رواية اسألي عني الليالي الفصل السادس وخمسون 56 - بقلم رقية جاسم

انه وگلبي .. على الهجران مابيه ..
تضل روحي .. ليالي الشوگ منسيه ..

قناة التليگرام

حساب الانستگرام

الـبـارت الـخامس والـخـمـسـون...............

بالليل افتقدت صگر ومكانه بيناتنه.. عفتهم كاعدين وصعدت فوك كلت احاول بلكت يجاوب..دكيت علي كلي امل يجاوب.. بس ماكو نفس الحالة..
تركته ع الشحن وكمت للحمام غسلت وتوضيت..لبست ثوب الصلاة ارد اصلي جان يدك التلفون..ركضت علي..صگر .. شلته ومتلهفة اسمع صوته بس مو هو جاوبني..جان صوت رجال غيره..اول ما سمعت الصوت انخرست..
- : نعم اختي تفضلي..
سكتت ما جاوبت..رجع حجى..
- : تسمعين..
دنوة : اا..اي..هذا مو رقم العقيد صگر..
- : اي هو..
دنوة : وينه..انت منو..

- : اني مقدم هنا بالمقر ببغداد..طلع هو ودورية كاملة كبل اسبوع وليهسه ما رجع..
دنوة : شلون ما رجعه..ليش وين راحو..
- : اجاهم أمر يتوجهون للناصرية..الجنود والضباط الوياه تلفوناتهم مفتوحة عادي..بس هو نسى تلفونه هنا جان طافي
دنوة : بس هو يداوم ببغداد شعنده هناك..
- : اي عادي يسمونهه مأمورية..من خابرت الضابط كتلة العقيد وياكم كال خلصنه على شنو اجينه هو طلع كال ساعة بالزايد واجي ما اتأخر..هاي كبل تلث ايام..بعدين كتله شوكت ترجعون كال العقيد ما اجه..ما خلينه مكان ما دورناه بي وليهسه ماكو.. الدورية رجعت البارحة بالليل.. احنه ما مسؤولين عنه..لأن من اختفى مجان ضمن نطاق العمل.. هم مخلصين شغلهم وهو طالع حتى ما كايل وين رايح..
هو كال هيج وانه كمت ارجف..حتى تفكير ما اكدر افكر ..

كتله : شكرا..
سديته بالعجل.. وين راح ..شصايرله ياربي..مو الوضع امان هسة لو ٢٠٠٦ جان كلت اي..بس هسة شكو..
خليته ع الكومدي ورحت صليت..بس خلصت كمت ابجي ع السجادة..مدنجة وابجي..راسي كام يوجعني ويدك حيل.. كمت على كيفي لأن خفت..جسمي نمل من فوك لحد اصابع رجلية..نزعت الثوب مالت الصلاة ولبست الشال..نزلت جوه بالعجل..وجهي مبين علي الخوف..الحجي ابو مخلد والباقين كلهم ضلو يعاينون علي مستغربين..
ابو مخلد : شبيج خالو..شو خايفة..
دنوة : خالو هسة دك علي رقم صگر..بس مو هو جاوبني .. حجيتلهم شصار ومنو هذا..
الحجية : يمة وليدي وينه عمت عيني..وين رايح ييمة..

ابو مخلد : صبري خوية.. خالو صار شكد هلحجي ..
دنوة : كال كبل تلث ايام هو ماكو..
ابو مخلد : هسة وين راح يعني..مو تكولين عراق ٢٠٠٦ لو ٢٠٠٧ حتى نكول الوضع متأزم وكلشي ممكن يصير.. هسة شكو قابل..بس الله يستر..
رفعت راسي ودموعي بعيني..كتله : شنو حتضلون كاعدين .. محد يدوره..مختفي حتى تلفونه ما ماخذه وياه..
ابو مخلد : اي ادوره بس وين..قابل الناصرية متر مترين .. واني شمعرفني بهلمنطقة يا خالو..حتى ما طابهه..
ضل يعاين علي بنظرات شفقة..تمشيت كعدت ع القنفة ساكتة بس ببالي الف فكرة..وينك .. ليش تروح بدون ما تكول .. صدك بهلموقف صرت ضعيفة الى درجة بعيدة..

مستعدة اتحمل الغربة مرة اللخ واتحمل اخلاص بس ما اتحمل صگر يبعد عني..خايفة ومتوترة..البيت كله انشحن بجو متوتر مليان افكار واحتمالات..
رفعت راسي وضليت اسمعلهم..
ابو مخلد : خوية ام محمد..مو كلتي وائل يشتغل بالصيرفة
الحجية : اي..
ابو مخلد : دخابري كليلة محتاجينك بالبيت..ما رايدين نحاجي ولا هم يحزنون..اريد نوصل لحل..بلكي يعرف واحد بالمخابرات استخبارات..
الحجية : خالة دنوة كومي جيبلي التلفون..امري لالله.. منا محمد بتلفات الدنيا..ومنا صگر ما ادري وين اراضي..
ابو مخلد : اصبري ماكو الا الخير..
كمت جبتلهه التلفون خابرت ع الحجي..حجت وياه شوي بعدين كالت هسة يجي بالطريق..

اجت سلمى كومتني كعدت ع القنفة واسمعهم..الصار شي جبير..ويصدم..صگر صارله سنين بالجيش..ولا مره غاب بدون محد يعرف عنه شي..هسة ليش ما اخذت التلفون.. كلساع تجيني فكرة واكول لا مو هيج..مابي شي وحيرجعلي.. اي يرجعلي متأكدة..
ضليت كاعدة وساكتة لحد ما طب الحجي متفاجئ من عدنه وانه اكثر شي..لأن اول ما دخل شافني..
وائل : خير ياستار..اجيت بالعجل..شبيكم..
الحجية : شبينه..غير صگر رايح لشغله وما راجع بعد.. الدورية كلهه راجعه بس هو محد يدري بي وين..
وائل : صدك جذب..شنو محد يدري بي وين.. هسة انتو شمدريكم هيج..
دنوة : خابرني واحد كال انه مقدم بالمركز..صگر ناسي تلفونه

دازيهم ما اعرف شنو للناصرية مخلصين شغلهم هو كايل عندي شغلة اسويهه ساعة واجي..رايح وما راجع..الضباط الباقين مدورين علي ماكو..اختفى..البارحة راجعه الدورية لبغداد وهو بعده..
وائل : لا حول ولا قوة الا بالله..بله هسه الواحد وين ينطي وجهه.. خالو هو حجالج شي..عنده مشكلة وي احد.. خلنفتهم خاطر نعرف وين نروح شلون نحجي..
جاوبته والدموع بعيوني : لا ما كال شي..هو طلع مرتاح .. حتى كبلهه محد خابره ولا شفته يصيح .. خاطر نكول متعارك وي واحد
وائل : هسة احنه ما نريد نسبق الاحداث ونحجي شي يمكن يصير ويمكن لا..خلننتظر..منا ليومين اذا ما اجه اطلع ادور علي..لو مستشفيات لو مراكز الشرطة..

دنوة : شيسوي بالمركز خالو..هو طالع مناك..
وائل : يساعدونه نشوفه وين..خوما وحدنه ندور..
الحجية : اكلك حاجي هذا صاحبك كلت يشتغل بالعمارة بلكت عنده اتصال بواحد من الناصرية..
وائل : هو هم اجة على بالي..باجر اخابره عيب من العالم هسة دنيا ليل..
ابو مخلد : مو جده عنده صيت وسمعة..قابل ع الخالي بلاش اكيد يعرف ناس واصلين..نخابره نكلة ع الصار..
وائل : ماعدنه علاقة بيهم..صگر كطع العلاقات من وفاة ابو دنوة..لا يجونه ولا نجيهم..
ابو مخلد : ادري..بس يبقون عمامه ومن لحمه ودمه..
وائل : تريد..هيانهم موجودين كللهم نريد مساعدتكم.. انه بالنسبة الي ما احاجيهم ابد..

الحجية : وائل تره حجي محسن صدك..مو وكت الزعل والمشاكل .. خلنشوف وين صار..منا ليومين تلاثة اذا ماكو نوصللهم خبر..
كام وكف وراح يم الباب : براحتكم..
عافنه وراح..ضلينه كاعدين للفجر..محد اله نفس ينام وانه اولهم..حتى ماكدرت افكر..توترت..اخر شي حجة الحجي
مخلد : اني باجر اروح لبغداد للمكان اليشتغل بي.. مترهم بس مخابرة..اشوف شصاير..شوكت طلعو ومنو وياه.. اجيب تلفونه همين..
اركان : خوما وحدك تروح..اجي وياك ماعندي شي..
خالة سكتت ما حجت..كالت بكيفكم..راحت لغرفتهه راسهه كام يوجعهه..ما متعودة تبقى لهلوكت واذا بقت كاعدة قابل شنو حيتغير..سلمى كامت تغفي بس متقبل تروح..

دنوة : روحي نامي كلهم راحو..
سلمى : شلون انتي تبقين هنا..روحي نامي..
دنوة : عوفيني هنا..مرتاحة..هسة شواي وانام..
كامت هي وتكلي الله يساعدج.. ما انطيتهه ردة فعل.. رحت ع القنفة ومكرفصة روحي..ضليت افكر لحد ما تعبت وغمضت عيوني بدون ما احس..
كعدت الصبح على صوت الحجي ابو مخلد ديحاجي الحجية ومخلد واكفة بسده هو واركان ثنينهم مبدلين.. عدلت كعدتي والشال واسمعهم..
مخلد : حروح وارجع بنفس اليوم..ما اريد اضل هناك.. حتلو تأخرت مو اشكال..
الحجية : الله يسهللكم.. شوف بلكت محاجي احد ع المكان الرايد يروحله..انه بس اريد اعرف شعنده بالناصرية..

مخلد : هسة اروح واشوف شصار..
طلعو ثنينهم والحجي ابو مخلد طلع وياهم..شواي ودخل الحجي يخابر ومبدل يريد يطلع..
وائل : الله بالخير..الله يسلمك ياطيب..والله رايدك بشغلة .. اي هسة طالع للشغل..اشوفك هناك وافهمك كلشي..يله بس مسافة الطريق ما اتأخر..مع السلامة..
الحجية : ها..المن خابرت..
وائل : هذا واحد رجال اعرفه..ابنه يشتغل بالداخلية .. يعني واصل وعنده خوش معارف..اكله على صگر وهو يعرف يتصرف..
وكف يم الباب ورفع السويج : هذوله ولدج واحد منهم حيروح بداهية وكولي كال وائل.. هسة حروح ويصير خير عود..
خالة عاينت علي وعيونهه مدمعة..

الحجية : هو هذا حظي..بعدني يالله توني خلصت من سالفة محمد اجاني صگر..
ام مخلد : الله يفرجهه..بعدين لا تستعجلين..بلكي عنده شغله هناك وما راد احد يخابره..ما صارله بس تلث ايام.. هم يله .. وانتي مريضة لا تقهرين بروحج..مابي شي كولي يالله..
الحجية : يالله..الله يسمع منج..
مشى اليوم بتوتر وخوف..تلفوني ما دك بعد..جنت متأملة يدك وينطينه خبر هذا الضابط..بس ماكو..مخلد خابر ع الحجي بالليل تقريب الثمانية..كال حنوصل ماضل شي..
انه حتى نسيت المطبخ والاكل..من الصبح لليل ما اكلت غير لكمتين تمن علمود الدوة..حتى الدوة نسيته..خطية سلمى تركض وراي تكلي دواج لا تنسينه..ولو انه نسيته لو ما هي .. ضليت افتر بالصالة رايحة جاية..هو من يتأخر يكول ..

يخابر خالة لو يخابرني..يكول عندي شغل بعد واطول جم يوم ليش هسة ما حجه..ادور حتى تلفونه ناسي ليش هيج.. هس مكتبولتي شلعان الكلب والحيرة.. الحجي ابو مخلد لاحظ توتري وخوفي..
كال : بوية دكعدي..هسة كلنه متوترين وياج بس مو هيج..
سكتت ما جاوبت..رحت كعدت ..شواي واندكت الباب.. گلبي ضل يدك بلكت سمعو شي عنه..طبو كعدو ويحجون..
ابو مخلد : بشر..شسويت..
مخلد : رحت للمقر اليشتغل بي..ما قبلو يفوتوني.. كال لا انت ضابط ولا عندك باج..ما تدخل..كتله يابة اني من جهة العقيد الفلاني وانطيته اسمه..كال حيطلع المقدم يحاجيك.. ضليت منتظر لحد ما طلع حاجاني..كتلة البارحة اجانه اتصال منك وشرحتله شصاير..كال اي اني كتلهه ما مسؤولين عنه..

كتلة وين المكان الراحوله بالضبط..واريد تلفونه بلكت يساعدنه نشوف الارقام والاتصالات.. المهم بعد جر و عر يله انطانياه ما قبل بالبداية..يكلي هاي معلومات عسكرية وهذا ضابط جبير شلون تريد انطيك هيج شغلات عنه..شوفته الجنسية مالتي ومالت اركان..كتله ابن خاله اني..وتأكد من الجنسية مالته لو طلع الفايل مالته وشوف.. راح جوه ورجعلي وره نص ساعة انطاني التلفون كال بعد ما اكدر اكلك شي..اخذتهن وهاي جيتي..التلفون طافي خلي ع الشحن ونشوف..
ابو مخلد : تعالي خالو اخذي التلفون خلي ع الشحن خنشوف دربنه..والله بلش التوتر ياكلني..
كمت اخذت التلفون وصعدت فوك..اول ما طبيت للغرفة اشتميت ريحته..من البارحة ما دخلتلهه..دنجت ورحت ع الشاحنة خليته وضليت انتظر تقريب الثلث ساعة..بعدين اخذته ونزلت..اخذه الحجي يكلب بالارقام والاتصالات ..

الحجية : ها شلكيت..
ابو مخلد : هذا رقم غريب ما كاتب علي اسم مخابر علي كبل ثمن ايام العصر..يعني باليوم الراحو بي للناصرية.. مرتين هو مخابر علي ومره هذاك مخابره..وهاي هنا مخابر دنوة.. بله هاي مال ضابط..بس هذاك شعنده وياه..انوب مدة المكالمة عشر دقايق..
الحجية : يعني شنو هسة..
ابو مخلد : شمعرفني..كل الارقام مسجل عليهه اسم بس هلرقم..
الحجية : دخابره شوفه منو..بلكت صديقة يعرفه..
الحجي دك ع الرقم..ضل يدك لحد ما فصل من وحدة.. ادور رجع دك علي..هم ضل يدك لحد ما فصل..
ابو مخلد : ماكو محد ديشيله..

عوفي باجر ارجع ادك..لو هو يشوفه ويدك مرة اللخ.. هسة كليلي هذا وائل وين صار..هسة وكته يتأخر مو نريد نعرف شسوه..استغفر الله..
الحجية : خابرته كبل شواي..كال ما اتأخر بالطريق..
ضلينه ننتظره يجي..بهلموقف ما نكدر نجزم.. ما نكدر نكول مخطوف لو صايرله شي..ولا نكدر نكول مابي شي.. بعده مصارله اسبوع..ممكن اذا تعدى الاسبوع نكدر نثبت على مرسى..هسة لا احنه هنا ولا هنا.. ادور هذا الرقم الغريب وترني..ارد اعرف منو وليش ما يشيله..المشكلة انه ما اكلب بتلفونه..ما يقبل..يكلي شغلي وارقامي كلهه هنا.. فاعوفه ما ادخل.. ضليت الوم بنفسي..هسة ليش مو عنيده.. ما عندي هلصفة..لو عنيدة جان خليته يحجيلي منو هذا ومنو هذا.. ع الاقل يكون عندي علم..زين هيج منعرف كلشي..

ضلينه ننتظر تقريب النص ساعة واجة الحجي..كعد ع القنفة وصالحي..كال : دنوة بلا زحمه جيبيلي كلاص مي..
حركت راسي يعني اي ورحت..بس اسمع خالة تكله ها شسويت..يكللهه اصبري بس خلارتاح..
اجيت انطيته المي وكعدت اريد اسمعه شيكول..
وائل : رحم الله والديج.. شربه ورجعت يحجي ..اليوم من رحت للشغل لاكيت هذا الرجال هناك..كعدنه بالسيارة وحاجيته .. كتله ابن اختي عقيد وشغله ببغداد..مثل ما تعرف الوضع امان والحمدلله..يعني كلشي ماكو..فهاي شيعتبروهه.. كلي هو صارله شكد ماكو.. كتلة هم طالعين مأمورية للناصرية.. مناك مخلصين شغلهم على حسب الاصول هو كايل عندي شغله ساعة بالزايد وارجع..والروحة روحه..الدورية واصله كبل ثمن ايام مخلصين الشغل بخمس او اربع ايام..

رايدين يرجعون وهو ماكو..يعني صارلة تلث ايام واليوم الرابع كال انه ابني اذا وصيته فهو محيقصر..بس من هسة اكلك .. الشغلة مطوله..لأن المفقود لازم يعبر اربعة وعشرين ساعة يله ينكال عنه مفقود وتبدي تتحرك الدوريات ..كال شوكت ما تريد خابرني وانه اوصل المعلومات لابني او انت حاجي ماكو اشكال.. هذا كل الصار..هي صارت السالفة مالت محمد ومشت على خير بدون مشاكل والحمد لله.. مو نكول هسة رجعو تذكروه..هو رايح وحده غير..
الحجية : ما ندري..ما ندري كلشي..مخلد واركان اليوم راحو لبغداد رايدين يدخلون يحاجون الضباط وياخذون التلفون بطلاع الروح يله سلموه..هسة شفنه التلفون مخابر مرتين على رقم مجهول ما ندري منو..

محسن دك علي ..يدك ومحد يجاوب.. اكول بلكت يطلع صاحبه ومحاجي بهلسالفة او منطي علم وين حيروح..
وائل : بعد شنو شفتو..المن مخابر..
ابو مخلد : محد مخابر..بس احنه من دكينه علي.. وهذا الرقم والضابط لمن خابر دنوة من رقمه..الباقي قديمات..
وائل : والله ما اعرف..سالفته سالفة..هو كتوم..لا يحجي لا يكول..بس ان شاء الله خير..بلكت بهلايام يرجع..
الحجية : بلكت..مكتوبتلي هاي..عود انه اكول صگر جبير وما يسويهه..ما يسوي شي طايش..
وائل : هسة احنه شمعرفنه شمسوي الرجال..بلكت طالع بشغله وي واحد..لو لو ..هواي احتمالات..وهو مكانه جبير تره مو تكولين ملازم لو شي..يعني محصن نفسه..بس كليلي هو مسوي هيج كبل..مختفي بدون ما يكول قصدي..

الحجية : هو انه لو ادري بي يسوي هيج جان ما حجيت وضليت انتظره..هو صح ما يحجي بس لمن يريد يتأخر بالواجب لو تطلعله شغله اضافية يخابرني..ينطيني علم .. يمه حتأخر لا يضل بالج..
وائل : ما اعرف بعد ..هو ناسي تلفونه لا تنسين..
تنهدت بقلة حيلة..كالت : روح ارتاح خوية..الله يساعدك..
عافنه وراح..بقو يحجون..الحجي ابو مخلد كام يعاتبني عبالك انه السبب..
ابو مخلد : هو مو رجلج..شلون ما تعرفي وين راح..
دنوة : شمعرفني خالو..هو ما يكول..
ابو مخلد : المفروض تسألي..تكليله وين حتروح يضل بالي عليك..خابري اطمني علي..اخر مكالمة منج من طلع اول يوم للدوام..انتي مهملة..

سلمى : عمو ليش هيج تكللهه..هي شعليهه..هذا قضاء وقدر يمكن يطلع ماكو شي ليش هيج تلومهه..
ابو مخلد : بله لا دافعيلهه..هي عدهه لسان وتحجي..
دنجت ما جاوبته..يمكن صدك مني السبب.. انه ما اسأل ولا اهتم..بس اشوفه كاعد ويانه يحجي ويسولف اكول مابي شي..ادور حجية بقه براسي..كمت الوم روحي بداخلي.. صدك انه دائما من ينزل للواجب ما اخابره..الا هو يخابرني تكول زعلانة وانتظر يصالحني.. هو انه احتاج واحد يطمني مو يجملني..
ضلينه كاعدين للوحدة بالليل..حتى اكل محد يشتهي ياكل .. مصبوب بس محد اكل.. عفتهم يحجون وغفيت..كعدت على ايد سلمى تكعدني..
سلمى : كومي نامي فوك..باردة هنا..

دنوة : هسة..
كمت وهي تعاينلي بنظرات خوف على حزن..هيج.. هي تدري بحالتي النفسية شلونهه..تدري صگر شلون ساعدني.. ادور هسة هو ماكو..عفتهه وصعدت فوك..توضيت وطبيت للغرفة صليت..دعيت ياربي يكون موجود وعايش..خليتأخر بس اريد ارتاح واعرف وينه.. خلصت ورحت تمددت ..حضنت المخدة مالته بيهه ريحته..لحد ما غفيت وحدي..
ثاني يوم الحجي خابر ع الرقم الغريب طلع خارج منطقة التغطية..هنا فصلت عنهم..اجت ببالي الف شغلة.. ساعة اكول هذا يمكن خاف من عدنه وقفل جهازه.. بعدين اكول شمعرفه صگر ما موجود خاطر يخاف..الحجي ضل اليوم كله يحاول يخابر ماكو..شد ارصدة ثنين لتلفون صگر ورصيد لتلفونه .. خابر الارقام الداكين علي او هو داك عليهم اخر فترة..

كلهم يسألهم شفتوه..اجاكم..وصلكم..ما كال شي.. محد يعرف كلشي..متكتم ع الموضوع الى درجة..متت خوف .. اليوم كله متوترة حتى حجي ما حجيت..ادور الحجي ابو مخلد كام يرزل بيه..كاعدين بالجذب ع الغده..هناك وحجة..
ابو مخلد : اذا صار شي بصگر انتي السبب..
دنوة : انه..
ابو مخلد : لا ابوية بالكبر..
عيوني دمعت..شوي واطك بجي..ليش هيج..كتله : قابل انه ما خايفة علي..لو ما مهتمتله..ليش تكول هيج علي..هو هم رجلي قابل اريدله الشينة..
ابو مخلد : اييييي انتي مهملة..ما عرفتي تصرفين.. انتي هم حاسبة روحج ع النسوان والزوجات..انتي طفله ..طفلهههه .. لعد اكو وحدة ما تدري رجلهه وين راح..مهملهههه..
مخلد : يابة على كيفك..

شسوت البنية..ليش هيج وياهه..
عفتهم وكمت..صعدت فوك واتصفن بالغرفة..هاي من اول يومين وهيج سوو بيه..بعدين شحيصير.. وينك هسة..حتى صوتك ما اسمعه..ليش حظي هيج.. دنجت وتنهدت..كمت توضيت.. ما اكدر احجي لاحد..كلهم متوترين..فاصلي وارتاح شوي
مرت الايام..لمدة اسبوع كامل ماكو ولا خيط عنه..الحجي خابر الرجال اليعرفه بلكت اكو خبر..كالة هسة لحد الان ماكو شي انطو صورته ومعلوماته لجم مركز بالناصرية ودينتظرون .. بهذا الاسبوع حتى الحجي وائل همات كلب علي..يكلي انتي السبب .. مهملة ما تعرفين تتصرفين..ما تعرفين تشيلين تلفون تخابري تكليلة وين رحت وشسويت..ادور خالة كامت من تشوف صارت هوسة تعوفنه وتروح..تكول هو انه راسي يسولفلي ما اريد مشاكل وهوسات..

انه دورات اجاوب ودورات اسكت..بالحالتين نفس الشي.. ما اعرف ليش يذبوهه براسي..صحيح ما اخابره..بس حتلو خابرته هو ما يحجي..ما يكول شحيسوي..يسوي ويكمل بعدين يله يجي يكلي دنوة سويت هيج وهيج..بكل الحالات انه اخر من يعلم..بس محد يرضا يستوعب..
وره هلاسبوع جنت نايمة الظهر..راسي كام يوجعني فاخذت حباية وجع راس والدوة مالتي ونمت..حسيت على صوت التلفون يدك..عبالي حلم..ادور ضل يدك احد ما كعدت.. جريته من الكومدي وشلته بدون ما انتبه ع الرقم..
دنوة : ااا..منو..
- : اني سرور..ما قريتي اسمي..
دنوة : لا والله ما انتبهت..جنت نايمة..شلونج..
سرور : والله زينة..انتي شلونج..
دنوة : شلوني..شلوني بدون صگر برأيج..

سرور : بدون صگر..ليش ياستار..وينه غير بالدوام..
دنوة : ياريت بالدوام..مختفي صارله عشر ايام..
سرور : يا صخام..شنو على فجأة..وين شنو السالفة.. شنو هلبلوة هاي..
دنوة : هو انتي كلتيهه..بلوة..ما اعرف شمعرفني وين راح.. هو يحجي اصلا..ادور حتى تلفونه ناسي..
سرور : هاي وين جانتلج..سوده عليه..والله اني ما ادري محد كلي..قبل يومين جنت ببيت جدو..علموده جان مريض هسة احسن..بس محد كال وجاب السيرة هاي..
دنوة : اي هو الحجي كال اليوم يروح لبيت جدي يشوفهم ويحاجيهم بلكت يكدر يساعده..
سرور : شلون هسة شحتسوون..وين دورتوه..
حجيتلهه شصار وشسوو..

كمت ابجي ما تحملت..الوضع يوم عن يوم يصير اسوأ.. بمكان ما نلكى شي عنه ادور صار يختفي اكثر.. الرجال الي كلفة الحجي كال ماكو شي على حطة ايدك..راحو على سيطرتين ببداية المحافظة وسيطرة لخ .. انطو اوصافه ودينتظرون ..كلهم يخلونه ع الانتظار..ماكو شي اكيد وصحيح من عدا رزايلهم..عبالك انه كتله اختفي .. شحال لو ما كاتله روحي بس اريد اشوفه واعرف وينه..
ضلينه نحجي تقريب العشر دقايق بعدين سديته.. لبست الشال ونزلت..ع الدرج واسمع خالة تخابر..بالبداية معرفت ويامن تحجي بس بعدين من الحجي عرفت اخلاص..
الحجية : اي يمة مثل ما كتلج.. لا قابل محمود شعنده خاطر يدور.. خوالج ما يقصرون ..هسة طلع خالج محسن واركان ومخلد لبيت جدج..

راحوا يحاجوه..تدرين بي واصل خوش وصلة وعنده معارفه طبعا..بلكت يعرف احد هناك بالناصرية.. يا هو.. هااا .. اي مو كتلج ما جابنله خبر ليهسه..هيانه تلفونه محطوط كل يوم يدك علي واحد ويجاوبه خالج يسأل عن صگر..يكلة ماكو .. محد يدري بي وين طالع.. اوووف ييمة..والله ما ادري شكول بس ربج يعرف بحالي..يله روحي ارتاحي عود انه من يجون افتهم شسوو واردلج خبر.. شعندج جاية حبوبة قابل اذا جيتي شحيتغير.. تنهدت ورجعت حجي ..مع السلامة..
سدته وراحت لغرفتهه..خطية شلون تحجي بگلب محروك بنفس الوكت ما بيدهه شي..عبالك واحد كاعد ببيت بي غرفة دتحترك وهو منتظر شوكت يوصله الحرك..لأن ماله حيل يسوي شي .. ماله قدرة يطلع من هلمكان ..متقيد وينتظر رحمة تخلصه من الديصير..

دنجت ونزلت للمطبخ..صبيت اكل وكعدت اكل..معدتي عصرتني جي اخذت الدوة بدون اكل..هو اكلت لكمتين هم تنحسب اكل قابل.. شواي واجت جوان..جرت كرسي وكعدت جدامي..ضلت صافنة بعدين حجت..
جوان : اكلج..اني سامعه صگر جان متزوج..
دنوة : اي كبل..
جوان : خاف راحلهه..ما تشوفين ليش عايف تلفونه.. علمود ما تخابري وتزعجي..يمكن مل منج لأن متحبلين..
دنوة : انه اكول لو تعوفيني بضيمي احسلج..مرته القديمة لمن انه تمرضت ما تقربلهه..عاد هسة يريدهه ويتذكرهه.. بعدين هي مصلاوية وعايشة وي اخوهه وامهه هناك..شجابهه بالناصرية وشمعرفهه بيهم حتى..
جوان : يله..هو اليريد ينصح بعد يطلع مكروه..

بس اكلج من هسة..اذا رجع صگر وانتي بعدج ما مخلفه حيتزوج عليج..وتشوفين بعيونج هذني..
دنوة : عشتووو..يتزوج علي..ومنو هاي اليتزوجهه بله..
جوان : اني..شبيه قابل ناقصة ايد رجل..واجيبله خمسة .. احسن منج..
صدك ضحكت من كل گلبي..تفاجئت منهه ومن ثقتهه الزايدة بنفسهه..حتى غصيت : والله ضحكتيني..روحي جيبيلي مي غصصتيني بسالفتج هاي..
جوان : جعلج بالغصة..عبالج ما اسويهه..
دنوة : لا والله..انتي كلشي يطلع منج..واليكره كلشي يسوي .. بس صگر ما يسويهه..لو تطلع نخلة براسج..يله دروحي من خلقتي مالي خلكج..هو انه روحي بخشمي..
اجت وكفت جدامي وجرت الكاشوخه من حلكي..

خزرتهه وصحت بيهه : وجع حتى وجع..مو دا اتسمم سم ببطنج كولي امين ..
جوان : اكلج شي واروح..حتى يصير عندج علم..
دنوة : كولي فضيني تره ضجت..
جوان : تعرفين شنو يعني واحد يوعى على حب شخص.. يجي يمهم دائما و هم يروحوله..عايش وياهم وعايشين وياه.. متشاركين ايام وليالي..انتي تباعيله بحب ونظرات تشرح نفسهه ميحتاج واحد يشرحهه..بس هو ما يشوفج اكثر من اخت او كرايب..اني هيج..احبه لمن جنت صغيرة.. اول ما كبرت ووعيت بالاول متوسط شفته..جان بعده بالكلية .. لمن يرجع يجي لبيتنه اول بعدين يروح لبيتهم..ينام بالغرفة وتبقى الباب مفتوحة..اضل كاعدة اباوعلة لحد ما انعس واكوم انام .. حبي هذا ما راح ولا نسيته..واريده..بعده بگلبي .. احسه حلالي..بس انتي ..

انتي حقيرة وجلبة..اكرهج..جان تزوجني وعايشين سوه مرتاحين..احسن من هاي البهذلة يا شمعة الفكر..من يوم شافج هو ما شايف الراحة..
انه اسمعهه وفاكة حلكي..يعني مثل هلجرأة والعين الوقحة انه ما شايفه..عيني عينك تحجيهه وتكلي احب رجلج.. فوكاهه حجي ماصخ وجريئ..اعاينله هو ونايم.. ونظراتي اله بيهه حب وغير شي..ادور الوكت الكالتلي بي كلش غلط..انه منا متوترة جي هو ماكو..ومنا اجت هي وترتني بالزايد بحجيهه.. حتى ما كدرت افكر..شمرت الخاشوكهه بوجهه وكمت : شوفي لج ادبسز..لو تولين من جهرتي لو اسحل بيج البيت سحل.. انتي وحدة جلبة وتكج ماكو..انه ما شايفة هيج بشر عينه زايغه .. لج رجال متزوج عمره اربعين سنه حاشره روحج بي شكووو .. سالمين شكووو..

تره اكول لابوج وهو يعرف يتصرف..
قاطعتني هي وتحجي بإسلوب مستفز : لا كلش خفت والله حرجف الحكيلي..
دنوة : تخافين وغصبا ما على راسج..محد اله نفس يسمع هذا الحجي الوصخ مثلج..لو ما وضع البيت المتوتر جان عرفت شتصرف وياج..يلههههه..يله لا تصيرين جدامي بعددد..
عتيتهه من تشريتهه وشمرتهه بره المطبخ..
جوان : سهلة..بسيطة اني تسوين بين هيج..
عفتهه ودرت وجهي اخذت الخاشوكة غسلتهه واجيت اكل .. هي شافتني لبستهه عافتني وراحت..وطبهه مرض.. عساهه رايحة ولا راجعه..شلون عين عليهه..ولا تستحي.. هو انه بيا حال..حال الضيم حالي..منا رزايل الحجي ومنا صگر ماكو والدوايات مالتي..اكلي قليل..

مالي نفس بكلشي..بكل زاوية بالبيت احسه موجود.. وبكل يوم اكعد الصبح اكول بلكت ربي يطلع حلم واشوفه جاي من الدوام ينتظرني خاطر نصعد فوك..بس اريد اعرف وينه.. بالي يودي بيه ويجيب..تعبت من الافكار والاحتمالات..رقم هذا الولد الغريب من يوم انقفل والحجي شاك ..يكول عنده شي وي هذا ليش تلفونه مغلق..بس ما يعرفه منو..كال لو يعرفه جان كدر يوصله ويعرف من عنده شي عن صگر..بس ماكو..
ضلينه ننتظر لليل جان تندك الباب..طلعت بالعجل فتحتهه .. اجو الحجي ومخلد واركان..لا سلام ولا شي..كبل فاتو جوه ضليت كاعدة انتظر يحجون..ثواني واجت خالة..
الحجية : ها بشرو..لكيتو الشيخ..
ابو مخلد : اي جان موجود..
الحجية : يالله خير..شصار احجي..

ابو مخلد : والله حاجيته كله عيني واغاتي..كتله احنه لا جايين نصالح ولا نعاتب..جايين علمود صگر..هو يبقى ابنكم واكيد شفتو وعرفتو معدنه شنو..كال اي ما منه كصور للامانة بس موقفه الاخير وشلون هان حفيدي وابني ببيتي ما انسالهيا واضل اذكره بيهه..كتله هذا شي يخصكم.. بيناتكم .. اني جايك بشغله تخصه..يابة تره صگر مفقود..وحجيتله صار شكد ما موجود وشسوينه وويامن حجينه ..تخبل..كال صدك تحجي اني ما ادري ولا سامع..لو سامع جان تصرفت من يمي ما يحتاج تجي..كتله ادري بيك كفو وما تقصر لهيج اجيتك .. كال ما يكون خاطرك الا طيب..باجر ادز جماعة اعرفهم بالناصرية يدورون علي..يدورون بالمستشفيات بالسيطرت وغيرهه بعد هو شغلهم هذا يعرفون شيسوون.. عاد تشكرت منه وضيفنه بعدين طلعت وهاي جيتي..

الحجية : ان شاء الله خير يا الهي..تعبت ما اريد صگر هم يبتعد مثل محمد..عاد واحد منهم..
ابو مخلد : الله كريم..المكتوب يصير.. هسة اروح اغسل وانام وباجر لمن يطلع مخلد عود اطلع وياه نسأل ونشوف..
الحجية : الله يسلمك ويطول بعمرك..ما تقصر..روح ارتاح
عافنه وراح..ضلو مخلد واركان يحاجون خالة وانه بس اسمع ما ادخلت ولا حجيت..بالدعش ونص صعدت فوك نمت..

مرت الايام..لمدة اسبوعين هو ماكو بعده..التوتر زاد والاكثرية عرفو..بيت خاله الي جنه نروحلهم لمن جنت مريضة خابرو خالة يواسوهه..كلهم يواسون خالة..جا وانه..انه فرحانه بغيبته يعني لو شنو..ادور كامو ذبوهه براسي..احجي وادافع بس ما يفيد قفلو ع السالفة هاي..لمن يكومون يحجون هيج اعوفهم واروح حتى مليت من الحجي والتبرير..بس سرور تخابرني كل يومين تلاثة تصير بيه..تكلي صبري مابي شي هسة يرجع.. الله يباوعلج من فوك ما ناسيج..

البيت كله توتر..ماكو ولا خيط عنه..تلفونه موجود محد يلعب بي دورات يدك يجي الحجي يشيله..
الضابط الي كلفة الحجي وائل يكله انه من احصل شي اخابرك وانطيك خبر لأن ماكو شي لحد الان..ليش اوهمك..
جدي همات كال ماكو شي..يعني هيج فص ملح وذاب..

وره هلاسبوعين كاعدين العصر كلنه بالهول..ديحجون بسالفة صگر ووين يدورون بعد..جان تندك الباب دكة قوية.. عبالك تفتيش لو واحد هدادة..طلع مخلد بالعجل وراه الحجي .. دقايق وصار صياح وصل للهول..كمزت من مكاني رحت وكفت يم الباب..تخيلت حيجيبون صگر مكتول..هلكد ما الصياح قوي هرج البيت ولو هم بره..ضلينه واحد يعاين بوجه اللاخ ما مفتهمين شديصير..هناك وفات مخلد..
مخلد : فوتو جوه..هذوله الجماعة هنا حيكعدون..
الحجية : منو هذول خالة..غير نفتهم..
مخلد : يكول نعرف صگر ونريد ابنه منكم..
خالة شهكت وخلت ايدهه على صدرهه : عزه بعيني.. هو احنه بيا حال..محتركة روحنه علي وهذول جايين هدادة..
مخلد : لا تحركين بنفسج خالة..فوتي وهسة نفتهم..

طبينه للصالة اللخ واركان ضل هناك..انه سديت الباب وكعدت بالكع يمهه..اريد اعرف شديصير.. الكع غادية قالب ثلج جي باردة..وانه كعدت هيج..اجت سلمى تريد تكومني..
سلمى : دنوة كومي..لتسوين بنفسج هيج..هسة كلنه وياج متوترين قابل شبيدنه..
دنوة : عوفيني..بس اريد اعرف شصاير..
تنهدت وضلت واكفة يمي.. شواي وسمعت صوتهم طبو للهول وصوت الباب انسد..اصوات كومة واكثر من شخص.. ضلو كاعدين بالبداية ما سمعت غير صوت الحجي ابو مخلد كال انتظرك هسة الجماعة هنا..درت وجهي على سلمى..كتلهه : شنو منو هذول..
سلمى : حالي حالج..ما اعرف..هسة نفتهم صبري..
انه من الانتظار مليت..كضيت حياتي كلهه انتظار وصبر ..

خمس او عشر دقايق ودخل الحجي..عرفته من صوته.. سلم عليهم وكعدو..كبل دخلو بالموضوع.. بس تفاجئت.. بالبداية عبالي بصاروة مثلنه..بس لهجتهم تختلف..
وائل : شرايدين من الاخير..
- : والله مثل ما كلنه لأخيك..نريدن ابنه منكم..وهاي احنه كاعدين بعتبة البيت..لو تردولنه ابنه لو يصير غير حجي..
وائل : شو انت تحجي وطالع ابو الراهي.. عبالك ابنه موجود ومرتاحين..شحااااال لو ما مفقود وتكلوطنه صار شهر.. هسة يله جاي على ابنك..بعدين احنه شعلينه بابنك..عرفه ولفه اصلا اول مره اشوفكم..
- : حتى ما تعرفونه ويامن طلع ويامن خش.. ابني مهدي طلع وي صگر ومارجع..
ابو مخلد : اخي العزيز احنه شعلينه..

دنكلك ابنه همات مختفي شنو السالفة مدتستوعب يعني.. وهذا تلفونه هيانه يسمع حسك..حتى ناسي بالمقر وطالع لواجبه ..بعد يا طلعة هاي..
- : عندك شاهد..جيب..
مخلد : لا ماعدنه..بس الصدك مبين ما يحتاجله شهود
- : جا خلص..احنه اهل الحگ..واليوم لو احنه لو انتو..
وائل : انه ما شايف واحد يهدد واحد وهو كاعد ببيته.. اذا ما تحترم اهل البيت اطلع بره..يلههههه..
ابو مخلد : اصبر اخوية.. يا ابو مهدي..دا نكلك ابنه مفقود يعني ما ندري بي عايش ميت..لو عايش وندري بي جان جبتلك ابنك منه..بس احنه حالنه حالكم متلوعين ودننتظر.. ياريت يحجي بهدوء حتى نفتهم..لا انتو احسن من حالنه ولا احنه احسن من حالكم..

حجة غير واحد..لأن مو نفس الصوت..كال : حگك علي عمي بس والله دمنه محروك على اخينة.. السالفة شلون صارت .. مهدي كبل لا يطلع بجم يوم جان على اتصال وي ابنكم صگر هم صحبان من زمان موش تكول ما يعرفنه وعلى غفلة صارت علاقتهم..جان متفق وياه ياخذون فلوس من واحد زلمة يعرفه قديم..هو مجهز المبلغ بس يجي ياخذه..هو مهدي ما حاجيلنه النه احنه اهلة..بس طالب عون صگر..وهو رايح وياه ما مقصر والله زلمة .. راحو هناك واختفى اثرهم..هسة تكول جا منو كاللكم هلحجي.. ابن عمتي جان يدري بالسالفة بس جان مسافر..كبل اسبوع رجع وحجالنه .. عاد احنه سوينه النكدر علي وكدرنه نوصللكم.. خالي ما رايدين منكم شي.. بس نريد نعرف وين وصلتو..المن خابرتو..عبن احنه جزعنه هلكد ما دورنه ومامش الهم اثر..

ابو مخلد : رحم الله امك وابوك..هو انت بنفسك كلتهه.. مالهم اثر ثنينهم..والله دورنه علي بمستشفيات البصرة .. الناصرية همات جم منطقة دورنه بيهه..مراكز الشرطة والسيطرات .. ماكو ولا خيط الله وكيلك..بس حنبقى ندور بعد ونشوف.. واحنه اذا اكو شي رگبتنه سداده..بس ابنه هم ماكو..

ضلو يحجون بس هذا الرجال هدأ الوضع..بالبداية صياح وعياط بعدين صار هدوء شوي..يعني صگر طالع وي هذا علموده ادور مختفين ثنيناتهم..هسة ما افتهمت جيتهم هنا شكو..اكو واحد يجي على بيت شخص مفقود..والله سالفة هاي وناس بطرانه..عبالك عايشين ومرتاحين.. شحال لو ما لا ليلنه ليل ولا نهارنه نهار..
رجلي وايدي جرشت من الكع..كامت كعدت ع القنفة لحد ما طلعو وره ساعة يعني..جان يجي الحجي ابو مخلد حجة كلشي بس متغيره علومه..
ابو مخلد : نتأمل بيهم خير..لأن حيدورون ويانه.. مبينين خوش ناس وعدهم معارفهم..بعد اكثر من هذا الشي.. حجيت وي جده وكل يوم لو اني اطلع لو واحد من ولدي نسأل وندور .. والله الف حسبة تاخذني وتجيبني..

ما انساله وكفاته وزيناته وياي و وي ولدي..يله كلشي يهون بس كون هو سالم..
الحجية : الله يسمع منك خوية..تدري بصگر شكد عزيز وشايل البيت على حيله..منو النه من بعده..
ابو مخلد : الله يحفظه لا تكولين هيج..الوضع زين بالعراق يعني نلكاه وعايش ان شاء الله..مو مثل كبل..الينفقد بعد ما ينلكي لو تنطبق السما ع الارض..
الحجية : اي والله وانت تحجي الصدك..

هي وتحجي كامت تبجي..حالتهه تقهر وضعفت كلش.. شكد شفتهه قوية من جنه بسوريا..بمكان ما انه اصبرهه ع الغربة والبعد تجي هي تصبرني..قوية بهواي مواقف.. بس هنا جي الموضوع لامس صگر بينت بحالة ضعيفة..تقربت منهه حضنتهه واهدي بيهه..اليشوفنه يكول مرتاحة بغيبته.. اخر شي ما تحملت..دموعي كامت تجري سكتة..تعبت من المشاكل والغياب والبعد..خلصت من الغربة اجت سالفة محمد خلتنه نبتعد..هسة صارت هاي..ع الاقل هذيج الفترة هو جان موجود ويحاجيني..هسة وينه..وصلت مرحلة اكول ربي بس كون عايش حتلو يتأخر بس عايش..ما اتحمل فقد بعد.. كون يومي كبل يومه..ما مستعدة اخسر شخص ثاني .. اريد اعيش مثل البشر..شنو حرام لو صعبة..

مسحت دموعي ودموعهه..كتلهه : خالة لا تبجين..تعودت عليج تمسحين دموعي..شنو التغير هسة..
درت وجهي على سلمى لكيتهه مدمعه وايدهه على حلكهه.. حركت راسهه وراحت بالعجل.. صدك حالتنه تقهر ..شرد اكول على صگر..شلون اوصفه..شمعة البيت..البيت بدونه اظلم ومابي ضوه لو اضوية البيت كلهه مشتغله.. حسه وضحكته تتردد على اذاني احسه يمي..بس وين..
اخر شي اجه الحجي كعد يمهه يهديهه ويحاجيهه لحد ما سكتت..حجية حلو ومريح..طريقته بالحجي همات..هادئ .. خلص اليوم عادي..بالليل اخذت دواية وصعدت فوك..

ما اعرف ليش لأول مره بعد هلشهر طبيت للغرفة واحس صوته يمي..عبالك بشر كاعد يمي ويحاجيني هلكد ما واضح.. ضليت اتلفت بالغرفة عبالي حيطلع من الكنتور.. هيج تخيلت .. حسيت روحي تخبلت..كلت : اصحي..اصحي..محد اكو بس انتي..لا تخبلين روحج منو الج..طلعت من الغرفة بالعجل وحت للحمام غسلت وجهي..الغصة صارت بزردومي ورجلية ثكال احسهن حجار..اريد ارجع للغرفة ادور احس المسافة شطوولهه .. شواي وطلعت..صارت سلمى بوجهي..هي غرفتهه صارت غرفة اخلاص القديمة..
سلمى بإستغراب : خيرج..شنو لعبانه نفسج..
دنوة : لا مابيه شي..بس اختنكت ما اعرف ليش..
سلمى : لا تقهرين بنفسج حبيبتي..الله موجود ويدري بيج شلون تعبتي..

صگر موجود ويرجعلج بس خلي ايمانج بالله جبير..
اخذت نفس ودنجت : ونعم بالله..الله يسمع منج..
عفتهه ورحت للغرفة..طبيت وقفلت الباب وراي..هم صوته بعده بس ما اريد اوهم روحي..ارد ابقى هنا لحد ما يختفي.. صگر ما موجود هسة..منين ديجي هلصوت..صوت واضح.. هسة اذا كلت لأحد عبالهم مخبلة.. مديت ايدي طفيت الضوه وشغلت الضوه مالت التيبل لامب..تغطيت لحد عيوني و سادة اذاني ما اريد اسمع..شكد حاولت اغفى ما كدرت..سمعت صوته يكلي بنيتي..دناوي.. بدون وعي جاوبته ..هذا انت..
لحظات وصحيت على نفسي..مديت ايدي ع المكان الينام بي ما لكيته..كمت ابجي واحجي : ماكو انت..ماكووو.. وينك .. وين عفتني..شوكت تجي والله تعبت بدونك.. كل يوم اكول اليوم يجي هو يحبني كلي ما اعوفج وحدج..
ضليت ابجي واحجي..دموعي نشفت..

شكد بجيت وانقهرت بنفس الوكت..شواي ورجع الصوت .. ابوية انتي لا تبجين..
صدك بلحظتهه دموعي سكتت من وحدهه..مو جي هو كال هيج..بس من هول اللحظة..ما تخيلت حتوصل بيه هيج.. توصل بيه اتخيل صوته ويكلي لا تبجين..يمكن جنت محتاجة احد يكلي هيج..محتاجته هو يكلي بنيتي وابوية.. صحيت على روحي ومسحت دموعي..كافي نامي..محد اكو بس انتي .. غمضت عيوني وضليت اتكلب لحد ما غفيت..
مرت اسبوع صنطة..لا خبر ولا شي..حتى اهل الولد كال اسمه مهدي همات مثلنه..ما لكو اثر..كل يوم اصعد فوك انام واسمع صوته..بنيتي..بس ما اكول لأحد خاف ما يصدكوني .. بس انه احس بصوته..احسه هنا عبالك كاعد يمي ويشوفني..

دائما لمن اسمع صوته بالغرفة شعور بداخلي يكلي بعده عايش.. لا تفقدين الأمل..ياما شهور بسوريا نخابر ويطلع مغلق..بعدين يطلع ملتهي بشغله..كود هلمرة همات..
افز الفجر على صوت الأذان..اكوم اتوضى واجي اصلي .. اشبع بجي لمن اعاين لمكان نومته..مفتقدته ومفتقده صوته وضحكته..احسه وطن وتغربت من بعده..احسه ابوي واخاف اتيتم مرة اللخ..ع الشفته منه من حب واهتمام ودلال وغيرة وغيرهه وغيرهه مشاعري وانه كلي انقادله لا اراديا واحسه شي اكبر من مقامه..ما احسه بس زوج ..صديق و أخ .. حتى اب صارلي..لمن يكلي بنيتي وصوته حنين وهادئ تلقائيا احسه ابوي..جي محرومة..انحرمت من الاب ونعمته ولو هو جدامي حملني ذنب مالي علاقة بي..أذاني وضربني و هاني جدام الكل..جدام اليسوى والما يسوى..

بس كله هان وراح..وانه بكل صلاة ادعيله بالرحمة.. استغفر واهديله..تلث مرات ختمت وهديتله..ما فرطت بي لا كبل ولا بعد ما تغير..هو هو نفس المعزة..بس معزتي عنده تغيرت لمن جابني لبيته هنا بالمدينة..داراني وحبني اكثر.. الله يرحمه ما بيدي اكو غير هلشي..
بهلاسبوع الحجي وائل ومخلد طلعو للناصرية..كال حنضل يومين ونرجع..بعد هذا اخر أمل النه..اذا ما لكيناه هلمرة بالمستشفيات معناهه هو بمكان محد يعرفه.. لو نروح لبغداد ولو الامل ضعيف هناك..قابل شيودي من الناصرية لبغداد بهلسرعة مثلا..
ثاني يوم كعدت الصبح بالعشرة..غسلت وجهي ونزلت لكيتهم توهم دا يطلعون..خالة تودع بيهم وتوصي..والله محد مارد گلبي غيرهه..

شكد منقهره علي..ودهه تشوفه اليوم كبل باجر.. حقهه وانه وياهه همات ارد اشوفه..
دقايق وطلعو..بعدين طبينه كلنه..جان الاكل مصبوب.. كعدت اكل بالجذب بس علمود الدوة..والا انه لو ما الدوة جان ناسيه الاكل..جوان من يوم يرزلتهه بعد ما حاجتني..مدري زعلانة مدري تريدني احاجيهه خاطر تسوي عركة اكبر من راسهه وانه مالي خلك روحي مو ادور هي..
كاعدة اكل جان تجي سالي تزحف يمي..خلت ايدهه بنص الماعون مال جبن وبي زيتونات..رفعتهه من الكع خليتهه بحضني..انطيتهه جعب الصمونه بيدهه..كل شوي تريد تفوت كول بالماعون واقربهه لصدري..هي تضحك من الحركة هاي خطية ما تعرف..شكد حلوين الجهال..عبالك بغير عالم مو عالمنه العايشي..كله ضيم وضلايم..

يعيشون اليوم ينسون باجر..دورات اتمنى ارجع طفلة.. بس من اتذكر طفولتي اكول ابقى هيج احسن..هسة ع الاقل عندي صگر..كبل منو الي..امي وما شابعه منهه..ابوي جان يبهذلني ولا مره حضني اذا يشوفني ابجي..يعوفني ويروح..
فزيت من افكاري على صوت سلمى يمي..
سلمى : تدرين يلوكلج الطفل..
عاينت عليهه وابتسمت بس ما جاوبت..
سلمى : الله يرزقج بطفل..بس يرجع صگر متأكدة حتحبلين
دنوة : الله كريم..بس يرجع واشوف طوله..
سلمى : ربج موجود هو أعرف بحالج.. هسة جيبي هاي الوكحة واكلي على راحتج..
دنوة : هاجياهه..عود غسليلهه حلكهه توصخت..
سلمى : يالله..هسة كايمة..

اخذتهه وراحت للحمام تغسللهه..انه كملت اكل وشلت الصينية رحت غسلت المواعين ضليت كاعدة بالمطبخ شربت مي وطلعت لغرفة خالة..كعدت يمهه احاجيهه..ارد انسى شوي.. لكيتهه تقره قرآن..انتظرتهه تكمل وحاجيتهه..هي الوحيدة ارتاح يمهه احس روح صگر بيهه..بطريقة الكلام والهدوء..هو يشبهه بالطبع..عاينت عليهه وصفنت..كلت بگلبي يارب عايش وتشتم الهوى مثل خالة..كون اشوفك جدامي ويرتاح گلبي.. الله يحفظك ما اكول غيرهه..احاول بكل تفكيري يصير شي يفرحني..ما اريد اتأمل شي يقهرني..عايش وحيرجعلي هو صوته بالليل يكلي هيج..يكلي لا تبجين انه موجود.. ما اعرف هاي شيسموهه..يمكن خيال..يمكن طيف..يمكن حلم .. يمكن هواي اشياء..كمت لمن اصعد فوك واسمع صوته ما استغرب تعودت علي..

لسه محد يدري بي..بيني وبين نفسي..ما اعرف احجي لغيره هو عودني علي..عود روحي تجيله بكل حيلهه..هسة اجه دوره هو يجيني..ما اعرف وينه ولو اعرف جان رحتله بنفس اللحظة بس وين..
ضليت كاعدة عدهه تقريب الساعة جان تجي مرة الحجي ام مخلد..كعدت يمنه تحاجيهه تحاول تخفف عنهه..شكد حبابة حرام جوان بتهه..
مشى اليوم عادي..ما صار شي بس كاعدين ومنتظرين الحجي ومخلد يرجعون..اركان راح لمركزين بالبصرة انطاهم صورته واوصافه..بلكت راجعين للبصرة..كلهه احتمالات ماكو شي اكيد..الحجي ابو مخلد بين يوم ويوم يخابر جدي يكله ما اجاني خبر لحد الان..اخر شي طلع لتلث مستشفيات عدنه بالبصرة..دور علي كال بلكت جاي عدهم..

سأل وصلو للفايلات مالت المرضى والحالات المتوفية التجي من غير محافظة او من نفس المحافظة و هم ماكو..
اخر شي بعد هليومين اجة الحجي وائل ومخلد..طلعت متلهفة بلكت عرفو شي عنه..ولو خيط..اول ما شفت وجوههم اجة ببالي ما لاكين شي..بس اقنع روحي لكو شي.. بس سلموا وفاتو..سديت الباب ورحت كعدت..خالة جانت بالهول فحجت
الحجية : الحمدلله ع السلامة..خوما صعب الدرب..
وائل : لا زين..
الحجية : محد ناوي يحجي..شصار..
وائل : شصار..ما صار شي..ولا اثر اكو..شسوي بعد انه جزعت..حيصير شهرين..دورت لحد ما تعبت..مراكز الشرطة ما خليت..اكثر من مركز دخلت وانطيت معلومات علي وعلى اختفاءه وغيرهه وغيرهه..

بكل مركز ادخلة نفس الكليشة احجيهه..حلكي يبس..
الحجية : راح الرجال..عمت عيني..هيج زلمة شطوله شكده يختفي جن فص ملح وذاب..انه شمسويه بدنياتي خاطر هيج يصير بيه واتلوع..
مخلد : لا تتحسبين على روحج خالة..كلشي قضاء وقدر .. وهو ما طول مفقود ما تكدرين تكولين هيج مصيره..اذا خالو تعب و مل..اني ما امل..اذا تريدين اروح اني وعلي للطب العدلي ببغداد..لو مدينة الطب..أي مستشفى اعرفهه اروحلهه..
الحجية : الله كريم..ارتاحلك يوم ع الاقل ادور روح..
مخلد : هو اني من رحت للناصرية ودورنه ومالكيناه خابرت علي فهمته..كال شوكت ما تريد اجي وياك..
الحجية : يله..جا يصير خير ما طول متفقين..
هم وديحجون جان يصيح بيه الحجي..

وائل : كله بسببج..انتييييي..انتي ضيعتي الرجال بإهمالج يا طفلهههه..انتي هم مره..مرهههه..
دنوة : خالو انه شعلية..هو ما يحجي..والله ما يحجي.. شسوي بعد ليش تذبهه براسي..شفتني ضحكت لو متونسك على غيبته..
وائل : طبعا ما تتونسين..لأن انتي السبب..شايله ذنب هلكبره فوك راسج..وابقي شايلته..حتى مالي نفس اكعد وياج..
كام وراح لغرفته..شكد فشلت من مخلد..حجة كلشي جدامه .. عفتهم ورحت صعدت فوك..كمت ابجي وحاضنه المخده مالته .. دموعي تنزل تحرك خدودي..وينك يابة..وينك بس.. مو متت على شوفتك..
بلا وعي مني كلت يابة وانه قاصدة صگر..شكد أذتني غيبته والفراغ الصار حسسني فقدت ابوي..

مرت الايام ماكو شي..سرور كل يومين خابرني تصبر بيه .. الولد هذاك الراح وي صگر همات ماكو خبر عنه..وهاي هيج لحد ما اجة علي لبيتنه الفجر..جنت كاعدة اصلي وسمعت صوت حجي جوه..لبست الشال ونزلت شفت علي كاعد مبدل ومخلد همات..عرفتهم حيرحون لبغداد..بقيت واكفه ع الدرج لحد ما راحو وصعدت فوك..دعيت لحد ما غفيت.. كعدت الصبح مالي واهس بشي..بس على أمل جية مخلد .. ضلينه منتظرين على جمر..لحد ما اجو بالليل..طلعت بالعجل فتحت الباب..محد عاين بوجهي كبل فاتو جوه..هنا ما اعرف شفسر احساسي..الف فكرة اجت ببالي ......

يتبـــــــــــــــــع.........................

طبعا تدرون شنو؟ اني مقرره اكتب البارت من الاربعه الفجر لحد السبعه الصبح وانشره ، بس غفيت بدون ما احس ، وهاي كعدت بالدعش كملته هسه ارجع اكمل نومتي هههه
گلولي شنو توقعاتكم؟..صگر عايش لووو ...