رواية اسألي عني الليالي الفصل التاسع وأربعون 49 - بقلم رقية جاسم

اسد شباچ حسنك لو تعديت ..
واضيف تراب جدمك وردة البيت ..

واسألك لو طفح حسنك بالعيون ..
حلو بطبعك يالاغنج لو تحليت ..

قناة التليگرام

حساب الانستگرام

الـبـارت الثامن والاربعون.................

طلعت من الغرفة بدون حذاء..ورجلي توجعني وجع مو طبيعي عبالك بيهه ابر..شعري مكفش والشال محطوط على رگبتي مثل واحد يريد يخنكني بس فكيت روحي منه..عاينت للصالة تصفر صفر..محد اكو..كلهم نايمين..فتحت الباب البراني وطلعت اركض والتفت وراي..ضليت اركض ومرجعة راسي ليوره لحد ما حسيت بضربه قوية على بطني..

فزيت مرعوبة واصيح..عبالك واحد كامشني من ركبتي بعدين هدني..كمت اتنفس سريع ودموعي بعيني..صگر فز على صوتي..اجة كومني لأن من فزيت طحت بالكع على وجهي.. حلكي كام يوجعني..كمت ابجي..حضني ويمسد بشعري
صگر : لتخافين بنيتي..مابيج شي..كومي اغسلج..
اخذني للحمام غسل حلكي بعدين رجعنه..ضل حاضني ويهدي بيه..بقيت كاعدة لوجه الفجر بعدين نمت..ثاني يوم هم بقينه يمهم بعدين وراهه رجعنه للبصرة..بالطريق مكدرت انام فنزل صگر جابلي شي اكلة..وصلنه للبيت المغرب لأن ما طلعنه الفجر مثل كل مرة..صگر جان كاعد وياي للفجر مكدرت انام حسيت روحي متوترة والبيت جديد علي..ولو هم الجماعة محد حاجاني..بس ما ادري هذا الشي بداخلي..

طبينه للبيت استقبلتنه خالة..وجهه وحدة يجيب الراحة.. شكد احبهه وارتاح من اشوفهه..وكفت وياي وكفات لو عمة غيرهه جان ما سوت ربع السوتلياه هي..بسوريا لوما هي جان تخبلت وحدي..هي قريبة علي من تشوفني كاعدة وحدي تجي يمي تحجيلي على صگر وحياتهه كبل..يعني بس تريد شي تلهيني علمود ما اضوج..خصوصا بالفترة التوفى بيهه ابوي .. ما عافتني ولا دقيقة..فترة وعدت..

كعدنه بالصالة وصگر محاوطني من جتفي مقربني علي.. ويحاجي الحجية..اجت اخلاص سلمت علي جاوبهه من ورك خشمه..وجهه ثكيل عليهه..انه معاينت بوجهه اصلا.. يغثني شكلهه واسلوبهه..بقينه شوي بعدين خالة كالت حروح اصيح جلنار تسوي العشه..صگر اخذني من ايدي وبايدة اللخ الجنطة مال ملابس وصعدنه فوك..غيرلي ملابسي وكعدني بحضنه..ضل يعدل بخصلات شعري ويهمس..
صگر : منظرج مديروح من بالي..من لكيتج تبجين بالمطبخ وخايفة من النار..حسيت روحي غلطان الف غلطة..شلون اعوفج وحدج..
سكتت ما جاوبته..خطية هو دائما يحاجيني..يكلي ارجعي مثل كبل..تعبت اشوفج هج تعبانة..بس انه هلكد ما احس المرض مسيطر علي اعوف حجية واجاوبه جواب بعيد عن الديحجي..اكلة شوكت تطلع جلنار..

لو اكعد احجي حجي ما موجود..انت بالمخابرات..وانت تشتغل وي الامريكان..عفت مرتك وجهالك وووو..حجي مدري منين.. كلشي بية منقاد لأوامر ما اعرف منين..خصوصا لساني.. اذا حجيت ما اسكت..يرادلي ساعات يلة..احس لساني يوجعني واحس حلكي وفجوجي همات توجعني بس مع ذلك ما اكدر اسكت..انه المريضة ادوخ هلكد ما احجي..شحال لو صگر كاعد وياي من الصبح لحد ما انام..هاي اذا فزيت ولكيت الضوه مطفي..اكعده من النوم وابجييي..عبالة شفت شي جدامي لو رجعتلي الحالة..اكوم ابجي وأشر ع الضوه هو يفهمني ويكوم شغلة..يحضني ويبوسني لحد ما انام..

هاي هج خلص اول يوم..انطاني الدوه بموعده وكلش حذر بأدق التفاصيل..هو اصلا طبعه مرتب بشكل..يمكن مرتين او تلاثة شفت ملابسه ع الكرسي..هو يضمهن ويرجع كلشي لمكانه..من يكون هو بالبيت وينزل يشوفني اطبخ يجي يكعد يمي..اكلة متروح تكعد يم الحجي..يكلي ما اضيع فرصة خاطر اشوفج بيهه..لو يجي يساعدني..يعني صگر صدك ما يشبه احد ثاني..واضح الحب بكل تفاصيله وحركاته..بكل كلمة يكلياهه..وره تقريبا عشر ايام من الادوية والتمارين.. شويه ها بلشت اصحى..كبل جنت ابتسامة ما ابتسم..هسة اذا صگر حاجاني ابتسم..بس اكدر استقبل من عنده..اذا واحد غيره يحجي عادي ما يهمني..اخلاص من اشوفهه عادي مو مثل كبل اريد اخنكهه لو اسويلهه شي..

كبل جانت الحجية دورات تجي تصعد فوك بالفترة الاولى من مرضي..تصبر بصگر..
الحجية : ها يمة شلونهه دنوة..
صگر : شوفت عينج..بس تحجي وتبجي..
الحجية : ميخالف حبيبي..قابل بيدهه..مو كلت اخذهه للدكتور باجر..بلكت يطلع علاجهه يمه..انت صابر صارلك سنين..
صگر : اي والله ومستعد اصبر عمري كله..بس كولي تصير زينة..انه اصبر علمود اشوفهه مريضة لو اشوفهه يمي وتضحكلي..عمي ما اريد تسوي شي بس اريدهه زينة.. يمة تعبت والله..شكد اتحمل بعد..هم عندي شغل والتزام بكد شعر راسي..منا البيت ومشاكل اخلاص المتخلص..هاي متفتهم بالبشر..يابة بدون مشاكل..مارضت..لحد ما مرضتهه..

الحجية : الله يساعدك ياعيني..اكيد مو سهلة عليك.. ما اريد اصير انحيازية وعبالك ادافع لاخلاص..هي هم أذتهه وسمعتهه حجي ما ينسمع..بس جلنار سوت بيهه هج..هي ضلت تغث بيهه وتحجي حجي ماصخ..
صگر : ادري..انه هم غلطان..كله صوجي..
الحجية : انت شعليك حبيبي..
صگر : بليلتهه اجت للغرفة وهي مريضة..كامت تعاتبني وتبجي بس ثكلت وجهي عليهه..ومنا جنت ما اخليهه تشوفني بس بالليل من تنام اشوفهه.. والله شعور الذنب اكلني
الحجية : لا ياعيني ليش تحجي هشكل..قابل انت مقصر وياهه..هسة تاخذهه للدكتور ويشوف شبيهه..لا تضل هج هو انت بيك حيل..
صگر : ما ادري بلكت..اخذهه واشوف..

هاي هج جانت تحاجي..انه كاعدة واسمعهم بس من اريد احجي فالحجي كلة يكون خارج الموضوع الديحجون عنه.. بهاي الايام كمت انام مثل كبل..بالوحدة اكثر شي بعدين اغفى وحدي..اكعد الاكي صگر يم راسي ويمسح بشعري.. لو يبعد الخصلات من وجهي..بهاي العشر ايام طبيت سبحت وحدي بدون ما اكول لصگر او هو ياخذني..هو جان جوة فمن صعد وشافني سابحة عيونه لمعت..اجة حضني ويبوس بيه
صگر : يولييي شنو هاييي.. ما مصدك الداشوفه..احد ساعدج لو رحتي وحدج..
دنوة : لا انه وحدي..محد يساعدني غيرك..
صگر : بعد عيوني هلعيون..اساعدج وانه الممنون.. والله فرحان ما راح الصبر بلاش الف الحمدلله..
حضنته بعدين بالليل طلعني..اشترالي حلويات وجباسة يكلي بس كليلي شتريدين اجيبلج..هو يعرف شحب فما احجي هو يجيب..

ردة فعله طبيعية لشخص مثل حالتي..باعتبار سويت انجاز بعد فترة الخمول العشتهه لأن هملت نفسي الى درجة.. هو يلبسني هو يوكلني..هو يسبحني هو كلشي يسوي وهاي من ينزل للواجب خالة تصير بمكانه..رجعنه للبيت ضلينه كاعدين بالحديقة بعدين انطاني الحباية ونمت..كعدت الصبح لكيتة ديلبس ملابسة العسكرية..كمل واندار شافني كاعدة..اجة يمي باسني ويعدل بشعري..
صگر : حروح للواجب..
دنوة : تتأخر لو لا..ليش حتعوفني مو كلت ما اعوفج..
صگر : ما يصير اطول اكثر..امي بمكاني مو تحبيهه.. ان شاء الله ما اطول..ديري بالج على نفسج..
لحيته طولانة صايرة تجكجك..ابتعدت عنه كتلة : لحيتك تجكني.. خلة ايده عليهه وابتسم..
صگر : والله ناسي روحي من تمرضتي لسه..هسه حروح احلقهه مايصير تبقى..

باسني واخذ جنطتة..رجلية اخذتني لعنده..حضنته هو وداير وجهه..كتله : حشتاقلك..
اندار وعلامات الفرح والصدمة بنفس الوقت بعيونه واضحة.. دنج صار مقابيلي..
صگر : يابة مشتاك لهلكلمة من حلكج..
ابتسمت بس مو على حچيه..ابتسمت لأن هو ابتسم.. اسمع كلشي بس ما اسوي شي..بس صگر من يسويلي شي استقبلة وافهمه..افهمه كحركة..ككلام لا..باسني وراح.. نزلت وراه كعد يوصي بيه عند خالة..
صگر : يمة بالج عليهه..
الحجية : حبيبي ان شاء الله..هم بنتي هي..
ديحجي جان تجي جلنار..كامت تبجي : صگر بعدك على قرارك..والله مدا اكدر انام من التفكير..
صگر : طبج مرض..الميعرف تدابيرة حنطته تاكل شعيرة.. وانه ساعدتج هواااي..وكفت وياج بكلشي..

حتى حطيتلج محامي علمود ابنج..ولو هو مو ابني بس ماردت اشوفج محرومة منه..ادري بيج متعلقة بي وهو هلوحيد.. ما اريد احرك گلبج علي..اكدر اكلج طبج مرض ويروح الولد.. ليش هانت عليج كل هلمواقف ورحتي عليهه تأذيهه.. ليش جي احبهه..لو جي مريضة وما تكدر تحجي..
جلنار : والرب بعد ما احاجيهه واسكت..شتريد اسوي بس لا ترجعني لبيت اهلي..ميريدوني..
صگر : يريدوج..بتهم انتي منهم وبيهم..انه اعرف شتصرف بس خلارجع من الدوام واشوف شسوي..مال تبقين هنا انسي انتهت بعد..
كامت على خالة تبوس بيهه وتعاين لصگر : خالة شبيج احجي شي..يعني ترضيهه اتهجول..
الحجية : انه معليه..انتي ورجلج..
صگر : بله ما اريد تمسكن ودموع جذابة..

شوفي هاي دنوة جدامج توهه دتصير زينة..اذا رحت للواجب واجيت لكيتهه منتكسة اسويج وصلتين.. الحجي الج ولاخلاص بس تحاجوهه يصير غير حساب..
جلنار : صگر والرب حبقى كاعدة وما أذيهه..
صگر : لج بابا لا تتوسلين..غصب عنج ما تتقربين يمهه وتعوفيهه بحالهه مو طلب..يله هسة روحي من وجهي اريد اتوكل لبغداد..
راح لعند الباب وأشرلي..رحت يمه..باسني وحاوطني من جتفي بعدين تمشينه للباب..ابتسملي وراح..ضليت كاعدة بالحديقة لحد ما اجت خالة كعدت يمي..
الحجية : ترتاحين هنا..
دنوة : اي كلش..حتسوون غده..
الحجية : خلته اخلاص ع النار..سوت تبسي وتمن..
دنوة : ها..اي يله طيب..محمد حيجي اليوم..

الحجية : اي شمدريج..
دنوة : سمعت صگر يحاجي البارحة..ضلينه كاعدين شوي بعدين طبينه جوه..اخلاص وجلنار خانسااات ع الاخير.. ولا وحدة منهن حجت كلمة..انه ضالة يم الحجية..دللتني شكد حبيتهه..كعدت يمي وتخلي اللحمة الزينة جدامي..بالبداية شافتني ما اكلتهه جان تقطعهه نصاصة وخلتهن ع التمن.. عاينتلي وابتسمت..العصر اجة محمد..سلم علي وكعد يمنه حجيت شوي وسكتت..كمت من احس روحي تعبت من الحجي اسكت..كبل اتعب ما اتعب اضل احجي.. هسة احسن ولو تجيني فصلات بس بعدني اليشوفني يكول هيانهه مو انسانة طبيعية حالي حال محمد واخلاص..اكو فدشي.. ويروح وي العلاج ومرور الايام..بالليل خالة انطتني الحباية وطلعنه بالحديقة شوي للدعش بعدين طبينه..نعست ونمت..

وهاي هج مرت الايام جلنار واخلاص ولا كلمة.. بس دورات اسمع اخلاص تحاجي جلنار ع الخطوبة مالتهه..مره سمعتهه تحاجيهه على صگر واهلهه..
جلنار : حروح وما احضر خطوبتج..
اخلاص : لج بلكت الله تتقدم..غير هاي دنيوة مريضة صگر وكف الدنيا كلهه علمودهه..هسة انه شعليه..
جلنار : انتي شبسرعة غيرتي رأيج..مو جنتي تحبين طارق وما تعيشين بدونه ع اساس..
اخلاص : يمعودة..شسوي يعني..شفتي صگر شلون معند وهاي دنوة ماكدرت تقنعه..بعد هاهية خوما بس انه..الدنيا ما توكف على احد..وانتي هم حتزوجين وتكملين حياتج..
جلنار : لو يخلوني اهلي جان كلت اي..بس يله..
اخلاص : ربج ما يعوف عبده وحيد..هسة تشوفين شيسوي بهاي دنوة..هي هجولتج..

بس المن تشتكين اذا القاضي ظالم عبالك مسويتله سحر.. شتكلة يكللهه نعم..شدعوة عيني شدعوة..قابل منو هي بت الوزير..اشوف مزوجة ومطلكة..يمكن حامل وطارحة.. جا ليش من حبلت طرحت..يعني اكو شي مأثر عليهه كبل..بس هذا صگر مدري اعمى مدري هو يعمي روحه..
جلنار : كتلج يحبهه لا سحر ولا شي..ليش ماكو هيج حب.. بعدين هي صغيرة تره شتعرف عن السحر وسوالفه..مو كلتي يحبهه من زمان ومن تزوجت مارجع للبيت..
اخلاص : خليهه سكتة..من تزوجت لو يشوف نملة يتعارك وياهه هج عصبي نار وما يتحاجى..حتى اكل ما ياكل..
جلنار : اي شفتي..مو اكلج..همزين تزوجهه وخلص..
اخلاص : ها..شو دتحجين عبالك اخوج مو رجلج..
جلنار : مو تكولين الدنيا متوكف على احد..هاي صدك محتوكف على احد..

واني اروح اشوف حياتي بعد..يمكن الايام العشناهه حتضل ببالج وبالي..يمكن حنرجع نلتقي..الرب يعلم..
ضلو يحجون..عفتهم ورحت يم خالة..بس كلماتهه بقت ببالي ولو بوكتهه جنت فاصلة..مرت الايام..انه جنت نايمة فوك ماردت ابقى جوه..اشتاقيت لغرفتي..خالة انطتني الحباية وصعدت.. الصبح كعدت على لمسات صگر يمي..عدلت كعدتي وشعري مهوس من النومة الغلط..كعد يعدل بخصلات شعري ويحاجيني بهدوء كلمة كلمة مثل كل مرة..
صگر : شلون صرتي..خوما احد حاجاج..
دنوة : زينة..لا محد خالة وياي دائما..ضل كاعد يمي يحاجيني ويبتسم..لحد ما اجت جلنار..
جلنار : اذا عندك وقت من ترتاح اريد احجي وياك بشغلة
صگر : ميخالف..
راحت وسدت الباب..كتلة : شتريد منك..

صگر : ما ادري..اشوفهه عود..
دنوة : وانت حتاخذهه لبيت اهلهه لو جذب..
صگر : اي طبعا اخذهه..واطلكهه هم..هاهية..سويت العليه وماقصرت بشي لا وياهه ولا وي ابنهه..
دنوة : زين شلون..مو تكول اهلهه ما يريدوهه..
صگر : ماكو اهل ميريدون بتهم..انه عود احاجيهم وافهمهم
سكت شوي بعدين حضنته..وره يومين كعدت الصبح مالكيته كمت غسلت وجهي ونزلت..صارت خالة بوجهي..
الحجية : صباح الخير حبوبة..تعاي تريكي..
دنوة : اي..بس صگر وين..
الحجية : اخذ جلنار وراح للموصل..
دنوة : ها..يله اجيت..رحت وياهه تريكت بعدين كعدنه بالمطبخ اخلاص تفتر يمنه ويسره وتصيح ضايجة اليوم اريد اطلع لو مدري شيصير..

الحجية : اي اطلعي انتي ومحمد..
اخلاص : وين يقبل هذا..كامش التلفون وكاعد..يمكن هم يحبله وحدة..متشوفي شلون خانس..
الحجية : يحب ما يحب شكو بيهه..بس يكول اخطبلياهه.. عنده فلوس وشاغول شبي قابل..
اخلاص : هااا اشو هو حلال علي الحب وانه حرام..
الحجية : باع هاي..هسة انتي تجيبين محمد على طارق مدري صخام..ماكلنه حرام..بس الولد مو خوش وانتهت..
اخلاص : اي هو انتي ماعندج غير هذا القرص كل مرة تعيدينة نفسة من تريدين تحجين..
شالت التختة تريد تشمرهه يمهه : اذا متروحين من وجهي بس يجي صگر هو يعرف يتصرف..دولي يلة..احترمي من تحاجيني مو بكدج انه..انه امج خوش لو لا..

ضلت تعاينلهه وراحت بالعجل..انه بس ساكتة واسمعهم.. للعصر جان صگر يخابر..كللهه حبات عند خالي تعبان من الطريق..بس ما حجالهه شسوه..كال من ارجع احجي.. بالليل انطتني الحباية ورحت صعدت فوك انام.. وره يومين كعدت الصبح..كمت غسلت ونزلت جوة..تريكنه عادي بعدين اندكت الباب..طلع الحجي يفتحهه..شوي وطب هو وصگر..اول ما شافني جان يبتسم..ابتسمت على ابتسامته بدون ما احجي شي..بعد سلام وكلام كعد يحجي شصار..
الحجية : ها يمة شسويت..
صگر : اخذتهه ورحنه للموصل..دلتني على بيت اخوهه لأن ابوهه ميت وامهه باقية يم اخوهه..بالبداية استغرب كلي منو جابك وانت منو..كتلة ماعندي شي ولا اريد منكم شي.. بس جاي اوصللكم بتكم..طبيت وهي طبت وراي جان تكب العيطة هاي شجابهه..

واحنه ما نريدهه..كنالهه اذا اجيتي بعد ما نفتحلج الباب.. بعدين انت الثاني منو..منو يكول هذا ابنهه..
الحجية : عززه صخام..شنو منو يكول ابنهه..صدك جذب
صگر : اي والله هنا تعاركت وياهم..كتله هي اجتكم كبل وجان الطفل بيدهه بعده صغير..هسة وره ما كبر تردون تسمعوه حجي يخلي يكره امه..كتلة هسه خلنكعد وانه افهمك كلشي واروح..كام يصيح جان تطلع مرة شوي اكبر منج..كالت فوتهم وراهه طبينه..هي كامت تبجي مكدرت تحجي..كتلة جنت عاقد عليهه لأن مالهه احد وصار حجي..رجلهه المرحوم بحسبة اخوي فما ردت اعوفهه وحدهه هو هم اله فضل علي.. كال وشتريد هسة احنه كايليلهه ما ترجع بعد..اذا عتبت عتبة الباب بعد لو تطلع نخلة براسهه ما ترجع..المهم سالفة منا سالفة منا كتلة مستعد اطلكهه جدامكم بس المهم تبقى يمكم..هاي بتكم وهذا هم ابنكم..شلون تعوفوهم بنص الدرب..

كال هي خلت ابونه يموت من القهر..صار بي ذاك المرض وراد يشوفهه بس هي ما تدري..يعني متدري ابوهه مريض محد كايللهه..كتلة اخي انه شعليه..هاي مشاكل بيناتكم..انه جاي اكلكم هاي مرتي واريد تعرفون وتخلوهه يمكم لأن ظروفي متسمحلي اخليهه عندي اكثر من هج..وراهه كال اخليهه عدنه بس طلكهه..تدرين ما اندل مرايح هناك فهو اخذنه لسيد.. المهم طلكتهه وراحت بعد..كتلهه ما اريد ترجعيلي بعد.. شوفي حياتج..وراهه رجعت لبغداد..ضليت عند خالي يوم بالثاني طلعت وهاي جيتي..
الحجية : والله احسن شي سويته طلكتهه ورجعتهه لبيت اهلهه شنو مصرف زايد..عدهه راتب رجلهه خلتفعلة تروح تاخذه وتعيش منه..شكو لاطشتلك..
صگر : اي والله تعبت من المشاكل..هم بشر واتحمل لحد ما اطك..يله..الله وياهه المهم ماقصرت وياهه بيوم..

الحجية : الحمدلله..انت ما يطلع منك نقص..تعال اكلك لكمة وروح ارتاح هم تعبان من الطريق..
صگر : ما اشتهي حروح انام..كعدوني ع الغده عود..
ضل كاعد شوي بعدين صعد..اخلاص شالت المواعين وعافتهن انه حسيت اعصاب ايدي ثبتت..ايدي كامت مترجف.. الرعشة والرجفة قلت كلش..دقايق ودورات ماكو حتى..فكمت اغسل مواعين جان تجي خالة..باستني وطبطبت على جتفي..
الحجية : الف الحمدلله..خلي ايمانج بالله جبير..كلشي يرجع لمكانه وتأكدي انتي ما أذيتي بشر بيوم..ربج حيوكف وياج بكلشي..لا تخافين..
ابتسمت..فرحت بيه لأن سويت شي..طول الفترة هاي كلشي ما اسوي..بس كاعدة..ايدي تكوم ترجف اذا سويت شي بي حركة..اقصى شي اسوي اسبح وامشط شعري..

كملت وصعدت فوك..لكيت صگر داير وجهه وظهره علي قطرات مال مي..مبين سابح..تمشيت يمه حضنته..اندارلي وابتسم بعدني عنه شوي ولبس التشيرت..اخذني للجرباية كعدني بحضنه وحاضني..
صگر : شجنتي تسوين..
دنوة : غسلت المواعين واجيت..
صگر : صح والله..
دنوة : اي والله..ليش ما مصدك..
صگر : يالله..دتصيرين زينة يوم عن يوم..
مد ايده للكومدي طلع الادوية..ثنين منهن خلصانات بس واحد باقية بي وحدة..مكتوب علي مرتين..
صگر : لازم اشتري مرة اللخ..وراهه اخذج لبغداد تشوف حالتج.. انتي دتحسين بتحسن..مرتاحة..
دنوة : اي من خالة تنطيني الحباية ارتاح..

حتى دا انام من وكت وما اكعد للصبح..مو مثل كبل تتكطع نومتي..ابتسم وباسني من خدي وركبتي بوسات خفيفة هو ويهمس : يالله..بس ديري بالج على نفسج..
انتبهت مخفف لحيته..بس صايرة تجنن لأن بيهه شيب.. بالليل انطاني الحباية وكال : يله بدلي اخذج وياي..
دنوة : وين نروح..
صگر : اشتري الشريط وافرج شوي تتونسين..
دنوة : ها..يله هسة..كمت غسلت واجيت بدلت بعدين طلعنه.. نزل اشترى الدوة ونزلني وياه ضلينه نتمشى وكامش ايدي لحد ما كتلة تعبت خلنرجع ورجعنه..كبل لا انام كمت احجي خرابيط..بس ما طولت..ربع نص ساعة وسكتت بعدين نمت وهاي هج مشى الحال لحد ما خلص الشريط..صادف صگر بالواجب..وره ما خلص الشريط حسيت بفرق جبييير..

اكثر من اول مره..حتى حجي كمت ما احجي..الرجفة راحت نهائيا..كمت اغسل مواعين واساعد خالة بالطبخ..كمت ارجع لنفسي القديمة شوي شوي..فرحتي ما تنوصف بهاي الفترة اكعد احس يوم يوم علمود يرجع صگر ويشوفني شلون تغيرت ورجعت مثل كبل..لمدة شهرين ونص انه اخذ العلاج يوم بيومه خالة وصگر ساعة وحده ما يفوتولي..يعني التزام كلش.. هذا الالتزام خلاني اوصل لهاي المرحلة..خالة فرحانة على فرحي لأن اليشوف حالتي كبل العلاج يكول هاي مستحيل تصير زينة..بس الحمدلله على كل حال..متيقنة ان كلشي مو زين يصيرلي..وراه شي زين يفرحني ويطلعني من العشت بي.. بالليل غسلت المواعين وكعدنه بالصالة كلنه..انه والحجي ومحمد وخالة..بس اخلاص جانت بغرفتهه..حفلة تخرجهه قريبة تريد تشتري ملابس وخايفة من صگر..

تخاف تطلب منه بعد ع الرزايل الاخيرة الاكلتهه..ضلينه كاعدين للدعش ونص تقريبا بعدين صعدت فوك..سبحت وغيرت ملابسي..بعدين نزلت على كيفي لغرفة خالة..عبالي نايمة فما ردت اكعدهه..بس اخذ التلفون..طبيت للغرفة لكيتهه كاعدة كعدت يمهه شوي بعدين كتلهه : خالة انطيني التلفون اخابر صگر..صار هواي محاجين..
الحجية : تريدين اكلج الصدك..باجر يجي..هو خابرني اليوم الظهر..خابرته كبل نص ساعة كلي مشغول وحقفل التلفون
دنوة : ها تحجين صدك..
الحجية : اي حبوبة شنو اجذب عليج..
ابتسمت وكتلهه : لا عيني ماكلنة هشكل..حشاج من الجذب يله اروح انام..عبالي اخابرة..
الحجية : يله هسة يجي واريدج تفرحي..
دنوة : افااا..غير يدلل..انه هم فرحانة والله..

الحجية : الله يساعدج خالة..روحي ارتاحي حبيبتي..
انطيتهه بوسة بالهوى..كامت تضحك..ابتسمت وصعدت فوك حسيت براحة مو طبيعية..تغيير جبير للأفضل..حضنت المخدة الينام عليهه صگر مبتسمة عبالك احاجي : شكد ساعدتني وما مليت مني بيوم..حتى بأسوء حالاتي تكلي مابيج شي.. احس بكلشي واعرف..بس صدكني مو انه اسوي هج.. تعبانة جنت احس بسواد جبير بهاي الفترة..اعصابي تلفت بمعنى الكلمة..يعني لو واحد غيرك جان عافني مريضة..شلون تحملتني انه واحجي..حتى غلطت عليك..اخذت نفس وخليت راسي ع المخدة مبتسمة لحد ما غفيت..كعدت الصبح على صوت هلهولة..ما ادري ليش ضحكت..كمت غسلت ولبست شال بعدين نزلت جوة..شفت خالة طش جكليت على صگر وهو يضحك..
صگر : هههههه..يمة قابل اول مرة..

الحجية : لا عيني وليدي صار شكبرة شكدة بعد شريد من الله بعد منو يحاجيني..ام العقيد..
ابتسمت وكلت بداخلي..شنو ترفع..نزلت سلمت علي.. ضل مبتسم ورافع حاجبة باستغراب..كعدنه بالصالة..طلع مترفع من مقدم لعقيد..والله شي جبير..مجنت اسمع هاي الكلمة بس من جدي دورات..يكول اجة العقيد الفلاني رادني بهج شغلة.. بس هسة رجلي عقيد..ضلينه كاعدين لحد ما صعد فوك.. انه كمت للمطبخ لكيتهم متريكين..اخذت جبنة وجم زيتونة.. بعدين نكعت التمن وصعدت فوك..لكيتة متمدد ويكلب بالتلفزيون سديت الباب ورحت كعدت يمه..بسته ومديت ايدي على شعره امسد بي..اخذ ايدي باسهه..
صگر : شلون صرتي..
دنوة : اممم..مو حيل..بعدني مريضة..
صگر : بس مدااحسج هشكل..

ابتسمت : لا كلش كلش زينة..ردت افرحك اليوم..لكيتك فرحان اصلا..يعني خربت المفاجئة..
عدل كعدته وفاتح عيونه : صدك لو شقة..
دنوة : لا صدك..
صگر : والدوايات..خلصن..
دنوة : اي اولت البارحة اخر وحدة..

ابتسملي هو ويعدل بشعري : دناوي..
دنوة : شنو حبيبي..
صگر : بنيتي انه موصغير.. وانتي كبرتي بعد ..اريدج تنتبهين لروحج ودواياتج كلش زين..وانه وياج ماتاركج ابد.. بس اريد تعرفين انه تعبت من المشاكل والأمراض.. لاتحسبين دااحملج منية.. لا والله مو هيج ..بالعكس خايف عليج وحتى بالواجب عصبي وارزل چي بالي متشوش عليج..الجنود خطية انه احترمهم ومااهين واحد منهم بس هلمرة غير.. فشوفي شكد مو عصبي وهادئ بس بطيحتج هاي حتى علي أثرتي.. كافي اتركي العصبية وانتبهي لروحج يروح روحي..انه وانتي وامي.. انسي الباقين.. لوما اخاف عليج مااحچي هيج.. اصلا مامصدك اشوفج هيج متحسنة.. حتى جلنار طلگتهه علمودج وقطعت كل صلة ممكن توصلهه علي.. كله لخاطرج ميخالف.. اسوي هيج واكثر بعد.. دتفهميني ..
حركت راسي يعني اي..عيوني دمعت من كلامه.. عدل گعدته ونزل رجلي من الچرباية.. جرني من ايدي گعدني على رجله وايده محاوطة خصري..

صگر : ضجتي مني..اعتذر بس لاتفهميني غلط..
خليت إديه على خدوده : لا مو هيج..بس انه تعبتك صحيح.. مهملة ومااهتم..
قاطعني : لاتحچين على روحج ابوية..
دنوة : لا انه هيج صدك مو دااحچي على روحي.. حتى الحمل الاول لمن طرحته جان تصرف طايش مني..المفروض احافظ عليهه..
اخذ إديه باسهن وقربني لصدره.. : ميخالف حبيبي.. الله كريم .. كلشي ينحل ..انه صار ساعة احچي لاتقهرين بروحج وهسه دتذكرين شغلات قديمة..
دنوة : مووو..
رفع راسي ويعاين على شفايفي : مو شنو عمري..

دنوة : مو هيج..ماكو شي..
تقرب من شفايفي وغمض عيونه بحنية.. شواي وابتعد.. گتله بطريقة غبية : ليش..
ضحك ونزلني : قفلي الباب بين ما انزع..
دنوة : عزززه شتنزع شدتحچي..
صگر : ههههههه..يولي انزع القميص شبيج..
اخذت نفس براحة : اي عبالي..

ضل يضحك..كمت قفلت الباب وانداريت ..لكيته واكف يم الميزتواليت ولابس بس الفانيلة بدون القميص.. ظهره وچتافه مبينات.. مشخطات ..هاي انه استغفرالله مني.. شگد ما هو حنين بس ماادري..مااگدر يعني لازم اخرمشه.. شافني صافنة علي ..اندار ع المراية وابتسم..
صگر : همزين ماانزع القميص..
تقرب مني كمش إديه..مد ايده اللخ ع المجر طلع مگراضة .. : لااا حبيبي ليش..لا مااقبل لاتگصهن..
صگر : لج انتي لو اچتفچ هم حلال.. بس گصريهن يابة مايصير..
دنوة : ها هيج الحچي..لا اشو مااگصهن ولا اگصرهن..
صگر : لا اشو تگصريهن يله جدامي..
كمش ايدي يريد يگصهن واجرهه منه..هن موهلگد طوال بس شكل الأظفر يأثر.. اخر شي فتحت القفل ردت اطلع.. جرني لصدره وبإيده اللخ قفل الباب وطفى الضوة..
همس : انعل ابو الاظافر..دتعاي مامصدك تصيرين زينة..

ضحكت وحضنته.. مشينا للچرباية وكلشي تجدد بيناتنا.. روحنا وهمسنا واحساسنا..بكل مرة من اصير بحضنه يگدر يخليني احس بلهفته وابادله مثلهه..بهلمرة جان اكو برود من ناحيتي ونوع من الصعوبة بتقبله كزوج مرة لخ..هو حاول يتغاضى عن الموضوع

اخير شي حضني ويعدل بشعري خصلة خصلة..
صگر : يمكن حنسافر..
دنوة : ها وين..
صگر : ما ادري خلاشوف..اول شي لازم ارجع اخذج للدكتورة علمود تشوف حالتج..بعدين عود..
دنوة : بس ما اريد اروح مرة اللخ..
صگر : بس تتأكد منج..مو تكولين صرت زينة..
دنوة : اي..يعني هاهية شكو نروح..
صگر : يولي بس تتأكد لا تعاندين..
دنوة : يله سكتت ما اعاند..
ابتسمت وكمت لبست وشلت شعري..هو كال لبس البرنص وراح للحمام..شوي وصاح : دناوييي..جيبيلي ملابس..

صگر الوحيد يدلعني هج..كلهه تصيحلي باسمي..اصلا هو اسمي عبالك دلع مدري شلونه..كمت طلعتله ملابس ورحت يم الباب ضليت انتظر..بعدين فتحهه وسحبني من ايدي.. قفلهه وحاطني وره الباب..كتله : شنو شنو شكو..مو اخذت ملابسك يله خلاروح عفت التمن جوه..
هو ويهمس باذني : عوفي..اخلاص هناك..
حسيت بحرارة صارت براسي ونزلت لجسمي كلة.. حضني واخذني جوة الدوش انه وملابسي : صگرررر ليش هشكل مو تبللت..كام يضحك ولا يمة..خلص ولبس..اخذت البرنص لبسته وطلعت وراه..شافتني اخلاص..عوجت حلكهه وراحت.. عفتهه ورحت للغرفة بدلت ونزلت جوة سويت الغده..اجة صگر يمي سوه الزلاطة..كتلة : لا روح ارتاح..
صگر : مرتاح يمج..جم مرة اكلج..
دنوة : يله عيني سكتنه..شبيك عصبي..

ضحك وباسني..وهاي هج مرن تلث ايام..بعدين صگر كال لخالة خابري ام الولد الخطب اخلاص كليلة بعد تلث ايام يجون علمود الخطوبة..خابرتهم واتفقو..ثاني يوم انطاهه فلوس لاخلاص والي ولخالة..طلعنه العصر رجعنه بالليل بالتسعة هاي اخلاص ذوقهه صعب..انه اجرت فستان طويل التعلاكات مالتهه نازلة ع الجتاف لونه بصلي ومخصر..اكيد بي لمع بس هادئ وخفيف..خالة دفعت فلوس واخذت شي مناسب لعمرهه كمرة جبيرة يعني..ما اخذت كعب هو عندي واحد اسود وعالي يناسب هللون..رجعنه للبيت بعد فرة شطولهه..انه بس اخذت شغلتين تقريبا..الحصة الاكبر لاخلاص..رجعنه للبيت فرحانة وتريد تجرب الفستان..ضلينه كاعدين..جان الحجي جاي كبلنه بساعة..هم طالع مدري وين..خالة كالت باجر اخابر ام علي واختهه اللخ هن وبناتهن..مرام همات..عفتهم يحجون وصعدت فوك..تمددت وانزع الشال..شوي وطب صگر..

كعد ع الجرباية بسدي..
صگر : اشوف ششتريتي..
دنوة : هسة خلارتاح..
صگر : كومي لبسي خلاشوف شلون تطلعين..
ابتسمت وكمت..هو يعاينلي من فوك ليجوة : ها شكو..دير وجهك عيب..كام يضحك ودنج عيونه..لبست بالعجل لأن السحابة بالخصر مو من ورة..انداريت طلعت الكعب لبسته علمود يترتب كلة..كتله : يله شوفني..افتريت جدامه.. وجهه صار احمر..اجه يمي باسني وعاين ع الكعب..
صگر : مو نفسه لبستي بالمشية مال سرور..
دنوة : اي شمدريك..
صگر : من صعدت شفتج فوك انتبهت علي..
دنوة : هااا اي تذكرت..صدك عفية عليك متنسى..زين كلي البسة عادي مو..

صگر : لبسي حبيبي..حتطلعين احلى من المخطوبة..
دنوة : شوف لهلسبب احبك وامووت بيك..يله هسة دير وجهك خلابدل لأن تعبانة من الفرة..
راح كعد ع الجرباية ومخلي ايدة وره راسة : يله بدلي..
دنوة : ها شنو ماكلنة هج..
صگر : انه اكول..يله..
ابتسمت واخذت ملابس ورحت للحمام بالعجل..هو كام يصيح لج وييين..تعاي..كمت اضحك..والله عباله ابدل جدامه.. صار سنين متزوجين بس استحي..كملت وطلعت صگر ما عاينلي عرفته زعل..نزلت سويت عشه بعدين صحته..هم ما عاينلي .. شدعوة عيني..كملنه وكمت غسلت مواعين..هو ضل كاعد وياهم بالصالة..كملت وصعدت فوك سبحت وبدلت.. خليت مكياج بسيط لأن ما اعرف هلكد بي..فتحت شعري ورتبته ورحت طلعت فلم..

ضليت كاعدة لحد ما اجة..سويت نفسي نايمة..سمعته يحاجي روحه..
صگر : بله هاي نايمة..شلون عليهه سوالف..
ضل يحجي لحد ما كال كلمة طكيت ضحك..اندار متفاجئ عباله نايمه..كتلة : شبيك تحاجي روحك..صرت مثلي..
صگر : مو عساس نايمة..شعندج تتصنطين..
تقربت منه حضنته ومحاوطة ركبته : شبيك زعلان مني عمري هسة شسويت قابل..
صگر : عفية تعرفين تستخدمين لسانج..
دنوة : شقصدك..عود انه ما اعرف اتغزل واحجي حجي حلو مثلي..خاف عبالك اكول مثلك..
صگر : هههههه..اي يابة مثلج لا تضوجين..
حضني ونصى الصوت مال تلفزيون ورحنه بغير عالم.. التغيير من ناحيتي بلشت يقل..يمكن بسبب الادوية..

ضلينه كاعدين لتلاثة ونمنه..وره يومين العصر اجت ام علي هي وزينب ونور..اجت اخت خالة اللخ وعدهه بنية وحدة.. مرام هم اجت..انه جنت فوك بدلت وخليت مكياج..عدلت حاجبي بالملقط..توني دا اطلع جان يجي صگر يدور الساعة..
صگر : دناوي وين الساعة..حطيتهه ع الميز..
دنجت ادور بالمجرات..اجة حضني..انداريت واخذت ايده لبسته الساعة..بعدهه الحلقة بايده مانزعهه..ابتسمت : بعدهه الحلقة بايدك..
صگر : اي ما نازعهه بس مرتين يمكن..
بسته بوسه خفيفة علمود متطبع الحمرة..باسني وراح.. شوي ونزلت..سلمت عليهم..اخت خالة ام جاسم حبتني..تعجبت علي وعلى جسمي واسلوبي..
ام جاسم : يمة فدوه..ولج عيني هاي جنتج تخبل..هنيالج عليهه باعيهه شلون لهلوبة..

الحجية : ههههه..اي هو انه من زمان اكول عليهه لهلوبة.. يله يوم لجاسم وتفرحين بي..
ام جاسم : اي اذا مثل دنوة ليش ما افرح..
دنوة : ههههه..خجلتيني والله..
كامت تضحك..كعدنه سوه لحد ما كالو اجة الشيخ..بعدين راحت اخلاص يم الباب من سأل الشيخ موافقة..تذكرت يوم خطوبتي من صگر..صدك من احلى الايام بحياتي.. شكد فرحت بيومهه..تمنيت يبقى اليوم كله هنا..شوي وشغلو اغاني وهوسة صارت..كمت للمطبخ اجيب الكيك والعصاير.. اجة صگر يفتح بالدكم مال قميص الاولانيات..كتلة : شبيك
صگر : مابيه شي..جيبي هاي من ايدج واخذي للنسوان غيرهن جبت بعد..
دنوة : يله بكيفك حبيبي..
عاين علي وغمز..هو ومبتسم : ابقي حلوة لليل..

ابتسمت ودنجت..خجلني..هو يحجي كلمة ويروح تضل ببالي اليوم كلة..رحت ع الثلاجة طلعت غير كيك ورحت خليتهن بالصالة..ضليت صافنة عليهن..شلون يركصن هو احنه كلنه بنات بس استحي..شلون هن هج..انه وكاعدة جان تجي مروة بت ام جاسم..كمشتني من ايدي وكومتني تريدني اركص وياهن..صفكت شوي وضليت واكفة مكعدت..رجلي كامت توجعني..ضلو للمغرب ادور لبسنه شالات جان يجي الولد لبسهه الذهب وراح.. بعدين بدو يروحون..اول شي راحت ام الولد وخواته ثنين..بعدين راحت مرام وام جاسم..بقت بس ام علي هي وزينب ونور..لأن بيتهه مو بالبصرة بعيدة.. نظفت الصالة وغسلت المواعين مال كيك..الباقي ضميته ووكفت اسوي عشة..سويت شي خفيف وصعدت رجلية خيوط من الوكفة.. نزعت الحذاء وبدلت..مسحت المكياج وسبحت..

لفيت الخاولي وطبيت للغرفة.. تذكرت صگر كال ابقي لليل حلوة.. ابتسمت ورتبت الچرباية .. ياربي انه ليش هلكد مهملة من ناحيته..خطية.. كملت الغرفة ورحت ع الكنتور.. شكد عندي سيتات مدري المن ضامتهن.. اخذت واحد نيلي نهايته بيهه فرو ..شسورت شعري وخليت مكياج بسيط هو يحبه.. خليت من عطري اليجيبليا دائما..افشان النسائي.. كملت وعاينت لروحي بنظرة أخيرة..اي زينة حلوة.. جريت التلفون خابرته..
حاچيته بدلع : الو حبيبي..
صگر : ها گلبي..
دنوة : شوكت تجي عمري..وين انت..
صگر : يم علاوينا هنا انه وخالي..خير محتاجة شي حبيبي..
ردت اتحارش بي : اي محتاجتك..
صگر : ههههه..يولي مااكدر احچي.. ميخالف جاي ثلث ساعة بالزايد واطلع..
دنوة : ماشي حبيبي انتظرك..

سديته منه ورحت دورت اقراص مال افلام.. طلعت فلم عربي وجبت حب اكرز بين ما يجي.. الغرفة باردة وظلمة كلش.. اندمجت بالفلم.. شواي وفزيت ع الباب انفتحت.. رفعت راسي انه وأبعد الگذلة عن وجهي بإصبعي الصغير.. ابتسملي .. درت وجهي خليت الماعون ع الكومدي وشربت مي.. ضليت اتفرج على حركاته..نزع الحزام وطبگه.. ضحكت ..

خلاه ع الميزتواليت وحچه : شو تضحكين..
دنوة : تذكر بيوم زواجنا..لمن رحنا للفندق..همات نزعته وطبگته هيج ..كتلك حتكتلني..
صگر : ههههههه..هاي شذكرج يولي..لا عمي شكتلچ مخبل..
دنوة : اندري اشو انت تطبگه بطريقة تخوف..
صگر : ها انه اخوف.. لو اخوف چا ماع الترف بيدي..
: يعني شنو..
صگر : يعني چا شردتي من اول يوم..بس غير انه حنين..
دنوة : اويلي عليك..اي حبيبي كلش حنين انت..

ابتسم هو ويفتح الدگم مالت القميص.. لحظات جان ينشال الغطى مني..كمزت اريد أجره من ايده.. : صگررر ليش جريته مو باردة..
ضحك هو ويلفه : هاي شلابستلي.. تره عقل ماضل براسي ..
عاينتله بطرف عيني ومبتسمة..كعدت بهدوء ع الچرباية والعب بخصل شعري..اجه تقرب مني ويتلمس شعري..
همس : يحتاجلي هيج تعريسة جديدة..
دنوة : حبيبي والغطى..
صگر : شبي ابن الكلب..
دنوة : غير نتغطى..استحي..
صگر : انعل ابو لابو..انه موجود وتتغطين..

حاوطت رگبته وقربته علي..هو يشم بشعري ورگبتي.. : هاي مخلية من العطر الأحبه..ناوية تجلطيني..
همست بنبرة صوت ذبلانة : غير ادلل حبيبي..
صگر : اويلي هاي الجرأة انه اموت عليهه.. تعاي يولي ..

سلمته كلشي بكل حب ولهفة.. ملكي وحبيبي .. تعانقت ارواحنا قبل شفايفنا واجسادنا.. انه وي كل حركة يسويهه وهمسة يهمسهه روحي تموع بيده بالزايد.. خلص الليل بحضنه وبهمساته.. لحد الفجر گبل الأذان.. مشيت اصبعي على صدره.. كمش ايدي وقربهه من شفايفه .. : لاتتحرشين اريد اغفى..
دنوة : ليش حبيبي شسويتلك..
صگر : انتي كلچ تثيرين بلا ماتسوين شي..
دنوة : يله عمري مااسوي شي..
حضنته ونمت..

ثاني يوم الصبح سبحت ونزلت مالكيت ام علي وبناتهه..خالة كالت طلعو الصبح من وكت..وره يومين الصبح تقريبا بثمانية..بدلت وصگر همات بعدين طلعنه لبغداد.. هو جان حاجز هج وكت..بين ما وصلنه بالخمسة تقريبا..نزلت مكسرة..ضلينه كاعدين نص ساعة تقريبا بعدين اجانه الدور من طبيت عرفتني الدكتورة..

ابتسمتلي..بادلتهه..كعدت ع الكرسي وبلشت تسألني..
الدكتورة : شلونهه دنو..
دنوة : الحمدلله دكتورة..
الدكتورة : شلونج هسة..دتحسين بتحسن..
دنوة : اي احسن بهواي..صار فترة خلص العلاج يعني سيطرت تقريبا..جنت احس اعصابي فالتة..
الدكتورة : شوفي انتي سباعية..ما استسلمتي لمرضج.. وكدرتي تكومين منه..
سألتني بعد جم سؤال..وسألت صگر همات..بس اكثر سؤال ركزت علي اذا بالعجل حسيت نفسي زينة لو بالتدريج.. كتلهه لا بالبداية خفت الرجفة وكمت احجي قليل..يعني من اتعب اسكت..كبل جنت احجي واتعب بس ما اسكت..كالت ما يحتاج تجين بعد..بس تبتعدين عن الضغوطات وترتاحين شكد ما تكدرين..

الدكتورة : هسة انتي جدا زينة..واني سعيدة بيج..بس اريدج تعرفين شي..مريض الانهيار العصبي وأي مرض نفسي ثاني صعب يتعالج..صعب يرجع طبيعي..تحسين نفسج طبيعية تماما بس من أقل موقف يصير عندج شد عصبي وترجعلج الحالة كإن ما سوينه شي..فللإحتياط..حكتبلج نوع شريط هذا..طلعته من المجر مالتهه وشوفتنياه..حباته صغيرة .. كالت : هذا تبقين تستخدمي ما يتغير..يضل وياج.. بس لا تحسين نفسج متضايقة بسببه..ماكو أي اشكال..بس حتى ترتاحين اكثر..كل ما يخلص تشترين مرة اللخ منه.. ضلت تحمد بيه..

تكلي انتي سباعية وقوية.. يعني صدك اذا جنت بعدني مريضة فكلماتهه هي الخلتني اتحسن واحس روحي زينة.. ولو موضوع الشريط مال حب ضوجني بس احسن..ماطولنه عدهه شوي وطلعنه..صگر من الفرح اشترالي كلشي ملابس ومكياج..من غير الحلويات.. دللني..بتنه عند بيت خالة وثاني يوم طلعنه..بس طبينه للبيت كعد يحجي لخالة ع الكالتة الدكتورة..هو فرحان اكثر مني..صدك حالتي جانت صعبة وتقهر الما ينقهر..
الحجية : اي الحمدلله مابيهه شي..
صگر : اي يمة هسة اكدر انام مرتاح..بالي كلنه منشده يمهه خله ايده على جتفي وكال : سباعية بنيتي..
ابتسمت وصعدت فوك..وره يومين صگر نزل للواجب.. كعدت ما لكيته..نزلت يم خالة..كعدنه نحجي..كتلهه : شوكت حتصير زواجة اخلاص..
الحجية : بعد..وره تخرجهه..

دنوة : يله قريب..
الحجية : اي..اكلج اليوم تجي مرام..علي مسافر لبغداد وما يقبل تبقى وحدهه..
دنوة : اي هله بيهه..شريد اسويلهه..
الحجية : ادري..ما اريد تصيرين عصبية لو تضوجين.. عوفيهن يحجن يغارن منج..جي صگر يحبج..
ابتسمت : حبيبتي انتي احلى خالة بحياتي..شوف شوف يعني منو عنده وحدة مثلج..يتمنووون..لا لتخافين ماسوي شي..يمكن اروح لبيت خالتي..مشتاقتلهم..
الحجية : يله براحتج..تريدين اجي وياج..
دنوة : اذا ماعندج شي اي ليش لا..
الحجية : يله ماشي..
كمت سويت الغده جان تجي مرام..سلمت علي عادي وراحت كعدت يم اخلاص تسولف..

العصر بدلت ونزلت يم خالة..كتلهه : يله خالة نروح..
الحجية : يله بس البس الشال..
كملت وطلعنه..هم صايرين بنفس الشارع هج مسافة قريبة.. تمشينه وكل خطوة تذكرني باليوم الاجيت بي هنا..باليوم الشفت بي صگر من تصوب..جان يحاجي خالتي وعينه علي لو من فزيت على صوت الطلقات..بوكتهه الف فكرة اجت ببالي بس الحمدلله طلع غير شي..وصلنه لبيتهم..دكيت الباب طلعتلي حلا..بوستني وخالة بعدين طبينه..سالفة منا سالفة منا..كلهم ما متوقعين حصير زينة بعد الحالة الشافوني بيهه خصوصا خالتي..
خالتي : والله انمرد كلبي من شفتج ذاك اليوم..كلت شلون حتصير زينة..الله يساعدج..
دنوة : فترة وكضت..الحمدلله على كل حال..
خالتي : شوف حتى بحجيج كبرانة..

ابتسمت : يعني اضل صغيرة..يله هج احسن مو..
خالتي : تخبلين بكل حالاتج..والله عبالك ذاك اليوم من جان المرحوم يجيبج يمنه تضلين اسبوع..
من كالت المرحوم تذكرت ابوي..عيوني دمعت بس ماردت ابجي جدامهم..كمت احس بالضعف اذا بجيت جدام احد.. بس صگر ارتاح يمه..احسه مني وانه منة..قريب مني ومن تفكيري يفهمني من تصرفاتي ونظراتي حتى لو ما حجيت.. احب كلشي بي..من رزانته وهدوئه..لشعره الاسود البي شيب.. دورات اكول شلون اول مرة شفته شعره جان اسود فاحم بعدين صار الشيب واضح بي..بس ضافتله جمال خاص

نفضت الافكار وضليت كاعدة وياهم..دنيا جايبة ولد مسميته ايسر..يعني حياتهم عادية مثل كبل ما صاير شي جديد.. الا انه التغييرات كلهه يمي..تغربت وطرحت وتمرضت.. خصوصا المرضة..اخذت جزء من البداخلي..اذتني..حتى نظرات صگر الي من يشوفني دا احجي أذتني..هو ما يحجي بس نظراته تعوض عن هواي..احسه يكول تعبت اشوفج هج..هو فعلا يكول هج بس مو بوجهي..اخذت نفس وتنهدت..كلشي يروح ميصير نبقى مجلبين بي..بقينه يمهم للمغرب ورجعنه..مرت اربع ايام واجة علي اخذ مرام..علي كلش متغير..ملامح وجسم.. حتى ما عاين علي..بس سلم هو ومدنج عيونه..اخذهه وراح.. وراهه ما صار شي جديد..حياة عادية مثل هواي بيوت عراقية.. بس اخلاص شكلهه كامت تحب هذا الولد خطيبهه..لأن اسمعهه تخابره..يعني يحجون على زواجهم وهج..

شكد حلو..احب هاي التفاصيل..بس ما تهنيت بيهه..وره خطوبتي بجم يوم تمرضت من وره شذى..صگر من ذاك اليوم هو حاير بيه..ولو جنت مرته بس ع الكلام مو عقد محكمة وشي رسمي..اخذني مناك وضل يوم يوم وياي..لحد ما كدرت اوكف على رجلي ورجعت طبيعية..

وره اسبوع كعدت الصبح غسلت ونزلت لكيت صگر واكف ديدخن يم الباية الاخيرة ويحاجي خالة..نزلت سلمت علي وبسته..خزرني..ابتسمت..كتله : شنو ميصير يعني..
صگر بهمس : اي عيب مو امي هنا..
الحجية : يله قابل شسوت..اصلا اكيف اشوفكم سوه.. اخذو راحتكم حروح اشرب دواية..
ابتسمت وراحت..دنج يعاينلي : صعدي فوك..
دنوة : ها حترزلني مو..
صگر : شوكت مرزلج يولي..لا امشي صعدي..
صعدت واجة وراي..حاجاني هو ويفتح الدكم مالت القميص : باجر اخذج اسويلج جواز..بين ما يكمل عشر ايام علمود احول الجنسية متزوج..
دنوة : حييل..هاي شذكرك بيهه..صار شكد مزوجين..
صگر : ادري مو اريد نسافر..فلازم يعني..

دنوة : هااا..هاي سويتهه صدك يعني..
صگر : رب الصدك..شعندي غيرج..اريدج تنسين الصارلج ولو شوي..البيت حيذكرج..اطلعج تنسين احسن..
تقربت منه حضنته واحجي بدلع : حبيبي انت شكد احبك.. شوف شلون داير باله علي..وين اكو منك ها..
صگر : لو هج اللسان لو بلاهه..لو ادري من زمان اخليج تكبرين بعدين اخذج..
دنوة : لااا..جان ماتعلمت..بس غير انت دائما تحجي حجي حلو فانه لازم اصير مثلك موو..
كام يضحك وعيونه تتفحص شفايفي وحركات ايدي : حتلو تعلمتي وكبرتي تبقين بنيتي والله..دورات الاب من تضيك بي الدنيا يجي يم بنته..انه ماعندي بنية..بس عندي انتي.. يعني شكد تريدين احجيلج..بس كل الاحجي ميجي للاحسه.. انتي اكبر من كلشي حسيته..

تعاي تره مدا اتحمل ابقى هواي بالواجب..اريد اضل يمج
نزع القميص وشالني من الكع..رحنه لغير عالم..همساته وحدهن غير مكان..ووو.. حضني ويمسد بشعري..كتله : صگر اريد اراجع دكتورة..
صگر : عليش..
دنوة : علمود الحمل..
صگر : مو كتلج لتفكرين بهلموضوع..
دنوة : اريد اصير حامل..ليش تكول هشكل..متكيف يصير عندك ولد او بنية..انت هم كبرت..
صگر : ادري..اذا هذا الشي صعب عليج عوفي..عايشين واذا كلش اخذج عود ميخالف..
دنوة : بس انه اريد اروح..حتلو اروح وحدي..معليك انت
صگر : لحت بعد..ميخالف بس مو هسة..
دنوة : شوكت..
صگر : جم يوم وانطيج فلوس روحي وي امي..زين..

ابتسمت وخليت راسي على صدره : زين عمري..
مرت الايام ورحت وي صگر علمود يسويلي الجواز.. مرتين رحنه يمكن..وعلمود الجنسية همات صارت متزوج ومتزوجة.. الصور هم جددناهه..خلصت الجناسي بقى بس الجواز مالتي لأن صگر عنده ومجدده كبل فترة مو حيل طويلة..ففاتحته بموضوع الدكتورة..كتله : حتنطيني فلوس..
صگر : اي كلبي..شوكت تريدين تروحين..
دنوة : باجر زين..
صگر : يله..انه هم باجر تخلص اجازتي..علمود الحك انطيج
دنوة : زين شنو هاي..حنضل هج..ما اشوفك هواي تره والله ميصير..عوف الشغل هذا شوفلك غير شي..
صگر : شعوفه يولي..صار سنين يله وصلت لهنا..مرتاح وادري بيج مقدرة وضعي..من انزل خوما اقصر وياج..
دنوة : لا ابد..

صگر : اي خلص حبيبي..يله المره الجاية اخذج ونسافر لا تفكرين تكولين صگر ما يبقى هواي..
دنوة : شكلنه حنطول هناك..
صگر : اقل الشهر اي..بس اخذ موافقة من الوزارة اول .. خوما چفت..
دنوة : هااا.. شمدريني مااعرف .. بعد انت اعرف
كعدت يمه وامشي ايدي على جتفة بهدوء : حبيبي مدللني.. وين اكو مثل حظي بيك..يحلمون..ابتسم وكعدنه نسولف.. ثاني يوم الصبح كعدت لكيته توه ديطلع..باسني وانطاني فلوس..بعدين نزل..ثاني يوم الظهر دا اسوي غده جان تجي خالة..فكلت احاجيهه بالموضوع..كتلهه : خالة..
الحجية : ها عيني..
دنوة : تعاي وياي اليوم للدكتورة..
الحجية : نسائية..ليش..
دنوة : اي..صار فترة طويلة ما صار عندي حمل..من رجعنه من سوريا ولهسه..تدرين صگر كبر..ما ادري يعني مقهورة علي..ادري السبب مني..

الحجية : لا يمة شدتحجين..شنو السبب منج قابل شبيج مو صرتي حامل ذيج المرة..عادي هاي تصير ميخالف..
دنوة : اي ادري بس اريد اروح اراجع..صگر انطاني فلوس بس كال خلامي تروح وياج..تجين..
الحجية : يله ميخالف ماعندي شي..
همزين قنعت..كملت الغده وصبيناه..بعدين كمت اغسل المواعين..رحت نمت شوي ادور كعدت بدلت ونزلت لكيت خالة توهه تريد تصعد تكعدني..اخذتني وطلعنه..رحنه لدكتورة كومة عليهه..بحيث مليت من الانتظار بس كالو زينة..اخر شي اجة سرانه وطبيت..فحصتني وسألتني جم سؤال..طارحة قبل تاخذين ادوية..كتلهه اي بس قطعتهن صار فترة..ومستمرة على نوع واحد..
الدكتورة : سويلي تحليل دم وشوفيني الاشرطة الاخذتيهه شنو..علمود اعرف شنو تأثيرهه..

انه جنت جايبتهن وياي..فشوفتهيا..ضلت صافنة وتقره بيهن بعدين نزعت نظراتهه : ما اريد اخوفج..سوي تحليل الدم ومن تجيبي اسويلج سونار.. عندي بعد مراجعتين..سوي التحليل بين ما اكملهن..
دنوة : ماشي..اخذت الاشرطة ونزلت ع المختبر جوه.. سحبتلي دم وكعدت انتظر..تقريب الساعة وطلع..خالة ضلت جوه مابيهه حيل تصعد مرة اللخ..العيادة فرغت بس وحدة باقية..طبيت انطيتهه التحليل..
الدكتورة : شكيت..لأن هاي الادوية تأثيرهه قوي..
دنوة : شلون.....

يتبـــــــــــــــــــع......................

تدرون والله منعسة حيل بس گلت لازم اكملة وانشرة ، اعتذر ع التأخير بس البارحة مكدرت اكتب ، المهم توقعولي شحيصير😁💙..