رواية انتي ربيع العمر في كل الفصول! الفصل الثاني 2 - بقلم rned 🖤

...

الجزء الثاني من رواية..

" ولا زلت في حبل الغرام اتجود ".

"أنتي ربيع العمر في كل الفصول ".

~

بداية ~.

نزل من الدرج وفي يده ملفات ومستعجل يطلع يلحق على محاضرته الي بتبدأ..

صادف بنت اخوه بعمر "6 سنوات" والي تفاجأت من وجوده وشهقت بفرحه: عمووو هادي!.

ابتسم وقرب منها باس خدها وقال: هلا هلا .. ليه غايبه عن المدرسه؟
جود بهمس : سمعت بابا يقول انه بيطلع مع ماما كوفي.

ضحك بصخب وقال : وانتي غبتي عشان تروحين معاهم؟
جود اومئت بأبتسامة..
ضحك ونكش شعرها بيده ووقف بيطلع ولكن وقفه صوت زوجة اخوه "جواد" : هادي؟ بتروح ماقد اكلت لك شي؟
هادي توقف وشد على يده بهدوء هي الوحيده من بين حريم اخوانه الي ما يتقبلها بعد كل شي صار في الماضي، التفت لها وقال بأبتسامه مجامله: مشكوره انا تأخرت اساساً وبطلع..
ملاك اومئت وهي تعدل حجابها على راسها
وطلع هادي من البيت الي ما يجيه الا نادراً وأغلب وقته في شقته حرك سيارته متوجه للجامعه وهو يقلب جواله بيد وماسك الدركسون بيده الثانيه..

...
ملاك جلست وشالت حجابها وهي تناظر بنتها بنص عين: بابا الحين يصحى وبيعصب عليك لانك ما رحتي للمدرسه!.

جود جلست بجنبها وهي تلعب بأيبادها وقالت : لا بابا يحبني ما بيعصب انتي الي ما تبيني..

ملاك اتسعت عيونها : جود !.. عيب هالكلام انتي بنتي وشلون ما أحبك؟
جود ناظرتها وضيقت عيونها : تبين بابا لك بروحك!.

شهقت ملاك: يا قليلة الادب انا اوريك!!!

سمعت صوت ضحكته وهو ينزل من الدرج ويقول : طيب وهي صادقه ليه تغارين من بنتي الحلوه؟

جود ناظرت امها بنظرات أنتصار وعلى وجهها أبتسامة..
قلبت عيونها ملاك..

جواد قرب وباس خدود جود وجلس بجنب ملاك وهو يطوق اكتافها: ايه وش عندكم من الصباح؟
ملاك: ابد حضرة السنيوره جود متغيبه عن المدرسه وغصب عني بعد!
جواد ناظر جود وقال: وليه غايبه
جود قربت وجلست في حضنه: بابا انت تقول انكم بتطلعون كوفي وانا ابي اطلع معاكم
ضحك جواد وهو يبوس خدودها واعتلت ضحكتها: ااخ ياذي البنت... ابد بتطلعين معانا على هالخشم كم جود عندي؟
ملاك تحنحنت وهي تناظرهم بنص عين: اذا خلصتوا رومانسيتكم المنسيه ذي تعالوا الفطور جاهز من زمان

جواد وقف وهو يشيل جود ويتوجه للمطبخ وملاك سبقتهم وهي تصب لهم شاهي ولجود حليب

وجلسوا على الطاوله كلهم وملاك تقدم الفطور لهم وجلست معهم وبداو يفطرون..

_

"هادي"..

وقف السياره ونزل منها ورفع معصمه وناظر ساعته باقي دقائق قليلة وتبدا المحاضره!..

اتسعت عيونه دخل يركض لداخل المبنى الجامعي بأستعجال واستقبله صديقه "غازي" والي كان واقف ينتظره
غازي بأستعجال: وينك يا رجال باقي دقايق على المحاضرة!!؟
هادي مد يده و سلم عليه بسرعه وبدوا يمشون بخطوات سريعه ومستعجله: يا رجال راحت علي نومه طول الليل سهران على المشروع اليوم عندي اجتماع
مع شركة « لونا ».

غازي وهو يمشي بجنبه : الله يعينك قاعد تتعب عمرك
هادي: حلالي انا واخوي لازم نتعب فيه ونحافظ عليه!.

غازي وهم يدخلون للمحاضره : زين الله يعينك المهم ما تتأثر دراستك الجامعيه
ضحك هادي بخفه وقال: لا تخاف بجيب الفل مارك.

غازي بأبتسامة : ايه ايه واضح تحضر يوم وتتغيب اسبوعين يا فل مارك.
جلسوا بمكانهم وفتح هادي الملفات الي ارسلهم له غازي عن المحاضره السابقه وتوه يفضى يفتحهم يشوفهم ضيق عيونه وهو يقرأ: اوف اوف وش ذا كله؟.

غازي ناظره و سحب الملفات وبدأ يشرح لهادي بأختصار عن بعض النقاط ولكن قطع عليهم دخول الدكتور وقفل غازي الملفات وهو يركز مع الدكتور ألي بدأ المحاضرة.

ومثل كل مره رن جوال هادي بنغمته الصاخبه كالعاده

والتفت الدكتور بعصبيه وقال بحده: هادي جراح

عض هادي لسانه وغمض عيونه ووقف: اعتذر يا دكتور نسيت اقفله!
الدكتور ترك نظارته على الطاوله وقال: كم مره تقول ذي الجمله؟
هادي بأحراج : اعتذر من جد.

الدكتور صر على اسنانه : هادي اطلع من القاعه

هادي فتح عيونه : دكتور قلنا حنا اسف وش فيك؟

الدكتور: هذي ماهي المره الأولى ولا الثانيه ولا الثالثه! الموضوع يتكرر.
هادي: اخر مره واعتذر منك ما بيتكرر بعد اليوم صدقن.

تنهد الدكتور واشر له يجلس..

جلس هادي وهو يناظر غازي وضحك لكن غازي فتح عيونه ينبهه يسكت لأن الدكتور يطالعهم .

الدكتور بنرفزه: هادي!
كتم هادي ضحكته ووقف وقال: وش بعد!.

الدكتور صر اسنانه: اطلع .

وقبل لا يعترض هادي قال الدكتور بحده: اطلع يا هادي..

عض هادي شفته واخذ ملفاته وأشر لغازي بيده وطلع وهو يضحك!!.

والضحك يجيه في مواقف غلط وتسبب له مشاكل..

وقف وناظر المبنى الجامعي و اخذ نفس وقال: اجل خل اروح افطر دامها راحت المحاضره مب حق الركض الي ركضته..

طلع من الجامعه وحرك سيارته ووقف عند كافتيريا واخذ له عصير " طازج و بارد " واخذ له فطور خفيف..

ورجع لسيارته وفتح الباب ودخل أخذ نفس وهو يلبس حزام الأمان ويفتح الأكل وبدأ ياكل بهدوء ويناظر الناس الي تمشي كل واحد رايح لشغله ابتسم بهدوء واخذ نفس عميق وهو يتذكر ..

وين كان ووين صار " ست سنوات" مرت و تغيرت حياته تماماً وكل شي اختلف فيها من الألف الى الياء!.

ساكن في شقه من ثلاث سنوات قريب من بيت اخوه جواد الي مستقر في الرياض هو وزوجته وبنته..

بينما أغلب اخوانه لازالوا في الديرة والبعض منهم ساكن في الرياض..

بمعنى ان كل واحد منهم استقل بحياته الخاصه!.

اخوه فاهد للحين ساكن في ' الديرة ' مع حريمه الثلاث..

أما حمد فزادت مشاكله مع حرمته "جمانه "

فطلقها وبقى مع نور واستقر معها في الرياض وحياته هادئة ومستقره..

وباقي اخوانه كلن معه حياته الخاصه مع حريمه وعياله..

اما هادي لقى نفسه اكثر مع اخوه " جواد " وحس أنه الأقرب الى قلبه وأكثر شخص يفهمه ويفهم طموحاته...
لذالك استقر قريب منه ولشدة اندماج هادي مع جواد في الشغل كانت لهادي غرفه في بيت اخوه جواد

ولكن نادراً ما يروح لها فقط اذا كان عنده شغل مع جواد مهم ..

بالنسبة لحالتهم المادية..

فكان هو وجواد افضل اخوانهم لأنهم استثمروا فلوسهم بطريقه صحيحه جواد مدير مستشفى خاص فيه وكذلك داخل في شراكة مع صقر وهادي وأسسوا شركه وبسرعه كبيرة لاقت شهره سريعه وصار لها فروع في الرياض ومكه..

الفرع الي في الرياض يديره صقر وهادي والي في مكه يديرها أيهم اخو ملاك الي صار يشتغل معهم اما جواد فكان في المستشفى ومع ذلك يساعدهم في الشركه...

عودة للأحداث ~

تحنحن هادي وصحى من شروده وهو يمسح فمه ..

و لم الأكياس الي جنبه
وحرك سيارته لين وصل عند صندوق الزباله "تكرمون" ورماهم وكمل طريقه متوجه للشركه...

بيبدأ شغله فيها مثل كل صباح.

____

كانت جالسه في الصاله وقهوتها معها والتلفزيون شغال
خذت الجهاز وقفلت الصوت وقالت بنرفزه: يا ميران ميييران!
طلعت "العاملة " بسرعه وقالت: حاضر ماما
ام صقر بغيض : نادي لي ذي البثره الي منعفسه فوق خلها تنزل!

ميران وهي تشبك يديها ببعض : انتا يقصد غيداء؟
ام صقر بعصبيه : هو فيه غيرنا بذا البيت؟.
ماغيرنا الثلاث! لو ان صقر تارك عنه الحيه الي معه وسامع شوري وقاعد معنا بذا البيت لكن الله يرحمك يا بو صقر رحت ومابقى لنا احد من بعدك .
ميران ناظرتها بدت في حلطمتها اليومية و تركتها تسولف لأنها اعتادت عليها وراحت لغرفة" غيداء " في الطابق الثاني للبيت و دقت الباب بهدوء وما جاها رد تأففت من ذي الغيداء الي مطلعه عيونهم بنومها واستهتارها..
فتحت الباب ولفحتها برودة الغرفه اقشعر جسدها من البروده ودخلت بتناديها شافتها نايمه بالعكس ورجولها طالعه من اللحاف وشعرها مبعثر ونص بطنها طالع من البجامه ومخدتين تحت راسها وداقتها نومه بعد سهر طويل على المسلسلات.

بدت ميران تهزها على الخفيف: غيداء انسه غيداء!

عفست غيداء وجهها وانقلبت على الجهه الثانيه وما ردت..
ميران بدت تهزها اكثر: انسه غيداء ماما يقول انتِ ينزل الحين.
غيداء تأففت و حكت شعرها وهي مغمضه عيونها وتكلمت بنعاس: ميران اطلعي وقفلي الباب بنام..

ميران: بس ماما يعصب على انت اذا ما ينزل الحين..

غيداء رفعت راسها وفتحت عين وقالت بنبرة بتهديد : ميران اطلعي وقفلي الباب بنام ..

ميران كشرت و أقفت عنها وطلعت وقفلت الباب.
رمت غيداء راسها على المخده وغمضت عيونها ورجعت تنام وهي تحتضن المخدة الثانيه..
نزلت ميران للصالة وقالت: ماما غيداء يقول اطلع واخليها تنام..

ام صقر وقفت بعصبيه وهي تتحلطم وتسب غيداء في داخلها وهي متوجهة للدرج بتطلع لها..

صعدت الدرج بصعوبة وتعب ووصلت للغرفة الي كانت مقابلة لها فتحت الباب بقوة وصفق في الجدار.

وعلى صوته فزت غيداء مرعوبه وقالت بقهر: وشششش ذا يمه في احد يفتح الباب بذي الطريقه؟.

ام صقر بعصبيه: انتي ماعد بك حيا نايمه للساعه عشر؟

فتحت غيداء عيونها: وششش تبيني اسوي؟

ام صقر : انتي ما وراك جامعه؟ ماوراك ام تجلسين معاها؟ ماوراك اغراض تغسلينهم؟ ما وراك غرفه تنظفينها؟
تنهدت غيداء وجلست وقالت: يمه اول شي جامعتي ذي انا ماعندي محاضرات مهمه ثاني شي انتي عندك ميران وجيرانك اقعدي معاهم ثالث شي يا امي الحلوه ميران وش جايبينها تسوي هنا؟ تغسل وتنظف صح ولا؟ رابع شي ابي انااام تكفين اتركي اقتحاماتك ذي! .

ام صقر اتسعت عيونها وهي تشوف شعر غيداء: وششش مسويه بشوشتك انتي؟
رفعت غيداء يدها بسرعه لشعرها وتلعثمت : ااا انا...

ام صقر بعصبيه ضربت رجولها : الله ياخذك من بنت انا كم مره قلت لك لا تقصيينه؟ كم مره قلت لك خليك مثل باقي البنات الي شعورهن تجلس معاهن لاجلسن؟ كممم مره؟

غيداء تأففت : يوووه يمه انا ماارتاح الا اذا كان شعري كذا انتي تعرفيني ما اطيق الشعر الطويل صحيح انه حلو بس اني ما اطيقه يتعبني انا ما ارتاح الا اذا كان شعري كذا!
ام صقر تحسبت عليها وهي تتوجه للستاير وبدت تفتحها وهي متنرفزه من غيداء ومن حياتها..

غيداء بقهر: يعني ما بتتركيني انااام!!
ام صقر: قومي قامت قيامتك ان شاء الله قوومي
غيداء بنرفزه: اووهووو!.

رمت اللحاف ووقفت وهي معصبه وطلعت من الغرفه ببجامتها وام صقر فتحت الدرايش كلها تتهواء الغرفة ونادت على ميران الي جت تركض: هلا ماما
ام صقر: نظفي غرفة ذي الرفلا عساها للي ماني قايله..

تأففت ميران وبدت تشيل اكياس الشبسات والعصاير من الأرض وام صقر طلعت من الغرفه ونزلت للصاله لاحقه غيداء و قالت بعصبيه وهي تشوف غيداء انسدحت على الكنب ونامت: انا وش قلت لك؟؟؟
غيداء شوي وتبكي ضربت الكنب بيدها بقهر: يــــــــمه ابي انااام ما نمت الا ثلاث ساعااات ثلاث ساااعات!!
ام صقر: كله من هالجوااال طول الليل سهرانه عليه والنهار ماتبي تصحى، انتي ما عندك صديقات؟ تطلعين معهم مثل باقي البنات انتي ماعندك اهتمامات بعمرك ولا بلبسك مثل بنات خوالك وبنات الجيران مغيرر نوووم ذبحتيني! شوفي جسمك اصفر ماقد طلعتي للشمس من اسابيع عفنتي بغرفتك
طيرت عيونها وشهقت: يمه وش ذا الكلام وش فيني بسم الله علي.
ام صقر جلست وتأففت: حسبي الله ونعم الوكيل منك بنت حسبي الله بس!.
غيداء خذت نفس عميق وقالت: يمه يا حبيبتي يا عمري انتي وش تبين مني بالضبط؟
ام صقر: ابيك تتسنعين مثل باقي البنات تقومين الصباح تتقهوين معاي تروحين جامعتك ترجعين تتغدين معاي وبعد العصر تقعدين معاي لابسه وكاشخه اشوفك ترد لي الروح
غيداء عوجت فمها: ليه زوجي انتي يمه! .
ام صقر خذت الفناجل ورمته عليها و نطت غيداء وتفادته وهي تضحك: وانا صادقه وش ذي الأمنيات يمه!
ام صقر بعصبيه: يعني غلطت يوم اني ابيك مثل البنات؟
غيداء: يا حبيبتي يا مامي الحلوه وش ناقصني؟
ام صقر: ليه ما تروحين لجامعتك ليه ما تجلسين معاي مثل البشر؟ شوفي ام حمزه جارتنا بنتها ما تفارقها قهوتهم سوى جلستهم سوى يازينهم، وانا بنيتي ماهيب حولي
غيداء تنهدت: ياربي وش اسوووي انا؟! .... زين اسمعيني وش رايك انام الحين ويوم اصحى ابشري ابجلس معاك.
ام صقر ببرود : ما اقول الا الله يكسر جوالك
شهقت غيداء: بسم الله عليه وش دخله
ام صقر ماردت وهي تصب لها قهوه..
غيداء شافت أمها تتقهوى بصمت وتناظر شاشة التلفاز وبسرعة انسحبت وصعدت لغرفتها ركض مستغله سكوت امها ودخلت شافت ميران ترتب الغرفه قالت : ميران اطلعي وقفلي الباب..

نطت على السرير وسحبت لحافها وتغطت فيه وغمضت عيونها تستعد للنوم مره ثانيه..
هزت ميران راسها بيأس وهي تناظر غيداء وطلعت وقفلت الباب وراها ..
_

"هادي "

دخل لشركتهم « شركة J s h »
وابتسم للموظفين وتوجه لمكتبه..

وقفت " سهى " المساعدة لهادي بتفاجأ وأبتسامه: استاذ هادي؟
هادي التفت لها وعقد حواجبه بأستغراب: هلا!
سهى بأبتسامه: لا بس تفاجأة حسبتك ما بتجي اليوم لأن عندك محاضرة! .
هادي زادت عقدة حواجبه وقال: وانتي وش عرفك عن جدولي؟
سهى تلعثمت: اء. لا بس سمعت الموظفين.
اومئ هادي ببرود ودخل لمكتبه وسكر الباب
جلست سهى على كرسيها وضربت جبينها: غبيه غبيه في كل مره تفشلين عمرك وهو ما درى عن هوى دارك
عدلت شعرها ورفعت الجوال تشوف مكياجها اذا للحين ضابط!
ابتسمت بخفه وهي تطلع الروج من الدرج وتعدله وأبتسمت بدلع وهي تتذكره وبدت تقلب الملفات بأبتسامه عضت شفتها بأبتسامه وهي تشوف ان مع هادي اجتماع بعد ثلاث ساعات فرصه بتستغلها وتدخل وقفت وهي تعدل لبسها واخذت الملفات ودقت الباب بهدوء.
هادي وهو يكتب في اللاب: ادخل.
فتحت الباب ودخلت: استاذ هادي.. في عندك اجتماع بعد ثلاث ساعات مع شركة" لونا "
اومئ هادي وهو مشغول يكتب: اي عندي خبر
سهى اومئت وهي تنتظره يرفع راسه يناظرها لكنه مشغول قالت: ااء.. طيب تبي شي؟
هادي هز راسه: لا شكراً ارجعي لشغلك
اومئت وطلعت سكرت الباب وجلست على مكتبها وتأففت وبدت تلعب بشعرها وهي تناظره من الزجاج الي أمامها...

_
سهى
بنت حلوه وأنيقة وتهتم بشكلها وبالموضه عمرها 24 مخلصه جامعتها اكبر من هادي بثلاث سنوات لكن مو مبين عليها ابداً والي يشوفها يعطيها 20 سنه عينها على هادي وتنجذب له .. وتهتم بأدق تفاصيله.

_

دخل صقر وقال: آنسه سهى خلي "عامر" يجيب القهوه لمكتب هادي اذا مر من هنا لاني عند هادي
اومئت سهى: حاضر استاذ صقر
دخل صقر لمكتب هادي بأبتسامه: صبحه بالخير
هادي رفع راسه بأبتسامه: صبحه بالنور
جلس صقر وقال: ها بشر جهزت للمشروع
قفل اللاب توب وناظره: اي سهران عليه طول الليل لا تخاف
صقر: و ما عندك جامعه اليوم؟
هادي ابتسم: عندي ولكن كالعاده انطردت من المحاضرة
ضحك صقر وقال: ما تترك عنك الطفاقه يا هادي ماني راحم الا خويك غازي
هادي ضحك: خلك مني الحين علمني شركة " لونا " من بيجي منها للأجتماع؟
دخل "عامر" بالقهوه ومدها لهادي وصقر.
صقر: مشكور... اتوقع صاحب الشركه نفسها لأن المشروع مهم ويبي له دراسه..
اومئ هادي: ولا يهمك ان شاء الله يقبل لان لو نجح المشروع هذا بيكون مردوده على الشركه كبير وبنحاول بكل الطرق ما نخسره لأنه مرتبط بمستقبل الشركة..

صقر اومئ: إن شاء الله انت دامك دارس الموضوع بشكل زين فأكيد بننجح وانت حاول انك تتساهل في البداية بالأسهم عشان يقبلون وفي نفس الوقت لا توضح لهم اننا نحتاجهم..

هادي: ابشر
قطع حديثهم صوت جوال صقر ومد يده لجيبه وطلعه وابتسم بهدوء وقال : هذي الوالده
فتح الخط ورد: هلا يمه ارحبي
ام صقر: السلام عليكم
صقر: وعليكم السلام ورحمة الله كيف حالك يمه عساك طيبه؟
ام صقر تنهدت: الحمدلله بخير وانت كيف حالك وكيف زوجتك
صقر: الحمدلله احنا بخير انتي علامه صوتك عسى ما شر
ام صقر بعصبيه مفاجأة: هو فيه غيرها ام شوشه هبلت فيني عسى الله يكفيني شرها
ضحك صقر وقال: وش مسويه بعد
ام صقر: قاصه شوشتها لين تحت كتوفها وداقتها نومه لين الحين ولاهي مهتمه لا بجامعه ولا بعمرها جننتني يا صقر جننتني شف لك حل معها اتعبتني
صقر ضحك: يمه يا حبيبتي وش لك بشوشتها خليها تقصها على كيفها وموضوع الجامعه انا اكلمها عنه

كان هادي يكتب في اللاب وباله مع صقر ويسمع لكلامه ومتأكد ان الموضوع يخصها...
ام صقر: زين كلمها ترى باقي لي شوي وانجلط من وراها
صقر: ولا يهمك ابشري ادق عليها الحين
ام صقر تنهدت: وانت ما ودك تجيني ولا للحين ورى كلام حيتك
صقر ميل فمه: يمه وش فيك عليها والله اني مشغول في الشركه ولا في المستشفى مالها دخل حتى هي ما جلست معها وما ارجع البيت الا الليل!
ام صقر: اجل وراها ما تجي تعيش معنا في بيتنا البيت كبير وما فيه الا انا واختك!
تنهد صقر: يمه الحرمه تبي تاخذ راحتها في بيتها
ام صقر بعصبيه: ليه وش بنقعد بغرفتها ولا بندخل عليكم
صقر عض لسانه وهو يحاول يقصر الصوت : يمه انا مشغول الحين وش رايك ادق عليك بعدين ولا اقول لك بمرك على الغداء واتغداء عندكم واشوف موضوع الجامعه
ام صقر تهز رجلها: زين أستودعتك الله!
قفلت الخط وقالت: قال تاخذ راحتها قال والله لو ان البيت مليان ورعان.
صقر ابتسم لهادي: اجل انا بروح اخذ لي كم ملف اخلصهم وطالع وانت الله يعينك وبالتوفيق في الأجتماع
هادي: جميع ان شاء الله.

وقف صقر واخذ قهوته وطلع من مكتب هادي متوجه لمكتبه
بينما هادي رجع ضهره على الكرسي وتنهد مد يده للدرج وفتحه ناظر اللاب الي فيه ابتسم بخفه وهو يمرر يده عليه سحبه وطلعه من الدرج وخلاه على الطاوله فتحه وهو يدخل على الملفات ابتسم وهو يدخل على الصورة الوحيدة الموجودة فيه تأملها لثواني وعلى وجهه ابتسامه خفيفه للان يتخيلها بنفس هذا الشكل هو تغير وكبر لكنه ما قدر يتخيل كيف صارت هي كيف كبرت للان في مخيلته البنت الصغيره بعمر الـ15 البنت المغامرة والجريئه، الى الآن محتفظ في الجوال واللاب الي منها يتذكر جملتها يوم قالت له " اذا صار عندك رقم دق علي"..
صار عنده رقم قبل ست سنوات لكنه تردد وتوتر وانتظر سنتين وهو في توتر ويوم تجرأ ودق كان الخط مُغلق وعرف انها اكيد غيرت رقمها..
سند راسه على الكرسي وهو يغمض عيونه ويتذكر مغامراتهم ضحك لا إرادي وهو يقول: الواضح انك للحين على نفس الطبع ما تغيرتي دام امك تشتكيك...

نفض افكاره ودخّل اللاب للدرج ورجع للابتوبه الخاص بالشغل وهو يكمل شغله ..

مستعد لمقابلة شركة " لونا " لأن الأجتماع هذا مهم بالنسبة لشركتهم وبيفيدها كثير وهادي بذل قصارى جهده لجل ينجح الجتماع ويتفقون مع شركة ' لونا '

_

في شركة " فيّان ".

كان جالس على مكتبة الي يضم صفته بالخط العريض

~ المدير ~

يقلب في الأوراق الي حوله ببرود تام ويقرأ اسم شركته الي صارت من اكبر الشركات في المملكة.

" تصدير واستيراد عالمي" شركته الي تعب سنين لين طلعها وعانا كثير لين وصل للي وصل له..
تحدى كل الظروف الي صابته في الماضي وأصابت عائلته وأسس نفسه في عالم التجارة وأصبح رجل أعمال كبير جداً ولكن بأسم غير أسمه الحقيقي !.
بلقب ليس لقبه الحقيقي !.
بأسم مصطنع « فيّان!» ..

هذا هو الأسم الي اختاره واطلقه على عمره وعلى شركته..

تصفح بعض المواقع المهتمة بالتجارة والأسهم وهو يشوف اسم شركته متصدره ومن بعدها

شركة " J s h "

ابتسم بسخرية وهو يعرف اصحاب هذه الشركه حق المعرفة " عيال جراح آل فارع " هادي وجواد..

تنهد وهو يغلق الصفحات ويسند ضهره على الخلف ويلف للجدار الزجاجي المطل على مباني الرياض الشاهقة...

سمع الباب وسمح لهم بالدخول بصوت بارد خالي من أي مشاعر صوت عرفه الموظفين جميعاً وأطلقوا عليه
صوت الجليد!
دائماً ما يأتيهم بكل برود ويسطر الأوامر فقط..

دخل السكيورتي « وائل » ببدلته الرسمية بلونها الأسود وقال: استاذ فيّان في مجموعة أوراق لازم تشوفها..

لف الكرسي بهدوء وناظر وائل وقال: اتركها قدامي..

وائل ناظر وجه المدير الي يغطيه «كمامة سوداء » دائماً يلبسها يخفي وجهه عن الجميع..

ترك الأوراق أمام المدير وطلع وائل وهو يجلس على مكتبه القريب من مكتب - فيّان -.

أخذ المدير الورق وبدأ يقرأها وما يستغرق عنده قرائتها سوى دقيقة وثلاثون ثانية!..

وسرعان ما احتدت ملامحة وشد على يده بعصبية وقال: وائـــــــل!.

فز وائل بسرعه ودخل للمكتب: سَم طال عمرك!.

فيّان بعصبيه: هالاجتماع يتكنسل تفهم؟

وائل بهدوء : ابشر.

فيّان: تتصل الحين على شركة " لونا " وتتعاقد معاهم بالمبلغ الي يبونه تصرف سوي الي تبي المهم تنلغي اتفاقيتهم مع شركة.. J s h..

وائل: ابشر...

فيّان ارتخت أعصابة وقال ببرود: واثق فيك.
وائل بأحترام: ان شاء الله اني قد الثقه..

اومئ فيّان براسه وطلع وائل من المكتب متوجه لمكتبة بيسوي المستحيل لجل يمنع اجتماع شركة لونا مع شركة جي اس اتش.

رفع فيّان جواله وهو يسوي كم مكالمة من عنده..

_____

_ ديرة هزاع _

كانت العنود جالسه على الأرض بجنب دولاب الملابس
ترتب ملابس ابنها " جواد الصغير " بعد ما غسلتهم وعطرتهم وهي تدندن بأنسجام وتنتظر الوقت يمر عشان تروح لمدرسته تطلعه..

وقفت وهي تتوجه للمراية بتصميمها الطفولي
" سوبر مان " وابتسمت بلطف وهي ترتب عطوراته المخصصة للأطفال برائحة الورد والكرز..

خذت وحده من العلب الصغيره وفتحتها شافت فيها مختلف أنواع الخواتم والي دائماً ما يشتريهم جواد كل ما زار أبوه " فاهد "..

كانت تستغرب من هالعادة الي في جواد الصغير ليه يشتري خاتم كل ما زار ابوه!.

أكملت ترتيب الغرفة والملابس لين سمعت صوت مسج وصلها تنهدت وهي تعرف المسج من مين لأن هذا الوقت هو وقته هذا الوقت الي خصصه فاهد من خمس سنوات يرسل لها فيه من وقت ما صار عنده جوال!.

ناظرت جوالها الي على الأرض بهدوء وحيرة ما تدري وش تتصرف معه !.

سبع سنوات رافض انه يطلقها وهي رافضة انها ترجع له!

وهو الى اليوم يرسل لها كل شي في حياته وأبسط تفاصيل يومه!!

كم مره حظرت رقمه وكم مره غيرت رقمها الا انها تنصدم انه يرسل لها في نفس الوقت ويوصل لها كل مره الساعة 10 صباحاً الساعة الي انكشفت اوراقه فيها والساعة الي جته للسجن!.
الساعة العاشرة صارت رمزهم..

التقطت جوالها من على الأرض وفتحت الرساله بدون ما ترد كالمعتاد لقت مضمونها
( صباحاً زاد فيه خافقي بالولع!
صباحاً فيه قلبي يدمي شوقاً ولهفتةً
اما حان وقتٌ للقاء؟ ).

قلبت عيونها وقفلت جوالها وهي تجلس على سرير جواد عضت شفتها من الداخل تمنع اهتزازها وضعفها تمنع رغبتها في البكاء.

رفعت يدها لشعرها تحركه بهدوء وهي تاخذ نفس عميق وترفع رأسها تحاول تستعيد تركيزها وتكمل شغلها قبل يرجع أبنها من مدرسته وقتها بتترك كل شي وتقعد معه قلبها متعلق فيه بشكل مُبالغ!.

وقفت مره ثانيه وهي تطلع من غرفته وتروح لغرفتها تخلص ترتيب كم غرض وبعدها بتنزل لزوجة اخوها تساعدها في المطبخ..

كانت العنود طيلة السنين هذي تعيش مع أبوها وأمها واخوها الي تزوج وصار عنده بنت وولد بعمر ثلاث سنوات..

وحياتها هادئة مع ولدها الي يروح كل خميس و جمعة وسبت لبيت أبوه في ديرتهم..

وبعدها يرجع لأمه وكان متعلق في ابوه بشكل كبير ويحبه ودايم يسولف عنه ودائماً يتسائل بتساؤل طفولي ليه امه وابوه مو مع بعض!.
ودائماً تتهرب العنود من انها ترد عليه لكن الشي الي ماكانت تدري عنه ان فاهد في كل مره يزوره ولده يسولف عليه عن حبه للعنود وانه يبيها ترجع له ودايم يوصي جواد انه يقنعها ولا يعلمها ان فاهد الي قال..

!!

_____

" غيداء "

تأففت من صوت جوالها الي يرن وازعجها رفعت الجوال وهي مغمضه وردت: نعم..

: السلام عليكم... لا تصدميني وتقولين للحين نايمه تكفين!!.

غيداء تثاوبت وقالت بنعاس: وعليكم السلام نايمه، انتي وش عندك؟
قالت المتصله بزعل : غيداء تخيلي حمدان منعني من الجامعه!

تأففت غيداء وقالت: فَي ابفهم متى بس تخلص افلامك انتي وولد عمك ذا!..

فَي بغصه: مدري مدري صرت اكره عمري بسببه متحكم بكل حياتي والمشكله جدي وجدتي راضين له وكل كلامه أوامر!.

غيداء تأففت وعدلت جلستها وهي ترفع شعرها بيدها: فَي قولي له ترى هبّة قديمه ان ولد العم يتحكم ببنت عمه ويصير سوبر مان على راسها!!.

فَي بقهر: ياليت بس يموت وافتك منه عاطل باطل ويبي يتحكم فيني بعد ويمنعني من دراستي واصير مثله..

غيداء سندت ضهرها على المخدات وقالت: لا عاد ما توصل للموت والله انه مسكين وضحى بكثير من وقته وتمرمط عشان يجمع كم ريال تدخلين فيهم للجامعه...

فَي: انا ادري انه يتعب ويشتغل عشاني وعشان جدي وجدتي بس بنفس الوقت ماله حق أبداً انه يتحكم فيني الله يرحم امي وابوي لو كانوا عايشين ما كنت اتعب كذا..

غيداء: الله يرحمهم الحين علميني ليه منعك من الجامعه وش مهببه؟

فَي سكتت شوي ثم قالت: ما هببت شي
غيداء غمضت عيونها وقالت وهي تحاول تمسك نفسها ما تعصب: علمتيه عن المشكله الي صارت؟

فَي عضت شفتها وسكتت.

صرخت غيداء بقهر وقالت: انتي متى يصير عندك خصوصيه متى!!!

فَي بفشله: غيداء خير لا تصارخين علي بعدين انا ما علمته علمت جدتي وهي علمته تدرين ما اقعد معه ولا اكشف وجهي عليه شلون بعلمه؟!!.

غيداء بعصبية: علمتيه ولا علمتي جدتك كله واحد!.
ليه تعلمينهم من الأساس!!

فَي بأحراج: كنت قاعده مع جدتي و..
غيداء بمقاطعة: وما كان عندك اي موضوع فبديتي تكبين كل اسرارك بين يديها !.

فَي عضت شفتها بأحراج وقالت: بالضبط..

غيداء شدت شعرها بقهر وقالت: وجدتك بطبعها الي يقدس شي اسمه حمدان وما يخبي عنه شي راحت وعلمته عن خبالك، ومحور الكون اصدر قرار انه ممنوع انتي تروحين للجامعه؟!.

فَي بزعل: غيداء خلاص شسوي عاد زلقت مني الكلمه الحين علميني شسوي عندي محاضرات!.

غيداء تأففت من فهاوة صديقتها وقالت: الساعه كم محاضرتك؟
فَي: تبدأ 11.
غيداء بنرفزه: تجهزي بخلي السواق يجيبني لك واخذك للجامعه ولد عمك ما بيدري تلقينه بين زيوت السيارات وقطع الغيار..

فَي بفرحه: يا حبي لك ياغدو طيب استعجلي جداني صار وقت القيلوله بينامون الحين..

غيداء وقفت وهي متنرفزه من نومها المتقطع وسكرت الخط في وجه فَي الي صارت متعوده ويمونون على بعض..

دخلت غيداء للحمام " وانتو بكرامة ".

وغسلت وجهها ورفعت شعرها كله لفوق وطلعت للغرفه
توجهت للمرايه رتبت شعرها..
وبدت بروتينها اليومي البسيط لبشرتها وتوجهت تاخذ عباتها ولبست نقابها بأستعجال وسحبت شنطتها اليد بسرعه وطلعت من الغرفه وفي يدها جوالها

نزلت للصاله وما شافت احد بسرعه طلعت تركض قبل تسوي لها امها مشكله ودقت على السواق يطلع يوديها وماهي الا خمس دقايق وطلعت من البيت مع السواق لبيت " فَي ".

__
تجهزت فَي وخذت اغراضها وطلعت من الغرفه بهدوء قبل تنتبه جدتها وتعلم حمدان الي بيسبب لها مشاكل كبيرة لو عرف انها كسرت كلمته.

طلعت من البيت ووقفت تنتظر غيداء تمر عليها

وماهي الا دقايق ووصلت غيداء للحي الي هم فيه وللبيت الصغير الي واضح عليه التواضع بسبب حالتهم الماديه..

انتبهت عليها فَي وبسرعة راحت لها وحرك السواق متوجه للجامعة..

( فَي ..
بنت في 20 من عمرها بنت دلوعه بشكل كبير ومبالغ فيه وعلى نياتها، يوم كان عمره 13 سنه صارت قصه طويله في الماضي لعائلتهم المكونة من ( جدها وجدتها وثلاث من عماتها وأبوها وعمها) خلال هذي القصه توفوا كل عائلتها وما تبقى الا هي وجدها وجدتها وولد عمها حمدان الي كان بعمر 15 والآن أصبح بعمر 22 سنه!..
مرض جدها وتعب وصابته جلطه من بعد الي صار في عياله وحريمهم وبناته! ..

وتولّى حمدان المسؤولية في عمر صغير وعانا كثير لجل يعيشون ولجل يعالج جده وتحمل مسؤلية فَي الي كانت جداً متعبه في صغرها ومتطلباتها كثير إلا ان حمدان ضحى كثير وعانا كثير لجل يعيش وإلى الآن يشتغل في كل حرفه وصنعه وحالياً في ورشة سيارات يشتغل..

لكن الجانب الخفي من حمدان انه مصاب بداء
" الحب الأستحواذي"!

مُتيم ومغرم في " فَي " بنت عمه ومتسلط عليها ومتحكم في كل شي يخصها بأسم انه مسؤل عنها! .

وكلمته هي الي تمشي في البيت وجده تاركه هو الي يتصرف..

فَي..

كانت برغم انهم عايشين مع بعضهم إلا أنها كانت متغطيه عنه وما تكشف عليه ودائماً تكون في غرفتها اذا كان في البيت واذا طلع من البيت طلعت لجدتها وجدها والقرارات دائماً توصلها منه عبر جدتها الي ما تخفي شي أبداً عن حمدان...

تعرفت فَي على غيداء في المدرسه خلال دراستهم الثانويه وصاروا اعز صديقات برغم اختلاف شخصياتهم
ودخلوا الجامعه ولازالوا مع بعضهم برغم اختلاف تخصصاتهم..
ودلع فَي الغير محبب لغيداء الا انهم اعز صديقات ويتحملون بعض..

___
وصلت غيداء و فَي للجامعه ونزلت فَي بسرعه وهي تركض متوجهة للمحاضره ونزلت غيداء تمشي ببطئ بتروح تاخذ لها قهوه لين تخلص فَي محاضرتها وترجعها للبيت قبل يرجع حمدان للبيت..

__

في أحدى ورشات السيارات..

كان جالس على الأرض وساند ضهره على الجدار وملابسه كلها " زيت اسود " وسرحان بتفكيره
والأرهاق واضح عليه سمع صوت الرجال المسؤول عن العمل والي وصاه صاحب احدى الشركات الكبار على انه يهتم في حمدان لشي مجهول! : حمدان؟ توّك تجي؟

رفع حمدان راسه وتنهد بتعب: اي والله كنت مشغول بس لا تخاف خلصت شغلي والفرامل صار جاهز..

رائد ضحك بخفه وقال : واضح من ملابسك انك خلصت الشغل بسرعه..

ابتسم حمدان بخفه ونزل نظره لملابسه.

قال رائد وهو يناظر الورشه ككل: مافي الا ذي السياره؟

حمدان وقف بأرهاق: ما في الا هي.

رائد لاحظ تعبه وقال: رح وانا ابوك للبيت شكلك تعبان!.

حمدان فرك جبينه: اي والله تعبان بس يمكن يجي سياره ولا شي.

رائد: ماعليك بخلي واحد من العمال يمسك مكانك انت ارجع للبيت وريح وتعال في الليل.

اومئ حمدان بالموافقة وراح بيغير ملابسه ويلبس ثوبه ويرجع للبيت يرتاح..

اما رائد تنهد وهو ما يطيق حمدان أبداً ولولا توصية رجل الأعمال بأنه يهتم فيه ما كان خلاه يشتغل معه..

_____

طلع حمدان وهو يركب سيارته الأقل من عاديه
وناظر يديه لثواني وتنهد وهو يشوف اثر الزيت لازال عليهم وحرك سيارته وهو يطلع جواله يشوف الرساله من فَي متطلبات البيت المعتاده والي كانت مرسلتها الصبح..

نزل جواله ودخل يده لجيبه يشوف كم معه فلوس
وكمل طريقه متوجه لسوبر ماركت ياخذ كم غرض ناقصين البيت..

وقف سيارته بعد وقت قصير ونزل للسوبر ماركت
دخل وتوجه ياخذ الأغراض الي مكتوبين في الرساله.

توقف عند اخر حاجه كتبتها فَي وابتسم بخفه وهو يشوف انها طالبه « أندومي وكم نوع من الشبسات»

مشى بخطوات هادئه ياخذ الي طلبتهم وراح للمحاسب يحاسب عليهم وطلع من السوبر ماركت راجع لسيارته

فتحها وترك الأغراض بجنبه وحرك السياره راجع للبيت
مرهق وتعبان من الشغل..

____

يتبع..

مافي جدول معين بترك التنزيل عشوائي عشان اترك لنفسي المجال اني اخذ راحتي في الكتابة بدون ضغط.

( لا تنسون ⭐ ) .