رواية #انتي سيوف الثأر في اجفاني الفصل الخامس وأربعون 45 - بقلم الكاتبه سمو العراق

تكملة البارت السادس من الجزء الثاني
رواية..انتي سيوف الثأر في اجفاني
بقلمي..سمو العراق

💔💔💔💔💔💔💔💔

ابتسمت عليه بحزن..جدتي لازمه الباب وتريد نيشان واني متوتره وخايفه وعلي جان اسلوبه حلوو....

تقرب مني ولزمني من خصري وعيونه تتاملني..

دمعت من خجلي وريقي جف..احس اطرافي جمدت بالحضات اتذكر غيس ولعانته ويايه واتذكر ضربه اليه وانه جنت ضعيفه لا حول ولا قوة...

حسيته نزلني علئ السرير واني صدري يرتفع وينزل من الخووف...

حسيت بغثيان ما اكدر اخلي يتغرب مني اخااف ضلت شفايفي ترجف...

وهو ضل يوزع قبلاته على خدي...

احسه غيس النايم ويايه مو علي انه بعدني ما متعوده على علي وجدتي لزكت ماتروح اله نيشان..

حسيت روحي طلعت من غربه..« قربه »

دفعته بثنين اديه وصرخت بخوف وانه الملم بملابسي عليه...

كتله بنهيار..عوووفني ماااريدكك ماااريدد يممممه تعالي مااريييييده

ضليت انحب وابجي بصوت عالي وهو تخبل لزمني من اديه حيييل گال بااستغراب...لا ترديني لج انتي شنو سالفتج راح تخبليني كل ما اوصل بقربج تنهارين انتي عندج واحد

همست بخوف ورجفه...لا لا والله وروح اهلي

علي بعصبيه...لعد شبيج:؟

سحر بشهكه..مااريد انه حتى بعد مامتعوده عليك ولا اعرفنك اكييد صعبه عليه...

مسح علئ شواربه بعصبيه وحسيته يهدئ بنفسه كال...يالله نصبر ماعندي شئ بس اخاف يا سحر تطلعين غيير شئ لو بالج واحد

وحق الله اذا طلعت شكوكي صح وحق الله ماارحمج

سكتت بس احس عيوني غوشت...

هو كال... سحر هاي جدتج راضعه ويه ابليس وبما ان انتي متقبلين لازمنه نيشان مزيف بس جدتج شلون تعبر عليها....

سحر ببراءه...جااا شسوي

علي بحيره..شمدريني

بعدين راح يدور بالجرارات علئ شئ حااد شوويه واجه كعد يمي

لزم المقراضه مالت الاضافر..واخذ المبرد الموجود بالمقراضه ورفع رجله وسرفن طرف التراك طلع رجله..

ولزم طرف المبرد وقربه من رجله...

اني تقربت عليه وضليت اباوع عليه بخووف...

هو جرح رجله بصعوبه رغم المبرد جديد وحاد واني غمضت عيوني حييل..

رجعت فتحت عيوني وهو حط القطعه البيضه علئ رجله ولوثها بالدم واني صافنه عليه بذهوول

هو سوه حركه كمزني من مكاني نفخ بوجهي..بوووووه.

كمزت وحطيت ايدي على صدري وابجي هو حضني وضحك بصوت عالي...

كال بحنان...لهلدرجه تخافين

هزيت راسي بلا...

همس بهدوء..سحر حاولي تبينين انتي تعبانه لان جدتج اعوذ بالله منها يمكن اخت ابليس برضاعه

بلعت ريقي...جااا ليش تأخذ قيبتها..« غيبتها »

علي..والله جدتج قيبتها حلال علئ گولتج..ولج هاي جدتج نزلوو بيه فتوئ الياخذ غيبتها يدخل الجنه

ضحكت بهدوء...ههههههه منهو نزل هاي الفتوئ

علي...شيخ صديق خالي خالد...

رفعت اصبعي وكاني فرحانه بااجابتي...ابو لهب

علي احتضني وهو يضحك ...عفيه شاطره

اختفت ابتسامتي من حضني علي حيل حباب ميستاهل وحده مثلي عدها سوابق..

مانسمع غير دگت الباب..

جدتي صاحت...خااب شنهي اخرتوني...

علي تافئف...استغفر الله هسه رجلها والگبر غير تكعد

انه صح جدتي قاسيه بس ما ارضئ علي يقلط عليها مهما يكون هي مره جبيره وملتزمه بعاداتها وتغاليدها

راح فتح الباب وانطاهم الوصله وهنه ضلن يركصن ويهلهل عبالك محرر الموصل...

جدتي دخلت عليه وتباشير الفرح علئ وجهها...

كالت وهي تضربنه..عفيه عليج سحير مانزلتي راسي وطلعي بت همزين غيس ما واصلج

سحبت نفس عميق وزفرته...لو تدري بيه لحد الان كولشي ماكوو يمكن تجنزني...

دخلت عمتي والبنات وضلن يباركن الي...ويبوسن بيه

واني ارد ببتسامه ومجامله...

وبعدها جدتي لمت ملابسها وراحت للكوت...

............................  

ثاني..يوم صادف جمعه لان سحر تزوجت اربعاء علئ خميس...

كعدت الصبح من النوم لابسع تراك خفيف ولافه شعري ليفوك...غسلت وجهي وطلعت من غرفتي

شفت امي كاعده علئ القنفه ولامه رجليها علئ صدرها وتبجي بصمت

تنهدت وجريت نفس رحت كعدت يمها وحضنتها

هي انتبهت عليه وزادت بالبجي

بستها بخدها وهمست...ماما شبيج علئ كيفج والله اصلا اني ممتغيره اكيد مابيه مرض خبيث لو متغيرة جان اني هماتين خفت..

باوعت عليه كالت وهي تمسح دموعها ..يا ما متغيره اشوو وجهج اصفر وشعرج ديتساقط

باوعتلها بنظرة بريئه...اي حاله نفسيه اكيد يتساقط شعري واذبل

حضنتني وبجت...

طلع بابا من غرفته وهو ينشف بوجه بالمنشفه...

كال..صباح الخير

ماما همست...منين يجي الخير ودانيا مااعرف شبيها

بابا جاوبها...حجزت الها السبت ان شاء لله ...والله الي يكولي دانيا مابيه شئ والله انطي بيتي...

ماما بجت كلتلها...والله لو اعرف انطي روحي وكل املاكي واكعد بالشارع بس دنوو مابيه شئ انطي

كلها..الله كريم

اني تلقائيا دمعت من كلامهم خله اثر بنفسي كوولش قووي ومعزتي ما نكروها شكد احبهم همه وطني ربي يحفظهم واكدر اسعدهم ولوو اني لحد الان ممسويه شئ يرفع راسهم بي

كله من وره ابو الشوارع دمر مستقبلي واستوطن احلامي واحتل تفكيري...

صهيوني..احتلني احتلال وماكوو فرج منه...

منين اجيب شعلان ابو الجون يحاربه...

انتبهت علئ صوت ماما...دوونه حبيبتي نروح اني وياج لخاله ام مصعب همه شويه تغيرين جوو ويه البنات..

ابتسمت ابتسامه صفره..بكيفج

كال بابا...حضروو روحكم حتئ اوصلكم...

ماما راحت تحظر نفسها واني هماتين عشر دقايق وخلصنه...

وبابا هماتين بسرعه بدل ورحنه

مسافة الطريق وصلنه البيت خاله بابا مقبل يدخل..

احنه دگينه الباب وبابا راح...

فتحت خاله الباب ابتسمت بصدمه وفرح من شافتنه ممصدگه جاين الهم وخاصة اليوم جمعه والكل كاعد..

باوست ماما وباوستني...

دخلنه لكيناهم هسه ديتريگون..

عبله كاعده علئ الكرسي ودتاكل كدامها الطاوله مالت الطعام بالصاله وتراسل...

وسلسبيل هماتين دتتريك...ومصعب مقابيلهم

من شافنه البنات فزن فرحات...

عبله ...يااااااي خالتوو ودنوو والله ممصدكه

مصعب ابتسم وحط ايده على الكرسي...

سلسبيل كامت سلمت علينه...

سلمنه عليهم وكعدنه...

ماما اول مكعدت بجت وخاله استغربت

كلتله بااستغراب...خييير ام رانيا شكوو صاير شئ

ماما سحبت شهكاتها بحزن واطلقت العنان لدموعها...اي مصيبه وطاحت علئ راسي

خاله بخووف...خييير شكو

ماما بجت...دنوو احتمال بيها مرض خبيث بصدرها

خاله لطمت صدرها...يمممه اعووذ بالله انتي شد دكولين

سلسبيل..لا هو شك مبدئي ان شاء لله ماكوو شئ لا تخافون

ام مصعب بعصبية..يعني انتي تدرين وساكته

ماما كالت بعتب...اي ثنينهن ساكتت منتضرات الفرج شوكت يجي

مصعب كعد يمنه بتوتر واضح عليه ...دااانيه معقوله ومتحجين والله ان شاء لله اخذج الاحسن دكتور

جاوبته بشكر...تسلم مصعب بس،بابا حياخذني وان شاء لله خيير

مصعب..ان شاء لله والله يا دانيه اوكف الج وكفة زلم وادللي وان شاء لله ما بيج الا عافيه

ابتسمت بحزن...تسلم مصعب مقصرت...

خاله كالت..دنوو حبيبتي تعالي بالله يمي خلي اشوف صدرج

خجلت حيل من كلامها كدام مصعب وهو خطيه حس بسرعه راح الغرفته...

تقربت من خاله هي دخلت ايدها بصدري ...التمست العقده

ماما جانت مترقبه بخووف...هااا ام مصعب شفتيها

خاله ام مصعب بلعت ريقها..اي ام رانيا موجوده كتله وضاهره...

ماما لطمت علئ وجهها...صخام بوجهي عزه العزاني يممه بنيتي المسكينه يمه الصغيره سوده بوجهي المرض لامج يا ضناي...

حضنته ونمت بحضنها وبجيت...ضلت تمسح علئ شعري وتبجي وخاله وبناتها يسكتون بيها...

سلسبيل...والله خاله لتخافين الدكتور كال ان شاء لله حميدة مو خبيثه...

ماما كالت..ان شاء لله والله خروف الوجه الله وتعالئ بس كون الله يبشرني بيها...

ضلينه كاعدين يم خاله وكدرن يطلعن ماما من جوو الكابه الي هي بي...

بس ماما كل شويه ترجع النفس الموضوع...

بعدين رحنه لغرفة البنات...

سلسبيل ضلت تسولف ويايه...

وعبله ملتهيه بحبيبها...

سلسبيل صاحت عليها خاله وراحت تساعدها بالغداء

وعبله اجت كعدت يمي

كالت..اذا اكولج هسه فد شغله متصدكين

كلتلها..شنوو؟

كالت..ميسر حيدفع قسط الجامعه يييييييياي

فتحت عيوني مصدومه...انتي شددكولين لج قسط جامعتيج اكثر من مليونين شنوو غايته يدفع هيج مبلغ

كالت بغرور...يحبني

كلتلها...حبته حيه ام رأسين منين يجيب الفلوس هذا مكسر

كالت..لج بابا بالدووله تعرفين شنو بالدوله

كلتلها...هاااا حرامي بالدووله افتهمت حبي

كالت بعصبية...لج لا تحجين علئ ميسر اصلا نزيه

كلتلها...اي مبينه النزاهه واكعه من جيوبه...

كالت...انتي ليش تكرهينه والله هو يحبج ودائما يسأل عنج ويكول سلميلي علئ دنوو ونطيني رقمها حتئ أسأل عنها...دانيا اختي واعز من اخواتي

جاوبتها ...لا بالله خاف ميرضئ مكسر كوليله لعبها علئ غير دنوو ترئ تربية الصهيوني علمني علئ اصول الحقاره كولها...لذالك ليحاول يوكعني

كالت..عزاا بعينج شيوكعج هو حبيبي تعرفين شنو حبيبي

كلتلها..حبتكم حيه شعليه بيكم

تركتها وطلعت...

صاحت عليه بااستفزاز...تغارين لان تزوجتي زواج فاشل وزوجج مامعترف بيج

حييييل قهرتني من حجت هيييج بس ماعرفت ارد عليها تمنيت ارد عليها بكلمه تطير جبهتها بس انعقد لساني من حقارتها...

بس كلتلها..علئ الاقل زوجي وبالحلال حتئ لو فاشل مو مثلج مكسر مدري شلاعب بيج وضال يورق عليج

حسيته دخنت...وتعصبت..

تركتها ورحت مزعوووجه حييييل

كالت سلسبيل..شبيج دنوو ليش گالبه خلقتج

كلتلها..هي صخله مدري عبله دكول تغارين مني لان زواجج فاشل وزوجج ممعترف بيج

كالت..تولي البعيره متعرف تحجي

مصعب دخل كال...اي فعلا فاشل وتافه وحقييير

بلعت ريقي واحس اعصابي تلفت شكوو يغلطون مهما يكون هو زوجي حتئ لو هو غلطان لازم يحترموني...

سكتت محجيت

كال...والله علئ يوم اشتكي عليه اله اخلي يعفن بالسجن

ضحكت لازم ارد عليه هيج تعلمت من خالد

بس سكتت اذا ارد مصعب يزعل مني واني مااريد ازعل اي شخص...

اتذكرت كلمة خالد من جان يكول الاصيفر امه متنسيه بيه حييه لان مثل الحيه يكرص ويضم راسه

كال..دنوو تطلكي احسن والله

كتله..الله كريم..

تركتهم ورحت يم ماما حطيت راسي علئ رجلها وهي ضلت تمسح علئ شعري وتبوس بيه....

وبعدها تغدينه ومصعب وصلنه البيتنه....

ورانيا كوول شويه تتصل بس احنه سوينه الموضوع عادي ما قلقناها...

......................................

رانيا جنت كاعده بغرفتي ارتب بيها...بعد مرور يومين من عرس سحر عندي قلق كوولش قوي من ناحية داانيا بس كل مااخابرها يطمنوني عليها ودكول ماكو شئ...

كملت ودخلت سبحت...

كعدت انشف بشعري ومشطت حطيت مرطب لاديه وحمره فاتحه...

دخلت عذراء بدون ماتدك الباب...

عذراء بلبكه..رانيا رانيا الحكي

رانيا بخوف..خير شكوو

كالت...راح يجي ابو لهب وامه يشوفوني عليج العباس طلعيني احلئ من هيفاء وهبي...

ضحكت..صدوك حيجون يخطبوج

عذراء..اي والعباس مجاي اصدك اكرصيني بلكي استوعب...ياربي والله مستحيه من خلقتي خلقتي سر عنوستي

ضحكت...لا ونبي تجننين

عذراء...يالله ميخالف احلفي جذب بس اريدج تطلعيني حلوه بحيث ابو لهب من يشوفني يضل يغني...

لو عذيره لو مااريد حياتي حبي جديد

وتهز جتف وتركص...

ياربي هل بنيه مخبله...

كلتلها روحي غسلي وجهج ولبسي وتعالي...

ركضت دقيقتين واجت غاسله وجهها ولابسه ثوب جويتي وشال نفس اللون...

باوعت علئ روحها وكالت...رووح ابو لهب بعد شتريد خويلد جابلك مره طالعه اليوم جني قلم جاف ههههههاي....

ضحكت حطيتلها مكياج والله طلعت حلوه

نزلنه اني وياها جووه

هي متعرف تستحي كل شويه وكالت..فدووه علموني شلوون اخجل

كلتلها..عذوره بس نزلي راسج لا ترفعينه لان ابو لهب متدين

لزمت اديها برجاء...عفيه رانيا عفيه كله دلعيني عذوره حتئ من تجيبون الجاي صيحي عليه عذوره تعالي اخذي الجاي حتئ ابو لهب يعرف اني مدلله وكيوت ومليانه كياته فديتني امي اليوم لبستني ازرك ابو لهب اذا يبوسني والعياذ بالله يدمر حبر خههخخ...

استغفرت ربي واني اضحك عليها...

دخل خالد كلها..هلا هلا بالزين كله شطالعه جنج حاويه مال زباله

عذراء..متضامنه ويه حاوية اهل ابو لهب شايفتها هم زركه ههههههههاي

متت من ضحك ذول شبيهم مخابيل يربي...

كلتله..فدووه اتاخر ابو لهب شسالفه يصلي صلاة التراويح دخل يجي مو انكطع كلبي عفيه خالد روح جيبه بتكسي...

كلها..هسه يجي لا تلحين

عذراء..فدووه خابره

خالد ..ولج لا انتي قطعه نادره مانريد نشمرج هيج شمره لازم ندلل

عذراء..يابه خلي نكطع مهر ودلل براحتك بس خليني اتبركس براس ابو لهب وطيح الفأس براس ههههاي

خالد..ادري ابو لهب لو محارب ضد الرسول بمعركة احد هم مايصير بيه هييج خطيه مضلوم شلون بلوه راح تطيح عليه

عذراء...هاااا هااا شبيه والعباس قطعه نادره ماكوو مني

شويه واندك الباب صار طشارهم ماله والي عذراء وامها تركض واخوانها صغار وعمتي هم وياهم...

راح خالد هو يضحك فتح الباب واني دخلت بالمطبخ دخل ابو لهب وامه واخته...

جان شاب ضعيف حييل وطويل وصاحب لحيه سوده وملامحه حلوه والوقار مبين علئ وجه وعندي احلئ من عذيره بقاطات

خطيه عذراء ضلت ترجف طبعا وبكل ثقه مو خوف بس تخاف مينعجب بيها ابو لهب...

المهم شوويه وطلع خالد صاح عليها

وهي لبست عبايتها وراحت اخذت الجاي وطارت..

ركضت واني اضحك واباوع عليها من الزرف مال الباب جانت كاعده مقابيل ابو لهب...وابوها وعموو هم كاعدين

وتتبسم وابو لهب يباوعلها ويسبح بسبحته وينزل عيونه....

ضل يسولفون احنه اجينه علئ الاخلاق والادب ومااعرف شنوو وان شاء لله نخليها بعيونه ...

وبعدين راحوو هو وامه واخته...وخالد طلع وياهم

احنه دخلنه وعذراء طايره من الفرح...

كالت.. يممممه يجلط بالعباس لو ماعيب جان بسته

امها ضربته...ماتستحين ماتخجلين مو عيب ولج ابوج خطبني حتئ ما شفته وكلشي مااعرف ولحد الان كولشي مااعرف وانتي لا تستحين لا تخجلين

عذراء ضربت ايد بايد وكالت...والله موتتني كوولشي ما اعرف وكولشي مااعرف وازوجت ابوج ولحد الان مااعرف وهي مخلفه ست جهال جااا لو تعرفين شكد تخلفين...

ضلينه نضحك عليها ...وامها ضلت تضرب بيها

ودخل خالد وهي وكفت ملهوفه عليه...

هااا خالد بشر..

خالد غمز الها..يكوول ابو لهب ماشاء لله ماهذا الحسن و الجمال اشبه بحور العين

عذراء لزمت ادين خالد ممصدكه.. لا العباس عليك

خالد...اي والعباس...تعال لج عذراء عند يا كشافه مشتغلات

عذراء بفطاره..والله ماادري امي جابتلي بخور وبخرت بس شنوو ريحته جايفه

فوزيه..دهر صابج ولج شوكت

عذراء خافت..لا لا جذب اشاقه وياكم...

كلها خالد..اذا ماعدكم مانع ان شاء لله الخطبه الجمعه بس نتفق على الحاظر والغايب

عذراء شغلت الديجي وليله سهرن للصبح خطيه فرحانه...

اني تركتها وصعدت فووك...

لكيت مرتضى نايم علئ السرير هسه جاي

كتله..الله يساعدك

كال...هلا

اووف نسيت فادي عند عمه حروح اجيبه...

هو وكف تقرب مني ولزمني من ايدي

كتله...مرتضئ،شبيك؟

كال..اريد حقي

بلعت ريقي بخووف...مرتضى وخرر

كال..ليش بالله اشوو كلهم حاطين نسوانهم بحضنهم عايشين حياتهم واني لا اني للسماء ولا اني للارض

رجف كلبي من قربه...بس انت متحبني

مرتضى...اكسر الحاجز واشووف

دفعته..اهوو مرتضى عووفني..

هو لزمني حييل ودفعني علئ السرير..معاناتي كلها بسببج وهسه تتعيقلين عليه...

نزع قميصه وشمره..

تخبلت..لا لا هذا مو من كل عقله احسه مثل التعبان احتمال سكران بس مو شكل سكران يمكن مكبسل

هجم عليه بعنف وهو يبوس بيه ويسب

دفعته واني ابجي..لك وخررر لا تنسئ اني ملك مهتدئ

من كلت مهتدئ هجم بالزايد ضربني كال..عبالج اذا هيج دكولين اعوفج...

درت وجهي وبجيت بصمت وهو همس باذني..سلميني نفسج كولشي انتهئ انتي ملك يمني افتهمتي...

بلمح البصر تقرب مني حسيت نفسي قذره وحقيره

بس خلص ابتعد عني واني وكفت لميت الشرشف علئ جسمي وابجي دخلت للحمام وقفلته...

ضليت ابجي وابجي وارجف واحساس غريب تولد بداخلي وكره ناحية مرتضى..

حقير المهم رضئ غريزته...

سديت الدوش وطلعت من الحمام مالكيته بالغرفه طالع القذر حتئ ما سبح....

جان دنيا العصر...

قررت اروح الاهلي...

بدلت بسرعه وأمسح بدموعي...

هو من اخذني وكمل انطاني ضهره وكال..والله ندمت

ندم لان تقرب مني بس جان يريد يجربني حرك كلبي حيييل واستصعفني...

رخصني وخلاني لعبه بيده والله حرام عليه...

شنو ذنبي صرت ارملة اخووو ليش العادات ربطتني بي والله ضد المراءه تتزوج حماها..

لان يذلها ويستحقرها وعبالك مان عليها....

رحت جبت فادي بدلت اله ولميت جنطتي وطلعت...

لكيت خالد كاعد يدخن بالاستقبال كتله..خالد

كال...هااا

كتله..اريد اروح لاهلي وصلني

كال..رجلج يدري

كتله.. اي

هو طلع موبايله واتصل بمرتضئ كله..صدك انت تدري بمرتك تريد تروح لاهلها

مرتضى..اي ادري خلي تروح

انصدمت صدمة عمري اخذ الي يريده وشمرني لا ياحقير اخذتني لحم وشمرني عظم. .

خالد اخذ مفاتيحه وطلع ركبنه بالسياره والطريق كله اتنحب بصمت علئ،حالي وعلئ،غدر مرتضئ بيه...

لا مااذلك يا مرتضئ مااطلع ام فادي
......    ...   .......... ..........

دانيا جنه هسه راجعين من الدكتور...

الدكتور فحصني وحدد الاسبوع الجاي عمليه

وقررت اسووي العمليه ماما جابت الطريق بس تبجي..

وبابا يهدئ بيه

بس الدكتور كال..اتطمنوو هاي عقده يسموها ماوس معناه فاره متحركه وتتزرد.  اما اذا مكي ماوس يعني قطه..هاي تكون خبيثه وتكون ثابته متتحرك

وبعدين كال..لازم عمليه وزرع وان شاء لله خير

وصلنه للبيت تقريبا الساعه بثمانيه اقل المهم الضلام احتل الجو..

رحت صليت واني وبابا وماما...

وبابا كال لاتسون عشاء اجيب من بره جاي يطلع..

وندك الباب...

فتحه وطلعت رانيا وخالد...

سلمت علينه وحضنتني وبجت عبالي،لان مريضه وهم شبكت ماما وبجت وماما مصدكت ضلت تبجي

خالد كعد بالاستقبال. 

واجه بابا كال خالد يريدج

رحت اله مع العلم مااريد اروح...

اول مدخلت باووع عليه بحده عبالك مسويه جريمه..

كعدت بدون مااسلم شفت الفايل بيده انهبطت فايل دراستي نسيته علئ الميز يبوو شافه...

كال بجمود..شلونج

كتله..جنت زينه بوجودك لا

كال...هههههاي اي تلعبين من وراي غاب القط العب يافار

رفعت حاجبي.. وهسه شتريد

كال..اريد ارجعج لان انتي استهترتي بكيفج تطلعين ولا عبالج ماادري ولا دكيتي تليفون وكلتي علئ ذمته لازم يكون عنده علم تطلعين بكيفج وممخليتلي اي احترام...

جاوبته بحده.. يابه اريد اطلك انت شنوو

ضحك وحك لحيته..وشمعة الاسلام مااطلك لو تنزل ايه من السماء

جاوبته..براحتك اقدم دعوه وتطلك غصبا عليك

ما اهتم الكلامي وفتح الفايل...

اووف دانيا.....للتقديم بالدراسه الاوكرانيا طب عام..

كمل.. هلا بالدكتوره بس بصراحه اكره الطب انتي لسان محامي لذالك راح أحرك الفايل...

انصدمت من كلامه...

شغل الجداحه وشعل طرف الفايل...

انصدمت لا لا تخبلت وكفت مرعووبه منهاره ركضت عليه حاولت الحك علئ الفايل بس هو وكف ورفع ايده ليفووك...

ضليت اضرب بي وادفع بي بس هو طويل وضخم مايحس...

ضليت صرخ بصووت عالي.. ياكلب يانذل يا حقييير الله لا يوفقك

اجت ماما ورانيا وبابا يركضون علئ صوتي..

بابا كال..شكوو شصااار

خالد حضني وقيدني وهو يضحك بخبث..لا ماكوو شئ بس دنوو زعلانه لان تاخرت عليها

عطت بوجه ...جذااااب بابا جذاااب حرك فايلي مراح اسافر

بابا تخبل من شاف الفايل محترك تقرب من خالد كله وهو يعقد حواجبه...انت بأي حق تتجاوز علينه وبيتي

خالد بجمود..لا متجاوزت انتو الي تجاوزتو مدام دانيا علئ ذمتي مستحيل اقبل تتصرفون من وراي وعبالك حراميه تردون تهربوها...

ابو رانيا بعصبيه..بنتي واني الي اقرر مستقبلها وانت مالك حق عدنا

خالد بثقه...لا الي دانيا مرتي وارفع عليكم دعوه واسحبها البيت الطاعه

دانيا ببكاء...امداني اذا اطيعك والله تطلك وغصبا علئ خشمك فااهم اكرررررهك اكررررهك حسس شنو إحساسك ووين

ابتسم بهدووء..اكرهيني المهم اني احبج

عطت بوجهه...لك والله الدنيا صغرت بعيني وجودك يخنكني انت مستفز وخبيث اطلع من حياتي مليت منك امووت واخلص منك شلوون...

بابا...خالد اطلع بررره

خالد بتنهيده...ميخالف رايح بس وحق الله دانيا ماتصير الغيري گبر يضمها ولا غيري يحضنها...

بابا رفع ايده راد يضربه بس هو لزم ايد بابا وضحك..لا لا ابو دانيا ممقبوله منك هذا واني حامي عرض بنتك...

بابا من بين اسنانه...اطلع برره

خالد عدل ملابسه واخذ موبايله ومفاتيحه و طلع

وكف عند الباب وكال...اذا سافرت الي تصرف ثاني وياكم...

طلع وركع الياب وراه فلشه...

ماما حضنتني وضلت تصيح ...والله يطلكها النذل البنيه مريضه وهو يزيد عليها الله ينتقم منه الشويب منطيته دانيه تسوه راسه اكبر منها ب 16 سنه شلون مستفز...

واني اشهك بحضن امي اووف منك خالد قهرتني ولا فد يوم سايسني الخبل بعد والله مااحبه ارريد اطلك مااريده....

رانيا جانت بس تصفن ومرات تنهد تغلط عليهم ومرات تهدئ...

وبعدين ابنها ضل يبجي وراحت ترضعه....

مرت تقريبا...ربع ساعه...

واتصل موبايل بابا....

بابا فتح خط رقم غريب جان...

بابا...الووو

المتصل..الوو

بابا...تفضل

المتصل..تعرف خالد هذا موبايله...

بابا..اي اعرفه ليش شكووو

المتصل...خالد سوووه حادث

فزيت من حضن امي مرعووووووووووبه ومنهاره

نهاية البارت...يتبع....

كونوا هنا كونوا بخير...احبكم

سمو العراق...نور