رواية اسألي عني الليالي الفصل العشرون 20 - بقلم رقية جاسم

قناة التليگرام

حساب الانستگرام

الـبـارت الـتـاسـع عـشـر................

سكتت ماحچيت .. مبين ماتدري صدك .. وانه مااريد احچي اخاف .. جبانة اي .. وحيل جبانة .. خلص اليوم بطلاع الروح ورجعنا للبيت .. ماگدرت انام للفجر .. الموقف بقذارته انطبع ببالي .. لحدما أذن الفجر كمت صليت ونمت ع المصلاية ..

مر اسبوع ماحچيت لأحد عن الصار .. خفت واصلا قفلت الموضوع مايفيدني شي اذا حچيت بي .. ادري الحق حيصير وياه ..

وره هالأسبوع گعدت الصبح غسلت وبدلت دااطلع لگيت رائد كاعد ع القنفة بالصالة المفتوحة ويدخن .. سالم وعامر يمه .. ترخص منهم وگام .. اخذني وطلعنا للمدرسة .. كمش ايدي يبوسها ومبتسم هو ويعاين ع الحلقة ..
رائد : دناوي مشتاگلج شكثر ..
دنوة : انه هماتين وداعتك ..
مسح بإصبعه على خدي .. : يولي شدعوة هالكثر ترف..
دنوة : صدك .. ماادري هو هيج ..
ضحك وكمل طريقه .. نزلني وراح .. داومت طبيعي واجه اخذني .. مكيفة بي ومرتاحة ..

خلصت المواد كلهن .. بقالي انگليزي شهر ثاني ماامتحنت أجلته .. شفت الاسئلة صعبة ماعرفت اجاوب شي .. گلتلي آخر يوم تعالي امتحنچ .. بيومها اجني نسوان ولد عم جدو هن وبناتهن .. ألتهيت بالشغل والطبخ .. ماشفت الغرفة والكتب ابد .. ادور باتن يمنا .. جمعة وسبت مرن بثگل .. عاد بالليل بس طبيت سبحت ونمت .. كعدت الصبح بدلت وكامشة الكتاب افتر رايحة راجعة .. شقره .. هو انه وي البنات ماامتحنت .. هسه اكيد تجيبلي اصعب .. اجه سالم گال رائد بره .. اخذت الجنطة وگعدت ..

انداريتله : رائد ..
رائد : ها حبيبي ..
دنوة : عندي امتحان وماقارية شي .. شلون ..
رائد : اختياري لو شهري ..
دنوة : لا شهري ..
رائد : شعندج ..
دنوة : انگليزي ..
اخذ الكتاب وشغل السيارة .. طلع ع الشارع العام : عندج واجبات لو خلصتي..
دنوة : لا هو انه رايحة علمود الامتحان بس ..
حرك براسه يعني خوش .. مشى شوي چانت اكو سقيفة وجواها سيارتين ومكان مال سيارتين لخ فارغات .. طبگ وطفاها ..
رائد : انطيني قلم وتعاي تگربي ..

انطيته وتقربت منه .. گام يشرحلي ويخلي خط جوه المهمات .. لخصلي القطع وراجعلي القواعد بشكل سريع.. خليت راسي على چتفه واسمعه .. وره ماادري شگد سكت ورفع راسي .. : نعستي..
عدلت گعدتي : لا عادي ..
رائد : يله خوش .. فهمتي لو اعيدلج .. بس أشريلي ..
دنوة : لا فهمت زين..
رائد : عفية .. شاطرة بنيتي ..

وصلني للمدرسة بثمانية ونص .. ساعة هو يشرحلي ..
گتله بخوف : شلون حمتحن .. مايصير افوت هسه ..
رائد : نزلي حبيبي .. هسه احاچيها تمتحنج وانه انتظرج بره خلصي وطلعي اوصلج بعد لاداومين گعدي راجعي..
دنوة : ماشي يله ..
نزلت وهو نزل وياي .. المديرة طلبتها واجت .. حاچاها گالت ماكو مشكلة .. رحت وياها امتحنت .. جاوبت الفهمته من شرح رائد .. بس القطع موهلگد .. صححتها جدامي ونزلت الدرجة .. بالسبعين .. هم نعمة .. طلعت فرحانة هو گاعد على كرسي بالانتظار ..

اخذني وطلعنا ..
رائد : حبيبي تحبين تروحين لمكان .. حتبقين بالبيت تحتصرين فترة..
دنوة : ااممم .. براحتك مااعرف ..
رائد : لو بغداد قريبة چا اخذتج للجادرية ..
دنوة : اوي خيولي .. اكره هالمكان ..
رائد : ليش يولي .. تره حلو ..
دنوة : اي هو حلو صحيح .. بس انت چنت ضايج ومااحب اشوفك هيج ابد ..

ضحك وحاوطني من چتفي قربني لصدره ويسوق بإيده اللخ : الشغلة اللي مستحيل اشوفها يم غيرج .. حبج البريئ .. ادري بيج خجولة فماتحچين .. وإن حچيتي حيكون بطريقة بريئة مثل هسه..

ابتسمت واكتفيت بالسكوت .. ريحته ترستني بمعنى الكلمة هالمرة .. عرفته شيفكر ماگمت اخاف منه لو افكر تفكير غلط بحقه .. ضل يفرفرني ويسولفلي ..

وره نص ساعة هيج .. خابروا علي يريدونه بشغلة .. رجعني للبيت ..
بالباب گال : حبيبي خاف يسألوج ليش جاية هسه گليلهم امتحنت امتحانين فتأخرت .. زين ..
حركت راسي بالموافقة ونزلت .. نزعت الحذاء وطبيت تفاجئوا من رجعتي هسه .. خصوص بالعشرة وشوية ..
خالة فاطمة حچت من يمها شافت ابوي گاعد تريد تگببه علي : شو هسه راجعة .. اكو دوام يخلص هسه اول مرة ادري..
دنوة : بس امتحنت ورجعني رائد ..
فاطمة : واليمتحن ساعتين ونص.. حتى الوزاري موهيج..
محيي : شقصدج لمن تحچين على بتي هيج .. لاتدخلين خوية انه ابوها اسألها ..

اندارلي وحچه بنتر : ساعتين ونص تمتحنين بابا ..
جاوبته بثقة : لا بابا امتحنت امتحانين .. انگليزي واسلامية .. وتعرف بعد الاسلامية طويلة وكلها شرح..
محيي : ورائد وين..
دنوة : راح وخابرته من المديرة اجه اخذني..
گام ودگ ع الميز بإيده : خوش ..
عافني وراح ..

طبيت للغرفة بدلت وضميت الجنطة .. تمددت ورجعت نمت نعسانة..

مرت الأيام طبيعية .. انه ورائد ضالين بس ع التلفون .. وبالليل همات مو بأي وكت .. بلشت أراجع واشتغل بالبيت .. مااريد ابوي ياخذها حجة ويبطلني ..

مرة من الصبح دنخبز وره البيت وصوت صياح عالي بره .. راحت سرور ادحدحت تسمع شكو .. اشوف نسوان عمامي كل وحدة منهن خايفة على ولدها .. وجدة خايفة على عمامي .. شواي واجت سرور ..
ابتسام : ها يمة شكو ..
سرور : جماعة كاتلين واحد ومهران (ابن عمي كاظم) داخل فازوع .. ادور ذابيها براسه وهسه جايين يردون حگهم .. يا يكتلونه يا يدخل السجن ..
الحجية غادة : يداده سودة مصخمة .. هو اليسوي زين مايردونه .. هو النبي مارادونه ادور الوادم ..
فاطمة : زين شصار هسه خالة..
سرور : ماادري طبيت بعد .. بس جدي طلع يحاچيهم ويجيب مهران ..

بقينا اليوم كله مشدوهين .. ناس تفوت وناس تطلع .. بيتنا هوسة طول الوكت .. حتلو الفجر .. بنص الليل اذا اندگت الباب مانبقيها مسدودة .. هاي بالحصار چنت فاطنة واتذكر چم شغلة .. تجي نسوان تبچي يم جدو .. تگله ماعندي فلوس ورجل مفقود بحرب ايران وهاي جهالي ماعدهم اكل .. لو اللخ رجلها شهيد .. اشكال الناس .. فهو چان يساعد وينطي .. ناس ماعدهم فلوس ايجار يجون يباتون بمضيفنا .. الدنيا كلشي بيها ..

مشى اليوم لحد بالليل انفضت بفصل ومهران اعتذر منهم ولو هو مامسوي شي بس هذول عراكة ومسودنين .. ففضوها بالموجود وطلعوا .. لمن طلعوا ماصدگت هلهلت .. تعبت رجليه صارن خيوط .. عاد خبزنا للعشه وغسلت مواعين رحت نمت رأسا ..

وراها بفترة گاعدة بالليل بالغرفة دااسوي جدول للمراجعة .. كلساع تتخربط علي مدااضبط .. دگ التلفون .. جريته من المجر .. رائد ..
ابتسمت وفتحت خط : امم.. هاي منو يسمعني صوته ..
ضحك بتعب مثل نبرة ذاك اليوم : شلونج حبيبي ..
دنوة : زينة الحمدلله .. انت شلونك ..
رائد : على الله .. دتراجعين لا ..
دنوة : اي .. شبيك احسك ضايج ..
رائد : مشكلة بسيطة ماكو شي ..
دنوة : اكيد .. احچيلي الصدك تره والله اخاف عليك..
رائد : اي بنيتي لاتخافين ماصاير شي .. بعد اسبوع انزل اجازة واجي اشوفج.. مشتاك لعيونج ..
ضل يحاچيني ويتغزل مثل عوايده .. يضحك لمن مااجاوبه .. احس الكلام يضيع شسوي ..

بهالأسبوع طبيت للاستقبال ارتب الكوشات .. دخل ابوي يصيح ويغلط .. يبست بمكاني .. شكو ياستار .. اريد اراجع روحي شمسوية حتى الافكار طارت من بالي .. اجه يمي كمشني من دشداشتي وسحلني للغرفة .. شمرني وراح ع الكنتور فركشه تفركش ..
صاح : لبسي بالعجل .. هذا ابن ال.... ال.... يلعب علي بگد القندرة .. اليوم اشوفه نجوم الظهر ..
بقيت واگفة بمكاني من الصدمة مداافتهم شديصير .. عليمن يقصد .. اندارلي وعاط بوجهي : لبسي بت النعال..
لبست شال وعباية فوگاه .. شفته سحب الذهب وجرني من ايدي طلعني .. جريت ايده مااريد اطلع ..
دنوة : بابا فهمني شكو .. سويت شي غلط ..

كمشني من قراصة شعري وسحلني بقوة : انتي كلچ غلط من ساسج لراسج .. امشي ولا حرف منعولة الوالدين..
گمت ابچي واتوسل بي .. شمرني بالسيارة وصعد هو من الجهة اللخ .. شغل وساق بسرعة جنونية ..
دگ تلفونه .. شاله واسمعه شيحچي : اي شيخنا .. هسه جايك دقايق ..
كمشت ايده بخوف : شحيصير شدسوي بابا..
اندار خزرني : اليوم اطلگج منه .. والبيت ينباع .. خيسدد دينه عود .. جاييني الديانة لباب محلي .. من اشتعلت لشة هيج نسيب فاشل وحيال ..
دنوة : بابا هو گال ديسدد لاتسوي هيج ..

ضربني راشدي ويكفخني : ليش مااسوي .. تحبينه لج منعولة.. ادور علي الزعاطيط تحب وتتمعشگ..
سكتت ماجاوبته .. اخذني للمكتب العقاري الاشترى منه البيت .. الشيخ موجود والرجال ابو العقار وبعد ثنين .. مسحت دموعي وطبيت مدنجة مارفعت راسي ..
- : ابو دنوة اذا بت مجبورة مايصير .. وهذا طلاق ..
محيي : شيخ الرجال موخوش .. ترضا بنتك تروح لرجال موزين.. اريدلها الزين بعدها ماتفتهم ..
- : انت ادرى بعد ..

گعد بسدي وگرصني من زندي .. همس : سويني وكيلج علمود اروح واخذ الشيخ لهناك يطلگج ..
دنوة : بابا لاطلگني منه .. احبه ..
عيونه صارت بگصته .. تخبل .. رزلني واستغلني برائد .. خليته وكيلي .. يگدر هو يطلگني .. ادور طلعلي اوراق مااعرف ماليش گال وقعي .. وقعت وايدي ترجف .. عيوني مغرغرة دموع .. بس انتبهت على اسمه مكتوب يمه الوكيل .. كمش ايدي بقوة وضاغط على اصابيعي .. وقع بمكاني وگمت .. رجعني للبيت وراح هو والشيخ ..

طبيت جوه فحطت بچي واشهك .. الدنيا صغرت بوجهي .. اريد هوى اريد اتنفس مدااگدر .. ادور هذني النسوان ملتمات فوك راسي .. اذا اكو نفس فهنَ حيسدنه علي ..
خالة ابتسام اجت كعدت يمي ووخرتهن .. غسلت وجهي بمي بارد هي وتقره على راسي : اسم الله حبيبتي شبيج يمة..
اسمع صوت جديتي تكش بالبنات .. كمت مااميز بس اريد اشوف رائد شحيسوي .. حيقبل .. لبدت بحضن خالة وابچي بحرگة : خالة يريد يطلگني من رائد ..
شهگت وخلت ايدها على صدرها : ليش ياستار .. شسوى الرجال .. اشو حتى مديجي يشوفج..
دنوة : خالة ماادري .. احبه عفية لايسوي هيج بيه .. والله احبه ..
سدت حلگي وهمست : اشش لايسمعنج ييمة مو بصالحج صدگيني..

سكتت بس ابچي ودموعي تصب .. بقت گاعدة وياي .. تيهت الوقت والمكان .. شحيسوي لرائد .. ابوي حيأذي ماعنده مانع .. حيستغل ان هو صاحب مبدأ واخلاق ماتسمحله يشتكي على عمه فيخلي يطلگني .. ليش يعني ليش .. حظي القذر ماادري منين ملموم .. ساعات ضيعتني من واقعي والدنيا كلها .. بطني گامت تگرصني من الجوع بس مااشتهي .. لعبانة روحي من كلشي .. حبيبي هو حسسني بقيمتي .. بقدرتي ع الاحتواء والحب .. شلون مدااصدك .. مااصدك اخسره ..

جدي ساكت ماگال شي .. اريد اعرف شصار .. ليش هيج محد اهتم .. مو كلهم يحترمونه ويحبونه .. شنو الخلاهم يتنازلون عنه بالعجل ..

وره مااعرف شكثر .. واگفة بالمطبخ دااشرب ماي .. اجت جدة بيدها التلفون انطتنيا بلا ماتحچي شي ..

اخذته منها مامفتهمة شكو ..
جاوبت : الو ..
اجاني صوت ابوي يرعد : ها بت السگط .. انه يم رائد هسه والشيخ يمي .. مايقبل يطلگج .. حفتح حاكية وچنچ دتحچين وياي .. گليلي مااريده وانه خليتك وكيلي علمود اطلگني ..
دنوة : بس بابا ...
محيي : لابس ولا مس .. تسوين الاگوله لا اجيچ هسه اعلگج بالبنكة .. تحچين طبيعي بدون عوي وبچي خوش..
سكتت ماجاوبته بس ابچي .. شلون يعني حجني على روحي وماادري وضع رائد شنو ..
عاط بيه : خووووش ..

ماانكر خوفي منه وسيطرة رأيه وفرضه علي .. طاوعته وقبلت ..
گال : يله حفوتله وانتي احچي رأسا ..
اسمع صوت خطواته رايح لحبيبي .. مااعرف وين ماخذه .. ليش هيج ديهدده .. شمسويله .. گلبي صار نار علي ..
حچيت بنبرة قوة مااعرف منين اجتني .. حسيت انتهيت خلص .. هدمت كلشي بيدي .. سده بوجهي .. انطيته لجدة وضليت ساكتة حتى دموع مانزلت مني..

المغرب سمعت صوت الباب انفتح .. گمت رأسا .. اريد اسمع شي يفرحني .. بلكن چان كلشي حلم .. شي مو اكيد .. اي شي .. والغرگان يچلب بقشة ..فات ابوي وياه عمي قاسم وفيصل .. وگفت وره محجر الدرج ..

اجه جدي يحاچي : ها شسويت ..
محيي : طلگتها .. اسبوع ويجي عقيل يعقد عليها .. لاخطوبة ولا صخام .. هواي احترمتها ..
عصام : عمي شصار .. ليش طلگتها ..
محيي : دخيولي هذا الملعون .. اسأله شكد سددت من الدين يگلي دااسدد لاتشيل هم .. هاي صار ست شهور .. ادري شني هالدين هذا مايتسدد .. ماانطي بنتي لواحد مديون .. شمدريني شيسوي بيها ..
سالم : عمي انت على عيني وراسي والله .. بس الدين صعب وانت ابو سوگ بعد أعرف..
محيي : هاهيه طلگتها .. مايستاهلها .. رجعتله فلوسه وذهبه وعود بفلوس البيت خيسدد الدين ..

دموعي حجرت بعيوني من كلامه .. متناقض .. كره وحب وحقد بنفس اللحظة .. مايهمني .. چنت واگفة بباب غرفة ظلمة ومچلبة بإديه ثنينهن بقوة .. الظروف وابوي وعمامي الكل يدفعني يريد ادخلها .. بس بعدني كامشتها وأقاوم .. لحدما تلقيت دفعة صغيرة .. مكتوبة بإسمي .. بإسم حبنا .. بإسم ايامنا وكلشي يخصنا .. بإسم وعودي اله ان اضل وياه .. طبيتلها وگلبي محفور من القهر والظلام الدخلتله ..

من الصدمة والموقف المهول .. ايدي رجفت وراسي يفتر .. گمت ابچي بحرگة .. كمت اهمس بيني وبين روحي : ليش بابا .. ليش ..
ضليت اكررها الى أن صارت الدنيا ظلمة ماحسيت شصار بعد ..

لگيت روحي داافوت لمستشفى .. ماادري شلونها .. مصبوغة بأسود مو أبيض .. مابيها مرضى بس دكاترة تفوت وتطلع .. شفتهم يضحكون ومتونسين .. بس واحد واكف بعيد مخلي ايده على عيونه ويبچي .. رحت يمه وهيج لا أراديا نطقت : دكتور وين رائد ..
عاينلي هو ويمسح دموعه : يتأخر ..
دنوة : شلون يعني .. وينه .. هو عمو كال بهاي الغرفة ..
انه ودااحچي وياه سمعت صوت رائد بالغرفة يگح بصوت عالي چنه مختنك .. گحة فارغة مابيها شوائب .. ينوح ويون بتعب وهمس : ياياااابة .. تعبااان ..
اريد افوت اشوفه كمشني الدكتور ويجرني بره الغرفة

فزيت لكيت روحي بغرفة جدة .. ماادري بيش الساعة .. بس ماكو ضوة من البردة .. بالليل يعني .. انتبهت ابوي هنا .. رفعا راسي عاينتله .. چيت وضميت راسي بحضن جدة .. كامت تمسح على شعري..
حچه بنبرة صوت حادة : شون صرتي ..
ماجاوبته .. بس ابچي .. مااريد اسمع صوته .. صدك أذاني هواي .. بس هاي الضربة ماتتعالج ..
الحجية غادة : يمة چا نطيت مجال للزلمة .. مو هيج على غفلة ..
محيي : ع شنو تقصدين .. اذا ع الطلاك انه نبهته اربع شهور اذا ماسدد الدين اطلگها منه .. بس البيت ماكتله .. هو بحساب بيتها شله علاقة .. بكيفها تبيعه تبقي ..
الحجية غادة : يمة انت جبرتها .. اتقي ربك مايصير .. الرجال بعده حتى مامسدد الدين وانت چروب بعته..
محيي : نعلعلا عرضه .. خيولي ولا اطيقه .. شكد ما اكره ابوه بس هو اكثر .. فرخ البط بعد ..
سكتت ضلت بس تستغفر وتكول الله يهديك .. اجه يمي جر إذني : بعدج تردينه ..
ماجاوبته .. عافني وراح .. كمت وراه سديت الباب واجيت كعدت بالگع وحاضنه إدين جدة : احچیلي ابوي شسوى برائد .. جدة گلبي واجعني علي .. احبه ليش هيج يسوي .. حتى تحلمت حلم موزين بي ..
الحجية غادة : شتحلمتي حبيبة ..
كمت ابچي واغص بالحچي .. هي عيونها مدمعة على وضعي وتهدي بيه ..
دنوة : جدة احچیلي حبابة لاتضمين عني .. شسواله ..

جرت نفس وحضنت راسي بإديها : أبيچ ماخذه لبيت واحد صويحبه ماادري منهو .. كاتله ومدمي .. جابره يطلك .. بس يجدة تره الزلمة مامتنازل عنج الا ماخذي للمستشفى بعد شنهو البيده يسوينه ..
عاينتلها مصدومة : وهو ماسواله شي ..
.. الحجية غادة : راد يشتكي علي بس يروح اربعة ارهاب فساكت بس جدج هسه عرف وراحله لبيتهم
دنوة : مو كلتي راحله لبغداد .. شون اجه ..
الحجية غادة : وج شمالج .. لمن راحله لبغداد چان هستوه طالع من دوامه .. فهو ماخذه ورايحين لبيت صويحبه خاطر يطلك .. تدرين بي شون چلّب بيج علما عقد عليج .. فماقابل يطلك .. تالي كاتله وهو ضغطه صاعد نقولنه للمستوصف بالعجل .. بين ما مصحصح أبيچ ماادري شحاچي وي الرجال ومتنازل ومطلك .. ادور راجع بعد مايدري بي .. بس جدج تعرفينه شونه .. كال بسك وين رايد .. خابر رائد يريد يفتهم منه .. فهو گایل عمي هيج وهيج سوى .. هالحچي هو راجع للبيت .. جماعته مرجعي .. واحد منهم رايح للمركز يريد يرفع دعوة على محيي عاد جدج خابره اعتذر منه .. گله اتنازل عن القضية وانه جايك لبيت أبوك .. هسه هو يم حامد ..

گلبي يدك بقوة وانفاسي تثكل وي كل كلمة اسمعها .. ابوي لهالدرجة حاقد ويكرهه .. ليش والله مايأذي ونفسه طيبه بكلشي .. حضنتها وابچي بحرگة .. اسمع صوت النسوان طابة طالعة .. ها يحسرة طلكها .. ها ابوها شنو من رجال حتى نسيبه كتله .. ماادري شلون حاسبين الرجولة بالضرب والكتل ..
كل هذا مايهمني .. اريد اشوف رائد شلونه .. مديت ايدي جدام عيني مالكيت الحلقة .. مااخذها مني لمن رحنا للمكتب العقاري ..

عاينتلها وابچي : جدة وين الحلقة ..
الحجية غادة : اخذها ابوج ..

عفتها وكمت للغرفة روحي لايبة .. ماادري شسوي .. اريد اطلع منا .. مختنگة من الحيطان .. من الشباچ الشفته يمه دائما .. سودة علي.. اكيد تعبان هسه .. هو دائما مشدوه باله من وره الدين وديسوي العلي .. محد اهتم لرأيي واحساسي .. بس الصدمني من هذا كله عقيل .. اكرهك واموت منك .. شلون اعيش وياه مااكدر نفسيتي ماتتقبله .. هو حتى اكبر من رائد ..
ضليت كاعدة واندب حظي .. اجت سرور هي ونوارة .. درت وجهي ساكتة ..
سرور : شون صرتي حبيبتي .. خوما يوجعج شي..
ردت اگللها گلبي يوجعني .. : لا مابيه شي .. سرور رائد ..
حچیتها وبچيت .. اجت يمي حضنتني وتمسد بشعري ..
دنوة : جدو رجع لو بعده هناك ..
سرور : لا بعده هناك .. بس ابوي خابره كال على جية ..
رفعت راسي عاينتلها ودموعي بعيني : ماكو أمل يرجع مو ..
ماجاوبتني بس تهدي بيه ..

مشى الوكت الى أن سمعت صوت اكثر من واحد دخلوا للبيت .. كمت بالعجل وكفت وره الباب اسمعهم ..
محيي : ها بوية شسويت ..
جدو حچه بعصبية : انت شمسوي بالرجال .. والله عيب عليك وحريمة .. اي والله حريمة هيج .. مخرط وجهه ماكلت وراه حميد يگلب الديرة على راسك من عساها مكلوبة ..
محيي : هسه شني بوية لاتلومني .. رائد موخوش وانه مااريده انتهت بعد ..
شامخ : ماتريد على عيني وراسي .. بس طاگه ومعوره ليش ..
محيي : والله اسحگه بالسيارة همات ماعندي مانع ..
شامخ : گم من جدامي انت منين اكلت .. شني بحشاك .. حريمة ضاعت سنيني والله حريمة .. يول ابن أخيك هذا .. رجال بنيتك .. شمالك انت مسودن ..
فيصل : على كيفك بوية سكرك .. هاهيه خوية انفضت والزلمة طلك بعد .. بس مايدري بالبيت دينباع ..
محيي : واذا درى .. عساس يهمني .. انتم مسويله مقام اكبر من مقامه بالله ..
طلع ورگع الباب وراه .. طبيت وانتچیت عليها .. هيج يعني .. دموعي تصب مثل النهر على خدودي .. حضنت رجليه بإديه وراسي بيناتهن حاضنته بقوة مامصدكة هيج كلشي راح بالعجل .. وانه كبل اسبوع جنت سهرانة على غزله وكلامه ..

مر اليوم بطلاع الروح .. بس ابچي .. حتى مااكلت .. تلفوني ماكو .. ابوي اخذ كلشي .. بيا عين اخابره هسه .. فوك ما ابوي مدمي ارجع أطمن علي.. حتى زحمة .. قررت مااخابره بس حخلي سرور لو نوارة تتصل بي اطمني عنه .. ماكو غيرها ..
بالليل صبوا عشة اجت ورود تصيحني ..
ابوي من يمه عاط : عوفيها عساها تاكل سم وزقنبوت ..
عافتني وراحت .. كمت للحمام قفلت الباب وطبيت جوه الدوش .. جسمي حار وراسي يفور من الأفكار والقهر .. عيوني كامت تغوش .. كمشت البوري وكعدت والمي يكت علي .. اريد يبردني محترة ومفورة .. شبيدي شكدر اسوي .. مااعرف شكد بقيت .. بس اسمع صوت خالة ابتسام برة تصيحني .. كمت لفيت روحي بخاولي وحاچیتها
دنوة : خالة جيبيلي هدوم ماجبت ..
ابتسام : اي هسه ..
خلت وراحت .. وره شوي دكت الباب انطتني الهدوم وراحت .. سبحت وطلعت للغرفة قفلت الباب وكعدت .. الدنيا حارة وكهرباء ماكو .. مااهتميت .. روحي تسعر انتهيت .. شلونه هسه .. بس هالسؤال يواريني ..
بالليل بالثنتين ماسمعت صوت أحد .. كمت صعدت فوك يم سرور ونوارة .. فرشت الي ونمت ..
هيج مر اليوم واليوم الوراه .. رحت وي ابوي مرتين علمود بيعة البيت .. بقت بس سوالف الطابو ونقل الأسم بآخر خطوة اجي أوقع وينقل كلشي .. بيومها رحنا للبيت تكاتبنا مو بالمكتب .. چي جمعة وحظر تجوال فإجراء احترازي يعني .. اول ماطبيت تخايلته كاعد ويندهني أسد الباب .. تذكرت ذاك اليوم شلون چان تعبان وبالگوة يحجي .. تكاتبت وطلعنا رجعنا للبيت ..

بمرور يومين كاعدة بغرفة خالة ابتسام جاي نفر الچربایة واجت صاحتني .. كالت لهي روحج لاتضلين كاعدة .. احنا ودنشتغل مر عمو لواء من باب الغرفة يخابر ويحجي بحرگة ..
لواء : شون يمعود .. وين انت .. هسه جايك مااتأخر ..
ضليت اعاينلها وتعاينلي بإستغراب ماندري شكو .. طلعت نوارة حاچته ..
نوارة : شكو عمو شصار..
لواء : رائد داخل غيبوبة من البارحة بالليل ..

مثل المچلب بـ قشة بالبحر واجت موجة قوية خلته جواها .. صار يدور وي مجرى مياهها .. مسلّم أمره الها .. شوكت ما تهدأ وينزل .. مايدري اذا حينقطع النفس لو يكدر يسعفه حتى يوصل للشاطي .. بس روحي خلصت وأنفاسي انقطعت نهائيا .. من الصدمة حتى دموعي مانزلت .. طلعت أمشي وأعاين عليهم شلون مخبوصين ويخابرون مااعرف منو .. فلان وفلان .. اريد اشوف حبيبي .. ديچذبون علي .. مابي شي .. شلون يدخل غيبوبة .. مستحيل .. مدااصدك .. ياربي هواي صدمات مدااتحمل ..
لحد هاللحظة صامتة .. النسوان منها تدعي ومنها ملتهية وي عمامي .. الى أن طلع جدو مخبوص وصاح على عمي قاسم وكاظم طلعوا وياه .. اجه ابوي هو ويدگم الدگم مالت القميص الفوگانیات .. راد يطلع .. هنا صحيت .. فقت من البنج التبنجته بسبب هالخبر الصادم .. بچیت بصوت ورحت يمه كمشته من ايده ونظراتي كلها توسل ..
دنوة : اخذني .. اريد اشوفه ..
خزرني وعصر زندي بقوة .. هو ياخذني بإتجاه الغرفة وانه روحي توديني لباب الكليدور .. اريد اطلع .. اموت اذا ضليت هنا .. روحي شاغت علي .. عتيت ايدي بقوة منه وعدلت الشال .. دموعي كامت تصب بغزارة : بابا اخذني ابوس ايدك .. مااتحمل والله احبه .. حيصيرله شي وانه بعيدة ..
دفعني حيل ع الغرفة ويصيح .. النسوان اجت على صوت صياحه ..
محيي : ام سالم كمشيها خلأطلع ..
ضغطت على معصم ايدي تريد ادخلني جوه .. كمت أعت بيها وابچي : لاتكمشيني خالة حرام عليج .. لاتروووح اخذني وياك..
عاينلي ينظرة أخيرة .. ماكدرت افسرها اذا جان مقهور علي لو على رائد .. لو على ظلمه إلي.. تركت كل هذا بس اريد اروح .. خالة صحيح موحيل چبیرة بس ماتكدر لوحدة بعمري شابة بعدها .. كمت ادفع بيها واصيحه لايروح بدوني .. مااحس غير بإيد سرور وورود كمشني .. عطت بيهن : لج هديني .. حبيبي حيصيرله شي .. وخري حرام عليكم عوفوني .. جدة عفية تعاي اخذيني ..
الكل بچى على حالتي والنوبة الهستيرية الدخلتها .. غيبوبة .. شي چبیر مو كلمة وتنكال ويتخلى وراها نقطة وانتهى .. حلمت بي حلم موزين .. اي هو هذا تفسيره .. مابي شي .. هسه يكعد .. هو وعدني مايروح ..

فزيت على صوت الباب انرگعت طلع ابوي .. بقينا بس احنا النسوان ومهران .. عاد هدني .. طحت من طولي .. ماتخيلت رجليه ماتعيلني بعد .. عبالك الجزء السفلي كله إنشل .. اجت نوارة تريد تگومني .. دفعتها وعطت : اكرهكم كلكم .. حرگتوا گلبي ليييش .. ماتحسون انتو ..
ضلوا على راسي اريدهم يرحون لطشوا .. اختنكت حتى بالهوى انه واتخيله شلون نايم هسه مايحس بأحد .. تمنيت روحي طيرة وتروحله .. تشوفه شلونه .. تبوس خده وتطمن علي .. هو شكدما صلب من بره بس حنين ويحس بالكل ..
ضليت ع الوضع هذا مااعرف شكد .. البنات كلساع وحدة طابتلي .. آخر شي حسيت ماكو خصوصية كلها تچفت على غفلة .. كمت للمطبخ اريد أغسل .. نسوان ولد عم جدو يعاينن علي بنظرة غريبة ..
اسمعهن يتهامسن : تحبه ويحبها .. مدري شلون انطوهيا ..
اللخ تجاوبها : شوفي اكيد الله مايجرعه بحيث أخذها ..
بس هي حلوة .. عاد انتن شايفاته ..
بتهم الصغيرة بكدي تطلع .. كالت : اي يوم انه شايفته .. حلو يجنن وضابط ..
اي چا هنا الحچي ..بس خطية سمعت داخل غيبوبة ..
اي ماندري شكو .. هسه ترجع الزلم ونفتهم ..

ضلن يحچن .. راسي صار طبل من كلامهن شلون يحچن جدامي وعادي ولا چن .. انداريت وخزرتهن : شكد تحچن .. دخت كافي كافي ..
اجت جدة تريد تهدي الوضع : يله حبوبة روحي وي ام سالم حبيبة انتي تعبة (تعبانة)..
عفتهن وطلعت سمعتها ترزل بيهن .. الگبر شگد قنقينات .. رحت كعدت بالهول وألوب رايحة راجعة .. ماو غير سالم احاچي .. هو حيحچیلي .. عدلت الشال وطلعت دموعي بعيني أدور علي .. سمعت صوته بالحديقة الورانية .. طلعت شفته واكف ديخابر .. وكفت يمه بين ما خلص حچي واندارلي ..
سالم : ها خيتي گولي ..
دنوة : رائد شلونه .. فدوة بس احچي .. ليش دخل غيبوبة ..
سالم : ماادري شگلچ .. هو سامع ابوج ديمشي بالوكالة مال بيع البيت ومتخبل .. طالع من بيتهم مشي يريد يجينا .. ممنوعة علي السيارة لأن سكره مهدد يهبط بأي لحظة .. يعني بداية سكر .. هو طالع وبالطريق متخربط وطايح بالگع .. سيارة رايدة ادوس علي ..
شهگت حتى ماخليته يكمل : شصار بي .. خوما انكسرله شي ..
سالم : لالا .. مامكسور الحمدلله بس صاير عنده رض من الطيحة .. عاد الرجال خيّر فأخذه للمستشفى سووله فحوصات ومااعرف شني يعني شغلات طبية .. كالوا غيبوبة سكري .. سكره هابط فد دور ..
عاينتله وطگیت بچي .. سودة علي مااكول غيرها .. كمت أشهك من القهرة ..
سالم : دنوة خوية فوتي جوه لايجن هذن النسيوات بس يحچن ..
عفته ورحت طبيت .. انه طاوعت ابوي ورحت وياه للمكتب ديبيعه .. هو بعده حتى مامسدد الدين ادور انباع البيت ..

بقيت گاعدة بالمطبخ .. بالركن وخالة ايدي على خدي .. دموعي تنزل بدون صوت .. محد اجه من الزلم لحد الوحدة بالليل انفتحت الباب ودخلوا .. گعدوا بالصالة المفتوحة يحچون بي .. عفتهم وطبيت للغرفة .. ضليت گاعدة للفجر ابچي وادعي .. صليت شگد .. لحدما تعبت ونمت ماادري بروحي ..

رائد .....

آخر يوم شفتها عدها امتحان وماقارية .. اعاينلها شلون متوترة وخايفة .. اخذت الكتاب منها لخصتلها وشرحتلها .. هي مخلية راسها على متني وتسمعني .. چنت لابس تشيرت فمفتوح من يم الرگبة .. أنفاسها تخللت رگبتي .. هادئة ومنتظمة .. حسدت روحي شلون گاعد بهدوء وكامش اعصابي .. وره ما خلصت عاينتلها صافنة على ايدي شلون دااكتب .. عيونها نعسانة بعد شوي وتنام .. ابتسمت عليها واخذتها للمدرسة .. ردت اضل اكثر اشوفها واشبع شوف منها .. مستغرب بنفس الوكت محيي ساكت مايگول شي ولا يطلعلي سوالف منا ومنا .. گلت اكو شي مستحيل يسكت اعرفه .. وصلتها وبقيت واگف اعاينلها شلون تمشي .. عدها عادة لمن تمشي تمايل بروحها .. كلها ترافة وأنوثة من فوك ليجوه .. وانه زلمة على گد حالي .. تذوب روحي بهيج انسانة ..

تانيتها تدخل ورحت .. يومين والتحقت .. قفلت التلفون .. گامت الديانة ع التلفون يخابروني .. لو يجوني للمقر .. لميت ايدي من دخل المحلات والراتب سددت واحد صاحبي تلث ملايين .. صح المبلغ الباقي چبير بس اذا اضل على هالمنوال اسدد واخلص .. محل الانشائية من ذيچ المرة اجه الشراي ماقبل بالسعر فراح بعد .. ومو بسهولة تصير البيعة قابل هو بيت .. باب رزق يعتبر ..

وهاي ضليت هيج .. من فلوس المحلات اسدد والراتب بنهاية كل شهر .. حسيت عگدة الضنك والتفكير بدت تنفك بيسر وسلاسة .. والحمدلله ..

بيوم طبيت ارتاح الصبح .. چنت خفر بالليل .. جريت التلفون فتحته خابرت امي گالت انه ببيت خالك محسن .. لمن ترجع مر أخذني .. گتلها اي بس ماطايق افوت لبيت خالي .. من وره جوان .. باليوم العرفت بي خطبت وعقدت تخبلت .. وانه شلون .. ماادري شجاعلة روحها وانه حتى مااعاينلها .. اطب واطلع على اعصابي ..

لگيت دناوي مخابرتني .. الوحيدة التروحلها إديه ورجليه وكل جارح بيه بإرادته .. دگيت عليها .. ضل يدگ..
گبل لايفصل جاوبت بنبرة طفولية بيها حب ولهفة : حبيبي واخيرا فتحت تلفونك ..
رائد : حياتي انتي .. والله مشغول .. شلونج گلبي ..
دنوة : ااممم .. زينة كلش .. بس مشتاقتلك ..
رائد : انه اكثر وداعتچ .. شكو ماكو .. شصاير بالبيت..
دنوة : ماصاير شي يعني عادي .. بس ابوي ساكت كلش .. فخايفة منه..
رائد : والله انه هماتين خايف ..
دنوة : هههههههه .. لا عزه عيب شنو تخاف .. حبيبي شخبار الدين طمني ..
رائد : لا الحمدلله لاتخافين .. عوفينا منه .. تره روحي طاگة عليج .. اريد اشوفج ..
دنوة : شوكت تجي ..
رائد : هاليومين انزل .. بس مااريد افوت .. اخابرج وطلعيلي ..
دنوة : لا عفية اخاف هيج .. خو تعال احسن ..
رائد : يولي هسه ابوج يطلعلي سالفة صفح .. اشوفج بالگع القريبة على غرفتج ..
دنوة : يله اذا هيج زين .. لمن تجي گلي ..
رائد : ماشي حبيبي .. حروح انام ..
دنوة : يله على راحتك ..
ودعتني وسديته ..

مرت اربع ايام بهالحدود ونزلت اجازة .. كل يوم احسب بعد شگد ضل وتجي امتحاناتها .. اريدها تخلص .. كلما تطول الفترة كلما دااحس اعصابي تلفت مني .. مو علمود شي .. بس أبوها ساكت مايطمني .. ادري بي ديدور وراي ع الدين .. كل مرة يسألني شگد سددت .. طبيت انام اجت اخلاص سدت الباب وراها وگعدت ..
اخلاص : اريد احاچيك ..
رائد : احچي شعندج ..
اخلاص : عوف دنوة .. عفية شحبيت منها .. هسه هي حلوة يعني مقبولة بس شدعوة هيج لازگ بيها .. شوف روحك شون ضعفان ومابيك حيل ..
رائد : هسه انتي وياي لو علي ..
اخلاص : لا وياك طبعا .. فلهيچ دااحچي علمودك يعني .. دااشوفك صافن اكثر الوكت .. اكيد الدين مضوجك ..

عاينتلها بنظرة باردة .. : شنو مناسبة الموضوع .. اريد انام..
اخلاص : شو انت مامهتم .. ولاچن اختك دتحاچيك ..
رائد : اشو تصيحين بوجهي .. شفتيني ساكت ..
نصت راسها وتفرك بإديها : لا اعتذر.. بس غير خايفة عليك..
رائد : لا لاتخافين..ماكو شي مرتاح اصلا ..اكثر من هذيج الفترة..
اخلاص : ها الحمدلله .. بس ردت اطمن عليك والله لاتفهمني غلط..
رائد : فاهمج عدل .. جريت الغطى تغطيت ودرت وجهي : طفي الضوة عود..

گامت هي وتحاچي روحها .. كل العائلة عصبية بس انه طالع هادئ على ابوي .. الباقين ترشه ماي يرشك دم مدري شكو .. يابة ولا اجرع الأعصابهم نار ..

وره يومين تلاثة رحت لبيت جدي المغربية .. عمي محيي ماچان موجود فأطمنت .. انطيت خبر لأبوي حبات عدهم .. يمكن كل الأيام البتتها عدهم بس بالفترة التهددت بيها .. وراها رجعت لبيتنا .. بس هسه لخاطر دناوي اريد اشوفها ..

بالليل گعدت بالصالة وي الولد بعدين راحوا لغرفهم .. ضليت گاعد ادخن لحدما تأكدت الكل نام .. طفيت الجگارة وگمت تمشيت لغرفتها .. دگيت الباب ع كيف .. ثواني وطلعت تعدل بشالها .. گذلتها طالعة من الشال .. رفعت راسها وعاينتلي ببراءة .. : ماتوقعت حتجي ..
رائد : لا مو گتلج اجيچ .. تعاي يله ..
دنوة : وين حنروح ..
رائد : هنا بالحلال گريب لاتخافين..

طلعت تمشي جدامي وتخط بگصيبتها طريق مشيتي وانتظامه ..
اندارتلي مبتسمة .. : شو واگف .. يله امشي ..
رحت وياها چن هي ماخذتني مو انه .. فتحت باب الترك وطلعنا ع المزرعة الگريبة .. محد يفكر يفوت هنا هسه .. اكو دچة ناصية من ضمن الحايط .. گعدت وهي واكفة جدامي مخلية ايدها على خصرها وتعاين ع الشجر..
كمشت ايدها : شبيچ حبيبي .. تعاي گعدي ..
دنوة : خاف يجينا أحد ..
رائد : لاتخافين حبيبي كلها نايمة .. وانتي مرتي حرام يعني..
ابتسمتلي ضلت واگفة .. ورثت جگارة وجريتها طاحت بحضني .. رادت تگوم حسيتها توترت ..
لفيت ايدي على خصرها وگعدتها ع رجلي ..
رائد : گعدي يولي لاتضوجيني..
دنوة : عفية رائد استحي شبيك ..

بستها من خدها .. أسمر ترف .. عاينتلها حسيتها ضاجت بس ماتريد تحچي .. هديتها .. رأسا كامت گعدت بسدي وكمشت ايدي اللابس بيها الحلقة ..
گالت هي وتفر بيها : ضعفان انت .. الحلقة مو ع گدك..
رائد : ماادري والله .. من الشغل عادي ..
نصت صوتها وهمست بغنوة ..
" ..أمانة عليك .. ياليل طوّل ..
وهات العمر من الأول ..
ياليل طوّل .. على العشاق ..
وقول للفجر مايبناشي ..
يهون العمر ع المشتاق ..
وساعة القرب ماتهونشي .."
عاينتلي وعيونها تلمع : هالأغنية حلوة ومناسبة لجونا ..

لمعة حب .. لهفة بنية مكتومة .. اي .. چنت راسم شكلها هيج ببالي .. بهيج منظر وهيج يوم وهيج جو .. بنيتي تريدني مثل ما اريدها .. بس الظرف فارض نفسه ع الكل حاليا .. ولو بيدي اخذها هسه گبل اليوم وكل يوم .. بحر من المشاعر اچذب اذا اكو ساكنة .. بالعكس .. فاضحة ومفسرة بشكل واضح بكل نظرة وكلمة اگولها ..

عاينتلها وابتسمت بذبول من صوتها الشجن .. صدمتني وفاجئتني شلون غنت بدون طلب مني .. : يروح روحي .. اغدي فدوة لهالحس الحلو.. بس شنو المناسبة يبعدي ..
دنوة : حسيتك ضايج ومااعرف شلون اسعدك بس هيج ..
حاوطتها من متنها وقربتها لصدري : لا يگلبي ماضايج .. ليش شمبين علي ..
دنوة : ااممم .. ماادري حسيت يعني ..
رائد : لا اطمني حبيبي ..

ضليت شابگها وگلبي يراقب حركة انفاسها گبل عيوني .. هايم بيها قليل بحگ حبي الها .. هي گاعدة بهدوء يمي ماگامت .. شعر گذلتها يطيره الهوى يصير على حنچي وخدي ..
ورثت جگارة وزفرت الدخان .. صار هدوء هي ساكتة وانه همات .. ماعرفت شلون افتح موضوع .. كلشي سكن بداخلي بس گلبي يدگ بقوة ..
ضليت ادخن لحدما حسيت أنفاسها ثگلت .. عاينتلها لگيتها غافية وايدها محاوطة رگبتي .. گلبي وروحي وكلشي بيه گام يصافگ عليها .. همست : حبيبي دناوي ..
رأسا فزت .. : ها..
رائد : فوتي نامي يله ..
دنوة : لا لا..خلأشوفك ..تره گاعدة من الصبح فنعست..
رائد : يله باقي ماعندي شي ..
دنوة : زين احنا ثنينا مدنحچي .. احچيلي شتحب ..
ردت اتحارش بيها : احب النسوان ..

گامت وتخزرني : عززه صدك.. المن تحب .. يعني تحب غيري..
رائد : اي هواي احب ..
تخوصرت واخذت الجگارة مني : ها هيج .. چا خوش..
رائد : تعاي يولي شو اخذتيها شنو حلالج الوضع..
اخذتها من ايدها وگمت .. بست راسها وخدها : وداعتج بس انتي بعيوني .. دااشاقة يولي لاتسودنيني ..
دنوة : چا شقصدك بالنسوان ..
رائد : يعني احب تجيني بنية أربيها واشوفها جدامي تركضلي .. شگد حنينة ..
دنوة : تفكيرك ماشايفة مثله .. بس عفية يعني انت بكلشي مختلف..

ضحكت وضليت واگف وياها ثلث ساعة بهالحدود ودخلنا .. طبيت گبلها شفت محد اكو يله خليتها تروح .. تمشيت للغرفة حتى نسيت الجگاير كل مرة گبل لا انام ادخن تلاثة اربعة .. دخنت بيها مايحتاج بعد .. تمددت وغفيت ..
ثاني يوم كعدت الصبح بس سلمت وطلعت لبيتنا .. رجعت نمت مانايم زين .. مر چم يوم بالليل گاعد دااحضر الجنطة للدوام .. دك التلفون بالخمس مرات .. مااهتميت .. محد يلح هيج بس محمد وهسه يطلع رايدني بشغلة سخيفة ..
كملت وگمت ع التلفون شفته رقم غريب .. دااريد ارجع ادگ علي چان يتصل ..
شلته ..

رائد : الو .. منو ..
- : ها خوي .. شونك ..
رائد : هلا بيك .. الحمدلله حبيبي .. ماعرفتك ..
- : اني منتظر ابن عم صاحب صديقك ..
رائد : اييي عرفتك .. شو انت .. چا صاحب وين ..
- : صاحب مسافر لألمانيا يريد يسوي لجوء .. خلاني بمكانه علمود الدين سمعت مداينك ستة مليون ..
رائد : اي صحيح..
- : اي شوكت عندك مجال حتى نلتقي وسلمني المبلغ .. اني مامحتاجه بس لصاحب ..
رائد : خوية ولا صغرا بيك .. بس المبلغ ضخم وحاليا ماعندي فلوس جوه ايدي بهالمبلغ .. لأن گبل اسبوعين بهالحدود سددت اربعة .. فصعبة ..
- : افهم من حضرتك تشكك ان الفلوس اخذها اني ..
رائد : ماگلت هيج انه .. بس المبلغ مااگدر ادبره هالشهر .. اصبرلي الشهر الجاي اسلمه بيدك ..

ضل يحچي ونافخ ريشه .. اتخبل من هيج واحد مكبر راسه على مااعرف شنو ..
بالأخير گال : انت واحب نصاب وماينطلع منك فلس احمر.. والله الا ازوعك العافية..
شياطين راسي گامت تركض جدامي .. تسودنت .. طول الاتصال كامش اعصابي واحچي بهدوء .. بس هسه زاد الموضوع عن حده : ماكو غيرك النصاب فد واحد سرسري .. تهددني يول تعرف وين اوديك .. بالقرآن اذبك اربعة ارهاب اشگ حلگك بالنص.. يله توكل لاتشوفني خلقتك ..

سديته ورحت نمت .. گعدت من الصبح بدلت وخليت رتبة التاج على چتفي .. هالأيام تصير الترقية وانه اولى بيها .. خصوصا هالفترة دخلت دورة مشاة وقنص .. كلها تنحسبلي وتصيرلي الأولوية .. اخذت الجنطة وطلعت للدوام .. بس متضايق من هذا منتظر .. ضليت بالدوام واحد وعشرين يوم .. بآخر اسبوع رجع اتصل علي بس ماجاوبته .. خابرت دناوي وراها قفلت التلفون .. ماضل شي وتبلش امتحاناتها .. عاد اشوفها عدل ..

خلص الدوام وطلعت .. توني دااركب السيارة وحسيت بإيد انحطت على چتفي .. انداريت تفاجئت بعمي محيي وراي..
بعدني ماحچيت وسبقني : عوف سيارتك وتعال..
رائد : وين عمي ..
محيي : شغلة هنا ..
مشيت وياه للسيارة واشوف رجال مااعرفه گاعد ليوره .. سملت وگعدت ..اخذني لمشتمل .. نزلت مطمن كل الاطمئنان .. گلت يبقى عمي قابل شيريد يسويلي .. لگيت شيخ گاعد ويمه زلم ثنين بگدي يطلعون ..
انداريتله : اجيت وياك بحكمك عمي وعلى عيني وراسي .. هسه الصار هنا شنو ..
محيي : طلك دنوة جدامي .. انه وكيلها ..
رائد : اطلگها .. لا طبعا ليش دااطلك ..
محيي : طلگها باليسر احسن مما اطيح حظك..

عفته ماجاوبته .. درت وجهي دااطلع مااحس غير بضربة اجت على رگبتي .. ماادري بشنو بس راسي گام يفتر .. شگدما هو چبير عمره بنهاية الخمسين بس ايده گوية ويطگ بحيله .. زحمة اطگه وهو اكبر مني .. بس اصده .. ضغطي صعد وخشمي يكت دم .. دخت من الطگة ومن ضغطي .. حاول وياي راد .. انتهيت والولد واحد يفاكك والثاني واگف وياه ..

آخر شي گمت مااشوف بس اسمع .. صار غواش بعيوني .. حسيت روحي بالمستشفى والممرض واگف يمي ديقيسلي الضغط .. شواي وطلع .. اجه عمي هو والشيخ والولد ثنين ..
محيي : طلگها يله .. لا بالله اتخبل عليك واكتلك هسه ماعندي مانع..
رائد : شفتني محترمك زايد گمت تتمادى .. لا مااطلگها ..
الشيخ : ابني طلگها ختروح لحال سبيلها .. مالكم قسمة ..
رائد : شيخنا صار سنة شيب راسي يله اخذتها شلون اطلگها لاتسودني الله ينطيك العافية..

ضل يحاول ويحچي .. ماقبلت اطلگ .. شلون يعني هيج سهل الموضوع .. شبيه تسودنت اطلگها بمجرد طلب منه .. هو انه دين البيت ماسددته ادور اطاوعه ..
الشيخ : الفظ الطلاق ابني..
عاينتله وگوة مفتح عيوني من وجه راسي : مااطلگ ..
محيي : هي ماتريدك خلتني وكيل علمود اطلگك .. حتى ماتريد تشوفك .. انساها خلص ..
كلامه دگ براسي .. ادري جبرها .. ماتسوي هيج .. ماصدگته وضليت على اصراري ..
حچيت وبالگوة تطلع الكلمة مني : اذا سمعت كلمة مااريدك منها اطلگ ..
خزرني وطلع تلفونه : خوش .. انت الا ينكسر ظهرك يله..

طلع شواي واجه وگف يمي..فتح حاكية واسمع حسها .. بوية روحي رجفت علي .. هي تحچي بصوت ناصي ها بابا .. اويلي بنيتي لاتفشليني يبعدي وانه حالي بالضيم..
عاط بيها : احچي فضيني .. تردينه ..
دنوة : لا بابا مااريده .. وانه خليتك وكيلي خاطر اطلگني منه ..
رفع حاجبه وسده بوجهها .. گال : يله طلگ ..

ماادري شصار .. بس فقدت .. گبل شوي ماچان بيه هيج .. جسمي كله يون وراسي يدگ بقوة من الوجع .. گلبي وجر منها .. ليش يولي ليش .. ادري بيها يبين عليها كلشي .. بس حسها چان طبيعي مابي شي .. انه البيه وروحي عطبت منها .. ناقوس الكرامة اندگ وسكن كلشي ثاني ..
گمت بيه مابيه عدلت گعدتي .. احبها اي .. روحي بيها .. ذاك اليوم غفت على متني .. بس شفت منها تخلّي .. عاينتله : طالق طالق طالق ..

تقدم علي خلى جنطة سادة حجمها وسط بسدي .. : هاي الذهب والفلوس .. خاف تگول اكلهن علي ..
كمشت ايده وضاب عليها حيل : قسما بالله اذا عرفتك وره هاي السالفة مااتردد ثانية وحدة اشمرك اربعة ارهاب .. هددت ضابط عسكري واعتديت علي .. عبرت ومشيت ميخالف .. عمي واكبر مني حتى اكبر من ابوي .. بس والله وانه لخاطر شيباتك مامديت ايدي .. چا كسرتك شبيه موزلمة .. اهد حيلك .. بس فرقي عنك حامد رباني ..
انه گتله هيج وتدروش علي .. جر ايده وصاح : حامد خريج السجون .. اي خوش يربي ابن الگح....
رائد : خوش ونص واحسن منك .. لو موخوش چا كل مرة اشوفك بيها انيمك مستشفى .. بس التربية واگفة بعيني .. دنوة حلالي ومريتي واحبنها من چانت بالمتوسطة .. اخذها من عينك صبرك علي ..
محيي : لك انت اكبر فارغ .. مابيك خير ..
راسي فور من حچيه : ماكو غيرك الفارغ .. ماگادر بس ع النسوان ..

ماجاوبني .. اخذه الشيخ وطلعوا .. جريت التلفون خابرت على صاحبي جاب السيارة .. اجه الدكتور فحصني ..
-: اخوية ضروري تضل مرتاح .. اذا تنام مستشفى يكون افضل..
رائد : ليش دكتور شكو ..
-: عندك هبوط بالسكر .. ضغطك منتظم حاليا بس السكر مشكلة .. ممنوع تسوق سيارة الى أن ينتظم السكر .. لأن مهدد بالغيبوبة ..
عاينتله ومامستغرب من معلومته .. اعرف .. حركت راسي بالموافقة : ان شاء الله دكتور ..
خلى وراح .. بالساعتين واجه صاحبي اخذني وطلعنا للبصرة..

-: خوية شبيك ياستار .. عينك مورمة .. اني شفتك طلعت من المقر وي جماعة ..
رائد : مابيه حيل احچي اسكت ..
-: يمعود اروح هسه للمركز اشتكي عليهم ..
رائد : لا بوية انه سديت السالفة .. امشينا للبصرة لاتضوجني..
ضل يلح وراح للمركز .. قدم شكوى ع الزلم الچانوا وي عمي .. هسه دتطلع الدورية واجاني اتصال من جدي .. اعتذرلي علمود اتنازل عن الشكوى .. تنازلت وسديتها .. ماچنت اريد افتحها اصلا ..

بس ارجع للبيت اشوف شسوي .. اكبر رجال ينطگ هيج يتنازل من اول كلمة .. بس بقيت مصر واريدها .. اگول جبرها .. اي جبرها وانطيت عذر .. بس سمعت حسها تحچي بهدوء وعادي ..

وصلني للبيت وعاف السيارة .. ماقبل اضيفه .. طلع لبغداد .. طبيت لگيت امي تبچي وتحوم بالبيت رايحة راجعة .. اجت شبگتني وتمسح على وجهي والورم بعيني ..
ام رائد : يمة حبيبي اسم الله عليك رويحتي انت .. تعال ييمة فوت .. هيج زواجة ماتنراد ييمة والبت ماتريدك..
عاينتلها بدون مااجاوب .. طبيت گعدت .. جابتلي ثلج وغيرت القميص والفانيلة .. كلهن دم .. شواي ودخل ابوي صاير جمر مورث ..
حامد : شوف اگلك .. انه عفتك على حلّك گلت هو چبير قابل عشريني وشاب بعده طايش .. لابوية ادري بيك زلمة من يوم يومك .. رحت وياك خطبتلكياها وتحملت شوفة هالوجوه الوصخة لخاطرك .. بس لمن محيي يمد ايده على وليدي اكسرلياها .. واطيح حظه هذا النذل .. دشوفه هسه حيجون عمامك وجدك .. اذا اجه شتريد انطيك .. جبان وخنثة ..
رائد : يابة تره تعبان الله يطول بعمرك ..
حامد : لك انت شني هالبرود العندك .. اگول لاتسودني .. طلگتها بعد ماتتقدملها .. البت ماتريدك بوية ماتريدك .. هي تنازلت عنك لاتخليني اطلع عن طوري ..

رائد : هسه جاي تخفف عني يا تچملني..
حامد : يول انه علمودك شعندي قابل ..
هو وديحچي اندگت الباب..طلع محمد فتحها واشوف عمامي فاتوا وجدي وياهم .. دورت بوجوههم اريد اشوف محيي ماكو.. هم صدك شيجيبه وهو مسوي بلوة..

اجه جدي وگف جدامي باس راسي وتحمدلي ع السلامة .. گعدوا كلهم..ابوي بس يتفرج مايريد لسانه يطخ لسانهم.. وانه تعبان .. روحيا وجسديا..ضلوا يحچون ويعتذرون..زيناتي وياهم هواي..ماينعدن..فـ ردة فعلهم طبيعية..
بالأخير جدي گال : ماظن الكم نصيب بعد المشاكل الصار يبوي.. اترك البت هاهيه..
ابوي رأسا گام وحچه بصياح : والله من نعلعلا بتكم على ابنكم .. شخبصتونا بيها..حتى ماتوصل لأبني ودراسته وتعبه.. عجيبين انتم..
گمت كمشته من چتفه : يابة بس كافي..
شامخ : اجيت لخاطر ابنكم..چي خوش زلمة وزيناته ويانا چثيرة..بس لمن تجاوز على اهل بيتي لا هاهيه.. بسك انت مو مال عيني وأغاتي ..

گام هو وينفض غترته..طلع وعمامي طلعوا وراه..عاينت لأبوي بدون مااحچي..ادري بي خايف علي..الكل يحچي بنبرة حاسمة .. لأن هي فلتت ايدي مو انه..اكثر شخص تحملت لخاطرها الدنيا كلها..انه چنت اداين الناس تالي گمت اداين منهم وصارتلي مشاكل يابو مشاكل..توقعت حتگول لا يابة اريد رائد.. ادري بي قاسي وياها ..وادري بروحي بنفس الوكت حوگف وياها لو صارت الدنيا كلها ضدنا..منين مااجيها اشوف طرف ابوها قاسي وظالم بس انه وياها ماتاركها..

گمت للحمام سبحت والماي يطيح مثل النار علي.. تلمست چتفي..چانت هنا..وتغنيلي..اريد منها كلمة..بس كلمة.. ردت گبل وهسه همات اريد..ابوي وعمامي وحتى جدي كلها ضدي بس لو اشوف منها "اريدك رائد" اجيها مغمض عيوني عن الدنيا وكل سبب ممكن يمنعني عنها..

قررت أصبر لحدما أشوف منها فد حركة يله اعرف شسوي.. لأن تعبت والتعبني اكثر كرامتي الصار رفعها للسما وطيحتها للگع بيد محيي..اكثر انسان يكرهني..
بالليل طبيت انام..روحي لايبة عليها..كلساع أمد ايدي ع التلفون واشوف تلفونها يمي..على شنو اخابرها..عفته ونمت..

مرن يومين ماسمعت بي شي عنها..كلشي ساكن.. حتى الوكت مايمشي .. بنيتي چانت بس تخلي راسها على چتفي احس بيها تشم بعطري بفطارية منها..نظراتها بريئة ماتخون احساسها .. شتحس يبين بعيونها..

باليوم الثالث گاعد بالهول بالليل داادخن..دايخ وراسي يفتر .. لعبانة روحي ماادري شصايرلي..اريد اترك الجگارة بس ارجع ادخن.. مديت ايدي جدام عيوني .. ترجف والأوردة بارزة .. طفيت الجگارة وشمرت الباكيت بعيد..گمت دااريد افوت انام چان يدك التلفون.. ابو العقار ..تفاجئت شعجب.. شلته وحاچيته..
بالأخير گال : خوية انه ماخابرتك ع الفلوس..لازم تطمن..
رائد : هااه..چا شنو..
-: ردت اخبرك ان البيت انباع..بعد انت بفلوسه تگدر تسدد الزلمة..
شحچي مااگدر انطي الموقف حگه من ناحية الصدمة.. : انباع شنو خوية على كيفك..منيلك هالحچي..
-: اي وعلي هو هيج..ابو دنوة اجه گال محتاجين فلوس ونريد نبيعه..انه چان عندي شراي مستعجل گتله من حظك وشاف البيت واخذه.. هسه المعاملة دتمشي..

حاولت اقفل الموضوع : هاهيه خوية هو البيت بإسمها..
سديته ورحت للغرفة صرت نار..محيي شگد تجاوز حدوده.. گمت ابدل واخابر علي..
دگ مرتين تلاثة يله جاوبني..
اول ما رفع السماعة عطت بي : انت واحد ماتخاف ربك.. هسه جايك صبرك علي..
محيي : وجع شعندك وياي..
رائد : شعندي.. بايع البيييت ..لك شگد شفت انذال بس مثلك ماكو.. جبته بدم عيني ..رخصت الغالي بس علمود اشتري واخذ بنتك..تالي ماتالي اطلگها وتبيع البيت..لا والله اليوم اهد البيت على راسك شفتني ساكت استغليتني..طلع ابو الأصول والمتربي مايعيش..اشو ارد اصير مثلك واحد خسيس خلاشوف ياهو يوگف بوجهي..

سديته بوجهه وطلعت بالعجل..سويچ السيارة ماكو مايصير اسوق.. گمت اشوف غواش والگع تفتر بيه..مشيت سريع اريد بس اوصل..طعني طعنة هدت حيلي..
وهناك بالطريق واگف ع الرصيف حسيت رجليه خدرن..اعاين ليجوه هاي الگع لو السما..مداافرق من الدوخة.. درت وجهي اشوف ضوة سيارة من بعيد جاي..شوي شوي اختفى الضوة وصار كلشي اسود..

...........................................
دنوة ......
...........................................

مرت تلث ايام ماعرف شي عن رائد .. بس الأعرفه هو نايم بالمستشفى .. مديفيق .. كل يوم ابچي لحدما اغفى .. وجع راسي رجعلي.. بس اوگف اطيح.. حالتي تبهذلت.. حتى للحمام مااگدر اروح.. تجي سرور تمشيني .. ابوي بس رجع من المستشفى ثاني يوم طلع لبغداد مارجع بس يخابر.. گال بس يكمل شغله يرجع علمود يصير العقد انه وعقيل.. لمن عرفت گلبت الدنيا بچي وصياح..مااريده مااحبه.. مااتخيل اصير يم شخص غير رائد .. يردون يموتوني وانه عايشة ..

وبيوم گعدت الصبح من وكت شسوي گمت اگدر اگوم وامشي مااحتاج شخص يسندني.. واگفة يم النسوان اريد اسمع خبر عنه .. نسوان گرايب جدي تخبلن لمن عرفن احبه .. ماعدهن هيچ .. يعتبرنه عيب ..

مشى اليوم لحد المغربية عرفت بيا مستشفى موجود.. محد ياخذني.. اريد اروح اشوفه .. اموت اذا بقيت..گلبي يوجعني وضميري مأنبني على مطاوعتي لأبوي ونكران كل فعل سواليا وموقف وگف بي وياي .. سوى كلشي علمودي وانه حتى الشوفة استصعبتها..

بالليل بحدود الثمانية اجت خالة ابتسام گالت خالتج برة تنتظرج .. لبست صاية وطلعت وياها .. كلشي باهت بعيوني .. ملانة من الدنيا..وصلتني للبيت ومشى باقي اليوم عادي..بالليل صعدت انام يم البنات..ماگدرت اغفى حتى .. گمت ابچي ..

حلا : حبي لاتبچين..الله يگومه بالسلامة..
دنوة : ولج اريد اشوفه..مشتاقتله..
حلا : شوفي باچر يجي مهند ياخذني نطلع..ماما ماتقبل نطلع وحيدنا..فانتي تعاي وياي وانزلچ تشوفي..
صفنت عليها..ماكو غير هالطريقة..قبلت وحاولت انام بس علمود يمشي الليل ويجي الصبح..

ثاني يوم العصر بدلت واجه خطيب حلا أخذها..ماگالت لخالة حنروح للمستشفى..انه نص الطريق وتراجعت.. خفت اشوف ابوي هناك لو واحد من عمامي..تعبت من التفكير آخر شي شفت روحي بباب المستشفى ومهند داير وجهه علي..
مهند : يله خوية تنزلين واحنا هنا ننتظرج.....

يتبــــــــــــــــــــع......................