#أنسام_اللهيب
بقلـمي أنا زينب خالـد
صوتـو حبيباتي وعلقو بين الفقرات وتابعـو حسابي على الواتباد 🫂.
𖦆 𖦆 𖦆 𖦆 𖦆 𖦆 𖦆 𖦆 𖦆 𖦆
أنهار ::- اسوء شي اكره بحياتي من شخص يستغفلني أو يفكـر يضحك ويجذب
عليـــة دائماً أحسه يجي شعور أنو إني غبيـة وسخيفة وبسرعة ينضحك عليـــة
ضحكت بصوت عالـي النظرات صارت كلـها عليــة بدون وعـي من بحالة عصبية صرت
أدفع بيـهن وطلعت برة أباوع بالوجوه كلها زلم صدري يصعـد وينزل
محد منتبهلي ونسوان تصيح التفت قيس شافني باوع لشكلي خزرنـي تقدم
بأتجاهي دفعني ليجوة كال وهوه گاز على سنونـة
: شبيج تخبلتيييي
دنگ عينه واستغفر عاط
: فوتي بوية لبسي شي وفوتي كعدي يم
رجلـج
أنهار : لتكولللل رجلج جيبووو الشيخ
رجعووو هسه يفصخخ النااااااا
رفع عيونة مستغرب يباوعلي خزرني سحبتني نوران من أيدي حيل
نوران : روحي مناك روحي احجييي وياه
بدل الصياح أنهار
بلعت ريگ أباوع النسوان كامن يحجن وحده بيهن تباوعلي بحقد وتضحك كأنو منتصرة
تقدمت بهدوء نوران لازمة أيدي قوي شاده عليها دخلتني عليـــة
جان كاعــد يلاعـب بنتـه من دخلت وسديت الباب رفـع رأسة خطف نظرة ورجـع دنك
يلعب وياها
اندارت عليـــة باوعت وصفگت بأيدها
: هاييي خالـة الجديدة مو بابي ؟؟
ضحكت مستهزائة
أنهار : لازم الخالات هـواي مو حبيبتي
تقدمت عليه وكاالت
: لاااا أنـتِ اول خالة
رفع عيونة يباوعلي رافع حاجبة
السبـع : ها بسلا بديتي تحبيني وكمتي تغارين
أنهار : ليش سويت هيـج ؟
عگـد حواجبة
- شسويت ؟
أنهار : تعرف قصدي راسلتني من غـير
حساب وضحكت عليــة وسويت نفسك شخص ثاني
حك حواجبة وكال
السبـع :- بابا ليلي روحـي للبيبي هسه
شوي واجـي نروح نشتري
العاب
سوت نفسة من يعگد حواجبة وبرطمت لزمت أيدية وكالت :
ماااا ماااا أريدها حباب بابا تشبه الباربي
حلوة أريد العب وياها
حرك لسانة بخدة وكال
: نلعب بابا نلعب هواي بس روحـي هسه
أشرتلي أنزل لمستواها
دنگت عيني عليــة مركزة بتصرفاته وأذني يمها وهي تهمس بكلام لطيف بريئ مثلها
أبتعدت وسوتلي بيباي بيدها وراحت
رجعت أريد أباوعــلة ماحس الى صار يمي نزيـت مخترعة ردت أعثر رجعـت ليورة
وهوه يتقدم لحـدما ضربت بالحايط نزل روحـة لمستواي خزرته رفعت أصبعي
اهدده
ماحس إلى لــزم أصبعي قوي ونزلـه صرخت من الوجع
أنهار : اويييي
فتح عيونـة خزرني وسد حلگي حجه بتحذيـر
: لترفعين أصبعج مرة ثانية
بوجهي هاي المرة صارت المرة الثانية أكســرة وبلا أوي ما أوي لتجيبين الشبهات علينـا
وأحنا كُلشي ممحصلين
دفعت أيدة قوي
أنهار : ليش سويت هيجي حرام عليك
حسبي الله ونعم الوكيل هسه تطلگنـي !!!! أنـتَ مو عندك بنية متخاف عليها الله وأكبر
على رأسك شنو من بشر لا حياء لا صخام لاش..
بعدنـي ماكملت قاطعنـي حاوط خصري بأيده مقربني عليــة سحبني تقرب عليــه شواربة طخت بشفتي فتحت عيوني
هي ثواني وصارت شفايفي بين شفايفـة فاتحـة عيوني على وسعهم أدفع بي وماكـو
وهوه مستمـر يتفنن ويضغط على خصري قوي بأيده أبتعد عنـي يتنفس يجـر النفس وإني أحس روحـي عطبت من العصبيـة
مسح حلگه صار بي حمـرة من شفايفي بطرف أصابيعة باوعلي مبتسـم
رجع تقرب وإني بعدنـي مصدومـة بأصبعة الچبيرة مشاه على شفتي يمسح الحُـمرة الي
ملطختني بسببـه
ماحس الى شي حار على خدي رفع أيده يمسح دموعي دفعته قـوي من صدرة
بكُـل قوتي عطت بصوت يمكن كل الي بالبيت سمعـو
: طلككككككنننننييييي طلكننننييييييي
فتح عيونة مصدوم أبتعد انصدم من صوتي ماحس الى فتحت الباب مرة تباوعلنا مصدومة
كالت : خيركم يمة
أنهار : ماكـووووووووو خيررررر هسه
يطلكنييييييي واذبححح روحـي
صار أعصاب من شاف ردة فعلـي دفع المرة حيل من جتفها وسد الباب قفلـها
تقرب عليــة لزمني من زندي قـوي
السبـع : يابة وداعت بنتي الماعندي أعـز منها
طلاك ماطلگ اني من أقرر اطلگج ساعتها تتطلگين
أنهار وحق داحي الباب اخليج تتمنين الموت على العيشة الي اخليج تعيشيها أنـتِ واهلج
بلع ريگ باوع بعيوني وكال
: اعتبريها صفقة اصرف عليج وعلى اهلج
بالمقابل ضلي فتـرة عنـدي
ربي بنتي
عيوني نترست دموع رفعت رأسي باوعتله
أنهار : شنو مشتريني أنـتَ ؟
نظراته تتنقل بين عين وعين ارتخت ملامحة وعيونـة بعيوني نزل نظرة لشفايفي
جر حسرة مبتعـد عني كعــد على القنفة حط رجل على رجل طلع جگارة وشغلها
اباوع زندي صار أحمر عليها طبعات أيدة رفعت رأسي للسگف أمنع دموعـي تنزل
سيطرت على نفسـي كاتمة غصتي
أنهار : ماريدك تلمسني لتلمسني بعــد حرام عليك ماحبك ايع تلعب نفسي منك
رفع حاجبة وضحك وكال
: ديلا خانم علساس إني الي راح
أكتـل روحـي لخاطر ابوسج دمشي بابا عندي الأحسن والأحلى منج بيش الكيلو أنـتِ ؟
غمضت عيوني
أنهار : هاي هي عوفني ومعليك بية
عندك الكح** أشكال وألوان داير مدايرك متعجبك بنت الأصول طبعاً
التفت ماشفت رده فعلة فتحت الباب وباوعتله يباوعلي صافن مصـدوم من كلامي
باوعتلـه وحجيت :
بالمناسبة إني مو سمرة حنطاوية
ميخالف خنكـول سمرة سماري هذا الي معاجبك غيـرك سحل روحـة لخاطرة
حجيتها وطلعت ورگعت الباب وراي حيل طلعت صعدت فوك جانت أنسام تسولف
وية نوران اول مدخلت نوران باوعتلي بخـوف ضحكت اول مرة أني أصير غبية
بهشكل ونوران تلگفـها كعدت على التخـم تعبانة باوعتلي أنسام بعتب صديت
عنه شسوي هوه الله من يشمرة للثول يشمرة جريت نفس أحس روحـي مختنگـه
دخلت البنية ودق باوعت عليـنا وتحديداً عليـة
ودق : مبروك يحلوه منه المال ومنج
العيال الله يهنيكم أن شاءلله كُلش حلوين سوة عفية ماكدر اقاووم گوة لزمت روحـي ماصوركم
أبتسمت بهدوء إلها كمنـا نلم بغراضة بدلن ملابسهن نوران تباوعلي بصمت متكدر تحجي
أنسام يمنـا نزعت ملابسي ولبست شلون ما جـان نزلنا جان عمو هشام واكف
وأخو بصفـة تقـرب عمو باركلي وإني أحس ماعندي اي ردة فعـل أباوع على أخو صافن
بعالم ثاني يباوع ليفوگ
وإنسام كذالك شبيهم يرگعون صفنات گلبت عيوني مشيت اول وحده ودق فدوة للگلبها
ودعتنا وحده وحده وبوستنا شكد تنحب هلبنية
اجتي وراي نوران وأخير شي أنسام تمشي بطيئ وعقلها مو يمها جانت أكو طابوگه
ردت احجي ماحس الى عثرت غمضت عيوني اتخيل وگعتها فجأة الجـو صار هدوء
فتحت عيوني وماحس الى حلگـي راد ينشگ بكد ما فتحته لگفها أخو عمو لازمها من صدرها
حتى لتوگـع
عضيت على شفتي بفشلة الوضع هدوء وكلها مصدومة وتباوع أنسام مغمضة مسوية
روحـها ميتة هوه استوعب ايده وين رأساً سحبها وماحسسس الى چــــرب وگعت بالگاع
لهيب : منرخصتكم احزم الرفعة
مشى شويـة وصفن رجع اندار يباوع مصدوم وعمو هشام صار وجهه أحمر من الضحك
گـوه لازم روحـة يخاف لا يفشل أنسام تقربت عليها كومتها وهي عمت عيني
عليـها سوت نفسها ماكو تخربطت متكدر تمشي حقها هي هاي هم فشلة الله يطيح صبغها
صعدنا بالسيارة
وصعد الولـد الي يوصلنا ضل يعدل بالمراية عوجت حلگــي حجيت بسرعة
أنهار : دعوف المراية كافي ماشبعت شوف
التفت عليـــة خزرني نوران تعض بأصبيعها وإنسام الفشلة يمكن خلتها تتمرض
وتصخن عدل المراية وشالها عنـه أدري شبيك مشايف ولو حقك اذا هاي أختي
وصلـنا نزلت الغراض ونوران سانده أنسام دخلت للبيـت صعدتها فـوك
شمرت الملابس امشي واشتم بـ عثمان عشيرته حرگتها حرگ
ماكـو حس لـ علي بالبيـت اشتم ريحـة بالبيت تقربت على المخزن فتحت الباب أباوع
علـي كاعد وبيده جگارة وكدامــة الكتاب
فتحت عيونـي تقدمت بسرعة رفع عيونـة ذبلانات أحسـة مو بوعيـة سحبتها وكف عاط
دفعني قوي وگعت بالگـاع
أنهار : عزا بعينك يا مطي موزين موزين
عليك گلبك ميتحملللل
علي : ديلا يلا
حجاها وضحك ويهز بأيده بحركات غريبـة كمت بسرعة سديت الباب إذا تشوفة
أنسام بهل حالة تتخبل تنجلط متتحمل والله
تقربت عليه جريته من ياخته شميته مابي ريحـة طحت بالگاع أحمد الله كل اعتقادي بس الشرب يوصل لهل حالـة مجان أكو
بالـي ولا فكرت بيها لهذيج الشغلـة ..
اباوع عليــة كعد بالگاع لازم گلبــة شهگت خايفة زحفت الـة جريته لحضنـي
أنهار : شبيك شبيك علـي يمة يمة
علي شبيك ؟؟
أحس ثگل چسمـة كل صار على جسمي باوعت عليـــة نام أحس بهلثواني القليلة
روحـي فرفحت ضليت الوب
حمدت الله وشكرته مابيــة اكوم اسندة وحدي انجبرت أصيح نوران الي أكلت
گــلبي حتى بجي بجت تكول اتخيلــة يموت
ومحــد طايح بيـها غيري حطينا بجربايته طلعت رحت للغرفة صارت عيني على التلفون
فتحتـه لكيت مسـج منـه
كاتـب
: حظري روحـج بعد أسبوعين العرس
غميته وشمرت التلفون فدواحد أرعن وسرسري بس اصبرلي راسمتلم خطة بالي
الى اخليك تعوي وعلـي
رحت دخلت للحمام أخذت دوش سريـع ورحت رأساً للجرباية بس حطيت رأسي
نمـت من التعب
أنسام :- ماعرف ليش كل هلمواقف السخيفة تصير بس وياه هوه نايمة ومغطية روحي
بالبطانيـة غمضت عيوني اتذكر شلون فلتني الچلب الحقير الله لا يوفقة
رفعت رأسي وطلعته من البطانية من أجانـي صوت إشعار يدل على وصول رسالة جديدة
سحبتـه نمت على بطني
متغطيـة جان من رقـم غريب داز فيديو مال يوتيوب لـ شعر لـ إيهاب لمالكي عفست وجهي
مستغربـة فتحتـه
جان يكـول :
مو ذنبك حلاتك كل ذنب مابيك
لكـن صوجي گــلبي الماكـدر يصبـر
شكد ردت أكتفـي بالنظرة الأولى وياك أغمض
والفصوص من الجفن تطفـر
يا نظرة برائة تظل برائة وياك ؟
إذا نظراتـي چـانت بالجلــد تحفر
قست دگات نبضـك من لمحتك عيــن
واحتكيت بيك بدون ماتشعـر
مغـير لونهن بس شفـت لون شفـاك
اخذلك هيج واحد من بُــعد يخزر
اليسـمع دفو صوتك يوگــع بشده
وماضل وراها يضل صبــر عنــده أكو
گبلـي نبي كالو مكلـم الطير وأنه اول إنسان
يكـلم الوردة
هنياله الهوه اليمك يفوت بكيفة يفوت
ماتحمـر خدوده ومستحة تردة
هم جان إسم غيرك باللعب ينگال
من تلعب وياهـم يا ورد شـدة ؟
بلعت ريگ أحس جسمي يرجف من الخوف طلعت لكيته متصـل كتبت
: منو أنـتَ ؟
رد رأساً : معليج
كتبت بحرگـه رأساً
: خوش لعد راح احظرك
- عادي اجيب غير رقم سهله
فتحت عيونـي رأساً فتت حظرته وشمرت التلفون شلون مستهتر ومايستحي
گبـر الهمجي غطيت رأسي ونمـت وإني افكـر منو هوه
صـبا : كاعــدة اهز برجلية واكفـة كدامة وهوه مدد على القنفـة وحاط أيده علـى عيونة
عـود مكتئب وداخل بجـو
صبا :- خليلللللللللل كوم أطلع
اشتريلييي تراااا والله اكوللل لـعثمان عليك
طفر رأساً حط أيدة على خدة ديفكر رفع رأسة وكال
: جا هي ليش رفضتني شو شاب واخبل
واطگ بالگاع قحط عود هي دكتورة ختولـي أم حلك متدري إني بزمانتي المنطقة تصيحلي
الدكتور خليل
رفعت عيوني للسما ادعـي من الله الصبر دخل عثمان باوع عليـنا بتعب ودار وجهه يصعد
حجيت بدلـع
صبا : عثماااااااان
التفت اليــة وكال
: هابوية ها حبيبتي أمريني
صبا :- ميقبل يشتريلي !
باوعله خـزرة وعاط بي وهوه گمـز
السبـع : گـــم إبن القنادر أنـتَ شوكت تقرة متكلي مو وراك خره وزاري لو بس فالح
تفكر تتزوج هاي وتخطب ذيج
جر حسرة خليل وكال
خليل : احب النسوان اموتتتعليهننن
وية الوريدددد يمشن
نزع الحزام عثمان وذاك طفر اخذ الفلوس من أيدي ضحكت بفـرح صعدت ليفوك
دخلت لغرفة ليالي لكيتها تلعب بالملاعيب كعدت يمها تطير هذا وتگتل ذاك
باوعت عليــة وكالت
ليالي :: خالة هيل هيل حلوه تشبهه الباربي
تقربت عليــة شوي وكالت
: إني احس بابي يحبها هيهيهي
رمشت بعيوني ممستوعبة
صبا :: ولج بعدج بكـد النعال منين متعلمة
هسوالف وشمدريج يحبها
ميلت رأسها وتخصرت وكالت
:: عمو كليل كال إذا تحبين وأحد تبوسينه
وإني شفت بابييي يبوسها مناااا
تحجي وتنفخ بشفايفيها وتأشر صارت تضحك مثل المخبلة تفتر وتصيح بصوت عالي
:: بابيي باسهااااا
عضيت شفتي تقربت سديت حلگها
صبا :: عزاااا بعينج فضيحــة ولج دهر فرچ
اندفر الباب حيل طب خليل حط أيده بوجهي رفعت رأسي اباوعلـة أشرت بـ شكو؟
خليل :: بوسي أيدي وانطيج
أبتسمت الــة
صبا :: صار حبيبي مو تدلل
كمـت وكفت سحبت أيده عضيتها حيل بكل قوتي وهوه سحبني من شعري واني مچلبة
بيده ماهدها تالي تقدمت ليالي عضتني من فخذي شطت لله
خزرتها :: ليشششش ولج
خنزرت بوجهي وكالـت
ليالي :: حكيراااا شلون تعضين عموو !!
نزل خليل لمستواها يراويها أيده
:: دشوفـي عمتج الحيـة شسوت هاي انوب
شنصيحلها حبيبي لولو؟
لوت شفايفها وحطت أيدها جوه حنچها
تقلـد حركات خليل رفعت إصبعها عود لكت الفكرة وكالت
:: الهاسكي هههههه
عمه صبا هاسكييييي
زفرت نفس بضجـر بت أبوها شتطلع سحبت العلاگــة من عنــده نزلت ليجـوة يم جدتي
كاعــدة هي الوحيدة الي غرفتها جوه كلنا غرفنـا فوك
فتحت الباب ودخلت كعدت يمها فتحت الجبس أكـل أباوع بالغرفة بيـن متخلص دتقرة قرآن
عيوني تتجول بأرجاء الغرفة
خلصت صدقت وباوعتلي مبتسمـة أشرت على رجلها مدتها ومددت عليها
تفرگ بشعري وكالت
:: حليوه مريت هذا البغـل
صبا :: اي حيل تخبل أحلى
من أخوي شلون قبلت بي هههه
ضربتني خفيف على گــصتي وكالت
:: انجبي ولج اخوج هم يخبل
ألف وحده تتمنى
صبا :: هوه شگــبر رأس أخوي غير هلحجايـة
أجاني صوت خشن ففزني
السبـع :: أفاااا تحجين عليــة بغيابـي وسفة
وحسافة
صبا :: جا يخوي حچاية الحگ توجعكم
انتو الرياجيل
طگها بضحكة ودفعني نام هم على رجل جدتـي الثانية صرنا كلواحد من جهه وهي تلعب
بشعرنـا ماحس الى خليل
دفـع الباب
عاطت جدتي
: يبويييي خايب گسرت الباب من كون گــسر برجلك
خليل : هذا بس خليلخل هيج تحجين
وياه لو عثمان دافعها جان كتيله تروحلك فدوة
: اي جا شجاب الثوم على الحلقوم
ولك يامصرگع
سد الباب وتقدم سحب الجبس من أيدي وكعد ياكل عثمان : جا وفريختي ولك
وينها ؟
خليل : نطمرت إني وداسولفلها
على بطولاتي چلبـة عليمن تطلـع
بس حجاها دفـرهه عثمان بطن غص كام يكحكح عم الهدوء أرجاء المكــان وماكو بس
صوت خليل وهوه يگرط الجبس من بعد ثواني قليلة
حجت جدتي بهدوء وهي تمسح
على شعر عثمان
: جا يمـة البنية الماخذها مو جنهي صغيرة
عليك بعدهي بكـد خليلخل أخوك
خليل : شني خليلخل حتلو
تثردين بأسمي مو هيـج
: نجب ويعـة أهلي كون أن شاءلله
عثمان : لا عادي مابيها شي
: ها هيـچ شورك
هز برأسه بدون ميحجـي كالت وكأنها
تعرف شي منـعرفة
: نشوف تاليـتها شلون
غمضت عيوني أحس تعبانة اليوم رگـصت هواي بس بعدين تذكرت شغلة طفرت
رأساً صعدت فوك
فتحت تلفونـي فتت على الانستا أكو صورة صورتها لـ عثمان هوه مرته وبنته بحضنهم
جان يبوسها من خدها
اخذتها ورحت ضفـتها بهذا الاخضر بس هي تشوفة يعني نشرتها واني اضحك
بعدين صفنت هاي كُلشي أتوقع منها رحت حذفتها رأسا رحت كعدت كدام
الشباگ أباوع على العالـم الي تروح وتـــرد
نفتـحت الباب انداريـت
أباوع منـو جانت أمي
صبا : ها يمة
باوعتلي ونظرتها كلها شك
:: اخوج ومرته تعرفين شلون عرفـهها؟
عفست وجهي
صبا ::- شبيهم شمدريني
ماعرف ليش
: من راحت يمـة ورة مخلص العقد جانت تبجي وتصيح طلگـني
گلبت عيوني بملل
: يُـــمة عادي صدُك تحجين أكيد عرفت
عنده علاقات لو مجانت تدري بـ ليالي كُلشي توقعي
باوعت بعـدم رضا كأنها ممقتنعة
بكلامي مهتميت شمرت روحـي على الجرباية غمضت عيوني تعبانة ركصت هواي
بالعقـد
افز على صوت صياح وصوت بنية عالي فزيت باوعت داير مدايري أسمع
صوت عثمان عالي
نزلت بسرعة بگفشتي أباوع خطيبته واكفة توصل لصدر عثمان تتعارك وهوه يباوعلها مضيگ
عينـة وخليل شايل ليالي ويهوس بعالم ثانيـة نزلت وفزيت من شفت ولد صغير
يطلع بعمري تقريباً نايم على القنفـة
فاقد الوعي يمكن ردت أنزل تراجعت وضليت كاعــدة على الدرج أباوع
أمي وجدتي مَــادري وينهم ومرت عمي وبتها راحن لهلهن
عاطت البنية
: ترااااا أخوية هذاااا اعرفة
مستحيللللللل يمشيييي بهيج دروبببب !!!!!
رفع رأسة حط اصبعة بين عيونة يفرگ بيهم وكال
السبـع : ولج بوية
إني ماره عليـــة هيج حالات أشكال وألوان اكدر أميزهن اخوج يتعاطى
ضربته على صدرة قوي دافعته
: اللّٰـه ياخذك أن شاءلله
متعرف أنـتَ كُلشي متعرف
تمشت يم أخوها تريد تسنـده ماهيس الى دفعها قوي انضرب ضهرها بـ طبلة وكفت
فازة على وگعـتها سكت خليل من شاف الوضع صار جـدي
طفـر عثمان يريد يگومها خزرته قوي وهي عيونها تلالي من الدموع دفعته وخرته
وعاطت
: وخر شنو أنـتَ تحميني من أخوي
وخر
كامت تمسح على وجهه مسحت دموعها تقربت تزحف على رگبها وصلت يمة
هزته خفيف تهمس بخفوت
: حبيبي علـي يروح أنهار شبيك حبيبي
وكف لازم صدرة من جهه القلب رافع رأسة ليفوك نزت هي وعثمان يباوعلـه مستغرب
السبـع : اخوج مريض؟
مهتمت لسؤاله كل تركيزها على أخوها تمسح بوجهه عاد هوه لزم أيدها وكال
: أنهار أريد راح أموت احتاجهن
إذا ماخذهن اموت
فتحت عيونها على وسعهن سدت حلگه بأيدها قوي نزل رأسة عثمان غمض
عيونـة خليل شال ليالي وطلـع برة
إني واكفة صافنة ماعرف شسوي اندارات البنية الي إسمها انهار على عثمان
تقربت لزمت أيده قـوي
أنهار : اللّٰـه يخليك شسوي شلون يبطلهن
علمني شسوب فدوة عفيــة
عينة صارت على أيدها الي حاوطت أيده باوع عليها عيوني تنتقل بين عيونها وهي
تبجي عين على أخوها وعين على اخوي
بلعت ريگ رفع عينـه شافني خزرني
دنگت عيني ألعب بأصابيعي أحاول اتجاهله رجع عيونه عليها
السبـع : ميخالف
هسه نشوف هسه شوي وتخف حالته من يرجع الوعيـة هذا مأخذ جرعة
أقل من كل مره جسمه ممتعود يحس نفسة بعده محتاج
أنهار : شسوي وين اودي إذا تشوفه أنسام
تخخبلل تموت والله اذا تدري
بية يتعاطى
باوع على الوضـع كال
: عوفي يمي هنا من يصحى يرجع روحـي وكولي يقره يم صاحبة تحججي بأي شي
مسحت دموعها بسرعة تقربت عليـــة
مسحت على خدوده وكالت
: مايصير عليك شي ماخلي شي
يصيرلك حبيبي
أبتعدت تشهگ سنده عثمان صعده ليفوك وهوه بين الصاحي وبين الكاعد
الشي الوحيد الي يحجي يكول
: أريد بعـد أحتاج بعـد
ذب حسرة عثمان اجت عيونها عليــة كعدت على التخم تشهگ مغطية وجهه بأيدها
نزلت يمها كعدت كدامها
صبا : لتضوجين هسه يصير زين
رفعت وجهه عليــة دموعها تنزل بـ غزارة
رجعت تبجـي وتحجي بغصة
أنهار : ليش هيچي ليش هيچي صار
والله أنسام متتحمل ذبت دم گلبها لخاطر تگبرة وميصير عليــة شي
شنو الي وصلـه لهنا والله كافي تعبنا كافي
كعدت يمها أمسح على ظهرها مبينه هستوها راجعة من الدوام
ذبيت حسرة دخل خليل مشتـري ليالي نزلها من حضنه تقدمت عليها
بحلگـها مصاصة وبيدها وحده ثانية
ليالي : هاج هبيبي لتبجين
منو مزعلج هسه عمو كليل يضربه
رفعت رأسها باوعتلها وأبتسمت باوعت على خليل وهوه باوعلها وكال
خليل : اكلج هاي الي نزلت
وياج من السيارة شتصير منـج
ضربت على فخذها قوي وكالت
: انابياحال والدفان يغمزلي
عوچ حلگه چنه ذني العجايز خزرته هسه
وكته دومـة مفشلنا
نزل عثمان باوع على الوضع نتبه ليالي هي باوعتله وخزرته
عثمان : ها الله يساعدهم
ماهيس الى ليالي تقدمت ضربت ابوها على رجله قوي فتح عيونه يباوعلها مصدوم
هي دارت عنه ورجعت تمشي لـ أنهار
باوعت الها والمصاصة
بحلگـها كالت
:: ها هسه صرتي زينه ؟
أبتسمت أنهار بتعب هزت رأسها بـ أي تجاريها وكفت لبست جنطتها خليل اجه
كعد يباوع علينـا
عثمان : ليش تضربين ابوج ولج ؟
تخصرت وكالت
: بابي انت مو هباب ماهبك بعد
انت ضوجت خاله
رفع حاجبة مستهزاء
: شوكت هاي
خنزرت مثله
: البارحه من بستها هنا
تحجي وتأشر على شفايفها
فتحت عيونيييي مصدوم أباوع أنهار جانت تمشي التفت مصدومة مثلي وعثمان
جمـد بمكانه ماسـمع الى صوت ضحكه خليل
رجت البيت رج
باوعت أنهار على عثمان بسرعة
اندرات تمشي مـن كد ما استحت ضربت رأسها بالباب ممنتبه
لزمت گصتها فتحت الباب وطلعت
استحيت اني كاعـده بنص إخواني
عاط عثمان
: إبن الخرة عليش تضحك يا زمال
خليل : يا عزه بعين امي
ولك عثيمان تدور حقوق قبل لا تعرس
لتخلون البنت يمه عمي بطگها بفرخين هسه يحبلها يبلينا
دفره عثمان برجلـة سحب بنته وصعد فوك باوعلي وكال :
ولـج اليوم شلون شفت حاته
تخبل هلكدوتها بكد ليالي والعباس حبيتها من اول نظره ام سعودي
عگدت حواجبي
: سعودي منو ؟
خليل : أبني
صبا : وام سعودي الي شفتها
اليوم مو بالله؟
هز رأسه مبتسـم هزيت أيدي صعدت فوك طبيت للغرفة فتحت تلفوني دخلت
على الانستا اباوع لستوريات هيفاء حسوني ماعنـدي شي اسوي ماحب
الدراسة اتخبل منها بطلت خلصت سادس ابتدائي وكعدت جنت بس
يكلولي أقري أكوم ابجي والطـم
نايمة على بطني رجلية فوك سمعت صوت حركة بالغرفة الي بصفي
الي بيـها الولــد شمرت التلفون تقدمت بخطوات بطيئة يم الباب
حطيت أذني أستمع واتلفت إذا يشوفني
عثمان بالعباس يشگـني شگ
أسمع صوته يون خفيف
فتحت باب الغرفة على خفيف حطيت الگبوس مال التراك مالتي على رأسي
لكيتـه مدد بالگاع ويون بخوف تقدمت كعدت كدامه مستنده على الحايط
لميت رجلية لصدري وحضنتهم
حاطه رأسي على رجلي أباوع عليــة ملامحه حلوه ولا چن إخواني جلحان
ملحان وخصوصاً خليل معفن
فتح عيونـة كأنو صحـة باوع عليــة
علي : منين أنـتِ خواتي وين
بلعت ريگ مجاوبت رفع عيونه للسگف
أحسـة ممسيطر بعده
رجع كال : خرسة أنـتِ
مانطيت ردة فعل رفع رأسة من الگاع باوعلي
مقلص عينه كال
:: خاف اني متت وفتت للجنه
وأنـتِ حور العين
گــشول وجهه وكال
:: أيع ماحبيتج خليبدلوج بسرعة
يحجـي ويهـز بأيده بحركات عشوائية ويبتسم ويضحك خفت منــه
طلعت ورجعت قفلت الباب ودخلت لغرفتي كعدت على الجرباية أفكر بـي ..
أنسـام :: كاعــده وكدامي كــومة
أوراق وكُل شوي بالي يسرح ويروح على المحادثة مال البارحـة أفكر بيها
لزمت رأسي قوي اطرد هاي الأفكار السخيـفة باوعت أستاذ لهــيب ماكــو اليوم
استغربت لـيش
انفتحت الباب دخل أصهب يركـض فتح الباب على غرفة أستاذ هشام لحكـته بسرعة
دخلت وراه أباوع عليـــة دنك يلهث يجر النفس حجه بسرعـة
أصهب : خالـي حط خالتي وكتلها
راح يذبحها
فتحت عيوني مصدومــة رمشت مرات متتاليـة مامستوعبة طلع أستاذ هشام يركض
بسرعـة ضليت أباوع عليــهم لحدما اختفى أثرهم من عيني
صفنت كلها تباوع مستغربـة عضيت شفتي
خايفة كعدت أكل بأظافيري
أباوع على ساعة وساعة تجـر ساعـة
لحـدما خلص وقت الدوام وبدت العالـم تطلع لبست جنطتي وطلعت بالـي يمـهم
أفكر شصايـر وليش أستاذ لهــيب ماداوم اليـوم
وصلت للبيت فتحت الباب ودخلت لاگتني أنهار عيونها حُـمر باوعت مستغربـة شكـو
أنسام : ها بس لا بطلتي متردين تعرسين
وتعالو طلكوني
هزت رأسها بـ لا وصعدت بدون متعلق ضليت أباوع عليــها عاقجة وجهي مو عوايدها
هيـج مَــادري منين اتلاكاها إخواني صاير وضعهـم غريب
من علي وتصرفاته الغريبة
وحركاته وكلامه ولا كأنو هذا الي ربيته إنسان ثاني
لو من نوران وفهاوتها وتصرفاتهم الطفولية
يمكن لو شخص غيري يشوف تصرفاتها يعتقد هي تتصنع هذا الشي بس هي فعلاً طبيعتها
هاي
لو من أنهار وشخصيتها الاندفاعية
وتصرفاتها الـ مومنطقية وقراراتها المُتسرعة زفرت نفس نزعت الحذاء
وشمرته
صعدت فوك بدلت ملابسي
ونزلت صبيت غدة أسوي غدة قبل بيـوم واخلي الهم من يرجعون يحمونا
محد مأكل محطوط على حطته
هزيت أيدي خلصت أكل غسلت مواعيني
وصعدت فوك سديت الباب
فتحت التلفون لكيت رسالة من الواتساب فتحتها
جانت من رقـم غريب
فتت على الصفحـة جان مكتوب الرقم وجواه إسم مكتوب أم محيسن الخياطـة
مكتوب
- السلام عليكم
رديت - وعليكم السلام
منو وياي منين حصلتي رقمي؟
انتظرتها ترد ماكـو تأخرت قُـرابة الربع ساعة بديت أغفي هستوني غمضت
عيوني أجاني إشعار فتحته كاتبة
- داده دلوني عليج أهل الخير
عفست وجهي وكتبت
- منو أهل الخير شتردين خاله ؟
كتبت بسرعة
- خلخاله تخلخل عظامج بعدني شباب
شنهي خاله
عگدت حواجبي مستغربة استغفرت وكتبت
- تَــمام وهسه شتردين ؟
تأخرت وهي تكتب ضليت صافنــة بالمحادثة انتظرها تكتب
- اشاقة وياج يُــمة إني مرة عجوز أبني عايفني
وزلمتي ميت ومالي أحد والبيت
وحشه علية أكضي يومي كله وحدي محد بحالي ولا أحد يمي ولكيت رقمـج
وكلت اشوف ياهي أنـتِ
انقهرت عليـها وأنبني ضميري كتبت
- آسفة خالة واعتذر على أسلوبي وياج
بس أكو واحد ملطلط يراسلني البارحة يتغزل ومدري شنو
كتبت
- انجبي ولج
هاي شبيها هاي كتبت
- شنو
ردت
- ههه أقصد أكيد حلوه وهيج يحبوج
كتبت
- لا خالة منين مَــادري
والله
- اكلج حبيبه أنـتِ وين تداومين
حبيت سوالفها ارتاحيت الها ضليت اسولفلها وهي تسئلني على شغلي وعلى مديري
وإني انطلقت أسولف
تعبت النعاس أكل عيوني سديت وضليت أفكر بيها شكد سوالفها
غريبة غمضت عيوني بتعب وماحسيت بشي بعـد والنومـة نومة
حسيت على صوت طرقات خفيفة على الباب فزيت باوعت دنيا
العصر كمت فتحت باب صارت بوجهي
نوران مطنگرة
أنسام : ها شكـو خير يا طير ؟
نوران : أنسام أكو نسوان جوه
يكولن يردن يخطبني
وسعت عيوني وهي طگتها بجية رمشت بعيوني شنو القضية لزمتها من چتفها
حيل أعت بيها عطت بعصبية أحاول اكتــمها
أنسام : اذا تكليلي أحب وأريد
اذبحج
شهگت بصوت عالي
نوران : ماريدهم ماريد ماحب ماريد
تحجي وترفع بأكتافها بلعت ريگ دخلت عدلت ملابسي وشعري رشيت عطر وفرگت
وجهي اصحصح
نزلت مبتسمـة رحبت بيهن جانن تلاث نسوان بدن يحجن ويكولن شفناها بالعقد
وهي حليوه وصغيرة ومدام اختها متزوجة بعمر صغيرة يعتقدن نوران هـم هيج
أبتسمت ألهم بفشلـة ماحس الى صوت نوران تتدعبل من الدرج فتحت عيوني مصدومة
فجأة وكفت طبيعي ولا كأنو توها واگعة مستغربة اباوعلهن والنسوان
وجهن اعتلته ملامحي الصدمة إلي غزت ملامحي
جانت حاطه الكحلة على شفايفها ومسويتهن سود وحاطه ايشدووو أصفر وياه بنفسجي
رفعت عيونها فوك حيل بين بس البياض تمشي صفح وحاوله عيونها النسوان نـزن
خايفات من تصرفات ماشوف الى أنهار هم توگع من الدرج وكذالك
نفس الحالة حاطه حمرة سوده وايشادو احمر وبرتقالي وتمشي صفح وحاوله عيونها
ماشوف الى أنهار لزمت
نوران من جتفها وركعت رأسها برأس نوران
كمت اضرب على خدودي
اباوعلهن شيسون والنسوان مخترعات
نوران لزمت رأسها واندارت عليها فتحت عيونها حيل على وسعهن صارن يخوفن
تقربت على المرة قربت وجهه لوجهه المرة وكالت
: أنـتِ ظهرج يوجعج مووووو؟
تحجي وتثخن بـ موو مالتها
فتحت عيونها المرة تصيح
: أي والله صحيححح صحيحححح
غمضت عيوني من شفت أنهار تقدما دفعت نوران قوي وقربت عليها وكالت
: رجلجججج متزوج عليج وحده
علوية سمرة قصيرة جدها السابع اسمة نوري
المرة كامت تدگ وتلطم مامصدكة والي بصفها خايفات عاد بس وخرن نوران وانهار
طلعن طفرن حتى ما أستاذنن ولاشي صافنة اباوعلهن فطست أنهار
بالگاع من الضحك
ونوران تباوع بصدمـة وتحجي
نوران :: راحو هاي هي يعني ماتزوج صدك
اندگت الباب مرة ثانيـة لزمت رأسي أحس حيطگ من وراهن دفعتها أنهار
:: امشي ولج روحيها فتحي الباب
وعوجي حلگج وفتحي عيونـج
جرت نفس عميق وتقدمت تمشي أعوج وفاتحه عيونها منظرها يفطس ضحك
فتحت الباب
لحكتها أريد أشوف منو أباوع الولد أصهب يباوعلها مستغرب تقدم عليها كال
أصهب ::- شبيها مريضة؟؟
يحجي خايف وهي مشافته لأن حاوله عيونها ورافعتهن فوك ممبين بس البياض
وفاتحه حلگه مثل الهايشة
بس سمعت صوته نزت شافته واكف هوه باوعلها مصدوم
هي تباوع وطگتها بجية بصوت عالي وكعدت بالگاع وهوه صافن يباوعلي وإني اباوعلة
وهوه يباوعلي ونوران بنصنا تبجـي بلعت ريگ الخاولي فوك رأسي
مد الكتاب كال
أصهب : نسته بالسيارة اليوم
خفت لا عدها تحاضير وشلون تقرة فيمالا
اخذته من أيده اني هم مصدومـة بحيث تقدم مشه التفت باوعلي بعدني واكفة بمكاني
والباب مفتوحـة رجع سدها وراح نزلت نظري إلها كاعده جوه رجلـي
تبجـي اجتي أنهار تأكل
وباوعت تحجي وهي بحلگها لگمه كالت
: ها شني شكو ليش تبجون
رفعت رأسها نوران ماتحملت طگيتها ضحكه وأنهار طلع الأكل من خشمها هي تباوع مستغربة
جانن الأوان الي حاطتهم على عينها من تبجي سايحين أصفر وبنفسجي
منظرها جنها جوكـر
ندكـت الباب من جـديد غطت وجهه وأنهار تأكل وتباوع فتحتها جان خطيب أنهار
واكف كدامــة
علي انصدمت باوعت عليهن هوهَ علي مو جوه شنو مارجع؟ ليش محد كـلي
فزيت على صوتـه وهوه يكول
السبـع : من رخصتج خوية بس أريد
أنهار بسالفة ولو زحمة منج
بس ما طـول خمس دقايق
دفع الباب علـي ودخل عيوني عليـــة باوع على أنهار ونزل رأسة وهي تباوعله بقهر
ونوران بالگاع تبجي
بلعت ريگ التفت عليـــه هزيت برأسي بـ أي سويت مجال يفوت كومت نوران
أباوع على أختي أنهار خزرته سديت الباب
وانتچيت عليها
شنو ديضمـون عنـي؟
إنهار : واكفـــة كدامة أكل باللفه
وهوه يباوعلي طلع باكيت الجكاير من جيبة سند نفسة على الحايط بحيث
صار ظهره على الحايط يعاين عليه حط الجــگارة بين شفايفة طلع الجداحة
وحاوطت أيده الجــكارة سمعت صوت طگه الجداحة أباوعلة رجعها لجيبـة
وصار يدخن ويباوع عليـــه
رفعت حاجبي
أنهار : خير اللهم اجعله خير
السبـع :: رايدج بشغلـة
أنهار :: لااااااا
السبـع :: علساس هي بكيفج
زفرت نفس گلبت عيوني بملل وكلت
:: مدام هي مو بكيفي
ليش جـاي تكولي !!!
سحب نفس من الجگارة وزفره باوع عليه
السبـع :: باجر لتدومين عندي وياج
شغلة بمكان
فتحت عيوني
:: وحدنااا !!!!!!
ضحك بطرف شفته وكال
:: اذا تحبين ليش لا
لعبت نفسي وملامح القرف بينت على وجهي
:: أكـــو أحد ويانا يعني؟
السبـع :: أخوي خليل
حجاها وطلـع سد الباب وراه ضليت اباوع على الباب رفعت رأسي باوعت للسـما
جانت دنيـا توها تغرب حضنت روحـي الجو صار بارد
استمريت أباوع على السما لوقت مو كُلش طويل أسمع صوته يحجـي بتلفون
قريب على بيتنا ما أبتعد الظاهـر
أجاني فضـول أعرف شديسولف فتحت الباب خفيف
باوعت من الزرف شفته واكف يدخن ويحجي
بتلفونة ملامحـة تبين
أنو هوه متنرفز ماعرف شنو سمـع من الطرف الثاني وطگـها ضحكـة
بصوت عالي ڪال
السبـع : يا حبيبي البغل هم يتفاخـر بأن
أسلافة جانت خيول
أبتسم بطرف شفته وكال
:: تكولـي يعني شنو ؟
يعني أبو أبوك احرگـه ادوس عليك بقندرتي واعبرك لا أنـتَ ولا أبوك
تهـزون كياني تعرف الفرق بيني وبينك شنو أني سويت نفسي بنفسي
إني كـبرت نفسي وصنعت أسمي و أنـتَ من جماعة بابا وماما اللگمه توصل لحلگه
عايش على صيت أبوك
اشوف نفث الدخان گح
ضحك بخفة أردف مڪمل : هذا الخــليفة
مو مطول الزمة و** أشگه
بس اصبرو عليــة أخليكم تتمنون الموت
وتحلمون تشوفونه
أخليك تتوسلون حتى أرحم بحالكم
واذبحكم
خفت صار النقاش حـاد أكثـر معقولة بعدة ڪاعد يشتغل ؏َ سالفة عمي انسحبت ماعرف عن شـنو ديحجـون سديت الباب
على الخفيف حتى ماتطلع صوت
رجعت فتحت الباب ودخلت حضنت وجهي بين أيديه ادفي وجهـي
دخلت لكيت نوران تغسل واسمع صوت أنسام عالي تصيح على علي
باوعتـلي نوران بخوف وكالت
نوران : نكوللها ؟
رفعت حواجبي بتعجب ضحكت وكلت
أنهار :: شتكولين مثلاً اخوج يتعاطى مخدرات
وأبن أمج وصلـه لهاي الحالة ....
يتبـع ..
ا
لحكــاية تستمـر الى أحداث أخرى .
𖦆 𖦆 𖦆 𖦆 𖦆 𖦆 𖦆 𖦆 𖦆 𖦆
حسابي انستا للتواصل 👇🏻
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!