رواية امقت اعرافهم لكنها حيتني الفصل التاسع 9 - بقلم نور الشمس

اتفاجئت بكلامه وردة فعله واضح عليه مقهور بس مستوعبت الي گاله جاوبته ابرود

..ليش تحچي عليه قابل انتو احسن منه ع الأقل هوه انسان متفهم مو تفكيره رجعي مثلكم انتوو  شنو تردون مني مكافي الشفناه منكم انت شرايد بالضبط وثارك الي مااعرف على شنوو ناوي تاخذه مني

..احس عيوني صارت نار من حچت هيچ بس اكو شي بداخلي خلاني اسمعها جاوبتها ابرود

ابد مو احسن منه هوه احسن مثقف واحنه تفكيرنه رجعي ذولي التفكيرهم رجعي والماعجبيچ واني منهم لو اني مكان رجلچ التحفه چان خليتهم يرموني وماانطيچ ع الأقل اگلهم اني وياها اخذوني سوه مستحيل الرجعي على گولتچ يعوفچ ويشرد بعمره
ع العموم اني اتخبل من سالفة النهوه وخاصتا التزوج بعد هذا هو يسموها طلعت والكل هنا يعرفني اني لو ادخلت بهيج قضايا اتدخل الحلها مو اكثر الي صار وياچ بدون علمي ومارضيت علي رغم الغلط مو منه الغلط بألوالده الله يحفظها ههه ضحكت بأستهزاء بعدهي نفس ماهيه متجوز من عمايلها فاتلها هواي عبالها هذي هم تفوت الها بس مو كل مره تسلم الجره

..چنت ابجي من كلامه صدگ حسيت بضعف وشماته شلون يتركني وحدي چنت احس بالخذلان واگول من ارجع الا اعاتبه وازعل شلون يتركني بهيچ موقف وامي شنو علاقتها كل شويه وجابو سيرتها عبالك بينهم شي متأكده اكو شي بس شنو مااعرف

جاوبته واني اشهگ

..معليك بأمي انت ليش تكرهه هيه شنو سوتلك واني شنو ذنبي وجاي اتحاسب بدل منها

اتنهد بقوه تأثر بكلامي وحسيته ضاج

..البيني وبين امچ مو كره وبس لو ع الكره اگول تهون تره اذا نكره واذا انحب واجب علينه نتعايش بسلام اليكره والي يحب مشاعره يخفيها بداخله مينطيني الحق ائذيج وأذي امچ لأن اكرهه وبس ..مع هذا اني ابد ممأذيچ بالعكس اني ضايج عليچ واحاول اساعدچ ومراح اتركچ بس انتي استوعبي الغلط بأختيارچ مو بينه
چان اختاريتي شخص علي الأعتماد شلون تعيشين عمر كامل وي شخص باعچ بيوم

..ليش تحچي عليه اني مااقبل هوه زوجي وقبل ميكون زوجي كان حبيبي ومتأكده مراح يتركني هسه اتصل عليه وابلغه انو انت واگف وياي وتريد ترجعني اله موو انت مو گلت ارجعج .. چنت احچي ونظرات عيني تتوسله
رفع حاجبه الي بأستهزاء وجاوبني بنبره حاده

..حبيبچ ؟ واضح الحب يمكن انتي متعرفين الحب واني هم مااعرفه لأن ممجربه بس شايف هواي يحبون مستعدين ينطون ارواحهم بس حته يسعدون الحبيب مااعرف انه حبكم يختلف لو احنه نحب بخبال
وگفت اريد اطلع .مع الأسف بنت عمي انتي متوهمه  خابري وافتهمي منه اني ماحرگ گلبي الا البرود الي هوه بي زلمتچ حاجيته بنفسي واتخله عنچ بدون اي مبرر مجرد اهله ماعاجبهم تصرف ولد عمومتچ حسب كلامهم وگايلين هالنسب مانريده
همه هم مثلچ يفكرون هم حقهم يگولون شجابنه ع الرجعيه هههه اهل الگذل ماعاجبيهم
واني الصراحه هيچ نسب هم مااريده ولا اريد نصير خوال ولدهم الي يقبل عرضه يروح من بين ايده وهوه مايسوي شي هذا حرام ينحسب على الزلم

..يعني شنوو هوه شگلك

..گلي بتكم عدكم واعتبرها طالق من باچر اروح للمحكمه واخلي محامي وينهي كلشي هذا الي چان حبيبچ وصار رجلچ موو هذا الي تتباهين بحبه گدامي

..بذيچ الساعه تهسترت چانت صدمة عمري الي محاسبتلها حساب ابد.. گتله لتكذب عليه انت واحد كذاب الله ليوفقك الله لاينطيك الله ينتقم منكم كلكم اكرهكم ان شاء الله اشوف بيكم يوم واتشمت بيكم خلي ابالك لو صار عليك شي اني اول الشامتين بيوم جنازتك يوم عرسي شايف شنوو يعني فرحتي لكم بيش طالبيني انتو شنو تردون مني
چنت مخليه عيني بعينه وهوه ابد مااتحرك ولا هزه كلامي بس حچايه وحده گلي انه مااچذب والله هوه اعرف بالحال اذا يرضي دعائج الله يتقبل ويريحچ
چان يريد يطلع فتح الباب وشاف كلهم واگفين يردون يفهمون شكوو الظاهر صوتي چان عالي

گلهم عوفوها ترتاح لحد يضوجها بكلمه خلوها على راحتها

دخلت افياء وبضوجتي هجمت عليها الله ينتقم منچ انتي اخت انتي كله منچ الصار وياي ولچ عروس ليش هيچ ليش المثلي بعدهي بشهر العسل واحلى ايامها دمرتوني انتي وحبيبج عساكم ماشفتو الراحه
يارب ينهجم هالبيت على روس البي يارب اشوف بيكم يوم
حاچتني وهيه تبچي والله اني ضايجه لچ مااعرف كل هذا يصير والله مو قصدي الي صار كله من امي مافكرت بينه فكرت بنفسهه وبس

..لچ افياء گليلي شأسوي لچ معقوله يتركني ليش اني شنو ذنبي وين وعده الي انو هوه ميتركني ليش هيچ يسوي بيه شنو ذنب اطلگ بهذا العمر واول ايام زواجي اني شنو سويت

..حبيبتي اذا صح وسواها انتي الله يحبچ وبينلچ حقيقته علاء طلع مو كفوء اختيارج مو بمحله خلي يولي الميريدچ لتريدي

..مو بهالسهوله لج احس نار بيه احس روحي انتهيت اني شسويت وهيچ يصير بيه مصايره هذي حته بالمسلسلات والأفلام لچ ماكو هيچ ناس تعاملني وكأنو اني سبيه ورجلي الي اعتمدت عليه باعني برخص لچ وامچ تركتنه وهاي صار يومين بالچذب موصلت النه ليش

..الله كريم حبيبتي الله كريم
شفت اختي منهاره حاولت اهديها بقينه نسولف وهيه بحضني ضليت العب بشعرها الحد ماحسيتها نامت چانت تشهگ من البچي
طلعت لگيت البيت اجوائه متوتره عمتي رغم مضايجه علينه كلش بس چانت ضايجه من كلام علياء وي علي وشلون اتحسبت عليه
عمتي نقطة ضعفها علي رغم هيه ممخلفه بس تلث بنات ورجلها استشهد بس علي هيه الي ربته رافع حچالي عنهم وعن علاقتهم
رحتلها
..عمه ضايجه وكلشي يطلع منها لتخافين تره گلبها طييب مو من گلبها دعت عليه

..عاذرتها عمه وگلبي محترك عليها بس خفت من دعائها عمه علي شاف اشكال ظيم وگلبه مشيب من صغره مو ناقص هالدعاوي واعرفه يضوج اكيد هسه ضايج عليها بس ياعمه الصار من امكم هيه السبب الله يصلحها كبرت وماكبر عقلها

بعدنه نحچي اني وعمتي اجه علي وچانت الجگاره بيده گل العمتي

..يمه شوفيها لاتخلنها وحدها لاتسوي شي بروحها
وخليها شماتحچي تحچي لحد يسكتها خلوها ترتاح

..بعد امك انت هم ارتاح وجگارتك يمه ذبها مو زينه عليك شگالك الطبيب يمه ليش تشلع گلبي

..ارتاحي يمه لايضل بالچ هوه عمر مكتوب من الله لاتزيده الجگاره ولاتنقصه لاتخافين اشرب علاجي وحده بس اريد اريح راسي بيها

..عمرك طويل بعد امك روح ارتاح

طلع علي واني ضل بالي يمهم شنو مريض شنو علاج شو ممبيين عليه شي چنه ورد
استحيت اسأل عمتي رجعنه يم علياء لگيناها نايمه
لس بطريقه فوضويه يمكن نعست ونامت من التعب محست على نفسها بس اني عفتها نايمه عدل مو هيچ شنو گعدت وراي تركتها وطلعت

بين ماگضيتلي شكم غرض ورجعت اعدل فراشها واخلي مخده جوه راسها شفت علبة حبوب فارغه يمها
ضليت احركها اضربها افتح عيونها ماكو ردة فعل
صحت بصوت
..علياء علياء لچ علياء شسويتي بنفسچ
طلعت اصيح الحگولي فدوه علياء مااعرف شبيها
لاگيت عمتي والولد كلهم يم علي
اجو كلهم التمو عليه يسألون وعلي وعمتي دخلو الغرفتها بسرعه اخذ علبة الدوه خلاها بأيده وصاح بسرعه جيبو ملابسي وانطوني السويچ اني اخذهم
شال علياء وطلع خلاها بسيارته
واني اصرخ وابچي حسيت فقدت اختي للأبد واني السبب اجه رافع گلي حضري نفسچ نطلع وراهم واجت ويانه ريمه زوجة خالد
دخلنه الطوارئ چانو مدخليها للطبيب وجاي يسةلها غسل معده
شفت علي گاعد من شافني وگف يهدي بيه لتخافين ماكو شي ان شاء الله وعمتي هم اجت تبچي حاول يسكتنه بس اخذني على جهه

..افياء هم تعرفين علياء تاخذ علاج او شي يعني هم مداومه على علاج معيين تشربه بشكل يومي

..لا ابد متاخذ شي ليش هيه مريضه لو شنوو

..مااعرف ياريت تطلع صدفه ياريت تطلع هالحبوب مو الها
..فدوه شنو الموضوع هيه منتحره موو زين الحبوب مال شنوو
..اي منتحره گلتها بعصبيه منتحره علمود واحد رخيص واحد مايسوه اضفرها شلون گدرت تسوي هيچ بروحها شلون تعصي ربها بهالعمل متخاف تخسر دنيتها واخرتها ولج اختچ شنهي ماعدها راي
زين هذي الحبوب منين جابتها

..بچيت مااعرف والله مااعرف مااتوقعتها تسوي هيچ

..بس لا الي ابالي صدگ

..شنو الي ابالك

..خل اتأكد وان شاءالله مو صحيح الي افكر بي والي حذرني منه الطبيب

ابتعد عني وصاح رافع واحسه عصبي ومتوتر ورافع هم شكله ابد مو طبيعي
الطبيب اتأخر وكل شويه طالعه ممرضه ماخذه عينة دم تسوي تحاليل ومينطون جواب

الطبيب طلع وگال تبقه تحت المراقبه بعد وضعها خطر
وطلب من علي يروح للعياده يفهم وضعها اكثر ويحچيله النتائج

رافع گال بعد ميصير نبقه اكثر هيه تبقه هنا وانتي ارجعي علي وعمتي وياها صعبه انخليج مراح تستفاظين شي الصبح تصحا ان شاءالله واجيبچ الها
حاولت ابقه بس رفض رجعت وياه واني اشوف كلامه صح شنو الفائده من وكفتي هنا واتي مشايفتها اصلا
رجعنه وياي ريم تصبر بيه
دخلت البيت لكيت اعمامي توهم دارين ولاحگين علي للمستشفى وبس البنات موجودات ونسوان عمامي هم نص الليل بس همه كلهم ملتمين ومن شافوني بچن وياي وصبرني اني اشوفهم ناس طيبين ليش علياء تكرهم مااعرف

البنات ضلو يمي الحد مانمت والولد كل شويه متصلين

علي..

اني علي عمري ٣٢سنه
تربيت ابيت جدي مدلل وكلشي مينقصني بس احس بفقد والدي چنت اشتاقله اتذكر شلون يحبني ومهتم بيه مگدرت انساه وعاش وياي بكل تفاصيل حياتي
امي صفحه ودي مو بس اطويها ودي احرگها من دفتر حياتي مااحب اي شي يذكرني بيها

عمتي صارتلي ام واحن والبنات اعتبرتهن خواتي عشت وانه ملازم جدي بكل مناسبه وگعده انه وياه
تعلمت كلشي منه من صار عمري ٢١سنه بدو يلحون عليه اتزوج رفضت الزواج ورفضت كلشي يخص بنات حوه الي چانت امي منهن ماحاقد ع النساء بس ماارغبهن ولا راغب زواج ابد عمامي يحترموني ويحبوني يعتبروني اخ الهم ومو اخ عادي اخ يحترموو ويحسبون حسابه
الا عم واحد عندي اتذكر المشكله الصارت والي غادرنه بسببها چانت تخص والدي وامي وتخص الي دمر حياتي
چنت حاقد علي ومااريد اعتبره عم الي الى ان اجونه بيوم من الأيام علمود جدي من عرفنه بي مرض مو زين والخاطر جدي وافقت يشوفه خاف ارفض واتندم ماعندي اغلى منه
اجو وراحو مارف گلبي عليهم ومن اجت مرته احس طابوگه على صدري خانگه النفس ومااكدر اتنفس
من راحو يلله ارتاحيت
بيوم من الأيام اجه عمي يشوف جدي وسبحان الله الله راد ياخذ امانته بحادث ع الطريق
جدي الي معتبري يريد يموت بقه عايش لحد الأن وعمي الي مابي شي راح بغمضة عين سبحان الله هوه احكم وابصر صارت عندي قناعه المرض مو دلاله ع الكوت لا يمكن امتحان للبشر وصبره بس الموت ميعرف مريض وصاحي ولا جبير وزغير

راحت فتره واجه اليوم الي اجيت بي وعرفت رافع شمسوي هوه وعمامي رغم مارضيت عليهم بس ماانطيت بيهم حاولت اهدي الأوضاع وترجع علياء الرجلها بس مع الأسف طلع واحد سگط ماينحيب ع الزلم

بيومها قلقت عليها وخفت اول مره اشوف وحده تهمني غير امي وخواتي ليش ضايج عليها وهيه ماخلت كلمه مو زينه مگالتها
وصيت امي واختها يخلن بالهن يمها لأن شفتها يائسه حسيت تسوي شي بنفسها وره شويه سمعت صوت صياح عرفت الي ابالي صح
اخذناها ورحنه الصدمه نوعية الحبوب المنتحره بيهن وشكوك الطبيب الي زيدت شكي وخلتني اضيع بأفكاري معقوله تستخدمه من زمان زين منين حصلت هيج نوعيه

يتبع ..