رواية اسألي عني الليالي الفصل الخامس والعشرون 25 - بقلم رقية جاسم

قناة التليگرام

الـبـارت الـرابـع والـعـشـرون............

بالليل ابدل واتعطر علموده .. شفته استعدل حتى تلفونه مشمور مايكمشه هواي.. وراها صعدت لگيته نايم.. تمددت بس مااجاني نوم.. ماادري شبيه مخنوگة.. ضليت اتكلب لحدما فغرت روحي ونزلت كلت اتمشى بالبيت شوي.. سمعت صوت طگطگة من وره باب الكليدور.. تقربت اكثر اجاني صوت وليد .. كال : لاتحچين وربج اذبحج هسه..

خليت ايدي على حلگي برعب وصدمة.. منو هاي .. خفت افتح الباب لو اروح لعقيل خاف يطلع عنده شي غير عن البالي ادور ثنيناتنا نطيح بمصيبة..
وليد : كافي لج لاتضوجيني .. هذا موبيتي لايكعد ابوي والله مايخلي على حالنا حال..
حچت بصوت تعبان ومبحوح : وليد اني مارايدة منك شي .. انت اول واحد اخذتني وصرت الك.. شنو حرام لو ميصير..
وليد : اي مايصير مااتزوج مسيحية..
- : ليش تسوي هيج.. شفتني فقيرة عبالك ماعندي احد.. لتنسى الأيام التبات بيها يمي وماعندك راحة وأمان بس حضني..
ضربها راشدي : انچبي لاتعيريني.. اخذتج وعقدت عليج وكت حاجتي هسه اريد اطلكج شكو راجعتلي امج ابوج انه..
- : انت كلشي بحياتي ليش تسوي هيج.. لأن احبك واريد خاطرك..

ضلوا يحچون ومن كلامهم عرفته معشمها يتزوجها عقد محكمة.. صوتهم اختفى فجأة وانفتحت الباب فاتوا هو وياها حاضنها ويبوس بچتفها.. رجعت ليوره هو ماانتبه علي منصي راسه بس هي رأسا حچت..
-: وليييد.. منو هاي..
خله ايده على حلكها وشافني.. كال : جوجو حبيبي فوتي لغرفتي..
راحت ومادة راسها تعاينلي.. شعرها اشگر بارز بحيث.. تقدم علي يحاچيني..
وليد : لاتكولين لأحد ديري بالج..
دنوة : لا معلي انه.. بس شون هيج مداافتهم.. مرتك هاي..
وليد : اي مرتي وانه اعرف شوكت احچي..
دنوة : على راحتك ماادخل..
عاينلي بنظرات حادة خفت منه.. طفرت فوك كبل.. شون يفوتها للبيت مايخاف يكعد أحد يشوفها وياه.. نفضت الافكار واجيت تمددت يم عقيل.. شبگته وبست خده.. اندارلي والنوم بعيونه..
عقيل : شبيج بالليل..
دنوة : مابيه شي بس خايفة..
ابتسم ورفعلي الغطى.. تقربت منه حضني بدفو وباس راسي.. غفيت على صوت انفاسه .. كعدت الصبح لكيته معلك هدومه ع التعلاگة ومرتب غراضه يله طالع للشغل.. تعلم ع الترتيب مني.. غسلت ونزلت جوه صار وليد بوجهي ديصعد فوك.. سكتت ورحت للمطبخ..

مشى اليوم عادي ماصار شي.. بالليل صبيت العشة وصعدت فوك اصيح حنين .. سمعتها تحجي مدري ويامن.. تقربت اكثر عرفته وليد..
حنين : بكيفك عيني.. شوف ياهو الصح وسوي.. بس ابوي تعرفه شون جان يريد هاي الغجرية وماخذاها علمود السمعة.. انت شون ماادري..
وليد : الشاهد الله احبها واريدها بس لمن افكر بهالأمور اتراجع واحاول أكرهها بيه.. مكاعد تكرهني بعدها مصرة..
حنين : چا حاچي ابوي وفهمه وضعك گله بس اعقد عليها محكمة واخذها لبغداد وبعد انت طيح علي بلچن يقبل تراه حنين ويعرف باللوعة هاي شتسوي بالآدمي..
وليد : اي والله صحيح ماچذبتي.. احاچي اليوم واشوف..

دكيت الباب على كيف وفتحتها صحتهم يجون يتعشون.. وانه اكول شون يفوتها براحته ثاري اخته تدري اكيد تسويلها مجال شوف شلون مرهميها ماادري.. تناسيت الموضوع ماطول علاقتهم شريفة.. مرت تلث أيام كلشي هادئ وماشي بدون معرقلات.. الى أن كمزت من مكاني بالمطبخ اجاني صوت عمي صاح.. هو مثل طبع رائد هيج موعصبي ومايتسرع تفاجئت بعصبيته .. طلعت لا اراديا شفته واكف جدام وليد ويحاچي بعصبية..
كاظم : لو حاچي من البداية چا منعتك.. بس چنك اخوك تسوي الشغلة يله ادري بيها .. هم صوچي انطيتكم حرية زايدة وكليات وعلاقات..
وليد : بوية مرتي شون يعني اطلگها..
كاظم : لاطلكها مايصير تنكسر رگبتها.. باچر اروحن وياك انه وامك وتجي هي وامها نعقد محكمة واجيبها هنا.. بين ماتطلع السنة مال عمك عودك بعدين سوي عرس.. عرست عليك ايامك لابارك الله بيك..
عقيل : هسه ليش تدعي علي.. شمسوي الرجال حب وأخذ..
كاظم : ياخذ وحدة من مقامه مو هيج.. الله اعلم لو ماداخل عليها اخوك الشفية وحابها چا شصار بيها .. مانريد نحجي هسه..
وليد : بوية انت موحبيت.. شسوي يعني مااكدر..
كاظم : ادري .. لو مامجرب هسه اطلكها منك بس ادري باللوعة هاي شون تسحن الگلب..
تقدم علي باسه من راسه وإيده.. : الله يحفظك ويخليك.. الوادم شنگللها..
كاظم : صارت بالعجل وماردنا تصير هوسة لحدما تطلع السنة مال حامد.. انت بس اسويلك عرس تاخذها وتروح لبغداد .. بعد تعرف بالوادم هنا شون تبحوش..

عفتهم يحجون ورجعت كملت شغلي.. حاچاه يعني حاچاه.. شلون شخصيته قوية ومفروضة .. ثاني يوم الصبح راح عمي وعمتي وياهم عقيل ووليد يعقدون محكمة.. للظهر هيج ورجعوا .. محد درى بالسالفة بس احنا بالبيت وجدو.. الباقين عبالهم بنية عادية وصايرة زواجتهم ع السريع چي عمو متوفي.. وليد جاب غرفة جديدة وكله جديد.. وراها بإسبوع جابها للبيت واجت لابسة صاية وشال محطوط هيج شلالي الگذلة شگرة طالعة من الشال بس حسيتها حبابة .. سلمت علينا وفاتت جوة.. عقيل ضل يعاينلي ومچتف ايده.. تقرب علي وهمس : عبالك ذاك اليوم من عرسنا ..
تذكرت اليوم المشؤوم وشكد تأذيت.. سكتت ماجاوبته .. صعدت فوك دااحضرله هدومه معزوم .. اجه حضني من ظهري وشفايفه تمشي بلطف على رگبتي..
عقيل : اريدج.. بس برضاتج اذا ماتردين كليلي..
انداريت خليت الهدوم بحضنه : بالليل علمود احضر روحي..
باس خدي وراح سبح وبدل وطلع..
بالليل تحضرتله وصرت بيده بإرادتي لأن شفت منه اختلاف وتغيير چبير ..

ثاني يوم رحنا لبيت جدي هو طلب نجي علمود تصير زواجة وليد رسمية ع الاقل بيناتنا والكل يعرف.. هو صدك يحبها ومدللها حبيتهم سوه.. طبيت للمطبخ وياهم ونسوي الأكل..
ابتسام : خالة ورود روحي جيبي السيت مالت المواعين بالمخزن..
فاطمة : ورود دتسبح عيني شوفي وحدة من البنيات..
دنوة : هسه انه اروح عوفيهن ديشتغلن..
كمت تمشيت للمخزن يم البيتونة.. الشباچ مكسورة جامته فماندخل هنا قليل بس على كد الحاجة.. رديت الباب وطبيت أدور عليهن.. مااحس غير صار هوى عالي الباب انركعت ركعة اخت الچذب.. كمزت من مكاني ورحت افتحها ماكو لطشت.. حديد شثكلها.. ضليت احاول وأدك بيها بلكت أحد يسمعني .. رحت يم الشباچ كمت اصيح.. ثواني وسمعت صوت رائد بس ماشفته..
رائد : شبيج تصيحين فضيحة انتي..
دنوة : الباب مقفولة ماتنفتح تعال شوفها..
رائد : هسه اجي لاتصيحين..
سكتت ورحت يم الباب تانيته.. شواي وانفتح القفل وانفكت الباب.. رائد واكف بره مادخل.. حط ايده بجيبه ورفع حاجبه : مرگوع الباب وفالت المفتاح صاير ليغاد..
تقربت منه شميت عطره.. نفسه افشان .. اجيت اموت چن كل الذكريات انعادتلي بشكل سريع .. تشكرت منه واخذت المواعين ورحت..
ابتسام : عبالي نمتي.. هاي وينج بطيتي..
دنوة : خالة انركعت الباب وماتنفتح صار ساعة احاول..
ابتسام : شوفي ليش ماردت أدزج.. ماتعرفيلها.. يله ميخالف جيبيهن..
انطيتهيا ورجعت اكمل شغل وياهن.. للمغرب هيج ورجعنا للبيت عقيل مامبين علي شي يعني ماسامع الحمدلله ..

رائد ........
كاعد بالاستقبال بالليل داادخن .. راسي يوجعني وجع موطبيعي.. خلصت الجگارة وصعدت فوك قست الضغط.. صاعد 17 العالي.. عرفته صاعد.. مااكدر انام متضايق وهواي دخنت اليوم.. الباكيت الثالث هذا ربعه خلص.. نزلت سويت ليمون وماي .. اجت امي مرعوبة وتتنفس بصعوبة .. كعدت يمي وكمشت ايدي..
رائد : سلامتج يمة شبيج..
الحجية : يمة رائد بعد مااكدر انه گلبي رچيچ .. دااشوف ابوك كل يومية وبكل ساعة وچنه ديكلي لاتبقون بالبيت..
رائد : وين نروح الله يسلمج.. شنو نبيعه..
الحجية : اي بيعه.. ناخذ حصتنا وانت شوفلنا بيت ثاني اشتري.. عسى ما نكعد بإيجار..
رائد : حجية بعدج مامتعودة على غيبته فتشوفي هيج....
قاطعتني : لا لا يمة شني ماتصدك بإمك.. والله هالبيت من يوم كعدنا بي ماشفنا الخير .. مصايب ومشاكل وانت متهدد حتى ماشفتك بي.. يا بالواجب يا ببيت جدك هاي من هددوك لمن صرت وي الأمريكان.. بعد شني اكثر من هيج..
رائد : متأكدة.. اشوفها مخاطرة وخطوة صعبة..
الحجية : اي يوم اسمع كلامي..
رائد : ادانش فكري واشوف لاتستعجلين..
الحجية : يله بس لاتعوف السالفة وروح ابوك من لمن توفى انه اشوفنه بالحلم يكلي لاتبقون بالبيت ديري بالج على رائد..
بچت هي وتحچي.. كمت من مكاني شبگتها ومسحت دموعها.. ماكتلها صاعد ضغطي ادور شينيمها .. طمنتها وراحت تنام..

صارلها من وره اربعين ابوي تكلي بيعه.. ادور واحد بمنطقتنا انكتل بباب البيت.. فخافت ضلت تلح.. انه خليت محامي قسم الورث وفتحت بيان بس اشوف شراي ابيع واشتري.. بس هوسة يرادلي مجال وهالوكت الوضع فالت فدمرة يادوب انزل اسبوع لو عشر أيام.. محمد بعده موكلش چبير ومايريد يتزوج .. خلاشوف شسوي..

وره چم يوم كعدت الفجر صليت وبدلت دااروح للدوام.. هيج انه ومنصي راسي دااربط القيطان صوتها مر من إذاني چنه نسمة هوى.. كالت : هاي وينك مشتاقتلك.. رفعت راسي ضليت اتلفت بالغرفة مالكيتها.. راحت هي هذا وهم .. سكتت بس گلبي لاچمني.. اخذت الجنطة ونزلت شغلت السيارة حمت وطلعت.. مشت الأيام ماكو شي.. فديوم اجه واحد ضابط بوكت استراحتي هو وياي چنا خفر .. كعد يمي بس مامطمنله..
مجيد (الضابط) : شعندك كاعد مو استراحة..
رائد : والله نعسان مالي خلك شي..
مجيد : دگوم اخذك لوحدة تخبل.. هسه تنسيك همك وبت عمك..
رائد : تدري بيه مااتگرب للحرام.. روحلها انت..
مجيد : يمعود ساعة الك ساعة لربك قابل شكو.. وانت رجال الك حاجتك لشوكت تضل عزابي .. اني متزوج ثنين واحس روحي بعدني محتاج..
رائد : هسه شحاچيك.. تتقصد تحجي هيج جدامي..
مجيد : هههههه.. سيدي انت حتى بهاي صارم.. على كيفك..
رائد : يمعود لعبان نفس مو عندك نسوان ثنين..

ضل يحاول وياي مااقتنع قابل صغيرون وتمشي الحچاية براسي.. الا بنات الليل اتسودن منهن موطبيعيات لعبان نفس.. مثل مايكولون.. فرخ البط عوام .. وانه اطباعي كلها من ابوي.. جنت اسمعه يحجي ع الغجريات اليعدمهن الريس.. يكول هسه مانذب اللوم عليهن بس نكول الزلم التروحلهن هم السبب.. وصدك هيج..

خلص الدوام ورجعت للبيت.. طلعت بتلاثة الا الفجر.. ماردت ابقى اكثر اريد انام ميت نعاس ومتحلم بأبوي اريد اروح للمگبرة.. الفئة السنية من الشعب ومن ضمنهم عائلتنا يخافون يدفنون بالنجف بهالفترة بسبب الطائفية.. فيدفنون بمگبرة ابو غريب.. انه چي ضابط ومنصبي عالي ماخذ راحتي خوما يغتالوني وياي عائلة.. فالهالسبب دفنته بالنجف..
بين ما وصلت الشمس بعدها هستوها دتطلع.. طبكت السيارة بره ودنجت ع الچكمچة دااطلع المفاتيح كبت عيطة وصلت لسابع جار من البيت المقابيلنا.. رفعت راسي طلع واحد ملفلف وجهه بس عيونه مبينات وكامش بيده جنطة.. طلعت المرة تصيح حرامي .. دفرها بعكسه وضرب طلقة بإتجاهي بيني وبينها شعراية چا طبت بچتفي.. شرد .. انه من الموقف والهبطة ماكدرت اسوي شي.. انداريت شفت الطلقة طابة بالدنگة محفور مكانها.. امي طلعت شافتها تخبلت .. طبيت وقفلت البيبان صدك جفلت..
اجت يمي كمشت چتفي وتبوس بيه : خوما صارلك شي حبيبي..
رائد : يمة شبيج حيصيرلج شي.. لاتخافين مابيه شي..
الحجية : مو كتلك بيع البيت انت ليش ماتسمع الچلمة.. الا نتعزى ونتصخم..
رائد : هسه انه شايف دربي ياعيني دنطيني مجال اشوف بيت اصغر من هذا وبمنطقة زينة وابيعه ميخالف.. هو انه ماشي بالمعاملة..

صعدت سبحت ونمت.. مرن يومين وطلعت انه ومحمد أدور بيت مناسب.. ضليت فترة أدور وأسال معارفي لحدما عارف جابلي واحد يريد يراوس بيته ببيت كلاسيكي.. رحت شفته جديد مامسكون بس چم شهر..
رائد : اكو واحد يراوس هيج بيت ببيت قديم..
عارف : الناس اذواق يمعود.. شوفه زين تره وبي غرف هواي.. ماشاءالله انت الوادم رايحة وجاية تكول ماعدهم بيت بس بيت المرحوم..
رائد : اي والله ماچذبت.. خلأشوفه شكد ياخذ فرق واتوكل..
اتفقت وياه ع التلفون اشوفه يم مكتب عقاري وراها رحتله.. اخذته للبيت شافه انعجب بي.. شعدنا احنا قابل جهال ويشخبطون ع الحيطان.. كاعدين وساكتين حتى الصبغ جديد چنه.. قبل بي وراد فرق 65 مليون.. مااختلفت عليها كتله انطيكياهن كاملات بس اصبرلي چم يوم.. بعت الذهب الاشتريته لدنوة وسحبت من البنگ كل الفلوس الحاطهن بإسمي.. ماتکربت لفلوس محمد واخلاص وراها رحت وياه للمكتب انطيته الفلوس وتعاقدنا.. هو فاتح بيان فالمعاملة تمشي بالعجل.. وانه همات فاتح..

بدوا يلمون بالنواعم وانه فكيت الغرف اعرف افك واشد ماجبت واحد من بره بس بالنقل.. التهيت كلش ومددت الاجازة بين مافرغنا البيت وقفلته ورحت للبيت الجديد.. هو دفع فلوس سرع المعاملة واجه اخذ المفاتيح وانتهى كلشي.. سجلته بإسمي بطلب من أمي.. كتلها خو بإسمج انه شكو.. ماقبلت وأصرت ماعارضتها وسويت الرادته.. شديت الغرف والبنكات علگتهن محمد فكاكة مايعرف..

چم يوم وكملت بعد كعدت ماسويت شي.. بالليل هيج خابرني جدي..
شامخ : ها بوية شونك..
رائد : هلا بيك يابة.. الحمدلله الله يسلمك.. انت شلونك ضغطك..
شامخ : على الله وليدي.. شني سمعت شايل وبايع البيت..
رائد : اي والله شلت للـ ..... منين سمعت..
شامخ : خالة دنوة شايفة امك وكالت.. ادري اليبيع هيج سكتاوي مايصير..
رائد : صارت بعد وتعرف واحد جوارينا اغتالوه امي لحت بعد..
شامخ : وين صاير بالضبط.. دليني اجيك همات لازم نبارلك..
رائد : الله يحفظك.. دليته ع البيت كال باچر جايك.. ماكلت لا .. انطيت خبر لأمي وطلعت جبت اكل من بره يكفيهم.. اجه هو وعمامي.. يونس وسالم ومهران وقصي اجوي.. ضيفتهم وباركولي .. الولد جايبين هدايا بس جدي انطاني فلوس.. تشكرت منه وبقوا للعصر بعدين راحوا..

يومين تلاثة والتحقت.. داومت ولمن خلص الدوام رحت لأنس شفته بعدني متندم چي اخذت منه دين.. كعدت وضيفني.. حچينا وهناك سألني..
أنس : شو ماگتلي تزوجت لا.. انفجعت بوفاة والدك ونسيت اسألك..
رائد : لا والله.. ماصارت ..
أنس : لا الله عليك.. صدك.. ليش حرامات..
رائد : صارت مشاكل ماتنحچي وراحت بطريقها..
أنس : يله خوية الله يعوضك.. تره الف وحدة تتمناك شبيك قابل..
ابتسمتله بالچذب بعدين طلعت..

هالحچي بالليل بالتسعة هيج.. مريت من فرع بيت خالي.. والله مالي خلك أبات وتعال احجي وجامل هو انه ماطايق روحي.. كلت أرجع حتلو اوصل الفجر عادي ماامشي سريع.. اخذت السيارة وطلعت للبصرة.. بالطريق نعست نعاس.. كافر .. نزلت تلث مرات غسلت وفتحت الراديو بس مااريد اغفى.. طريق عام اذا اوكف دقيقة تجي سيارة تهفني.. بيني وبين البوابة تقريب العشرة كيلو بس غمضت عيني ثواني فلتت السيارة مني.. ماحسيت بيها اريد اوكفها بعد مااكدر من هول الموقف ضيعت وين البريك.. بس حسيت بلطمة قوية على صدري وراسي بعدها مااتذكر شلون وليش..

كعدت راسي يوجعني چن درنفيس يحفر بي.. صدري مشدود ببلاستر وايدي معلگة همات مشدودة.. اجت امي باست خدي وتمسح دموعها..
الحجية : الف سلامة يمة حبيبي.. لاتتحرك..
رائد : شصار يمة..
الحجية : سويت حادث.. لاتفكر ارتاح..
سكتت لأن صدك مابيه حيل اتحرك لو احجي.. اجه الدكتور تفقد حالتي كال صاير عندك رض بصدرك بس خفيف مايطول ويتحسن.. الاربطة بمفصل ايدي متشنجة بحيث ايدي يابسة مااكدر احركها نهائيا.. وراسي همات متأذي.. عدل كعدتي وجابتلي أمي قميص لبستنيا مااكدر اسوي شي متكسر.. شد ايدي برگبتي.. بقيت بالمستشفى يومين بعدين طلعت ورحت لدكتور مفاصل وعظام.. كتبلي ادوية ووصاني على چم شغلة.. رجعت للبيت وبدوا يجوني گرابتي وصحباني .. بالكوة اعدل نومتي جسمي يوجعني..
اجه جدي باس راسي وخلالي فلوس رفضت اخذ : جدي اذا تعزني اخذهن..
شامخ : لا مايصير.. الولد جابولك كلشي مالكيت شي مناسب غيرهن..
اخذتهن وتشكرت منه.. ضلوا فترة يجون ويروحون ماادري منين حتى ناسيهم.. الفلوس الاجتني صرفتها ع الدكتور.. كمت اروحله بالأسبوع مرتين يسويلي تمارين علمود ايدي تتحرك وينفك التشنج.. تأذيت من وره هالحادث.. السيارة محمد اخذها للمصلح وهو ديسويها بعد..

بيوم كاعد بغرفة أمي داادخن جدام المراية.. راسي مشدود ووجهي مشخط من يم گصتي وخدودي.. اكره التقيد والكعدة بالبيت طكت روحي..اجت امي حطتلي الاكل واشوفها قلقة تريد تحجي شي بس ساكتة..
رائد : شبيج حجية.. تردين تحجين شي..
الحجية : شونك يمة شون صرت..
رائد : زين الحمدلله هذا خوش دكتور..
الحجية : اي الحمدلله.. تگربت مني وباست راسي : يمة لمن فقت من البنج كمت تهذي وتسولف اشكال الوان..
رائد : اي وين المشكلة.. كلها هيج..
الحجية : ادري بس انت جنت تحجي بدنوة.. ادور تصيح وتبچي الا اجه الدكتور انطاك مهدأ يله نمت.. ابن عمك عقيل لمن سامع اجه حاچاني كتله هو مريض خطية مايدري برويحته قابل شني بكيفه ديكول هيج.. يعني جاريته وراح.. هم حقه..
صفنت عليها وگلبي نغزني من طاري دنوة.. ماادري بروحي هيج حاچي.. اويلي شكد كتمت بداخلي وحتى بيني وبين روحي مااكول اسمها اكول حرام متزوجة مايصير.. تالي طلعت هسه بهالبنج.. كتلها : اي يمة زين تسوين.. شنو المطلوب مني..
الحجية : انساها يمة الله يوفقك.. بس تطلع سنة ابوك اخطبلك وحدة تلوگلك انت همات كبرت لاتنسى روحك هذول مو يونس وقصي اصغر منك وواحدهم بالناقص عنده واحد..
بست راسها واحجي بصعوبة : ميخالف الله كريم.. انه مااريد اتزوج هسه يمة.. لمن اريد اكلج عود خطبيلي.. خوما جبر هي..
الحجية : لا كلشي ولا هالشغلة مابيها اجبار..
رائد : ها هاي تعرفين بعد شكو.. تعاي اكلي وياي مااشتهي وحدي..

كعدت يمي بس مااكلت علمود سكرها كلش تحافظ ع الأكل وتنتبه.. اخذت المواعين بعدين اجت اخذت دواها ونامت.. شلت الباكيت والنفاضة رحت للاستقبال دخنته كله كفرت بي.. دورت بالبوفية لكيت باكيت باقي بي خمسة ستة هيج.. باكيتات جگايري مطشرة بكل مكان اخلي باكيت واعوفه.. طلعت بالطرمة دخنتهن.. كعدت ع الصبة ومقهور ميت قهر على وضعي النفسي والخارجي.. حبي راح.. صحتي متدهورة.. انه وافكر صاح الله اكبر أذن الفجر.. جريت نفس طويل وزفرته بقلة حيله بعدين طبيت..

بمرور عشر ايام عزمني جدي ورحتله انه ومحمد.. هم اجوني للبيت بس بعد ماارفضله طلب.. رحتله وصبولنا اكل مايتعاب.. كمت واخذني محمد دااغسل سمعت صوتها تضحك.. هذا صوتها لو انه متوهم.. تقصدت اماطل اريد اتأكد..
كالت بصوت عالي مثل عوايدها : سرووور وين الخاوليات محمد يريد..
يابوية دخيلك هاي هي.. اجيت اندار وتراجعت.. مااريد اشوفها.. نشفت ورجعت للديوان العصرية رجعنا بسيارة سالم..

بعدها بديت اتحسن وصرت للأحسن ع الدكتور هذا.. شلت البلاستر من صدري بس ممنوعة علي الحركات المفاجئة والسريعة.. ايدي همات تحسنت والحمدلله.. السيارة كمل تصليحها وجابها محمد.. بقيت فوك الشهر ونص بالبيت بعدين يله التحقت..

بالدوام واجاني أمر اطلع مأمورية للبصرة.. اخذت جنود وبعد چم ضابط ورحنا.. سويت الشغل المطلوب وتفقدنا الوضع ولو البصرة من وره السقوط يرثى لها بسبب القوات الثانوية الدخلتها لأن سنة وشيعة فصارت هوسة وبيها طائفية.. وراها طلعت تفتيش للديرة.. وصلت لبيت عمي كاظم وگلبي چن انشال مني وانعصر حييل.. دكيت الباب طلعتلي هي.. سمرة والعيون شهل شحلاتها يالله دخيلك شني ملاك انتي.. حچيت وياها بصوت حاد وطبيت مااريد اجيبلها الشكوك انه رجال ماعلي شي ياهو اليتجرأ يحجي.. عفت الجنود والضابط يفتش جوه وصعدت فوك فتشت الغرفة مالتها .. اول ماطبيت اجتني ريحتها.. شالاتها معلگة ع التعلاگة.. ماجذبني بس هدوم عقيل يم مالاتها.. طلعت رأسا قابل شعدهم هم.. هي تعاين علي احس بيها ولمن حاچيتها بجدية ادري بيها انقهرت.. البداخلها مو اكبر من البداخلي.. خليت ورحت لبيت جدي همات نفس الحالة لحدما خلص الدوام ورجعت لبغداد اخذت السيارة ونزلت للبيت..

مرت فترة وانه كاعد بالسيارة داانظفها دك التلفون.. منو .. رقم غريب.. شلته..
صوت بنية بس موغريب علي : الو عيني..
رائد : اهلا.. منو..
- : سيدي ماعرفتني شبيك..
رائد : ولا صغرا بيج..
- : اول شي الحمدلله على سلامتك سمعت مسوي حادث..
رائد : الله يسلمج.. بس ماعرفتج منو..
- : انه صديقة محمد هيفاء نسيتني..
رائد : هو انه ماتجي علي بس الخلاگين.. شكو شتردين..
- : مشكور مقبولة منك.. انت تدري الناس لأهلها وانه الصراحة تركت شغلة بيوت الليل وهاي الأمور انت أعرف بيها.. فهسه كعدت ببيت صغير وكمت اشتغل سكرتيرة لدكتورة نسائية.. هذا الشهر الدكتورة سافرت وماعندي ايجار.. بلكت تساعدني اخاف ابو الملك يشيلني..
رائد : ماادري اذا دتضحكين علي لو دتشاقين.. وانه ياهو مالتي خاطر اساعدج..
- : والله مالكيت واحد غيرك يساعدني ويفك كربتي.. اضل ادعيلك لحدما اموت..
رائد : لا يلدغ المؤمن من جحر مرتين.. ماطولج سويتيها علي كولبة وردتي تاخذين ضعف المبلغ وتذبين اخوي سجن فأعذريني لأن محكدر انطيج واللبيب تكفيه الاشارة..
سديته بوجهها.. شون عين صلفة عليها.. هسه لو اعرفج وجاي عليج چا گلنا بيها مجال ع الاقل عشرة بيناتنا.. بس هيج صلافة ماكو..

سديت سالفتها ومشت الأمور ع الساكن.. الى أن جنت يم عارف من العصرية ورجعت بالليل.. اخلاص صبت العشة بس محمد ماكو..
رائد : محمد وين..
اخلاص : ماادري طلع..
جريت التلفون خابرته كال يم صاحبي.. مشى الوكت لحد نص الليل هو ماكو.. ضلينا كاعدين نتاني.. رجع وجهه مصوفر وخايف بس سلم وراح نام.. انه همات شفته رجع صعدت فوك.. نزعت القميص داابدل لكيت الكنتور مفتوح بابه الجواني اخلي بي فلوس.. نصيت علي طلعت الفلوس حسبتهن ناقصات تلثمية وخمسين.. طز بالفلوس جوه قندرتي بس لمن تنوخذ شغلة من دون علمي لا هنا غير حچي.. طلعت صحت محمد جريته من قميصه..
رائد : الفلوس وين..
محمد : يافلوس شدتحچي..
رائد : فلوس الراتب ناقصة.. اخذت منهن..
عت ايدي وخازرني : كتلك مااخذت فلس واحد ليش تشك بيه.. يمة شفتي شيكول ترضينها..
الحجية : يمة دحچي الصدك ولا تلوعه.. وين الفلوس..
ضل يماطل مايقبل يحجي بعدين كال انه اخذتهن.. اخذته على صفحة ماردت افضحه جدام أمي وهو من ذيج المرة حلف مايروح لهيفاء وهالأماكن..
رائد : اخذتهن لهيفاء مووو..
محمد : اي والله انقهرت عليها كالت ماعندي ايجار..
رائد : من امداك يالأغم انت اثول ماتصيرلك چارة.. لو كايلي چا ماخليتك تاخذلها فلس احمر.. لك هاي رادت تذبك سجن اقل شي 15 سنة شبيك ماعندك عقل..
محمد : شسوي يعني ماكدرت وانه كلت بس اروح للبنك ثاني يوم اسحب من فلوسي انطيها لرائد والله ماماكلك..
هديت ايده وعفته.. شاب طايش ماينلم.. مرن يومين وراها اجاني للغرفة شاد فلوس بتچة بكد المبلغ الأخذه.. اخذتهن منه وراح..

مرت ايام كلشي بيها هادئ.. دوام وبيت وهاي على هالمنوال.. اشكال ناس تتكتل.. نوبة انه وبالدوام على جسر حي العامل فات عرس ورموهم الأمريكان.. صار عزى عليهم مو فرح.. من يمي انقهرت خطية.. عاد هم شلون..

بيوم كاعد يم عارف ودك تلفوني.. خالة ابتسام.. استغربت شعجب خابرت.. خاف عمي بي شي كل الإجه ببالي هاي الشغلة.. شلته ورحت بره احاچيها.. بس السمعته مو صوتها.. صوت دنوة.. طلبتني بشغلة حنان شفتها شلون تترجاني بعد شوي تبچي.. كتلها ميخالف.. بس داومت دزيت ثنين ولد اعرهم عراكة على محل الرجال الگلتلي علي..
رائد : بس تروحوله لاتكتلونه خيولي.. اخذوا الصور منه وجيبوها..
- : سيدي منو يكول موجودة الصور..
رائد : هدده وخلي ينطيكياهن غصب.. بعد هاي شغلتكم..
- : حاضر..
راحوا ووره يومين هيج اجه صباح (واحد منهم) جايبلي الصور..
- : طلع جبان كلشي ماسويناله بس شافنا ملثمين انطانياهن.. اخذت تلفونه همات كسرت السيمكارت وانطيتهيا..
رائد : اي مبين علي مخنث..
طلعت فلوس انطيته وراح.. ماتفرجت عليهن رأسا شگگتهن وخابرتها كتلها ع الصار ضلت تتشكر مني..

سمعت بوليد متزوج بس زواجة سريعة.. مادخلت بالتفاصيل بس رحت لبيت جدي هو عزمني رحت انه ومحمد.. اشتريتله هدية وباركتله.. كاعد وياهم ديحچون چان يدك تلفوني.. ترخصت منهم ورحت للحديقة الورانية.. خلصت مخابرة وسمعت صوت دنوة تصيح.. تمشيت للمكان حاجيتها بدون ما اندار.. فتحتلها الباب لكيتها باچية وعيونها رطبة مبينة.. تشكرت مني وانه من ودي اضل اتفرج عليها وأفصلها.. راحت تتمشى وتمايل بروحها هي مشيتها هشكل.. استغفرت ورجعت للديوان.. شجاك يمعود شنو اول مرة تشوفها قابل.. بقيت يمهم للمغرب هيج ورجعت..

دنوة ........

مر اسبوع صافي ماكو شي.. شغل وبيت ونوم.. جيهان (مرة وليد) حبابة وتساعد بالشغل الا روان عبالك ست البيت وهي الآمر والناهي.. ادور عقيل مايكللها شي..
واكفة ع الكاونتر دااثرم زلاطة ودخلت جيهان..
جيهان : ياا هاي شنو دتشتغلين وحيدج.. جان صحتيني..
دنوة : بعدج عروس انتي لمن تحبين تساعديني عود تعاي..
ضحكت وتقدمت يمي اخذت من ايدي تكمل : لك انتي ماادري شون ماتحبج هاي السعلوة.. دخيل ربج على كولتكم..
دنوة : ههههههه.. هي موزين تحب روحها يمعودة اتركينا منها..

شواي ودخلت روان..
جيهان صاحت : أهو ئدامك.. گبنا سيرة القط ئام ينط..
نصيت راسي واكركر.. هي انتحست وطلعت رأسا..

مشت الأيام بهالشكل.. الى أن اجتني روان وانه بالهول داارتب بالكوشات وانكت القنفات.. كعدت ع الكرسي ولافة رجل على رجل..
روان : عيني بعد الدنيا كلها حتصير بيدي..
ماجاوبتها.. رجعت حچت..
روان : شبيج ماتسمعين..
دنوة : شتردين..
روان : انه حامل دنوة.. مامصدكة والله..
دنوة : الف مبروك عيني..
صدك فرحتلها.. مهما يكن هي صارلها سنين تنتظر هاي الفرحة.. بالليل اجه عقيل وگلتله.. ضل مصدوم مامصدك مثلها.. عفتهم كاعدين واخذت اكرم وصعدنا فوك.. نومته يمي واسولفله قصص.. انه غفيت وهو بعده..
كعدني : ماما كعدي حبابة..
دنوة : ها شتريد ماتنام ولك..
اكرم : بعد قصة بعد..
دنوة : لك شنو هي نستلة علمود كلساع بعد وبعد.. يله نام وباجر اسولفلك خمسة..
حضنته ونمت..

مرت تلث أيام التهينا بالعزايم ماادري شكو كلساع عقيل عازم جماعة.. اندكت الباب وطلعت افتحها.. ثنين زلم..
دنوة : تفضلوا.. منو..
- : صحبان عقيل.. مو هذا بيت ابوه..
دنوة : اي هذا.. دخلوا..
فاتوا وراهم بدقايق اجه عقيل.. صبيت الغدة وانه متغدية اصلا فصعدت فوك سبحت ورحت للغرفة تمددت داانام مااحس غير ع الباب اندفرت دفرة قوية.. كمت من مكاني بالعجل.. اجه عقيل كمشني من رگبتي.. روحي ماعت عبالك هلكد ما كامشني قوي..
عقيل : طالعة تحاجين الزلم.. انتي سودنتيني.. شسويلج ماتتعلمين فهميني.. حتى الجاهل اذا اگله لاتسوي هيج مرة اللخ مايسوي..
دنوة : ماجنت ادري هذول رياجيل والله وروح امي..
عقيل : لا تدرين وتتمضحكين وياهم عيني وعيني..
شهكت وخليت ايدي على حلگي : چذب والله جذب.. ماسويت هيجي.. منو گلك..
عقيل : گلولي.. واذا مرة اللخ انعادت قسما بذات الله اذبحج وانعل شرفج.. ذيج المرة طلعتي لرائد وكلت ميخالف محد بالبيت ويبقى ابن عمها موغريب.. بس تطلعين للغريب لا انعل سلفة سلفاتج..
دفعني ع الجرباية وراح..

دفنت راسي بالمخدة وابچي بحرگة.. شكد حقير وشكاك كرهت الشك مالته.. دااحس روحي بقفص ومحطوط فوك نار دينصهر بهدوء وهو كامش المفتاح مايقبل يفتحلي.. هلكد ما بجيت تعبت وغفيت.. كعدت العصرية ع الباب ندك.. خليت شال ورحت فتحتها صارت جيهان بوجهي..
دخلت وانه رحت ع العلبة مالت المكياج اخلي كحلة علمود مايبين علي شي..
جيهان : عمي سأل عليج كال وينها..
دنوة : اي جنت نعسانة شوي واجيت نمت..
جيهان : عقيل خوما ضربج.. عفية هذا شبي بس يكتل كبر..
دنوة : لا ماسوالي شي.. شمدريج يكتل..
جيهان : وليد يحچيلي..
دنوة : لا صار زين بس هو عصبي..

ضلت يمي تسولف وياي بس بقى كلامها ببالي.. فشلني عقيل وين ماروح هالكلام ينگالي.. بالليل تانيته يصعد وصعدت وراه.. قفلت الباب وكعدت يمه..
دنوة : عقيل.. كافي تكتلني..
رفعلي حاجبه متفاجئ : شني المناسبة.. شرايدة..
حجيتله ع الكالتليا جيهان.. سكت واعتذر مني.. : ادري اخذتج غصب.. بس اريدج تتعودين علي.. مدااشوفج تتعودين..
دنوة : لا دااتعود بس انت تأذيني هواي بكلامك وفعلك..
گومني من ايدي وكفت جدامه.. باس خدي وحضني : اعتذر شسوي والله عصبي بخبال.. بادلته ردت أمتص غضبه وصار هيج.. حرت وياه.. دورات ماكو أحن منه ودورات يموت خوف هلكد ما عصبي ومايتفاهم..

وره فترة اجت غدير هي وجهالها ورجلها.. سوينا غدة دسم والتهينا.. اكرم راح يلعب وي جهالها ومتونس.. وره الغدة العصرية هيج دخلوا كلهم بس ابنها الصغير بكد اكرم ماكو..
غدير : وين ابراهيم عمة اكرم.. مو جان وياك..
اكرم : ماادري عمة.. شمر الطوبة بره بالشارع وراح يجيبها..
كامت بالعجل مخروعة وانه رحت وياها.. ضلت إدور بالشارع ماكو.. من يمي خفت.. راحت لنبيل رجلها كلتله.. طلع متسودن هو وعقيل يدورون علي.. هي گضتها بچي انقهرت عليها خطية.. كعدت يمها اواسيها.. لهناك المغربية ورجعوا جايبينه وجايين.. عقيل لابس تشيرت ابيض صاير كله دم.. كمت يمه كمشت ايده : ياستار.. شبيك عقيل..
عقيل : هذا الكلب ابن الكلب..
ضل يغلط ويفشر.. هذا الطفل بس يبجي..
اجه عمي كال : شبيكم.. ابراهيم شبي..
نبيل : عمي لكيت واحد ميخاف ربه يريد يتحرش بإبراهيم.. چمالة جبير موتكول مراهق.. يطلع ببداية العشرين.. عقيل كتله ماخله على حاله حال..
كاظم : لا يامنعول اللشة.. هاي الشغلة ماينكعد بيها عشاير تعتبر خزي.. احنا نكعد بس من طرفه محد يجي..
نبيل : اي عمي صحيح.. لا اني ذبيته بالمركز هسه بس جبت ابراهيم وعقيل يبدل اروح ارفع دعوة علي الا أخيسه عشر سنين..
صعد فوك يبدل ونزل بالعجل راح هو وعمي ونبيل للمركز.. عمتي خابرت على جدة واجت قرت على راسه وغسلتله بماي مقري علي من سادة وشيوخ.. دائما يكون عدها منه.. اكللها جدة شعندج تجيبينه.. تكول عدنا جاهل.. بلچن جفل.. ينفعنه ..شوي فكته وسكت بس بعده متفاجئ عبالك.. انگلبت السفرة عزى.. لليل يله رجعوا.. كال رفعت علي دعوة بس باجر يخلي محامي ويتاني القضية تصعد محاكم.. أهل الولد مامعروفين للآن.. هو اليسوي هيج هم عنده أهل.. بقينا كاعدين وياهم للثنتين هيج بعدين كلمن راح لداره..

صعدت فوك لكيت عقيل نازع قميصه ديبدل.. چتفه ومنطقة الظهر فوك كله احمر ومجرح.. تقدمت خليت ايدي علي..
صاح : ااااخ.. لاتخلين ايدج بابا..
دنوة : يوجعك..
عقيل : فدمرة..
دنوة : اصبر لاتلبس..
نزلت جوة للصيدلية بالحمام جبت مرهم يسكن الألم وصعدت.. ابتسمت لمن شفته كاعد ع القنفة بدون فانيلة..كعدت يمه : ها تسمع كلام..
عقيل : هههههه.. تدللين..
دنوة : دير وجهك أخليلك..
اندار وبديت أخليله.. هو متوجع خطية بين ما كملت اندار علي حضني وباسني..
عقيل : مقهور على ابراهيم..
دنوة : اي خطية مايستاهل..
كام تمدد على بطنه غطيته ورحت من الجهة اللخ..

ثاني يوم راحوا للمركز جاي بس اخو الولد.. ماعنده لا خوات ولا أب وأم.. رايحين للبيت كاعدين بالچولة.. يعي هذا البشر لمن يطيح بمصيبة يروح يسوي حرام.. دسوي خير بلكت الله يگومك من مصيبتك.. صدك الشيطان قوي.. أخوه كايل خلتصعد محاكم انه ماعندي فلوس اسوي شي لو ادفع فصل.. عاد انفتحت القضية ومنتظريها توصل محكمة..

بقوا عدنا يومين وراها راحوا.. وره روحتهم العصرية كاعدين كلنا دنتفرج تلفزيون وملل.. روان تعاينلي وخازرتني بكل حقد.. عفتها ورحت للمطبخ اسوي چاي.. كملته وصبيته.. هستوني انداريت وشايلة الصينية ماحسيت غير على ايد روان دفرت الصينية طاح الچاي على فخاذي والاستكاين تكسرت .. كمت اصيح وابچي.. الكل اجه مخروع.. عقيل رفع الدشداشة عن فخذي ومشاني بره المطبخ هو ويصيح : روان البت الكلب انعل ابوج لابو ليش تسويلها هيج..
صعدت فوك نزعتها رأسا.. فخذي مهلوط صاير احمر حيل.. عطت من الخوفة..
عقيل : لاتتحركين هسه جاي..
نزل واسمعه يصيح ويكسر.. الباب انرگع.. بقيت بالغرفة ألوب.. متت من الحرارة هستوني مطفيته طبعا حار ويچوي.. رحت للكنتور لبست دشداشة گصيفة ورفعتها عن فخذي.. وره ثلث ساعة هيج اجه جايب ادوية.. تمددت وهو خلالي من العصارة..
عقيل : خوما غسلتيها..
دنوة : لا ماسويتلها شي..
عقيل : اي خوش.. هاي الادبسز هواي مسلتت.. اصبريلي چم يوم اشوف بيت بي خير ونشيل..
سكتت والصراحة يكون احسن اذا شلنا لبيت وحيدنا.. بقى كاعد يمي ويحاچيني.. بعدين راح نزل.. ثاني يوم مانزلت هو ماقبل بس جيهان ماقصرت هي تجيبلي الأكل.. قرر يشيل وديدور بيت ايجار.. عمي ماقبل بالبداية بس لمن شاف المشاكل والهوسة قبل..

مر اسبوع بهالحدود كال لكيت.. رجلي تحسنت فبديت أصرصر بالغراض.. ماعدنا شي بس الهدوم.. كملتهن بيومين وراها اجوا ولد ثنين فكوا الغرفة ووداها لذاك البيت.. بعدني ماشايفته بس يكول مرتب وململم.. عمتي انطتنا غسالة وبردات.. وعقيل اشترى زولية لأن بلش الجو يبرد وكاونتر وطباخ.. سنك هو موجود بالبيت.. كال بس نستقر اغيره عود وأجيب جدد.. لبست شال وعباية وودعت جيهان والباقين بعدين رحنا.. طبيت شفته.. حلو مابي شي.. راح يجيب أكل من بره تعشينا وطبينا نمنا.. عاد ثاني يوم اجت خالة ابتسام وسرور وعمتي فرشنا الزولية ورتبناه لأن هوسة كلش.. علگت البردات ومسحته.. هواي سوينا شغل لحد المغرب هيج اندكت الباب فات ابوي وعقيل.. رحت حضنته.. ضحك وباس راسي..
دنوة : اليوم جنت على بالي.. كلت اجي اشوفه..
محيي : الگلوب سواجي بوية.. هاي اجيتج..
ضحكت وطبينا جوه.. صبيتله عصير وكليچة وكعدت وياه.. رادوا يرحون وانه ماقبل.. أول مرة يفوتولي ورحون هيج.. راح عقيل جاب اكل من بره وصبيناه.. تعشوا بعدين وصلهم ورجع جايب علاگة سودة وياه.. عرفته شرب.. درت وجهي ورحت للغرفة تمددت ونمت..

كعدت الصبح لكيته نايم بالفانيلة والبنطرون ريحته تلعب الروح.. الهول متروس بطالة.. رفعت الدشداشة خليتها على خشمي وجبت كلينس شلتهن خليتهن بالچيس طلعت ذبيتهن بالسلة بره.. انداريت لكيته وراي وعيونه حمر..
عقيل : شطلعج..
دنوة : ذبيت الشرب.. مو كلت مااشرب بعد..
عقيل : متعود.. هسه سويلي اكل جوعان.. اريد أولي للشغل..
سكتت ورحت للمطبخ سويتله.. راح يبدل وطلع.. ضليت احوص بالبيت.. انظف وأحاول ألهي روحي.. بالليل رجع جايبلي تلفون.. بسته وتشكرت منه..

مرت فترة كلشي هادئ..الى أن واكفة الظهر بالمطبخ دااسوي غدة جان تندك الباب.. خليت شال ورحت فتحتها.. خالتي وبناتها وأم رائد اجني.. بوستهن وطبينا جوه..
دنوة : همزين اجيتوني.. والله ضايجة وحدي..
دنيا : ياااا.. غير تكولين يمعودة.. كلساع نجيج..
دنوة : هههههه.. الله يخليكم.. شكو ماكو..
ضلينا ندردش بعدين رحت للمطبخ اكمل الغدة.. اجت حلا وكفت يمي تريد تحچي شي ودنيا تخزرها يعني لاتحچين..
اخر شي عاطت : اهووو.. دخليني احچي..
دنوة : شكو شبيچن..
حلا : رائد جابنا لهنا..
عاينتلها وغصيت بگلبي : اي شسوي يعني..
دنيا : گتلج لاتحجين.. الا تحجي وتمسلت..
دنوة : دعوفيها عادي مامهتمة انه..

صبينا الغدة وبقوا عندي.. تونست وياهن سوالف وشقة مشى الوكت.. للمغرب اندكت الباب.. طلعت افتحها وانصدمت برائد واكف..مااجه ببالي شي بس هيثم يوسف لمن يكول..
" نظراتك تحرجني وانسى .. وين توديني ليا مرسى "

عيوني غرغرت تمنيته خطيبي هسه واحضنه براحتي.. نصيت راسي..
كال بصوت حاد : وين الجماعة.. خليجون بالعجل..
دنوة : اي هسه حگللهم..
مسحت دموعي وطبيت صحتهم.. جهزوا روحهم وطلعوا.. طلعت وياهم ودعتهم.. ماكدرت أمنع عيوني كلساع أعاينله هو يورث جگارة ويطفي اللخ..
حتى أمه انتبهت : يمة كافي جكاير..
رائد : اي هو هم.. هسه اوصلكم واشتري باكيت لاخ..
الحجية : عود اگله لادخن يكول اشتري جديد..
ابتسملها بتعب وكال صعدوا وراي دوام.. صعدوا وراحوا.. سديت البيبان وطبيت..

عقيل تغير علي.. چنه اختلى بيه وكام يسوي اليعجبه.. يجيب شرب يضل يشرب للصبح.. اخاف منه لايروح يكتلني فأعوفه وانام.. اكعد الصبح الاكي مكسر الگزاز والقواطي مطشرة.. ماتحملت الوضعية.. جريت التلفون اخابر ابوي.. جره مني وسطرني راشدي.. إذني كامت توش..
عقيل : اذا خابرتي انعنع عظامج وبكيفج بعد..
دنوة : ليش تسوي هيج.. حقارة هاي.. اكرهك مااريدك..
عقيل : ماتهميني انتي.. المهم انه مرتاح وياج..
وتقرب مني أخذني بالغصب وراح.. اجيت انفجر بوجهه من الحسرة البداخلي.. لو باقية هناك احسن.. عبالك مان علي.. شريد احجي يكلي مو أجرتلج بيت.. انجبي وسكتي.. ماانكر خوفي منه فطاوعته بكلشي يكوله ويطلبه .. الى أن فديوم اجاني بالليل بدون شرب.. حتى تفاجئت بس وجهه احمر چنه متعارك..
صاح : تعاي دنوة سويلي اكل..
رحت اسويله ماباقي عدنا هواي يرادلنا مسواك.. سويت الجوه ايدي وحطيته جدامه.. دفر الأكل.. شهكت واستغفر : ليش هيج سويت.. موحرام..
عقيل : هو هذا اكل.. شبيج ماتعرفين تسوين..
دنوة : ماعدنا بس هذا منين اجيب..
تقدم علي كمشني من شعري ضربني راشدي بدون سبب.. ضل يكتل بيه ويصيح اكرهج اموت منج عساج بالموت.. ماهمني الكتل بكد كلامه.. مايحاچيني هيج هو شصايرله.. كام مني وراح انخمد.. شلت الاكل ذبيته صار بي گزاز بعد مايفيد ورحت نمت بالهول..

ضل هيج.. يجي عصبي ويتدروش علي.. ماادري شبي.. بالليل يكعدني مصخن.. اكعد اسويله كمادات وخافض حرارة يله يهدأ وينام.. كام عود يريد يعوض التصرفات الحقيرة اخر فترة يجيبلي اكرم من الصبح لحد بالليل لمن يرجع من الشغل ياخذه للبيت يم عمتي.. ماكو مرت اربع أيام مو اكثر وكعدت بالليل مالكيته موجود.. خابرته اكثر من مرة مايجاوب.. بعدين بتلاثة هيج اندكت الباب.. رحت فتحتها بلا وعي.. دخل جوه بالعجل وحاط ايده على حلكه.. طبيت وراه لكيته ديستفرغ ويشهك مختنك.. فتحت الشباچ وانطيته ماي.. شربه وراح تمدد.. مابي ريحة شرب.. چا شبي..
دنوة : عقيل صاير شي بره البيت.. احجيلي بلكت اساعدك..
عقيل : لا ماكو شي لاتهتمين.. عوفيني انام نعسان ميت نعاس..
ساعدته يمدد وغطيته..

ثاني يوم طلع للشغل ورجع بالليل من وكت.. خليتله الاكل ورحت ع التلفون يدك.. رقم غريب..
شلته وسمعت صوت رجال كال : الو خوية..
دنوة : نعم تفضل..
- : ابو وسام..
دنوة : لا عيني غل.....
مااحس غير التلفون انشال مني وانهطر بالكع.. كمشني من شعري شبعني كتل ويغلط ويفشر..
عقيل : هااااا خاينة بت الچلب.. انعل ابوج لابو حتى الخلفج..والله اذبحج ذبح اليوووم..
كمت ابجي واحير وين اخلي ايدي.. اقوى كتله انكتلتها منه.. ركع راسي بالكنتور حيل ولا اكو گلب بصدره.. صرت اشوفه اربعة والدنيا كلها غواش.. دفرني بخاصرتي وطلع يصيح صبريلي بس اجيب السلاح انتي مكانج جوه التراب.. تخبلت من كلامه.. سمعت باب الكليدور انركع يعني طلع.. كمت وخشمي يكت دم.. اخذت تشيرتي خليته على خشمي ونصيت جبت التلفون خليت البطارية وأدور رقم ابوي وعيني ع الباب لايجي يكتلني من صدك..
ضليت ادك لحدما جاوبني.. بچيت وعطت : بابا تعال علي بالعجل..
محيي : ياستار استر.. شبيج بوية وين اجي..
دنوة : مااكدر احجي فدوة تعال.. انه بالبيت..
محيي : هسه جاي..

سديته وكمت للحمام غسلت وجهي والدم ماسكت.. اتخبل من الدم لو اموت ولا اعاينله.. صرت ارجف من الخوف ماادري وين انطي وجهي.. دقايق وسمعت صوت ابوي فات وفتح الباب.. اجه علي تخبل لمن شافني هيج..
محيي : هذا عقيل الگواااا... صوچي انطيته مرة تسوى وتستاهل..
كمشته من قميصه وانتچيت علي.. مشاني للغرفة طلع جنطة خله بيها هدوم ولبسني عباية وشال اخذني وطلعنا للمستشفى رأسا.. اجت الدكتورة شافتني ادروشت.. اخذتني للطوارئ فحصتني وشافت خشمي.. كالت انحراف صاير.. وكفت الدم وعقمتلي الجروح.. جرح زندي لفته ببنادج والباقي كالت هو وحده يطيب.. كتبتلي ادوية اشترالياهن ابوي وطلعنا..
محيي : شسوالج هذا الچلب.. انتي شمسوية..
دنوة : بابا ماسويت شي والله.. خابرني واحد كال ابو وسام كتله لا.. يعني غلطان بالرقم.. هذا رأسا جر التلفون مني وضربني موتني يكلي خاينة.. كمشت ايده وحضنتها بخوف : هو راح يجيب السلاح يريد يكتلني خلاص..
محيي : لا يامنعول اللشة ياساقط.. بسيطة الا ما اخلي يطلك وهو الممنون..
سكتت بس ابجي خايفة.. مو بسهولة اتقبل هيج كلام..

وداني للبيت وطبيت للغرفة مالتي بعدها على حطتها.. اجن البنات وخالة ابتسام يمي.. بالفترة الراحت عمو لواء شايل فماموجودين..
ابتسام : الف سلامة يمة حبيبتي.. شبيج..
حجيتلها شصاير بس بالگوة احجي.. طشت السالفة والكل درى.. عمي كاظم اجه بس عقيل ماكو.. يخابرون علي يطلع مغلق.. طبيت للهول عمي بس شافني وخشمي شلون مشدود ادروش..
محيي : شفت ابنك شمسوي..
كاظم : حگکم بوية.. شتفصلون نلبس بس كون يجي عقيل..
محيي : خليجي احسنله لا اجيبه حتلو جان بسابع سما والله.. واطلكها منه.. شني بس هو رجال.. انه صوچي.. لو مامنطيها احسن..

فرحت لمن كال اطلكها منه.. اوووف الحمدلله واحد حس بمعاناتي والوجع لمن انكتل.. بالليل بس طبيت للفراش غفيت من الوجع.. ثاني يوم كعدت الصبح على صوت عقيل يرعد بنص البيت.. خليت شال وطلعت صار بوجهي..
صاح : هاي الخاينة شعدكم ملفينها.. المفروض اذبحها..
محيي : انجب واكمش لسانك لا انه اذبحك وحگ لا اله الا الله..
عقيل : هااااا صرتوا تمشون بحچاية النسوان..
شامخ : لا نسوان ولا هم يحزنون.. البت تطلك وغصبا ما على راسك.. لا طفل بيناتكم ولاشي.. صار اكثر من مرة تنكتل ونسكت.. هلمرة صارت جدام ابوها بعد هو يتصرف.. خنشوف ياهو هذا المايطلك والله اهجم البت على راسك..
عقيل : مااطلك وترجع وياي لا أحش رجليها هسه..
كاظم : عقيل طلكها ولاتضل تماطل..

ضلوا يحجون وياه يردونه يتنازل ويطلك.. ماكو لطش..
بالأخير كال : اطلكها.. بس لا انطيها نفقة ولا مؤخر ولا بطيخ..
دنوة : اي انه قابلة بس طلكني..
محيي : بابا شني قابلة.. شمالج.. هذا ذخر الج لاتتنازلين عنه..
دنوة : لا بابا انه متنازلة.. مااريد شي يوكف بوجه طلاگنا..
عقيل : هاهيه هي كالت چلمتها وانه كلت.. باجر الصبح اجيب الأوراق والمستمسكات ونروح نطلك ماعندي أي مشكلة..

مشى اليوم ماصار شي.. راح ابوي وي عقيل جاب جنسيتي وشغلات ثانية.. ثاني يوم رحنا للمحكمة الصبح طلگني بتنازل مني عن المؤخر وكلشي يخص الفلوس.. نزعت الحلقة والذهب كله ملصته انطيتهيا بنص المحكمة.. خزرني واخذهن مني بعدين كلمن راح بدربه..

رجعنا للبيت ورأسا طبيت للغرفة.. الولد بعدهم بالبيت.. اجيت اطير من الفرح.. مامصدكة طلكني وخلصت منه.. اووف ياربي چن حمل وانزاح مني.. هو آخر فترة لمن تسودن علي كام مايتقربلي .. فإن شاء الله مااحبل.. اجه ابوي باس راسي وعدل شعري..
محيي : لاتعتبرين روحج غريبة عن البنات.. بعدج صغيرونة..
دنوة : لا بابا..
حضني ويحاچيني.. شواي وطلع.. اجن سرور ونوارة حضنتهن وبجيت من الفرحة.. بعد ماانضرب..
دنوة : مامصدكة سرور.. كرصيني..
نوارة كرصتني حيل.. كمزت كمزة للستار.. : ادبسززز گتلج كرصيني خوما صدك..
نوارة : هههههه.. شسوي غير انتي كلتي وانه كلي سمعا وطاعة لحضرتج حبي..
ضليت اضحك واحاچيهن.. رجعت لحياتي بس بيها تقيد شوي.. بس الظهر والعصر اطلع بره الغرفة باقي الوكت جوه كاعدة..

مرت الأيام بهالشكل.. كاعدة وساكتة.. كلشي هادئ وانه مرتاحة نفسيا وجسديا.. الى أن فديوم نزلت من فوك بالعجل سمعت سالم حيجي من الشغل وتمزلگت ع الدرج.. صوتي انكتم اريد اصيح ماكو.. لحدما فات ابوي من جدامي وشافني.. اجه يريد يشيلني وعصرت ايده من الوجع..
همست : مااكدر اكوم ظهري يوجعني..
محيي : حاولي بوية لازم.. على كيفج..
گومني على كيف وصاح على سرور اجت نزلتني وياه.. تمددت بس الوجع قوي كلش.. بقيت يوم كامل متأذية بعدين ابوي كال طز بالعدة شلون يعني تموتين من الوجع.. لبست شال وعباية وأخذني لدكتورة مفاصل.. كالت تهشم بالفقرة العصعصية.. هسه مايبين تأثيرها بس لمن احبل يصير ضغط على عظم الحوض والفقرة هاي فيبين الوجع.. انطتني أدوية ومسكنات بعدين رجعنا.. بقيتمستمرة ع العلاج شوي شوي كمت اتحسن وامشي براحتي.. بس بقيت فترة مااكدر اكعد بالکع اذا بقيت كاعدة فترة طويلة لمن اكوم عبالك دمار يكمشني..

مرت هالفترة وبقالي بس چم يوم وتخلص العدة.. دخلنا لسنة 2006.. سنة من بدايتها صعبة ع العراقيين وعلينا احنا بالبصرة.. اجه ابوي يحاچيني وكامش بيده ورقة..
محيي : حترجعين للمدرسة.. سويتلج نقل لمن اطلگتي لمدرسة قريبة على بيتي..
دنوة : ليش حعيش وياك يم البنات..
محيي : اي بس تخلص العدة اخذج.. شكد باقي..
دنوة : ماهواي..
محيي : خوش يعني كبل الامتحانات..
دنوة : اي گبلهن..
محيي : سجلج بعده موجود وانتي اعتبرتي راسبة فهسه بس اداومين ماعندج شي..
دنوة : والدرجات شلون..
محيي : معليج سويتلچياهن..
ماسألته بعد ماطوله مسويلياهن مامصدكة شلون اخبار مفرحة هاي.. حضنته وبسته.. ضحك وبقى يمي يسولفلي ع البنات ودراستهن وهالأمور بعدين راح..

خلصت الأيام وخلصت العدة.. اجيت اهلهل لوما عيب.. الشهرية مالتي أيامها متقاربة خصوصا بعد ما تزوجت وصرت حامل تغيرت الهرمونات.. بالليل سرور سوتلي كيك وعصاير واجت هي ونوارة.. فتحنا فلم نتفرج ونكركر.. فلم عربي يضحك.. حسيت العگدة انفكت والحمدلله.. شلت المواعين دااغسلها واجت سرور شايلة التلفون..
ضحكت : هاج كمشي..

اخذته منها وبعدني ماحاچية سمعت صوت رائد كال : الف مبروك..
دنوة : ههههه.. سرور فضيحة مو..
رائد : أفضح منج.. شلونج يولي..
دنوة : زينة الحمدلله.. انت شلونك..
رائد : بخير وعافية لمن سمعت هالصوت.. اويلييي مامصدك حلم علم يالله دخيلك..
دنوة : علم علم لاتخاف..
ضلينا نحجي شواي وكتله حروح انام.. سديته وانطيته لسرور.. خابرني.. اي هذا هو.. يمة گلبي اجه يوكف من الموقف الحلو هذا.. جان حسرة علي حتى شوفته..

مرت خمس أيام هيج خلصتها قراية.. راجعت كل يوم مادة النص الأول.. بالكوة تذكرت صار سنة تقريبا.. بس على كد النجاح قريت.. ابوي شافني هيج ملتهية كال لبسي اخذج لبيت خالتج باتيلج چم يوم.. كمت بدلت واخذت هدوم وياي.. وصلني وراح..

طبيت سلمت وكعدت وياهم سوالف وضحك.. دنيا كلساع تحضني وتبوسني تكلي واخيرا رجعت حياتج.. بگلبي اكول اي والله.. بالليل صعدنا فوك وجبنا حب وكرزات..

البنات الصبح راحن للكلية فكعدت وياهن.. بين ما راحن وصعدت ارجع انام..سمعت الباب تندك بقوه..سترك ربي.. منو هسة من الصبح ..نزلت بسرعه شفت خالتي واكفة بالباب تخاف تفتحها..الدگه مو طبيعية.. مال واحد مستعجل لو مضيعله شي..طلعت افتحها وانصدمت باللي جان يدك الباب..

يتبـــــــــــــع..............