انثى في عرين الوحوش الفصل الثاني 2 - بقلم الاميرة ارجوان

الكاتبة الاسدية

كل عام وانتم بالف الف خير وعيد سعيد

حبايب كلبي مثل ماعودتكم القصة حقيقية واتمنة متحكمون على القصة من بدايتها

لان بيها احداث هواي وواقع مع الاسف موجود بمجتمعنا ولا يزال موجود

راح نطرق باب بيت جوري وندخل الى عالمهم ونعرف قصتهم نكول بسم الله وندخل برجلنا اليمنة

هيلة نرجس نرجوسة حبيبتي اخذي هاي سفطة الخبز البيت ام اكرم

نرجس معلية والله لو اموت ماودي شنو خدامة عدهم اني

هيلة ولج يمة فرفحت روحي من التنور ومابية حيل انتي بس وصلي يمهم ومعليج

نرجس اكلج والله ماروح معلية وانتي بعد موكافي تخبزين للناس ويصيحولنا بيت الخبازة

جوري وشبيها الخبازة ماموكلتج ومشربتج وملبستج ومخليتج تكملين دراستج

نرجس هي هاي هم عيشة الي احنا عايشيها وين هذا اللبس الي اتكولين علية هن جم حاجة منذبها الا تتملخ علينا

هيلة ليش يمة شوكاسرة ضهري علمودجن النهار كلة اخبز للعالم واطبخ للنسوان والف كبب حتى انتي واختج متعوزن احد وتدرسن وتصيرن احسن الناس

نرجس واني ماريدج هيج تسوين ماريد الناس تباوعلنا بعين الزغيرة

هيلة بيج خير كملي دراستج وصيري براسج خير وتخرجي وشتغلي وتصيرين مثل الناس اني مرية ماعرف اقرا ولا اكتب وماعندي احد يعلمني لو يصرف علية كل الي عندي هاي الايدين الي تعجن وتخبز وتطبخ ويوم على يوم بدن يضعفن

جوري وهي تحظن امها وهذا كلش هواي الي تسوي الخاطرنا وانتي احسن ام بالدنيا

لتضوجين اني اخذ الخبز البيت ابو اكرم

نرجس اي روحي بحجة الخبز شوفي حبيب القلب كرومي

جوري احترمي نفسج لان صايرة كلش سخيفة

هيلة ماريد شي من اي وحده اني اروح اخذ الخبز ومناك امر على ام نشوان عدها خطار اروح اساعدها

جوري ارتاحي شوية يمة موزين عليج اني اخذ الخبز بين ماتذبين مي على روحج من حرارة التنور وبعدين روحي

هيلة مو تتاخرين بسرعة اريدج يمي وماريدج توكفين بالشارع ودك سوالف وية ام اكرم

جوري يايوم مسولفة وية ام اكرم اذا هي من تشوفني تضل ترجف تموت مني ماعرف ليش

هيلة افهميني وكولي اي يمة

جوري اخذت الخبز ورحت البيت ام اكرم اول مادكيت الجرس فتح الباب اكرم وضل صافن بوجهي

اكرم جوري شعجب اليوم جاية علينا

جوري لان امي تعبانة وجبت الخبز مالتكم

اكرم كون يومية امج تعبانة وانتي تجيبين الخبز

جوري اسم الله على امي وبعدين شعندي اجيكم شنو اهلي كرايبي

اكرم يجي يوم ونصير اهلج اكول جوجو هو صدك ابوج مطلك امج وعايفكم ومهزوم

جوري لا جذب اني ابوية شهيد بحرب ايران بس ناس متخاف الله وتحجي بكيفها

اكرم جوري الله يرحمة بس شعجب محد عدكم لا عمام ولا خوال يسالون عليكم زين اذا ابوج صدك شهيد ليش ماعدكم راتب شهيد وماماخذين الحقوق مال الشهيد

جوري لان امي يتيمة واهل ابوية مجانو موافقين على زواجهم

اكرم جوري تدرين اني احبج وكل يوم مسويلي عركة وية اهلي علمود اخطبج وابوية يكلي منين اخطبها غير نعرف عمامها وعشيرتها

جوري اكرم اني اتاخرت وانت تعرف اني خامس علمي واريد اكمل سادس مو وكت حب وزواج هسة

اكرم زين خليها بس خطبة ومن تكملين سادس نتزوج بس عرفيلي عمامج وكرابتج وين

جوري لتستعجل كرومي فدوه اعرف امي كلشي متحجي كل ما اسالها على عمامي تفر الموضوع

اكرم زين جوري اني ابوية واصل بالحزب جيبيلي نسخة من الجنسية مالتج وراح اعرفلج نفوسكم وين اصلكم منين

جوري خوش فكرة احاول اجيبلك نسخة
خلي اروح لا امي تحجي علية لان اتاخرت

اكرم اوف ياجوريتي شوكت اخليج ابيتي ومتكولين اروح

جوري بخجل الله كريم اهم شي هسة دراستي

هيلة ها جوري اني شكتلج

اكرم خالة ام جوري شلونج اني سولفت وية جوري علمود دروسها اذا تحتاج ملازم تقرا بيهن حتى اطلع معدل زين

هيلة خالة منحتاج شي منكم بس نحتاج اتخلونا بحالنا احنا ناس مانملك بس الستر وهذا كنز منفرط بي

اكرم والنعم منكم خالة الله يستر عليكم ويحفظج

هيلة روحي يمة يم اختج وقفلن الباب زين الى ان اجي ها وكعدن درسن لتسون اكل اني اجيب وياية

جوري عفتهم ورجعت للبيت واني افكر بكلام اكرم بخصوص النفوس الي بالجنسية يعني اخيرا راح اعرف منو اهلي منو عشيرتي ومنو كرابتي وياريت ماعرفت ولا راح اعرف

نرجس ها جوري وين عقلج يم كرومي فره العقلج وضحك عليج بجم كلمة

جوري اني موزغيرة وواحد يكدر يفر عقلي ويضحك علية

نرجس شوفي جوري صح اني ازغر منج بس اني اعيش واقع ماعيش بالخيال

واقع اني بت هيلة الخبازة والخدامة يعني اذا بيوم واحد يريد يفكر بينا ماراح يكون غير اقل من عدنا لو مهتلف يعني اكرم يضحك عليج وحتى لو هو يريدج اهلة وبالاخص امة لوتموتين متاخذج الابنها

جوري واني هذا الشي ميهمني الي يهمني صدك هي دراستي لازم اغير هذا الواقع واخلي الناس تتمنة جوري الخاطر جوري نفسها

نرجس اي روحي درسي خلي نشوف وين توصلج دراستج خلي اشغل قناة الشباب اليوم اكو حفلة مال حبيب علي

جوري ياحفلة يمعودة امي تكلب الدنيا عليج اذا شافتح اكعدي اقري يلا

نرجس امي متجي هسة لان بيت ام نشوان عدهم عزيمة مال ابنها نشوان صاير ضابط

جوري وحتى لو امي ماكو اكعدي درسي اهم شي مستقبلج

نرجس ميخالف خلي اشوف الحفلة وبعدين ادرس
هذا ياحب جايني تحجي علية
احجيلي كلبي المنجرح اشباقي بي

جوري الله يهديج راح اطب للغرفة اقرا لتفتحين الباب الاحد

هيلة الله يساعدك ابو نشوان ام نشوان موجوده

ابو نشوان اي جوه بالمطبخ صار ساعة منتظرتج اتاخرتي عليها

هيلة اي والله جان عندي شغل خلصتة وجيتكم بساع

ابو نشوان بوجهج كبل للمطبخ تلكيها جوه

هيلة طبيت للمطبخ شلونج عيني ام نشوان

ام نشوان هلا ام جوري اتاخرتي وراج كومة شغل

هيلة هسة بساع بساع اكمل ولا يهمج

ام نشوان اي ادري انتي شاطرة بس اليوم عزيمتي جبيرة وناس كلها كبارية جايين اريدج تبيضين وجهي

هيلة صار من عيوني هسة شنو تردين اسوي

ام نشوان شوفي الكصاب كطع اللحم يعني جاهز اريد تسوي تشريب والدجاج كلة اريده شوي بالتنور والبرياني اريده على طريقتنا مال كركوك ووالكبب والمحاشي انتي مكملتهم قبل بس طبخيهم والحلويات راح يجيبهم نشوان وياه

هيلة ادللي كلشي راح اسوي مثل ميعجبج

ام نشوان واني هم راح اداريج بالاكل والفلوس حق تعبج ها وعندي ملابس ماريدهم اخذيهن الج وللبنات

هيلة مشكورة متقصرين

ام نشوان اني راح اعوفج واروح للصالون ماوصيج لتطلعين خارج المطبخ ابو نشوان راح ينام شوي بالصالة ماريد يشوفج زين ولو اني اعرف ابو نشوان عينة مليانة

هيلة صار بس اضل بالمطبخ

بديت اشتغل واستعجل لان شغل هواي والوقت قليل ولازم اكمل قبل ليجون خطارهم وهلكانة من التعب فزيت على شي اتلمس مؤخرتي واني عطت

ابو نشوان اش هاي شبيج هيج فزيتي

هيلة شعندك اهنا وشتريد مني

ابو نشوان والله حلوه يسالون واحد ابيتة شتسوي اهنا

هيلة ابو نشوان بداعت نشوان اطلع من المطبخ مابية حيل مشاكل احسبني اختك وشرفك

ابو نشوان بس انتي مو اختي وبعدين اشفتيني ماعندي احساس واني اشوف كل هذا الجمال يفتر كدام عيني وماسوي شي

هيلة خوية الخاطر الله بداعت نشوان اني مرة فقيرة وماعندي غير شرفي احافظ علية

ابو نشوان واني مخيل عليج من زمان واجتني الفرصة اشوفج جنج تفاحة زاهية وكل نفس تدنة عليج

هيلة خوية الخاطر ربك والخاطر نبيك واسلامك عوفني لا اعوف الشغل وانهزم

ابو نشوان شو تعالي خلي اروي عطشي وراها روحي وهو يحاول يتهجم عليها

هيلة مابيها مجال لو انهزم وحتى عباتي اعوفها لو اذا رحت على عباتي راح يحس ويجلب بية كلت انهزم واحافظ على شرفي احسن

اقرب شي الي الباب الي اكدر انهزم منها

وية ركضتي وصلت للباب من فتحتها صار نشوان بوجهي

نشوان هلا ام جوري شنو طالعة هيج

هيلة ها ها لا ماطلع بس بس

نشوان بس شنو خالة

هيلة بس ردت اشوفلي جاهل ادزه البيتنا ياخذ غراض انطتهم الي امك

نشوان هااا زين هاج هاي الحلويات طببيهم جوه واني اخذهن البيتج

هيلة ها لا خالة البنات ميفتحون الباب الواحد غريب

نشوان على راحتج امي وين

هيلة راحت للصالون هي واختك هسة على جية

نشوان روحي كملي شغلج اروح اشوف ابوية

رحت على ابوية جان كاعد بالصالة بس شكلة مسويلة عملة ابوية واعرفة نقطة ضعفة النسوان وهاي ام جوري مو مرة طركاعة جمال وشباب حتى الي يشوفها وية بناتها يكول اختهن

ابو نشوان ها بابا كملت طلبات امك

نشوان اي كملت وانت كملت

ابو نشوان شكمل اني ماعندي شي اسبح والبس قاطي

نشوان اقصد على ام جوري

ابو نشوان بارتباك شبيها ام جوري وشنو قابل اساعدها بالمطبخ

نشوان انت تعرف قصدي ولو هي تهز اكبر شارب بس خطية فقيرة تريد اتعيش وتعيش بناتها

هيلة رجعت للمطبخ بس جنت خجلانة من نشوان اكيد حس علينا رجعت كملت شغلي بساع بساع واني دموعي تجري على خدي

وينك محسن تعال شوف حالي شدعي على كلمن جان السبب بهاي بهذلتي

ام نشوان ها ام جوري كملتي شغلج

هيلة اي كملت بس اللحم اقل من نص ساعة ويستوي
والدجاج شويتة كلة وطفيت التنور وغطيتة ابطن التنور حتى يضل حار والخبز جبتة وياية ولفلفتة

ام نشوان زين هاي هية اخذيلج عشة انتي والبنات وهاج هاي الف دينار وخواتي راح يجن هن يصبن وياريت تجين بالليل حتى تغسلين المواعين وتاخذين الاكل الزايد

هيلة رجعت للبيت واني التعب الي بكلبي اكثر من الي بجسمي

نرجس ها يمة اتاخرتي متت من الجوع

هيلة ذاك الاكل جبتة وياي صيحي اختج حتى تاكلون وتكعدن تقرن

نرجس يمة اني من طلعتي الى هسة اقرا مليت اسالي جوري

جوري قبل لنختم البارت اعرفكم بنفسي

اني جوري محسن عمري 17 سنة صف الخامس علمي
اسكن محافظة كركوك

امي اسمها هيلة عمرها 32 سنة بس التعب ماخذ حيلها كلة رغم الجمال الي شايلتة اني واختي ماخذين من شكلها هواي
اختي نرجس عمرها 16 سنة صف رابع عام

مواصفاتي بيضة عيون عسلي طولي حلو وجسمي مكتمل الانوثة شعري احمر هلكد ما امي اتخليلي حنة

وعيت على الدنيا واني بلا اب امي تكول استشهد بحرب ايران من جان عمري سنتين

جنت اشوف امي شلون تسوي المستحيل حتى توفر النا لكمة الخبز واحتياجات المدرسة

ومثل كل البنات جنت اتمنة عندي اب اتباهة بي ويكون سند الي ويكونون عندي عمام واجداد وخوال وخالات

كل ما اسال امي على اهلي وين تكول هي يتيمة واهل ابوية مجانو موافقين على زواجهم لهذا اتبرو منه

اشكد جنت اريدها اتكلي هم وين وين عايشين متنطيني اي جواب يريح كلبي

بس جنت متاكدة امي تخفي سر ولازم اعرف شنو هو

حبايب تتوقعون جوري راح تكدر تقنع امها حتى تكتشف السر وياترى شنو هو هذا السر

مثل ماذكرت بالبداية النشر راح يكون بين يوم ويوم بشرط اذا عبرت التصويتات 200 تصويت

حتى لو اضطر الغي نشر القصة مو المشاهدات تتجاوز 500 وتصويت ميعبر 100

تحياتي اختكم الاسدية ولتنسون دوسو 🌟🌟