رواية اسألي عني الليالي الفصل التاسع عشر 19 - بقلم رقية جاسم

قناة التليگرام

حساب الانستگرام

الـبـارت الـثـامـن عـشـر................

تقريب الاسبوع مر طبيعي.. ماكو شي ..ورود فاكة عينها علي.. ها يحبها واخذها حتى بيت اشترالها..عاد جدة تلصمها لمن تگللها احسن مما يلعب.. وره هلأيام حضرنا العجين واخذته لوره البيت علمود نخبز..التمينا كلنا..
بلشنا نخبز وحچت خالة ابتسام : حبيبتي دنو جيبي الچرچف فرشي نذب علي الخبز..
دنوة : اي هسه خالة..
گمت اجيبه واشوف باب الديوانية مفتوحة.. عمو كاظم واگف ويمه ولد ثنين گصة عصام واحمد.. بنية هماتين تطلع بگدي.. منو هذول..

كاظم : اي هذول ولدي..وهاي بنيتي..بوية تدري بيهم ومريتي ام عقيل همات.. تدري بس عندي عقيل واريدله السند باچر عگبة.. حگي يا لا ..
شامخ : حگك بوية .. وليداتنا ومن عدنا وبينا مابيها شي ..
محيي : هاي شوكت هلحچي..شني آخر من يعلم احنا..
شامخ : بعد أبيك انه ادري من گبل..ومجهزلهم اليردونه.. بيت وگعدة مچانهم هنايه بعد..
كاظم : روحوا حبّوا راس جدكم..

متزوج ثنين..هاي شنو شو ماندري صدك..الولد چنهم ذبة ولدنا فمبينين من اهل البصرة مو بغداد.. اعاين البنية تشبه عقيل عينا.. مبينة اخته ..

صافنة عليهم وعلى حچيهم خالة ابتسام صاحت وين الچرچف.. رحتلها فرشته ووگفت اشيل القبق .. سولفتلهن شسمعت ..
دنوة : جدة انتي تدرين..
الحجية غادة : چا شون..قابل وليدي يزوج وانه غافية .. غير رحت خطبتلهياها.. والحچي بيناتنا جدة .. ام عقيل ماتخلف من ذاك الزمن بالگوة صاروا هلوليدات .. وانه تهمني فرحة حبوبي..
نوارة : بس خطية تزوج عليها جدة .. شكو بيها اذا بس عقيل وغدير وحنين..
الحجية غادة : يمة ودية مابيها شي..بس يابعد چبدي جدج ماعنده خوان بس أختين..والأخت قابل شتجعل..وهاي وصية أبيه الف رحمة على روحه گال لمن شامخ يجي وليد خيزوجه مبچر خاطر الخلفة..وبعد تعرفين مايصير تنطگ چلمة الوصاية..

تركتهم يحچون..بعد هي مرته ماطول تدري بيها احنا شعلينا.. كملنا خبز وسوينا غده ضخم للخطار الجدد .. اجت البنية ويانا.. اسمها زهراء .. حبابة ومتواضعة تونسنا وياها.. ضلوا عدنا يومين..فكلش التهينا بيهم..

وره هليومين گاعدة وره البيت دااعزل بي متهوس.. اجت سرور بيدها علاگة حلوة..عاينتلها مستغربة ومبتسمة..
دنوة : هاي شنو بيدج..
سرور : جابه رائد الج.. تلفون وبي سيمكارت ..
نفضت ايدي وگمت اخذتها : چذابة..الله فدوه شكد حباب..
سرور : ههههه..روحي شوفي انه حكمل بدالج..
غسلت ايدي ورحت للغرفة.. كاتب بورقة صغيرة خابريني لمن يوصلج.. فتحته وسويت السيمكارت.. مسجل چم رقم ومن ضمنهم رقمه.. دگيت علي بس مستحية مدري ليش..
جاوبني هو ويترنم : حبيبي الحلو بعد مايحاچيني بالختلات..
ضحكت : اممم..الظاهر هيج..
رائد : اكيد يولي لاتبخلين علي تره خطية انه..
دنوة : اي كلش خطية..
رائد : هههههه..گلبي انتي.. حروح هسه عندي شغل ..
دنوة : ماشي على راحتك..

سديته وخليته بالمجر مالت الكومدي.. طلعت لگيت يونس ومرته هنا.. بطنها كبرانة حامل ..هو شعجب جاي..مايجي كلش قليل.. رحت سلمت عليها وضيفتها ..گالت بالليل يجي يونس ياخذني.. مشى الوكت عادي ضحكة وسالفة ..بالليل تقريب الدعش هي گامت تفتر بالمطبخ رايحة راجعة وايدها على ظهرها ..
جدة انتبهت عليها : شبيج حبوبة..شو مو على بعضج..
الاء : اي بيبي يونس مايجاوب علي مااعرف ليش.. هو كال بالتسعة اجي..صار ساعتين ماكو..
الحجية غادة : خابري على عمج خيخابره..
الاء : بيبي هو ديخابره ومايجاوب..

اثناء ما دتحچي اجه عمي فيصل يخابر وعصبي.. طلعله جدي ..
فيصل : وينك دماغ سز.. انت ماترتاح الا تسكني الگبور .. وين انت هسه..بعدين عود فهمني ..جاي مسافة الطريق..
سده واندار على عمي قاسم..
قاسم : خير خوية بشر
عاينله بنظرات مدري شلونها : الخير يسبگ الشر بعد اخوك .. حروح اجيب فلوس وانتظرك بالباب..

الكل ضل يعاينله متفاجئين شديحچي .. طلع بالعجل ..
عمي قاسم صاح : عصاااام.. عصام وين..
احمد : بوية طالع من الصبح ..
قاسم : شعنده .. ليش ماادري بي ..
احمد توتر كام يبلعم : ماادري بوية..كال رايح لصاحبه مريض..
قاسم : يول تستغبيني قندرة .. اخابره مايجاوبني.. ليش احچوا خلافتهم شسوي..
احمد راد يطلع جان يفوت سالم كمشه من تشيرته ودخله جوه.. مد ايده على جيبه طلع التلفون .. عاط بي : ليش تمد ايدك علي شحاسبني صغيرون..
سالم : اي صغيرون وبكد القندرة هماتين..
ضل يكلب بي ويخابر مدري عليمن .. لحدما انرفع الخط واجه صوت عصام بإذاننا ..
عصام : ها خوية..

سالم : ادبسر انت اكبر نذل .. جايك هسه انه وعمك فيصل..
سده وشمره بالگع صار طشار .. : فوت جوه انت وهذاك روس البلة الله يطيح حظكم..
راح بالعجل يصعد فوك وعمي صاحه : تعال انت اللاخ.. فهمني شكو شبي عصام شمسوي..
سالم : مطلوب ٨ ملايين..
عافنا وصعد فوك.. تذكرت ذاك اليوم من سمعته يحاچي عصام ويرزله .. بس صار هواي.. معقولة ليهسه مديون لو شلون .. تندمت چي ماحچيت .. لو حاچية .. جان ماوصلت هيج..
فزيت على صوت عمي يصيح على احمد : احجي لك كتهن كلهن.. خلاشوف انه شموكل ولدي.. خاف مال حرام وماادري بروحي..
احمد : لا حشاك بوية محشوم.. بس والله هو محلفني مااكول ..عبالنا مشكلة وتنحل بالعجل..
قاسم : فيصل شدخله بالنص.. ليش واصلة هيج..

احمد : هو جان مطلوب من صديق صديقه.. رايد يفتح مشروع بس مانجح المنطقة موشغالة .. فهو حاچاه بهالسالفة وكال بوية تره المشروع مانجح .. تانيني اشوف خيري وألم ايدي بـ چم فلس وارجعلك فليساتك.. بس ماقبل ضل معند ويريد فلوسه هسه .. بوية وحگك انه كبل چم يوم عرفت .. وحجيت وي سالم انطيته خبر .. كال عصام يكول تره سددته وماعندي شي وياه بعد .. هذا كل الاعرفه .. بس اليوم شفت غير شي خابرني كال خاف اتأخر تره طالع وي يونس مسوين كعدة ببيت الرجال المداين منه اخذه وراح بعد ماادري ..

هو وديحجي فات عمي فيصل وسالم نزل من فوك بيده چیس اسود .. طلع بالعجل لحگه عمي قاسم .. جدو صار عصبي ويرزل بأحمد : هسه ابوك صغير هيج تسوي بي .. گم من وجهي لابارك الله بيك..

عافه وراح لبس سترة وطلع هو وابوي .. ضلينا وحدة تعاين للخ .. خطية عمو اصدم بالمبلغ هذا.. وعمو فيصل مخروع چي ابنه راح بشغلة أي أب مايقبل بيها.. خصوصا هسه .. العالم تتكاتل ع الفلوس ..
بقينا ننتظر والتلفون مانزل من ايدهم .. قهرتني الاء صار عدها لويات .. اجت جدة ماادري شنطتها

ضلينا مشدوهين للوحدة بالليل انفتحت الباب ودخلوا ابوي وجدي وعمامي .. خالة ابتسام طلعت مفرفحة تريد تشوف عصام .. هو فات وراهم عينه مورمة .. شهگت وبچت
مسحت دموعها : خالة لاتبجين.. مابي شي هياته اجه..
ماسمعت مني ..

دخلوا من باب الديوانية مفتوحة فسمعناهم ..
شامخ : اول واخر مرة .. تشوف أبيك ساكت تصول وتجول براحتك .. اذا هو يقبل انه مااقبل.. بسكم عاد .. يوم احمد يوم انت .. زين طلع منكم سالم خير.. اجيت ووكفتلك مو تزامط وتحچي سوالف اكبر من راسك .. فهمت يول
عصام : حاضر جدي.. بس والله جنت ناوي أرجعله الفلوس..
شامخ : ترجعله ماترجعله .. انت فشلت أبيك وعمامك وانه هماتين .. رايح بزودي واگولن مايچذب هو كال ارجعلياهن .. تالي ماتالي يكلي صارله فوك النص سنة ماكلهن علي.. لا وتهدده بعد .. بوية چا طلعت هيتة السالفة .. زين منهم اهل أصل ماكالوا شي ..
كاظم : بوس راس ابوك وجدك .. خلص فضت بعد بس انت اثگل شوي .. هذا مو سالم وياكم شمالكم عليمن طالعين..

ضلوا يحاچونه ويعاتبونه .. تركتهم ورحت للمطبخ .. سولفت لالاء ارتاحت .. فضوها واجه يونس اخذ الاء وراح لبيتهم .. قفلنا البيبان وطشوا لغرفهم .. تمشيت لغرفتي اول ماشفت الشباچ ابتسمت .. مشتاقتله ... صار شكد ماشايفته ..

مرت ايام طبيعية .. هو لمن عنده مجال يخابرني لأن كال مايفتح تلفون بالدوام .. بيوم كاعدة ضايجة بالليل .. ابوي مستلمني رزايل من الصبح .. چي ديسوي النقل مالتي .. هسه انه شكو ... قابل كتله انقلني .. طبيت انام جان اسمع التلفون يدك .. نسيت الضوجة لمن قريت اسمه ..

جاوبته بفرح : الو عيوني..
ضحك : ابوسهن باجر جايج .. شلونج حبيبي..
دنوة : زينة الحمدلله .. مشتاقتلك مووت .. ليش بذات..
رائد : والله طامس لراسي .. كلش مشغول.. باچر انزل اجازة .. وهلمرة مطول شوي..
دنوة : ااممم.. اي بعد احسن .. تعبان ..
رائد : مدااحس برجليه .. شتكولين تعبان لا..
همست بصوت ناصي ومغمضة عيوني : الله يساعدك حبيبي..
رائد : هههههه.. اويلي يابة .. اروح فدوه لهالوجه الحلو يبعد السمر كلهم..
دنوة : اوي لاتخجلني ..
رائد : تدللين .. سولفيلي اريد انام..
دنوة : شنوو .. يعني اسولفلك وتعوفني وتنام ..
رائد : چا شتردين ابوية .. نعسان والله..

دنوة : يله اسولفلك .. هو يعني.. ماادري شسولف .. بس احبك كبل كلشي .. اريد ابقى ببغداد علمود تجي تاخذني واشوفك الصبح ..
ضحك بصوت تعبان وهمس : انه همات احب تحجیلي شيصير بيومج ..

بقيت اسولفله .. هو شواي وغفى .. صار هدوء بس صوت انفاسه واضح .. سديته ورحت نمت .. ثاني يوم التهيت بالشغل .. جدو عنده فصل فجايين الجماعة يمنا .. التهيت .. لحد العصر طلعوا وبطلعتهم رحت أسد البردات مالت الاستقبال .. لمحت رائد فات وياه امه .. طفرت من مكاني رحت غيرت هدومي وتعطرت .. ضفرت شعري وهديته .. خليت شال هيج شلون ماجان فوكاه .. اجتني سرور تضحك ..
سرور : ها عيني يوم الألي هيج يجيني وافرح ..
دنوة : انچبي عوفيني فرحانة ..
سرور : هههههه .. يله كومي ضيفيهم ..
دنوة : اي هسه اروح..

عفتها ورحت للمطبخ .. اجه عمر يم رجلي يريد بسكت .. انطيته ونزلت يمه
دنوة : حبيبي روح شوف چم واحد بالهول وتعال بالعجل..
ضليت انتظره .. شواي واجه .. صبيت حسب العدد ورحت .. اول مادخلت لكيته كاعد هو وامه وجديتي .. سلمت وقدمتلهم .. كعدت ع القنفة الكعد عليها بس من الجهة اللخ ..

هن ملتهيات بالسوالف وهو ماكلني بنظراته .. كالعادة الأناقة لاتعليق .. مرتب وعطره يلالي بالهول .. شكدما چان عطري قوي بس هو طاغي .. كمش ايدي قربني علي .. خزرته وهمست : بله شافتنا خالة .. عيب وخر..
رائد : لا بوية .. ماتصرفلي هالسوالف .. هسه اذا ابوسج محد يكول شي..
دنوة : عززه انت تريد تفضحنا .. كافي ..
كام يضحك ومنزل راسه ..

هم وديحجون صاحوا على جدة ماادري بشنو .. كامت طلعت ..
كال يمة ... وسكت..
مافهمت .. هي ضحكت وطلعت .. ادور سدت الباب .. ماادري ليش توترت ولو متعودة علي .. كمت دااطلع .. لف ايده على خصري قربني علي ورافع راسه مبتسم بخباثة..
رائد : وين رايدة .. احرك الدنيا اذا طلعتي ..
كمت اتأتئ : ها هاي شدسوي .. وخر خاف يجي احد ..
رائد : لا لاتخافين ..
كعدني بسده واخذ الگصيبة باسها وباسني من خدي .. انفاسه حارة دخت .. دفعته : عوفني ..
جر ايدي البيها الحلقة يحركها بهدوء : تضوجين لمن اسوي هيج ..
سكتت ماجاوبت .. عاينلي بنظرة ينتظر بيها جواب ..
نصيت وجاوبت : لا مااضوج ..
تقرب باس خدي واخذ نفس .. ابتسم هو وعلى وضعيته : مخلية من العطر..
دوة : ااممم.. اي .. مو تحبه ..
رائد : ماخلص ..

دنوة : لا .. مااخلي منه دائما بس لمن اشوفك
رائد : روحي تذوب باليهتم لليهمني ..
ابتسمتله بس مستحية من وضعنا .. عدل گعدته ونزع القمصلة خلاها على ايده وكام .. عاينلي : حطلع حبيبي ..
دنوة : وين .. ماشفتك ..
رائد : لايجي ابوج يصخمني .. ادور شيخلصنا ..
ضحكت وكمت وياه .. راح طلع للحديقة الچبیرة الولد كاعدين هناك .. عفتهم وتمشيت للمطبخ .. كعدت وي النسوان ومر اليوم صافنة واتذكر حركاته .. جريئ بشكل لطيف وسلس .. ماادري شلون بس مايبين جرأته ..

بالليل رحت انام وصاحني ابوي .. رحتله لغرفته ..
بدون مقدمات حچه بنتر : سمعت رائد جاي اليوم ..
دنوة : اي اجه ..
محيي : ها .. شسويتوا ..
عاينتله مستغربة سؤاله وخجلانة بنفس الوكت.. : ماسوينا شي بابا .. جدة جانت كاعدة ويانا هي وامه..
اجه يمي جر إذني : واذا سمعت غير هالحچي .. شسوي بيج ..
كمشت ايده متوجعة من الجرة : ماسويت شي والله ماسويت ..
محيي : يله روحي يله لاتشوفيني خلقتج ..

طلعت منه مخنوگة .. ليش ديحچي هشكل وياي .. هو رجلي هسه شنو العيب والحرام .. هاي بس اجه يشوفني هيج سوى .. چا باچر عكبة شيسوي .. طبيت تمددت ضليت اتگلب .. گلبي يوجعني من الموقف .. كمت ابچي وكاتمة صوتي بالمخدة .. مااعرف شلون غفيت من التعب ..

...........................................
رائد ......
...........................................

گعدت الصبح جسمي منعنع .. مابيه حيل اگوم حتى .. بس لازم اروح.. اريد اشوف بنيتي مشتاگلها .. طبيت سبحت وطلعت.. وگفت جدام المراية انشف شعري .. شگد ضعفان .. خلصت هسه من وره هالمعاملة والبيت .. الدين اكل راسي .. الله اعلم شكثر حنطلب بعدين..وين ما ألم ايدي وادفع .. ارجع احسب الاگي السددته لاشيء مقابل المطلوبه.. اليعرفوني گتلهم تلاثين مليون مطلوب .. بالصدك اربعين .. حتى ابوي مايدري ..صحاني من أفكاري صوت ابوي دخل للغرفة.. وگف بسدي..

حامد : شخبار الدين بوية.. شكد سددت ..
رائد : بعد ..
كمش چتفي بمواساة : ادري بيك ماتحچي .. ابني تره الدين يخلص العمر.. بعدك بشبابك لاتاكل روحك بالدين وسوالفه .. محل الانشائية جايين علي شراية .. هو بيدك من زمان انت مسؤول عنه .. جبت البضاعة وشغلته .. تدريني حتى ماواصل اله صار شكثر .. بس بالعقد مسجل بإسمي .. انت شوف الشراي هذا ببيش ياخذه هو وبضاعته وسدد بي .. اكيد حيصير زيادة عود أثث بيها ..
رائد : لا شلون .. استحسف ابيعه والله شكد تعبان بي واروح وارجع علي.. حرامات ..
حامد : چا من حريمة يصيرلك شي من وره الديانة..
رائد : انطيني مجال يابة.. محد ديداعيني بالدين وانه منطيهم كلمة بالبداية.. اتأخر سنة يله اسدد ..

حامد : وك بوية الفرص ماتجي مرتين.. اذا هسه اجانا شراي مو معناها الشراية واگفيلنا سرة..
خليت الخاولي على رگبتي وانداريتله منتچي ع الميزتواليت : بس تخلص اجازتي واروح لبغداد اشوف الشراي ميخالف..
طبطب على ظهري : وحگ طولك انه علمودك دااحچي هيج .. الله يسهلك ماطولك رايدها ماامنعك..
رائد : الله يحفظك ويخليك ..
تركني وطلع .. اعاينله شلون يمشي بكبر .. تعب السنين بين هسه..

تفطنت فد موقف قديم .. لمن چنت اداوم بقاعدة تكريت چنت اروح عبرية.. قلة القليلة عدهم سيارات بزمن صدام .. حصار وضربة بوش ماصارلها سنتين من صارت .. بيوم كعدت متأخر كلت فاتني الوكت بعد شلون اروح..الضابط إله هيبته ومقامه .. حتلو چان ملازم .. ماطول اسمه ضابط واكو نجمة على چتفه .. فالقوانين صارمة .. بدلت بالعجل واخذت الجنطة محضرها من ذيچ الروحة..نسيت اخذ فلوس .. ضليت من سيارة سيارة لحدما وصلت تكريت همزين اكو چم فلس بجيبي .. عاد داومت وصادف عيدميلاد الريس .. من كل فوج تطلع مجموعة فاللواء طلعني وياهم.. لمن خلص دوامي ماعرفت شلون ارجع.. فلوس ماكو ..ونفسي عزيزة مايهلي اكول لواحد هلبت توصلني وياك.. اخر شي اخذت من واحد ابو دكان اكل گتله بالجية اللخ ادفعلك ..عفته وطلعت مشي .. خلصت المدينة كلها مشي .. صارت دنيا ليل گلت تيهت .. ماادري وين طبيت.. كمت امشي عمياوي تعبان اريد ارتاح .. انه وامشي صرت اغمض عين وافتح عين من النعاس..

والله ومااحس غير صوت هورن مال تريلة اجه ترس إذني .. طفرت من مكاني للرصيف تفركشت الغراض .. البيرية طاحت .. تبهذلت .. نزل السايق يعتذر ويرجف چي شافني ضابط..
گال : سيدي شتريد حاضر.. تعذرني ماشفتك ..
رائد : بوية كلشي مااريد .. وصلني لبغداد تسوي فضل..
- : يله سهلة..هو اني راجع لبغداد..
عاد كمت لميت الغراض وصعدت وياه.. ضليت گاعد لحدما وصلت.. راد يرجع ماقبلت .. گتله غداك يمي ..

اخذته ونزلت لفرعنا .. من بعيد اشوف ابوي واگف ولابس بنطرون وبلوز فوگاه سترة..امي واگفة يمه ماادري شيحچون .. اندار شافني .. أشرتله وتمشيت لعنده.. ضيفت الرجال بعدين راح .. ماشفته بعد .. عاد حچيتلهم .. ناسي الفلوس ورجعت مشي .. گام ابوي كلما انزل للواجب هو يخليلي فلوس بجيب البنطرون.. لو بالبيرية وانه الصبح لمن اگعد اخذها ..

العسكرية والسلاح شي طفولي بداخلي .. ولو انه مو عدواني بالعكس مسالم وهادئ بس احبها .. ابوي بحرب ايران لمن يرجع اشوفه لابس البدلة العسكرية اگول شوكت يجيني الدور البسها .. يعني اعتبرها شي مقدس .. بذلت كل جهدي علمود الرتبة هاي.. ترفعت مرتين بسنة وحدة .. اعتبره اكبر انجاز بحياتي ..خصوصا گبل الرتبة بصعوبة تتحصل.. وره السقوط صارت سوالف الدمج وضاعت بعد..

شكد مواقف وسوالف بروحي .. مااحب احچي هواي .. بس يمها اريد اگعدها على رجلي واسولفلها شنو بگلبي .. ماضل شي وتخلص واجيبها ..

يوم الخليت الحلقة بإيدها بگد صغر اصابيعها وحجم الحلقة حسيت همّي صار هيج .. الفرح والسعادة سيد اللحظة مو غيره..شكد چنت متوجع وشفايفي تون اهجسها نار .. تبهذلت باليوم المفروض انسعد بي وماافكر بغير هالمضمون.. تناسيت كلشي .. اي ماافكر بس بيها .. شفتها خجلانة وخايفة بنفس الوكت ..شعرها سرح نازل على چتافها .. كمشت ايدها مااريدها تصدني.. تقربت وبستها .. رجفت بيدي وعيونها ذبلانة ..

" وكأنني في عينيها لهب ..
بفؤادها الولهان متّصل ..

يبدو رمادًا حين تلحظنا عين ..
وحين تغيب يشتعل ..

ياخير من حنّت لها مهج ..
وأحب من غزلت لها مقل ..

أفرغت عطركِ في دمي ..
فعلى شعري عبير منكِ منهمل .."

اذا اگول طاير بيها مااچذب .. روحي صارت سجينة نظراتها الذابلة .. حسها المنتشي .. چنت اشوفها واحس بيها لمن تشم بعطري حسبالها مامنتبه .. بس اليمنعني الحرام .. هسه مايمنعني شي بس مااريدها تنفر مني .. تحسبني اريد استغلها .. بنية وطبيعي هواي يفكرن هشكل ..

بكبري وطولي .. لو لاگيت نسمة الهوى الدافية عدها .. لو فتحتلي باب صغير لشبگة أمسية .. نعومة اصابيعها تتخلل شعري بأنوثة طاغية وفطارية مااهتملها بهيج لحظات .. اجيها مسير مقفل الأيادي .. أبكم المشاعر .. مااحچيهن بطلاقة اللسان .. بس اسردهن بتصرفاتي .. بهدوئي وتعاملي وياها .. وي انسانة ترفة من اقل شي تبچي .. لمستها لمسة ملائكية متأكد ومقتنع قناعة تامة .. خمس سنين انتظار ولدت هالكم من الأحاسيس بداخلي..

مرت ايام عادية .. بيوم كاعد بالاستقبال يمي ورقة وقلم دااحسب اذا بعت محل الانشائية شكد يجيب .. اجت اخلاص كعدت يمي .. حبيبي واخوي .. تحچي ودك ناعم ..
انداريتلها بقلة صبر : گولي شعندج ..
اخلاص : ماعندي شي .. مايصير احچي وي اخوي ..
رائد : لا يصير اكيد..بس سوالفج معروفة ..
اخلاص : اي ديله الا اگول اريد فلوس ..
رائد : ماشي .. لشنو وشگد تردين ..
اخلاص : اشتري هدوم جدد للدوام .. يعني تلثمية.. ابوي ببغداد يتأخر يله يجي وانه مااطلب بس منك ..
رائد : سامعة مجدي كركوك وخنجره بحزامه .. ميخالف انطيج خلاشوف شكد عندي..
اخلاص : حبيبي اشكرك الله يحفظك ..

تركتني وطلعت .. بهالفترة هستوني مستلم الراتب .. حنطيها ميتين منيلي هلكد وانه غاط لراسي .. بعد تأثيث وهواي شغلات .. كمت حسبتلها ميتين وانطيتها .. ماگالت شي..

ثاني يوم العصر طلعت لعارف .. بقيت عنده لليل .. خابرت امي گتلها ابات بره مااجي .. شواي واجه بيده شرب وكرزات .. كعد جدامي يحضر بي..
رائد : يول شوكت تبطل ماتگلي ..
عارف : والله كل يوم اگول هاي آخر گعدة بعد مااجيب .. بس هاي تعودت بعد .. هسه انت مو مدمن ع الجگاير..
رائد : شجاب الجگاير ع الشرب .. هسه هاي مو حرام..
عارف : يله ربك رحيم بوية لاتضوجني ..
ضحكت : طاح حظك .. يله اگعد ..

اجه كعد والريحة مامقصرة .. ابتعدت تلعب روحي ..
عارف : فطنتني .. شخبار الدين ..
رائد : لاتجيب طاري .. ابوي يريد يبيع محل الانشائية .. شتكول ابيعه وأسدد بي..
عارف : خوش فكرة .. اي بيعه وتوكل خوية .. ادور تروح البت من ايدك ماصدگنا تخطبها ..
رائد : اي بالله حتى انه مامصدك ..
عارف : حرامات ماكو تلفونات گبل .. چا سجلتلك صوت انت ومواويلك ..
رائد : انلصم سرسري ..صوچ اليحچيلك ..

دائما چنت اكول اذا شي متلهفله بعدين من اشوفه يمكن تطفى لهفتي اله .. الا هي اشتعلت شعل لمن شفتها .. كلت طاح الطير بيد صياده .. شيطيره بعد ..

بتت عنده وثاني يوم طلعت .. يومين والتحقت .. انه وبالدوام اجوني ثنين يردون الدين .. عمي وخالي على عيني وراسي بس انطيني مجال .. صار هواي لمن اداينت .. گبل لا اشتري البيت من عرفت سعره رأسا اداينت .. مااريد شي يوگفني ..

المحل عفته مؤقتا بين ما اخلص دوامي واشوف شسوي بي .. الشراي خابرته وعرضت علي السعر .. كال ادانش فكري وأردلك خبر .. ماخابرني بعد .. تركت الموضوع مبين مايشتري ..

بهالأيام واگف بالباب ادخن واجاني البواب گال شخص طالبك بره .. طفيتها وطلعت شفته .. رجال چبير كهل .. سلمت علي بس مااعرفه ..
گال : بوية اني ابو أنس صاحبك ..
رائد : ماعرفتك بالبداية عمي .. تعذرني .. شلونه أنس ..
عاينلي بخوف وعيونه مدمعة : موزين والله ..
رائد : ليش ياستار ..
- : صارت عركة وانضرب بچزار .. هسه بالمستشفى وماعندي فلوس للعملية .. سمعت من بنتي هو مداينك مليونين .. بس والله ماادري هو محلفها ماتحچي ..

رائد : صدك چذب .. زين عمي شنو المطلوب مني ..
- : هلبت تردلي الدين وليدي حيروح مني ..
ضليت صافن علي .. : ميخالف انطيني نص ساعة بين ما احضر المبلغ واخابرك تجيني بنقطة دالة ادليك عود..
انطاني رقمه وراح .. اخذت اجازة وقتية لظرف طارئ وطلعت لمحل الانشائية .. مافكرت ان ممكن ياخذ من عمامه .. هو حاچيلهم عنهم .. عص ماينطون وماعنده بس عم واحد حتى خوال ماكو .. وانه لو اصير بهالموقف اجي ع المداين مني اخذ فلوس .. اخذت الدخل مالت اليوم والبارحة .. هذا العامل واگف ويعاينلي متفاجئ ..
عطت بي : شبيك صافن..
- : سيدي الدخل ..
رائد : المحل انه تعبان بي .. وإن سأل ابوي گله رائد اخذه..

حسبتهن وشديتهن بتچه..لفيته بچيس اسود وطلعت .. خابرته انطاني عنوان المستشفى النايم بيها .. رحتله لهناك وانطيته الفلوس.. ناقصة نص مليون .. حاچيت الدكتور يسوي العملية ولمن يطلع انطي الباقي .. اخذه لصالة العمليات .. طلعت بره خابرت محمد..
جاوبني بنعاس : ها شتريد..
رائد : قندرة انت بس تنام .. گوم وينك هسه ..
محمد : بالبيت وين يعني ..
رائد : روح لغرفتي .. بالخانة الفوك جوه الهدوم فلوس .. احسبلي خمسمية وحولها .. لو تجيبها بكيفك ..
محمد : ليش شعندك ..
رائد : شو تمسلت انت .. شعليك .. سوي مثل ما اگلك..
محمد : لا بوية .. انت حتودي روحك بداهية من وره الفلوس .. مهما يكون السبب مااجيبلكياهن ..
رائد : روح يله .. وانه بس انزل اشگ حلگك مو مال احترام..

سديته وطبيت .. ضليت انتظر لحدما طلع الدكتور .. سألته عن وضعه گال لحدما يفيق من البنج يله نگدر نحدد اذا اكو مضاعفات لو لا .. انتبهت للوقت بعد مايسعفني اضل هنا .. ترخصت من ابوه بعد ما گال عندي هالمبلغ اگدر اجيبه .. رجعت للدوام بس غادي نار وعصبي .. وراها طلعنا مأمورية لتكريت وقفلت التلفون .. التهيت بالشغل ..

بطريق الرجعة السيارة خلصت بانزين .. نزل السايق يترسها .. فاتت شاحنة نقل نفط سريعة .. سريع عام وفارغ شكو قابل .. الدنيا ليل هندس ..
صحت : ها يمعود بشر ..
- : اي هسه خلصت ..شغلها كملت..
سمعت صوت القبق مالت البانزين انسد .. شغلتها وتمشيت اكعد من الجهة اللخ ..
بلحظة صار صوت قوي .. الجامة مظللة صار بيها فطر .. نزلت صرت بمستوى الگع وكعدت بالسيارة .. النار ماادري منين تطلع .. بس اسمع صوت شظايا اطيح ع السقيفة مالت السيارة .. نزلنا كلنا صعدنا بالهمر ..
انداريت اشوف فلاح .. ماكو .. الچان يعبي بانزين ..
رائد : فلاح وين .. مانطلع بدونه ..
- : سيدي تدري شصار .. مانگدر منو يكول مايفخخونا ..

عفته ونزلت اشوف فلاح متمدد بالگع وايده على عيونه .. اجو الجنود وياي شلناه هو يصيح عيوني عيوني .. اخذناه لأگرب مستشفى .. دخل عمليات رأسا .. ضلينا ننتظر لحدما طلع الدكتور .. رحت حاچيته ..
رائد : شلونه هسه دكتور..
- : سويت الاگدر علي .. بس الشظية مدمرة شبكية العين .. عينه اليمنى فقدت البصر ..
رائد : ابد .. مايفيدها عملية ..
- : للأسف لا .. تگدرون تاخذوه لغير مستشفى بس يفيق من البنج لأن محتاج عناية ..

عافنا وراح .. اچذب اذا كلت موقف وعبر مني .. شكد تعاطفت وياه .. خصوصا هو فقير حالته المادية موهلگد .. ماگدرنا نبقى .. انطيت خبر لأهله يجون علي وطلعنا لبغداد ..

التفجير الصار للشاحنة هاي .. تعودنا من بداية السقوط لحد الآن وانه اكثر بشر شفت هالمناظر .. المفخخات والقتل .. الجثث بالگع .. أصعب فترة مرها العراق بعد حرب ايران والحصار ..

طبيت ارتاح فتحت التلفون لگيت ابوي مخابرني .. دگيت علي حچيت وياه ..
بالاخير گال : شسويت بفلوس المحل..
رائد : انطيتها لواحد صاحبي يسوي عملية ..
حامد : والله ماادري .. اليوم عمك المخبل يريد يفسخ ..
رائد : يالله شدتحچي .. يابة مالي خلك هبطات .. شصار..
حامد : ماادري شسامع ومتسودن ..
رائد : شصار .. يفسخ شنو مرتي هاي مو خطيبتي .. مااطلگها مو ينذبح جدامي ..
حامد : ادري .. هاي لخاطرك تعنيتلهم لهناك .. گتله ابني رايدها ومايطلگها ..
رائد : وشگالوا .. شوكت هالحچي
حامد : جدك وگف وياك وانسدت .. بس مايقبلون تشوفها بعد .. صار خمس ايام هيج ..
رائد : نعلعلا شرفهم مناعيل الوالدين .. هاهيه فهمت.. يومين تلاثة ويخلص دوامي..
حامد : يله اخذ راحتك ماصار شي بوية ..

سديته وتمددت انام .. ماادري شكثر نمت بس گعدت راسي يوجعني من يم عيوني .. اخذت براسيتول واجيت لگيت ابو أنس مخابرني .. نسيته ..
رجعت دگيت علي .. بعد سلام وكلام ..
سألته على أنس : عمي أنس شلونه .. طلع لا ..
- : اي طلع بعد عمك .. بس ...
رائد : بس شنو ..
- : من الضربة جزء بالدماغ مسؤول عن حركة الاطراف فقد وظيفته .. هسه ايده اليمنى متتحرك .. إنشلت .. لو جايين أوكت ماچان صار هيج .. لأن صاير نزيف ..
انهضمت من كلامه .. لوما مدايني چا ماصار هيج .. خجلت من موقفي : المهم هو بخير عمي .. زلمة مايعيبه شي .. انه بس يخلص دوامي اجي..
- : هلا بيك بكل وكت ماقصرت..

تشكر مني بس احسه يعاتبني .. حملت روحي المسؤولية .. ماچان المفروض اداين منه .. هو منيله .. طار النوم والدنيا كلها من عيني .. خلصت هالتلث ايام ورجعت للبيت رأسا مابتت ببيت خالي .. سلمت ورحت للغرفة مختنگ .. ماادري شسوي .. جريت التلفون .. أدور اسمها ..

...........................................
دنوة ......
...........................................

مرت الايام طبيعية .. كمت احسب يوم يوم بس تخلص العطلة .. ع الاقل اكدر اشوفه مرتين باليوم .. هسه حسرة علي الاتصال .. واخاف من ابوي وتهديده آخر مرة .. كمت اتجنبه واكعد وي البنات اغلب الوكت .. مااريد يشك

بيوم گعدنا انه وسرور ونوارة .. اجت غدير كعدت يمنا تسولف على زوجها شلون يداريها ويحبها .. تخيلت روحي فديوم هيج اتدلل وشريد يجيني .. لأن شغلة الدراسة هاي مالها مستقبل فألتفت لغير شي احسن ..
اندارتلي هي وتغمز : شبي صافن الحلو..
دنوة : لا ماكو شي ..
نوارة : تريد تشوف حبيبها وابوها مايقبل..
عاينتلي مستغربة : صدك .. ليش ..
دنوة : مايقبل ماادري ليش .. خلاسكت احسن ادور يطلگني منه ..
غدير : يله حبيبتي صبري شتسوين.. ماضل شي وتخلصين..
دنوة : اي هو هم هيج..

.. وراها العصر ماعدنا شي .. اجن نسوان جيرانا وخالة شيماء اجت هي والاء .. كاعدات كلنا بس ورود ماكو .. ماادري شعجب هي تحب تهرش وتسولف .. سكتت مااهتميت كلت يجوز نايمة ..
جدة كالت : حبيبة بلچن تجيبيلي العوچية يابعد جديتج ..
دنوة : اي حاضر ..

كمت دااجيبلهيا من غرفتها جان ينخمط شعري من الفروة حيل انعت وطبيت لغرفة ماانتبهت عليها بالاول لحدما سمعت صوت ابوي ..
محيي : بت الكلب انه مو كلت اذا مسوية شي وي هذا الگوا... انعل سلفة سلفاتج .. نبهتج لو لا ..
دنوة : بابا والله مامسوية شي شدتحچي .. اجانا للبيت شكدر اسوي ..
جر الشال من راسي وعن رگبتي هو وكامشني بكل قوة .. احس المكان الضاغط علي بس يتركه ينفجر دم .. كمت ابچي من الموقف الفاشل .. يريد يتأكد اذا مسوية شي لو لا .. بس مافهمت شعليها رگبتي ..
ضربني راشدي فر وجهي .. سحلني لغرفتي هو ويفشر اشكال يجي على لسانه بعدني بطور الصدمة مدااعرف شديصير بس اسمعه يكول اليوم اخلي يطلگج ..

كمشت ايده احاول اصده وافهمه .. ماكو مايفيد شي ..
شمرني بالغرفة واندارلي : طلعي الذهب وكلشي يخصج .. اليوم ارجعلياهن ماعده مرة يمي ..
ماادري شلون طلعت مني بس الأعرفه مااريد اخسر رائد : بابا ماسويت شي حباب لاتسوي هيج .. هو رجلي ليش دتأذيني ..

تسودن لمن گتله هيج .. راشديات ودفرات ماادري منين احصلها .. كمت ابچي بصوت واضح .. بس مااريد أحد يسمعنا چي النسوان كاعدات .. عافني وراح ع الكنتور اخذ الذهب .. وكف يمي يخابر مدري عليمن .. راسي صار نار من الراشديات الأكلتها ..
محيي : اسمع لك مخبل .. تجي هسه تاخذ ذهب ابنك المچلوب لا والله بعزه وجلالته اروحله لدوامه اشرشحه تشرشح ..
سده وطلع بالعجل .. ردت اطلع وراه سد الباب وقفلها من بره ..
صاح : ابقي هنا بت الگح ...

كعدت بمكاني وابچي بحرگة .. صوته صار عالي اكثر وعمامي يمه بس صوته هو الطاغي .. جدي همات يمهم .. هو يصيح ويتعود الا يطلگني منه اليوم .. شسويت بروحي .. ليش جاوبته لو ساكتة احسنلي .. الغرفة صارت هلگدوتها بيه اختنگت وصدري ضاق علي .. وگفت بالزاوية اريد اسمع شديگول .. ماكو صوتهم ابتعد كلش بس اسمع صوت رگع مال بيبان ..

ضليت گاعدة اتاني مصيري شنو ووين .. دموعي ماسكتت .. دورت التلفون مالگيته .. هسه هذا وينه اووف ..

ضليت صافنة ع الساعة .. لحد المغرب سمعت صوت القفل دينفتح .. گمزت من مكاني گعدت بالركن .. فات ابوي شمر الذهب ع الچرباية وطلع بدون مايحچي .. تانيته يروح وگمت ضميته .. شصار ليش رجعه ..
لميت شعري ولبست شال .. طلعت بره غسلت وجهي صادفتني ورود .. عاينتلي بنظرة حقيرة ..
دنوة : هاي انتي سويتي هيج..
ورود : وانه شكو .. عشتووو ..
دنوة : اي انتي حقيرة وچلبة .. ليش تتبلين علي .. عجبج الصار شكد اكرهج ماتموتين وتخلصيني ..
ورود : اسم الله علي .. عساچ بالموت انتي .. ليش انه ياستار .. وحبيبتي تره البشر مايلاگي بس اليستحقه .. چا انتي تفشليني جدام ابوي وعمامي وتردين اسكتلج .. احلمي ..
عافتني واندارت .. عتيتها من زندها بقوة ودفعتها .. رادت تعيط عفتها ورحت .. ختعيط لروحها انه شعلي ..

شفت البنات ماكو .. صعدت فوك لگيتهن گاعدات ع السجادة چانن يصلن .. گعدت يمهن ..
دنوة : تقبل الله ..
نوارة .. سرور : منا ومنكم ..
دنوة : شصار على سالفتي فهموني ..
سرور : ولج والله ابوج ماادري شلونه .. كلساع رأي..

دنوة : شلون يعني .. شسوى .. هو رجع الذهب ليش ..
سرور : اجه عمو حامد .. ابوچ مخابره گايله تعال هسه مالكم مرة يمي .. خطية هو جاي بس ماقابل لكلام ابوج .. تدرين بي شگد يكرهنا بس سمعته يگول هاي لخاطر ابني اجيت ومااريد تتفركش الزواجة .. چا انتم تبلون وليدي ببيت شكبره يكسر الظهر بعدين من توصل للأخير تگول نطلك وماعندك مرة يمنا .. لا اشو مانطلك وهي مرته على شرع الله .. لو ياخذها هسه محد يفك حلگه ..
دنوة : وابوي شگال ..
سرور : شگال يعني .. تعرفي شونه قابل حيرضا بالعجل .. گام يصيح ويفشر .. بس جدي ماقبل علي .. گال مانطلگها والذهب يرجعلها .. على گولتك هي مرته وگبل كلشي بت عمه من ظهر واحد .. عاد بعدين رجع الذهب وفضوها بس مايقبلون تتشاوفون بعد ..

عيوني دمعت اريد اطك بچي : هو انه ميتة على شوفته وانتي تگولين مايقبل تتشاوفون..
نوارة : حبي نسيتي لو شني .. رائد قابل مثل أي واحد .. هسه اذا اجه حيخليهم يقبلون غصب سواء رضوا لو لا ..
سرور : والله حچيها صحيح .. هذوله شبيهم عفية شكد قنقينة .. مدري انتي حظج معروج ..
دنوة : حظي هذا حبي لا قنقينة ولا بطيخة .. بس اگللچن .. ابوي من صاحني سألني شمسوية وي رائد وخر الشال من رگبتي .. شعليها مافهمت ..
ضلن وحدة تعاين ع اللخ ويضحكن .. : دحچن شبيچن ..
سرور : حبوبة يريد يشوف اكو أثر مال بوسة يا لا..
دنوة : عززه وصخام گبر شهالحچي .. طبعا ماكو شچان يفكر اووف .. خلاروح اشوف شسوي ادور يطلگني چي گعدت ..

ضحكن .. اخذت نفس شوي ارتاحيت .. ميخالف اخابره حتلو مااشوفه .. نزلت جوه نظفت ومشى اليوم طبيعي ..
مرت ايام العطلة بهدوء بعد هاليوم العاصف .. بآخر يوم بالعطلة بالليل سبحت وحضرت هدومي .. حعوف هدوم المدرسة هذيج .. شگد چانن ستايل وحلوات .. هنا كله عريض بشكل مبالغ بي .. سديت الباب وقفلتها داابدل .. كملت ووگفت انشف شعري .. دگ التلفون .. انداريت مصدومة .. شعجب .. رحت شلته بالعجل وگلبي يدك سريع .. حبيبي اكيد ..

اول ما انفتح الخط سمعت صوته يجر نفس جگارة .. زفره وجلى صوته : الو حبيبي ..
ابتسمت وتربعت ع الچرباية .. جريت المخدة خليتها بحضني وحاچيته .. شلونج ومن هالكلام ..
حسيته ضايج ويحچي من خشمه .. : رائد ..
رائد : ها يروحي گولي ..
دنوة : شبيك ضايج .. صاير شي ..

رائد : حبيبي باچر دوامج ..
: اي ..
رائد : خوش علمود اشوفج .. تعبان من كلشي وداعتج .. ماادري شبيه روحي مسحونة ..
دنوة : اسم الله ليش .. احچيلي ..
رائد : مااريد تحملين روحج المسؤولية .. اتركي الموضوع علي .. باچر اجي اخذج .. حبيبي فتحيلي إدينج ..
دنوة : دتخوفني عليك .. شصاير ..
جر نفس طويل وحچه بهمس : يولي اريد تشبگيني .. هاي إدينج الناعمة تحتويني .. مداالگى الراحة بمكان .. اكيد حلگاها يمج ..
ماادري ليش كلامه طبع بداخلي عنصر خوف .. سكتت ماجاوبته بس العرفته هو تعبان ..
هدم السكوت بصوته : حبيبي .. ليش ساكتة ..
دنوة : مدااعرف شگول ..

رائد : سولفيلي خلأنام .. وانه باچر اجي احاچي ابوج علمود يقبل اشوفج ..
دنوة : شتريد اسولفلك ..
رائد : غنيلي بنيتي .. بكيفج شحافظة غني .. لهيني عن تفكيري ..
مااعرف بس كلامه ضحكني : تعبان واغنيلك ..
رائد : شو تضحكين يولي .. تره روحي طافرة ..
دنوة : اعتذر لاتضوج مني.. ااممم حغنيلك ساعاتك انت مو سوه ..
سمعت صوت جداحة اشتغلت اكثر من مرة هو ساكت .. طفت الجداحة وحچه : يله اسمعج ..

" ساعات انت مو سوه .. والدوة وين الگى الدوة ..
ساعة تشكي .. ساعة تبچي .. ساعة تضحك للهوى ..
مرات اشوفك .. حب وانهار .. مرات احسك كلك نار ..
مرات تگلي انت حبيبي .. وتگلي حبك اجمل نصيب ..
مرات تخليني اكره نصيبي .. واتمنى محسبتك حبيب .."

لمن وصلت للمقطع هذا ضحك بتعب وصوته ذبلان : ليش يولي .. حسافة ..
دنوة : لا هاي شبيك .. غير الاغنية هيج ..
رائد : اي باباتي اعرف .. يله عمري روحي نامي وراچ دوام..
دنوة : حبيبي .. ليش انت ماتحچي ..
رائد : انه لخاطر هالكلمة ححچيلج .. والله مثل مااحچي لروحي احچيلج .. بنيتي انتي ..
ماقبلت اروح .. انقهرت علي شلون يحچي بتعب وبالگوة يجر الكلمة .. ضليت اسولفله .. ضحكته .. ذكرته بموقف النا قديم .. حسيته غفى فسديته .. خليته بالمجر ونمت ..

گعدت الصبح بدلت ورحت بالمطبخ تريگت وانتظر منو يوصلني .. ابوي وعمامي الكل گاعد .. عفتهم گاعدين ورحت للهول .. دقايق وسمعت صوت رائد يلالي بالبيت .. گمت بالعجل مديت راسي اشوفه .. بلوز وبنطرون مضروب أوتي من الصبح .. المفاتيح بطرف جيب البنطرون صوتهن واضح .. ابتسمت علي شكد حلو طالع ..

محيي : خيرك .. شعندك من صبحيات ربك ..
رائد : اوصلها للمدرسة .. شعندي يعني ..
محيي : سالم يوصلها .. لاتدخل انت ..
رائد : چا مو انه رجلها .. عليش سالم .. مو ببغداد اوصلها شني الفرق .. ببغداد مرتي وهنا لا ..
محيي : بغداد مابغداد .. ماتوصلها يله توكل ..
طلع جدي محمل على ابوي .. : يله وليدي اخذها وصلها .. واحنا بعد الديرة عرفت مخطوبة ومعقود عليها .. خوما ندزها بيد ابن عمها .. خو زلمتها أولى بيها ..
محيي : يابة انت ليش هيج تتصرف .. انه ابوها شسالفتك ..
شامخ : وانه جدها والاگوله يصير ..

خليت ايدي على حلگي مبتسمة ع الصار .. طب انت بتحط نفسك بمواقف بايييخة ليه .. رحت اخذت الجنطة وطلعت .. لگيته كاعد بالسيارة يدخن .. ابتسملي وشمرها .. گعدت وطلعنا .. بس ساكتين ثنيناتنا .. گبل لا انزل بسته من خده ..
دنوة : شلونك اليوم ..
ضحك وغمزلي : رب الزين ..
ابتسمت ونزلت ..

داومت طبيعي .. البنات بعدهن نفسهن اول ما شافن الحلقة بإيدي بدت الاستفسارات .. حچيتلهن ..
اسراء : لج مو گتلج .. اويلي شلون زلمة هذا ..
دنوة : انچبي تتغزلين بي جدامي طاح حظج ..
هاجر : لج عيني غير هو يستاهل .. بس وين يعاينلنا وانتي صرتي اله .. يله النا الله حبي .. النا الله ..
ضحكت عليهن .. نسيت هاي آخر سنة الي .. لأن عندي التعويض والحمدلله على كل حال ..

كملت وحليت .. وصلني للبيت وراح .. وهيج مر الأسبوع هو ساكت مايحچي ابد .. بس الجگارة ماتنزل من حلگه .. لمن اجي الصبح الگى باكيت .. ومن ارجع باكيتين .. واحد فارغ والثاني مأخوذ منه خمسة اربعة .. احاول احاچي اريد اجر لسانه مايگول شي .. حبيبي شبيك .. سولفلي .. يكول ماكو شي .. تذكرت كلامه بذاك اليوم .. معقولة چان كلام عابر .. لو شلون .. يمكن الدين مضايقة .. مااعرف شسويله ويرتاح .. ردته يبيع الذهب ماقبل .. شسوي شنو بيدي قابل اكثر من هالشي ..

وبيوم اجاني الصبح چنت متأخرة بالنوم .. كعدت بالعجل بدلت وطلعت ..
اندارلي وخزرني : ليش متأخرة ..
انهضمت من كلامه : اسفة .. بس أخذتني النومة ..
ورث جگارة وشغل السيارة : خوش .. ماصار شي ..
ضجت منه .. ضليت ساكتة طول الطريق .. گبل لا انزل كمشني من ايدي وعاينلي بتعب : لاتفهميني غلط .. من البارحة مانايم ..
دنوة : عزززه ليش .. انت شدتسوي بروحك ليش هالتصرفات .. عيونك حمر ..
رائد : حبيبي من تخلصين نحچي .. روحي هسه لاتتأخرين..
باسني من خدي .. اخذت الجنطة ونزلت ..

حيخبلني عفية ليش مايحچي اووف .. تورم گلبي علي .. حتى مدااركز كلساع انطي احتمال شكل .. وبكل الحالات ادري الدين مضوجه .. بس گال ديسدد دائما .. خلأحل واشوفه شيريد يگول ..

بنص الدوام اجت الفراشة گالت دنوة محيي هي وجنطتها يردوها حتطلع .. گلت ابوي اكيد شوف شمحضرلي .. اخذت جنطتي وطلعت لگيت رائد منتچي ع السيارة ويخابر .. لمن وصلته سده .. صعدت وهو همات ..
دنوة : شعجب اجيتني هسه .. ابوي گال ..
رائد : لا حبيبي ..
سكتت .. شفته غير طريقه.. : رائد وين رايحين ..
رائد : هسه مانتأخر ..
ماسألته بعد .. ضل يمشي لحدما طبينا للمنطقة الأشترى بيها البيت .. انداريتله متفاجئة .. شديسوي .. شنو قابل ماشايفته .. شيريد يسوي .. نزل فتح الباب ودخل السيارة..طفاها وحچه بدون مايعاينلي : نزلي ..
نزعت السترة ضوجتني .. نزلت أشد الحزام مالت الصدرية ليوره .. البيت فارغ مابي شي .. بس قنفات ثنين ..
راح گعد على وحدة منهم وأشرلي بالجداحة ع الباب : سديها وتعاي هنا ..

اچذب اذا كلت ماخفت .. ضليت واگفة ماسويت اليريده ..
دنوة : شحنسوي .. ليش جبتني ..
رائد : شهالحچي باباتي .. سدي الباب تعاي ..
سديتها واجيت گعدت ع القنفة بس من الجهة اللخ .. سويت روحي دااعاين ع البيت مامنتبهتله .. إديه بحضني متوترة ماصرنا وحدنا لهالدرجة .. مااحس غير بإيده بعدت إديه عن حضني .. تمدد وراسه بحضني .. جاب ايدي خلاها على شعره بدون مايحچي .. استحيت بالأول ماسويت شي .. شفته يجر انفاسه بتعب .. كمت امسد بي .. هو يطفي الجگارة ويورث اللخ ..
همست : بيك شي .. احچيلي مو كلت ححچيلج ..

طفاها وعدل گعدته .. قربني علي وإدي على متوني ..
رائد : اكو واحد صاحبي متعارك وضاربي بچراز على راسه .. ابوه ماعنده فلوس للعملية فتأخر يله سووله العملية .. بس خطية هسه هو ايده اليمنى مشلولة ..
وخر إدي .. : هذا متداين منه مليونين .. لوما مدايني ماچان صار بي هيج .. مديروح الموضوع من بالي .. عبالك حرجته وانطاني الفلوس ..
دنوة : وانت على هاي ضايج ..
رائد : دناوي راسي حينفجر .. ادري الزواج مو هين .. يحتاج صرف وفلوس .. شوفي البيت فارغ .. بعدني حتى مامأثث .. الدين اكلني .. هذا الولد شنو ذنبه هيج يصيرله ..
دنوة : بس هذا قضاء وقدر انت شعليك ..
رائد : لا بسببي .. هو ماعنده شلون اداين منه .. حتى مستحي اعاين بوجهه ..

گام يحچي بحرگة .. عيونه حمر دم بس البؤبؤ لونه اسود .. كل الأبيض صار احمر وجفونه مورمة .. ايده صارت ترجف هو يحچي بإنفعال وعصبي ..
سكت وعاينلي بالگوة مفتح عيونه : فتحيلي غطاج .. اريد ارتاح بحضنج حتلو ساعة .. عيوني ماشايفة النوم صار يومين گاعد وعندي دوام باچر ..
هو يحچي ويعاينلي بذبول .. ماادري شصار بيه .. ماحسيت بس بالشال طاح من راسي وشعري مفكوك .. هو بنفس گعدته بس كامش خصلة من شعري يشم بيها ..دفعته وگمت..
دنوة : حتلو مو حرام بس تصرفك غلط .. ليش هالحركات ..

خزرني وجرني من ايدي للقنفة : شريد اسويلج فهميني .. انتي ماتجوزين واضل أبرر وانطي اسباب .. ألف فرصة گبل هاي .. اخذ الاريده وروحي بدربج .. ليش هسه عود ..
درت وجهي : ماادري ..
تنهد وقربني لصدره .. دگات گلبه صارت بإذاني .. انفاسه حارة وثگيلة .. حاوطت رگبته بدون مااحچي .. بحركتي هاي حسيته صار طفل صغير بالعمر .. چان هو الحاضني ومحسسني برجولته .. ثبوته وهدوئه .. نصى نام على رجلي ومگرفص روحه .. شبگته وامسح على راسه .. سكت ماگال شي .. ضل على وضعه لحدما غفى .. بقيت اعاينله شلون نايم بهدوء .. گلبي رجف علي .. نفس الدگة لمن شفته وره البيت .. ماكمشني بيوم ولا تجرأ يشوفني سافرة .. حتى هسه بعد ماصار كلشي مباح بقى مبتعد .. الا هالمرة صار المبرر اقوى من طاقته .. گمت أمشي أصبعي على خده والرصعة بحنچه .. انتبهت على شامات نحره .. ابتسمت ..

بقينا ع الوضعية هاي .. خفت اتحرك ادور يفز ..
وره ماادري شكثر سمعته يهذي بكلمات مامفهومة .. خليت ايدي على رگبته مصخن نار .. ردت اگوم كمش ايدي بقوة ..
گام يرجف .. وشفايفه همات .. وينتفض من الحرارة ..
يحچي بصوت ناصي گوة سمعت : دناوي .. حبيبي لاتعوفيني .. احبج يولي .. ابوج سرسري شسويله ..
ماادري انقهر علي لو اضحك .. خليت ايدي على خده واگعده : رائد .. گوم .. مصخن انت ليش مالابس زين ..
ماچن سمعني .. گمت شلون ماچان دورت بالسيارة لگيت وصلة صغيرة .. اخذتها غسلتها .. لگيت حافظة مال اكل مذبوبة بالگع .. غسلتها همات وترستها مي بارد .. گعدت بالگع وهو ع القنفة يرجف من البرد والصخونة ..
صرت أعصر بيها واخلي على گصته ورگبته .. اريده يصحصح ماكو .. متت خوف ..

همست يم إذنه : حبيبي اگعد .. خوفتني عليك ..
بقى بالربع ساعة فاقد .. شوي شوي بلش يصحى .. خليت ايدي على رگبته دااشوف حرارته .. كمشني منها فزيت .. قربها لشفايفه باسها .. عرفته صحى بعد .. ضليت گاعدة لحدما فتح عيونه ..
حچه بتعب : شگد نمت ..
دنوة : ماادري .. شوف الساعة ..
وگفت دااريد ألم شعري .. جرني صرت فوگاه .. خدي صار نار من الموقف .. فشلت ..
رائد : مايهم شگد .. بس المهم حسيت بيج .. بترافة ايدج واصابيعج ..
دنوة : لوتي حتى وانت مصخن وتهذي ..
رائد : ههههه.. ليش شگلت ..
دنوة : ااممم .. كلت حبيبي اموت بدونج لاتعوفيني ..
ابتسم وباس رگبتي من يم إذني : اي والله ماچذبت ..

ابتعدت وخزرته انه واشيل بشعري : يله بالعجل خلنرجع للبيت لا يشكون بيه..
رائد : يله لبسي ..
لبست الشال وكملت .. اخذني وقفل البيبان بعدين طلعنا .. مرينا من محل غذائية چبير ..

گتله : حبيبييي ..
رائد : ها يولي شبيج ..
دنوة : اريد حلويات .. مشتهية حلاة ..
ضحك واخذ ايدي خلاها على رجله ويمشي ابهامه عليها : شتحبين اجيبلج ..
دنوة : ماادري بكيفك ..
رائد : نزلي انتي اشتري اليعجبج ..
دنوة : لا .. انت تعال وياي ماانزل وحدي..
رائد : ميخالف اجي ..

فر السيارة ورحنا ع السرة اللاخ يم المحل .. نزل ونزلت وياه .. استحيت اخذ اكثر من حاجتين .. اخذت نساتل ثنين بس ..
نزع مناظره ورفع حاجبه : بس ..
دنوة : اي بس ..
رائد : يله روحي هسه اجي..
عفته ورحت گعدت بالسيارة .. شواي واجه خلى علاگة بحضني وطلعنا ..
دنوة : هاي شنو .. ليش جبتلي بعد ..
رائد : دكلي .. هسه شجايب قابل ..
ابتسمت وتشكرت منه .. وصلني للبيت .. گبل لا انزل شبگته وبسته من خده : انتبه لروحك واخذ ادوية ..
رائد : تأمرين أمر ..
ودعته ونزلت ..

وره هالموقف ماشفته بعد .. لأن التحق خابرني بالليل گال حروح للدوام واقفل التلفون خاف تسألين .. گتله براحتك الله يحفظك ..
گام عمو قاسم يوصلني للمدرسة .. سالم ابتعد .. التهيت بالدراسة حتى مارحت لبيت خالتي .. ورود تركتني بعد السالفة الاخيرة لأن شافت سوالفها ماتسوي نتيجة .. رائد واگف وياي بكل الحالات ..

بيوم رجعت تعبانة رأسا نمت حتى ماسلمت .. گعدت المغرب بالسبعة هيج .. گمت بدلت ورحت للمطبخ اكل .. اشوف سرور ونوارة يضحكن .. مافهمت شكو .. عفتهن وانه ضايجة منا بعد الواحد لمن يگعد المغرب شيطانه راكبه .. صبيت على صفحة وگعدت اكل ..
رفعت راسي حاچيتهن : خالة وجدة وين ..
نوارة : عيني ديخبزون وره البيت .. صح النوم حبي ..
دنوة : ها خوش .. منو هنا ..
نوارة : گرايب جدي اكو غيرهم قابل ..

كملت بالعجل ورحت للحمام اغسل .. مريت من غرفة خالة ابتسام واسمع صوت نوارة تخابر وتضحك ..
تقربت اسمعها : اي حبيبي شبيك .. لا ماكو شي .. انه همات احبك والله ..
صخام .. هاي شدتحچي منو هذا .. فتحت الباب وطبيت بالعجل .. هي ارتبكت حتى ماسدته ..
عاينتلها متفاجئة : منو هذا ..
نوارة : شعليج حبيبتي ..
دنوة : دحچي .. لاتودين روحج بداهية ..
نوارة : اووي .. حبيبي واحبه ويحبني .. شني حرام ..
جريته منها مالگيت المكالمة مفتوحة .. طبيت ع المكالمات ماكو رقم غريب ..

هي طگتها بضحكة واخذته مني : هاي شبيج صدگتي .. چا انه شجابني ع الحب عمي .. خليني عايشة ع الأكل احسن منچن .. شتحسن ماادري .. حب شني والله بطرانات..

دنوة : ههههههه .. وانه عبالي صدك .. گلت هاي شكد مفضوحة ..
نوارة : لا حبي ردت اضحكج شوي اشو گالبة الچهرة من اجيتي ليهسه ..
دنوة : اي تعبانة من الدراسة ..
نوارة : بطلي .. موخوش سالفة هاي ..مو عندج رائد .. شوف شوف .. جدره على ناره وعينه على جاره ..
دفعتها بشقة واضحك : انچبي ماكلت اريد ابطل ..

عفتها ورحت وره البيت وياهن .. مرت الأيام طبيعية .. امتحانات وخطاطير ومشاكل لايخلى منها ..
وره اسبوعين هيج رائد خابرني بالليل .. حچينا عادي وحسب كلامه گال سددت سبعة لحد هسه .. بعد ماادري اذا صدك يا لا.. بس انه واثقة منه ثقة تامة فاكيد مايچذب علي ..

خلصنا الشهر الثالث ونص الرابع .. شلنا الزوالي وغسلناهن .. رجعت اشوف رائد يوصلني للمدرسة .. حسيته ارتاح شوي ونسى موضوع هذا الولد صديقه ..

وراها بفترة بلشنا نخلص المواد بقى بس الرياضيات فبقيت اداوم علموده .. باقي چم يوم ونگعد علمود المراجعة .. فماعندي ضغط مرتاحة .. عمو كاظم عزمنا لبيته على غدة .. يريد الولد يلتقون بولده ويتعرفون عليهم أكثر ..
گعدنا الصبح تريگنا والظهر قفلنا البيبان ورحنالهم .. همات قريبين فتمشينا مارحنا بالسيارة .. حنين وغدير موجودات .. بس روان..
گعدنا بالمطبخ فسألت عنها : چا روان وين ..
حنين : ببيت اهلها عيني .. زعلانة ماتخلص زعلانها ..
سرور : ليش عود ..
حنين : ماادري .. بيناتهم ..
سكتت بعد معليه ..

وره ساعة هيج التهينا بالطبخ .. مسوين كمية چبيرة ..
اندارتلي غدير بيدها طاسة وسط : حبيبتي فوك الگونية مالت التمن .. جيبي منها بهاي ..
اخذتها من ايدها : ماشي هسه ..

عفتها وصعدت فوك .. صنطة محد اكو .. الغرفة الاخيرة هي متروكة فيخلون بيها هالسوالف .. تمشيتلها مااحس غير انفتحت باب الغرفة الثانية انسحبت من ايدي جوه .. عطت لمن شفت عقيل .. : شجابك ..
كمشني من زندي بقوة دافعني ع الحايط .. وايده اللخ يريد يرفع الردان مالت الدشداشة .. عضيته من ايده .. ضربني راشدي ..
صار يتجرأ اكثر بوقاحة .. روحي ساحت من الموقف الهابط .. اريد ادفعه مايندفع .. ادور هو صامت لايحچي ولايگول .. گمت ابچي وادفع بي ..
دنوة : شتريييد .. عوفنيييي ..
عقيل : ترفضيني مووو .. ادور انتي بگد القندرة تحبين وتتمعشگين .. اذا ماكتلته بليلتچ اطلع معتب ..
فتحت عيوني بخوف .. جسمي كله رجف .. شلون يحچي بقباحة ويگبح بوجهي عيني عينك ..
دنوة : شتريد مني انت .. اكرهك مااريدك ..

رفع الردان وشفايفه تمشي على ساعد ايدي وزندي .. شواربه ولحيته تبززني .. جسمي كزبر منها .. گمت ارفس وادفر بس اريد يعوفني .. عضيته جريت شعره مايفيد شي .. هو يفشر ويكفر شلون ترفضيني وادزين رائد ينهي عليج .. محد يفهم ماچنت ادري حيسوي هيج وينهي علي ..
راد يجر الشال .. تفلت علي وغطيت وجهي .. : والله اگول لابوي يطيح حظك..
عقيل : ابوج نفسه انطاج لواحد متزوج صارله سنين .. لاتستگوين بي مايصدگج ..
دنوة : لا يصدگني وغصبا ما عليك ..

ابتعد هو ويمسح بأصابيعه على لحيته : ماكو بنية تجي لواحد متزوج الا اذا چانت عدها علاقة بي .. هو متزوج عليش يبصبص ع الحديثات .. روحي احچي .. يله روحي .. واذا أحد صدگج شتردين انطيج..

خفت من كلامه شلون يحچي بثقة .. البنية هنا محسوم أمرها .. انه شعندي دليل .. البيت بيته وهاي غرفته وانه جاية عليهم .. فوگ ما اجيت ادور اتبلى على ابنهم .. هيج يفكرون .. اتفشل والله اعلم ابوي شيسوي بيه .. سكتت بس دموعي تنزل .. عفته ردت اطلع..
صاح : زنودج ترفة ..
انداريت وخزرته : نذل وحقير ماعندك شرف ..
رگعت الباب بوجهه ونزلت بالعجل .. حتى ماجبت تمن .. ختروح اخته تجيب انه شكو .. كرصت بالمطبخ ماطلعت بعد .. بس اسمع صوته شلون يحچي ويضحك ولا چن .. لعبت روحي من روحي .. رحت للحمام غسلت ايدي وزندي .. رائد الهو رجلي ماتقربلي بهالنذالة .. انت شنو .. شگد اكرهك ..

طلعت گعدت وياهن بين ما صبن الغدة وصاحني .. بقيت گاعدة بس على اعصابي حتى مااكلت هيج .. افكر معقولة غدير دزتلي بالقصد .. بس هي حبابة ماتسوي هيج .. كملنا غدة لگيتها دتغسل مواعين وتسولف وي النسوان .. رحت وگفت يمها حاچيتها..
دنوة : غدير لمن دزيتيني اجيب تمن منو چان فوك..
غدير : حبيبتي محد اكو ..
دنوة : عقيل وين چان ..
غدير : راح يجيب شغلات للبرياني .. ليش تسألين حبي..
دنوة : بس انه شفته فوگ ..
عاينتلي بإستغراب : لا شلون .. اسألي حنين هي راحت جابت تمن وراج..

سكتت ماحچيت .. مبين ماتدري صدك .. وانه مااريد احچي اخاف .. جبانة اي .. وحيل جبانة .. خلص اليوم بطلاع الروح ورجعنا للبيت .. ماگدرت انام للفجر .. الموقف بقذارته انطبع ببالي .. لحدما أذن الفجر كمت صليت ونمت ع المصلاية ....

يتبــــــــــــــــــــع.....................