رواية اسألي عني الليالي الفصل الخامس وثلاثون 35 - بقلم رقية جاسم

‏صيري..
    صيري اشتشتهين ..
صيري ليل لوحدي اسهره
صيري شط بليل اعبره ..
     يوم بيضه ويوم سمره ..

قناة التليگرام

حساب الانستگرام

الـبـارت الرابع والـثـلاثـون.............

ابوي كام يصيح كللهه لتشوفيني خلقتج بعد..اجة يمي صافن ميعرف شيسوي.. بجيت وجلغت لحدما تعبت ونمت..هم كعدت الفجر ع صوت الاذان وصوت ابوي ديقرة قرآن ع حافة الجرباية..اول ما كعدت بطني عصرتني عصر..شهكت شهكة ابوي فز من سمعني.. رحت للحمام بالعجل وايدي ع الحايط اخاف اطيح..كمت استفرغ ومغمضة عيوني.. فتحت عيوني وانصدمت..مستفرغة دم..ع البوري والمغسلة مليانة.. كمت ابجي بصوت عالي وايدي على عيوني وابجييي..ابوي اجة يمي كمشني من جتفي وطلعني برة الحمام..

طب هو سمعت صوت مي يعني غسل الدم..بعدين اجة حضني ويمسح على راسي بهدوء..
محيي : لتبجين بابا..تعاي..اخذني للغرفة تمددت هو راد يكوم كمشت ايدة واحرك براسي يعني لتروح..
محيي : هسة اجي والله..ثواني ما اطول..
مديت ايدي على حلكي نوب خليتهه جدامي..اصابعي بيهه دم اجة ابوي شافني صافنه ع اصابعي..كعد يمي سحب ايدي ومسحهه بقطعة قماش رطبة..باسني من راسي..
محيي : مشتاك اسمع صوتج بالبيت تكولين يابة..ليش هج صار بيج عذبتي حالي والله..وين اخذج المن..
انه اسمعة وكامشة ايدة قوي..ماريدة يعوفني ويروح هو و رائد الوحيدين اكدر اخليهم يفهموني شريد..ادور حيروح لبغداد ويعوفني يم شذى..نمت انه وكامشة ايدة..

كعدت الصبح شفتة ماكو..كرفصت روحي وايدي على شعري سمعت صوت شذى يم الباب تريد تحاجيني..
شذى : ها كاعدة..كومي من غرفتي يلة..هاي شنو مستفرغة دم ترة لعبت نفسي..كومي نظفي انتي..
سمعتهه وسكتت..مجاوبت حتى مدرت وجهي..اجت يمي جرتني من بلوزي طيحتني بالكع..
شذى : شبيج مو احاجيج..تسوين روحج متسمعين
جسمي تفصخ شكد ما جنت ضعيفة طحت ع عظمي كبل كمت ابجي واضرب ع راسي..شالتني من بلوزي وطلعتني برة الغرفة..عاينت عليهه حسيتهه شيطان واكف جدامي متت خوف منهه صعدت فوك..سديت الباب وكعدت ع الجرباية صافنة ع الحايط وحاطه ايدي جوة حنجي..مدري شكد مر وكت بس بطني كامت تكرصني من الجوع..

جنت متعودة ع ابوي يجيب ماعون الفواكه يمي ويوكلني قطعة قطعة..يتحملني من اوخر الماعون واحرك براسي يعني ماريد رفعت راسي للسكف كمت اشوف خيالات..حسيت شي ضخم طفر علي..كمت ادفع بي وابجي بدون صوت..صوتي انتهى للاخير..شوي وانفتحت الباب بس ماعرفت منو لحدما حجت..
شذى : شبيج يمعودة تخبلتي..ويامن تتعاركين..
انه سمعتهه كالت هيج تخبلت بالزايد..كمت اضرب بيهه واجر بشعرهه ماكدرت اهدهه بس اضرب..هي تصيح وتريد تفك ايدي من شعرهه..اخر شي ضربت راسي بالجرباية وكامت
شذى : مخبلهههه..الله يموتج واخلص منج جلبهههه منين طلعتيلي انتييي منييييين..
ركعت الباب وراحت..كمت ابجي وايدي ع راسي..احس نار بجسمي بدال الدم تحرك بية..تعبت من الوجع..

مثل الهوى يمر من يم اذاني اكوم اشوف الكع مگبرة.. لساني مربط استغفرالله ما اكدر اكول..كمت ابجي وايدي ع اذاني لحدما غفيت من وجع راسي..كعدت مدري شوكت..كمت بية مابية ونزلت جوة انزل باية واكعد ع اللخ..حيلي مهدود.. النفس بالكوة اجرة هم ياريت ينحسب نفس..كعدت ع الباية الاخيرة ورجلية بالكع ما احس بيهه خدرانة..ما احس بشي بس راسي والافكار البي.. الخيالات الاشوفهه والصوت..انه وصافنة وادية مدندلة بالكع اجت رزان بيدهه كاسة شوربة..كعدت يمي.. مسحت وجهي بايدهه وانه مثل الجثة ماكدر اسوي شي..
رزان : ليش هيج حالتج..والله دتقهريني عليج..
سمعتهه بس مجاوبت..لساني ثكيل..كامت توكلني شوي شوي حتى جايبة خاشوكة صغيرة خلصت ربع الكاسة ودفعت ايدهه بعيد عني..

رزان : متريدين بعد..
دنوة : حركت راسي بمعنى لا..كامت وباستني من خدي وراحت شوي واجت اخذتني للصالة..احسني لعابة بيد هذا وذاك وين ما يمشوني امشي..لو يخلوني جدام سيارة تدعمني هم ما ادري بروحي..كعدتني ع القنفة وكعدت بسدي فتحت التلفزيون وتكلب بالقنوات..شوي وفاتت شذى
شذى : هاي شجابج هنا..
رزان : اني جبتهه ماما..خطية مماكلة شي..اذا هي متكدر تحجي خوما نعوفهه هيج..
شذى : وانتيييي شعليييج..امهه ابوهه..هي لو تريد تجي تحجي تكول اريد اتسمم اتزقنب..
رزان : بس متكدر تحجي..شوفيهه متنقهرين عليهه
شذى : اشوو وخري من خلقتي..شنو حضرتج المحامية مالتهه شمنطيتج هي وهيج ادافعيلهه..

اجت جرتهه من ايدهه وطلعتهه برة الصالة..وكفت جدامي ورفعت راسي من حنجي بايدهه..
شذى : مو عبالج تضحكين وتقنعين برزان بهاي سوالفج التافهه مثلج..يلة كومي عاد..
هي ودتحجي مدري شجاني..كمت ابجي واجلغ برگبتي وخدودي وادفع بيهه..حسيت الشوربة الاكلتهه صارت ببلعومي كمت للحمام بالعجل..كمت استفرغ واشهك احس روحي وصلت لزردومي..لو ميتة ولا الداعيشة هذا..ايدي والمغسلة كلهه دم..هسة انه شماكلة خاطر يصير دم..بس شفتة تهسترت اريد اصيح..اريد اطلع الجمرة البداخلي..انتهيت وينك يابة..وين عفتني يم هاي..اذتني الله يأذيهه وياخذ حقي منهه..

اجت هي على صوتي شافت المغسلة جان تتخبل كمشتني من بلوزي وطلعتني برة الحمام وتضرب بيه
شذى : هاي شسويتيييي بالدنيا..انتيي شنووو..لج اريد اخنكج وصختي بيتي بوصخج..
وره الدم الاستفرغتة حيلي خلص بعد..بس شمرتني بالكع طحت..راسي انركع بالازارة..مستمرة ابجي وايدي على راسي اريد الوجع يروح..حرام عليهه..حرام..نزلت يمي كمشتني من شعري وتحرك براسي رايح جاي..
شذى : بعد اذا شفت قطرة دم اذبج بالشارع..ارد اشوف منو يلم وحدة مخبله عقل ماكو براسهه..
دتحجي وتضرب بية جان اسمع صوت خلاني ادير وجهي اريد اشوف صدك لو خيال من خيالاتي..كامت هي راحت يم باب الحمام..اجه دنج يمي لمني واخذني لحضنة..ابجي وادفع بي تخيلتة شذى..

- : يولي انه رائد..بس اهدي شوي بنيتي انتي..
ضليت ادفع بي بعدين ورة دقايق من صوتة تأكدت هو.. كام وكومني من ظهري..كامشني حيل خاف اطيح..
رائد : شلون تضربيهه وهي مريضة..ماكو رحمه بگلبج انتي شنو من بشر..شنو من طينهههه..
شذى : اي حقك ماشفتهه شسوت..
رائد : شسوت..حتى اذا سوت ميصير هج تمدين ايدج عليهه انتي لا امهه ولا اختهه ولا احد قريب عليهه..انتي مرة ابوهه تعرفين شنو يعني..يعني أي حگ مالج عليهه..
شذى : لا والله..بعد بس تجي انت تعلمني منو اني..
رائد : اذا متعرفين اعلمج..رزان جانت واكفة بسد امهه كللهه جيبيلهه ملابس..حاخذهه عندي..
شذى : اي اخذهه وخلصني من دمهه ووصاختهه..
دنوة : عاين على ايدي..جان بيهه دم..

رائد : شبيهه..ليش ايدهه بيهه دم..
شذى : واني شمعرفني..اشو هاي بس تاكل شي تروح تستفرغ دم..والله اني لعبت روحي منهه..اخذهه وخلصني منهه احسن..بلكي مابيهه شي يمك وتبيعهن براسي هنا
رائد : صدك انتي مو بشر..يلههه وين الملابس..
كمشني من ايدي واخذني للحمام..شاف المغسلة اندار علي وحواجبة معكودة..انه بس عاينتلة وابجي..ذب مي عليهه نظفت غسل ايدي ووجهي وطلعت..طلع كلينس من جيبة نشف بي وجهي..شوي واجت رزان بيدهه جنطة..اخذهه منهه واخذني وطلعنة..صعدني بالسيارة وهو هم صعد..مد ايدة ورة حط الجنطة..كمش ايدي وباسهه..اخذني لبيتهم صح احس روحي بغير عالم بس اعرف الطريق..نزل وبيدة الجنطة..

فتحلي الباب ضليت صافنة علي..راح فتح الباب..حط الجنطة بالطرمة واجة شالني..لفيت ايدي على رگبتة وراسي ع صدرة بس نفس يطب ويطلع بريتي..سمعت اصوات ناس مسامعتهن كبل بس صوت واحد عرفتة..
ام رائد: شبيهه خطية..وشلون جايبهه ابوهه يدري..
رائد : يمة بعدين افهمج..
كل هذا وانه عيني ع ايدة بس مارفعتهه..فتح باب غرفة من الغرف وطب..من وجع راسي مانتبهت ع الغرفة بس حطني ع الجرباية وكام يريد يروح..كمشتة من ايدة..باسني منهه
رائد : دقيقة وارجع مااطول وداعة عيونج..
هديت ايدة وراح..جبت رجلية يم بطني وخليت راسي بينهم اشكال يجي ببالي..اشوف خيالات اسمع اصوات..احس شي كاعد يمي..ايدي ولساني وكلشي بية مربوط ما اكدر اتحكم بي..شوي وانفتحت الباب..طب بيدة تلفون ديخابر..

كعد ع حافة الجرباية ويحجي بعصبية..انه راسي احس حينفجر كلش اذاني..سد التلفون واندار علي..
رائد : اكو شي يأذيج..بس اشريلي..
تقربت يمة واخذت ايده..خليتهه على راسي..كلي هنا؟.. حركت راسي يعني اي..وخر ايدة جان بيهه دم شوي..توتر بس ماراد يوترني وياه..كومني ورحت وياه للحمام..نزع تشيرتة خلاه على رگبتي وكام يغسل بالمكان الطلع منة دم ع كيفة..لف شعري بالخاولي ورجعنة للغرفة..كعد على حافة الجربايه وكعدني على رجلة..حضني وباسني من ورة اذني..
رائد : مشتاك لصوتج ولضحكتج..اريد تكليلي ليش تكلي بنيتي..شصار بحالج..عفتج تضحكين اجي الكاج هيج
دنوة : عاينت علي وصفنت..تنهد وفتح شعري..كام ينشف بي بالخاولي على كيفة..يخاف يطخ بفروة راسي..

شوي وكام يأذن العصر..كمت ابجي واشهك..ادفع بي وايدي على رگبتي اريد افهمة مجاي اكدر اتنفس..هو انخبص بية ميدري شيسوي مثل ابوي اول مرة..كعدت بالزاوية وابجي وايدي على اذاني واحرك راسي بلا..اريد اصيح..اريد ارتاح ماكدر.. صوتي راح كمت ابجي على صوتي ووضعي.. اضل هشكل يعني.. كمت اجر بشعري وبجامتي..وارفع راسي للسكف اشهك اريد هوى يطب لصدري..اختنكت..اجة كعد يمي..لمني بحضنة يمسد بشعري ويهدأ بية..
رائد : يولي بسج كافي..تمرمر گلبي عليج..شسوي يالله حرت والله شسوي..ماكدر اشوفج تتعذبين وساكت..

هو ويحجي وانه بغير عالم..دقيقة احس بروحي انسانة جسد وروح..وساعات احسني بس جسم..شالني وحطني ع الجرباية بس بعدني مكرفصة روحي..حضني ويهدي بيه.. مد رجلية وايدي بهدوء..غطاني وباسني من خدي..ضل كاعد يمي ويمسح بشعري..كمشت ايدة..
رائد : ماروح والله..كاعد يمج..
تقرب مني..خله راسي على صدرة..صوت نبضاتة احس بيهن واسمعهن..هلكد ما الغرفة هدوء ودافية غفيت..نسيت انه وين وشجابني بس غمضت عيوني ونمت..كعدت ماعرف شوكت شفته داير وجهه ويبدل..ظهره علي قطرات مي..لبس الفانيلة واندار شافني كاعدة..لبس التشيرت واجة يمي..
رائد : اجيبلج شي تاكلي..مجوعانة..
بطني جانت تكرصني بس اخاف احط اي شي بحلكي.. حتى الماي اخاف اشربة ع الدم الشفتة لعبت روحي من كلشي.. أشرت على حلكي..

رائد : لا لتخافين..اوكلج شي خفيف..
وخر الغطى وكمشني من ايدي..كمت على كيفي..حيلي بايد منتهية..كل دقيقة اكول هي هاي لحظاتي الاخيرة من الوجع الاحسة..راسي وعيوني وجسمي كلشي يوجعني..ضفرلي شعري وشدة بالقراصة الجنت لابستهه..مشاني بالكوة ونزلت جوة..انه بس كامشتة من تشيرتة اخاف يعوفني مثل ابوي دخلنة للصالة..كلهم كاعدين..كعد بالطرف وكعدني بسدة.. ايده لافهه على جتفي..ما انتبهت منو ومنو.. مركزة نظري على رائد هو ويحجي وياهم..انتبهت على صوت واحد منهم
خال رائد : بوية شلون تجيبهه للبيت..ميصير..بلكت ابوهه ميقبل..بعدك معاقد عليهه بالمحكمة..

رائد : اسمهه مرتي..شفتهه تتلوع وتنضرب جدامي وتريدني اعوفهه..لا والله..حاطهه يمي ماخليهه تروح يم مرة ابوهه تضرب بيهه وهي مريضة حتى حيل ماعدهه تحجي صوتهه ماكو..شلون يهلي اعوفهه..
ام رائد : بس المفروض تخابر ابوهه ميصير..
رائد بصياح : مرتيييي..يعني الواحد مرتة لازم ياخذ اذن ابوهه يله ياخذهه..خوش والله..
خال رائد : احنا علمودك..شوف حالتهه غادية عودة
رائد : عاجبتني هيج..عودة سمينة مو مهم..باجر اخذهه لاحسن دكتور..حتى لو باربيل هم اروح..مستعد اسوي كلشي بس ترجع مثل اول..
ام رائد : ترة خالك ما كال شي..ليش هيج تحاجي..
رائد : انه هم مكلت شي..

مد ايدة ع صحن الفواكه..اخذ برتقالة كشرهه وانطاني.. ايدي خدرانة ما اكدر اكمش بيهه شي..رفعت راسي عاينتلة كام هو يوكلني..شوي ودفعت ايدة..همس بصوت ناصي
رائد : بس مااكلتي شي..
همهمت وايدي على رجلة..هو كام ياكل وكلساع يسألوه على شغلة..رائد وين فلان شي..رائد اريد فلوس حيبلش الدوام واريد اشتري ملابس..هو يكول اي ويسكت..كلماتة تنعد ع الاصابع وياهم..بس وياي غير شكل..كام وكومني وياه.. غسل ايدة وصعدني فوك..تمددت ع الجرباية وهو واكف ديخابر بالباب..كلة خابرت العقيد واخذت اجازة شكو مخابرني.. عندي ظروفي..سدة واجة كعد يمي..ضل يعاين بوجهي بعدين تنهد وحجه هو ويمسد بشعري..

رائد : ماتمنيت تصيرين يمي بهاي الحالة..جنت اتخيلج تتلكيني من الباب..اقبل اصبر لخاطرج العمر كلة والله.. بس ترجعيلي مثل كبل..
سمعتة بدون ما اجاوب..وخر الغطى وتمدد بسدي.. خلة راسي بين رگبته وصدره ومغمض عيونه..ضليت اعاينله لحدما غفيت..الفجر فزيت مثل كل مرة ابجي وايدي على اذاني اريد الاذان يخلص..رائد فز شغل الضوة واجة يمي يهديني..وانه ادفع بي واجلغ برگبتي وخدودي كمشني من ايدي..كمت ابجي بالزايد وصوتي ماكو بعدهه الجمرة بداخلي..بس خلص الاذان عاينت للسكف وشهكت..كمت للحمام بالعجل..كمت استفرغ وابجي..روحي صارت بخشمي..متت من الخنكة

اجة رائد وكف يمي..دار وجهي صرت بحضنه..مد ايدة فتح المي وغسل ادية..طلعني برة بدون ما اشوف المغسلة.. ضليت منتجية ع الحايط ودموعي تصب..سمعت صوت مي شوي وطلع دنج يمي باسني من راسي ومسح دموعي..كومني ولاف ايدة على ظهري..دخت دوخة مو طبيعية..كمشتة من تشيرتة وملت علي مغمضة عيوني..دنج شالني ومقربني لصدرة طبينة للغرفة سد الباب وطفى الاضوية..تمدد ع الجرباية ومخليني بحضنة ما عافني..باسني من خدي ويعاين علي بنظرات قهر وحزن.. اخذ ايدي البيهه الحلقة ويمسح عليهه بهدوء لحدما غفيت..كعدت الصبح شفتة على نفس وضعية البارحة مامتحرك وإدي محاوطتني من جتفي.. هو متجي راسة ع التاج مالت الجرباية..شلت راسي من صدرة جان يكعد..فتح ايدة ووخرت منة..كمت للحمام صادفتني اخلاص اول شي معرفتهه..

اخلاص : شو رايحة للحمام..شعندج..لازم هاي بس علينا تسوين روحج مخبلة ويم رائد ....اجه صاح بيهه..
رائد بصياح وعصبية : ووجع اي والله..من الصبح تتناكرين وياهه..جي متكدر تحجي ومريضة..
اخلاص : وشدعواك..ترة مصارت مرتك بعد..
رائد : ماعوزج بس تكليلي جايبهه من الشارع وجاي.. شحال لوما عقدت عليهه جدامكم كلكم..اكول روحي من وجهي ولا تعترضين لدنوة بعد اذا متعرفين حالهه..
اجة يمي..كمشني من ايدي واخذني للحمام..هي راحت غسلت وجهي وادية..كمت ابجي..
رائد : ليش البجي باباتي..
أشرتلة على رگبتي وحلكي..يعني اريد احجي تعبت.. احس طاقة بجسمي ونار اكلتني اكل..دنج يمي..حضنتة وابجي اريد يطلع صوتي..سمعت صوت بنية اول مرة اسمعة..

- شبيهه خطية..
رائد : تعبانة..كام وكف واخذني من ايدي رجعنا للغرفة.. عاين للساعة وراح ع الجنطة مالتي..طلع منهه الصاية والشال واجة لبسنياهن..كعدني ع الجرباية وهو راح للكنتور يلبس بس ما اشوفة..بالي مو وياه ولا وي احد ثاني..احس بغير عالم مو بالواقع..وكف جدامي هو ويخلي فلوس بجيب بنطرونه كمشني من ايدي ونزلنة جوة..طب للصالة..
ام رائد : ها حتاخذهه هسة..
رائد : اي البارحة من رحت احجز السكرتير كلي لو باجر الصبح لو ورة يومين..هاي عود الصبح وكال جدامك بعد ٣
ام رائد : اجي وياك..خاف متكدر وحيدك..
رائد : لا يمة انتي هم تعبانة..ماريد اتعبج اكثر..بس اذا اجة عمي كليلة من يجي رائد هو يفهمك كلشي..
ام رائد : مثل متريد يمة..

اخذني وصعدنا بالسيارة..نوب كام يسوق مسافة طويلة بس طول الطريق ساكت..شوي ادور وطبك السيارة..نزل واجة نزلني صعدنا فوك..كعد على كرسي وكعدني بسدة.. ومن الجهة اللخ جانت كاعدة مرة..عاينت لحذائهه..مبينه جبيرة شوي وطلع اول واحد من الدكتور..كامت تحجي وياه..

- : خالة شبيهه البنية..
رائد : مريضة..كامت تستفرغ دم..
- : اكدر احاجيهه..
رائد : متكدر تحجي..
- : ليش اسم الله عليهه..
رائد : والله ماعرف حجية..بالليل بطنهه وجعتهه وابوهه اخذهه للمستشفى كلولة مابيهه شي..هي رجعت للبيت كامت تستفرغ وسكتت بعد متكدر تحجي..هسة بس ع الاشاير..
- : ما اخذتوهه لدكتور اذن وانف وحنجرة..
رائد : اخذهه ابوهه..كلة مابيهه شي حنجرتهه وحبالهه الصوتية بس جان عدهه احتقان بسيط..
- : ماريد اخوفك..شوف الدكتور شيكول عليهه اليوم..اذا مابيهه شي فانه بيتي هنا بالبصرة..بالطويسة..هذا رقمي وفتحت جنطتهه تدور..انطت ورقة صغيرة لرائد..
رائد : ان شاء الله..متقصرين..

شوي وصاح السكرتير اسمي..طبينا وكعدت ع الكرسي و رائد واكف يمي..
الدكتور : الاسم..
رائد جاوبة بعدين كلة متكدر تحجي..
الدكتور : شنو مشكلتهه..
رائد : تستفرغ دم..وهي مماكلة شي حتى..بس فاكهه..
الدكتور : افحصهه اول..اذا شفت ماكو شي ادزهه على ناظور وتحليلات..
كمشني من جتفي واخذني للسدية..ما اكدر اتحرك الا واحد يشيلني ويحطني..مددني واجة فحص اذاني وبلعومي انه ما انطي أي ردة فعل بس متمددة واعاين للسكف.. رفع الصاية لنص بطني والبلوز..خلة جل على بطني ويعاين ع الشاشة مدري ماليش..دقايق وكام..اجه رائد عدل ملابسي وكعدتي راح كعد مقابيلة يحاجي..

الدكتور : ع الاكثر مابيهه شي معدتهه..هي تكح
رائد : لا..بس على فجأة تكوم تستفرغ..
الدكتور : لعد مابيهه مثل ما عبالي..حكتبلهه ناظور..هذا ادق واضبط من السونار..هسة حكتبلهه مهدأت وفيتامينات.. ميصير متاكل جسمهه ميتقبل الادوية بعد..خليهه ع الميزان اشوف شكد وزنهه وطولهه..
اجه رائد اخذني من ايدي ووكفت ع الميزان والمقياس مالت الطول هو صاير ع الحايط..الدكتور ضل صافن..
الدكتور : ليش هيج حالتهه..طولهه ١٦٠ ووزنهه اربعين.. هاي وي الملابس هيج..بدونهه اقل..خاسرة هواي سوائل..
راح كعد ع الميز و رائد كمشني ايدي واخذني يمة..كعدني ع الكرسي وهو واكف يحاجي الدكتور..
رائد : يعني شحتكتبلهه هسة..

الدكتور : حكتبلهه فيتامينات ضروري تاخذهه..كثرلهه سوائل وعصاير..جسمهه محتاج سوائل..هذا العرفتة بالفحص.. ومثل ما شفت..اني سويتلهه سونار بس مابين شي..شاك عدهه تقرحات بالاثني عشر..من اعراضة التقيؤ يكون دموي.. يومين تمشي ع العلاجات وتلتزم بوقتهن..وراهه الصبح بالسبعة اشوفك بمستشفى الراهبات ببغداد حكتبلك ورقة عليهه اسمي واسم المريضة ورقم العملية..المبلغ منختلف عليه منطول ان شاء الله..عملية بسيطة
رائد : دكتور هي بس تخلي شي بحلكهه تكوم تستفرغ فتخاف تاكل بعد..
الدكتور : اي اغلب المثل حالتهه يخافون ياكلون بعد الصارلهم فانت انطيهه الاكل ع شكل جرعات..الصبح شوية والظهر شوية وهاي هيج يعني ..بالنسبة للاكل..مو اي اكل.. ابتعد عن النشويات والحلويات..وكلهه معلاك حتى تعوض الدم الخسرتة اجبان..ابتعد عن المشروبات الغازية..فهمتني..

رائد : اي..هي عدهه ادوية اعصاب وعلاج لصوتهه.. تضل تاخذهن لو ميحتاج..
الدكتور : صوتهه يرجع بمرور الوقت مادام حبالهه الصوتية بحالة جيدة..أي دكتور اخر تروحلة حينطيك علاج على حسب معرفته..يعني خوما هو دكتور نفساني وينطيك ادوية دكتور قلبية او باطنية..اكيد حينطيك ع اختصاصة وشلون شخّص الحالة..اكدر اكلك انطيهه العلاج مالت الاعصاب بس المشكلة وين..اذا هي مابيهه شي وتاخذ الدوة هذا حيصير بيهه صرع لا سامح الله..فليش ما اريد اورطك واكلك اي انطيهه.. اترك الادوية كلهه وانطيهه الي كتبتلهيا..ماعدهه غير العافية
رائد صافحة واخذ منه الرايجتة وطلعنا..صعدني بالسيارة وكال حجيب الادوية واجي..

ضليت كاعدة واعاين من الجامة اتخيل الناس تمشي على جمر بس ميهتمون..وانه وي كل خطوة يخطيهه واحد من هلبشر احس انجوي بمكان بجسمي لو ايدي لو رگبتي.. شوي واجة رائد..حط الادوية يم الگير وشغل السيارة..وصلنة للبيت سمعت رائد يحجي وي روحة يكول اي همزين اجة اريد افض كلشي..اخذ الادوية واجة نزلني ومحاوطني من جتفي طبينة جوة للصالة..سمعت صوت ابوي..اريد اروح احضنة بس جسمي نحلان..ما اكدر امشي واروح يمة..هو اجاني حضني ويبوس براسي وخدي..انه بس اعاينلة بدون ردة فعل..اخذني وكعدني بينة هو و رائد ويحجي وياه شصار وياي وشلون جابني هنا ..

محيي : يادكتور اخذتهه..
رائد : باطنية وقلبية..
محيي : وشكال..ادويتهه القديمة متاخذهن..
رائد : لا ما اخذتهن..كال انطيهه الادوية هاي هذيج عوفهن خاف تصير عدهه مضاعفات..بعد يومين اروح للمستشفى كتبلي اسمة واسمهه خاطر يسويلهه ناظور..كال شاك عدهه تقرحات بالاثني عشر..سوالهه سونار كال ماشفت شي.. الناظور أدق واضبط..بعد الله كريم..
محيي : تمرمرت وياها والله..ما ادري شسوي..رحت لبغداد اجيت لكيتهه هنا..رزان حجتلي شصار..تنهد وكمل حجية.. هسة اريد اخذهه..
رائد : وين ماخذهه..خليهه عندي..والله حاسبهه مثل بنتي كبل لا تصير مرتي..تعال شوفهه شوكت متريد..
محيي : انت عاقد عليهه بس شيخ..ميصير..
رائد : يعني بالله عليك تتوقع يصير شي وهي هج حالتهه والله روحي شايغة عليهه..اي بشر يكلي بفلان مكان علاجهه اروح لو جانت بأبعد مكان هم قابل..

صار حجي بين رائد وابوي يالله قنع يبقيني عندة..انه بس اسمع كلشي محجيت..طلع وي ابوي برة وانه بقيت بالصالة مدري منو كاعد وياي..بس عرفت اخلاص..اجت يمي
اخلاص : مارحتي وي ابوج..شعندج يمنة..حتوصخينة انتي ودمج..ترة كلش تلعب روحي من هسوالف وامي هم..
دنوة : رفعت راسي عاينتلهه بدون ما اجاوب..حتى لو اريد اجاوب ما اكدر..صوت ماعندي..حيل خاطر احجي ماعندي كمشتني من زندي حيل..
اخلاص : شبيج مو احاجيج..خرسهههه..
ضلت تحجي يم راسي لحدما اجة رائد صاح بيهه ووخر ايدهه مني..كومني وجرني وراه..

رائد : شنو انتييييي..هو انه جبتهه من بيتهم چي مرة ابوهه تكتلهه..ادور اخليهه يمج..ديربالج تتقربين يمهه..لا انتي ولا امي حتساعدوهه بشي..هي مرتي وانه اتحمل مسؤوليتهه.. مال تحميلهه منية ع يابو انتي القايمة بواجبهه شيليهه..
ديحجي جان تجي امة..
ام رائد : هاي شبيكم ياستار..
رائد : ماكو شي..بس كولي لاخلاص لا كلمة والثانية تجي على دنوة تكللهه لعبانة روحي منج..يابة هي مأذيتج بشي.. احجي مو احاجييييج..
اخلاص بخوف : لا خوية..
رائد : خلص بعد..حرف ماريد اسمع..
اخذني من ايدي وصعدنة فوك..خلاني بالغرفة ونزل..نزعت الشال وتمددت على بطني..كمت اغفي ونمت..اجاني نفس الحلم القديم..نفس الرجال والحجي والجو..والظلمة..

كمت ابجي بالحلم واكطع بشعري..فزيت من النوم مرعوبة.. تلمست المخدة..جانت منكعة..كمت اتلفت بالغرفة..وين رائد اخاف الحلم صار صدك..مكدرت اتحرك من مكاني..احس ايدي ورجلي مربطات بطابوك هلكد ما ثكيلة..كمت ابجي بمكاني وايدي على راسي واون..شوي وانفتحت الباب..طب رائد واجة يمي بالعجل..فتح ايدي..جنت ضابتهم حيل على راسي..
رائد : يولي اشش كافي..عيونج راحن من البجي..ماعوفج والله..بس على كيفج..
يحجي بخوف وحرص..بس سمعت صوتة حضنتة وراسي على رگبتة وابجي..اختنكت بالبجي وهو يهدي بية يكلي يمج ماروح بس اهدي..جنت مغمضة وابجي..

فتحت عيوني..حسيت شي كمز صار جدام عيوني اسود من فوك ليجوة..شهكت وخليت ايدي على وجه رائد..اريده يشوف ششفت..دورت وجهه للمكان الشفت بي ذاك الخيال..هو صافن ميعرف شداقصد خلة ايده على راسي وحطني بحضنة
رائد : بس لو افهم شدتكولين..احس نار بگلبي من اشوفج متلوعة وماعرف شسوي..
كمت ابجي من المنظر الشفتة..خفت وفزيت وضل مطبوع ببالي..باسني من خدي وعدل كعدتي..مد ايدة جاب ماعون بي معلاك وعصير بكلاص..
رائد : اكلي..ولو قطعة وحدة..
مديت ايدي اخذت قطعة..ضلت بحلكي ساعة..جسمي مالة قابلية يسوي اي شي..ضل يمي لحدما كملت اكل..شربني العصير..اخذ الماعون حطة ع الكومدي

اجة يمي يعدل بشعري نزعني الصاية وكعد يمي..انطاني الدوة من علبتين معرفت ماليش بس اخذتهن وشربت مي فوكاهن..حطيت راسي على صدرة وايدي على ايدة..الغرفة كلش هدوء..شوي وانفتحت الباب طبت وحدة بنية مشايفتهه كبل..
زينب : يلة رائد متجي تاكل صبينة وننتظرك..
رائد : هسة اجي..اكلو انتو..راحت وسدت الباب وراهه.. عاين علي كلي نروح..مجاوبت..كمشني من ايدي ونزلنا جوة لاول مرة ارفع راسي واشوفهم نفر نفر..بنات ثنين وي اخلاص ومرة جبيرة بكد خالة ام رائد..والرجال الاجة بخطوبتي كال خالي..واحد لاخ اصغر من رائد وبسدة بنية..كعد بنفس مكان البارحة وكعدني يمة..اول ما كعد الكل سكت..جانو ديحجون..كام ياكل ويعاينلي كل شوي لحدما خلص وكام يغسل عافني يمهم..

اخلاص : حتى متاكل ويانه..كلة يجيبلهه من برة ومشاوي والله يالله..شلون حظ عليهه..
ام رائد : لج سكتي..لا يجي ويتخبل علينا..عوفيهه هي مريضة خطية حتى حجي متكدر تحجي..
طب سمع امه دتحجي..عافهم ودنج يمي حاوطني من جتفي وصعدني فوك..شوي وعافني بالغرفة ونزل..رحت كعدت ع الكرسي جدام الميزتواليت..عاينت لرگبتي شلون غادية خطوط حمر بيهه دم..اظافري طولانة اخر فترة..وانه كل ما يأذن اشيش واكوم اجلغ برگبتي وخدودي..كمت ورحت تمددت ع الجرباية..شوي وانفتحت الباب..طبت سرور وياهه رائد اول ما شافتني كامت تبجي واجت علي تحضن بية وتبوس براسي وخدي..تعاين لرگبتي وترد تعاين لرائد..

سرور : كتلة لابوي اذا ماخذتني اروح وحدي..شصاير بحالج ليش هيج..انتي ام الضحكة والسالفة تخربطت احوالج سودة علي.. ليش هشكل رگبتهه..
رائد : على فجأة تكوم تبجي وتجلغ برگبتهه ووجناتهه
سرور بقهر : وهسة متكدر تحجي مو..
رائد : اي..
بقت يمي تحجي هي و رائد وانه بغير عالم..دفعتهه وتغطيت نسيت شصار بعد..اكيد ضاجت من تصرفي بس مو انه المسؤولة عن كل الديصير..اريد احجي..اريد صوتي يطلع.. اريد اكللهم مو انه الداسوي هشكل..اسمع بس ماكدر اجاوب احس مربطة..لشوكت اضل هيج..بقت شوي بعدين نزلت

سد الباب واجة يمي..يمسد بشعري ويحاجيني
رائد : شسويلج وتصيرين زينة..سعادتي يمج والله..لو افر الدنيا كلهه ما انسعد كثر ما تصيرين بكربي..
شافني ماجاوبته..تنهد ونام بسدي..حضني وباسني من راسي..مكدرت انام..ورة فترة انداريت علي شفتة نايم.. مديت ايدي ع لحيتة مدري ليش..ضليت اعاينلة لحدما كعد.. احس الكل غريب واول مرة اشوفة..بس رائد وابوي..الباقين بس اعرفهم بالصوت..عيوني تشوف غواش طول الوكت..لو اشوف خيال ورة الشخص الاعاينلة..فابد ما ارفع راسي بس مدنجة واسمع..كمش ايدي وباسهه..

شوي واذن المغرب..حطيت ادية على اذاني واون..رائد بالعجل كمش ادية..يدري حكوم اجلغ برگبتي وخدودي..كام يهدي بية..لحدما خلص الاذان بجيت بجي مصاير..اخذني لحضنة ويمسح براسي..بالليل صاحو يجي ياكل..
رائد : تجين تاكلين..
عاينت علي وحركت راسي يعني لا..كام للكنتور طلعلي ملابس وكعد بسدي
رائد : فوتي سبحي..اذا متكدرين بس غيري ملابسج.. باجر انه مو بالبيت ارجع بالليل..ولازم الفجر نطلع لبغداد فاريدج تتحضرين من هسة زين..
باسني من جتفي وكومني..طبيت للحمام وهو راح نزل..فتحت المي وطبيت جواه بملابسي..مادري شصارلي..متحكمت بروحي ادور المي كلش بارد والدنيا شتا..

احس بي بارد بس ماكدر اسدة كعدت جوة الدوش..كمت ارجف وابجي بقيت هواي بس مادري شكد..باب الحمام بي قفلتين..انه من طبيت قفلتة قفلة وحدة..شوي واندكت الباب..
رائد : خلصتي؟..
مجاوبتة..زدت بالبجي..صاحني مرة مرتين مجاوبت..صار اكثر من صوت يم الباب..حطيت ايدي على اذاني واون شوي ودفر الباب..مرتين بالثالثة انكسر القفل..اجة يمي سد الدوش وانه متنكعة مي..اندار عليهم..
رائد : روحووو..محد كلي تأخرت..شنو انتووو..محد انتبه عليهه..ولا واحد بيكم حس بيهه ماكو..غبت عنهه هيج هملتوهه كومي يابة كومي..
راحو كلهم..كومني وسد الباب..لف شعري بالخاولي وصاح على اخلاص تجيب واحد لاخ..رفع راسي بايدة..

رائد : شلون حروح واعوفج باجر..خايف عليج..هو وديحجي جان تجي اخلاص..انطتة الخاولي..لفني بي واخذني للغرفة طبيت وهو طلع مدري وين..لحظات واجة بيدة الملابس الانطانياهه عود البسهن من اسبح..سد الباب وقفلهة.. كمشني من ايدي واخذني للجرباية..كعد ع الحافة وانه واكفة جدامة بس صافنة..ماحجة شي..ذب الخاولي ونزعني البلوز والبجامة هو ومدنج عيونة..ميعاين علي..انه بغير عالم ماحس بس بلمسات اصابعة ..غيرلي ملابسي وكعدني ع الجرباية اخذ الملابس وراح مدري وين..شوي واجة بيدة كلاص مي وحباية كعد يمي انطاني الحباية والمي..اخذتهه..

كام طفى الاضوية واجة ع الجرباية..اخذ الكلاص خلاه ع الكومدي وحضني بايدة ورجلة وباسني من خدي..
رائد : يولي والله اموت الف موتة من اشوفج هيج..من صحتي وحيلي لعافيتج بس ترد هلضحكة والصوت..
بقيت اسمعلة لحدما غفيت..كعدت الصبح على صوتة ديخابر ويلبس بالبنطرون..كلة يلة هسة جاي بس تكعد..شافني كعدت سدة واجة يمي..
رائد : كومي اخذج لبيت ابوج..من اجي بالليل اجيج خاف هنا ممتعودة عليهم..
كمت للحمام غسلت ورجعت للغرفة..لبسني الصاية وعدل شعري سوالياه ولبسني الشال..لبس حذائة هو وانه اتابع حركاتة..اخذني ونزلنة جوة..راح على امة مدري شحجة وياهه اجة ورحنة للمطبخ..كعدني ع الكرسي وهو جدامي..وكلني لكم صغيرة..اكلت شوي ودفعت ايدة..
رائد : ماشي كومي يلة..

اخذني من ايدي وايدة اللخ يطلع بيهه السويج..صعدت بالسيارة ورحنة لبيت ابوي..باسني من خدي كلي ديري بالج على روحج..احاول ما اطول..اجة نزلني ودك الباب.. طلعلة ابوي سلم علي وانطاه الدوة وراح..دخلني جوة وكعدنة بالصالة..بعدني فاصلة واكثر من اول يوم..مدري اذا هم ديشوفوني اصير اسوء لو بس انه احس..صاح رزان وسما اجن يمي باسوني وراحو..مشى اليوم عادي..الظهر صبو غده بس انه سوالي شوربة واجة وكلني..بعدين انطاني الدوة شذى مشفتهه..شكد كرهتهه من ذاك اليوم..حتى معاينت بوجهه المغرب جنت بالغرفة صافنة ع التلفزيون جان يأذن..كمت من مكاني بالعجل رحت للهول يم ابوي..حضنتة وابجي..عرفني بعد ماسوة شي بس حاوطني ويهدي بية..

بالليل تمددت ع القنفة بعد ماكدر اتحرك..احس جسمي صار نار والحراره يم اذاني اكثر..شوي واجة رائد..كعد هو وابوي وانه متمدده اريد احجي..تعبت..كالة اريد جنسيتهه اصليه ومستنسخة وجم صورة.. راح ابوي دقايق واجة انطاهيا..اجة علي..خلة ايدة على رگبتي..عكد حواجبة وعدل كعدتي..
رائد : مصخنة..ليش هشكل..يعني كل ما اعوفج اجي الكاج متمرضة وشحالج غادية..كومي يابة..
كومني وطلعنا..دخل السيارة بالكراج واجة شالني وصعدني فوك..كمشتة من ايدة راد يكوم..
رائد : هسة اجي بس اشوف دربي..
راح وانه ابجي من الحرارة..اجة عدل كعدتي وانطاني الحباية وياهه عصير..شربته بعدين اخذتهه..بقة كاعد يمي.. نزعني الشال والصاية..احس استسلمت بعد ماكدر كلشي اسوي تجيت راسي على جتفة اريد اغفى..

ورة ساعه لو اكثر مد ايدة ع رگبتي..همس بينه وبين نفسة بعدج مصخنة..وخر راسي خلاه ع التاج مالت الجرباية وراح مدري وين..شوي واجة بيدة طاسة..نيمني وكعد يمي..يعصر بالفانيلة ويخليهه على گصتي ويهمس بصوت ناصي معرفت شنو..ضل مادري شكد.. لحدما غفيت..كعدني الفجر من وكت كلش..حتى الشمس بعدهه ممبينة..هو جان ديلبس ببلوزة ويكعد بية..
رائد : كومي بنيتي..ورانة سفر يادوب اوصل ع الوكت
اجة كومني وغسل وجهي ورجعنة للغرفة..غيرلي ملابسي وكعدني ع الجرباية..دنج لبسني الحذاء وكام..لهلدرجة وصلت بحيث ما اكدر ادنج والبس الحذاء لو احط الشال على راسي اخذني من ايدي وايدة اللخ كامش بيهه جنطة صغيره ونزلنا امة جانت كاعدة..

ام رائد : يمة خابرت البارحة على خالك فادي..كال موجود انه شوكت ميريد يجي عادي..
رائد : اي عاشت ايدج..مابيه حيل ارجع بنفس اليوم
باسهه من راسهه وكمش ايدي وطلعنا..ورة ما طلعنا من المحافظة غفيت مادري شصار بعد..كعدت على ضوة الشمس بعيوني..شلت راسي شفتة ديحجي وي واحد وواكفين بسيطرة مدري شكلة وطلعنا..اندار علي..
رائد : زين كعدتي..هسة طبينة لبغداد..
حركت راسي يعني اي..مشينة مسافة مو حيل طويلة.. طبك السيارة بمكان بي بعد جم سيارة..نزل واجة نزلني وطبينة للمستشفى..تختلف عن مستشفيات البصرة..ضليت كاعدة بمكاني و رائد راح ع الاستعلامات..مدري شسوة.. شوي واجة يمي جان يجي الدكتور..سلم على رائد
الدكتور : يلة جاهزة..
رائد كومني وابتسملي..يعني لتخافين

تمشيت للصالة الدكتور كلة رائد ميصير تدخل بعد.. طبيت لغرفة جبيرة بيهه سدية وادوات وشاشة وهواي شغلات..كلي تفضلي ع السدية تمددت على ظهري بين ما اجو بعد دكاترة وياه..واحد منهم كلي فتحي حلكج..خلة مخدر وماعرف شنو بحلكي..بعدين كلي انداري ع الجهة اليسرى..وراهه محسيت بشي..كعدت لكيت روحي بغير صالة..رائد واكف يم الباب تحركت شوي حس علي.. اجة كعد يمي وباسني من خدي
رائد : شلونج هسة..زينة؟..
حركت راسي يعني اي..بس احس بلعومي وحلكي كلش مر شوي وطب الدكتور حاچه رائد..

الدكتور : بعد اربع ايام تطلع النتيجة..تجيني للعيادة بالبصرة نشوف اذا تحتاج ادوية..ان شاء الله مابيهه شي
رائد : ان شاء الله دكتور..الله يسلمك..تكدر تطلع هسة..
الدكتور : اي عادي ماعدهه شي بعد..
حجة شوي وراح..اجة كومني وعدل شالي وطلعنا..وقع على اوراق الخروج واخذني ورحنة للسيارة..كال حروح لبيت خالي والفجر مثل اليوم نرجع للبصرة..همهمت يعني اي..كل شوي يسألني..جوعانة ..اجيبلج شي..خوما تعبانة..بس احرك راسي يعني لا..

وصلنا لبيت طبك يمة واجة نزلني ونزل الجنطة دك الباب طلعلة رجال سلم علي وبوسة..سلم علي بس مجاوبت ما اكدر اتجاوب وي احد غير رائد وابوي..لساني متربط..طبينا جوة ومشى اليوم عادي..رائد مخليني يمة لا راح هنا ولا هنا محد جان اكو بالبيت بس هو هذا الرجال ومرة جبيرة بالعمر وبنية بكدي تقريبا..الظهر كعد يتغدى وانه بس كاعدة يمة ما مديت ايدي..ما اشتهي..كام هو يسويلي لكم صغيرة وينطيني اكلت شوي ودفعت ايدة يعني لا..فهمني وكعد ياكل هو.. الخيالات مراحت من جدامي..فما ارفع راسي اخاف يجي نفس الخيال مال ذاك اليوم الاسود بس مدنجة وكاعدة يم رائد..بين ما كمل كام وكومني وياه..خالة ماسأل علي ولا المرة الجبيرة..طبينة لغرفة..سد الضوة ونزعني الشال..

كعد ع طرف الجرباية واخذ ملابس من الجنطة..غيرلي ملابسي هو ومركز عيونة بعيوني..كمل وكام هو غير ملابسة واجة يمي ع الجرباية حضني وتغطينا..اول ما حط راسة نام..ضليت اعاينلة لحدما غفيت..كعدت المغرب ابجي..كعدتة على صوت شهكاتي حطني بحضنة ويمسح على شعري..مر اليوم عادي..بس اتصفن وبالي مو وياهم..الفجر كعدني رائد ورجعنا للبصرة.. اخلاص ماتابت مني..كل ما تشوفني وحدي تجي تحجي يم راسي بس انه بغير عالم..اسمعهم كلهم بس ميلفتني بس رائد وابوي..مرت ثلاث ايام..المغرب ابجي واشهك ما اسكت لحدما يجي رائد يحضني ويهدي بية يالله..عمي قاسم وفيصل وجدي اجو شافوني..

اول شي كالوه ضعفانة خلصانة هو حاطني بسدة ويحاجيهم مابعدني عنة ابد.. ويبوس بية يكلي بس ارجعي مثل كبل يحترك گلبي حرك من اشوف حالتج وانه مابيدي شي..اتمنى ارجع نفس لفهة كبل من اشوف رائد  واحساسي من يصير يمي..كلة راح من تمرضت.. ما احس بس بوجع ونار بجسمي بدال الدم..باليوم الرابع كعدت مثل كل مرة..كال اليوم العصر نروح للدكتور اخذ النتيجة مالت الناظور..اجة العصر بدلي ملابسي وهو بدل وطلعنة..ابد مامل مني..يسويلي كلشي بحذر وخوف..ما كال اوف.. احسة يسوي كلشي من گلبة

طلعنة للدكتور بقينا شوي واجة سرانة..طبينة والدكتور جان يدور بالفايلات..
الدكتور : النتيجة ايجابية..مابيهه أي شي..
رائد : الديصيرلهه شنو..
الدكتور : اعتذر..بس علاجهه مو يمي..رجعهه للدكتور النفسي يمكن كلامة صح..
رائد عاينلي بنظرات مدري شلونهه..تشكر منة وطلعنة رجعنة للبيت.. شمر السويج وكام يصيح..
رائد : يعني رحتلة مرتين..بس خاطر احصل حجز قريب ورحت من بغداد للبصرة بس علمود العملية..عوف السعر مو مهم..ترخصلهه فلوس الدنيا كلهه تالي يكلي علاجهه مو يمي جا ويييييين..ويييين.. اريد ادمي يفهمني..تعبت اشوفهه تخلص يوم عن يوم وانه ساكت..
ام رائد : يمة مو هيج كالوهه..اصبر ربك ميعوف احد

رائد : شنو اصبر..شنووو..اااخ يالله يمة شو عوفيني يرحم اهلج..اجة يمي اخذني من ايدي ورجعنا للسيارة.. حط ايدة بجيبة الورة..طلع ورقة مدري شنو بيهه..يمكن رقم لأن كتبة بالتلفون..وكال ..اليوم ارد اعرف شقصدت هذيج.......

يتبـــــــــــع....................