البارت الاخير
رواية...انتي سيوف الثأر في اجفاني..
بقلمي..سمو العراق
💔💔💔💔💔💔
مات الضمير وشيعوو جثمانه..
جان كاعد يجري اتصال ويفتر بغرفته....
الشخص ...انت شنوو تلعب عليه لك ساعه دكلي انطيك فلوس ساعه دكول لا
عمار بااستغراب...اني شوكت كتلك لا؟؟
الشخص...انت مو رسلتلي رساله كتبت بيه ولا انطيك فلس...
عمار...من يا رقم
الشخص...من السيم كارت الاثير
عمار بلع ريقه..بس اني مضيعه صار كم يوم شلون اجتك رساله منه
الشخص...انت تضحك عليه
عمار بعصبيه..انجب لك شنو اضحك عليك
الشخص...هسه تنطوني فلوسي لا والله حتئ كبيركم اشتكي عليه...
عمار بدون نفس...مو كتلك ننطيك..ارسلي الرساله الي انرسلت الك..من الرقم الأثير....
الشخص..اي ميخالف بس دزو فلوسي و ديرو بالكم تقتلوني...ترئ مخلي واحد احتياط بس يصير عليه شئ يوديكم بستين داهيه...
عمار بعصبيه...مو كتلك اي
قفل الخط وشويه اجته الرساله المرسوله للشخص المطالب بحقه الباطل...
قراها..انصدم هذا منو الرسال هاي الرساله هو ضاع سيم كارته بس ميعرف وين...
معقوله واحد من اخوانه هو الي اخذ السيم كارت..
اتمنئ يكون السيم كارت ضاع بالشارع ولا ضاع بالبيت....
حس برجفه بكلبه وخوووف ورعب....
عدة دقايق وسمع صوت مرتضئ يصيح باسمه ويغلط....
سمع اسم مهتدئ...انت قتلت مهتدئ ...لك كلب تقتل اخوونه....
ضل يفتر بالغرفه برعب بسرعه قفل الغرفه...
فتح الكنتور وطشر الملابس كلها...
طلع الفلووس مالته وجنسيته وجوازه....
وبعدها طلع مسدسه
حس الباب حينكسر من شدة الضرب عليه...
ركض بسرعه فتح الباب ووجه السلاح بوجة مرتضئ
هجم عليه مرتضئ لكن عذراء..لزمته...
عذراء...مرتضئ لا لااا لك لا تنكتل فهمنه شصاير هو متعصب ولازم مسدسه وانت تهجم عليه يكتلك والله لك الشيطان ما مات....
...
دانيا...جنت نايمه بحظن رانيا وابنها بنصنه سمعت صوت الغلط والصياح
فززت رانيا بديه كلتلها بخووف...رانيا رانيا لج اكعدي مدري شصاير
فزت مرعووبه كالت...شكوو شصاير؟
نزلت من السرير علئ صوت مرتضئ ولبست حجابها ونزلت تركض واني هماتين لبست حجابي وركضت حتئ مغسلت وجهي...
لكيتها قايمه القيامه...
عمار موجه سلاحه بوجه مرتضى...ومرتضى يتهدد عليه...ولازمته عذراء
وخطيه عمتي تكسر الخاطر ودكله..ولك عمار تكتل مهتدئ تكتل اخووك ولك ربيت وتعبت وما فرقتك من ولدي...ولك عمار اضملك الاكله الزينه ولك اكلهن عمار يجي من شغله تعبان اسهملك السهم الزين هيج تجازيني...
هو جان موجه سلاحه عليهم ويبجي كلها...والله مو اني كتلته والله اني ما كتلته....
مرتضى صرخ بوجه بعصبية...لك جذاااب نذل لو ما انت كتلته مو رفعت سلاحك لوجهي نذذذذذل اعتبرناك اخوونه وهيج تخونه...
كال وهو يبجي ويصرخ...ما كتلته والله ما كتلته همه كتلوو اني جنت بس اريد اسلبه بس همه كتلو
اباوع علئ رانيه ترتجف وتبجي بس بدون صوت وجهها صار احمر
هجمت علئ عمار بعصبيه وهي تصرخ...لك نذذل حقيير كسرت فرحتي يتمتني جرحت كلبي
هو اطلق رصاصه كلنه صرخنه ورانيه وكعت من طولها....
وكعت رانيا وهو انهزم بس موجه اسلاحه علينه....
مرتضئ ركض لرانيا عباله اجت الطلقه بيها رفع من الارض واحنه ركضنه عليها شفناها تتنفس وممضروبه بس هو من ضرب هي انهارت ووكعت واحنه صار الصريخ عبالنه ضربها..
مرتضئ شاف مابيه شئ ركض للشارع وعمتي هي وفوزيه يصرخن وركضن وراها...
هو جان قووي ومنهار ماكدرن يلزمنه...
خطيه عمه تصيح...ولك مرتضى يممه لا تفجعني هذا النذل كسر كلبي لا يكسر كلبي بيك....
هو مجان مهتم وفوزيه لزمته من تشيرته وتجر بيه حتى تشيرته تمزق....
طلع للشارع بس عمار ابتعد مسافه لتمت العالم علينه والنسوان اجت تركض تريد تعرف الصار
ركب مرتضئ سيارته والناس صارت هوسه ببابهم ماخلته يتحرك...
دخلوو للبيت وغسلوله جان حيل منهار....
وخطيه عمتي وفوزيه اتخبلن عمتي صاعد سكرها وضعطها وتخربطت....
ورانيا تخربطت....
جان يوم كوولش صعب انسان عايش وياهم ومبربينه هيج يغدر بيهم ويطعنهم بضهرهم....
الكل مصدوم ومنهار....
دخلوو الزلم واجه معن من سمع تخبل ضل يصرخ...
وعمو ابو خالد كعد بالكاع وحط ايده على راسه وضل يصرخ....يا بوويه يامهتدئ انه ابوووك ملفي كتالك واعلف عليه...يا وسفة الوسفه انغدر يابويه الله ينتقم مني دخلت حيه لبيتي وكبرتها حتى تاكلكم....
خطيه ويضرب على جبينه....
حيل انقهرت عليه عموو فقير ومسالم ومن موتت مهتدئ وهو معتزل عن الكل لان هو حيل يحب مهتدئ
وصعبه عليهم ابنهم كبروا ودرسوو وجانو يفتخرون بي ويجي واحد نذل مثل عمار يقتله ماغزر بيه الزاد والملح
صدمتهم بعمار جانت اقوئ من صدمتهم بومتت مهتدئ
شوويه واجه خالد....
دخل اسلاحه بيده وشكله يرعب لابس قميص اسوود وبنطرون كابوي...
صاح بصووت عالي...وين عمااااااااااار
اني جنت كاعده بالمطبخ واباوع عليه من الشباك...
هو جان بالحوش...
طلعوو الناس الي التمت من الاستقبال...
واستقبله..مرتضئ كله...عمار انهزم...
خالد ما كله عمار انهزم...اتخبل صار عبالك مصارع...
لزم مرتضئ من ياخه قميصه وعاط بوجه بعصبيه وغضب...لك اثووووول شلووون انهزم اني مو كتلك لاتخلي ينهززززززززم....
مرتضئ بنهيار....هو انهزم من ايييدي عرفني بسرعه اول ماصحت عليه وجان لازم سلاح واجه يقتلني...
خالد ضررب مرتضى راشدي طير ملامح وجه خطيه ماتوازن..
العالم لزمت خالد وابو خطيه يتوسل بيه...ولك بويه خالد علئ كيفك...ماكدر اله
وهو يصيح بعصبيه...مو هذا مطي اكوو واحد هيج يسووي يروح يفضحه وهيئله كل شئ
جنت ارجف من فوك ليجوه خالد من يتعصب مايرحم وحيل اضووج واخاف واتمنئ اختفي
اذكره من يضربني ومايرحمني....
اني بس جنت اريد اعرف شعوره شنو تجاهي من ناحية ضلمي متحسف متندم اني حلفت مااسامحه وهو جان يضحك عليه
يكول عود من يجي هذا اليوم كليلي....
شفت واحد من جيرانهم كعده علئ الدرج وانطاه كلاص مي وهو يكوله...اهدئ عمي اهدئ هسه القانون ياخذ مجاره
خالد اخذ الكلاص منه وركعه بالحايط وهو يصيح..انعل ابو القانون والله اطلع اغم اذا مااخذت حقي
وكف وحط مسدسه وره ضهره وطلع ....
خطيه عمتي ركضت وراها...
لزمته وحضنته كلتله...فدووه يممه ابوس ايدك يمه هذا نذل لا يغدر بيك فدوه اروحلك خابرنه الشرطه همه يعاقبونه....
هو لزم وجه امه وباسها براسها ورفع اصبعه بتهديد...انعل والدي والديه والله حق مهتدئ محد ياخذه غيري...والله
ترك الناس وطلع
وامه خطيه فرفحت وتركض وراه وتتوسل بي بس هو تركها وطلع....هو عنيد والي براسه يسووي
ضلينه نسوي جاي ومي للرايح والجاي واقاربهم كله التمت.....
وخالد راح مااجه...
جنت حيل خايفه عليه لان أتأخر هووايه اخاف هم يغدر بي عمار...مثل ماغدر بااخووو....
سوينه عشاء وهو ماكووو.....
رحت صعدت فوك لغرفتي سبحت وبدلت وضليت ابجي...
مااريد اضل يم خالد لان هو قاسي وعصبي وحرمني من كل شئ من دراستي واهلي وحتئ انوثتي قلت بوجوده
صرت مبهذله عوائلنه حيل راقين ودارسين وديكولون بس بنات ابو رانيا فشلن بزواجهن لان ميخلونه ندرس...
عدنه بعوائلنه الدراسه اهم شئ واني للاسف خالد دمر مستقبلي...
هو صح تعرض لضغط تغيرت من شخصيته وصار عدواني بس هو اصلا وكح من زمان
امه تسولف دكول جان حييل وكح من صغير وشالع كلبي وبس يعارك بالجيران
والمدير جان يوميه فاصله...
قبل جانوو اكوو مصرين يشتغلون فالمصري غالط عليه كايل عليه...ابن الشرموطه...
وهو متخبل وهاد علئ المصري والعالم لازمته جان هنا عمره 16 سنه...
ودكول امه اكل روحه لحم...وكل شوويه وكال...شلون يكلي ابن العرموطه انب امي عرموطه...
دكول مجان يعرف شنو معنئ شرموطه...
ومن درئ قبل كم سنه كال اله اروح المصر اكتله هههه مخبل بس هو يشاقه ميروح....
وامه دكول جان من كثر ميعارك قميصه بي بس دكمتين كلهن مكطعات...
اتذكر موقفي وياه دائما...
جان دائما يسوي الاشياء الي اكرها...
يعني يكتلني .يريدني انام بحضنه لو يكعدني بحضنه
مره ضربني وره ساعه سحبني كعدني بحضنه حيل ضجت وضليت احجي وهو ولا جنه...
جان حاجبه شوويه مضروب
كتله...هاي منو ضربك
كال..هاي عذراء من جنه صغار كتلتها وضربتني بقوطيه المعجون وانجرح حاجبي
كتله ...زين شنو هاي الندبه الي بجبينك
كال..هاي مره واحد مطيرجي خمط طيرتي ورحت جيتت علئ سطحهم اخذت ثنين من طيوره الزاجل والاورفلي
ومن دره شمر عليه طابوكه اجت بكصتي...
كتله بااستهزاء...لعد كلهم كاتلينك ولا كاتل واحد
هو لزمني باسني بعنف كال عذراء مسترجله وابو الطيور ساااق.....
كلت بكلبي ...وانت شريف...
سمعت صوته اجه فزيت من مكاني....ونزلت اركض...
...........................
من اول ماطلع من بيتهم وهو كاب نار اعصابه تلفانه متخبل انسان عايش وياهم يطلع هو قاتل اخوهم
شكد حقير ماحس بتأنيب الضمير شلون جان ياكل بخيرهم وهو خاينهم...شلون عايش مرتاح بنصهم وهو برگبته دم
جان يدور بشوارع بغداد بس عمار فص ملح وذاب....
خابر علئ علي...وطلب انطاه الرقم المتصل والي كشف عمار....
وعلاوي كله راح يحددون موقعهم....
خابر علئ اصدقائه ثنين وخابر علئ ابو لهب ومرتضئ
والتقوو بمكان....راحوو دكوو اهل عمار...واجوو
واهل عمار رادوو عطووه....
.......
دانيا....شفته واكف بالحووش ولازم موبايله يخابر ومسدسه بيده
باوعت عليه وبلعت ريقي...
ابوو اجه بعصبيه....كله انت شلون تدك العالم
هو هم حجه بعصبيه...كله انعل والدي والديهم باجر عكبه يحمونه ويردونه منه ويسونه زلمه علينه
ابوو..وشتريد الدوله هي تاخذ حقنه
خالد...لا دوله ولا نعال حقي اخذه اخذه...ودكيتهم حتئ يعرفون دمه مهدور ومنو يساعده يلوحه طشار منه....
شووويه واجت ناس اهل عمار...
طبعا هو عمار ابن عمتهم...رباه خاله ومن ماتت امه عمر12 سنه همه انتشلوو لان مرة ابوو جانت قاسيه وياها وتخلي يبوگ وتضربه...
وهو مو نفس عشيرة خالد من غير عشيره...
هو باوع عليه صرخ بوجهي كال...طبي جوووه
كولش انقهرت وفزيت من مكاني ركضت للمطبخ وكعدت..
قررت اتركه اي هذا قراري لازم يحترمني اني اريد اكمل اعيش هو بس يغلط وميحترم....
جانن البنات كاعدات بالمطبخ يسون جاي...
وعذراء كل شويه تطل من الشباك تباوع علئ ابو لهب
جرت نفس كالت...شكد حقير عمار والله لحد الان ممصدكه هو كتل مهتدئ الله برحمه....
صدك الغريب احسن من يندار سبع فدوات لابو لهب خلقه واخلاق...
رانيا جانت دايخه حييل وبس تبجي وكل شويه دكول...ليش كتله والله مايدري شصار بيه والله انذليت ليش علمود المهر والله لو كايل انطي مهري وذهبي وفلوسي وكل شئ يريد...والله لو اعرف اكعد بالشارع ولا مسوي هييج...
اووف ياحبيبي يامهتدئ نمت جوه التراب وتركتني
جان سحر كلت الها....انت جاي تخونين مرتضئ بهذا حجيج
ردت عليها رانيه بحده ونهيار...انتي مالج شغل لا تستسرفين براسي
خطيه سحر انصدمت وسكتت
واني كلتلها...ياااا رانيه شبيج علئ كيفج
كالت...متشوفيها شدا دكول
سحر بلعت ريقها بصعوبة وكلتلها...مو قصدي بس لان انتي متزوجه هيج حجيت
رانيا ردت عليه بااستهزاء...وانتي مو هم مخطوبه
سكتت سحر وخلت وراحت
كلتلها...يمعوده علئ كيفج لبنيه متقصد
كالت بحده....لا تقصد
تنهد وتركته اصب بالجاي
مر عليه شريط حياتي وانتقام خالد مني انضلمت حييل منه اخر ضربه قتلتني....
قررت اخابر امي وتجي تأخذني واطلب الطلاق...
طريقي وياه مسدود.....
اجه مرتضئ اخذ الجاي باوع علئ رانيا شافها كاعده ولازمه راسها...
كلها بهدوء...شلون صرتي تردين اخذج للمضمد
كلتله....لا الحمدلله زينه
كلها...فادي وين
كلتله بتعب...نايم
كلها...ديري بالج عليه هذا امانه
هي هزت راسها بأي
واني انطيته الجاي
هو كال...دانيا
كتله....هاااا كال....خالد ضغطه صاعد 18
كتله بصدمه وخووف...يااا خطيه خلي يجي يرتاح
كال...ميقبل وبس يصيح راح اكوله امي تريدك وانتي اطلعي صعدي فووك لان هسه قسنه ضغطه صاعد
كتله...اي اي ميخالف
عذراء كلتله...قستو ضغط ابو لهب
مرتضئ كلها...انعل ابوج لابو ابو لهب متستحين
كلتله...شبيك نمونه هو جهاز وبلاش اذا تريد انطيك الف....حتئ اذا صاعد اعصرله ليمون
اني ذكرت هم اخذت ليمون وبرتقال وبديت اعصره ومرتضئ عافها وطلع
شوويه وسمعت حرحشت كلامهم خليت وطلعت شفته واكف يحجي ويه مرتضئ
اجيت تقربت منهم هو باوع عليه جان لازم راسه
كال...انتي ليش تعاندين مو اكلج ادخلي جوه
ابتسمت بحزن عرفته ماعنده الجرئه يواجهني وهو ضالمني..
كتله بهدوء...تعال اصعد فوك انت تعبان
كال بعصبية...يطبني مرض شنو يعني واذا صعد ضغطي شوويه تذليني
كتله بنفاذ صبر...شبيك خالد شنو اذلك حرام عليك
لزمته من ايده وسحبته هو سحب ايده وصعد فووك كدامي
واني رحت للمطبخ جبت العصير اله وصعدت....
صعدت لكيته ديطلع قميص ويريد يسبح...
سحبته من ايده وكعدته علئ السرير وانطيته العصير كتله...اشرب زين للضغط
ضحك بحزن وملاطفه كال...خاف مسويتلي سحر
ضحكت بهدوء..كتله اي مو جاي اموت عليك
هو شربه جرعه وحده وانطاني لكلاص...
وتمدد علئ السرير كال...تعالي دلكي راسي يوجعني
كعدت ادلك براسه واباوع عليه وارجف وكلبي يدك سريع مااعرف شيصير بيه من اتقرب منه...
ماردت اعاتبه ولا احجي لان مااريد اتعبه...
بس اكيد مخليه اله عتب وقررت من اتركه هو حيقراه
باوعت لملامحه وهمست...انتهت اللعبه واثنينه خسرنه ماكو ربحان بينه...
هو سحبني نمت بصفه بس كوولش خايفه جنت اخاف من شعوري تجاها بس اني كانثئ لازم ارد اعتباري واخذ حقي هو ضالم وضلمني لازم ارجع حقي...
نمت بحضنه محتاره مقهوره مجبوره....وكل شوي افز اشووفه...بسته بصدره وبجيت حييل مقهوره لان قررت اتركه...بس والله لازم اتركه
لان ذلني هوووايه....
وانقهر عليه لان ديكول احبج...
الحيره اكلتني اكل.....
كلما اردت الهروب من اوجاع الماضي ..
أحببتك
واحببت القدر الذي اتى بك الى دربي ..
حبيبي ،،،
مالي اراك مندهش .. وفي عينيك اقرأ ملامح الاستغراب
سأوضح لك الصوره ..
لم آتي هنا لأزخرف لك كلمات حبي ..
الذي انت اعلم به مني ..
ولا لأنظم لك الابيات والقصائد التي تعلمتها
لأعبر لك كلما وصلت الى نشوة العشق معك
كما تحب ان تكون ..
أتيت ..
لأقول لك انه يجب علي ان اودع روحي
وان ألفظ آخر لحظات السعاده بحياتي
يجب علي ان أرحل عن عالمك
لاتسألني لما ..؟؟
فاأنا نفسي لاأعلم لما ..!!
الشيْ الذي أعلمه أنه هذا مايجب ان يحدث
...............................
سحر...
كعدت الصبح متضايقه جدتي كالت بعد نروح البيتنه وغيس وله بعد ما نشوف جهرته...
كتلها ....ميخالف
رحت غسلت واجيت همه بعدهم مخبوصين خبص...
.والعالم متفاجئه من الصار
كالوو اجه علي ...هو علي ضابط بالنجف بس ماعنده دوام اليوم....
وهم عنده اصدقاء ضباط هنا...
خابرهم...
من اجه كال لزمو العصابه عن طريق الاتصال مالت الشخص الي جان يراسل عمار....
وهو اعترف علئ عصابته هم سبعه وبيهم واحد كبير بالدوله...هو رئيس العصابه...
بس عمار للاسف انهزم ما لزمووو.....
اني ضليت كاعده بالغرفه....
شويه واجه علي سلم عليه وعلئ جدتي...
وجابلي موبايل اخذته بخجل...
وكتله...راح نرجع للكوت
كال...ميخالف بس اذا تردون ااجر الكم شقه هنا بين منزوج
خفت حيل من كال هيج...كتله...لا لا هناك احسن
كال...براحتج
خله وطلع...
شوويه واتصل موبايل جدتي
جدتي فتحت خط..
قيس كلها...تجن لا والله افضحجن فضيحه
كلتله جدتي....ياااا غيس يالنذل رديت
كلها...اي والله تفسخون الخطبه واني ناهي علئ بنت عمي
ضليت كلي ارجف وابجي وجدتي تغلط عليه وهو يغلط عليها..
ضليت بحيره وهو يحلف اله يفضحنه.....العار
..............................
بعد مرور اسبوع....
خالد راح يلتقي بقتلت اخووو بالمركز....
واني لميت اغراضي وخابرت ماما ....
اجت هي ومصعب
جنت ادور داخل الغرفه كلها ذكريات تعيسه وحزينه...
لكن بيها شئ حلوو ونفس رائع....
حطيت الرساله علئ السرير وطلعت.....
ودعتهم وعمتي ضلت تبجي كالت لا ترحين...
كلتلها ببتسامه...سكتت هوواي اهلي لو يدرون هو ضاربني بعيني ميسكتون انتهت اللعبه وانتهئ كوولشي مع السلامه...
طلعت ركبت السياره وطكيت من البجي واشهك وماما ومصعب تخبلوو
كالوو ضاربج
محجيت بس ابجي واباوع للطريق...
وتركته وتركت كوولشي ورراي الله يسعده وينسيني لان تعبت حييل واحس تعبت نفسيتي ومحتاجه للراحه لان وياه بس مشدوده اعصابي......
..........................
هو اجه من المركز كعد شويه ويه اهله ومحد حجه عن موضوع دانيا...
جان يسولف عن قتلت اخوو وشلون اغتالوو....
وبعدها اترخص وصعد فوووك....
الف بالغرفه مشاف محبوبته وطفلته العنيده...
استغرب اتوقعها يم رانيا
انتبه للورقه جان عليه كوم مال جكليت....
فتحه وانصدم من حروفه
كاتبه....
خالد يامجرم.....
لست انا سيوف الثأر في اجفانك بل انت السيوف القاتله في أوصالي..نثرت غبار الذل في اوطاني واذوب من الحزن بحضنك ياسلطاني...ارئ كفوف الحقد تسطرها علئ وجنتي وائن قهرا من اسئ الحرمان..اشكو سيوف الثأر من ألم الدجئ..اشكوو مهانتك الي ياسجاني...رباه نصرك مئملي عجل به..واسلل سيوف الحق من اجفاني.....
خالد اذا تحبني حررني من قيودك وطلكني اني رحت الاهلي....
تخبل عصر الرساله بعصبيه....
وهمس بفحيح مرعب...اني الج دانيه والله اله اطيح حضج تمردتي هووواي....
اخذ موبايله جاي يطلع...
وصلته رساله...
فتحه جان مكتوب....خالد ...اني ما قتلت مهتدئ صح اني طمعت بفلوسه وسيارته ومجان بنيتي اقتله بس جنه نريد انسلبه....
بس هو من خطفناه وشدينه عيونه اول محجيت عرفني
كلي ....هاااااا عماااار ياكلب ياخاين تخوني وتسلبني...
فالمسؤل علينه كال...مدام عرفك لازم ينقتل لان راح ننفضح.....
وهو المسؤؤل قتله واني طلعت بره....ولاتدور ورايه خالد اني راح اكسر السيم كارت مراح تلكه مكاني...
نهاية الجزء الأول من القصه.....
الهدف من القصه هو الطائفيه وعدم بناء امور باطله وما الها مكان من الصحه علئ حساب اشخاص ابرياء...دانيا كانت ضحيه للطائفيه بدون سبب ...وخالد ايضا ضحيه...
ان شاء الله انتو تميزون هدف القصه....
انتظروني بالجزء الثاني...مع كشف حقائق عصابة عمار ....ومغامرات دانيا وخالد...
وزواج عذراء 😍
كونوا هنا كونوا بخير...احبكم
نور سمو العراق....
الاغنيه تصف حال ...عمار وخيانتة لخالد واخوته💔😢
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!