رواية امقت اعرافهم لكنها حيتني الفصل الثامن 8 - بقلم نور الشمس

ثالث يوم امنت ماكو شي صاير لأن علاء على تواصل وي اهله وبلغوو ماكو شي ومحد وصلهم واني هم اتصلت على امي گالت احنه ابيت خالچ بمنطقة البياع ميگدرون يوصلون النه ميندلونه
طلعنه من الفندق وتوجهنه البيت عيالي چنت متخوفه عروس وأول دخلتي مرتبكه وخجلانه احس نفسي غريبه بغير عالم واكو شي قالقني مااعرف احس نفسي مو مرتاحه
كل شويه اقره أيات تهديني وصلنه البداية الشارع انريد ندخل اتصل اخو علاء
رد علي گله اني قريب عليكم وصلت
..علاء ارجع لتوصل بيتنه هسه دير بالك
..لك شكوو شصاير
..عمام زوجتك اجوو وگلبو الدنيا شارعنه هسه كله سيارات وبأسلحتهم وممهتمين لا الدوله ولا الشرطه يگولون منتحرك اذا مو بتنه ويانه
..شلون يعني ميتحركون وين اروح اني هسه
..مااعرف اي مكان علما انشوفلنه حل

..علاء شكوو شنو صاير خوفتني
..مااعرف بس الظاهر عمامج ميردونها تعدي على خير وهسه همه ابيت اهلي وبسياراتهم واسلحتهم ومو هامهم احد

..يعني شنوو شراح يسوون

. مااعرف
..علاء لتخليهم ياخذوني عفيه لتتركني نروح الأي مكان
..ممتوقعهم هيچ ماكو ناس تفكر بهالتفكير الهسه شلون يعني وين اروح بيج واحنه كلشي ممحضرين
خل نروح الأهلج بين مااتصل بأهلي ونحضر نفسنه ونطلع للشمال فتره بين متحلها الكبار

.الله كريم..

الخوف سيطر عليه وفكري تعب زين اتصل بأمي تنطينه عنوان بيت خالوو لو اروح البيتنه صار فتره تاركي اكيد ابالهم تركنه البيت گلت العلاء نروح البيت اهلي افضل اكيد عرفو احنه تاركين البيت وهوه هم معارض اقتنع بكلامي
وصلنه البيتنه ودخلت جوه المشكله مفتاح البيت مو عندي منين اجيبه الباب بي من فوگ سنسله ومقفوله بقفل چبير سيارة علاء بيها عده راح جاب منها كم حاجه كسر القفل الخارجي دخلنه جوه
احس الرايح والجاي يتفرج علينه ومستغرب وضعنه هذي بدايتها شنو تردون منه ليش هيچ يتعاملون ويانه يقبلوها على بناتهم چنت افكر ودموعي بدت تنزل
المشكله من اول موقف حسيت الملل سيطر على علاء وحسيته متورط رغم مشاف دموعي مواساني ولا انطاني امان حته بنظراته مو بس بالكلام چنت اريد منه حچايه وحده يگلي اني وياچ ولتفكرين
دخلت جوه واني افكر معقوله استعجلت معقوله امي ورطتني معقوله علاء يتخله عني بس هوه گال مراح اتركچ اكيد ميتركني بس هوه ضايج وخايف على اهله حقه واصلا اني هم مشاف مني شي يمكن تأثر على نفسيته
چنت اشوفه متوتر

علاء أسمر طوله ١٧٠تقريبا ملامحه حلوه بس مابي شي مميز غير طلته وتنسيقه الملابسه وتسريحات شعره يعني يحب يهتم بمظهره الخارجي ويبيين كلش حلو ونازك ويهتم باللبس والماركات الساعات والأحذيه وحته السيارات يحب كل فتره يغير نوع

صفنت عليه واني افكر وره هذي الكشخه والمظهر اكو سند احتمي علي اگدر ائمن على حياتي ومستقبلي وياه راح يحميني
الجواب الي احبه انطي النفسي واحاول اقتنع بي اكيد كله رجوله وراح يحميني ويعوضني عن هذي الأيام الي الخوف مله قلبي بيها
اكيد مراح يتركني وراح يتحده العالم كله ويوگف بوجهم ويگلهم هذي زوجتي مو من حق اي واحد يطالب بيها ومو سلعه هيه وانتو بكيفكم تتصرفون بيها
طلعت من افكاري هذي كلها على صوته

..علياء
..گول حبيبي
..شنو الحل برأيج
..مااعرف الحل شنو كل الي اعرفه يگدرون يفرقونه صح موو
..اكيد ميگدرون احاول نطلع من باچر ولما تنحل المشكله بالتراضي يلله نرجع

..يعني مراح تتركني

..لا
وي جوابه وبعده ممكمل كلام حسينه بشخطة السيارات والأصوات احسها اخترقت اذني يمكن من خوفي حسيت بيها مو طبيعيه
وي وگفة السيارات صار اكو صوت رمي واصواتهم علت
..اطلع من البيت نعرف بيكم انتوو هنا
چنت اباوع العلاء شراح نسوي
بدون مااسئله شفت اليئس بعيونه
بقينه على وگفتنه اندفعت الباب شفت رافع ابن عمو اجه شافني ابچي بسرعه دار عيونه عني وجه كلامه العلاء

..اي ياعريس اكو واحد ياخذله مره بدون رضا اهلها وچماله احنه ناهين تجي انت ابو گذيله تكسر نهوتنه ماتعرف السويته يسمونه لعب بالنار واحنه النار وانت العبت بينه تتحمل اليجرالك لو لا خل انشوف

شفت علاء مجاوبه ابد والخوف بان عليه
ترجيته اني رافع فدوه اروحلك لتسوله شي والله مو ذنبه امي هيه الگالت عمامها ماالهم حق مو هوه

..لتخافين بنت العم مانسويله شي اهله متانينه بالباب
دار علي بصوت عالي صاح يلله گوووم اتحرك گبل لا اغير رأيي
شفت علاء گام يريد يطلع صحت عليه
..علاء وين  واني وين عايفني
..علياء روحي وياهم هسه اوعدچ مراح اتركچ راح اسوي الأصول واجي اطلبچ منهم من جديد

..لا عفيه لتتركني علاء علاء. صحت بصوت مخنوگ
رافع گلي علياء لتخافين ماعدنه شي وياج بس لازم هيج نسوي مو سهله يتركونه واحنه ناهين بالجذب چان دز اهله عمامه يقنوعنه يطلبونج رسمي كل الصار بسبب امج اني رايدج تتصلين بيها تضغطين عليها حته اعرف افياء وين لتروح تجبرها

..أنت متخاف الله ابيش طالبني شنو تردون منه بسببكم ابويه فقدناه من يوم الي شفناكم وعرفناكم مشفنه الخير اختي غبيه وثوله اشافت بواحد همجي مثلك وحبته

..حاشمچ الخاطر اسم عمي والا چان اعرفت اتصرف وياچ رجلج لازم يتحشم ويمشي يلله ترجعين وياه هاي اعرافنه احنه مو طراطير ولا بس حچي من نهينه وحذرناهم وتركوو تحذيراتنه شعبالهم راح نسكت هسه بسرعه فضيني عنوان افياء حصلي الي لا اغيير رأيي واخذج انتي وحبيب الگلب سوه تره تركته لعيونچ والله چي شفت الخوف بيهن عرفتچ خايفه علي والله هوه المفروض يتحاسب غير حساب

..تعرف شي اكرهكم واكره عاداتكم وتقالي
كم ولو تموت متفرقني من رجلي فهمت

..تكرهينه هذا شي يخصچ المحبه مو اجباري كرهينه متأثرين علينه شي ولا راح نأثر عليچ بس رجلج احنه مرايدين نفرقكم گرصة اذن اله والأهله مو اكثر چان بيدنه نسوي الأكثر بس هذا هم مايرضينه الجبرنه نسوي هيج امج وين راحت هيه واختج جاوبي

..مااعرف كل الأعرفه همه ابيت واحد من خوالي

..والله والنعم من خوالچ شلون نحبهم احنه وماخذه بتنه يمهم وين صايرين

..مااعرف

..اتصلي بيها بسرعه

اتصلت بأمي ومابينت شي خفت من نظرات عيونه احسه مستقتل حته يعرف مكان افياء
اخذت من امي العنوان بحجة نروح يمهم لأن عمامي ميندلوهم
بسرعه اخذني بيده وطلع اشوف الشارع كله سيارات وشباب مسلحين زين معقوله ماكو سيطرات
اخذني طاير بسيارته وصلنه العنوان نزل هوه بيده افياء بس چانت فرحانه متعرف بيه اني موجوده صعدت بالسياره انتبهت الي واتفاجئت
ضلت عيونه ع الجام نشوف امي تركض منا ومنا واحنه على ركضها شبعنه بچي حسينه بحيرتها حاولت تحمينه منهم بس مگدرت واحنه هم مساعدناها عله صوت بچينه وطلعت السيارات بينه خارج بغداد حسيت بأحساس الأسيره الذليله
تلطريق كله رافع يسئل افياء خو مسوتلج شي خو معقدتي بيت خالج منو بي چامت متحاچي بس بالأشاره
عرفنه مصيرنه صار بأيدهم واحنه انتهينه كل حريه ماالنه يمكن موقف افياء افضل مني هيه غير هيه حبيبها سوه كل هذا علمودها واني شنو اني سبيه حالي حال باقي السبايا بس ضحية الأعراف
وصلنه المغرب
تقريبا نزلنه للبيت الي اجيناه قبل بس اجينه ويانه ماما وبابا اجينه فرحانين حته نتعرف على اهلنه هسه لا كلشي يختلف
اني حقدت ع الكل احس اكره حته هواهم ودي مااشمه ولا اتنفس منه
استقبلتنه عمتي واحنه عيونه حمر من البچي الولد نزلونه وطلعوو مادخلو اصلا وعمتي ضلت تسأل واحنه مالنه خلگ نجاوب
گتلها اريد ارتاح بس رادتنه ندخل يم بيبي وجدوو نشوفهم بس اني حته همه كارهتهم كارها كلشي يربطني بيهم حته بابا كرهته بذاك اليوم
احساسي صعب صعب اترجمه

دخلنه جوه ودخلت عمتي تهدي علينه ومبينه مقهوره
گالت اني الهم كيفهم يتصرفون خل يجي علي واني اعرفه شلون يتصرف وياهم
سوده عليه عمه انتي عروس والبچي مايصلح لاتخافين يجي الشيخ وكلشي يتعدل هوه مايقبل عليهم لاتزعلن بس الغلط بأمجن شلون تتصرف من راسها وتوصيلهم وتگلهم كسرت حچيكم وخشومكم والي ردته سويته ياعمه شبابنه دمهم حار شلون هيچ تعيرهم
چنت مو مركزه بالي تگوله بس سمعته وابجي مجاوبت شي وافياء چنها فرحانه بالسواه الها رافع
طتلهم اريد انام
انام وبس
غطتني عمتي واني جسمي ينفض احس الرجفه والخوفه هسه طلعت بيه وحسيت بيها

نمت مااعرف شگد بس گعدت على اصوات عاليه وعرك بداخل البيت
بداخلي فرحت اي ياربي بعد وبعد هذي حوبتي واني عروس دائما اسمع يگلون المظلوم اله حوبه وهمه ظلموني
فتحت الباب اريد اعرف شكوو اسمع حچيهم صوت چان واضح بخشونه يتكلم والكل يسمع اله ومن يسكت يبدون اكثر من واحد يتحچون ويرجع يصيح بيهم
اريد اعرف منو هذا وشنو الخلاهم هيج يتعاركون
تقدمت اكثر حبيت اسمع

..ولك انت شنهي صاير چبير اهلك وتتصرف من كيفك ماحشمت جدي ماحشمت عمك ابوك ولا حشمتني احترامكم وينه ولك ومحمد سوايتك ماينسكت عليها ولو واحد غير رصاصه تحطها بركبك واسگطك ياسگط
ولك تاخذ عروس من زلمتها ولك اغبر بنت عمك شلون هيچ تعاملها ياهو السوه سوايتك عم الك ابوو
ولك انه افتر ابختي وبخت اهلي واحل طلايب العالم وانه بدي افك نسوان من النهوه تجي انت تعيد سوالف النحچي عليهم واطبقهن ومو بس هاي تريد تورط ولد العالم ماخذهم همه واسلحتهم تكتلوو بالدرب صار عليهم شي اخذتهم الحكومه ياهو الهم وشتگل الأهلم ولك رافع انت غلطت وماخذتلك شور لا مني ولا من عمك وابوك اخوانك وينهم وين چانو عنك

..شيخ اني السويته مجبور علي انه رايد بت عمي وهيه رايدتني وامها جبرتهه تتزوج غيري وهيه بنيه ورفضت وسوت الخاطري المو كل وحده تسوي شلوت انه اتخله عنها ماالي غير هذا الحل

..واختها شنهي عذرك من جبتها

..اختها صوج امها ورجلها لو يعرفون الأصول چان محد تعرضلهم ابوي نهه وهمه كسروو نهوته وودتلنه حچايه وعار وتتحدانه ردت اشوفها الأمهات شتجيب وشلون تعرفنه السنين السكتنه بيها عن حقنه مو خوف سكتنه لأن محترمينك انت صاحب الحق بثارك وانت الي تقرره

..سالفة الثار مالك دخل بيها الي صار صار وصلو خبر الأهل الولد يجون يمشون حسب الأصول وياخذون مرتهم
ويراد اجمعكم ونسولف واخلي حد الكم والي والكل فرد بالعشيره ماكو هيچ كل واحد يتصرف من كيفه غبتلي فتره قليله ولو ماامي مخابرتني ماادري بالصار العتب مو عليكم العتب على اخوتي الكبار وليد واحمد المفروض همه يتصرفون بدل عني لو يبلغوني
وعمامي هم الهم ايد بيها اعرفهم اني

اسمع حچيهم وارتاح بالي اكو من يفكر بينه بعدني واگفه واجت عمتي گالت لاتخافين عمه علي وصل ومارضه عليهم انتي ترجعين بس ارتاحي

شويه ارتاح بالي ونمت واني مرتاحه ع اساس اليوم علاء يجيني فدوه العمره شگد اشتاقيتله ماچنه يوم
يارب يحفظه الي

صار الضهر واجن البنات چنت مرتاحه وحچيت وياهن وضحكنه يعني جاملتهن افياء چنت ضايجه منها مهتمتلي چانت فرحانه بنفسها مگالت اختي شنو ذنبها

تغدو وكملوو وبالديوان نسمع علت الأصوات وصارت هوسه
عمتي والبنات كلهن يصيحن شكوو شكوو

اجو الولد ومافهمت منهم شي يتوشوشون وي عمتي وعينهم عليه

وره ساعه تقريبا رحت للغرفه
توني تمددت واندگت الباب حيل وي ماعدلت نفسي دخل علي اتذكر شكله ممتغير بي شي

..متگليلي هذا السگط وين لگيتي وصرتيله مره
زلم بغداد كلها عفتيها ومااخذتي غير هالحرمه يصير رجال عليچ

يتبع ..

اذا انشر باركولي لأن مليت وانكس واهسي من النشر بسبب الوات باد
وانطوني رأيكم وتوقعاتكم هم
والاخطاء عبروهه بدون مراجعه 😂

اليوم احاول اعوضكم بس اذا جهالي نامو وربنا يهديهم اذا لا على باچر الفلاونزه دمرتهم ودمرتني بعيد الشر عنكم وعن اطفالكم