انثى في عرين الوحوش الفصل الثالث عشر 13 - بقلم الاميرة ارجوان

الكاتبة الاسدية

تعال وياك أخذني وخـــــل نروح آبعيد
ونعيش الفرحه كافي وخل نعوف الهـمّ
تعبنه الوكــــــــــت والقدر بينه يدوس
مجروحين آحنه والجرح يلجـــــــــــم
محد بينه داري وعذبانـــــــه الحــآل
وألك هذا الحچـي يـلّ وحــــدك آلتفهم
كل شي يخـون بينه لكن انّـه ويّـــــآك
أبد منخون حبنه وربك اليعلـــــــــــــم

جبر هاي بت ناجحة طالعة اولى بالبكلوريا ماعرف شنهي اليوم خابصينا بيهن خبص اسمها جوري محيسن ال شنون وانة جيت وكتلك

سلمان انت صكد تحجي يو لا

جبر اي والعباس ابو فاضل صكد حجيت

سلمان خلني اروحن ابشر حبوبتي منسية مشكور ياخوي

جوري اشوف امي شكد فرحانة اول مرة بحياتي هيج اشوفها تضحك وتهلهل ونسوان المنطقة كلهن اجني يباركن النا

وحتى ام اكرم جتي وجايبة صندوك الشربت وكل شوي تكلي يوم نفرح بعرسج

خلصت الهوسة والناس كلمن راح البيتة

كعدنا اني وامي ونرجس نتخيل شلون راح اصير دكتورة

مشغلين التلفزيون ونشوف الهوسة علمود نتائج السادس وجان يطلعون لقاء وية الاولى على العراق والاولى مكرر
شوي وجابو اسمي بالتلفزيون

اباوع على امي ضلت تنطي الوان

نرجس مامة شبيج احس الفرحة طارت من وجهج

هيلة لا يمة ليش اكو احلى من هيج فرحة

جوري بس احس اكو حسبة ابالج احجيها

نرجس خاف غلمود مصاريف كلية الطب يكولون هواي وغالية

هيلة والله لو اشتغل ليل ونهار اسد مصاريفج اهم شي عندي تصيرين دكتورة

جوري لعد شبيج يمة اححيلي

هيلة يمة اليوم كل شوي يذكرون اسمج بالتلفزيون ونوب اسمج الكامل واتي اخاف يسمعون عمامج ويعرفوج

جوري شبيج يمة قابل بس اني بالعراق كلة اسمي جوري محسن ال شنون لتشيلين هم ماكو شي

سلمان جده جده اريدن البشارة منج

منسية يابعد جدتك واهلهة كلهم عبنك على بشارة اذا جانت الي ابالي انطيك ماي عيوني

سلمان اي هي جده لكيت بنات عمي محيسن

منسية يارحمتك ياربي صكد تحجي وين لكيتهن يابو فاضل هيج واحظة ابنات محيسن وشوفنهن بعويناتي ووفي نذري

سلمان اي حبوبة حضري نذرج كلها يومين واجيبنهن جوة رجلج اخليهن يحبن التراب الي جوة رجلج هن وامهن

منسية لا ولك لاتصير اغم انة ماريدن امهن عبنها كسرت وجهنا اخذ بنياتها وعوفنها مثل الجلب

نورية صكد الي سمعتة لكيت بنات محيسن

سلمان اي عمة لكيتهن وحبوبتي تريدهن بس هنة وتكلي عوف امهن

نورية وسفة عليج يمة جا شلون يعوفنها جا من حميد ذبح بتي موش لان هيلة انهزمت وماتزوجت غضبان

منسية خليها سكتة نويرية موش ذنب هيلة بتج الي موش راحة ومالكوها بت وغسلو عارها
نورية لا اني بتي اشرف بت بس هو غضبان راد يطلع هزيمة هيلة بكريمة
شوف عمة سلمان اريدنك تروح يم عمام هيلة وتطش خبر لكيناهة هي وبناتها خل يوصل الخبر الاهلها وخلهم يغسلون عارهم بايدهم عبن بتهم انهزمت وكسرت وجهم

سلمان عمة موش سلمان الي يساوي هيج انة زغير جدامج وساوي سواية النسوان انة سلمان ابن فاضل كل السلف تهابني

نورية جا انة الي اطشها بالسلف اريدنهة تنذبح جدام الوادم واخذ حيف كريمة منهة

سلمان شوفي عمة لو حميد ماجاتل كريمة جا انة ذابحها بايدي عبن ريحتها فايحة بالسلف

نورية جذب وحك الله جذب كل هاذ الخاطر هيلة شردت وهجت من غضبان

جوري دزو علية بتربية كركوك وكرموني وكرمو مدرساتي والمديرة وطلبو مني لقاء صحفي بس اني استحي كدام التلفزيون اسوي لقاء بس طكولي صور ورجعت للبيت

شكد جنت متفائلة بكلشي وشكد جانت احلامي بريئة

كل هذا نهد بلحظة وحدة

جنا كاعدين نتغدة اني وامي ونرجس ماحسينة غير الباب اندفرت وطبو علينا رياجيل اربعة عيونهم ينط منها الشر

هيلة يبوووو انتو منو شتريدون من عدنا احنا بس نسوان بالبيت ماعدنا رجال

سلمان نعرف انتن بس نسوان نعرف كلش زين يافصلية محيسن

جوري انتو منو وشتريدون من عدنا وشلون هيج اطبون علينا متستحون

جاسم بوياي والله فرسة هيج عمي عنده بنات

هيلة منو عمك وانتو منو لتخلوني الم العالم عليكم

سلمان انة سلمان ابن فاضل الي اخوج جتلة

جوري ماحسيت غير امي وكعت وتخربطت واني ونرجس كمنا نتصارخ ونفرك الها

نرجس ولج يمة شبيج احجي وياي يمة فدوة اروحلج اكعدي وحاجيني

جوري ماحسينة على الزلم الا وهم يجرون بينا مثل الحيوانات ويضربونة ويهددونة اذا حجينة كلمة وحدة يذبحونة ويشمرونة بالجول

صعدونة باليدي مال البيكم وصعدو ويانة اثنين زلم واحد منهم كال شوفو اي سيطرة نمر منها تسكتن اذا حجيتن جلمة وحيدة اخونا الي ضل يم امكم يذبحها ويشمرها للجلاب

جوري انتو منو وشتريدون من عدنا وين ماخذينا

جاسم احنة اولاد عمامجن ونريد ناخذجن الاهلجن عين حبوبتجن اتجالع وتريد تشوفجن كبل لاتموت

نرجس شنو تجالع

عبد تجالع يامتعلمة يعني تريد تموت وانة عبد الزهرة اخوجن

جوري صدك انت اخوية

عبد اي انة اخوجن ابن محسن ونورية وعدج اخو اسمة ماجد ومحمد وانتن ياهي جوري وياهي نرجس

جوري اني جوري وهاي اختي نرجس بس ليش هيج تسوون بينا جان كلتو احنا اهلكم وبيبي مريظة تريد تشوفنا جان اجينة وياكم

جان تطبك السيارة وينزل منها ولد ضخم واسمر

سلمان خلينا نتفاهم كبل لا نطلع من كركوك شوفو صح طبتنا عليكم جانت غلط اعذرونا

كل الي نريدة منكم نوصل للناصرية حبوبتي منسية مرة جبيرة كلش وضن انها تريد تموت وكل حجاية تصيح اريدن بنات محيسن اريدن اشوفنهن كبل لا موت

يابنات عمنا هاذ اخوجن عبد جاي ويانة كلها يومين وتردن الامجن خوش

نرجس بس امي خطية ماعرف شلون صارت ولا تدري بينة راح نرجع

جاسم لاتخافين عليها هاي فصلية كلشي تتحمل

جوري زين منو يكول راح ترجعونة الامي

عبد انة اكولن تردن جا موش زلمة بعينج انة

جوري لا العفو بس كلت اسال

سلمان شوفن بنيات عمي انة هاذ لبسجن مايمشي عدنة بالسلف وهاي شعفتجن الي ناثراتها ماريدنها حالجن من حال نسوانة تلبسن شيلة تلبسن ربطة اي شي خوش

نرجس وانت شغليك بينا شنلبس هذا احنا طبعنا وكلها يومين وراجعين الامي مو هيج تكول

عبد جا والعالم والزلم الي بالسلف هيج تتفرج عليجن غير اذبحجن بيدي

سلمان موش هيج ياخوي على كيفك وياهن نتفاهم وياهن بالهداوة وهسة خلنة نتوكل ونرجع للناصرية كبل الليل

جوري مشت بينا السيارة شكد وكل ساعة لو ساعتين نوكف بمكان لو يجيبون مي النا لو يترسون السيارة بانزين

اخر شي وكفت السيارة بمكان كالو عطلت السيارة وكفو ضلو يشتغلون بيها صار الغروب وشوي ضلمت كالو اشتغلت صعدونا من جديد كالو راح نطب بغداد

نرجس جوري اني تعبت راح امدد وانام ماتحمل بعد

جوري اي نامي لان طريقنا طويل شفت نرجس مددت ونامت واني عيني على جاسم الي نضراتة ابد ماعجبتني

وهذا الي يكولون علية اخونا نايم ميدري بالدنيا شكو واني خايفة من هذا

وصلنا بغداد الي جان يسوق نزل وشوفة صاير عصبي

حمدان انة ماكدر اكمل للناصرية عبني تعبت ونعست والطريج طويل خلنا انبات اليوم ابغداد

سلمان وين تبات والبنات ماعدهن لا جناسي لاشي جا تريدهم يحبسونة

عبد جا عليش مانروح البيت مويجد نبات يمة انة اندل مجانة

جاسم خوش والله خلنا نرتاح ومن الغبشة نتوكل ونروح الاهلنا

جوري من سمعت رايحين البيت اخوية ماجد كلش فرحت لان حبيتة من حجي امي عنة كعدت نرجس وكتلها راح نبات ابيت ماجد

وصلنا منطقة كلش حلوة احلى من منطقتنا الي بكركوك وبيوتها كلش حلوة وجبيرة وبيها حدايق تجنن

وكفنا يم بيت حلو بس مو ذاك الكبر بس حلو ومرتب نزل اخوية ودك الجرس شوي وطلع رجال مو كلش جبير يعني اربعيني بس يشبة عبد اتحاضنو وسلم على الرياجيل الي وياهم باوع علينا واجانة يركض

ماجد جوري ونرجس حبيباتي تعالو طبو جوة اني اخوكم ماجد

جوري اي اني اعرفك امي تحجي بيك

نرجس انت مو مثل اخوية عبد

ماجد تعالو عيني هسة ام رشا ورشا يفرحون بيكم

جوري طبينا للبيت فتح باب طبب الزلم بغرفة واني ونرجس اخذنا من باب ثاني على المطبخ طبينا للبيت

المطبخ جان كلش حلو واثاثة مرتب كلش

ماجد رشا بابا ميادة تعالو شوفو منو اجانة اليوم

شوي وطبت علينة مرية هيج بعمر امي وحلوة لابسة تراكسود وشهرها كاصتة قصير عبالك من هذن الممثلات المصريات

ميادة هلا ومرحبا بالي جاينة اهلا وسهلا بالحلوات منو هذني

رشا هلا هلا منو هذني شكد حلوات

ماجد هذني عماتج جوري ونرجس واني اروح لان عمامكم بالاستقبال جوة سوولنا عشة

رشا هلو فدوة شلون عمات حلوات فدو ماما شوفي شكد حلو عندي عمات ازغار وبكدي

بس ها اني ماراح اكول عمة اكول جوري ونرجس

ميادة هلا بيكم عيوني والله نورتو بغداد شعجب اجيتو وين لكوكم اهلكم منين جيتكم

رشا ماما عفية سوي عشة واني اخذ البنات الغرفتي اليوم تباتن يمي ونسولف للصبح

ميادة ماما غير تساعديني شوكت اتصيرين ام بيت وتتعلمين

رشا ماما من اتزوج وينشلع كلبي اتعلم خليني مدللة بوجودج وخليني افكر بالدراسة يلا باي ماما

نرجس اخذتنا رشا وصعدتنا الغرفتها فوك جانت غرفة بناتية كلش حلوة

رشا اكول بنات اكيد تعبانات اذا تريدن عندي ملابس هواي وكلنا نفس القياس الي تريد تسبح

جوري اي والله ياريت لان مصعدينة بالبدي عبالك حيوانات

رشا الله يطيح حظهم وحظ تخلفهم الحمد لله بابا مو مثلهم ولا عبالك هذول اهلة

نرجس اكيد لان هو متعلم ودارس وعايش بعيد عنهم

جوري لعد شبيهم بقية اخوتي مو مثلة دارسين ومتعلمين

رشا اكول بنات يلا اسبحو حتى نكعد نسولف حبابات لان كلش حبيتكم وهسة يجي قصي يشاغب علينا

قصي ها سمعتج تحجين علية لكفتج بالجرم المشهود وهو شايل بايدة مي ويريد يرشة عليها

رشا توبة والله توبة بعد ماحجي عليك وداعت بابا بس لتبللني حباب وهي تختل ورة جوري وتصيح بداعت ماما

قصي لك لك هاي شنو الكيكات خرب انة صدك جذب هذني عماتي

جوري ههههههه شكد حلو عندي ابن اخوية هيج شاب حليو لو انت بكركوك افتر وياك واتباهة بيك

قصي واني لوما انتي عمتي الا اتزوجج لو تنكلب الدنيا بس حرامات

رشا ها ابو البنات لتصدكين بي هذا مكطع بنات المنطقة

نرجس لا خطية ليش

قصي شسوي مالاكي وحدة مثلجن واضل عليها

رشا يلا هوينا روح يم عمامك خلي البنات يرتاحن

جوري طبينا سبحنة وبدلنة ملابسنا صاحت علينا مرت اخوية حتى ننزل ونتعشة جوة

نزلنا كعدنا بالصالة شوي ونزل علينا ولد اثنين واحد زغير عمرة عشر سنوات وواحد ثاني لا اكبر من قصي

اركان مساء الخير

الكل مساء النور

ميادة تعال اركان لتستحي هذني خوات ماجد تعال محسن هذني عماتك جوري ونرجس

اركان ليش ماجد عندة هيج خوات وزغار

رشا خالو ابد لتحاول عماتي مو مثل البنات الي تعرفهن

اركان ولج ام السان ولا عبالك اني خالج هيج تحجين وياية

ميادة اكعدو النهار كلة تتناكرون تعال اكعد اتعشة

جوري محسن تعال حبيبي خلي ابوسك فدوة للخدود الحلوة

ميادة لتصيحيلة محسن ميقبل

نرجس مو تكولين اسمة محسن

رشا غير بابا كال الا اسمي على اسم ابوية ومن كبر شوي ماقبل يصيحولة محسن يكول اسمي محمد

جوري تعال حبيبي يمي اصلا اكلة حمودي زين

محسن اي حلو وانتي هم حلوة

نرجس لعد وين ماجد اخوية

ميادة يتعشة وية ولد عمة اكلو عيني لتستحون

جوري كعدنا تعشينة وضحك وسوالف شكد حلوة هيج عائلة لو عارفيهم من زمان ياريت كل اهلي مثلهم

ليش امي جانت تخوفنا منهم

كملنا عشة وفرشو للولد بالاستقبال وصعدنا اني ونرجس ورشا الغرفتها شوي وصعد اخوية ماجد يمنا

ماجد جوري متعرفين شكد فرحت من سمعت اسمج بالتلفزيون وانتي طالعة الثانية على العراق

جوري يعني انت هم عرفتني اني اختك

ماجد شلون ماعرفتج وحسيت روحي طاير من الفرح وهسة ناوية ترحين طب

جوري اي اكيد اروح طب

ماجد راح تنقبلين طب بغداد وراح تجين تعيشين يمي

رشا اييي 💃💃💃💃💃 بس حرامات اني كلية الصيدلة مثل تخصص بابا

قصي واني هاي السنة اشد حيلي واطلع طب واضل اتباهة بعمتي بالكلية

رشا حرامات امي شكد رادتني اروح طب بس اني اختاريت اصير مثل بابا

جوري صيدلة هم حلوه نفس الشي

ماجد امج شلونها شلون جنتو عايشين وشوصلكم الكركوك

جوري هاي قصة طويلة بلكت من ارجع من يم بيبي نمر عليكم واسولفلك

ماجد الله كريم خلي اعوفكم ترتاحون وانت قصي عوف عماتك واختك يرتاحون يلا كدامي

نرجس ضلينا للصبح نسولف ونضحك مر الوكت بسرعة

اجتي مرت اخوية كالت يردوكم الولد حتى تطلعون للناصرية من وكت

انطتنا رشا ملابس من عدها كالت عيب تطلعون بالتراكسودات وانطتنا ملابسنا الي اجينا بيهن وانطتنا بعد كل وحدة تراكسود كالت خاف تتاخرون يومين يم بيبي

طلعنا للشارع رادو الولد يصعدونا بالبدي ماجد ماقبل كال عيب شنو يصعدن بالبدي انتو متتطورون شوية

جاسم خلينة التطور الك موش زين منة خالينك انت وعايلتك هيج عايشين بحريتك

ماجد شوف جاسم عائلتي خط احمر زين وماقبل اي بشر يتحكم بيهم الا واني جوة التراب

حمدان خوش والله جا انة راح انهي على بتك واشوفنها تروح للغريب

ماجد والله لو مو تنهي عليها مانطيها الك ولا الغيرك زين

سلمان كافي ياحمدان موش وكت حجيك هاذ عبنة سابك الوكتة خلنا نتوكل

صعدونا بالسيارة بس هاي المرة مو بالبدي لان جانت السيارة دبل قمارة وعبد وجاسم صعدو ليورة

مشت السيارة شكد تقريبا ساعة 11 كالو وصلنا للناصرية

وضلت تمشي بينا السيارة شكد طلعنا من المدينة ومشينا بطريق امبين زراعي

نرجس صار فوك الساعة كلتو وصلنا للناصرية شكد بعد تعبت

سلمان وصلنة كريبين

حمدان جا شلون يدشون السلف هنة وشعفاتهن

سلمان جا ماجت ابالي نشتريلهن حجابات من الولاية خلنا ندش كبل للحوش مال جدتي

جوري والله اني مالبس حجاب وكلها يومين وارجع الامي

نرجس سودة علية مادري شلون صارت هسة وشلون كلبها صاير نار علينة

سلمان موش انتي بكيفج وماتلبسين حجاب انتي كلج بت فصلية

جوري الفصلية احسن منكم

سلمان لاتخليني من هسة امد ايدي عليج واكسر راسج وراس الفصلية وياج

جوري خفت منة وهذا حمدان وكف السيارة ويكلة خليني اكسرهن وعلمهن شلون يحجن وية الزلم

اخر شي طبينا البيت امبين من هذني البيوت مال الريف الي نشوفهن بالتلفزيون

وكفو السيارة قريب على البيت نزل منها عبد يركض فتح الباب وجر نرجس حيل

نرجس اخ شبيك اني انزل

وشوي وجان يجرني سلمان مثل ما جرروني من اخذوني من بيتنا واشوفهم يسحلوني اني واختي واحنا نتوسل ونعيط حتى نمشي وياهم عادي

طببونا الغرفة كاعدة بيها مرية كلش جبيرة بالعمر جان يشمرونا حيل دفعونة بالكاع وكعنا على وجوهنا كدام هاي العجوز

سلمان كتلج اجيبنهن جوة رجليج يو ماكلت وانة عد جلمتي

حبايب تتوقعون راح يرجعون البنات الامهن ويوفون بوعدهم لو هذا مجرد كلام حتى ليسوون الهم مشكلة بالطريق

تحياتي اختكم الاميرة ارجوان الاسدية

لتنسون التصويت 🌟🌟

https://www.youtube.com/watch?v=ce5WHm3IPW8