رواية اسألي عني الليالي الفصل الثاني عشر 12 - بقلم رقية جاسم

قناة التليگرام

حساب الانستگرام

الـبـارت الـحـادي عـشـر...............

بمرور اسبوع تقريبا رجع سالم ياخذني ويجيبني..رائد ماشفته بعد على الرغم بهلاسبوع هو بالبيت ماطلع.. واسمع خالة ابتسام تخابر امه تحاجيهه علي..بس هو مطول ..
بيوم كعدت الصبح مابيه حيل اروح وماجان عندي شي فگلت اغيب..بقيت نايمة لحدما فزيت على صوت عيطة قوي..

خليت شال وطلعت ..صارت سرور بوجهي هي ونوارة..
همست : شكو شصاير..
سرور : يونس ابن عمي فيصل طالع وماراجع من البارحة بالليل..
دنوة : عزززه صخام..وينه هسه.. وشنو هلصياح..
سرور : هاي امه هنا خطية دتبجي وخايفة..عمي ببغداد مو هنا.. هسه حيرجعون هو وابوج ..
دنوة : اووف خطية..خاف جان طالع بشغلة بمكان بعيد..
سرور : لا هو طالب جامعي خطية.. يمكن طالع من الكلية وخاطفي.. هسه حيجون ونفتهم..

عفتهه وطلعت اغسل وجهي..البيت كله مشحون ويخابرون على گرايبنا وصحبانه.. ادور گرايبنا كلهه اجت ..فوك التوتر والخوف.. الاكل صبيناه ونفسه شلناه ..محد اله نفس ياكل.. لحد العصر جنت بالاستقبال جانو الخطار توهم طالعين فداانظف.. سمعت صوت رائد فات ..وكفت بالباب اشوفه.. باب الاستقبال يطل ع الصالة الجبيرة للگعدة.. فكلهم جانو كاعدين هنا عمامي بس فيصل وابوي طالعين..

كام يحجي بعصبية : غير تنطوني خبر..الوضع فالت للأخير مو وكت كليات ابد..خابرتو صحبانه..
لواء : ماخلينا احد ماخابرناه..بس اكو ثنين هم قريبين علي مايجاوبون..
رائد : ردلي ارقامهم..ووين يشتغلون هذول..
قاسم : ماندري..بس واحد منهم بالجنسية يشتغل..
ردلياهن ..خابرهم اكثر من مرة يله جاوبو..
رائد : شلونك حبيبي.. اي خالي ..سمعت تشتغل بالجنسية واريد اسوي وحدة لخ..اي تعرف الوضع شلونه واخاف حگي فاريد تسهلياهه وفلوسك يمي مانختلف عليهه..وين اكدر اشوفك..انه جنت بالدائرة وشفت السرة طويل..فواحد رجال خيّر كال ابو سيف يكدر يحلهه الك وهاي جيتي الك.. حبيبي ماتقصر.. يله ساعة والاگيك هناك ..

دنوة : هذا شبالعجل فكرله بهيج سالفة.. يمة شكد لوتي..
قاسم : رائد وين اتفقت وياه انت..بمكان ما يروح واحد ادور ترحون ثنينكم..
رائد : لا شسالفة قابل غشيم..صاحبي ضابط بالداخلية .. انه اتفق وياه اذا شفته لگف انطي خبر يجي يشيله ونعرف منه.. هسه صاحبك اللح لاتأمن بي..ادور الغريب.. اذا دخلته توقيف حيجرون لسانه..
لواء : لاتروح وحدك..انه اجي وياك وقاسم..
رائد : ماكو مشكلة..ساعة وأمرلكم..انطي خبر لعمي فيصل يرجع..انه بس اوصل لشي يخصه اكدر اطلعه..
قاسم : يله هسه اخابره..

ترخص منهم وطلع هو ويرجع شعره ليوره.. هو دائما يركضلنا بأي مشكلة تصير..دورات تصير مشكلة شبابية بالشارع لواحد من گرايبنا هو يجي يفكهه..مايخلوهه توصل لجدي وتصير عشاير لو قانون..فعمامي يحترمونه حيل..لهيج خابروه هسه.. ضلينا ننتظر ساعة ..محد خابر علينا.. جان التلفون الارضي بعده واكو خطوط عادي..لحد وره ساعة رجع عمي وابوي واجه رائد اخذ عمي قاسم ولواء وطلع.. طبيت للمطبخ اسوي چاي طلبو مني..اجه ابوي شمر السويچ ع الميز..
محيي : شون شغلة تعبانة هاي..سويلي اكل ميت جوع..
دنوة : شتحب اسويلك بابا..
محيي : بكيفج..سويلي حو..أي شي ..
دنوة : هسه..
هدرت الچاي وسويتله مقالي وزلاطة..خليتهن جدامه ووديت الچاي للصالة..

هستوني كعدت جان يصيح : ويييينج بت الكلب..
فشلت من عمامي..گمتله بالعجل ..
محيي : شني هاي..
دنوة : شنو شبي..
محيي : مامستوي..سويلي غيره..
دنوة : بس سويته زين ..
عاط بيه : سويلي غيره ولاتلعبين روحي..تره ارگعه بوجهج..
دنجت وبعيوني نظرة كره..تعبني خلاني اكره روحي.. هو مايدخن ابد بس لمن مديت ايدي لكيت گطوف.. وهو بيده جگارة ديدخنهه..شافني صفنت ع الماعون طفى الجگارة بإيدي.. كمزت من مكاني وتكسرت المواعين كلهه..
محيي : وجع..خبال ماتشوفين عمييية..
عاينتله بقهر وابجي : ليش تچويني شمسويتلك..

بلحظة او اقل احس صارت وشة بإذاني وخدي حار ..
محيي : اذا تحاجيني هيج اكسر راسج..يله ولي من خلقتي ..
على صوت صياحه اجن نسوان عمامي وجدي..
ابتسام : اسم الله..ابو دنوة ليش هشكل..
محيي : ام سالم لاتدخلين الله يرضا عليج..المامترباي اربي.. وهاي بتي اعرف شسويلهه..
شامخ : انت ولا تجوز منهه..ماتروح تزوج وتخلصنا.. تتأمر ع البت شمالك مسويهه خدامة..كومي جدو تعاي هنا..
كمت رحت وكفت يمه ومدنجة راسي ابجي..كمش ايدي شاف الجلد مشلوع على گد دائرة صغيرة..
شامخ : الله لايرضا عليك..ام سالم تعاي بعد عمج اخذيهه سويليهه ايدهه بين ما يطلع واحد من الولد يجيبلهه عصارة صخام..

محيي : وليش هيج متخبل عليهه..انه اعرف شتصرف لاتدخلون والله خليتوا عينهه تطلع هاي چنهه امهه..
شامخ : روحي لاتسمعين..

عفتهم يحجون ورحت وي خالة ابتسام للحمام انه وابچي.. تحرگني حيل..اجت سرور واكفة يمي وايدهه على حلگهه.. خالة خلتلي عليهه معجون وتهفيلياهه..كعدتني بغرفتهه وراسي بحضنهه..صارت تحرگني وتصل علي..مايفيد بيهه شي.. كمت ابجي لأن وجع بيهه مو بس حرارة..بقيت يمهه وهي ادردم على ابوي..لحدما اجه سالم وعدلت گعدتي..
سالم : سلامات..سمعت محترگة..
ابتسام : اي هذا عمك الشفية..جبتلهه عصارة..
سالم : اي يمة..هاج كمشي سويلهيا خطية..
ابتسام : اي هسه..شصار على ابن عمك..
سالم : هستوهم وصلوله ديحاچوا وبعد دننتظر بين ما يرجعون نشوف شصار..
ابتسام : ان شاء الله خير..يمة لاتطلع ضل بالبيت..
سالم : تدللين..ماعندي شي اصلا..

عافنا وراح..انه هلكد ما بچيت راسي كام يوجعني وماارتاح بس بغرفتي..كمت على كيفي خفت ابوي يجي ورحت للغرفة.. اجن البنات يمي ..
سرور : شلون صرتي حبي..
دنوة : يعني..احسن شوي..
ضلينا كاعدين لحد ساعة بالوحدة هيج ورجعوا.. لبست الشال ووكفت بباب الغرفة اسمع شصار..هي الغرف متوزعة داير مدور الصالة الجبيرة ..
فيصل : ها بشر شصار..

رائد : مو هو..
فيصل : شون عرفت..
رائد : اعرف..انه ضابط وافتهم بهذول..مبين المذنب..هو هم يحلف ويتكفر ماشايفه صار اسبوع والولد يريد يسافر اصلا.. صاحب عائلة..يونس شجابه علي..
فيصل : شمعرفني ياعمي..المهم اسمه صديق .. متزوج لا.. ووليدي مو صغير..
رائد : هسه هذا مو مهم..انطيت خبر لمراكز الشرطة عن اختفاءه وصورته وكليته وكلشي يخصه..بس يصير شي يخابروني او يخابروك لأن انطيتهم رقمك..بس عمي لاتخلي أملك بالمركز..مايسوون شي تره..الا اذا خابروا الخاطفينه ويطلبون فدية يله..

ضلوا يحجون وهو وياهم وياهم..لحدما بالثنتين نعست وعفتهم طبيت للغرفة بس اسمع صوتهم.. ماكدرت انام من الاصوات.. ومنا ايدي تحرگني..شوي شوي بلش يخف الصوت لحدما صار هدوء فضيع..عرفتهم طشوا بالغرف.. كمت ع الميزتواليت طلعت العصارة اخلي منهه وسمعت الجامة اندگت.. گلبي رجف بخوف..خليت الشال وتقربت فتحت البردة على كيف.. شفته رائد واكف والجگارة بحلگه..لاف شماغ على رگبته..
تقرب من الجامة وهمس : فتحي الشباچ ابوية..
ركضت ع الباب قفلتهه واجيت فتحت الشباچ..
دنوة : شكو..
عاين لإيدي المخليتهه ع اليدة..
رائد : سلامات يابة..سرور گلتلي ..
دنوة : وشكو تحجيلك اصلا..
زفر الدخان وذب الجگارة طفاهه بحذاءه : خوما تحرگج..
دنوة : لا زينة وليش تغير الموضوع ضوجتني..ماتروح لعائلتك ومرتك شكو تسأل عني..

ضحك وتقرب مني : الجو بارد مو..يله فوتي موزين عليج..
نزع الشماغ لفه على إذانه ورگبته وراح يتمشى للباب اليدخل للبيت..
ليش ماجاوبني..معناهه صدك متزوج.. هسه انه ليش لحيت.. هاهيه حنساه ..تمددت انه واقنع روحي الى أن غفيت..

ثاني يوم كعدت الصبح مالكيت من الزلم بس عمي قاسم ديتريگ والتلفون مانازل من إذنه..ملتهين بمصيبة يونس..
كعدت يمه : شصار عمو..
قاسم : ماكو شي بعد عمج..الولد فص ملح وذاب..
دنوة : وين حتدورون بعد..
قاسم : رائد حيحچي وي الامريكان بالسيطرات اذا شايفي والمترجمين..بعد دنتاني..
همهمت وسكتت..فاتو عصام وسالم واحمد..انداريت على خالة ابتسام احاجيهه..
دنوة : ابوي وينه خالة..
ابتسام : طلع وي عمامج يدورون على يونس بالمستشفيات..

مشى اليوم بتوتر وخوف..للمغرب رجعوا كلهم حتى جدي ورائد.. ابوي فات اولهم..بس شافني خزرني وأشر براسه ع الباب..طبيت لغرفتي بالعجل..حاولت ألهي روحي لأن اصوات هواي صارت هوسة علي ..طلعت الكتب اقره.. باجر دوام.. دقايق وطب ابوي بس طبته بدفرة..
محيي : كومي بت الكلب..
سديت الكتاب وكمت : شنو بابا..
محيي : ضمي الكتب ماترحين للمدرسة منا لحدما نلگى ابن عمج..
دنوة : ليش بابا..عندي امتحانات..
محيي : عندج امتحانات..عندج صخام..كلت ماكو يعني ماكو.. كعدي وسكتي خوووش ..
حركت راسي بالموافقة.. عافني وراح ..

مرت تلث ايام على نفس الرنة..مستشفيات ومراكز شرطة.. كل النعرفهم صار عدهم علم بلكت واحد منهم يكدر يوصله.. امه تجي يمنا تبجي وخواته همات..چي بعده شاب وعزابي مامتزوج.. احنا فاتحين الاخبار والراديو ونسمع ..اشكال خطف وقتل وحرگ وكلشي يخطر بالبال..يخلي الجسم يقشعر ويخيب الأمل.. الى أن جنت بالمطبخ دااسوي چاي ونسوان عمامي يمي كاعدات هن والبنات..الزلم بالصالة الجبيرة.. مااحس غير بصوت رائد..نصيت النار ووكفت بالباب اشوفهم..
حچه بصوت عالي : شوف اگلك لاتهددني ولا اهددك.. الولد وينه.. اي مانختلف ع المبلغ ..
عاين على عمي وعاگد حواجبه : اي نكدر..دزلي أي واحد احاجي اول بعدين انطيك الفلوس..اي انه مقدم بالجيش .. خوش انتظرك..

فيصل : ها شصار..
رائد : خابرني هذول الخاطفينه..يردون ٣ دفاتر..
فيصل : تلاثة اربعة المهم ابني اريد اشوفه..ترخصله فلوس الدنيا كلهه..بس كون يجي سالم مابي شي..
رائد : لاتخاف..ماطول سألني اذا بالجيش لو لا يعني حيسلمه.. هذا واحد گرايب صاحبي خاطفي..چي ابوه عسكري ذبوه..
فيصل : يله خير يارب..شوكت يريدهن..
رائد : باجر العصر..عمي عندك لو اساعدك..عادي مابيناتنا شي وهاي شدة مابيهه تشافي..
فيصل : الله يسلمك حبيبي ماتقصر..بس مامحتاج..
رائد : يله..چا هذا هو..باجر العصر سلمنياهن اطلع انه وجدي انطيهن..
فيصل : ان شاء الله..

كلنا فرحنا بس خايفين بنفس الوكت..هواي ناس ياخذوهم وياخذون فلوس بعدين يذبوهم جسم بدون روح.. لليل بقينا كاعدين حتى النوم مايمر علينا..سمعت الباب تندك .. رحت افتحهه صار ابوي بوجهي..عافني وفات..بس وجهه مايگصه الطبر..سديت الباب ورحت وراه..
شامخ : شبيك بوية..
محيي : اياد ابن حجي حقي تعرفه..
شامخ : اي شبي..
محيي : مخطوف گبل اسبوع..البارحة ماخذين فدية وشامري قطع قطع بصندوك بالباب..
عمي فيصل انتفض من مكانه بعصبية : بيش طالب ابني.. شو انت ماعندك حچاية خيرة..
محيي : يول انه دااحجي خاطر ماتتأمل اذا صار العكس.. بعدين شون تصدكون بحچي هذا الزعطوط..

يحجي ويأشر على رائد..
فيصل : ماكو غيرك الزعطوط..دنعل شرفك لابو..
ابوي گام من مكانه شمر النفاضة يم عمي..صارت طشار.. مااشوف غير رائد حط ايده على عينه وعگد حواجبه..
شامخ : لك انت صغيرون تسوي هيج.. فال الله ولا فالك .. الزلمة ماندري شصار بعينه..
راح ع الحمام وسالم وعامر راحو وياه..ابوي بس يريد شي يفش غله بي..اجه علي كمشني من دشداشتي..
محيي : هااااا خفتي علي بت القندرة..خشي لغرفتج لا اذبحج ع القبلة وحگ الحگ..
دنوة : بابا ماسويت شي والل...
محيي : اششش ولج اكرهج خرب باليوم الاجيتي بي..

شامخ : محييييي..اترك البت..
هد ايده..انه گبل ركضت للغرفة وقفلت الباب..خاف اجت الگزازة بعينه..عزززه شحيصير بي ياربي اووف.. اي طبيعي أهتم لأن خطية وهو يبقى ابن عمي برغم كلشي.. بس شلون اعرف شصارله..هسه ابوي من سوه هيج حيكول لسرور ونوارة مايجن يمي..ضليت الوب بالغرفة ماادري شسوي.. لا تلفزيون لا صخام.. رحت ع الكنتور افتح واسد بي..بعدين تذكرت عندي من هذا الـmp3 ..طلعته اگلب بالاغاني مالته.. بس مالي نفس شو لعبانة روحي..اخر شي صارت بالثنتين وماكو صوت بالبيت..لبست شال وفتحت القفل على كيف وطلعت.. ضليت واكفة بمكاني.. شدااسوي.. حروح لغرفته اريد اشوفه شلونه..ماادري حب لو خوف هذا..لا بس خايفة علي.. اي اذا سألني اگله ردت اعتذر منك بمكان ابوي..هيج احسن..

تمشيت لغرفته لگيت الباب مردودة والغرفة ظلمة هندس.. اكيد نايم شداافكر انه..اوف مني..ضليت دقيقة او اقل وانداريت.. عطت لا اراديا..خله ايده على حلگي..
بهمس من بين اسنانه يحجي : هسس فضحتينا انتي بلوة يولي شوكت ما اشوفج تعيطين..
وخر ايده بالعجل.. : اعتذر..انه ..ماادري مااقصد والله.. بس
رفع حاجبه وملامحه مو كلهه مبينة چي ظلمة : بس شنو..
دنوة : اشوفك شلون صرت..يعني مو تحسب غير حساب بس چي ابوي هو سوه هيج فردت اعتذر بمكانه..
ماجاوبني..مد ايده وراي فتح الضوة..خليت ايدي على حلگي من شفت وجهه..گصته مشخطة وجفنه مال عينه اليمنى مورم ومشخط..
دنوة : هاي شنووو..
رائد : طار الشر..لاتخافين..

دنوة : منو گلك خايفة اصلا..كتلك اجيت اعتذر..
رائد : ابوي يگول..روحي لغرفتج لايجي ابوج وبعد لاتشوفيني وحدج هيج عمياوي..
دنوة : لاتحاچيني هيج..مو علمودك اجيت..
ابتسم هو ويطفي الضوة : فهمنا ابوية..
عفته ورحت للغرفة..عفية هذا ليش هيج غامض ومايحجي.. ماسامعة حسه بس هلمرة من اجانا.. ضليت ادردم لحدما نمت مدري شلون..

ثاني يوم العصر راح ابوي ورائد وجدي للمكان الاتفقوا يشوفون الجماعة بي..انه كاعدة بالصالة يم عمي..
فيصل : ها بوية وينك هسه.. يله لاتتأخر تره هم بالي عليك انت همات..الله يسهلك..
قاسم : ها شصار..
فيصل : دافعين الفلوس..هسه بالطريق..طار نص عمري بهاي الهبطة..بس كله فدوة اله بس اشوفه..
قاسم : الله يرجعه سالم غانم..لاتخاف..

بين ما رجعوا انه طلعت منهم..كعدت بالمطبخ.. كامو الجيران يجونا ومااعرف ليش..يواسونا على مصيبتنا لو شنو بالضبط.. تعبت من الطبخ والنفخ..ابوي ماقبل اروح للمدرسة.. فضليت كاعدة اتاني بلكت يرجع.. صبرنا خلص يوم عن يوم .. جدي رجع دز جماعة يدورون بالمستشفيات والسيطرات.. الجماعة الخابروا رائد انقفل الخط مالتهم وماكو وصل بعد.. خلانا نخاف بالزايد.. وره تلث ايام بالليل واكفة دااغسل مواعين والبنات يمي..اسمع صوت وهوسة مامفهوم.. درت على سرور ونوارة وحده تعاين للخ مامفتهمين..
دنوة : وحدة منچن تطلع تشوف شكو..
سرور : اي اي هسه حشوف..

خلصت ع السريع وطلعت وراهه اشوف شكو.. لكيت يونس حاضن رائد ويبچي..حتى چتافه تتحرك.. تقربت اكثر اسمعهم..
يونس : جانوا يحجون بيك..نتلني بالكهرباء كال ماطول گرابتك المقدم حطلعك..
رائد : كافي خوية..عدت وراحت اشتعلت صفحة ابهاتهم.. تعال فوت ارتاح..
خليت ايدي على گلبي..الحمدلله رجع..رائد مبين ابوه يمه.. چي طويل وضخم.. ابتسمت عليهم..بهللحظة جان تجي مرة عمي تبجي..حضنته وتمسح على شعره وتبوسه..حارت شتسويله.. شكد حلو شعور الأم من تشوف ابنهه او بتهه .. ضليت واكفة ومركزة عليهم..فرحت شوي انزال الغم.. حسيت على سرور گرصتني..

دنوة : اااخ شبيج ولج..
سرور : شوفي ..
منو .. رفعت راسي شفت رائد منتچي ع الحايط وقمصلته على ايده اليمنى يدخن وعيونه تتفحصني.. عفته وطبيت للمطبخ.. صوت الهوسة صار بالصالة يعني ابتعدو همزين..

كل يوم ماننام من الخوف والقلق..هلمرة من الفرح برجعته .. ضلوا كاعدين عدنا للثنتين بالليل بعدين اخذوه وراحو.. عمامي شواي وراحو لغرفهم..ضل ابوي كاعد يگلب بالتلفزيون وحيده.. رحت يمه..
دنوة : بابا..
محيي : شرايدة..
دنوة : اداوم باجر..
محيي : لا لاترحين..
دنوة : بابا صار اسبوع مامداومة..ليش مااروح..
محيي : سوي الاريده وانجبي لاتضوجيني..
دنوة : بس شلو...
ضربني راشدي فر وجهي ..شمر الريمونت وگام..
محيي : لا يعني لا..ولي انطمري عساج لا كاعدة.. ادور تريد تجيبلي رس امهه..گح....انگلعي خلصيني..

تعودت على راشدياته..مابجيت عليهه بس بچيت على كلمة گح... : تفشر علي ليش شمسوية..
دفعني للغرفة هو وصاك على اسنانه بعد بس ياكلني.. سديت الباب وتمددت..گرفصت روحي وگلبي احسه صار نار حيل يحرگني ويوجعني.. شوكت ابطل احاچي..هسه انه شرايدة منه..بجيت لحدما تعبت ونمت وحدي..

ثاني يوم كعدت الصبح وملانة مااريد اكوم واعيد نفس النظام مال كل يوم..كمت امسح بإيدي ع الچرچف لحدما مليت وكمت.. وكفت ع الميزتواليت اسوي شعري..لكيت ورقة جوه البردة..لميته بالعجل ودنجت اخذتهه..بيهه كتابة خط ايد مرتب بشكل ويجنن..
- : لوما عمي چا ذبحته..خلي عندج كلمة ولاتسكتين بالعجل.. انتي بت عمي گبل كلشي فاكيد الي حگ بيج.. حجيت وي ابوج وتعاركت وياه..عگبة رجعي للدوام سالم ياخذج..
گلبي يكلي هذا رائد..اي هو ماكو غيره..لأن لو عصام والباقين چا حچه جدامي..يعرفون ابوي شي ويقبل يحاچوني.. بس رائد ابد قافل حيل من ناحيته.. ابتسمت على كلماته.. چنهه تحاچيني من صدك..ليش افكر بي وهو عنده علاقة.. حرام اخرب بين ثنين..بس هو ليش ينتبهلي بكلشي اسوي.. شنو نهاية هلتفكيرات هاي..

طبگت الورقة وخليتهه بكتاب التاريخ.. طلعت غسلت ورحت اتريك.. ذبحوا ذبيحتين لسلامة يونس ووزعوهن.. وكالعادة رائد وياهم بكل خطوة..شكد حباب ومايستنكف..عكس عمي الهو ابوه..مايحبنا..

بالليل خلصنا شغل وكلمن راح لداره..طبيت للغرفة اقره.. كومة فايتتني شغلات..لخصتهن هيج رؤوس اقلام واشوف شلون احفظهن بعدين بيوم جمعة سبت..بقيت للوحدة الخص واحفظ السهل..كملت جان تندك الجامة..كمت على كيفي فتحتهه..
ابتسملي : شلونج..
دنوة : زينة..ماتخاف تجي هنا خاف احد يشوفنا..
رائد : كلهه نايمة..ومنو يطلع بهلبرد..
: ااممم..
رائد : شعندج كاعدة..امشي نامي مو وراج دوام..
دنوة : جنت ادرس..انت شتريد مني..كافي عيب وحرام.. ومااريد اخرب علاقتك بعائلتك..
رفع حاجبه ونزل الشماغ من حلگه : يولي ياعائلة هاي الخابصتني بيهه..

دنوة : ليش انت مامتزوج..
رائد : لا يابة متزوج شنو..منيلج هلحچي..
كمت اتأتئ..احس بالفشلة : انه ..يعني افهمني.. اسفة بس ماجنت اقصد وهيج سمعتك تخابر..تكللهه مشتاگلج واجي اشوفج..
ضحك بهدوء هو ويعاينلي : هاي امي يولي..
صفنت بعدين ابتسمت ..حسيت هم بداخلي انزاح.. اووف الحمدلله .. بس يله مع ذلك مااحاول اتقرب واشغل تفكيري بي.. ابوي ماينطيني ويموتني فوگاهه..
ماحسيت بروحي غير صافنة علي..هو عيونه سود ليل وشعره سرح بس ثخين والهوى عالي فتتحرك خصلاته.. لف الشماغ على خشمه وهمس : سدي الشباچ لاتبردين..

عافني وراح يتمشى بعيد..وانه اشوف جسمه شلون متناسق .. مو معضل ولا جسم الافلام..بس جسمه مرتب وصدره عريض..ضخامة وشهامة.. لمن يوكف احمد بسده لو عصام ماكو تشابه بيناتهم..

عفت الافكار وسديت الشباچ..رحت تمددت ونمت.. كعدت ثاني يوم متأخرة..محد كعدني ..بثمانية.. كمت متدروشة وراسي يوجعني.. غسلت بالعجل ولبست ملابس بدون ستريج.. حتى نسيت البرد..طلعت للمطبخ مالكيت بس خالة وعمامي وسرور..
دنوة : خااالة ليش ماكعدتيني..
ابتسام : اسم الله شبيج يمة..ماادري بيج حترحين للمدرسة..
دنوة : شلون هسه..سالم وينه..
تصلبت بمكاني من شميت عطره افشان.. ملى المكان .. طغى على عطور عمامي ..سمعت صوته..
رائد : شلونك عمي..
قاسم : الحمدلله ابني..كومي عمو انه اوصلج..
دنوة : مايخلوني افوت بعد..تأخرتتتت..
قاسم : دگومي هسه افوتج انه لايضل بالج..

رحت صعدت بالسيارة انتظره..كمت اگرضم بروحي.. لو باقية نايمة احسن..دنجت راسي لحضني نعسانة.. فزيت ع الباب تنفتح ورائد يصعد..
كمزت من مكاني وإيدي ع اليدة : شجابك..
رائد : عمي طلع وي جدي بشغلة..كال وصلهه..وانه مااكول لا.. عاينلي وابتسم..
دنوة : رائد نزلني..مااريد اروح..
رائد : عيب باباتي..شيكولون علينا..شريد اسويلج ابوية..
سكتت ماجاوبته.. وصلني للمدرسة ونزل وياي ..
درتله : هسه شكو جاي..
رائد : دفوتي يولي لاتضوجيني اشو هواي تلغين انتي..

فشلت منه..سكتت وطبيت جدامه..حچه وي الحارس وفات وياي.. عبرت الساحة لحد الإدارة بعدين تجي الصفوف.. اجت المعاونة شافته..
- : اهلا حبيبتي دنوة..اشو متأخرة..
رائد : اي فاتهه الوكت وخافت تجي وماتدخل..
- : لا عادي..فوتي امي..
عاينلي وابتسم بطرف شفافه : يله روحي ابوية..
عفته وطبيت للصف..همزين المدرسة توهه جاية.. سلمت وكعدت بس متوترة ع الصار..شكد ضعيفة يمه وهو بشخصيته يحاچيهه چن اخوي مو ابن عمي..

ماادري شلون خلصن اول درسين واجت الفرصة ارتاحيت.. اجن هاجر واسراء مبتسمات..
هاجر : عيني تره شفناه ديحاچي المعاونة..
دنوة : جذببب..شلون..
هاجر : من الشباچ..اوف اوف فديت الطول والشهامة..
اسراء : اي غير يجنن يبو..ادور انتي مبينة بنته..
دنوة : انچبن شنو هلحچي الماصخ لعبت روحي..
اسراء : اووي لعبت روحهه..خليحضنج ونشوف تلعب روحج لو لا..
هاجر : الا ما ذبتي اگص ايدي..
عاينت عليهن وخزرتهن : كافي مسلتة..
عفتهم وطلعت بالساحة اتمشى واراجع..

ممتحنين امتحانين وفايتني..رحت ع المدرسة حاچيتهه .. كالت امتحنج وي المؤجلات.. والثانية ماقبلت..حترسبني وانه مامتحنة شهر اول..ردت ابچي الا شوي..ومنا مخنوكة من كلام اسراء وهاجر مااحب هيج حچي.. خلص الدوام وطلعت بره انتظر..كمت ارجف وراسي يوجعني من البرد.. جانت اكو بلوكة على صفحة.. رحت كعدت عليهه ومدنجة راسي لإديناتي.. بقيت هواي كاعدة الى أن سمعت صوت رائد..
رفعت راسي شفته جدامي كاعد ركبة ونص وعيونه ادور على شي بعيوني : شبيج بنيتي..
: ها..شنو..
رائد : شبيج ابوية..مريضة..
دنوة : ماادري..راسي يوجعني وبردانة..
رائد : كومي ارجعج للبيت..باجر لاتداومين..

اول ما گمت حسيت بدوخة قوية..تچيت ايدي ع الحايط لحدما استعدلت شوي ومشيت..جنت لابسة بس قميص وصدرية وفانيلة خفيفة جوه القميص..انه امشي وشفايفي ترجف.. اسناني وحدة طگ باللخ.. ادور رائد يمشي سريع وانه گوة خطوتين..اخر شي بقيت واكفة وحنيت ظهري انه واسند روحي على ركباتي..
همست : رائد..
ماسمعني..ضل يمشي لحدما افتقدني ماكو.. اندارلي واجه يمي بخطوات سريعة..كمش طارف القميص بدون مايطخني..
رائد : هاي شلابسة..اكو واحد يطلع هيج بهلبرد..
دنوة : بردانة انه مابيه حيل عفية..
كام يستغفر ونزع قمصلته الجلد..شال الجنطة مني ومدلياهه بيده : هاج لبسيهه..

دنوة : لا عيب..
رائد : لبسي ابوية موزين هيج..
اخذتهه منه ولبستهه..رفعتهه شوي غطيت إذاني وخشمي بيهه.. كمت أشم بعطره التارسهه كلهه..حسيت روحي دخت.. دخت من العطر مو من المرض..شگد طيب والقمصلة دافية..مشيت وراه لحدما وصلت البيت بس دفيت لأن على حرارة جسمه جانت..
اندارلي : نزعيهه واخذي الجنطة وطبي لبسي زين.. اذا أحد شافج لابستهه حتصير موحلوة لا بحگي ولا بحگج..
نزعتهه واخذت الجنطة.. بس حركاتي اثگل من الثگل.. هلكد ما تعبانة..
رائد : يله فوتي وانتبهي لروحج باباتي..بالليل اشوفج شلون صرتي..
دنوة : شكرا..
رائد : العفو ابوية ماسويت شي..

عفته وطبيت جوه..لكيت البيت هوسة..جايين بين عمي فيصل ومرة عمي لواء وورود..نسوان ولد عم جدي همات.. عفتهم وطبيت جوه حتى مابيه حيل اسلم.. رأسا تمددت ولفيت روحي بالبطانية ..راسي احسه حينفجر هلكد ما يوجعني وجسمي كله يرجف من البرد.. بقيت بحدود النص ساعة يله دفيت وغفيت وحدي..

ماكعدت للمغرب على صوت الأذان وجسمي عرگان.. هدومي لاطشة علي..لكيت خالة ابتسام كاعدة يمي تمسح على شعري..
ابتسام : سلامتج حبيبتي ماماتي..شون صرتي..
دنوة : جسمي يوجعني خالة..
ابتسام : اي فلاونزا من البرد..رائد حچالي..شون تطلعين بهلهدوم يمة هو هيج..
دنوة : شمدريني..جنت مستعجلة والرحلة باردة ثلج..
ابتسام : يله اجر وعافية..كومي بدلي هسه اجيبلج شوربة..
همهمت وكمت على كيفي..جسمي كله يون احس عظامي منعنعة.. كعدت ع الچرباية ولافة البطانية علي..بس عيوني مبينة..انتبهت على خيال شخص يقترب من باب الغرفة..

ابوي .. رجفت بخوف ..
تچى ايده ع الچرچوبة مالت الباب : شلونج..
: زينة..
محيي : جبتلج دوة..هسه تجيبلجياه ابتسام.. التزمي .. باجر اخذلج اجازة..
دنوة : شكرا بابا..
محيي : يله.. رفعلي حاجبه هو ونظراته كلهه اشمئزاز.. عافني وراح..

احسه ينطيني الفلس بمنية..شكد اخذ على خاطري.. بس يله احسن مما اضل متعلعلة..شواي واجت اكلت الشوربة واخذت دوة.. بس راحت رجعت غفيت چني جنازة ..
كعدت بنص الليل..محترة..لبست شال وطلعت .. اول ما طبيت للمطبخ لكيت رائد كاعد رجل على رجل ومتچي ايده ع الميز يدخن..النفاضة متروسة لعينهه..فزيت منه بس المرض مسيطر علي ماحجيت شي..
زفر الدخان واندارلي بصفنتي..طفى الجگارة وگام..
رائد : شلون صرتي..ضل بالي عليج..
دنوة : زينة..شكرا لأن سألت عني..
ابتسم : شكثر تكولين شكرا..مايحتاج ابوية ..
بادلته بتعب.. رحت ع الثلاجة طلعت كباب بيت وكعدت بالگع اكل..

حسيت الضوة انسد عني..رفعت راسي لكيته يمي.. انطاني خبرة بعدهه بيهه حرارة..
اخذتهه منه وابتسمت : شك..ها لا ..
رائد : هههههه..ميخالف ..
ضل يعاين بعيوني..حسيت راسي صخن ودخت من نظراته.. ليش هشكل يعاينلي..شيقصد..ادور انه ماادري شصارلي چن مغناطيس ماكدرت انزل عيوني..لحدما رمشت ودنجت مستحية.. مشى عني وراح ع الميز اخذ الجگاير وطلع .. كمت اكل وبالي يمه..گلبي احسه يريد يوگف من يشوفه.. ابتسمت وكملت بعدين رحت للغرفة تمددت وغفيت..ماثگلت بالاكل جنت احس روحي شبعانة..

مر اسبوع وصارت راس السنة..دعائنا الوحيد الله يهدي وضع هلبلد..لأن خرط فد دور.. بليلتهه صعدنا بالسطح انه والبنات جان الجو ثلج..بقينا كاعدين وبيت عمتي همات موجودة.. ضحك وسوالف لحد الثنعش ونص اجه ابوي..
محيي : گومي بت القنادر..شعندج تبصبصين للزلم بنص الليل..
فرح (بت عمتي سناء) : لا خالو ماجانت تسوي شي.. گاعدين عادي..
محيي : فروحة خالو انتي تعرفين شي وانه اعرف شي.. گومي يله لا انزلج سحل..
عدلت الشال ونزلت وياه..عصر زندي حييل ودخلني لغرفته..
محيي : اكويلي هدومي كلهن..باجر اطلع لبغداد واتأخر..
دنوة : حاضر..

طبيت للغرفة اكويهن..ايدي خدرت.. حاطلي كومة هدوم .. اوف يابة..شكد يقسي علي ومايرحم بيه ابد..جدام الكل يسويني بصغر النملة..يله..كلهه يم الله ماتروح.. انه اكوي واسمع اصوات ضحك ولد عمامي ورائد وياهم..شوي شوي اختفى الصوت واجه ابوي..
محيي : ها كملتي..
دنوة : بعد بس واحد..
سكت..سويتليا وطلعت.. رحت للغرفة تمددت..عندي طبع من انام امد ايدي جوه المخده.. مديتهه جان تجي ايدي على ورقة.. اخذتهه اقراهه..نفس الخط .. ومكتوب بشكل احلى..

انه بلياك گلبي شما يدك يبرد ..
ياباب الفرح .. والحزن مد الشوف ..
خايف لايهب عالي الهوى وينسد ..
يااسود رمش هنيال لون الليل ..

چي لنّه وي عينك دوم يتودد ..
فضلك ع الحِسن انت اخر العنگود ..
وبستان الورد لولالك ماورّد ..
يازفة عرس ضحكتك تالي الليل ..

وياعين الصگر بالزعل من تحتد ..
يالتدلع غنج واليحب مو گصاي ..
وانت اعلى الچتف مبخوت تتگصد ..
ياصوغة هدايا وفضفضاك الليل ..

لاتلتم بديه لاهوى وتنشد ..
ويااسهل من اسمي وصعب حد الغيظ ..
وطلاسم لو ردت وياي تتشدد ..
صدگني احبك حب غريب الطور ..
واحب صبرك علي وماكلت لأحد ..

قريتهه اربع مرات وبكل مرة اوصل لـ صدگني احبك حب غريب الطور..گلبي يكوم يدك سريع وحرارة تمشي بكل جسمي.. نبضاتي غريبة يم كلماته..يم صوته وضحكته القليلة.. سوالفه المعدودة ع الاصابع.. اكيد رائد .. يحبني .. شلون وشوكت شافني خاطر يحبني..احس اكو شي على لسانه وماادري شنوه..قريتهه مرة اخيرة وگلبي يدك وي كلمة اقراهه اتخيله جدامي ديحچيلياهه وابتسامته الخفيفة چن بس انه اشوفهه.. طبگتهه وخليتهه بكتاب التاريخ نفس ذيج.. تمددت ناسية رزالة ابوي على هلكلام الحلو القريته..

مرت ايام مابيناتنا شي..ولا حتى سلام..مااشوفه.. لمن سألت سرور عنه كالت ملتهي وديشتغل شفت ترجمة مسائي بالسيطرات.. والصبح وين يروح..ماادري .. المهم مدااشوفه.. حسيت بضيق بصدري..بكل ليلة احضر كلام اريد احچيلهيا اذا شفته بس ماكو..وادري بروحي اذا شفته حتتبخر كل قطرة ندى تحمل بداخلهه كلام اله..

وراهه بفترة گصيرة بلشت الامتحانات..سكنت الغرفة كمت مااطلع .. اروح وارجع وي سالم..افتقدت وجوده وخوفه علي بذاك اليوم..مع العلم جنت بحالة يرثى لها بس ماحاول يكمش ايدي حتى.. سديت الكتاب ورحت تمددت مغمضة عيوني واتخيل شكله ذيج المرة وقربه مني لمن دنج وسألني : شبيج بنيتي.. درت وجهي للجهة اليمنى وهمست بيني وبين روحي : احس وراك شي بس مااعرف شنو..

خلصت اول تلث امتحانات وراهه بالامتحان الرابع رجعت للبيت لكيت عمامي كاعدين ومتوترين..حتى سالم من اجه يرجعني جان متوتر..سكتت ماحجيت شي.. ضليت اعاينلهم وبعيوني كل نظرات التساؤل..حسيت على سرور ندستني دخلتني للغرفة..
سألتهه بخوف : شكو يمعودة تره متت خوف..
سرور : رائد ماكو..
دنوة : شنو..اقصد يعني..يعني ماادري شنو ماكو..
سرور : كبل خمس ايام طلع كال حروح لابوي وعندي شغلة اطول بيهه..طلع ومارجع ليهسه..
دنوة : عزه وشلون عفية..يعني وين راح..
سرور : شمعرفني انه..اوف استغفرالله..امشي اكلي شي شوفي وجهج صاير كركم..

دنوة : مااريد..مااشتهي..
صدك بهللحظة اذا يذبحوني مابيه قطرة دم..خفت وگلبي عصرني.. كمت اكول بگلبي ..مابي شي ..هسه يرجع اكيد قابل شعنده هو..بنفس اليوم اجه ابوي الظهر مايدري شكو .. حچوله.. دار وجهه عاينلي بطرف عينه..
كام هو ويحاچيهم : الله يرجعه بالسلامة..شسويله..
كاظم بعصبية : انت مو بشر..يابة الرجال سوالنا زين حد الشبع..شني انت ماتغزر بعينك زيناته..
محيي : سوالك الك..انه ماسوالي شي..
كاظم : روح انگلع..گطيعة التگطعك..ابن أخيك يول يالأغم.. روح لاتجنني..
محيي : لوما اكبر چا عرفت شسويلك..ولاتجاوز علي جدام بتي.. مو صغير انه ..

عافه وراح للغرفة..ابوي شكد عصبي وكاعد على نار بأكثر وكت يكون هادئ..بس هلمرة ماحچه شي ابد عبالك شخص غريب ماشايفه ولا عاشره..شكد يكرهه مايطيق اسمه..

عفتهم يصيحون بيناتهم وطبيت للغرفة..جان اليوم الوراه عندي تاريخ..شمرت الكتاب بقهر..طاحت الاوراق مالته.. گلبي خفگ وايدي رجفت.. رحت شلتهن وقريتهن بنفس اللهفة الأولانية.. تقربت من الورقة المكتوب بيهه القصيدة شميتهه منتشية.. عطره مالي الورقة والكتاب.. حسيت گلبي وجعني .. وينه هسه.. ليش من انطاني هاي راح..يارب يكون بخير.. انتبهت ع الباب تنفتح رأسا طبگتهن وضميتهن..

مشت الايام وانه امتحن..كل يوم برجعتي اكول اليوم اشوفه.. اليوم يجي..ويوم يجر يوم لحدما رجعت للبيت وجان باقيلي امتحانين.. شفت سيارة واكفة بره اول مره اشوفهه .. نزل منهه رجال يطلع بكد ابوي..لابس بنطرون وقميص وسترة فوگاهه.. عاينتله ..حنطاوي طويل وضخم ..بلحظة دار وجهه علي.. شفت رائد بي..نسخة مستنسخة..اكيد ابوه عمي حامد هذا.. سالم راح علي وفاتوا جوه..مشيت وراه بالعجل ..ضليت واكفة بباب الكليدور اليطلع ع الصالة الچبيرة..عمامي كلهم گاموا وجدي همات ..محد جان طالع للشغل ملتهي بمصيبة رائد..
فيصل : شجابك انت..واكو واحد يفوت هيج..
حامد : ابني اذا مااجه اذبحكم كلكم..مناعيل الوالدين.. اليوم انعل سلفة سلفاتكم وحگ لا اله الا الله..هو انه طلعته مناك لأن خايف علي..بعدين يجي هنا ومايرجعلي..علاسة.. طلعوا ابني لا ادخلكم كلكم بالسجن..

شامخ : اكمش لسانك وخليني محترمك ومخليلك مقام.. لا اطلعك بالچلاليق..اسمك ابني..
حامد : انت الوحيد لاتحجي..لك انت هم تسمي روحك اب.. انه الأب..انه التعبت وعشت ضييييم .. يول انت تقارني بيك .. شهور نايم والبرد يگصني گص..لك انه الرجال.. انت وهذول ولدك ولد الدلال مابيكم خير كلكم..واكبر دليل ابني اجاكم ومارجعلي..واذا مارجع وحگ عيونه اهد البيت على روسكم..
شامخ : دمشي اطلع بره ياطايح الحظ..
هو ديحجي وياه وطلع ابوي من الغرفة..هو شاف عمي وتخبل.. كمشه من سترته صار حچي حاد بيناتهم غلط وفشار بعمري ماسامعتة.. سالم اندارلي وأشرلي اطب جوه.. ركضت ع الغرفة بس واگفة وره الباب اسمعهم..

محيي : مثل ما انت خايف علي فاحنا همات..منيلك هلحچي التافه مثلك..يول احجي عدل لاتخليني اهينك وانت رجال الشيب طاگ براسك..
حامد : يول هذا رائد..تعرف شنو يعني..يعني رجال البيت.. الأب الثاني..ينحلف براسه مو خيخة مثلكم.. شيل ايدك.. طالع.. بس والله ثم والله..وروح المرحومة.. اذا مارجع رائد اشتكي عليكم..اخليكم تخيسون بالسجن..وانت اولهم ..
فتحت الباب على كيفي..شفته ديطلع وسالم طلع وياه ..

خطية شكد محروگ دمه علي..سديت الباب ودموعي نزلت.. شلون خاف مايرجع..هو وينه حتى..حظي معلعل من الصغر.. سندت راسي على إديناتي وبجيت بحضني لحدما دخت وغفيت انه ووره الباب.. فزيت ع الباب تندك..كمت فتحتهه..
ابتسام : هاي بعدج مامبدلة..وشبيهه عيونج مورمة..
دنوة : شبيهه خالة..مابيهه شي هيج جنت خايفة ماانحح بعدين تأكدت من الأجوبة..
ابتسام : يله كومي ماما..صبيتلج اكل..هذول بيت عمج لواء هنا ومرة ابن عم جدج هي وبناتهه..
دنوة : اي خالة لاتوصيني..
كمت بدلت وطلعت سلمت عليهم وتغديت انه وساكتة.. تكفيا للمشاكل..

خلصت امتحانات..وگبل الامتحان الاخير تغديت ومااشتهيت عشه..بس اشتغلت وياهم وخبزت..جنت مخلصة من وكت.. نمت بالدعش هيج..كعدت ثاني يوم وحدي..تمنيت اكعد على صوت هوسة لرجعته..بس ماكو..عبالك اليوم بألف سنة.. لبست واخذت الكتاب وطلعت بره ..اجه سالم اخذني ورحنا للمدرسة.. اخر يوم والبنات مكيفات .. انه بس خلصت رحت كعدت جوه الشجرة اتاني يفتحون الباب.. اجن الثنائي المرح يمي..
هاجر : شبيك ياحلو ضايج..
دنوة : مابيه شي..تعبانة هيج..
اسراء : بمناسبة الحلوين..شو ابن عمج ماكو..
دنوة : ماادري وينه..لاتسأليني علي..
هاجر : يااا..وينه خطية..

دنوة : مااعرف..صارله من بداية الامتحانات ماكو.. گايل حطلع بشغلة وماراجع..
هاجر : اسم الله..ان شاء الله ماكو شي..زين انتي شدعوه هلكد خايفة علي..
دنوة : ولي من خلقتي..شكد اضوج من هلاسئلة..
اسراء : ولج مو كتلج تحبه..دعترفي مايفيدج النكران.. بعدين يعترفلج ويمووووت..
دنوة : انچبي شنو هلحچي..فال الله ولا فالج بيش طالبة الرجال.. استغفرالله..
اسراء : اي عيني رجال ليش لا..فديته..
فكيت عيني متفاجئة عليهه وعلى جرائتهه : انتي شنووو.. عيب بابا عيييب..
هاجر : كولي تحبي لو لا..
دنوة : وانتن شكو..

اسراء : لج احنا صديقاتج..غير نگلج اذا احساسج صح يا لا.. بس غير نعرفه اول..
صفنت ودرت وجهي : اي احبه..
هاجر : يله الله يرجعه بالسلامة..ان شاء الله مابي شي..
ضلن كاعدات يمي يسولفن وانه مالي واهس روحي.. وره نص ساعة فتحو الباب ورحت بره..شواي واجه سالم اخذني.. بالطريق حسيته مو طبيعي..مو مثل البارحة بس سكتت ماحجيت..گبل لا نوصل للبيت وكف وعاينلي..
سالم : رجع رائد ..
دنوة : عززززه..جذب..صدك شوكت..
سالم : وره ما طلعت واخذتج للمدرسة هو جاي..

سكتت ماجاوبته بس بگلبي الف حچاية وسؤال.. خفت اسأل ويحس اكو شي بيناتنا..انه امشي وگلبي يمشي جدامي.. دنجت راسي مااريد اعاين بوجه أحد ويشوفون شي بعيوني.. اول ما طخت جدمي باب البيت سمعت صوته يكول الله يسلمك.. ابتسمت ودنجت نزعت الحذاء وطبيت من باب المنور.. رحت لغرفتي بالعجل بس فاتحة الباب شوي.. شفته شلون واكف بطوله وجسمه وشعره الأسود ليل.. شايل القمصلة على إيده اليمنى..ماادري شحچوا جان يضحك .. رسم شفايفه شكد يبرز لمن يضحك.. خليت ايدي على حلگي وگلبي يدك سريع.. احس تهيت دگاته..رحت ع الورقة الكاتبلي بيهه القصيدة.. هلكد ما قريتهه حفظتهه وخصوصا السطر گبل الأخير.... وصدگني احبك حب غريب الطور ....

طبگتهه وشميت العطر البيهه منتشية وافكاري حسيتهه وردة وفتحت بطلته.. ضميتهه بالعجل ورحت بدلت .. بقيت كاعدة بالغرفة خفت اطلع ويشوفني ابوي..حاولت ألهي روحي الى أن غفيت ماادري..كعدت الظهر لكيت سرور ونوارة يمي يسولفن واسمع الضحك..عدلت نومتي انه وارمش بسرعة اريد يروح الغواش من عيني..
سرور : عيني أمورة..كومي..
دنوة : شكو شبيج..
سرور : ولج هاي شنو الخط الحلو..منيلج هلقصيدة.. مال عريان.. اويلي شلون ذوق..
كمزت من مكاني جريتهه من ايدهه : شعليج بيهه لج..
نوارة : هو كاتبهه مو..
دنوة : ها..لا انه سمعتهه بالراديو وكتبتهه..

سرور : ولج انجبي..شحال لوما هو انطانياهه گال خليهه بغرفتهه بس لاتقريهه..عبالي بيهه كلام احم احم.. بس طلع مؤدب الزلمة..
دنوة : يبو عليج..هههههه..اي مالته..وينه هسه..
سرور : راح لبيتهم..باجر يرجع يمكن مدري عگبة..
دنوة : شصار وين جان..مخطوف..
نوارة : هو ابوج خلانا نسمع شي..كال فوتوا بعدين عود.. هذا شبي عكرة..اووي..
دنوة : چا ششايفة منه..
سرور : عود انتي حاچي واسألي..
دنوة : اخاف لا..كومي لاتضوجيني حروح اكل شي..

لبست شال وطلعت للمطبخ كليتهن كلهن كاعدات.. بنات عمامي چي عطلة..صبيتلي على صفحة وكعدت..اسمعهن يسولفن برائد ..
حنين : اي ولج ماشفتي ابوه شسوه..بعد بس يهلهل..
نور : ليش عمي اجه..
حنين : اي..جدي خابره واجه رأسا..هو زلمة ويعتمد علي.. ماتشوفين ليش فرفح على غيبته..
نور : يله المهم رجع مابي شي..

انه كاعدة واگرضم بروحي..شلون هسه ..اريد اعرف وين جان بس من منو..محد ديجيب طاري هلموضوع.. بس انه شفته يضحك..اكيد ماجان مخطوف..
ثاني يوم صارت هوسة..ولد عم جدي حيجون هم ونسوانهم.. كعدوني من الصبح ساعدتهم بالخبز..خبزنا كومة.. شكد ما الجو بارد الصبح بس من التنور صار حار.. وراهه سوينا ريوگ وگيمر وهلاشياء من حلالنا .. بالتسعة اجو .. التهيت اليوم كله أهورف انه والبنات..شنو ماصدگوا خلصت امتحانات استلموني.. خلصناهه چايات وضيافة..للعصر سمعت جدي يكول سوو مجال لرائد.. الابتسامة انرسمت على شفايفي تلقائيا.. حگدر اشوفه خاصة ابوي مو هنا..

هو اجه رائد وكامت الزلم تجي اكثر شي..يتحمدوله ع السلامة.. جنت ناوية اسأل خالة ابتسام..بس بعد ع الهوسة هاي اريد بس انام..بالليل بلشوا يطلعون ..لحد التسعة فرغ البيت لأهله..الولد طلعو بره وجدي ترخص ينام.. عاد گمنا نظفنا وخلصنا كلشي بالدعش..

رحت اخذت هدوم سبحت ورجعت للغرفة .. اجن البنات يمي جابن شغلات مال تعليلة چي اول يوم عطلة.. فتحنا التلفزيون على فلم بين ما خلص سمعت صوت الولد يفوتون للبيت.. سرور عافتنا وراحت ماادري وين..شواي وكمت طفيت ورحت للغرفة..ضليت اتگلب لحدما غفيت.. فزيت على سرور تهز بچتفي وتهمس..
سرور : كومي..ولج دنوة..گومي..
دنوة : شكو يمعودة شكووو..منو مات..
ضحكت هي وتحاچيني : محد..هاج كمشي احجي..
عاينت على ايدهه لكيت تلفون بيدهه..
دنوة : مالمن هذا..
سرور : مال امي..خلصي وانطينيا بالعجل..انه بالممر..

اخذته منهه : الو ..منو..
حمحم وحچه : انه..
كمزت من مكاني وايدي رجفت : رائد..
رائد : اي..اريد اشوفج ابوية ..
دنوة : شلون..وين اقصد..
رائد : طلعي من باب الترك محد اكو..
دنوة : لا عفية عيب واخاف يعني مايصير نضل بهيج مكان..
رائد : يولي شنو مراهق انه..سرور واكفة على صفحة عود لاتخافين شلون بلوة هاي..
فشلت منه : لا اعتذر مااجي..
جر نفس وزفره : يله باباتي تره تعبان واريد شوفتج.. نظرة حرام ماانظرلج وداعت امي..
دنوة : ماشي..

سديته ولبست شال..انطيته لسرور وتمشيت لباب الترك.. بس خايفة ومااعرف شصار بيه..الف احساس وفكرة وشعور.. شي يگلي لاتخلي يشوفج هسه..گلبي يگلي شوفي مايسويلج شي.. حسيت برعشة مشت بجسمي من فتحت الباب وصار بوجهي.. ابتعدت عنه انه واعدل الشال..
حس بإرتباكي..مد ايده رد الباب وهمس : كعدي..
دنوة : لا ماگلت هيج..شتريد تسوي..
زفر أنفاسه بقلة صبر : مااسويلج شي..ماتكدرين تختبرين صبري..تره صبور حد گطع النفس..كعدي يله..
اكو مثل البلوكة بس خشب قوي على شكل مربع.. كعدت وهو كعد جدامي..ضوة خفيف بيناتنا من اللّد مالت السطح..
مد ايده طلع جگارة ورثهه وزفر الدخان..اختنگت رأسا گحيت..

رائد : الله الله..
دنوة : هاي شتدخن انت عفية ليش هلكثر تخنگ..
رائد : نفسهه مالتي..

سكتنا ثنيناتنا..هسه انه شكو اجيت..اوف هي علمود هاي.. گتله : نسيت اگلك الحمدلله ع السلامة..
رائد : الله يسلمج ابوية..
دنوة : هو انت وين جنت..
رائد : طلعت بشغلة وي واحد ولد..يريد يشتري سيارتي.. گتله ماكو مشكلة بس اريد اشتري بمكانهه خوما اضل بدون.. كال امشي لبغداد هم تبيعلي وهم تشتري..كتله يله..اخذته ورحنا لبغداد..سويت معاملة تحويل وبيع وهلاشياء.. اخر شي بعتلياهه وكملت..اخذته وياي للمعارض دااشوف وحدة غيرهه حتلو نفسهه بس غير لون غير مواصفات..عادي لأن مستعجل عليهه..ابوي خابرني كال ديصفون اهل المعارض.. اترك السيارة وارجع..ماگلت لا..هستوني دااطلع من المعرض واجت سيارة حمل سودة نزلوا منهه ملثمين..صعدوني انه وبعد ست سبع ولد..

اعرف السجون شلونهه فلمن دخلوني لمكان عرفته سجن.. يعني جهة حكومية.. خلوني بغرفة وحدي وي الولد صاحبي صادق.. كام كل يوم يجي علينا ضابط مااعرف شنو رتبته يگلي انت تطلع بس مو هسه..يابة خلاخابر اهلس هسه بالهم علي..كال ابد..عدنا شغلة تخص العملاء اليشتغلون وي الامريكان.. عاد ضليت كاعد هناك بس اكل صفر ولعبان روح.. ردت بس اطلع..سلبوني طبعا..جنت شايل ٢٠٠ الف مانطوني منهه بس خمسين على كد الكروة والجنسية همات سلمونياهه..حتى التلفون اخذوه.. عاد اخذت صاحبي ورجعت للبصرة هاي البارحة جيتي..

دنوة : يااا..خطية..شلون تحملت السجن..
رائد : عادي..انه شفت حرب ايران..وشفت ابوي يجي من الحرب مانعرفه هلكد ما متغير..انتي بعدج ماجاية للدنيا..
ابتسم هو ويكول بعدج ماجاية.. بادلته ودنجت ..حسيت علي شمر الجگارة وورث وحدة لخ..
حچه بنبرة صوت مختلفة..حسيتهه حنينة وهادئة.. رجولية ورزنة.. مااعرف بس گلبي رجف من سمعته : قريتي الرسالة..
جاوبته بثول : يارسالة..
رائد : القصيدة..
دنوة : ها..اي قريتهه..حلوة..
رائد : دنوة..رفعي راسج..
رفعت راسي ..شفته صافن يتاني عيوني تصير بعيونه.. كامش الجگارة بيده اليسرى واللخ على فخذه..

: اا..شنو..اكو شي..
رائد : فهمتي قصدي بيهه..
دنوة : اي..لا قصدي لا مافهمت..
رائد : اي لو لا..
: اي..بس انت شمعرفك بيه وشوكت حبيتني..
رائد : شايفج من جنتي بالسادس ابتدائي رايحة ع الاول..
فكيت عيني متفاجئة : شوكت ..شلون..
رائد : شفت الصورة بألبوم امي..ودائما لمن ترجع من يمكم تحمد بيج..تكول خاتونة وتفرفر بالبيت گصيبتهه لظهرهه.. ضليت اسأل عليج يمهه.. كالت بعدهه صغيرة وهي فطيرة حيل..
خدي صار نار من كلامه..عاينتله شلون مبتسم .. : وانه فطيرة صدك..
رائد : فددور..

سكتت مانطيته جواب..بس بداخلي احس انهيار.. دگات گلب سريعة..انفاس ترجف..افكار تلخبطت.. مااعرف شصار.. هو هذا الحب..الأسمع بالراديو يحجون عنه..يحجون عن تجاربهم لأول حب وشعورهم.. عاينت بعيونه حسيت روحي ذابت..
همس : تحبيني..
كلمته نفضت كل الافكار البگلبي..عبالك هو ديگلي تعاي لحضني.. هو ديگلي مكانج يمي..بس انه بجوابي احدد اذا اقبل لو لا.. : مااعرف..
رائد : احجي..هذا شيگلج... وأشر على گلبي..
دنوة : مايكول شي..مااعرف لاتسألني..

ذب الجگارة وطفاهه بحذاءه..هو گاعد ورجليناته بمستوى بطنه.. خله إدي على ركباته وشابچهن ..
رائد : دنوة انه ضابط..ضابط من سنة الـ٩٣.. تعرفين شنو يعني..يعني طير الطاير اعرفه شديفكر..مايفوتني شي.. فطن ونبه لحد ماتتصوري..لاتحسبين غافل عن نظراتج.. بس انطيتج مجال..كلشي اشوف واعرفج شدتفكرين.. بس اكول هي تحجي براحتهه احسن..انه رجال عشت ببغداد من يوم الوعيت ع الدنيا لحد التسعة وتسعين..بس وحگ هاي العيون مايوم كعدت وي بنية هيج كعدة وحاچيتهه بهلوضوح .. شوفي شكد راغبج ورايدج..
دنوة : يعني شنو شحيصير..ليش دتگلي هيج..
رائد : عايني بعيوني ..
بهاي اللحظات كل فعل فعلته مسير بأمر من سيد الأحاسيس .. من گلبي..

عاينت بعيونه ماحاولت اتهرب..مااعرف منين اجتني هاي الجرأة وانه جنت اشوفه بالختلات..
حسيته ابتسم ومد ايده ع الباكيت يورث جگارة.. عاينلي هو ويحجي بهمس : كل حرف گلته بداخلي صار سنين.. حبي مو ابو يوم وليلة..صيري نچرة وافهمي قصدي..
دنوة : مافهمت شتقصد..
رائد : يعني احبج يابت عمي..
كمت من مكاني..هو بقى كاعد.. : ماشفت ابوي شسوه.. وشلون يكرهك..انت ليش تعلق أملك بكلمة مني..انه شگدر اسوي يعني..
رائد : انه الاكدر..انتي بس اسمع منج أي..ابوج نفسه جان يحب وحدة اهلهه ماقبلوا ينطوه..بعدين تزوجوا طبيعي..

دنوة : رائد انه اخاف من ابوي..اذا عرف بشي يموتني ومايتردد بگد الشعراية..هسه تكلي اذا تخافين چا شلون اجيتي.. اجيت لأن...
عاينلي ورفع حاجبه : لأن شنو..
دنوة : لأن ماادري..اي صدك ماادري ليش اجيت.. وماادري ليش اجيت اشوفك باليوم الأبوي كسر النفاضة.. من مااجاوبك يعني مااعرف الجواب مو اضم عليك..
ضحك بهدوء وعيونه على ايدي : فوتي نامي.. لاترجفين .. عرفت كلشي..
تقربت منه متفاجئة : شعرفتتت..
رائد : هسسس انتي فديوم توديني بداهية من حسج العالي.. عرفت وخلص..

اخذت نفس وتقربت من الباب اريد اطلع..
رائد : اصبري لاتطلعين انتي..
گام وكف يمي..ريحته صارت بخشمي..غمضت عيوني بهدوء.. لحدما حسيت روحي تشبعت منه..ابتعد عني وطلع جدامي .. لحظات واجه..
همس : يله دخلي..وانتبهي لروحج..
دنوة : شكرا..
ابتسملي ووكف على صفحة.. تمشيت للغرفة .. سديت الباب مامصدكة بروحي طبيت هنا..احس خطواتي ثگيلة.. گلبي فرحان وجفوني من عطره حسيتهه ثگلت بعد مااشوف بس هو..مااشتم بس عطره.. تمددت مبتسمة وسرحانة بعيونه وكلماته وهدوئه..

يتبـــــــــــــــــــــــــــع..................