رواية اسألي عني الليالي الفصل الخمسون 50 - بقلم رقية جاسم

ضحكاتك تلاكي السوالف بالگلب ..
مابينها المر والصعب
والنظره منك لهفة المشتاك من بعيد.. وظنون المحب

قناة التليگرام

حساب الانستگرام

الـبـارت التاسع والاربعون...........

ضلت صافنة وتقره بيهن بعدين نزعت نظراتهه : ما اريد اخوفج..سوي تحليل الدم ومن تجيبي اسويلج سونار.. عندي بعد مراجعتين..سوي التحليل بين ما اكملهن..
دنوة : ماشي..اخذت الاشرطة ونزلت ع المختبر جوه.. سحبتلي دم وكعدت انتظر..تقريب الساعة وطلع..خالة ضلت جوه مابيهه حيل تصعد مرة اللخ..العيادة فرغت بس وحدة باقية..طبيت انطيتهه التحليل..
الدكتورة : شكيت..لأن هاي الادوية تأثيرهه قوي..
دنوة : شلون..
الدكتورة : حبيبتي..انتي اكيد من رحتي لدكتور او دكتورة نفساني حجالج عن اضرار العلاج..
دنوة : لا..بس كالت استمري ع الشريط الشوفتجياه.. علمود متصير عندي مضاعفات وانتكس..
الدكتورة : شلون ميصير هشكل..

احجيلج علميا..العلاج النفسي بكل انواعه يضعف الرغبة.. يقلل من فعالية الخلايا الجنسية والتكاثرية..العمر اله تأثير صحيح وخصوصا انتي بعدج صغيرة..بس لكل فوائد مضار.. نفترض انتي حتتركين العلاج هذا علمود يصير عندج حمل.. لكن انتي ملزمة تستمرين لصحتج أهم..فبهلحالة لازم تتوجهين لدكتورتج او دكتورج هو يعرف شلون يتصرف مع هيج حالة.. هسة تعالي تفضلي ع السدية اسويلج سونار..
كمت تمددت والافكار احسهه تجمدت براسي..
الدكتورة : ماما ليش هيج هاملة نفسج..
دنوة : ليش شصاير..
الدكتورة : عندج بداية اكياس ع المبايض..
دنوة : بس ما حسيت بشي..لا الم لا غيرهه..
الدكتورة : اي لأن بعدهه صغيرة..تكدرين تكومين..

كمت وعدلت ملابسي..هي راحت ع الميز تكتب وتحاجيني
الدكتورة : حاليا ما اكدر اكتبلج شي علمود الحمل.. مثل ما كتلج تتوجهين لدكتورج هو يعرف حالتج وطبيعة جسمج اذا تكدرين بدونه او لا..حكتبلج علاج نوع واحد علمود التكيس.. بس ما اريدج تخافين..بعده ببدايته يتعالج بسرعة..
كتبتهن وانطتني الرايجته..ابتسمت : شكرا..اخذتهه ونزلت جوه بس مهضومة من السمعته..يعني هسة شسوي.. اعوف الدوة علمود الحمل بس منو يكول حتبقى اعصابي ثابتة وما ترجعلي الرجفة والهلوسة..لو اضل مستمرة علي واعوف موضوع الحمل..المشكلة حبقى اخذ هذا العلاج للكبر..مو شهر وشهرين واتركه..بهلحالة شلون حيصير عندي حمل..مثل واحد يريد يعبر بعدين تجي صبة جبيرة ما يكدر يمشي وكف.. ردت ابجي من القهر..يعني ليش هذا حظي..حسبي الله على شذى هي سوتلي سحر خلاني اصير مخبلة رسمي..

لحد ما خسرت اعصابي..صرت من اقل شي اتنرفز واختنك اصير عصبية وانفعل زايد..انه مو يم العصبية ابدد.. حتى كبل جانت سرور من تصير عصبية اضل اعاينلهه بهدوء تكلي شنو انتي ثلج..شجاني هسة تغيرت..ربي لا تعوفني وحدي.. لا تخلي اخلاص تشمت بيه..مقهورة على نفسي وعلى صگر يعني ليش..هج كلهه دفعة وحده..تكيس وصعوبة بالحمل او احتمال ماكو حمل نهائيا..اخذت نفس ونزلت ع الصيدلبة اشتريت الدوة ورحت لخالة..
الحجية : بشري شكالت..
دنوة : بالبيت احجيلج..رجلي كامت توجعني من الوكفة..
الحجية : الله يساعدج يله امشي..
اجرت تكسي ورجعنه للبيت..طول الطريق افكر شلون حكوللهه هي اكيد حتضوج لابنهه..تكول ابني صار اربعين ولسه ماعنده خلفة..اي شسوي مو بيدي..

وصلنه للبيت صعدت فوك بدلت احس جسمي كله ذبلان.. اعصابي راخية كلش..خليت الدوايات ع الكومدي ونزلت اسوي عشة..شوي وطبت خالة..
الحجية : ضل بالي..شكالتلج الدكتورة..
دنوة : خالة كلبي ورم والله..تكلي من وره الدوه النفساني الدتاخذي هذا يمنع الحمل..فوكاه هذنيج القديمات همات الهن تأثير..فوك هذا كله طلع عندي اكياس ع المبايض..بس بعدهن صغار كالت ويتعالجن بالعجل..
الحجية : يبو..والله عرفت كالتلج شي..والعلاج شلون مو كالت دكتورتج ما تعوفي بعد..
دنوة : اي كالت..ما ادري والله دخت..ليش هج حظي..
الحجية : حتى انه دخت وياج..اصبريلج فترة بين ما يجي صگر علمود ياخذج لدكتورتج ببغداد..شوف شتسوي..
دنوة : الله كريم..بقت شوي وراحت..تعبت بعد مابيه حيل شوكت يصير شي يفرحني..

كملت وصبيته..بعدين كعدنه نتعشه..محمد جان موجود.. كام يحجي ع الشغل مالته يريد يغيره..كمل جان يكلي شنو رأيج كتله ها..شنو شبي رأيي..
محمد : سلامته عيني..وين شاردة..
دنوة : لا بس نعسانة..شنو وين حتشتغل اذا غيرت شغلك
محمد : هنا وي صديقي عنده محل مال ملابس..
دنوة : ها..اي احسن من الروحة والجية كلساع..ابتسم وكام يغسل..انتظرتهم يكملون وشلت الاكل..بعدين اجت اخلاص غسلت المواعين..توضيت وصعدت فوك اصلي..كمت ابجي على حالي..بلكت الله يعطف بيه..لا ام ولا اب..حتى اخ ماعندي.. رزان وسما هم محسوبات ع الخوات..صار سنين محد شال علي تلفون يكول شلونج..وانه كل فترة اكول لصگر اذا شفت وحدة بيهن اسألهه عن حالهم خاف بيهم شي..انه محد يسأل عني..حتى عمامي..التربيت عدهم نسوني..

بس لو اعرف منو كايل دنوة موتته ارتاح..انه شعليه هج اجي اريد ازوره واشوف كرايبي واهلي بعدين يطردوني من الباب.. شكد حز بخاطري هذا الموقف وكل ما اتذكره انقهر.. فوك هذا كله ما يصير عندي طفل..ليش يعني ليش..شمسويه جوه الله خاطر هشكل اتعاقب..كمت ابجي..شكد انهضمت..كملت وكمت ع التلفون خابرت صگر..اشترالي كبل فترة من رحنه للجوازات..دك مرتين يله شاله..
صگر : هلا حبيبي..
دنوة : هلا بيك..شلونك..
صگر : والله بهلدنيا..شلونج انتي..خوما تعبانة..
دنوة : لا زينة..شوكت ترجع..
صگر : بعد..فد خمس ايام..رحتي للدكتورة..
دنوة : اي رحت انه وخالة..
صگر : وشكالت..

تنهدت..كتله : ما كالت شي..
صگر : شبيج بنيتي..اخلاص حاجتج شي..
دنوة : لا شبيك مابيه شي..ردت اخابرك هج مشتاقتلك.. حجينه شوي بعدين سديته..ما اريد اكلة هنا بالتلفون..هسة اذا احجي اكوم ابجي ومحيفتهم مني شي..كمت طفيت الضوه واجيت تمددت..ضليت احوص بالفراش بعدين نمت.. وره يومين جنت دا اعدل الصالة جان تندك الباب..رحت افتحهه طلعت مرام مرة علي..سلمت علي وفاتت..خالة واخلاص ومحمد جانو بالكلية علمود حفلة التخرج مال اخلاص.. والحجي طالع لشغله لأن كام يشتغل بالصيرفة..فبس انه بالبيت..طبت كعدت وتسولف وياي..بعدين جابت موضوع الحمل وشلون صرت..
مرام : صدك ما صرتي حامل..صار سنين متزوجة..
دنوة : لا بعد..

مرام : يله شدي حيلج تره صگر كبر..
عاينت عليهه ودنجت اشيل الكوشات..مجاوبت..غيرت الموضوع كتلهه : شو سمنانة ليش..
مرام : ياا..غير حامل..
دنوة : صدك والله..الف مبروك..ولد بنية..
مرام : بعد ما مسوية سونار..بس تنساتي مو مثل طيبة.. فعالاكثر ولد..همزين علي استعدل على هلولد..
دنوة : يله تكومين بالسلامة ان شاء الله..لازم واحد وي طيبة خوما تضل وحدهه..
مرام : اي هاي ربج راد بعد..كليلي شوكت يجون..
دنوة : ما اعرف والله..تريدين اخابرهم لو تنتظرين..
مرام : يله انتظر ماعندي شي..شحتسوين غده..
دنوة : فاصوليه وتمن حطيتهه ع النار..تعاي بالمطبخ نسولف ما عندي شي هنا..

رحنه للمطبخ نكمل..متغيرة ويايه..هم زين احسن مما تصير غثيثة..تقريب النص ساعة واجت خالة واخلاص..محمد ما شفته كبل راح للغرفة يبدل وطلع للشغل..اجت تسولف شصار ما صار..يعني شي عادي..وره تلث ايام كعدت الصبح غسلت وجهي ولبست الشال ونزلت..محد جان كاعد كلهم نايمين بس خالة كاعدة..لأن دواهه من وكت لازم تاخذه..صبحت عليهه ورحت للمطبخ..ولو ما اشتهي الصبح بس اكلت جبنة وزيتون علمود الحباية..توني دا اصعد جان تندك الباب..رحت افتحهه صار صگر بوجهي..ابتسملي بتعب ودنج حضني.. بادلته وبسته من خده : الحمدلله ع السلامة..تعال فوت.. حاوطني من جتفي وطبينا..كعدنا مثل كل مره..بس كل شوي يعاين علي يمكن حس علي متغيرة..انه صدك من سمعت حجي الدكتورة تأذيت..تمنيت ما سامعته..بس شسوي..

ضلينه كاعدين جان يكعدون الحجي واخلاص ومحمد.. فكمت اسوي ريوك..شوي وحسيت على صگر حضني..ابتسمت بس ما درت وجهي..
بهمس : شبيج ضايجة..
دنوة : لا مابيه شي..مشتهي شي اسويلك..
صگر : لا حروح انام..تعبان..
دنوة : الله يساعدك..اكمل البيدي واجي..باسني وابتعد عني كملت وصبيته بصينية..اجت اخلاص اخذتهه وراحت..انه اكلت فصعدت..طبيت للغرفة لكيته متمدد ويكلب بالتلفزيون..حتى ما مبدل..حاجيته انه وانزع الشال : مرام حامل تدري..
صگر : سمعت من علي..بالخير شريد منهه..
دنوة : اي انه هم كتلهه هشكل.. سكتنه ثنيناتنه..فليت شعري ورحت كعد يمه..اخذ ايدي باسهه..
صگر : كليلي شمضوجج..

من يوم الخابرتيني مو على بعضج..تره اعرفج من صوتج وعيونج..حتى حركاتج..متشوفين سألت اكثر من مره..
دنوة : ها..اي ادري بس ما صاير شي..جنت ضايجة وكلت اخابرك..شنو ميصير يعني..
صگر : الدكتورة شكلتلج..
دنوة : مو كتلك ما كالت شي..
صگر : شكلتلج..
سكتت ما جاوبت..حتى ما عاينت بعيونه..حاجاني بنتر..
صگر : مو دا احجي..شكالت..
دنوة : كلتلي الادوية النفسية الاخذيتهه تسوي ضعف.. والدوه هذا الي دا استمر علي يمنع الحمل..من اعوفه عوود يصير عندي حمل وهم احتاج مراجعه ومنشطات..سوتلي سونار كالت عندج اكياس ع الرحم بس بعدهه بالبداية..
صگر : بس..

دنوة : شنو بس..يعني كل هذا مو مهم..مراح اصير حامل بعد ما دام مستمرة ع العلاج..عاد همزين رحت علمود تعالج التكيس ولو مو مهم..بالحالتين ماكو حمل.. سكت ما جاوبني.. تنهدت وكمت ع الكنتور ارتب الملابس..ضل الحجي الحجيته براسي..دموعي خانتني كمت ابجي..خليت ايدي ع وجهي وواكفة بمكاني ما تحركت..لحظات وحسيت على ايد صگر حاوطتني من خصري..سحبني لحضنه..انه مثل العين مالت المي هج كمت ابجي..كتله : ليش حظي هشكل.. ها بس كول ليش..تعبت من الاخبار التصدم..شلون شسوي..ليش يصير وياي هج..انه ...كمت ابجي واشهك حتى ماكدرت اكمل حجي شكد انهضمت..اخذني من ايدي ورحنه ع الجرباية.. كعدني بحضنه ويمسح بدموعي..
صگر : بس بس كافي..هسة نرجع للدكتورة الاولانية هي اكيد تعرف شتسوي..ليش كلتي ماكو من هسة..

بعد كلشي ما مسوين بنيتي انتي..لا تقهرين نفسج.. فدوة الج تروح الدنيا كلهه والله..كلشي يصير هسة مو روان كالو عقيم وما تخلف بعدين جابت وعايشين..بعدج شابة توج صرتي كلبي شنو اليمنع..
دنوة : شلون شنو اليمنع..والدوه شلون..
صگر : كتلج نرجع للدكتورة الاولانية هي تعرف شتسوي.. بس ما اريد دموعج تنزل ولا تقهرين بروحج عمري انتي والله ضل بالي عليج من يوم الخابرتيني..
عاينت بعيونه ورجعت ابجي : ما اكدر..يعني انه صغيرة وما يصير عندي حمل..انت جبير وماعندك خلفة..بله باجر عكبة تريد تروح تزوج علي مثل عقيل..
صگر : وهذا شنو تجيبي علي..هذا جاهل بس جبير بالاسم انه لو اريد جان سويت من زمان وما اكلج..بس انتي جدامي بكلشي اسوي..

كلشي اله حل..لا تبجين وتوترين روحج..انه قابل بيج هشكل لو ما قابل جان كل يوم عركة..
دنوة : يجي يوم تمل..انت بشر وعندك طاقة تتحمل بيهه
صگر : لا ما امل..جان مليت خمس سنين انتظر اشوفج.. شو عاينيلي..رفع راسي بايده ويمشي اصبعه على خدي : وداعت عيونج الاحبهه اضل وياج..مستعد اصرف شگد ماتردين بس تصيرين حامل..مو هو هذا التريدي..
دنوة : اي..
صگر : ميخالف..بس ارتاح جم يوم واخابر احجزلج عدهه علمود ندخل بالعجل ما نضل ننتظر..
اخذت نفس وسكتت..حضني وشالني من الكع..صرت جوه وهو فوك..باسني ويعدل بشعري..
صگر : وره ما نروح للدكتورة نسافر..
دنوة : وين حنروح..
صگر : كيفج..تركيا لو عمان..

حاوطته من ركبته : اليعجبك حبيبي..
تقرب باسني وهمس بإذني..
صگر : اضعف جدام دموعج..لا تبجين على كلشي..انه وياج بكل خطوة مو عليج..
دنوة : الله يخليك يارب..شعندي غيرك..
صگر : ولا انه..حكوم اسبح وانام كلش نعسان..
باسني وكام يطلع ملابس وراح يسبح..رتبت الجرباية ونزلت جوه اشوف خالة خاف تحتاج شي..ع الدرج وسمعت اخلاص تخابر خطيبهه وتضحك..ما فهمنه تحبي لو تحبين هذاك.. عفتهه ونزلت سويت روحي ما سمعتهه..غسلت المواعين ورحت يم خالة..سألتهه على اخلاص : اكلج خالة..شوكت تزوج اخلاص مو عساس من تتخرج..
الحجية : اي بعد دصبري فد شهر..تكول احنه متفقين..
دنوة : هااا..اي سمعتهه تخابر..

الحجية : خليهه يمعوده..هسة تروح شلعت كلبي..
دنوة : اييه..انتي كلبج طيب..هسة تروح وتضلين تحنيلهه..
الحجية : على كولتج..حاجيتي صگر..
دنوة : اي..
الحجية : انه ما كتله..كلت هي تكلة عيب انه شكو..شكال
دنوة : هو حيعرف اول وتالي..بس زين سويتي..كال ححجزلج يم الدكتورة شوف هي تعرف شتسوي..
الحجية : خالة تره صگر وياج..لتخافين هو يدري بحالتج شنو يكول ما مستعجل..ولو للصراحة انه اريدله الطفل بس انتي هم خطية..
دنوة : ادري هو انه هج اكول دائما..هو ما يحجي بس ادري هلشي بخاطره..بعد الله كريم شسوي..
الحجية : الله يساعدج حبوبة..لا تنقهرين..
ابتسمت وبستهه..خلص اليوم عادي..العصر صگر خابر الدكتورة حجزلي عدهه..

كال عكبة سرانا الصبح..مشن يومين عاديات بعدين كعدت الفجر وكعدت صگر وياي..كملنه ورحنه لبغداد..طول الطريق ما كدرت انام..الف فكرة اجت ببالي..اخاف تكول ما يصير عندج حمل بعد..لو ما يصير تعوفين العلاج..ما ادري توترت كلش..كبل لا نوصل غفيت شوي بعدين كعدت..طبينه للعيادة طبيعي..طلعت وحده من عدهه ادور اجه سرايه..طبيت وصگر وياي..ابتسمتلي..
الدكتورة : تعاي تفضلي..
رحت كعدت..بلشت تسألني شلون صحتج..مستمرة ع الدوه لو تركتي..ومن هلحجي..لحد ما كتلهه : دكتورة انه رحت لدكتورة نسائية..فسألتني اذا اخذ علاجات نفسية او لا..كتلهه كبل جنت اخذ تلث اشرطة هسة بس واحد وشوفتهيا..كالت هاي هاي الاشرطة تضعف الخلايا التكاثرية وتأثر ع الحمل.. خصوصا هذا الدا اخذه الاخير..

كلتلي توجهي لدكتورتج النفسية هي تعرف حالتج اكثر وتعرف شلون تقلل منهه او تقطعهه نهائيا..مع ذلك اذا تركت العلاج لازم اضل اراجع علمود المنشطات وهاي..فشلون..
الدكتورة : اها..شوفي ماما..علميا لحد الان ماكو شي علمي يثبت ان المريضة نفسيا سابقا ميصير عدهه حمل.. بس العقاقير الطبية الهه تأثيرهه طبعا..ايجابيات وسلبيات.. مثل البندول او البراسيتول..تاخذين منه حتى يهدأ الوجع بجسمج لكن اذا كثرتي منه وتعودتي كل ما تتمرضين تستخدمي يسوي امراض بالكلى..من ضعف الى حصى الى الى... اني سبق وكتلج ان انتي تشافيتي واني سعيدة بيج..لكن الصارلج هو انهيار عصبي..معناهه اعصابج مستحيل ترجع مثل قبل.. احنه بدورنه كأطباء لازم ننطي للي مثل حالتج علاج مثبت ومرخي للاعصاب..حتى خاف يصير شي فعندج علاج تسندين نفسج علي..

بالنسبة للحمل..فاني ما اكدر اقطع عليج العلاج..لكن نكدر نقلل كميته والاوقات التاخذي بيهه..انتي تاخذي بالليل..
دنوة : اي دكتورة..بالتسعة تقريبا..
الدكتورة : جيد..منا وجاي حتصيرين تاخذي نص حباية صباحا بعد الفطور..كل تلث ايام..بس لازم تراعين بيتئج.. وما تتعرضين لأي مرض يهز اعصابج..واضح..
دنوة : واضح..اذا استمريت ع العلاج هذا بهلشكل خوما يأثر ع الادوية الحتنطينياهه الدكتورة النسائية..
الدكتورة : لا ابد..اتفقي وياهه على موعد العلاج وشوكت تاخذي..يفضل باليوم اليماعندج بي موعد..
دنوة : يعني اكو امل..
الدكتورة : اي طبعا..بس التزام..

دنوة : شكرا دكتورة..
الدكتورة : العفو ماماتي..ان شاء الله اسمع بحملج..
ابتسمت وكمت..صگر تشكر منهه وطلعنه..تمشينه اشترى حلاوه وجباسة للطريق..من صعدنه حاجيته كتله : انه عبالي حتسوي شي جبير..
صگر : شتسويلج عملية يعني..
دنوة : لااا ماكلت هشكل..بس عبالي يعني..
صگر : هذا تغيير جبير بنيتي..سمعتيهه شكالت..كالت نص حباية كل تلث ايام..يعني مرتين بالاسبوع..انتي جنتي تاخذين مره كل يوم..شوفي الفرق هسة..
دنوة : هاا..اي هم صحيح..
صگر : ما اوصيج..انتبهي لنفسج وما اريد بجي وانفعالات.. حتخاطرين بصحتج علمود طفل وانه كتلج ما مستعجل ليش تسوين هشكل..

كمشت ايده وشديت عليهه : ميخالف..اذا صار الحمل فهو اكثر شي حيفرحني ويغير من نفسيتي..
صگر : يله..شريد اكثر من ضحكتج وفرحتج..
ابتسمت..رجعنه للبيت بس نفسيتي شوي تغيرت على حجي الدكتورة..خصوصا كالت اكيد اكو امل..يبقى بس اروح للدكتورة الثانية اشوفهه شتكول..دوة التكيس خلص فاول وتالي لازم اروحلهه..انه نص الطريق ونمت..فزيت على صوت صگر يكعدني ويلم بالجياسة..شكد اكلنه..يله الطريق كلش ملل الواحد شيسوي..طبيت للبيت استقبلتنه خالة بعدين طبينه حجيتلهه شكالت الدكتورة..
الحجية : يالله خير ان شاء الله..لا تخافين حبيبتي مو كتلج بعدج صغيرة والعمر اله تأثير خوما هج..
دنوة : اي صحيح..بلكت بعد الله كريم..
ضلت تحاجيني وانه منتبهة على صگر شلون يعاينلي ويتفحص حركاتي وحده وحده..

بقينا شوي بعدين صعدت فوك..بقيت بس بالتشيرت طويل فوك الركبة بشوي وصلوخ..عبالي صگر جوه فاخذت راحتي.. فتحت شعري واغني اسألي عني الليالي..جان يجي.. ضليت جامدة بمكاني..سد الباب هو ومبتسم

درت وجهي استحيت..
صگر : كملي ليش سكتي..
دنوة : ها..مو استحي يعني..
خلى إدي بجيوبه وتمشى بإتجاهي.. جنت واكفة يم الچرباية.. بس تقرب مني دفعني دفعة صغيرة طحت.. نزع التشيرت ذبه ع الميزتواليت..كمشني من إديه بقوة شوي..
جريتهه منه خليتهه على صدره : حبيبي شبيك.. ليش قاسي..
صگر : حبيبي ماكو غيرج القاسية..وفشلتيني همات..
دنوة : عززه شلون شسويتلك..

كام ورفع الفانيلة..انطاني ظهره..خليت ايدي على حلگي.. ثواني ونزلهه..طلع باكيت الجگاير من جيبه وورث وحدة..
صگر : ذاك اليوم بالواجب طبيت ارتاح فنزعت القميص ومدنج ع البسطال افك القيطان..اجه واحد ضابط خلى ايده على چتفي گال على كيفك وياهه..
دنوة : عززه..ههههههه..حبيبي وانت شگتله..
صگر : كتله هي رعنة وماتگصر اظافيرهه..انه رجال رومنسي شجابني ع السوالف هاي..
دنوة : صدك هيج گتله..ماتستحي..
ضحك وزفر الدخان : لا يابة شلون احچي هشكل.. كتله هي دلوعة..
دنوة : لا عفية شنو دلوعة..اصلا كلش متواضعة انه..
صگر : هسه شگله ماترضين..شتردين رب الحلو.. بعدين هاي هيج ولشي..غير رگبتي انه البس لفاف بالشتا..
دنوة : اهو سويتني فد دور ..اصلا حبابة انه..
صگر : هو كله براسي..

طفى الجگارة ودار وجهه علي..جرني من ايدي لصدره ويبوسني من خدي ووره إذني.. : انه مااريدج حبابة..
اخذني للچرباية يتغزل بيه ويبوسني..يريد يجذبني برومنسيته لنقاط احساسه..يطبع حبه وشوقه بكلمات بيهه ترنيمة هادئة ثملة.. سحبت ايده الخلاهه على خصري..
رفع حاجبه : شدسوين..
دنوة : حبيبي الباب..
صگر : شبي هذا ادور..
دنوة : غير تقفله..
ضحكت ودفعته..رحت قفلت الباب ..هو تمدد وفتحلي ايده.. اجيت بحضنه الأحسه دنيا ثانية.. بقينا ماادري شكثر.. وياه مااحسب حساب للوكت..اريد كلشي يمر على مزاجي .. شوكت ما اوگف الوكت كون يوگف..ومن اشغله يشتغل.. وياه روحي تنولد من جديد بإحساسه ورجولته..

مشى الوقت عادي ثاني يوم العصر بدلت وهو هم بعدين طلعنا للدكتورة..ضل ينتظرني بالباب مال صالة لحد ما طلعت.. لأن كلهه نسوان كاعدات..بين ما طلعت اول مريضة رحت ع السكرتيره كتلهه اسمي..راحت دورت بالفايلات كالت اي هيانه اسمج..بس تطلع الثانية يجي دورج..حركت راسي يعني اي ورحت كعدت..طلعت جان تذيع اسمي..طبيت بس خايفة..خاف تكول يبقى نفس التأثير ما دام بعدج دتاخذين علاج..سلمت عليهه وكعدت..
الدكتورة : رحتي لدكتورتج..
دنوة : اي دكتورة..

الدكتورة : تمام..شكالت..
دنوة : قللت الكمية والفترة..صرت اخذ نص كل تلث ايام..
الدكتورة : اي هيج حيل زين..وعلاج التكيس كملتي..
دنوة : اي..
الدكتورة : عفية عليج..تفضلي اسويلج سونار نتأكد..
كمت تمددت وسوتلي سونار..بعدين كامت للميز مالتهه..
الدكتورة : رايحات..شفتي الحمدلله انج اجيتي بمثل هيج وقت لأن مثل ما كتلج..توهه دتصير..خلصنه من كل الامور المتعلقة بيج وبحملج..انطيج منشطات تلتزمين بيهه بالساعات تاخذيهه أي تأخير او تقديم لازم تعيدين الدورة من جديد..
ضلت تحجيلي شلون استخدمهن والوكت..بين يوم ويوم اول اسبوع بعدين ابدي اخذهن بشكل يومي..لحد ما اخلص دورتين يعني عشرين يوم بعد تلث ايام من اليوم وارجعلهه

كالت اكو امل بس يتأخر..احتمال مو هلشهر..بس المهم اكو امل..تشكرت منهه وطلعت..لكيت صگر واكف برة يخابر.. رحت يمه انتظرته يكمل وحاجيته : يله ننزل..
صگر : يله..شكالتلج..
دنوة : احجيلك بالسيارة..
نزلنه ورحت ع الصيدلية اشتريت العلاج نوعين..بعدين طلعت صگر جان ينتظرني بالسيارة..صعدت وحجيتله شكلتلي الدكتورة..كتله : شتكول انت..
صگر : صار خير على خير..ما صار مو مشكلة..ما اريد بجي وقهر..كتلج انه وياج..واذا هلشي يأذيج ويضر صحتج ما اريده..اهم شي انتي..
دنوة : حتضل تكول هشكل..بمكان ما تشجعني..
صگر : انه شكايل..مو كتلج وياج خطوة بخطوة..بس ما اريد تتأذين علمود شي ممكن يصير وممكن لا..

هسة المهم التزمي عدل وان شاء الله خير..
عاينت علي وابتسمت..ابتسم على ابتسامتي..طبك يم محل نزل اشترى شغلات مال تعليلة واجة..رجعنه للبيت لكيت اخلاص مسويه عشه..مرام وعلي يمنه..سلمت وكعدت يم صگر هو كعد الكل سكت..ميحب واحد يحجي ع الاكل.. كملت وصعدت فوك..بين ما بدلت جان تجي مرام..ضليت متفاجئة هي متصعدلي فوك ابد..شجابهه..ابتسمت بدون ما احجي
مرام : شلونج دنو..سمعت مريضة..
دنوة : اي صار فترة..هسة احسن الحمدلله..منو كلج..
مرام : سلامتج حبيبتي..اخلاص حجتلي..
دنوة : هاا..الله يسلمج..تعاي كعدي..
مرام : لا والله بس ردت اطمن عليج..اريد اكلج عوفي الايام القديمة ورانه اريد نبدي من جديد..
يعني صدك صدك صدمتني..

جنت اذا افوت بدرب هي تطلع من اللاخ..ليش بعد ما خلوني اخسر صحتي القديمة كلهه سكتت.. كلهه كامت تعاملني بالعيني واغاتي..جانو يعاينولي بنظرة احتقار من يشوفوني ويا صگر..خوب هي مرام تكلي انتي زعطوطة شلون ماخذه صگر جبير ومقامة اكبر منج بمرتين..هج يعيروني على كلشي على كعدتي وشعري..لون بشرتي ووو.. ابتسمت كتلهه : اي عادي ما صار شي..
ابتسمتلي وراحت..يله يمكن تغيرت شسويلهه..بعد احسن.. بدلت ونزلت يمهم..علي مثل ذاك اليوم..هم يضحك ويسولف بس ما يعاين علي..ثنينهم متغيرين هو ومرام..يمكن هذا الطفل الجديد كصته خير..انه كاعدة يم صگر متحركت.. ضلو يحجون على ايامهم كبل بالكلية وهاي..جان اخلاص تحجي.. تتقصد تنغزني وتغثني..
اخلاص : اي وين جنت ووين صرت..

واحد غيرك هسة عنده اقل شي ثنين..وكبار..فد ١٣ سنة.. مو باقي تنتظر البعضض..
حجتلهه وعاينتلي..صگر خزرهه وحاوطني من جتفي..
صگر : اي عادي شنو بيهه..انه من زمان جنت ما اريد اتزوج بعمر صغير..هسة يصير عندي طفل ما مستعجلين..
اخلاص : جا شوكت تستعجل..من تصير خمسين..
صگر : عندي بنية ما اريد طفل..
هو كللهه هج كامت تبلعم..عاينلي وابتسم بطرف بشفافه.. ابتسمت ودنجت..هي نصى حسهه بعد ما شاركت بالحديث حتى..فشلهه تستاهل..هو انه وين اشوفه..ومنا تمرضت بسببهه هي وجلنار..همزين راحت وخلصت منهه..الدور الج ان شاء الله عن قريب.. بالليل صگر جاب الدومنة وورقة وقلم كعد يسجل من صدك..الضحك والتحشيش ماشي على علي.. كل مره يهدد..

علي : اذا ما فزت هلمرة نتخارب..
صگر : العب لك..
علي : ماعندي رب الحلو ادري شنو كلهن يمك..
صگر : دومن..جيب حبيبي شكد عندك..
يكوم يضحك يصيح سجلي سجلي..كلهه تدفع عليهه غرامة.. هو يحجي هشكل بس يشاقة..هذا كله من عدا الكرزات والحب بس صدك تونست من شفتهم متغيرين وياي..خصوصا علي شكد حباب صاير..محمد هم موجود..بالليل بالوحدة يله راحو بيتهم براس الفرع يعني عادي..صگر ومحمد طلعو وياهم وانه لميت الكشور والدومنة..كمت غسلت وصعدت فوك..رجلية توجعني بس تمددت غفيت..بين غافية وكاعدة حسيت على ايد صگر حاوطتني من خصري وراسه ع صدري قريب رگبتي.. مديت ايدي على شعره امسد بي..
صگر : كاعدة..عبالي نمتي..

حاجيته بهمس : لا نمت بس فزيت على حركتك..
باسني ونام..حسيت علي من انفاسة ثكلت..ثاني يوم العصر اخذ فلوس وطلع..ما سألته هو من يرجع يحجيلي..عايفته على راحته..ادري بي ما يضم علي..اجة بالليل وي العشه.. كال لا تصبون جبت وياي..همزين جنت توني دا اسوي..فرجعت ضميتهن..اخذت العلاليك منه ورحت سويتهن بمواعين وكعدنه نتعشه طبيعي..اخلاص اجتهه الندارة تريد تغسل المواعين.. غسلتلهه ماعون جان يدك تلفونهه..عافتهن وراحت.. يابة والله ما عدهه مسؤولية ابد..كمت اغسلهن جان يجي محمد يدندن بأغنية شيجيب باجر مال هيثم يوسف..راح ع الراديو شغلة وطلع قناة دائما يطلع عليهه هيثم هج وكت..كعد ع الكرسي ويدك بأصابعه ع الميز..انه ساكتة ما حجيت..
محمد : دنووة..اريد احجيلج شغلة..
دنوة : اي كلي اذان صاغية..

محمد : شوفي خلاشوفج وحدة..كليلي رأيج..
دنوة : يله اشوف..
اجه يمي فتح التلفون يدور بالصور..طلع صورة بنية تطلع بكدي او اكبر مني بجم سنة..
محمد : شوفيهه حلوة..
دنوة : اي مرتبة..منو هاي..
محمد : لج هاي احبهه..المشكلة هي من بغداد.. يعني حسرة اشوفهه بالشهر مره لو اي لو لا..
دنوة : هااا..يعني حجي اخلاص صدك..
عكد حاجبة وسد التلفون : شكالت هاي الثولة..
دنوة : كالت محمد يحب..جي كامش التلفون من الصبح لحد ما تنام..وتبتسم عساس..
حجيتهه متقصدة لأن ضحكت وراهه..
محمد : اي يله قابل الحب حرام..

المهم شوفي هسة دا اجمع فلوس..صار عندي خمس ملايين.. شكد احتاج بعد واخطبهه..
دنوة : وانه شمدريني..
محمد : شبيج انتي مو تزوجتي..صگر شكد صرف..
دنوة : والله ما ادري..ما سألته..انتو غير تتفقون..يعني هي تكلك ابوهه شنو طبعه وهاي..لو شلون..
محمد : ما اجت ببالي هاي الشغلة..يله اليوم اخابرهه اكللهه مثل ما كتيلي..
دنوة : ههههه..وانه اعلمك قابل..غير انت جبير وتعرررف..
محمد : اي شمدريني مخبوص..والله احبهه شنو هاي..
دنوة : اي عيني..يزيد ويبارك ليش لا..من هاي اشوفك لاطش بهاي القناة اليطلع عليهه هيثم..طلعت مو هين..
محمد : اي اي..شعبالج..هاي الاغنية اسمعهه من اريد اشوفهه..توصفنه..

دنوة : الله يديمكم..بس حاول تستعجل..خاف ابوهه يعرف ادور يعاديهه وبالعناد ما ينطيهه..
محمد : اي ادري..هي غير تزوج اخلاص دا اولي اخطب.. اخذ صگر وياي..على سمعته ينطيهه..
دنوة : هسة هي حتاخذ صگر لو محمد..
محمد : لا مو هج يول..بس غير السمعة وعقيد وهاي..
ابتسمت وغمزتله : عقيد وهاي..
كام يضحك وراح كعد يم الراديو يسمع الاغنية..لحد ما خلصت طفاه وراح لغرفته..انه كملت وصعدت فوك..صگر مشغل فلم اكشن ومندمج بي فد دور..حتى ما انتبه علي من طبيت..نزعت الشال وبدلت..طفيت الضوه ورحت كعدت يمه.. حضنته وراسي على جتفه..بقيت اتفرج وياه لحد ما خلص الف مره غفيت وكعدت..بكل مرة صگر كاعد..

اخر شي عدلت نومتي وصگر طفاه..اجه حضني.. يحاجيني ويعدل بخصلات شعري..
صگر : اليوم رحت حجزت..
دنوة : صدك..شوكت ووين..
صگر : تركيا..بعد يومين الحجز مالنه..لازم نروح بالاربعة العصر للمطار..بين ما تخلص الاجراءات ومدري شنو هاي العطلات هم فد ساعتين..
دنوة : هممم..والجوازات جبتهن..
صگر : من زمان..من رجعت ذاك اليوم من الواجب مريت جبتهن واجيت..
دنوة : صدك..شو ما انتبهت..يله انه وين افتح كنتورك اصلا.. ابتسم وباسني..وره يومين الصبح حضرت الجنط الي ولصگر ملابس عطور وهسوالف..

تقريب التلاثة كمت بدلت وهو هم..اخذ فلوس والجوازات والجناسي بعدين نزلنه..خالة تحجي عبالك حنروح للمريخ..
الحجية : البيت حيصير ضوجة بدونكم..
دنوة : حبيبتي خالتي..قابل وين حنروح..
الحجية : يله اهم شي ترتاحون..تونسو ما تونستو..
انطيتهه بوسة بالهوى جان تكوم تضحك : لج انتي ما تبطلين هاي بوستج الهوائية..شحلاتهه من تنحط ع الخد..
دنوة : يله شنو جنج على بوسة..
كلهه ضحكت حتى صگر..بستهه وسلمت على محمد والحجي اخلاص همات ولو من ورة خشمهه.. محمد اخذنه بالسيارة للمطار..اول مره افوت بي..فتفاجئت طبيعي..صگر شكله متعود ع الوضع..يمكن مسافر كبل..بعد جر وعر يله ذاعو رقم الرحلة مالتنه..صعدنه طبيعي..صگر يعاين علي ويبتسم

هذا شبي..شنو ما شايفني قابل..اجت هاي المضيفة كالت العنده ضغط لا يخاف..مفهمت فسكتت..بعدين طلعت الطيارة صارلي شعور يخوف..اكو وحدة رادت تخرب الا شوي.. وره ربع ساعة تقريبا استقرت وراح الشعور..عبالك واحد صاعد لعبة سفينة او شي..صگر عاينلي وابتسم..
دنوة : بله على شنو دتضحك صار ساعة..
صگر هو ومبتسم بطرف شفافه : شنو شعورج..
دنوة : شنو شعوري..متت خوف..عود ليش ما كتلي حيصير هج..اجتني مثل الصدمة..
صگر : هو كلت اشوفهه شحتسوي..
دنوة : ايا لوتي..منو يلحكك..
ضحك بصوت ناصي وكمش ايدي..وره ساعتين تقريبا او اكثر وصلنه..هم خلك مطار ومدري شنو..بعدين اخذ تكسي ورحنه للمدينة..

تمشينه على طول الشارع فنادق ومحلات..حبيتهه كلش.. خصوصا بالليل فالمنظر يجنن صاير..طبينه على واحد جان اكو مترجم فحجة وياه صگر واتفقو ع المبلغ والليالي.. كال اسبوع ونرجع..صعدنه فوك..هم جان سويت مثل ببغداد.. بس احلى..المهم كلش عجبني..والمنظر بره بعد احلى.. ردت ابدل جان يفززني صگر..
صگر : وين وين..كومي نتعشه بره ونتمشى شوي بعدين نجي ما عدنه شي..
دنوة : يله..عدلت الشال ونزلنه..تعشينه بس منفتهم عليهم هج ع الاشاير..كملنه ادور طلعنه نتمشى..للدعش وشوية بعدين رجعنه..صگر ضل يفتر بالغرفة..رايح جاي..
دنوة : شبيك حبيبي..
صگر : خلصت الجكاير..ما اعرف اشرب الا من نفس النوعية وين الكى هسة..

دنوة : ديله عبالي شوف شنو..صدك انه عندي باكيت بجنطتي شوفهه بالكنتور..
رفعلي حاجبة ومجتف ايده : شجابه عندج..
دنوة : لكيته ع الميزتواليت بالبيت واخذته..
صگر : لازم ادير بالي..اشرب منهه شوي واطفيهه..
دنوة : هههههه..من صدك عود..اصلا مو زين عليك قابل انت صغير..بلكت تتعود بدونهه..
اجه يمي يلعب بشعري ويعاين لشفايفي : متعود عليهه مثل ما متعود انام بحضنج..
كمشني من خصري ودارني للجهة اللخ..اخذني للشباج ويهمس يم اذني..حسيت بكل حركاته حتى انفاسه..بس تقفلت ما اكدر اسوي شي : شنو انتي..دنيا وناسهه.. احبج بكد حبي لامي..اريد تصيرين بمكاني من اجي تعبان واحضنج شلون احس روحي فرغت كل التعب..

يمج ارجع للبداية من جد وجديد..شمهما يصير انتي تبقين كلشي..اريدج تعرفين اذا ما صار الطفل لا تنقهرين.. طلعت روحي يله صرتي زينة..ادور تتمرضين علمود طفل.. الدنيا جدامنه وحنعيش..انتي طفلتي وبنتي..
دنوة : بس...
حط اصبعه بشكل خفيف على شفتي : لا بس ولا شي.. انه مرتاح هشكل..كل كلمة اكولهه الله شاهد طالعة من كلبي.. ما اريد تكولين ديكول هج علمود ما انقهر..تهميني اكثر من روحي..زين عمري..
ابتسمت وحاوطت ايده : زين..ضلينه شوي بعدين سد البردة وراح طفى الضوه..حضني ورحنه ع الجرباية.. صگر بكل مرة يصير اهدأ ولمساته خفيفة..ووو...

ضلينه كاعدين للفجر بعدين نمت..كعدت الصبح سبحت صگر همات..بعدين طلعني..صدك نسيت كلشي بهاي الفترة.. فرحني وما خلى شي بنفسي..هو شايف وجاي هنا كبل فعادي عنده..انه جنت اذا اجيت لبغداد اتفاجئ..اشترالي ملابس جدد وداني لهواي اماكن..رحنه لمكان شوي بعيد بي جبال وهج هنا تأخرنه..تقريب التسعة بالليل يله وصلنه للفندق.. واستمر الحال ست ايام..فرحانة الى درجة..الدوة من اكعد الصبح يجي صگر ينطينيا وياه كلاص مي..يكلي ادري بيج نسيتي هسة..هو انه صدك نسيت..حتى موضوع الحمل.. ما احس بس بصگر..شكد عوضني..ما خلاني احس بالملل دقيقة وحده..شفت الحب بعيونه وتصرفاته..حركاته وكلماته.. بكلشي..هو يحاجيني وانه اعاينله بنظرات تأمل.. اتمنى يضل يحجي وانه بس اعاين..

بالليل احجيله : احبك..اكثر من حبك الي..
حضني وابتسم : متوصلين للمكانة الخالج بيهه..
هج يكلي كل ما اكلة هشكل..هو يمكن صدك..المهم عشت احلى اسبوع بحياتي..بالليل من نرجع من التعب كبل انام بملابسي..بعدين اكعد الصبح الكاه واكف يمي يدخن ويعاينلي من فوك ليجوة..فاكوم اسبح واغير ملابسي..وهاي هج لحد ما جنت توني طالعة من الحمام جان يجي يحاجيني هو ويدخن الجكارة متنزل من حلكة..
صگر : باجر الطيارة..اليوم وين تطلعين بما انه اخر يوم
رحت تقربت منه ومادة ايدي على تشيرته : بكيفك حبيبي.. خلنبقى هنا والله تعبت..
صگر : يولي مو حترجعين للبيت وتضلين كاعدة..
دنوة : اي ميخالف مو ما شفتك..خلاشوفك..هسة نرجع للبيت وتروح للواجب ومدري شنو..

غيرت نبرة صوتي..كمت احجي بهدوء اكثر : او بكيفك
هو مبتسم ورايح لغير عالم وي صوتي..اخذني من ايدي وراح طفى الجكارة..بعدين رحنه ع الجرباية..
وخر الخاولي هو ويحاجيني : تعجبيني من تصيرين لوتية.. هسة تعاي يله نبقى هنا مثل ما تريدين..
ابتسم وغمزلي..هاي غمزاته ولا تريح..اخذني وياه لغير عالم بس صوته وصوتي..ووو...
بالليل حضرت الجنط وكملت..لأن بالثنتين المفروض احنه بالمطار..خلصنه كلشي ورحنه..صگر جان مخابر محمد يجي ياخذنه الفجر..بعد خلك مطار وهوسة يله وصلنه.. محمد جان بالصالة ينتظر..اخذنه ورجعنه للبيت..اول ما طبيت لكيت خالة كاعدة..والبيت كلش هدوء..كلهم نايمين..سلمنه عليهه وكعدنه شوي بعدين صعدنه فوك..انه بس بدلت رحت تمددت.. وانتظرت صگر يجي بعدين نمت..

عكبة صگر نزل للواجب..كال بس ارجع تصير زواجة اخلاص بهلفترة اخلاص عزمت صديقاتهه مدري شكو..تكول بعد ما اشوفهن..صارت هوسة بالصالة واغاني..جنت كاعدة يم خالة بغرفتهه..جان تحاجيني..
الحجية : ليش ما تروحين وياهن..
دنوة : ما اعرفهن شعندي وياهن..
الحجية : دروحي يولي..خليشوفونج شلون حلوة وتخبلين.. هسة اكيد اخلاص كايلتلهن محلوه وسمرة شحالهه..مو عندج فستان جوه الركبة..روحي لبسي..
دنوة : لا استحي خاف عبالهم افرض نفسي..
الحجية : هاي شلون بيهه..دروحي حبوبة شنو تفرضين نفسج قابل بيت ابوهن..بيت رجلج وبكيفج..
دنوة : يله حكوم ميخالف لا تضوجين..

ابتسمتلي..كمت صعدت بدلت وسويت شعري..خليت مكياج بسيط..بعدين نزلت للمطبخ..جان تجي اخلاص..
اخلاص : اي همزين لكيتج..حاخذ العصاير واروح..تعاي وياي خيشوفنج امي كالت..
دنوة : يله جيت..هاي خالة شكد تريد تفرحني ولو بشي بسيط رحت وياهه..سلمت عليهن..وحده ضلت تراقب حركاتي لحد ما كعدت ع الكرسي..
- : هاي مرة اخوج..
اخلاص : اي عيني..دنو..
- : ياعيني..والله تخبل فدوة..شمخلصه انتي..
دنوة : سادس ادبي وبطلت..
- : حرامات جان كملتي..
اخلاص : اي موو..حتى انه دائما اكللهه جان كملتي..
- : يله اكيد بيهه صالح..

ابتسمت وكعدت وياهن..ضحك وسوالف..اخلاص شلون تحجي وياي عدل وكله حبيبي وحياتي..والله عمي زين.. هاي جدامهم تطلع هي الحبابة..جا شبيهه وياي بس تذب بسامير ضلو للمغرب بعدين راحو..عدلت الكوشات وشلت العصاير والكيك..غسلت المواعين مالتهن وصعدت فوك..ثاني يوم اجة خطيب اخلاص محمود هو وامه..اخذو اخلاص والحجية علمود يشترون المهر ويأجرون البدلة وهاي التفاصيل.. تذكرت نفسي..من الاستعجال صگر هو راح اشترالي بدون ما اجي وياه..ولو حلوات ومابيهن شي..بس هي حلاتهه من تكمل كلهه سوه..اخذت نفس وسكتت..عادي المهم صگر عوضني هواي

رجعو المغرب..اخلاص مشتريه الدنيا كلهه..وماخذه صور للبدلة الأجرتهه..تشبه اللبستهه من تزوجني..المهم جان الفرح واضح عليهه كلش..وره اسبوع اجة صگر..العصر انطاني فلوس انه وخالة ورحنه لمحل ملابس..اجرت فستان طويل بس نهايته شفافة..ردان بس بي فيكة بهدوء..ضليت بالساعتين اختار علمود اذا طلعت من البيت بالفستان صگر ما يحجي.. بالاخير اخذته ودفعت فلوس الاتأجير..ادور طلعنه لمحل احذية قريب اخذت كعب مريح شوي ورجعنه بعد ما خالة هم اخذتلهه شي رجعت للبيت ميته تعب..كبل صعدت فوك..صگر جان جوه فبدلت وفتحت شعري اريد اشوفه شلونه علي..كملت ورحت ع الدرج اصيح : صگرررر..تع...
صگر : هسس..شنو هلصياح..
حسيت بالفشلة..كتله : لا مو اريدك تشوف الفستان..
صگر : فوتي جدامي خلاشوفه..

طبيت للغرفة لبست الكعب جان يجي..ضل واكف وره الباب ومجتف ايده مبتسم..
دنوة : ها شلونه..حلو..
صگر : انتي الحلوة والله..
ابتسمت..كتله : البسه بره عادي..
صگر : لبسي عمري..
انطيته بوسه بالهوى وانداريت بدلت..ثاني يوم الصبح كعدت من وكت وي اخلاص..رحنه للصالون وهسوالف كلهه مال زواج والهوسة مالته..هي فرحانه وهذا كل شوي يخابرهه.. الله شهلحب هذا السريع..او يمكن هو يحبهه من كبل..مشى الوكت ورجعنه للبيت..انه مسويت شي قوي..مكياجي مثل كل مرة..بس عدلتلي حاجبي..اجة محمد اخذنه والتحشيش
محمد : بعد وكت عيني..جان بتوا هناك فد دور..
دنوة : شمدريني غير اخلاص..

محمد : يله بس لا انه هم يصير وياي هج..
الحجية : ليش شعندك عيني..
محمد : لا ماكو شي يمة..دا احجي وي دنوة..
ابتسمت على حجية..ادري بي ديقصد البنية اليحبهه.. رجعنه للبيت..بطني كامت توجعني ما ماكلة..فرحت للمطبخ اكل.. جان يجي صگر حضني وباسني..
صگر : مشتاكلج يولي ماشفتج اليوم..
حاجيته انه واكل : اي شسوي غير علمود اخلاص..
صگر : اكول يولي لا تروحين وياهم اليوم..
دنوة : شنو ليش..مو كتلي روحي..
صگر : حيجون كرابة الولد..زلم هواي وهوسة مسويهه بقاعة ومدري شنو..امي حتروح وياهه ومرام وصديقاتهه.. ووو مدري منو بعد خير من الله..
دنوة : صگر شبيك حباب..

صگر : يولي والله هوسة راح ادوخين ومتفتهمين شي.. بعدين شلون ناسية تاخذين الحباية مال دكتورة بغداد..
عاينت علي وفاتحة عيوني على كبرهه : عزه بعيني.. اهووو غير تذكرني..هسة شلون..
صگر : كعدي ارتاحي باباتي..شكو قابل وحيدة..
دنوة : والفستان مو حرامات اجرته..
صگر : لبسيليا..خالو ومحمد حيطلعون يم علي..
دنوة : هااا..اكووول ليش تكلي ابقي..غمزت وابتسمت : تدلل باقية ما اروح..
كام يضحك واجة يمي ياكل..للعصر جان تجي السيارات وهوسة مدري شنو..ما حبيت الاجواء..ضليت واكفة بباب الكليدور واعاينلهم..شلون صگر انطاهه لا محمد ولا الحجي.. ولو الحجي اكبر منه..

بس صگر اله الحق..خالة ومرام راحو وياهه..بعدين شوي شوي بلشت تخف الهوسة وابتعد الصوت..انه رحت فوك نزعت الشال وسويت شعري..ضليت اتصنط من الدرج لحد ما طلعو الحجي ومحمد بعدين نزلت..صگر لابس قميص ابيض وبنطرون..الحذاء يلمع مثل كل مرة..البيت هدوء كلش.. نزلت ع الراديو جوه جبته بالصالة وكعدت اكلب بالقنوات..لحد ما طلعت اغنية ذوبت گلبي..عليته ورحت على صگر اتمشى جدامه..ورافعة الفستان من الطرف.. هو گاعد ويدخن وعيونه تاكلني گبل شفايفه..تقربت علي.. كام وكمشني من خصري..
صگر : اليوم معرس من جد وجديد..
دنوة : حبيبي انت..
باسني وصرنا بداخل جو الاغنية ولحنهه الهادئ..لحد ما خلصت..تقرب علي طفاه وصعدنا فوك..يمكن هذا اليوم اكثر يوم سمعت بي غزل..

انه كامشته من قميصه ومبتسمة..وهو يحجي..
صگر : احبج يولي شلون يعني..
دنوة : انه هم احبك..بس اكلك..
صگر : اي شنو..
دنوة : جلنار جانت تريد تحضر الحفلة وهاي..
صگر : عفتي العالم كله وتذكرتي جلنار..ابوية انتي عوفيهه مرة راحت بطريقهه شريد منهه..قابل اول اخير وحدة..
دنوة : شتقصد..يعني تزوج غيرهه عادي..
صگر : لا يولي يالله شوف..لك وين تفكرين..اقصد مو اول وحدة تطلك..وانه ما قصرت هاهية..
دنوة : يله اسفة شبيك صرت عصبي..
صگر : ما اصير عصبي على بنتي..تعاي هنا..
دنوة : ها شنو وين اروح..

حاوط خصري هو ويحچي بصوت ذابل..
صگر : بحضني .. اريد هلعسل يمليني بعطره..
عاينت علي هو مبتسم ويحچي على كيف وعيونه على رگبتي وإذاني..كمشت ايده بخجل..
دنوة : حبيبي..
صگر : شنو گلبي..
همست بإذنه : خاف أخرمشك..
ضحك هو ويمد إيده ع السحابة يم خصري : ميخالف..

طفى الضوة واخذني لحضنه بهلفة وحب.. بس أنفاسنا وصوتنا الذايب .. هو بإسلوبه يخليني أتبع إحساسه وحبه واتجاوب وياه بكل حركة يسويهه.. ضليت بحضنه واسمع كلام غزل منه..فرحانة بي وبقربه مني..

بالليل نزلت اسوي عشه ونظفت البيت..اندكت الباب واجت خالة والحجي ومحمد..خطية مبينه باجيه..اي حقهه غير بتهه الوحيدة فوكاهه..طبو للبيت عادي..مر اسبوع..خلصت فترة العلاج..لازم ارجع ع الدكتورة..بس اليوم السبعة مال اخلاص هم ما اروح ميصير..فكلت اخليهه ع اليوم الثاني واروح.. بالليل صگر راح يسبح وانه بالغرفة اغير الجراجف..

تلفونه دك يمكن عشر مرات..ميقبل اكمشه..يكلي يدك يحترك معليج بي..فعفته..كملت الجراجف..سكت شوي بعدين رجع يدك..دخت وضجت من صوته..رحت اشيله ما مكتوب اسم بس رقم..شلته بدون ما احجي خاف يطلع صديقة ولد ادور يرزلني
- : الو حبيبي وينك صار ساعة ادك عليك..

يتبــــــــــــــــــع.........................

الوقت متأخر ادري ؛ بس مريضة اليوم مع ذلك ماردت اخليهه على عكبة..كنت ناوية اكتب قبل الفطور وبعده بس هاهية بعد ، المهم توقعاتكم مثل ذاك اليوم منو برأيكم؟