رواية أنتقام الصفحه 27 (ترميم) الفصل السابع وأربعون 47 - بقلم خـلود الـ محسن

انستا للتواصل lorai_alrwi

تفاعلكم على البارت گلبي❤️
………………………………
:-ملاذ حسن نحكم 23 سنة
احس فرحة بداخلي يستحق واكثر لان الي سواة مو قليل

اجت امي كعدت كدامي سحبتني لحضنهه
:-شلون صرتي

:-زينة

:-تردين اخذج لطبيب تعبانة

:-لا مابية شي

:-احجيلي شنو التردينة

:-ماريد شي بس جنت اريد حسن يتعاقب على السواة بيه وهاي هية

:-تجين يمي بالمطبخ

:-لا تعبانة اريد انام

:-بس تعاي مسويتلج عصير طيب كومي بس ضوكي لخاطري

:-اي هسة اجي وراج

:-لا كومي وياي

سحبتني من ايدي امشي وراهه فتت للمطبخ كعدت على الكرسي شاردة بفكري ما ادري شبية اكو شي بداخلي ما اتحكم بي شي يجبرني اتصرف ببرود

سمعت امي تكلي
:-مو صح ملاذ

رفعت راسي عليهه ما سمعت شتكول
:-اي صح

ابتسمت واجت كعدت كدامي بيدهه كوب العصير
خلتة بيدي

:-لا مو صح

:-ليش

:-لان اني ما حجيت شي وين شاردة شتفكرين

:-لا وياج ما شاردة

:-ملاذي

:-ها

:-انت ليش هيج شاردة وتعبانة صارلج شي من نخطفتي حسن سوالج شي

حركت راسي بمعنى لا ودموعي تجمعت بعيني خليت الكوب على الميز وكمت من مكاني ارجف

:-اذا تشكون بية اخذيني سويلي تحليل وتأكدي اني مابية شيي بس صعب متقربلي والله تتشكونن بيةة انتم موو اخذيني يلة

كامت مصدومة مني جنت احجي بصوت عالي
:-لاا يمة ولج مو هيج قصدي بس احجيلي شبيج

:-ماابية شي وهسسة راح ابدل ونروح تأكدوا بنفسكم لان اني حتى من احجي شي محد يصدكني

شفتي الجوة كامت ترجف وجسمي كلة يرجف ما اسيطر علية ما ادري ليش اتصرف باندفاع

اعرف امي مو قصدهه شي بس اي شي ينججي كدامي افسرة غير شي واعصب منه لزمت ايدي رادت تحجي شي ثنينه التفتنه على صوت صعب بباب المطبخ

:-يوم عوفيهه

فلتت ايدي رجعت دنكت راسي اهدي بروحي
:-ملاذ اريد احجي وياج بالغرفة

:-ماريد احجي يلة انت هم تشك بيه روح شغل سيارتك خل نروح للدكتورة يللة

قرب من يمي لزم ادية عصرهم بين ادية سحبتهم منه قوة قبضته عليهم

:-اشش بس اشوفج شي ما اريد شي ثاني

فلت اي ولزم الثانية دار وجهه على الميز
:-هذا العصير الهه؟

ردت علية امي
:-اي

اخذة بيدة وطلع برة المطبخ يسحل بية وراه فات للغرفة خلة العصير على ميز التواليت فلت ايدي واتجه لباب الغرفة قفلة وخلة المفتاح بجيبة

:-شتريد طلعني ماريد ابقى هنا اكرة الغرفة المقفولة طلعنيي

دفعته من كدامي اريد اعبر للجهه الثانية لزمني من عكس ادية ثبتني كدامة

:-اهدي بس احجي وياج

:-ششترييد

فلت وحدة من اديني ومد ايدة بجيبة طلع تلفونة
بقى يكلب بي مااشوفة شيطلع

فلت ايدةزمن ايدي وخلاهه على جتفي سحبني لحضنة مقيدني ايدة دايرهه على كل ضهري خاف اتحرك دفعته اريدة يبتعد سووة نفسة ما مهتم مركز بالتلفون

شغل التلفون اسمع بس الصوت

:-اولاََ تم الحكم على المدعي حسـن ....… بالحبس لمدة خمسة عشر عاماََ بتهمة الاختطاف حسب المادة القانونية 423 من عقوبات القانون العراقي

ثانياََ الحبس المطلق بمدة خمس أعوام وذلك بجريمة تعرض الضحية للاذية واجهاضها جنينها وذلك حسب المادة القانونية 419 من عقوبات القانون العراقي

ثالثاََ الحبس لمدة ثلاث سنوات وذلك لتعاطية المواد المخ/درة وبدفع غرامة مالية بقيمة 10 ملايين دينار عراقي وفصلة من وضيفة نهائياََ حسب المادة القانونية 32 من قانون العقوبات العراقي

وبهذا تم الحكم على الجاني حسن ........ بالحبس لمدة 23 سنة مع دفع ما ذكر سابقاََ

سد التلفوت جنت مركزة وية الكلام حرف حرف احس گلبي يرجف واني اسمع حقي نوخذ منه ضم التلفون
بجيبة وخلة ايدة جوة حنكي رفع راسي اله

:-وعيونج الي يفكر يلزملج طرف اسويهه دموم وياه
ماسويت هيج علمود ترضين علية ولا اريدج ترجعيلي لان بهل لحضة اني ماريد ترجعين لان مستحيل اخليج تجيني واني اهملج ثانية وحدة والله لغير كلشيي لاجل عينج واخلي راحتج بوسط حضني

:-ماريد ارجع اني مرتاحة

:-بس انة تعبان ارتاحي وراهه نحجي بهل موضوع اكو هواي دفاتر نفتحت لازم تنسد واولها حسن سدينة ملفة والله لضل طول عمري وره هل قضية يوم واحد ما اخلي يرتاح

:-شكرا

فلت ايدة من وجهي دنكت راسي نزل ايدة على بطني خليت ايدي فوك ايدة اريد اوخرهه بعد ايدي وخلة ايدة

:-جانت هنا نعمة الي والج بس ما دامت رايدهه ترجع رايدهه ملاذ وبأقرب وكت حيل محتاجهه هاي الراح تريح بالج وبالي راح تعيشنة بأمأن طول العمر

دنكت راسي نزلت دموعي رفع ايدة الثانية وحاوطني بحضنة خلةة حنكة على شعري يحرك بي بخفة بعدت نفسي رفعت راسي كبل ابتعد ودار وجهه مني

:-شو باوع

رفع ايدة يمسح بوجهه لزمته من زندة درته علية باوعلي مبتسم عيونه حمر و رموشة مبلله

:-جنت تبجي؟

هز راسة برفض
:-جذاب بجيت اعترف تبجي عليه لو على هذا

:-ياهو؟

:-هذا الطفل ولد مدري بنية

:-محد يهمني بكدج وبعدين غلطانه ما بجيت

دار وجه على الميز شال كوب العصير خلاه كدامي
:-اشربي

:-ماريد ولا عبالك احجي وياك ترة ماحجي وياك ويلة اطلع برة

ابتسم ودنك راسة يتمتم بصوت مسموع
:-صبرني عليهه يأخو زينب صبرني

:-سمعتك ترة يلة برة ماتحمملني اطلع

:-اشربي العصير واطلع واني اكلج ضلي زعلانة لان ماريد ارضيج هيج ماتلوكلج

:-شوف ماريد

:-لا تردين

:-اهو شبيك انتت شبيكك ايديي توجعني

:-بيدج الثانية

:-هم توجعني

:-جا ياهي دفعني مساع ابوي

:-اكلك اطلع برة انت وعصيرك يلة ماريد

بقى ساكت ثواني يباوعلي
حجة بنبرة تختلف:-اشربج؟

ما كدرت اخفي ابتسامتي گبل دنكت رفعت راسي اعض بشفتي ماريد ابينله مبتسمة

:-لا عندي ادين

:-لا يوجعنج اني اشربج

قرب مني خلة ايدة على جتفي كعد على الجرباية وكعدني كدامة يشربني بالعصير كل ما اباوعلة عيونه علية

كملت رفع ايدة مسح طرف شفتي بأصبعة الابهام ونزل ايدة جان لابس شفقة نزعتهه من راسة وخليتهه على شعري عدل شعري خلاه ورة اذني بقى يرتب بي و خلة الشفقة عدل

:-ملاذي

:-ملاذ اسمي

:-ضللي زعلانة انه جاي اكلج ماريد ترضين بس خليني اسميج ملاذي

:-ترا انت طلكتني ماحبك خوش؟

:-لا مو خوش

:-لاا خوش وهسة اخذ الكوب واطلع

بلع ريكة ودنك راسة
:-ملاذ كل ما افتح باب ينسد بوجهي هل مرة ادعيلي من گلبج حيل محتاج دعائكم ملاذي ناذر عمري الج بس ماريد تتعلعلين وياي اصفي كلشي وراجعلج

:-ماريد ارجع كلشي طلع من نفسي اخاف صعب صرت اخاف ماكدر اخسر اكثر من هيج

خلة ايده على خدي
:-تهون وكلشي يضل ذكرى يجي يوم نحجي هل شي واحنة نضحك

:-يعني انت راح تضل؟

:-ترديني اضل!

بقيت اباوع بعيونة وهو عيونة علية دنكت راسي بدون ما احجي

:-تردين اجيبلج شي

:-لا

:-تحسين روحج مريضة تحتاجين دكتور

:-لا مابية شي

:-تنامين؟

:-اي

:-انومج!

بلعت ريكي متوترة حركت راسي برفض
:-لا اصلا اطلع من الغرفة لاتجي يمي انت مو طلكتني مايصير تضل يمي

:-ياطلاك؟ دروحي هو هذا ههم طلاك وفوكاهه مو بس  طلاك جذابي هم حامل

:-اي معليك اطلع يلة ماريدك ماريد احجي وياك ليش تحجي وياي ليش تجي يمي

:-انومج واروح احجيلج شي علمود تنامين

:-شوف اكلك شي

:-كولي

:-اني مخنوكة اكو شي جاي خنكني لان ماعرف احجي لامي شبية ومحد عندي احجيله حتى رتيل مايفهموني شأريد

:-اني يمج كل وكتي الج احجيلي ملاذ

:-انت ماجنت تخليني هيج احجي حتى انت تغيرت ماريدك ماريد احجي لاحد

بلع ريكة كام من مكانة بدون ما يحجي يتلفت بالغرفة
:-وين الكة فراش مال نوم؟

:-مناك فراش امي

دار للجهه الثانية شال الفراش فرشة بالكاع سحب مخدة من الجرباية ونزل الغطة مالتي

:-تعاي

:-شتريد وين اجي؟

:-تعاي بس نزلي جوة

:-ماا

درت وجهي للجهه الثانية قرب مني خلة ادية جواية يشيلني كمت ارفس بي

:-ووخرر وخررر

:-هاي شبيج والله مااسوي شي بس انزلي

سحلني سحل خلة المخدة على الحايط ركة نفسة عليهه وسحبني لحضنه خلة ايدة فوك راسي سحبة لصدرة

:-شبيج جامدة والله ما اسويلج شي لاتخافين

خليت راسي عدل
:-ما خايفة

سحب ايدي عبرهه على بطنة وبقى لازم جفهه يعصر بي ثنينه ساكين شوية وكال

:-تعبانة انتِ؟

:-اي

:-ما حجيتيلي شلون نخطفتي!

:-اني مو اجيت الك

:-ليش اجيتي؟

:-لان شهاب كلي واني خفت عليك طلعت بسرعة من الدوام واجت سيارة نزل واحد منهه ما طالع وجهه خلة شي على خشمي وبعد ما كعدت اله بالغرفة الشفتهه انت

:-وشصار؟

:-اني جنت ادك بالباب اريد احد ييجي عبالي انت لو شهاب وضليت ادعي عليكم اريد تطلعوني وضليت اصيح انت غمار مو صعب وحتى تلفوني مالكيتة

:-اي وبعدين

:-اجة حسن واني دافعت عليك هو يكرهك لان تحبني واحسن منه وراح خلاني اضل وحدي بليل والمكان مسكون اني ردتك تجي لان من اخاف من الجني انت يمي وماخاف بس ما اجييت

:-بس هسه انت يمي

:-بس من بقيت وحدي انت ما اجيت

:-شصار بعدين؟

:-كمت اسمع صوت بالباب يدك وهو محد اكو بس المكان مسكون اني ضليت بالزاوية خاتلة

عصر ايدي بقوة لان احجي وارجف من اذكر الصار روحي تنبهت خلة ايدة فوك شعري يحركهه دموعي تنزل على صدرة بس ما يخليني ارفع راسي

:-وببعد

:-بعد هو اني ردت احد يجي وحسن اجة دفعني واني بقيت ابجي من الالم وهددني يخلي اصدقائة يغتصبوني جبرني اصور فيديو ابوس رجلة واكله احبك

رفعت راسي اباوع علية
:-بس والله اني ماحبة وحتى من لمسني جسمي لحد هسه مادري شبي اسبح واجلف المكان وتضل نفسي تلعب منه افوت للحمام اجلف مكان ادية بس ابقى قرفانة

كعد وصار كدامي باس راسي خلة ايدة على خدي
:-بس اخذتي حقج منه وسمعتي بأذنج هو شلون تعاقب على السواة

:-اي انيي من سمعت فرحت

:-ترجعين للناصرية؟

:-لا ما اريد بس خل نغيير مكانه منا اخاف اهله يسوولنه شي

:-محد يگرب منكم يضيعون اذا واحد منهم فكر يسوي شي

:-اي بس اخاف منهم اخاف على امي هل مرة أذوني يجوز المرة التجي يسولهه شي

:-اخذج يمي بالناصرية هناك ما تخافين

:-وامي؟

:-اخذهه شلون جا تضل وحدهه

:-اي اذا امي ترجع ارجع

:-هاي هيه يصير خير

رجع لمكانة وسحبني عليه يحرك اييدة على شعري
:-اقرة قرأن

بقى يقرة بصوت مسموع ما ادري شلون نمت

كعدت اتلفت بالغرفة الضوة مطفي وهدوء تذكرت الصار قبل لا انام باوعت بصفي صعب ماكو

كمت بسرعة من مكاني شلت الغطة و رجعت اشيل المخدة

شفت علاكة بصفهه كعدت افتحهه كارتونة موبايل طلعت الموبايل ملزوك عليه ورقة فتحته مكتوب

:-ممكن نتعرف
وجواة رقمه

ضحكت وفتحت التلفون مشحون وكامل عصرت الورقة بيدي منزل بي كل البرامج كبل فتت للواتساب دازلي

:-نمتي وضليت صافن بعيونج تمنيت تفتحيهن واشبع منهن شوف ولو لو اضل عمري كلة صافن بيهن ما اشبع منهن

ضحكت وسديت التلفون طلعت برة غسلت لكيت امي كاعدة بالساحة

:-ها يوم شدسوين

ضحكت ورفعت راسهه عليه تباوعلي عاكدة حاجبهه
:-هاي ملاذ لو مبدلينج

:-ههه ليش

:-يا و تضحكين

كعدت بصفهه باوعتلهه مبتسمة
:-شنو يعني اني ما اضحك

:-لا والله صايرة ضحكتج مثل هلال العيد كلنه نتنطرهه

:-ههه لا اضحك بس ما منتبهه

:-لا يمة صعب ضل سويعه يمج ومن طلع انت فكيتي النونه

:-ههههه لا شوكت ضل يمي وبعدين هو بس حجينة ما كال شي

:-جا احنه مثل صعب يمة بكلمة يفرج فر

بقينة نضحك درت وجهي على شباك غرفتي شكد باوعتله منا

:-يوم

:-ها حبيبتي

:-صعب هم حجالج شي؟

:-عليمن؟

:-على اعمامة هم كال شي لو لا

:-لا والله يمة و كل ما تحجي وياه يضل صافن ومن أسأله هل ايام شجاي تسوي يكول مشغول هو عاف شغلة البناصرية كلة علمودج و هسه يريد يرجع

:-كالج نرجع وياه؟

:-لا ما كال ليش يريدج ترجعين

:-ما ادري

كمت من يمهه نضفت الغرفة وسويت عشة تعشت امي واني تحججت ما اشتهي

لليل انتضرت صعب ما اجة فتحت التلفون ادزلة رسائل ما عندة نت كلت لامي تجي تنام يمي لل 2 وهو ماكو

سمعت باب الشارع نفتح طفرت اباوع من الشباك فات بيدة اوراق مبين جان بالشغل فتحت باب الغرفة واكفة اباوعلة فات رفع راسة باوعلي وابتسم

:-ها بابا شعندج كاعدة

:-وين جنت

:-مشغول والله

خلة اغراضة على التخم واجة بصفي لزم ايدي واني منزلة راسي مسوية روحي ضايجة

:-تنامين؟

:-عشاك بالفرن

درت وجهي اريد افوت للغرفة سحبني من ايدي
:-ضايجة؟

حركت راسي بمعنى لا

:-تتعشين؟

:-ماريد

:-ماكلة شي

:-لا ماريد

تقدم لزم باب الغرفة سداة بهدوء حاوطني بيدة صرت بينة وبين الباب

:-هسه ااحجيلج شنو جنت اسوي

:-ماريد لاتحجيلي روح اتعشة واني راح افرشلك

:-تعاي بابا خل احجيلج شي

:-انت منتبة لروحك كل ما تسوي شي تقشمرني تعاي احجيلج شغلة و ماتحجيلي وتخليني ارضة

:-هي الشغلة الاريدهه ارضيج

:-ماريد

:-وخر اريد امشي

:-نروح سوة

مشة كدامي لازم ايدي اخذ مخاد من الصالة و فات للمطبخ  خلة بالكاع

:-اكعدي

كعدت وهو فتح الثلاجة يحضر بالعشة

:-اي شسويتي اليوم

:-ما سويت بس انتضرتك

:-خو ما ضجتي

:-ااي مليت

:-بعدج تعبانة اكو شي مضوجج

:-لا كلت لاميي نرجع للناصرية؟

:-لا باجر اكلهه

خلة الاكل وكعد كدامي يسويلي لفات
:-اكل لا تلتهي وياي

:-من تشبعين اشبع

:-خوش هاي السوالف مال الحب ماحبهه

رفع حاجبة مبتسم:-شتحبين؟

:-ماحب احد ارسله و مايرد علية

:-مافاتح تلفوني والله تعودي بس هل ايام

:-شجاي تسوي

:-شغل وداعتج المهم شهاب خابرني اليوم راد يحجي وياج

:-ماريد احجي وياه اكرهه

:-لا خطية هو وضعه فرد نوب وتزيدين عليه انت هو حاسبج حسبة رتيل

:-ماريد لا يحسبني ماحبة وبعدين شبي هو

:-فصخ هو وبينات صارت مشكلة واتصلت على ابوة كالتله ماريدة

:-ليش هي مو تحبة

:-مشكلة بابا معليج

كملت اكل غسلت وفرشتلة فراش
:-تنامين هنا؟

:-لا بغرفتي

:-بس اليوم

:-لا ما انام يمك غرريب علية

ضحك يحرك براسة فتت للغرفة انام دزلي
:-بيج ما بيج أزعلي علية ما تحلى المراضة اله بزعللة قوية

سديت التلفون ونمت رجعت اغلب وقتي انام
صعب حاجة امي علمود موضوع الرجعة بدينة نحضر بأغراضنا كلش قليل اشوف صعب مرات اسهر انتضرة ومادري بروحي انام مرات يفوت للبيت بدون صوت الكاة فارش ونايم بدون ما نحجي من اراسله ما يرد

و اغلب وقته من يجي للبيت يكضيهه اتصالات ويه علي وشهاب و جاي واحد جديد وياهم محامي مرتضى بحيث مكضي كل وكته وياة

اجة اليوم الي نرجع بي شالو كل اغراضنة وسلموا البيت لصاحبة جنت كلش متنرفزة لان صعب حتى كلمة ما يحجي وياي ملتهي بتلفونة ندمت على الساعة الحجيت بيهه وياة

كعدنة بالبيت الي اول مرة صعب جابني اله رتبناة وكملنة

فتت لغرفة صعب لكيت جنط مالته وبيهه ملابس
استغربت ليش مخلي ملابسة بجنط

اجت علينة رتيل و شهاب اجة سلم وراح هو وصعب وعلي وياهم

راحت رتيل اتصلت على صعب ما يرد شوية و اتصل علية
:-الو

:-انت وين؟

:-مشغول محتاجة شي

:-لا

:-باي يلة ببعدين نحجي

سد الخط بقيت صافنة على التلفون خلاني افور شهل تصرفات

مسحت وجهي اهدي بروحي احس حتى انفاسي صارت حارة جنت كاعدة برة اباوع للسماء فززني صوت امي

:-ها شتسوين

:-هيج كاعدة

:-تعاي جوة اكلي شي

:-لا ما اشتهي راح انام

فتت جوة باوعت للمطبخ مخلي مكتبة جبيرة على الباب مال الغرفة الي جان يقفلهه فتت للغرفة سديت التلفون و نمت حسيت احد يكعد بية فتحت عيني نعسانة شفت صععب كدامي خليت الغطة على وجهي

:-اريد انام

:-اكعدي تعشي

:-ماا روح اريد انام

:-كومي ولج امج لاتكعد

:-ماريد وخرر

لفيت روحي بالبطانية من صدك جنت نعسانة كال
:-بس اليوم خل اشوف مو راح اروح

وخرت الغطة من وجهي
:-وين تروح؟

:-مو تكولين غريب عليج ما يصير ابقى وياكم راح اروح

:-معلية بيك روح

رجعت احاول انام وهو يحجي مارديت علية مل مني وطلع

حاولت اسيطر على دموعي ما كدرت للصبح بقيت كاعدة امي كامت واني بفراشي امثل النوم سمعتهم برة يسولفون عرفتة راح يروح فتح بابا الغرفة واني غمضت عيوني باس راسي وحجة بصوت ناصي عباله نايمة

:-اسف بابا ادري هاملج بس كلشي جاي اسوي لاجل عيونج

كال هيج وطلع ضلييت اليوم كله ابجي حتى الاكل ما اشتهي اكله لا هو يراسل و لا اني مليت من البيت فتت للصاله امي كاعدة تسوي كليجة كعدت يمهه

:-يوم

:-ها حبيبتي

:-اني اريد اشتغل

:-لااا لاا ولاتفكرين ابدد اكعدي واسكتي

:-يمة فددوة والله اختنك من البيت ومحد يحجي وياي انت كل وكتج مشغولة ورتيل حامل و روحهه بخشمهه تنكد عليه

:-سوي اي شي بس لاتفكرين تشتغلين شنو نسيتي الصار وياج لو اذكرج

:-اهوو يوم فدوة افهميني والله مليت من الوحدة جاي اختننك

:-ماكو شتشغلين بلة هم تدرسين وتنخطفين

:-اي شي ماريد اكعد وحدي

:-لا اكعدي واسكتي واذا صدك مليتي من الوحدة اجيبلج طلاب درسيهم بالبيت التهي وياهم

:-ايي جيبيلي طلاب شوفي منو يريد مدرسة بس جيبيلي ابتدائية

:-ميخالف

ايام مرت وامي جابتلي ثنين بنات وولد ابتدائية اخلص كل وقتي وياهم

كل يوم افوت لحساب صعب ابد ما يفتح نت كمت ارسل شهاب اسأل عليه يكلي ما اشوفة قليل لان يشتغل

………………………………

شهـاب

فتت للبيت لكيت اهلي كاعدين و الوضع متوتر رتيل يمنة واببوي كاعد يهز برجلة وامي بصفة

:-السلام عليكم

محد رد ابوي كام من مكانة
:-شهااب شنو الصار؟

:-شنو يابة

وكفت كدامة اباوع لرتيل تبجي وتمسح بوجهه امي وجهه اصفر وابوي يرجف

:-شنو الصار بينك وبين بينات و قررتوا الطلاك؟

:-ما اناسبهه وكلمن اختار طريقة

:-شنو الما تناسبهه مو سنين تفتر ورااي بس كون تحصلهه وتاللي شصار اول ما خطبتهه تعوفهه ترضاهه على خواااتك

:-ما تراهمنه

:-شنوو الما ترااهمتتت ولك ششصار بينكم تخلي البنية تخابرني وتكول دربنة مو واحد شسوويت شهااب

:-شغلي وكلشي بية مو مثل مايردون واني ما اكدر اغير روحي علمودهه ما نرهم سوة و هذا قراري وهي نجبرت توافق على هل شي

عفتهم وصعدت فوك مجبور احجي هيج ماريد سمعتهه تخرب كدام احد ثلث ايام مرت ابوي ما يحجي وياي وامي مثكلة علية رتيل دازتلي رسائل كاتبة

-حرام عليك هيج تسوي بالبنية شنو الصار وهيج ابتعدت عنهه مو جنت كاتل روحك عليهه ليش تخليهه تتعلق بيك وتعوفهه تكدر تغير روحك علمودهه وابوي يكول ما احجي وياه اذا بقى معند هيج

بس اقرة حجيهم ما ارد على احد لهل لحضة احب بينات بس الصاو و السوتة جبرتني اعوفهه

اكثر شي ملاذ تراسلني ثنينه مضروبين بوري جنت نايم واسمع تلفوني اشتعل بالمخابرة

:-الو

:-وين انت

:-ع الجرباية

:-***كووم

فتحت عيني مصدوم اباوع بالتلفون صعب يحجي وياي
:-ياابة لا تفشرر شكايليلك علية

:-دكوم بالباب صار ساعه واكف جا اليوم شمتفقين

:-شمتفقين

:-شووف التاريخ شهاااب

باوعت بالتلفون طفرت من مكاني اليوم صعب يرفع دعوة على اعمامي ولازم من الصبح متجهزين

:-طااالع طاالع اصلا جنت منتضرك

سديت التلفون غسلت وجهي على الطاير اخذت ملابس من الكنتور  و مشط ونزلت اركض بالنعال

:-هاا صعب شنو سالفتك شكد تتأخر

:-لا عمي صح اني المتأخر استعجل

صعدنة بالسيارة وكف بمكان منتضر محامي مرتضى يجي يحجون هو وصعب واني امشط بشعري لبست القميص و البنطرون بالسيارة طلعت ناسي الحذاء كاشخ ولابس نعال نزلنه بكوفي

:-صعب رجعني للبيت اجيب ححذاء

:-ماكو داعي البس روحك

احس روحي ساحليني سحل وياهم بس احجي يفشلوني

ألصعب:-شوف مرتضى ماريد تقصر بشيي كللشي جاهزز وعمي شاهد على كلشي و ام زوجتي هم الاريدة منك بسس تثبت الجريمة عليهم و غير هيج جبت هواي ادلة واثباتات على شغغلهم ويه الاشوح

:-ان شاء الله ما اقصر بشي

:-اني وياكك ضل الك وياريت لو اكدر احجي شي بسس تعرف هل قضية ما اكدر الزمهه و انيي واحد من الشهود الجرائم الي عليهم مو سهله وانت بشطارتك تكدر تضيعهم و اضافة لكل هذا كدرنة ننلزم الي صوبني و راح يكون ضمن الشهود اعمامي همه الي دزوة اليوم راح تنرفع القضية وانت من اليوم راح تشتغل على هل شيي اريدك تدررسة دراسة واني وياك خطوة بخطوة بس لا تخذلني

:-الصعب لاتوصيني اعتبر القضية قضيتي و الماتوا اهلي لا تخاف

:-ما خايف مطمئن من ناحيتك

عيوني على صعب يحجي وشفايفة ترجف ادري مو سهله عليه يسلم هيج قضية لكن ما سلمهه اله لشخص ثقة

صار اسابيع صعب بس يشتغل ويدور ادلة وحجة ويه ابوي علمود هل موضوع وابوي صار احد الشهود لهل قضية

واحنة راجعين بالسيارة اتصل تلفون صعب
:-الو....شصارر لااا مات؟ لا حول الله زين ششلونن
بقى يستغفر و يحوقل

خلص وسد الاتصال وكف السيارة مسح وجهه بثنين ادية

:-شصاير ياهو المات؟

:-شهااب عمي ااحسان مو عندة ست بنات واخر شي صار عندة ولد

:-اي

ذب حسرة وكال
:-اليوم يزفتون ببيت اختهم مطلكة وبانيلهه بيت لا حول الله الزفت حارك الطفل و ضال دقايق بالمستشفى ومنطيك عمرة

:-الى رحمة الله شكبررة هذا؟

:-بعدة طفلل يمكن عمرة 10 سنين

:-لا حول الله الله يرحمة ياهو كالك

:-صار ايام مراقبهم و واحد من الولد خابرني هسه يكول بعدهم بالمستشفى

:-خطية الله يرحمة

:-شهاب نرجع للبيت

:-ليش مو اليوم تقدم بلاغ؟

:-لا ابنة اليوم متوفي انتضر ثلث ايام وارجع ارفع القضية احسن

:-بكيفك

رجعنه صعب من يوم الي اجت ام ملاذ وملاذ انتقل للشقة مالتي رحت وياه الوحيد بين اهلي ما ذاب صوج بينات بية

:-شهااب ملاذ هم تحاجيك

:-اي كل يوم بس نتعارك

:-تسألك علية؟

:-اي تكلي هذا الجلب شلونه بس كالتلي لا تكله أسال عليه

:-ها خوش مسويني جلب رحم الله والديكم

:-والله خوية مرتك أمرغلتني بالكاع مو مثل البشر تدزلي هلو كبل تدزلي وينك هيوو تحسسني اشتغل عدهه

:-زعلانة عليه لان عفتهم بس ماريد اشغلهه وياي اريد اكمل كلشي وارجعلهه فارغ

:-تحبك ملاذ لا تعذبهه اكثر صدك اكثر وحدة تعذبت من وراك ملاذ

:-ادري وهواي أذيتهه بس راح اعوضهه تشوف هذا كله الاسوي وكلشي عفته وحولتهه قانونيا ذليت روحي يم ناس  بس علمود يجون يشهدون بيوم القضية ومحد بيكم يدري شكد عانيت علمود احصل خيط يوصلني لجرائمهم كله بس علمودهه ما مستعد اشوفهه تتأذة اكثر وما اريد ارضيهه هسه لان ادري بيهه فطيرة وبسرعه ترضى اريد اسويلهه شي اخليهه كل عمرهه تذكرة

:-ارجعلهه وهي راح تذكر هل شي كل عمرهه

:-ليش انه عايفهه

:-وشيسمونهه ما كاعد وياهم بنفس البيت وانت رجلهه و ام ملاذ مثل امك بعد شكو عايفهم؟

:-طلكتهه ودام نطقت هل كلمة كسرت شي بداخلهه حتى لو رضيتهه وضليت وياهه راح تضل تذكر هل شي دوم لذلك خل اكمل كللشي وارجعلهه فارغ اريد امتلي بيهه شهاب

:-والله سوالف الحب ما من وراهه بس وجع الراس انه شجابني يم هيج عالم شورطني

:-ديلة مو جنت تمشي وتهلهل بأسم دعسوقة هم واحد لامك

:-اي والله حسرة عليه جبت طاريهه وكفتلي عضم بالبلعلوم وشكد ما صيحت ما ارتاحلهه راحت يله ارتاحيت

:-شهاب اختار ناس صح بحياتك وهسه ما نايم صار يومين ياريت تطفي الضوة وتطلع وماريد اسمع صوت لو اكلك تروح لاهلك احسن

:-ترة شقتي

:-ما ميت عليهه خليني انام ومن اشبع نوم افكر اطلع منهه

شفت ملاذ تدز رسائل صعب منعني احجي بس ما اكدر اضم عليهه سالفة كتلهه صعب اليوم يرفع قضية دزيتلهه رسالة

:-ها صارت سالفة وتأجلت القضية وهسه صعب راح ينام

:-من ينام افتحلي كامرة خل اشوف وجهه الحقير شكد اكرهه

:-تدللين
طلعت برة بالربع ساعة انتضرت ملاذ يمهه صوت جهال تدرس بيهم فتت للغرفة فتحتلهه كامرة شافته وبقت ساكتة طلعت بسرعة خاف يكعد

سدت التلفون ودزت رسالة
:-راح النت اخذ راحتك

ثلث ايام وصعب باقي يشتغل على القضية هو ومرتضى من الصبح لليل كاعدين سوة بس بوكت النومة كلمن يروح لبيتة

نرفعت القضية و اصدورا ورقة القاء القبض على احسان وراضي جنه اني وصعب واكفين بنص المركز

صعب بملابسة مال الدوام وملفات بيدة واكف واني كاعد على صفحة  فاتوا عمامي كمت من مكاني عيوني على صعب شلون عيونه عليهم كأنما يذكر شي من الماضي لحضات و طلع بدون ما يحجي شي رغم هو طلب يشوفهم طلعت وراه

وصل للسيارة حسيته اختل توارنة و لزم باب السيارة يثبت نفسة لزمته من جتفه عيونه دم

:-شصار صعب؟

:-ماكو شي بس تعبان

:-اصعد اني اسوق

صعد فتحتله بطل ماي وصعدت اسوق شارد مو وياي
:-صعب شصار الصبح مابيك شي

:-شهاب يمكن اني غلطت يمكن ما جان لازم احولهه قانون يجوز مايتحاسبون خاف الشهود الجبتهم يكلبون عليه بالحضة خاف ما ياخذون جزائهم

:-ليش خايف؟ مو انت اخذت هذا القرار ببنفسك مو متأكد كل واحد راح ياخذ جزائة ليش الخوف و التفكير انت سويت العليك والباقي على الله

:-بعيونهم اشوف عيون عمي هاددي واحس عيون ابوي بيهم انكسر من اشوفهم

:-ابوي بنفسة ماعافك وصار وياك ابوي بنفسة عافهم من زمان واتبرة منهم وبنفسه مستعد يشهد على كلشي سوو ليش تتعاطف وياهم بحجة ابوي

:-ما متعاطف بس خايف ما ياخذون جزائهم جراائم قدييمة و ماعندي كللشي عليهم ادلتنة قليله ولا اني الي راح اخذ حقي بيدي صح جبت كلشي وحضرت كلشي بس مو اني الراح احجي

:-بس راح تشهد وسويت كلشي علمود اهلك والله راح يوكف وياك

:-ان شاء الله

:-اسبوع بالزايد تنرفع القضية محكمة لا تضعف من هسه

:-ان شاء الله
.....................

ملاذ

سديت تلفوني ادري بروحي اضعف وكل يوم ادزلة رساله كمت ما افتحة بس علمود انساه صار ايام لا اجة ولا سأل و لا دز رسالة صح ملتهي بس اقلها يسلم عليه

يدري بيه بس يحجي شي وياي افرح ليش يبتعد صرت التهي وية الجهال ادرسهم حتى بالجمعة ادز عليهم علمود اضيع وقتي

شفت امي تحضر بملابسهه
:-شكو اليوم وين

:-اليوم المحكمه مالت اعمام صعب

:-اليوم؟

بلعت ريكي متوتره
:-وشراح يصير

:-والله ما ادري يايمة ان شاء الله كلمن ياخذ جزائة

:-شوفي راح افتح تلفوني خابريني عود

:-خوش

:-شلون راح ترحين وحدج؟

:-لا شهاب يجي عليه

:-خوش

راحت امي واني بقيت افتر كل شوي عيني على تلفوني ماكو ما تتصل خابرت على رتيل من ما اخابرهه روحهه بخشمهه

:-اكلج شهاب ما خابرج علي اي واحد

:-ولي ملاذ ولي مني منتبهه كل ما تخابريني وكلتي ماخابروج

:-هسه شكايلتلج اني

:-كون تحملين وتحسين بمعاناتي

:-دولي مني منين احمل

:-ها شنو الضاهر صعب مقصر

:-شكم مرة كتلج اني وصعب مانحجي وولي مني مالي خلكج

تعاركنه سديت التلفون وكعدت اهز برجلي متوترة

سمعت باب الشارع نفتح طلعت ركض فاتت امي وصعب بالباب شفته وكفت احس اعضائي كلهه بادت دنك راسه كال

:-السلام عليكم

ما رديت بقيت صافنه عليه
:-يله اني اترخص

سد الباب وطلع درت وجهي على امي لحضات شفته شكد متغير مو بس بالشكل حتى باللاسلوب عينه ما رفعهه عليه

:-يمة صعب شبي؟

:-ما بي شي

:-شصار؟

:-ما صار شي الجلسة الجاية منا لثلث ايام بس ان شاء الله خير كلشي قدموا وهواي شهود اجت ومن ضمنهم الي صوب صعب كبل فترة

:-يعني راح يربح القضية؟

:-والله مادري يا يمة اعمام صعب روس كبار ووراهم عالم ان شاء الله تضل القضية لصالح صعب

:-واذا خسرهه صعب شراح يصير؟

:-تعرفين الراح يصير و تعرفين قرار صعب

فاتت جوة فتت وراه اذكر صعب شلون دنك راسه اول ما اجيت كوة لازمة دمعتي ما تنزل

:-يمة اني راح انام تعبانة

:-شبيج مريضة اجيبلج شي؟

:-لاا بس تعبانة

فتت للغرفة قبل جانت غرفته تمددت بفراشة اذكر من جنه ننام بهاي الغرفة سوة و يمثل عليه على اساس اكو جني علمود انام يمه دموعي تنزل وتتخلل بشعري

:-كل مرة اكول تصلح كلشي ورجعنه يكسرني بموقف اني وصعب ما نصلح سوة

نمت بوسط افكاري بي كعدتني امي
:-ما تكومين ولج يمة طلع الليل وانت نايمة جا شوكت تنامين بعد

:-مالي خلك جسمي يوجعني

:-شبيج مصخنة

خلت ايدهه تتلمس بوجهي

:-ولج داوية نار شبيج كومي اخذج للمستوصف

:-ماريد بس خليني انام غطينيي بردانة اكرة صعب كليلله

:-عوفي صعب بحاله كومي وياي

:-ماريد

رجعت نمت ثاني يوم ما كدرت اخذ الطلاب معاندة ويه روحي ما اروح طبيب ثالث يوم شوية الصخونة خفت بس كلش تعبانة امي راحت لان الجلسة الثانية تصادف اليوم

كل مرة ترجع نفس الحاله ماكو اخبار جديدة لازم بالجلسة الخامسة يله يتحدد مصيرهم بيومهه لكيت صعب دازلي رساله

:-ملاذ روحي طبيب مو زين عليج
ما رديت عليه

الى ان وصلت الجلسة الخامسه حتى شهاب كطعت تواصلي وياه لان بس احجي وياه يروح يكل لصعب لو اني اسأله وماريد صعب يفرح

اجت امي شكلهه كلش عادي واني من الصبح كاعدة منتضرة جيتهه فتحت الباب متلهفة شفت السيارة كبل شخطت من يم الباب حتى ما نزل

:-ها يوم شصاار؟

:-ما ادري بعد

:-شنو بعد مو كلتي اليوم اخر جللسة؟

:-اي

:-ااايي وشحكموهم

:-مما ادررري ييمة

:-شنو الماتدررين وين جنتي صعب ليش راح بدون ما ينزل؟

:-عدة شغل

رجعت ليورة جسمي يرجف حجيت بصوت ماليتة الخنكة
:-شنو يعني صعب ما ربح القضية؟

:-ما ادرري

كعدت بالكاع ما اكدر اوكف اكثر ادية ما اسيطر عليهم
:-راح يعني؟

:-كومي ما صار شي بعد يمكن تأجلت الجلسة

سحبتني من الكاع فتت للغرفة روحي مبهوتة شوية وامي فاتت لابسة عباتهه

:-كومي

:-وين؟

:-اخذج اقيس ضغطج وجهج اصفر لا تتخربطين و لا تكولين لاا ما اسمعلج

طلعت حجاب وصاية لبستنايهم هي تتحكم بيه كل فكري بصعب وين راح وشصار امي ليش ما تحجي اخذتني قست ضغطي ورجعت اشترتلي من برة احس بيهه تضيع بالوكت

:-يمة تعبانه اريد ارجع للبيت

رجعتني مشي رغم المستوصف بعيد علينه فتنه للبيت فتت كدامهه افتح باب البرة ما ينفتح

:-يوم شنو قافلتة؟

:-لاا افتحي من اليدة

افتح بيهه ماكو درت وجهي على امي اريدهه تجي تفتحه حسيت احد فتحة من الداخل درت وجهي خايفة……

.
.
.
.
.
.
للحكاية بقية

كلانا كتف للاخر♥
الوريد♪

حسابي على الانستا