رواية امقت اعرافهم لكنها حيتني الفصل العاشر 10 - بقلم نور الشمس

رحت للطبيب واني فكره تجيبني وفكره توديني اريد اعرف شنهي  الموضوع بس لا شك الطبيب بمحله
دخلت الدكتور اشرلي اگعد مقابيله

..دكتور اسمعك شنهي الموضوع وشبيها المرييضه

..أنت شنو تقربلها ووين ولي أمرها

..اني ابن عمها ولي امرها موجود جدها لأن والدها متوفي وماعدها احد غيرنه

..يعني هسه هيه بمسؤلية منوو منو يتكفلها

..دكتور اني المسؤل عنها بس گلي انت شاك بشي

..الحقيقه اتي چنت شاك وهسه تيقنت المريضه چانت مدمنه عدها ادمان على نوع من الحبوب المهدئه الي متنطي الا براجيته وصعب الحصول عليها تعتبر نوع من انواع تعاطي المخدرات
اخذنه عينات من دمها وعرفنه الأدمان صار فتره تاخذه بحيث جسمها متشبع منه
بس هالمره ماخذه جرعه زياده سوينه العلينه والباقي يم الله مابيدنه شي ان شاء الله تتحسن
بس معقوله انتو معرفتو بيها شي مابيين على تصرفاتها يعني الأدمان شغله مو سهله اذا صحت يرادلها علاج ويراد ينقطع عنها بصوره تدريجيه واكيد يرادلك تاخذها الطبيب خاص ينطيكم الطرق الي تتعاملون بيها وياها لأن راح تسوء خالتها وتقريبا تفقد السيطره على نفسها

..الطبيب يشرحلي واني مصدوم كل هذا يطلع منها زين معقوله هذي تربية عمي انه هاي تاليتي بت عمي مدمنه يمكن بتاريخ المحافظه كلها الي اني بيها مسامع يوم اكو حالة ادمان ربي سترك منين اجتني هاي الطرگاعه
تناقشت وي الطبيب وحبيت الموضوع يضل بيني وبينه ومااريد احد يعرف بالصار
رحت اراقبها وهيه على السرير
والأجهزه داير مدايرها ياربي معقوله گايم مااعرف البشر انه دوم نظرتي للأنسان تكون صحيحه واني من شفتها توقعتها مضلومه وبريئه
وانسانه طاهره وصادقه
اتذكرت ملامحها عيونها وطولها لون شعرها الي شفته من اجيت شلتها واخذتها للطبيب
صح المضاهر خداعه
هيه منين تطلع يعني ومنو الي ربتها ومن ياساس هيه

تذكرت حياتي قبل بوجود والدي طفولتي الي احس بيها چنت صدگ عايش ومرتاح بعدها ماحسيت بطعم الراحه رغم اهلي مامقصرين ومدلليني
تذكرت چنت بعمر ال٥سنين وبدت المشاكل بين امي وابوي وبدت تتحجج على ابوي بأي شي حته تزعل
چنت اشوف والدي يحبها وممقصر وياها بشي
چانت اكثر وحده مدلله بنسوان عمومتي البيت كله يعرف بمشاكلهم وصارت حياتنه جحيم يوميه مشكله  چانت امي عدها صديقه تجي البيتنه وتتردد عليها تشوفها من نفس المنطقه وبنت ناس معروفين كلهم بالدوله بذاك الوكت
كل ماتجي وتطلع تزيد المشاكل وتكثر
بيوم من الأيام امي طلبت من ابوي يطلگها وابوي شك بالموضوع وحب يطقس ويعرف كلشي
چنت بذاك العمر مو واعي بس بعدين فهمت كلشي
ابوي شاك اكو شي وطلع شكه بمحله امي عاشگه اخو صديقتها وهوه رايدها ومقنعها تطلگ حته يتزوجها چان هوه يتواصل وياها عن طريق اخته الي هيه صديقة امي
بذاك الوكت والدي عارف كلشي ومعاند ميطلگ
وباقين سنتين على هالحال لاهيه شالت ذاك من راسها ولا العاشگها استحه وگال حرمه متزوجه رغم ابوي هجرها بس بقت هيه معلگه

وره سنتين ونص تقريبا چان شته والجوو بارد نزلت سيارات مدنيه وبيها مجموعه كسرو الباب واخذو ابوي من بيناتنه
امي بيومها بالليل عافتني وراحت الخوالي چنها تعرف ودارسه الخطه عدل الكل چان مستبعدها ومحد يعرف البينها وبين ابوي وليعرفون هاجرها
الا بعد فتره
ابوي الي هوه جدي وعمامي يدورون على ابوي بكل السجون بس ماله اثر بيوم ضهريه وچان الوكت طالع  والجو توه دفيان چنت العب بالباب واجو اثنين لابسين زي معيين ورادو  يحاچون جدي لو واحد من عمامي
صحتلهم جدي وطلعت العب بالباب قريب الهم
اسمعتهم طلبوو من جدي يستلم جثة والدي ويدفع فلوس الطلقات الي انعدم بيهن
چنت افتهم وذكي من صغري ماكو شي يفوتني بس هنا اريد استوعب الصار ماعرفت
راحو وعافو جدي بحيرته دخل جوه وبچه بصوت عالي التمن عماتي وبيبيتي چانت بحيلها طلب منهن يسون كلشي بسكته حته البچي انحرمنه منه
شعور صعب والتهمه مانعرفها شنهي
بيوم الي استلمو جثته چان منطي ورقه للحارس الي يشرف على اعدامه ورايد يوصلها الأبوي واعماني والحارس وصلها بيوم الي راحو يستلمون جثته
مضمون الورقه

بعد السلام اعلم ياابي اني قد فارقت هذه الدنيا وانت تقرأ ماخطت يدي
فارقتها وانا محكوم بالأعدام دون ذنب كان ذنبي هوه الحفاظ على زوجتي واسرتي بين طيات كتاب حياتي سوف تجد الأسطر التي تبيين لكم من هوه غريمي ومافعلت انا وماهم فعلوو

وصيتي لك ولأخوتي اوصيكم خير بعلي
ياابي كل مارأيته امامك كأنك تراني
عامله كما عاملتني واحسن تربيته وابعده عن رأس الأفعى

چانت الورقه كلها اسرار وماعرفو مضمونها بس عني عمي خالد گال حسين مايكتب هيچ هوه راد يوصل رساله
وصدگ دورو مكتبته ولگوو كتاب من ضمن العنوات البي كلمة حياتي
دوروو الكتاب چان بداخله دفتر مذكرات وچان ابوي كاتب كلشي
هذا الشي عرفته بعد ماكبرت جدي فهمني علي وهوه ضام بيده الدفتر من كبرت نطانياه بسبب موقف معيين

امي ماوصلت النه بعد وره فتره عرفنه هيه متزوجه القاضي ماهر الي هوه اخوو ام علياء  عرفنه هيه السبب بالي صار وعن طريقها اخوها راد امي وهيه الساعدت باعدام ابوي

جدي بذاك الوكت ماسوه شي وبقت علته بگلبه چانو اهل ماهر واصلين بالدوله كلهم ضباط امن وقضاة
چان يگلي جدي لاتخاف ثار ابوك مااعوفه البدوي اخذ ثاره وره اربعين سنه وگال استعجلت

صحيت من صفنتي على صوت علياء تون
وگفت يم راسها

..خيرچ بيچ شي اصيح الطبيب
اشرت بعيونها وچانت تتألم
نسيت حقدي وخفت عليها رحت للطبيب اجه شافها گال اكيد تكون تعبانه غسل المعده مو شي بسيط وهيه هم راسها يوجعها وجسمها نحلان من الأدويه
مراح انطيها منوم خليها تصحا شةيه افضل الها

وگفت يمها وحاچيتها
..منو يستاهل السويتي بروحچ وليش مافكرتي بأخرتچ ليش
..موبيدي والله ماچنت ادري هيچ يصير

..ارتاحي هسه مو وكتعا بعدين نسولف

طلعت منها وخابرت الأهل طمنتهم
وضلت ذكرياتي اطاردني مرن عليه سنين عمري كلها شجابهن گدامي بنات عمي وليش جروحي كل مااريد اشلهن ينفتحن
ليش كل مااريد انسه يصير موقف يذكرني بكلشي مو حلو بعمري واولهن امي وامهن
اخ احس روحي معلعله ومالها طبيب تعبت وحسيت نفسي يرادلي علاج بس علاجي مجايبه وياي
ردت اتصل بأحد يجيبه بس الوقت متأخر
اني عندي ازمة ربوو حاده يعني من تتأزم حالتي انتهي وهاي الحاله تجيني من حالتي النفسيه اذا توترت واذا چان الجوو تراب ومرات من ادخن هم تصير
ماخابرت وگلت اني بالمستشفى اذا صار شي العلاج يمي
بقيت اراقب حالتها وثاني يوم قررولنه الخروج ولازم اخذها الطبيب يشوف نسبة التخدير بدمها وشنو تأثيرها وكيفية العلاج
بيومها مو نايم للصبح وصلت للبيت وهمه استقبلوها فهمت امي مااريد احد يفتح وياها موضوع انتحارها ابد اني رايح ارتاح
رحت انام وگوه تخلصت من افكاري ونمت صار العصر اخذتها ورحت للطبيب جان وجهه اصفر وذبلانه ساعات احقد عليها وساعات تكسر خاطري
بس كل همي هسه اعرف شلون صار عدها ادمان وهسه الطبيب يعرف هيه مدمنه بارادتها لو چانت مريضه وهذا علاج الها

يتبع ..

حبايبي اني ممنونه منكم ومن متابعتكم وصح تأخرت عليكم بس والله ضروفي تجبرني
طبعا هالبارت يسموه تصبيره علما باجر اكمل باقي الأحداث البارت بدون مراجعه عذروني ع التقصير