رواية انتقام بلا رحمة الفصل الرابع 4 - بقلم Beroabood5

بعد اربع اشهر من الاحداث السابقة يجلس شارد الذهن امام نافذة مكتبه بالشركة يدخل عليه فارس وزين .......

زين : فهد اللي بتعمله دا مش في مصلحتك ابدا وبعدين هي ربنا يرحمها ...بجد نفسي تخرج من اللي انت فيه وتشوف حياتك بقا على الاقل تتابع الشركة مش تيجي تقعد تقلب في الورق وانت سرحان كدا

فارس : زين عنده حق يا فهد لازم تشوف حالك وشغلك بقا

فهد بابتسامة بسيطة : تصدقو بدأت افكر في كلامك و بعدين الحي ابقا من الميت هي بقالها اكتر من اربع شهور ربنا يرحمها

زين : ايوة بقى الفهد هيرجع تاني عايزين نشوف شغلنا عندنا صفقات كتير مش عايزين نخسرها وحاجات تانية كتير

فارس : ناوي على ايه يا زين

زين : على كل خير ان شاء الله

فارس : فهد كان فيه موضوع عايز اكلمك فيه

فهد : خير فيه ايه

فارس : فاكر من مدة كدا قبل الحادثة كنت كلمتك عن بنت موجودة معانا في الشركة بس مش موظفة هي كانت بتتدرب بس هي كلمتني من فترة عشان محتاجة تشتغل

فهد بشرود : لا مش فاكر اسمها وكانت بتدرب في انهي قسم

فارس : كانت بتدرب في قسم التسويق اسمها ديالا هي المشكلة انها لسه بتدرس بس احتياجها للفلوس خلاها عايزة تشتغل

فهد بابتسامة بسيطة : مفيش مشكلة خليها تحضر ورقها وتيجي عندي المكتب عشان اعرف هتبقى في انهي قسم

فارس : بس هي كانت بتدرب في قسم التسويق اكيد مش هتبقا في قسم تاني

فهد : اشوف ورقها و ساعتها هقرر هتبقى في اي قسم

فارس : ماشي اللي تشوفه انا همشي بقا عشان الحق ابلغها

زين : وانا كمان بقا هروح اشوف ورايا ايه
بعد خروج زين وفارس ...

فهد بشرود : اللعبة بدأت تحلو اوي جيتي برجليكي سبقتيني بخطوة بس كويس اما اشوف بقى هنعمل معاكي ايه يا ديالا هانم

Flash back .......

قبل شهر من الاحداث السابقة اثناء غيبوبة ديالا يذهب فهد لغرفة العناية المركزة كعادته بالآونة الاخير ولكن هذه المرة مختلفه لانه ذهب في معاد تواجد والدة ديالا بالممر المقابل لغرفة ديالا ........

والدة ديالا اميرة : ازاي اللي حضرتك بتقوله دا يا دكتور مين هيكون دفع الحساب احنا معندناش قرايب وهي ملهاش اخوات ملناش حد يسدد الفلوس دي كلها

الطبيب سيف : انا كل اللي اعرفه ان الشخص دا محبش يقول مين هو وسدد المبلغ وبزيادة

فهد : سلام عليكم

والدة ديالا والطبيب : وعليكم السلام

فهد بابتسامة بسيطة : بعد اذنك يا دكتور انا عايزة اتكلم مع الحاجة شوية

الطبيب : مفيش مشكلة بعد اذنكو

اميرة : مين حضرتك يابني

فهد : انا الشخص المجهول اللي دفع حساب المستشفى وعلاج بنت حضرتك

اميرة : متشكرين يابني بس احنا الحمدلله مش محتاجين صدقة من حد وشكرا جدا لحضرتك وفلوسك هتوصلك باذن الله

فهد : ممكن حضرتك تسمعيني بس وان هفهم حضرتك على كل حاجه

اميرة : اتفضل انا سمعاك يابني

فهد : بنت حضرتك ديالا كانت بتدرب في الشركة بتاعتي وانا بصراحة ومن غير كدب انا كنت معجب بيها من فترة بس انا مش عايز حضرتك تفهمي غلط هي متعرفش بحبي ليها وكنت عايز اتقدملها بس حصلت الحادثة واجلت كل اللي كنت عايز اعمله وانا مش عايز حضرتك تضايقي من موضوع الفلوس انا معملتش حاجه لاني بجد كنت بموت لما عرفت الخبر وانها كمان في غيبوبة حضرتك متعرفيش انا بحبها قد ايه

اميرة : بص يابني انا مش عارفة ارد عليك اقولك ايه عموما انا عند كلامي فلوسك هترجعلك لما بنتي تقوم بالسلامة

فهد : يا طنط انا مش عايز حاجه مش هقبل اني اخد الفلوس دي وبعدين اعتبريني ابنك ولا مشرفكيش

اميرة : لا مش القصد يابني بس ميصحش

فهد : لا يصح غير كدا باذن الله اول ما تقوم انا هاجي واطلبها من حضرتك في بيتك انا عارف الكلام دا مش مناسب دلوقتي بس انا حابب اوضح موقفي

اميرة : ربنا يقومها بالسلامة الاول وبعدين ربنا يحلها من عنده

فهد : يارب .. بس طلب اخير مني مش عايز حضرتك تعرفي ديالا مين اللي دفع فلوس المستشفى لحد ما تبقى علاقتي بيها رسمي وهقولها انا ....استأذن انا بقا عشان الشغل مع السلامة

اميرة : حاضر ....مع السلامة يابني

End flash back .......

فهد بحقد : اول خطوة نجحت والتانية انتي قومتي بيها الباقي عليا انا

~~~~~~~~~~~~~~~~~~~~~~~~~~
العودة بالزمن قليلا ليوم عودة ديالا الي منزلها بعد تحسن حالتها الصحية .......
في منزل ديالا تجلس وسط اصدقائها يطمئنو على حالتها بعد عودتها من المشفى ....

رغدة : حمدالله على السلامه يا حبيبتي وحشتينا اوي بقا كدا تقلقينا عليكي كل دا

ديالا بتعب : الحمدلله اوي لحد كدا اللي فهمته من كلامكم وكلام الدكاترة اني كنت بموت وربنا رد فيا الروح

فريدة : الحمدلله ..المهم انتي عاملة ايه دلوقتي لسه تعبانة

ديالا : الحمدلله احسن بكتير بس عندي صداع ودوخة مستمرة الدكتور قالي انه هيستمر معايا مدة عشان النزيف والارتجاج اللي كان عندي والدكتور كتبلي مجموعة ادوية عشان الصداع دا

رغدة وفريدة : الف سلامة عليكي يا حبيبتي

ديالا : فريدة ممكن اطلب منك طلب

فريدة : قولي اللي انتي عايزاه يا حبيبتي

ديالا : انتي عارفة اني كنت بتدرب في الشركة عندكو و دلوقتي انا محتاجة اشتغل عشان المصاريف وكدا وبصراحة انا مكسوفة اكلم بشمهندس فارس فى الموضوع

فريدة : حاضر من عنيا اول ما اروح هكلم فارس وهو يكلم فهد متقلقيش وبعدين تتكسفي من مين دا اخوكي الكبير

ديالا : عارفة والله بس بردو الموقف محرج بالنسبة لي

فريدة : لا مش محرج احنا اخواتك وبعدين فارس بيعزك جدا وهيزعل اوي منك لو عرف الكلام دا

ديالا : لا خلاص انا مش بحب حد يزعل مني وبالذات انتم لاني بعتبركم عيلتي بجد

رغدة :طب ايه بقا نقوم نمشي احنا عشان منتعبكيش اكتر من كدا

ديالا : لا اقعدو معايا شوية كمان عشان خاطري انا مش تعبانة

فريدة : لا انتي تعبانة وبعدين احنا هنعدي عليكي تاني عشان نطمن عليكي ونجيبلك المحاضرات متقلقيش يلا سلام

ديالا : ماشي مع السلامة

~~~~~~~~~~~~~~~~~~~~~~~~~~
في الوقت الحالي بعد حديث فارس وفهد عن عمل ديالا بالشركة يهاتف فارس ديالا ليخبرها ما قاله فهد ......

فارس : سلام عليكم ازيك يا ديالا ايه اخبارك النهاردة

ديالا : الحمدلله احسن شوية من الاول بس الدوخة بتجيلي كتير بس الحمدلله حضرتك عامل ايه

فارس : الحمدلله عندي ليكي اخبار حلوة هتفرحك

ديالا : خير ان شاء الله

فارس : انا كلمت فهد ف موضوع شغلك ف الشركة وهو وافق بس حابب يقابلك الاول ويشوف ورقك عشان يعرف هتبقي ف اي قسم

ديالا باستغراب :  ليه هو انا مش هبقا ف قسم التسويق اللي كنت بتدرب فيه !!

فارس : مش عارف والله على حسب ما فهد يحدد وانا قولتله انك هتروحي بكرا الصبح بورقك مكتبه

ديالا بتوتر : لازم يعني اروحله مكتبه

فارس : لازم عشان يشوف ورقك ويحدد هتبقي فين

ديالا : امري لله بقا شكرا لحضرتك جدا يا بشمهندس

فارس : على فكرة انا بعتبرك اختي يعني زيك زي فريدة فبلاش حكاية بشمهندس وحضرتك انا فارس بس ممكن ولا ايه

ديالا : حاضر يا بشمهندس

فارس : بردو قولنا ايه بقا

ديالا : اديني وقتي عشان اتعود

فارس : ماشي يا ستي عايزة مني اي حاجه تانية

ديالا : شكرا يا فارس

فارس : طب يلا اطير انا بقا سلام

ديالا : مع السلامة

~~~~~~~~~~~~~~~~~~~~~~~~~~~
اليوم التالي الساعة 9 صباحا بمكتب فهد بالشركة يجلس شارد في تفكيره في ديالا التي ستأتي بعد قليل وكيف سيتحمل رؤيتها بعد ما فعلته ويقطع هذا التفكير دخول سكرتير مكتبه يخبره بوصول ديالا ....

السكرتير : استاذ فهد في بنت برا اسمها ديالا بتقول انها عايزة تقابل حضرتك

فهد : اه دخلها بسرعة يا استاذ محمد

السكرتير : انسة ديالا اتفضلي

تدخل ديالا المكتب بتوتر وهي تنظر لقدميها لا تستطيع رفع عينيها لترى من ينظر لها بحقد شديد ولكن يخفيه خلف ابتسامة مرحبة ليتحدث اليها ....

فهد بابتسامة : اقعدي يا انسة ديالا مالك خايفة ليه

ديالا وخجلها يزداد ونبضات قلبها ترتفع : لا مش مش خايفة ولا حاجه ...اتفضل حضرتك دي اوراقي

فهد ينظر لها قليلا ثم للملف الذي بين يديه يتمعن النظر به ويقرأه جيدا ثم : ورق كويس ومعدلات نجاحك في الكلية كويسة بردو وورق تدريبك هنا بيوضح انك كويسة جدا بس انا عندي رأي تاني ف موضوع شغلك دا

ديالا بانتباه : من ناحية ايه مش فاهمة

فهد يتحدث اليها بعد ان نهض من مقعده ليجلس على المقعد المقابل لها : اقصد انك مش هتتعيني ف قسم التسويق ورقك يخليكي ف مكان احسن بكتير

ديالا : بردو مش فاهمة حضرتك تقصد ايه يعني هتعين فين

فهد : هتبقي سكرتيرتي الخاصة بدل استاذ محمد بصراحة محتاج حد جديد لانه كبر ومحتاج يرتاح من الشغل

ديالا باندهاش : طب واشمعنا انا

فهد بابتسامة بسيطة : فارس قالي انك نشيطة اوي وشغلك بتخلصيه ف مواعيده ومنتظمة والاهم انك مش بتنسي حاجه يعني المطلوب بالظبط وبصراحة اكتر مش هقدر استغنى عن واحدة بكل المواصفات دي انها تبقا اقل من سكرتيرتي ومتقلقيش مرتبك هنا هيبقا اعلى بكتير من موظفة تسويق

ديالا بتفكير : طب ممكن حضرتك تديني وقت افكر

فهد بابتسامة : اكيد بس هما ساعتين بس تشربي فيهم حاجة ساقعة وتقرري هتعملي ايه

ديالا بشرود : بس ساعتين قليل اوي

فهد : لا قليل ولا حاجه بالعكس دول كتير اوي

ديالا : بس انا مش بفهم حاجه ف شغل السكرتارية

فهد : متقلقيش استاذ محمد هيفهمك كل حاجة قبل ما يمشي ومش عايز كلام تاني غير بعد ساعتين

يتبع .....