رواية اوركيدا الفصل الثلاثون 30 - بقلم دانيا

رواية اوركيدا

الفصل التاسع والعشرون29

بقلم دانيا

احمد قال خلو امها والباقيين يطلعوا طلعوا برا في الحوش قاعدين تلاته ساعات على اعصابهم بعدها غيداء جات لأمي مبسوطه قالت ليها مبروووك ياامي جابت ولد زي القمر حضنتها وبقن يبكن الدكتورة جات قالت ليهن ح تقعدن تبكن كدا الف مبروك ماشاء الله رغم إنها ولادة مبكرة لكن بنقدر نقول صحتو كويسة مافي داعي للخوف لكن ح يقعد في الحضانه اسبوع .... امي شالت نفس عميق وقالت ليها الحمد لله بتي المسكينه وتاني رجعت تبكي جاء احمد داخل لمن شافهم ببكو لمن جسمو هبط جاء عليهن وقال ليهن مالكم في شنو ؟ وملامح وشو م بتتفسر غيداء مسحت دموعها وقالت ليهو مافي حاجه الف مبرووك يربى في عزكم وعزنا وعز الدوله كلها .

قال ليها قلتي شنو ؟ جابت ولد ؟ قالت ليهو ااي للحظه اختلطو مشاعرو بين الفرح والخوف قال ليها وغرام غرام كيف ؟ الدكتورة قالت ليهو كويسة شوية وبتصحى ..... حضن امي وبقى يبكي قال ليها جاء بدري شديد ياخ الدكتورة دي متأكده إنو كويس ؟ غيداء قالت ليهو كويس انا زاتي شفته .... بعد اسبوع طلعنا من المستشفى وحجم البيبي الصغير كان اكتر شيء مخوفني م كنت قادرة امسكو بعد يومين عملنا السمايه وسميناهو محمد .

بعد السمايه جات اماني سلمت علي وقعدت معانا لبعد العصر ومشت بيت امها فاديه قالت لي كأنو اماني م طبيعيه تحسها شارده الوقت كله قلت ليها م تهتمي ربنا يروق بالها .... احمد قاعد معانا اتصل عليهو امين قال ليهو تعال عاوزك في البيت ،، قال لي غرام انا بعدا امشي لأنو امين اتصل م بعرف داير شنو قلت ليهو تمام ... جاء ودع حمودي الكان نايم باسو في راسو الصغير دا وبعدين مشى .

لقى ناس امو مجتمعين في البرندا جاء قعد وقال لأمين في شنو مالكم ساكتين كدا ؟ امو قالت ليهو اماني جات وجايبه شنطها معاها وحالفه تاني م ترجع بيت عمك عاين لأماني وقال ليها خير يا اماني في شنو ؟ بقت تبكي قالت ليهو عبد الرحيم جاء من السعوديه ومعاهو مره بولدها قال دي مرتو اتزوجها قبل سنه .... ولمن اتشاكلت معاهو شتمني وقال لي البترضيهو لغيرك م بترضيهو لنفسك ؟ قلت ليهو تطلقني ولميت حاجاتي وبناتي وقمت طالعه مسك البنات مني وقال لي لو ماشه امشي براكي وعمي ومرتو خشمهم م قدرو يفتحو .... المهم انا تاني م راجعه وعاوزاهو يطلقني .

احمد عاين ليها مسافه وقال ليها الراجل محلله ليهو اربعه مش دي الجمله القلتيها لغرام ؟! امو قالت ليهو هسي كنت بقول ليها كدا .... كما تدين تدان يابتي قامت منهم بزهج وقالت ليهم انا م عندي شغله المهم انا طالبه الطلاق وقراري نهائي ،، احمد قال ليها نهائي على منو يابت م تخليني انسى إنك اكبر مني اوعك تاني اسمع منك كلمة طلاق دي فاهمه وطلع مشى الصالون .

بقت تبكي امين قام مشى منهم بقت قاعده هي وامها امها قالت ليها والله عاد يابتي ربنا م بظلم عبده وانتي مرت اخوكي دي م قصرتي فيها عشان كدا الله عاقبك تصبري وترجعي تمسكي بيتك وم تفضحينا بين الناس .

بعد يومين عبد الرحيم جاء قعد مع ناس احمد وعاوز يشرح ليهم الحاصل احمد قال ليهو انت اماني دي مقصر من واجباتها في شيء ؟ عبدالرحيم قال ليهو لا والله دي اماني القاعده تقول انا مقصر في حاجه ،، احمد قال ليهو خلاص سوق مرتك وامش وربنا يعدلها عليكم .

مرت شهرين ورجعت من بيت ناس امي وبيتنا م فضى من الناس كل شويه جايين يباركو .... جاتني ميناس قعدت ونست معاي كتير قلت ليها انتي ياميناس في موضوع كان قالوا لي احمد قال عرضه عليكي وانتي رفضتي ،، انتي خاته زول في راسك ؟ دنقرت وقالت لي لا م كدا لكن انا شفت معاملة خالتو زينب معاكي وخت من إني اخش بيتها دا الصراحه .

الفصل الثلاثون من هنا