رواية اسألي عني الليالي الفصل الحادي وستون 61 - بقلم رقية جاسم

اذا إنت تمُّر ع الأعمى يصيح الله ..
والأخرس لَّون حاچيته يحاچيك ..
أذب كلبي على سهمك وآنه مجروح ..
واكلك دير بالك أخاف أأذيك ..

قناة التليگرام

حساب الانستگرام

الـبـارت الـسـتـون.................

كتلهه مابيه شي حتى دوخة ماعندي عادي..سوتلي سونار طلع ولد..كالت وكح مبين اشو هواي يتحرك..يووو انه شكد فرحت..يعني كلهه شهر او اقل ويصير طفل بين اديه.. اكيد شعور حلو ورهبة بنفس الوكت.. وراهه فحصتني بس عكدت حاجبهه مدري شكو..كمت عدلت ملابسي اشوفهه شتكول.. كعدت ع الكرسي واسمعلهه..
الدكتورة : ع الاكثر حيصير عندج تعسر بالولادة..
دنوة : شلون..ليش..
الدكتورة : رحمج مال بنت عذراء لسه ما متزوجة حتى.. يعني ضيق بالرحم هيج نكول..
دنوة : يعني شنو شحيصير..
الدكتورة : اني حشرف عليج وولادتج تصير بالمستشفى الاشتغل بيهه..اهلية ..اذا شفت عندج تعسر بالولادة احولج عملية..وان شاء الله خير بالحالتين..

دنوة : شكرا دكتورة..
انطيتهه فلوس وطلعت..كالت لمن تدخلين بشهرج تعاي علمود نحدد موعد..انه رجعت للبيت طايرة من الفرح.. اول طفل بيدي حيصير ولد..فرحت هواي وكاعدة على نار اريد صگر يرجع واكلة..ما احب التلفون..شحلاتهه من اشوف عيونه السود يلمعن وگلبه يدك سريع..حتلو مو قريبة منه بس احس بيهن .. عبالك يدگن بگلبي..
كتلهه لخالة فرحتلي والكل عرف بعد..جوان تخبلت بعد بس تاكلني بنظراتهه..عفتهه مهتميت..بالليل صعدت يم سلمى نسولف..
سلمى : اكلج اشو بطنج مو حيل جبيرة..
دنوة : ماعوزهه بس تصير لخشمي.. لا تره زينة ..
سلمى : اي شمدريني غير شفت اسماء بطنهه اكبر.. يمكن لأن حبلت ببنات مو ولد..
دنوة : لا شعليهه غير كلمن وطبيعة جسمه .. ذكرتيني.. جوان هم حجت شي..

سلمى : لا والله..كاعدة وساكتة..اليوم لمن طلعتي سمعت عمي يحجي بالتلفون وي واحد مدري منو..كالة ميحتاج تسوون مشية نسوان..بس يجون الزلم علمود نتفق ع المهر وموعد الخطوبة وغيرهه..
دنوة : هاااا حتنخطب واخيرا..اي خلتلتهي بروحهه شكو لازكة برجلي..
سلمى بضحك : بيني وبينج..الله يساعد الياخذهه..
دنوة : والله اجت ببالي هلحجاية..ههههه..يله شسويلهه ختروح جانت بانية امال سخيفة..بعدين تهدمت..
سلمى : احسللهه..هي وين وصگر وين..كل واحد بديرة .. هو ربج لو يريدهه تصير جان صارت من زمان..
دنوة : على كولتج..بس انه شلون رزلتهه رزالة..غسل ولبس .. كتلهه لا تتقربين على رجلي بهيج سوالف..تره زلمة طاك الشيب شعرة وما يعاينلج..

سلمى : والله طلعتي گوية..وشكالت المحروسة..
دنوة : خنست شتكول سواد وجهه..
سلمى : عاشت ايدج..الحب مو حرام..بس حرام عليهه تحب متزوج..عاد ياريت منطيهه وجه..اشو لابسهه..
دنوة : ههههههه..اي عيني چا غير يحبني..
ضليت كاعدة يمهه تقريب الساعة..لحد ما دخل اركان.. ترخصت منهم ورحت للغرفة..لكيت صگر داك علي.. صارله ١٥ يوم بالواجب كلش طول..كلت اسويلهيا مفاجئة لمن يرجع اكلة.. عفته مارجعت دكيت علي..كمت بدلت وشغلت التلفزيون على فلم اتفرج .. خالة كالت انه اشتري الجهاز مالت الطفل.. بما ان اول طفل لصگر..انه كيفت عاد..مابيه حيل اطلع .. هو للدكتورة وهم من وره خشمي رحت..
لهناك ونعست..دا اطفي والتلفون صار ضوه بشاشته.. اكيد صگر ..ابتسمت وفتحت الرسالة..

- اوووووف يدنيتي باجر جايج يولي مشتاكلج بكد رحمته..
جاوبته : وانه بعد مشتاقتلك..
كلماته حتى وهي مجرد حروف تخلي گلبي يدك.. صگر مو بس زوجي..ابوي واخوي حتى امي..شفت يمه الدنيا من غير جهة..جنت كاعدة بمكان اصغر من الكوخ وظلمة فد دور.. الناس تمر من يمي محد يقدملي ايده خاطر اكوم.. بس هو اجة طلعني من الجنت عايشته..خلاني اعيش دنيا غير دنيا .. انه مو انه يم صگر..حنيته واحساسه مستحيل يصير شخص ثاني عنده مثلهه..هو شكد ما يكول احبج ودنيتي وبنتي .. بس انه احبه اكثر..لأن احبه مثل ابوي واخوي مو بس زوجي.. شفت الامان يمه..الحب والاحساس الغريب .. سالم جان قريب مني..يشاقيني وهو الوحيد لين وياي.. عصام واحمد حادين والكلمة بالكوه تطلع منهم..

مع ذلك ماحسيت بشي تجاهه..احسه انسان عادي حاله حال الاخ..بس صگر مختلف..مختلف بكلشي.. طوله وهيئته .. رزانته وهدوئة..حتى بضحكته.. اول ما شفته حبيت شخصيته واسلوبه شلون يحجي بهدوء والكل منفعل..بشر ما يتعاب كامل والكمال لله..عيونه نظراتهه تگص گص.. نظراته حادة وهو كله وكلايله حاد..من عيونه لحد مشيته وحسه.. بس يمي يختلف..لمن يهمس بإذاني و ادي تحاوط خصري اتمنى يبقى على هلحركة..ياخذني بغير عالم..كلشي من ناحيته ينطينيا واحس بي لهفة..بكل يوم عبالك اول يوم يشوفني ويحبني .. حبه يزيد ما ينقص..لهفته لمن نصير سوه وحيدنه ع الفراش تحسسني بأنوثتني وصغر حجمي يمه..الانوثة الي محد انتبه عليهه بيوم..والكل محسسني انه انخلقت للشغل والخلفة .. واول الناس الحسسوني هيج عقيل..كلمة والثانية يكلي انه جايبج تخلفيلي مو لسواد عيونج..

عبالك مشتريني شرايه..كلشي يم صگر يختلف.. يقدر كل تعب اتعبه..يحب كل نفس اتنفسه..حتى لمن صرت حامل وخصوصا هاي شهوري الاخيرة من يشوفني يكلي ارتاحي شتريدين اجيبلج..اكيد تعبانة وظهرج يوجعج.. هاي هيج يحاجيني..اذا ردت ادنج هو ينزل يجيبلياه.. ابتسمت بعد هذا التفكير وغفيت..
كعدت الصبح غسلت ونزلت..مالكيته..شعجب ما جاي لسه.. طبيت للمطبخ اسوي الريوك وياهم..خالة كاعدة..هي والبنات والحجية ام مخلد..بس جوان ماكو كالعادة..سلمى حجت
سلمى : دنوو شحتسمين الوليد..
دنوة : والله بعدني مامفكرة..شوف صگر شيكول..
سلمى : اختاري انتي ماطول يحبج وهاييي..يعني يقبل.. اكو زلم متقبل النسوان تسمي..
دنوة : ولج خليجي ببالي اسم اول عود الله كريم..

شواي وسمعت صوت الباب..عفتهم ورحت افتحهه.. صار صگر بوجهي..ابتسمتله .. دخل وسد الباب.. باسني من خدي وراسي..حاوطني من جتفي وتمشينه لباب الكليورد
صگر : شلونهه دنيتي..
دنوة : زينة..انت شلونك..تعبان..
صگر : ميت تعب والله..رجلي توجعني..
دنوة : يله اكلك شي واصعد نام ريح..
ابتسملي وطبينه..لكيتهم صابين الاكل.. راح يغسل واجه سلم عليهم وكعدنه نتريك..وره ساعة كلمن التهى هو صعد فوك.. خطية حتى ماكدر يكعد بالكع..حطيتله الاكل ع القنفة.. رجله توجعه..ادور خفت لا رجعتله الدوالي ومايقبل يحجي.. عفتهم وصعدت..لكيته بالغرفة يدخن..مابيه اضل واكفة.. فرحت كعدت ع الجرباية واحاجي..

دنوة : عوف الجكاير شوي..موزين هيج..
صگر : مامسويتلي شي..ليش..تضوجين من ريحتهه..
دنوة : لا عادي..تعودت..بس علمودك..
صگر : لا تخافين..سويتي سونار لا..
دنوة : اي رحت البارحة..
صگر : وشكالت..
ابتسمت : انت شتكول..
صگر : اي شي..المهم تمام الخلقة..بس شحلاتهه لو بنية
دنوة : لا ولد..وكالت مبين وكح هواي يتحرك..
ابتسم وكام اجه يمي..باسني من راسي ودنج يم بطني : بعدك ببطن امك وهيج وكح..عليمن طالع..ابوك وعاقل..
دنوة : هههههه..عليك سوالف..بس اكلك..
صگر : شنو عيوني..

دنوة : الدكتورة كالت يمكن حتولدين ولادة قيصرية..
صگر : هاااه.. ليش ..
دنوة : كالت ضيق بالرحم..ما اعرف بعد..
عاينلي مثل اليكلي انه وياج : لاتخافين..اي شي يصير هي الدكتورة حتعرف تتصرف..
دنوة : ان شاء الله..
باسني من خدي وكام ع الكنتور ياخذ ملابس وانه اعاينله شلون هادئ بحركاته..يسوي كلشي بهدوء ولا چن اكو بشر مر منا..ابني اذا طلع علي تسوى الدنيا ومابيهه..
بالليل چنه كاعدين بالهول..جوان تعاينلي بنظرات عبالك تريد تاكلني..حتى تضايقت منهه..ما اكدر احجي احسهه تتبع كلمه كلمه اكولهه..عفتهم وصعدت.. فكيت شعري ومشطته انه وافكر بإسم لابني..شسمي..دقايق وصعد صگر..

قفل الباب واجه وكف وراي..اخذ المشط من ايدي يمشط بأطرافه..چي طويل اهمل النهايات..
صگر : شبيهه صافنة دنيتي..
دنوة : داافكر بإسم للطفل..شتكول انت..
صگر : بكيف امه..هي شتريد نسمي..
دنوة : چا هو مو ابنك..قابل بس ابني..غير ثنيناتنه..
صگر : براحتج ابوية..شعاجبج..
صفنت شوي..بعدين كتله : ايمن حلو..لو امين..
صگر : ايمن احلى..
انداريت صرت مقابيله..كعد بالكع صرت انه اطول من يعني وهو كامش ايدي يفر الحلقة على كيفه..
دنوة : صگر..
صگر : عيوني الاشوف بيهه..كولي..

دنوة : مدااتحمل جوان..شلون..
صگر : شسوتلج..نبهتهه ما تتگربلج..
دنوة : ماسوت شي..بس اتضايق من نظراتهه الك.. انت كاعد وتسمعهم ما منتبه عليهه..بعد بس تاكلك..
صگر : وداعت هلعيون ولا دايرلهه بال..اصلا كل ما اشوفهه ارزلهه..ذاك اليوم اجت تتمسكن يمي..كتلهه اذا شفتج جدامي بعد تحملي كلشي يطلع مني..
دنوة : وانت شتسويلهه..
صگر : والله امردهه مرد..اخليهه تكره اليوم الحبتني بي.. انه مو بحالهه وغلاتج..حتى ماادري بيهه تحبني.. هو انه شفت صورتج ذيج ونسيت روحي..شلون الواحد يختصر حياته بشخص مايدري حيحبه لو لا..
مبتسمه انه واسمعله..هو صافن على ابتسامتي..

دنوة : ما مشككه بيك..وادري بيك ماتحبهه..ثاقة بيك اكثر من روحي..بس دااحجيلك الاحس بي..
صگر : احجي اليعجبج ابوية.. اسمعلج بكل وكت ..
سمعت صوت رسالة لتلفونه..جان ع الميزتواليت.. انداريت اخذته فتت عليهه..من الشركة..ادور طبيت على جهات الاتصال كتله : هاي شكد عندك اسامي..انه وين..
صگر : بالبداية..
رحت ع البداية صدك شفت رقمي..كاتب دنيتي.. رفعت راسي : ليش دائما تكلي دنيتي..

كام وكف وطفى الضوه..اخذني من ايدي للجرباية.. حضني على كيفه ويهمس هو وايده تدخل لشعري بهدوء ..
صگر : انتي دنيا والله..مو بس انتي..كلشي يخصج همات .. مره بالدوام وفاغرة روحي من التعب والحر..طبيت ارتاح اجة الخفر بمكاني..جانو كاعدين بعد تلث ضباط.. واحد منهم كال شوكت تعرس يمعود نريد نفرح كلهه عرست هاي الدنيا مليانه وانت مرتب ماكو وحده متقبل بيك..كتله ما ارتاح بس يم دنيتي..ضرب صفنة وضحك..كال شنهي عندك غير دنيانه هو من العمارة..كتله اي والله وما اريد غيرهه..عاد كام كل ما يشوفني يكلي عشت بدنيتك لو لا..اكله بعد..لحد ما انسجن تغيب عن الخدمة بعد ماشفته..

لمن شفتج ببيت الشيخ..والله ماصدكت روحي كلت معقولة هي نفسهه..يالله شكد كبرانة والعيون شفتهن وجه لوجه.. بالصورة مجانن مبينات زين..ادور انتي تعاينين بعيوني عادي.. ما تدرين بگلبي شلون رعش من نظراتج..ولو ماجانت نظرات حب بس المهم اسمهه نظره..ردت اخليج تعرفين بحبي من نظراتي .. كل يوم ارجع للبيت اكول يعني نظراتي مابيهن معنى لهلدرجة خاطر مافهمت حبي..

من افوت للغرفة واشوفج نايمة والله اضل واكف واعاينلج من فوك ليجوه..ادور تتحركين..فتصعد الدشداشة.. زنودج وفخاذج كلهه تبين..اكول انه اشوفهه هيج جدامي.. لا والله حلم.. طريقة نومتج وهدوء انفاسج..اهتمامج وحبج البريئ .. ما اريد اكلفج..اريدج تكعدين واتفرج عليج بس .. اااااااه لج شحجي انتي مو بس مرتي..بنيتي .. سعادتي محطوطه بيج.. انه يمج فرحان بدون سبب..انتي السبب..

انه يمج اعيش دنيا ثانية..حتلو ساكتة ميخالف.. ابقى مرتاح ..اختصرت حياتي كلهه يمج..كلشي اعيشه واحسه وياج مختلف..صبرت سنين بس انتظر شوفه..ماريدج تحبيني .. اريد بس اشوفج..اشوف البنية الاحبهه من صغرهه شلون صارت ..جنت اجي من الواجب اروح ع الصورة هذيج.. بوكتهه صرتي ثالث متوسط..كلت بيني وبين روحي هسة شكد كبرانة اكيد صايرله احلى..
كمش ايدي خلاهه على گلبه..دكاته سريعة وقوية بشكل عبالك صوتهه حتى جوه حيسمعوه..كلماته ذوبت روحي.. بعد ما ادري على شنو اجاوب وشلون وليش..يمكن للحظة الواحد يحسه شعور غريب ان شخص ما شايفه يحبك وانت ماتدري حتى..

لساني انعكد بمعنى الكلمة..ادور دكاته دتصير اسرع وانفاسه صارت من دافية لحارة..رجع حچه
صگر : دنوة..
رفعت راسي عاينت بعيونه بدون ما اجاوب..
صگر : رجفة گلبي هاي ما احسهه بس لمن اتذكر..
انتبهت علي كصته تصب مي وعركان..تقربت منه حضنته وايدي على شعره مثل ام تهدي ابنهه لمن يبجي : على كيفك وي روحك..احبك بكد لهفتك الي ورجفة گلبك هاي..
كام يتنفس بصعوبة وتعب..خفت علي : حبيبي شبيك
سحب راسي بهدوء خلاه بحضنه..همس : معليج مني.. نامي اريد اغفى ع الانفاس هاي..
ضليت على نفس وضعيتي لحد ما غفيت وحدي..

وره جم يوم..صگر جان فوك نايم وانه جوه اغسل مواعين.. خالة طالعة لبيت اختهه ام جاسم..اجتني جوان خلت مواعين بالسنك وكلاصات مدري منين جايبتهن..عاينت عليهه وفاكة حلكي : هاي شنو جوان..

جوان : غسليهن شنو هاي شنو..وها باعي..اني حطلع ويا امي للسوك اني وشهد..فروحي نظفي الغرفة..
دنوة : دطيري..اغسل مواعيني اي..انتي شنو اخدمج.. ما تخدمين روحج..لازم مشتريتني خاطر اسويلج شتريدين
جوان : يله هو انتي تنشرين عادي..
هي كالت هيج وانه شياطين الدنيا كلهه صارت جدامي.. شمرت الخواشيك بوجهه وصحت بيهه : رعنهههه.. انه انشرى دصبري..خنشوف منو ينشرى..
ذبيت الطاسة مال زاهي بحضنهه وطلعت..كامت تعد وتصف علي..هيج هيج منج..دا اصعد جان تجي بالصالة تصيح بعلو صوتهه..اجت الحجية على صوتهه..
ام مخلد : ياستار استر..شبيج يمة..
جوان بدموع : يمة تقبلين دنوة تضربني..

ام مخلد : هاااا..تضربج.. يخالة انتي مو حامل..شلون تضربيهه..شمسويتلج قابل..
دنوة : هي تدري بروحهه شمسويه..
جوان : كذابة ما مسويه شي والله...
دتحجي وقاطعتهه : شالج الله كولي امين..اكول لا تخليني اطلع عن طوري وافتح دفاتر عتيكة..خالة بتج تكلي تنشرين بفلس..اذا تقبليهه على جوان انه اقبل..
شهكت وخزرتني : يمة كذابة لتصدكيهه..
عفتهه تتبالش هي وامهه وصعدت فوك..صار صگر بالباب .. توه كاعد وعيونه حمر..
صگر : شبيهه..
دنوة : ماكو شي..مشكلة وانحلت..
عاينلي بخزره وراح نزل..عرفته حيتعارك وياهه هي وامهه..

هو لمن واحد يكعده من النوم يتخبل..ادور منو كعده.. هاي الخاتونة كلش يحبهه عاد هو.. نزلت وراه ..
صگر : شمسويتلهه..
جوان : مامسويه شي..وشدعواك هيج تحجي بنتر..
صگر : كولي شمسويتلهه..
ام مخلد : خالة لغوة بسيطة بين النسوان..شبيك تكبرهه..
صگر : خلتستر على نفسهه ولا تكبرهه هي وتحجي..
جوان : كتلهه تنشرين بفلس..لأن ضربتني مو بدون سبب
هي كالت هيج وتخبل عليهه..صياح وغلط : لج تغلطين عليهه جداميييي..انتي شنو..شنوووو..انعل زينج والله .. لوما بنية جان سويتج وصلتين..حجية هذا الحجي جدامج.. دنوة اذا صارلهه شي ماتلوم الا نفسهه..
جوان : يله هو حظ..واني ماعندي حظ..

راد يصيح كمشت ايده : عوفهه ختولي..عيب من خالة..
صگر : ديلهههه..اذا فكيتي حلكج اوصل الحجي لابوج..
امهه جرتهه وراحت للغرفة..انتبهت على ايده اوردتهه كلهه مبينه..اندارلي..
صگر : لا تتگربيلهه..ادور تسويلج شي..
دنوة : مو كتلك ماكو شي..دختولي..روح ارتاح..
اخذ نفس وراح صعد..رحت للمطبخ اكمل المواعين..دقايق وحسيت واحد دفعني حيل ع السنك..معدتي صارت بزردومي.. شهكت للسما..
جوان : حتى تتعلمين متجيبيلي رجلج يحجي عليه..
انه اختنكت بعد حتى مابيه اجاوبهه..رحت للحمام بالعجل .. كمت استفرغ شاغت روحي..اجت اسماء على صوتي هي وسلمى..كمشتني من جتفي وتغسل بحلكي..

صدك تأذيت وحسيت روحي طلعت..بعد حتى مالي حيل اجاوبهه..اخذتني لغرفة خالة تمددت .. انه مغمضه عيوني مافتحتهن..بس سمعت صوت صگر يصيح..
صگر : وينهههه..شبيهه..
اجه كعد يمي وباسني من راسي..انه طفيت من وجع الراس ومنا بطني مغصتني..غمضت اريد بس اغفى..
صگر : شبيهه دنوة..
اسماء : ما ادري شكلك..هي كامت تستفرغ اجينه على صوتهه منعرف شكو..
صگر : لا ابوي بگبره يعرف..اكول لا تخبلوني..شبيهه البنية ما جان بيهه شي كبل لا اصعد..
اسماء : خوية والله مندري شصارلهه..اسألهه الهه..
اندار همس يمي : دناوي..احجيلي شصار ونامي..

عاينت علي حضنت ايده واحجي : جوان دفعتني ع السنك.. وما ادري شصار بيه اختنكت كمت استفرغ..
الحجية خزرتني ودفعت جوان وراهه : خالة لا تسوين مشكلة .. هياتج مابيج شي بس ارتاحيلج شوية..
جاوبتهه بتعب : خالة شنو لاتسوين مشكلة..وين مسويه انه.. سألني وجاوبته..
جر ايده مني وكام : حجية هاي عود كتلج اخذي بتج لا تخليهه تأذي مرتي..بعدين هيج تسوي بيهه..وببيتي.. لا والله عاد ما صايرة هاي..
هو يحجي ويصيح وانه بطني احسهه وجعتني وجع مو طبيعي.. بس ساكته واعصر بالچرچف..دقايق وزاد الوجع .. طكيت بجي..اندارلي وفاتح عيونه..
صگر : شبيج..

اجه يمي عدل كعدتي وايده ترجف من العصبية ومن الموقف .. كمشته من بلوزه وهمست بصوت يادوب ينسمع : بطني دتوجعني عفية.. كمت اصيح وابجي ..احسهه تتشك من الوجع .. صحيح تصير عندي انقباضات وتقلصات دورات.. بس مو مثل هيج.. هو انخبص بيه..صاح ع الحجية وكفت يمي كمشتني تهدي بيه وانه روحي بخشمي صارت..
اسماء : جوان شسويتي بالبنية ليش هيج مو خطية.. حتصير عدهه ولادة مبكرة ماكو غيرهه..
جوان بصياح : واني شعليهههه..والله يالله..
سلمى : لا انتي كله بسببج..ماكو عقل براسج هيج حتورطيهه شدعواج هيج..رجال ميريدج شكو لاطشتله..
ام مخلد : لزمي لسانج تره اخلي اركان يرجعج لبيت اهلج حالج حال الجلب..

سلمى : مقبولة منج عمة..مقبولة..
دتحجي وفات صگر..جوان لاطشه بالباب تريده بس يطخهه خاطر تسويلهه سالفة..اجه يمي لبسني الشال والصاية وطلعنه..اسماء اجت وياي الباقين بقو بالبيت.. نص الطريق واسمعه يخابر ..
صگر : يمة وين انتي..دنوة ما ادري شبيهه.. شنو شبيهه دااكلج ما ادري شمعرفني انه..يمة ما تكدر تحجي بطنهه توجعهه.. يله هياني جاي دقيقتين ..
سده وساق اسرع من كبل شوي..اقل الدقيقتين وكف السيارة يم بيت ماانتبهتله..من الوجع بعد حتى ما احس شديصير.. دقايق وسمعت صوت خالة صعدت وره..
الحجية : يمة احجيلي شيوجعج..
بصوت تعبان : خالة بطني عفية..ما ادري شبيهه..

وجع مو طبيعي..مو مثل كل مره..
اشرتلي على مكان ببطني : هنا..
دنوة : ااااخ اي خالة اي..فدوة كافي ما اكدر احجي..
كمت ابجي وكامشه ايد صگر..احسهه تملخت من اظافري بس هو ساكت ماكال شي لحد ما وصلنه مستشفى.. اجه نزلني وانه ذابه ثكلي كله علي..ما اكدر امشي لحالي.. لحظات واجت دكتورة تحاجي خالة..
الدكتورة : شبيهه البنية..
الحجية : صار عدهه وجع وهي بعدهه بالشهر الثامن..
الدكتورة : مسويه حركة مفاجئة..شي قوي..
صگر حجالهه شصار..سألتني سؤالين عن مكان الالم واذا اكو شي ثاني..كتلهه اي..
الدكتورة : اي ولادة مبكرة لازم هسه تدخل..

اخذتني لردهة جبيرة ممر هو..بعدين طبيت لغرفة منهن .. ردت اتمدد وكمشتني بطني..ماكو هيج وجع..كمت ابجي وكاتمة صوتي ما اكدر اصيح ما اعرف شبيه..ضليت هواي متوجعة .. ساعات مو ساعة وساعتين حتى الشمس بلشت تغيب .. الدكتورة والسستر كلساع جايه علي.. ها تحسين بشي.. مدااحس بس بالوجع الفضيع.. اخر شي سمعت الدكتورة تحاجي صگر وخالة..
الدكتورة : الظاهر البنية عدهه ضيق بعنق الرحم.. اكو هيج حالات تتأخر يله تصير عدهه ولادة..بس هي هسة حالتهه تختلف..ولادة مبكرة..المفروض تسهل اكثر..
صگر : شلون..تضل متوجعة..
الدكتورة : لا..بس اسألك..خوما عدهه سكر حمل..
صگر : لا مابيهه شي..
الدكتورة : جيد..لازم عملية منكدر ننتظر اكثر..

احتمال سائل المشيمة ينزل ويأثر على وضع الجنين.. هسة تفضل ويايه توقع على ورقة علمود نسوي العملية..
هي كالت عملية وانه گلبي احس دكاته علكت بزردومي.. اختنكت..كمت اكح ادور الوجع زاد..تمنيت الموت ولا احس بهلالم..ياربي ساعدني مدااتحمل..
دقايق واجة رجال جبير..بكد ابوي تقريبا وياه بنية عشرينية .. حاط السماعة على رگبته والبنية بيدهه ابرة..علك كيس ابيض مثل المغذي هو ويحاجيني..
الدكتور : اهدي بنتي..ميصير هيج..
انه ابجي والوجع موتني وهو يكلي ما يصير..حتى مابيه اجاوبه..سكتت بس دموعي تكت..كمل وخله السماعه بإذانه يفحص نبضاتي..
الدكتور : بنتي بس خلافتهم..

ولو متوجعة بس سكتت..وراهه خلالي ابره بمكان الكانونة العادية..اجت البنية ضربت الابرة بالكيس الابيض..هو كام يسألني..
الدكتور : لتخافين..كليلي شسمج..
دنوة ..
ابتسم : اسمج مميز..حامل بولد لو بنية..
دنوة : ولد دكتور..
الدكتور : دتحسين بشي..
حسيت شي بارد ثلج فات لايدي..ايدي جمدت..حسيتهه خدرت ونملت مثل واحد نايم عليهه صار هواي..كتله : اي..
الدكتور : يالله..تكومين بالسلامة..
كام ومشى هو والبنية..رفعت راسي للسكف حسيته بعيد والغرفة جرشت بيه..نسيت الالم من وره المخدر هذا..

ضليت اعاين بالغرفة..البرودة مشت بكل جسمي لحد ما غفيت من وحدي..
كعدت على صوت رجلين وصوت الچرخ مالت السدية.. اريد ارفع راسي ما اكدر..جسمي نحلان وذبلان..كلت بيني وبين نفسي بس لا ماتخدرت وبعدهه الدكتورة ما مسويتلي العملية .. لأن حسيت النومة النمتهه دقايق اذا مو لحظات.. ادور طببوني لغرفة لخ شوي اصغر من هذيج.. بيهه كراسي ثنين وديلاب او لوكر..كل هذا وانه مفتحه عيوني ع النص .. لكيت روحي مو بملابسي..مبدليهن..وشالي ماكو.. دقايق وسمعت صوت صگر..فتح الباب على كيف وفات.. ابتسملي بتعب واجه يمي..باسني من راسي ..

صگر : الحمدلله ع السلامة حبيبي..
بتعب وصوت ناصي : الله يسلمك..شصار.. ليش سوولي عملية..الطفل وين..
جر كرسي وكعد..كمش ايدي باسهه ويحاجيني : الدكتورة كالت عدهه حالة يسموهه عنق العذارى..عنق الرحم ضيق متصير ولادة..
عاينت علي بدون ما اجاوب..غيرت الموضوع : والطفل.. شسميته وشلونه..
صگر : مو ردتي ايمن..هو سميته مثل ماتريدين.. وكف وباسني من راسي بهدوء وحذر كال : لاتخافين..
دنوة : شنو ما اخاف..شبي متحجي..
صگر : بعدهه رئتة ما كاملة..هسة هو بالخدج يحتاجله من اسبوع لاسبوعين بين ما تكتمل ويطلع..

سكتت ماحجيت..كمت ابجي بهدوء وبطني توجعني من جوه .. يمسح دموعي وانه بالطالع..حتى مابيه حيل احجي تعبانة حيلي مهدود..
همس : بنيتي لاتخافين..اكو هيج حالات..فترة ويصير زين ونطلعه..مابيج حيل لاتبجين گلبي انتي..
دنوة : اريد اشوفه..
صگر : بس تكول الدكتورة خلتمشي عود اخذج..ارتاحي هسة كافي دموع..
كام وكف ودار وجهه..كمشت ايده : لاتروح..
صگر : امي حتجي تشوفج حبيبي..انه واكف بره زين..
حركت راسي يعني اي..ابتسملي وراح..شواي وفاتت خالة .. كعدت يمي تحاجيني..
الحجية : عدت سلامات حبيبة..المهم انتي زينة..
دنوة : وابني خالة..

الحجية : لاتخافين يمة..اسبوعين بالزايد ونطلعه..
عاينت عليهه وعيوني ذابله بالكوة مفتحتهه : وين جانتلي هاي
الحجية : أمر ربج..وهاي جوان بس نرجع صگر يتصرف وياهه مصختهه الرعنة..
دنوة : شوكت نطلع..بيش الساعة هسه..
الحجية : تسعة بالليل..باجر تطلعين الصبح..
ردت اخذ نفس وبطني شنطتني..اذا اكح توجعني.. ضليت بمكاني هادية..اريد بس اشوف ايمن شلونه..ذاك اليوم جنت احس بحركاته ببطني..هو انه شوكت صارتلي شغلة كاملة.. لازم تخرب ع النص..
مشى الوكت..الدكتورة كالت لازم تاكل شي خفيف.. صگر يروح منا ويجي منا..تبهذل هو وخالة .. اسماء مالكيتهه سألت خالة كالت بناتهه كامن يبچن وراحتلهن.. اخر شي بنص الليل كالت خلتمشي..

خالة مابيهه حيل تعبت خطية..اجه صگر يمشيني بالغرفة بعدين تمشيت بالممر..بس باردة ثلج وارجف ولو لابسة كومة .. كمشت ايده وامشي خطوة خطوة..مثل الطفل اليريد يمشي ومايكدر فيجي ابوه وياه..
صگر : تروحين تشوفي..
دنوة : اي اروح..
مشاني للغرفة الخالي بيهه..ماطبيت بس من بره.. جانت اكو سستر يم واحد منهم..همَ اربعة او خمسة..
اشرلي علي : هذا هو..
من كبل لا يحجي حسيته هو..شكد ضعيف وحاطيله اوكسجين فاتح ادي ونايم..ابتسمت وعيوني دمعت..ملت على صگر وايدي محاوطته بتعب..احس كوه شايلة روحي.. شلون حروح للبيت واعوفه..ليش صار هيج بيه..والله ما استاهل..

سنين اريد بس اشم ريحة طفل بيدي..بعدين تصير ولادتي هيج وحتى ماكمشته اول ما اجه..رفعت راسي كتله وعيوني مدمعة : مابيه اوكف بعد..
رجعني للغرفة بهدوء وياي خطوة بخطوة..راح كعد ع الكرسي وانه تمددت..ضليت اتصفن بالغرفة هو كاعد مانام .. لمن غفيت هو جان كاعد.. كعدت الصبح لكيته نايم ومدنج راسه لحضنه رگبته مقوسة من أثر النومة..انتبهت لايده مجلغة بحمارات .. اكيد انه البارحة بدون ما ادري..
بس تحركت حس علي..فرك وجهه وشعره مخربط.. وره ساعتين طلعنه من المستشفى..الدكتورة كالت اقل شي اسبوعين اذا مو اكثر..و هم كل فترة يجي يشوف وضعه وياهه.. خالة خطية ما عافتني..شكد كبرت بعيني..كالت رجعت للبيت بس بدلت واكلت واجه صگر ماخذهه..هي ماقابلة تبقى بالبيت

وانه جنت مكيفة وخالة مشتريتله الجهاز وانتظر يوم يوم علمود يصير موعد الولادة..بس الحمدلله ماكول غيرهه.. طبيت للبيت احس روحي صارت بزردومي..كارهته وكارهه اهله.. اسكت ياكلوني..احجي تصير مصيبة..شسوي خاطر انصف ويصير الصح وياي..گادني لغرفة خالة والكل يعاين علي ..
همس : ابقي هنا بين ما تكدرين تمشين..اروح اشوف هذول اليوم ميبقون بالبيت دقيقة..
دنوة : لا تحرگ اعصابك..
ماجاوبني..عافني وراح..دقايق وكبت العيطة..
صگر : اذا ماطلعت هاي الچلبة اذبحهه..منو يفيدني .. انتتت لو انتي..مرتي حالتهه تصعب ع الكافر..وابني الله اعلم شحيصير بي تالي متالي ابقيهه عندي..لا والله اليوم تطلع وبهلساعة..عسى ما تروح للگبور..

كبور تلفهه هي واليطلع وراهه..خالي على عيني وراسي .. تريد تبقى هلا بيك..بس بنتك هاي ماريد اشوف وجهه بعد .. كافي مللتوني كرهتوني بعيشتي حرام عليكم..چي محترمكم ومكعدكم عندي..اكول وين يروحون اذا طردتهم.. ومو طبعي أرد احد ترجاني..هذا علي يسمع حسك..باگني وطعن بشرف مرتي يعني شرفي وتهم اخوي خلاه يدخل مراكز شرطة وهو غريب بغير دولة بعدين اجاني يريد اشوفله بيت..وهذاك بيته حتى كعدته قريب مني.. شتردون مني انتو..

حتى ابني الصار سنين انتظر اشوفه هسه بالمستشفى وحالته حالة..انعل شرف اليسوي زين بعد..مذمووووم .. مذموم بكل الحالات..
ابو مخلد : ماقصرت وكفتك ما انساهه..هاهيه اني طالع اليوم وولدي همين..
بهاء : يابة على شنو تحترمه..شوف شسوه بينه.. مرتك لسانهه اطول منهه تستاهل اليجيهه..
صگر : حشاهه والله ماتطلع منهه الشينة..تشرفك وتشرف عشرة من امثالك.. اخذتهه صغيرة چنهه نسمة محد يحس بيهه .. ولحد هسه .. بعدين انت بالذات تنجب وماتفك حلگك بكلمة وحده.. نذل نسيت روحك شمسوي..لك لوما انهههه چا انت حتى فاتحة مامسويلك مثل الچلب..چا هاي جوان اليدافعلهه فصلية تخدم جوه الرجلين..لا تخليني احجي..

بهاء : شو تهدد..والله ما ادري منو مكبر راسك..
لحظات وسمعت صوت شي انكسر وخالة تصيح يمهههه ابنيييي..كمت ارجف وبطني توجعني..كمت بيه مابيه اريد اشوفه شبي..بس طلعت من الغرفة شفته كاعد بالكع وكامش راسه والدم على خدوده لحد رگبته واصل.. گلبي خرط صار بيدي من المنظر..دموعي كامت تكت..شنو هلمصيبة.. رحت يمه كمش ايدي ورفع راسه شاف دموعي..
صگر : روحي ارتاحي يابة لا تكومين موزين عليج..
دنوة : وانت شلون..
صگر : ابوية روحي لا تتوجعين.. يمة كومي وياي..
اول ما كام غمض عيونه وانتچى ع الحايط..اجه اركان اخذ السويج من جيبه ومشاه لحد بره صعدو السيارة وخالة تبجي وتصيح يمه ابني عمت عيني عليك..

درت وجهي على بهاء وجهه صاير اصفر كركم.. عدنه نفاضه شوي جبيره وگزازهه قوي ماينكسر بالعجل..راكعهه براسه متكسره وشاگته..الحجي كام يصيح..
ابو مخلد : شفتي شسويتي بينه..خزيتيني بهاي شيباتي عساهه بيج..كومي..كوميييي .. كومي لمي ملابسج خنروح .. الرجال انشك راسه من وره اخوج المخبل..وانتي طيحتي مرته بمشكلة..انعل ابوكم لابو..لو ماخذيك ومخلصيني منك
ام مخلد : ليش تدعي على ولدك علمود ابن اختك.. شسويناله فوك ما متحملين تعياره..
مخلد : يمة لا تنكرين..الواحد يحجي الحق..الرجال مافك حلكه بكلمه ويانه..حتى ماكال شوكت تروحون..واني لكيت بيت بغير منطقة بس بعيدة..هاي صارت السالفة مال دنوة وماكتلكم .. انطيني مجال منا لباجر ارتب الوضع ونروح

الحجي كام على جوان كسرهه تكسر هو ويغلط.. ادبسز خزيتيني مابقيتيلي ذرة كرامة..انه هيج انطرد من وره هاي الشكول.. اشكال كال..لحدما اجه مخلد شالهه من جواه .. عاينت عليهه بطرف عيني ورحت للغرفة..بالكوة امشي اريد بس الكى التلفون اخاف خالة..ابني ومادري بي شلونه.. رجلي هم يروح مني..لكيت تلفون صگر ع الكومدي.. اخذت وخابرت على خالة..ماجاوبتني.. رجعت خابرت على اركان .. دك مرتين يله جاوبني..

دنوة : ااا..ابو فارس انه دنوة..
اركان : هلا خوية..كولي محتاجة شي..
دنوة : صگر شلونه..ضل بالي..
اركان : اخذته للمضمد..كال تلث خياطات براسه..
دنوة : يمه صدك تحجي..شلون شوكت يجي..
اركان : هسة ديكمل الخياط..ينطي ابره مهدئة ونجي..
دنوة : ماشي..انتبه علي فدوه..
اركان : ان شاء الله..

سديته ورحت تمددت..بطني توجعني من اقل حركة.. اذا اخذ نفس طويل تنغزني من مكان العملية..كمت ابجي بهدوء ماكو صوت بس دموعي تنزل..دقايق واجت سلمى
سلمى : حنروح باجر خية..اعتذر بمكان جوان الچلبة هاي .. ان شاء الله اضل اتواصل وياج علمود ايمن..
دنوة : متقصرين..
باستني من خدي وابتسمتلي..راحت مدري وين.. ضليت بالفراش انتظر شوكت يجون..گلبي تعب.. شوكت ارتاح لمن اموت لو شلون..

وره ساعة او اقل سمعت صوت صگر..گلبي ضل يدك سريع اريد اشوفه حبيبي اكيد متوجع بس مابيه اكوم.. شواي وسمعته يكول : ماريد يمة ماريد..
اجه راسه مشدود ببلاستر ودم قليل على رگبته وإذانه .. كعد يمي وايده على ايدي..
صگر : شلونج..خوما متوجعة..
دنوة : زينة..راسك شلونه..
صگر : لاتهتمين ابوية..باجر حيطلعون طبهم مرض..
عاينت بعيونه شلون ذبلانه وجفونه بالكوة فاتحهه من النعاس والتعب..كمت ابجي واحاجي..

لا تعوفني..ليش تعاركت وياه..مو كتلك لا تصير اعصاب.. هسة شلون..گلبي يم منو ..يمك لو يم ايمن.. انه ...
قاطعني : هسس كافي..لا تبجين..مابيه شي وغلاتج.. ايمن اروح ابات عنده بالليل وامي تروحله الظهر بين ما ارتاح واكلي شي..ويجي محمد بمكاني
دنوة : محمد..
صگر : اي يابة..خابرني بالصدفة..كتله انه بالمستشفى ودنوة جابت ..حجيتله.. كال عكبة جايك..
عاينت بعيونه وسكتت..تقرب باسني من خدي وكام
صگر : اروح اسبح واجيبلج اكل..
حركت راسي يعني اي..خله ومشى.. وره ساعة كمت على كيفي للحمام واحس بطني تتشك من الوجع..شكد حضل هيج مااتحمل.. رجعت للغرفة لكيته بالباب..
صگر : تعاي اكلي موزين عليج..
دنوة : بطني توجعني مااكدر..
صگر : انه اوكلج على كيف..

رحت وياه..وكلني.. جايب معلاگ وعصير بكلاص مبين هو مسوي مو هذا النشتري من بره..كمل وراح جان مغير ملابسه..بالباب سمعته يحاجي خالة..
صگر : ديري بالج عليهه..حروح اناملي شوي راسي حيطك
الحجية : روح يمة انه يمهه..
اجت يمي..انطتني دوه : ماليش خالة..
الحجية : الدكتورة كالت جرح العملية يتأخر يله يلم.. لازم تاخذ دوايات تخلي يلم بالعجل..هم نزفتي هواي..
دنوة : اوووف خالة..كليلي ليش هيج انه..يمة تعبت من المصايب..توني طالعة من عملية ادور رجلي انشك راسه .. انه من يا فگر جايه..
الحجية : لا حبيبة لاتكولين هيج على روحج..كله قضاء وقدر .. ربج يريد هيج بنتي..

صگر يصير زين بس يشوفكم كمتو على حيلكم..البارحة ماقبل ينام..كل ما اكعد اشوفه يغفي ويفز..يمة نام موزين عليك .. يكلي لا شلون اعوفهه بلكت كعدت خطية..
ابتسمت بتعب على حجيهه..
الحجية : شفتي شلون گلب البيت علمودج..والله يستاهلون .. ولو اخوي وهذا بنته بس تستاهل..مصختهه..عنده ولد يشتغلون عيارة هاي الكعدة يمنه.. انه دوختج خالة.. ارتاحي ونامي زين..بس تردين شي صيحيني مو بعيدة..
باستني من راسي وغطتني وطلعت..انه من التعب والالم غفيت كعدت المغرب خالة كالت راح للمستشفى..
بالليل كمت الوب من الوجع..حرت شسوي..مكان العملية يوجعني وراسي يدك طبل..خالة بقت وياي .. لحدما طر الفجر جان يدك التلفون..

راحت شالته..شواي واجت انطتنيا..
الحجية : هاج صگر يحاجيج..
اخذته منهه جاوبته بتعب : ها عيني..
صگر : هلا بيج ابوية..شلونج غاليتي ..متوجعة.. والله گلبي ماردني عليج..
دنوة : سلامة گلبك..شوي خف الالم..كبل ساعة جان قوي كلش..ايمن شلونه..انت شلونك ..راسك..
صگر : هياني واكف بره اشوفه واحاجيج..راسي زين لاتفكرين بيه دنيتي..
دنوة : صگر تعبانة..
صگر : انطيج راحتي لو بيدي والله.. تنهد وكال : نامي ياروح روحي موزين عليج..ايموني زين..

دنوة : ماشي..مع السلامة..
سديته وانطيته لخالة..كتلهه حنام..غطتني ونامت يمي من الجهة اللخ.. ثاني يوم كعدت الظهر لكيتهم محضرين الجنط كومة بالهول..سهى مبدلة نفنوف وكالون..شافتني ضحكت واجت تمشي حضنت رجلي..
سهى : عمة دودو شينيني (شيليني)..
ابتسمت وعاينتلهه : ولج وين اكدر..
اجت اسماء شالتهه وتعدل بنفنوفهه : الله يكومج بالسلامة حبيبتي..ازورج من ينور ايمن البيت..خليج قوية..
دنوة : الله يسلمج عيوني..
اجت سلمى همات سلمت علي..حتى اركان ومخلد.. بس الحجي والحجية ماشفتهم..بهاء عاينلي بطرف عينه وراح .. شكد كرهته لمن ضرب صگر..صدك الزين ماينراد هسة

جوان اجت يمي بالغرفة تحاجيني..
جوان : الله يكومه بالسلامة..خطية طفل..بس انتي لا..
دنوة : مااريد دعائج التافه مثلج..ابني حيصير زين عندي ايمان بالله..عوفيني و ولي..
جوان : سهلة..صگر طردنه علمودج..
دنوة : وشسويلج..اكلج انه راسي يسولفلي..روحي لا تندكين بيه..البيه مكفيني..
دتحجي جان تصيحهه امهه..عافتني وراحت.. بعد سلام وكلام طلعو كلهم..البيت هدأ الى درجة..هم طلعو وره نص ساعة دخل الحجي وائل جايب علاليك اكل
وائل : ها طلعو..
الحجية : اي..الله وياهم شردت اسويلهم..

وائل : اي..اكلج هذا ابنج منتهي..خابري خليرجع ينام .. انه اروح للطفل عود..جنت بالمستشفى..عيونه تك وتك فاتحهه.. ويحجي على كيفه بالكوه سمعته..
الحجية : اي سوده علي..الصبح من وكت خابرني كال يمة ابقي حاجيني ماريد انام..
وائل : ها شكلنه..دخابري خليرجع..هاي وصاني اجيب اكل لدنوة..اروح ابدل واروحله..كمشي..
راحت اخذتهن منه هي وتحاجيني : يمة تمشيلج شوي موزين بس كاعدة..
خليت ايدي ع الحايط وامشي خطوة خطوة..تأذيت ياربي ارحمني فدوه لاسمك.. تمشيت شوي وكعدت بالغرفة.. اجت جابتلي الاكل..انه واكل تذكرت صگر..حبيبي شكد تعبان ويضغط على روحه بكلشي..

بس مايريد يحسس المقابل ان هو تعبان لو بي شي..
سمعت صوت الباب يعني طلع..وره ساعة انه متمددة وشاده راسي بالشال..يوجعني..سمعت صوت صگر..گلبي طار من مكانه..ردت اكوم جان يفوت..
صگر : خليج لاتكومين..
سد الباب واجه تمدد يمي بس مبعد جسمه..بس راسه قريب من رگبتي وصدري..باسني من جتفي ويشم بشعري ورگبتي .. حسيت بشعور غريب..حسيته مايدري شديسوي .. مااعرف شلون شعور..تيهت..شافني قلقت وتململت
صگر : اذا ضوجتج اروح..
دنوة : لا خليك..بس شبيك..شنو مريض..

صگر : مابيه شي عيوني انتي..اريد اشمج متضايق.. يمج ارتاح..معليج مني..هسة اغفى وحدي..
سكتت..دقايق وحجيت : راسك شلون..رحت غيرت الضماد
صگر : بس اكعد اروح..هسه من التعب مدااحس بي.. رجلية مورمة فد دور..
دنوة : لا تخوفني عليك حباب..مابيه حيل..
صگر : لاتخافين يدنيتي..
سكتت ماجاوبته بعد..

مرت الايام نفس الشي..صگر مدد الاجازة مالته.. محمد اجه كام يوم هو يوم صگر..دورات الحجي.. حسب .. بس خالتي عرفت..خابرتني بالصدفة وحجينه..
خالتي : اشو صوتج تعبان..شبيج..
دنوة : غير جبت خالة..عملية..
خالتي : چا انه اخر من يعلم..حبيبتي سوده بوجهي حتى مااجيت وياج..تعذريني والله ماادري..
دنوة : معذورة خالة..هي صارت بالعجل..
خالتي : بعدج ماطبيتي بشهرج يعني..
دنوة : اي.. وحجيتلهه شصار..حجيتلهه وضع ايمن شنو
خالتي : هذا حظج شوكت يتعدل ماادري..حبيبتي خلي رجلج يروح لشغله وانه اجي ابات عنده..
دنوة : لا شلون مايصير..والبنات منو يبقى يمهن..
خالتي : قابل صغار..يعني فوك ما مااجيت وياج ترديني اعوفج هسة..لاتشيلين هم عيوني..

انه امج مو اگلج هيج من زمان..
دنوة : اي والله..شكد مشتاقه لحجيج خالة..
خالتي : انه همات مشتاقتلج حبيبة خالة..هسة يرجعون البنات من بيت دنيا واجيج..
دنوة : على راحتج.. سديته منهه وتمددت.. صدك وره ساعتين هيج اجتني..بوستني وخلت فلوس بيدي..ولو انه الدنيا كلهه طايحة من عيني..اريد بس اشوف ابني .. ورم گلبي على شوفته..منا صگر مريض والليلة اليبات بيهه بالبيت يبقى للصبح يون..رجله وراسه فد دور..اكلة روح للدكتور .. يكلي خليصير ايمن زين يله..يعاند..
راحت هي باتت عنده بهليوم..ضل الحال هيج .. محد اجة بعد بس يخابرون..

رحت للدكتورة شالت الخيط مالت العملية وانطتني مرهم علمود الاثر يروح..ايمن ضل بالمستشفى تلث اسابيع .. كل يوم بالليل اكعد ابجي علي..مااريد انحرم منه..اريد بس احضنه واشم ريحته..حتلو بنية هم جان نفس المعزة ويمكن اكثر.. صگر يخابرني يهدي بيه..ذبل اكثر مني من السهر والتعب.. يجي ينام ست او سبع ساعات والباقي يسهره..من عدا جم يوم يروح الحجي يمه لو خالتي فينام زين..

وره هلتلث اسابيع كاعدة بالغرفة بالليل ودك تلفوني.. شلته جان صگر : هلا عيني..
صگر : هلا بيج گلبي..شلونج..
دنوة : الحمدلله..اليوم احسن..دااتحسن يوم عن يوم..
صگر : يله شريد اكثر من هيج..انتبهي لنفسج..
دنوة : حاضر..ايمن محيطلع گلبي طك علي..
صگر : ها..بعد ماكالت شي الدكتورة..
دنوة : اوووف..شوكت بعد..خاف بي شي ومتريد تحجي
صگر : لا وغلاتج مابي شي..چنه ورد والله..
دنوة : يله اصبر شسوي..
صگر : يله نامي حبيبي تأخر الوكت..
دنوة : ماشي..تصبح على خير..
صگر : وانتي من اهله يگلبي..

سديته منه وتمددت..غمضت عيوني ودعيت من كل گلبي.. خسرت هواي مااريد اخسره..بقيت هيج لحدما غفيت وحدي .. فزيت الظهر على صوت بچي طفل يمي..حلم لو حقيقة مدااستوعب..شديصير..ادور اريد افتح عيوني وخايفة يطلع حلم..بعدين سمعت حس صگر..
صگر : دناوي..كومي حبيبي..جبت ايمن..
فتحت عيوني مامستوعبة..شفت خالة واكفة وعيونهه مدمعة والحجي ومحمد همات يمه..صگر واكف بسد الجرباية وشايله بيده يهمس يمه اشش باباتي هاي ماما.. فتحت ايدي وعيوني مدمعة من الموقف..خلاه بحضني ..

كمشت اصابع ايده الناعمة..لفهه على اصبعي عبالك عرفني .. حركته شوي بايدي وسكت.. عاينت على صگر .. طكيت بچي..انهاريت..مامصدكة روحي..شلون البارحة شبعت بچي علي..واليوم شفته جدامي وبحضني..اجه صگر حضني ومسح دموعي..
همس : هيانه يمج مو ردتي..عليش البجي..
دنوة : مامصدكة..صدك لو جذب..
صگر : ههههه..صدك وغلاتج..ماردت اگلج البارحة كلت اجيبه تشوفه اول ماتكعد احلى..
وائل : الحمدلله على سلامته وسلامتج..
دنوة : الله يسلمك خالو..
ابتسملي وراح..خالة اجت شالته وتحاجي صگر..

الحجية : يمة كبرت بإذانه..
صگر : اي حجية..
اندارلي وباسني من راسي : بعد ديري بالج على روحج.. ايمن واجه بحضنج شنو عذرج..
دنوة : انت هم ديربالك خوما بس انه..
صگر : تدلل ام ايمن..
ابتسمت بخجل..صرت ام..يمكن حسيت بشعور امي لمن صرت بين اديهه..اكيد فرحت .. مجانت تدري حيصير ببتهه هيج..شكد تعبت ياربي..بس عوضني بصگر وهسه ايمن

مرت الايام وخلص الاربعين مالتي..كدرت اتحرك وامشي طبيعي بس الدرج مااصعده..ضالة بغرفة خالة.. صگر نزل للواجب اسبوعين..بهلاسبوعين كل يوم يخابرني.. شلونج .. ايمن شلونه..خوما بعدهه توجعج..اجيبلج شي وياي.. كليلي شنو بنفسج..هيج يحاچيني.. راسه تحسن وشالوله الخياط .. بس بيومهه ضل الليل كله كاعد من الوجع..ع المهدئات والوقت صار زين..خالتي اجتني مرتين..علي ومرته همات اجو .. مرام خلت فلوس بگماط ايمن..تذكرت لمن خليت فلوس من جابت هي .. جوان كلتلي مستحيل تصيرين حامل بعد.. وهسه ابني بين اديه..

عبالك تحدتني بس ربي ماراد يفشلني..والحمدلله على كل حال..المهم هو زين هسة..كلشي هان وراح..

وره الاربعين نزل صگر من الواجب..شعره مخربط وطولان حيل هو ولحيته..بيومهه كمت انام فوك وايمن بكاروكة .. مايكعد بالليل بس مره وحده..اسويله حليب وينام..بس يچلب من يكعد لازم اخلي يمي..وانه لو علي طول الوكت اخلي ينام ع الجرباية وياي..طايرة بي حتى نسيت العملية والالم مالت ذاك اليوم..سمن شوي وجسمه ترس..خالة سبحته وره الاربعين انه خفت اكمشه..خاف يفلت من ايدي..ريحته صارت تجنن .. دخل الفرح لحياتي بشكل..حسيت اللون الرصاصي من حياتي لونه هو..مثل من اخذني صگر..جنت عايشة بظلمه وهو فاتلي مثل الضوه..هم سندي بهلدنيا..وخالة ماانسى فضلهه علي واهتمامهه بيه وبايمن..

كعدت الصبح على ايمن يغنغن..كمت لميت شعري وغسلت وجهي..تحسنت والالم كله راح..خلصت ورجعت للغرفة لكيت صگر متچي ايده ع الحايط ويعاينله هو ومبتسم .. اندارلي واجه يمي..باسني من راسي..
دنوة : شوكت اجيت..
صگر : صار نص ساعة..جنت جوه..
دنوة : ها اشو ماحسيت..الحمدلله على سلامتك..
صگر : الله يسلمج بنيتي..
ابتسمت ورحت يم ايمن فكيت الگماط والاعب اصابعة.. مبتسمة وفرحانة..مااعرف شوصف فرحتي..دقايق وانداريت على صگر لكيته نازع القمصله والقميص ومنتچي على باب الكنتور مبتسم علينه..

دنوة : شبيك صافن..
صگر : على حبايبي غير..شعندي غيركم..بس دااشوفج تحبي اكثر مني..شلون هيج..
ردت اضوجه.. : اي غير ابني..طبعا احبه..
صگر : چا وانه..خراعة خضره..
دنوة : لا انت ابوه..احبك على محبته يعني..
صگر : اي غزرت المداراة..اروح اسبح احسن..
ضحكت وكمت يمه..رفعت نفسي وحاوطته من رگبته : شبيك ضجت..دااشاقة..انت محد يجي بمعزتك وحبك عندي
صگر : لا تخلين گلبي يصافگ يولي..تعبان وخايف عليج
جاوبته بدلع واجر بالحچاية : ليش شبيه حبيبي..

صگر : اشتعل شيبه..غير اربعينج ..
دنوة : صارله عشر ايام من خلص..حتى سبحته لايموني .. مو انه..خالة سبحته..
حاوطني من خصري وقربني علي : نيمي من وكت عود
ابتسمت وبسته من رگبته بهدوء وابتعدت..شفته ضيع الدنيا ومابيهه..كمشني من ايدي قربني لصدره..راد يحجي .. سبقته : دااحس بيهن حتلو مااسمعهن..
صگر : اكول تره ضغطي حيفول..روحي خليني عايش..
دنوة : ها هيج..يعني اموتك انه..
صگر : انتي تموتين الدنيا بعيوني لمن تصيرين جدامي.. خاطر من اكلج دنيتي تصدكين..
دنوة : احبك..واحب هاي اللمعة بعيونك لمن تحجي..
صگر : غير انه وعيوني وگلبي نروح فدوه لهلملاك الواكف جدامي..

باسني من خدي وراح يسبح..كمت على ايمن غيرت ملابسه والكماط..سويتله حليب واشربه على كيفي لحدما شبع .. خليته على جتفي واطبطبله..
خلص اليوم عادي..بين طبخ وكعدة..علي اجه هو وبنته طيبة بالليل يمنه..ضل للعشرة ونص وراح..كمت اشوف ايمن .. لكيته يحرك بإدي ومغمض عيونه..اجيت وكفت يمه مديت ايدي لف اصابعه على اصبعي..هاي الحركة تحسسني بالامان .. تحسسني ان انه صدك صرت ام وعندي مسؤوليتين مو وحده .. صگر وهو..دنجت قريب منه ومبتسمة..حسيت ع الباب تنفتح وتنسد..اجه وكف يمي ..درت وجهي علي : يشبهك تره..
صگر : اي صحيح..
دنوة : شوف شلون احبك..حتى الطفل طلع عليك..

ابتسم وحضني من ظهري..همس : والله فرحان..بالواجب الضباط يكلولي خيرك شو وضعك مو تمام..كتله يمعود كله يروح فدوة..غير صرت اب.. واحد جندي جان واكف ليغاد كام يهلهل..
دنوة : ههههههه..يهلهل..
صگر : اي والله..الدورة التخرجت منهه كلهم تزوجو.. كل واحد عنده ثنين تلاثة..وانه اتانيج..مامحملج منية لا وعيونج.. بس ماتطيب روحي الا عندج يروح الروح..كلشي هان لمن اجن ايمن..تعب السنين راح بجيته..وانتي .. سكت وجر نفس طويل وياه شهكة : انتي بلسم ع الجرح بكل يوم..وثمرة سنيني الحبيتج بيهن..
ضليت مبتسمة واسمعه..ماادري شجاوب.. مو ذنبي ولا بيدي لمن حبني..حتى ماجنت ادري..

انتبهت علي نام..همست : نام..

ابتعد عني وابتسم ابتسامة خبيثة عبالك..راح تمدد وصاحني .. رحت يمه بس مو بنيتي ابقى..احس ماجاهزة .. كتله : صگر مو هسة..اريد اغير ملابسي..
صگر : خليج هيج..عاجبتني..
دنوة : كتلك لا..لاتعاندني..
صگر : لاتعبيني يولي..مشتاكلج وداعتج..
دنوة : اي اصبر شوي شبيك..
تلفوني جان بسده..مديت ايدي اخذه..كمشني حيل من فتحة الدشداشة انشكت من فوك.. شهكت وخزرته : هاي شنوو .. ماجاوبني..حسبني لحضنه ..
همس : بس تحسين روحج ماتكدرين كليلي..مااضغط عليج عيوني ودنيتي..

جاوبته بهمهمة بس..فتحلي ايده واجيت بحضنه.. خليت راسي على صدره متقصدة علمود اسمع دگاته..شواي وبعدني عنه..صرت جواه وهو فوكاي..
كام يعاين بعيوني ويحجي بحس يرجف : شلون كل ما اعاين بهلعيون اضيع الحچي..
دنوة : ليش تضيعه..
صگر : هو بس الحچي..حتى روحي..اكون اخر نظراتي كبل لا اموت تصير بعيونج..
بحركة لا ارادية خليت ايدي على حلگه..همست : لاتكول هيج .. من عمري على عمرك بس مايصيرلك شي..

كمش ايدي يشمهه ومغمض عيونه..باسهه وتقرب باسني من شفايفي..مشتاقتله ومشتاقه للهفته لمن نصير سوه.. حاوطته من رگبته وقربته علي..انفاسه مو منتظمة.. حسه يرجف .. همست : بيك شي..
بتعب وانفاس سريعة : هااا..لا مابيه..معليج مني..
سكتت بس بالي يمه..مو طبيعي.. خلص وابتعد ..انتچى ع التاج وصدره يصعد وينزل بشكل سريع..جريت الچرچف تلفلت بي : ليش هيج..شبيك مريض..
صگر : ماادري..ماصايرلي هيج كبل..
دنوة : شوف شلون مدتكدر حتى تحجي..خلاخذك للدكتور باجر..بلكت بيك شي اسم الله..
صگر : لا لا..مااروح..تعاي يله..

اجيت بحضنه..حضني وشاد علي..انفاسه ضلت نص ساعة اذا مو اكثر هيج ترجف..ماكدر ينام وانه بعد ماكدرت.. لحدما طلع الفجر كعد ايمن يبجي..كمت لبست بالعجل ورحت يمه .. دخت كام يبجي بصوت عالي..اريد اسكته.. كام صگر اجه يم الميزتواليت خاله علي حليبه والممة..
صگر : شكد اخليله..
دنوة : لا لاتعب روحك..هو انت تحتاج راحة..
صگر : يله قابل شمسوي..كليلي..
علمته..سواهه وانطانياهه..اخذته بحضني ع الجرباية شربتهيا بين ما غفى..صگر كاعد يمي ويعاينله.. اخذه خلاه بكاروكة بس مابچى..متدلل علي..طفى الضوه واجه حضني .. انفاسه استعدلت الحمدلله..بس ضلت ببالي.. لازم اقنعه يروح ولو يحتاجلي شهور..بس ححاول..

مر شهرين ماكو شي..صگر نفس الضيق بالنفس يصيرله بكل مره نصير سوه..شكد حجيت علي..روح دكتور.. انه اروح وياك بس روح..موزين انطي مفكة لروحك..مايقبل.. يكلي مابيه شي شيريد يسويلي الدكتور..

وره هلشهرين كاعدة بالهول وي خالة..دك تلفوني .. منو .. خالة ابتسام..گلبي لعب..شعجب تذكرتني..اخر مره خابرتني لمن طلع ايمن من المستشفى..شلته ارد اعرف شبيهه وصوت بچي وصياح يمهه..
ابتسام : دنوة..تسمعيني..
دنوة : اي خالة..شبيج خوفتيني وين انتي..
ابتسام : ماادري شلون اكلج يخالة..بس جدج مات..
گلبي وكف من كلماتهه..مااعرف شجاوب انصدمت .. ضلت تكول دنوة تسمعيني..خالة..وانه بصدمة اخر شي انقفل الخط.. اجت خالة تحاجيني..

الحجية : يمة شبيج صفنتي..منو ع التلفون..
عاينت عليهه..تذكرت لمن جانت تجي شلون جدي يگلب البيت گلاب..يكول بتنه هاي مو غريبة..حضرولهه احسن اكل.. طكيت بچي ..كمت اتأتئ : خالة..جدو..
الحجية : اسم الله ياستار..غير تفكهه وتحجي..
دنوة : جدو مات خالة..
الحجية : صخام ..شلون الله يرحمه..
هو بإعتبار يصير عمهه..كامت تبجي..حضنتني وتهدي بيه .. الموقف وكف شعر راسي..ذاك اليوم لمن طلع ايمن اجاني للبيت خلاله فلوس وباسني من راسي..كال شبالعجل كبرتي يدنوة .. جنت اگودج بالحلال اكلج روحي ركضي وانتي تستحين .. هسة صار طفل بين اديج..

ضليت بحضنهه ابچي وارجف..مدااصدك.. شلون عفية .. ليش هاي چي فرحت ماكو مشاكل..حتى انت رحت..
مااعرف شكد ضليت ابجي بس فزيت على صوت مفاتيح السيارة مال صگر..
صگر : حجية حروح لبيت جدي..
دنوة : اصبر لاتروح..خلاجي وياك..
الحجية : يمة انه همات..فشلة مانروح وهو بعده بأول يوم..
صگر : اذا اخذتكم مانرجع الا وره الفاتحة..ايمن ينمرد
دنوة : اخلي يم خالتي..بس اخذني..
صگر : كومي بالعجل..
صعدت فوك ركض..گلبي يدك سريع ودموعي ترست عيوني وخدودي..مامصدكة..

ليش هيج يالله..صحيح طردني بس كله بسبب شذى .. ليش مو شذى..ليش هو..گلبي يعصرني وي كل كلمة تجي على بالي..لبست دشداشة سوده وبدلت..ادور حضرت ملابس وحليب وحفاظات لايمن..اول مره حفارگة وانام بدونه.. شلته واخذت جنطته ونزلت..خالة مكمله بس اخذنه وطلعنه.. انه الطريق كله ابچي..عشت وياه طفولتي ومراهقتي.. جان لمن ابوي يكلي بطلي هو يگله احنه مو همج خاطر نبطل البت.. خلهه تكمل دراستهه..العصرية بالنوادر ماعنده شي يجي يصيحني..يكلي مااحب اسولف بس وياج من بين حفيداتي كلهن..اكلة ليش..يكلي مسكينة وحتتعبين بحياتج..

هو انه تذكرت هاي الحجاية وفحطت..صگر يهدي بيه وخالة ماكو ميفيد..تهسترت..اريد اروح هناك اريد ارتاح.. اريد ازور گبره مااريد انحرم منه مثل ابوي تالي ضلت الحسرة بگلبي من ٢٠٠٧ لحد هسه..اصبر روحي بالچذب..
وصلنه لبيت خالتي..نزلت خليت ايمن عدهه كتلهه ما اتأخر .. حجيتلهه على وفاة جدي..كالت اخذي راحتج شكد ماتريدين ابقي..انه حدير بالي علي..
تشكرت منهه ورجعت..بس وصلنه للديرة لكيتهه مگلوبة گلاب .. سيارات وهوسة موطبيعية..صگر طبك بره ونزلنه.. الچادر منصوب وزلم قيامة الله بره..
اندارلي يحاجيني : فوتي من وره البيت..انه بره..

حركت راسي يعني اي ورحت انه وخالة..ماانتبهت منو اكو .. كبل طبيت..اول مادخلت وشفت البيت تذكرت كلشي.. كله على حطته..تذكرت لمن ابوي جان يضربني يجي هو يگومه مني .. يكلة لا تمد ايدك عليهه جدامي..هاي بنتي..
عيوني غوركت كمت اشوف غواش..حسيت على صوت سرور ونوارة يمي..بس شفت نوارة طكيت بچي.. حضنتهه وابجي من كل گلبي..حسيتني رجعت لمن جان عمري ١٠.. لمن وعيت على ابوي والضرب مالته..جان هو يجي يدافعلي.. يسحبني منه يخليني وراه..بعد منو يطخني اذا صرت جوه جناحه .. يكلة لا تمد ايدك عليهه..هاي بنتي اكثر مما بنتك.. ياخذني للحلال ويوكلني..يكلي انتي بس اشريلي وشتردين اسويلج .. كلشي مريت بي صار جدامي..

شلون صار جوه التراب..گلبي ينغزني چن سجاجين بي.. ابتعدت عنهه وعيوني كوه اشوف بيهن..
نوارة بتعب : شلونج انتي..ابنج..
دنوة : زينين كلنه..
لحظات واجت خالة ابتسام..سلمت عليهه وبچيت بحضنهه .. ايدي كامت ترجف..من اقل موقف تصير هيج..خالة اجت هدتني هي ادرى بحالتي..شفت الكل بحالة مزرية.. جديتي تبجي چنهه طفل..كعدت يمهه بستهه واحاجيهه..
دنوة : الله يرحمه جدة..
الحجية غادة : ولج شلون انساه..عشرة عمر وحب الدهر.. عبالك ذاك اليوم لمن اجه صوبي مقهور چي ابوه توفى.. مو كافي خسرت وليدي ادور عزوتي وخيمتي..

معرفت اجاوبهه..بس حضنتهه كامت تبجي وتشهگ.. كسرت گلبي..فوك الستين سنة متزوجين..حقهه.. شواي وصاحت راسي حيطك ..حسيت على ايد دفعتني من چتفي
فاطمة : كومي عنهه..جاية تنعين يمهه خاطر تكوم تبجي ويصعد ضغطهه..اي هو انتي شيجي وراح غير الفگر.. مو خلصنه منج شعندج رجعتي..
مسحت دموعهه وكمت : لاطلعيلي لسانج الاطول منج.. انه ماكلت شي..هي حزنانة علي انه شكو..
رادت تحجي وقاطعتهه : اكرميني بسكوتج..ماعندي حچاية وياج.. عفتهه ورحت للمطبخ..

مكلوب گلاب..الدنيا كلهه جاية .. هاي العدهه جهال وهاي الجاية وحدهه..مطبخنه كلش جبير..يكفيهم وزايد بس هو هوسة..اكو ناس عرفتهم واكو لا..كلهه بچت علي.. اله سمعته وزيناته وي كل واحد بهلمنطقة.. شيخ بعد ..ياهو العنده مشكلة ماتنحل يجي علي..
خالة ابتسام مابيهه ذاك الحيل..بس هاي مرة عمي لواء فاطمة گوية بس ماتشتغل..مااريدهه تحملنه منية..فانه كمت اشتغل سويت الحشوة مالت البرياني..خو الچاي صار اكثر من اربع قواري..التمن وره البيت جايبين گوزان وجداري كبار كلش .. انه سويته والباقي على سرور والباقيات..ردت ابزله جان تجي اخت جدي..گوية بعدهه بحيلهه مامتزوجة
- : جيبي انه ابزله لاتحترگين..

دنوة : خاف ماتكدرين جدة..
- : لا ودية ليش مااگدر..بس وخري شوي..
وخرت عنهه..اجت مرة عمي فيصل وياهه بزلوه واجيت كملته .. انه من الاجواء والبچي ماالحك على دموعي.. صدك ساعات تقبض الگلب..تخيلت ابوي من مات هيج سووله وهيج جانت الاجواء وانه ماكو..بنته الجبيرة ماكو..وماداريه الا وره يومين .. فوك القهرة قهرتين..كمت ابچي على جدي وابوي..
صگر ماشفته من الصبح لحدما بالليل طلعنه الفراشات كلهه فرشناهه بالمضيف الثاني..الجبير صار للزلم..اكو منهم بات واكو كالو نجي باجر..

بالليل نظفنه المطبخ انه والبنات ورحنه فوك لغرفة نوارة.. بس خليت راسي تذكرت ايموني..حبيبي شصار بي اليوم.. عاينت للساعة بالدعش ونص..كمت جبت التلفون خابرت خالتي .. ها خالة شلونج..
خالتي : هلا بيج عيني..والله الحمدلله..انتي شلونج .. ضل بالي بس كلت مااخابرهه خطية مشغولة..
دنوة : اي والله..التهيت نسيت كلشي..ايمن شلونه..
خالتي : هستوه نام..علواه تبقي يمي بعد..
دنوة : يله اجيبلجيا بين فترة وفترة..لازم حبيتي..
خالتي : يونس يخالة..حبوبي يجنن..يشبه رجلج..
دنوة : اي حتى انه كلت..يله خالة اروح انام نعسانة بس ردت اشوفه شلونه..
خالتي : على راحتج عيوني..تصبحين على خير..
دنوة : وانتي من اهله..

سديته ونمت..بقيت عدهم لحد السبعة..صگر شفته مرتين مدري تلاثة..اجه ياخذ الچايات واشوفه يلهث .. مايكدر يتنفس اخذته على صفحة احاجي : شبيك بس احجي والله گلبي عليك..مريض نروح للدكتور..
صگر : بس خلتخلص السبعة واروح..رجلي مورمة ومختنگ .. مدااكدر اتنفس..اكلج اذا وكفت ادوخ احس الدنيا تفتر بيه
دنوة : يبوو مو كتلك اخذك للدكتور انت ليش تعاند.. يعني حلو هيج..
رفع البنطرون..شهكت للسما : عززززه بعيني عزه.. هاي شنو ليش هيج صگر..
صگر : كتلج مورمة..
عيوني دمعت..متحمل كل هذا وساكت..

صگر : لاتبجين..روحي يمهم انه باجر تخلص السبعة واروح وعد..اخذج وياي عود..
حركت راسي يعني اي ورحت..بس گلبي يلعب مامرتاح.. بداية چف رجلة مورم..ورجله همات..

كعدت احسن دقيقة دقيقة بس اريد تخلص السبعة واخذه للدكتور متت خوف علي..كلما اشوفه لو يلهث لو خال ايده على صدره يكلي صدري ضاق علي..ومايقبل يرتاح تعبني.. منا ايمن بعيد اشتاقيتله..
اليوم خلصت السبعة بالليل والاغلبيه طلعو..بقو بس كرايبنه .. سرور اجه رجلهه اخذهه ونوارة همات..فنظفت المطبخ وطلعت .. شواي وگبت العيطة..ارد اعرف شكو.. بس اسمع خالة تصيح.....

يتبـــــــــــــــــــع.......................

شلونكم؟ مشتاقتلكم نفر نفر واللهي، اعتذر ع التأخير الطويل بس كنت جدا مريضة لدرجة تركت التلفون ، قبل يومين بلشت اكتب ومتوترة جدا ، اجيت ع التعليقات مالتكم انصدمت ، بيكم اليغلط والي يكول القصة انتهت بس الكاتبة تبيع ثگل علينا ..

واني قسما كتبت تعليق كتلكم نشرته بالغلط كنت بعدني نصه ماكاتبه فاكيد اتأخر ..

عموما ..ماحبيت ارد ع التعليقات اليغلطون بيها عليه لأن كالعادة اطلع المذومة فوعدت نفسي ان أي تعليق خارج الاستفسار عن القصة ماارد علي واتمنى تعذروني يعني ، تكفيا للمشاكل ..

وشكرا لكل السألوا عني ، احبكم💙.