#أنسام_اللهيب
بقلــمي أنا زينب خالـد
صوتو على البارت وعلقـو بين الفقرات وتابعـو حسابي مال واتباد .♥
𖦆 𖦆 𖦆 𖦆 𖦆 𖦆 𖦆 𖦆 𖦆 𖦆
أنهـار ::- أباوع عليها بهتت
بوجهـي مجانت تدري بموضوع المخـدرات رموشها مبلله ذبيت حسرة
وعفتها وصعدت فوك وكفت كدام غرفة علـي
أسمع شديحجـون
أنسام : متككككليييي
وييييييين صايرررر تولييي جايني المغربية وأنت طالع من الصبـح ؟؟؟؟؟؟
علي : ليش دتحاسبيني ؟
أنسام : أي إحسابك
واطيح حظك هم منو مسؤول عنكم غيري
علي : مو أمي أنـتِ
صار الجو هدوء ماكـو صوت لـ أنسام تراجعت ليورة فتحت الباب باوعتلي
بقـهر رگعت الباب وراها تمشي وتردد
: مابيـكم خير
مابيكـم ماغزر بعينكم ماغزر
دنكت رأسي تقدمت فتحت باب الغرفة لكيته لازم صدرة ويگح يايابة روحي فرفحت
تخبلت ركضت عليه لازمته
أحاول أكتم صوتي
أنهار : علي علي شبيك
عليك الله شكو شصاير
أشر بأيده مي ركضت جوه عثرت بدرج ماهتميت رأساً كمت جبت مي ونوران
تباوعلي بصمت من شافتني هيـج
صعدت وراي
تباوع علينـا وتنزل دموعها شرب المي وبعد يگح وبالگوه يجر النفس
رجع رأسة على المخدة نام شلت الغطة وغطيته كعدت يم رأسة
اجتي نوران أشرتلها تسـد الباب
سدتها وتقدمت كعدت يمة من الجهه الثانية وهوه نام غمض عيونـة
نوران : حيموت ؟
بس حجتها لطمتها على حلگها قوي وخزرتها رأساً
: ديربالج تحجيها
بعـد والله اذبحج ميموت راح يبطلهن معليج
حجيتها وحطيت أيدي على أيده ورأسي عليهن نايمــة يمة سمعت صوت خطواتها
تمشي وماخذه وياها خيبتها
غمضت عيوني بتعب خايفة على أخوي وين اودي وين أضمة واحمي منهـم
أحس على حركة يمي فتحت عيوني شفته كاعد نهضت رأساً
أنهار : هاي وين رايح
شكو ؟
علي : مو زعطوط وترگضن
وراي أريد سم الحسن مماكل من البارحة داومن انتن مالـي خلك اداوم إني
بلعت ريگ نوعاً ما ارتاحيت لأن أعرف هوه مناك مَــادري منين يجيبهن
هنا علاقل ماكـو يمة زفرت نَفس براحـة
باوعت للساعة شفت نوران كاعده بس مو هي روحها خلصانة من البجي عيونها
حُـمر شافتني صدت عني يمكن زعلانه مني رحت أطلع ملابس صار كدام
عيني التلفـون ضامته عن أنسام بعدني شكد استحقر روحي لأن اسوي هيج شغلات
بدون علمها
باوعت عليـــة ليش ما أكسرة؟ مُجرد ما فكرت بالفكرة انفتحت الشاشة
دليل على وصول إشعار فتحته
مكتوب منـة
- تحضري جايج بعدشوي
باوعت على نوران تراجع بدون نفس نقلنا ميريام لغير مدرسة وهذا أول يوم
مو مال أعوفها وحدها متدبرها بعدين شلون اعوفها وية هذا السايق
وحدها
شمرته حيل بالكنتور لبست ولبست جنطتي نزلت لكيت علي يأكل لفة
جبن وبيده كوب جاي باوع علينا ودار وجهه
طلعنا واكفات برة ننتظر أصهب انفتحت باب بيتهم طلع أخو لازم بيده كوب گهوه
باوع عليـــنا وأبتسم تقدم بأتجاهنا
وصل يمنا كال
خليل : بونجور
باوعتله نوران مخنزرة معاجبها العجب من يصير الموضوع علـي تقفل
كُلش نصها الثانـي علي باوعت عليــة
أنهار : خيرك خوية؟
مسح على شعره بأيده وهوه عينـه
على نوران كال
خليل : طبعاً إني دائماً أحب أبدي
صباحي بأنو احتسي كوب كوفي شوب
ماتحملت وطگيتها بضحكه باوعتله نوران مخنزرة حجت بعصبية وكالت
نوران :: إسمها coffee مو كوفي شوب
سحبت أيدي وإني أباوع عليــة هز بأيده ويغمها اجه الولــد وية جيته طلع السبـع وياه
البنية الي كعـدت يمي البارحـة زفرت نفس باوعت لنوران وكلت
أنهار : نونو ميصير تداوم وحدك اليوم ؟
عگـدت حواجبها مستغربة
نوران : وين راح ترحين
باوعت بعيوني مأشرتلها عليه واكف مكتف أيدة يباوع علينا صعدو إخوانه بالسيارة
باوعت عليهم ورجعت عيونها عليــه هدت أيدي بنترة وصعدت بالسيارة
وسدت الباب قوي نزيت من يمي رحت دكيت جامة السايق فتحتها حجيت بخفوت
محد يسمع بس اني وهوه
أنهار :- اذا سويتلها شي اذبحك !!!
مانطه أي ردة فعـل رحت فتحت باب السيارة وصعدت ورة يم البنية
أنهار :: صباح الخير
ردو كلهم صباح النـور طول الطريق خليل جان يحجي ويلطف الجو لحـد ماوكفنا
بالسيطرة وجانت يمنا سيارة بيها ولد هواي يهوسون ويركصون
وهوه إسم اللّٰـه عليه رأساً سوة اقتران وياهـم طلع جسمة من الجامة يركص وهُـمة
حبو ردة فعلة كامو يركصون ويهوسون وياه
تقربت علية البنيـة وهمست بأذني
صبا : تعرفين وين رايحين؟
باوعت عليها رفعت أكتافـي بعدم معرفة
صديت عنها أباوع
للطريـق بدينا ندخل بدرابين وفروع غريبـة ضيقة كُلش يادوب السيارة تكدر
تفوت بيهم
وصلنـا لمكان وبعد السيارة متكـدر تفوت التفت علينـا جانت أكو علاگه يم أخو سحبها
من جوه طلع عبي شمرها على كل واحـد بينا باوعت مستغربـة
السبـع : يلا البسو
خليل :: ههه عثمان جايب
وحده زيادة ومنطيها اليـة
حط الجكارة بحلگه وكال
: لا هي ألك ضلعي
خليل : شبيك عثمان شافط
من شوكت اني ألبس عباية شنو طلع قانون جديد الزلم تتحجب وإني مَــادري
السبـع : اكلنعل ولا تنعثل
بس ماكـدر افوتهن وحدهن يم هـاي ميكدرن بالله أنهار تدبرها جوز بس صبا
تخاف أدخل وياهن واحجي بعد أنت تعرف روحك لسان دلاله منو ميصدك
أنت مرة بلبس هذا
خليل : هي شني مدخل عائلتك
بهيج أمور ومهمات متخاف يصير خطر عليهن ترا إني ماخاف وهسه أنزل
انعل والد والديهم بالعباس بس خايف على ذني الي وياي
السبـع :: ديلا عاد فضوها ولبسوو
لبستها فوك شالها وجانت وياها بوشية لبستها وباوعت على نفسي شعور
غريب أنو إني بشكل وبثاني عجبتني العباية بس مجانت أبد الي نية البسها
هي حلوه نعم بس إني من الأساس ماعرف اطلع إذا ماطلـع شعري مو نوب تالي
ألبس عباية
فتحت الباب ونزلت اعدل بيها فيت على طولي شلون هيج جايبهم عدلات
منظر خليل بالعباية يفحط ضحك گوه لازم روحـي أما صبا قصة ثانية كُلش حلوه
عيونها فعلاً جميلات ههه أحسن الها ماتلبس بوشيه تعم على روحها بهاي
عيونها
باوعت على خليل طويل كُلش وجسمة يعني مو قاصر ضخم العباية علية تخرب ضحك
مدري شلبسنا السبـع وكال بس احجي وياكم تحجون إلي اكوله الكم تَــمام
هزينا رأسنا ماعرف ليش مطاوعته ودامشي وراه مايَ بس إخوانه وياي
أكيد هوه محيسـوي شي يأثر بي على اخوانة ويضرهم
لهذا السبب إني متطمنة
خليل :: امشن وراي ولتخافن
مدام خليل المُريب وياجن ماكو شي غريب راح يحصلج من وراجن
أبتسمت بـ خفة على كلامة التفت وراي باوعت عليه اجت عينه بعيني رأسا درت وجهي وصرت
امشي وراهم البنية
مجلبة بعباتـي واحنا نمشي وراه أماكن غريبة وشوارع تخوف فارغة
دنيا صبح وماكو ناس لثواني حسيتها مهجورة
لحـدما انفتحت بوب من البيبان وطلع منها رجال يخوف اصلع ولابس فانيلة
وكرشة خمس مترات ليكدام يتثاوب بطريقة مقرفة ولازم بيده اليمين ساطور
أباوع لخليل يباوعلة وهوه يباوع عليه الرجال كل اعتقاده خليل مرة لأن ممبينه بس عيونة
من البوشية غمزلة وكال
: تعالي يحلوه
جحظت عيوني خليل ماشوف الى يلملم العباية ويطكها ركضة كمنا نركض
وراه نريد نلحك ماكو وهوه تخبل يصيح
خليل : ولككككك عثمانننن
الحكككك أخيك راحححح يغتصبونننن برائتييييي
ماشوف الى يضرب دقله بالگاع على وجهه ماهتم رجع وكف يركض واحنا مثل المخبلات
وراه نركض لحدما وكف
يلهث يجـر النفس أسمع صوت عثمان بأذني
السبـع :: سبحانك ربي
هذا الرجال اجاكم هداية من الله ركضكم ركضة طويرح وصلكم للبيت
المطلوب بعد أخيـك
خليل :: أي مرتاح كاعد بالسيارة
وضاربلك أحلى عكس تباوع براحتك واني هنا رادو يسلبون شرفي
مارد سكت عنـه تقدم خليل دك الباب بطرقات خفيف وبعد يجر النفس وصبا كعدت
على الصبه تجر نفس بكد ما ركضت خطية وإني كاعــدة يمها انفتحت الباب
طلعـت مرة عمرها يطلع بـ ٦٠ باوعت علينا عين وحده تباوع بيها الثانية مخيطة
شكلها يخوف وعيونها تجدح نار بيتها اظلم من جوه ومن برة كاتله الوصخ
أول وحده باوعتلها اني رأساً نزلت عيني خفت عيونها تخوف رفعت رأسها صبا
شافتها ولزمت بأيدي قوي حجت بخفوت
صبا : الله يخليك
عثمان خلي نرجع إخوانك لو من شارع إحنا
طگها بضحكة رجت أذني رج
أجاني صوت خشن فززنـي من صفنتي بضحكته المعوقة رفعت رأسي
: تعالي أدخلي أنـتِ فقط
خليل : جا داده انسمط أبو أبوي
يلا وصلتج وتفوتين بس ضرتي يا بوييي على حظج ياخويلهههه
عگدت حواجبها وحجت بجبروت
: شنهي أنتن ضراير
خليل : أي وكلنا متزوجات عثمان
السبـع :: ك** عثمان
ترا هاي سحارة سترو على رواحتكم
خليل خليها تفوتكم تلاثتكم وكلي شتشوف من تدخل
خليل : بعد اخيتج فوتينا جاينج بمصيبة وكلنا
مالها بس نسوانها المعدلة
رفعت حواجبها بعدم تصديق كأنها تعرف أكو أنه بالموضوع سوت مجال دخلنا
ريحـة البيت تگتل گتل سد خشمة خليل ميتحمل واني اختنكت
البيت كُلش صغير وضيق واظلم
ضوه شمس قليل يفوتله كعدتنا بالگاع وكعدت كدامنا سطرتنا تلاثة كدامها
طلعت جكارة من صدرها ودخنتها
: شنهي سالفتجن
خليل : انه اسولفلج حبوبة
:: أنطم أنـتَ
خلي هاذي الي بالوسط تتكلم
بلعت ريگ فهيت بوجهم شنو انطم هي شلون عرفته رجال وهوه منعم صوته أنعم
منـي
خليل : ترا إنه حرمة شنهي انطم
:: عبوب كلي أنته راجل
خليل : ياهو عبوب هذا
وينه شني لا هوه عنبة لا هوه كبة شني هذا
: الجني مالتي
حجت صبا بسرعة بدون تفكير
صبا :: دخيل ابو الحسنين
عثمان :: أنهار احجي وياها كليلها
اني جاية أسوي سحر لرجلي شي ماعرف دبريلج سالفة خلي خليل يباوع
يحفظ البيت
طول الگعده جانت عينـها عليـــة
أنهار : أنـتِ منو
ضحكت بصوت عالي أسمع صوت السبع يفشر بسبب الي كلته يمكن جان سخيف
بنظرة وماعرف شنو الجرأة الي عنده الي خليته يجيبنا هنا وميخاف
: تردين تعرفين منهو أنه ؟
عضيت شفتي بقهر كحت شوي وباوعت على خليل وكالت
: وحول گون أن شاءلله شبيك
ويهـد تباوع
رجعت بصرها عليــة
: جايتج أخبار تهـد الحيل تگسر ظهرج
إنه شايفتج بأم عيني تحبين شخص ويحط على رأسج مرة
ضحكت صبا وكالت بتوتر
صبا : اي هوه شوفي حبيت رجلي
واخذته مني وهسه يريد يعرس عليها وهي متتقبل
: أنـتِ هم تتلوعين هواي
عثمان : كافي اطلعو بدت تمضرط بسرعة اطلعو ولتخافون المكان أصلا
كله مُراقب وهي تعرف ومتكدر تسوي شي
قبل لا نــطلع ڪالت جُملة ظلت
عالگــة باالي
سحبتني قوي عليها حجت بفحيح غضب
: ڪولي للي دازج
عليــة ماتگضي السالفــة
بسهولــة والخليفـة ماينزل بسهل ، اشوفن
زلمة خير عضيدة يصير
اثنينهم يلا يكدروله
ابتعدت عنها أحس من دخلت ولسة جسمي كله يختض طلع خليل يشتم ويغلط على عثمان نزع العباية
والطريق كله يصيـح
صبا تمشي ولازمتني لأن فعلاً ماعرف شنو صارلي طول الوقت بس افكر بكلامها
وگلبي أحسة مقبوض
والگاع تفتر بيه صعدنا بالسيارة وخليل يصيح مخفت عليهن وهوه مدري
منو يخابر بتلفون يحجي وياه عن هاي المنطقة عين على الطريق وعين عليـه
وصلنا للبيت قبل لا أنزل ذبيت العباية بسيارته باوعلي وكال
السبـع :: روحـي لبيتنا بين ما تحل اختج
ورجعي وياها
هزيت رأسي ماعندي حيل أناقشة اول منزلنا طار بالسيارة شخطها بقت واكفة وياي البنية
باوعت عليها تباوع على بيتنا
توجهه بصري على وين تباوع لمحت علي واكف مكتف أيده وبيده جگارة يباوع
عليــة ورافع حاجبة نسيت التعب نسيت روحي نسيت وين اني
ركضت علية بسرعة بدون وعـي أريد اسحبها من أيده رفع أيده ليفوك خزرته وصحت
أنهار :: علي جيبببببهاااااااا
علي :: وسم هلصوت العالي منين
جبتي
جريت أيده قوي نزلت شوية سحبتها حيل من أيده حرگت أيدي صرخت متألمة
:: أخ ولج يمة
فز انتبهه اني احتركت شمرها بالگاع بسرعة لزم أيدي قوي يعتذر أحس تعبت
بكد مشايلة همـه
أنهار :: الحَمدُللّٰـه احترگت
انوب اذا ماتبطل جگاير احرك روحي مو بس أيدي
كفخني على رأسي وهوه بيده لازم أيدي ويباوع عليها رفع عينه لسما ليفوك طول
النظر ضحكت وكلت
أنهار : تدري اكتشفت أنـتَ عزيز
عندي واني هواي أحبك
دنگ عينه علية تقرب لمني لصدرة حاضني جمدت بمكاني أول مــرة أول مــرة يسويها
ويحضني أيده محاوطتني وإني متصنمـة أحس مشاعر هواي اجتاحت روحـي
بهاي اللحظات رفعت أيدي ساحبته اليـة بادلته الحضن واني أحس بمشاعـر
غريبة وخصوصاً بعـد ما طلعت مناك مَــادري كُلشي بيه تخربط
قبل ليبتعد تقرب همس بأذني وكال
علـي : ذيج ليش تباوعلنا
هيج
التفت لكيت صبا صافنه علينـه من شافتنا انتبهه استحت طبت للبيت بسرعة
دفعته من أيده قوي بلكت اكدر من اتقرب منه يبتعد عن هاي الطرق
زفرت نفس براحة رغم القلق الي بداخلي دخلت وهوه دخل قبلي
شمر روحـة على القنفة حط أيدة جوه راسة
علي : وين جنت
نزعت الحجاب وكعدت كدامة
أنهار : الحلقة صغيرة أخذني أبدلها
علـي : ليش مأخذ أخو واخته
أنهار : أخو جانت عنده شغلة وسواها
وأخته اني مقبلت نطلع وحدنا اله وياها بعدني ممتزوجين عيب
رفع حواجبة وعض شفته كاتـم ضحكته
علـي : أخته تضحكنـي جنها
ذني الثولات مَــادري افطس ضحك من أشوفها
أنهار : أنجب ولك
باوعت للساعـة المفروض شـوي وتجي نوران باوعت عليــة صافن بسگف أبتسمت
أكو امل أكو أكو أمل انتشل أخوي من الخيسة الي وگــــع
نوران ::- صافنـة على الطريق ضجت من أنهار ليش تعوفني وبمدرسة جديدة
وحـدي وفوكاها كاعــدة وراه وبكل صلافة ولا چـن موقف البارحـة
ذبيت حسرة مقهورة وأحس روحـي راح اختنگ من گــدما أريد ابجـي وماكــدر
رفعت رأسي أحاول أمنع دموعي تنزل صعبة عليــه متعودة على شي طول حياتي وياي
وبين يوم وليلة اكعد والكاه متغيـر عليــه وميحبني وميردني
جنه ننام لازمين أدين بعض صار يستنگف يلزمنـي فززنـي صوتة
اصهب : ليش تبجين
نوران : معليك خوش
خزرنـي من حلاوة روحـي رأساً خفت وكمت ابجي من شافني ابجي أنصدم وكف السيارة
اندار عليـــة كال
: هايمعودة شكــو شبيج
نوران : إني مارتاحلك أنهار
تكول أنـتَ واحد ادبسزز وعينك زايغة وميصير احجي وياك فـ بعد لتحجي وياي
افتهمت لو لا لأن اذا تحجي يصير شي ميعجبك
رفع حاجبة مستهزاء وكال
أصهب : شيصير مثلاً
حجيت بثقـة
نوران : ادعي عليك
ماشوف الى طگها ضحكة وهز بأيده شغل السيارة وكام يسوق وكلشوي يضحك
ضجت منه شكـــد مقرف ومستفزززز ايع صديت على الجـامة
وصلت للمدرسة فتحت الباب وبس نزلت سديتها قوي حيل سمعت صوته يصيح
ماهتميت بي ردت أعبر الشارع وكف بطريقي ولد اروح يمنى يصير بوجهي
اجي يسرى يصير بوجهي رفعت رأسي خزرته
عبالي راح يخاف ماشوف الى غمزلي وكال
: اروح فدوة للمخنزر
فتحت عيوني حطيت أيدي على حلگي وصحت
نوران : شكد ماتستحي .
راد يحجـي ماحس الى وگــع بالگاع باوعت لكيته واكف وراي وجهه وردة فعلة طبيعية
مو مال شخص عصبي بس ضربته تخوف مال واحد جان منتظرها من زمان
كام ذاك من الگاع تلازمـو وصار واحد يضرب الثاني وإني وكفت على جهه خايفة
لا يعورني والكلمة الوحيده بحلگي
: شكد ماتستحون
اخير شي اجتي العالم فاككتهم والبنات تباوع واسمعهن يتغزل بأصهب لأن
ابيض وحلـو وعنده لحيـة زفرت نَفس افففف تقدمت وحده عليــة لزمتني من أيدي
وكالت :: هذا خطيبج ؟
نوران : لااااا ايعع
عبالك واحد وجان غرگان وهسه طلعو من المي رجعت كالت
: لعد شيصير منج
هستوني ردت اجاوبها انسحبت قـوي من أيدي باوعت جانت بنيـة دخلتني
جـوه
خزرتني وكالت
: لتضلين تنطي حجي للرايح وللجاي
الوگت مو أمان وبطلي تتصنعين هاي الطفولة ملايكتلج
بللت شفتي بتوتر باوعت عليها
نوران :: هدي أيدي
دتوجعيني
جانت ملامحها حاده وغريبة دفعت أيدي بنترة وراحت تمشي خنگتني العبرة
هسه لو أنهار وياي أحس العالم كلها تباوعلي وعيونهـم علبه بالگوه خلصت
اليـوم كله بتوتر وقلق البنية الي سحبتني جانت بصفي كاعـدة
تخوف ماعدها صديقات كاعده وحدها ومنعزله تخوزر بالعالـم طلعت انتظرة
ماكـو أول مرة يسويها ويتأخر ضليت أنتظر والرايح والجاي يباوعلي
شوي واجه صعدت وراه مطنگرة
وگالبه خلقتي
شكـو يتأخر حلوه وكـفتي هنا الطريق هدوء وصلني وفتح الباب نزل مدري شسوة بالسيارة
مانطيت أهمية دخلت للبيت لكيت علـي وأنهار كاعدين سوة الإبتسامة شگت
حلگـي
علي : ها الله يساعدهم
نوران : الله علي بعدك تحبني
كام يضحك هوه وياها من كل گلـبة
فتح أيده رحت ركـضت شمرت روحـي بحضنه وأنهار تباوع النـا مبتسمة زفرت نفس براحة
أحس نفسـي إني بالبيـت فعلاً هسه لأن داحس بالأمان يمـهم
أنسام ::- كاعدين إني وأستاذ هشام
ندقق بالملفات أكو خطأ صايـر رفعت عيني للساعة بعـدة اليوم هم ما اجه
مامتتظرة علمـود شي بس احس روحـي راح اطگ أريد أعرف شصار البارحـة
هشام :: أنسام طلعي صيحيلي لهيب
أنسام :: أستاذ بعده ما اجه
نزع نظارته وباوعلي بقلق
هشام :: بعـده مجاي ؟
هزيت برأسي رجع بالكُرسي ليورة وإني كاعده يمة اباوع دك عليـــة فتح السبيكـر
وحط التلفون على جهه رجع لبس النظارات يكمـل
نفتـح الخط أجاني صوتـه مبين نعسان
لهيب :: شتريـد
هشام :: تعال للشركـة شنو شريد
ميت على خلقتك قابل
لهيب :: مابيــة
نعسان
هشام :: عندي شغل أريد اخلصة إبن
الاوادم ظهـري نگــسر
لهيب :: يطبك هرش شسويلك
غمض عيونـة أستاذ هشام نزع النظارة شمرها حط إصبعة يفرگ الي بين عيونة وكال
هشام :: جؤ جؤ شفتي بابا أنسام كتلج
لنخابرة هذا أخوي وأعرف بي ميجي يشتغل ويانا بس أنـتِ لحيتي وماكدر ارفضلج
طلـب
فتحت عيوني مصدومة أشر على روحـي
أسمع صوتـه يگح بصوت عالي كال بخوفت
لهيب :: لا ليش أصلا طارت
النومـة جاي
عض شفته أستاذ هشام كاتم الضحكـة خاف يسمعها سد الخط وباوعلي أبتسم بمُكـر وكال
هشام :: كُلشي ينحل بالحيلـة
أنسام :: ءاا أستاذ عنـدي سؤال
حجـة وهوه يشتغل بدون ميباوعلي
هشام :: كولي بابا
أنسام :: لتفهمني غلـط عفية بس يعني
البارحـة جنت أفكر إلي أدري بي أستاذ لهيب متزوج
بس من صار العقد أبد ماشفت
لا زوجته لا أطفالة
وگـع القلم من أيدة من ذكرت كلمة أطفالة صفنت عليه بهت وجهه بلع ريگ بلل شفايفة
وكال :
لتحجين بهـذا الموضوع كدامـة أبد
ديربالج نصيحة مني أنسام لتورطين نفسج بهيج سوالف
عضيت شفتي بفشلـة صوجي شكو الغي انطمي شدعي على أم محيسن هاي
منين طلعتلي بس أرجع احضرها بسيطة
رجعت أشتغل وكل شوي الوم نفسي ليش حجيت لحدما فززني صوته وهوه يباوع
بالفراغ ويحجي :
جان متـزوج بس أنفصل عن زوجته بسبب
مشاكل بعدها مجـان يهمه شي جان عايش لخاطـر بنتـة
أبتسم بحـزن وأردف مكمـل بصوت واهن ومگـسور
هشـام : بـس ماتت ومـات
وياها لهيب
أحس دگات گــلبي تسارعت والـدم جمد بعروگي الله يساعـد گلبه إخواني اني وماتحمـل
وأحد بيهـم يصير بي شي شلون أتحمل وبنته هي
جان الجـو هدوء
أحس لزمتني بجية أريد ابجـي علية مَــادري شبية انفتحت الباب دخل كالعادة سلم
سحب الكرسي كعـد مقابيلي يعلج والنظافة الألف استحيت على روحـي
اذا اني اطلع الصبح ماغسـل وجهي
ذبيت حسرة متناسية وجودهم رفع رأسة يباوعلي أحس گوه لازم ضحكته
يباوعلي بنظرات غريبـة كأنو يشوف وحده ثولة كدامـة تجاهلته لأن
هوه طــول الوقت هيـج
خلصنـا واخيراً طلعت أريد اشربلـي مي صاحنـي أستاذ هشام التفت
هشام : بتـول كلتلي اعزمج على الغـدة
اليوم كالت هي ماتردلك طلب ها شتكولين
باوعت عليــة بتوتر أستحي ادخل بيتـهم
هزيت رأسي بموافقة رجعت لمكتبي لكيت عليــة ظرف فلوس بلعت ريگي
حسبتهم راتب مال شهر كامـل شلون ارده افضاله عليـــه هواي
أبتسمت مرتاحـة هسه مراح أشيل هـم خلصت نزلت وية أستاذ هشام صعدت
بسيارته وسيارة أستاذ لهــيب ورانا تمشي
لحـدما وصلنا نزلت باوعت الـة نزل هم سد الباب قفل السيارة وتقدم
دخـل للبيت بوجهه للطابق الفوك ضلت عيوني متمركـزة علية إلى أن اختفى من تحت انظاري
فتح الباب ودخل گفختني ريحـة الأكل أستاذ هشام إلي اعرفـة عنه عنـده تلاث
خوات وحده أم بتول وقيس
والثانية أم اصهب ودق
والثالثة ميتة ماعدها اطفال
وأخو الوحيـد لهيب
أول مدخلت طلعت أم بتول من المطبخ أمها تخوف حيل عدها جبروت وغرور ونرجسيـة
مو طبيعية مرة صايمة مصليـة ملتزمة بصلاتها وكل كلامها بدين
بس لمحت طولـي خزرتني باوعلي أستاذ هشام اباوعلها باوعلها برود وصد
عنها يصيح بتول يصعد على الدرج بدون إهتمام استوقفة صوتها الخشـن
بي بحـة زلم
صبريـة : هاي منهي يهويشهم
لا يكون جايبها تكعد عندنا ؟
هشام : فگي ياخة عنـي لا اخلي
ينزلـج ترا حاد سنونه عليچ گوه گاضبة عنج
أبتسمت بسخرية معقولة هي الي كتلها البارحة مستحيلة شكلها وشخصيتها
مو مال وحده تقبل تنضرب باوعت عليـــة وأشرت بأيدها أجي يمها
تقدمت بخوف امشي خطوة وارجع عشرة دخلت يمها للمطبخ ماحجت شي
جانت تباوعلي بهدوء وبعيونها نظرة غريبة تتفحصني كأنها تخطط لشي
بالـها
أسمع صوت خطوات سريعة على الدرج باوعت بتول لابسة حجاب وجاية ضحكت
بتوتر كالت
بتول : ها يُــمة أنـتِ هنا
صبرية : لا بعرعر انه
بلعت ريگها باوعتلي بخوف وكالت
بتول : شيسمونة اني عازمـة صديقتي على
الغدة برا بالمطعم يعني
خالو جابها الية نطلع سوة
باوعتلها أمها بنظرات غريبـة ومبتسمة بسخريـة
صبرية : هي هاي أنسام
كامت تفرگ بأصابيعها بتول بخوف عين عليه وعين على أمها ماحس الى اندفر الباب
قـوي فزيت مخترعة وكفت على حيلي خايفة
باوعت جان أستاذ لهيب باوع علينا إني وبتول وخزرني اليــة دفعتني صبرية
من جتفها نضربت بالحايط تقدمت على أخوها مرت من يمه تضحك وماعرف شهمست
تحرك أستاذ لهيب بأتجاه سحبتني بتول قوي طلعتني من باب المطبخ وبرة البيت بسرعة جان اصهب واكف يدخن
باوع عليـنا وكال
اصهب : ها نروح
اسمع صوت عياطهم جوه البيت استحييت اباوع بتول متوترة وصوت أستاذ لهــيب
وهوه نازل غلط وفشار بالعالم كلهـا
أنسام : بتول وين نروح ماكدر
اتأخر على إخواني
بتول : شبيج وجع بس نتغدة ونرجع
نغير جو ممليتي من الشغل للبيت للبيت للشغل اوييي
اصهب : وجعويييي دفضيها
لخاطر شوارب زُليخـة
صعدت وياهم مابيدي شي هم من حـقي أعيش حياتي واطلع واطب فعلاً
عزمتني على مطعم واكلنا وهي تسولف ومنطلقة أحب سوالفها بس يمها
أكدر اضحك وانسى تعبي
وصلت للبيت انفتحت شاشة تلفوني بدت الاشعارات تهل باوعت الساعـة بـ ٤:٣٠
فتحت الباب لكيت البيت هدوء رحت فتحت الجدورة انصدمت من شفتهم
ماكلين شعجب
أبتسمت براحة صعدت فوك فتحت باب كُـل واحد بيـهم اتطمن موجودين
فتحت باب غرفة علـي مجان موجود لزمت گـــلبي ركضت على غرفة نوران
وأنهار فتحتها بسرعة
ارتخت ملامح وجهي مي بارد ونزل على گــلبي واني اشوفة نايم يم نوران
هي نايمة على الجرباية وهوه نايم على أيدها رأسة على الجرباية وجسمة على
الگاع
وأنهار بعالم ثاني فاتحه حلگها والگفشه واصلة للسگف شمرت الجنطه بالگاع
نزعت الشال أجواء الغرفة تساعــد على النوم دنيت أنهار ونمت بصفها
وهي تدفـع ونومة نومـة ماحسيت الصبح على صوتهم يتناگرون فتحت عيوني
بنعاس باوعت داير مدايري ديلبسن شالهن مليت من الروتين المتكـرر
غطيت روحي بلحاف ورجعت نمت متناسية الوضـع حولي وناسية الشركـة والدنيا
أسمع صوت تلفون يدك بملل رفعت الغطة عن وجهـي سحبت التلفون
نزيت مخترعـة من شفت الساعـة عزا بعيني توسعت عيوني من شفت أستاذ
لهيب حارگ الدنيـا عليه بالمكالمات
اني وداباوع دك من الخوف شمرت التلـفون بعيد عني الله يطيح حظج يـ بتول
الله يطيح صبغـج
شلته التلفـون وحطيته على أذني لكن سرعان ما وخرته بعيد بسبب صوته
إلي طرشني
لهيب : يابة وداعت الي بالي
خمس دقايق يا أنسام اذا ما المح طيفج كدامي اجي للبيت اخذج اني
سد الخط رأسا مانطاني عطوة احجييي ركض ركـض طلعـت بالگوه وصلت
امشي واباوع للساعة وعلى حظي تلفوني خلص شحن بنص الطريق
فتحت الباب ودخلت ركض دخلت أوقع صار بوجهـي خازرنـي جان أكو أوراق من البارحـة نقص
وحظي خلاني إني الي جنت مدققة بيهم ضل يصيح ويعيـط عليـــة واني
دمعـة بطرف عيني كلها انتبهت لـ أسلوبة وياي بش محد يحجي كلها خايفة
كعـدت واخيراً بعـد مالكيتهم الـه وهوه جنه العمة واني جنتها بس يدور
زله حتى يتعارك وياي ويرزلني كدامهم زفرت نــفس بقلـة حيلـة ماينحزر هذا أبد
صبا : الأيام تمشـي ركـض ركض بدينا نحضر للعرس وهوه حصرنـا فدنوب
الى ورة أسبوعين البنية تركض منا ومنا ومنا دوامها وامتحانتها وهي سادس
وهوه ميقبـل الى بهاي الفتـرة وليالي ومسؤليتها عليـــة وإمي وجدتي مايدخلن
روحـهن ومرت عمي وبتها مالهن غرض بس بالاسم عايشات ويانا اهمشي يأكلن
واكو من يصرف عليهن
زفرت نــفس عطت بصوت عالـي
:: لججججج ليالييييييي اكعدي مامااااااااا
تضرب برجلـها بالگـاع قوي وتصيح
:: اريدددددددد عموووووو
وخريييي أنـتِ وخريييييي
خليل جان كاعـد يم علـي أخو أنهار صارت كعدته هنـا حتى بيبتي تحبـة
وتسولف بيـة تكول خوش ولـد
كامت تركـض واني وراها وصوت عثمان يعيط يلااا يريـد يأخذني أشتري
فستان للعرس قرب مابقة شـي
انهاريت كعدت بالگاع ابجي باوع
عليــة بخوف
السبـع : شبيج بوبة شجرالج
عليش تبجين بنيتي
صبا :: تعبت تعبتني ليالي
والله تتعبت موتتني هاي خطية من تجـي ودراستها شلـون بيها
دنگ راسة كال
:: ميخالف ڪُلشي ينحل
رفعت رأسي مصدومة
:: صدُك تحجـي تكـــول هيج
وأنت عندك أخت مو حرام عليك خوية مو باجـر تصير بيـة
هز برأسة حاير أول مـــرة أشوف اخوي هيج محتار بهلتناقض ساعـة أحسـة يحبها
وساعة أحسـة موطايقها
نهضت علـى حيلي صعـدت أرتب بالبيـت ولبست وطلعـت وياه وداني
للسوگ اشتريت فستان عجبنـي كُلش جان لونه أصفر فاتح هيج جذبني تصميمة
مو كُلش هوسة بنسبـة للباقيات
أباوع على الطريق وليالي تهوس بحضني فرحانـة گح عثمان وباوعلي وكال
: عزمتيها ؟
باوعتله بقـهر
صبا : عثمان إذا بعـدك
تحبها ليش ورطت بت العالـم وياك
استغفر وكال
: يابة وحق عرش الله ماحبها
ماحبها بس هي وحده ساقط** تستاهل من يگسرها عينها چان كل اعتقادها ماكــدر
بلياها ومستحيـل أتزوج غيرها بس أنه
اعرف شلون الوي ذراعها وافضحها
باوعت بعـدم ثقة ماثق بكـلامة
مَــادري شديسوي وين يريـد يوصـل
وصلـنا للبيت نزل صارت بوجهنا أنهار تنزل من سيارة رجال چبير يطلع بعُمر
عثمان هيج شي جان يخوف وبس يخـوزر أشرلي عثمان افوت
بس ماكــدر ضليت واكفـة اباوع عليهـم بالختله فاتت ليالي بسرعـة تركض تريد
تباوع تلفزيون باوع عثمان على أنهار وكال
: الله بالخـير
رد عليـــة الرجال الثاني
: الله بالخيـر والعافية خيرك
شو جنك داخل تتعارك مو تسلم
عثمان : لا ليش طبيعي
كلش إني أنت الي موطبيعي ليش تنرفزت بسرعـة
ضحك بأستهزاء وكال
: اني
عاطت أنهار
: هاشكو شبيكـم حتتعاركـون
كتف أيده ذاك وكال
: والله مَــادري شوفي رجلج
شبي هـاد عليـنا
رفع حواجبة وبلل شفته وكال
: مدام تعرف رجلها شعندك واكف وياها
تقربت أنهار علــى عثمان تحاول تهـدي
أنهار : شبيك عادي گـرايبي
يوصلني
عاط بصوت عالـي ومتنرفـز
عثمان : گرايبج منين طلع گرايبج
منيننن عندج احد أنـتِ
يحجـي بعياط ماحس الى ذاك الرجـال تقدم عليـة لزمه من ياخته وضرب گـله بگصته
ماشوف الى أخوي رجـع ضربـة بوكـس
لزم طرف شفته ذاك طگت دم شويـة مسحها بطرف شفتـه وكف بهدوء مسح
على ملابسة الي تدمرت من الگاع وتولـه أخوي ضرب نام فوكاه يمكن عثمان
مجان متوقعت ضرباته أخير شـي من استوعب تلازمـو
طلعت على صوتهم العالم من بيوتها تفاكگهم وأنهار جامـــده بمكانها بمُجرد
ماحجه حجايته ذيج أخوي أحس أطرافي كلها ترجـف من الخــــوف
أنهار : لهيب كافـي
عوفـه كلامه صحيح ما وراي أحد إني
غمض عيونـة بنفاذ صـبر باوعلها وكال
لهـيب : شواربـهم اذا تغثج ازينها
والبسـهم شيلة واكـعدهم الج مثل النسوان بالبيوت لا تكولين ما وراج أحد إني بظهرج
فوتـي بزودج وأريد رجال طالـع من ظهـر رجال يفگ حلگــه وياج إذا ماسوي الج نثية هذا شاربي
ازينـه
يحجي ويباوع على أخوي الي عيونه تجدح نار لـ أنهار ولـ الي أسمـة لهيب
حط أصابيعة بين عيونة لازمهم قوي دمارات أيده مبينه من العصبية يضحك بصوت
عالي والعالم تهدي بيهم
ماحس الـى دفـع الزلم الي لازمينـه قوي من أيديهم خطف نظرو إلها قبل لا يروح
خـزرة
ركضت فتـت للبيت بسرعة نزعت الحجاب وسويت الدرج خمس خطوات حتى
خاف يشوفني ينتحـر بيـة صعدت فتحت الباب ليالي تأكل بـ تفاحـة
وتباوع تلفزيون وتركص مثلهم
شمرت روحـي على الجرباية أجر النفس أريد تنفسي ينتظـم أخاف يفوت وهوه متفوته
فايته
شـوي ورجـع صار صوت كُلش عالـي لزمت گلـبي ليالي خافت سدت أذنها حيل
نزلت متخبلة لاكاني خليـل طلع من غرفته البيت كلـه نخبص اخذت الشال على رأسي
طلعـت أباوع الرجال الي جان
يتعارك وي أخوي كـــــاعد بالگاع سانده جسمة على سيارته مضروب
طلقـة .
يتبــع ..
الحكايــــة تستمر إلى إحداث أخرى .
𖦆 𖦆 𖦆 𖦆 𖦆 𖦆 𖦆 𖦆 𖦆 𖦆
حسابي انستا للتواصل 👇🏻
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!