رواية انتقام بلا رحمة الفصل الثالث 3 - بقلم Beroabood5

بعد شهر من الاحداث السابقة لازالت ديالا غيبوبتها مستمرة ولكن فهد اصابته حالة اكتئاب شديدة ...
في غرفة فهد بالفيلا ....

فارس : مينفعش اللي انت عمله في نفسك دا يا فهد انت كدا هتموت نفسك

فريدة ببكاء : يا حبيبي اللي حصل حصل ربنا يرحمها احنا كلنا كنا بنحبها وعارفين قد ايه انت بتحبها بس دا قضاء ربنا وهي لو كانت موجودة كانت هتزعل من اللي انت عمله في نفسك دا

فهد بحزن شديد : لو كنت موجودة مكتش حصل كل دا

فارس : فهد ماما تعبانة اوي بسبب اللي انت فيه زعلانة علي اللي انت عمله في نفسك عشان خاطر ماما حاول تخرج نفسك من الدوامة دي

فهد بشرود : ان شاء الله هحاول

~~~~~~~~~~~~~~~~~~~~~~~~~~~
اليوم التالي ليلا في المشفى في غرفة ديالا بعد مغادرة والدتها وغادة يجلس على الكرسي المقابل للسرير الذي ترقد عليه كالجثه لا حول لها ولا قوة ينظر لها بكره شديد ويخطط كيف ينتقم منها على فعلتها ......

فهد : انتي السبب هي ماتت بسبب غبائك بس عارفة صدقيني انا هعيشك اسود ايام حياتك هكرهك في اليوم اللي اتولدتي فيه وهشرف على الموضوع دا بنفسي 'يقترب من اذنها ويتحدث بصوت يشبه الفحيح ' خليكي فاكرة الصوت دا كويس اوعى تنسيه ابدا ....سلام

يخرج من المشفى ويتذكر ما حدث بعدما افاق من اغمائته وتأكد من وفاة حبيبته ....

فهد يتحدث امام قبرها : وحشتيني اوي انا مش قادر اصدق اللي حصل ... ' وهو يمسح دموعه ' هاخد حقك من اللي كان السبب في موتك عمري ما هسامح نفسي لو ماخدتش حقك
Flash back .....

بعد الحادثة باسبوع في الاستقبال ......

فهد : لو سمحت من حوالي اسبوع كدا حصل حادثة وجه فيها اربع بنات وماتت منهم واحدة

موظف الاستقبال : ايوة بس حضرتك عايز ايه بالظبط

فهد : مفيش مجرد اني عايز اعرف مين اللي كانو ف الحادثة وايه حالتهم الصحية بس

موظف الاستقبال : بص حضرتك انا عندي بس الاسماء بتاعتهم بس الحالة الصحية دي تقدر تعرفها من الدكاترة المتابعين لحالتهم

فهد : طب قولي اساميهم عشان اكلم الدكاترة واطمن عليهم

موظف الاستقبال : حاضر لحظة واحدة .....فيه واحدة توفت اول ما وصلت ودي اسمها ميرنا والتانية اسمها سهيلة كانت معاها في نفس العربية والتالتة اسمها غادة والرابعة اسمه ديالا ودول كانو سوا في العربية التانية

فهد : طب الدكاترة اللي بيتابعو معاهم مين

موظف الاستقبال : هو دكتور للي بيشرف على حالتهم اسمه دكتور سيف علم الدين هتلاقيه موجود في الدور التالت اول اوضة

فهد : شكرا

يذهب فهد ناحية المصعد ليذهب الي الطبيب المشرف طرق باب غرفة الطبيب ليسمح له الطبيب بالدخول ......
الطبيب : اقدر اساعد حضرتك ازاي

فهد : كنت عايز اسأل عن حالة مجموعة بنات دخلو المستشفى في حادثة من حوالي اسبوع

الطبيب : حضرتك بتتكلم عن انهي حادثة احنا بيجلنا حوادث كتير

فهد : حادثة كان فيها اربع بنات ماتت منهم واحدة اول ما وصلت المستشفى

الطبيب : ايوة ايوة افتكرت بس حضرتك بتسأل ليه

فهد : اصل البنت اللي توفت دي خطيبتي والبنات التلاتة صحابها فكنت محتاج اطمن على حالتهم الصحية

الطبيب : البقية في حياتك ....هو فيه بنتين منهم حالتهم الصحية تعتبر كويسة الاصابات مش خطيرة بس البنت التالتة حالتها خطيرة شوية لانها لما وصلت المستشفى دخلت غيبوبة لان كان عندها ارتجاج ونزيف في المخ لانها اللي كانت بتسوق العربية بس

فهد : طب اقدر اشوفهم

الطبيب : اللي تقدر تشوفها دلوقتي البنت اللي ف غيبوبة انما الباقين مشيو لان حالتهم زي ما قولت لحضرتك كويسة

امام غرفة العناية المركزة التي ترقد بها ديالا يتحدث فهد الي الطبيب ......

فهد : كنت عايز اتكفل بمصريف علاجها كلها واي حاجة تحتاجها انا متكفل بيها

الطبيب : تمام مفيش مشكلة بس تقدر تتابع الموضوع دا مع قسم الحسابات تحت

فهد : ماشي شكرا لحضرتك
End flash back .....

ينهض من امام قبرها وهو شارد الذهن بالفتاة الراقدة بالمشفى

~~~~~~~~~~~~~~~~~~~~~~~~~~
بعد شهرين من الاحداث السابقة في مكان اخر تحديد مكتب زين بالشركة يتحدث مع فارس عن حالة فهد ......

زين : انا قلقان على فهد اوي حالة الاكتئاب اللي هو فيها دي غلك عليه واحنا مش هنفضل واقفين متكتفين بنتفرج عليه وهو بيموت ببطء

فارس : معاك حق انا وفريدة خايفين عليه اوي حتى ماما تعبت بسبب الحالة اللي هو فيها بس هنعمل ايه هو بردو كان بيحبها اوي ربنا يرحمها

زين : يارب ....عايز اتكلم معاك في موضوع تاني بعيد عن موضوع فهد

فارس : خير في حاجه ولا ايه

زين : خير ان شاء الله متقلقش اوي كدا

فارس : طب ايه اتكلم فيه ايه

زين : حاضر متزوقش يا عم بص انا مش عارف ابدأ الموضوع منين بصراحة انا عايز اخطب

فارس بابتسامة : بجد الف مبروك و دي مين اللي امها داعية عليها دي

زين بنظرة احتقار : قوم من هنا يا فارس انا مش هتكلم معاك في حاجه اطلع برا ياض

فارس : خلاص خلاص بهزر قول هي مين بقا يلا

زين بتردد : فريدة

فارس : فريدة مين ...فريدة اختي انت بتستعبط ياض

زين : ليه ان شاء الله فيا حاجة غلط ولا ايه

فارس باستفزاز : لا .... بس اديني وقت افكر

زين : لا والله طب اطلع برا بقى انا غلطان اللي بتكلم مع عيل زيك

فارس : بهزر معاك يا كبير انت بتقفش ليه ...بس مقولتليش اشمعنا فريدة يعني

زين : انت صاحبي يا فارس وانت عارف اني بعتبرك اخويا الصغير وانا مش بحب ابقا مخبي حاجة ابدا و في الموضوع دا انا مش حابب اخبي عليك حاجه وبالذات انها اختك ....بصراحة انا بحبها من زمان اوي من اول يوم دخلت فيه بيتكم وبقينا عيلة واحدة وانا كنت بشوفها وبحاول ابعد فكرة الحب دي عن تفكيري عشان مخسرش حد منكم بس صدقني انا بحبها بجد انا حتى معرفش ايه شعورها ناحيتي وانا محبتش الف وادور و عايز الموضوع يبقا رسمي و كل حاجه تبقا واضحة

فارس : انت عارف غلوتك عندي واني بعتبرك زي فهد بالظبط بس غلوتك دي كبرت اوي عندي بعد كلامك دلوقتي ...انا يا سيدي معنديش مشكلة بس الكلام دا مينفعش هنا ....

زين : قبل ما تكمل كلامك انا عارف هتقول ايه بس انا كنت باخد رأيك لاني بصراحة متردد اوي لاني مش عارف ايه مشاعرها هترفض ولا توافق ....عموما هكلم فهد واشوف هيقول ايه

فارس : بص رأي اجل الموضوع دا شوية عشان موضوع ميرنا و كدا يعني

زين : انا عارف وفاهم ومقدر وانا كنت بفكر ف كدا بردو

فارس : انا بقول كدا بردو

زين : ماشي يا عم اللمض قوم شوف شغلك بقا

فارس باستفزاز : بقى كدا طب انا مش موافق على الجوازة دي

زين : لا فارس دا انت حييبي انت متعرفش كدا ولا ايه

فارس : ايوا كدا ...انا ماشي بقا سلام

زين بغل : غوووووور

فارس من خلف الباب : ايه مسمعتش

زين ببرائة : مع الف سلامة يا حبيبي

~~~~~~~~~~~~~~~~~~~~~~~~~~~
بعد ثلاثة اشهر من الاحداث السابقة .....
تستفيق ديالا من غيبوبتها ولكنها مازالت بالمشفى تحت العناية الطبية ولكن قبل هذا بمدة قصيرة تقابل فهد مع والدة ديالا ......

يتبع .......