انثى في عرين الوحوش الفصل الثاني عشر 12 - بقلم الاميرة ارجوان

الكاتبة الاسدية

كامت النسوان ياهو تحتاج مساعدة تودي علية اساعدها وتنطيني فلوس وبديت اخبز للناس وعشت كل حياتي هيج

اخذم للناس حتى بناتي مايحتاجن واحد وحتى يصيرن احسن الناس ويدرسن ولا يضلن مثل حالي

وانة ضميت عليجن خفت لا تريدن تردن الاهلجن وتعيشن الي اني عشتة وياهن وياريت واحد معترف بيجن

جوري ومنو يكول كل هاي القصة الي سولفتيها النا حقيقية

هيلة الله شاهد كل كلمة كلتها حقيقة وماعندي اثبات غير كلامي

واذا صدكتي لو ماصدكتي ميهمني المهم اني كدام ربي سويت الي علية وخلصتجن من حياة كلها ذل ومهانة

نرجس على اساس حياتنا هاي مو ذل ومهانة من النلس تباوع النا بعين الزغيرة ويعيرونا بت الخبازة

هيلة على الاقل هسة عندج فرصة تغيرين الواقع بس هناك جان انتي هسة حتى قراية وكتابة متعرفين وجان زوجوج وانتي عمرج 13 سنة لو من مشاكلهم ينطوج فصلية

جوري اني راح اسكت بس باقرب فرصة اريد اروح الاهلي واكيد راح اعرف كل الحقيقة

هيلة سوي الي تردي بعد ميهمني كلشي مو بعدين ترجعين تعضين اصبعج ندم بالوقت الي مينفع الندم

جوري جنت اتامل اكرم ياخذني للناصرية ماعرف اوصف شعوري من عرفت عندي هلكد اهل وعمام واخوان وخوات

مثل الي ماشايف وشاف جنت احس روحي زغيرة وهسة كبرت صارو عندي سند بهاي الحياة

بس اه كم اه ماسمعت كلام امي

اكرم جنت كل يوم اتعارك وية ابوية الخاطر جوري اني شعلية وهي شعليها بالي سوتة امها

المهم عندي جوري جوري وبس ماعرف شنو هذا الاصرار العجيب برفضها

البنية حلوة وقمة بالاخلاق وعدها مستقبل لان شاطرة وطموحة

المشكلة بامي الي كامت تلسن هواي على ام جوري وحتى حاربتها برزقها وكامت تخوف النسوان منها

كل وحدة كامت تخاف على رجلها لتروح ام جوري تضحك علية وتقشمرة

بس مستحيل اشوف بام جوري هاي الميزة

هيلة جنت عايشة على الخبز للنسوان بالمنطقة والي عدها شغل اساعدها والي اغسل الها زولية او فراش

فجأة كامت النسوان متدز علية وحتى الخبز كوة جم وحدة ادز الطحين الي للبيت وترجع ادز واحد من الجهال ياخذة
من غير التبسمر الي اسمعة من نسوان المنطقة

وهاي جوري متفبل تكلي شدراها بقصة اهلها وهم موجودين بالناصرية

معقولة عمامها وصلو الها وهيج عافوها هي واختها

جوري جنت كلش محتاجة اكرم لازم اكمل الي بديتة كلت امر من بابهم من ارجع من المدرسة عسى اشوفة واحجي وياه

بيوم صدك مريت شفت اكرم واكف بالباب هو ولد ماعرفة
بطئت بابمشي مالي كلت بلكت يروح هذا الولد واحجي وياه مريت قريبة منه والولد موجود مشيت بطريقي
مسافة قليلة واسمع اكرم يصيحني

اكرم جوري جوريتي انتظري

جوري نعم محتاج شي كلت احجي رسميات وياة لان عيب من الولد

اكرم لا مامحتاج شي بس حبيت اشوفج واسلم عليج صار هواي ماشايفج ولا انتي تسالين علية

جوري هو اني لو انت شتريدني اجي ادك بابكم ومن تطلع امك لو ابوك اكللهم اريد اكرم

ام اكرم اي عادي تسويها يا بت هيلة امج منو كلشي يطلع منجن بنات اخر وكت يفترن على الولد

اكرم يمة طبي جوة

ام اكرم اشو ماطب وهاي الساقطة هي وامها اذا بعد شفتخا كدام عيني افضحها فضيحة واخليها عليج بحلك الناس

اكرم يمة كتلج كافي طبي جوة

جوري اشكرج خالة على شنو تسويني علج بحلك الناس اني مريت منا وهو الي صاحني

ام اكرم هو ياهو الي يصيحكم تركضن علية مثل امج من نهبت واحد وشردت وياه

جوري ماسمحلج تحجين على امي امي اشرف منكم

ام اكرم عيني لمي الشرف الي مطشر بالكاع

اكرم يمة والله العظيم اذا ملسكتي وطبيتي جوة اعوفلج البيت واهج زين

جوري لا اني الي اروح وبعد ماشوف وجهي وانتي كافي خافي الله

عفتهم ورجعت اركض للبيت جنت اتمنة ماشوف امي كبالي كلة من وراها

طول عمري امشي مرفوعة الراس وهسة الي يسوة والي ميسوه يحجي علية وعليها

امشي وابجي حتى دراستي هاي السنة هملتها واني هاي اهم سنة الي

دفعت الباب وطبيت للبيت واني صايرة نار

نرجس ها شبيج صاير شي

جوري وخري من كدامي اريد اطب الغرفتنا اتلاكيت وية امي وهي طالعة من المطبخ

هيلة ها يمة شبيج اختج كالت عدها اضافي

جوري وخري مني الله ياخذني واخلص من عارج الي راح يضل ورانا هسة حتى اهلنا ميحترمونا لان امنة انهزمت وية واحد هسة يكولون بناتها عليها

هيلة كافي جوري ولج خافي الله اني امج وحجيتلج كلشي هاي بدل متشكريني وتبوسين ايدي خلصتج من هيج اهل

نرجس على شنو نشكرج يلا هسة كليلنا شلون راح نعيش اذا حتى النسوان كامت اتخاف من مصايبج ومحد تخبز يمنا

هيلة بعد اني هذا حدي وياجن سويت الي علية شتريدون اروح ابوس ايدين نسوان المنطقة حتى يخبزن عندي
جوري اخذينا الاهلنا اذا انتي صدك مامسوية شي

هيلة ميخالف لمن هديماتجن ومن باجر اخذجن اوصلجن الاهلجن بس حدي وياجن الباب بيتهم وكلمن يروح الحال سبيلة لا انتن بناتي ولا اني امجن

وهاي الخدمة الي ماراضيات عليها عندي اهون مليون مرة من العيشة وية اهلجن زين

جوري ميخالف اني من هسة احضر ملابسي وانتي نرجس

نرجس اكول جوري خلي نروح بالعطلة مال نص السنة لان حرامات هسة مو وكت نقل وهناك نسوي نقل زين

جوري اي هم صدك كلها شهر وتجي العطلة ونخلص من هيج ذله

ضليت افكر باكرم هسة شسوة وية امة علمودي هو صدك يحبني لو بس يقشمرني

لا اكيد هاي امة هسة يسكت واني يضحي بية الخاطرها

اوي شسويلة كلها شهر واعوف كركوك واروح اعيش بالناصرية وية اهلي ولا اشوف اكرم ولا اعرف اخبارة

نرجس اكلج جوري انتي صدك تردين تروحين للناصرية

جوري اي لعد عاجبتج المذلة والمهانة الي عايشيها

نرجس زين وامي

جوري اذا هي صدك مامسوية شي ومن صدك تحبنا ماراح تعوفنا بس اذا لا خايفة من شي راح تعوفنا

نرجس بس اني خايفة شلون نعيش وية ناس منعرفهم شلون راح يتقبلونة

جوري نتعلم عليهم واحنة باخلاقنا اكيد راح نكسبهم

كاعدين نحجي اني ونرجس نسمع صوت دك على الباب كلش قوي

طلعنا نركض امي جانت كاعدة بالهول فتحت الباب واشوف ابو اكرم وهو مثل المخبل

ابو اكرم خوية ام جوري دخيل الله ودخيلج ابوس رجلج حالليني واوهبيني دخيلج ابني وحيدي راح يروح من ايدية

هيلة على كيفك خوية ابو اكرم ماجاي افتهم شكو اني شدخلني بالموضوع وابنك شبي

ابو اكرم خوية فدوة جنت انظف بالسلاح مالتي واكرم طب للبيت هو وامة يتعاركون واني مادري انشدهت من وراهم ومامامن المسدس طلعت طلقة منة وجت بصدر وليدي

خوية فدوة سامحيني سامحي ام اكرم ابني بين الحياة والموت

هيلة خوية الله يكومة بالسلامة خطية بعدة شاب الله يشافي بس اني ماعرف شدخلني بالموضوع

جوري اسمع الحجي واني متت من الخوف خطية اكرم ميستاهل وضليت الوب علية بس شدخل امي بالموضوع

ابو اكرم خوي الشيطان لعب براسنا اني وام اكرم لا والله ام اكرم هي الشيطان بعينها من دزيت ناس على النفوس مالتكم بعد ما اكرم توسل بية حتى نعرف اصل وفصل جوري

وجيت وسولفت الام اكرم قصتج انتي واهلج والفصلية
كالت اني ماريد جوري الاكرم خلي نكول عليها نهزمت وية واحد وهي الي كتلت رجلها

حتى اكرم تزغر بعينة جوري وميريدها بعد

وهسة حوبتج طلعت بابني فدوة اروحلج ابوس ايدج بس سامحينا سامحي امة هذيج هي مثل المخبلة على ابنها

والله مستعدين كدام الناس كلها نكول ام جوري شريفة واحنة الي شوهنا سمعتها بس المهم ترضين علينا حتى الله يرضى علينا ويسامحنا ويكوم ابني بالسلامة بس هو عندي الي طلعت بي من الدنيا

هيلة استغفر الله مادري شكول هيج اعراض الناس وشرفها عدكم سهلة

مافكرتو بهذن البنات شنو سمعتهن شراح تكول الناس عليهن مو هذن يتيمات

ابو اكرم والله شتريدين اعوضج كولي زين بس يكوم اكرم بالسلامة اجيب المنطقة كلها واجي خطابة على جوري بس سامحينا

هيلة روح خوية الله يسامحكم واني هسة اكعد اصلي وادعي رب العالمين يشافي ويعافي الخاطر شبابة

ابو اكرم يعني مسامحتنا صدكي بس يصير ابني زين اصيح بالمنطقة واكول ام جوري شريفة وهاي السالفة كلها جذب احنا طلعناها عليها

جوري زين واذا ماكام اكرم بالسلامة والله رادة يعني تضل امي مظلومة ومتكولون احنا ظلمناها

ابو اكرم لا والله عمو اني بنفسي اضل اصيح بالمنطقة ام جوري شريفة وام جوري مضلومة والم اهل المنطقة كلهم واخطبج الاكرم

جوري واني لو ابنك يصبوة ذهب بعد ماريدة اذا من هسة هيج طلعتو سمعة على امي باجر عكبة شتسوون بينا

ابو اكرم وهو يبجي دم مو دموع عمو الي تريدو احنا حاضرين بس اهم شي ابني والله مستعد انطي روحي

وهذيج امة لو تشوفين حالها مخبلة بالمستشفى وكل شوية توكع وتريد تموت خطية هاي ام ام جوري فدوة انتي ام وتعرفين شنو الام من تفقد ضناها

هيلة والله ياخوية اني مسامحتكم واذا تريد هسة اجي وياك للمستشفى واكول الام اكرم اني مسامحتكم لان اني ام واعرف معزة الضنة

ابو اكرم رحم الله والديج يارب بحق الانبياء والرسل وبجاه كلمن عندة جاه اريدك تكوم وليدي بالسلامة خلف الله عليج خوية مشكورة يا ام كلب الطيب

جوري عافنة ابو اكرم وراح واني ميتة خجل من امي ماعرف شلون ما صدكت بيها وهذا اكرم مادري ادعي عليه لو ادعيلة
اخ منه اذا طلع يعرف السالفة كلها تلفيق الا انتقم منة بيدي

هيلة ها جوري اشوفج صافنة وين راح بالج

جوري ماما اني اسفة ماصدكت بيج وشمرت روحي بحظنها

هيلة ميخالف يمة لتقهرين روحج صح قهرتيني مو لان ماصدكتي بية لا قهرتيني لان رحتي من وراية خليتي اليسوة والمايسوة يحجي بشرفي وبسمعتي

جوري مو اني شكد كتلج احجيلي منو اهلي وانتي كلش متقبلين حتى نحجي بيهم

هيلة من ظيمي يمة من نار الي بكلبي شريد احجي وشريد اكول ماريد اشوه سمعتهم كدامكم مهما يكون ذول اهلهم

نرجس لا منريد هيج اهل منريد يسوون بينا الي سووه بيج

هيلة باجر الصبح اروح اشوف اكرم وهاي امة خطية الله ليفجع كلبها بابنها خطية بعدة شباب وهل واحد

جوري ليش تكولين عليها خطية وهي هيج سوت بيج

هيلة يمة هاي ام اكرم من راح ابو سمير وضليت بلا فلوس هي الي ساعدتني هواي انطتني وهي الي وصت النسوان حتى يخبزن عندي

لو ما هي جان الله العالم شصار بينة وهذا الحصار الي دمرنا ياما وياما ام اكرم تجيبلي الطحين والتمن

جوري بس هي حقيرة الي تسوي بية والي تحجي علينة

هيلة ميخالف يمة ادعو الاكرم ولتشيلون بكلبكم اي حقد على واحد حتى الله يوفقكم بحياتكم

جوري بعد ماعرفنة الحقيقة قررنا نعوف هيج اهل اكيد راح يشلعون كلبنا ويذلونة

بديت اتجة للدراسة مالتي لازم اعوض امي على التعب الي تعبتة والذل الي شافتة

بالنسبة الاكرم خطية جاية الطلقة بالكبد مالتة وشوي من الرئة ضل هواي يتعالج بس اني ابد مايوم فكرت اروح واشوفة لو اسال علية

ام اكرم كدام المنطقة كلها ضلت تحجي بطيب كلب امي وعرفت الناس امي مضلومة وتعهدت كدام الناس بس اكرم يصير زين تخطبني الابنها

بس اني مادري شبية ماحس نفسي مستعدة ارتبط او اتزوج كل الي افكر بي هو مستقبلي ودراستي

انتهت السنة وجتي موعد الامتحانات مال بكلوريا
نرجس نجحت وزين درجاتها رفعتهن وطول ما اني ادرس هي تجي تدرس وياية حتى تستعد للسادس

امي ضلت تركض النهار كلة بشغلها وكل هذا رغم متكدر تساعدنا بالدراسة بس جانت تساندنا بالتشجيع وتسهر ويانة وكل شوي تسويلنا لفات لو جاي

مرت ايام الامتحانات واني بس الهلاك ما انام ساعتين او ثلاث باليوم وكل يوم اجاوب على الاسئلة كلها ماخلي شي ماجاوب

الحمد لله خلصت الامتحانات وضليت انتظر النتيجة تطلع

ايام صعبة اصعب شي هو الانتضار واخيرا علنو عن النتائج للصف السادس الاعدادي

جان موجود تلفزيون الشباب ينطون بيها النتائج وتفاجأت اسمي بالمركز الثاني على العراق

جانت الفرحة ماواسعتني ماجنت اعرف فرحتي هاي راح تدمر حياتي ولو ماناجحة احسن الي

جبر اكولن سلمان انت عمك محيسن عندة بت

سلمان الله يرحمة شذكرك بعمي محيسن وشعندك وية بناتة انت ماتستحي تجيب طاري نسوانة

جبر خوية شمالك انة اليوم تذكرت عمك عندة بت من الفصلية خذتهن ونهزمت موش هيج السالفة

سلمان اليوم انت ماتمشيها على خير الا ادفنك بمجانك عبنك تنبش بالفات

خوية وحك الخوة انة اليوم جاعد جدام التلفزيون وهيج سمعت اسم كلت وين سامعة يجبر وين سامعة تذكرت اسم عمك محيسن

سلمان يا اسم وليش سمعتة بالتلفزيون

جبر هاي بت ناجحة طالعة اولى بالبكلوريا ماعرف شنهي اليوم خابصينا بيهن خبص اسمها جوري محيسن ال شنون وانة جيت وكتلك

سلمان انت صكد تحجي يو لا

جبر اي والعباس ابو فاضل صكد حجيت

سلمان خلني اروحن ابشر حبوبتي منسية مشكور ياخوي

مساء الخير حبايب كلبي

اعتذر عن التاخير بتنزيل البارت لان النفسية كلش تعبانة

ومنا اشوف التصويتات كلش قليلة هاي اول قثة الي هيج تصويتها

ماخليتو واهس انزل ويمكن راح احذفها احسن

تحياتي الكم اختكم الاسدية

https://www.youtube.com/watch?v=ZhtGEEzizDc