رواية اسألي عني الليالي الفصل الستون 60 - بقلم رقية جاسم

يا حلو واحلى من الحلو واكثر بعد ..
لحصدلك شعاع الشمس ..
وانذرلك وشاح الگمر شدة ورد ..

قناة التليگرام

حساب الانستگرام

الـبـارت الـتاسع والخمسون...................

*اعتذر ع التأخير بس نت ماعندي اليوم يلا كملته .. بارت طويل تعويضا عن ايام الانقطاع ..

نزلت وراه اشوفه..حضنه وشاد علي بكل قوته..ومحمد همات .. شكد حلوين الاخوان..محمد باسه من راسه..تفاجئت
محمد : شكد متغير خوية..تعذرني ما كدرت اجي اشوفك
صگر : يوصلني سلامك من امي اكعد لا تهتم.. والله مشتاك لشوفتك..شلونك مرتاح..
كعدو يحجون عن حياته لمن راح لاربيل ووين ديشتغل.. كال صديقي عنده معرض سيارات وانه اشتغل وياه..
محمد : كاكا انه اجيتك بشغلة..
صگر : هههههههه..اكول ارسى على بر..لو كردي لو بصراوي .. بس يله كول..
محمد : والله اريد اخطب..ومستحي من الجماعة..

صگر : هااه..خير ان شاء الله..منو هاي..
محمد : احجيهه طك بطك..بنية احبهه من زمان..صار كومة ااجل بالسالفة..من يوم سافرت لاربيل ولحد هسة.. بعد ما بيهه مجال..كلت ارجع للبصرة..منهه اشوفك ومنهه اريدك تجي وياي اخطبهه..
صگر : مابيهه شي..تدري بوضعك هي..
محمد : اي تدري..ومرهمين كلشي بس نخطب..
صگر : هي منين..
محمد : بغداد العامرية..
صگر : يله سهلة..جم يوم وادز امي هي ودنوة .. شوف عمتك سناء هم لو اخلاص اذا كدرت..
محمد : متقصر والله..بالبداية ترددت..كلت وين حيقبل يعاين بوجهي وره السالفة هذيج..

صگر : راحت وكضت..لا تضل تفكر بيهه..بس مكانك مو بالبصرة بعد..
محمد : والله تريد الصدك..مرتاح هناك..تعال وشوف الكعدة والجو..هاي كل اسبوعين اطلع وي جماعتي ماكو مكان ما فريته..اذا اخذهه هناك تكيف اكيد..
صگر : ها كاكا شبسرعة اندمجت..
الكل ضحك حتى هو حجاهه وضحك..ضلو كاعدين لحد ما اجو الولد والحجي..اكلوه بالسلام والكلام..جي ما شايفي صار هواي..هو سوالفه تنحب وجهه بشوش يعني ملامحه مريحة.. عكس صگر .. صگر عكس الكل بكلشي.. ملامح حادة اذا خزر احد يخنسه..يمكن هاي احلى شي بي.. احسهه ضايفتله جاذبية وجمال فوك جماله..كل ما اعاينله اتذكر كلام خالة..

تكول يشبه حامد ابوه..صار عندي فضول اشوفه..شوف باجر لو بالليل اكللهه تشوفني صورهم القديمة..
العشه ما سويناه..صگر طلع هو ومخلد جابو من بره .. عاد انه كمت ادلل علي..اجاني للمطبخ يحاجيني..
صگر : حبيبي حطلع اجيب عشه..تريدين شي..
دنوة : والله..اممم..ما ادري مشتهية اكلات ومقبلات .. يعني هواي بس خاف اشوفهن وتلعب نفسي..
صگر : عود انه اكلهن..كليلي شمشتهية..
دنوة : ههههه..جيبلي كص .. واريده بلفة زينة مو هيج.. وجيبلي مقبلات طيبة على ذوقك شكلهه..وشنو .. اريد ببسي هماتين..وبس ..سلامتك بعد..
راح وكف يم باب المطبخ وتجى ايده عليهه : انه اكول لو اجيبلج المحل واجي احسن..

دنوة : اي تصدك انه هم فكرت هيج..
ضحك هو ويعدل بشعره : يله تدللين عيوني الج..
ابتسملي وراح.. دقايق وفاتت جوان ..شكلهه مثل توم بتوم وجيري لمن يصير عصبي ووجهه احمر.. ضحكت بداخلي ودرت وجهي..اجت يمي تحاجيني..
جوان : راح اجي وياكم بالمشية..
دنوة : هله بيج..شعليه..
جوان : اي هو صگر لح علي..كال لازم تروحين..
دنوة : هاا..ليش منو انتي مثلا..
جوان : اني..اني الحاخذه منج بس صبرج عليه..
اشرتلهه بيدي بإستهزاء : يله روحي من خلقتي رجاءً .. ما اريد لعبان نفس وانه حامل يعني تدرين بيه اخاف يطلع شي بالطفل منو يفيدني ..حضرتج..

جوان : هو انتي عاكر منين صرتي حامل..الا ما تطلع جذبة من يمج علمود ما يعوفج..
طلعت ماعون كاستر ورحت كعدت ع الميز احاجيهه بكل برود : انتي شمفتهمة الزواج..خلفت وجبت بعدين خلفت وجبت .. هاي عود انتي الجبيرة المفروض تعرفين شنو قيمة الزواج .. ثم صگر يحبني..بالطفل او بدونه..خاف ما تدرين تعاي احجيلج خاطر يبرد گلبج..شوفي الصراحة هو يحبني لمن جنت بالسادس ابتدائي..
فكت عينهه متفاجئة ..كملت كلامي : اي عيني.. شايف صورتي يم امه ومنعجب بيه..بعدين شافني لمن صرت بالسادس اعدادي..يعني ما بطل يحبني حتى وهو ما شايفني تجين انتيييي..بيوم وليلة تخلي يهجرني.. كلنه نحلم.. بس مو كلنه احلامنه تتحقق..

روحي عيشي واقعج احسلج من الاوهام وحرگان الگلب على شي ما موجود ولا حيكون موجود..
عاينت علي ودموعهه بعينهه..عافتني وراحت.. احسن .. خلتخلي روحهه بمكاني وتعرف شكد شعور مزعج ان تشوف بنية تحب رجلهه..شكد حاولت..هي واخلاص.. اخلاص اخته وهم رادته يعوفني..حتى جلنار..بس ما يكدرون.. اقصى شي صار جر اذني وبوكتهه زعلت شهرين الا.. لو ابوي بمكانه او اي شخص ثاني ما يهمني..بس هو علمني ع الاحترام والرأي المتبادل..بعدين اجه جر اذني على شي ما مسويته .. فحزت بخاطري..بس راحت وصارت ماضي الحمدلله..
كملت وكمت كعدت بالهول يم محمد..جانو ملتهين وانه وياه نسولف : اي..هي نفسهه شوفتني صورتهه كبل..
محمد : اي ولج هي..يابوية صار كومة ما شايفهه..

اريد تصير المشية بالعجل علمود اشوفهه..
دنوة : اي عيني ليش لا..يله ما متأخرين صبرك علينه..
كام يضحك وكمل سوالفه بين ما اجه صگر..صبينه الاكل وكعدنه ناكل عادي..
وره يومين خالة خابرت عمة سناء اتفقو شوكت تجيهه وهناك نبات عند اخوهه ابو جمال بس ليلة والصبح نرجع.. هي اخلاص من بغداد تجينه..ما تجي للبصرة..
بالليل صعدت نظفت المطبخ وغسلت المواعين وصعدت فوك انام..لكيت صگر كاعد بدون فانيلة يدخن..هذا ولا يبرد .. عودك الجو بارد مو مال هيج كعدات..سديت الباب ورحت كعدت احاجي : عيني ما بردان..كوم البس..
صگر : لا مستحر اصلا..
دنوة : دا احسك تعاند مدري ليش..

ابتسم ودنج ع الجداحة يورث الجكارة..هيج يصغر عيونه ويسحب نفس يصير جذاب بشكل..رفع راسه شافني صافنة علي..غمزلي ..
بخجل : شو تغمز شصاير..
اجه كعد يمي..كمش الجكارة بيده وطبع بوسة على رگبتي .. ذوبني ..دقايق وابتعد عني..
صگر : كومي ع المرايه شوفي..
انه صرت مطفية فد دور..حتى ما اعرف اجاوب ..كتله : ها .. شنو ليش..
حط الجكارة بحلكة وابتسم..كمت اشوف..لحظات ودرت وجهي علي وشهكت : هاي شمسوي..هسة شلون انزل باجر
صگر : لبسي شال عادي..
دنوة : عود شنو معناهه..

صگر : غير احبج يولي..تعاي هنا..
حجاهه هو ويطفي الجكارة بالنفاضه..اجيت يمه حضني ورجع باسني من نفس المكان.. حاوطته من رگبته ورحنه بغير عالم.. ثاني يوم كعدت سبحت وبدلت..اخذت ملابس قطعة وحده علمود النومة بالليل..عمة سناء جانت جاية..نزلت سلمت عليهه باركتلي ع الحمل..كالت حليانة وكبرانة..هاي ياهو اليشوفني يكلي هيج..صگر جان عنده دوام اصلا فاخذنه ورحنه لبغداد..هو منسم ع الاخير مدري شكو.. فاتح اغاني .. يعدل بالمرايه ويغمزلي..شوكت ما ارفع راسي اشوفه يعاينلي ابتسم بخجل وادنج..جوان اجت ويانه مدري شكو منبصة روحهه ..ماتت من تصرفات صگر..هو عبالك بالعناد يسوي هيج .. عمة انتبهت علينه..
سناء : بعد عمتك التهي بالدرب لا تدعمنه..

صگر : ليش عمة شمسوي..غير هاي بت اخوج لاهيتني .. انه رجال عيني ع الدرب لا منا ولا منا..
دنوة : يااااه..ها انذبت براسي..يله مقبولة..
صگر : ها شفتيهه شتكول..يعني حجيي صحيح..
الحجية : ديله عساس ما نعرفك ..
حجتهه واندارتلي هي وتضحك..يابة الحب واضح بعيونه ما يكدر يضم..كلهه تدري بي يحبني..وخالة اكثر شي.. بعد هي امه وتعرفه زين..
مشى الوكت لحد ما وصلنه..هو نزل ويانه تقريب الربع ساعة وكام يريد يروح..كال تأخرت .. رحت وراه اسد الباب.. كتله : عينك ع الدرب عود..
صگر : هههههه..غير تدلل اميرتي..بالج على نفسج..
باسني من راسي وراح..
طبيت كعدت وياهم..وره الغده اندكت الباب..

طلعت افتحهه صارت اخلاص بوجهي..سلمت علي من وره خشمهه وطبت..
انه بس اكلت رحت نمت..مابيه بعد..اصلا البارحة بقينه سهرانين انه وصگر فنعست.. كعدت العصر على صوت عمة
سناء : يله عمة كومي..هم يالله نروح..
كمت بدلت وطلعنه..الحجي ابو جمال وصلنه..طبعا محمد يمكن خمس مرات خابرني..ها وين وصلتو.. ها دخلتو لو بعد.. خبصني..بس حبيت تصرفه..شكد يحبهه..كتله احنه من نوصل اكلك وصلنه لا تضل تسأل..
عاد لمن وصلنه بالباب خابرته..
محمد : ها يولي..
دنوة : وصلنه..بس نطلع اكلك عود..
محمد : شيصبرني..يله امري لالله..

ودعته وسديته..شواي وطلعت بنية صغيرة..مبينه بالاول او ثاني متوسط..كالت فوتو..شكلهم يدرون حيجون خطابة على بتهم..بيتهم صغير مقارنة ببيتنه بالبصرة..ولو ما قاصر .. بس مرتب بشكل..كعدنه بهول جبير..دقايق وفاتت مره جبيرة تطلع بكد خالة..نفس ستايلهه..تلبس تنورة وقميص طويل .. حاطه شال ووراهه بنية لخ كامشة صينية بيهه كلاصات عصير .. قدمتلنه وراحت..حجو طبيعي بالبداية ..كإن جوارين .. بعدين خالة فتحت الموضوع..
الحجية : والله يا ام كريم احنه جاييكم نخطب..
ام كريم : هله بيكم عيوني..المن تخطبون..
الحجية : بتكم روزة..
ام كريم : ع الخير..
صاحت : روزة تعاي ماما..

دقايق وفاتت..بنطرون وقميص كصير .. شال ماكو بس الشعر كاريه ملامحهه حلوة ..عيونهه سود وشفايفهه متروسة.. يعني حبيت شكلهه..اجت سلمت علينه ومبتسمة.. صوتهه وتصرفاتهه كلش نازكة..
ام كريم : هاي بنتي..
الحجية : ما شاء الله..الله يحفظهه..حماتي ام حمد .. وأشرت على عمة سناء ..جايه لبغداد وشايفتهه..فسألت عنهه وكالو هذا بيتهه..احنه من البصرة..ابني يشتغل ومكمل كلية لغات فارسي..بس نكللكمياهه من هسة..هو ساكن باربيل مو عدنه ..
ام كريم : ان شاء الله نسأل عنكم ونردلكم خبر .. حوالي تلث ايام اربعة..علمود تصير مشية الزلم..
الحجية : ان شاء الله ..ننتظر ردكم..

بقينه كاعدين تقريب النص ساعة بعدين طلعنه.. تمشينه بالشارع شواي بعدين خالة خابرت الحجي اجه اخذنه ورجعنه .. خطية الرجال شالنه بالصلوات .. يا اكل يا فواكه .. ما قصر لحد ما بالليل وره العشه كمت للغرفة ابدل.. تذكرت محمد..نسيت اخابره .. بدلت ولبست الشال وخابرته .. اول دكتين وجاوب..
محمد : يمعووده..وينج..صار شكد انتظر اكول خاف كاعدين ادور اخابر وتتفشل جدامهم..
دنوة : لا صار هواي من رجعنه..بس التهيت خوما اعوفهم واجي اخابر..هسة فضيت وخابرتك..
محمد : هااا..ديله جا خوش..كليلي شصار..
كلت خلالعب على اعصابه شوي : ها..ما صار شي .. شكلهم ما مقتنعين..امهه ضاجت من جيتنه..

فلا تخلي املك بيهه..ع الاكثر ما ينطونهه..
محمد : صدك جذب..جا صارلي سنين انتظر بعدين ايدي والكع..شوفي لا تلعبين بأعصابي..كليلي شصار.. اهو والله يصير بيه شي من القهر..
دنوة : ديله عيني شدعواك..الف وحده تتمناك..
محمد : لا انه اريد هاي الوحدة من الالف..
دنوة : ههههه..زين زين..امهه رحبت بينه وضيفونه يعني ناس حبابين..وهي روزة عيني تخبل ونازكة..كالت نسأل عنكم بحدود الاربع ايام ونردلكم خبر علمود المشية..
محمد : ايييي الله يبشرج بالخير..
دنوة : صدك اكلك ذكرتني..خالة كلتلهه ابنه ما عايش ويانه .. كاعد بأربيل..اشو ما سألت ليش..
محمد : انه مفهمهه كلشي..وهي حاجيه لأمهه..

موضوعي محد يدري بي..هسة اذا سألوا عني بالبصرة ما يكولون الا الزين..وتدرين بسمعة صگر شلونهه..
دنوة : يعني تدري .. خوش ..زين تسوي..
محمد : اي يابة غير احبهه صار سنين..خوما اضيعهه مني .. بعدين انه ما علي شي..كاعد وساكت.. عفت السوالف هاي .. هسة تصير عندي عائلة التهي بعد..
دنوة : على كولتك..
محمد : يله عيني اروح انه..
دنوة : على راحتك..
ودعته وسديته..اخلاص اجه رجلهه عليهه..ما قبل تبات.. ابنهه بقى هناك يم بيبيته ما جابته..عاد صفينه انه وجوان الحبابة .. كل شوي تريد تنغزني واغلس..خليتهه بحسرة الكلمة مني .. عبالهه الساحة ساحتك والعب اليعجبك..

لو جايتني كبل تلث اربع سنين جان كدرت تسوي تغيير.. تضوجني لو تخليني ابجي..الواحد لازم يتغير ويصير قوي .. مثل ما يكول صگر..الضعيف ينوكل..
الحجي بالليل خابر واحد يعرفه علمود يوصلنه..فكعدنه الصبح من وكت اجانه السايق..انه بس صعدت السيارة نمت .. شلون طبع هذا..بس طريق سوريا ما نمت بي.. ولا غفالي جفن.. من التوتر والخوف الجنت عايشته..كل ما اتذكر هذيج الايام اكول شلون عشتهن ووصلت لهنا..وبكل مره اكول الحمدلله كلشي صار وراح ..
كبل لا نوصل للبيت بدقايق كعدت..عمة سناء موصليهه للبيت باقين بس احنه.. نزلت اول وحده وجوان وراي..بس دكيت الباب طلعلي مخلد جر جوان من شعرهه ودخلهه جوه.. ضليت صافنة ..متفاجئة من الموقف.. يصيح ويفشر عليهه ما متفهمين شكو..حتى هي..

خالة صاحت : عمة على كيفك شمسويه البنية..
ما جاوبهه..سديت الباب وطبينه..هذا مخلد مخبل مال كتل .. جنزهه وهي حتى ما تعرف شديصير..كلنه متفاجئين .. خالة وشهد يردون تفك بي وما ينفك..ادور الولد طالعين.. حتى الحجي..تصيح وتستريح .. قهرتني ..خالة راحت علي دفعته عنهه وكومتهه..
الحجية : صدك ما تستحي انت..شلون اطكهه هيج.. ماكو غيرة..ماكو اصول واحترام..
مخلد : اخذيهه من كدامي لا قسما بالله اسويهه وصلتين واذبهه بالشارع حالهه حال الجلب..
الحجية : لا واللهههه..خوش سالوفة هاي..شوف اكلك.. لا تغلط عليهه..مثل بنتي هاي..شمسويتلك وتسويلهه هيج..
مخلد : اني اكول لا تعرفين شمسويه احسلج..

وهسة بس تعوفيهه اني اعرف شلون اتصرف وياهه.. اليوم اطلعلج جلد جديد..بس انطيني مفكة..
الحجية : عيني ام مخلد ما تجين على وليدج هذا ما ادري شبي تخبل ع البنية..شمسويتله غير نفتهم..
اجت على وان حضنتهه وتمسح على شعرهه : انتي تعرفين شي واحنه نعرف شي..بس ياريت الحجي ما يوصل للحجي ولا لأحد ثاني..امشي يمة..
اخذتهه وراحت..ضلينه واحد صافن ع اللاخ..خطية خالة فشلت..عود جاية تفاكك تريد تفتهم شكو ادور محد يحجي .. شهد عافتنه وراحت..هي واسماء..سلمى جان واكفة ع الدرج بس شافتهم راحو صعدت.. رحت وكفت يمهه : خالة شبيهم هذول..
الحجية : حالي من حالج..شمعرفني اشو تسودنو..

دنوة : خالة معليج بعد لا تدخلين..يمكن ما يريدون يحجون .. شي صاير بيناتهم..
الحجية : هو هم هيج..اروح انام نعسانة..عود كولي لسلمى تسوي غده لو انتي سوي اذا ما نعسانة..
دنوة : ماشي خالة..
عافتني وراحت..اخذت الجنطة وصعدت..بس بدلت ورحت لغرفة سلمى..لكيتهه دتغير ملابس فراس ابنهه..
رحت كعدت يمهه احاجيهه : اكلج شصاير..ليش كتلهه ..
سلمى : خليهه سكتة..
دنوة : يا..شكو غير تحجين..
سلمى : من البارحة مخبوصين..هذا مخلد راد يجي لبغداد البارحة بالليل..بالكوة لزمة اركان..باعي اسولفلج بس لا تحجين لأحد..ديري بالج..حتى عمي ما يدري..

اني عرفت من اسماء..حتى شهد متعرف شكو..
دنوة : قلقتيني يمعودة..احجي..
سلمى : البارحة المغرب دا اسوي العشه جان تكب العيطة .. بين مخلد واسماء..هلحجي عمي واركان طالعين..بس احنه بالبيت..شكو ما شكو..شايف مكالمات ورسايل بينهه وبين صگر..
فكيت حلكي متفاجئة : صگررر..شعلي بيهه..اصلا يكللهه اختي..
سلمى : دسمعي..عاد اني طلعت ما ردت ابقى..بس سمعتهم من وره الباب..كالت هاي جوان حطت سيمكارتهه بتلفوني وخابرت صگر..دازتله رسايل احبك واقبل اصير مرتك الثانية ما اعرف شنو..من هذا الحجي يعني..مخابرة علي مرتين مدري تلاثة..اول مره ما مجاوبهه..

بعدين مجاوبهه دقيقة ومسدود الخط من عنده..
دنوة : يبو يبو..شنو هلسالفة هاي..وهي شعدهه تخلي سيمكارتهه يم اسماء..هسة اكيد مخلد ضربهه مخبل هذا
سلمى : هو ضربهه راشدي..بعدين فهمته..هي صدك تلفونهه وكع بالمي كبل لا ترحون لبغداد بيومين و وكف بعد.. كالت حضم السيمكارت..شمدريني خلته بتلفون اسماء..
دنوة : بعدين شصار..هسة شحيسوي مخلد..
سلمى : كام يصيح راد يجيكم لهناك لبغداد..بس عمتي وكفته كلتله هي تجي ونفتهم..بس شوفة عينج..اول ما شافهه ضربهه والله ما يرحم الله يساعد مرته..
دنوة : اي ما تتذكرين شلون كتلهه..
سلمى : اووو..لا تذكريني..خطية..باعيلي..لمن يجي صگر فتحي تلفونه شوفي الرسايل والمكالمات..

يعني السالفة صدك لو لا..لأن خطية خاف يسويلهه شي وهي تطلع ما مسوية شي..
دنوة : ميخالف..بعد يرادله اسبوع يله يرجع..بس كليلي هو شحيسويلهه..
سلمى : شمدريني عاد..يزوجهه يرزلهه..
دنوة : ابوهه لازم يعرف..بعده عايش ما يصير هو يتحكم بيهه هو يبقى اخوهه ..ابوهه اولى..
سلمى : هو هم هيج حيصير..بس خايفين على عمي.. صحته مو شي هلفترة..تدرين شنو..هي تحب صگر للامانة.. من زمان..اول ما طبيت اني چنة هي تسولف بي..تشغل اغاني وتغني وياهن..بس كلشي قسمة ونصيب..وهو مو نصيبهه .. بس ما اعرف ليش مدتستوعب ان التحبه متزوج ومرته حامل .. بعدهه عايشه بالاوهام..

دنوة : اي سولفتلي كبل..شسويلهه..اخرب بيتي علمودهه .. ع الاقل هي عدهه اب و ام..خوان وخوات..حتى دراسة مكملة .. اذا خسرت شي عدهه مية شغلة تعوضهه..انه بشنو اتعوض اذا خسرت صگر..
سلمى : خاف عبالج واكفة وياهه..لا والله..اصلا شوكت ما تجيبلي طاريه الصمهه..اريدهه تعيش الواقع احسللهه من الاوهام وشي من المستحيل يصير..
دنوة : انه همات كتلهه هشكل..بعد ما ادري.. هو صگر راد عليهه لو لا..
سلمى : ما ادري والله..ما اعتقد..
دنوة : هسة يجي ونفتهم..اروح اسوي غده..
سلمى : يله بس انوم فراس واجي وياج..
حركت راسي يعني اي ونزلت..

سويت الغده وكملت وجوان ما شفتهه..كعدنه ع السفرة عادي .. الحجي ابوهه اجه..
ابو مخلد : لعد جوان وين..متجي تاكل..
مخلد : يابة عندي وياك موضوع..بس تخلص نحجي..
ابو مخلد : خير ان شاء الله..بس اكمل..
كلنه سكتنه..لحد وره الغده واكفة دا اغسل المواعين واسمع صوت جوان تبجي..صوتهه عالي..البيت فارغ..لا الحجي .. لا اركان..حتى محمد ماكو مدري وينه.. غسلت ايدي ورحت اشوفهه..بس ما طبيت ضليت واكفه بره واسمعهه..
جوان : يابة ابوس ايدك لا تزوجني..والله كذب..كذببب .. روح خابره وشوف..
ابو مخلد : لا تكفريني..انتي كاتبة اسمج..وهذا رقمج .. تلفونج محترك كبل يومين والسيمكارت ماكو..

شنو معناهه هاي..كولي الصدك ولا تعبيني..
جوان : يابة كتلك كذب ..والله ما صاير شي..
ابو مخلد : ادري اذا ما صاير شي لعد هذني الرسايل شنووو..تردين تبلين مرة اخوج..
ضلت تتوسل وتبجي..گلبي عصرني عليهه..هاي بس سمعت صوتهه وهيج انقهرت..لو اشوفهه شلون..اخر شي سمعت صوت راشدي من يمي توجعت..حسيته نفس راشدي ابوي لمن جان يضربني..
صاح بيهه : تحجين لو اكتلج..
جوان بدموع : اي اي ححجي والله..بس لا تضربني فدوه .. كامت تشهك وتحجي : مو قصدي ابلي اسماء.. اني بالعكس احبهه وداعتك يابة..بس تلفوني احترك وخليت السيمكارت بتلفونهه..

سكتت .. رجع عاط عليهه : بعديييين..
جوان : ه..هو دزيت..الرسايل هذ..هذني..
ابو مخلد : لييييش..شلوووون ادزين هيج رسايل لرجال متزوج واكبر منج بثنعش سنه..تعرفين شنو يعنييييي.. تردين تهجمين بيته فوك راسه..شوفي هذا الهادئ خاف عبالج يسكت.. تره يطردنه بره وانتي السبب..ما شفتي شلون مكيف بحمل مرته .. انتي شكوووو منبصه روحج..باعيلي .. اذا مرة اللخ اجاني شي عليج اذا اجتج قسمة زينة انطيج قسما عظما .. حتى ما اكلج..سمعتيييييي..
جوان : ااا..اي اي سمعت..اسفة ابوس ايدك وترضا عني
ام مخلد : لا ايدي ولا رجلي..احترمي نفسج ولزمي حدودج .. مو صغيرة انتي..هاي اسماء مو بكدج..شوفيهه رجال وبنات ثنين والله يعلم يمكن حتصير حامل مرة اللخ..

الرجال خلف الله علي ..زلمة وكد كلمة..حتى ما مجاوبج وانتي تجيبين ودزين..عيب عييييب..خلي احترام لنفسج مو الي .. الج انتي..منو يفيدج بعدين..هاااا احجي كليلي منووو
جوان : حرام عليك يابة..انت السبب .. انت ومخلد.. جان خطبني بس كطعتو التواصل بيناتكم..سنين ما نعرف عنهم شي..الله يسامحك .. ما اكول غيرهه..
ضلت تردد الله يسامحك هي وتبجي..عفتهه ورحت صعدت فوك..صوتهه هي وتبجي قهرني..تخيلت روحي بيهه.. هي ابوهه يكللهه كبرتي..وانه ابوي يكلي مطلكة محد ياخذج يضحك عليج..متأكدة الحجي ما عنده شي وياهه ويحبهه طبعا بنته..بس الشافه من رسايل خلته يصير هيج وياهه .. الا هو طبيعي كلش وياهه..وكل ما يجي من بره يسأل عليهه اول وحده..وين جوان .. اريد مي من ايدهه..

الله يهدي النفوس..بس سالفتهه غثتني..شعدهه تخابر على رجلي ودزله رسايل..شوكت تبطل عاد مللتني.. رحتلهه لغرفتهه العصر..جانو كاعدين بالهول فاستغليت الفرصة ورحت .. دارت وجهه عني..اجيت وكفت جدامهه احاجيهه.. بعدني ما حجيت شي وهي سبقتني..
جوان : ما اريد احجي شي..
دنوة : لا تحجين..بس لا تتقربين من رجلي..شعندج ادزيله رسايل..ما يريدج شنو المحبة كوة قابل..
جوان : شتريدين هسة..روحي لتحجين ويايه..انوب اسوي شي يخليج تندمين..
دنوة : خفت الصراحة..شوفي لج..كفي عن صگر لا يصير حجي مو خوش..وانه اخليج تندمين مو انتي..ابوج سكت بحجة بهاء ووين تروحون..بس مرة اللخ اروحله انه اكلة بنتك هيج وهيج ودتزعجني..واكول لصگر..هو يعرف شيسوي .. فهمتيني مووو..

جوان : هجامة بيوت انتي مو مره..
دنوة : ماعاش اليسوي هيج..هاي انتي مو انه.. انه ماعندي غير صگر والطفل البطني..تردين تخسريني حياتي علمود تتهنين انتي..لا والله غلطانة..
جوان : هو الظاهر ميفيد بي هيج..
دنوة : ولا حيفيد بي شي..عوفي رجلي وعوفيني..
رادت تحجي عفتهه وطلعت..المهم رزلتهه خاطر لا تحس روحهه فدشي براسي واسكتلهه..صحيح انقهرت عليهه لمن كتلهه ابوهه بس مو معناهه اعوفلهه الساحة..

مرت اربع ايام ماكو شي..جوان ما تحجي وي احد.. بس نصيحهه ع الاكل تاكل وتروح..حتى انه الجانت تنتظر اصير وحدي خاطر تجي تحاجيني هسة كامت هي تبتعد عني من وحدهه وره ما رزلتهه .. انه وين اروح اذا صگر تغير علي لو صار ما يريدني ..كافي افكر بالناس..خلافكر بنفسي.. وخصوصا بمثل هيج موضوع.. محد درى عن الصار..بس انه وهم سويت روحي ما ادري..محمد خبصنه شوكت يردون خبر وشوكت يردون خبر..عاد اخر شي اليوم العصر خابرو على خالة..
الحجية : هله ام كريم..الحمدلله تسأل عليج العافية.. ها .. يالله خير ان شاء الله..يعني شوكت يجون..بعد اخوه عكبة يجي .. يعني تلث ايام بعد ويجوكم..

يله عيوني اخذي راحتج..مع السلامة خية..
محمد : ها يمة بشري..
الحجية : جايين خوانهه وابن عمهه سائلين علينه.. ما جايبينه بالشينة..كلهم حامدين بينه..ابوهه كايل شوكت ما يجون خليجون..موافق..
محمد : ايييي..يله فضت ماضل شي..
الحجية : ديله هاي جاوبت بعد شكو..مو تضل تسأل..
محمد : يمة احبهه شسوي..
الحجية : مو اخوك اخذ دنوة شو ما سوى هيج..
محمد : اي حقه..بس راح يهدد يحرك نفسه ويحركهه وياه .. يمههه ما نريد نحجي..
حجاهه بضحك هو ويغمزلي..ابتسمت ودنجت.. تذكرت ذاك اليوم لمن اجه للبيت..

ابوي ضربني راشدي جدامه ودخلني جوه..ضليت اعاينله شلون واكف هو ووضعيته مخربطة..يريد يوكف وابوي يدفعه بره..بهذلة وهو رجال مو صغير..بوكتهه عمره ٣٦.. مع ذلك رجعله مره ومرتين لحد ما انطاني..مرتين طرده بس ما كال هاهية مو قسمتي..البنية شكد مغلوب على أمرهه.. مدري انه فاهية وفطيرة..وحده غيري جان من سالفة عقيل وما طاوعته .. بس صارت..غلطة وتعلمت منهه..
مرت يومين عادي..بالليل صعدت انام لكيت صگر دازلي رسالة : باجر جاي..مشتاك لشوفتج يبعدي..
ابتسمت ..دا اكتب جان يدك..شلته واخذت نفس..
صگر : اول شي اسمعه انفاسج..يعني اجي هسة..
دنوة : هههه..شكو عيني تره ما اقصد..
صگر : بريئة مو اكلج..

دنوة : خاف ما مصدك..
صگر : مصدكج انه ومغمض..لو تاخذيني لمكان بدون ما ادري وين اروح ومطمن..
دنوة : هسة انه استحيت شلون اجاوب..بله لو جدامي جان ابتسمت وعرفتني خجلانه..هنا شلون..
صگر : يله ماضل شي واجي..اشو مشتاكلج اكثر من كل مره ..
دنوة : يله مو زين تشتاقلي..
صگر : هو انه منو ببالي خاطر اشتاكله غيرج..
دنوة : حبيبي..احبك..
صگر : اعشكج من فوك ليجوه..
حجينه شوي بعدين كال روحي نامي تأخر الوكت.. ودعته وسديته..تمددت وخليت ايدي على بطني..

يارب ما اريد شي..خسرت كلشي جنت اخاف اخسره .. دراستي وابوي..حملي الاول..بس لا تخليني اخسر هلحمل .. طلعت روحي يله صار..بين الافكار وغفيت.. اخذتني النومة للظهر..كعدت لكيت صگر بالغرفة..مدنج ديفك القيطان مالت البسطال..الغرفة باردة..جريت الغطى تغطيت لحد عيوني .. حس علي..
ابتسملي : صح النوم باباتي..
دنوة : ليش بيش الساعة..
صگر : وحدة ونص..
دنوة : ولا حسيت..عبالي بالعشرة..شوف هاي تأثير الحمل .. اي يمكن بعد شهرين اكعد بالاربعة..
صگر : بعدج بالبداية يولي لا تسويهه فد دور..
دنوة : ها هيج..جا خوش..

درت وجهي وتغطيت..حسيت علي صار ع الجرباية.. انداريتله مثل الثولة..اخذ شفايفي بين شفايفه وغمض عيونه.. ابتعد عني نزع القميص..ادور اجه حضني ويهمس يم اذاني.. حسيت نتلة مشت بجسمي من فوك ليجوه..غمضت عيوني واسمعله شيكول..
صگر : صار هواي من صعدت..بس كلت ما اكعدهه..
دنوة : اا..ليش جان كعدتني..
صگر : احب شكلج انتي ونايمة..واحبج بحضني..
انداريت صفنت..من حركاته وهمساته احس ذبلت.. هو اخذني باسلوبه الحنين مثل كل مره..وووو ...
باسني من راسي وخدي وكام لبس البرنص..راد يطلع صحته : صگرر..اصبر..
صگر : ها گلبي..

دنوة : خلاجي وياك..
صگر : مسمعت..
دنوة : ارد اجي وياك..شنو ما يصير..
ابتسم هو ويورث الجكارة : كومي يله..
راح ع الكنتور شمرلي البرنص..لبسته ورحت وياه.. بس طبيت لحظات وطلعت..عفته ..
صاح : دصبري بس اطلع..
بدلع : على راحتك عيوني.. ضحكت ورحت للغرفة.. انتظرته يكمل..اجاني مبتسم..كتله : شنو ما ضجت..
صگر : عليش اضوج..سوي اليريحج ابوية..
رحت وكفت جدامه واصابعي على قطرات المي على صدره.. رفعت راسي عاينت بعيونه كتله بخجل وصوت ذايب : حتضل تعاملني مثل الطفلة..

صگر : شبي معاجبج اسلوبي..
دنوة : لا عاجبني..بس يعني دا اكول..
صگر : متعود اكلج هلكلمات..لا تحرميني منهه..
رفعت نفسي خليت شفايفي بهدوء على رگبته وبسته منهه .. همست : براحتك حبيبي..شتريد سوي..
عاينتله شلون واكف بمكانه وذايب..
جان محاوطني من خصري..فلت ايده وهمس : روحي لا تخليني اسبح مرة اللخ..
دنوة : يله نعتذر عيني نعتذر..
ضحكت ورحت ع الكنتور اخذت ملابس..سبحت وكملت ونزلنه جوه..الاكل مجهزي بس رحت صبيتله..بعدين ع الاكل اتفقو ع المشية..كال عكبة نروح..
مرن يومين عاديات..جوان محد درى بسالفتهه..

صگر همات ما حجى شي..الحجي ومخلد عبالك يحسبون كلماتهم يله يحجون..خايفين من عنده..مو مال يطردهم علمود بنية.. يكدر يتلافاهه..عاد هو خبره بهسوالف..مثل ما سوى وي جلنار..
بس انه حاجيته بموضوع جوان..بالليل كملت شغل وصعدت فوك..لكيته ديكرز حب ويتفرج فلم..اخذت تلفونه من الميز كلبت بي..هو فاصل ما انتبه علي..فتت ع الرسايل اقراهن..
- صگر احبك حس بيه..والله قابلة اصير مرتك الثانية.. اني وعيت على حبك..لمن جنت تجي لبيتنه اخلص اليوم بس اشوفك وانت مامنتبه عليه..ماتزوج غيرك والله..
طبيت ع المكالمات داكه علي تلث مرات ومره مجاوبهه دقيقة ومسدود من عنده..خليته ع الطبلة طلع صوت..اندار شافني واكفة.. ادري بي ميحبهه بس الكلام جرحني..شلون تتلزك برجلي وانه موجودة..

رفع حاجبه وكام : شعندج بالتلفون..
دنوة : قريت الرسايل مالت جوان..مبين تحبك..
صگر : انه ما احبهه..ولا يجي يوم احبهه..
ما جاوبته..فتحت شعري وگلبي يدك سريع..اختنكت من كلماتهه..ما حسيت غير بايده سحبتني لحضنه.. مانطيته ردة فعل..باسني من خدي هو ويقربني اله اكثر..
همس : متعمد بقيتهن خاطر لاتكولين عنده شي وياهه وما رادني اشوفهن..
دنوة : اكره وجودهه..مدا اتحملهه وهي تحبك..
صگر : يولي انه ما احبهه..احبج الج..ختولي هاي تحجي عشرة بالشهر..
دنوة : بله الحجي فرضهه عليك بحجة اكو علاقة بيناتكم ولو هي ماكو بس نفترض..

صگر : شنو جاهل خاطر يفرضوهه علي..لا تحجين حجي مستحيل يصير ابوية..هو خايف مني ما شفتي شلون ساكتين حتى خابرني..
دنوة : خابرك..
صگر : اي ..اعتذر مني خلاهه هي هم تعتذر..ولو ما يهمني بس من سواد وجهه..كال انه حزوجهه مدري شنو..كتله براحتك هي بنتك مو بنتي..
سكتت ماجاوبته..رفع راسي بايده وباسني من عيوني انه ومغمضة..
كال بهمس : وداعت هاي العيون ماعندي شي وياهه.. واعتبري الرسايل هذني ماموجودات .. يبعد حيلي..
ابتسمت وخليت راسي على صدره..

صگر : لا تفكرين مجرد تفكير اتگرب لوحده غيرج..ولا اعاين حتى..ببعدج ساكنة بروحي وبعيوني..وداعت الطفل البطنج
بسته من خده ورحت وياه نتفرج ع الفلم..

وراهه الظهر جنت جوه دا اسوي غده..كملت وصعدت فوك لكيته مبدل لابس بنطرون وبلوز وقمصلته الجلد.. مدنج ع المرايه ديسوي شعره جي اطول منهه..كمل واندارلي .. ابتسمتله : شو مبين انت الحتخطب..
صگر : اي انه هم حخطب..بيوم وليلة تلكيهه بالغرفة..
دنوة : احرگك انت وياهه لمن تكونون نايمين..
صگر : ههههه..ليش انه احلم تصيريلي خاطر اجيب وحده عليج..مخبل عاقل..
ابتسمت بدون ما اجاوب..

فتحلي ايده هو ويحاجيني : تعاي هنا يمي..صار يومين كل ما اصعد انام ما الكاج..
كمت من مكاني وكفت جدامه..طبيت لحضنه وهو حاوطني بإديه ثنينهن..سكت بس اسمع صوت انفاسه..دكات گلبه سريعة بشكل..بالاول جنت منزلة ايدي..بس هو حاضني .. بعدين خليت ايدي على گلبه وهمست : ليش يدك سريع..
ما جاوبني..ادور كام يدك اسرع..خفت يكون بي شي وهو ما حاجيلي..رفعت راسي : صگر شبيك..مريض..
قرب شفايفه من اذاني..همس وانفاسه دافية : كلشي بيه يدك لمن تصيرين يمي..بكل يوم احسج مرتي لاول مره .. كل هلسنين احسهه لحظة يمج..انه الهادئ الي الكلمة مني تطلع بطلاع الروح يمج افرغ كلشي بداخلي..مرتاح وناسي الدنيا .. من تضحكين وتسولفين..

بودي تبقين تحجين وانه اتفرج.. جر نفس وزفره .. انفاسه تخللت رگبتي واذاني..شعور غريب ..كال : شحجيييلج .. هواي.. لج انه ما احب اسمي..بيوم سمعته بصوتج عشكته.. الهوى التشتمي احبه..احسه مو مثل هوانه..منين شفتج وشلون .. كلهه دقايق وهيج تعلكت روحي بيج .. الف حسبة تاخذني وتجيبني لمن تزوجتي..گلبي القوي يعصرني عصر .. ياخذني لصورتج الشفتج بيهه اول مره..
... الموقف على لسان صگر ...
بليلتهه اخذت السيارة ورجعت للبيت..محد بي بس اخلاص .. امي جانت يم بيت الشيخ..طبيت بضعف الهدوء الافوت بي بكل مره..ولا كلمة نطقت..اجت اخلاص تحاجيني.. كالت تاكل شي..عفتهه ورحت..حتى ما عاينت عليهه..رحت عاني متعني ادور بالصور..اريد الكاهه..

ايدي ترجف..عگلي ماله قابلية يفكر بعد..التعب والتفكير والدكات السريعة كلهه بگلبي..دورت الصور كلهن يله لكيتهه .. اخذتهه ورجعتهن بمكانهن ولا كإن صار شي.. درت وجهي لكيت اخلاص واكفة بالباب وعيونهه مدمعة على وضعي .. خليت الصورة بجيبي وعفتهه وطلعت..بيومهه الصبح رحت لعقيل وابوهه ثنينهم تعاركت وياهم .. كلبت الدنيا .. اجت دورية شرطة فاككتنه..طلعت انه الخسران .. انه .. هضيمة بكبر الدنيا طاحت على گلبي..ضليت افتر بالسيارة.. حالي مثل واحد مكتول بس ما يكدر يحجي..بس يحجي يبجي .. جنت اعرف واحد ولد..عارف..علي سمعة يبيع شرب.. هو صاحبي .. يسمعلي لمن جنت احجيلهه على دنوة.. يجي شارب ناسي الدنيا بس يسمع ويواسي..بس بعمري ما اجيته علمود هلشغلة الا بهليوم..

خابرته كتله اتانيك بالفلكة جيبلي اليمك.. كال شلون وانت متشرب .. كتله جيب وانت ساكت..وره ربع ساعة اجاني جايب وياه اربعة..فتحلي قوطية وعاين علي..
عارف : ها جنك متردد..لا تجبر نفسك خوية..
عاينت علي بنظرات..هو يعرف معناهه..
عارف : شبيهه .. ضايج عليهه اكيد ماكو غيرهه..
صگر : تزوجت..اليوم العقد مالهه..
عارف : بشرفكككك..يمعود شدتحجي..مو كلت حاجيت ابوهه والشيخ..بعد شنو..
صگر : حاجيته..عفت شغلي ورحتله..كتله شتريد حاضر .. بس دنوة لا تنطيهه..احبهه .. كال هو ابوهه انطاهه مو انه.. ورحت على ابوهه تعاركت وياه ..كتلت عقيل.. كتله تنازل وعوفهه البنية ما تريدك..

عارف : شسوه هو..
صگر : ابوهه خابر الشيخ كايله صگر تعارك وياي.. ادور رحتله للديرة ما فوتني..كال لا اشوفك ولا تشوفني..اذا وصلت يصير غير حساب..
عارف : هذا جدك ما ادري شجان يفكر من سوى هيج.. الله يسامحه.. هسة انت شحتسوي..
صگر : شسوي..شسوي ما ادري..تدري شنو هنا.. وأشرت على گلبي.. لك محترك حرك..عساني بالموت ولا اشوف الديصير..لك انه..انه هيج يصير بيه..اخذوهه مني.. حتى ما تهنيت بيهه..
عارف : ادري بيك تحبهه..بس راحت لغيرك..لا تضل تذكرهه وتلچم روحك..هي هم ما حاولت تكول لا علمودك..لا تكول ما تدري بيه احبهه..

دشوف الحب واضح بعيونك..تدري..بس ما اعرف يعني .. ما ادري شكلك..سالفتك حيرتني..
دنجت وسكتت..ما جاوبته.. اخذت القوطية من ايده .. شربتهه كلهه..اول مره احط الحرام بحلكي..كلهه تكلي لا تخلي عارف يصير صاحبك..تره كله شرب وسوالف مكسرة..وشكد ضليت وياه..سنين..ما فديوم حاول يرغبني بالشرب.. بس انه حسيت الدنيا هلكدوتهه بيه..كلشي انسد بوجهي..كلت هسة عبالهه ما سويت شي علمودهه..عبالهه اضحك عليهه.. وانه انهانيت وانطردت من الكل..مع ذلك ما تهاونت عن الموضوع هذا.. كلت كلشي لخاطرهه يهون بس تصير يمي..بعدين اشوفهه هي موافقة من كيفهه..سكتت شريد احجي..اجبرهه علي لو شلون يعني.. شربت ثنين مدري تلاثة..كعدت بمكان عارف وهو بمكاني..

راح بعيد..ع الشارع العام..نزلت انتجيت ع السيارة والجو بي نسمة هوى بيهه برودة..ولا تكول نفس ذاك الجو الحار الصبح.. هو بقى بالسيارة ويكلب بالسيديات..شغل الاغنية الاسمعهه كل يوم وبنفس الوكت.. اسألي عني الليالي
صاح : ادري بيك تحبهه..
يدري لمن اسمعهه اتذكرهه..من زمان.. من اتعس الليالي بحياتي..كل كلمة بالاغنية لچمتني.. حرگت گلبي..جنت منتظر منهه كلمة..بس كلمة لا.. واجي اخذهه غصب عنهم.. بس ما حجت شي..ما حجت..خلتني مفضوح بحبهه وانه اريد اكتم .. ما اريد غيرهه يدري بكبر حبي.. بعدين صارت لغيري .. وصلت للمقطع من يكول للهوى سلمت روحي .. يازمن يشفي جروحي.. تنهدت تنهيدة رجفت جسمي .. بجيت..بجيت بدموع وقهر..گلبي متكطع..

كرهت اليوم الشفت بي صورتهه..علكت روحي بيهه بعدين وره ما شفتهه وحسيت بوجودهه تروح لغيري..
انه ابجي..ابجي على مره.. مو مره هي.. طفلة اي .. وانه ابوهه..صورتهه ليهسه ببالي لمن جانت صغيرة..ما اشوف غيرهه.. تعودت اكول بنيتي بيني وبين نفسي من اعاين لصورتهه.. ما اجه ببالي غير منظرهم سوه وشلون حيهمسلهه مثل أي ثنين ينخطبون..المفروض الي .. انه بمكانه.. شواي واجه عارف ورثلي جكارة..
عاين علي مصدوم : هاي شنو يمعود..كول يالله.. الف وحده تتمناك شبيك كاتل روحك عليهه..لو تريدك جان رفضت.. بس شوفت عينك حتى ما نطقت..
اخذت الجكارة من ايده : لا تحجي عليهه..بعدهه صغيرة .. يمكن ما فهمت نظراتي وحبي الهه..

عارف : جا ما تنطي لروحك هلعذر..عليش تعذرهه الهه.. انت متأذي اكثر منهه..
صگر : اسكت رحمة لأبيك..گلبي غادي جمر.. طلعت الصورة عاينتلهه وعيوني مغوشة من الدموع والشرب..

شلون..شسوي..اريد اخربهه..اكتله خلاص ..
عارف : لا تتسودن..شارب وناسي روحك..باجر صحصح وارجع لشغلك بعد كافي انساهه..
صگر : ااااااخ لك شنساهه..شنساهه ما تروح من وجهي لا اخلص عليك..
عارف : لا شلون اعوفك..
صگر : چا خلص..احجيلك حجاية بيهه خير لو تسكت..
ضل كاعد يمي..خلصت الجكارة وذبيتهه..صفنت شوي .. تذكرت عيونهه شلون تلمع لونهن يجنن..بجيت بنحيب وصوت .. مثل النسوان..من حسرة گلبي وهول الموقف الصرت بي.. احس مشلول ما اكدر اسوي شي..شسوي بعد..حتى اذا اريد اخربهه هي كالت موافقة بعد شنو..وانه انطردت بالعشر مرات..وهم ضليت احاول لحد ما صار العقد..

ابجي ودموعي مثل الجمر على خدي..ما ادري ابجي على حالي..ابجي على حب عمري الراح بساعة.. لو على ابوي لو عجزي..لو شنو..گلبي كام يدك سريع وگصتي تصب عرك اختنكت بعد مابيه..مسحت دموعي وسكتت.. ضليت لنصاص الليالي بره..لحد ما طفيت ع الاخيرة ورجعني عارف.. خطية طبكلي السيارة بالكراج وغسل وجهي بعدين راح.. طبيت منثول وما اعرف راسي من رجلية..اشوف الواحد عشرة.. بس فتت شفتهه..انه مثل مكان ديحترك وطفوه..بقت شرارة ما لاحوهه لحد ما رجعت النار بيهه..هيج گلبي احترك واشتعلت ناره .. شكد صرت ضعيف جدامهه..صرت بالوضعية الاريد اصيرهه يمهه..على طبيعتي..على حبي ولهفتي..انه من الشرب و چي اول مره دخت..حتى ما ركزت بعيونهه..عاينت بيهن ..

بس ما حسيت بدكة الگلب..الا لمن كمشت ايدي.. خلصت الليلة احس گلبي يرجف ومهزوز من القهر.. مو انه اهذي .. لا گلبي اليهذي هلكد ما خدران من التعب والحسرة..

دنوة : عاينت بعيونه طول ما هو يحجي..عبالك بالغصب كامش روحه ما يريد دموعه تنزل..ما عرفت اجاوب بعد.. شحجي وره هذا الحجي..حضنته ودافنه راسي بصدره.. حسيته مد ايده على خصري..كلماته تتردد بإذاني..قهرتني .. سوت حفر بگلبي..بجيت بحضنه واعصر بقمصلته..كمت اشهك واحجي : حبيبي..شكد متحمل..احبك وما ادري شسوي بدونك.. انه الحياتي تعلكت بيك وبطولك وحسك وكلشي يخصك
صگر : لا تبجين يبعد طولي..والله ما اعوفج .. لج شكد ضاله بگلبي هلسالفه..تحرگ بيه وداعت عيونج الاحبهن .. اول مرة تنزل دموعي بقهر وگلب ملجوم..شوفي معزتج شكثر عندي.. احبج دنيتي..
رفع راسي بايده وباسني من كصتي..مسح دموعي بطرف اصابع ويحاجيني ..

صگر : لا تنزلين دموعج على كلشي..لا تخلين گلبي يرجف .. جي كل ما اشوفهن على خدودج اتخبل..
دنوة : بس انقهرت عليك..ومن حجي عارف.. انه خفت من ابوي يكتلني فسكتت..بس احبك والله.. جانت غلطة ودفعت ثمنهه بهواي شغلات..
دنج بجسمه صار بمستواي وعيونه بعيوني : ما اريدج تفكرين بالماضي..انسي انتهى..المهم هسة صرتي يمي وهذا يعادل الدنيا كلهه..
دنوة : صدك..لو تريد تسكتني..
صگر : صدك وعيونج..شوكت مجذب عليج..
ابتسمت : حشاك من الجذب..
باسني من خدي وكام يرتب ملابسه..سمعت صوت اسماء تصيحني ع الغده..نزلنه تغدينه و هم راحو لبغداد.. الحجي ابو مخلد ووائل ..صگر ومحمد واركان..

رجعو بالليل بالتسعة..صگر ما قابل يباتون يم خالهم.. كال اتفقنه ع الخطوبة بعد اسبوع بين ما يشترون الحلقات وهي تأجر الفستان وهيج يعني..انه بهلاسبوع رحت وي البنات أجرنه فساتين علمود الخطوبة..بس انه وشهد وسلمى.. اخلاص كالت تجي هي وحدهه ..اسماء وجوان ما رادو.. بعد احسن..اصلا قليل يجون من طرف الولد .. كملنه كلشي محمد اشترى حلقات هو وياهه .. منسم ع الاخير وبالليل دورات اسمعه يخابرهه.. ماضل شي ونصير سوه.. احبج وهلحجي مال بلال الحب..
اليوم كعدنه من الصبح مخبوصين..عبالك شوف شكو.. هو خابص روحه..حيروح يشوفهه بعد..كل ما يجي يوكف يمي يكلي ولج حشوفهه..يبو شكد مشتاقلهه..حبه بلهفة واضحه مثل عين الشمس..

صگر شلون كدر يضم هاي اللهفة والحب..ما ادري..
الظهر تغدينه وكملنه..صعدت فوك بدلت..الفستان الأجرته بسيط ..مابي هواي تفاصيل..ردانه بي معصم من النهاية وفيونكة صغيرة..لبسته ولبست الشال والكعب..ادور خفت لا اتعثر ويصيرلي شي..ضليت صافنة البسه لو لا.. لحد ما فات صگر مستعجل..
راح ع الكنتور يبدل ويحاجيني : شبيج صافنة ابوية..
دنوة : مابيه شي..منو حيجي ويانه..
صگر : انه ومحمد وخالي وائل..
دنوة : يله زين..
لبس قميص وستره وانه اعاينله شلون مرتب بكلشي.. اندار شافني صافنة ومبتسمه..
صگر : لازم طلعت حلو ..

دنوة : انت بكل وكت حلو..
ابتسملي ونزلنه..مسافة الطريق ووصلنه..جانو مجهزين كلشي على حسب الاصول..روزة تخبل شكد محبوبة..خالة كعدت يمهه وامهه من الجهة اللخ يسولفون..شغلو اغاني وكرايبهه ما قصرو..انه جدام البنات واستحي..هن ولا عبالك .. يمكن متعودين..بس سلمت وكعدت..اجت وحده ما اعرف شتصير منهه كعدت يمي..مره بالاربعينات عمرهه..سلمت علي عادي بعدين كالت : حبيبتي انتي متزوجة..
دنوة : اي خالة..
- : يااا..شوف ولا مبين..عبالي بعدج بنية..
دنوة : هههه..صارلي خمس سنين متزوجة..رجلي جاي .. هسة يدخل وتشوفي..
- : ها..الله يحفظكم..
دنوة : الله يسلمج خالة..

مشى الوكت لحد ما دخل محمد وصگر..البنات لبسن حجاب المحجبات..ولو اكثريتهن سافرات..لبسهه الحلقة وهي همات وثنينهم مبتسمين مبينين فرحانين..صگر بس يعاين على محمد مارفع عيونه على وحده منهن..بس لمن لبسهه الذهب وكملو خالاتهه هلهلن..رفع راسه ابتسملي..بادلته وضليت اتابع حركاته لحد ما طلعو..ضلينه بس احنه..لليل جابو اكل من بره .. استحيت اكل..كتلهم شبعانة..لحد ما بالسبعة ونص بلشو يطلعون واحنه همات طلعنه..محمد بعد بس يريد يطير ياخذهه ويروح..خالة كالت نبات يم خالك ابو جمال بس ما قبل كال عندي دوام عكبة اريد ارتاح..بالطريق نزعت الكعب خليته جوه الكشن ونمت..كعدت على صوت صگر يمي
صگر : كومي بنيتي وصلنه..
دنوة : ها شنو وين..

صگر : هههههه..للبيت عمري..نزلي..
نزلت مطفية ما ادري شنو جوايه..حتى نسيت انه نازعة الحذاء.. دست على كزاز كمزت من مكاني للكشن..
صگر : الله الله..خوما بيج شي..
دنوة : غير تكلي ناسية الحذاء..بله شلون هسة.. دتوجعني كلش..شنو من كزاز هذا..
صگر : تعاي لتخافين..
لف ايده على رگبتي وجوه فخذي وشالني..سديت الباب وصعدنه فوك..جنت منعسة بشكل هو انتبه علي فسوالياهه .. طلع الكزاز لأن نزلت بالشارع مو بالكراج..فهواي جان اكو .. كمل وكام يغسل..اجه يبدل ..انداريت نزعت الشال ودفنت راسي بالمخدة..حسيت علي طفى الضوه واجه حضني..
همس : بعدهه توجعج..

دنوة : لا زينة حبيبي..
صگر : اشتعل شيبه لحبيبج..اخاف اتقرب بطنج دتكبر..
دنوة : اي عفية ابقى عاقل.. حبيبي ..
صگر : اويلي يابة..نامي گلبي نامي..
انداريت بسته ونمت على ايده..
مرت الايام ماكو شي جديد..صگر راح للدوام كال اطول.. البيت اجوائه هدوء..ماكو شي..لمن رجع من دوامه سوو حنة لمحمد بالبيت..يمكن المنطقة كلهه اجت..ومن ضمنهم ولد عمامي كلهم..تفاجئت..شعجب جايين..مو ما يريدونه.. ما سوينه اكل صگر كال حجيب من بره..انه جنت جوه كاعده بالهول وي جوان هو نزل يسد الدكة مالت الدشداشة بمعصم ايده..جوان ضلت فاكة حلكهه شبر..انه مكيفة عليهه .. رفع راسه يحاجيني ولا عاين عليهه تخبلت..

تمشيت لعنده محد كاعد بس انه وجوان..الولد برة ملتهين وي محمد والبنات جوة.. مديت ايدي ع الدگم البصدره وياخة الدشداشة : حبيبي طالع تموت الله يحفظك من عيون الناسس .. وعاينت عليهه متقصدة..
ابتسملي : هلعيون الشهل يشوفنّي هيج يولي.. اكول جيبيلي الشماغ والسبحة..
دنوة : اي بس ليش..
صگر : چوبي يابة..هسه تشوفيني العبهه لعب..
دنوة : اووف حبيبي اكو شي ماتگدرله.. احم اي هسه اجيبلكياهن..

صعدت انه واعاين على جوان..عبالك دخان ديطلع من إذاناتهه.. ماتت من كلامي وموقفنا.. جبتله الشماغ والسبحة هو معتز بيهه چي مال ابوه..انطيتهيا وراح ع المراية يسوي على راسه..

كمل واندارلي : شلونه..
سويتله حركة بيدي يعني تمام .. تقربت منه وبسته من خده : حبيبي جوان عينهه اكلتك..اقره المعوذات عمري خاف يصيرلك شي..
ضحك وباسني من راسي : تدلل اميرتي..

عافني وراح بره وي الولد..ياربي ولا مبين عمره اربعين.. عبالك بكدهم وهمَ كلهم بگصة محمد..تلاثينات.. جوان ضلت تروح وتجي تسودنت..انه كاعدة بالصالة الچبيرة اشوف فلم بالتلفون واكرز حب..صگر مايقبل اشتغل من هو هنا فالبنات بمكاني.. وره ساعة هيج..سمعت صوت الدي جي..طفيت التلفون وگمت وكفت بالهول..كلنا وكفنا نشوفهم..حبيبي مترأس الدبچة والباقين وراه..محمد بسده ومحاوطه بإيده من خصره.. هو يفر بالسبحة ويتحرك بخطوات متناسقة ومرتبة.. الضحكة مالية عيونه گبل شفايفه..اجت خالة يمي..
الحجية : وليدي ولا يكبر..
دنوة : اي خالة فدوة لطوله.. اكو ناس دتموت..
الحجية : اسم الله منو يمة..
عاينت لجوان : هيچ خالة فدناس.. المهم حبيبي يجنن طالع اليوم..

خالة افتهمتني..خلت الشيلة على حلگهه وتكركر.. رجعت اعاينله ياربي مااشبع من شوفته.. اللبس العربي يلوگله اكثر.. هيبة ووقار.. ضلوا هواي وراهه طفوا ..
اسمع واحد منهم گال : يول صگر ماحضرنالك حنة حرامات..
صگر : يله ميخالف.. شو عبالك انه ابو الحنة.. انه كمشت الدبچة ومسوي كلشي..يول بس لا تفشلنا..
محمد : افااا..لك انت بس تفاول علي..
-: يابة انت فاهي..هم ليش البيضان فاهين..
واحد لاخ تقرب لصگر ودفعه من چتفه بالشقة : اووي حبيبي شوفه شكد نار..دتعلم من اخوك..انزووول..
هو طگهه بضحكة : يول قندرة لاتلعب روحي مااحب هيج مياعة..

ضلوا يحچون فعفتهم خربانة ضحك.. بقوا للمغرب وراحو .. عاد هو ومحمد جمعو الكراسي واجه الرجال اخذهن .. لمن طبو حجت خالة..
الحجية : شو ولد عمومتك جايين شعدهم..
صگر : محمد عازمهم..
الحجية : عليش يمة..
محمد : احسن..لشوكت نضل كاطعين..وجدي همات وكف ويانه لمن انخطف صگر..عامر هماتين عكبة عرسة وعزمنه
الحجية : كلنه..
محمد : اي يمة كلنه..هو جدي طالب نجي..
الحجية : انه ماعندي مانع..بس شوف اخيك يروح..
صگر : اي حجية اروح ماعندي شي وي عامر..
الحجية : يله جا خلص..على راحتك..

كال حيسوي العرس بالبيت..شعجب .. يله هم مابيه حيل اروح أجر فستان وهوسة..البس العندي..
مرن يومين عاديات..وراهه العصر طبيت سبحت وكملت .. اجيت لبست فستان عندي طويل بي شذر وتفاصيل .. لبست الشال ومكياج خفيف .. ردت انزل جان يجي صگر.. سد الباب وانتجى عليهه..ابتسم هو ومجتف ادي..كتله : حلو.. صدك انه لبسته بدون ما اگلك تقبل لو لا..
صگر : اي اقبل..مابي شي لبس عادي..بس انتي المو عادية ..
دنوة : ها تره حيكبر راسي ادور اتكبر عليك..
صگر : تكبري براحتج مردّج هنا .. وأشر على صدره ..
ابتسمت بخجل ودنجت..اجه هو يبدل كملنه ونزلنه.. عاد هلفترة كلهه مناسبات شكد حلو..

رحنه انه وصگر ومحمد وخالة..شهد همات اجت هي وسلمى بس الباقين لا..يعني ماعدهم علاقة بيهم فاكيد ما يجون.. طبينه احنه وصگر ومحمد بقوا بره..العروس حسيتهه شلولو .. عيونهه طايرة..شعلي..سلمت عليهه وكعدت..شفت الكل.. خالة ابتسام..جديتي..خالة فاطمة..نوارة وسرور.. حنين وغدير .. حتى ورود..كل كرايبي شفتهم..صار سنين ولا لمحتهم.. شكد الدنيا صغيرة وتفتر بالعجل..شلون التقينه هسة..سلمت عليهم وعيوني مدمعه..حقي..جانو اهلي وقطعه مني..بعدين تبرو مني على شي ما مسويته..خالة ابتسام شكد متغيرة وكبرانه .. شافتني وبجت..مسحت دموعهه ..
ابتسام : والله عبالك اخذو بنتي مني..ولهانة عليج حبيبة خالة.. مرتاحه بحياتج..
ابتسمت : الحمدلله خالة مرتاحه..

انه زينة بس انتي انتبهي لصحتج..
ابتسام : فدوة لگلبج الحنين..بعده مثل كبل..
دنوة : ما يتغير على عزازة..وانتي عزيزتي وامي بطفولتي لحد ما كبرت وحصير ام..
باستني من راسي وخدي..جديتي همات .. هي بحكم عمرهه وخبرتهه بالدنيا جانت من نظراتي تعرفني شريد.. ومن يوم تزوجت عقيل هي شافتني كلتلي جدة انتي ما تردينه مو .. كتلهه اي جدة والله ما اريده واخاف منه..شوفي شكبره ومتزوج فوكاهه..
الحجية غادة : ببالج صگير ابن عمج حامد..
سكتت دموعي وعاينت عليهه مذهولة : شمدريج..
الحجية غادة : جا شني يمة صغيرونة انه..اعرف الطير الطاير شيفكر..بس ييمة الزلمة مو نصيبج..انسينه..

دنوة : جدة وگلبي شينسي..
الحجية غادة : ينسى وي الايام..عيشي وي رجلج وداري بالزينة..عسى الله يوفقج وياه..
لسه اتذكر كلماتهه..دتحجي هيج علمود تخليني اطاوعه واقبل بي..كبل ماعدهم شي اسمه ماطاوع رجلي.. هو الآمر والناهي..وهذا الشي شفته يم عقيل..كلشي يريد اسويله بالدقيقة..خلاني اسوي شغلات غصب عني ولعبت نفسي .. كله جي ما خليته يتقربلي..شسوي ماكدرت اتقبله..
المهم هسة انه يم صگر..علمني كلشي ممكن يصير بالتفاهم والاحترام..علمني شلون اجي انه برجلية بدون اجبار.. بإسلوبه وحنيته ينتشلني من تفكيري والمكان الكاعدة بي لعالم مابي بس احنه..بس صوت انفاسنه ودگات گلبه هي الطاغية ع الجو كله..

عاينت لجديتي وابتسمت..
همست يمي : صار التردينه..
ابتسمت بخجل ودنجت.. مشى الوكت..ورود متزوجة ومخلفة ثنين..بنات عمي فيصل همات متزوجات..كلمن عايش لحالة ولعائلته..كلهم متغيرين وانه بعد متغيرة..
بالليل جابو اكل صارت هوسة..بعدين بالاخير يله كالو حيدخل العريس..عدلت الشال وكعدت..فات كعد يمهه ويتهامسون .. ابتسمت عليهم..حسيت بسلمى تنغزني..
سلمى : رفعي راسج ..
رفعت راسي شفت صگر واكف بالباب..اشرلي اروح يمه.. كمت بهدوء وكفت جدامه..
همس : خوما ضوجوج..نطلع اذا تريدين..
دنوة : لا حياتي مابيه شي..بالعكس متونسة..

صگر : على راحتج ابوية..
ابتسملي وراح..وره صفكة وهلاهل صارت الزفة وطلعو ثنينهم للفندق..بقى جدي وصگر بالباب واكفين..شعجب صگر يحاجي..شواي وفات يحاجي خالة..
صگر : يمة امشي وياي..انتي ودنوة..
الحجية : خير ياستار وين بعد امك..
صگر : لبيت جدي..ما نتأخر ان شاء الله..
الحجية : لبيت الشيخ.. شعدنه..
صگر : هسة نروح وتعرفين..امشي بالعجل..
رحنه للديرة..كلهم جانو ملتمين ببيت جدي..عمامي يعني .. طبيت تفاجئت بيهم..سلمت انه ومدنجة..بلشو يحجون وفتحو الموضوع..

صگر : على شنو طلبتنه جدي..
الجد : بوية بعد جدك تدري بيه كبرت..شكد اريد اعيش بعد .. سنتين تلاثة بالزايد..
الكل : لا الك طولت العمر يابة..
الجد : اي هذا الحگ..جا الواحد شكد يعيش.. المهم بوية.. اريدن افك الحمل برگبتي صوبك انت ودنوة..
رفعت راسي مصدومة ومتسائلة بس ما حجيت..
الجد : اي..دنوة تربت عدنه..بين بنيتنانه وحلالنه..الحجي الصار بيوم رجعتج من سوريا جان عصبية زايدة.. مرة المحروم غلطت واحنه همات غلطنه..المفروض ما اصدكهه.. بس لمن حلفت قرآن كطعت الشك من اليقين..
الحجية : شمدريكم دنوة ما مسوية شي..
كاظم : رزان حجت..هي امهه مصويتهه..مريضة وما تكدر تحجي حتى..فبنتهه حاجيه بمكانهه..وقابل اكو وحدة تريد لامهه الشينة..الا اذا جانت صدك..
دنوة : شبيهه مريضة..
الجد : والله يبعد جدج ما ادري..ما رحت اشوفنهه.. بس كالت مريضة ومدنعرف شبيهه..

صگر : ربك بالمرصاد..قسمت قسم باطل على بت رجلهه وهي مالهه علاقة وما تدري شصار حتى..
الجد : اي وانت على حگ.. اريد كلشي قديم ينتهي وتبريني الذمة يبعد جدج..
عاينت لصگر ورجعت عاينتله : مبري الذمة جدي..
الجد : تعاي هنا بنتي..
رحت يمه..وكف على حيله وباسني من راسي : اعذريني.. الشيطان گوي..وتدرين بالمحروم شكد عزيز..
سكتت بس حسيت بايده..شكد كبران حتى ايده صاير بيهه رجفة خفيفة مال كبر.. تذكرت طفولتي يمه..شلون يكمشني من ايدي ويطلعني بالحلال العصرية..لمن ابوي راد يبطلني هو كالة احنه مو همج ونبطل بناتنه..خليهه تكمل وهي تستاهل شاطرة ماتعبك.. عاينت بعيونه وحضنته..

ما اهتميت لعمامي..اذا هم ما اسامحهم فراح اسامحه اله.. حضنته وبجيت بحضنه : اشتاقيتلك..
الجد : انه بعد يبنتي..
رجع باسني ومسح دموعي..عاينت لصگر شفته مبتسم.. رحت بهدوء وكفت بسده..
الجد : شوكت ما تريد جيبهه وتعال..
صگر : بحيل الله..
ضلينه كاعدين عدهم شواي ورجعنه للبيت..صگر صعد فوك وانه جوه طبيت للمطبخ اكل شي..كملت وصعدت فوك..
مرت الايام عادي..وصادف اليوم زواجة محمد..كبلهه بجم يوم طلعنه اجرنه فساتين..محمد وخالة راحو اشترو النيشان هم وروزة وامهه..رجع للبيت حتى ما نام الليل كله.. شكد فرحان .. كعدت الصبح انه وصگر نزلنه شفته يلوب..
دنوة : صباح الخير عيني..شبيك..

محمد : نعسان واذا نمت بعد ما اكدر منا لليل..
دنوة : ما نمت بالليل شموازيك..
محمد : روزة..
صگر : اكول لا تتخبل على راسنه..هسة تزوجون واشبع منهه عود..شلون وي المراهقين..
محمد : انت مو نفسك ما كدرت تنام..
صگر : يول انه احترك گلبي صار عطاب والشيب طك بشعري يله اخذتهه..حگي ما انام يابة..
محمد : اي حگك صحيح..
صگر : ديله كوم نام..عود اكعدك الظهر..
محمد : نومي ثكيل شيكعدني..
صگر : مي بارد مجرش يلوك لهلراس..
كلنه ضحكنه حتى هو..راح ينام وضلينه احنه..

للظهر وصدك راح كعده وكعد جهز نفسه..احنه رحنه لصالون حجزنه عدهه بوكت ماعدهه احد ورحنه..مكياجي بسيط مثل كل مره..علمود يناسب الفستان..
خلصنه كلشي بالوحدة ونص هيج..ادور اجه محمد رجعنه للبيت..جان حاجز قاعة للعزس مو بالبيت..ببغداد همات مو هنا..كملنه وطلعنه..بس مسافة الطريق ووصلنه لبيتهم.. نفس الصار وي اخلاص صار هنا..ضليت مبتسمة واعاينلهه شلون انطاهه ابوهه وخوانهه واكفين يمهه..لحد ما صعدت هي ومحمد ليوره وصگر هو ساق..امهه وخواتهه وبعد بنات هواي وياهه اجو للقاعة..القاعة اجواء غيير..تختلف عن البيت وشي جديد..عاد محمد دللهه..كله همس وكامش ايدهه.. فرحتلهم .. ادور ركصوا سلو والاغنية هادئة ورومنسية.. وره ساعات زفوهم للفندق وكلمن رجع لبيته..

احنه رجعنه للبيت خركة بمعنى الكلمة..من الصبح لحد الوحدة ونص بالليل..صعدت فوك بدلت ونمت..
مرت الايام طبيعي..شذى ما وصلتهه..حتى رزان ما خابرتي اكيد ملتهية بأمهه..فديوم اخابرهه وافتهم شبيهه..
بطني كبرت كمت احس بثگل..طبيت بالشهر الثامن وما مسوية سونار..كل يوم اكول باجر والتهي.. صگر دللني دلال .. اذا ينزل من الواجب ويشوفني اشتغل يخبص البيت.. شلون تشغلوهه وهي حامل..عوفوهه ترتاح..عاد هاي احلى فقرة .. اعوف الدنيا واصير بحضنه وملكه..يجي يبوس بطني ويهمس بإذني..سمعت كل كلام الحب والغزل.. بكل يوم اشوف حب اكثر من اليوم الكبله بعيونه.. فرحانه وطايرة بي..
ادور كمت اتنسى واشكال اشتهي..يا فلافل يا بطيخ يا بيتنجان..هو كلشي يجيبلي..ما خله شي بنفسي..

لحد ما اجة اليوم رحت للدكتورة تشوف وضعي وتسويلي سونار..هم منهه تحسبلي شكد ويصير موعد الولادة.. رحت لدكتورتي نفسهه..عرفتني وباركتلي ع الحمل.. سألتني على وضعي وليش ما اجيتهه ..

كتلهه مابيه شي حتى دوخة ماعندي عادي..سوتلي سونار طلع ولد..كالت وكح مبين اشو هواي يتحرك..يووو انه شكد فرحت..يعني كلهه شهر او اقل ويصير طفل بين اديه.. اكيد شعور حلو ورهبة بنفس الوكت.. وراهه فحصتني بس عكدت حاجبهه مدري شكو..كمت عدلت ملابسي اشوفهه شتكول....

يتبـــــــــــــــــــــــع...........................