انثى في عرين الوحوش الفصل التاسع 9 - بقلم الاميرة ارجوان

الكاتبة الاسدية

مساء السعادة على عيونكم حبايب كلبي

طبعا بعد ما اعتب عليكم واكول ليش التصويت قليل لان ميفيد العتب

جنت كل يوم كبل لا يطر الفجر اكومن اشتغل بالزرع وبالحلب ومن ارجع من الحلال اخبز وانظف خلني خدامة

وكل هذا زلمتي مايدافع عني بس بالليل يجي مثل الحرامي ويروح بعد ما يكلي انتي حرمتي ويسوي الي يريده ويروح

ويوم الي تشوفني منسية هذا يوم اسود ومصخم تكلي ماريد يوم المحج جدامي

جني ماجلة عشاها ليش هيج تكرهني ماعرف

بيوم وانة بالزرع سمعت صوت تبسبس وضحكات جني اعرف هاذ الصوت

تكربت شوي شوي واشوفن كريمة بت زلمتي وي واحد وهم متشابكين ويحب بيها من كل مجان وانة صرخت بيهم

الولد الي وياها شرد وهي ضلت بكل عين صلفة واجفة

كريمة شعندج هناية وشتسوين

هيلة انة شعندي يو انتي وهاذ ياهو وياج هيج تسوين وياه موش عيب

كريمة شوفي هيلة وداعت ابوي واخوي اذا سمعت حسج كايلة شي هسة اصيحن والم الوادم عليج واكولن شفتها وية زلمة بالزرع تتمعشك وخلي يطمون عارج هنا

هيلة انة موش عار حتى يطمو انتي الي جبتي العار الهلج راح اروحن الابوج واكلنلة على كل شي

كريمة خلنا نروح انة وياج وانتي كولي شفت كريمة وي واحد وانة اكولن شفت هيلة وية واحد ونشوف ياهو يصدكون وياهو يذبحون لتنسين انتي فصلية

هيلة طبج مرض انتي وامج ان شاء الله تنشهرين بهاي سوايتج ويذبحوج

عفتها ورحت عبن اعرف ماراح يصدكوني ويذبون تهمة علي
من غير هاذ مغنتب الفاسد كل يوم يترصدلي من اروحن للزرع ويضل يحومي علية مثل العتوي من يترصد للسمجة

انة اخافن منه عبنة كل يوم يسوي حركات بعيونة جنة ابو شلش المسودن هيج يسوي بعيونة عبنة مايشوف

لو يضل يلعب بشواربة جنهن المكناسة الي انظف بيها وكل شوي من اخبز يجي ياخذ كرصة خبز ويطخ بجسمي
لو من احوشن الزرع

غضبان ها يحلوه شتساوين هين

هيلة انة احوشن انت شتسوي

غضبان انة جاي بحلالنا وانة حر وين اروحن وين امشي

هيلة خوش عبنك حر جا ضل مرابط هنا عبن اكو ثعلب يترصد للدجاجات مالتكم خل عينك عليها زين

غضبان انة مامش دجاجة تهمني غير وحيدة ويجي يوم اضوكنها وامصمص عضامها عظم عظم

هيلة كون العظم يوكف بزردومك وتموت

غضبان هاي عليمن ولج

موش عليك على الذيب وعفتة وركضت اشوفن العجين

نورية وين جنتي او ويامن

هيلة جنت احوشن بالزرع خلصت وجيت اريدن اشجر التنور واخبز

نورية كل هاذ الوكت بالزرع يو جنتي تسوين شي ثاني

هيلة لا جنت بالزرع احوشن

كريمة يمة انة اشوفنها تتختل بالزرع جنها وحدة مسوية عمله

هيلة هو انة الي اتختل يو انتي

نورية جا اليوم حجيتي على بتي وهيج تكولين يافصلية يا خدامة يا .... يا ...... ولزمتني هي وكريمة موتني تموت حتى دشداشتي شكنها علية

ماخلصني منهم غير غضبان بس شلون خلصني يجر بية من جواهن وهو كل شوي لازم مني مجان عيب وانة ازيدن بالعياط

ماجد ولكم شني هاذ صوتكم واصل الذاك الصوب

نورية يا هلا هلا يمة مجود شلونك مشتاكتلك يابعد امك واهلها

ماجد شلونج يمة شكو شنو هاذ المصايح وياهو هاي المكرودة الي وكعت بيدجن

كريمة شلونك خوية هاي الفصلية الي شمروها على ابوك

ماجد استغفر الله انو شنو ماكو خوف من الله شني ذنبها هاي الجاهلة وابوي شلون قبل

نورية ابوك موش راضي بس تعرف اوامر جدتك يمة شوكت جيت من بغداد

ماجد كبل شوي وصلت ومريت على ابوي بالسوك عبن كلت ابشرنه صار جد اجتني بنية كلش حلوة

منسية هلا بمجود هيج كشمرتك بت بغداد ونوب خلفت منها بت هاي شتطلع على امها

ماجد جدة وشمالها امها بت اصل وبت ناس اجاويد

منسية بس موش من بنات عمك عبنك راح تسويها سنينة الزلمنا ياخذون غريبات ونوب بت ولاية لا هي من ثوبنا ولا هي من عوايدنا

ماجد جدة كل واحد حر يسوي الي يريدة وانة اجيت اكللكم صارت عندي بت اسمها رشا

نورية رشا شنهي جا حك التعب والربة جا سميتها نورية

منسية من زينج ومن زين اسمج جا سماها على اسم حبوبتة منسية بس لا البغدادية ماتقبل يخافن على زعلها

ماجد جدة انتي وامي على راسي بس باجر عكبة البنات يضحكن عليها بالمدرسة عبن هسة الدنيا تطورت والاسماء اتطورت وبعدين لتزعلين هي هواي تشبهج حبوبة

منسية لاتكشمرني بهاي سوالفك عبنك ماجبت مريتك تعيشون ويانة بحوشنا

ماجد جدة مرتي ماتكدر تعيش هنا وتعرفين دوامها بغداد

نورية جا يمة انت موش زلمة شلون اتخلي مريتك تشتغل موش عيب من الوادم

ماجد يمة من شنو عيب مرتي تشتغل صيدلانية والحمد لله هسة فتحنا اني وياها صيدلية والصبح دوامنة سوه بالمستوصف

منسية اغسلي ايدج يانويرية هاذ ابنج راح من ايدج واذا هسة كل خمس اشهر تشوفينة بعدين كل عشر سنين يلا تشوفينة كولي كالت منسية

ماجد اكول يمة انتي وكريمة راعن الله بهاي الطفلة مو ذنبها من الله طيحها هيج طيحة وصارت فصلية

نورية انة مراعية الله بيها وهي بحسبة بتي كريمة

هيلة مر اسبوع من ابن زلمتي موجود ويانة انة صرت بخير مامش كتل ولا غلط واهم شي ابوه ابد ماجاني من هو موجود

وبيوم الصبح وانة اخبز حسيت روحي راح اوكع بالتنور جن الدنيا ادور بية وساعة تصير سودة دخيلك ربي ماعرفن شبية

ماحسيت على روحي الا وانة وكعت وتطشر العجين واسمع صوت زلمتي وابنة يحجون يمي ويكوموني

ماجد بوية اظن مرتك حامل

محسن ها لا لا مامش هيج شي

ماجد شنو المامش امبين على البت حامل

محسن هس لاتسمع امك وتسويلنا كونبة ( مصيبة وهوسة )

ماجد جا امي موش تعرف هي حرمتك ويجي يوم وتحبل منك ويصير عدها جهال

محسن انة ماريدن فروخ منها جا امك تخنكها هي وفروخها

ماجد بوية هاذ الي تسوي حرام هي مالها ذنب جا انت من ماتريد جهال عليش تتكرب منها

محسن هس لاتسمعك امك

ماجد يمة يمة تعاي مرت ابوي حبلى حتى تعرفين من هسة

نورية يا شنهي حبلى جا هو ابوك يايوم متكرب ليها

ماجد لا يمة حرام البت حبلى وابوي كل يوم كارب ليها

هيلة كل هاذ الحجي وانة ماعرف ياهي الحبلى ونوب حرمة زلمتي اجت تريد تهمشني وتكتلني بس ماجد ماخلاها

ماجد بوية البت بعدها زغيرة واذا تضل يومية تنكتل تروح تموت هي والجاهل الي ابطنها

محسن لا منا وغاد اشوفن مرة تمد ايدها على هيلة

نورية ها يالفصلية صرتي حبلى عدالج تصيرين وحدة منه لا هاذ مايصير على كص ركبتي جا صارت سكينة وحيدة منه

ابد ضلت فصلية وضل ابنها مالة كل حك عبنة ابن الفصلية خوش عساج ماجبتي عشرة تضلين فصلية وجهالج جهال الفصلية

هيلة اكول خوية هي ياهو حبلى

ماجد انتي حبلى شني ماتعرفين روحج حبلى

هيلة لا انة ماعرف كلشي جا انة شلون صرت حبلى

محسن هيلة موش كل سؤال ينسال لاتضلين جاهلة انتي كبرتي وصرتي مرة وهسة حبلى وراح تصيرين ام اعرفي حجيج زين

هيلة جا غير اعرف حتى لا ضلن جاهلة بس هاي هية ماحجي شي بعد

ماجد اكول هيلة كونج ترحين يم مرتي.جا علمتج هواي شغلات

بوية خلني اخذها وياي البغداد جم يوم واردها الك

محسن لا بوية الوادم تاكل وجعنا عبن فصليتنا تطب وتطلع ونوب تروح البغداد بوية جدتك تلعب بينا جولة

ماجد ماكو فايدة الي براسكم براسكم بوية انة ماشي البغداد واحلفنك بروح ابوك عينك على هيلة

محسن جا بوية ماراح تجيبلنا الفرخة نشوفها انة وحبوبتها وجدتك خلها تعرفنا

ماجد اكيد بوية اجيبنها هي ومرتي بس خلها تشد حيلها عبنها جابت بعملية

هيلة خوية اخافن انة هم اجيب بعملية

ماجد لا خوية ان شاء الله موش عملية

هيلة كل ما تمر الايام وانة احس روحي موش زينة وتعبانة

وكل يوم مرت زلمتي هي وبتها ومرت طالب الي جتلة اخوي يزيدن بالكتل وماكو شي ماسونة وياي حتى يوكع الجاهل

بس ربج جان رايد يعيش وبيوم وانة بالزرع حسيت بوجع كلش قوي كوه رجعت للبيت وانة ابجي اريدن امي
تلكتني سكينة

سكينة ها شمالج تونين

هيلة عندي وجع كلش كوي ابطني

سكينة اخافنج تردين تجيبين

هيلة شنهي يعني اجيب يعني راح يجيني فرخ واصيرن ام

سكينة اي روحي دشي الحجرتج لاترحين تجيبين جدام الزلم

هيلة يمة الحكيني راحن اموتن فدوة سكينة اريدن الجدة تجيبني امي جانت تجيب الجدة النسوان اخوتي حتى يجيبن

سكينة مامش جدة الي مثلنا فصلية تجيب وحيدها يتمنون نموتن ويخلصون منه دشي حجرتج وانتي عيني نفسج

هيلة جا انة كلشي ماعرف اخافن اموتن لو الفرخ يموت

سكينة انتي صيري سباعية وبس صيحي يا علي هو يسهل كلشي

هيلة اكول سكينة جا هو زلمتج موش مات انتي ليش مارديتي لهلج

سكينة انة فصلية حتى من زلمتي كتلوه انة اضلن خدامة هنا الرايح والراد يكفخ بية ونوب ابني مسودن سودنوه المايخافون الله

هيلة لاتكولين علية مسودن انة اشوفنة كلشي مابي عبنة يسولف وياي زين

سكينة من ظلمهم سودنو الولد

هيلة اه ولج يمة ولك بوية الحكوني

منسية شمالج تنغطين جنج بومة

هيلة يمة وجع كتلني

منسية وغمة تغمج انة موش امج عساج بالموت وافتك منج دشي الحجرتج موت الخذاج

هيلة دشيت الحجرتي عبني اخافن منها وانة لو بيدي اصرخ واسمع الوادم كلها

شوي ودش علية محسن وياه حرمة بكد جدتي

محسن ها يهيلة يكولون راح تجيبين

هيلة ماعرف بس موجوعة حيل

الجدة كلجن هيج تشلعن كلوبنة ياجايباتنا ويا راداتنة وكلشي مامش بس تشاليع

محسن جده انتي شوفيها والله كريم

هيلة شافتني الجدة كالت كلها شوي وتجيب واصلة حدها البت بس ساعديني وصيري سباعية

جان ادش علينة عمتي منسية

منسية ها يمحيسن اشوفنك جبت الجدة وجيت ماتستحي على روحك تدخل بشغلات النسوان ياهو ضحك عليك

محسن يمة البت راح تجيب وهي بعدها جاهل كلشي ماتعرف كلت اجيب الجدة الها

منسية ومن يمتة نجيب الجدة للفصلية ها تريد تسويها سنينة بالسلف

محسن يمة خلها تجيب والله كريم

منسية الجدة ماتضل دكيكة وحدة هنا والفصلية تجيب وحدها خوش

محسن يمة

هيلة هنا بعد ماتحملت الوجع ضليت بس اصارخ يمكن لميت السلف كله دشت علية سكينة انطتني شيلتها حتى اخليها بحلكي وماصارخ

عمتي منسية عافتنا وراحت وزلمتي طلع وراها ماعرف وين
حسيت الموت يحامي علية شوي واسمع صوت جاهل يبجي
الجدة يا خطية جابت بت

سكينة خطية والله جابت بت الله يعينها على ما بلاها

هيلة اريدن بتي اريدن اشوفنها

لفلفو البت بخركة وخلوها بحظني جني ملكت الدنيا كلها نسيت الوجع ونسيت انة فصلية

كلت يارب ان شاء الله جيتها خير وتغير حالي

دش محسن من سمع صوت بتي شالهة وسمة بسم الله واذن باذنها وكام يقرا قران عليها

راحت الجدة وضل محسن يمي شوي راح وجاني جايب اكل سمج وخبزة وياها خضرة

محسن اكول هيلة اريدن اسمي البت جوري عبنها مثل ريحتج جنها جوري

هيلة بكيفك بس اخافن امك ماترضة الا تسميها منسية

محسن لا ماتريد اسمها منسية عبنها بت فصلية

هيلة بكيفك حلو اسم جوري علمتني سكينة شلون ارضع البت وجابتلي حضاين وملابس تكول جانن ملابس جبارة ابنها

ثاني يوم من الصبح دشت علية حرمت محسن هي ويتها ملشتني تملش

نورية كومي يالمسعدة سودنتي الزلمة مايشوف غيرج لا عدالج البت راح واحد يكول عنها يت محيسن بس يكولون عنها بت الفصلية

فروخي هم فروخ محسن موش بت الفصلية سمعتي وجرتني خاطر اعجن واحوش الزرع ماجني البارحة من جبت

مرت ايام ورجع غضبان النفس سوالفة بس صار يحجي وياي بكل صلافة ويكولن انة احبنج وانة اريدنج وكل يوم اصدنة واخافن منة واخافن واحد يشوفة

جوري بعدها ترضع حسيت روحي حبلى من جديد عمر جوري سنة جبت نرجس

محيسن صحتة صارت موش تمام كام حتى مايكرب مني وانة حياتي هي هي

بيوم ابن محيسن ماجد اجانة للسلف يزور اهلة وهم الخاطر خطبة اختة كريمة على ابن عمها حميد اخو غضبان

يوم ثاني الصبح اجاني محسن كال اريدن اخذ البنات للمستوصف انة وماجد يكلون جاي لقاح مال شلل اروحن القحهن

انة كلبي لعب وخفت ياخذون بناتي ومايردوهن الي ضليت مثل سمجة المزوهرة الى ان ردوهن الي

بالليل دش علي محسن عبن صار هواي ماداش علية عبنة تعبان ومريض

محسن تعالن يبنيات اريدن اشبع منجن شوف الله ياريحتجن جنها ريحة امجن

اسمعي هيلة اريدن اطيج شي تظمينة بروحج مامش مخلوك بالدنيا يشوفة فهمتي يو لا

هيلة شنو هو وليش ماتريد مخلوك يعرف

انة شكلت موش كلت كولي صار على كل شي اكولة

هيلة صار مامش مخلوك يعرف

خلة بايدي جيس كاغد ملفلف تلفلف كال هذن ظميهن بروحج اخافن يصير علية شي هاذ ظمان بناتي

هيلة جا شنهو هاذ

محسن اليوم انة وماجد خذيت البنات وطلعتلهن جناسي وماريد احد يعرف عبن مامش جهال فصلية عدهم جناسي

هيلة مافهمت شنهو يعني جناسي بس حسيت كلش مهمات من خوف محيسن عليهن وعبنة مايريد واحد يعرف بيهن

مرت حياتي كل يوم وانة حتى الخدامة احسن مني الا ان اجة اليوم المشؤوم

حبايب اتمنة تعجبكم القصة وعذروني عن التاخير بالتنزيل

تحياتي اختكم الاسدية
ولتنسون 🌟🌟🌟

https://www.youtube.com/watch?v=EORs000ROyU