رواية اوركيدا الفصل الأول 1 - بقلم دانيا

رواية اوركيدا

الفصل الفصل الثلاثون30والاخير

بقلم دانيا

قلت ليها شوفي يا ميناس كونو إنو تحكمي على الشخص من طريقة تعاملوا مع شخص تاني وتقولي اكيد ح يتعامل معاي بنفس الطريقه بعدين دا غلط لأنو في النهايه الزول دا يمكن عندو مشكله معاهو لكن انتي لا هسي مثلاً ماما زينب كانت عندها مشكله معاي لأنو اول شيء هي م كانت بتعرفني وتاني شيء هي كانت مختارة بت اخوها من الأول .... يعني في النهايه ليها اسبابها لكن انتي هي بتعرفك من زمان وبتعرف اهلك وكل شيء واتربتي معاها في نفس الحي وكمان اتزكري إنو السيء مهما كان سيء لو عاملتيهو بالأحسن ح يخجل وح يتغير معاكي .

قالت لي صاح كلامك والله ياغرام ما نحكم على الناس من تجارب غيرنا لكن يلا دا درس واتعلمتو للزمن قلت ليها وهسي كيف ؟ رفعت راسها وعاينت لي وضحكت قالت لي بعد شنو لكن العرض انتهى .... احمد جاء خاشي قال ليها لا لسه العرض ساري المفعول عاينت ليهو بقى يضحك البت ماتت من الخجل ونهاي م اتلفتت عليهو ،، قلت ليهو بسم الله جيت ناطي من وين انت ؟ البت طوالي قامت طلعت قال ليها قولي لعم حسين يوم الجمعه جاينكم ... قلت ليهو حرام عليك خجلت البت وخليتها تهرب .

يوم الجمعه مشو احمد ومو طلبو يد بت وبعد شهر كان العرس الكل كانوا مبسوطين شديد حتى هاله بقت تتعامل معاي كأني اختها قلت سبحان مغير الأحوال ... وطول فترة العرس كنا قاعدين معاهم في البيت بتجيني الصباح بتشيل حمودي بتلعبو كدا وبتجيبو لي راجع ،، بعد عرس امين ماما زينب قالت لينا تعالوا اسكنو معانا انا بفضي ليكم غرفتي دي وبسكن في عريشة المطبخ قلنا ليها معقولة دي ما ممكن والله كيف تسكني في العريشه .

امين قال لأحمد رايك شنو تبني ماياهو الحوش كبير ؟! احمد عاين لي قلت ليهو م عندي اي مانع البتعملوهو انا معاكم ..... يومين كدا واحمد لم شباب الحله كتار وجاء خطط وجاب المواد وبقوا يبنو اسوعين وخلصو ونقلنا عدتنا ورحلنا ،، عملوا لينا غرفتين وبرندا كبيرة ماما زينب كانت مبسوطه شديد ومرتاحه نفسياً قالت الحمد لله الله رزقني بي بت واحده بس لكن عوضني بي تلاته ودي براها نعمه .. بقت م بتمرض كتير زي زمان زمان كانت بتمرض بسبب الضغط النفسي والتوتر لكن الحمد لله .

في الخلاصه حابه اقول ليكم " لو قابلنا الإساءة بالإساءة عمرها الإساءة م بتنتهي ، ويابنات ام زوجك مهما كان تعاملها معاكي اعتبريها امك واكيد مافي زول برد في وش امو ، وبراها ح تتغير لو شافتك طيبه معاها ، وكمان عسى ان تحبو شيء وهو شر لكم وعسى ان تكرهو شيء وهو خيرا لكم ، وكمان التعليم عمرو م بقيم الإنسان البتقيمو اخلاقو وتربيتو

تمت