رواية اسألي عني الليالي الفصل الرابع والعشرون 24 - بقلم رقية جاسم

قناة التليگرام

حساب الانستگرام

الـبـارت الـثـالـث والـعـشـرون.............

بنهاية الأسبوع خابرني عقيل ياخذ موافقتي على رجعتي كتله موافقة.. اجه اخذني بس ابوي رزله..
محيي : لاتشوفني سكتت يعني مااعرف..ادري بيك ضاربها.. بس الشفعلك الطفل ميت.. لو ماميت چا صار غير حساب..
عقيل : عمي الصار بيناتنا ماينحچي.. لو تعرفه تعذرني..
محيي : مهما يكن.. هذا ابنك او بنتك.. اكو واحد يكتل صلبه.. خلي عقلك براسك واذا اجتني دنوة مكتولة مرة اللخ يصير غير حچي..
عقيل : حاضر من عيوني..
ترخص منه واخذني ورجعنا للبيت..

مرت خمس ايام كلمن ينام وحده واكرم يمي.. مايقبل يشوف امه بس بعده يحبها ويشتاقلها.. وره هالخمس ايام بالليل نزل ينام يم بيبيته.. مكيف عليها تسولفله سوالف بيبيات.. اجه عقيل فتحتله الباب وحطيتله الأكل وصعدت فوك.. طبيت سبحت شفت البيت صنطة.. لفيت الخاولي وتمشيت للغرفة بالعجل فتحت الباب وطبيت.. صار عقيل بوجهي.. نصيت راسي مستحية.. هو ماصدك شافني بهيج وضعية صك بمكانه ويتفرج علي.. عفته ورحت للكنتور..
دنوة : جبت نساتل لأكرم.. چان يريد..
عقيل : اي جبتله..
اخذت الهدوم ورحت بالركن بدلت هو من وده ياكلني.. بعدني ماخذة موقف منه.. ولو بهالأيام شكد حاول يصالحني ماقبلت .. نشفت شعري وفتحت التلفزيون اتفرج فلم.. شواي وگام طفى الاضوية واجه يمي.. سكتت ماحاچيته..

كمشني من ايدي باسها ونصى التلفزيون..
عقيل : اسف بوية سامحيني..سبحانه المايغلط..
دنوة : مو يغلط هيج غلطة..بعدني متأذية منك ..
عقيل : يبت الحلال اگلج اعتذر شون هسه.. صارت وبعد ماتصير .. شتردين يصيرلج تدللين..
ضل يحاچيني ويقنعني.. رضيت من لاچارة.. هو انه زعلانة من روحي عاد مايهم اذا زعلت على عقيل لو لا..  شبگني وراسي على صدره يتنفس بإنتظام .. حاوطت رگبته بتململ وغفيت..
علاقتنا تحسنت شوي مابيها مشاحنات..

كعدت الصبح على صوت اكرم.. رحت شلته واسكت بي.. سويتله سريلاك ووكلته.. شنو ذنب هالطفل ضل معلك بيناتهم .. انقهر علي .. التهيت بالشغل والتحضير اليومي.. بس گلبي ناغزني ماادري ليش.. عمي كاظم طالع من الصبح مغبش ومحد بالبيت بس احنا النسوان..

العصر كاعدين سويت چاي وكعك .. دك التلفون .. سرور.. كيفت وشلته ..
دنوة : الو عيني وين هالغطة.. نسيتوني..
حچت بنبرة مافهمتها : هلو دنوة شلونج ..
دنوة : زينة الحمدلله.. شبي صوتج ياستار صاير شي..
سرور : لا بس هاج امي تريد تحجي وياج..
ابتسام : الو خالة دنوة .. شونج حبيبتي..
دنوة : هلو خالة ..زينة الحمدلله اسأل عنج..
ابتسام : الله يسلمج.. يمة خابرتج دااكلج ابوج تمرض فدمرة ونقلوه للمستشفى اليوم الصبح...
جمدت بمكاني والدمعة صارت بطرف عيني.. والله گلبي علمني بي شي.. احساسي مايخطأ : شبي ابوي خالة .. شلون تخربط .. يعني شيكولون الاطباء..
ابتسام : سووله تحاليل وبعد منتظرين نتيجتها.. بس لاتخافين حبيبتي حالته مستقرة وماعلي خطر... الاطباء طمنونا .. سرور رادت تخابرج من الصبح..بس مارضيت تقلقين على شي مو أكيد كلت نتأكد يله..
دنوة : ماشي خالة.. باچر اجي اشوفه او اليوم بس اشوف عقيل شيگول..
ابتسام : يله على راحتج حبيبة..

ودعتها وسديته .. ضليت باقي اليوم بالي منشده علي .. اريد اشوفه .. كلت من يرجع عقيل اگله يوديني باچر.. المغربية اجه عمي هو ومهران.. رحتله لا اراديا حاچيته..
دنوة : عمي شلونه ابوي.. شصايرله..
كاظم : شمعلمج بوية.. ماكو شي ان شاء الله چم يوم ويكوم على حيله..
مهران راد يحچي وعمي سكته.. ليش مديحچولي هذول شبيهم ادور لاحنين تعرف ولا عمتي ترضا تحچي..

بالليل تأخر عقيل.. ضليت الوب بالغرفة وين صار هذا وكته اليوم يتأخر .. سمعت صوت السيارة دخلت بالكراج يعني اجه .. الحمدلله من طليت .. دخل الغرفة ذب المفاتيح والسويچ ع الميزتواليت ونزع القميص..
عقيل : شعندج كاعدة ليهسه..
دنوة : ابوي عقيل.. شبي ليش محد يحچي..
عقيل : شبي مابي شي.. موجود بالمستشفى..
دنوة : باچر اخذني حباب فدوة..
عقيل : روحي طفي الضوه لاتضوجيني اريد انخمد..
دنوة : عقيل شبي....
عاط بيه : اگلج لاتضلين تنگرين براسي.. طفي الصخام والصباح رباح..
عافني وراح نام.. شبي هذا شكد غثيث..

اليوم الثاني فزيت على حلم موخوش .. چن امشي بطريق والدنيا ليل.. وورايه تمشي بزونة سودة .. بس چنت خايفة ومرعوبة بالحلم واحسها تريد تهجم عليه بأي لحظة .. مااهتميت للحلم .. كلت اليوم اخابر خالة ابتسام اسألعا على ابوي واحچيلها الحلم لأن تفتهم بهالسوالف ..
حضرت الريوك اكلنا وشلته .. بس بالي يم ابوي وگلبي يرجف خايفة علي.. عقيل كتله شوكت تاخذني ماجاوبني.. عمي طالع من الصبح لأبوي.. خفت اطلع وحدي ادور يكتلني مابيه حيل.. شلت التلفون اخابر خالة ابتسام..
دنوة : الو خالة شلونج..
ابتسام : على الله حبوبة انتي شونج بالي يمج من ساعه الخبرتج بسالفة محيي ..
دنوة : اي والله خالة ميته خوف علي .. طمنيني شلونه..
ابتسام : والله توة اجة سالم من المستشفى وحچالي .. طلعت ضاربته جلطة قلبية .. بس چي الاولى فخفيفة صايرة لاتخافين .. وضغطه مامنتظم فخالي تحت المراقبة .. كالوا تلث ايام بالزايد ويطلع ان شاء الله...
دنوة : مادري يخالة افرح لو انقهر ... الحمدلله على كل حال .. ماريد شي بس سلامته..

ابتسام : اي حبيبة خلي ايمانج بالله جبير ..
دنوة : ان شاء الله خالة... صدك اليوم حلمت حلم واريدج تفسريليا ..
حچيتلها الحلم كالت : خير ان شاء الله .. هو البزون بالحلم يعني عدو .. ديري بالج بنتي من الحواليج .. لا تبقين فطيرة وفاهية.. تره مو كلها مثل طبيعتج تحب وتريد الخير..
دنوة : ميخالف خالة الله الحافظ..
ودعتها وسديته .. الحمدلله طلع منها سالم.. بس لازم اخلي عقيل ياخذني... مايصير ينام مستشفى واني بنته الوحيدة وماروح..

مشى اليوم اتوسل بالرايح والجاي بس ياخذوني للمستشفى محد يقبل.. اخاف اخابره ادور مابي حيل وأجهده.. العصر اجت خالة فاطمة هي وبتها وجديتي.. سلمت عليهم گالت ابوج زين هسه وضعه احسن حتى ديحچي بس الضغط شوي بي اشكالات..  عفتهم وصعدت فوك خابرته.. راد يفصل وجاوبني..
محيي : الو.. باباتي..
متت لمن سمعت حسه شلون تعبان : شلونك حبيبي.. الحمدلله ع السلامة.. ماگدرت اجي كلت لازم اخابر..
محيي : الله يسلمج عيوني انتي.. زين الحمدلله لايضل بالج..
دنوة : خوما زعلان مني.. ردت اكمل بس سكتت وبلعت لساني..
محيي : لا بوية مامشيلج ذنب.. واصلة زيارتج وانه گتلهم لايخبرونج لنچ بعدج تعبة ع السالفة مال طفل..
دنوة : الله يحفظك يارب ماانحرم منك.. اروح واعوفك ترتاح خاف مالك حيل تحچي..
محيي : هلا بيج بابا..
ودعته وسديته..

صار الليل واجوي عمي وعقيل .. كملنا عشة وصعد فوك .. كملت غسل مواعين وصعدت وراه ..
دنوة : الله يساعدك .. سمعت رايح لابوي ..
عقيل : اي رحتله اليوم تحمدتله ع السلامة..
دنوة : هاا .. چا وانه .. مو كتلك اريد اروحله البارحة ..
عقيل : ماصارلي مجال امرلج .. غير مرة ان شاء الله..
دنوة : شكرا مااريد.. خابرته انه .. لو اضل عليك تعوفني بلاية اكل ولا ماي..
اندارلي وعيونه بگصته.. كمشني من زندي عتني حيل.. : بعد سويني مخليج مگدية..
ايده عورتني وانه گلبي محمل.. رأسا بچيت واشهك مثل الجهال.. وخر ايده وسحبني لصدره يهدي بيه.. سكتت وابتعدت عنه.. لمن داانام حسيت علي شبگني من ظهري وباسني من خدي..

مرت اربع ايام بس اخابره ع التلفون.. عقيل مايقبل اطلع موتني شسويله فسكتت..
وراها اجه بالليل شارب.. كمشني من ايدي صعدنا فوك.. قفل الباب واندارلي..
حچه بثكل : باجر العصر اخذج لبيت جدج.. ابوج حيطلع من المستشفى الصبح..
دنوة : صدكك.. شو ماگالولي.. موتغلس علي حباب اخذني خو هيانه بيت جدو..

تقرب علي ونزع التشيرت شمره.. : لا مااغلس.. تعاي هسه اريدج مشتاك لكلشي بجسمج..
مانطقت بحرف.. خفت يسويلي شي وهو مو بوعيه.. مشيت وياه اخذ اليريده وراح ينام..

ثاني يوم مشى عادي صار العصر ورحنا.. اول مادخلت اجني سرور ونوارة استقبلني.. شكد مشتاقتلهن ..
سرور : وينج يمعودة مو اشتاقينالج مكانج خالي والله..
دنوة : والله حتى انه..شلونچن شلونه البيت وابوي..
سرور : زينين كلنا والله الحمدلله.. اليوم الصبح رجع من المستشفى..
دنوة : اي دريت..
طبيت جوه للاستقبال شفته كاعد وبس يعاين ع الناس تجي تتحمدله ع السلامة.. مابي حيل يحچي.. گلبي عصرني علي.. رحت حضنته وبچيت..
دنوة : شلونك بابا الحمدلله ع السلامة..
ابتسملي وحضن راسي بيده.. باسني منه : يسلمج ربي عيون بابا.. زين موگتلج لايضل بالج..
دنوة : اعذرني من التقصير بس شسوي..
محيي : لا بنتي ماعليج عتب عذرج وياج.. شونج انتي مرتاحة..

شحجيلك لو شحجيلك .. اكتفيت مثل كل مرة بالحمدلله ومرتاحة لاتخاف علي..

دخلت جوه وي البنات .. بوستهن وكعدنا..اشوف نوارة تنغز بسرور .. چن تريد تحجي شي وماتخليها ..
سرور : ايييي دوخري مااكدر بعد لازم احجي وهي هم من حقها تعرف..
دنوة : من اول ماطبيت وانتي وراج شي مو راحة.. شصاير احجيلي.. نوارة دعوفيها شبيج..
نوارة : يله احچي.. ريحي روحج وشعلي بيها نار..
سرور : انتي مو اكثر مني تحبين دنوة..  اندارتلي وكملت حچيها..  رائد جاي لأبوج بالمستشفى ومطرده..
شهگت وخليت ايدي على حلكي : چذابة.. ليش موخطية..
سرور : گايل انه من وراه انطيتها لعقيل علمود لاتصير اله ومقهور چي طرحتي ..
سكتت ماحچيت.. هسه هو شعلي ليش هالكلام الجارح.. غيرت الموضوع حچينا على غير شي بس بگلبي اهجس اكو گزاز بمكان النبض..

ضليت ساعتين هيج وراها رجعت للبيت.. اجاني اكرم وكامش بيده دفتر تلوين والوان.. حضنته ورحنا بالهول اسولف وياه اتونس احسن مما اضل وحدي..بس بالي يم السالفة مال رائد .. شكد صاحب فضل بس ابوي مايقابله بشي..

ثاني يوم من الصبح سمعت صوت روان.. لبست شال وگعدت اكرم ونزلنا.. سلمت عليها عاينتلي بطرف عينها ماعاجبها الوضع.. مشى اليوم عادي واليوم الوراه وماكو تغيير.. بمكان وفاء اجت روان..

مرت فترة گصيرة بدت تشد وي اكرم.. خليته جوه يتفرج ع التلفزيون وصعدت انام الظهر نعسانة.. هستوني غفيت وشفت النوم فزيت على صوت عيطة مال طفل.. نزلت بالعجل واشوفها كامشته من إذنه تجر بيها وتكتله..
روان : ادبسز بكد النعال هيج تسوي.. امك گح... انت شتطلع قابل نبي..
ام عقيل : وخري ايدج لا اكسرها.. شون تمديها ع الصغيرون طاح صبغج رعنة..
مشيت حضنته وشلته يبچي ويفرك بإذنه توجعه من وره هاي الحاقدة.. : ليش كتلتي شمسويلج..
روان : اريد اگلبه ع المسلسلة وهو لاطش بالكارتون.. شسويله يعني والله يالله قابل تلفزيونه اله وحده..
دنوة : شوفي انتي جاهلة وخالة گورتج وي الجهال.. اليوم يجي عقيل ونتفاهم..
اخذته وصعدت فوك.. ماخليته ينزل لحدما اجه عقيل وحچيتله .. رزلها طيح حظها..خنست هي وفشلت..

بس ماجازت.. ضلت تعيدها.. تصيح علي وتصخره.. اتخبل هو طفل شمفهمه تصخري.. اكو حجار براسها مو عقل.. ماتستوعب مللتني..

بيوم كعدت مثل كل يوم.. جايين الولد وليد ومهران وبراء هي وجهالها.. سويت غده دسم والتهيت بالمطبخ بعد ماصعدت فوك.. عقيل اجه تغده وياهم ومشى اليوم بين الچايات والتحلاة .. نظفت البيت انه وروان متفاجئة منها شعجب ماخلته كله علي.. رحت طلعت هدوم لأكرم سبحته ونيمته يم حنين غرفتها مابيها سبلت علمود لايستبرد.. هستوني دااصعد وصاح عقيل من فوك..
عقيل : دنوووة.. تعاي بالعجل..
صعدتله وكل البالي هسه يگلي ليش ماكاوية هدومي هو يتنعوص على أقل شي..

فتحت الباب لكيته نازع التيشيرت وباقي بالفانيلة .. عصبي وجهه مايكصه الطبر ويمشي يمنى يسرى بالغرفة.. انتبهت على اوراق محطوطة ع الميزتواليت .. اول ماشافني دخلت گلي قفلي الباب وراج وتعاي كعدي .. سويت مثل ماكال ..
عقيل : هي كلمة وحدة مااثنيها..شون هالرسايل دخلت هنا..
دنوة : يا رسايل .. على شنو دتحجي ..
جرني من شعري للكع وعيونه حتنط من العصبية : هذني بت القنادر.. انعل ابوج لابو حتى عقيل الگوا... بيوم اجيت خطبتج..
خليت ايدي على ايده وأجر بيها : مداافتهمك حباب وخر ايدك دتوجعني بس فهمني..
عقيل : لج انتي شني ماتگليلي.. امنتج على بيتي وشلتي اسمي.. عاملتج بالعيني والاغاتي كلت تنسى... كلت تستعدل وتصير ادمية .. بس الظاهر انتي ماتتوبين ..
دنوة : شدتحجي وداعة ابوي مداافتهم يا رسايل هاي..
رفع راسي وضربني راشدي ايده اشتغلت بعد مايهدني.. حطيت ايدي على وجهي مادري منين تجيني الراشديات والدفرات .. اريد افتهم منه ماكو.. قفل مايشوف جدامه.. شمرني على الكنتور طخ راسي باليده مالته.. شاغت روحي من الوجع..
عقيل : حطلع.. واذا شفتج طالعة من الغرفة انعنع عظامج خوووش..
حركت راسي بالموافقة.. لبس تشيرته وعافني وراح..

تمشيت قفلت الباب وكعدت وراه ابچي بحرگة.. هسه هذني شنو منين طلعلي.. شحيصير بيه بعد ..
سمعت صوت اكرم يدك بالباب ويحچي بخوف : ماما دنوة فتنيني (فتحيلي) الباب..
دنوة : روح حبيبي مااگدر داابدل..
اكرم : لا ماما انه سمعتج تبثين (تبچين) وتصيحين..
بچيت ومضهومة من الوضع.. قنعته مابيه شي وراح .. كمت بيه مابيه ورحت للميزتواليت اريد اعرف على شنو ديحچي .. شفت رسايل وظروف ..

حبيبتي دنوة مداانساج.. كلشي من بعدج ظلمة وادري بيج تحبيني بعدج مثل ما احبج .. داانتظر موعدنا دقيقة دقيقة .. ديربالج على نفسج .. رائد..

وهواي رسايل من هالنوع .. انصدمت شهالرسايل .. اول مرة اشوفهن وهالخط مااعرفه .. بس الاكيد مو خط رائد .. اعرفه لخطة زين.. مرتب وعبالك خطاط .. جمدت بمكاني منين اجني هذني ياربي..صفنت تفطنت روان .. اكيد روان ولا شلون حتوصل لغرفتي .. اوووف دنوة حتبقين ثولة طول عمرج.. شكد حذرتني خالة ماسمعت .. اكيد هي حطتهن هنا .. شلون حقنعه هسه.. خصوصا هو شايفها رسولة ماتغلط وتطلع منها الشينة.. رجعتهن لمكانهن ورحت فتحت القفل.. فرشت بالگع غطيت راسي وتمددت.. بين غافية وگاعدة حسيت علي شال الغطى مني..
عقيل : نايمة..   دنامي اشتعلت لشتج..
سكتت مافتحت عيوني.. رجع غطاني وراح ولى جوه..

ثاني يوم گعدني بالچلاليق من الصبح ويصيح..
عقيل : وين القميييص.. ليش ماكاويته فوك التخامة مالتج كون اذبحج هسه ذبح..
دنوة : انطيني مجال هسه اكوي.. ياهو تريد..
شمره بوجهي.. كويتلهيا لبسه وكمشني من وجهي فرني علي حسيت العظم طگ.. : حتأكد بروحي احسن مما اسمع منج ومن غيرج..
عافني وراح..

ضليت قلقة وخايفة.. شسوي .. اخاف يروح على رائد ويأذي .. التفكير اكل راسي.. انه واشتغل مشدوهة.. كلساع طايحة شغلة من ايدي.. محد درى بالسالفة هو ماحاچي كايل مشكلة بيناتنا.. آخر شي صبيت اكل وصعدت فوك ..

عصرت دماغي يله تذكر كدرت اتذكر رقمه.. خابرته ضل يدك ماجاوبني.. انتظرت دقايق ورجعت دگيت جاوبني..
دنوة : الو.. رائد ..
رائد : نعم منو..
دنوة : انه دنوة ماعرفتني..
تغيرت نبرة صوته حسيتها كئيبة : تفضلي..
دنوة : مااريد احچي شي.. بس امانة گلي اذا عقيل اجاك لو سوه شي..
رائد : لا مااجاني ..بالدوام انه اصلا..
جريت نفس براحة.. : الحمدلله.. شكرا اعتذر ع الازعاج..
رائد : اهلا بيج..
سديته وبلعت ريگي مقهورة.. صوته تعبان.. مسحت الرقم بالعجل ورجعت التلفون لمكانه..

نزلت تغديت ومشى اليوم انه ماشايفة روان.. المغرب دااعجن خبز للعشة وطبت هي..خليت حنين تكمل بمكاني ورحت فوك جبت الاوراق وطبيت للغرفة.. شمرتهن بوجهها..
دنجت اخذتهن وضحكت هي وتعلچ : مساء الخير عيني .. البارحة بالليل سمعنا صوت ضرب وعقيل طلع عصبي من البيت .. خوما صاير شي..
ماكدرت اكمش اعصابي .. تقربت وبودي اكطعها تكطيع .. : انتي الحطيتيلي الرسايل مو .. بس عبالج اسكتلج لو تنذب براسي وتمشي مثل ما مخططة .. دصبريلي ياحقيرة .. اول وتالي حيعرف وين الصدك ..
روان : على يارسايل تحجين عيوني.. شكاعد تخرطين شنو انشخطتي..
دنوة : هسه اشوفج هاي المشخوطة شراح تسوي بيج..
رگعت الباب وعفتها تضحك بصوت عالي.. شكد كلبة وماعدها رحمة.. انه بحال رجلج دتسويلي مشاكل .. دخذي بلكت يطلگني واخلص من هالعيشة المهلكة.. مدتسويلي شي بس تستنزف من أيام شبابي..

مرت خمس ايام كلما يجي يكتلني ويفشر ويغلط ماخله على حالي حال.. بس اسكت.. ماكو دليل يكول هاي الرسايل مو الي ولا الدازهن مو رائد..الصبح تستلمني عمتي اسئلة.. كافي لاتعبين ابني.. كل يوم يطلع منج تعبان.. عبالك واگفتلي يم الباب..

بقيت بالغرفة افتر لحدما سمعت صوت السيارة تدخل للبيت .. فرشتلي بالعجل بالكع وسويت روحي نايمة..
دخل وفتح الضوه ومن حچيه عرفته سكران ..
عقيل : كومييي ادري بيج مامخمودة ..
تقرب علي وجر شعري خلاني اوكف بارادتي وي حركة ايده.. : وروح امي مو مالاتي .. مادري منو حطهن لو شلون وصلن لهنا .. صدكني مدااچذب وداعة ابوي ..
عقيل : ماكو رجال يسوي السويتلچيا .. ماكو رجال يرضا ينلفظ اسم زلمة غيره على لسان حرمته ويبقيها بالحيا .. لا وفوگاها لمن اجيت يمج.. بمكان ما اسمعج تگولين عقيل سمعت رائد .. بس انه اكول صغيرة .. اكول كلنا چنا نحب وتتعلم وياي شوي شوي .. مدللج چي اصغرهن .. بس انتي شسويتي... نكرتي كل السويته.. نكرتييي بت القنادر..

ضربني راشدي قوي ..حسيت بالاهانة والظلم..كمت ابجي واتوسل بي بس اريد يصدكني ماكو .. سكران ومايسمع بس نفسه ..شمرني ع الچرباية وبحركات جريئة وبعنف اخذني.. كام مني رحت لبست.. كمشني من زندي ويرزل بيه.. : اريد اطلگج بس اكول متونس وياها.. خليچ تونسيني..
ماتحملت گبيت بوجهه : اكرهك انت حيوان موبشر..
جر إذني حسيتها انشلعت وعاط : انتي گح... يله طلعي نامي جوه لاتشوفيني خلقتج..
ماصدگت كال هيج رأسا عفته وطلعت..

وره هالأيام بقيت جوه اشتغل.. نظفت الطباخ فات عقيل.. دگ ع الميز كمزت وانداريتله..
عقيل : صبيلي اكل بين ما اسبح..
صبيتله وصعدته فوك.. گبل لايجي نزلت.. ضليت افرفر بالبيت كلهم نايمين واخاف اصعدله لايكتلني..جسمي يون من الكتل مالته.. طبيت للهول فتحت التلفزيون اگلب بي مااحس غير واكف يمي ومچتف ايده..
عاينلي ورافع حاجبه : ليش كاعدة هنا..
دنوة : ماجايني نوم..

كمشني من ايدي وطفى التلفزيون.. صعدنا فوك .. اخذ الرسايل والظروف شگگهن جدامي وذبهن بالزبل..
عقيل : عرفت الصاير ومو الج هذن..
دنوة : الحمدلله عرفت.. بس بعديش..
عقيل : انه عصبي ومااتفاهم لشوكت اضل اگلج هالحچي.. ابوج مو عصبي.. شني الاختلاف يعني..
دنوة : هذاك ابوي مهما يكن.. مو مثلك.. بس انت شلون عرفت مو الي..
عقيل : عرفت وخلص معليج..
اجه يمي يريد يقنعني اروح وياه للچرباية دفعته رافضة كل الرفض.. فرشت بالگع وخايفة يجي يجبرني..بس ماسوه شي عافني انام وراح.. ثاني يوم العصرية اخذني اشتريت هدوم جدد كال اخذي شيعجبج.. صار آدمي يخاف اكول لأبوي چي انه مدللته.. روان لاتحط اكل جدامه ولا تكوي هدومه ماتسوي شي علي كلهن..

وره فترة ماشية الأمور عادية.. ابوي اروحله كل اسبوع اشوفه صار زين بس يتعب لمن يحچي.. كام مايروح لبغداد قليل بالشهر نوبة..

كعدت الصبح شفت الك مخبوص وعمي كاظم يروح ويجي يخابر..
كاظم : وينه هسه بيا مستشفى.. صدك چذب اكو واحد يطلع بالليل هم السواق ويخافون.. هسه جاي مااتأخر..
منو ..عليمن يقصد.. تمشيت لعنده ..
دنوة : شكو عمو.. شصاير..
كاظم : رائد مسوي حادث..
بلعت ريگي وايدي رجفت : شلون ..
كاظم : راجع من الدوام بالليل ومگلوبة بي السيارة.. هسه بالمستشفى بعده مافايق من البنج..

هو وديحچي اجه مهران ووليد بعدين طلعوا كلهم.. صار عندي خفقان من الموقف هذا.. ادور عمتي وحنين وبراء كلهن يعاينن علي وعلامات التساؤل واضحة.. صعدت فوك اريد اروح لبيت جدي ع الاقل اسمع عنه شي.. هنا محد يحچي يدرون چنت احبه ويحبني..
ام عقيل بصياح : وين رايدة.. تعاي نزلي..
دنوة : خالة اريد اروح لبيت جدو شنو مايصير..
ام عقيل : اي مايصير.. گعدي وسكتي اذا خطيتي خطوة وحدة اكسر رجليج..
عاينتلها وبچيت.. خفت علي.. هو منا عنده بداية سكر ادور ماادري شصايرله.. مايستاهل.. صعدت غسلت وجهي وخابرت سرور.. بعد سلام سألتها علي..
كالت : بعد والله مااعرف عنه شي.. هسه راحوله الولد ولمن يرجعون نشوف..
دنوة : حبابة خابريني طمنيني مو تنسين فدوة..
سرور : ميخالف عيني..لاتسوين شي لايتهمونج يمعودة..
دنوة : اي ماشي..   سديته ونزلت..

لهيت روحي بالشغل.. شيجي جدامي نظفته بس مااريد افكر لو اعاين بوجه أحد لايشكون بيه.. للعصر اجه عقيل ومهران .. يعاينلي بطرف عينه..
عقيل : جيبيلي ماي دنوة..
انطيته كمش ايدي من وده يكسر اصابعي.. ابتعدت ورحت وكفت بالباب اسمعلهم..

مهران : خطية بالگوة كادرين يوگفون النزيف.. صدره متأذاي
عقيل : شكو علي.. عار مايصيرله شي..
مهران : ابن عمك لك لاتصير حقير.. هم عنده مواقف وياك..
عقيل : مواقفه وقندرتي.. مااطيقه لا هو ولا المرحوم..

عفته ورحت فوك سبحت.. يعني متعدي مرحلة الخطر.. خفت اخابر سرور لايجيني عقيل هسه يخليني انام مستشفى.. چفيت الشر وسكتت..بمرور يومين عقيل چان طالع.. خابرت سرور.. حچينا وسألتها على رائد..
دنوة : شلونه.. شلون صار..
سرور : زين الحمدلله فايق من البنج بعد باچر لو عكبة يطلع ماعلي شي..
دنوة : الحمدلله.. خفت اخابرج عقيل ماادري شبي..
سرور : اي ديري بالج حبي ..لاتجازفين..
حاچيتها شواي وسديته.. بعد فترة گصيرة اجاني عقيل للغرفة بالليل داارتب العطور والمشاطة ع الميزتواليت..
عقيل : حضري روحج باچر جدج عازمنا ع الغدة بسلامة رائددد..  حچاها بنبرة حادة..
انداريتله وسكتت.. ثاني يوم بس تريگنا ونظفت البيت بعدين رحنا لبيت جدو..

ماشفت واحد من الولد كلهم كاعدين بالديوان وابوي وياهم ورائد.. امه ماجاية ولا اخلاص.. نسوان ولد عمام جدو موجودات هن وبناتهن سلمت وبديت اشتغل وياهم بالطبخ والتحضيرات..
وحدة منهن اسمعها تتهامس : اي هي هاي دنوة.. خية مادرينا البنج يفضح الآدمي..
- : هو چان يحبها حبيبة شمالج.. بس ابوها انطاها وصارت قسمتها لعقيل..
- : اي ادري هم خطية..

غلست ماسألتهم.. اخذت سرور ورحت يم باب الترك محد يجي هنا.. حچيتلها شسمعت..
دنوة : شصاير استحيت اسأل..
ارتبكت مارادت تحچي.. : لا ماكو شي عليش تسألين..
دنوة : دحچي عليج الله..مااسوي شي..
سرور : رائد مو فايق من البنج كايم يهذي بإسمج.. وتعرفين السالفة من اطيح بين النسوان اطش بالعجل..
دنوة : شگايل سودة علي..
سرور : احبج ويكمش ايد أمه عباله انتي.. شون ترحين لعقيل وانه اريدج وج سويت كلشي وانتي شي واحد ماسويتي.. يعني هيج حچي.. ادور صار يصيح ويبچي بعدين جاي الطبيب منطي ابرة مهدئة وراجع نايم..
عاينتلها واريد اطك بچي بس بلعتها وسكتت..

مشى اليوم عادي صبينا اكل وتغدينا.. النسوان من ودها تاكلني شكد ضجت وتضايقت من الگعدة.. هسه شعليهن .. هو مريض والمريض مايدري بروحه شديحچي..

التهيت وياهن لحد العصر سمعت رائد حيطلع يوصله سالم وعمي لواء ..
تمشيت يم باب الكليدور وخرت البردة شوي.. شفته طلع ومحمد يريد يسنده بس ماقبل.. ايده مشدودة وسنودة على رگبته.. گصته مجروحة جرح قوي.. انقهرت علي اجيت اموت شون منظر يكسر الگلب.. راح يتمشى للباب وصعد بالسيارة وياه الولد وطلعوا..سديت البردة بالعجل ورجعت للمطبخ كإن شيئا لم يكن..

المغربية رجعنا للبيت بس عقيل محمل علي.. اكيد سمع بالصار .. ماحاچيته تركت الموضوع يهدأ.. مر چم يوم وكعدت الصبح مستبردة.. خابرت علي مايجاوبني.. شبي هذا هسه دجاوب بلكت واحد مات.. اخذت خافض حرارة ومسكن بين ما يجي ويجيبلي.. لأن فلاونزا بالعظام دمرتني.. بالليل يله اجه .. فتحتله الباب وخليتله الأكل بعدين صعدت.. تانيته يجي وكعدت يمه..
دنوة : عقيل خابرتك اليوم ماجاوبتني ليش..
عقيل : ماانتبهت للتلفون.. خير شرايدة..
دنوة : ردتك تجيبلي دوة..
شو هذا عاط بوجهي : عقيل ودي عقيل جيب.. عقيل عقيل .. چا عقيل مايگول جيبولي وسوولي.. موبشر انه.. لو ماخاطبج احسن.. متندم انه متندم بكد شعر راسي.. اكبر غلطة بحياتي انتي.. لو ادري هيج حيصير چا انه اجيت بخطوبتج وانه قنعت ابوج ينطيج لرائد..
صوفرت من كلامه.. حچيت بصعوبة : شنو يعني مافهمت..
كام وكف ونصى صار بمستواي : مافهمتي.. شني بوية الظاهر ماسمعتي برائد الگوا... يهذي بإسمج.. يحچي بإسم بمرتي.. والله وداعة ابني لوما مريض چا خليت طلقة براسه واخلص منه.. انتم ثنينكم نقمة وانه ابتليت بيها.. بس بسيطة منا وجاي اخليج تمشين وتخافين من خيالج لاترحين تكولين رائد بلاية علم..

رفع ايده يريد يضربني راشدي ضميت وجهي بإديه ونصيت راسي بحضني.. صحت بخوف : عقييييل لا فدوة اروحلك لاتمد ايدك.. مايدري هو مريض وناسيني والله نساني..
وخر ايدي ورفع راسي : وانتي ناسيته..
دنوة : نسيته وداعتك.. لمن طبيت لهاي الغرفة بعد ماتذكرته..
هد ايده وكعد بسدي يفرك بوجهه وشعره.. كعدت بالگع كمشت ايده واحاچي..
دنوة : كافي خلننسى الصار..انه تعبت من الكتل مالتك.. تكتلني وماتدري بروحك دورات تدري بس ماتدري شگد تأذيني والله اضل ايام متكسرة..ادري بيك عصبي بس انه دااحاول وياك ومااحچي لمن تتعصب..موو ..

عقيل : صحيح..
دنوة : چا خلص..   كمت بسته من خده واعتذرت منه.. ولو أذاني بس لو احط روحي بمكانه اشوف الموضوع چبير ان ينحچي بمرته بلسان شخص جان بيناتهم علاقة.. بغض النظر عن نوعها بس اكو وداد بينهم ومحبة..

ثاني يوم كعدت الصبح لگيت علاگة ادوية يمي.. براسيتول وفوار مسكن للعظام وغيرها.. هو ايده طلقة مايقصر بس اسلوبه منحدر ومايعرف يتعامل وي المرة..

بمرور فترة بالليل نايمة بالغرفة حسيت على صوت اكرم يبچي يم راسي ويكعد بيه.. مديت ايدي فتحت التيبل لامب وشلته..
دنوة : شبيك حبيبي ليش تبچي..
سكت بس يبچي.. اخذته للحمام غسلتله وجهه صار احمر من البچي.. : حبيبي بس أشرلي وين يوجعك..
كمش ايدي خلاها على بطنه.. خليته بحضني وافركلياها .. عقيل كعد على صوته..كام من مكانه اجه يمه..
عقيل : شبيك باباتي..
دنوة : ماادري.. يكول بطني توجعني..
ضلينا كاعدين وياه.. انطيته خافض حرارة حرارته عالية كلش .. كمادات وللفجر يله نزلت وغفى وحده..  كعد الصبح ويگعدني يجر بدشداشتي..
اكرم : ماما دنوة.. كعدي حبابة..
دنوة : شبيك عمري.. شلون صرت شو تعال اشوفك..
اكرم : اريد ماما.. انه مشتاقلها ..سمعت بيبي انول (تگول) امك مريضة.. اريد اشوفها حبابة..
دنوة : حبيبي لازم تگول لبابا انه مااكدر اسوي شي.. ان شاء الله تشوفها مابيها شي حياتي..

شلته واخذته غسلتله.. بعده مصخن وعنده وجع ببطنه او بالأحرى بمثانته.. بقى چم يوم مصخن ويبچي لمن يدرر.. بالليل وره اسبوع نومته بالگوة وفات عقيل..
عقيل : شونه اكرم.. ضل بالي علي..
دنوة : يعني موكلش.. لازم ناخذه دكتور..
عقيل : ادري.. هو انه چنت اسأل على دكتور زين.. باچر ناخذه العصر.. حجزتله..

كعد يمي ويمسح على راسه.. كتله : هو يريد يشوف امه.. لاتحرمه منها خطية.. هم تعبت بي ..
عقيل : لا ماتشوفه.. ختولي..
دنوة : بس عقيل....
قاطعني : لا بس ولا نعل.. انتي مامقصرة وياه وانه همات.. ختولي هاي توكله حرام وماارضا..
سكتت شعلي بعد..هو ابوه وحر بي..

ثاني يوم اخذناه للدكتور.. سويتله تحليل دم وادرار.. طلع عنده صليبين جراحة .. كتبله أدوية ونوع حليب زين بي املاح قليلة لأن بعده مامفطوم يشرب قواطي.. رجعت للبيت وبلشت وياه بالأدوية ع الموعد وكل اربع ساعات او أقل اغيرله حفاظته.. ومشت الأمور بهالشكل..

الى أن فديوم اجه كعدني من النوم الظهر يبچي يريد امه.. كلش متعلق بيها هالفترة ويريد يشوفها ماادري شصايرله وشنو السبب.. مدااكدر أسد النقص الحاصل .. قررت اخلي يحاچيها او أودي الها لو اضل على أبوه مايقبل.. بالليل نومته ولبست سيت شسورت شعري.. اجه عقيل تفاجئ من تصرفي .. تقربت بسته وحضنته.. أخذني للچرباية وتقربلي بهدوء وحركات مدروسة.. ابتعد وباس خدي..
شفته مرتاح كمشت ايده واحاچي : اكرم يريد يشوف امه.. اخذه الها فد ساعة وجيبه..
عقيل : دنوة لاتفتحين هالموضوع مرة لخ..
تركته ورحت سبحت.. رجعت لكيته نايم.. اخذت تلفونه دورت رقم وفاء.. سجلته بتلفوني بإسم نوارة ورجعته لمكانه..

ثاني يوم الصبح خابرتها..
دنوة : الو عيني..
وفاء : تفضلي منو..
دنوة : انتي وفاء مو صحيح..
وفاء : اي حبي.. ماعرفتج..
دنوة : انه دنوة.. مرة عقيل.. ماخابرتج علمود اضوجج صدگيني ماعندي شي وياج.. بس اكرم مشتاقلج ويريد يسمع صوتج..
بچت وكالت : حبيبي وينه خلأسمع صوته..
صحته وانطيته التلفون كتله احچي هاي ماما ع الخط.. كام يحاچيها ويبچي وياها.. شنو ذنبه هذا .. رفع راسه انطانيا بعده مفتوح الاتصال.. حاچيتها..
وفاء : دنوة الله يخليلج ابوج وناسج.. انه ماعندي احد بس ابني وأمي..والله متندمة ومااعيدها بعد.. هاهيه تبت بس اريد عقيل مايصرفله هالحچي..
دنوة : يعني شنو المطلوب مني..
وفاء : فد يومين واخابرج هيج وكت لأن عقيل ماموجود ادري بي بالشغل.. تعالي للسوك وجيبي اكرم وياج اشوفه..
دنوة : مااگدر عقيل مايقبل..
وفاء : محتاخذي لمكان.. حتجيبي يم أمه انه حبلت بي وشلته تسع شهور..
ضلت تقنع بيه وقنعت.. اتفقت وياها على عكبة اجي للسوك واجيبه وياي..

مرن يومين وراها خابرت عقيل كتله حطلع اجيب حليب لأكرم واخذه وياي.. ماكال لا ..بدلت وبدلتله..
اكرم : وين حنروح ماما دنوة..
دنوة : هسه نروح وتشوف .. بس لاتگول لأحد بعد مااطلعك تره..
صم حلگه ويحرك براسه يعني مااكول.. كملت وطلعنا.. خابرت وفاء واتفقنا على محل اشوفها يمه.. وكفت يم محل ملابس رجالية شواي واجتني.. اخذت اكرم شالته وتبچي وتبوس بي.. هو همات مامصدك شايفها..
حچيت وياها بحدود النص ساعة وكتلها يله خلنرجع.. جرته مني وخزرتني..
وفاء : وين ماخذته.. من كل عقلج..
دنوة : شنو هالحچي.. مدااشاقة.. ساعدتج تشوفين ابنج مو تاخذي عقيل يموتني..
وفاء : مايموتج وانه شكو..
فكيت عيوني على كبرهن .. شكد بت حرام.. تعاركت وياها رأسا عاطت لمت العالم كلها علينا..

طلع ابو المحل والمحلات الباقية..ماحاچوا احد راحوا على اكرم ..
- : عمو وين امك..
أشر على وفاء طبعا يكول هاي امي قابل انه..
دنوة : عيني تره المرة منفصلة عن رجلها والولد يمي انه أربي بس ماردت اكسر بخاطرها وجبته تشوفه..
- : اختي الطفل كال هاي امي.. هذا الفلم عليش..
دنوة : شنو دااچذب عليكم انه.. ابوه يريده ليش تتصرفون من يمكم..

مديت ايدي دااريد اطلع التلفون وانخمدت الجنطة من چتفي .. محد من الواگفين تحركوا.. عبالهم اريد ابوگه.. هو انخرس اگله احجي بس يبچي.. اجيت اكتله شلون غثني بعدين كلت حقه انصدم من الموقف والناس شلون ملتمة..

آخر شي اخذته وراحت.. ضليت اصفصف وحيدي بالشارع .. هم فشلة وهم خوف من ردة فعل عقيل.. شسويت انه حهجم بيتي على راسي.. هذا گلبي الأثول مايبطل محبة وتعاطف زايد.. رجعت للبيت مشي .. عمتي اول ما شافت اكرم مو وياي ضلت تصيح وادگ على خدودها.. حنين راحت تخابر على عقيل ماادري شگللها بس رأسا سدته بخرعة..
ام عقيل : هاااا بت شهلاء الگح... ضيعتي الطفل..
دنوة : خالة ماضيعته والله اخذته يشوف امه ليش ماتصدگوني ..
ام عقيل : يا أم هاي.. عقيل حرمه منها انتي شكو تتصرفين من عدج نعلعلا شرفج..
سكتت لأن ادري بروحي غلطانة بس ماچانت بنيتي يصير هيج... شواي وسمعت صوت باب سيارة انرگع..

طفرت فوك بالعجل وقفلت الباب قفلتين.. اجه صوت عقيل يرعد بإذاني كمت ارجف وخايفة..
صاح : بت الكلب فتحي الباب اليوم اشمرج من السطح وانعنع عظامج منعولة الوالدين..
دنوة : حباب افهمني والله ماچنت اقصد..
ضل يصيح ويهددني يكسر الباب.. ابتعدت ورحت ختلت بالكنتور.. ماكو دقايق وبقى يحاول يدفر بالباب لحدما طگ القفل وانفتحت..

اجاني متدروش كمشني من دشداشتي شالني كمت ارفس رجليه ماطخ بالگع..غطيت وجهي ميتة خوف.. مااحس غير بالصوت المنقذ اجه من باب الغرفة..
كاظم : اترك البت لاتمد ايدك عليها..
هدني رأسا اخذت نفس براحة وركضت وره عمي كمشته من دشداشته.. : عمي والله مااقصد.. ردته يشوف امه..
عقيل : بوية هاي صلفة ومالها رداد..
كاظم : عمو مالازم تطلعين وتاخذين الطفل غلط.. شفتي شون اخذته.. شمدرينا شحتوكله وشني عيشتها.. تره عقيل معيشهن هي وامها وخواتها.. هسه منين تجيبله اللگمة..
عاينتله ونزلت راسي : بس مافكرت هيج عمو..هو تمرض عليها شمدريني..

اخذ عقيل ونزلوا جوه.. عدلت هدومي وبقيت كارصة بالغرفة ماطلعت.. لحد المغرب اجه يبدل ويخابر ماادري منو.. سده واندارلي .. گرفصت روحي ومنصية راسي..
دنوة : لاتكتلني الله عليك..
عقيل : مااكتلج.. حيجي وليد هو وصاحبه يسوي الباب .. طلعي لاتبقين هنا خوش..
دنوة : ماشي..
بس طلع طلعت وراه.. راح هو وعمي ومهران من عمتي عرفته رايح لوفاء يجيب اكرم..

بحدود النص ساعة اجه صديق وليد سوه الباب وبقى كاعد شواي وطلعوا ثنينهم.. بالليل بالدعش يله رجعوا.. ضليت اتفرج من الشباك.. شفته نزل وشايل اكرم بيده علاگة حلويات وسيارة .. حاضنه ويبوس بخده.. همزين رجعه.. چا سواها علي كولبة.. حطيتلهم الاكل وصعدت.. بس تمددت غفيت ماادري بيهم بعد.. المهم انحلت وخلصت..

وره فترة ع الغدة واندگت الباب قوي.. عبالنا الأمريكان .. بس احنا النسوان بالبيت.. طلعت افتحها صار رائد بوجهي وراه جنود اربعة وضابط لاخ.. صكيت بمكاني لمن شفته.. لابس عسكري وبيرية ومناظر..
نزعها خلاها بالقميص وحچه بنبرة صوت حادة : عدنا تفتيش سوولنا مجال..
فتحتله الباب ودخلوا كلهم.. ضليت واكفة بمكاني واتفرج علي وعلى مشيته.. گلبي كام يدك سريع چني اله وحلاله.. تذكرت لمن اجه تفتيش ببيت بيبي شكد چان مرن وحباب.. هسه عبالك مااعرفه ولا بيناتنا عشرة وأيام.. بس شجابه هنا غير ببغداد دوامه..

تمشيت طبيت للبيت واحد منهم كال : ريحة اكل طيبة.. شمسوين..
دنوة : برياني ودجاج..
- : اشتهيته بعد عشرين يوم انزل.. صبيلي يرحم والديج..
رائد صاح : امشي مو وكتها..
- : سيدي ماجوعان..
رائد : لا .. اخذ الك وتعال بالعجل لاتضل تماطل..

تمشيت للمطبخ خليت كمية زينة بحافظة أكل وانطيتهيا.. تشكر مني وطلعوا.. تانيتهم يروحون ورحت سديت الباب .. روان تعاينلي بطرف عينها والعلچ يطك بالحلك.. ضجت من نظراتهم هسه ديگولون بعدها تحبه وتريده.. ماانكر هالكلام صحيح بس منو يسمع وينفذ.. بيني وبين روحي بطلت اكول هيج .. حرام علي .. بالليل اجه عقيل وشكله واصل اله خبر جية رائد.. صاحلي وصعدتله ..
عقيل : فاتحة الباب لرائد..
دنوة : ماچنت ادري بي..
عقيل : ممنوع تفتحيها بعد.. بس أمي تطلع خوش..
دنوة : ليش تشك بيه.. مامسوية شي انه..
عقيل : يله فهمت لادوخيني..
عافني وراح اخذ هدوم ونزل جوه.. اي حينام يمها الحمدلله.. اجاني اكرم يركض فرحان.. باسني ويعدل گذلتي..
اكرم : واخيرا حنام هنا.. ماما كلش مثتاقلج (مشتاقلج)..
دنوة : حبيبي.. هههههه.. تعال يله هسه افتحلك كارتون..

مددته وفتحتله كارتون.. لمن عقيل ينام هنا مايجي اكرم.. هو يضوج ينام يم بيبيته فمكيف علي..

وره تلث ايام هيج واكفة ع الطباخ دااسوي غدة وعرگانة ميتة حر.. مااسمع غير عيطة روان رجت البيت.. غسلت ايدي ورحت اشوف شكو.. شو هاي كمشتني من ايدي حيل
روان : وين وديتي محبسي الذهب.. انتي اخذتي..
دنوة : انه شكو عيني وخري ايدج..
روان : شفتج طبيتي للغرفة الله اعلم شسويتي..
ام عقيل : لاتمسلتين خالة.. شعليها هي قابل ماعدها..
روان : اي شافت عقيل يبات يمي صار چم يوم وضاربها بعرض الحايط ضاجت.. تريده الها..
دنوة : انچبي لاتحچين من عندج..

ضلت تصيح وتحچي.. صعدت وياها فوك دورت بالكنتور مالگيته .. وجهها صوفر چنها تعرف شي.. بهالاثناء فات عقيل جان بالحمام..
روان : حبيبي شفت دنوة ماخذة محبسي وماتقبل تنطينيا..
عقيل : انه اخذته دنوة شعليها..
صكت بمكانها وبالگوة تحجي : شنو.. شجابه يمك..
عقيل : لكيته بالكنتور بين الهدوم.. گولي شجابه هنا وانه ادري بدنوة ماتمد ايدها على شي مو الها..
روان : شقصدك.. يعني انه دااريد اتهمها.. هيج وصلت بيك عقيل..
مد ايده انطاها المحبس وراح ع الميزتواليت ينشف شعره : انگلعي يله.. وبطلي حركات الجهال هاي..
كامت تبچي ونزلت تصيح اليوم اروح لبيت اهلي وانت ماتريدني وماتحبني.. رحت يمه بسته..
دنوة : شكرا.. تريد تتهمني..
عقيل : لا بوية شحدها.. ختولي تغار..
ابتسمت وعفته ونزلت..

هي بعد هالموقف شدت وياي.. لمن يجي عقيل هي تروح تفتحله الباب وتلبس كله سيتات نوم ومكياج صارخ.. انه ضالة بطرگ الكحلة والمسكارا وهم من وره خشمي.. يعني حاوت شتسوي بس تريد تجذبه .. انه مامهتمة بس اتفرج على تصرفاتها.. هو وره فترة أخذها وراح لبغداد كمحاولة اخيرة علمود يصير عدها حمل .. العصرية ضجت وحدي.. خابرته من تلفون عمتي گتله حروح لبيت جدي.. قبل الحمدلله.. بدلت ولبست عباتي وتمشيت للبيت..

سلمت وطبيت كعدت وي النسوان أتاني ابوي يجي كالوا طالع.. عمي لواء ديبني بيت بالزبير علمود يطلع من جدي.. نص ساعة هيج وإجه.. رحتله بوسته وحضنته..
دنوة : مشتاقتلك ماتسأل عني..
محيي : هو انه المريض لو انتي..
دنوة : شوف منين اجاني.. هههههه.. حقك علي بابا..
ضحك وطبينا.. فات لغرفته وصاحني ..رحت وراه..
محيي : اريد اگلج شغلة تخصج وتخصني.. بس لاتحچين الا لمن احچي انه..
دنوة : شنو هي..
محيي : انه وأمج الله يرحمها علاقتنا موخوش.. لهالسبب ازوجت لمن چان عمرج اربع سنين.. انه متزوج بوية وعندي بنات ثنين توم.. خواتج هذن وينفعنج بالزمن..
بقيت مصدومة.. شديحچي.. وليش محد يدري.. معقولة هلكد متكتم ع الموضوع.. خاف اكو شي..

دنوة : الله يخليهن يابة بس ليش ماحاچي بيهن..
محيي : اسباب هواي.. عندي خوفة من النسوان مااريد انطيهن مطلق الحرية وتتفرعن علي مثل...  سكت..
بست راسه وخده : هاهيه بابا اكيد انت دارس الموضوع زين .. شوكت اشوفهن..
ابتسملي وحضني حضنة حنينة : عن قريب..
بقيت كاعدة يمه واسولف وياه.. تغير وياي وكلساع يسألني اذا مرتاحة وي عقيل لو لا..جوابه نفسه لأن مهما حيكون هو محيطلگني منه بس يمكن يحاچي علمود يتغير وياي..

طلعت منه وتمشيت لباب الترك ديخبزون.. باب غرفة قصي مفتوحة شوي ويطلع منها صوت.. ماكدرت امنع روحي لأن الصوت واضح..
حنان (مرة قصي) : الله يخليك كافي لتتقربلي.. گتلك تزوجت وعندي ولد وحامل مرة لخ.. اعتقني والله اخلي رجلي يجيك وهو يتصرف..  سكتت ورجعت حچت بفزة : لا دخيلك لتوديله الصور..

فتحت الباب انه رأسا درت وجهي ورحت وياهم اخبز بس بالي يمها.. شبيها يعني ..خاف تحتاج مساعدة.. والله وكملنا ماكو كعدت وياهم ع الأكل هي كاعدة على اعصابها انتبهتلها .. كملت بالبداية فگمت اغسل حسيت عليها واگفة وراي..
حنان : دنوة حبابة اذا ماعندج شي اريد احاچيج..
دنوة : اي ميخالف ماعندي شي..
رحت وياها لغرفتها قفلت الباب وانطت خرخاشة لأبنها سكت وكعدت تحچيلي..
حنان : شفتج واكفة يم الباب يعني سمعتيني..
دنوة : مامتقصدة والله بس سمعتج تبچين وانقهرت عليج..
حنان : اووف ولج.. بلوة على راسي..جنت احب واحد وعندي علاقة بي.. وياي بالكلية علاقتنا شريفة والله ماكو شي من ناحيتي شمدريني هو يطلع نذل.. چان ياخذلي صور بالكامرا هاي الفورية انه وأعدل بشالي.. ادور مرة دااعدل بي وإجه واحد مااعرفه جره مني وطلع شعري.. من الفشلة لبست بالعجل حتى ماانتبهت منو.. بعدين تخرجت وكتله اذا مالك نية تخطبني تره جاييني خطابة وخوش ناس.. كال روحي مااريد اتزوج هسه وماعندي شغل..بوقتها چان قصي متقدملي وقبلت لأن مايعيبه شي الشاهد الله..

الولد الاحبه لمن سمع تزوجت وحامل ضل يهدد بيه ويخابرني ع الأرضي هاي گبل لا تجي التلفونات وبالگوة خلصت منه كمت ابچي واتوسل يله عافني..
دنوة : خو چان كتيله لقصي ..
حنان : لا مو هو حاچاني كبل لا نزوج.. كال اذا عندج علاقة سابقة صارحيني وانه كتله لا ماعندي شي وحلفتله لأن على بالي ابدي جديد وياه..
دنوة : هسه شون.. هذا الولد شيريد منج راجع..
حنان : لج ماادري شيريد.. ادور هو متزوج وعنده بنات ثنين شيريد مني مايفكر بيهن.. يهددني بالصور يگلي ادزهن لرجلج واگله هاي جديدات لمن چنتي بالحلة وحيدج ورجلج بالبصرة شهرين الا شمدري ماخنتي..

دنوة : شنو هالبشر هذا شدعوة هلكد خبيث وخنيث هماتين.. الغسل حتى الغسل..  هسه انه شگدر اسوي..
حنان : ماادري عفية ساعديني.. احب قصي وحياتي حلوة وياه..
دنوة : حاچي رائد حيساعدج وهو مايحچي..
شهگت بخوف : لا عيني هذا بس اباوع علي استحي.. ادور اگله صايرتلي هيج شغلة.. خاف يفضحني..

دنوة : لا ليش هيج ماخذين نظرة عنه.. تره حباب وكتوم مايحچي اعتبري سالفتج ببير ومحلولة..
حنان : مااكدر استحي اخاف.. حاچي انتي حبابة..
شفتها تترجاني وخايفة ترجف.. هو صدك رائد يكدر يساعدها ومايگول شي.. قبلت ماطول عقيل ماموجود وانه محسوي شي حرام بالعكس حساعدها.. انطتني عنوان سكنه وشغله.. طلعت منها ورحت خابرت عقيل كتله حبات ببيت جدي.. قبل بس بالتواسيل.. بالليل تانيتهم ينامون واخذت تلفون خالة ابتسام وصعدت فوك بالحمام خابرته..
شواي وجاوبني : الو خالة..
دنوة : انه دنوة مو خالة ابتسام..
رائد : خير ياطير.. تفضلي ..
دنوة : محتاجتك بشغلة وادري بيك حتساعدني..
رائد : گولي واذا اكدر مااقصر..
حچيتله السالفة والصور ومكان الشغل وغيرها.. : تكدر تسوي شي حاول فدوة..
رائد : اي ميخالف بسيطة.. اعتبريها محلولة من باچر..
دنوة : اشكرك ماتقصر.. اترخص هسه..
رائد : الله وياج..

سديته ومسحت الاتصال.. نزلت نمت وثاني يوم حاچيتها طمنتها .. ضليت يمهم يومين اشوفها ارتاحت لاتخاف لاشي .. رحت يمها احاچيها..
دنوة : ها بشري خوما خابرج..
حنان : لا يمعودة فضت وراحت.. ماادري شون اتشكر منه صدك خوش انسان.. هو خابرني كال دزيت واحد صاحبي هدده وفضيتها والصور جابلياهن شگگتهن اطمني بعد..
دنوة : اي شفتي مو گتلج حباب..   سكتت مقهورة وفرحانة بموقفه الشهم.. غيره يرجع يستغلها وياخذها بعين الاستحقار والاستصغار..

وره يومين رجع عقيل وانه همات رجعت للبيت.. كعدنا بالهول ديحچون ع الصار ببغداد..
ام عقيل : يعني اكو أمل.. اكرم همات طرادله ظهر بعدين..
عقيل : اي يمة اكو بعد دنتاني.. كالت الشهر الجاي لو الوراه..
ام عقيل : خير يارب.. چا وين جانت هالطبيبة من زمان..
عقيل : شمدريني والله انه چنت بالعيادة ماخذين اكرم للدكتور وسمعت يحچون فأخذت اسمها وصارت..
ام عقيل : يله ان شاء الله تصير..
روان : الله يسمع منج عمة..
عفتهم يحچون وصعدت فوك.. ماعندي شغل كاعدة صافنة جان التلفون يمي العب هاي لعبة الحية.. شواي وفات هو.. نزع القميص شمره وگعد يمي..
دنوة : ليش تشمر مو الغرفة نظيفة..
درت وجهي مااحس غير بإيده كمشت فچي ودارني علي يعاينلي بخزرة : خوما رائد جاي للبيت..

دنوة : لا مااجه..
هدني وگام شال القميص علگة ع الشمعة (مالت الهدوم) .. ضجت منه ومن الشك مالته.. حسرة اطلع باب الحوش جاب رائد بالنص..

مرن خمس ايام بهالحدود روان تاركتني ملتهية بالأدوية مالتها علمود يصيرلها حمل .. انه ماادخل بالعكس فرحانة ومرتاحة بتغليسها علي.. بس عقيل قالقني.. اكعد بالليل مااشوفه يمي .. انزل همات ماالگاه يم روان.. بعدين يطلع بالحديقة لو بالاستقبال.. ماادري شعنده ماسألته خاف يرزلني.. تركت السالفة الى أن بيوم العصرية بدلت گلبية حلوة وشلت شعري حطيت الشال على چتفي ونزلت اسوي كيكة.. عقيل موجود بالبيت بيومها..

طاح زيت ع الردان صحت حنين اجت تكمل بمكاني وصعدت فوك البس غيرها واغسلها گبل لايلطش .. واكفة وره الباب واسمعه يحچي ويدك ناعم ..يگول اي حبيبي اويلي امووت على ربج.. حچي مقرف ويمدح بجسمها..
بالأخير كال : فد يومين اخذ مرتي لبيت جدها واجيج..
رعشت من كلماته..شكد دنيء.. لعبت روحي منه.. مايهمني يتزوج لا بس لمن توصل للقذارة مااقبل.. فكيت الباب وطبيت سده رأسا واندارلي ايده بجيبه..
عقيل : شعندج جاية.. دگي الباب مرة اللخ..
دنوة : ويامن چنت تحجي..
عقيل : وانتي شعليج..
دنوة : انه مرتك.. يعني لازم اعرف..
عقيل : لا مو لازم.. لاتدخلين بخصوصياتي..
عفته ورحت بدلت بس على اعصابي.. بالليل شفته نام اخذت تلفونه گلبت بالأسامي مالكيت شي.. كلها اسماء ولد وگرايبنا .. عفته ورحت تمددت اعاينله كشت روحي..

ثاني يوم هم سمعته يخابرها بس ماطبيت للغرفة.. تانيته يكمل ودخلت.. عافني وطلع.. جريت التلفون لكيت المكالمة بعدها موجودة.. قفلت الباب وخابرتها..
اجاني صوت ناعم وبي نعوصة : ها حبيبي.. شنو اشتاقيتلي ...  وضحكت..
دنوة : منو حضرتج..
- : انتي منو.. شعندج بتلفون حبيبي..
دنوة : حبيب بعينج ان شاء الله گولي امين.. انه مرته.. لاعبالج غايرة منج بس مااريده يجيج بالحرام بعدين يجيني وفهمج كفاية.. فمااريد تتقربيله بعد..
سديته بوجهها ونزلت لكيته طالع.. عمتي كالت رادوه بشغلة مستعجلة..

بالليل كبل لايجي طفرت فوك فرشت ونمت.. هسه اكيد تحچيله علي وشلون خابرتها.. مابيه حيل الكتل مالته.. كعدت الصبح لكيته يحوم بالغرفة وكامش التلفون.. غطيت راسي ومگرفصة روحي .. اجه يمي يريد يجر الغطى..
عقيل : شمسوية البارحة.. ليش تكمشين تلفوني وتخابرين بكيفج..
دنوة : انه ماادخل بكلشي ومعليه ابد.. انت أعرف واحد بيه .. بس هاي حرام ولعبان نفس ماارضا على روحي..

كمت من مكاني كمشت إدي ثنينهن واترجاه يتركها.. مبينة بت ليل .. چا ليش يتختل لمن يخابرها قابل خايف لو شنو.. جان جابها مثل وفاء بس لا مبينة..

صك على اسناني ورگع التلفون بالگع اطشر : مامرتاح وياج .. اجي الگاج نايمة .. لا لبسة لا هدمة بيها خير.. انتي هم مرة.. اغريني جذبيني اهجس روحي مزوج رجال..
فشلت منه : ليش رجال..
عقيل : اول مااخذتج گلت طفلة وماتعرف وتتعلم وياي.. هسه شني عذرج.. صار شهور مرتي انتي.. شسويلج اكثر فهميني ..
دنوة : اسويلك التريده والله بس لاتتقرب لهيج نماذج..
جر ايده وابتعد : نشوف..
عافني وراح.. اجيت اطك بچي عبالك دااسعر وأرغب بروحي لحضرة جنابه علمود لايتقرب من هيج وصاخة.. دست على مستحاي وكمت اسوي اليريده..

بالليل ابدل واتعطر علموده .. شفته استعدل حتى تلفونه مشمور مايكمشه هواي.. وراها صعدت لگيته نايم.. تمددت بس مااجاني نوم.. ماادري شبيه مخنوگة.. ضليت اتكلب لحدما فغرت روحي ونزلت كلت اتمشى بالبيت شوي.. سمعت صوت طگطگة من وره باب الكليدور.. تقربت اكثر اجاني صوت وليد .. كال : لاتحچين وربج اذبحج هسه.....

يتبــــــــــــــــــــع..................