انثى في عرين الوحوش الفصل العاشر 10 - بقلم الاميرة ارجوان

الكاتبة الاسدية

محسن اليوم انة وماجد خذيت البنات وطلعتلهن جناسي وماريد احد يعرف عبن مامش جهال فصلية عدهم جناسي

هيلة مافهمت شنهو يعني جناسي بس حسيت كلش مهمات من خوف محيسن عليهن وعبنة مايريد واحد يعرف بيهن

مرت حياتي كل يوم وانة حتى الخدامة احسن مني الا ان اجة اليوم المشؤوم

مثل كل يوم اكعد من الصبح اروحن للكاع احوشن الزرع وبنياتي وياي عبن مامش واحد يداريهن ولا واحد يريدهن

كعدت بناتي بالفي وانة احوشن حسيت واحد هجم علي وهو يكلي اليوم ماعوفنج اليوم اطفي شوك سنين وانتي جدامي وماكدر اضوكنج

حاولت انهزم وجان اشوفنة غضبان بس عيونة حمر وريحتة تكتل كتل

هيلة دخيلك خوية عوفني انة حرمة عمك حرام عليك

غضبان لو مو حرمة عمي لو حرمة ابوي اليوم ماعوفنج

هيلة دخيلك منا بنياتي عبن عيب يشوفن هيج امهم تساوي خاف الله دخيلك

غضبان انة اليوم كلش سكران ماعرف لا عيب ولا اعرف الله واليوم الا اشبع منج ماعوفنج

هيلة دخيلك ربي استر علية انة عرضك ولك حرام وهو ينزعني الشيلة ويهجم علية

كمت اصارخ واصيحن اريدن واحد ينجدني منة

غضبان لاتصارخين راح اشهرنج واكولن هي ودت علية للزرع عبنها تحبني وتريدني

هيلة شلون وديت عليك وشلون اصيحن وصارخ اريدن واحد ينجدني

وانة بعدني اتلاوة وي غضبان واتوسل بي ماحسيت غير واحد طك غضبان بكرك وكعة بالكاع

محسن لك نذل ساقط تتعدة على شرف عمك ياناقص غيرة

هيلة محيسن والله انة جنت اصارخ هو هجم علية

محسن اعرف انة جنت اراكبة شلون يترصدج بس ماجان عندي دليل علية

واليوم شفتة راجع سكران كلبي لعب وجيت وراج للزرع

هيلة توني سترت روحي بحظن محيسن ماشوفن غير غضبان كوم وشيل الكرك وطك محيسن على راسة

اشوفن راسة انطر بالنص والدم يتطاشر علية وعلى الكاع
طاح محيسن وهو يرافس مثل الدجاجة المذبوحة

انة ضليت بصدمة ركضت على بنياتي غطيت عيونهن حتى لايشوفن ابوهن وهو مجتول

غضبان شوفي ولج ترحين منا للشط تغسلين الدم وتعديل روحج وتاخذين بنياتج وتمشين جنج مادريتي ولا شفتي شي

هيلة وزلمتي الي انت جتلتة

غضبان هس ولا جلمة وياويلج اذا سمعت منج حجاية لو حتى وية روحج موش انة الي جتلتة خوش

هيلة جا ياهو الجتلة

غضبان مانعرف ياهو الي جتلة ولو طلعت حجاية وحيدة من حلكج اذبح بناتج جدام عينج فهمتي يو لا

هيلة اي فهمت فهمت

خذيت بناتي ومشيت صوب الشط غسلت الدم الي تطشر علية وانة بعدني اتراجف

تذكرت ماخذيت الزرع الي حشيت رجعت اركض خذيت الي اكدر علية ورجعت وي بناتي للبيت

ركضت على العجين وجيمت التنور بديت اخبز

بس شني جسمي كلة يتراجف منظر محيسن وهو سابح بدمة مايروح من بالي

لو من اتذكر غضبان والي جان ناوي يسوي بية

سكينة شمالج طيحتي الخبز كلة بالتنور

هيلة ها ماعرف عبن جسمي لازمتة الرجيفة

سكينة هدي من ايدج انة اكمل خبز

هيلة اي والله عبن روحي لايبة اليوم

سكينة امشي روبي لاتكعد عمتي منسية وتلعب بيج جولة

هيلة ها بعدني ما حالبة الهوايش

سكينة يا اليوم شمالج يخايبة صابج العباس

هيلة هو انة من زمان صايبني العباس خلني اروحن احلب كبل لا تكعد عمتي

رحت للحضيرة اريدن احلب تذكرت بناتي عفتهن وحدهن بالحوش رجعت اركض واسمع غضبان يحشم ويهوس

غضبان خايبين هو ياناس يا عالم عمي محيسن لكيتة بالكاع مجتول

شوي وصار الثغيب والهوسة والمراكض مالة والي

بس الله يعلم منين كامت تجينة الكفخات انة وبناتي انة موش مهم المهم البنات هذن زغيرات ومايحملن

كلمن يكوم يكفخ ويصيح فكر وياخذنا شوط بالكتل والمكافخ

غير مرت محيسن وبنتة كريمة وبنتة فريدة الي توها عمرها 12 سنة وصارت وياهن تشاركهن بكتلي

التمت الوادم وعشيرة ال شنون كلها اتسلحت ويردون يعرفون ياهو الجتل محيسن

غضبان اخافنة حسن ابن عم هيلة هو الي جتلة عبنة جان ناهي عليها ومحيسن خذاها فصلية

الي سمعتة رايحة الزلم وداكين بيت عمي

بعد شوي جوي عمامي دكو ال شنون عبنهم موش هم جتالين محيسن

ردت الطلايب بين عمامي وبين ال شنون من جدة وجديد

بس الحك صار وية عمامي عبن حسن جان ملتحق بالعسكرية وصار اسبوعين هو بالشمال بالوحدة مالتة

واخذ القصل وجيب الفصل والحك كلة العمامي كلت جاني الفرج راح عمامي يرجعوني عبن زلمتي مات وهم اصحاب حك

بس يمكن نسوني ولا واحد ذكرني ولا واحد داعة بية فضت السالفة بفلوس

وراح دم محيسن وتركني بعذابي عبني اعرف جتالة وسكتت عبني مالي والي واخافن على روحي وعلى بنياتي

اخافن جان محيسن يحاميني شوي هسة حتى محيسن راح

ماكدر اسولف عن الظلم الي شفتة من عمتي والنسوان الي بالبيت

كامو حتى بناتي مايخلوهن يمي وخلوهن يكرهني ويسبني ويفشرن علية

ضاع دم محيسن وضاع حكة

مرت سنة وانة على حالي بذل ومهانة الي اصبح بي امسي بي

الى ان بيوم اجت كريمة تكلي احسبي حسابج زواجي من حميد الجمعة وغضبان يريد يتزوجج اول مرة اشوفن فصلية تتزوج عبنهم يخافون تصخمين وجوهنا وتمشين بطريج الاعوج

هيلة انة اتزوج غضبان شنو انة عبدة عدكم وتبيعوني للرايح والراد

منسية اي انتي عبدة عدنا ونبيع ونشتري بيج اشتريناج بدم ابني موش زين مني ماشمرتج للجلاب تاكل لحمج بس لحمج نجس حتى الجلاب ماتاكلة

ماضل الي بس يومين واروحن من ظلم الى ظلم

ونوب اروحن يم غضبان الي جتل زلمتي وهو ماخذ نسوان اثنين وكل وحدة جنها سعلوة

ماعرف وين انطي وجهي والمن اروحن اشتكي

من غير بنياتي الي عمري ما راح اشوفنهن وراح يعيشن حياتهن مثل مصيري

تذكرت سالفة مرة سمعتها من امي تحجيها المرت اخوي عن وحدة كرابتنا رادو يزوجوها الاخو زلمتها من مات وهي خذت ابنها وشردت محد يندل دربها

كلت ليش ما اشرد منا واخذ بناتي وياي

بس شلون اخذ بناتي وهن موش يمي صار هواي مايخلوهن ينامن يمي

كلت اروحن اتوسل بكريمة اليوم يباتن يمي عبن باجر من الصبح راح اروحن البيت غضبان

سويت الي جنت افكر بي ورحت حتى راسها بستة بس الليلة يباتن وياي

تذكرت الجناسي سويت بقجة بيها هدمتين الكل وحيدة بينا وظميت الجناسي مال بناتي حسيت بيهن كلش مهمات

صار الليل والبنات نايمات وانة احومي منا ومنا وكل شوي اروحن للحمام اشوفن اذا واحد جاعد

حسيت السلف كلة نايم موش بس بيت ال شنون

شلت نرجس وشلت البقجة وكعدت جوري زين ما كعدت الوادم من بجيها وجانت الدنيا كلش باردة والبت تبجي

لفلفتها بشيلة من شيلاتي ولفلفت نرجس بغطة خفيف وطلعت من الحوش مثل الحرامية

طلعت وانة امشي بساع بساع وكل شوي انجبح على وجهي لا انة اندل طريجي ولا انة اعرف وين اروحن

كلت مامش غير طريج النهر امشي وياه حتى اصيرن بعيدة عن سلفنا

الليل كلة امشي وجوري تبجي بجيها يجيب التايه وبس الجلاب تنبح علينة وتريد تعضنة

شلت بايدي عصة كمت اهشن بالجلاب البنات تعبن ونعسن وكتلهن البرد

وانة ماكدر اكعد شوي نرتاح عبنهم لو حسو علينة يجون ورانة واكيد راح يكتلوني لاني شردت

امشي وشوي شوي طر الفجر علينة يعني اذا يدورون علية راح يلكوني بساع

حسيت روحي بمجان كلش بعيد وجوري وكعت بالكاع من التعب والنعاس

نزلت نرجس تمشي وشلت جوري منا جوري جبيرة ومنا انة تعبانة والخوف جاتلني كعدت على شارع مامبلط كلت هلبت يمر واحد منا ويساعدني

البنات نايمات اثنينهن بحظني وانة اغفي شوي شوي واهيس حس سيارة من بعيد

مامش مجان اختل وراه خافنهم ال شنون جايين يدورون علية

واشوفن السيارة بيكم وبيها نسوان صاعدات بالبدي وزلمة جبير يسوق

اشرت ليهم وانة اصيحن اوكف اوكف حجي خذني وياكم

السايق انتي ياهو وين ماشية

هيلة حجي رحمة الوالديك خذني وياكم اريدن اروح الهلي بغداد

السايق مامبين عليج بت بغداد وجنج عاملة عملة وشارده

هيلة عمي بروح اهلك اريدن اودي بناتي البغداد يم اخوهن عبنهن يتيمات واهلي يردون يزوجوني ويشمروهن بالشارع فدوة اغديلك

السايق خوش انة طريجي موش البغداد لاجن اوصلنج البجان يوكف بي سيارات الولاية ومناك امشي البغداد

هيلة صعدت يم النسوان ضلن يعاينن بوجهي جنهن مامصدكات يكلامي

جوري فزت من النوم بردانة وتبجي من البرد والجوع وحيدة من النسوان شالت جرجف مغطية بي الكيمر ولفلفت جوري وطلعت كرصة خبز خلتها بايدها

مشينة مسافة وكفت السيارة وصاح علية السايق

السايق عمي نزلي اهنا راح تمر سيارة للولاية صعدي بيها ومناك صعدي البغداد خوش

نزلت ونزلت البنات اخذت الجرجف من جوري ردت اطي للمرة كالت لا عوفي الجاهلة بردانة خطية

ضليت على الشارع تمر سيارات هواي بس ماعرفن ياهو تروح للولاية

وكف يمي زلمة خفت منة وخرت غاد منه كالي المن واجفة هنا ماتصعدين كل شوي مارة سيارة

كتلة اريدن اروح للولاية وماعرف ياهو سيارة الولاية

الزلمة كال انة رايح للولاية اصعدي وياي

اشر السيارة وكفت صعد بيها وانة صعدت وراه

السايق كال ادفعي الكروة كتلة شني هي الكروة ماعرف

الزلمة الي صعد وياي كال يعني فلوس

كتلة انة ماعندي فلوس

السايق كال عليش صعدتي اذا ماعندج فلوس

الزلمة كالة انة ادفع كروتها مشت بينة السيارة هواي وراها نزلو كل الي بيها ومنهم الزلمة الي وياي انة هم نزلت

كلمن مشة بدربة وانة صحت على الزلمة حجي بروح ابوك شلون اروحن البغداد

كالي الزلمة تعالي اوديج السيارات بغداد مشيت وراه جان يلتفت علية وكال انتي مو كلتي ماعندج فلوس جا شلون ترحين البغداد

كتلة ماعندي هلبت الله يوكفلي ابن الحلال وياخذني بلا فلوس

طلع من جيبة ورقة كال هاج هاي دينارين ماعندي غيرهم مو تضيعيهن من يكلج السايق كروة انطي بس واحد منهم كليلة ماعندي غيرة كون الله يقبل وضمي الثاني اخافنج بغداد بنياتج يجوعن وكليهن خوش

وصلني يم سيارة كلش جبيرة كال هاي توصلج البغداد

صعدت وانة خايفة عيني تدور منا ومنا حطيت نرجس بحظني وكعدت جوري بصفي

ضلت السيارة واكفة هواي حتى تنترس اجاني واحد كال هاي الجاهلة نفر كتلة هاي بتي كال ادري نفر كتلة لا اسمها جوري

ضل يهذري بالحجي انة شكتلة وهو ضل يحجي علية
جان يكعد بصفي ولد شاب لابس مال جيش وحط جوري بحظنة وجوري اتخاف منه كل شوي تشمر روحها علية وهو يكللها اكعدي امج بحضنها اختج

مشت السيارة وانة بعد من التعب والخوف ماعرف شلون نمت فزيت على صوت يكلي ادفعي الكروة

اتذكرت يعني شني الكروة طلعت ورقة الي انطاني اياها الزلمة ونطيتها للولد ضل يكلب بيها كال اريد الكروة

كتلة هي هاي الكروة جا اكو غيرها كروة

كال هاي قليلة بعد اريد كتلة ماعندي بس هاي كام يصيح على السايق وضلو يحجون علية

هيست روحي هاكداتني عبنهم يحجون علية ويكولون جذابة عندج

ماعرف هم ليش هيج يكولون انة موش جذابة

الولد الي كعد بصفي كال انة انطيك بقية الكروة طلع فلوس من جيبة وانطاهن الة كال انتي وين رايحة البغداد

كتلة هو اروحن البغداد

العسكري ادري البغداد بس وين بغداد جبيرة شنو اسم المنطقة الي رايحتلها

هيلة اسمها بغداد

العسكري خاف تقصدين بغداد الجديدة

هيلة جا هي اكو بغداد عتيجة وبغداد جديدة

العسكري لا المنطقة اسمها بغداد الجديدة

هيلة انة مادري عبني مارايحة كبل

العسكري زين انتي المن رايحة بغداد وتندلين البيت الي رايحتلة

هيلة رايحة الاخو بناتي اسمة ماجد وهو يعيش ابغداد ويشتغل هو وحرمتة سوية

العسكري خوية انتي هيج راح تضيعين اذا كلشي متندلين

هيلة لا انة اندل اهل الحلال هواي من اكللهم انه رايحة الماجد وعندة بت اسمها رشا هم يدلوني عليه

سكت الزلمة وانة سكتت ورجعنا نمنة الحد ما فزيت على صوت هوسة والوادم تنزل من السيارة

الولد كعد جوري وانطاني اياها ونزل وانة هم نزلت بس شنو الوادم شكد وهوسة

جنت كل ضني من اكللهم على ماجد ياخذوني اله بس ياهو الي اسالة يضحك علية ويروح

والي لا يضل يسال يكلي هو وين بيتهم شنو اسم المنطقة وانة كلشي ماعرف

كعدت بالكاع وبناتي بصفي ضلن يبجن جوعانات تذكرت الورقة الي انطاني اياها الزلمة طلعتها ورحت على عربانة يبيع بيها هيج شي حلو شكلة كتلة عمي انطيني من هاذ

كال اسمة كعك انطاني ثلاثة بالورقة خذيتهن همزين انطاني ثلاثة عبني انة هم جوعانة

صار علينة العصر وانة بعدني بمجاني الي عرفتة اسم المنطقة كراج النهضة وانة ماعرف وين انطي وجهي وين اروحن

جاعدة بالكاع اجتي مرة تعاركت وياي تكلي هاذ مجاني امشي غاد لاتضلين يمي

مشيت عنها غاد كعدت اجاني واحد يكلي انتي غريبة موش منا ياهو الي مشغلج

كتلة انة ماشتغل انة جاية على بيت ماجد اخو بنياتي وضل يسالني وانة كلشي ماعرف

كالي لاتضلين عنا خافن يجوج الشرطة ويذبوج بالحبس

انة خفت من الحبس عبن كرابتنة مرة انحبس وكتلوة بالحبس من كد الدك علية بالصوندات

ضليت ابجي وين اولي وين انطي وجهي شفت زلمة جبير بالعمر يمشي شوي ويكعد امبين علية تعيبان وموش بصحتة

كلت هذا زلمة بكد ابوي خلني اسالنة بلكت يعرف ماجد

حبايب كلبي سؤالي منو هذا الرجال هل راح يكون اله دور بحياة هيلة وبناتها

احلفكم بداعت منسية وغلاتها عدكم صوتولي 🌟🌟

تقبلو تحياتي اختكم الاسدية

https://www.youtube.com/watch?v=rmBJklYsQ14