أنتقام الصفحه 27 (ترميم) الفصل الثالث وخمسون 53 - بقلم خلود ال محسن

انستا للتواصل lorai_alrwi
تفاعلكم ع البارت الي يقرون بصمت اجعصكم علقوا وصوتوا😞❤️
……………………………
قررنه نسوي حنه وعرس بيوم واحد

قبل العرس بيوم اتصل عليه غطيت روحي بالبطانية خليت رتيل تخابر بعلي واني احجي ويه صعب

:-ألو

:-ها بابا شلونج

:-زينه اشتاقيتلك

:-بس اليوم مو يمي باجرر بحضني ملاذ

:-اممم

:-شجاي تسوين

:-بفراشي ماسوي شي

:-اجي

:-لا شتسووي لاتجي

:-مشتاقلج كملتي كلشي ماريد شي ناقص باجر

:-اي كملت

:-محتاجة شي اجيبلج شي

:-اذا طلبت شي هسه تسوي؟

:-اطلبي مايردج اله لسانج

:-خوش بعدني ما مصبغه اضافيري وماريد احد يصبغهم باجر اريد انت تجي تصبغهم؟

:-مو حلو لا تصبغيهن

:-انت ماتحبني لو تحبني جان اهتميت بيه باي

سديت الخط وشمرت التلفون
:-جلب ما يحبني لو يحبني يجي

وخرت الغطة من وجهي كعدت لكيت رتيل صافنه بوجهي
:-هاا شتردددين انتِ

:-اني شريد ولج المخبلة علي اخترع عباله اكو شي
فزيتي تصيحين الجلب

:-شعليج وخري مني رتيل اكرهكم اني

:-ولج شبيج انجلبتي شو هستوج تتنغوصين جوة البطانيه طلعتيلي مجلوبة

:-معلييجج اكعدي وياي يلة احجي وياي

:-شحجي

:-اهوو رتيل انت ما تحبينني

:-اخبج والله احبج بس هاي عادي هرمونات لان باجر عرسج تخبلتي علينه

:-لا هو مايحبني اكرة ماريدة

رتيل باوعت بصفي تلفوني يتصل كاتبه عليه صعبي رجعت باوعتلي

:-لا. يابة لاتحبينة ولا شي

شلت التلفون ونطيتة رفض
:-شوفي عبالج اجذب

بقت تضحك وهو كل شويه متصل واني ارفض اخر شي كمت ما ارفض ولا افتحه كامت رتيل جابت ماسكات خلتهن على وجوهنه ندك باب الغرفة وامي صاحت بصوت ناصي

:-ملاذ كاعدة

:-ها رُفيدة فوتي كاعدة

فتحت الباب تباوعلنة
:-هاي شمسويات بوجوهجن

:-ضايجين وين نروح

:-صعب بالاستقبال تطلعيله هيج

احس گلبي عصرني من كالت هيج
:-شجابه بنص الليل كليله نايمة

:-الولد متعني وجاي اكله نايمة كال صيحي الها رايدهه ضروري

باوعت لرتيل تضحك وتغامز
:-يمة يمة ماتحمل زعلها

كمت من فراشي بداخلي فرحانه بس مبينتلهم ضايجة لميت كفشتي وعدلت تراكي اريد اطلع صاحت رتيل

:-القناع بوجهج يمعودة لا يخترع كفشتج مشطيهه باجر عرسكم لا يشرد

لزمت الباب اباوع لرتيل
:-شايفني بأتعس من هذا وضعي واذا يحبني يتقبلني

هزت ايدهه وغمتني طلعت امي متخوصرة كدامي
:-شنو هاي ولج رتبي روحج

:-معليكم هو يحب يشوفني هيج

صفكت ايد بيد وغمتني
:-شبيجنن بس تغمن بيه وعلي ترة اروح وياه ومارجع بس اوكفوا من نتصالح مو هسه

دفعتني امي من جتفي علمود اروح:-وللي وليي خفة هل وجهه

فتحت باب الاستقبال كاعد يشرب جكاير بس فتت رفع راسه يباوعلي

:-فوتي

فتت هو جان كاعد على التخم الوسط كعدت بأول واحد على الطرف خليت اديه بين رجلييني واباوع على جهة الباب

:-شبي وجهج شمخلي بي

:-معليك

:-زين انت شبيج عليمن زعلتي

:-مازعلانه شتريد جاي هسه

:-جايج تمانعين؟

درت وجهي عليه سويتله حركة عود مراضية ودرت وجهي سمعت صوت ضحكتة

:-لاتتضحك لايسمعونك هاي رتيل الجلبة توكف بالباب عبالهه جاي نسوي شي

:-وخل تسمع

:-اهوو اني مو مزاعلتتك لاتحجي وياااي

:-شلون بلة مو باجر عرسنه ماترهم تزعلين لو هاي شارة تزعلن كبل العرس بيوم

:-شششووفف اكلكك متغيير متصدكنني

كام من مكانه كعد بصفي حشكت روحي بالتخم ودايرة وجهي منه.ندك الباب رتيل صاحت

:-ملاذ بس تعاي اخذي الصينينه

رد عليهه صعب:-رتيل روحي انت وصينيتج كلشي مانريد بس عوفينه

:-مو صوجكم والله صوججي اني

بقى ساكت شوية من تأكد رتيل راحت كال
:-شو باوعي هنا

:-ماباوع ماحجي وياك

:-بس اكلج شغله

:-ماريدد وخر

مد ايدة يريد يلزم ايدي حضنتهم لصدري ورفعت رجليه كعدت لجسمي علممود ما يكدر يسحبهه

:-طفله والله طفله

:-عوفني معليك

خلة جكارة كدامي
:-ورثيهه

:-معليه بيك

:-بس ورثيهه خل نحجي ماسوي شي

مديت رجليه بالكاع وسحبت الجكارة منه باوعت عليه
:-ووين الجداحة

:-هاي بجيبي طلعيهه

:-معليه انت طلعهه

:-ايدي مااكدر طلععيهه

:-ياجيبب

:-هذا

مديت ايدي بجيبه عرفت مو جداحة طلعته صبغ اضافر
:-وينهه الجداحة هاي مو جداحة

غم گصته وباوعلي
:-هو انت وجة اهتمام

:-لا ادري عود جبته ترضيني بس اني كبرت ما اتقشمر بسهولة

:-هسة انه شسوي شلون ترضين

:-ما ارضة خليني زعلانه

خليت الصبغ بحضنة ودرت وجهي
:-ارسملج على اضافرج وترضين؟

حركت راسي بمعنى لا

خلة ايدة ورة ضهري وعبرة عليه صرت بنص حضنة لزم ادية بثنين ادية:-لا تزعل بنتي خل الدنيا كلهه تزعل اله هي

:-اهوو انت لاتحجي هيج كبل ارضة

ضحك ورفع ايدي لوجهه باس باطنهه سحبتهه منه

:-لاتبوسهه مايصير

:-معليج شي يخصني يلة تعاي ارسمهن الج

مديت ايدي اله فتح الصبغ وكعد يصبغهن وكل اضفر يكمله سنفخ عليه علمود ينشف ابتسمت واني اباوعلة شلون مدنك راسه و مركز فززني صوته من كال

:-عليمن تتبسمين

:-ما مبتسمه وين شفتني مو مدنك

:-حافظ سوالفج

كملهن وخلاهن فوك ايدة باطن ايديه على باطن ادية
:-ها حلوات

:-امم حلوات

:-انتضري ينشفن

بقيت مخليه ايدي كدامي لحد ما نشفه طلع جداحة من جيبة هي وجكارة خلاهن كدامي

:-ورثيهه

ورثتهه وخليتهه بين اصابعي رفعتهه اله سحب نفس منهه وزفرة بوجي ابتسمت واني احرك بيدي كدام وجهي ابعد الدخان مني

اخذ الجكارة مني خلاهه بيدة وسحبني عليه
:-هذذا شنو الوجه الازكته على وجهج وخري

:-وخرة انت لو تتعاجز مني بعدنه بالبداية ومليت

:-ضحك وسحبه من وجهي لازمة بين اصابعه

:-شنو هاي والله عليجن سوالف

اخذته منه خليته على التخم
:-تغار لان ماعدكم هيج سوالف

ضحك ورجع يسحب نفس بالجكارة

دار وجهه عليه وقرب اكثر بعد شعري عن رگبتي خلاه كله بصفحة وحدة وقرب وجهه مني زفر الدخان بيهه بلعت ريكي ردت ادنك رفع ايده على حنكي رفع راسي وخلة راسه يم بلاعيمي عض اللوزة بخفة

:-جؤؤ لا صعب

رفع راسه مبتسم
:-هي تحرشت بية لا تحركينهه

نزلت راسي ارتب بشعري وادير بوجهي منه
:-تستحي الدكمة جا ياهي عضتني بركبتي ذيج المرة امي لو ياهو

باوعتله فاتحة عيني مصدومة
:-يااا لاتجذبب شووكتتت

:-ها صح يجوز انه غلطانه يلة ولايهمج باجر اخليج تعضينهه ماحب اخلي شي بنفسج

:-شبيك انت لاتحجي هيج انت مو صعب متغير

ضحك وحك لحيته
:-لا انه صعب بس ماشايفتني بكل حالاتتي

:-ماحبك هيج

:-بعدين تحبيني

:-اهوو لاتصيرر سربوتت

:-بس وياج تحلى السربته

:-وخر اكلك روح لبيتك ماريدك لاتضل

:-بوسيني واروح

:-ياا شبوسك روح حباب

:-الخير ومدت ايدة بوسيني علمود اروح

:-لا حباب روح مو بستني انت

:-اي اريد انت تبوسيني

:-تروح؟

:-اي اروح وداعتج

:-ووين ابوسك

اشرلي على خدة

قربت من خدة ابوسة رفع ايدة لفهه علىركبتي ورجعني على التخم صار معتليني يوزع بوسات على وجهي
:-جؤؤ لاا حباب

:-مو حباب

:-لا تجي امي بس وخرر

سحب شفايفي بين شفايفه واني ادفع بي من صدرة ما يتحرك لحد ما ابتعد من ذاته

:-شبيك انت وخر يلة امي راح تجي

خلة وجهه بجهي يتنفس قريب من اذني ورفع ايدة يفتح بدكم القميص

:-ياا صععب شبيك انت ترة اممي كاعدة حبااب

:-ماسوي شي والله

:-ووخرر حبااب وخرر

:-جؤ بس بوسي الوشم و اوخر

فتح القميص للاخر رفعت ايدي ابعد القميص عن صدرة بست الوشم وابتعدت خليت ايدي عليه اتلمسة ابتسمت ورفعت عيني اباوعله

:-كل ما اشوفة اتخيلج نايمة على صدري

:-يلة وخر حباب صار الك هوايه هنا عيب من رتيل وامي

ابتعد عني يمسح بوجهه ويسد دكم القميص
:-بس شوفيلي خاف احد برة خل اروح

كمت رتبت ملابسي فتحت الباب محد موجود
:-كوم محد اكو

كام واني طلعت وراه حضني وباس راسي
:-نامي زين بابا

حركتله راسي بمعنى اي وطلع سديت الباب وفتت لكيت رتيل متخوصرة كدام باب الغرفة فتت بسرعه للاستقبال شلت القناع خليته على وجهي وطلعت وهي مازالت واكفة وتضحك

:-ها شبيج تضحكين

:-يا عمت عيني حتى القناع ما شاله من وجهج شكد بريئين

:-اي وللي لاتدخلين ام طحش

:-اسكتي ام الختلات

بقينه نضحك فتت للغرفة مااكدر انام اتخيل باجر شلون البس البدلة واتبسم خابرني صعب

:-ها بابا اني رجعت للبيت

:-يلة روح نام وراك كعدة

:-وانت شنو ما ناوية تنامين

:-ما يجيني نوم احس فرحانه

:-هههه ليش فرحانه على الصار قبل شوية لو على اليصير باجر

:-اي على باجر لان راح البس بدلة

:-اخخ بوية شوف الفطيرة

:-يلة روح نام

:-ننام سوة

:-ما انام ماريد

:-وراج سهرة گلبي اشبعي نوم

:-لااتكول گلبي اكرة هاي الكلمة

:-تدللين بابا

بقينه نحجي لحد ما نمت كعدت الصبح رتيل وامي ما موجودات طلعت لكيتهن يتريكن بالمطبخ

:-صباح الخير

:-صباح العافية هلا يمة تعاي

رتيل:-صح النوم عروستنه يلة تعاي تريكي واسبحي علمود تتجهزين للصالون

:-اي اسبح واجي

اخذت ملابس سبحت لكيت رتيل واكفتلي بالباب
:-ها سالمين

:-تعاي امشطلج واتريكي كداامي يلةة علمود نتجهزز

:-شهل استعجال اصبريي

:-ماكوو حبيبتتيي اليوم كله مستعجلين

تحجي وتضحك اخذتني وياهه للمطبخ فتحت تلفوني اريد اشوف صعب كاعد بو بعدة اخذته مني رتيل وكعدت تكتب بي

مديت ايدي اريد اسحبهه منهه رفعت ايدهه
:-تراسلليي منو ولج جيبيي

:-دزيت لهذا ابو اذاناات كتله لاتراسل خلي البنيه تهتم بروحهه

:-مااغيرج ام اذاانات احلى منج ومن رجلج الاجلح

:-بس اضفرة يسواكم

:-دوولي يسووانه خخاايبة بسس رمش رجلي يسواج
ويسوة اخوج ورجلج وابنج الماجاي

:-مخلووقين من ذهب الخاية دوليي انت ورجلج

صاحت بينه امي
:-وولجنن كااففيي يللة ملاذ تريكي بسرعه

كملت وغسلت المواعين اباوع بأضافري واضحك رتيل خابرت شهاب اخذنة للصالون امي صعدت كدام واني ورتيل ورة

شهاب:-ها ملاذ شنو ولاعرفتج حلييانه على العرس

:-شهاب ما صار يومين من شفتني وعيبت عليه ليش تجذب هسه

:-امداج والله مو صوجح صوجي اني كلت خل اجبر خاطرهه واكلهه حلوة

:-اي جذب لاتجذب

امي ترزل بينه واحنه كاضينهه ضحك وشقة ردت انزل من السيارة شهاب كال
:-ملاذ بس شوية اريد احاجيج

بقيت بالسيارة وامي ورتيل نزلن على صفحة
:-كول

دنك راسه ورجع باوعلي بالمرايا
:-ملاذ خو ما شايلة بگلبي عليج لان خابرتج وانخطفتي
ابتسمت

:-لا انت شعليك هل شي مكتوب الي وحتى لو مو انت خابرتني راح انخطف

:-ميخالف بس اني السبب

:-لا معليك انت

:-زين خو ما ضايجة على سالفة الورقة ورتيل

:-لا بالعكس هل شي صار من صالحنه لان خلصنه من هل موضوع وللابد

:-يعني تعتبريني مثل گبل شهاب اخوج الي من تضوجين تغلطين عليه وتضحكين وياه

:-واكثر صرتولي اهل انت عمو رتيل كلكم

:-اي شي تحتاجينه انة موجود صعب اذا فكر يعلي صوته عليج على ابو ماعندج اخو انه اخوج تعاي بأي وكت تحتاجيني لاتتقيدين والله اخلي يحلم يشوف طرف اضفرج

:-الله يحفظك

:-يلة روحي اريد احتي تطلع احلى عروس بالكون وانه متأكد راح تطلعين اميرة

:-شكراا اشهب

نزلت الفرحة ما سايعتني صح ماعندي اخ ولا جربت هل شعور بس شهاب خلاني اجربة

نزلت اضحك امي ورتيل شايلات الاغراض والبدلات ويانه بدت ام الصالون تتشغل ورتيل واكفة على راسهه خاف شي ما يعجبني كل ما افتح عيوني اباوع لامي تصلي على النبي لو تمسح بدموعهه شوية واجت رتيل بيدهه التلفون

:-ابوية هذا يريدج

اخذته منهه مستحيه منه ماعرف شحجي
:-الو هلا عمو

:-هلا بوية شلونج اليوم اتمنيت اشوفج واباركلج بس ماصارت لكت انه اسلم بنيتي بيدي للصعب ماعوفج

:-رحم الله والديك شكرا عمو شكرا لان ماقصرتوا ويايه بشي

:-تدللين كم ملاذ عندي

:-الله يحفظك

:-ويحفظج بوية يلة كملن بس ردت اسلم عليج واذا احتاجيتي شي لا تكولين انه يتيمه انه ابوج والله شاهد احسبج حسبة رتيل

:-فدوة لعمرك

:-يلة بوية الله وياج

:-باي

سد الخط عيوني مغرغرة دموع كوة مسيطرة عليهن ام الصالون ما تقبل ابجي

رتيل:-ملاذ هذا صعب مللني كل شويه متصل. يكلي بس خل اسمع صوتهه كتله ما تحاجيك

:-خيبة شبيج بس خلي احجي وياه شوية

:-لو تموتون

بنات بالصالون بقن يصفكن ويركصن ورتيل وياهن وامي تهوس اباوعلهم واضحك بودي اطير وياهم

كملنه كلشي وشهاب اجة علينه وصلنه للقاعة بعدهه الناس ما جاية بس بيت عمو هادي كل البنات وامهم اجت كعدن يركصن ويعلمني شلون اركص وياه

لبست بدلة ماروني وعلى نص الحفلة البس البيضة لان صعب مصر البس بدلتين للحنه وللعرس بدت الحفلة كلهه تركص واني على واهسهم اركص تعبت ورجعت لمكاني جانت يمي ام شهاب باوعتلي ودارت وجهه تحجي ويه وحدهه بصفة

:-اليكلك اول عرس ذاك عرسهم سكتاوي سوو واليوم رجعوا من جديد عبالك ما شايفين اعراس

كوة لزمت روحي منهه احس سم مو حجايه كالتهه ايدي بقت ترجف وعيوني يطلع منهه نار غصيت بالحجايه اريد ارد عليهه ما اكدر

رتيل اجت يمي عبالهه لان قربت الزفة خفت دنكت تحجي وياي بصوت مسموع

:-ها حبيبتي لا تخافين ترة صعب هذا حبيبج لاتفكرين بشي

ابتسمت بوجهه وسكتت امهه ردت عليهه
:-منين تخاف المبلل ما يخاف من المطر

حجت هيج وضحكت
رتيل:-شقصدج يوم بابا شنو كال قبل لا نجي ملاذ حالهه من حالي احجو شي يفرح المقابل لو اسكتوا رجاءاا

هزت ايدهه ودارت وجهه كعدت بصفي رتيل لزمت ايدي
:-خو ما ضجتي ملاذ والله امي البكلبهه على لسانهه
:-لا عادي ما ضجت

سحبت ايدي تباوع بيهه
:-اووي هاي شنو الاصابع الحلوة هاي منو مصبغلج هل صبغ

سحبت ايدي اضحك ادري بيهه تريد ضوجتي تروح
:-ترة عادي رتولة ما ضجت اني اليوم ماخلي شي يضوجني منتضره هل يوم صار شكد ماخلي حجايه تأثر عليه

كرصت خدودي وبوستني
:-عفية هيج اريدج ما تهتمين يلة اريدج توردين شوية وتجي الزفة

ما اهتميت للصار رغم كل ما اذكر الحجاية تطحن بگلبي غيرت البدلة لبست البيضة امي كاعدة على صفحة وتبجي شوية وكلهه كامت تصيح اجو جسمي يرجف مشاعري مخربطة فرح خوف ضحك بجي كلشي اجتمع عليه بهل لحضة

ما جنت اشوف شي لان مغطين وجهي بس احس بكلشي احس روحي اشوفة شلون يمشي وعيونه علية دموعي تنزل وابتسامتي ممفاركة وجهي

وكف يمي غمضت عيوني اردد بالحمد اسمع هوساتهم وفرحتهم بينه من بينهن هوسة امي

:-وليدي رايد رادته وعايف بناة ولايتة
فرحة بداخلي ماريدصعب يحس ما اله احد

نمشي واغنية هم عريس هم نشمي وعم ربعة يزفونة مشتغلة

ضاغط على ايدي بكل قوتة يحس برجفة ادية
صعدت بالسيارة وهمه بره يركصون ماكدر ارفع راسي

صعدو وسمعت صوت شهاب
:-ووالله وزفيتكم بيدي

ضحكت وصعب جاوبة
:-هنيئاا لك الجنة

بقوا يضحكون وشهاب مشغل اغاني بعالي الصوت حسيت بقرب صعب مني

:-ملاذي واخيراََ بالبدله وصعبج وياج

دنكت راسي ما عبالي يجي يوم واستحي منه
خلة ايدي بيدة وايدة الثانية فوكهه يحركهه عليهه
وكفوا بنص الطريق وشهاب نزل يركص

صعب دنك راسه رفع البرگع من وجهي
:-ما مصدك هاي انتِ جمارة يعني صدك صارت گرصيني ملاذ خاف حلم

كرصت ايدة بقوتي صاح
:-اخخ عگررب شبيجج

:-منو عگرب غير انت كلت اكرصيني

:-حجاية التنكال سم مو گرصة

:-ها عليه

:-اي عليج ماتفرقين بين الصدك والشقة

بقى يفرك بيدة باوعتلهه اثر اضافري مطبوع بيهه درت وجهي متشمته

:-تستاهل طبك سم

:-انجبي ملاذ

:-لاتتغلطط ترة ارجعع رجعني لامي يلة رجعنني

:-تفيدج هاي السوالف بعد ماكو صرتي بدية

:-هسه بس نوصل اخابرهه اصلا من زمان ما مرتاحتلك

ابتعدت عنة وحضنت ادية لصدري اباوع للجهه الثانية
صعد شهاب هو وصعب يحجون ويتشاقون شهاب يحجي وياي يريدني ارد قفلت عليهم وصلنه للفندق وزفونه كلهه تهوس صعب لازم ايدي كوة كل شوية افلتهه منه علمود يحس بيه زعلانه فتنه للغرفة امي ورتيل وعلي بقوا ويانه بالفندق كل واحد بغرفة

نزعت البركع باوعت عليه
:-شوف نسيت مجنطتي يم امي بيهه ملابسي روح جيبهن منهه

:-عادي ضلي بدون ملابس

درت وجهي عليه معصبة
بدون ما احجي شي كال
:-يلة يابه رايحين بدون هل حركات رجاءا

طلع واني امشي وراه بس طلع باب الغرفة سديت الباب بسرعه وقفلته دك الباب

:-ملاذ

:-بات برة اليوم دورلك غرفة خل اشوفك العگرب
شتسووي

:-بس افتحي الباب وين اروح هسه

:-تصبح على خير بكيفك روح نام بالشارع

فتت للغرفة مقهورة عليه طلعت ملابسي شكد غشيم رتيل كدامه جابت الجنطة بيهه ملابسنه

فتحت شعري فتت للحمام سبحت وكملت لفيت شعري كعدت اتعشى وحدي فتحت تلفوني دازلي رساله
:-بردان ملاذ

ضحكت وهزيت ايدي دزيتله
:-صيف ترة

لكيت رتيل كومة دازتلي رسائل فتحتهن كتبتلها ولي بدون ما اقراهن

خابرت صعب كبل رد
:-وين انتَ

:-بالباب

:-اي خوش باي

سديت التلفون وفتحت الباب لكيته واكف بالباب
:-فوت

فتت كدامه وهو وراية سد الباب وطلع المفتاح بيدة درت وجهي عليه

:-كسرت خاطري باردة عليك

ابتسم وقرب مني جسمه طخ بجسمي خلة ايدة على خصري وسحبني علية

:-دفيني

:-صيف

:-بردان

:-اعتذر مني

رفع راسي اله باس ارنبة خشمي:-اسف

ضربة صدرة بخفةة
:-لاتتعتذر اتشاقة يلة اسفة

:-ليش تسبحين انة اريد اسبحج

:-ليش شبيه وتسبحني اكدر وحدي

شمر المفتاح بالكاع نزع سترته وشمرهه يتقدم واني ارجع ليورة سحبني لحضنة وتمدد على الجرباية

:-اريد كل شي بيج اركز بي ساعات اريد اشبع منج ماريد اغفى لحضة وانتِ يمي

:-تحبني صعب؟

رفع ايدة يسحب بالمشف من شعري فتح شعري نثرة على صدرة

:-لا تسأليني تحبني احسها قليله واصل مرحلة الهيام هايم بيج انة

رفعت راسي اباوعلة: -ماراح تعوفني

:-الة ربج ياخذ امانته

نومني على ايدة ورفع نفسة صرت جواة ثبت وجهه على ايدة يباوعلي:-اريد اشبع منج شلون

ضحكت ابعد عيوني استحي من اشوف هل لمعة بعينة رفع ايدي يفرد اصابعي واحد واحد ويبوسهم نزل راسه يبوس بعيوني

:-هزيمتي وانتصاري بهل عيون

عشت احلى يوم وياه كل ثانيه يردد كلام بعمري ما سامعته كل ثانيه يبوس عيوني

طفل بوسط حضني صار بجه ضحك غازل وحجالي حبة بطريقة ماتنوصف

للصبح ما خلاني انام حتى فلم فتح بتلفونه شفناه سوة نعست كلش وهو يحلفني بس شوية ضلي

خليت راسي على صدرة وايدي على مكان الوشم احركهه
:-اخاف من افرح حيل اخاف يصير شي بس اليوم ابد ما خايفة احساس بداخلي يكول ماراح تعوفني

:-ولا راح اعوفج ببالي هوايه شغلات اريد اسويهه اريد اشوف طفلنة اريد اعيش كل لحضة وياج اشاركج الحلوة والحلوة

:-الحلوة والمرة

:-جؤ ماتشوفين بس الحلوة مني وداعة عيونج عليه ماخلي مر يمسج دامني وياج

بسته بحنكة عصر خشمي بيدة
:-فصفوصة وما تنكدر

:-هههه احبك شوكت انام هسه يكعدونه

:-خل اشبع شوف شبيج وراج هواي ايام ونامي

بعدنة نحجي ندك الباب
:-سسوي روحج ناايمةة

سحبت الغطة منه غطيت راسي وهو نزل من الجرباية
فتح الباب مادري منو حاجاة سمعته سسد الباب وخرت الغطة باوعتله بيدة ريوك

:-نامي انتِ وانة اتريك البارحة عفتيني بدن عشة

شلت الغطة ونزلت من الجرباية
:-والله يا حبيبي صوجك انت العشة كدامك وما تعشيت

:-جؤ مو لكيت شي اطيب من العشة

كعدت بالكاع
:-ديلة وكللني

كعد كدامي يسويلي لفات ويوكلني بيدة شبعت يلة اكل فتت سبحت وبدلت وهو حضر ملابسه فات للحمام حضرت مشط وزيت لشعري كعدت على الجربايه رتيل دزتلي

:-يلة يكول علي لا يتأخرون علمود نرجع

كتبتلها
:-انت وعلي عرستوا ويانه شجابكمم عمي خلونه براحتنه
اتصلت عليه رفضته كتبت

:-راح اسوي مداهمه عود كلت عيب ادك الباب عليهم
ساعه الكم اذا ما طلعتوا اخلي علي يقسم عليكم
ولاتنسين شهاب راح يجي

:-خووش افتهمنه

طلع صعب ينشف بشعرة
:-يلة تعال مشطلي ويكولون يلة اطلعوا

:-شيرردون منه عمي ما شبعان من مرتتي

كمل شعرة وكعد ورايه سحبني عليه صرت بين رجليه مشط شعري خلالي عطر وجاب الشال علمود البسه يسوي هيج وهو ملتهي يرتب بنفسه كل ما يروح يمشط لو يسوي شي يجيب الي شي

طلع من الغرفة بيدة الجنطة واني باقية جوة مستحية فاتت رتيل وجهه كله شر تضحك وتغامز:-هاا بشرري حبلج

:-سالممين شبسررعه

ضحكت وبوستني:-الف مبروك يروحي ان شاء الله يرزقكم الذرية الصالحة

:-تسللمين

طلعنه سوة امي واكفة يم صعب بس شافتني حضنتني
:-مبروك يمة

:-الله يبارك بيج

رجعنه للبيت امي ما قبلت تضل يمنة بوجهي نمت وصعب طلع للولد كعدت لكيت صعب نايم بصفي رفعت اصبعي انغز بجتفه

:-اككعد صععبب

فتح عيونه يباوعلي نعسان
:--شتردين

:-اكعد اني شبعت نوم

:-هستوني نمت ملاذ

:-جا اني شسوي شبعت نوم

لف اييده عليه:-تعاي نامي بحضني بعد وكت

حصرني كوة على النومة لحد ما هو كعدني بنفسة امي مسويتلنه غدة تغديت

وكفت على السنك اغسل المواعين وكف وراية اي ماعون الزمة ياخذة مني يغسله
:-وخر خل اطلع واغسلهن انت

:-لا ضلي مسويتلي واهس

كل شوية يدنك يبوس ركبتي لو اذني لحد ما كملهن خليت جاي شربة واني يمة ورثتله جكارة
:-تعاي بحضني

كمت من مكاني كعدت بحضنه يرد بالتلفون على اصدقائه يباركولة واني اقرة وياه

لليل اجونه بيت عمو هادي محملين هداية من رادرا يرحون فات شهاب سلم عليه وخلة فلوس على الميز

:-ملاذ من اتزوج رجعولياهن و زودوهن ترة نفسي بيهن

:-لعد لا تزوج اني ورجلي متضررين ماعدنة

:-جا سهله راح اخذهن واعتبروهن سد بسد لا تنطوني ولا انطيكم

الصعب:-هسه اليشوفك يكول واجبك مليون ما تفيد هاي قليله

:-انجب انت غير يومين وتحمل وهم تعال خال الولد والله لازم تصير خير وتواجبب

:-اي خوش خال دطلع لا بارك الله بيك

طلعوا يضحكون واحد يشاقي بالثاني
أسبوع اامي ورتيل ابد ما عافني كل يوم يجيبون اكل للبيت وراهه بديت اطبخ اني وصعب وهو رجع لدوامة مرات نجيب اكل من برة مرات نطبخ بالبيت اكثر شي امي تطبخ وتدز النه

فتت للغرفة ضايجة وصعب يشتغل
:-صعب

:-ها حبيبتي

:-شوف اني ضايجة وديني لامي

:-البارحة يمهه شتسوين كل يومية

:-جاا انت ماتحجي وياايي شوف حتى شعري ممشطته منتضرتك

:-تعاي جيبي المشط وكعدي هنا اكمل شغلي وامشطلج

:-من تكمل شغلك تسويلي اي شي اريدة علمود ماضوج

:-اي والله ما ضل هواي راح اكمل

:-خوش كمل علمود اكلك شريد

:-تدللين

خليته يكمل طلعت ملابس بدلت وحضرت مشط وزيت شعر منتضرته يكمل

ربع ساعه وسد الابتوب عزل الاوراق والهوسه المسويهه وكعد وراية مشطلي وباس راسي كل ما يمشطلي هيج يسوي

:-شتردين اطلعج؟

:-لا

:-جا ليش ضايجة نشوف فلم

:-هم لا

:-انة عندي حل

:-شنو

:-اركصيلي هم انه اتونس وهم انت تفرغغين طاقة

:-مااا صعب اكلك ضاايجةةة

:-شسوي اخذج للسوك

:-لااا ضااايجةة

:-وين اخذج

:-اكلك شريد

:-ااايي بووية كولليي

:-شفت مقطع حلو

:-شنو؟

:-وحدة هي وحبيبها جايبين دعبل ويلعبون اشتريلي خل نلعب

ضل صافن بوجهي شوية
:-صدك؟

:-ااي والله شبيك تذكرت من جنت طفلة وابوك دعابل الجهال والله جنت اتونس هسه تستخسر بيه خمسمية دينار ماتشتريلي بيهن

:-لا حبيبتي بس من اشتري شيكول عليه ابو المحل

:-يعني انت ما تهتم بيه ضايجة تهتم لابو المحل شراح يكول

:-بس بابا وداعتج واكفة

:-جا زعلت وما ارضة وديني لامي متحبني

كام من مكانه سحب التشيرت يلبسة
:-راح تجيببللي؟

:-امري لله

طلع واني واكفتله بالباب عشر دقايق واجة
:-هاا

مد ايدة بجيبه طلع دعبل اخذتهن منه فرحانه كعدت بالغرفة سفطتهم يباوعلي ويضحك

:-العب وياي

كعد كدامي كل شويه مطشرهن
:-اكلك بدلني بهاي العندك يمكن خوش تلعب مالتي ماريدهه

يضحك عليه لحد ما مليت كله هو يفوز شلتهن من الكاع وشمرتهن بالحاوية

:-غشاش رحت جبتهن ومناك اتفقت وياهن يفوزنك

كل يوم اطلع اله بسالفة جديده لليوم ما شفته مل مني كل ييوم يحضر النه سهره وحلويات واجباس نكعد نشاهد فلم لحد ما اكعد الكة روحي نايمة بحضنه بدون ما اكمل الفلم

يجي من الدوام اذا اسوي الغدة ما يخليني اغسل مواعين واذا يوم ضايجة يجب اكل من برة وكل فترة نروح لامي لو هي تجينه الصبحيات لان وحدي

مرة طلعلي صور اصدقائه بالتخرج ما شفت صورته وياهم استغربت

:-صعب صورتك وين؟

:-ما رحت بالتخرج

:-صددك ليشش؟

:-ما رحت

:-يعنني لليش

:-كل واحد يجيب اهله وياه انة شعندي رايح

:-اي بس مو شرط تجيب احد وياك ليش تحرم روحك من احلى يوم بحياتك

:-جنت الثاني على الدفعه ومارحت

:-وتتمنى لو رايح؟

:-اي من اشوف صورهم اضوج لان ما رحت بس صارت قديمة لذلك نسيت

رجع لصور لمكانهم ونومني بحضنه بقت السالفة ببالي

اسبوع وخليته يدزني على امي بحجة محتاجة شغلات
اخذتهه للسوك تهز بيدهه على سوالفي اخذت قماش الي يستخدمونة بروب التخرج ورحنه على خياطة

انطيتهه القياسات الي رايدتهم واتفقت وية مصورة على الانستا علمود جلسة تصوير

رجعت للبيت ولليل صعب اجة عليه اخذني مثل العادة محضر للسهرة ومشغل البلازمة بس خليت راسي على جتفة نمت وهو بقى يباوع للفلم فززني صوته وهو يصيحني بصوت ناصي

:-ملاذ بابا كومي ننام بالغرفة

:-ماا خليينيي بحضنك

:-هو بحضني بس كومي

:-مااا ماا انعسس خليني ناييمةة

شالني واني فاتحة عيوني بنعاس ضحكت وبسته بصدرة
:-غطيني عود

خلاني بفراشي باسني وخلة الغطة عليه شويه وحسيت بيه نام بصفي

يومين وامي خابرتني كملت الاغراض رجع صعب من دوامه بيه عادة من تزوجنه لليوم اول من يفوت يبوس راسي متعود واني متعودة انتضرة بباب البيت
فات ينزع بجواريبه واني وراه

:-بابا حبيبي

بدون ميباوعلي طكك ركبته
:-شرايدة من الاخير

:-يا شنو شرايدة بس داكلك متغدي لو لا

باوعلي رافع حاجبة:-وقبل لا تسألين شمرتي كمية حب احجي صاروخ شمسويه

:-ممسويه

:-هممم زين

فات للغرفة امشي وراه ينزع بملابسة طلعت اله ملابس دار وجهه علية

:-ملاذ لا تلفين وتدورين احجي

:-شحجي حبيبي

:-عندج شي

:-لا

حرك راسه بمعنى ما ادري
:-حبيبي اسبحك تعبان؟

خلة ايدة بجيبة واجة بأتجاهي يباوعلي متحير رفع ايدة لمس راسي

:-ما مصخنة شكو!

:-شنو يعني اني ممهتمه بيك قبل

:-تسبحيني صدك؟

:-ها اذا تريد يعني اي بكيفك

حجة وكأنما يختبرني:-اي اريد

:-ها لا راح احضرلك الحمام خوش

:-اممم

اخذت منشف وملابسة فتت للحمام كدامه اغم بگصتي
:-مطي والله مطي ملاذ احجي وياه لاتخافين

:-منين؟

فزيت وانداريت عليه واكف بباب الحمام
:-منين ليش اني جنت احجي بصوت؟

:-أسألي روحج

فات بدون قميص سد الباب
:-اريد اطلع امي راح تجي

:-كل ما افوت للحمام امج ترييد تجي شنو؟

:-مو وخر حباب

قرب مني خلة ايدة على خدي ورجعني ليورة صرت بينه وبين الحايط يبوس بيه رفع راسه يباوع بعيوني

:-كولي حبيبتي شرايدة ليش خايفة !

دنكت راسي متوترة

:-شوف بس اول شي خليني احجي وخر جعصتني جواك
ضحك وابتعد

:-كل يوميه جاعصج جواي بس اليوم المكان تغير

:-صصععب انتت صايرر سرببوت كللشش

:-وياج حيلل مسربت احجي

:-شوف اريد اجيبلك هدية حببابب حبابب

:-اطلعي اريد اسبح

:-شبيك شووف ادري متقبل بس هل مرة وماعييدهه حبااب

فتح باب الحمام اشرلي بيدة ليبرة
:-ماعندي خاطر يمك؟

:-لا يلة برة

بس كال لا بلعومي احتقن نزلت دمعتي وهو ثابت بمكانه عفته طلعت من صدكي كعدت بالكاع ابجي سمعته ركع باب الحمام وضل يصيح

:-كلل يووم سالفة جديدة تحيير شللون تبجي تتتحييير

بقيت ساكته وابجي بصوت ناصي
طلع ورايه بيدة ملابسة شمرهم على التخم واني كاعدة بالكاع

يزافر بنفسة افتر بالمكان يريدني احجي وياه رجع شال القميص وركعه بالتخم ضحكت واني ابجي باوعلي ابتسم
:-لاتتضحكيين خووش

حجيت ببجي خشمي ودموعي كلهه تجري:-ممعلليك بيه انت معلليك

كعد كدامي سحبت رجلية ودرت وجهي
:-شو خل اشوف وجهج

:-ماارريدددد

:-لاتردين بس امسح خشمج

:-مممعلليك بيةة

تربع كدامي وسحبني بحضنه كرفصت ضامه وجهي
رفع ايدة طلع وجهي من بين ادية مسح خشمي باصابعه ومسحة ببنطرونه

:-عيعع وصخ

:-يابه استحيت لا يفوت احد يشوفج هيج انت ومخطانج

ضربته راشدي: -شنووو بالبدداية تطردننيي وهسه تكلي استحي تتستحيي منيي صعبب روحح منيي وخرر

ادفع بي وهو يضحك ما يفلتني
:-ولج بابا بس فهميني شبيج

:-ششبييه خل اجيبللك هددية

:-انت هدية ماريد

:-معلليه وديني لامي وديينني

:-جيبيلي بس شرط الفلوس مني

:-هو انت مو تنطيني واني جامعتهن ف هنه يعتبرن منك

:-جؤ انت تكولين انطيهن الج ف هذن الج ما تصرفينهن عليه

:-لا حباب مو ما احس بطعم الهدية

:-شتردين تجيبين ياهو خلة برراسج هاي الفكرة ررتيل مو خابريهه خل انعل والديهه

:-لا والله مو رتيل ومالها دخل

سحبت تلفوني من التخم كعدت كدامه شوفتة صورة قاط رجالي كلش عاجبني

:-هذاا

:-لا ما تجيبين كلت شي مو غالي

:-ححبااب حباااببب

:-جؤؤ

عافني كام للحمام

فتت للغرفة سديت الباب وبدلت بسرعه لبست دشداشة كلش قصيرة توصل للافخاذ خليت حمرة حمرة ترست روحي عطر وبقيت كدام المرايا اعدل بشعري منتضرته يفوت

بس نفتح الباب باوعت بالمرايا عليه بقى واكف وصافن عليه مهتميت وسويت روحي ارتب بشعري تقدم بأتجاهي شمر الخاولي على الكرسي الي كدامي وحضني من ضهري يتنفس برگبتي

:-وخرر احنه مو منتحاجة

:-منو كال

:-اني ويلة وخرر

دارني اله يبوس بيه ضايع :-ميخالف شتردين تسوين سوي

:-صدكك

:-اممم

كسر خاطري بقيت وياه نمنه للعصر يلة كعدت وصعب بعدة نايم راسلت البيج

يومين وكلشي وصل المصورة اتفقت وياهه ثاني يوم البنيه دزتلي اماكن اختاريت اقرب مكان علينه جبت الاغراض كلهن

صعب طالع وية شهاب لليل يلة رجع جايب عشه وياه يباوع بتلفونه ويسويلي لفات صغيرة

:-صعب ضايجة اني

عاف التلفون وباوعلي
:-ليش بابا منو مضوجج شبيج

:-اريد اطلع مخنوكة

:-ميخالف كومي هسه نفتر بالسيارة ترتاحين

:-لا ماريد خلي باجر نطلع العصر بحديقة ونتعشه هناك ونرجع بليل

:-تمام باجر اخذ اجازة بنص الدوام علمود اجي من وكت ونروح

:-احبك بس اني اختار المكان

:-تدللين بابا

فرحة بداخلي رغم الشي الي اسوي بسيط بس متحمسه اشوف فرحته

ثاني يوم كعدت من الصبح احضر طلعت ملابس وحضرت القاط مالته احس الوكت كوة يمشي
نام ساعه وكعد

:-ملاذ شلبس

:-القاط الجبته الك علمود احس عاجبك اشو ملبسته

:-رايحين نغير جو البس قاط شكو؟

:-اني الزم السترة بيدي عليك الله

:-حبيبتي مارايحين عرس رايحين حدديقة

:-جا انت ما تحبني اكلك هو اني اشيل السترة وانت ابقى بالقميص والبنطرون ما يبين قاط

:-والله ماترهم يا حبيبتي مو تكولين طلعه بعيدة

:-متتحبني صعب متحبنني تخاف تلبسه ويكولون ذوق ملاذ حلوو

:-بس اسكتي البسه والله امري للواحد القهار

وكفتله بباب الحمام تأكدت لبسه حضرت نفسي كل شويه يباوعلي ويزافر

:-بس هذا امسحي من شفتج لونه طوخ

:-شبيك يا حبيبي والله خفيف بس انت تتحسس

:-جؤ انت حلوة بدونه ماكو داعي

خففت اللون وهو ما مقتنع كوة طلع شافني محضرة جنطه جنت حاطة بيهه الاغراض

:-شنو هاي ملاذ؟

:-اغراض من نرجع ندزهه لامي

:-خوب هسه نروح نسلم عليهه وننطيهه الها

:-لا لا من نرجع

:-بكيفج

كوة طلعنه شلع گلبي البنيه اتصلت عليه بنص الطريق رفضته ودزيتلهه رساله واصله قبلنه دزتلي المكان الي منتضرتنه بي نزلنه اني وصعب

:-افتحلي الجنطة

:-شتسوين بيهه

:-مو حاطة شغله ويه غراض امي اريدهه
:-غير تخلينهه يمج

:-اهو دفتحهه

فتحهه اخذت الجنطة ومشيت كدامه
:-صخمة شسوين بيهه

:-معليك لا تنباك بيهه شغلات مهمه

:-قافل السيارة

:-لااا امشي صعب تعبتني ما سويتهه طلعه كل ساعه طالعلي بسالفة ماعوف جنطتي هناا ماعندي ثفة بسيارتك

:-ترة غلطانه هاي جنطة جبيرة ما تنشال بهيج مكان

:-تتستنقص منني؟

:-لا بوية لا

:-جا امشي

فات كدامي اخذ الجنطة من ايدي يدردم واني اضحك شفت البنيه من بعيد صحت عليه ومشيت كدامه يمشي ورايه ويصيح

:-ووين رايحة ملاذ

:-هااي صديقتي خل اسلم عليه

وصلنه للبنيه سلمت عليهه بقى صعب صافن هي وكامرتهه

:-حبيبتي بس شوية من رخصتج ثواني وارجعلج

وكفت قريبه لصعب اخذت الجنطة منه افتحهه طلعت روب تخرج ووشاح كتبت عليه المحامي صعب عابس

:-ححلواتت؟

:-شنو ملاذ!

:-ننسوي جللسة لتخرجك

بقى صافن بوجهي مافسرت معانيه بلع ريكة وضحك
:-هاي منو سوة كل هذا

:-انني حللو؟

عض شفته الجوة:-ملاذ اريد احضنج يصير؟

:-لا من نرجع للبيت

لبسته الروب دنك البسه الوشاح رفعت رجليه اله
:-احلى خريج شافته عيوني

شفت الفرحة بعيونه اتفقت ويه البنيه نص الصور وحدة والباقي سوة بس صعب مقبل ولا صورة اخذ وحدة كلهن سوة اللمعة ببعيونه من شفتهه حسيت روحي ملكت الدنيا

كملنه كلشي والبنيه راحت صعب لهنا مقبل ادفع شي رغم جنت معتبرتهه تكمله للهدية بس قفل علية

لازم ايدي عاصرهه بين ادية وكاعدين على مصطبة
:-ملاذ تدرين انتِ نعمه بحياتي

:-احبك اتمنى اسوي كلشي تحبة وراح اسوي وعد

خليت راسي على جتفة فعلا جان من احلى الايام بخياتي ما انسة اي لحضة منه

صعب جابلي كتب سادس يريد اقرة بوقت فراغي يكول من تشوفين روحج مضبطة المواد امتحني ساعتهه بس اني مالي واهس اقرة

مكضبتهه لو اروح لامي لو هي تجيني رتيل باخر فترة كامت ما تكدر تجي لان بطنهه كبرت ودخلت بأشهر صعبة
فات صعب بيدة ورقه يصيح

:-جممارةة شوفي شجبتلج

باس راسي وخلة الورقة يمي بيهه اسم معهد
:-شنو هاي؟

:-سجلتج بمعهد للسادس

:-يا صعب ويني وين السادس؟

:-بس ادرسي السادس وبعدين كملي بس الزمي شهادة السادس بيدج واكعدي شكد ما تردين

:-ماكدر شلون انت تداوم واني اداوم

:-معليج هو دوامج يبدي ب 9 الصبح ويخلص ب 2 اني اجي عليج واذا ما كدرت ادز واحد من الولد يجيبج

:-يعني انت راضي؟

:-طبعا راضي

:-من شوكت اباشر

:-الاسبوع الجاي المعاهد تباشر

فرحت بداخلي لان فعلا حلمي ادرس صعب كل يوم جايلي بسالفة ساعه المعهد بي اساتذة بي طلاب بي مدري شنو فضا للنك مالته والملحة مالته قررت البس عباية خليجي طاير من الفرح وبشر امي

:-صعب لو ادري هيج تحبهه من زمان لابستهه

:-بويه اذا اكلج لبسيهه كبل تصيحين رجعني لااممي

بديت اداوم صعب يجيبني ويرجعني كم مرة شهاب يجي ياخذني وكل ما يجي يصيح اريد اصير خال مللني

لحد ما جابت رتيل ولد شكد فرحتلهه الولد طايرين بالطفل وصعب كل شويه يخابر علي ها شلونه حمودي وهو بعدة اشهر معتبرينه جبير

اجة عليه شهاب للمعهد
شهاب:-اكلج هسه انه صرت خال من رتيل اريد اصير خال منج شني شوكت تفرحونه

:-مانريد بعدنه ماشفنه شي بحياتنه

:-شتشوفين ما شبعتي من صعب صماخة شكبرة

:-لا ماشبعت منه وبعديين احلى منك انت لو بيك حض تزوج

:-الله يبعدني زواج شنو غير اشوف صعب ماشي على مسل الساعه حتى طلعاتنه يستأذن منج شجاايبني انه ولد يحب يطلع بالثنتين بليل محد يكلة على عينك حاجب

:-اي علمود عمو هادي يشوي على اذنك بصل

:-ذكرتيني بعمج يكول ليش ماتجي علينه نبزز

:-هو صار اسبوع من اجانه وبقى يبسمر بيه بس والله الدوام يتعبني ومالحك حتى امي قليل اروحلهه

:-ولج ابوج هذا روحيلة خوش شلون بنيه عاق

بقينه نسولف ونضحك كل مرة يجي شهاب يونسني نكضيهه ضحك وسوالف

كل يوم بليل صعب يراجعلي الماخذينه مرة وحدة جنت ما محضرة زعل وسواهه سالفة شكبرهه توبني من يومهه

ثنينه ملتهين احس روحي هاملته اشتريت روب نوم جديد من هذا اليحبه ومكياج جان طالع ويه اصدقائه تحضرت وخليت مكياج ترست الغرفة عطر وشغلت اضائه خفيفة سمعته من برة يصيح باسمي بقيت ساكتة منتضرته بالباب فتح باب الغرفة بقى صافن بيهه

:-شكو؟عرس منو

:-شنو شبيك اله عرس

كلش فرح من شافني هيج مهتمه كل فترة اسوي هيج ماريد يحس مقصرة منه

من نوع كلش يدقق بلبس ويحب دوم كاشخة ومتعطرة حتى لو جنت مشغولة كل الشغل اليوم الي عندي دراسة وامتحان بالمعهد ما يخليني اطبخ بالبيت

جنت منتضرته برة المعهد اريد ياخذني للصيدليه اسوي تحليل لان الدورة تأخرت عليه ما كتله متأخرة اريد اتأكد يلة احجيله

اجاني وصعدت عباله اسوي تحليل علمود فقر الدم
:-صعب جيبلي ماي
:-اي حبيبتي بس نوصل للاسواق
وصل كذام اسواق جنت تعبانه بشكل وفحطانة بس امشي شويه اتعب

راد ينزل كتله:-صعب اجي وياك

:-حبيبتي بس اشتري واصعد ما اتأخر

:-ميخالف اريد انزل

فتحلي الباب نزلت وياه فات سلم واني صافنه صعب كال
:-بس ماي؟
ردست بصوت عالي نسيت احنه باسواق وجانن ثنين نسوان موجودات

:-اي استاذ بس ماي
كلت هيج وكل الي بالمحل كام يضحكون وصعب حابس ضحكته بقى يصنف عليه لو ما نازلة اشرفلي

سويت تحليل دم واني وصعب كاعدين برة منتضرين النتيجة گلبي. يدك بقوة وادية ترجف صعب عاصر اصابعي بيدة

:-بابا شبيج هو تحليل ليش خايفة؟

:-لا ما خايفة

جنت خايفة لا تطلع شكوكي غلط ومنتضرة اشوف صعب شراح يسوي طلعت الممرضة تباوع على الكاعدين

:-منو ملاذ

:-ااني

:-مبروك حامل

كالت هيج اريد اوكف مااكدر صعب جان لازم ايدي حسيت ادية نفلتت مني باوعتله دموعي بعيني

الصعب:-والله صدك حامل؟

:-اي عيني مبروك

كام من مكانه يروح ويرجع ادية ترجف واني ماعدة دموعي تنزل ماعرف شسوي الناس تباوعلنه عبالهم سنين ما صاير عدنه

:-ممررتتي حاامملل حاامملل والله

يحجي هيج بصوت عالي سحبني من الكرسي حضني بنص الناس يبجي ويرجف الدموع متجمعه بعينه يرفع راسه علمود ما ينزلن

:-حاامل؟

احركلة راسي بمعنى اي ابجي واباوعلة شلون فرحان
طللع تلفونه من جيبة يتصل

:-الوو ييوم مملااذ حاامملل

سد التلفون ورجع اتصل حتى ما يسمعهم شيكولون
:-ششهاابب للك راح اصير ااب ملاذ حااممللل

بقيت اباوع للناس كلهه فرحانه على فرحتنه
:-صعب خل نرجع للبيت

:-لا لا خل اخذج لدكتورة خاف مو زين عليج خل تشوف الطفل شلونه

:-حبيبي بس امشي للسيارة

كوة طلعته من المكان ما يخليني انزل الدرج بسرعه يمشيني خطوة خطوة على البايات

رجعنه لبيت امي لكيتهه محضر الجكليت طشت علينه وتبارك وتهلهل

لليل اجو رتيل وعلي وشهاب وعمو عادي وزوجتة صعب ما عافني لحضة ما يقبل يروح يم الولد بالاستقبال كاعد يوكل بيه ورتيل تحشش علينه هو ولا يمهم ولا مهتم ما يشوف بس اني كدامه

كل فترة حملي مهتم بيه من الصبح يكعد يبوس بطني مرة نايمو كعدت صعب متمدد راسع يم بطني والتلفون مسوي بالعرض كدانه يشاهد فلم كعدت اباوعله رفع راسه

:-ما تنام

:-اني وطفلي نشاهد فلم تجين ويانه؟

هزيت ايدي اضحك عليه كل وعقلة يشوفه افلام لو يحجي وياه من وصلت لشهر الخامس تعبت كلش كمت ما اكدر ادنك حملي صعب ومتعب بشكل اكثر شي امي تجي يمي المعهد كمت اروح يوم وعشرة لا اغلب شي صعب بالبيت يدرسني

اول ما يجي من الدوام يبوس بطني ويجيب دهن الرجلين يدهن رجليه لان تاذن بشكل بس ادوس عليهن يتفتحن وياذني يلبسني الجواريب بيدة ينضف البيت يحضر ملابسي الحمام كلة هو يسوي

اكعد بليل ابجي من الخنكة احس الطفل يصعد لبلاعيمي اختنك صعب يكعد وياي يمرغ بدية لو يوسيلي عصير ينومني بحضنه والصبح يروح لدوامة ما نايم

اول ما فتت بشهر التاسع صارت عندي طلوكة فزييت الساعه بالثنتين بليل وجع ببطني مو طبيعي عبالي راح يصير شي

:-صصععب صصععبب اككععد

فز من نومته عباله مثل كل يوم جنت لازمة البطانيه وعاصرتهه بيدي بكل قوة

:-ييمكنن رراحح اججيب صصعععببب ييمةةة وووينج

بقي يرجف يخاف يلمسني يخلي ايدة على بطني واني اصرخ

:-ووووللك خل امي تجي راح ااجيببب

كام يفتر بالغرفة اتصل على امي مرتين وماكو ساعتين اني على نفس الوجع اتلوة بمكاني لا ارضى اكوم ولا يروح الوجع طلع جنطتي محضرينهه من زمان

:-كوميي اخذج لمستشفى

:-ووولك ماكدرر راحح يووكع ييمةة يمة ططلعع طلعع

:-وووينهه

:-ببطنني بسس راحح ييطلعع ييمة ووينجج

لزمني يريد ينزلني من الجرباية واني بس اصرخ ما اكدر اتحرك

:-عووفنني كله من ورراك ياجللب يمةة وولك بطنننيي مدري شبيهه

:-بس حركي روحج بابا بس كومي

:-لا تكليي بباباا لاتكليي جذاابب لو تحبني ما تخليني اتوجع وخر الوجع مني يييمةةة

فتح باب الغرفة بسرعه طلع اغراضي وداهم للسيارة خلة المحفظة بجيبه وكومني كوة من الجرباية لازمة بطني امشي كوة لازمة جتفه

:-وولك امي خل تجي راح اموتت

:-ااي والله اجيبهه بس عينيني تحرككي

:-مايررضه هذا ابن الكلبب راح يطلعع

:-ميخالف بابا شوية شووية

وصلت للسيارة ارجف حيلي مهدود راد يخليني وره

:-لاا اموت ااجيبب ضل وياييي لا تروحح

:-جاا شلون ااسوق ولج شللونن

:-مااا لاتتعووفنني

رجع يتصل بتلفونه ثنينه صاعدين وره كل ما يجني الوجع اعضه بقوتي وهو متحمل

لحد ما ردت امي :-ييومم فدوة تعاي ملاذ راح تجيبب استعجليي ماتخلينني انززلل

ماطولت شويه واجت تركض وهم جايبه بيدهه جنطة للطفل مجهزتهه صعدت يمي وصعب نزل بسرعه يسوق
كل ما يفوت بطسة الزم بطني عبالي الطفل راح ينزل

:-على ككيفف ولللك راح يطلعع لاتمشي بسررعةة

:-اايي اايي

:-ووصلننيي للمستشفى خل يطلعونه مني ماريدةة

احس مو ساعات سنين مرت عليه فوتوني لصاله الولادة اشوف الممرضات شلون يمشن كدامي ولا هامهن شي وهاي الي تكول ماعدهه توسع وبعدهه مو وكت ولاده كمت اجيب واغلط عليهن

:-ويينن امميي وينهه انيي ك*** اذا حبلت بععد كللة من وره ذاك الك** خلل يررجعنني لاممي خلوو ببطنهه خل يجرربب الوجع هذااا طلعوو منيي

امي تسد بحلكي واني اصرخ بصوت عالي هرجتهم هرج الوجع ما ينحمل خلني امشي الصاله طول بعرض لحد ما حسيت مي وكع عليه وملابسي تنكعت

:-ييممةة وولج ييمةة طاحح طاحح والله ييمةة

كبل اخذني لحد ما وصلت كلش اسمعهن يصيحن طلع ما ضل شي واني اغلط عليه وعلى ابوة

:-ططلعننهه ابن الكلب ماارريددةة طلعوو مني خل ياخذة ابوة ماارريددةة

لحد ما حسيت انتهت طاققتي وبعد ما احمل لا اصيح ولا اسوي شي سمعتهن يصلن على النبي ويصيحن بنوته طول فترة حملي صعب ما يقبل اسوي سونار غمضت عيوني ماريد اشوف شي الوجع مسيطر عليه فتحت عيني مشكليلي مغذي بس اني بغرفة وامي يمي اتلفت محد موجود

:-يمةة بنتي وين

:-يمة صلاوات كعدتي

:-ووينهه

:-بالخدج شويه ويطلعونهه رجلج متانيج على نار

طلعت شوية وفات صعب باس راسي وكعد كدامي
:-مبروك بابا بنيتي جابتلي بنيه

ابتسمت وزرت وجهي تعبانه مااكدر احجي
:-ملااذ تخبلل غاليتي

:-تعبتنيي من بدايتهه اخذهه الك

ضحك ورفع ايدي يبوس بيهه
:-سودة عليه بابا هانت خلصتي

:-خل اشوفهه

:-شويه ويجيبونهه حبيبتي عمي وشهاب هنا يردون يسلمون عليج

:-اي بس شعري

حجابي جان على الميز لبسنياه وكعدني عدل فاتو شهاب وعمو سلموا وتحمدولي على السلامة

شهاب:-ملاذ عبالي تجيبين ولد كلت اكييد من حبكم اليه تسمونه شهاب

:-لو تموتت
حجيتهه بتعب بقوا يضحكون

:-حتى وانت مريضة تنكطين سم

مالي خلك ارد عليهم عمو كال
:-شتسمونهه الحلوة

الصعب:-غالية

بقيت ساكتة وحدة مقرر صح ضجت بس ماريد اكسر خاطرة بقوا شوية يسولفون وراحو اجو رتيل واخواتهه هم سلممن وفات علي سلم عليه لليل راحو

جابولي الطفلة صعب كاعد يمي هو وامي اول ما فاتت الممرضة جسمي احس يرجف وعيوني تركض الها اريد اشوفهه

خلتهه بيدي اباوعلهه وابجي ناعمة وصغيرة
:-ششوفف صعب صغييرةة

كعد يمي يتلمس بوجهه
:-تشبهننيي شوفيهه

:-ماا والله تشبهنني

بعدت ايدي منه علمود ما يلمسهه امي اخذتهه مني
:-وولكم بدايتهه جعصتوا الطفلة عوفوها وخروا ثنينكم

خلتنه نباوعلهه من بعيد اباوع لصعب من يلمسهه ادية ترجف وضحكته ما مفاركة وجهه

ثاني يوم طلعونه من المستشفى رجعت لبيت امي للاربعين صعب ييخاف عليه مبقيني يمم امي

يجي من الدوام ركض الها يسولف وياهه ويحجيلهه شسووة اليوم
يشتريلهه العاب وامي تضحك علينه كل عقلة عبالهه تفتهم علية

رجعت ورة الاربعين شويه غاليه كبرت صرت ماخاف الزمهه من جنه ببيت امي كلش اخاف ومعتمدة على امي بس من رجعت انجبرت اهتم بيهه واتعلم عليهه بليل من صعب يشوفني اتعب يسهر وياهه

كمت انضف البيت وغاليه بكاروكهه كملت كلشي وحضرت الغدة فتت للغرفة تأكدت نايمو اخذتلي ملابس وفتت للحمام ركض ماحب يجي صعب واني بهوستيي كملت بسرعة طلعت اركض فتت للغرفة اباوع بالكاروك فارغ جسمي باد اريد اتحرك من مكاني مااكدر

اباوع بالغرفة عبالي مخليتهه على الجرباية كلبت الغرفة كلاب ابجي وافتر بالبيت تلفوني ضاع عليه اريد اتصل بصعب شكلة يذبحني

كعدت بالصالة الطم واصرخ
:-يييمةة بنننيتتيي ولجج ييمة لحككيللي صععب وينكك
سمعت باب الصالة نفتح درت وجهي فات صعب شايل غاليه ولابس علاكة بيده ولازم اللعبه الي تطع فقاقيع

:-ششكوو ملااذذ

طفررت من مكااني اركض عليه سحبتهه منه
:وووين مااخذهه ووينن

:-مو انت بالحمام ولكيتهه كاعدة تبجي كلت اشتريلهه وترروح ضوجتهه

:-تحججيي صددك غيير تبلغنني صععب گلبي طاحح ببطنني عبالي بتتي نخطفت

:-حبيبتي الباب مقفولة منو غيري يفوت للبيت

خبلني ما يقتنع بشي يعامللهه معاملة كبار لو من يجي شهاب ياخذونهه يمهم واني الزم گلبي بيدي يوم جايبينهه واحد لازمهه ومكعدهه على السيارة وواحد يصور يوم مكعدينهه بمكان السايق شهاب ياخذهه يفرها بالشارع ويشتريلهه وهي كل عمرهه اشهر مليت منهم وخليتهم براحتهم

جنه ناييمين على الجرباية راسي على صدر صعب احرك ايدي علي الوشم كلش احبة

:-جمارة

:-همم

:-اريد اسوي وشم

رفعت راسي خازرته
:-اموتك والله

:-لا شوفي انه احبج وسويتلج واحب اهلي وسويتلهم واحب بنتي خل اسويلهه شوفي هنا جوة اسمنه اكتب غالية الصعب

:-للوو انني لو بنتكك انت ماتحبنني تحبهه اكثر مني اخظهه واطلعلوا من غررفتي

:-بابا اوكفي بس افهممج

:-مماتتتسوويي صصععب

:-خطية

:-تتحبننني لو تحبهه

:-ثنينجن

:-يعني انني صارلي شكد وياك تجي فصعوونه بأشهرر تحبهه بكديي

كرصت ايده بقوتي وهو متدد يضحك
:-لاتتضحكك تحبني لو تحبهه

:-احبجن

:-والله راح اذبحك صعبب

:-اني عندي ثنين بحياتي انت وغاليتي

:-بس اني

:-ولج تراهه بتنه

:-اختار تحبني لو تحبهه

:-ثنينجن

:-خوش وخر

كمت من يمة سحبني من ايدي على صدرة
:-لاتقارنين روحج بأحد غاليه بنتي احبهه حب بنت وابوهه انت ملاذي جمارتي بنيتي مرتي لو تفرين الدنيا كلهه ماتلمين واحد يوصل لمكانتج

:-لاتقشمرنني

:-ااحبج بابا ارجعي لديرتج
يحجي هيج ويأشر على صدرة ابتسمت ورجعت راسي على صدرة

:-بس ما تسوي وشم

:-صار

غالية صار عمرهه سنه وامتحنت سادس بسوم الي طلعت النتائج صعب شايل غاليه ويفتر يممي وشهاب على صفحة فاتح تلفونه سساعه يشيل غاليه من صعب ساعه يكعد حايرين بنتيجتي وامي بس تدعي

شهاب:-والله اذا نجحتي اجيب ذهب لغلاهن

:-غغير اني الناجحة شنو غاليه

:-مو انتن واحد بس انجحي ملاذ

ثنينهم مهتمين بنجاحي لان الموضوع الي صعب مايعرفلة شهاب يشرحة ويدزة الي تعبوا كلش وياي

بس طلعت النتيجة صعب نزل غاليه بالكاع وبقى يطفر وشهاب يهلهل هو وامي صح معدلي ناصي بس كلش فرحت

شهاب من صدكة جاب تراجي لغالية وصعب طاير بية ينشر وكل ما يصفن الكاة يضحك لو مطلع نتيجتي يباوع بيهه لان غلاهن صغيرة مكدرت ادرس اني الي رافضة هل فكرة ومأجلتهه للمستقبل

امي وصعب والغالية عوضي بهل دنيا

كل الناس بحياتي رتيل شهاب عمو هادي جانوا صح بحياتي
الاغراض الي عد صعب رمش مني واضافري كلنس كلش قديم وخاولي كلهن محتفظ بيهن ويه صور اهله الرسمة مالت عيوني معلكهه بغرفتنه كدام الجرباية كل يوم احس حبة يزيد النه

الغاليه طبق الاصل عن ابوهه شكل وتصرفات طايرين بيهه ما يخلونهه تلمس الكاع بيت عمو هادي امي وصعب كلهم مدللينها دلال شهاب ما يسميهه اله غلاهن وصعب يصيح غالية ابوهه صح مرات اغار منهه بس يقشمرني بحجايه اسكت منه

لهنا اختم قصتي وياكم اتمنى استفاديتوا من قصتنه وتعلمتوا من اغلاطنة ❤️

*_صعباََ ألتاذ بأحضان طفلتةِ فرممو بعضهم

:-ولهنا ونسد ابواب القصة على أبطالنه
فرحنه وياهم وحزنه وياهم ضجنه منهم وضجنه عليهم كلشي سويناه سوة ويارب يعيشون بقية حياتهم بسعادة

علي ورتيل الله عوضهم ببعض وكملوا بعض ورزقهم ببأحلى طفلين

شهاب خلص من اكبر مشكلة بحياته واكبر عثرة بطريقة صح اتأذة هوايه واتأثر بس كدر يتخطة كلشي وان شاءالله يلكة بنت الحلال الي تسعدة

أما طيور الحب الصعب وملاذة شكد تأذو وشكد عانوا وشكد مروا بضروف بس الله عوضهم وعوض الله جبير الغالية أحلى هدية اجتهم من رب العالمين ولليوم صعب ماقصر وية ملاذ لو وية خاله رُفيدة بشي

علاقته ب الغالية غريبهه بشكل كد ما متعلق بيهه الله يحفظهم لبعض

واخيرا انيي
اتمنى قدمت القصة بالشكل المطلوب واتمنى ماقصرت بشي وياكم حاللوني اخاف قصرت بحقكم واعرف هوايه خليتكم تنتظرون بس اغلب الاوقات ضروفي جبرتني اتمنى ما ضوجت احد منكم بحجايه يجوز غثيت احد منكم بدون قصد يجوز احد منكم قرة مشهد غير لائق وضاج مني بس جنت اريد اوصللكم الرواية بكل تفاصيلهه احبكم هواايه ونلتقي بقصة جديدة وبأبطال جدد وبأحداث جديدة......

لهنا اكدر اكول ختامها مسك وماكو كلمة للحكاية بقية اليوم نكول النهاية❤️

دمتم احبتي❤️☘️خُلودكم…

أنستا للتواصل lorai_alrwi

2023/4/2 الاحد