انثى في عرين الوحوش الفصل التاسع والعشرون 29 - بقلم الاميرة ارجوان

الكاتبة الاسدية
مساء الورد والمحبة على اغلى صديقات وخوات واخوان ربي ميحرمني منكم

اشكر كل شخص وقف وياية حتى لو بكلمة وشكرا على دعواتكم البنتي بالشفاء ربي يشافي كل مريض

على كولت خالة منسية اتجالع وتطلع بالروح ومتطلع لان اعمالهة كلهة سيئة

ضلت شهر تتعذب وتللوع واني من اشوفهة ازيد حقد وكره وادعي ربي يزيد بعذابهة ولا يغفر الهة وللموت ماراح اسامحهة

بيوم الصبح سمعت صوت خالة سكينة تصرخ وتصيح ماتت ام محيسن

احس هاي الكلمة ابد ماهزتني او حركت مشاعري مرات من اسمع شخص مات انقهر عليه واكول خطية

هاي ابد ماحسيت باي حزن اتجاهة
ونفس الحال صارت الفاتحة والناس التمت من كل مكان

واني ولا اهتميت ولا لبست اسود وهم من عوايدهم حتى الجهال يلبسون اسود

وكل واحد يسال علية يكولون تسودنت من شافت اختهة ذبحوهة واني متجاهلة الكل

بعد موت منسية بدأ الصراع بين نورية وبين جميله كل وحدة تريد تصير هية الكل بالكل وتصير هي ام البيت والمسؤوله عنه

نورية ولجن سمعن كلجن الي جان ماشي بالحوش يضل مثل ما هوه والي اكولن عليه يمشي على الزغيرة والجبيرة فهمتن يو لا

جميلة جا وتي ياهو مالتج وشدخلاج

نورية انة الجبيرة وانة الي امرجن والي ماتعجبني اشوقهة عرض الباب شلونة

جميلة واتي ياهو وهيج تتحكمين بينة انة الي كل بالكل انة مرت سلمان الجبير

زهرة جا وانة هم مرت سلمان عليش ما انة الي اصيرن جبيرة الحوش

جميلة جا هي ضلت بس للزعاطيط ام الوسخ تصير الجبيرة

زهرة مامش ام الوسخ غيرج اتي وجدج ابو العرك انة بت شلال الرفيق بالحزب ويوما ابوي جا سلمان ماصار اله غيمة بالحزب

جميلة وج زهيرة انة تحجين على جدي ان ماخليتة يذبحج مثل نرجس ماتسمة بسمي
نورية ولجن بسجن هاي جدامي وهيج تساون جا وراي تتمالشن من الشعر
جوري سمعت عركهن وهوستهن عفتهن وطلعت امشي بالزرع

توني طلعت من البيت اتلاكيت وية رجال جاي باتجاه بيتنة

شلال اكولن يحلوه اشوفنج طلعتي من بيت سلمان اني كرابتة يو امين

جوري باوعت عليه بنظرة حقد لان سالني وكال انتي كرابة سلمان وعفتة ومشيت

جبارة هيو شلال المسودن شعدك وية جوريتي

شلال امش يالمسودن شلك غرض جا هي صكد جنهة جورية بس شمالهة ماتحجي شنهي خرسة

جبارة لاتخليني تطكك بحجارة وافشخنك

شلال ولك يالمسودن لاتخلني اطكك جيلة واشمرنك للجلاب

جبارة ولج جوري المسودنة تانيني هاذ شلال مسودن سريد يطكني جيله

جوري اجاني جبارة يركض ومسوي روحة خايف من هذا الي اسمة شلال
اني من اشوفة هيج يتصرف اضل اضحك ماتحمل

عفية عنده قابلية هيج يتصرف وبكل عفوية

مشينة للزرع اني وياه كعدت يم الشط وضليت صافنة

جبارة جوري ديري بالج من هاذ شلال
جوري وشبي شلال وشعندي وياه

جبارة جا انة شفت شلال شلون يبصبص عليج وعيونة جنهة عيون الشيطان ماخلت شي بيج ماشافتة

جوري اكول جبارة علي وين الكاه اريد اشوفة

جبارة جا مادريتي جا غير علي تسودن وهج من ديرتنة

جوري يااا من شوكت وين راح

جبارة من يوم غضبان موت نرجس وهو تسودن وعاف ديرتنة وحتى امة واهلة وهج يكولون كاعد بالمستشفى ويريد ينغل البغداد

جوري اريد اشوفة

جبارة وهو صافن

جوري جبارة كتلك اريد اشوفة

جبارة ياهو

جوري شنو ياهو اكلك اريد اشوف علي

جبارة اضنج صكد تسودنتي

جوري اي صح تسودنت والمسودم كلشي يسوي وانة رايحة العلي

جبارة وج يالمسودنة ردي لا يذبحج غضبان وج مو احجي وياج

جوري اسمع جبارة يصح علية حتى ارجع بس اني استمريت بالمشي اعرف بس ميعوفني اروح وحدي ويروح وياية شوية واحس بي قريب يمي يمشي وهو بس يدردم

جبارة هاذ حضي بس المسودنين ذابهم علية انة شجابني شوداني يو خالهة تسودن صكد جا ماهيج سوت بية

لا لا اهي اضن تسودنك صكد اي مامش عاكل يساوي هيج جا وين نلكي علي

جوري اريد اسكت جبارة واخلي يمشي وياية كلت اكول جبارة اتذكر السيد الي زوجنة كال اسمك جبر ليش يصيحولك جبارة

جبارة يا صكد انة موش تزوجت جا عليش ماتسمعين جلمتي يلا ميخالف عبنة زواج من جذب

اني من زغير ومات ابوي امي جانت تكلي اتة الله اطاك الي جبرة على كسرتي وضليمتي

وضلت تصيحلي جبرة وانة ما رضيت عبن جبرة اسم بت وزعلت عليهة جان تصيحلي جبارة ومشت علية جبارة

جوري وانت صدك جبارة والله جبر خاطري بيك

جبارة صكد تحجين يجوري

جوري اي صدك واني احبك هواي

جبارة جا عليش تحبيني وانة مسودن

جوري اول شي انت مو مسودن وثاني شي اني احبك احسك انت اخوية الصدك

جبارة جا هيج اتي ماتحبيني

جوري لا ليش كلش احبك

جبارة جا اتي ماتحبين اخوتج عبد

ومويجد جا شلون انة اخوج وتحبيني

جوري اكلك بعد هواي للعيادة مالت علي
جبارة لا موش هواي هيج شغلة سويعة ونوصل

جوري اني تعبت مابية حيل امشي

جبارة جا خل اصعدنج على مطي

جوري عزة اني اصعد على مطي لا مستحيل

جبارة جا هاذ صويحبي مصيلح راح اخذن المطي منة واكلنله اردة ليك فد شوية

جوري لا شنو انت تصعد على المطي واني امشي ماريد

جبارة جا صعدي على المطي وانة امشي

جوري لا لا ماسويهة لو اموت

شفت جبارة صعد على المطي ويمشي بي واني متت من التعب وضليت كل شوية اكعد ارتاح

جبارة ما الله يهديج وتركبين المطي اشوفنج تعيبانة

جوري لا ماريد شكد بعد ونوصل

جبارة بعد ساعة

جوري صار ساعتين من كلت بعد ساعة ليش هيج

جبارة جا اتي الساعة الي انة امشيه. اتي تمشيهة بثلث ساعات شو تعالي خل احطنج على المطي

جوري نزل جبارة وشالني صعدني على المطي شكد خفت وردت اصرخ من الخوف وهو يمشي بية وجبارة لازمني ويمشي على كيف

شوية ومشة المطي سريع واني بديت اعيط يمكن افتهم الوضع المطي جان يطنكر وميقبل يمشي وجبارة يجر بي
انوب اني متت من الضحك ساعة اضحك ساعة ابجي

وجبارة يكول البت تسودنت

واني ازيد بالضحك يمكن اول مرة اضحك من كل كلبي هيج

نزلت من المطي وجبارة كوة قنعة يمشي اتكول صديقة ويقنعة يمشي وياه

شكد اتحس عنده براءة وفطارية تحسة مثل الطفل الي بعده ميعرف شنو حقد وبي براءة

وصلنة للعيادة اخيرا لكيت واد بيهة غير علي من سالت هلية كال باع العيادة

وقدم نقل للبصرة وهسة هو بالمستشفى الحد ميطلع النقل مالتة

سالت شلون اكدر اوصل اله لان

محتاجتة الولد كال اني انطي خبر من اداوم باجر لان هو نفس المستشفى يداوم

كتلة كول العلي جوري محتاجتك ضروري وراح انتضرة يم الشط الضهر يومين

رجعنة اني وجبارة ونفس الحال ركبني جبارة على المطي وكل شوية اريد اوكع واضل اصرخ

رجعنة للبيت لكيتهم داخلين انذار والكل ادور علية عبالهم انهزمت

من شافوني اني زجبارة استلموني غلط وسب واني سويت نفسي ما اسمعهم
سلمان خزش والله يم حسين جتي بوحدة صرتي بثنين

جنت بجبارة هسة جبارة وجوري السوادين كابة

جبارة اته المسودن لا اطكنك بحجارة
سلمان وين وليتو من الضهر للمغرب ها ماكلتو احد ينشد علينة

جبارة جا هو ياهو الينشد علينة وياهو يدري بينة وين ماوين

سلمان خايب كم انشد علية انة انشد على جوري عبنهة موش بوعيهة ولنهة طالعة وتايهة

جوري باوعت علية صفح وعفتة ورحت واسمع بس عركة نسوان

اخر شي سلمان حسم الموضوع نورية هي المسؤولة عن البيت وهي الي تاخذ مكان منسية

اما نورية فماصدكت تصير هي رئيسة العصابة

بسرعة لزمت بيدهة عوجية ولبست يسموه جرخد وحطت الجلاب
( اكسسوار ذهب يكون شبيه بالبروج ) بالشيله وكامت تقلد منسية بكعدتهة وحجيهة وتصرقهة

ثاني يوم الصبح رحت كعدت يم الشط انتضر علي للضهر وهو ماكو

ويوم ثاني مفس الحال قبل صلاة الضهر شفت علي جاي علية

اول ماشافني نزلت دموعة كامت تجري عشرة عشرة

واني ماصدكت اشوف واحد يبجي بجيت بحركة كلب

علي كافي خوية لاتبجين الي راح مايرد لو نبجي دم

جوري علي اريد اعرف شنو الي صار ليش غضب كتل نرجس شنو شافك وياهة سمع عليكم حجاية

علي لا ابد بس الموضوع الي صار
جزري كعد علي يسولفلي الي صار بالتفصيل

اباوع علية شلون يحجي بوجع وقهر انتبهت عليه لحيتة طالعة ومتروسة شيب والحزن ماخذ هواي من شكله

علي انة عفت الديرة كلهة وحتى راح اعوف الناصرية مادشهة للموت

جوري زين وثار نرجس منو ياخذه

علي غير اعرف غضبان وين ضام راسة الا اكطعة وذر وذر وشمرة للجلاب

ماخليت مجان مادورتة اضن انهزم للحواز

جوري لو يضل يوم بعمري اخذ ثار اختي منهم

علي شوفي يجوري انة جنت اسال عليج والي عرفتة كالو عنج تسودنتي وانة اشوفنج اعقل من العقل كله اشردي بريشاتج لا يجي الدور عليج

جوري ماعوفهم الا اطلع حقنة منهم لو اضل طول عمري يمهم

علي وانة اضل اتابع اخبارج ومن احس محتاجتني تلكيني يمج

جوري شكرا احتاجيت اعرف شي وتاكدت منة

عافني علي وراح وصدك من يومهة بعد ماوصل للناصرية واخذ امة وياه وراح

جبارة جوري جوري وينج يالمسودنة

نورية ها يبو العلوم شجايب من خبر وجيتنة ترعد

جبارة مامش يالمسودنة جيت اكولن الجوري انة جوعان

نورية والله مامش مسودن غيرك انت وامك ومرتك امش لابارك الله بيك

جبارة وهو يشمر حجارة على نورية لاتكولين مسودن اتي مسودنة وسلمان مسودن وان حجيتي على امي المسودنة هي وجوري المسودنة اطكج بحجارة خوش

جوري تعال جبارة اسويلك حنونة

نورية همزين من سمعنة حسج عدالنة تسودنتي وصرتي خرسة

جبارة مالج غرض بيهة لا اطكنج

جوري تعال وياية للمطبخ

جبارة اكلج جوري غضبان يمكن رد لاهله وانة رحت على شلال الحزبي كتلة غضبان رد البيتة هلبت يكضونة

جوري لا ماريد يلزموة شستفاد اذا عدموه وما اخذ حق اختي

جبارة جا شمعرفني كلت تكضة الحكومة

سلمان ولك جبارة شلون بيك ما الله ياخذك لو يعكلك ونفتك منك

جبارة شمالك تصارخ تسودنت

سلمان ولك شلون تروح على شلال وتكله غضبان رد البيتة جا غير تجي علية وتكلي خل اكضنة ويكرمني الحزب

جبارة جا انت شلك غرض هو شلال حزبي

سلمان ولك وانة شنهي خراعة خضرة خل اطكك بجيلة وافتك منك

نورية صكد جذب جا اتة صكد تسلم سلمان للحزب خاطر وحده كح... ذبحهة وفتك من عارها

جوري من سمعت هيج حجت على نرجس ماعرف اشصار بية هجمت عليهة وملختهة تملخ كوة خلصوهة مني

بعدين رجعت وكعدت وية نفسي
اني ما لازم اتبع طريقة جبارة

راح اغير كل مخططاتي

الي عرفتة غضبان رايح البيتة ومن جايين علية الحزب مالاكي مهزوم

حبايب كلبي هنا راح تمر اكثر من سنة على وفاة نرجس الله يرحمهة وماكو اي شي جديد بحياة بطلتنة

نهاية سنة 2002 راح تبدي مرحلة جديدة بحياة جوري

انتظروني واحداث جديدة

تقبلوا تحياتي اختكم الاسدية