رواية اوركيدا الفصل التاسع والعشرون 29 - بقلم دانيا

رواية اوركيدا

الفصل الثامن والعشرون28

بقلم دانيا

مر شهر ودخلت في السادس قلت لأحمد انا بفكر بعدا امشي بيتنا قال لي ليه زهجتي من القعده هنا ؟ قلت ليهو شديد لمن كشر وشو ضحكت فيهو وقلت ليهو لالا والله م كدا بهظر معاك لكن فكرت كدا احسن يعني لأنو انا يوم بعد يوم بكون قاعده في البيت براي ومثلاً لو قمت بالليل لقيت الكهرباء قطعت او كدا بكون خايفه واحياناُ بخاف إنو في الضلام دا اقوم اطقش لي حاجه تعوقني ساي ..... قال لي فعلاً كلامك صاح م صاح تقعدي براكي اها ومفكره تمشي متين ؟ قلت ليهو والله ياخ ما بعرف لكن الأحسن امشي بعد بكره يوم الجمعه رايك شنو ؟ قال لي قرييييب ياخ م تخلوني براي ح اشتاق ليكم وكرفس وشو ،، ضحكت فيهو قلت ليهو البسمعك بقول مسافرين بلد تانيه ياهو بيت ناس امي في طرف الحله اقل من خمس دقائق بتكون وصلت دا لمن تشتاق لينا طبعاً .

صحي على سيرة السفر امبارح كنت بتكلم مع غيداء قالت لي اوراقهم طلعت خلاص مسافرين السعوديه هي وراجلها واولادها .... قال لي لا ياحليلهم سفر عديل ماشين زياره ول شغل ؟ قلت ليهو راجلها اصلاً شغال هناك لكن المره دي عاوز يسوقهم معاهو مره واحده عشان يكونو جنبو ،، قال لي كويس والله ماشاء الله صحي قبل انسى هاكي الروشته دي انتي عشان بتجي بدري بعدين جيبي معاكي الدواء دا و وديهو لأمي دواها خلص .... طيب تمام .

وصلني الصيدليه وهو مشى بطريقو السوق قعدت شويه جات الدكتورة الشغاله معاي قعدنا نتونس مع بعض قالت لي انتي ح تأجزي بعدا صاح ؟ قلت ليها لمن اخش في السابع حالياً انا م حاسه بتعب ..... بعد العصر كدا طلعت من الصيدليه شلت الدواء معاي وقفت اقرب ركشه ورجعت البيت حاسه نفسي فترانه شديد من القعده النهار كله ،، قلت اتصل لأمين يجي يشيل الدواء م قادرة امش ، اتصلت ليهو رد لي قلت ليهو في البيت انت ؟ قال لي لالا والله في السوق مع احمد نزلت لي شغل محاسبه وهسي جيت لأحمد بجاي عاوزة حاجه؟ قلت ليهو لا خلاص كنت عاوزاك تودي الدواء لماما زينب لكن خلاص م مشكله .

قال لي اتصل لهاله تجي تشيلو منك لو تعبانه ؟ قلت ليهو لا م تعبانه ح اوديهو كلها خطوتين قال لي تمام .... قفلت منو ومشيت دقيت الباب ووقفت مسافه مافي زول جاء فتح قلت اكيد هاله بتكون في المطبخ م سامعه ،، جريت السلك ودخلت سمعت صوت ماما زينب بتنادي على هاله صوتها جاي من على إتجاه الحمام مشيت على الحمام لقيت ماما زينب للحظه هبطت من الخلعه جيت حاولت ارفعها قالت لي وين هاله انتي في حالتك دي م بتقدري نادي لي هاله قلت ليها كدي براحه ياماما زينب امسكي في يدي لمن تحصلي الباب وبعدها اتمسكي في الباب وقومي .

مسكتها من يدها اتشجعت علي وحاولت تقوم سمعت صوت ضهري عمك طق للحظه حسيت وجع قوي شديد فكت يدي وبقت تقول لي يابتي انتي كويسة ؟ غرام ؟ قلت ليها كويسة دقيقه بس انادي هاله مشيت جوا وانا حاسه بألم شديد دخلت البرندا م لقيت هاله مشيت غرفتها لقيتها نايمه صحيتها طلعت وانا بقيت واقفه في محلي داك .... للحظه بقيت ابكي من الخوف جسمي كله بقى يرجف جاتني هاله قالت لي خير انتي مالك بتبكي في شنو ؟ قلت ليها ساعديني اطلع برا .

مسكتني طلعت قعدت برا في البرندا جات ماما زينب قعدت جنبي مخلوعه قالت لي كُر علي يابتي م تكوني اتأذيتي .... مسحت دموعي وقلت لالا ما اتأذيت وجع بسيط هسي بروح ،، لاحظت ليها خافت واتوترت شديد قالت لي نومي يابتي في السرير كُر علي الليله احمد يقول شنو عن امو يابت والله انا م قصدي قلت ليها ياامي روقي انا كويسة .

قعدت نص ساعه كدا الوجع خف قلت ليهم انا امشي بعدا قالت لهاله وصليها قلت ليها لالا مافي داعي بمشي براي .... مشيت البيت حاسه الوجع ماشي يخف قلت احسن انوم حبه خشت نمت م صحيت إلا على صوت ناس بتكلمو برا قمت مخلوعه لقيت احمد جاي داخل قال لي امسيتي كيف يا اوركيدا ؟ قلت ليهو كويسة قال لي كذابه م كويسة بقيت بعاين ليهو بإستغراب جات امو دقت الباب ،، عاوزة اقوم من السرير قلت ليها اتفضلي قالت لي خليكي راقدة يابتي .

جات قعدت جنبي وبقت تبكي انا بقيت بعاين لأحمد م فاهمه حاجه قالت لي والله يابتي انا العملتو فيكي م هين لكن انتي اثبتي لي إنك بت اصول وطالعه من بيت ناس صاح واثبتي لي إنو الحق م على المتعلمه المثقفه الحق على تفكيرنا نحن البنشوف المتعلمه زوله م كويسة .... اثبتي لينا إنو الجهل فينا وانو المشكله م في الغربيه المشكله فينا وفي طريقة تعاملنا والعملتي لي انتي والله البت الجبتها المني وفيني م عملتو لي ،، وانا لو متة هسي ح اموت متطمنه على احمد لأنو معاكي وفخوره بأختيار ولد .

للحظه حسيت دموعي جرن قلت ليها م عارفه اقول ليكي شنو لكن انا اصلاً م زعلت منك ولا بزعل ما انتي زي امي ومافي زول بزعل من امو ختيت راسي على كتفها وبقيت ابكي .... احمد قبل مننا وقال لينا مافي داعي للحظات العاطفيه دي تبوكنا معاكم ،، مسحت دموعي وبقينا نضحك .

يوم الجمعه مشيت بيتنا وخليت الشغل لأنو بقيت حاسه نفسي م قادرة بعد خشيت في السابع بإسبوعين قاعدين مع امي وفاديه في الصاله فجأة حسيت بألم شديد كشرت وشي وختيت يدي في بطني فاديه قالت لي مالك يابت ؟ عاوزة ارد ليها الوجع بقى إلا زايد .... امي قالت ليها سجمي ماتكون ولاده مبكره الله يستر جات مسكتني وقالت لي يابت غرام واجعاك شديد ؟ هزيت راسي بنعم لمن عرقت من الوجع ،، اتصلوا لغانم يجي يوصلنا المستشفى قلت لأمي لا والله م بقدر استناهو بقيت ابكي .

طلعنا برا فاديه جابت ركشه واتصلو لأحمد لاقانا هناك الدكتورة قالت إلا عمليه امي قالت ليها لكن دا ياداب السابع قالت ليها عادي كتار وضعو في السابع .

دخلوني غرفة العمليات وناس امي برا قاعدين على اعصابهم ام احمد جات مع امين قعدت تبكي قالت كله بسببي انا .... امي عاينت ليها قالت ليها قصدك شنو؟ انتي اصلك لو م قتلتيها م بترتاحي ،، ابوي قال لأمي روعه دا كلام شنو البتقولي فيهو دا ياجماعه لاحظو لإننا في مستشفى مافي داعي للنقاشات ... الممرضه جات قالت ليهم فضوا المكان م عاوزين غير زول واحد بس هنا كلكم اطلعوا برا

الفصل التاسع والعشرون من هنا