أنا الشموخ ومارضيت البهاذيل كسرت خشم الوقت من قو ذاتي الفصل السابع والعشرون 27 - بقلم متميز وموهبه فذه

يت على ازعاج سلطان وهو يصحيني....أنا نومي ثقيل....فتحت عيوني بضيق....وبس شافني فتحت عيوني....
تحولت تكشيرته الا فرحه كبيرة.....وقال بفرح:اووووووف ياحمارة تعبتيني....أنا أقول جازي... جوجو...
كلبه...حمارة....وبضيق....وضربتك وماصحيتي..وكشر بوجهه.....انتي مجنونه.....خبله...جماد ...جماد انتي.....
ضحكت على وجهه العابس بقوة....ناظرت الغرفه باستغراب.... وبعدها استوعبت بسرعه كل شيء صار......ناظرت
سلطان بألم....الله يأخذني....أكيد ارتبك ان المكان جديد....وأنا ساحبه على الدنيا.....قال بتوتر :جوجو حنا وين؟...
قلت بهدوء....وأنا مليون حسرة تطعن بصدري:حنا الحين ببيت جدي....
قال بدلع:جوجو....
قلت بحب وانا للحين منسدحه بالسرير...وهو جالس جنبي:عيونها.....
قال بدلع اكبر:أنا جوعان....ومسك بطنه وهو يبتسم....بطن سلطان تقول أنا جوعانه.....
شهقت شهقه مصطنعه...وأنا أفز..:يخسى الجوع والله.....وحضنت بطنه بقوة....وبست بطنه برقه....يابطن سلطان
اصبري شوي....الحين أجيب لك أكل يشبعك.....لاتزعجين سلطوني ترا بعدين ازعل عليك.....
ضحك سلطان بقوة....دايما أي شيء يوجعه يقولي كذا....وانا أكلمه وهو يفرح.....قطعنا صوته المستغرب:انهبلتي انتي
تكلمين بطنه.....
ناظرت وجه جدي المنصدم.....وضحكت بقوة....وسلطان يطالع جدي بعبط......قال جدي بابتسامه على ضحكي:عساه
دوم.....اهجدي يابوك....علامك انهبلتي.....
قلت وأنا أتنحنح...علشان اعدل صوتي اللي انبح بالمرة:وياك يايبه....وبمرح....سلطان هبل فيني....
ابتسم لي:والله مدري منو اللي مهبل بالثاني؟....وبهدوء....البسوا....وتعالوا نفطر جميع....ولف علي....ترا ولد عمك معنا
تغطي....
زفرت وانا أحس بضيق....أووووف أنا للحين مرعوبه من نظراته....أخذت شور سريع....ولسلطان...صلينا وسلطان كل
دقيقه يعصب ويسب....يخربط بالآيه...ويعيد الصلاة من أول وجديد....وأنا ماسكه نفسي غصب......كملت صلاتي
وانفجرت ضحك.....لبست لي روب بيت خفيف...ولبست عباتي....وتلثمت....ولبست سلطان دشداشته
البيضاء....وسرحت شعره الطويل لورا.....وحطيت له جل شوي....وغرقته بدهن العود الفاخر...اللي أموت فيه....
وطلعنا وحنا بكامل أناقتنا.....ووصلنا لغرفة الطعام....قلت لسلطان يتنحنح ويسلم بصوت عالي....وطبعا سلطاني نفذ
كالعاده....انا سلمت بهدوء....وبست راس جدي...وراس أم عزيز....وجلست سلطان جنب جدي....وأنا جنب
سلطان....وجنبي خلود....ناظرت ببنات عمي اللي مومبين منهن شيء.....الكل سما وبدأ يأكل....حسيت بنظرات ناديه
الناريه لي....ناظرتها وأنا رافعه حاجب...بنظرة خير....وبسرعه نزلت عيونها....وبس التفت طاحت عيوني بعيونه
البارده......ناظرته ببرود...ولفيت أناظر سلطان اللي يأكل بهدوء.....قال جدي بحنيه:علامك يبه ماتأكلين؟....
قلت بهدوء:سلامتك يايبه.....بس ما احب أفطر الصبح....
ثواني وجابت الخدامه....كوب قهوتي الساخن....وريحته منتشرة بالمكان كله.....قال جدي باستنكار:لاحول
ولاقوة...يابوك كولي لك اكل....بدال هالقهوة اللي كل ماشفتك.....وانتي ماسكتها.....وبحنيه....شوفي جسمك تقول
عصايه....
شرقت خلود بالشاهي وهي تضحك....والكل تبعها....حتى سلطان....قال سلطان بمرح:حتى جده تهاوشها وتسميها أم
عصاقيل...وأم كرعان...
هنا الكل انفجر ضحك...وعزيز كان يعلي صوت ضحكاته.....علشان يقهرني....وانا ولعت.....قلت بضيق:سلطان....
يبه....لاتضحكون علي.....وبدلال...ترا أزعل...وزعل جازي تراااه شين....
قال جدي بحنيه وهو يناظرني:تعلميني بزعلك....عساني مازعلك بيوم....
ابتسمت له...والكل بدأ يأكل وأنا أناظر بخار كوبي الكوفي حقي......ومتجاهله نظراته اللي وترتني كثير.....قطعني من
أفكاري صوت جوالي....ناظرت خالي يتصل فيني.....قمت وأنا أخذ كوب الكوفي وجوالي....ورديت
بفرح:ارحبوااااا.....

حقدت على اللي اتصل عليها....تذكرت نظرتها لناديه وبغيت انفجر ضحك.....سرحت بطيفها اللي راح....هالبنت وراها
لغز كبير....تذكرت الأوراق اللي قالي عليهن عمي ناصر.....وهن سبب المصايب كلها....همس لي جدي:عمك شفته؟....
ناظرته بضيق...وبجديه:لا والله ياجدي....ان شاء الله يداوم اليوم.....
وقمت وأنا أعدل غترتي....جت ناديه بتقومني بس أمرتها تجلس....طلعت وأنا اسمع صوت ضحكاتها العاليه....تسندت
على الباب....وأنا أسمعها وهي تقول بكل دلال:يابعد قلب قلب جوجو أنت....
وتعلقت عيونها بعيوني...وحسيت بارتباك لأول مرة أحس فيه....قلت بهمس:من تكلمين؟.....
ناظرتني ثواني...وبعدها ارفعت حاجب بتحدي وغرور....وبصوتها الأنثوي وللحين عينها بعيني:يابعد عمري
أنت....تدري شكلي بتهور خلاص.....ههههههههه.....
أنا انصدمت من عنادها....قلت بهمس مسوع وأنا ضاغط على أسناني:من تكلمين؟.....
وهي للحين بنفس نظراتها....كملت ببرود:أوكي قلبي....شوي وأكلمك....وبعناد...وانتبه على شغلك.....يالله مع السلامه
حبيبي....
قربت لها وأنا أبغى ألعن ساعتها......حاولت أجر الجوال منها....وهي حطته ورا ظهرها بعناد.....قربت منها
كثير.....وعيوني بعيونها الغضبانه....وأحس النار والعه بجوفي:عطيني الجوال لأكسر وجهك......
هزت راسها بلا وهي تناظرني بكل برود......قربت لها لدرجة ان ريحة عطرها الصارخ اقتحمتني.....لويت يدها
بقوة...وأنا أصر على أسناني:من تكلمين؟.....
ناظرتني بعيونها النجلا اللي تذبح.....ويدها على صدري.....تجمدت من عيونها الكبيرة....يالله كل ذي عيون....نظراتها
تذبح....نسيت كل شيء....وماحسيت الا بدفتها القويه....انصدمت بعد ماوعيت على حالي.....قالت بتهديد وهي رافعه
اصبعها بوجهي:آخر مرة تقرب مني....والا ورب البيت لأدفنك بأرضك....وباستهزاء....ومايحق لك ياولد
عمي....مايحق لك لا تسألني....ولا تقرب مني......وناظرتني بقوة وثقه....ومو أنا اللي أنسأل أكلم منو؟.....فاهم....ولو
ماكنت ببيتك عرفت شلون أرد عليك عدل......
وتعدتني وأنا متجمد....مو معقوله....شلوون دفتني بهالقوة؟.....وشلون بنظرة وحده من عيونها ودتني لعالم
ثاني....وسيطرت علي....مو معقول والله مو معقول.....انتبهت على تركي اللي يبقى يروح الشركه معاي....رحت مريته
وأنا ساكت....واذا تكلمت جاوبت باجوبه مختصرة على تركي......وصلت الشركه...ووصيت السكرتير أي فاكس لي أو
لعمي يجيني بسرعه....وعلى الساعه عشر دخل علي....ومعاه الفاكس....حسيت بارتجاف...وأنا ابغى أفتحه....حاولت
أتوقع شنو اللي مرتبط بمستقبلها....وخلاها تخرب الدنيا كلها....فتحته وانصدمت وأنا أشوف شهايدها وورقة ترك من
الجامعه....طلعت عيوني....معقوله عرفت....ومعقوله انها سوت كل هالسالفه علشان شهايد.....اتصلت على عمي
ومغلق.....وحسيت بالقلق عليه....ربي يعينك ياعم....وربي يعينك معاي...حطيت أوراقه بالخزنه.....ونظراتها للحين
يرتجف قلبي منها...هالبنت فيها بلا....تذكرت كلام جدي....وهو ينعاد براسي للمرة المليون......وطلعت من الشركه وأنا
ناوي ادور عمي ناصر.....اتصلت على رقمه اللي مايعرفه غيري.......وأنا ناوي أحل أي خلاف بينه وبين جدي
اليوم....

سوينا القهوة والحلا....بنتقهوى.....وننتظر الجازي راحت تنوم سلطان....تكلم جدي اللي طلبها....كنت أضحك على خلود
ونجد وخبالهن....سرحت بعيييد وأنا أفكر....بهاجسي هالأيام.....درست الوضوع من جميع نواحيه....أحاول ألقى ثغره
وحده ومانيب قادره....وعيت من أفكاري اللي تذبحني....على صوت خلود ونجد وهن يرحب بالجازي.....اجلست
بهدوء...ووجهها احمر....ناظرتها باستغراب....مدري ليه حسيت فيه شيء صار بينها وبين جدي؟....ضلوا مع بعض
تقريبا ساعه.....كنت أناظر عيونها الغامضه.....قالت خلود بهبال:بروح أتصل على دانوه وريموه....نستانس دام الوحش
مو هنا.....
وراحت وثواني ولحقتها نجد كالعاده.....قربت لها ومسكت يدها...وبحنيه:جوجو فيك شيء؟....
ناظرتني نظرة غريبه....وبعدها ابتسمت ابتسامه تهبل....ولمتني بقوة اصدمتني......وهمست لي:تصدقين أني أموت
فيك.....
ابتسمت بخجل....لأول مرة بحياتي أحد يلمني كذا.....ويقولي هالكلام....شوي وجونا ريم ودانه...دانه بالبيجامه وشوشتها
واصله للسما....ونرعت عباتها....وتلحفت فيها...وقالت بغباء:سولفوا وأنا بنام....بس لاتحشون فيني تراني أسمع.....
ونطوا عليها خلود ونجد....لما قمت غصب عنها......وهي تسب وتشتم...لا وقالوا لها روحي خوذي شور....واصعدت
لغرفتهم وهي تتحلطم....وحنا نضحك عليها....ثواني ودخل جدي وانصدم ان ريم هنا...سلمت عليه بخجل....وقالها تعالي
معاي.....
شفت نظرة جازي اللي احتدت.....وعرفت انها تعرف....حسيت بالموضوع زواج....ثواني ونزلت ناديه....وهي تناظر
الجازي....والجازي سافهتها....وتتقهوى ببرود....وناديه تقزها من فوق لتحت.....طلعت ريم اللي عيوونها
تلمع....والابتسامه مزينه فمها.....ابتسمت بأسى....ربي يرزقك كل خير تستاهلين.....بس ياترا منو؟.....وهي كل شوي
تناظر الجازي تبغى تقولها شكلها.....والجازي سرحانه...بعدها انزلوا البنات.....دانه لابسه بيجامة خلود....كشرت بس
شافة وجه ناديه....سلمت عليها ببرود.....وقعدت تسولف سوالفها المجنونه مثلها.....وخلود ونجد معاها....وريم ابتسامتها
مافارقتها....والجازي السرحان مآخذها لبعيد.....ونظرة الغموض بعيونها حيرتني كثير....وش ناويه يابنت عمي؟...

كنت أحس اني بكسر شيء....مستحيل اللي بيصير لي.....ليه؟....والله حرام....ناظرت نظرات ناديه الناريه....كأنك
عارفه باللي بيصير....أبغى أطلع من هالبيت والا بنفجر....مستحيل والله مستحيل.....فتحت جوالي....طرشت مسج
سريع.....وأنا أشوف ضحكهم وماني عارفه وش يقولون؟....ناظرت نظرات دانه لناديه....ونزلت راسي.... مستحيل...
يارب....مستحيل...كنت حاسه بنظرات ريم لي....قمت وأنا أتحجج بسلطان...وسحبت ريم معاي...لغرفتي....وبس دخلنا
حضنتني بقوة....وصاحت:جازي وربي أحبه....وربي أموت فيه.......
ناظرتها بفرح وأنا أحس جزء من همي طاح....أهم شيء تبغاه عادي.....ابتسمت بسعاده وأنا أحضنها أكثر:ربي يهديه
لك....ويثبت حبك بقلبه....ويرزقكم ان شاء الله....
ناظرتني بصدمه:انتي تدرين.....
هزيت راسي بأسى:ايه.....
قالت باستغراب:من قالك.؟....
قلت بابتسامه:أبوي بدر.....
تناست كل شيء....وبفرح وهي تجرني وتجلسني على الكنب:تتوقعين يحبني مثل ما أحبه......وبفرح....توني أعرف
شعورك مع طلال.....
ناظرتها بصدمه....وأنا أحس سكين يقطع قلبي.....قلت ببرود:ومن قالك اني أحب طلال؟.....
شهقت بصدمه....وأنا هربت منها وأنا اندس بخفه بجنب سلطان....قربت مني وهي تمسح على راسي....وأنا دفنت نفسي
بحضن سلطان......ودموعي سالت.....قال بهمس خافت علشان ماتزعج سلطان:جوجو حرام لاتقولين هالكلام....والله
طلال لو يسمعك يموت.....
بلعت شهقاتي....وقلت بصوت بارد:ريم اطلعي برا....وقفلي على الموضوع....وطلال ربي يرزقه باللي أحسن منه...
قالت بضيق:بس...
صرخت بحده:ريــــــــــم....
بسرعه طلعت من الغرفه....وأنا انهرت بحضن سلطان....والله أحبه....والله....ليه هالدنيا ناويه تغدر فيني مرة
ثانيه؟....ليه؟....والله حرام.....مسحت عيوني بتصميم....والله لأسوي اللي مايتسوى.....تذكرت شكله....ووحسيت
بقرف....بسرعه...ناظرت ملامح سلطان....وتذكرت ناصر....وحسيت قلبي يوجعني.....كله منه....كله منه....حتى
دراستي حرمني منه....أكيد هذي أفكاره.......

طلعت من غرفة الجازي وأنا أحس بضيق....الجازي بخرت كل فرحتي....طلعت للبنات اللي انصدموا من وجهي....قلت
لهم جازي نايمه....وأنا بروح انام مصدعه....رحت لغرفتي مباشره....ورميت نفسي على السرير....وأنا طلال كاسر
خاطري....والله حرام....عقب كل هذاك الحب؟.....كذا تقول الله يرزقه باللي أحسن مني.....شهقت بصدمه...معقوله
عمرها ماحبته....وهو اللي معشم روحه....وأنا وأنوار كذبنا الكذبه وصدقناها....تذكرت صدها له...نظراتها الغاضبه له
دايما.....كنا دايما نعزز السبب ان طلال رومانسي كثير.....وجازي الرومانسيه بصوب وهي بصوب.....تذكرت نظراته
من يشوفها....ابتسامته....حتى نبرة صوته من يشوفها تتغير....أنا وانوار دايما نحسدها على حب طلال اللي مو طبيعي
لها....ياما طلبت منه أنوار أشياء....وتقول جازي تبغاها....وهو مايصدق....تذكرت جياته اللي دايما....وعيونه على
السلم....يتمنى بس تطلع....وهي من تدري انه موجود....تحبس نفسها فوق....مسكت راسي بألم....وربي بيذبح نفسه.....
تذكرت مشعل.....وكلام جدي لي....وابتسمت بحب....وأنا أنسى الجازي وطلال.....تذكرت عيونه وارتجاف قلبي....من
طاحت عيوني بعيونه ببيت خالي....وهو مافارق بالي دقيقه....كنت دايما أحلم فيه....أرتبك وأنا أشوفه....كنت أحس قلبي
يضرب من نجلس بمجلس واحد....كانت عيووني تروح له مباشره.....تذكرت كلام جدي....ان مشعل هو اللي
اختارني....تذكرت خجلي الكبير من جدي....ودفنت وجهي بالمخده....وأنا أتذكر ضحك جدي علي بعد ماعطيته
موافقتي....ابتسمت بحب...وأنا العب بخصل شعري القصيرة....الله يقدرني واسعدك....عمري ماراح أصدك
يامشعل....عمري كله.....وجلست أحلم بمشعل...وحياتنا....وأحلم ببيت صغير....وعيال يجمعون بيني وبينه......

قامت الزفت ناديوه مابقت....ناظرت البنات بخبث.....وقلت بلعانه:بنات ماتحسون صاير شيء؟...
قالت نجد بعبطها المعتاد:يعني شنو صاير ياكونان؟....
حذفت عليها المارس اللي كان بيدي.....وهي صرخت.....وخلود أخذته بسرعه...وفتحته وأكلته وقالت:أشوا حذفتيه....كان بنفسي....واستحيت أقولك....
صرخت شذى بقرف:ياقذرة...ابلعي بعدين تكلمي.....
فتحت فمها بوجه شذى.....وفجأة:طرااااااااااااااااااااااااااخ.....
شهقنا كلنا....وشذى بعصبيه:قسم بالله اعملي الحركه ذي مرة ثانيه....وربي مايصير لك طيب.....
ناظرت وجه خلود....وانفجرت ضحك أنا ونجد....كانت مصدومه....وفاتحه فمها...والكاكاو سايل....باختصار فيس غبي
وعبيط....ناظرتنا بقهر....وهجمت علينا....وهي تبوس فينا....وحنا صارخ.....نجد بقرف/:ياوصخه كان بفمك.....
أنا أضحك شوي....وأصارخ شوي....وقطعنا صوته الحااااااااااد:وين قاعدات ان شاء الله؟.....
كلنا تجمدنا....وعيونا عليه....وهو معصب....أنا من الخوف...مدري شاللي وداني ورا الكنبه؟......صاررخ
بعصبيه:وبعدين يعني....حركات البزران منتوا مخلينها......ناظر بخلود بقرف...وأنتي بزر على هالسوالف
يالخبله.....روحي غسلي فمك...ألله يلوع كبدك.....
خلود ماصدقت خبر....راحت تركض....ولف على نجد:وأنتي يعني العاقلة فيهن يالبقرة؟......عدوك....
قالت بخوف:مو أنا....ه..م....
صرخ بعصبيه:انثبري....
شهقت بخوف.....كمل بحده:أنا طالع وقسم بالله...أسمع لكم صوت طالع من البيت....والله لأدفنكم بأرضكم....ووصلي
للبقرتيين اللي معاك.....
وتوجه لجناح جدي.....بس حسيته بعد....قمت لبست عباتي بسرعه...ونجد تعتذر مني....وتوجهت لبيتنا....وبس دخلت
غرفتي صحت بقوة....ياربي ليه كل موقف محرج يشوفني هو؟.....والله حرام....ابتسمت وانا أتذكر طلته الحلوة.....يالبيه
ياناس....وربي حرام بناديه....قمت وشفت وجهي والكاكاو على خدودي وخشمي....وانفجرت ضحك من بين دموعي....
الله يلوم اللي يلومك ياعزيز...والله يأخذك ياخلودوه....قسم بالله لأطلع حرتي من بين عيونك....أجل أنا بقرة ياعزيز.....
أخذت شور أبقى الكاكاو اللي بشعري وبوجهي يروح.....وأنا أضحك على شكل خلود لما ضربتها شذى...
ههههههه....تستاهل الكلبه....ولها عندي واحد...بس أشوفها......

ابتسمت بعد ماطمني عزيز عن عمه....وأنه العصر بيجي....وحله لموضوع مشعل الخبل...اللي الحين معند الا يملك
هاليومين....انهبل الخبل....ماسألت عن الطريقه اللي أقنعه فيها....لأني ماهتم الا ان اللي أبغاه يصير وبس.....وعزيز هو
الوحيد اللي أثق فيه....ناظرته بفخر...اللي يخلف يخلف شرواك ياولد الغالي.....ابتسمت وأنا ملاحظ تغيره هالأيام...مابك
ياعزيز الا بلا بلا واحد....عساها تتوبك منه.....طلع عزيز....وأنا ارتكيت على سريري براحه....وأنا أمسح لحيتي بيد
مرتجفه....يارب ألهمني الصواب....يارب ساعدني....وجنبني الخطا....كل اللي بأسويه علشان عيالي....تذكرت
الجوهرة....ووحسيت بالحزن يقتحم ذاتي.....ياليتك يالغاليه موجوده....عمري ماخذت برأي أحد غيرك....لازم أظمن
مستقبل أحفادي....وأريحهم وأريح ناصر.....وسامحيني يالغاليه اني زعلته....أدري انه أغلاهم عندك....بس اللي سواه
كبير...كبير....صدمتي منه كبيرة....ابتسمت بحب....لو شفتي الجازي.....والله أني من شفتها....حسيت قلبي يطير
لها....أحس يقووتك مغروسه فيها.....أحسها تذكرني فيك.....حتى أكثر من شذى اللي تشبهك كثير.....تنهدت من حال
شذى....يارب انك ترزقها بالرجل الصالح اللي يصونها....ابتسمت....بزوج ريم لمشعل.....بس الخبل عند....بس عزيز
عقله....ابتسمت من طاري عزيز...لو تدرين بعزيز وش صاير فيه....غادي عاشق وملتاع مثلي......ابتسمت وانا أتذكر
تعلقها الكبير بعزيز.....ابتسمت وأنا أتذكر اصراري عليها....عشقت من وأنا بزر....وهي كانت مره...كنت أشوف فيها
شيء غير عن النسوان....وبس كبرت...وتغطت عني...انهبلت....كنت ألاحقها من مكان لمكان....قلت لأبوي يخطبها لي
وانصدم....وأمي انهبلت....وقالت ماتخذها لو على موتي....أختار أي بنت وأنا بنفسي أخطبها....الا هي...أنا عندت قلت
ياهي يامابغى.....وتمر السنين وتجر السنين....وأنا وفي لها....كل البنات يبغون يلفتون نظري....بس نظري خصها
هي....اعرسوا أخواني اللي أصغر مني....وأنا معند...لما يأسوا أهلي مني....خطبوها....الكل قال فترة وبيمل....أخذتها و
غصب عن الكل أخذتها....كنت فرحان كثير.....ومن أول شهر ملكت قلبي أكثر من قبل....ومع قلبي....قلب أمي وأبوي
وأخواني....كانت راجحه عقل....وطيبه وصاحبة حيله....كنت أشاورها بكل شيء....وهي كانت خير من
استشير....حملت بحمد وأنا الفرحه طيرتني فوق السحاب.....وبعدها بالباقين.....وأنا كل يوم يزيد حبي لها...لما توفت
ربي يرحمها ان شاء الله...ومامر يوم نمت وأنا زعلان منها أو متضايق....كنت أحس انها محتويتني.....احتوت مشاكلي
وطبعي الناري....بطيبة قلبها...ورجاحة عقلها....اللي ماشفت مثلها الا ببنت ناصر.....لكذا ماراح تطلع لغريب...بتروح
لأغلى أحفادي.....لأنها أغلى حفيداتي.......