رواية اسألي عني الليالي الفصل الخامس وخمسون 55 - بقلم رقية جاسم

عايش بروحي تظل للتالي ..
من يوم فركاك تبقى ظلمة ليالي ..

قناة التليگرام

حساب الانستگرام

الـبـارت الـرابع والـخـمـسـون..............

ضلينه نسولف ونتذكر كبل..عبالك العمر لحظة..ذاك اليوم اجيت من سوريا وشفتهه..فتحتلي الباب وكلتلي ابوج وصى بيج كبل لا يموت..وهسة شفتهه..يعني فرق كلش جبير .. بالمكان والشكل والوكت..
دنحجي وجبتهه على نوارة..كتلهه : نوارة شلونهه..
ابتسمت بتعب : نوارة..ربج يحبهه..
دنوة : شلون يعني..
سرور : هي تزوجت وره ما طلعت السنة مال عمي محيي.. زواج تقليدي ابن واحد رجال زين يمنه..ضلت شهرين عايشة يم عيالهه وماشي الحال ماكو شي..بس مرة حماهه تكرهه .. هيج كره جناين بعد..تسأليهه ليش تكرهيهه تكلج هيج.. صايرة جم مشكلة بعدين رشاد رجلهه كايل بعد ما ابقى بالبيت.. بس بين ما ادورلي بيت اشيل..

ابو ضال مجلب بي..لا متروح واني ما عندي غيرك انت ابني وهذني جناين ما تخلص مشاكلهن..رشاد كايلة سكتت هواي عنهه..يعني هي بعدهه عروس ما صارلهه شهور وتتعارك وياهه ليش..المهم ما قابل يبقى وضال على قراره..عاد هنا ابوه كايلة براحتك بعد ما اتدخل..اذا تشوف حل الموضوع هيج فبراحتك .. بنفس الشهر نوارة طلعت حامل..هاي مرة حماهه كامت ادكلهه ناعم كله عيني واغاتي..تخيلي لدرجة حتى تخلي الاكل كدامهه..متخليهه تكوم واتعب روحهه.. شكو ما شكو.. اني اعتذر وبعد ما اتعارك وهي مثل اختي..الصدك وين ما تدرين وليش تغيرت عليهه على فجأة..عبالهه تخليهم يبقون بس هو بقى على قراره وطلع يأجر بيت بالبصرة ما راح خارج المحافظة .. بعدين وره شهر ..شهر ونص هيج شالوا واستقرو طبيعي..نوارة كبل شهرين من ولادتهه صار عدهه وجع مو طبيعي..حتى عبالهه حتطرح..

راحت للدكتورة تكللهه عادي هاي مضاعفات..مدري الدكتورة ما كدرت تشخص حالتهه مدري هي صدك ما بيهه شي.. وراهه ضلت تراجع يمهه..تنطيهه مسكنات وأبر مال فقر دم تكلهه فقر الدم هم هيج يسوي..يسوي الوجع ضعف.. بعدين من فاتت بشهرهه راحت للدكتورة علمود تحدد شوكت موعد الولادة وهاي التفاصيل..كايلتلهه الطفل مكانه عالي..ضلي تمشي يوميه ساعة ساعتين علمود ينزل وتسهل ولادتج..
دنوة : ليش ما سوتلهه عملية..عليش تسهيل ومدري شنو
سرور : هي ما قابله..كايلة اخاف..
الحجية : ياا..يله شكو قابل ليش تخاف المسعدة..هيج احسللهه وبالعجل تكوم..
سرور : شمعرفني بعد خالة..هي صارت بعد..حتى الدكتورة كايلتلهه اذا مرت عشر ايام وبعدج ما جبتي احولج للعمليات

هي مسويه مثل ما كايلتلهه الدكتورة وتتمشى يومية.. لحد وره عشر ايام رجعتلهه..كالت متحرك من مكانه صاير اكو تغيير بس الطفل وضعه خطر كلش..الحبل السري ملفوف على ركبته لفه وحدة..فمحددتلهه وره يومين تجي للمستشفى اهلي وتصير ولادتهه .. هي راحت ..طبعا جانت حامل ببنية وطلعت هي رشاد اشترو جهازهه وكلشي كامل..ليش ما بيوم الولادة عوسرت .. ضلت بالمستشفى من العشرة الصبح للعشرة بالليل.. النسوان جابن وراحن وهي بعدهه..الدكتورة كل ساعتين تضربهه ابرة تسهل الولادة وماكو ميفيد..اخر شي كلتلهه بعد لازم اسويلج عملية..لأن تأخرت ونفسهه ضاق..ياريتهه بس عوسرت.. حتى كامت تكول اختنكت احس الطفل كاعد على گلبي هلكد ما مختنكة يعني..
دنوة : يايمههه..سوده عليه خطية ليش هيج..شبيهه الدكتورة جا ما عرفتلهه من البداية..

سرور : هم حظهه يمعودة..هي من الخوف هبط سكرهه..
الحجية : يبووو..يا خالة شدعواهه..قابل ماتلهه واحد.. هي عملية جكة ابره..لو طبيعي شتكول..
سرور : هو اني جنت وياهه واحاول اهديهه..امي همين خطية ويانه ما عافتنه..التهينه بيهه..عاد اجت الدكتورة خلتلهه مغذي حلو ما اعرف شسمته نسيت..ضلينه ننتظر تقريب الساعة بعدين استعدلت..وراهه الدكتورة كالت ننتظر معدل نبضهه يتعدل والنفس بعدين ننطيهه بنج ونسوي العملية..وهاي ضلينه بين ما قاست الضغط والسكر مالتهه..معدل النبضات وكلشي بعدين اجة طبيب التخدير خدرهه وصارت العملية.. ليش ما طلع الحبل السري ملفوف ع الطفل لفتين ومختنك..حتى هي الدكتورة دتحجي كالت طلعناه ازرك..
الحجية : خالة فدوة لكلبج هاي شلون طبيبة..شنو ما سوتلهه سونار صخام تشوف حالة الطفل..

سرور : مو كتلج سوتلهه..بس هي متحركة زايد بيوم ولادتهه مو كتلج خافت..ضلت تتكلب..والطفل وضعه مو مستقر اصلا
الحجية : بعدين شصار بيهه المسكينة..
سرور : يا..غير كعدت كلبتهه بجي وعزه..من البجي تخربطت هبط ضغطهه..وراهه من كعدت رحت احجي وياهه وحجتلي على مرة حماهه والوجع اخر فترة قبل ولادتهه..كتلهه شوف شناطيتج هاي الحية.. هي ضلت يومين بالمستشفى بعدين طلعوهه..بس بهاي اليومين شافت الويل..وجع برحمهه مو طبيعي..تبجي وتصيح ..الدكتورة ضربتهه ابرة مهدئة تكول مدا احس بشي..نفس الوجع .. يعني خطية تعبت كلش..ادور نفسهه ضاق..وضلت ع الاوكسجين لحد ما انتظم النفس وطلعوهه..عاد هي حجت لرشاد على مرة حماهه ورايح هاد عليهم متعارك وياهم..
الحجية : حيل بيهه تستاهل..

ماكو مخافة الله..راحت وي اهل كبل..
سرور : على كولتج خالة..طلعت مخليتلهه بالأكل ما ادري شنو تكول طعمهه مر بس يسوي تشوه بالجنين..يعني ربج حميد لو جايبة جان طلع مشوه..هم بيهه صالح..بس هي تأذت..
الحجية : خطية.. الله يساعدهه..والله خالة تدرين بجدج شسوه بإبني..انه ولو جانت عندي علاقة بيكم بس بعد الصار كلت مستحيل ارجعلهم بعد..تبقين انتي ونوارة بناتي واحبكم الشاهد الله..خو تدرين بيه ما اكره بشر..لو ما هاي المشكلة جان اجيت اخذت من خاطرهه..اصلا ما ادري بيهه تزوجت وحبلت ..هسة منج عرفت..وصليلهه سلامي..
سرور : الله يسلمج خالة والله متقصرين وكلنه نعرفج شنو.. بس هاي..بعد شنسوي..
دنوة : زين مارجعت حبلت..
سرور : اي حبلت وره سنة..هسة عدهه ولد..

دنوة : اي الحمدلله الله عوضهه..
ضلينه نحجي للمغرب تقريبا..كمت اريد اسوي عشه جان تندك الباب..ردت افتحهه وطلع مخلد..شوي وفات
مخلد : هذا رجل بت عمج جاي..يكول انتظرهه بالباب..
دنوة : يله هسه اصيحلهه..
كمت للصالة الثانية جانت كاعده هي وولدهه..كتلهه : سراوي هذا حسام ينتظرج..
سرور : يله جايه..كومو ماما..اجة بابا..
كامت وابنهه ايهم اخذ كعكة كمشتهه من ايده تريد ترجعهه كام يبجي ويعت بيهه..كتلهه : لا لج عيب..خطية هي شنو قابل..انطيك علبة كعك ولا تضوج..
سرور : لج يوصخ نفسه والثاني يغار منه..
دنوة : ديله هسة انطيهم كل واحد ثنين علمود لحد يغار من الثاني..

كمت للمطبخ اخذت ثنين لكل واحد منهم خليتهن بعلبه صغيرة وخليتهه بيد ايهم..اخذتهه ويضحك..ايده ناعمة ذكرني بـ طه ابن جلنار..وين صارو هسة..شكد الدنيا غريبة وعلى فجأة تشوف الناس العرفتهم ماكو..ولو اذتني بس بعدهه ببالي.. ما انسى يوم وكفت وياي لمن ابوي توفى..احسن من اخلاص.. بس يله..كلشي قسمة..
رحت وياهه للباب ودعتهه كتلهه زوريني مرة اللخ تره ماكو غيرج هسة..كالت من عيوني..شوكت ما اجي للبصرة اجيج .. ابتسمتلهه وراحت..خطية مكيفهه بولدهه ورجلهه..سديت الباب وطبيت..رحت للمطبخ اسوي العشه..اجت سلمى وياي تسوي الزلاطة وتسولف..شكد فرفوشة..اكثر من اسماء.. شهد همات مثلهه بس جوان مو حيل..وانه هم ما اريد اتقرب منهه واسولف وياهه..اضوج..من سمعتهه ذاك اليوم مركزه وحاشره روحهه وي صگر ..حتى بعطره مركزه كرهتهه..

شوي وفات اركان وكف يم سلمى يحاجيهه..
اركان : اكلج اني مليت..اريد طفل..
خطية هي وجهه صار احمر..دنجت سويت روحي ما اسمع بس كاتمة الضحكة بالكوة..
سلمى بهمس : لك عيب مو هنا..فهمنه سبورتي بس مو هيج
اركان : ديله يابة..شرع الله وحلال..
حاجاني : يابة دنوة حلال لو لا..
هو كال هيج انه طكيتهه بضحكة : اي اي حلال..
اركان : ها شفتي..شكلنه..
دنوة : خطية لا هيج..تستحي..
اركان : هااااه..مو توج تكولين حلال..دوختوني وياكم..
دنوة : اي حلال بس تستحي البنية..
كام يضحك ورفع راسهه بيده : اسف مو تزعلين..

سلمى : يله هو انت خليت مجال للزعل..
ضحكو ثنينهم..راح جاب كرسي وكعد يمهه يسولفون.. هم كلش حلوين سوه..فرق العمر والاسلوب كلش قليل بيناتهم .. مخلد واسماء احسهم معقدين شويه..بسبب الاطفال يمكن ما ادري..كملنه ورحت صبيت الاكل..تعشينه عادي الكل يضحك ويحجي ع الاكل..افتقدت صگر..من هو هنا الكل ساكت محد يحجي لحد ما نخلص اكل..جوان وبهاء دائما يتعاركون ويصير حجي بيناتهم..متدري على شنو بس هيج فجأة يصيحون بعد بس يتضاربون..
جوان : ياااابة..شفت هذا الادبسز..
ابو مخلد : بهاااء..مو وكتهه هسة مو كاعدين ع الاكل..
بهاء : اكلج انلصمي ولا تخليني احجي شصاير..
جوان : محد يصدكك عيني..ابو المصايب لتنسى نفسك شسويت..ناسي خيره وعينه على غيره..

ابو مخلد : يله عاد لتضلون خابصينه..شنو جهال انتو.. انتي جاهلة بابا..عيب كافي..
جوان : اي هي هاي العرفناهه..دائما ادافع لبهاء..
عاين عليهه وخزرهه..سكتت كبل..رجعت اكلت لكمتين وكامت .. هاي شكو بينهه وبينه..دائما هيج يتعاركون وابوهه يسكتهه يوكف بصف بهاء..الظاهر شي قديم صاير مو هسة.. بس محد يحجي..شعليه..عفتهم ياكلون وكمت اغسل.. صعدت فوك نزعت الشال احتريت من وراه..اصلا جسمي احسه حار صار فترة اسبوع هيج..حتى ملابسي خفيفة دا البس مو شتوية كلش.. قفلت الباب دا ابدل جان يدك التلفون..رحت شلته وابتسمت..صگر..كتله : هلا حبيبي..
صگر : هلا بيج عيوني..شلونج..
دنوة : زينة ..انت شلونك..تعبان..
صگر : تعبان..اي والله هواي..باجر اجي..

دنوة : مو كلت اسبوع..شو خمس ايام..
صگر : ها شنو ما ترديني يولي..يعني ما اجي..
دنوة : لا..ما قصدت هشكل شبيك وياي..
صگر : يله مو مشكلة..بالحالتين تريديني ادري..
دنوة : هههه..احب ثقتك..بس اي اريدك شعندي غيرك اصلا خاطر ما اريدك..ها شعندي..
كام يضحك ويتأتأ : بعد گلبي هلگلب.. دتاخذين دواج..
دنوة : اي والله ع الموعد..
صگر : انتبهي لنفسج زين..حروح هسة عندي شغل.. بس ردت اطمن عليج واروح..
دنوة : ها..ماشي حبيبي..
ودعته وسديته..كمت بدلت ونزلت جوه..لكيت شهد دتغسل المواعين..وكفت وياهه عزلتهن ورجعتهن لمكانهن..مشى اليوم عادي..بس جوان تجي تخزرني وتروح..

غلست..ما طول متحجي فاعوفهه..بس تحجي ارزلهه واعرف شتصرف..علمتني الظروف والسنين كلشي..صگر همات علمني ..جان شوكت ما يشوفني يكلي دافعي عن نفسج.. لا تضلين ساكتة الفقير ينوكل..انتي فقيرة ما اريد احد يستغلج .. حتلو خالي حاجاج جاوبي بس كلمن وحسب عمره مو تحاجين الجبير بنتر..يم صگر شفت الما شفته يم ابوي .. اهتمام حب غيرة..ساعدني ابني شخصيتي.. شخصيتي جانت صفر..اذا واحد يضربني اسكت ما اجاوبه..بس من اجيت يم صگر تغيرت هواي شغلات..يمكن جي كبرت .. يمكن هو ساعدني..جنت حتى اذا اريد اجاوب ما اعرف.. اكوم ابجي بالعجل وما اعرف شحجي..بالمواقف الصعبة اقصد ..هسة تغيرت هواي شغلات..كل ما اشوفه كاعد يحجي هو وخواله لو وي امه ابتسم..طريقة كلامه رزنة وهادئة .. ما احسه عصبي ابد..

العصبي لازم يتعصب على كلشي..بس هو لا..الا الواحد يدوس ببطنه يله يحجي..صبور صبور..حيييل مو شوي.. انه بسوريا وكل يوم ابجي اريد اشوفه..اخابره واسمع صوته شلون تعبان بس ما يحجي..يكلي ما اريدج تضوجين هناك وحدج..انتبهي لنفسج الدنيا صغيرة ونرجع نلتم مرة اللخ.. فترة زمان بنيتي..هيج يحاجيني..بحيث ارجع للشقة شوي مرتاحة وناسيه..هو يضل يتحمل..انه بس اتعب شوي يبين علي..وهو اصلا يعرفني فسهل عنده يعرف شبيه ما بيه.. شوي شوي وي الايام كمت افهمه من يكول لازم واحد من عدنه شخصيته قوية ويتحمل اكثر من الثاني..صدك المفروض هيج.. انه من ابجي وانقهر هو من يشوفني هيج يخفف عني.. ياخذني بحضنه ويهديني بكلماته..تعودت علي وعلى حبه واهتمامه..ملامحه الحادة وطوله الشهم..كلشي بي حلو وما يتعاب ابد..

هاي اذا كعدنه سوه نتفرج فلم لو حلقة من مسلسلة..هو يفصل بعد .. لحد ما يخلص الفلم وكشور الحب تصير كومة بالماعون يله يكول ها..انه استغل هاي صفنته واحضنه لو ابوسه..يمد ايده يحاوطني من جتفي ويقربني علي.. اضل الح لو اتململ من الكعدة يندار علي يبوسني ويخليني بحضنه عبالك طفل يريدون يسكتوه..ولو انه يم صگر اختلف من كل النواحي..وهو همات يمي يختلف..

بالليل كعدنه بالصالة بين ضحكة وسالفة..جبت جيسين حب وكعدنه على فلم..مخلد كاعد ليغاد وبنته سهى بحضنه.. بس اسماء كاعدة ويانه وهم عبالك على عمى عيونهه.. ضليت اتفرج لحد ما خلص..سلمى نص الفلم وراحت نامت.. جوان ما شفتهه يمكن يم اختهه..وره ما خلص كمت لملمت الهول توني دا اطلع جان يجي مخلد عاكد حواجبه وانفاسه عالية غلست..عفته بالصالة ورحت للمطبخ.. غسلت الماعون وطفيت الضوه وصعدت فوك..سديت الباب ورحت تمددت اتفرج تلفزيون بين ما يجيني نوم..شواي وسمعت صوت التلفون مال رسالة..مديت ايدي ع الكومدي جبته..من صگر..
- بنيتي نايمة..يولي فدوة اروح للشعر المحطوط ع المخدة .. مشتاكلج يبعد الروح..
يمكن قريتهه خمس مرات..بكل مره نفس دكة الگلب تنعاد .. ياربي يعني من طاري يرجف گلبي..

شحال لو جدامي..صح صار سنين سوه..يعني المفروض تعودت علي..بس بكل مره يحاجيني بهمس ويحجيلي غزليات احس اول مره اسمعه..احساسي نفسه نفسه وبالعكس .. بكل مره دكة گلبي تزيد..تمنيته يمي احضنه وابوسه.. هيج بعز خبصته وهوسته يتذكرني..
ابتسمت وجاوبته : كاعدة بس توني دا انام..احبك هواي وانه هم مشتاقتلك كومة..
سديته وخليته ع الكومدي..ضليت اتكلب شوي بعدين غفيت.. اجاني ابوي بالحلم..عبالك انه طبيت لبيت ما اعرفه ولا شايفته بس بالحلم جن اعرفه..بالباب اضوية شكد بس جوه بده الضوه يقل شوي شوي..سمعت صوت ابوي يجي من غرفه عادية ضواهه مثل باقي الاضويه..طبيت شفته ديصيح من الوجع مخلي ايده على صفاحه ويعيط اااخ يابة.. رحت يمه احاجي كتله انت عايش يابة..

هو عاينلي ودموعه نزلت..ردت احضنه بس فزيت.. فزيت مرعوبة وراسي يوجعني من يم عيوني..كمت اتلفت بالغرفة عبالك حقيقة مو حلم..حسويله ثواب ما طول حلمت بي.. اكيد شذى الحقيرة ناسيته..
كمت لبست الشال ورحت غسلت وجهي..نزلت جوه سمعت صوت صگر بالهول..طبيت اول ما شافني ابتسم وأشرلي اكعد يمه..رحت كعدت يمه وتحمدتله ع السلامة..جانو متريكين توهم ديشيلون الاكل..خالة حجت ..
الحجية : حبوبة تعاي اكليلج لكمة..انه ما ردت اكعدج كلت خاف نعسانة هي شوكت تكعد عود تتريك..
دنوة : ما اشتهي خالة..بالعافية..
كمت اشيله وياهم ورحت للمطبخ..اجت سلمة تريد تساعدني كتلهه : لا عوفيهن مو سويتي انتي..
سلمى : ديله شسويت قابل حبوبة على كولتكم..

دنوة : هههههه..شبيهه كولتنه محلوة..
سلمى : لا والله حبيتهه..بعد كله اكول حبوبة وحبوبة.. حتى اركان اكلة هيج..
طكيتهه بضحكة من كل گلبي..صدك ضحكتني بسالفتهه هاي..كتلهه : لج لاااا..مو لهلدرجة خطية..
ضحكت واجت تغسل ايدهه : اي لج نشاقة شنو ميصير
دنوة : يله براحتج عيني..
نشفت ايدهه وراحت..هم كلهم كاعدين بالهول يم صگر فمحد يجي..كمت ادندن بأغنية حاسبينك.. من يغنيهه طالب القرغولي..غنيت لمن يكول ..ومن لكيتك..روحي صارت نذر لأهل الهوى العذري..هو هذا المقطع المفضل عني من الاغنية كلهه .. عدته مرتين وحسيت على ايد حاوطتني من خصري.. جفلت وطفر الماعون من ايدي..

درت وجهي وخزرته : هاي شبيك خوفتني..
صگر : ديله يابة شسوينه..فوك ما مشتاكين..
ابتسمت وكتله : فديت اليشتاكلي ويدزلي رسايل بالليل
درت وجهي للسنك..هو اجة حضني من ظهري وايده مقفله على بطني..كال : فديت اليغني بصوته الاحبه..
دنوة : ليش اكو شي بيه متحبه..
صگر : يابة اميرتي اعشكهه من فوك ليجوه..شحدي ما احب شغلة بيج..
ابتسمت بس محجيت..ما اعرف شجاوب..
وخر الشال شوي وباسني من رگبتي..شوي وابتعد..
همس : كملي وتعاي..
دنوة : ماشي..
خلصت المواعين بالعجل..حتى هن قليلا مو هواي..

كملت وصعدت..لكيته كاعد ويدخن..طبيت نزعت الشال وفتحت شعري..تمشيت لعند الجرباية وهو مركز نظرة علي من فوك ليجوه ومبتسم..كعدت يمه..مد ايده طفى الجكارة بالنفاضه وعدل كعدته ..كتله : صار شكد من اجيت..
صگر : ما صار هواي..بالدعش يمكن هيج..
تقربت منه حضنته خليت راسي على صدره بدون ما احجي .. مد ايده مسح على شعري..كال : شبيج حبيبي..
دنوة : مابيه شي..مشتاقتلك شنو ميصير..
صگر : يصير..و رب اليصير هم..
ضليت بحضنه ما ادري شكد..لحد ما مليت وبعدت..كام نزع القميص والفانيلة ..انه اراقب حركاته بس..اخذ ملابس من الكنتور راد يطلع..كتله : وين رايح هيج..باردة الدنيا
صگر : مستحر والله..

دنوة : يله براحتك..
ابتسملي وراح..كمت شفته واكف بالباب وجوان جدامه.. نظراتهه سخيفة وجريئة..عافهه وراح..انه اريد اطك هلكد ما غرت..يمكن ما متقصدة تصير جدامه بس نظراتهه ضوجتني رحت بره انه وشعري مفتوح طويل صاير بمستوى ركبتي.. عاينت عليهه بطرف عيني وابتسمت..رحت ع الحمام دكيته .. كتله : حبيبي افتح الباب..
جوان : رجال ديسبح شنو يفتح الباب..
هي دتحجي جان يفتحه..بعده بالبنطرون..كتلهه : اي شكو بيهه..هو يقبل..
فتحت الباب على كيف وحشرت روحي بحضنه..مد ايده سد الباب وقفله مبتسم ويعاينلي هو ورافع حاجبه..
صگر : شعجب..
دنوة : هاي الحقيرة حاطه عينهه عليك..

عبالهه يحلالهه الجو..لا يابة..كبرت بعد كمت اعرف شسوي
قرب شفايفه يم رگبتي وايده محاوطتني من خصري.. كال : اروح فدوة للكبران وغيران..
ابتسمت وحاوطته من رگبته..
صگر : يبعدي انتي..خلاسبح وانام ميت نعاس..
باسني وابتعد..عفته يسبح وطلعت..لميت شعري ونزلت جوه .. مشى باقي اليوم عادي..واليوم الثاني همات..جوان سكتت من شافتني شسويت جدامهه..حتى عيونهه بعد مترفعهه .. فشلت مني..يله بعد احسن..انه هم ما اريدهه تتمادى.. صگر دللني جدامهم..مخلد فد دور عصبي وما يطيق اسماء.. بحيث كلمة والثانية يصيح بيهه جدامنه..اذا تكلة اخذ سالي يمك بين ما اسوي فلان شغله يصيح بيهه..للججج وين مخليه المزعطه يمييي..خطية هي تصير شكدوتهه من الفشلة..

اذا ما تريدهه ليش بقيتهه وخلفت منهه ثنين..ادور بنات مو تكول ولد ويمشي عادي..صكر من يشوفه يصيح يعوفه لحد ما تروح هي بعدين يحاجي..يكله عيب هشكل..اكو غرفه وتفاهمو مو هنا..جدام ابوك وامك وبناتهه..ولو صغار بس ميصير.. هو ولا عبالك..يرجع يعيدهه..بعد ضلت يمه..محد يدخل..
وره اسبوع كاعدين العصر بالصالة..انه حسيت روحي نعست.. عفتهم يحجون وصعدت فوك..طفيت الضوه وتمددت..ما ضل شي ع الشهر الواحد ويصيرلنه اربع سنين متزوجين.. دورات اكول شبالعجل مشن هلسنين..كضيتهن بعد ومرض.. قليل حسيت بحنان صگر وتواجده يمي..ولو من هو هنا ابد ما يقصر ويحاول يحسسني بكل ذرة حب شايلياهه..بس تبقى سنتين الغربة بسوريا اصعب شي..واكثر فترة متعبة مريتهه بحياتي .. خسرت حملي الاول وابوي توفى..صگر بعيد ما ادري شخباره..بس كلة صار قديم وراح..

ضليت اتكلب شوي بعدين نمت..
كعدت المغرب على صوت الأذان..ما لكيت صگر..كمت عدلت الجرباية ولبست الشال..فتحت الباب صار بوجهي.. ابتسم وحاوطني من جتفي..طبينه جوه..
صگر : هسة جنت جاي اكعدج..كلت ميصير تنام المغرب
دنوة : اي هو كعدت على صوت الأذان..
ابتسم وباسني من خدي..راح فرش المصلاية يصلي.. ضليت اراقب حركاته لحد ما كمل..كال : شنو يهودية انتي..
دنوة : ها ليش..
صگر : كومي صلي..
دنوة : ها..مو..مو ما يصير..يعني هو هيج ..
ابتسم ودنج ع السبحة..فهمني..لأن خدي صار نار استحيت.. ما احاجي بهلموضوع ابد..هسة حجيت ولو بالخرساوي بس هاي شسوي استحي..

بالليل كملت عشه وغسلت المواعين..كعدت وياهم شوي بعدين رحت للصالة اللخ ارتبهه..شفت الكوشات مخربطة..جان تجي اسماء..عيونهه مورمة..عاينت عليهه مستغربة..
اسماء : دنوة..عادي نحجي شويه..
دنوة : اي ميخالف..
اسماء : انتظرج بالغرفة..
دارت وجهه وراحت..انه كملت الكوشات بالعجل ورحت وراهه خطية انقهرت عليهه..اريد اعرف شبيهه..طبيت للغرفة وسديت الباب وراي..رحت كعدت يمهه..
اسماء : يمكن حتتفاجأين مني..من تصرفي..بس والله طكت روحي شسوي..ويامن احجي..
دنوة : لا عادي بكيفج احجي..بس شكو خوفتيني..
تنهدت وحجت : اني امي متوفية..تعرفين شنو يعني البشر من يريد يحاجي امه بعدين يتذكر هي ميته..

ما صارلهه هواي..صار خمس سنين..شكبرني هسة .. متزوجه وعندي بنتين بس احس صغيرة بدونهه..تعبت..اريد احجي وياهه واشكيلهه..بس وين..
عاينت عليهه والغصة كمشتني من زردومي..كتلهه : الله يرحمهه ويخفف عنج..
اسماء : امين..الله يسمع منج..تدرين شنو..لمن شفتج شفت امي بيج..هي بشبابهه تشبهج..بس لون العيون يختلف.. متشوفين صحتج احجي وياج..كلت بلكي ارتاح من احاجيهه
ابتسمت وتقربت حضنتهه : عادي حاجيني شوكت ما يعجبج انه ماعندي شي..قابل طفل وحليب ..
انه كتلهه هيج كامت تبجي بجي ما صاير..فرفحت.. خطية شكد انقهرت عليهه..اريد اهديهه ماكو..فقدت.. بعدني ما فتهمه من شنو متضايقه بالضبط..كتلهه : احجي شبيج ليش تبجين..هسة انه شحفتهم..

اسماء : اووف..لج تعبت من مخلد والمكان..شفتي شلون يفشلني كدامكم..ميحترمني..عبالك خدامته مو مرته.. هسة اذا كتله اريد اطلك مو حياخذ البنات ويعوفني وحدي..اضل يم مرة ابويه الحية..لو اصلا ما يقبل يطلكني..
دنوة : ما ادري شنو الجان بيناتكم..شلون جانت علاقتكم.. بس صبري..او حاجي..كليله ليش متغير مقصرة وياك بشي .. المفروض انتي تعرفين شلون تحاجي غير صارلكم كومة متزوجين..تعرفين طبعه وشلون يتفاهم..
اسماء : ما ادري..ما ادري..احس الدنيا سوده بوجهي..
دنوة : يله لتفكرين وتعبين روحج..ساعة على ساعة فرج.. اكيد كلشي حيرجع لمكانه..
سكتت ما جاوبتني..ضليت يمهه واحاجيهه..ضحكتهه غيرتلهه جوهه..ابتسمت ومسحت دموعهه..

اسماء : ما ادري شلون اشكرج..والله جان بقيت مقهورة وما اعرف شسوي..
دنوة : لا شنو تشكريني..غير احنه خوات..
ابتسمتلي..كمت واخذتهه وياي للصالة..مخلد من شافهه وياي وعيونهه حمر ضل فاتح عيونه على كبرهن.. ضليت كاعدة وياهم شوي بعدين كمت فوك..غيرت ملابسي وفكيت شعري .. خليت مكياج بسيط وكعدت اتفرج تلفزيون..شواي واجة صگر ابتسم من شافني..قفل الباب وطفى الضوه..ضل بالفانيلة واجه يمي..حاوطني من خصري وراسه على صدري..
صگر : شعندج وي اسماء..
دنوة : ماعندي شي..حجينه شوي واجينه يمكم..
صگر : متعرفين تجذبين..سولفيلي..
دنوة : امم..هيج كامت تبجي تكول ضايجة ومشتاقه لأمي .. مخلد يضوجهه ما متفاهمين..

صگر : الله يهدي النفوس..لا دخلين روحج زايد عمري.. معلينه هم يعرفون مصلحتهم وين..
دنوة : اي بس ما سويت شي..يعني عادي..انه بس انقهرت عليهه جي مشتاقه لأمهه..
سكتت ما حجيت بعد..بس حسيت بغصة..
صگر : اذا تردين تبجين تعاي بحضني ونامي..ما اريد اشوف دموعج..انه امج وابوج..اخوج واختج..بكيفج..بس المهم عيونج ما تشوف البجي..
اخذت نفس وغيرت وضعيتي..صرت انه بحضنه وحاوطته من رگبته..كتله : الله لا يحرمني منك..
باسني من راسي ويمسح على شعري..من الهدوء وصوت انفاسه غفيت..
ثاني يوم الظهر انه واسوي الغده جوان تعاينلي وتبتسم مدري شكو..عفتهه..

كلت شسويلهه..خاف متذكرتلهه شغلة واجت تتبسم.. نصيت النار ع التمن والمركة ورحت كعدت بالهول يم خالة.. حجينه شوي بعدين كمت اصب الاكل..
جوان : لا لتعبين روحج..اني حصب وشهد تاخذهن للهول
دنوة : يله ماشي..
انه كيفت..لأن تعبت من الوكفة..بس اخذت السفرة فرشتهه وانتظرتهم يجيبون الاكل..صبوه عادي..توني كعدت جان يحجي الحجي ابو مخلد..
ابو مخلد : خالو بلكي تجيبيلي مي..ما دامج قريبة..
دنوة : اي هسة..
كمت للمطبخ واسمع صوت..هاي شنووو..شنو هلاكل.. لعبت نفسييي..عفت المي واجيت..صگر عاين علي ورافع حاجبه : هاي شنو دنوة..ليش الاكل هيج..

دنوة : شنو شبي ليش..
جوان : شحاله يلعب النفس..المركة مره شمخليه بيهه سم.. والتمن مالح بشكل مو طبيعي..
دنوة : ليش التمن مالح..كل يوم اسوي بنفس الكمية..
كعدت اكلت لكمة لعبت روحي..هاي شنو صدك..بس انه متأكدة من روحي مسويته عدل..
صگر : شمخليه بالاكل..
دنوة : والله ما مخليه شي..ما اعرف ليش هيج صار..حتى ضكته من خلصت..
وائل : تعاي شيلي ما نريد..لعبت روحي..اكوم اكل بره احسن
دار وجهه وطلع..هو جان مبدل اصلا يريد يطلع بس يتغده .. عاينت لخالة شفتهه ذبت الكاشوخه من ايدهه..كلهم كامو ضلت السفرة فارغة..بس الاكل مصبوب..

شكد فشلت..بس انه سويته عدل ليش هيج..
دنجت لميته واخذته للمطبخ..ذبيته كله حرامات شكد سويت هواي..كعدت اجلف مواعين وافكر..هاي جوان..اكيد هي الحقيرة..هي من شوكت تهتم بالاكل والمطبخ خاطر تجي تكلي انييي حصب..كمت اقلد عليهه..والله حركت دمي.. ضيعت تعبي كله خلتني اذبه بالزبل..فوك هذا فشلتني..
شواي واجه صگر..وكف يمي يحاجيني..
صگر : مرة اللخ من تتعبين كليلي اجيب اكل من بره.. ما يحتاج تسوين شي مو طيب..
دنوة : بس ما سويت هيج والله..تدري بيه وبأكلي..بس هاي جوان الحقيرة..هي خلت بي هيج..
رفع حاجبه : جوان شعليهه..
دنوة : هو انه ردت اروح اصب الاكل وهي اجت كلتلي انه اصبه روحي ارتاحي..

وانه كبلهه بدقايق ضكته ورحت..عود ليش وره ما اجت هي صار هيج طعمه ما ينجرع..
ضل يعاين بعيوني..دنجت بعد ما حجيت..
صگر : يله ما صار شي..حطلع اجيب من بره واجي..
سكتت ما جاوبت..عافني وراح..كملت المواعين ونشفت ايدي اريد اصعد فوك جان تجي جوان..لا وبكل عين صلفة تريد تحاجيني..شكد كرهتهه..
جوان : ها وين طلع رجلججج..
تحجي عبالك واحد ديعلج ويحجي..كتلهه : طلع يجيب اكل عيوني..خير رايده شي بعد ما خربتي الاكل..
جوان : ااا..اني خربته..افا بس..شعليه..
دنوة : لا عليج ونص..جان مابي شي..بس جلبة شسويلج
جوان : اي الجلب وفي ع الاقل مو مثلج..

شعندج بغرفة مخلد البارحة..ديري بالك تندكين بيه.. تره اخلي صگر يذبج للجلاب..منو يريدج..اشو ام وماكو..اب هم ماكو وين تروحين..
هي كالت هيج..وانه شياطين الدنيا كلهه كامت تكمز جدامي .. كمت عليهه سحلتهه من شعرهه كطعته بيدي واصيح بيهه : لج جلبهههه حقيرههههه..تريدين تتهميني بشرفي يا عاااار.. اشرف منج ومن عشيرتج كلهه خووووش..
اجة الحجي ابو مخلد ومخلد يردون يفكوهه مني ويفتهمون شصاير..انه تهسترت..فوكاهه تهيج جروحي..تكلي ماعندج اب وأم..شكد جلبه..
اجت خالة كمشتني من زندي جرتني منهه..
ابو مخلد : ميصير هيج يا ام صگر..شوفي جنتج شسوت ببنتي..يعني اهانه هاي لو مو اهانة..

دنوة : لااااا..لا مو اهانة..بنتك ما مترباية ولا عدهه ذرة انسانية..تقبلهه تكلي اخلي صگر يذبج للجلاب انتي ماعندج ام واب..تعيرني..اذا تقبلهه فانه حسكت بعد كلمة ما احجي
جوان : لج ليش تكذبين..اني وين كايله هيج..كذابه يابة.. تريد تذب حركتهه براسي..لأن الاكل يلعب النفس مثلهه..
الحجية : لا تحجين عليهه هيج..دنوة مثل بنتي وما تعرف تجذب..كمشي لسانج وكعدي..
جوان : خالة حتى انتي صرتي وياهه..يله مقبولة..
كامت تبجي..عافتنه وراحت..امهه راحت وراهه..الحجي هم راح..خالة رادت تحاجيني كتلهه : خالة ما اريد احجي شي حبابة..حروح انام راسي يوجعني..
الحجية : يله براحتج يمة..بس لا تقهرين بروحج..
حركت راسي يعني اي وصعدت فوك..تغطيت وضليت اتكلب كلش وترتني هاي الجلبة..

فوك ما مخليه عينهه على رجلي وتسويلي دكات ناقصة تجيني بكل عين صلفة تتعارك وتكلي اخلي صگر يذبج..بس تحلمين مجرد حلم يطردني..كاعدة هنا معززه مكرمة..مدللني دلال ما شفته يم ابوي..وانه بالمقابل صاينته..حتى نظره ما اعاين على غيره..وهو يدري بيه شنو ما شنو..طز بيهه هي وغيرهه .. عفت التفكير ونمت..كعدت العصر لكيته يمي ع الجرباية ويكلب بالتلفزيون..كالعادة الجكارة محطوطه بحلكه..شافني كعدت واتململ بالفراش..
صگر : كعدتي..
دنوة : اي..
صگر : كومي اكلي..خليتلج على صفحة..
رفعت راسي شفت ماعون محطوط فوكاه ماعون ويمه قوطية ببسي..جنت جوعانة صدك فكمت اكل..

كعدت بالكع ما رفعت راسي..بس حسيت علي نزل يمي ويحاجيني بهدوء مثل كل مرة..
صگر : شصاير انتي وجوان..ليش متعاركات..
دنوة : حجولك..
صگر : اي..بس اريد اسمع منج..
حجيتله شصار والعركة بتفاصيلهه..كتله : بس هاي لخاطرك بعد لساني ما يطخ لسانهه..ولا احاجيهه ابد..
ابتسم وكال : يولي اروح فدوة لهلحلك اليحجي ويدافع عن نفسه..عفية يولي ما اريدج فطيرة وتنوكلين..انه هاي اللغوة مال جوان ما تهمني..تستاهل وعفية سكتيهه.بس لا ترفعين صوتج على خالي..عيب...ما اريدج تطلعين بالشينة يابة..
دنوة : اي جنت متوترة من وره هاي الكلبة شسوي..بعد ما اعيدهه هاهية..
مد ايده مسح باصبعه على شفتي وتقرب باسني..

بهدوء وحنية صارت شفافي بين شفافه وانفاسنه سوه.. شوي وابتعدت..هو ابتسم وعيونه تنطي الف تفسير..
صگر : اكلي يبعدي انتي..
ابتسمت وسكتنه ثنيناتنه..بعد حجة..
صگر : بعد شكد وتروحين للدكتورة..
دنوة : هلايام..يومين تلاثة هيج..
صگر : خوش..انه باجر رايح للدوام..
همهمت يعني اي..ضل كاعد يمي لحد ما كملت وانطيته الماعون وانتجيت ع الجرباية..كام يضحك..
صگر : يعني شنو انزله هسة..
دنوة : لا خلي يمك..عود من انزل اخذه وياي..
حطه ع الكومدي واجه تمدد..خله راسه على فخذي ويحاجيني ساعة يتغزل..ساعة يضحكني..هو الوحيد مونسني .. ينتشلني من الدنيا كلهه لمن نصير سوه..

كتله : صگر..شلون اذا صرت حامل..بعدين اجيب بنية وتكللهه بنيتي وانه اصير قديمة..
صگر : هههههه..يولي غير اموت على تفكيرج..لا يابة انتي الأصل بكلشي..بنيتي الاولى والاخيرة..
دنوة : زين ليش تكلي بنيتي..بله بالبداية جنت صغيرة وحقك وهاي..هسة شكو مو صرت شكبرني..
صگر : هسة اكلج ليش..انه شايف صورتج لمن جان عمري ثمانية وعشرين..اي بوكتهه حتى جنت متخرج من الكلية العسكرية ملازم بعدني..لأن كبلهه جنت معهد من تخرجت يله دخلت كلية عسكرية..شفتهه بالبوم امي..كتلهه هاي منو البنية.. كالت بت محيي دنوة..كتلهه شكد عمرهه مبينه صغيرة كالت اي هي صغيرة قابل شكبرهه..سادس ابتدائي .. هو انه من شفت هلصورة انطبعت ببالي..

كمت كل فترة اجي اكلب بالصور بحجة اتذكر بس انه قاصد هلصورة..يابة شكد حبيتج..ولو انه شايف سرور ونوارة .. ورود والباقيات بس انتي ما ادري..مختلفة..حتى هاي الضفاير احسهن مختلفات..وراهه كبرتي اكثر..امي كالت بله عليك لبسوهه حجاب خطية..هي شكدوتهه..وهاي هيج ضلت كل ما تجيكم وتجي تحجي عنكم اضل واكف واسمعلهه بس منتظرهه تجيب طاريج..بكل مرة اجي لبيت جدج ما الكاج.. مره سألت سرور عنج كالت ببيت خالتهه..ومرة لخ هم كالت نايمة جانت بالمدرسة تعبانه..لحد ما شفتج بالباب ذاك اليوم..لمن شفتج ما عرفتج..كلت هي هاي لو غيرهه..متغيره وطولانه..جسمج صاير انوثي اكثر..جان جسم طفلة..بعدين سألت امي كالت اي هي.. فانه من اكلج بنيتي لأن اول نظره شفتج بيهه جنتي صغيرة والبراءه كلهه بضحكتج هيج كامشة ضفيرتج وكاعدة بحضن امي..

ابد ما انسى الصورة هاي..ليهسه من اغمض عيوني بالواجب وانتي بعيدة اتخيلهه جدامي..عود كولي لأمي بلكت بعدهه عدهه..شوفي روحج شلون تنحبين..
ضليت مبتسمه واسمعله..عيوني دمعت من حجية..شكد أثر بيه بحيث ركزت بكل كلمة يكولهه..خليت ايدي على خده بهدوء وبسته..كتله : احبك كلمة قليلة..شكول بمكانهه..
صگر : بعد عيوني هلعيون..كلشي منج حلو ومالي عيني..
ابتسمت وضلينه كاعدين نحجي..ثاني يوم كعدت الصبح كبله سويتله الجنطة وطلعت ملابسه..نزلت جوه سويتله اكل خفيف بين ما كملت جان يفوت..ابتسملي وصبح علي.. خليتله الاكل ع الميز واجه ياكل..كمل واجة يمي انطاني فلوس..كتله : شدعوة شو هواي..
صگر : اشتريلج شي..ليش تستحين قابل ماخذه من الغريب .. تونسي بيهن وروحي للدكتورة..

رفعت نفسي شوي وبسته من خده..همست : شكرا..
صگر : تدلل دنيتي..
ابتسملي وراح ع الميز اخذ البيرية والجنطة بيده اللخ وطلع .. ما كال شكد حيبقى بس مو اكثر من عشر ايام.. واذا يطول فهو حيخابرني اكيد وينطيني خبر..
توني طبيت جان تصير خالة بوجهي..
الحجية : صباح الخير يمة..طلع صگر..
دنوة : اي خالة هستوه راح..
الحجية : الله يسهله..تعاي خشي باردة بره..
دنوة : اي والله كلش..
طبينه جوه ومشى اليوم عادي..جوان ساكت ومطنكرة تريد تتعارك بس ما انطيهه مجال..كل ما تريد تحجي اعوفلهه الغرفة واروح..عود خليهه تتعارك وي الحيطان..وي خيالهه شمدريني..هي تتعارك وي الكل..

اسماء ومخلد شوي تحسنو ها..كام ما يصيح عليهه جدامنه بس نظراته واضحه..يعني البيت شي على شي زين.. بس الحجي ما نشوفه ابد..وكت الغده والريوك..العشه يتعشه بره لو يم علي..استحي اسأل شنو السبب الي مخلي ما يريدهم و هم بعد ما يريدونه..كلت لمن يرجع صگر اكلة يحجيلي..
وره هليومين الظهر واكفة بالمطبخ اسوي زلاطة وسلمى دتسوي تمن كالت خلي الغده علي هلمرة كله انتي ميصير.. جان تجي خالة..كتلهه : خالة تجين وياي اروح للدكتورة..
الحجية : بكيفج..ماعندي شي..
سلمى : تريدين اجي وياج اني..خاف خالة تعبانه..
دنوة : ها..يله هم زين هيج..بس خاف اركان ميقبل..
سلمى : لا شكو..عود نخلي يوصلنه علمود نخلص واخابره يجي ياخذنه..احسن مما نضل ننتظر تكسي..

دنوة : ديله خوش..خالة ارتاحي انتي حاخذ سلمى وياي
الحجية : على راحتج حبوبة..
سلمى كامت تضحك من سمعت خالة كالت حبوبة..هي تحب هلكلمة بس تكول تضحك..
ضلينه نسولف بين ما كملت اكل وكمت اصبه..جوان بعد شوكت ما تدخل للمطبخ اكللهه ما اريد مساعدة..روحي شوفيلج غير شغلة..تخنس وتروح..عبالهم بعدني مثل شخصيتي القديمة..اذا واحد يدوس ببطني اسكت.. تغيرت ومرتاحه ع التغيير هذا..
العصر كتلهه لسلمى حصعد ابدل كملي بي ما اجي.. صعدت بدلت واخذت فلوس ونزلت..لكيتهه مكملة هي واركان..اخذنه وصلنه وكال بس تخلصون خابروني..
طبيت للعيادة وكعدت انتظر..الانتظار شكد ممل ويكتل.. لو ما سلمى جان عفت العيادة وطلعت..

اجي على غير يوم..بس هي يمي تسولف هاي..
اخر شي يله اجة سرايه..بقت كاعدة وانه طبيت جوه.. سلمت عليهه وكعدت..سألتني ع العلاج..كتلهه : خلص البارحة
الدكتورة : ملتزمة بي التزام جيد لو تخربطين مرات..
دنوة : لا ملتزمة عدل..
الدكتورة : حيل زين..هسة تفضلي اسويلج سونار علمود اشوف وضع المبايض والمبيض..
كمت تمددت واجت سوتلي سونار..دقايق وراحت..كلتلي كومي كمت عدلت ملابسي ورحت كعدت..
الدكتورة : وضعج متحسن..شوفي العمر اله تأثير والوقت الاجيتي بي علمود تتلقين العلاج هم اله تأثير..بمعنى لو جايتني بعد سنة مثلا جان الموضوع كبر اكثر واحتمالية الحمل تقل الى درجة..هذا الكورس انتهى وعاشت ايدج ملتزمة والالتزام واضح..

يبقى انطيج منشطات..تنتبهين على موعدهن.. لمدة شهرين ورجعيلي..حتى اذا شفت التغيير اسويلج جدول تمشين علي وتضبطي بعدهه يصير حمل ان شاء الله..
تشكرت منهه وانطيتهه فلوس السونار..اخذت الراجيته.. كالت ميحتاج ترجعين اشوف الدوة..هو نفسه بكل مكان .. طلعت على سلمى..اخذتهه ونزلنه جوه ع الصيدلية اشتريت الدوة وتمشينه بالشارع..عزمتهه على اكلة خفيفه..
سلمى : لا لج ما اشتهي شبعانة من الغده..
دنوة : اهو مو انه فرحانة لا تخربين الفرحة..
سلمى : ديله هاي لخاطرج..شعدنه غيرج..
ابتسمت ورحنه كعدنه بمكان ناكل..بعدين شواي و دك تلفونهه كالت بخوف : هذا اركان..هسة يرزلني..
دنوة : دجاوبي بلكت يريد منج شي..

جاوبته وتحاجي بخوف : اي يله هسة جنت اريد اخابرك سبحان الله..اي احنه بنفس المكان لا تتأخر..
اندارت علي : ها ارتاحيتي خليتي اجذب..
دنوة : ههههه..ليش تجذبين علي..جان كتيله رحنه ناكل شغلة اشتهيتهه..دنوة عزمتني..
سلمى : يله اوي شسويله..
ضلينه كاعدين لحد ما خلصنه وتمشينه لمكان العيادة.. شواي واجة اركان..اخذته ورجعنه للبيت..اول ما طبيت جان تتلكاني خالة..
الحجية : ها يمه بشري..ضل بالي..
دنوة : لا لتخافين خالة..تعاي نفوت هسة احجيلج..
طبينه جوه..كعدت احجيلهه كالت الحمدلله مو كتلج ربج ما يعوف عبده وحيد..ابتسمت وبستهه من خدهه..كلامهه يطمني دائما..هادئة بطريقة حجيهه مثل صگر..

مرن يومين طبيعيات..بين شغل وضحكة..ماكو فد شي .. بس وراهه جنت كاعدة دا اجلف الطباخ جان تجي جوان يمي تعلج وتحاجيني..
جوان : اكلج عيني..
دنوة : كولي..
جوان : شنو انتي عاكر..اشو حتى سلمى الي كلنه عليهه راح تتأخر يله تحبل هسه حامل..
عاينت عليهه مستغربة : سلمى حامل..شوكت..
جوان : اي والله هسة سمعتهه تكول لاركان..وهو متخبل عليهه ما مصدكين الظاهر..
دنوة : شوف شوف..ضمت عني..يله عود احاجيهه..
جوان : شنو انتي ما تغارين..اكلج حامل..
دنوة : اي وشسويلهه يعني..اذبحهه مثلا..

الله يسعدهه وتتهنى يارب..انه ما اتمنى الشين للناس.. حايرة بروحي لا اعاين منا ولا منا..احسن منج..التهي بروحج حبوبة لا تضلين تبحوشين وراي..تره متغثيني ما تكدرين..
جوان : والله كوية..بس يله قابل تضلين هيج..الا اكسر عينج بسيطة..صبريلي..
دنوة : اي خفت كلش الصراحة حتى دا ارجف..
غمتني وراحت..شكد جاهلة وتصرفاتهه سخيفة..مثل ما كال صگر..بالكوة تريد تجذب الاهتمام لروحهه وهي حالهه حال النملة محد يعاين عليهه حتى ولا دايرلهه بال..سخيفة اصلا .. عفتهه وكملت الطباخ..
بالليل كاعدين بالصالة جان يدك تلفون خالة..شالنه كامت تكول صلوات صلوات..بنية ولد..يله بالخير..نجيكم الصبح ان شاء الله..سلملي عليهه..مع السلامة..
شهد : منو خابرج خالة..

الحجية : هذا علي..مرته جابت..
ام مخلد : يا بالخير..لعد شنو وحدهم راحو..
الحجية : لا وائل وياهم..
ام مخلد : باجر نروحلهم عود..
الحجية : اي انه هم كلت هيج..
جوان ضلت تعاينلي وتبتسم بطرف شفافهه..عود شوفي حتى مرام جابت وانتي بعدج..بس عادي ما يهمني..المهم صگر وياي..هو يساعدني بكلشي بعد بقت يم الله واكيد ما راح يخليني محتارة والناس تشمت بيه..لأن ما مأذية احد .. كلمن ينرزق على كد نيته..
ثاني يوم الصبح كعدت على صوت شهد..
شهد : ولج كومي..حنروح لبيت علي تبقين وحدج..
جاوبتهه بملل : ليش الحجي هم حيروح..

شهد : لا..بس خالة كالت خلدنوة تجي لا تبقى..
دنوة : يله هسة بس اغسل وابدل..
شهد : ديله بسرعة..اني جوه انتظرج..
حركت راسي يعني اي..ذبيت الغطى وكمت غسلت..بدلت ونزلت طلعنه نتمشى لبيت علي..لكيت سيارة واكفة بالباب يمكن اهلهه..طبينه عادي..سلمت عليهه وتحمدتلهه ع السلامة كالت بصوت تعبان هي ومبتسمة : يوم الالج يارب واشوف الطفل بحضنج انتي وصگر..
حسيت كلامهه دخل لگلبي بالعجل..فرحني وانطاني أمل جديد كتلهه : الله يسمع منج..
رحت ع الطفل جابت ولد طبعا..كالت اسمه زيد..مديت اصبعي على راسه بشكل خفيف وخليت خمسة وعشرينات ثنين بكماطة..هي حست علي خليت شي ..

كالت : ولج دنوة شكد خليتي..لا تكلفين روحج عيني..
دنوة : يله قابل شسوينه..
ضلينه كاعدين عدهم تقريب الساعة..خواتهه ثنين وامهه واخوهه جانو هنا..امهه كالت حتبات يمهه بس خواتهه يرجعن وي اخوهن..
علي جابلهه معلاك وكعد يمهه..ما سمعت شيحجون بس مبين فرحانين من النظرات..ابتسمت عليهم جان تجي جوان تتمقلج بالحجي..
جوان : اي شنو هلابتسامة..مال فرح لو مال غيرة..
دنوة : مال فرح طبعا عيوني..ليش اغار مثلا..
جوان : لأن ما عندج طفل يعني ومديصين عندج حمل..
دنوة : بعدني صغيرة حتى ما طبيت التلاثينات.. وصگر يكلي انتي بنتي ما اريد جهال..شفتي..بعد لا تدخلين صار جم مره اكلج..يله ولي خلاكوم..

عفتهه وكمت كعدت يم خالة..وره شوي رجعنه للبيت.. هي تخبلت تريد بس تضوجني بس ما تكدر..وين ما تجيني اجيهه من غير درب..ضاجت وعافتني من وحدهه..
وره عشر ايام المفروض صگر ينزل اليوم..بس ماكو.. رحت ع التلفون دكيت علي ما يجاوب..حتى رسالة ما دزلي.. ما ادري شعجب..توترت وخفت بنفس الوكت..وين راح يعني .. هو ما يفوت فرصة خاطر يجي للبيت ليش هسة تأخر..
ضليت اليوم كله اعاين من الشباج بلكت يجي..انطي اعذار لروحي..هسة يجي..يمكن الطريق ازدحام..يمكن هيج .. يمكن هيج..بس ماكو..رحت احاجي خالة بلكت كايللهه ..كالت لا خابرني ولا وصل يمي..
بالليل صعدت انام لكيت سرور مخابرتني..نزعت الشال ورحت تمددت بعدين خابرتهه..حجينه عادي..بعدين كامت تحجي بجدية شوي

سرور : دنوة..ما ادري اذا هلموضوع حيأثر بيج لو لا.. بس جدو مريض وتعبان كلش..هسة هو نايم بالمستشفى من البارحة..نفسه ضاق وماخذي هناك..
دنوة : عززه..شبي ليش هيج..هم جلطة..
سرور : بعد ما ادري..بس شاكين عنده قلب فسموي عنده انسداد بالشرايين..
دنوة : الله يشافي..
سرور : يعني متجين تشوفي لو شنو..
دنوة : اذا صگر قبل اجي..
سرور : يله براحتج..بس جدو خطية لا تنسي..مو عشتي ويانه سنين..جان ياخذج ويفرج الكيعان والحلال لأن يحبج.. بس الصار كله بسبب شذى..
دنوة : شذى..هاي شعليهه..شمعرفج انتي..

سرور : ليش ما تدرين..
دنوة : شدري ولج..
دتحجي ولدهه كامو يبجون..كالت : دنو حروح اشوف هذوله يمكن تعاركو..شوف اني باجر لو عكبة اخابرج واحجيلج كلشي بالتفصيل..
دنوة : يله براحتج..مع السلامة..
سديته منهه بس الف فكرة جتي ببالي..شذى يعني شحاجيه هاي الجلبة..ولو كلشي يطلع منهه..بس شكايله..يله انتظرهه شحتكلي وانه عود اعرف شتصرف..
ثاني يوم هي ما خابرتني بعد وانه هم نسيت..التهيت بصگر ماكو..متت خوف يكون بي شي ..جا ليش ما خابرني ولا كال شي..كمت اكعد الصبح من وكت التفكير اكل راسي حتى ما اكدر انام..الحجي ومخلد يدكون علي بس ما يجاوب يضل بس يدك بعدين يطفى وحده..

مرت خمس ايام لخ نفس الوضع..بس هلمرة الصبح دكو علي طلع خارج منطقة التغطية..كمت ابجي وافتر بالهول : عفية شلون خالو..
ابو مخلد : مو خابرته يا يابة..شسويله بعد..
دنوة : ليش يطلع هيج..خاف بي شي..
ابو مخلد : كولي يالله..ان شاء الله مابي شي..يمكن مشغول وما راد احد يحاجي..هسة ننتظر كم يوم..اذا ما جاوب عود اروح للمركز ببغداد..
ضليت ابجي بدون صوت..الف فكره تجيني..توترت كلش.. اجت خالة بيدهه حبايتين..
الحجية : هاج شربيهن لا تنسين علاجج يمعودة..
انتبهت لشكل الحباية عرفتهن مالت المنشطات..اخذتهن ورحت كعدت..حتى للمطبخ ما طبيت..هم يسوون ويصبون بدوني

بالليل افتقدت صگر ومكانه بيناتنه.. عفتهم كاعدين وصعدت فوك كلت احاول بلكت يجاوب..دكيت علي كلي امل يجاوب.. بس ماكو نفس الحالة..
تركته ع الشحن وكمت للحمام غسلت وتوضيت..لبست ثوب الصلاة ارد اصلي جان يدك التلفون..ركضت علي..صگر .. شلته ومتلهفة اسمع صوته بس.....

يتبــــــــــــــــــــــع...........................