رواية اسألي عني الليالي الفصل الحادي عشر 11 - بقلم رقية جاسم

قناة التليگرام

حساب الانستگرام

الـــــبــــارت الــــعــــاشــــر................

" بعد مرور اربع أشهر .... جنوب البصرة .... "

دنوة : واكفة بالمطبخ اسوي الشعرية علمود البرياني.. الجو حار حيل .. آب بعد .. سرور ونوارة كاعدات على صفحة يسون زلايط والجزر يگطعوه للحشوة.. هسه جان المطبخ هوسة وكلهم كاعدين هنا..شطلعهم.. همهمت بيني وبين روحي .. سمعت صوت الباب التدخل لحرم البيت انفتحت وصوت مفاتيح سيارة وحذاء يدك بالگع..هذا ابوي اكيد.. عدلت الشال بالعجل ولو حارة واتمنى انزعه بس شسوي.. اخاف اترزل ..

لحظات واجه وكف بالباب..عرفته من صوته..سلم على سرور ونوارة..گلبي عصرني..يحاچيهن باسلوب حلو.. عمو حبيبي وعمو گلبي.. ليش انه بنتك تأذيني بكلامك ..

انه وافكر صاح بيه : وجع ماتكولين ابوي واكف اجي اسلم علي..
انداريتله ومسحت المي من گصتي..تقربت يمه : اسفة بس راسي يوجعني بابا ماانتبهت..
رفعلي حاجبه وزفر انفاسه بتململ من كلامي.. راح وكال هو ويمشي : تعاي احاچيج بالغرفة..
مشيت وراه..غرفته مجرشة..تمنيت انام هنا واعوف المطبخ.. من البارحة مانايمة..راسي كامشة صداع نصفي ويذبح بيه أذاني..

دنوة : أأمر يابة..شردت مني..
محيي : باجر يجي ابن عمج رائد..انه حطلع لشغلي ببغداد.. ماريد لعب منا ومنا خوش لو لا..اذا سمعت شي من احد اموتج.. مااريد تشوفي ولا يشوفج ابدددد..ابد سمعتي..
عاط بيه : سمعتييي..
دنوة : حاضر..بس انه مامسوية شي ..
محيي : لا دسوي بله..يله طلعي مني خلانام نعسان..
سديت الباب وطلعت..ركضت ع الشعرية..جريت نفس طويل وزفرته..الحمدلله عبالي احترگت..

اجيت اكمل الباقيلي واصيح ورود السنيورة تصب ويانا.. نصيت النار وتذكرت رائد.. شكد مرتب وهادئ ..تعجبني شخصيته وكلامه..دورات اسمعه يحاچي عصام ابن عمي قاسم وصحبانه ..يعني فدشي مختلف من عدنا ..من صار السقوط لحد هللحظة مااجانا..شعجب حيجي الباجر.. ابوي مايخليني اطلع اسلم..هو يعتبر من اهل البيت..مثل عصام وسالم وقصي وعامر..حتى سرور ونوارة يسلمون علي.. انه يگلي اذبحج اذا خليتي يشوف خيالج..وماادري ليش.. بس اگله اي..لأن عصبي وايده والضرب..

ابتسمت وصبيت الغده..بلشنا ننقله للاستقبال..بيت عمتي يمنا اليوم واخت جدي هي وبناتهه..كملنا واجت الزلم.. كعدت لزك يم خالة ابتسام والباقين جدامنا..
جدي حچه : بوية دنوة شني محيي ماياكل..
دنوة : مااعرف بس كال نعسان ..
شامخ : كومي شوفي خاف مايدري صبيتن..
دنوة : ماشي..
كمت اشوفه..فتحت الباب على كيفي اخاف يطلع صوت.. سمعت صوت تلفونه يدك هو بسابع نومه حتى ماحس علي.. عفته وطلعت..كتله لجدي نايم مايريد ياكل وكعدت يمهم.. صار حچي على عامر..يريد يرجع لكليته وهي ببغداد..بس جدي وعمي لواء مايقبلون چي الاوضاع مو تمام..

فاطمة : عمي ترضاهه يسوي هيج..هو احنا هجينا من بغداد علمود قصي..ادور هسه عامر عنبل..
شامخ : لا يابة مايصير..مو وكتهه هسه والصك ع الهوية.. شني شناقصك ايد رجل..دگعد وبعدين كمل..
عامر : صحيح..بس حرامات تضيع السنة علي واني سنة اخيرة جدي..
شامخ : ميخالف بوية بعد جدك..حالك حال هلوادم..
لواء : اي وليدي هيج احسن..بس شوي يستقر الوضع وانقلك هنا بعد مالنا مكان ببغداد..

سكت ماكال شي..كملت اكل شلون ماجان..من الحر بعد مابيه حيل اكل..كمت للمطبخ سويت اكل ثاني لأبوي خفيف.. كملته وضميته بالفرن..شواي واجن البنات جابن المواعين.. سرور تغسلهن بعد انه سويت وي خالة ابتسام الغدة.. اجت ورود تحچي وي كوثر بت عمتي سناء وادري بيهه تريد تغورني ..
ورود : ولج عيني الحمدلله الف مرة ابوية يخبل..لايصيح ولا يصير عصبي..وخصوصا عليه اني..
كوثر : اي غير انتي الوحيدة اله..اكيد مايصيح عليج..
ورود : لعد دنوة مو الوحيدة عساس..بس شوف شمسوية لأبوهه حتى هيج يكرهها..
شفت كوثر گرصتهه من زندهه : وجع لاتحجين جدامهه هيج.. مو واكفة يمج..ماتخافين تسمعج..

مشيت من يمهه بس ماانداريتلهه : الحمدلله كاعدة وساكتة.. ماابصبص لولد العالم واخيل عليهم..
عفتهه وطلعت..كلت هيج لأن اكثر من مرة سمعتهه تحجي عن واحد تحبه بس يحب وحدة غيرهه وتكعد تبچي..
مشى اليوم عادي..جدي ضل بالديوانية هو وعمي لواء وقاسم.. كلساع جايين علي ناس..بيتنا مايفضى ابد..على طول خطاطير وفصول وگعدات..واحنا النسوان طايحين بيهه.. ورة المغرب انطفت الكهرباء..بعد ماتجي لحد ثاني يوم.. كمت فتحت الشبابيچ بلكت يجينا هوى.. كمت وي خالة ابتسام وفاطمة اسوي العجين مال خبز..لازم وي كل وجبة نخبز جديد.. احنا هواي بالبيت وهاي من وعيت للدنيا هيج الشغل.. بس تعودت..عطلة وماكو شي اسوي..

طلعنا ورة البيت نسوي..بين ما خلصنا طبيت للبيت اشوف ابوي كعد لا..من الظهر نايم.. لكيته بالمطبخ يفتر وكامش الضوة بيده..
دنوة : بابا كعدت..
محيي : اي..تعاي صبيلي اكل صخام..وينچن..
دنوة : جنت اخبز وره البيت.. هسه اصبلك..
محيي : مااريد كشمش بالبرياني..سويلي غير شي خفيف.. قولوني يوجعني..
دنوة : ماشي..
صبيتله وخليته بالكع..صاح بيه : ماتعرفين مااكل بالگع.. جيبي ع الميز.. وهاي شنو الحر ..فتحيلي الشباچ..

تأفأفت بداخلي..اوف تعبتني يابة..ليش هشكل..هسه لو يطلب وبإسلوب مااكول شي..بس يأمرني ونبرته قاسية حيل.. كمت سويت اليريده جان تدخل خالة ابتسام هي وجديتي والبنات..
الحجية غادة : ها يمة شني هلنوم هذا..
محيي : تعبان والله..جان نمت اكثر بس الحر سمطني.. باجر اطلع لبغداد بعد..
جديتي لطمت على صدرهه بخوف : وين رايح يوم.. تريد تجلطني.. شمالك ييمة هسه متوازي..
محيي : اي طبعا متوازي..شون اعوف شغلي بيد العمال.. هسه الله اعلم شكد مبيوگ..هي الوادم تسودنت من سقط النظام كامت تبوگ حتى من البيوت..ادور المحل مفتوح شون ماينباگ..عود اخابرج لاتخافين..

سكتت ماكالتله شي..سوينا العشة وصبيناه.. الوضع متوتر شوي على عمي فيصل..چي يشتغل ممرض عسكري ابغداد.. فخايفين علي..البصرة وضعهه مو احسن من بغداد.. بس الديرة أمان..حتى اكو ناس اجتنا من المدينة باتو عدنا وراهه جدي فرغلهم بيت من البيوت المامسكونة.. ماچنا متخيلين حيصير سقوط..بس جدي كال حيصير شي..لأن گبلهه بفترة طلعوا المساجين..بس الارهاب والقتلة اعتقد ماطلعوا.. وراهه من سقط النظام كلهه طلعت .. مناظر مرعبة وتخطف الروح شفناهه بالتلفزيون..الاتصالات انقطعت بوكت ابوي وعمامي فيصل وقاسم ببغداد بشغلهم..شهرين مانعرف عنهم شي.. بعدين رجعوا..ماجان بيهم شي ولا مخطوفين بس الطريق يخوف والسلابة حتى للبيوت تدخل .. شحال لو بالشارع..

كل ما انام يحضرني موقف ابوي لمن رجعوا..جانو بيت عمي فيصل يمنا ومرته تبجي والبنات يمهه يواسونهه..من رجع اجن بناته تلگنه وفرحان بيهم هو اكثر منهم..
كال : والله يابابا كل ما انام تجن جدام عيوني.. شون خاف يصيرلي شي واعوفچن وحيدچن..
وانه ابوي على الرغم من عصبيته وكرهه الي بس شفته كعد وحده رحت يمه بسته من راسه وشبگته..ماانطاني أي ردة فعل.. كتله : الحمدلله على سلامتك..خفت بدونك..
عاين علي بنظراته الجامدة : الله يسلمج..

فشلت منه وكرهت رجليه الجابتني لعنده من قارنت ردة فعله هو وعمامي.. بس الحمدلله ..لأن جدي وياي بكلشي.. حتى هو دخلني مدرسة وكلشي من عنده..مع العلم ابوي مامحتاج بس ماجان يريدني ادخل مدرسة..جدي خلاني اكمل ابتدائية ومتوسطة وهسه نجحت للخامس ادبي..

نفضت الافكار ونزلت الفراش فرشت بغرفتي..هي ابرد شي.. البنات اجن ينامن يمي والباقين طشو بالغرف..
سرور : ولج باجر يجي رائد..
دنوة : اي ادري..شمدريج..
سرور : سمعت ابوي يحجي.. ماادري شعنده ..شكله حيطول هلمرة..
دنوة : شكو ليش ماسمعتي..
سرور : لا..هسه يجي ونفتهم..
سكتت وكملت فرش..كمت فتحت الشبابيچ .. غرفتي صايرة ع الحلال القريب من عدنا..بحيث الهوى يجي بارد .. عفت الباب همات مفتوح وتمددت..نسولف ونضحك.. بيتنا كلش جبير حتى اكو غرف فارغة..ونفه حيل..

من يجونا بيت عمتي وخوات جدي اكو غرف ينامون بيهه.. فهسه بس انه وكوثر وسرور ونوارة نايمات سوه.. الباقين بغير غرف..

درت وجهي ع الكنتور افكر بأبوي..خاف يروح ومايرجع.. كلشي توقعنا بهلوقت الكسيف..
حچت كوثر : عيني أمورة بعد وكت شعندج نايمة..
دنوة : تعبانة..اليوم اشتغلت هواي..
نوارة : عوفيهه دتفكر برائد..
انداريت وخزرتهه : انجبي شنو هلحچي..بالي على ابوي.. يارائد استغفرالله..
سرور : اي هي تحبه..
دنوة : انه ابتليت كلت شخصيته تعجبني..انزوول عليچن..
كلتهه وضحكت..صدك مااسمي هذا الشي حب..لأن الانسان بهيج مرحلة من عمره يرسم بباله شخص يسمي فارس احلامه وانه شفت الفارس برائد .. اكيد من اكبر اكثر يروح هلشي.. لأن مو مهم .. اكو شغلات أهم واولهه الدراسة..

بقينا كاعدين للوحدة ونمت گبلهن.. كعدت من وكت لكيت خالة ابتسام وفاطمة كاعدات يسون ريوگ وخابزات جديد.. غسلت وصبحت عليهن.. بين ما كعدن البنات والكل كعد.. رجعت للغرفة ألم الفراش..مريت من الديوانية سمعت صوته.. اجه يعني.. ماادري ليش گلبي خفگ وابتسمت..رحت لميته ورجعت وياهن اصب الاكل.. جدي طلب نصب للزلم وحد ..صبينالهم وكعدنا نتريك بالمطبخ..

مشى اليوم كلش بطيئ..ابوي بس تريك وطلع..مشيت وياه اسد الباب وراه.. كمشته من ايده ..
دنوة : عود خابرنا حباب..
محيي : ان شاء الله بابا..فوتي ولاتخلي يشوفج خلاص.. حيطول فوك الشهر..فهمتيني..وانه همات اطول هلمرة..
دنوة : فهمت..
محيي : يله زين..

طلع وطبگت الباب وراه..سمعت صوت السيارة وطبيت.. هو قاسي ويكتلني..بس اضوج اذا ماسمعت صوته بالبيت..

خلص اليوم شغل وتعب..تمنيت يرجع الدوام علمود التهي ويخف الشغل علينا.. طول اليوم اسمع صوت رائد يحاچي عمامي وجدي بالديوانية..لحدما بالليل وره العشة كملنا كلشي جان يخف الصوت..اجت سرور تتمخطر وتحجي بحسام بينهه وبين روحهه..
دنوة : ولج نصي صوتج لايسمعج احد..
سرور : ديله نسيت شمدريني.. شدسوين انتي..
دنوة : كاعدة شسوي يعني.. شو ماكو صوت وين راحو..
سرور : رائد والولد طلعوا بالحلال .. جدي فات ينام باجر يطلع للعمارة عنده فصل..
دنوة : يله امشي فرشتي صخمتي..
سرور : اي كملت وفتحت الشبابيچ هماتين..

همهمت ومشيت وياهه للغرفة..ضليت كاعدة واحجي وياهن..
دنوة : ها ماعرفتن ليش رائد اجه..
نوارة : عيني المحروس يشتغل مترجم وي الامريكان.. ابوه ماقابل يقدم ع الخدمة هسه خايف علي.. هسه متهدد من جهة علمود شغل العسكرية مو ع الترجمة..وعمي دازه علينا.. ماقابل يبقى بالمدينة هنا أمان اكثر..
كوثر : شفتي..حتى انگليزي لبلبان.. هسه احسده لو احجي علي..وانه عود اداب انگليزي واذا شفت فلم لازم اقره الترجمة..

دنوة : هههههه..بله هاي سالفة..ليش هو شيدرس..
سرور : خريج معهد طبي بعدين مقدم ع الكلية العسكرية.. هسه هو مقدم..
دنوة : شنووو..يعني عمره ٣٣.. لا صبري.. وين اكو مقدم عمره ٣٣ وهو اصلا جان معهد..
كوثر : اي عادي ابوي يكول يسوي فعاليات اضافية وشي مايسوي المثل رتبته فيترفع..وعادي يترفع مرتين بالسنة بس لازم تلث شهور بين رتبة والثانية..هو سبع مبين علي..
دنوة : امممم..
درت وجهي كمت خليت البردة ع الشباچ خوما على حل شعرنا هو هيج اسوي كل يوم..

بالليل كلش نامن وانه بقيت كاعدة.. محترة اتاني الكهرباء بلكت تجي حتلو بالغلط..صارت بالثنتين وسمعت صوت زلم قريب .. تمشيت كعدت يم الشباچ ..يكون ناصي وطويل.. فدنجت وصار الصوت اقرب.. شهگت وخليت ايدي على حلگي.. هذا رائد والولد.. خلاسمع شديحجون..

قصي : بس تدري..مو خوش سالفة هاي..عليش دخلت روحك بهيج معمعة وامريكان ومدري شنو..
رائد : ماتعرفني..انه اتخبل من گعدة البيت..وتدري الجيش انحل ونفسيتي تلفت..سنين يله وصلت لهلرتبة بعدين نزعتهه بيدي..
عامر : الله يساعدك والله..غير الكبار ماانطوا أوامر..
رائد : اي والله دمار..خو انه بتكريت..اول اسبوع وره السقوط كل البعثية تكتلوا..امشي واشوف الجثث بالگيعان.. كلت اذا تكريت هيج چا بغداد والبصرة شلون.. ضربة بوش چنت توني لابس رتبة ملازم وشفت كلشي..يعني ماتأثر بيه هيج مناظر .. بس خفت على ابوي واهلي..ضلينا تايهين بالمقر ماعدنا شي نسوي..غير تجينا الاوامر من الالوية والرتب الباقية.. عاد اخر شي رجعنا بالختلات..فتت لشارع انه والضباط الباقين..

واحد وياي الله شاهد كام يبچي ويصيح بالشارع ياعالم بس انطونا هدوم خلنرجع..طلعوا رياجيل كبار بالعمر.. انطونا دشاديش بالمقابل سلمت السلاح والزي نزعته.. والله الدمعة بطرف عيني.. حصلتهه بدم عيني بعدين بسبب هلوضع الزالگ هيج ذبيتهه..لبست دشداشة ورجعت بس بالجنسية والمستمسكات ..
قصي : شبيك ماترجع تقدم..
رائد : ليش انه ماقدمت قابل.. مرتين مشيت المعاملة .. اجي الگى الاوراق مشگگة..الوالد الله يحفظه ماراضي.. وانه شفتلي غير شغل.. بعد بين ما اشوف شسوي واقنعه..
سالم : شني قابل صغيرون انت وتمشي بشوره..
رائد : لا ياب صغير شنو..بس رأيه يهمني.. وهذا الأنسب.. انت تعرف شي وانه اعرف شي..

عصام : بس تدري صدك هستوني انتبهت..شو مامسويلك لحية.. مو ماعندك دوام..
رائد : يول وحگ ربك متعود..بعدين هيج احلالي.. اخر مرة ربيت اللحية بنهاية الثمانين..
عصام : اويلي الله شگد عتيگ..

سمعته ضحك ضحكة طويلة وكلهم ضحكوا وياه.. ابتسمت علي.. كام يگح ..گلوله الله الله.. بهللحظة صار هوى عالي وانرفعت البردة شوي..كمشتهه وفتحت فتحة صغيرة بس تك عين طالعة مني و هم ماابين حيل.. شفته واكف بيناتهم .. لابس بنطرون اسود كتان والحزام اسوي گاعد سنتر علي.. وقميص نيلي بي خطين بيض من يم الصدر.. شعره سرح وثخين..الهوى چي عالي يلاعب خصلاته.. كل گرابتي الاعرفهم تقريبا طوال.. على جدي وعمامي فماكو واحد ناعم.. مع ذلك من اشوف رائد واكف بيناتهم احسهم نشاز يمه..

عصام : يول عليك الله احجيلنا شون تحاجي الامريكان.. شوف ولا تكول انه دارس ومتخرج..بس يله..
كام يحجي..على طبيعة شغلة والمستر المسؤول علي هو وبعد جماعة..كال مستر مايك..اخر شي سديت البردة وكمت تمددت.. شكد حلو من يحجي ..بله عمره ٣٣ اكيد هسه يحب وحدة ..يمكن متزوج وماندري.. لا اكيد جان عرفنا بس .. بس شنو.. ماادري لا هاهيه هو بس يعجبني قابل احبه لو شنو.. شنو هلتفكير..غير ابوي يخلص علي.. هو بالگوة مچلب بالدراسة على شعراية..بس اكول كلمة يبطلني..
كعدت احسب من شوكت اشوفه بدون مايدري.. من كبل السقوط.. اي صار هواي ..جانت اكثر جياته من ابوي هنا.. وانه اخاف منه فأضل كاعدة بالغرفة لحدما يطلع.. خاطر لا اشوفه ولا يشوفني..

بس هلسنة جياته صادفت ابوي ماموجود.. دورات اكول خاف حرام الدااسوي وابوي مگعدني ومخليني اروح للمدرسة.. ادور اكول انه شمسوية..وفعلا شمسوية..بداخلي نظيف وماببالي شي ابد..مجرد تعجبني شخصيته..
اهو شكد لغيت..خلانام احسن.. جريت الغطى لحد ركبات رجليه ونمت..

وره يومين طبيت للغرف اخذت الهدوم خاطر اغسلهن.. رحت على خالة ابتسام بالمطبخ كاعدة ويمهه نسوان عمامي وجديتي.. تقربت شاورتهه ..
دنوة : عندج هدوم اغسلهن..ماطول اكو كهرباء..
ابتسام : يحظي غير عطلت الغسالة..
دنوة : چا شلون..
ابتسام : تغسليهن بيدج خالة.. بكيفج خاف تعبانة ماتكدرين.. اخذي سرور ونوارة وياج..هنا النسوان مااكدر اعوفهن وعمامج يردون يروحون للشغل باجر..
دنوة : ديله ماعندي شي ..

رحت وره البيت اخذت الطشت الچبير وتايت وفتحت الباب.. الترك يطلع ع الحلال القريب علينا مايفوته بس اهلنا ..هيج يفر ونهايته تصير بسد غرفتي..الباب مالته ع الحلال وانه الشباچ.. خليت المي وصحتهن اجن يغسلن وياي.. جريت بنطرون هيج لا على التعيين اسود والا وكفت يله تعدل..
صحت : سروووور..مالمن هذا..
- : مالتي..
خلست من الصوت..هذا رائد شكد فشلة.. هسه يكول هاي عرمة وتصيح.. عدلت الشال وانداريت .. رفعت راسي اشوفه.. اول ما شافني مثل الانصدم وعگد حواجبه .. شبي ليش هيج..حسبالي شكلي بي شي لو جزء من جسمي مبين..
دنوة : اا..انه اعتذر بس ماادري..
رائد : ماكو مشكلة..انطينياه..
: ها ..
خزرني ومد ايده : انطيني البنطرون..
دنوة : اي اي..هاك..

رائد : وين لكيتي..انه مخلي بالغرفة..
دنوة : مااعرف لگيته بالسلة مادخلت لغرفتك..
رائد : اي زحمة تغسلين هدومي انتي..

عاينتله بإستغراب..شو عصام وسالم يذبون الهدوم علينا ذب خاطر نغسلهن..ولو چنا ع الغسالة هسه عطلت.. انتبهت علي اندار على سرور ونوارة سلم عليهن وابتسم.. كعد ركبة ونص واندارلي
رائد : جيبي التايت اغسله انه..
دنوة : مو..مو يعني ....
رائد : يولي جيبي..انه امي مااخليهه تكمش هدومي..
هذا شبي..شدعوة هيج يحاچيني..يله خفة وراحة.. دنجت انطيتهيا.. گلبه ع البطانة وكعد يغسله.. اعاين لإيده شلون كامشه بقوة حسيته حينشگ.. كمل وگام ينكته.. قطرات المي صارت على وجهي وانه مخلية كحلة.. فركت عيني من المي حتى ناسية الكحلة..

اندار والبنطرون على ايده..صار بسدي وهمس : غسلي صخام الكحلة..
عافني وطلع.. تانيته يبتعد ورحت للحمام شفت وجهي بالمراية.. الكحلة سايحة وحتى بأصبعي صايرة.. تأفأفت وغسلت انه واحاجي روحي : هاي اول مرة يشوفني وشافني بهلمنظر.. استغفرالله.. ديله قابل منو هو ..حاله حال سالم وعصام.. كملت ورجعت ع الهدوم كملناهن وشريناهن..
بالليل كملنا شغل ومثل كل مرة..بس هلمرة بيت عمتي رجعوا لبيتهم فبس انه وسرور ونوارة..احس اخذ راحتي اكثر.. بقينا كاعدين نسولف لحدما نعست وتمددت .. تذكرت شكله اليوم.. ليش هيج تفاجئ من شافني.. اوف حتضل السالفة هاي ببالي لحدما اعرف ليش..

خاف چي اول مرة يشوفني..لا.. ماادري اوي .. القطع سلسلة افكاري ابوي..خفت يعرف شيخلصني يموتني.. لالا مايعرف اكيد..محد شافنا..وكلشي جان صدفة..مايعرف اكيد.. طردت الافكار شلون ماجان ونمت..

مر اسبوع عادي..ماشفته من ذاك الموقف..بس اسمع صوته قريب الغرفة يسولف يا بالتلفون يا يحاچي الولد.. شكد حبيت ضحكته..ولو كلش قليل يضحك..ولد عمي الوياه يذبون حچاية يخربون ضحك عليهه..هو مجرد يبتسم لو يضحك ويسكت بالعجل.. كمت اخاف من مراقبتي اله..احس مايصير وحرام ويجوز يصير شي يخلي ابوي يعرف ادور اروح بداهية.. فبهليوم بطلت..حتى نمت من وكت خاطر مااسمعه من يجي هنا..

وره هلاسبوع طلع من البيت من الصبح ماسمعت بي هنا.. كالو راح لشغله..
العصر كاعدة اهفي لروحي بالمطبخ..البيت مخبوص بالخطاطير بس المطبخ فارغ..هسه اكو واحد يطلع يهلحر.. اوف ياربي..استغفرالله.. انه وكاعدة اجت خالة فاطمة..
نترت بيه : كومي لج..
دنوة : وين خالة..
فاطمة : اجت خالتج تاخذج يمهه..
دنوة : وابوي يدري..شلون خاف مايقبل..
فاطمة : وانه شكو تسأليني..ماتعرفين ابوج يقبل لو لا.. والله يالله..
كمت وكفت جدامهه : ليش تحاجيني هيج..شمسويتلج..

فاطمة : ذنبج بتهه..بت الگح....
دنوة : لوما جبيرة جان عرفت شجاوبج..الله يسامحج تحجين على مرة ميتة..الله شيسوي بيج..
عفتهه ورحت للطرمة انه واعدل بشالي.. لكيت خالتي واكفة بالطرمة.. رحت عليهه حضنتهه وبستهه ..
خالتي : يله حبيبتي جيبي هدومج وتعاي يمنا..البنات كاعدات ماعدهن شي..
دنوة : خاف ابوي مايقبل..شلون..
خالتي : لا خابرته..كال اخذيهه..هو عكبة يرجع ويمر عليج ياخذج..تونسيلج شوية يمنا..
دنوة : ديله خوش..هسه اجي..تعاي فوتي حارة هنا..
خالتي : لا حنتظرج بالسيارة عمري..

همهمت وطبيت جوة..اخذت هدوم وانطيت خبر لخالة ابتسام خاف يضل بالهه بعدين طلعت..اخذتني ورحنا للمدينة.. الشارع مهجور وتلفان..من السقوط ماطلعت باب البيت.. بس للمدرسة وسالم ياخذني ويرجعني.. مرينا من يم سيطرة.. خليت ايدي على خدي بتململ واعاين من الجامة.. لحظات. ووكفت السيارة يم جنود امريكان وواحد داير ظهره يحاچيهم بالانگليزي.. عرفته من صوته ..گلبي كام يدك سريع.. هذا رائد صدك يشتغل وي الامريكان..لابس بنطرون وقميص ابيض بي خطوط سود..مرجع شعره ليوره وحاط المناظر الشمسية علي.. باللحظة الانه صافنة علي واراقب حركات ايده شلون يحاجيهم اندار..

جفلت وشهگت..استغفرالله..الحمدلله خالتي ماانتبهت.. رفعت راسي شفته مبتسم بطرف شفافه بحيث مامبينة الابتسامة بوضوح..
فززني صوت خالتي : ولج هذا مو رائد ابن عمج..
دنوة : اي خالة هو..
خالتي : مو عسكري..شجابه ع الامريكان..
دنوة : اي هو كام يشتغل مترجم بعدين يقدم ع الخدمة..
خالتي : هااا..ديله زين..
حركت السيارة وطلعنا لبيتهم.. ضل منظره ببالي ..انه متعودة على ولد عمامي اكثر شي دشاديش لبسهم بس وكت الدوام رسمي يلبسون.. رائد مختلف ..

فزيت لمن وصلت للبيت.. ماادري ليش مالي واهس هلمرة بالجية هنا..گلبي عاصرني على مااعرف شنو.. بس غلست من شفت بنات خالتي..سلمت عليهم وكعدنا.. هن اكبر مني .. حلا ودنيا بالكلية مرحلة ثانية وتارة مرحلة اولى.. بس تفكيرنا متشابه .. هواي اجيهم بس جياتهم علينا قليلة..بس لمن ابوي يكون موجود تجي..

بالليل سوينا تعليلة وشغلنا التلفزيون على فلم.. جان تجي خالتي..ابتسمت وباستني ..
خالتي : تونسي خالة..شو بس كرب هناك سودة علي..
دنوة : اي كلش تعبت..بس تعودت ..هسه يجي الدوام والتهي شوية..فديتج خالة شكد احبج ..
گرصت خدي وكامت : انه اروح انام..قفلت البيبان مو تسمعن صوت وتطلعن بره..الوضع يرثى له..زين ماماتي..
تارة : حاضر ماما..روحي ارتاحي..
مست علينا وراحت.. اندمجنا ودخلنا بجو الفلم.. لهناك جان يصير رمي قوي وصوت صياح بالشارع.. اختلست والدم جمد بشراييني..گمنا وحدة تعاين للخ وخايفات..

صعدنا فوك لغرفة خالة..جانت كاعدة ودتفرج من الشباچ.. وگفنا وراهه نتانيهه تندار وتحجي..اخر شي دنيا حجت بخوف..
دنيا : يمة شبيج ماتحجين..شكو..حنموت اجونا مو..
خالتي : طاح حظج هو هذا حچي..هذوله بيت ابو فرقد كتلوا ابنهم..فايتع دبابة مال امريكان راشته.. عبالهم جاسوس لو شوف شي..
دنيا : اووف خطية..بعده شاب..الله يرحمه..شلون عرفتي..
خالتي : چا مو دااشوف..شنو شمدريني ..

عفتهم يحجون..خطية شلون مصاب بلوة هذا.. بقيت بالغرفة خفت انزل..البنات همات نزلن طفن الاضوية وصعدن نمنا يم خالتي..

وره يومين حضرت روحي وكعدت اتاني ابوي يجي.. العصر اجه مر علي اخذني..صعدت يمه ومشى بالسيارة سريع..
بلا مقدمات حچه : ترجعين تكويلي هدومي بالعجل.. عندي شغلة مهمة اسويهه..كبل لا تطفى الكهرباء..
دنوة : حاضر..
بين ما وصلنا للبيت شفت سيارة رائد بالگراج.. يعني يمنا .. ابوي اندارلي وخزرني هو وصاك على اسنانه : مثل ما گتلج.. تره يصير غير حساب..
دنوة : بابا والله انه....
محيي : والله ما والله..نبهتج واخذي الحيطة..يله نزلي هسه اجي..

انهضمت من كلامه..عفته ونزلت..سديت الباب بقوة بس لا اراديا هيج راحت ايدي..
نزل الجامة صاح بيه : انعل ابوج لابو الخلفج..
تركته ماجاوبت..شكد قاسي..أذاني..طبيت للبيت دمعتي بعيني..والكل يعرف من ابجي فبسبب أبوي.. تلگتني خالة ابتسام..باستني وحاوطت چتفي..طبينا جوة كعدت بالمطبخ يمهه محد اكو..
ابتسام : شلونج ودية..شو تبجين شبيج..
دنوة : ماكو شي خالة..انتي شلونج..
ابتسام : محيي مو..
بلا ما ادري دموعي نزلت وبحرگة..ضميت راسي بحضنهه وشابگتهه قوي..

دنوة : خالة ليش بس انه..مو عمو قاسم حباب وي سرور ونوارة.. انه شمسوية اووف احجيلي بس فهميني..
ماجاوبتني..كامت تمسح على راسي وتبوسني.. عادي مثل مرة.. حسيت روحي ارتاحيت وكمت ..

مشى اليوم عادي واليوم الوراه..ماكو شي.. رائد ماشفته بعد.. وابوي فوك راسي اخاف اتحرك أي حركة.. حتلو ماقاصدتهه بس هو يحسب غير حساب..يگلي ولج انتي شيطانة مو انسانة.. طلعيلي وجهج الحقيقي لاتلعبين علي انه رجال شكبرني شگدني امشي بهلوجه..جنت ماافتهمه بعدين عرفته يقصد انه شلولو ووكحة بس دااصير مؤدبة جدامه.. على شنو مااعرف.. مايصدكني ولو بكد الشعراية ..تعبت منه ومن ضربه وعصبيته وقسوته..

وره هلايام جنت كاعدة بالحديقة الورانية انه وسرور بس.. اجه سالم يفتر ويلبس ساعته..
سالم : سرور..الحذاء..وينه بالعجل وينه..
سرور : هسه اشوفلكيا..ياهو تريد..
اخذهه وراح..ضليت كاعدك انتظرهه.. كمت اشلع بالثيل الگصير كلش بتململ.. حسيت على شخص اجه.. كلت سرور هاي..
دنوة : سرور جيبي مي وياج عطشانتلي..
ماجاوبتني.. انداريت شفته رائد..جفلت وكمت من مكاني.. كمت اتلفت هنا وهنا..
دنوة : عفية شجابك شنو هاي..شمدريك انه هنا..

رائد : داانتظر سالم مو يمج ابوية..

عفته وتمشيت جوه..وكفت وره الباب اشوفه.. كعد ع المرجوحة ودنج يمسح حذاءه..اسود بغزارة..لابس تشيرت وبنطرون .. شكد طويل بحيث حتى وهو كاعد بارز طوله.. ابتسمت ورحت يم البنات..

بالليل كاعدة بالمطبخ اگلي كبة جعت.. حسيت على خطوات صوتهه هلكد ما قوي عبالك يضرب بالگع.. انداريت لكيته ابوي.. رأسا طفيت النار ..
كتله بخوف وتوتر : ه..ها بابا شبيك..
محيي : انعل شرفه البابا..تردين تجيبيلي رس امج الگح... اليوم انهيج بت الگوااااا...
سوى المسافة البيناتنا خطوتين..كمشني من شعري سحلني .. كمشت ايده اريد اعرف شكو : شكو فهمني شصاير..
محيي : شصاير..شصاااااير..صاير لعب بالذيال..
شمرني بغرفتي وسد الباب وراه.. نزع حزامه طبگه ثنين .. تشاهدت على روحي بداخلي..خليت ايدي على وجهي بخوف : والله مامسوية شي والله..وداعتك يابة مامسوية.. شفته بالصدفة انه مااقصد وروح امي مااقصد..

انه واحجي اجتني ضربة على حلگي.. حسيت شفايفي خدرت صارت حارة جمر..كام يضرب بيه بالحزام ويلهث ويرجع ولا كإنه.. جدي وعمامي يصيحون علي يردوه يفتح الباب هو ماكو مايسمع.. كمت ابجي واصيح ..جسمي وجعني كام يون.. اخر شي ديضربني وفلت الحزام منه اجت الحديدة على خشمي.. كمت بالعجل اريد اطلع حيخلي طلقة براسي ويرتاح.. كمش ايدي هجستهه انفصخت..
دنوة : ابوس ايدك..والله مااقصد والله بالصدفة ماادري سامحني اسفة حضل بالغرفة بعد مااطلع..
فريت ايدي وركضت ع الباب چني مخبلة وابجي.. فتحت القفل وايدي ترجف اريد اركز..فتحتهه شلون ماجان وطلعت..

صار جدي بوجهي..شمرت روحي بحضنه واعصر دشداشته : فدوة خليني يمك جدو حيموتني ابوي..
حاوطني بإيد وايده اللخ على شعري ..
لواء : يمعود ماتت البنية حرام هيج حرام..مايصير شنو ماكو احساس..انت اب تعرف شنو يعني.. مايقسي هيج..
محيي : لاتدخل انت..ولحد يدخل..بت القنادر انه الج..

هو يحجي بصياح وعصبية وانه وي كل كلمة يگولهه اتمنى افوت بضلوع جدي خاطر مايسويلي شي..

ضلوا يحاچوه وهو قافل بس يغلط علي ويفشر.. اخر شي سمعت صوت الولد اجوي..وصوت رائد وياهم..
رائد : الله بالخير..شبيكم..
شامخ : هيج لغوة وليدي.. اخذ راحتك..

رفعت راسي على كيف شفته واكف وعيونه إدور على شي ضايع..من شافني عگد حواجبه..طلعو كلهم حتى ابوي..فتت للغرفة تمددت حتى ماحسيت بالحر من الوجع.. ضليت اتگلب بالفراش جسمي كله يون..سمعت صوت طكطكة قوي بالمطبخ.. كمت على كيفي اشوف شكو.. سمعت صوت ابوي ورائد..
محيي : لك اذا شفتك معترض لبنتي اخلي طلقة براسك وراسهه..مخبل انه تره واسويهه مو بس حچي..
رائد : ليش انه ادري شكو..شبيك انت..
محيي : احجي عدل ولاتنتر..
رائد : على عيني وراسي..بس شصاير ..
محيي : كتلك لاتعترض لبنتي ولاتخليهه تشوفك.. مااريد رس حامد المخبل يوصلني..وتعرف كلش زين شسوالنا..

رائد : انت شگد گبحي وماعندك اسلوب..انه ابنه وتحاجيني هيج.. بنتك الله شاهد كل الصار بالصدفة..ولو اريد شي چا خطبتهه وانعل ابو اليلعب بالذيال..
محيي : حتلو خطبتهه ماانطيهه..
خله إدي بجيوبه ورفع راسه بنظرة تحدي : نشوف.. لاتأذيهه بعد زحمة جدام ولد عمهه..خلي خصوصية..هلمرة انضربت جدامي..مرة اللخ ....
محيي : اي شيصير بله..
رائد : يصير غير حچي..كلشي ولا بنية تنضرب..ادور جدامي.. الله يهديك عمي ..

ابوي راد يحجي وعافه..ركضت للغرفة قفلت الباب وكعدت وراه.. بطني توجعني ..ماماكلة..ادور كلام رائد خوفني اكثر.. شمعرفه بيه ويكول هيج..اكيد انقهر علي ماكو غيرهه.. الا هو ماشايفني شوكت دافع علي..ليش كل ما اشوفه يعگد حواجبه واحسه يريد يكول شي بس يسكت.. دنجت راسي بين رجليه احسه حينفجر..معدتي تقرقر اريد اكل شي..

ضليت على وضعيتي لحدما غفيت وحدي.. فزيت ع الباب تندك.. كمزت من مكاني خفت اجاوب..خاف ابوي ادور عباله دااسوي شي بدون علمه مانايمة..
- : دنو فتحي الباب انه سرور..
تمشيت بأريحية فتحتهه ورجعت كعدت ع الچرباية اشيل شعري.. اختنكت من الحر..حطت صينية جدامي..
سرور : تعاي اكلي..
دنوة : شمدريج بيه جوعانة..
سرور : رائد شايف الاكل مامستوي ع النار..كال سويلهه واخذيلهيا..
: اممم..يله همزين جنت جوعانة فدور..

كعدت بالكع اكل وجسمي كله يون..تعبت من الكتل.. سرور ونوارة وحتى ورود ولا مرة عمامي كتلوهن..بس حظي مصخم.. اوف شنو ذنبي انه شعلي..

مشت ايام بس كاعدة بالغرفة..اطلع اسوي غدة لابوي وحد مايقبل ياكل مثلنا..ويتأمر علي.. حتى خلاني انام بغرفته چي بالأخير صايرة..يكلي غرفتج ع الحلال والشبابيچ مفلگحة.. بلعتهه وسكتت..رائد كمت مااشوفه وامنع روحي حتى من سماع صوته..جنت أوهم روحي ان اكو مشاعر بداخلي اله.. بعدين نفضتهن كلهن..لاكثر من سبب..

مااعرفه شديفكر وشنو نمط حياته..وابوي رافضه كل الرفض ولا مفكر بي اصلا..ويمكن يطلع عنده علاقة وانه اجي أدمرهه.. خلال تفكيري اكول چا ليش دز اكل بيد سرور.. وكال لأبوي لاتضربهه جدامي..مااعرف المن احجي..كلهن نفس الگصة فاكيد تفكيرنا متشابه..اخر شي تركت الموضوع وبطلت اسوي شي..خلالتهي بالدراسة وبعد مااعرف..اكيد حيطلع من بالي..

وراهه صادف بعد اسبوع ع الدوام..وابوي بالبيت.. كلت احاچي ينطيني فلوس اشتري.. العصر سويتله چاي واخذتلهيا لغرفته..
رفع حاجبه وحچه بنتر : ليش مسوية چاي..
دنوة : ها..هيج اشتهيتلكيا..
محيي : اخذي مااريده..
شلته بدون مااحجي..خفت يرزلني فطلعت..
بالباب صاحني : تعاي شتردين تحجين..
دنوة : ردت هدوم للمدرسة وقرطاسية..
محيي : ميخالف..باجر عود..
دنوة : شكرا بابا..
: العفو..

عفته وطلعت..ثاني يوم انطاني فلوس ورحنا انه وخالة ابتسام اشترتلي..سرور ونوارة مو هلكد بالدراسة فبس تخرجوا من السادس بطلو وحدهم..وانه جايني الدور..ادري حيبطلني بس ع الاقل تصير شهادة السادس بيدي..

ولدنا كلهم متخرجين ماكو أحد ديدرس بس انه وورود .. فراحت هي وامهه لبيت اختهه ببغداد علمود مدرستهه وترجع خميس وجمعة.. لحد نص السنة وتسوي نقل..ماادري شهلفرة ..

وره هلأيام رجعت انام وحدي بالغرفة..البنات ينامن فوك.. سديت الباب وفتحت الشباچ شوي بعده الجو بي حرارة ولو دخلنا العاشر..حاولت اغفى ماكدرت..فزيت على دگة خفيفة ع الجامة مالت الشباچ..گرفصت روحي خفت.. اهو هسه غير ابطل افتح الشباچ..
رجعت اندگت مرة اللخ بس وياهه صوته..هو اي..عززه بعيني شجابه هذا حيموتني..كمت وكفت وره البردة حاچيته بهمس : خير خوية شرايد فدوة اخاف من ابوي روح..
رائد : ابوية ردت اشوفج شلونج..
دنوة : زينة شكرا ..
رائد : خوش..يله سدي الشباچ لايضل مفلگح..الولد هنا..
دنوة : ماشي..

كالعادة مثل الثولة سويت حركة مااقصدهه ورفعت البردة.. صار جدامي مدنج راسه ع الجداحة يورث الجگارة ومضيق عيونه.. الجگارة صار بيهه جمرة ورفع راسه زفر الدخان وعاينلي بإبتسامة..شكد حبيت منظره هيج وبهلوضعية.. رأسا سديت الشباچ وخليت البردة علي..جريت نفس وزفرته براحة.. رحت تمددت ونمت..

يومين وبلش الدوام..كعدت الصبح غسلت واجيت ابدل.. لبست قميص ابيض وصدرية سودة بيهه چاكة صغيرة من وره.. سادة مابيهه شي بس خطين من يم الصدر.. لفيت الشال وطلعت.. لكيت سالم گاعد هو ورائد وعصام وقصي ديتريگون بالمطبخ..كلهم كاعدين ومندمجين بالحچي بس رائد كاعد على صفحة يدخن.. كاعد بوضعية مخلي رجله قريب بطنه وايده فوگاهه محطوطة بيهه الجگارة.. رفع راسه صارت عيوني بعيونه..
سويت روحي ماشفته .. حجيت وي سالم..شوكت ياخذني..
سالم : يله عيوني كملت..انتظريني بره..
عفتهم وطلعت انتظرته.. شواي واجه يضحك ..وجهه شكد بشوش..اخذني ورحنا.. وصلت يم باب المدرسة وانداريتله..
طلع فلوس من جيبه : كمشي..
دنوة : شسوي بيهن..
سالم : اخذيهن مني.. اكلي شي بيهن مااكلتي..
ابتسمت : شكرا اخوية حبيبي..
ابتسملي وراح.. طبيت للمدرسة وبلش الروتين العادي.. بس متطمنة محشتغل هواي بالبيت بعد .. اول يوم هوسة وماكو دراسة فگضيناهه سوالف لحدما خلصنا وطلعنا.. لاگاني سالم ورجعني للبيت..

طبيت للبيت لكيت صابين الغده..بس غسلت وكعدت اتغده وياهم بالمطبخ..الولد كاعدين وحد بالديوانية..جايين ولد عم جدي ماادري شعدهم.. انه بس تغديت رحت نمت نعسانة وهلكانة چي اول يوم..كعدت العصر ومشى اليوم عادي.. ضليت بالمطبخ لازگة بخالة ابتسام خاطر مااشوف رائد ولا يشوفني..

لحدما بالليل فتت انام وكعدت مرعوبة على صوت الباب تندك قوي واكثر من صوت بس مااعرف شديحجون..خليت الشال على راسي وطلعت لكيتهم كلهم واكفين بالفرة مالت البيت .. وجنود امريكان واكفين..كلش ضخام وطوال .. رائد واكف يمهم لابس فانيلة بيضة وبنطرون.. عبالك واحد منهم على ضخامته وطوله..بس كملامح لا مبين بصراوي معرب الجدين..
انه واكفة بعيد كلش واشوفه شلون يحاچيهم .. لهناك جان يضحك والجنود هم ضحكوا وياه..بعدين انطيناهم من الاكل المسوي اليوم وطلعوا.. خليت ايدي على گلبي براحة .. وجودهم مرعب يسوي مغصة بالمعدة..
بس طلعوا حچه جدي : شرادو هذول..
رائد : تفتيش..يابة شهمج..فوتوا نامو ماكو شي..

طشو بالغرفة بالعجل بحيث فرغ البيت..ضليت واكفة بمكاني واشوفه.. ليش كل ما اشوفه احس انجذبله اكثر.. بكل مرة يعجبني شكله اكثر..شفته كعد ع الدرج ويورث جگارة.. شغلهه اكثر من مرة مابيهه نار..
حچه بعصبية گوة كاتمهه ويمكن هاي المرة الاولى الأشوفه متعصب على شي : وكتج هسه بت الكلب..
خليت ايدي على حلگي وابتسمت.. دنجت ومشيت للغرفة.. مااحس غير صار جدامي.. رأسا شهگت حسيت زردومي شحط.. كمت اگح..
هو يعاينلي بخوف : الله الله..اجيبلج مي..
جاوبته بصعوبة : لا شكرا..شجابك هنا عفية وهاي شنو هدومك هيج استغفرالله عيب حرام..

ضحك هو ويتأتئ : تعذريني..بس ردت اعرف ليش التبسم ..
عفته وطبيت للغرفة..شافني من ابتسمت.. استغفرالله.. ثولة ادري بروحي.. غسلت وجهي من الفشلة وتمددت.. مااعرف شصارلي من تذكرت منظر صدره..هو صح لابس فانيلة بس چتافه مبينة .. شنو هلحچي هذا ..همزين ابوي مو بالبيت.. جان موتني هسه..ضليت افكر لحدما دخت ونمت..

ثاني يوم هم نفس الشي اروح وارجع وي سالم.. رائد كمت اشوفه كل يومية..يا بالبيت يا بالحلال..مااعرف شفسر مشاعري.. شنو الديصير ..هو ليش هيج يتصرف.. اكو شي مااعرفه اكيد..

بيوم بالمدرسة جان عدنا شاغر فاجت المرشدة تحجي ويانا.. جابت موضوع المراهقة وتفكيرهه..
- بناتي..تعرفون انتو بمرحلة انتقالية..يعني مو اطفال ولا شباب.. مرحلة صعبة..للبنت وللولد وبما ان انتو بنات فنتكلم من ناحيتكم ..البنت بهلمرحلة تحتاج رعاية كاملة من الاهل.. رعاية تحسسهه هي مو بحاجة شخص من الجنس الثاني.. مع ذلك نشوف اغلب الأهالي ميهتمون لمشاعر ابنائهم بهلعمر.. يحسبون كلامهم ومشاعرهم شي عابر .. عابر صحيح ويتغير بمرور الوقت..لكن يجب مراعاته والأخذ به حتى نعرف ننصحهم او نشجعهم اذا كان صحيح او خطأ.. لهلسبب نشوف هواي من البنات تنحرف لشخص توهم ذاتهه ان هذا الشخص حيحويهه ويفهمهه اكثر من أهلهه.. ويكون قادر على إحتوائهه..بناتي انه مثل امكم..فاريدلكم الزين.. مشاعركم حاليا زائلة وتتغير مستقبلا..لتحاولون تنجرفون ..

انه اسمع كلامهه وگلبي يريد يبجي..بس انه ارتاح من اشوفه.. واحس بشعور حلو..حتى گلبي يدك سريع.. يعني هذا جذب كله.. مااعرف شلون خلص الدوام ورجعت للبيت.. كمت اتجنبه وكل ما يصادفني يبتسملي وماابادله بشي.. اي اكيد حنساه لأن هو شي عابر مثل ما كالت المدرسة..

ورة فترة بلش الجو يبرد حيل..كعدت الصبح اطكطگ.. لبست الصدرية وستريج بس رفعته شوي مااحب يلطش وي الجواريب.. لبست القميص والصدرية وفوكاهه سترة فرو سودة.. اخذت الجنطة وطلعت بالطرمة انتظر سالم.. كمت ارجف من البرد فطبيت للبيت احجي وعصبية : سااالم.. هاي وينك متت من البرد..
مااحس غير انلطمت بشخص.. دفعته بالعجل ووجهي احسه حينفجر من الحرارة..
دنوة : انه..اا..انه اسفة ماانتبهت..
رائد : ماصار شي..امشي اوصلج..
بحركة لا ارادية حجيت : لااا..ابوي مايقبل..
رائد : ابوج مسافر والولد طالعين لشغلهم..امشي ابوية شريد اسويلج اكلج مثلا..

دنوة : ها..لا انه اروح وحدي..
انه احاجي ومدنجة راسي وعيوني بكل مكان بس علي لا.. رفعت راسي لكيته ماد ايده بجيبه الوراني والقمصلة صاعدة شوي چي رافع ايده..شفت سلاح بخاصرته..
شهگت : هاي شنوووو..
رائد : هسسس فضحتينا شبيج تصيحين من الصبح..
دنوة : ليش عندك سلاح..
رائد : غير شغلي..

سكتت واراقب حركاته وهدومه..حذاءه يلمع لمع وقمصلته الجلد كاعدة تفصال علي..طلع جگارة ورثهه وزفر الدخان .. هو ويدخل الجداحة بجيبه أشرلي براسه ع الباب : امشي عندي شغل..
: ها..
رائد : هههههه..هواي تصفنين..يله باباتي..
عاينت علي وخزرته بعدين مشيت..وصلني للمدرسة وراح.. جانن صديقاتي هاجر واسراء واكفات بالباب بحيث شافوه من وصلني.. خجلت منهن فطبيت رأسا للصف..ذبيت الجنطة وكعدت انتظر الدرس يبدي..اجن البنات يحاچني..

هاجر بضحكة : هذا منو الحلو ابن الحلو..
دنوة : ماادري..
هاجر : چا ابوي يدري..
دنوة : ابن عمي..
اسراء : هم هواي والله..ياهو منهم..
دنوة : هيج واحد ماتعرفنه..
هاجر : خليجيبج دائما..شكله يفتح النفس ع الدراسة والأكل وكلشي بالدنيا..
دنوة : هههه..وجع انجبي عيب..

بدا الدوام وخلص وهذني كلساع يذبلي حچاية.. اوف شكد فشلة.. هسه انه شبيه كلما اتذكره گلبي يدك سريع .. استغفرالله.. طلعت من المدرسة وكفت بالباب انتظر سالم .. سالم بحساب اخوي الچبير..ويحبني مثل سرور ونوارة.. مابيناتنا شي..وابوي يرتاحله فهو ياخذني ويجيبني.. المدرسة صايرة بنص البساتين..فماارجع وحدي..انه اخاف وابوي همات يكلي ثولة هسه تضيعين..

انه وصافنة بملل والبنات كلهن راحن..بقن هيج چم وحدة ينعدن ع الاصبع.. سمعت صوت ضحكة وواحد يخابر.. اقترب اكثر..
- : اي يول هياتني يمهه..تدلل صدك چذب..
صار جدامي..گلبي كمت ادور نبضاته وين..لأن بكل مكان احسه يدك..هذا رائد..
عاينلي براحة ونزع المناظر خلاهن بجيب القمصلة : يله..
دنوة : ها..وين ..
رائد : للبيت غير..تره عفت الشغل واجيتج..كلت خطية سالم ماموجود اليوم فاجيت ارجعج..وهو همات خابرني يتأكد..
عاينت علي وابتسمت : شكرا..
رائد : تأمرين ابوية..

مشيت جدامه ورجعني للبيت.. بس طبيت الباب ركب السيارة وراح.. سديت الباب فرحانة ..ولك سالم بعد لاتوصلني خلي رائد بمكانك.. ابتسمت وفتت جوة..

لكيت البيت مگلوب گلاب..رحت على خالة ابتسام..
دنوة : شكو شصاير..
ابتسام : اكو غير الطلايب..ثنين ولد متعاركين على مصلحة شغل مفتحي ومامتفقين.. فديتعاركون شون يقاسمون الحصة وكلمن يروح بدربه..واحد طايش ضارب اللاخ سچينة وجايب ولد عمه كاتلين الولد ومكسرين غراض المحل.. هسه رجعوا على اصلهم يعني على جدج..بعد مااعرف شحيسوي..
دنوة : اهل الولد المضروب سچينة اجونا غير..
ابتسام : اي خالة..روحي صيحيلي البنات .. هسه تجي مرة عمج فيصل وبناتهه..مااكدر وحدي..انتي ارتاحي تعبانة..
دنوة : لا عادي خالة ماعندي شي..

رحت صحتهن وبدلت بعدين اجيت اساعدهم بالاكل.. انخبصنا مااذكر فديوم كعدنا بدون مشكلة..اوف شكد صعبة العيشة هنا.. ضلينا يومين تلاثة نهورف والناس طابة طالعة على جدي واهل الولد الغلطان من عرفوا السالفة وصلت شيوخ اجوي يتوسلون.. اخر شي انفضت بفصل بمبلغ مالي والحصة الاكبر من المحل صارت للولد المتضرر.. بس فضت طلابتهم ارتاحينا شوي..
وراهه بيوم صادف خميس..طبيت سبحت وركضت للغرفة خاف استبرد.. رحت ع الميزتواليت انشف واسمع صوت رائد لزك يم الجامة..مبين ديخابر بس ماادري ويامن..

رائد : انه همات مشتاگلج..زين لايضل بالج.. والله هلكان ومتضايق هنا مااعرف اطول هلكثر واخاف وجودي يسويلهه مشاكل..بلاهه هلبلوة.. اي شفتهه ..ماعرفتهه بالبداية شكد متغيرة وكبرانة..اي صحيح .. يله ارتاحي ونامي اروح انه وباجر أمرلكم.. الله وياج ..

نبضات گلبي صارت هي والماكو سوه.. اي يمكن مرته هاي.. لا حبيبته..يمكن خطيبته..ماادري.. گلبي عصرني.. شكد انقهرت.. صار شهور اشوفه واكول روحي مشاعري حقيقية تجاهه بعدين يطلع عنده علاقة.. عاينت لروحي بالمراية .. انجبي وسكتي.. نشفت شلون مجان ورحت نمت..

ثاني يوم ماشفته بالبيت..ولا سألت ..اكيد راحلهه.. وانه شكو.. حتى ماشافني الا ذاك اليوم..ادور البيت كله يحجي بي.. شكد قهر.. ماادري منين يطلعون السوالف ..مجبورة اسمعهم خاطر مايشكون اكو شي..وره يومين كعدت الصبح اروح للمدرسة.. جان عندي امتحان..بدلت بالعجل ورحت للمطبخ على ريحة الچاي..صبتلي خالة وكعدت اكل.. عمامي كاعدين وجديتي..
عمي قاسم : حبيبتي دنو انه اخذج للمدرسة..
دنوة : ماشي عمو..چا سالم وين..
قاسم : مريض اليوم حتى ماطلع للشغل..
دنوة : يااا..اسم الله سلامات اكيد مستبرد ..
قاسم : اي خطية..يله عمو امشي..
عمي لواء : بله هذا محيي شكال لروحه يعوفهه هيج..
قاسم : دعوفه محد يعرف البراسه شني..

عفتهم يحجون بأبوي ورحت كعدت بالسيارة..مدنجة راسي بالكتاب اراجع وسمعت صوت سيارة شخطت جدامي.. رفعت راسي مستغربة ..شفت رائد نزل من السيارة ودخل للبيت ع السريع.. هذا شبي ..بقيت كاعدة مانزلت.. خاف ابوي يشوفني يمه ادور اتعزه واتصخم من الصبح.. ربع ساعة بهلحدود واجه عمي على اعصابه..ماسألته شفته عصبي ويخابر بالتلفون ماادري شكو..
فزيت ع البريك مالت السيارة : نزلي عمو..سالم اذا صار زين يجيج واذا مو هو فرائد..زين..
دنوة : مو عمو..بابا مايقبل اشوفه..
قاسم : انه حاچيته معليج..شون يعني تضلين معلگة.. لايرحم ولا يخلي رحمة الله تنزل..روحي حبيبتي الله يوفقج..

عفته ونزلت.. ضليت الدروس كلهه اتصفن افكر برائد.. ليش هيج نزل بالعجل من سيارته وعمي اجه عصبي.. اووف شوكت تخلص هلسنة كلش تعبتنا وره السقوط..تعب نفسي.. فزيت بالفرصة على هاجر واسراء..
هاجر : ها عيني اشو صافنة شبيج..
دنوة : مابيه شي..ضايجة شوي..
هاجر : شكو سولفيلي..
حجيتلهه على رائد وشلون سمعته يحجي وي وحدة.. : شتكولن ويامن ديحجي..وي مرته مو..
اسراء : والله مبين مرته..بس لاتحكمين علي..خاف امه اخته.. لو مرته جان عرفتوا بعد ابن عمج شلون ماتعرفي تزوج لا..
دنوة : ها..يمكن .. مااعرف بعد..
هاجر : انتي شنو مشاعرج دنوة..

عاينت عليهه واكو كومة كلام على لساني..ردت احجي وسكتت.. تنهدت ودرت وجهي .. : انه من الشهر الواحد اشوفه.. وگبلهه ب٢٠٠٢ شفته بالشهر ال١٢.. مرة يمكن.. ماجنت محسبتله حساب يعني نظراتي عادية..بس مااعرف شنو التغير..
هاجر : اي گمتي تحبينه..
دنوة : لا انجبي..
هاجر : يله على راحتج..هسه فديوم تكليلي كلامج صح.. كومي خلنتمشى بالساحة لاتسوديهه..
دنوة : يله..

خلص الدوام وطلعت بره انتظر منو يجي ياخذني.. شواي ولمحته اجه..مشيت وياه طبيعي..
تذكرت موقف الصبح : اا..رائد ..
رائد : عيني..
دنوة : شصار الصبح..اقصد ليش هيج اجيب مستعجل..
رائد : صارت مشكلة بالدوام وانه بالسيطرة وتعاركوا ثنين امريكان وواحد عراقي..صارت هوسة ودخلوني بالنص عساس ترجمتلهم كلامه غلط وراد يدخل مركز..بس فضيتهه وبطلت منهم..چم يوم واشوف غيرهم..
: اامممم..

جنت امشي جدامه بمسافة قريبة..مااحسه غير اقترب اكثر مابيناتنا غير شبر أو اقل..اختنكت من الموقف مااعرف شصار بيه..
همس : امشي بالعجل لاتتمخطرين..
مشيت مثل ما گال بس مامفتهمة شصاير..كل ظني هذول الجماعة اليشتغل وياهم اجوي علي..وصلنا للبيت اول ما طبيت وكف جدامي وخزرني..
رائد : شنو هلچاكة الفضيحة..خيطيهه بدليهه..رجليج كلهه طالعة واكو زلم جانت تمشي ورانا..
دنوة : شنو ليش..لا مو حيل چبيرة..
رفعلي حاجبه هو ويورث جگارة..زفر الدخان وكال : دنجي شوفيهه ..
درت وجهي وسحبتهه علي..شهگت ووجهي صار احمر احسه حيطك من الحرارة..

مفتوحة اكثر صايرة لركباتي ومن امشي اكيد تصعد اكثر.. رفعت راسي عاينتله وخايفة : انه مااقصد والله مااعرف ..
ابتسم بطرف شفافه : يله فوتي ماصار شي..
دار وجهه ومشيت لباب المطبخ سريع..اوف الحمدلله .. رحت للغرفة ركض ..ذبيت الجنطة وطلعت ابرة وخيط سويتهه مثل ما جانت گبل..هبطت من كلامه عبالك تهديد لو شوف شي.. كمت تغديت وغسلت مواعين بعدين نمت..

بمرور اسبوع تقريبا رجع سالم ياخذني ويجيبني..رائد ماشفته بعد على الزغم بهلاسبوع هو بالبيت ماطلع.. واسمع خالة ابتسام تخابر امه تحاجيهه علي..بس هو مطول ..
بيوم كعدت الصبح مابيه حيل اروح وماجان عندي شي فگلت اغيب..بقيت نايمة لحدما فزيت على صوت عيطة قوي....

يتبــــــــــــــــــــــــــع....................