رواية #انتي سيوف الثأر في اجفاني الفصل السادس وأربعون 46 - بقلم الكاتبه سمو العراق

الجزء الثاني ...البارت السابع
رواية..انتي سيوف الثأر في اجفاني
بقلمي...سمو العراق
💔💔💔💔💔💔💔

وكفت بسرعه وبابا لبس سترته وتوجه للباب وشايل موبايله بيده وسويج السياره...

احس كلبي طار من بين اضلاعي مو حبا بي لا بس ضميري يانبني لان طلع زعلان..

واكيد من انهياره سوه حادث اي اكييد تعصب...ياربي شحاله بس لا مات...

مجرد ما تخيلت ميت وكف گلبي يمممه والله امه تتسودن...وهو من النوع النهار كله يفتر ما يلزمه گبر.

اسم الله اسم الله...

ماما هم خافت عليه كالت...لا انوب يصير عليه شئ ويبلونه بيه...

رانيا شالت ابنها يبجي عاطت بوجه...لك اسكت خلي نشوف عمك شصار عليه...

اخذت موبايل ماما وضليت اتصل عليه ماكوو مديرد متت من الخووف...

يمممه بس لا مات ياربي مكسر ويكعد بالبيت ولا ميت...

اباوع علئ اديه ترجف وشفايفي جفت...دموعي تنزل لا ارادي...

كالت رانيا...هااا تحبي

عطت بوجهها واني ابجي...لج يا احبه لج طلع مني زعلان واكيد سووه حادث بسببي والله امووت قهر يعني مصار الحادث اله لمن اجاني...

رانيا تنهدت...اووف عبالك نفس اليوم الي اجه بي مهتدئ جنت انتظره بالهفه لكن للاسف مات...ان شاء لله خالد مابي شئ رغم كوولشي هو انسان دم ولحم والانسان مو معصووم وعمه وعمتي ميستاهلون لديصير بيهم...

بلعت ريقي ...يمه اسم الله عليك خالد ياربي رجعه بالسلامه....

رحت الغرفتي وحركت الموبايل عليه حرك ميفتح خط احس بطني تكطعت من الخووف والقلق ورجليه ترجف وتضرب ببعض...

نظراته الاخيره خوفتني من راح زعلان ياربي الخاطري رجعه سالم والله خطييه امه تحبه حييييل...

وهو مو مال يمووت...بعده نفسه بالحياة...

احس الدموع تتطافر من عيوني اتصلت علئ بابا ميرد ...

مرت تقريبا ساعه...

لا هو يرد ولا بابا يارب شصار والله القلق ذبحني

شوويه وحسيت الباب انفتح ركضت بسرعه وطلعت بره غرفتي..

شفت بابا واكف وماما ورانيا يسئلون بيه علئ خالد

اجيت ملهووفه وبصوت خايف...هاا بابا شبي خالد

بابا هز ايده كال...اصلا ماكوو اختفئ مالكيته

احس مثل الشمروو عليه مي بارد...شلوون اختفئ شنوو يعني شالته الملائكه..

كال..اندري رحت للمكان الوصفه اليه الولد وكال هنا رحت لا اكوو حادث ولا خالد موجود سألت ابو السوبر ماركت...كال لا صاير حادث ولا شئ

عقدت حواجبي ..يالله بس لا خطفه عمار لا اعوذ بالله بس خالد مينخطف مستحيل هو نبه مو غبي

ضليت اكل بااضافري من الخووف...

باوعت الرانيه...عفيه رانيا اتصلي بمرتضئ خلي نشوف اخاف وصل للبيت

رانيا بحقد...خلي يولي مااتصل بيه

بابا اتعصب كال..هاي شبيكم لج رانيا شنو قلة الادب هاي شلون هيج تحجين علئ زوجج شنو خلي يولي

رانيا خطيه اصطكت وضلت تتئت...اءءء لا بابا قصدي يعني مااريد اقلقهم وخلي همه يعرفون من غيرنه احسن...

بابا...لج بابا لتصيرن همجيات وعدوانيات وتغلطن احترمن حتئ العالم تحترمجن احترم تحترم...

رانيا نزلت راسها خجلانه...اءء العفوو بابا

عرفت صاير بين رانيا ومرتضئ شئ فكلتلها انطيني رقم معن...

طلعت موبايلها وردت الي الرقم...

كتبته أصابعي ترجف من الهبطه...

اتصلت بمعن...

شوويه ورد عليه...

جاوبته بلهفه...الووو هلاوو ابو محمد

جاوب...اهلا وسهلا منو ويايه

بلعت ريقي وتنفسي ضاق..اني دانيه زوجة خالد

ضحك بتفاجئ...هلا والله مشتاقيلج صار هوواي بيتنه هدووء ومگابه العيطه

غمضت عيوني قصده خالد يكتلني وهو يهد ورايه غير كله من وره اخووه ابو المشاكل...

ابتسمت بهدوء...وينه خالد موجود

كال...لا والله طالع كل عاده احتمال متزوج الشارع العام...

ضحكت بقهر اخوو يحشش وميدرون بالدايح ميت عدل اووف ياربي...

كتله...ابو محمد اذا اجه خالد ياريت دزلي مسج

كال...ان شاء لله شنوو تصالحتوو

كتله..لا والله متصالحنه بس عندي شغله وياه

كال..هو مو اجاكم وصل رانيا

انهبطت من كال هيج..اي بس راح من زمان

كال...لعد وين راح

كتله..والله ماادري هسه اذا رجع دزلي مسج اوك...

كال..اي خووش

قفلت الخط وماكتله هو سوه حادث خفت يذبوها براسنه...

رجعت اتصلت..ماكوو ميرد ياربي وين راح...

ضليت اكل بروحي اكل...

ياربي بس لا مات اعوذ بالله...ياربي دخيلك شلوون

احس كلبي ناار

هسه غير كون نعرف وين

والله اذا الزمه اله اكتله...

صرت مثل الام العراقيه من يضيع ابنها بسوك تتخبل عليه ومن تلگاه تشبعه كتل...

والله اذا الزمه اشبعه كتل ابو الشوارع
...............................

سحر...

جنت نايمه علئ السرير وخايفه اتهرب من علي وبس انضف جوه وعمه كل شويه وكالت روحي سحر اصعدي يم رجلج...

صعدت وسبحت وبدلت ونمت علئ السرير...

علي جان طالع..

شوويه ودخل وكعدت وعدلت نفسي هو كال اكعدي اكعدي لا تخافين مااسوي شئ...

تنهدت بخووف...

كال...تعشيتي

كتله..الحمد لله وانت ما تعشيت اصبلك

كال...لا تعشيت بالمطعم ويه اصدقائي...

جاوبته..بالعافيه

ضحك واجه كعد يمي حط ايده على خصري وباسني بخدي حسيت نفسي يبست من الخجل...

همس عند اذني كال..شكوو لابسه حجابج حبيبي

همست بخفوت...بارده

ضحك وسحب حجابي وشمره باسني بااذاني بلعت ريقي جنت اتمنئ ادفعه بس اخاف يزعل وهو ميستاهل خطيه حيل حباب...

ضليت ارمش بعيوني وارجف...

كال بهدوء..سحر

همست بخووف...هااا

تنهدت..منوو مئذيج انت متعرضه العنف احجي والله العن خيرهم وخيسهم بالسجون

بلعت ريقي والدمعه جفت بطرف عيني كتله...لا علي انه ما متعرضه بس انه شوويه شخصيتي ضعيفه لان جدتي ربتني علئ العيب والتقيد

كال..لج انت ثلاجه باااارده متحسين وهااادئه حييل هدوئج يخوفني

جاوبته برجفه...اي مو كتلك شويه شخصيتي ضعيفه

ضحك كال...نقويها اني ضابط وانتي شرطي عندي شرايج

ضحكت بقلق..وشتريد من الشرطي اسويلك جاي

جنت اريد بس اشرد

ضحك كال...لا اريد الشرطي ينام بحضني

حسيت راح يغمه عليه من الخجل...

هو تمدد وسحبني الحضنه لزمت قميصه ودفنت وجهي بصدره والرجفه اعتلتني من فووك ليجووه وهو حس عليه

حسيت علئ نفسي ابجي من شد اعصابي وقلقي

هو بعد راسي من صدره ومسح دموعي وضمني الصدره

كال...لا تخافين والله مااسويلج شئ اله انتي تكولين علي تعال ترئ والله ممستعجل المهم تكونين راضيه اوك يكلبي

هزيت راسي بأي وزدت بالبجي احب حنية علي عليه بس اخاف يتقرب مني ان شاء لله تتحسن حالتي كله من وره غيس النذل كرهني بجنس ادم الحقير

ضل علي يمسح على شعري وهمس بكلمات طمنتني واسعدتني وعرفت اني محظوظه بعلي بس كون اكدر اتقبل قربه مني....

.................

ضلت كاعده للثنتين باليل ارجف من الخووف وابجي ورانيا هم خطيه قلقانه ويايه....

بعدين تذكرت رقمه القديم...

كتبته..واتصلت رن كم رنه وبعدين انفتح خط...

كال بثقل..الوووووو

تنفست براحه صوته اعرفه من الف صووت يا اما سبني وكال بنت النعل والمطي والاستهزاء...

كتله برهبه...الووو وينك لك شصار بيك صدوك سويت حادث

كال بتفاجئ...اني؟؟

جاوبته...اي مو اتصلوو من موبايلك كالوو سويت حادث

ضحك بااستهزاء...هاي شوكت لا الحمد لله حي ارزق

ضجت حيل...انت شبيك تخبلت كوول شبيك؟

رد بجمود..بابا شبيج والله لا مسوي حادث ولا شئ

ضربت رجلي بالارض ...لعد والله نرعبنه واحد خابر كال سويت حادث...ليكون ملعوب منك

ضحك وكال..فديتج حبيبي خفتي عليه

حسيت دخنت..لا لتفرح انقهرت علئ امك

كال..احببببج مشتاق الاحضانج

تنهدت وجريت نفس...انت تلعب عليه خليت بابا طلع تالي اليل يدور عليك واني كلبي نار اثاري ملعووب منك

كال ببراءه...لا يابه وروح اجدادي كلهم لا ملعووب ولا شئ

كتله بعصبيه...لا ملعووب اصلا من موبايلك اجه الإتصال

كال..الأثير

كتله...اي

كال...اهوو والله قديمه لج بابا هذا الرقم ضاع من زمان

اكلت شفايفي من عصبيتي..عبالي بالمستشفئ هسه

كال بهيام..لا يروحي اعسل بالكهووه ولوو مشتاق النحلتي اوووف لو الزمج والله خووش مزه

حسيت بقرف من كلامه عطت بعصبيه..شووف هي لا عبالك ارجعلك تطلك يعني تطلك والله اليوم السويته مايغتفر تحرك فايلي وتحرك كلبي هيج

كال..حبيبتي دراسه خارج العراق ممنوع اوك ادرسي بالعراق مكايل شئ

عضيت شفتي حيل...بابا انت شعليك  لو ادرس بجنهم متدخل

كال..مو صوجج صوج ابوج مخليج علئ حل كفشتج بس والحمزه...ماكوو دراسه خارج العراق لو مو اطلكج مفهوم

بجيت بحزن..خالد نسيت السويته بيه نسيت شلون طفيت عيني وعقدتني لك رجعتلك حتئ اذلك وشوفك جريمتك مكدرت اذلك لان مو كد حقارتك دا اكولك حررني والله مسجوونه حس شوويه حس احساسك ويين

اجتني نبرته الحزينه...دانيه والله امج ما تحبج بكدي واعترف اذيتج جنت مخبل مو عاقل اهلي ما سالمين مني بس والله من عرفتج صرت مسالم انتي ارجعي وشوفي اسلوبي والله ادللج دلال واذا اذيتج الج حق تتطلكين

غمضت عيوني...ذكرياتي وياك تعيسه

اجاني صوته الهايم...بس احببج وحق الكعبه احببج احب نعومتج وخبالج وكلامج وشعرج وصوتج التتنعوصين بيه عليه احب كووولشي بيج والله هاااايم لج قطار العمر فات واحنه ضالين بس نتعارك يابه ارجعي وخلي يصير عدنه ذريه وشووفي شلون ادللج والله متندمين...

غمضت عيوني انوب يريد ذريه ابو المشاكل حتئ يورطني...

كتله..خالد انت مستفز ومتسرع مااكدر اعيش وياك والله ورب والكائنات المجهريه والفضائيه وشمعة الاسلام والكعبة والحمزه وقمر العشيره.ورب الراقصات..مااتزوج غيرك بس طلكني

طبعا هاي حلفانه يحلف هييج

هو رد عليه..والحمزه وقمر العشيره وشمعة الاسلام ورب الكائنات الحية والمجهريه والفضائيه ورب الراقصات والكعبه ...مااطلكج لو تموتين...

قفلت الخط وشمرت الموبايل علئ السرير موتني ميقبل يطلك

بس الحمد لله تطمنت عليه...

سمعت رنت الموبايل...رحت فتحته شفته رساله من الصهيوني كاتب...

حبيبي شلون ما احبك ولابيك
وامك ماتحن مثلي ولابيك
عساهن بيه لوعاتك ولابيك
وتحول كل مرض منك عليــه.!

خالد..حبيبج

كالت رانيا عليج مريضه صدك يكلبي ان شاء لله بمصعب الاصفر ولا بيج...

ضحكت يربي والله ثاق من نفسه ليش مايكول بيه ولابيج لا بمصعب الاصفر..مصعب داقه دق...

تغطيت بطانيتي وكل شويه اقره رسالته وبعدين قفلته ابو الشوارع بثنتين يكول بالكهوه وين اكوو كهوه مفتحه...

ضليت افكر وافكر منا لمن غلبني النووم

..........................

تقريبا الساعه بالعشره الصبح كاعده ام خالد وصينيه مقابيلها والولد يتريكون...

ابو خالد بعصبية..انتم شبيكم تخبلتوو

خالد..خييير حجي شكووو صاير شئ

ابو خالد..ليش نسوانكم زعلانه

مرتضئ بلع ريقه...

خالد..والله اني هي شارده ومتقبل ترجع بس ان شاء لله الاسبوع الجاي افشلهم واخذ كبير العشيره...

ابو خالد..خووش حجي وانت مريضي

مرتضئ باارتباك..اني اريد اسافر للخارح خليها عند اهلها..

ابو خالد بعصبية...انجب هسه تروح تجيب مرتك وتجي رانيا خووش بنيه تشربني علاجي وكل شويه تجي تسأل عني وقايمه بواجبك وواجب العايله وانت تتعيقل عليه شبيها مو حلوه خايسه ؟؟ شوو شوفتها ترد الروح

مرتضئ بخجل..اي بويه

ابو خالد..وعلوويه كوووم رووح جيب مريتك بالله هذا الجبير الخير منتهين منه

خالد...جااا شسووي اجرها من كفشتها واسحلها الغرفتي

ابو خالد..خوو انت بس مال عرك ولك المره تجي بالكلمه الحلووه سايسه بوويه سايس مريتك

خالد بااستهزاء..شني هي حنان الفتلاوي واسايسها

ابو خالد..ولك انت ما الومها لو انهزمت نهار كله وليل كله داايح ومن تلفي عليه تشبعها رفسات حقها تنهزم بس هذا الاثول شبي انعده منك

مرتضئ...العصر اجيبها

ابو خالد...لا هسه

مرتضئ بخجل..تآمر يابه

ابو خالد...الزلم ترتاح بجال ولدها وانه بس عرك ومشاكل مايستحون ولا جنهم زلم مشوربه

دخلت عذراء...جااا خالي شسوي غير تربيتك هااي

خالد..هله بنجمة هوليوود هله بعذراء والله حجيجج درر

عذراء..افاا ابو وليد بخدمتك انت الغالي صديق الغالي ..اوو قصدي ابن الغالي..

خالد..تسلمين والله بخدمتج ان شاء لله هاي الجمعه الخطوبه..

عذراء بفرحه...لا تخليني اركص اسكت..

كعدت..اي والله خالي تربيتك شينه كلهم مابيهم خير طلع بس خالد بس خير وفايده..

خالي لا تحجي عليهم وانت من الاول ما منطيهم تربيه الشتله من الاول تنزرع عدل تطلع عدله تزرعها اعوج تطلع عووجه وماتصير الها جاره اله تكسرها

هسه انت شتلاتك كلهن عووج طلع بس خالد شتلته عدل ومايرافگ اله المتدينين والمؤمنين الله يكثر من امثاله...

ابو خالد..خاب انتي ما تنجبين

عذراء..والله خالي ولدك ماينلامون لو شلعو كلبك احجي وياك بااحترام تسب بيه...

خالد..شني عذيره صايره هيئه الأمر بالمعروف والنهي عن المنكر...

غمزتله...جااا غير مرة الشيخ

صدك اروح اصبغ شعري ككوي واجر بدله اله اخلي ابو لهب يباوع صفح خهههههاي يمه ممصدكه حتئ ضليت ما انام خاف يطلع حلم...

خالد...لا نامي صدك...

عذراء..الحمد لله ربي رزقتني باابو لهب هو صدك جنه رجلين دجاجه مهلووسه بس ميخالف احسن من ماكوو المهم أحرك كلب گرايبه واتزوج ههههههاي

خالد تركها تسربت الوحده ووكف راح الشغله ومرتضئ راح الرانيه....

........................

رانيا كعدت علئ صوت بكاء فادي لكيته متقيئ ومدمر ملابسه...

تافئفت ورحت غسلت اله وبدلتله وغسلت وبدلت خطيه جان جوعان رضعته...

طلعت لكيت ماما مسويه ريوك كعدت تريكت ضلت تسأل عن مرتضئ وتعامله ويايه جاوبتها زين...

ضلت تلح بالاسئله...

واني اجاوبها بااختصار بس ابدي احضنها واشكي بس شنوو اعرف ماما تعيش حالتها وتضل تغلط عليه وتعاركه.

بعدين ضحكت كالت..اختج الخبله البارحه تخبلت همزين اجيتي كلتي مابي شئ خالد طلع موبايله ضايع ومدري منو ناصب علينه...

كلتلها..اندري بيها صدوك مخبله

شويه واندك الباب..رحت فتحته

تفاجئت من شفت مرتضئ اجه جان واكف لابس قميص ازرك وبنطرون اسوود

عضيت شفتي واجيت ابجي..

كال..صباح الخير

مارديت عليه

كال..شنوو ماتدخليني

كتله.بحزن..تفضل

دخل للاستقبال..وكعد واني رحت جبت فادي واجيت انطيته اله محبيت احسس ماما احنه زعلانين

هو من شاف ضحك ووكف اخذه مني ويبووس بي ويعضه
واني منزله راسي بفشله وخجل وحزن ومشاعر مضطربه

بعدين باوع عليه اختفت ابتسامته كال..رانيا اني اعتذر عن الي صار البارحه

تنهدت ...هذا حق واخذته بس جان لازم تكون بطريقه افضل مو بهمجيه

كال..اي حقج بس والله اني صح حسيت نفسي حقير وتندمت ان شاء لله ماتنعاد اله برضاج

جريت نفس ..برضاي او لا اتمنئ تكون اوعئ من هيج ومتحسسني اني سلعه رخيصه الله يوفقك مرتضى اذا متريدني عادي والله طلكني وشوف الي تسعدج

كال بسرعه...لا رانيا اني من البارحه منايم والله صح جرحتج بكلامي وعدم اهتمامي بس ضليتي ابالي وانتي مرتي نمتي بحضني واخذت حقي مااطلكج ولا افكر ان شاء لله تتحسن علاقتنا مدام كسرنا اول حاجز

سكتت قيد لساني بكلامه بجيت بكلب محرووك وهو تخبل ترك فادي علئ القنفه واجه يمي حضني وباسني بخدي ويمسح بدموعي حسسني مثل الطفله

كال..لا رانيا والله عبالك فادي بجه مو انتي لا تكسرين كلبي وتزيديها عليه ان شاء لله والله بعد ماائذيج

ابتسمت بحزن ورحت شلت فادي خطيه خاف يوكع..

هو وكف كال..يالله حضري روحج خلي نروح

كتله..لا اريد ارتاح كم يوم وان شاء لله ارجع

هو حسيته ضاج بس سكت..

بعدها باوع عليه وابتسم كال..شكد عمرج

ابتسمت كتله..اربعه وعشرين

كال..صدك جنج 18 بس والله احلئ عمر اني 30

انصدمت..انت اكبر من....

سكتت ماكملت كلامي هو اكبر من مهتدئ بس ليش كلهم مامزوجين ومهتدئ خطب قبلهم..

هو هم غلس ماحجه...

ضحكت..اني عمري 24 بس ليشوفني يكول اصغر

كال..لان بيضه وكتكوته اني هم انصدمت عبالي اصغر..

سألني  كم عمرك غاليتي ..!
           فتبسمت وقلت عندما
تغازلني غزل نزار أكون بنت العشرين
          وحين تغمرني بحنان الاب
    أكون طفله لا تعرف عد السنين
     وحين توقظ العشق في جسدي
                أكون بنت الثلاثين
                وحين تبعد وتقسو
              أصبح جسد بلا انوثه
       واكون بلغت من العمر التسعين
                  فإياك ان تسأل أنثى
                  كم تبلغ من السنين
              اسألها هل لكي من البشر
             عاشق يعشق معك الجنون

ضل كاعد يسولف راد اروح وياه بس رفضت كتله كم يوم وتعال ادلل عشتوو..

وهو انطانه مصرف وباس فادي .راح..حسيت براحه شوويه ورجع الدم بوجهي صار عندي نشاط وحيويه

وصرت مثل الفراشه كل شويه احط بمكان...

.................. .

بعد مرور اسبوع كامل...

اليوم موعد عمليتي الخووف متلبسني كل شويه ابجي بس مو كدام اهلي لان خطيه همه هم متوترين..

رانيا مراحت لعيالها ضلت يمنه....

بدلت بسرعه تقريبا الساعه بسبعه الصبح بابا اخذ بطانيه...

و العمليه بمستشفئ خاص الهلال الأحمر بالمنصور

ماما هم خلصت خطيه بس تدعي وتقره قران ورانيا كالت اروح وياكم...

ركبنه بالسياره وكلبي احسه انقفص من الخووف خايفه تكون العقده خبيثه...

وصلنه للمستشفئ استقبلنه ال دكتور بالخاص..

كال..انتظري ساعه عندي عمليه قبلج..

جنت العب بالموبايل وماما لازمه السبحه تسبح

وكفت عند رقم خالد...

اديه لوحدهم كتبتله رساله...

خالد..اني بمستشفى الهلال الأحمر بالمنصور دا اسوي عمليه..اذا متت فانت مبري الذمه والله ادعيلي وترحم الي وربي يوفقك...

بجيت بصمت وروحي ذابت من الحزن علئ حالي وحال اهلي ....

شوويه ودخلت خاله ام مصعب هي ومصعب وسلسبيل...

وضلينه تقريبا ساعه وصاح الدكتور باسمي ولبست بدلة العمليات....

نهاية البارت...يتبع

كونوا هنا كونوا بخير..احبكم

نور..سمو العراق💔