#حنين حاتم الفتﻻوي
#انقذني ايها الغريب
(غير محلل نشر القصة بدون ذكر اسمي )
وصلت للمدرسة ﻻصطفاف بادي رحت من وراهم اتختل وطبيت للصف نزعت جنطتي وكعدت بس مﻻبسي مثلجات كلش بردت وضليت ارجف
ورة شوية بدو لبنات يطبون ﻻصطفاف خلص
اجت لمعلمة وكالت طلعو كتبكم دورت كتابي بلجنطة ماهوة اجت تفتش علكتب
وين كتابج ليلى
ماادري
لعد منو يدري
جرتني من ايدي تريد تضربني
هاي شنو مﻻبسج ليش هيج ناكعات
غسلتهن بليل بس مايبسن والله
ولنشافة وين راحت ليش ماجففتيهن
ماعدنة
كعدي
كعدت بس لبنات ضلن يضحكن علية ﻻن كتلهة ماعدنة نشافة
لمعلمة تشرح علصبورة كمت اشوفهة ثنين وجسمي كلة يرجف تلمست وجهي حار كلش
نجفيت علة صديقتي اريد اسيطر علة روحي مااكدر
صديقتي صاحت علمعلمة كلتلهة ليلى وكعت
اجتني شالتني اسمعهة تحجي بس اني موبوعيي دايخة وماكدر افتح عيوني
ودتني لﻻدارة اسمعهة تكل لوحدة اذا هية مﻻبسهة ناكعات شلون ماتتمرض
خابرو علة اهلهة
شسمهة هية
ليلى رعد
طلعي فايل لمعلومات مالتهة واتصلي علة اهلهة
حسيت ايد باردة تتلمس وجهي
نفس ايد ماما لصبح لمن تتلمس وجهي وتكعدني حتة اتريك
فتحت عيني لمديرة خالة راسي بحضنهة
ها ماما كعدتي امج ماشافت مﻻبسج من طلعتي
امي ميتة ست
حبيبتي شوكت ماتت
قبل شكم يوم
وانتي وين هسة باقية
يم بابا
اجت لمعلمة كلتلهلة دكيت علة اهلهة ومحد يرد
لعد شلون هسة حرارتهة كولش مرتفعة
دزيهة بيد لحارس خل يوديهة
طلعت لمديرة ودتني للحارس كلتلة وديهة ﻻهلهة مريضة
تعاي عمو موذاك ليوم وديتج لبيت عمج اني
اي
يلله خل اوديج لبيت عمج وهمة يودوج ﻻهلج
وداني لبيت عمو دكينة لباب دكينة محد طلع
هسة شلون
بيتنة مناك روح واني اروح اندلة
ﻻشلون خاف توكعين امشي اني اوديج
مشينة وصلنة لبيتنة لكيت زلم كوومة ووياهم كرابة وديفلشون ببيتنة لحارس عافني وراح
باوعت بين لزلم شفت عم امي علي اجيت علي كتلة
عمو ليش فلشو بيتنة
بابا هاذة موبيتكم بيتي واني جنت مكعدكم بي لخاطر جدج وامج هسة راحت واني لبيت اريد ابني محﻻت بمكانة اجيت علة ابوج 3 مرات مالكيتة
امشي وياي خل اوديج لبيت خالتج
وداني يم بيت خالتي بسيارتة
طببتني خالة صبتلي غدة ونطتني من مريم مﻻبس ونطتني دوة ونمت
فزيت لضهر علة صياح فتحت عيني خالتي ورجلهة يتعاركون
سمير الله يخليك خليهة يمنة نربيهة وية مريم
زهرة اني مالي خلك المشاكل وابوهة سكير وراعي مشاكل مالي خلكة يجي يتهدد هنا ويفضحني كدام لجوارين
فدوة سمير هية هاي الي بقتلي من ريحة ميعاد
وخري زهرة وخري
اجة علية
كومي عمو وياي خل اوديج لبيت عمج
اخذني وخالتي ضلت تبجي وتتوسل بي
وصلنة لبيت عمو طلعتلنة مرتة
هاي بتكم خوية
ابوهة وين لعد
ابوهة ماكو وصاحب لبيت اخذ بيتة ورجلج مايرضة لبنية تبقة يمنة هاي امانتكم واني رايح
طببتني كعدتني بلمطبخ
ضليت كاعدة بلكاع علزولية اجت بتهة يمي ازغر مي
شسمج انتي
ليلى وانتي
سكينة
راحت جابت مﻻعيب واجت يمي نطتني لعابة تخبل شعرهة اصغر وعيونهة لونهن ازرك وﻻبسة بدلة تخبل ضليت افر بيهة وبدلتهة تفتر
حسيت واحد جرني من شعري حييل
نداريت نفس لولد الي كلي ﻻتاكلين ويانة ﻻن لعبت روحة مني من جنت اكل بيدي بلفاتحة باوع علة اختة هم جرهة من شعرهة
انتي شتسوين هنا
سكتت اخاف من عدة
ماما ماما
ها وليد شبيك
هاي لوصخة شتسوي يمنة
هسة يجي ابوهة لشفية وتولي ويا
ماما خل تبقة يمنة تلعب وياي
سدي حلكج سكينة
نطيتهة لعابتهة ورحت كعدت يم لحايط اني مووصخة هستوني سابحة ومﻻبسي نضيفات ليش هيج يكولون علية
اجة عمو راحو ركضت علي سكينة شالهة ونطاهة نستلة شافني كاعدة صاحني
هاليلى شلونج
زينة
منو جابج هنا
بيتنة فلشو وعمو علي راح يبني محﻻت بمكانة ورجل خالتي زهرة جابني
لزم مبايلة خابر علة بابا مارد علي
نطاني نستلة وكلي يلله روحو لعبو انتي وسكينة
اجت مرتة نطتة مي وكلتلتة
شوكت توديهة
دكيت علة ابوهة ميرد هسة هية شمسويتلج قابل
مامسويتلي شي بس ماريد بت هاذ لسكير تختلط بجهالي
فاطمة شنو هاذ لحجي هية طفلة شعليهة بأبوهة
ضلو يتصايحون سكينة كلتلي امشي نروح بغرفتي
رحنة اني وياهة واسمع صوت عمو ومرتة يتصايحون
كعدنة نلعب بعدين سمعت صوت بابا
طلعت ركض رحت يمة
هسة وين راح تكعد
اني اريد اسافر
شنو
اكو وحدة اعرفهة عدهة فلوس وكلتلي نتزوج ونطلع للخارج اني وياهة
بسﻻ هاي لص.....طة الي لكيتهة يمك ذاك ليوم
خليل ﻻتغلط عليهة رجائا
اكل خرة ولك شواربك ذني ادوسهن بلقندرة اذا تتزوج هاي لكاولية
اتزوجهة وغصبا عليك
وهاي لمسكينة بتك وين تروح
خليهة يمكم اني ماريدهة واذا متردوهة اوديهة لدار ﻻيتام اذبهة بلباب واخلص من مسؤليتهة
عمو ضرب بابا وطردة برة
وكعد يحجي علي وعلة تربية جدو
اجت مرتة كعدت يمة تحجي ويا
ليش مانطيتهيا يوديهة دار ﻻيتام يذبهة بلشارع احنة شعلينة مامسؤلين بيهة
فاطمة سدي حلكج ﻻهسة ابتلي بيج وحق محمد
لو اني لو هاي بت لسكير بلبيت
فاطمة خلي عقلج براسج وﻻتسوين هيج
اذا متوديهة هسة اخذ جهالي واروح لهلي
ماوديهة فاطمة هاي دمي لحمي مالهة احد ابوهة كلب وامهة راحت لدار حقهة وين تروح لطفلة
ماشي خليل خليهة تنفعك
راحت لمت مﻻبسهة ومﻻبس جهالهة واخذتهم وطلعت
عمو حجة وياهة حاول يقنعهة ماكو
كعد عكرويت وخال ادي علة راسة
اجيت علي كتلة عمو وديني لدار ﻻيتام عادي انتة مرتك خطية وجهالك هم
باسني من راسي وكلي راح اطلع واسد لباب عليج من برة موتعلكين نار وﻻتلزمين كهرباء كعدي لعبي بلمﻻعيب واني ماتأخر دقايق اروح للمولدة وارجع
ماشي عمو
شغلي لتلفزيون وخﻻ علة كارتون وسد لباب علية وراح
نص ساعة ورجع ماحسيت بلوقت ﻻن اباوع كارتون اندمج وانسة روحي
طب شايل اكل ويا بعﻻليك كلي جيبي صينية وماعونين وتعاي جبتهن نطيتهن الة طلع من لعﻻكة كباب ومقبﻻت وطماطة شوي ريحة ﻻكل تخبل ماماكلة كباب بحياتي كلهة غير مرة وحدة ببيت خالتي
ضليت اكل هوااي وبسرعة عمو يباوع علية ويضحك ستحيت من عدة تدنيت
ليش وخرتي عمو هاذة كلة الج اكلي بلعافية
ضحكت ورجعت اكل
كملنة وشالة فرشلي فراش وكلي نامي باجر وراج دوام ردت اكلة عدي دروس ماقاريتهن بس ستحيت
مددت بفراشي بس مانمت مشتاقة انام بحضن امي جانت دائما تنومني بحضنهة ومن اخاف بليل اجلب بثوبهة وانام
بقيت 3 ايام اني وعمو لوحدنة يومية يوديني للمدرسة ويرجعني يسد علية لباب ويروح للمولدة بس خلة يمي تلفون كل سا يدك علية يكلي خوما بيج شي خوما خايفة اني مرات اخاف بس مااكلة اضل اباوع تلفزيون واكل حلوياة وعيني علباب لحد مايجي عمو مااتحرك من مكاني اخاف ومن يفتح لباب افرح كلش بجيتة وبدي احضنة بس استحي من عدة
رابع يوم كاعدة اباوع تلفزيون وشفت لباب بيهة حركة فرحت حييل هاذ عمو اجة نفتحت لباب دخل عمو وجهالة ومرتة
طبو بدون ﻻسﻻم وﻻكﻻم طبو لغرفهم بدلو واجو
اجت علية مرت عمو جرتني من مﻻبسي وكلتلي
كومي طبي للمطبخ هنا تنامين وتاكلين وتدرسين ماشوفج تطلعين برة عتبة لمطبخ
تذكرت لمطبخ شكد بارد دمعن عيوني باوعت علة عمو
كلي حبيبتي سمعي كﻻم عمتج انتي منا ورايح راح تعيشين ويانة وكﻻم عمتج تسمعي وتنفذي
انشاء الله عمو
رحت اخذت جنطتي وكعدت بلمطبخ
اجت سكينة شمرت علية بطانية ومخدة وراحت
لفيت روحي بلبطانية وكعدت
كل يومية اترزل بلمدرسة ومرات انضرب ﻻن ماعرف اقرة لوحدي ماما جانت هية تقريني
باوعت علة سكينة كبالي بلصالة كاعدة بصف لصوبة وامهة يمهة تقريهة قرائة نتبهت علصورة نفس درسنة
كمت انتبه علة حجيهة واعيد وراهة هية تحجي بصوت عالي وسكينة تعيد وراهة ضليت اعيد وراهة لحد ماحفضت لدرس وقريتة لوحدي بلقرائة فرحت كلش يعني باجر ماراح انبسط
داومت ثاني يوم وقريت لدرس صح وصفكولي رجعت فرحانة بس عمو مااجة علية رجعت لوحدي تانيتة هوااي لحد ماتعبت ورجعت وحدي
طبيت للبيت لكيت عمو وجهالة ومرتة يتغدون
نقهرت كلش اني متانيتة وهوة كاعد يتغدة لو كايلي مااجيج حتة ماضل اتاني
طبيت بدلت وطلعت اجيت كعدت يمهم جان مرت عمو عاطت علية
كووومي منا اني شكتلج
فاطمة شجاج وية لطفلة خرعتيهة
خليل اني شكتلك شتفقت وياك موكتلك هاي بت لسكير ماتكعد ويانة علة صينية وﻻتتقرب من جهالي
كمت ابجي رأسن وكمت كعدت بلمطبخ
اجت سكينة جابتلي اكل محطوط بقبق الكدر
تمن وفوكا مركة بانية
نقهرت حييل عدهم كوومة مواعين بلمطبخ بس ادري بيهة تعمدت تحطلي بلقبق حطتة يمي وراحت اني كمت حطيتة علكاونتر ومااكلت
اجت مرت عمي حطت لمواعين علة لسنك
هذني لمواعين تشوفيهن كلهن تغسليهن دقايق وارجع الكة لمطبخ يلمع
انشاء الله عمة
اجيت علماعين بديت اغسل بيهن
كملتهن وحطيت كلشي بمكانة بس مانضفن زين اول مرة اغسل مواعين
اجت مرت عمو تفحصت المواعين واحد واحد رجعت خلتهن كلهن بلسنك وكلتلي
ترجعين تجلفيهن من جديد هاذ لوصخ متشوفي انتي عمية بس ماعتب عليج هية امج جايفة عليمن تطلعين انتي
جلفتهن وهية واكفة فوك راسي كملتهن ورجعتهن بمكانهن
طبو همة لغرفهم ينامون
ضليت بلمطبخ لمكان بارد كلش لفيت روحي بلبطانية بس هم بردانة ﻻن بي شباك جبير ويطبب هوة
جعت كولش
كمت علة كيفي فتحت لثﻻجة لكيت اكل اشكال والوان طلعت تفاحة وسديت لباب
جاي اندار جان 😖.....يتبع
#حنين حاتم الفتﻻوي
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!