رواية اسألي عني الليالي الفصل السادس وثلاثون 36 - بقلم رقية جاسم

ذوبت گلبي بمحبتك ..
   وانت مامصدگ احبك ..

قناة التليگرام

حساب الانستگرام

الـبـارت الخامس والـثـلاثـون...............

اجه يمي اخذني من ايدي ورجعنا للسيارة.. حط ايدة بجيبة الورة..طلع ورقة مدري شنو بيهه..يمكن رقم لأن كتبة بالتلفون وكال ..اليوم ارد اعرف شقصدت هذيج..دك مرة مشالوه.. بالمرة الثانيه يالله..اخذ نفس وكام يحجي بهدوء..
رائد : الو..الحجية موجودة..هلة بيج حجية..اي انه شفتج بالعيادة..حجية ارد اجي اشوفج بعدين افهمج كلشي وين اكدر اجيج..كامت توصفلة الطريق هو يكللهه اي اندليت خلص بس مسافة الطريق..سدة وشغل السيارة..اريد اسألة وين رايحين بس مثل كل مرة..لساني مربط..بالطريق خابرة ابوي حجة وياه ع النتيجة مالت الناظور..رائد جاوبة وصوتة مبينه علي القهرة..كلة ايجابية..ويكلي علاجهه مو يمي..حجة وياه شوي بعدين سدة..كام يصيح ويسوق سريع..ورة فترة ضرب بريك ونزل..اجة نزلني وتمشينة لبيت صاير ركن دربونة.. دك الباب طلعتلة حجية..سلم عليهه وطبينة جوة..

هي نفسهه الجانت بالعيادة..بس انه معرفتهه بالشكل معاينت لوجهه ذاك اليوم..كعدنا بصالة صغيرة..
الحجية : خير خالة..شطلع بيهه..
رائد : سوالهه سونار..كال مابيهه شي بس اتأكد اكثر بالناظور سويتلهيا ببغداد بالكرادة وانتظرت جم يوم وطلعت النتيجة مابيهه شي..الدم التستفرغة شنو..خلصت والله شوفيهه حتى مابيهه حيل تمشي وتخلي لكمة بحلكهه..
الحجية : شوف انه عرفت والله بس كلت بلكت الله اطلع غلطانة والبنية بيهه مرض عضوي..
رائد : شلون اذا مو عضوي..
الحجية : انه بنتي كبل سنتين صارت مثلهه بالضبط.. تبجي ومتعاين بوجوه الوادم..تركت نفسهه..حتى سبح متعرف تسبح هم ضليت دكتور يوديني لدكتور اخر شي عمتي الله يرحمهه مرة جبيرة بالعمر تعرف بهلسوالف..كلتلي هاي مسويلهه عمل بالبداية مصدكت..كتلهه هي بنتي منو شايفهه خاطر يسويلهه عمل..كلتلي ادليج على شيخ ببغداد تروحيلة بعدين تكومين تترحميلي..هو حيكلج مسويلهه كيت وكيت..

والله واخذتهه لبغداد وحدي ابوهه متوفي..رحت للشيخ كتلة هاي بنتي يمك وماطلع اذا متصير زينة وتكلي شبيهه..قام يقرة عليهه بصوت عالي هي تخبلت وضلت تصيح وتبجي وتعت بايدة..اخر شي كلي مسويلهه عمل بس ربج حميد فاكي..بس مفعولة بعده تحتاج وكت وترجع مثل كبل..انطاني مي قريت علي جم سورة هو حددلياهم وهو هم قرا علي وكل يوم الفجر اكعد اشربهه منه والباقي اسحبهه بي بس لازم الماي يطيح بالطشت ميصير يطيح بالكع وهو سبق ومقروء علي
رائد : وشلون صارت هسة..
الحجية بابتسامة : تزوجت وحامل..
رائد : وين صاير هذا الشيخ..بعدة موجود..
الحجية : اي بعدة..اسمة الشيخ منصور..معروف بمنطقة ... بس توصل للمنطقة يدلوك علي ومحيقصر..
رائد : ان شاء الله..الله دزلياج حرت وين اخذهه..جان املي بالناظور بلكت يطلع شي يتعالج..الحمدلله على كل حال.. سلم عليهه وكام..اخذني ورجعنا للبيت..

كعدنا بالصالة اجو يمه يريدون يعرفون شصار ووين رحنا حجالهم شكالت المرة وانه بس اسمع واصفن..كال اليوم الفجر اطلع لبغداد..
ام رائد : وين يمة مصارلك جم يوم من رجعت..
رائد : والله ببالي اروح هسة بس الدنيا مغرب..باجر اخذهه واروح..اشوف عمي يجي..
ام رائد : اي لازم تاخذة ميصير..خابرة شوفة يجي
رائد : ميخالف..بس لازم امدد الاجازة بعد..باجر تخلص المفروض اروح التحق..
ام رائد : من اول ما سجلت بالكلية العسكرية اكلك يمه هاي الشغلة تعب وخوف وخطر..بس انه احجي وانه اسمع..
رائد : لوما هذا الشغل وشغل المحلات چا مو هذا حالنا چا كاعدين بيت ايجار وحال الضيم حالنا
ام رائد : يعني انت تخاطر بروحك لخاطر الفلس..عمي ماريد هج فلوس والله..
رائد  : يمة هسة اليوم البارحة انه بالجيش..هاهية تعودت وانتي تعودتي..شكو بعد..هذا مو موضوعنا..

مد ايدة طلع التلفون وخابر على ابوي..گله انه بالبيت انتظرك سدة والكل جان ملتهي لو يتفرجون ع التلفزيون لو يسولفون تقرب مني واخذ ايدي..ع الدرج وحسيت گلبي صار بمعدتي مابي نبضات..كمت اشهك اريد يجيني هوى..كمشت ايدة ودموعي بعيوني..دنج شوي شافني ممرتاحة..شالني وصعدني فوك..كعد ع الحافة مالت الجرباية ونزعني الملابس والشال..لبسني ملابس بيت وخلاني على رجله..
رائد : حضل احاول لحد اخر لحظة..مستعد اتحملج بكلشي بيج وما امل..متت يالله حصلتج ما اضيعج بسهولة
عاينت بعيونه وحطيت راسي على چتفه بدون ما اجاوب.. شوي واجت طفلة صغيرة تحجي وياه..
- عمو اجة رجال يشوفك..
رائد : يلة جاي..
عاين علي وباسني بخدي..اخذني من ايدي ونزلنا جوة

ابوي اول ما شافني اجة باسني من راسي وكعدني يمه..كامو يحجون گاله اجيك الفجر ونروح..عسى ولعل يطلع صدك.. ضل يمنة للعشه..تعشة هو ورائد والباقين وانه كاعدة يم رائد مامديت ايدي للاكل..بس خلصنا راح ابوي وهو طلع وياه اجت يمي اخلاص..
اخلاص : هاي هيج وصلت بيج..تسوين روحج بيج جن بس خاطر تهجولين باخوي من البصرة لبغداد لخاطر هلخلقة.. شنو انتي والله بلوة..
اجت بنية لخ كالت اسمهه زينب..حاجتهه واخذتهه مني
زينب : لج عوفي البنية بحالهه خطية..شنو مرة ابوهه انتي وهيج شاده وياهه..حرام عليج..
اخلاص بصياح : بعد بس تجين انتييي تعلميني الحرام والحلال مووو..ما اريد احجي هسة واخبلهه بالزايد..

ام رائد : شكو يمة شتحجين..
اخلاص : هيج يمة مو يمج..السالفة بيني وبين رائد وهاي المخبلة..خنشوف وين حيصفى بيهه الدهر وره ما تعرف
ام رائد : شبيج بابا..شنو شتعرف غير نفتهم..
دتحجي اخلاص جان يطب رائد صاح بيهه وخزرهه.. راحت ختلت وره امهه..
رائد : اذا شفتج فاكة حلكج اطيح حظج..يلههه صعدي فوك ولتشوفيني شكلج..بعدهه يالله توهه طبت للبيت واستلمتيهه من تبقى شتسوين بيهه..
اخلاص : شنو نسيت روحك شمسوي..
رائد : مامسوي شي حرام..طلعي فوك وديربالج تطلع كلمة وحدة..لتدخلين..حياتي وانه حر بيهه واعرف شسوي..
ام رائد : شنو انه خراعة خضرة ما تحجيلي..
رائد : كلشي بوكته حلو يمة..

اندار علي..اخذني من ايدي وعاف الهوسة كلهه وراه وصعدنا فوك..مددني ع الجرباية وراح يغير ملابسه..صفنت ع الكنتور اليوم مبجيت من أذن المغرب..بس احس صوت يم اذاني يحجي مخربط..طفى الاضوية واجه تمدد يمي..حضني ويمسد بشعري..
رائد : نامي موزين عليج باباتي..
غمضت عيوني لدقايق..وراهه صوت الحجية هي وتحاجي رائد تگله اخذهه للشيخ صار براسي..احس نار بجسمي وحرگة بزردومي اكلتني اكل..كمت اتخيل وعيوني مغمضتهن وادفع بي..اتخيلة واحد لابس اسود وكصير كامشني من رگبتي ويدفع بية للكع..والدنيا ظلمة صوت ماعندي خاطر اصيح..ضليت ادفع بي وابجي دموعي مسكتت..اخر شي صارت نسمة هوى عالية وانشال الغطى الاسود..من طار شفت شكلة..شهكت شهكة احس زردومي انشحط..

فزيت على ايده توخر ايدي من رگبتي..فتحت عيوني تخيلته هو نفسه رائد ..كمت ابجي بالزايد وادفع بي..اريد اخنكه واموته هو خانكني ميخليني احجي ولا يطلع صوتي اخر شي هديت ايدة بس حيلي مهدود للاخير..كام شغل الضوة واجة يمي يمسح بشعري ويقرة على راسي..
رائد : لو اعرف منو سوالج هيج.. تمرمرت بنيتي.. كومي يابة كومي اغسل وجهج..
كومني ولف ايدي على ظهره وايدة على چتفي..اخذني للحمام غسلي وجهي وايدي بمي بارد شوي ها صحيت..

معرفت شصار الا ورة دقايق..احس جنت فاقدة الوعي وهسة استعدلت اخذ ايدي اللخ يغسلهه..انه ذبيت روحي بحضنه واعصر بفانيلته..جاب خاولي نشف ايدي ووجهي.. شالني ورحنة للغرفة وانه بعدني كامشته من فانيلته وابجي..مددني هو وحاضني ماعافني..ضل يهدي بيه لحدما غفيت..بس نمت منتهية وروحي بخشمي صايرة..كلشي يصير مو انه اسوي

شوكت يرجع صوتي..احس اذا رجعلي صوتي حضل اصيح لحدما اتعب وانام..جمرة بزردومي تحركني حرك بكل مرة اريد احجي شي ويخوني صوتي..فزيت على ايد رائد يسحبهه من جوه راسي..لا اراديا كمشته من ايده..
رائد بهمس : اروح اسبح..اريد اصحصح وراية طريق
دنج باسني من ايدي وراح..بقيت بالفراش بين ما اجة حاط خاولي ع راسة ولابس بنطرون وفانيلة..راح ع الكنتور طلع ملابس ع صفحة وبلوز وقمصلة جلد..لبسهن وراح ع الميزتواليت يرتب بشعرة رجعة ليورة..اجة يمي كعدني واخذني للحمام غسل وجهي ورطب شعري ورجعنة للغرفة..

جاب الملابس لبسنياهن وهو مخليني ع رجله وراسي على جتفة كمل وراح جاب مشط..مشطلي شعري ولبسني الشال ونزلنا امه جانت كاعدة ومحضره الريوك..كعد وكعدني يمه ما اكلت بس زيتونة جان تندك الباب..راح فتحهه اجة ابوي..باسني ويعاينلي بنظرات مليانة حزن..احسة يكول هاي اخر امل عندي كملنة وطلعنا..صعدت ليورة وهم ليكدام..

رائد : عمي نرجع بنفس اليوم ماريد ابات عد احد..
محيي : اي انه هم كلت هج..البيت مابي بس البنات..
رائد : هاهية..
هلمرة مانمت..بس الطريق كلة اتخيل لو اسمع صوت بس ناصي..اتخيل حفرة جدام السياره واريد احجي اگله ديربالك بعد نفوت عادي يطلع ماكو شي..لو اتخيل ذاك الخيال الاسود كاعد بسدي وايدي ورجلي مربطات ما اكدر اتحرك وادفعه..بنص الطريق صنطة ماكو بس صوت السيارة واحد دك هورن قوي..
محيي : هااا يمعووود..شبيك منايم..
رائد : ما انتبهت ماشفته شلون زرك من جدامي..
محيي : انزل انه اكمل..ماضل شي لبغداد..
نزلو ثنينهم واحد كعد بمكان الثاني..رائد اول ما صعد تچه راسه ع الكشن ونام..انه اعاينلة شلون نايم وشواربه ولحيته طاگة مامزينها لحدما وصلنا للسيطرة جان يوكفونا..الضابط كال منكدر ندخل محافظات اليوم..ابوي گله كول يالله..صار سبع ساعات بالطريق بعدين ترجعونا..وشغلة مستعجلة

رائد كعد حاجاه وطلعله الباج..كلة فوت وتعذرني ما ادري بيكم مناك..بس طبينا نمت بعد مادري شصار..بس كعدت على صوته يكعدني..فزيت مرعوبة..صار جدامي الخيال الاسود..كمت ابجي..لف ايده على چتفي وسحبني للباب ابوي جان واكف يمة..كامو يهدون بية..شوي وراح مني..
محيي : نزلي بوية نزلي..خنشوف تاليتهه وين هاي..
كمشني من جتفي وتمشينا بمنطقة بيهه بساتين وكل مسافة جم متر يجي بيت..مشينا تقرب العشر دقايق جان يصيرون جهال جدامة ديلعبون..رائد صاح واحد منهم
رائد : عمو بيت الشيخ منصور وين..
- : البيت الابيض ع اليمنى..وأشرلة ع البيت.. تمشينا لعندة..تقدم ابوي دك الباب..طلعتلة طفلة صغيرة..كللهه جدو وين..ديحجي جان يجي رجال جبير بالعمر..اكبر من ابوي سلمو علي وطببنة جوة..

بيته جبير كلش..اغلبة حديقة وكراج دخلنا لصالة مفروش بيهه مدات من اليمنى واليسرى كعدنة على وحده منهن وهو كعد جدامنة..انه بس اعاين..المنظر طبع ببالي بس اليشوفني يحس ممركزة..
الشيخ : هلة بيكم والله..البيت بيتكم..بشنو تأمرون..
محيي : الله يسلمك حجي متقصر..بس والله جايك من وحدة مرة دلتني عليك..هاي بنتي..وكعد يشرحلة حالتي من يوم خطوبتي لحد اللحظة الاجينة بيهه هنا..
الشيخ : اي مبين مسويلهه عمل..شسمج..
رائد : متكدر تحجي شيخنا..من كامت تستفرغ اول يوم بعد سكتت نهائي..
الشيخ : ماريد اربككم..بس حسب السمعتة وخصوصا هي متحجي معناهه العمل بالبيت وبعده ما مفكوك لهلسبب خسرت صوتهه..بس اذا فكيتة يرجعلهه طبيعي..
محيي : شلون بالبيت..انه محد يطب ويطلع ببيتي..
الشيخ : الله اعلم..اكيد شخص منكم وبيكم..
رائد : بس المرة الكلتلي عليك ماكالت بتهه خسرت صوتهه يعني هو كل عمل يخلي الصوت يروح..

الشيخ : لا طبعا..السحر من اقذر الاعمال والعياذ بالله.. والي مسويلهيا يخليهه تحس روحهه مربطة وتريد تحجي شدتشوف بس متكدر فتكوم تبجي على فجأة..مو هيج..
عاين علي..انه بس حركت راسي يعني اي..
الشيخ : شغلتهه يمي..اليوم انطيك مي تشربه وي كل اذان بس بالبداية حقره علي كدامهه سورة طه ويس..تبقى سورة البقرة لازم بغرفتهه..هي متزوجة..
رائد : اي..
الشيخ : هي جانت ببيت اهلهه من تمرضت غير..
رائد : اي شيخ..
الشيخ : سورة البقرة تنقري بغرفتهه ببيت اهلهه بس مو كدامهه وللاحتياط اقراهه بغرفتهه هي ورجلهه بس كدامهه لمدة يومين..بما انه هي طويلة فاول يوم تقرة جزء ونص والباقي ع ثاني يوم..بالنسبة لصوتهه ميرجع الا افك العمل..
محيي : يعني لازم اجيك من الكاه..
الشيخ : اي..منين انتو..
محيي : من البصرة..يعني الدرب كلش بعيد وانه اليوم لوما نسيبي مقدم بالجيش چا ما فوتونا..
الشيخ : حظكم عدل بالله..باجر اني جاي للبصرة عند كرايبي ضال اسبوع اذا لكيتو العمل اجيكم للبيت وافكة..

صاح على واحد مدري شسماه گال اله جيبلي مي من ام رضا هي تعرفهن..كام نفض غترته وراح ع البوفية اخذ قرآن وباسة كام يقرة سورة الفاتحة والمعوذات واية الكرسي..من قره اية الكرسي تخبلت..كمت ابجي وادفع بي وابوي يريد يكمشني ماخليته..كمت اشيل بروحي واطبهه..احس روحي صارت بزردومي فرفحت..رائد وابوي بالكوة كمشوني لحدما اجة الولد انطاه المي وراح..ضل يقرة..انه اريد احجي.. اريد اكلة يسكت..احس نار تحرك بية..اعاين لرائد اريده يهد ايدي ..اريد اروح ع الشيخ اخنكة..تخيلته الخيال الاسود يريد يخنكني..وي كل كلمة يحجي اختنك بالزايد..محد حجة شي بس كامشيني..احس طاقة الدنيا كلهه انحطت بية..بين ما كمل انه دموعي خلصت ووجهي صار نار وجسمي كلة حار احس بي..ايدي خدرت هلكد ما كمشوني..

خلص وكال صدق الله العظيم وسد القرآن..انه استفرغت بدون ما ادري وطحت على رائد والدم على ايدي وحلكي..
محيي : تعذرني شيخنا حگك علي..
الشيخ : لا لا..خطية متدري بروحهه..اجتني الاسوء منهه وهسة الحمدلله صارو زينين..تعاال كاظم..شيل المدة اغسلهه زين والدم الحيطلع منهه لتخلي طفل يمشي علي
اجة اخذهه وراح..الشيخ گال الحمام اول متطلع من الباب جدامك..كومني ورحنا للحمام..غسلي ايدي وحلكي انه منتهية كبل شوي احس اكدر اصير انسانة طبيعية يعني امشي واكمش شغلة..هو بس سكت جان يروح الحيل كلة صرت خركة فد دور..رائد ماحجة شي بس عاين علي انه دقيقة اعاينله وعشرة مغمضه..اخذني للصالة كعدني وهو كعد بسدي..خليت راسي على جتفة واسمعهم..
الشيخ : الصار يأكد ان السحر موجود بالبيت..حاولو تلكوه بسرعة..حالتهه هسة ولا شي مقابل حالتهه بعد اسبوع

محيي : ان شاء الله..حسوي كلشي خاطر الكاه..بس اذا لكيتة شلون اطلعة مو ميصير اكمشة..
الشيخ : اي طبعا ميصير..انت بس خابرني اني اعرف شتصرف عدهه العافية ان شاء الله..
ضلو يحجون لحدما غفيت..كعدت لكيت روحي بالسيارة ورائد ديسوق ويحجي وي ابوي..ضليت الطريق كلة ساكتة حتى ماحسوا علي من كعدت..لحدما وصلنة للسيطرة مالت البصرة اندار علي شافني كاعدة..
رائد : اجيبلج شي تاكلي..
اشرتله لا..رجعت نمت..فزيت على ايده يخليني ع الجرباية حيلي مهدود ماسويتلة شي درت وجهي..هو غطاني وسد الضوة وراح مدري وين..غمضت عيوني ونمت.. كعدت المغرب عركانة وراسي يوجعني وجع مو طبيعي..اصوات الدنيا كلهه براسي واذاني..خليت ايدي على اذاني اريد الصوت يروح دوخني..طب شافني كاعدة..سد الباب واجة يمي اخذ ادية على كيفة ونزعني الشال..شوي وكام يأذن..

كمت اشرله ع الشباج وابجي وايدي على اذني..الاذان يحركني حرك من فوك ليجوة..انذب بفرن هلكد ما اختنك واحس الدنيا كلهه ظلمة وحارة..كمش ادية ويهدي بية..
رائد : ماضل شي يابة صبرچ علي..
خلص الاذان وسكتت..بس احس حرگة من معدتي وبطني كلهه وزردومي..كام للميز جان قرآن وكعد ع الكرسي مالت الميزتواليت..ويقرة بسورة البقرة وايدة ع البطل البي مي.. كمت ابجي تخبلت..فاتحة حلكي مثل واحد يصيح بس انه صوت ماعندي..رحت يمة كمشتة من بلوزة اريد اخنكة موتني بصوتة هو ويقرة..كال استغفر الله وكمشني من خصري كعدني على رجلة وحط القرآن ع الميز وايدة ع البطل واللخ كامشني بيهه طلعت روحي بين ما خلصت..

عضيته وخرمشته برگبته واذانه وايده.. جريت شعره حرت شسوي بس اريدة يسكت وهو مستمر ماسكت اخر شي كمل وسدة يلة سكتت خليت راسي على جتفة وابجي..كام يمسح بشعري هو ويهمس بصوت ناصي مادري شيكول..صب مي بكلاص من البطل الجان يقرة علي الشيخ..باسني من خدي..
رائد : شربي كله..حتلو متريدين شربي على كيفج..
ايدي جانت ترجف بشكل..ردت اكمش الكلاص وخفت يطيح من ايدي وينكسر..هو شربنياه شوي شوي لحدما خلص اخذني لحضنه بدون ميحجي..وهاي هيج خلص باقي اليوم من اذن العشة شربني بعد كلاص..ونزلني تعشينا..انه كاعدة بسده ماحجي شي..ياكل لكمة هو والثانية ينطينياهه يسويهه صغيرة كلش ويوكلنياهه على كيفة..حجت وحدة ماعرفهه

- : شو رگبتك مجلغة وايدك ليش..
اخلاص : اكو غير هاي المجلوبة سوت بي هيج..
صاح بيهه خرسهه : بابا شبيج وياهه..شعليج منهه.. عوفيهه شتسوي تسوي انه قابل انتي شكو..بعدين هي تعبانة ومريضة ماعليهه حرج..ماريد اضل اعيد بهالحچي هذا كلساع تعبت..كمت اكره الكعدة وياج..
اخلاص : شوفي يمة..شوفي شلون يدافعلهه عبالك بنتة.. انه اختة ميدافعلي هج..
ام رائد : يمة انتي شعندج خاطر يدافعلج..
الكل سكت..هو كمل وكام..كومني وياه وصعدنا فوك.. تمدد ومددني وياه ضل وياي كاعد ما اجاني نوم..بس اعاينلة لو اصفن ع السكف لو الحايط والكنتور..هو يغفى ويكعد يشوفني كاعدة فيبقى وياي لحد بالوحدة فتحت ايدة وايدي بعدهه ترجف وخليت راسي بحضنة..هو فز جان غافي حاوطني من جتفي بايد وايدة اللخ من خصري ونمنا

ثاني يوم نفس الحالة..اخلاص عافتني بعد بس امه ضلت تحجي وياه ع سالفة اخلاص ذاك اليوم من كالت نسيت روحك شمسوي..انه حايرة بضيمي حتى مجربت ابجي من حجيهه هم العصر كام يقرة الباقي من سورة البقرة وانه تخيلت اكثر من اول مرة..بين ما خلص ماكو شي ما طيحته بالكع كل العطور والمشاطة والجرجف والبطانية..خلص وكام انطاني كلاص مي وكعدني ع الكرسي كعد يرتب بالغرفة..اندار شافني كملت..اخذه مني وباسني من كصتي وخدي واخذني للفراش..حضني وضل يهدي بية لحدما غفى هو وانه بعدني كاعدة..صفنت على رگبته وايده شلون مجلغة..بس مو انه الاسوي هيج والله..فز شافني كاعدة.. همس يم اذني..
رائد : نامي بنيتي..حيلج انهد ارتاحي..
حضني بايده ورجله وباسني بخدي..بقيت شوي وغفيت

كعدني وي اذان المغرب انطاني كلاص مي..شربته ورجعت نمت هلكد ما احس بالتعب..احس حجار مربط بادية ورجلية بحيث خطوة وحده احسهه الف خطوة..من غير الخيال الاسود الخانكني طول الوكت..كعدت على اذان العشة شفتة ديصلي كمل وكمت كعدت بسده وكامشة ايد.. عاينلي وابتسم.. لف ايدة على ظهري وحضني..ثالث يوم ابوي خابر على رائد گله جيبهه وتعال للبيت.. انه جنت كاعدة بالغرفة وداشرب المي.. هذا اخر كلاص ورة ما اذن الظهر شربتة..
رائد : يلة خلصي بالعجل..ابوج خابرني حنروحلة..
كملتة ومديت ايدي اجة اخذه مني وكومني..لبسني الصاية والشال انه لبستة..كمت اكدر اتحرك وحدي..بس مو اقل من دقايق واتعب تعب فضيع..من يأذن ما ابجي بس نفس احساسي القديم..نار بجسمي تاكلني اكل..اخذني من ايدي ونزلنا..اخلاص جانت تتعارك وي امهه..

ام رائد : لج انتي شلون تحجين هشكل على اخوج.. انتي شمعرفج بي مسوي هيج..
اخلاص : يمة هو كلي والله هو كال..شنو اجذب عليج.. هسة يجي يوم يجيبهه ويجي وتكولين كالت اخلاص..
ام رائد : چا ودنوة شنو..
اخلاص : انه شمعرفني..متسألينة اله..هيانة وراج..
امة اندارت علي تحاجي بعصبية ودمهه محروك..
ام رائد : ها عيني زين عرفنا هسه..بله شوكت تزوجتهه.. وانه شنو..انه مو امك..ليش ماكتلي..ليش حركت گلبي..
رائد : شكو يمة شبيج..
ام رائد : هااا تسوي روحك متدري..    اجت يمة كمشته من بلوزة وعيونهه غادية دم من العصبية..متزوج مرة خالد..
رائد : منو گلج..
ام رائد : هسة انت عفت كل هذا واجيت تكلي منو گلج.. اختك الشفية كلتلي..مو حراااام عليك..چا ودنوة شنو مو خطية شلون تحبهه وانت متزوج..
رائد : اخلاااااص..انه شكتلج..مو كتلج لاتحچين.. هسة زين هيج ..شنو ماكو عقل بالراس..ماكوووو.. هاي كلهه دارت علي يمة من ارجع افهمج كلشي..

ام رائد : لا لا..لا تفهمني ولا افهمك..شلون تزوج مرة صديقك شنو متحس انت..راح عليهه جرهه من دشداشتهه يحجي بعصبية ويصيح ويغلط خبص البيت..
اخلاص : يلة شدعوه هج تسوي بية لخاطر هاي الكح... هي لو بيهه خير ميتبرون منهه اهلهه..وهو هم..
رائد : لج اذا فكيتي حلكج بعد اموتج..خشي جوه..    ودفعهه للصالة..هي كامت تبجي وعافته وراحت..
ام رائد : ماعندي حجاية وياك بعد..
رائد : انه ادري بروحي مسوي الصح..
ام رائد : جا متحجي شكو اذا مسوي الصح..
رائد : مامجبور ابرر..الوكت مو مناسب هسة..اعرف شوكت احجي..السالفة مو مثل ما متصوريهه..كافي قفلو الموضوع انه بيا حال وهاي جاية تنكر براسي..
خالة : خالو اذا هذا الموضوع مو مهم لعد شنو المهم..

رائد : يخالي انه اعرف شتصرف..محسب حساب الف خطوة ليجدام..بس اخلاص ماكدرت تكمش لسانهه الزفت..
ام رائد : نفس الطبع كبل ٣٠ سنة..      عافهه بدون ميجاوب..ضلت تحجي علي وتصيح تريدة يحجي..هو يسمعهه ويسكت..انه من سمعت الحجي تخبلت بالزايد..صح اسمع اصوات واشوف خيالات بس احس بكلشي واسمعة زين خاصة وره ما كمت اشرب المي..جنت كاعدة ع الدرج ومتجية راسي ع المحجر..كمت ابجي وايدي وشفايفي ترجف..اندار شافني
رائد : هسه زين هيج..زييين..اااخ منج اخلاص والله ما ماد ايدي على بنية ولا راح امدها..جان كسرتج تكسر..
اجة يمي يريد يسكتني..كمت ادفع بي وابجي بحركة.. ماريدة يكمشني بعد..فرفحت روحي فوك ما هي مفرفحة..تمنيت الحجي جذب وارتاح..بس هو كال بعدين افهمكم كلشي يعني صدك..ضليت ادفع بي وهو يحاول يهديني..

محد اجة اخذني من جدامة كلهه صافنة علي..اخر شي تعبت بس ادفع بي ودموعي تصب..كمت بية مابية كمشت المحجر وصعدت فوك بالباية الاخيرة عثرت وطحت على حلكي..كام يذب دم ويوجعني..بس هلكد ما حيلي مهدود مكدرت اخلي ايدي علي
رائد : الله الله..كومي ليش هشكل تسوين بروحج..
اجه كومني اخذني للحمام غسل ايدي وحلكي..طبينا للغرفة كعد هو ع الحافة مالت الجرباية وكعدني على رجلة..احس نار بية فوك النار القديمة..اريد اصيح واطلع الحرگة كلهه..
رائد : يولي والله مو هيج السالفة..ليش ماادري بيج تعبانة ومو لازم ينحجي هلحجي جدامج..

كمت من رجله رحت للجرباية..تمددت وايدي على راسي.. الصار رجعني للصفر..جنت احس بتغيير ورة ما كمت اشرب ولو صغير بس هسة حتى هذا التغيير الصغير راح..كام هو طلع تلفونه وخابر مدري منو..
رائد : كتله ما اكدر اجي اليوم..بلكت باجر..لكيته لا.. زين منو يكول الشيخ بعدة بالبصرة..خاف رجع..اي انطيتك الرقم بورقة صغيرة..ماشي عود خابرة من تلكاه..
سدة وراح مدري وين..ضليت ابجي وادفر بالفراش..كمت للميزتواليت ذبيت العطور كلهه بالكع ودموعي بعيوني ما اشوف بس غواش..

اجت اخلاص وواحد رجال كال ابن خالته على صوت العطور تتكسر..
اخلاص : تعااال رائد شوف هاي المخبلة كسرت الغرفة
شمرت المعطر يم رجلهه..كامت تصيح تريد تجي تضربني جان يجي..صاح بيهه..
رائد : تحملي نتيجة افعالج..يلة روحي من وجهي
جنت كامشة بيدي علبة مال مواسة واريد اطشرهه جان يجي اخذها مني وصاح بيهم روحووو..سد الباب واخذني لحضنه يريد يهدي بس انه منتهية خلص اريد اگله اكرهك ماريدك بعد كمت ادفع بي واخرمش بظهرة..
رائد : حگج والله..بس مو هيج السالفة بس انطيني مجال افهمج كلشي وداعة عيونج..احبج وماحب غيرج ولا تدني نفسي على وحدة..
عاينت بعيونه وزدت بالبجي..اريد اكلة ليش تزوجتهه اذا تحبني..ضل كامشني يهدي بية وانه ابجي مسكتت

لحدما بطني كامت توجعني وحرگة مو طبيعية بزردومي..كمت اشهك اريدهه تروح خنكتني..كمشتة من ايدة اريد ياخذني للحمام رجلية متعيني بعد..احس حستفرغ..كمت أشرلة ع الباب
رائد : تروحين للحمام ؟..
حركت راسي يعني اي..كمشني من ظهري واخذني اول ما وصلت الحمام كمت استفرغ دم احمر طوخ لونه مو طبيعي وبي سواد..صار على ايدي وملابسي وحلكي..ضليت اشهك واستفرغ متت من الوجع والحرگة.. كامشني ويوخر بشعري..بقيت هواي الكع صارت مسبح..خلص دمي.. صار صوت يم الباب.. ايع وهاي شنو اللعبان نفس ..اندار يحاجيهم وبعدة كامشني
رائد : لحد يدخل..انه موجود واتحملهه..

رجع اندارلي واخذني للمغسلة غسل حلكي ووجهي وايدي شالني واخذني للغرفة..حطني ع الجرباية ومدري وين راح انه كاعدة وحتى حيل للبجي ماعندي..جان تجي اخلاص..
اخلاص : هسة زين هيج حتنقليلنا السحر مالج
دتحجي جان يجي كمشهه من دشداشتهه وطلعهه برة ماحاجاهه بس خزرهه وراحت..دنج شال الكزاز مالت العطور خبطت الريحة..انه صافنة واعاين لحركاتة لحدما خلص راح للحمام غسل ايدة واجة..سد الباب وقفلهه..راح للكنتور طلعلي ملابس واجة يمي..كومني وهو كعد ع الحافة مالت الجرباية نزعني البلوز والبجامة لبسني غيرهم صار عليهن دم..خلص وحط الملابس على صفحة..طفى الضوة واجة حضني وتمددنة ع الجرباية..ما اسمع بس صوت انفاسة..

رائد : من صحتي على صحتج..تكطع گلبي من شفتج والله حسوي كلشي بس تصيرين زينة..
شلت راسي واخذت ايده البيهه الحلقة..حطيت خدي عليهه وابجي بحرگة..مامصدكة السمعته..جا ليش اخذني اذا متزوج شنو اخلص من عقيل اجي لرائد..عدل كعدته واخذ ايدي باسهه وباسني من راسي..
رائد : بس كافي بجي..والله ماصاير شي..يولي احبج وروح ابوي..كافي دموعج خلصت..
لف ايده على ظهري وخصري ويهدي بية..صرت شكدوتني بحضنة من الضعف..ضليت ابجي اريد احجي تعبت بس ساكتة نار مشتغلة بية..شوي وغفيت..كعدت المغرب على صوته يخابر ويفتر بالغرفة..
رائد : صدك تحجي..وهسة وينه الشيخ..يلة بس تبدل واجيبهه واجي..ما اطول..

سده واجه يمي..كمش ايدي وكومني للحمام غسل وجهي ورجعنة للغرفة..لبسني الصاية وانه اعاينلة اريد اعرف شديصير..كمشته من ايده هو وديلبسني الشال..
رائد : حنروح لبيتكم..حيخلص كلشي وترتاحين..
مفهمت شديحجي..اخذني من ايدي ونزلنا جوة..جانو كاعدين بالصالة التصير ع المنور مالت الدرج..
خال رائد : على وين المغرب..
رائد  : لبيت عمي..ما اطول..     عافهم وطلعنا..صعدت وهو هم ورحنا لبيت ابوي..جانت سيارة واكفة بالباب مو سيارة ابوي ماعرف اول مرة اشوفهه..نزلنا ورائد كامشني من ظهري بس كمت اضوج منة..اريد يرجعلي صوتي عندي حجي هواي اول ما طبيت صارت شذى بوجهي..هلمرة نظرتهه تغيرت.. جانت تعاينلي بحقد وكره..نظراتهه اليوم خايفة ومتوترة..عفتهه وانداريت على ابوي..اخذني وصعدنة فوك لغرفتي

مكلوبة كلاب الجرباية بالممر والزولية شايليهه هي والبردة حتى الكنتور وملابسي مطشرة بالكع..شفت الشيخ الرحنالة كاعد ع الكرسي بالغرفة وبيدة مصحف..ضلت اتلفت بالغرفة.. انتبهت على جيس اسود بالكع محطوط يم الكنتور..كمت ابجي من شفتة واريد اصيح..انداريت على رائد حطيت راسي بحضنه واعصر بتشيرته وابجي..ماريد اشوفة..تخيلته الرجال الاسود اليجي يخنكني دائما..
الشيخ : الزمهه زين ابني..دقايق مو اكثر..
كمشني من ايدي وايده لافهه على ظهري ومقربني لصدره.. كمش الجيس كام يفتح بي ويقرة قرآن بصوت عالي ويستغفر ويسبح..متت انتهيت..كمت ابجي وادفع بي اريده يعوفني اريد اروحلة اخنكه مثل ما ديخنكني..وي كل حركة اسويهه رائد يكمشني اقوى..

كمت ادفر واجلغ بخدي ورگبتي حتى الشال ذبيته..بس اعاينله شديطلع من الجيس.. طلع قطعة ملابس مالتي داخلية..وشعري من اسبح يطيح بالحمام منه اخر فترة كمت ما اكل كبل لا تصير الخطوبة..بعد لعابة صغيرة عليهه كتابات وشعرهه منتف وملطخة بدم بس ريحة الدم طلعت من طلعهه..عبالك جديد..طلع قطعة جلد بس مو مال حيوان ناكلة..ماعرف شلونه..لونه وردي ومحترك من صفحة اخر شي اوراق صغيرة صغيرة كلش..وي كل شغلة يطلعهه ازيد بالبجي وادفع بي اريده يعوفني..روحي توصل للسما وترد بية..اختنكت اريدة يخلص ويسكت تعبت..طلعهن كلهن وسكت..انه مثل شي داس على بطني بقوة..كمت استفرغ حييل ماعت روحي..دم اسود واحمر طوخ..حتى صار على ابوي شوي وايدي انملت..

كمت اكح واغص..اريد اتنفس تعبت من الخنكة..كل دقيقة احسبهه بساعة..كمل وكام اجة يمي يقرة على راسي.. شوي ارتاحيت..انفاسي تعدلت كمت اجر نفس مثل الاوادم.. بس گلبي يدك سريع..ضل يقرة على راسي وانه ايدي ترجف خلص وسألني..
الشيخ : شسمج بنتي..
عاينت علي وعيوني ذابلة..دنوة..حطيت راسي على چتفه وغمضت.. بس اسمعهم يحجون..
الشيخ : لتعبوهه بالحجي حنجرتهه تلتهب فاخذوهه للطبيب احسن علمود متتأذى..
محيي : زين يحتاج نجيبلكياهه بعد..
الشيخ : لا ميحتاج..بس تره يحتاجلهه فتره يله ترجع طبيعية الصارلهه مو هين..وهذا السحر قذر الى درجة..
رائد : يعني شيصيرلهه..

الشيخ : انت وكلنا نشوفهه طبيعية..بس هي حتتعب وتحس نفسهه مصخنة..وهي مسويلهيا بجلد الخنزير..الله اعلم منين جايبي وهاي اللعابة مكتوب عليهه باماكن هي جانت تأذيهه مثلا رگبتهه فتكوم تجلغ بيهه من تسمع الاذان لو شعرهه تكطعه
محيي : تنطيهه شي تشربة تسبح بي..
الشيخ : اي اكيد شلون لعد..جايب وياي لأن عرفت حتلكوه فكلت ليش اعنيهم لبغداد..الغرفة لازم تنمسح وبعد هاهية مابيهه شي..الجيس حاخذه واحركة ميصير اذبة..ان شاء الله عدهه العافية وتتحسن للافضل..
ابوي تشكر منه ورائد همات وانطوه المقسوم..نزلو ابوي والشيخ بعدين انه وياه..دخلني للحمام غسلي حلكي وايدي وعدلي الشال بعدين كعدنا بالصالة..

ضلو يحجون شوي جان تجي شذى ورزان..
شذى : ها شكال الشيخ..
محيي : كال حتصير زينة بس يرادلهه وكت..حسبي الله على السوة بيهه هشكل..
عاينتلي درت وجهي عنهه..شكد اذتني..بقينة للعشة.. كعدت وياهم ع السفرة..مديت ايدي للاكل مجانت ترجف والاكل احس بطعمة اكلت بس مو هواي..حجوا ع العقد..ابوي گله اذا باجر مابيهه شي نسويهه على الخميس (وره يومين) بين ما ترتاح هي بعدين سألني ابقى هنا لو اروح..
دنوة بصوت مبحوح : اي ابقى..    رائد ضل يعاينلي بنظرات يريد اجي وياه..درت وجهي عنه..اروح من اعقد محكمة يله بقى يمنه شوي بعدين راح..طلعت وياه كمش ايدي..

رائد : تعودت احضنج وانام..شينيمني اليوم..
وخرت ايده : نام بحضنهه مو متزوج..    شو هذا بمكان ما يضوج كام يضحك..
رائد : ظالمتني والله..احبج..
دنوة : هي تحبك انه شكو..
رائد : اهو عاد لتضلين صارعتني بيهه..يابة والله ماعندي شي وياهه..بعدين احجيلج وافهمج كلشي..براهه تجيني انتي تكليلي رائد ظلمتك..
مجاوبتن..بس گلبي يكول كلامه صدك..مع ذلك ما اكدر اتحكم بشعوري..غيرانة احس النار تاكل بية..باسني بخدي
رائد : الحمدلله ع سلامتج يبعد كل حيلي وعافيتي..
ابتسمت بس معاينت بوجهه..كرص خدي على كيف وراح سديت الباب وطبيت..سمعت صوت مي فوك.. صعدت اشوف شنو بس على كيفي باية باية..جانت شذى دتغسل بغرفتي ومصعده الدشداشه لخشمهه..اندارت شافتني

شذى هي ومتخوصرة : ها ارتاحيتي هسة..ردت اخلص منج مرحتي ويا رجلج شعندج يمي..زين تخليني اغسل دمج
عفتهه مجاوبت..صوتي مبحوح وزردومي يحركني بس احجي رحت لغرفة البنات..كعدت وياهم شوي..
سما : هاي شكد ضعفانة خطية..مادام صرتي زينة لازم تاكلين زين حتى تعوضين الخسرتي..
رزان : تردين الصدك..اني كلش افتقدتج بالبيت تعودت عليج شلون تكعدين الصبح تسوين ريوك وتجين تكعدينا..
ابتسمت : والله نسيت روحي انه..بعد ماتذكرت احد..الله لا يشوفكم الشفتة..ضلو هم يحجون وانه اسمع..تغيير جبير بين ذاك اليوم واليوم..الحركة بمعدتي راحت..والاصوات همات حتى الخيال..بس احسني تعبانة بعدني..صوتي من حجيت ماعرف شوصف فرحتي..

يعني لا اراديا الشيخ من سألني شسمج متوقعت حجاوبة بس كتلة دنوة ورجع صوتي الحمدلله وره ساعه اجه ابوي..كعد يمنا وحاضني..كل شوي يبوسني من راسي..يكلي مامصدك تصيرين زينة..وراهه كال لرزان تفرشلي يمهم..تمددت ومن التعب عفتهم ونمت..اجاني نفس الرجال ابو الاسود بالحلم بس هلمرة جان واكف بعيد ما تقرب يمي..واكو مثل الضوة ابيض داير مدايري ميخلي يتقدملي اخر شي اختفى
ماكعدت للصبح..مافزيت لا الفجر ولا شي الحمدلله..كعدت الصبح غسلت وجهي ورحت للغرفة.. غيرت ملابسي ونزلت الملابس غركانة بيهن هلكد ما ضعفت.. جان وزني سبعة وخمسين..ورة المرضه صار اربعين..يعني ١٧ كيلو باسبوع او عشر ايام..كعدت ع الكرسي بعدني مابية حيل اضل واكفة هواي..ابوي جان بالصالة..

طلع ع صوت الراديو داشغلة واغير القنوات..اجة كعد يمي وباسني من راسي
محيي : هلة ببنتي..والله كل ما اصلي ادعيلج اكول ياربي بعدهه صغيرة متتحمل هج تعب..
ابتسمت وحضنتة..اشتاقيتلك..باسني من خدي وشافني شلون ضعفانة..گلي اليوم اخذج لدكتور اذن وانف وحنجرة علمود صوتج..الظهر اجت سرور ونوارة وخالة ابتسام.. عمي قاسم وفيصل..سرور ممصدكة صرت زينه..
هي وتبجي : لج واخيرا صرتي زينة..متت عليج والله كل مرة اسأل ابوي عنج..يكول بعدهه..
حضنتهه وبستهه..بس محجيت مابيه حيل..حيلي بعدة مهدود بقو يمنة ع الغده وراحو..فرحانة جي كمت اكدر اتعايش وياهم واسمع واجاوب..وين جنت..جنت احس روحي بغرفة ظلمة صغيرة كلش..

شذى عافتني ولا حجت وياي ..وره ما راحو ابوي انطاني بطل المي كلي سبحي بي بس لتخلي يطيح بالكع..اخذتة منه واخذت ملابس وصعدت فوك..سبحت بي ومن خلصت نزلتة وذبيته بالطرمة..سمعته يخابر رائد..
محيي : اي حاخذهه للدكتور..اي بكيفك عكبة هاهية.. ها ماشي..يله اروح ميخالف..
سدة واندار علي..كلي بدلي نروح للدكتور..كتله ماشي وصعدت فوك بدلت ونزلت رحنا للدكتور.. فحصني..
الدكتور : التهاب بسيط بالحبال الصوتية..لازم متحجي هواي وترتاح شكد متكدر..مي دافي ع الريك وعصاير طبيعية وي الادوية ترجع زينة ان شاء الله..
كتب الادوية وانطاهه لابوي..نزلنة للصيدلية اشتراهن ورجعنة للبيت..اول ما طبيت شذى حاجتني..

شذى : اجت عمتج..
عاينت عليهه مستغربة..يا عمة..
شذى : ام رجلج..جابت النيشان..الذهب مالتج يمي ضميته خاف تسألين عنه..
حركت راسي يعني اي وصعدت فوك..شكد جايبة شغلات ملابس بيت وطلعة وفستانين واحذية ومكياج وعطور صفنت عليهن هذا رائد شوكت لحك ينطيهه لامه فلوس وتجيبهن واحد من العطور جان مثل مالتي القديم..مدري ليش ابتسمت خليتهن على صفحة ونزلت جوة..ورة ما تعشينا ابوي انطاني الدوة وكلي اخذي باجر الصبح وره الريوك.. ثاني يوم عادي مصار شي..بالثالث اجت سرور يمي..رتبتلي شعري ومكياج خفيف شوي شوي كمت ارجع لحياتي العادية..

زدت كيلوين.. احس الحياة رجعتلي..الخيال الاسود اختفى تماما من احلامي الاصوات هم..كمت اضبط الصلاة بمواعيدهه ما اترك فرض والحمدلله يمكن جانت الفترة هاي تحذير الي..صوتي تحسن هواي بلش يرجع طبيعي رائد مخابرني بس بيوم عقد المحكمة الصبح..اجت سرور انطتني التلفون اخذته منهه وكتله هله

رائد : هلا بناسي كلهم..حتصيرين يمي يعني..
ابتسمت وكتله بهمس اي واخيرا..
رائد : تره اجي اخذج هسة وماشوفج لاحد..
دنوة : ههههه..لا اصبر..
رائد : صار سبع سنوات صابر..بقت على هاي..
دنوة : احم..وهسة شنو يعني..خلاروح اكمل..
رائد : كملي يابة كملي..حتحركين عشيرتي اليوم..
ابتسمت : تدلل..
رائد : چماله تكلي تدلل..يلة مقبولة..
ضحكت ودعته وسديتة..سرور كملتلي شعري وغيرت ملابسي لبست فستان طويل اسود وكعب فوكاه فروة بيضه..خليت الشال شلون مجان بس المهم تغطى شعري..جنت اخلي مكياج خفيف عيب من راىد..نزلنا جان واكف بالباب ديحاجي ابوي..وعمي قاسم وياهم شافني جان يبتسم ابتسمت ودنجت..شوي وطلعنا..

سمعت ابوي يكول جدي مسافر للديوانية فماكدر يجي.. طبعا رائد بس امة جانت موجوده رحنا للمحكمة سوينا العقد وكلشي كمل..اخر شي بصم هو وانه بصمت هم..ماعرف شوصف فرحتي..نسيت كلشي صارلي بهاي الفترة من شفت كلشي صار رسمي ابوي عيونة دمعت من شافني..حضنته وبسته..لسة اذكر كلماتة من كلي شكد كبرت انه بحيث بنتي تزوجت وحيصير عدهه عائلة لوحدهه ضلت بگلبي هلكلمات قهرتني وفرحتني بنفس الوقت عمي قاسم وسرور باركولنت وراحو..رجعنة للبيت هو جان مخطط نروح لبغداد..فيعني لازم ناخذ ملابس كال نص ساعه واجي..صعدت فوك رتبت الجنطة واجت رزان نزلتهه مابيه حيل اشيلهه..اصلا من الفرحة بعد ماعرف شسوي ضيعت كلشي..

كعدت بالصالة انتظر..ابوي راح يغير ملابسة شوي واجة.. ودع ابوي وباسة من راسة.. حط الجنطة بالسيارة وطلعنا..الطريق كلة هو كامش ايدي ويضحك ويبتسم..يكلي حاير شسوي يعني اخذج واطير بيج لو شلون نص الطريق وكمت اغفي..نمت وهو كعدني..
رائد : كومي لتنامين..البارحة منمت الليل كله اخاف اغفى هسة وتصير عزى..
دنوة : عززه بيش طالبنا..يله هاهيه كعدت..ضحك وكمل الطريق..هو كل الطريق يتغزل بية ويحجيلي حجي حلو.. يدري بيه اخجل وماعرف اجاوب..يحجي بعدين يعاين علي ويضحك..وصلنة لبغداد كتله وين حنروح..
رائد : لفندق بابل..
دنوة : مرتب كلشي..
رائد : بنيتي وحبي من سنين شلون مارتب شلون
ابتسمت وكمل الطريق للفندق..

سوة كلشي وانه رجلي تكسرت من الكعدة..مانزلنا بس مره تغدينا ورجعنا..صعدنا فوك.. حط الغراض بالغرفة وانه كاعده ع الجرباية اراقب حركاته شلون هادئة ورزنة.. فات للحمام والباب مفتوح..ثواني وطلع ينشف ويمسح على إدي.. تقرب مني هو ويبتسم..

يتبـــــــــــع....................

*لتتسرعون بالحكم على رائد واي شخصية اخرى ؛