#حنين_حاتم_الفتﻻوي
#انقذني_ايها_الغريب....
غير محلل نشر القصة بدون ذكر اسمي
نداريت ووية مانداريت اصابيع نطبعن علة وجهي رأسن غمضت عيوني
حرامية بواكة بت السكير ليش تمدين ايدج
عمة والله بعد مااخذ هاجياهة ماريدهة
هدور اكسر ايدج اذا مديتيهة علة اي شي بلبيت
راحت جابت قفل لثﻻجة وقفلتهة
كعدت بلزوية حطيت ايدي علة عيوني وابجي اني مابوك والله بس ﻻن جوعانة وجنت متعودة من جنة بس اني وعمو يكلي شوكت متجوعين اكلي اي شي يعجبج من لثﻻجة
ضليت ابجي لحد ماصار اليل ونمت
صبو عشة وجابتلي سكينة صمونة وماعون زغير بي طماطة كلي كتلهة مااشتهي وماتعشيت لفيت روحي بلبطانية وتمددت بلكاع علزولية ﻻن مانطوني دوشك بس بطانية ومخدة
واني نايمة حسيت شي مشة علة جسمي فتحت عيني رأسن وكمزت من الفراش باوعت جريذي طفر وطب جوة لكاونتر ضليت للصبح كاعدة علمخدة وﻻفة روحي بلبطانية اخاف اتمدد ورفعت روحي بلمخدة حتة اصير عالية صار لفجر واني ابجي وارجف عمري ماخفت بكد لخوف الي حسيتة بيومهة
رجلية يرجفن وسنوني وادية شابكة روحي بيهن حتة ادفة
طلع لضوة وكشف الوكت شوية طمئنيت
لهناك اجة عمو دايغسل ويتوضة
ها ليلى صباح لخير
مارديت علي زعﻻنة من عدة يشوف مرتة شلون تعاملني ومايحاجيهة
اجة كعد بصفي وجرني لحضنة
عمو ليلو اني مابيدي شي عليج والله
شرطت علية مااتدخل بيناتكم وهية تريد ترجع تربيج من جديد حضرتهة ﻻن تكول تربيتج موحلوة
والله ياعمو بس اتدخل تاخذ لجهال وتروح لبيت ابوهة وتضلين لوحدج بلبيت ونضل اني وياج ﻻاحد يطبخلنة وﻻاحد يغسل هدومنة تحملي لخاطري حبيبتي
واني يومية من اجي بليل اجيبلج اكل خاف تجوعين ضمي يمج بس موتحجين كدام سكينة ووليد ترة يكلون ﻻمهم وبعد شيخلصنة من لسانهة
خوش عمو
وين ضحكتج اريد اشوفهة
☺
عفية بليلو
باسني وراح
مر شهر علة تواجدي ببيت عمو ومعاملة فاطمة مرت عمي الي يوم عن يوم تسوء يومية اغسل مواعين لعدة ولعشة وانضف لبيت ومرات حتة لمﻻبس تخليني اغسلهن واذا شافت ماعون مامغسول عدل تركعة براسي واذا نكسر ماعون هاي الي الله كاتبهة علية
انضرب ضرب ماصاير اي شي كدامهة تضربني بي ماشفت رحمة بكلبهة ابد ووليد شد حرابتة وياي كلما يفوت من يمي يضربني ويجر شعري لو يشكك كتبي ويشخبط عليهن
وسكينة هم علموهة تأذيني عمو نقلني وياهة بنفس المدرسة وصرنة بنفس لصف
هية ازغر مني بس مسجليهة وياي
تحجي علية بلمدرسة كدام لبنات وتكللهن ابوهة يشرب وموخوش انسان وخلت لصف كوولة يكرهني ومحد يحجي وياي
عندي قلم واحد بس وبي مساحة من جوة واذا ضاع اضل مااكتب دروسي ومرت عمو ماترضة تنطيني قلم وﻻتخلي عمي يجيبلي تكلي دوري وتلكينة
كمت شديتة بخيط ولبستة مثل الكﻻدة بركبتي حتة ﻻيضيع مني
يومية اراقب سكينة ومرت عمو من تقريهة واحفض لدروس ومن نرجع سكينة تكل ﻻمهة علية حافضة وصفكولي تجي تسأل بية تكولي شلون تحفضين وحدج
لحمد لله صرت شاطرة ونجحت من لرابع لللخامس وطلعت اﻻولى بس سكينة طلعت كمال بدرسين ووليد رسب بصف ﻻول متوسط وراح يعيد لسنة
فاطمة لزمت جهالهة موتتهم كتل
واني كاعدة بلمطبخ فرحانة اجت لعطلة ﻻن عمو كلي بلعطلة اذا نجحتي اخليج تباوعين تلفزيون ويانة كل جمعة
همة صايرين كبالي وامهم تضرب بيهم بلصوندة
جان وليد يكل ﻻمة
ماما شوفيهة شلون تضحك علينة متشمتة بينة
اجت علية جرتني من شعري
عمة والله مااضحك عليهم
صربتني حييل علة وجهي بلصوندة نشكت شفتي وكامت تجري دم
تذكرت ماما من شفت لدم يمهة كمت ابجي
عبالي راح اموت مثلهة
اجتني جرتني من شعري
حسج مااسمعة خوووش
سكتت وضليت اشهك
مرت فترة طوويلة علة تواجدي وياهم ومرت عمو كلما جالهة تسوء معاملتهة الية وحتة جهالهة كامو يمدون ايدهم علية ويضربوني عمو قبل جان يحجي ويدافعلي صح مايسوي شي بس مايسكت
بس هسة كام عادي يدنك راسة لويسوي روحة مايدري من انضرب كدامة لو انهان
داومت صف خامس ولحمد لله درجاتي كولة بل90 ومرت عمو تتخبل من تشوفني انجح وجهالهة يرسبون ولو تدري بية احفض من عدهة جان موتتني كتل
ويوم عن يوم تذب شغل علية اكثر بلبيت
كامت حتة طبخ تعلمني
مواعين لغدة ولعشة علية مﻻبسهم كولهم
حتة اذا ماكو شغلة تطلعلهة شغل من جوة لكاع وتكلي كومي سوي
تسوي هيج حتة ميبقة عدي وقت ادرس بي
بس اني كمت اموت علة دراستي اريد اكبر واتعين واشتري بيت واعيش بي وحدي واخلص منهم
كمت ابقة ل3 بليل مرات اقرة ومانام اذا مااقرة كول دروسي وكمت اعرف اقرة وحدي واحل واجباتي واحفض صرت اشطر وحدة بلصف
نجحت لصف لسادس ومتميزة
وليد طلع كمال رغم هوة عايد لسنة وسكينة هم كمال ب3 دروس وكلعادة نكتلو واني هم نكتلت وياهم
ﻻن مرت عمو تكول اكتلج وياهم حتة ﻻتضحكين عليهم
داومت صف سادس ودرجاتي هم عالية
وسكينة ووليد عمو حطلهم مدرسين لكل لمواد
نجحت من لسادس بمعدل 96 ومديرتي كلتلي قدمي علة مدرسة المتميزات ورحت كلت لعمو واخذني قدمت وسوولي اختبار ونجحت بﻻختبار رغم جان صعب كولش داومت بلمدرسة وفرحانة حييل لمدرسة تخبل مو مثل بقية لمدارس بنايتهة عبالك قصر وبيهة سبالت بكل لصفوف وزينة يختلف عن بقية لمدارس نلبس صدرية لون جوزي وقميص لون بيجي بس مرت عمي ماقبلت اخيط مﻻبس كلتلي
تداومين بمﻻت العام
بس عمة لصدرية لونهة نيلي وهمة مايرضون الة جوزي مالي شغل مشكلتج هاي ماضل اني يومية مخيطتلج جرود
داومت بيهن سبوع ويومية اترزل بعدين لمديرة ودت علة عمو وكلتلة رجع نطة فلوس لعمتي وكللهة خيطيلهة كلتلة متخيط وخل تبطل اني احتاجهة بلبيت تساعدني
فاطمة خطية لبنية شاطرة ليش نبطلهة
واني شنو ذنبي اكرب ليل ونهار وبعدين هية بنية اول وتالي تكعد بلبيت ماطول تعلمت تقرة وتكتب هاذهو خل تبطل شلهة بلمدرسة
ﻻعمة فدوة اني موجاي اساعدج بشغل لبيت ﻻتبطليني
عمة لعماج بيمن مساعدتني اشو 24 ساعة راسج بلكتب ولي من كدامي دوام ماكو يلله كومي للمطبح
رحت للمطبخ ابجي فرفحت ماريد ابطل اريد اكمل دراستي واشتري بيت اكعد بي واخلص منهة
ضليت يومين ابجي ومااكل كلت بلكي تنقهر علية وتخليني ارجع بس ابد مارف كلبهة وفرحانة كلش ﻻن بطلتني
اني ليلى عمري 18 سنة شكرة وعيوني خضر طولي بصراحة ماعرفة شكد وﻻحتة وزني بس اني ضعيفة بس عمري ماحسيت روحي حلوة بكد مامرت عمي تعييب علية وتمدح ببتهة رغم بتهة سمرة وموحلوة اني ليلى يتيمة اﻻم
واﻻب هههه ياريت لو ميت
اقلها جان محد عيرني بي
محد كلي بت لسكير ومحد حجة علة تربيتي
عمو صارت لشغلة عادية عدة وتقبلني كخدامة وحتة نسة انو اني بت اخو ولفضل يرجع لزوجتة
اني ليلى لحد هاي الحضة اكل بقبق الكدر ومن اكل مرت عمو تكلي دوري وجهج علحايط لتعاينين علية
اني ليلى عشت بهاذ لبيت خدامة للكل من اكبر نفر ﻻزغر نفر بلعائلة مجردة من كل حقوقي كبشر
ﻻلبس ﻻلكمة بيهة خير ﻻطلعة ﻻطبة
كل جمعة يطلعون لصبح يرجعون بليل يرحون لكرايبهم يرحون للكاضم يرحون متنزهات
واني هه
اني لخدامة الي ابقة بلبيت ارتب وانضف واجهز ﻻكل وانتضرهم يجون حتة اصبلهم
اني ليلى اي اني
.....يتبع
#حنين_حاتم_الفتﻻوي
حبايب موتنسون لتصويت فديتكم
لقصة بعدهة ببدايتهة بعد بيهة احداث كوولش حلوة
احبكم 😘
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!