انثى في عرين الوحوش الفصل الثالث 3 - بقلم الاميرة ارجوان

الكاتبة الاسدية

موكافي حزن ياكلبي مامليت؟
مثل دمعة يتيم اليوم حالك
بجيت هوايه حتى الدمع ملاّك
وطلب دمعك كلب ثاني إبدالك
وحقه الدمع لوملّك ومعذور
لأن ماكو كلب وفه بمثالك
شمالك ياكلب صدكت بالناس
وثقت بيهم عليمن شنهو اجالك
عافوك التحبهم وبرخص باعوك
ووفيت بحبك ومحد وفالك
اريدك ياكلب تنسالي الهموم
ولاتعتب بعد اكطع وصالك

اسم الله يمة جوري اكعدي حبيبة

جوري يمة فدوه نفس الكابوس راح يموتني من اني وزغيرة

هيلة اتعوذي من الشيطان واستغفري يمة ونامي خطية يومية مفززه نرجس بالليل

جوري يمة منو هاي المرية الي اشوف النسوان ملتمات علية ويكتلنها وبنات زغار اثنين مجلبات بيها ويصرخن من الخوف

هيلة مادري يمة انسي هذا الكابوس ونامي

جوري يمة شلون انسة وهذا الحلم صار سنين وياي واعرف تفسيرة عندج

هيلة واني الف مرة كتلج ماعرف افسرة اني مرية فقيرة حتى قراية وكتابة ماعرف

جوري يجي يوم واعرف بس والله يايمة اذا طلعتي تجذبين علينا ومعيشتنة بجذبة عمرنا ماراح نسامحج

هيلة الله يهديج بنتي بس اريد تعرفون عمري ماسويت الغلط والحرام

جوري رجعت خليت راسي على المخده وارجع استذكر الحلم هيج مثل الخيال براسي

نسوان 3 ملتمات على بنية لا لا هاي مرية ساعة اكول لا يمكن بنية بعمري لازماتها ويكتلن بيها واكو وحده تتفرج عليها والدموع بعينها

اوف تعبت ياربي بس خلي يجي الصبح اريد اسال نرجس على هذا الحلم

ماعرف شلون عيني اخذتها النومة يمكن من التعب مال الدراسة لان باجر اول امتحانات نهاية السنة

هيلة جورية جوري ماما اكعدي راح تتاخرين على الامتحان نرجس يمعودات شكو اكعدن شلعتن كلبي

جوري بيش الساعة ليش

هيلة يمة ساعة ستة اكعدن اكلن لكمة وراجعن امتحانجن

نرجس اني كعديني الساعة سبعة وربع ماريد اراجع درست هواي

جوري كعدت غسلت وجهي ولزمت كتابي حتى اراجع قبل لا اغير ملابسي

عيني بالكتاب بس بالي ابد مو يم الدراسة كل بالي مشغول بالحلم مال البارحة

هيلة كومي بدلي ملابسج ورجعي اقري بين ما اسوي الريوك

جوري لا خلي اقرا واخر شي ابدل بعد ماتريك

هيلة بكيفج يمة اهم شي شدي حيلج يمة اريدج ترفعين راسي ومتضيعين تعبي

جوري ادللي يمة

راحت امي تسوي الريوك واني ركضت على نرجس اكعدها لج نرجس نرجس اكعدي

نرجس ها شكو اتاخرت

جوري لا ولج كعدي اريد اسال على حلم حلمتة البارحة

نرجس وهي ترجع تغطي راسها اشكد بطرانة ام الاحلام ضلي عيشي باحلامج انتي وكرومي

جوري ولج غبية يااكرم هذا اكعدي اسمعيني ولج حلم مادري كابوس

نرجس خليني انام شلون انام بالشارع وارتاح منج ومن كوابيسج الليل كلة مكعدتني

جوري خلي اكمل امتحانات لازم اسوي حل واعرف امي ليش متدلينا على اهلنا

طلعت اني ونرجس رايحين للمدرسة امشي وعيني بالكتاب ونرجس كل شوية اتكلي شوفي هذا البيت شكد حلو شوفي هذول جم سيارة واكفة بالباب واني ما ارفع عيني اضل اقرا

نرجس لج جوري شوفي اكرم شكد حلو طالع اليوم

جوري رفعت راسي واني اتلفت اريد اشوفة وين

نرجس ههههههه صار ساعة اكلج شوفي البيوت والسيارات مارفعتي عينج من كتلج على اكرم

جوري لتصيرين سخيفة ويلا امشي بسرعة حتى نشوف اسماءنا باي قاعة ونلحك نراجع شوي

نرجس موكافي تقرين انتي حتى اسماء المؤلفين مال الكتاب حافظتهم

جوري مو احسن ما اضل من نجي الاسئلة اصفن وماعرف اجاوب

نرجس اني ماتعب نفسي مثلج وانجح قابل شريد اطلع معدل حتى لو اصير طبيبة يكولون هاي نرجس الدكتورة بت الخبازة

جوري اكلج انتي شنو موضوعج صايرة هواي اتعيرين امج بالخبازة شنو الي اتغير من يوم يومنا واحنا بنات الخبازة وراضين وقانعين شمعنة هسة

نرجس خليني بقهري وساكتة يلا امشي كافي حجي

جوري هسة طلعت اني احجي الله يهديج بس اريد تكليلي هم تذكرين شي عن طفولتنا

نرجس اي اتذكر جدو ابو سمير شلون جان يشتريلنا وشلون جان يحبنا صدك هو جدو ابو سمير وين

جوري كلام نرجس رجعني الى سنين وره من ذكرت جدو ابو سمير جنت ناسيتة كتلها ذكرتيني بجدو ابو سمير

وصلنا للمدرسة واني فكري كلة ضل وية جدو ابو سمير
منو هذا صحيح هو جدي زين وين هو معقولة مات شو ماتذكر زين امي ليش متجيب طارية

تشوش عقلي كلش حتى صديقاتي ماحجيت وياهم فزيت على صوت الجرس حتى ندخل للقاعات ونمتحن

استلمت الاسئلة واني فكري بين الاجابات وبين جدو ابو سمير بالكوه ركزت على الامتحان وجاوبت طلعت لكيت نرجس تنتظرني

نرجس شكو هلكد اتاخرتي يعني لازم تجاوبين نصا

جوري شلونج بالامتحان

نرجس زينة الاسئلة سهلة وجاوبت وانتي

جوري اني هم جاوبت صدك اني باجر ماعندي امتحان

نرجس اي عيني ادري ماعندج امتحان بس بالاحياء كلها اعفاء طالعة

جوري ماصرتي مثلي جان انعفيتي

نرجس مليون مرة اكلج اني ماتعب نفسي هسة عود بالسادس اشد حيلي لتدوخين نفسج بية

جوري رجعنا للبيت لكينا امي خطية منتظرتنا صارت عيني على البيت الي بصف المشتمل مالتنا جان مقفول بس مرت ابالي ذكريات اني ونرجس جنا نروح الهم اي هو هذا بيت جدو ابو سمير

هيلة ها يمة بشرو شلونكم بالامتحان

نرجس اني زينة جاوبت والاسئلة سهلة واكيد جوري راح تاخذ فوك التسعين

هيلة الحمد لله فوتو يمة اكلولكم لكمة ونامن ساعة وكعدن اقرن

نرجس اي اهم شي الاكل والنوم يمة سويها ساعتين نوم

هيلة شتلحكون تقرون يمة

نرجس انلحك قابل شعدنا بكلوريا

هيلة يمة جوري شبيج مو على بعضج بس اتصفنين شنو ماجاوبتي

جوري لا جاوبت وياريت تعوفيني نايمة لان مانمت البارحة من ورة الكوابيس

هيلة يمة وقرايتج شلون

جوري ماقرا لان ماروح باجر

هيلة يا يمة ليش وامتحانج شلون متروحين

جوري يمة مليون مرة كتلج عندي اعفاء مامتحن

هيلة يعني مثل العام من مارحتي للامتحانات ونجحتي

جوري اي يمة مثل العام

هيلة هم خلف الله عليهم من ينجحوج وانتي ماتمتحنين

نرجس على شنو خلف الله عليهم هي نجحت قابل هم منجحيها

هيلة جا انتي ليش مو مثلها متمتحنين

جوري يمة جدي ابو سمير وين

هيلة هاااا

جوري اسال على جدو ابو سمير وين

هيلة وشذكرج بابو سمير

جوري اتذكرتة بس هو وين ماتذكر شي عنه

هيلة هسة عوفونا من جدكن ابو سمير راح اصب الغدة لان العجين اختمر وراي خبز هواي

جوري يمة ماريد غدة اريد اعرف جدو ابو سمير وين راح وهو جدو ابوج لو ابو بابا

هيلة مات جدج ابو سمير ارتاحيتي

نرجس الله يرحمة عوفو بكبرة مو متت جوع هسة وكتج ياجوري

هيلة اي يمة دقايق والاكل يمكم بدلو ملابسكم بسرعة

جوري عرفت امي ماراح تحجي كلشي ماضل كدامي غير اسوي الي كال علية اكرم مال الجنسية

كملنا اكل كلت الامي يمة بالمدرسة يريدون نسخة من الجنسية مالتي

نرجس ليش شيسوون بيها احنا ماكالو النا عليها

جوري لا بس احنا لان راح نروح صف سادس وبكلوريا

نرجس القاعة مالتنا هم بيها صف سادس اليوم امتحنو ويانة ماكالولهم

جوري يجوز باجر يكولولهم

هيلة ميخالف يمة بيوم امتحانج انطيها الج

جوري يمة بالمدرسة يكولون اذا ابوج شهيد جيبينا الهوية مال الشهداء حتى ينطونا درجات مال ابناء الشهداء

هيلة ها مو اهل ابوج عدهم مو عندي

جوري زين ليش احنا ما اخذنا حقوق وراتب مال شهيد

هيلة مو هم اهل ابوج اخذو كلشي

جوري شلون ياخذون كلشي مو احنا بناتة وانتي مرتة شلون الدوله تنطيهم بس الهم

هيلة مو اني ماداعيت بيهن وتعرفين اني مرة فقيرة كلشي ماعرف

جوري زين ليش ما هسة نداعي بيهن

هيلة وهي تعيط بجوري كافي صايرة تنبشين بالماضي هواي متكليلي منو لاعب بعقلج ها

جوري لان اني كبرت وصرت افتهم واعرف كل الي تكولي النا جذب ومتريدين نعرف الحقيقة شنو

هيلة كافي اسكتي موكافي علية التعب والظيم انوب انتي خلي اكوم اخبز احسن

رحت شغلت التنور وضليت افكر اخيرا اجة اليوم الي جنت خايفة منة

جنت متاكدة البنات من يكبرن راح يضلن يسالن ويدورن
شريد اكللهم زين راح يصدكن كلامي لو يلوموني

خلي بس يكبرن ويصير عمرهن 18 سنة حتى هن مسؤولات على قرارهن ومحد يكدر يتحكم بيهن

بديت اخبز والحر والتعب هد حيلي ياربي كل الي سويتة الخاطرهن حتى ليعيشن الي اني عشتة

جوري شلون اكدر اوصل الاكرم ماعندي احد غيرة هو الوحيد الي راح يخليني اعرف الحقيقة

شكد حاولت انام ابد مكدرت لان بالي ابد مو صافي
كمت من فراشي لكيت امي تسفط بالخبز بس وضعها كلش تعبان

هيلة ها ماما ليش مانمتي شوية ترتاحين

جوري مانعسانة كلت اكوم اساعدج بالخبز

هيلة ماعندي شي كملت بس اخذ الخبز البيت ام اكرم وبيت ام محمد وبيت ام نشوان

جوري لا ارتاحي اني اخذ الخبز انتي تعبتي

هيلة لا ماما اني اخذه ماريد توصلين البيت ام اكرم وبيت ام نشوان

جوري ماما الي ابالج كلة مو صحيح اني عندي اهم شي مستقبلي لا اكرم ولا غيرة

هيلة اعرف يمة اعرف بس اخاف ادزج البيت ابو نشوان اخاف مرتة طالعة وهذا واحد ساقط

جوري حسيت امي صاير وياها موقف وية ابو نشوان بس متكدر تحجي لان اكيد اذا حجت راح يطلعوها هي الغلطانة لان فقيرة ومالها احد

كتلها لتخافين علية انتي مخلفة بنية بعشر ولد اخذت الخبز اول شي وصلت خبز بيت ام محمد وبعدين رحت على بيت اكرم دكيت الباب طلعتلي ام اكرم

ام اكرم ها جوري لازم اخذتي درب امج بالشغل

جوري وشبي درب امي تاكل لكمتها بالحلال والشرف افتخر اخذ دربها

ام اكرم اي صيري حبابة واعرفي دربكم وين لتباوعين على غير درب

جوري لا ان شاء الله اندل دربي واخلي امي وكل الناس تفتخر بية عفتها ورحت صدك غثني كلامها وهذا اكرم ماشفتة شلون اكدر اوصله

مريت على بيت ابو نشوان فتحلي الباب ابو نشوان اشكد حقدت علية لان احس هو انسان ابد مو نظيف

ابو نشوان هاي منو الحلوه انتي بت ام جوري

جوري اي اني جوري وهذا الخبز امي دزتة

ابو نشوان عمي صدك انتن مو نسوان لا تكول حلاوة ومصنفة

جوري ماحجيت اي شي وياه عفتة ورجعت للبيت بالطريق شفت اكرم

اكرم هلا جوريتي هلا بعطرج الفواح

جوري اكرم راح اجيبلك الجنسية مالتي واريد اعرف الحقيقة كلها منك

اكرم اذا الجوريتي ما اتعب المن لعد تدللين

جوري ماكدر اتاخر على امي اروح وبعد اربع ايام عندي امتحان اريد اشوفك وانطيك الجنسية

اكرم تمام راح انتظرج الصبح بالباب

جوري اليوم عندي امتحان وبالموت اخذت نسخة من جنسيتي من امي يمكن هاي اول مرة اشوفها بحياتي حتى مافهم منها شي وحتى صورة مابيها

طلعت اني ونرجس الصبح مريت من يم بيت اكرم لكيتة واكف بالشارع سلمت علية وانطيتة نسخة الجنسية ومشيت

نرجس هاي شنو ليش انطيتي الجنسية الاكرم وشيسوي بيها مو كلتي يريدوها بالمدرسة

جوري اسكتي بعدين افهمج من نرجع

نرجس زين امي تدري

جوري ديري بالج اتكولين الامي اي شي افتهمتي

نرجس زين ماراح اكول شي الامي بس من نطلع اريد احجي وية نشوان راح يجيبلي هدية وياه اليوم

جوري لج شعندج وية نشوان وعلى اي اساس يجيبلج هدية شلون تقبلين تاخذين شي منه

نرجس مثل ما انتي تحجين وية اكرم اني احجي وية نشوان هو يكول اني معجب بيج وراح يشبعني هدايا

جوري ولج هذا نشوان يلعب عليج عنده الف علاقة وية البنات واذا تريدين سالي بنات المدرسة علية

نرجس وحتى لو صدك قابل شعلية بي مافكر يخطبني اعرف اني مو من مستواه بس خلي اخذ منه هدايا واعوفة

جوري ولج هي هاي تربية هيلة بيج هي هاي السمعة والشرف الي ماعدنا غيرهن لازم نحافظ عليهن

نرجس اهو كامت تحجي مواعظ خلي نطب للامتحان وبعدين احجي براحتج

جوري طلعت من الامتحان لكيت نرجس منتظرتني بطريق الرجعة طبكت سيارة يمنا بيها نشوان

نشوان هلا بالحلوات تعالو اوصلكم بطريقي

جوري لا منحتاج توصلنا ولا نريد منك شي افتهمت

نشوان وانتي نرجس
جوري زحتى نرجس نفس الشي متريد منك شي وروح منا

نشوان خاف شفتي نفسج حلوه بس اني بفلس ماشتريكم

جوري ومنو كلك احنا للبيع ومتشترينا

نرجس على كيفج جوري ليش هيج

جوري ماسمعتي شيكول ميشترينا بفلس ولج هذا زاحد ساقط يريد يلعب عليج

نرجس طيرتي علية الهدية شحجي عليج

كملت الامتحانات وكعدنا بالبيت وماعرف شنو اخبار اكرم ووين وصل بموضوع الجنسية

انشغلت اقرا مواد السادس لان ناوية لازم اطلع معدل طب
امي كملت خبز وطلعت تاخذه للناس دقايق واسمع صوت الباب يندك

فتحت الباب شفت اكرم كبالي

اكرم هلو جوري شفت امج طلعت كلت اجي ابشرج عرفت اهلج وعمامج وين

حبايب كلبي تتوقعون جوري من راح تعرف السر راح ترتاح وشنو مصيرهم بعد ما عرفو الحقيقة

وارجع اذكركم التصويتات كلش قليلة انتظر لان اكثر المتابعين ميدرون بتنزيل القصة

لتنسون دوسو النجمة وسوو تاكات للي اتحبون يشاركوكم قراءة القصة
تحياتي اختكم الاسدية

اليوم راح ارجعكم الى الماضي والكلمات الجميلة

على كولتكم جيل الطيبين

https://www.youtube.com/watch?v=0YlSZayfL9o