رواية اسألي عني الليالي الفصل الرابع وأربعون 44 - بقلم رقية جاسم

على المحبوب ودوني .. على المحبوب ياناس ..
حبيبي وغيبته طالت ..
وانه المشتاك ياناس .. عليك الناس تسألني ..
حبيبك وين ما وين ..

قناة التليگرام

حساب الانستگرام

الـبـارت الثالث والاربـعـون.............

مهتميت..كلت عادي هواي تجيني هج احلام..وره هليومين اندكت الباب..رحت افتحهه..طب محمد..يعاينلي بنظرات مدري شلون اوصفهه..اول ما فات كال وينهه امي..كتله بغرفة اخلاص كاعدة..عافني وراح للغرفة..سد الباب وراه .. الفضول خلاني اروح للغرفة..سمعته يحاجي الحجية..
محمد : يمه ما ادري شلون اكللهه..هسة هي هاي سالفة .. الله يرحمه..
ضليت صافنة..من الخوف ما اجه شي ببالي..حتى مكدرت افكر المن يكول..خاف يقصد جلنار..

فتحت الباب على كيفي وطبيت..اندار علي ودنج راسه .. رحت كعدت يم الحجية واخلاص واكفة جدامي..كتلهه : شكو شبيكم عاينت لمحمد..كتله : منو مات..اخلاص حجت من مكانهه
اخلاص : ابوج..
هي كلمة بس حفرت گلبي حفر..عيوني غوركت وايدي كامت ترجف من الموقف..عاينت للحجية : صدك..
محمد هو ومدنج راسه : اي..خابرني رائد الظهر كلي توفى البارحة بالليل..متخربط بين ما ماخذين للمستشفى متوفي
صدمة وره صدمة..اولت البارحة جنت احجي وياه .. كلي زين مابيه شي واريدج تنتبهين لروحج..شنو مات شنو متخربط .. مدا استوعب.

ضليت دقايق مفتحة عيوني ما مستوعبة الموضوع..لحدما انتبهت عليهم شلون ملامحهم جدية..طكيت بجي .. كمت ابجي بحركة ودموعي ما الحك عليهه..الحجية حاوطتني من جتفي وقربتني عليهه..كمت ادفع بيهه ومستمره ابجي واشهك اجة محمد يريد يهديني..دفعتة وكمت..اعصابي انشدت .. رحت للغرفة وقفلت الباب..حضنت المخدة وابجييي..اختنكت هلكد ما بجيت..الحجية ادك بالباب تكلي فتحيهه وانه مو يمهه عبالك ما اسمع..

الف كلمة على لساني بس حسيته انعكد..بس ابجي واغض احس الكلمات صارت على لساني ومتطلع..جنت احسب يوم يوم بس خاطر ارجع للعراق واشوفه واطمن على وضعه..من يوم الرحت وانه خايفة علي خاف يصيرله شي من وره شذى خاف تغثة لو تسوي عصبي..وهو مو زينه علي العصبية .. بعدين وره ما يطمني علي يروح..

شسوي..شسوييي ما ادري..گلبي صار جمر..الطريق شطوله لا ساعة ولا ساعتين..شيخلصهن اذا رحت..بس اروح يعني اروح..اذا اضل هنا اطك واموت من القهر..ابجي وما مستوعبة الموضوع..شكد مريت بظروف دمرتني ودمرت نفسيتي .. تلفت اعصابي..وبالاخير خلتني من موقف صغير انهز واتدمر .. شحال بهذا الموقف..شكد صعبة..انهاريت بعد خطوتين ما اكدر امشي..عبالك حلم..

والله حلم..هن كلمتين بس كلبت كلشي بيه..فوك الغربة والبعد ابوي يموت..اي ليش..مو كال مابيه شي..وره كل سنين التعب اتمنى منه بس كلمة وحده تفرحني .. اسويله كلشي من ايدي اعرفه شيحب وشيكره..اكو اكلات عنده حساسيه منهه فمن يسوونهن انه اسويله غير شي..بس اريده يرضا عني ويحاجيني مثل ما عمامي يحاجون بناتهم..جان يجي عمي قاسم تروح سرور تتلكاه..يضحك بوجهه وهو ميت تعب..بس ما يريد يفشلهه..كبل لا تطلب يخلي جدامهه شتريد.ولا مد ايده عليهه..حتى راشدي ماضربهه..

وانه ابوي يضربني جدامهم كلهم..ما يهتم..ما يكول بنية ماعدهه ام تحتاج ابوهه يمهه يعوضهه عن غياب امهه..بس ماكو..يجي من الشغل متأخر بالليل..كلهم ينامون..اضل بس انه كاعدة اكول شلون انام وهو ماكو..كلبي ما يرتاح الا اشوفه..من يجي واطلعله يصيح بوجهي..شعندج طالعه بالليل..انه مو كايل ماكو طلعة .. انه من الفشلة حتى ما احجي بعد..اجي بكل لهفة وأمل اكول بلكت يلين وياي..هو ابد عبالك بسده يطيح الحجي بس مع ذلك اروح انه اصالحة واطلب رضاه..اكول ماعندي غيره يبقى ابوي..يجي يوم يحن علي..

كلشي قديم مر جدامي مثل شريط الافلام..كل لحظة عشتهه وي ابوي تذكرتهه..اغلب ذكرياتي وياه حزينة وتوجع .. بس اخر فترة تغير الف درجة..شلون داراني من تمرضت ويسأل عني حتى وهو مريض..ياريته جان هج من الاول..ما ادري شصار بيه..كلشي تذكرت كلشي..كمت ابجي بالزايد وي كل لحظة اتذكرهه..صوتي انبح هلكد ما بجيت وصيحت بس كاتمة صوتي بالمخدة..

اخر شي تعبت ونمت بس راسي ع الجرباية..رجليه بالكع .. كعدت من النوم راسي يوجعني من يم عيوني..كمت فتحت الباب وطلعت..صارت الحجية جدامي كاعدة ع القنفة بالصالة وخاله ايدهه على خدهه..بس شفتهه تذكرت الصار .. يعني مو حلم..يعني صدك مات..وانه بعيدة..هي شافتني حجت..
الحجية : تعاي كعدي هنا خالة..ضل بالي عليج..كلت خاف تخربطت لو سكرهه هبط..حتى مسمعت صوتج..
رحت كعدت يمهه..حضنتهه وابجي..احس گلبي حيطك اذا ما حجيت..كمت احجي وابجي..

خالة..ارد ارجع فدوة لعينج..شلون عفية..ادري دتحسين بيه .. مريت بنفس موقفج..شفتج متلوعة وغادية نار بس تردين ترجعين بس ماكو..خالة هذا ابوي..شلون..شلوون..مدا اصدك احسه حلم.. كوليلي حلم..حلم مو..مدا استوعب .. ردت اكمل كمت اغص بالحجي..حرف يطلع عشرة لا..ضلت حاضنتني وتهدي بيه..حارت شلون تسكتني..انه جسمي كام يرجف عبالك واحد مريض..وراسي حيطك من الوجع..

ادري بنفسي دا ارجف بس ما اكدر اسكت..ولا اكدر احجي اعصابي تلفت بمعنى الكلمة..شوي وكامت .. انتبهت علي شلون دا ارجف ومتيهة الدنيا كلهه..
الحجية : كومي غسلي وجهج..شوفي شصار بيج..هسة محمد يجي ويكللنه شكله رائد ..ميخالف بس دكومي..
درت وجهي عليهه بس كالت اسم رائد..كتلهه : كله من وره رائد..ذبنه بالغربة..ليش هج سوه بينه..جنه كاعدين وسادين بابنه..كل واحد من عدنه صفى بديرة..محد يدري بالثاني .. هاي كل اسبوع نوبه يخابر..ابوي مات وانه ما ادري بي .. حتى ما ادري شصايرلة وراح هج..

هو كبل يومين جان مخابرني..كالي زين..شبالعجل صار كل هذا..اكيد رائد يعرف..هو يدري والله بس ما يحجي .. هو شوكت حجة اصلا..درت وجهي عنهه وابجي..اجت حضنتني وكومتني للمغسلة..غسلت وجهي ورجعت للصالة..اجت جلنار اخذت من خاطري هي واخلاص..اخلاص من وره خشمهه تحاجيني عبالك جابرتهه تسوي هج..مهتميت اصلا انه بيا حال وهاي جايه تريد تبيع حب ركي براسي..عفتهه وضليت اتصفن..بس اسمعهم شديحجون..

الحجي بالليل اجه هو ومحمد..اخذ بخاطري ويعانيلي مدري شلون..نظراته حزينة..مثل واحد يكول وحيدة بلا ام واب وبالغربة فوكاهه..مدري انه من القهر كمت افسر بكيفي .. المهم محد حاجاني..الكل ساكت..عبالك محد حاس بيه .. اصيح وابجي واضرب بالقنفة وهم ساكتين بس يعاينولي.. محد حجة واجه فكني ويهديني..يعوفوني اهدى وحدي واضل ابجي..وحده غيري تكضيهه بجي وخلص..بس انه مدري شبيه كمت ادفع واضرب راسي فوك الوجع البي..

اخر شي اجه محمد كمشني من ايدي وخزرني..
محمد بنتر : شدتسوين بروحج..كافي كافييي..شوفي شصار بحالج..الله يرحمه والبقية بحياتج..كافي لا تسوين هشكل بروحج..هاي مو احنه وياج شسوي بعد..
عاينت علي ودموعي تصب : اريد ارجع للبصرة..الله يخليك .. بداعت رائد والله گلبي صاير نار..شبيكم مدتحسون بيه .. اريد ارجع.. ابوي مات..مات شلون..ما مصدكة .. عبالك حلم..هو حلم..مووو..احجي ليش ساكت..
محمد : لا اله الا الله..يمه تعاي عليهه خطية انه شكدر اسويلهه..مابيدي شي..

دار وجهه يريد يروح..كمت وكفت جدامه..كتله : اليوم اذا ما رجعت للبصرة اموت نفسي..اخلاص صاحت من يمهه
اخلاص : شبيج مخبلة تموتين نفسج..دنكلج الوضع متأزم ورائد ماكو اصلا..حتى فلوس تكفي للرجعة ماكو .. هذا محمد يمج واسألي..شلون حترجعين بله..يجي طير الطاير ياخذج مثلا..
الحجية : انه اكول لو تسدين حلكج احسن..لا تدخلين بابا .. بنية ابوهه متوفي شتردين تسوي..تسكت يعني..حقهه بكل تصرف سوته..بس خلافتهم رائد وين..
محمد : خابرت علي ما يجاوب..يطلع مشغول..
الحجية : بس تحصلة احجيله على دنوة..كلة متكدر تضل بعد تريد ترجع للعراق..بعد شوف بلكت هو يحجز من يمه .. احنه هنا بس عايشين ع الفلوس التجيبهه..

واخلاص حضرة جنابهه الكسيف كاعدة تتطلب براسي .. اريد هج واريد هج..هذا حالنه دتشوفين زين.. لوما رائد وشغله ومعرض حياته للخطر جان هج عايشين بالبصرة..هسة ما يفيد الحجي..روح خابره بلكت تحصلة..
محمد : اي هو رايح امري لالله..
راح..اجت الحجية اخذتني وكعدنه ع القنفة..حضنتني وتهدي بيه..انه بس ابجي احس حيلي باد..شسوي ما ادري..هسة ع الفلوس لو ع الوضع لو على شنو..ادور متوفي من البارحة ومحد حاجيلي..من جنت بالعراق وهم يضمون عني .. ادور هسة..

هلكد ما بجيت كمت اتخيل واهذي..احس جسمي فولت حرارته وارجف..حتى شفايفي ترجف..بعد ما اكدر اتحرك منا لهنا .. خليت راسي ع رجل الحجية وارجف..سمعتهه كالت لاخلاص تجيب بطانية..غطتني وتقره على راسي ايات..صدك احسه حلم اتمنى افز منه والكى كلشي مثل كبل..كلما اريد اكول هذا حلم اسمع الحجية تكلي الله يرحمه يمة قابل شبيدج .. كلنه على هلدرب..اكول لا حقيقة .. بس ما اكدر اتقبلهه .. شوكت حتقبلهه وشلون.. ما ادري..

غمضت عيوني..تخيلته واكف جدامي ويضحك..لابس بنطرون وسترة مثل اللي لبسهه بيوم خطوبتي..شكد ما كبر يبقى مرتب بملابسه وشكله وشعره..اليشوفنه سوه مبينين اب وبنته .. بس لون البشرة يختلف..هو ابيض واشكر وانه بالعكس..هسة كلشي يخصه صار جوه التراب..ليش انت..ليش وره ما حسيت بحنانه وعطفه يروح..حتى ماشبعت منه..كضه عمره كله يومين يضل بالبيت عشره لا..ومن يجي مايقبل يشوفني..يكلي اكرهج هج بوجهي..اذا حاجيته بشي يضربني لو يرزلني .. مره ع الاكل كاعدين طاح الكلاص من ايدي بي مي..

كام يصيح وبهذلني جدام الكل..شبيج عمية ما تشوفين .. كتله والله ما ادري..كلي يلههه روحي اكلي هناك..لا تجين يمنه .. انه بس مدنجة مارفعت راسي..شلت الكزاز وكمت للمطبخ .. بوكتهه حتى اكل ما اكلت..خلصت اليوم بس بجي..ما صالحني ولا جرب يكلي حقج علي..انه رضيت وحدي ..ادور جان عقيل يمنه..يعني صارت جدامه..هو شيفكر بعد من يشوف ابوي هج يرزلني..من هاي من تزوجني وكتله اكول لابوي يطلكني منك كلي منيلج اب انتي..

احاول اتذكر منه شي حلو..بس المو زين هو الطاغي .. مع ذلك حسيت روحي صدك صرت وحيدة ومالي احد..لوما ابوي جان انه بعدني يم عقيل..لوما ابوي جان هواي شغلات ما صارت..شلت راسي من رجل الحجية..جبت رجلية يم بطني ولافتهم بايدي وابجي واشهك مثل الطفل..حسيت على ادين ناعمة تكمش زندي..درت وجهي لكيته طه..ابتسمت والدموع بعيوني..مد ايده مسح دموعي..ذب روحه بحضني..حضنته واشم بريحته..

كام يتململ..بسته وراح لعند جلنار..اجت كعدت يمي تريد تصبر بيه..
جلنار : حاسه بيج والله..اني هم ابويه مات واني بعيدة عنه .. حتى ماعرفت بي ميت الا من رحتلهم لهناك..
دنجت راسي وخليت ايدي فوكاه : انتي عشتي وشفتي حنانه .. حسيتي اب موجود يمج ويجيبلج كلشي جدامج..انه ماحسيت شي..لا ام لا اب..حتى اخ واخت ماحسيت بيهم .. بيوم الحسيت بي وكام يعاملني مثل الاباء راح..هذا شنو شيسموه..ظلم قهر..مدتحسون بيه..صعب تحسون .. نار دتاكلني..شرد احجي ما اكدر..حضنتني وتمسح بشعري .. ما ادري شحجت تيهت كلشي هلكد ما بجيت..

مدري شلون خلص الوكت واجه محمد بالليل..انه جنت بالحمام اسبح..سمعت صوت الباب..سديت المي لبست وطلعت .. لكيته يحاجي الحجي..
وائل : ها بشر خابرته..
محمد : اي..بس كلشي ماحجة..كال مشغول وما عندي مجال احجي شي..غير وكت اخابرك وسده..هسة انه شكللهه .. منين اجيب فلوس للرجعة..يادوب اجيب اكل ناكله..بعدين اذا رجعت منو حيرجع وياهه..خوما كلنه..شيدخلنه بعد اذا رجعنه
وائل : اكلك ليش تدفع ايجار للشقة الكاعدين بيهه .. اشو اغلب وكتنه هنا كاعدين..شنو مصرف زايد..
محمد : وهاي الشقة تكفينه عود..وين نكعد على هلحجي

وائل : هسة نكعد شلون مجان..مو فد معضلة..قابل احنه باقين هنا لشوكت..سنة..سنتين بالزايد..الله كريم وراهه..
محمد : هاهية خوش..صفن شوي بعدين كال : والله صح .. انه اجرتهه مأثثه..يعني اغلى..باجر الصبح اصعد لابو العمارة فوك اسلمه المفاتيح..
وائل : عفية عليك..هسة كلي رائد وين..
محمد : خالو مو كتلك ما جاوبني..هو هذا بالوكت المرتاح بي ما يحجي..تريده هسة يحجي..
وائل هو ويطلع مي من الثلاجة : على كولتك..خابره بعد يومين شوفه وينه..هسة يمكن ملتهي بالفاتحة..
من كال فاتحة عيوني دمعت..رحت يم محمد..شافني دنج بالعجل..ليش من يشوفيني يسوي هج..

كتله : شنو يعني محرجع..
محمد : انطيني مجال بس اشوف رائد شيكول..انتي كاعدة بالبيت ما تعرفين شنو وضع العراق..انه اطلع واسمع..
متحملت..كلمة والثانية يكلولي وضع العراق ووضع العراق .. كمت ابجي واحاجي : شنو وضع العراق..يعني تقبل ابوك يموت وانت تدري وبعيد..ماعندك گلب لو شنو..انه عندي فلوس والله بس اخذهن صرفهن ورجعني..حتى لو بس يوم واحد والله مو اكثر..بس اريد گلبي يرتاح.. حط ايده على جتفي ودنج يحاجيني مثل ما رائد حاجاني..
محمد : الله يرحمه ويجعل مثواه الجنة..تردين اخوفج اكثر يعني لو شنو..العراق صاير دمار هسة..تعرفين شنو يعني ..

لا تشوفيني ساكت واجي يمكم احجي طبيعي..تره براسي الف شغلة واولهم رائد..هو من ديسوي هج لمصلحتج ومصلحتنه كلنه..لو باقين هناك جان الله اعلم شصارلنه .. لا تفكرين غلط بحقه..اسمعي مني..كل يوم انفجار وناس كومة تموت لا بيهه ولا عليهه..ادري بيج عاقلة وتفهمين .. مشيهه بس شهر..شهرين بالزايد بين ما يستقر الوضع وارجعي .. اخلي خالي يرجع وياج انه ما اكدر اعوف امي والبنات..
سمعته للاخير ودنجت راسي..دموعي كامت تصب .. حتى بعد ما اعرف على شنو ابجي..هج الطريق انسد بوجهي فد دور .. لو هذا هم حظي الاغبر..

طبطب على جتفي وابتسم.. تصرفاته منطقية بمثل هج موقف خصوصا هو جان يجينه كبل وشايفه اكثر من مره .. يعني عادي..عفته ورحت للغرفة جان تجيني اخلاص..
اخلاص : انتي منيلج فلوس..تكولين عندي واحنه نتحسر..
عاينت عليهه : رائد انطاني مية وخمسين..انطيت خمسين منهه للحجية ذاك الشهر..بقت مية..ضلت تعاينلي .. بعدين راحت للكنتور كلبته كلاب..
اخلاص : وين الفلوس..
دنوة : بالخانة الفوك..اخذتهن وراحت..بس طلعت سمعت صوت راشدي..كمت وراهه..شفتهه تبجي وتصيح على محمد والحجية واكفة تريد تعرف شكو..

اخلاص : انهههه..تمد ايدك علي علمود هاي الوصخة .. هي لو بيهه خير جان ماطلكهه رجلهه واخذت رائد..هذا اليسوى ويستاهل ياخذله وحده مطلكه..من امدااااج شلون لعبتي بعقله والله سباعية..
محمد : لا تضلين تمسلتين..شلون تاخذين فلوسهه..شعليج بيهه..انه مقصر وياج بشي..شو كلشي دا اجيبه جدامج .. وانتي الوحيدة كل شهر الله بالخير اريد ملابس..
اخلاص : روح اخذهن بعيهن..بس هاي الفلوس مالتهه احنه النه حق بيهه اكثر منهه..هي شنوووو..شوفي والله هاي نتيجة افعالج ياجلبههه..كعدتي شهور تقنعين برائد حتى نسافر ونعوفه بحجة وضع ما وضع..بعدين طلعت بيج..

الحجية : جيبي الفلوس..وامشي ولي..شلون سولتهه سالفة شكدهه شكبرهه..جان استحيتي على نفسج من تكولين دنوة خلته يسفرنه..يله ولي لا تعبيني مالي خلك..
اجه محمد اخذ الفلوس منهه ودفعهه للغرفة..تقرب مني انطانياهن..كتله : ما احتاجهن..
محمد : ميخالف..شي ينوخذ منج بالغصب لا تكولين ما اريده هو مالتج..خوش..
اخذتهن ورحت رجعتهن بمكانهن..مرت اربع ايام .. خلصتهه بجي واعصاب تلفانه..عيوني هلكد ما بجيت احس بيهن نار كلش أذني..كمت من ابجي وامسح دموعي ايدي تكوم ترجف مثل واحد ما مسيطر على روحه..

اكوم اغسل ورجلية تتصافك..مليت من الحالة بس ما احجي .. ما اريد اروح دكتور واخذ ادوية..جسمي ما يتقبل دوايات بعد اريد بس انام واكعد الكى كلشي حلم..تعبت من الصدمات والحجي اللي يسم البدن..كمت ما اكل..وجبة وحده باليوم بس وهم لوما الحجية تجي تخلي الاكل جدامي جان كضيتهه بس مي..خطية الحجية وجلنار التهو بيه..ساعة هي ساعة جلنار حتى محمد كلساع يجيني..يكلي والله بس احصل صگر اجي احجيلج بس لا تشدين اعصابج..

الحجي هم صار لاين وياي..كلهم تعاطفو وي حالتي بس اخلاص..تشوفني من هلدرب تصد على ذاك الدرب..انه ولا بحالهه اصلا..بس تصرفاتهه تغث فوك ما انه مغثوثه .. كمت اكعد الليل كله اصليله واقره قرآن..الحجية تكعد تشوفني كاعدة..تضل كاعدة وياي..اكلهه نامي خالة انتي هم تعبانه.. تضل كاعدة لحدما تتعب وتنام .. كلشي سويت بس اريد النار البيه تطفى .. فوك ما صارلي شهور ما شايفته بعدين يموت وانه بعيده عنه .. وحتى جنازته وسبعته ما احضرهه..شكد مشتاقتله .. والله هواي..

وره هلايام ايام اجه محمد الظهر وصاحني..رحت يمه
محمد : خابرت رائد..كال جنتي ملتهي بالفاتحة والهوسة .. ادور صارت السبعة بعد مالحك يجاوبني..
دنوة : كتله اريد ارجع..
محمد : كتلة..كال ماكو رجعه..خلتصبر هلفترة جم شهر وترجع هذا واحد صديقة يشتغل بالقائم بالانبار..كايله عصابات بالطريق ومسلبجية..العالم خايفة..نصهم يرجعون..واللي يريد يكمل الطريقة فعلى الله ما متأكد شحيصيرله..

دنوة : يعني محرجع..
محمد : لا..انتظري هلفترة والله علمودج ديحجي هج .. هسة هو نازل للواجب بعد ما يكدر يرجع الا وره شهر..
اخذت نفس وكمت دموعي بعيني..يعني شكد حصبر بعد .. كاعدة على اعصابي..كل يوم اكول اليوم يجاوب ويكول اي خلترجع..بعد ماكو امل..لازم انتظر..الله اعلم شكد هاي الفترة الحنتظرهه..رجعت للغرفة كمت ابجي..مدا اتخيل هو جوه التراب وانه هنا اتوسل ارجع اشوف بس كبر..هو وينه هسة راح..بس شوفة الكبر يمكن حتريحني..امي توفت وانه ما حاسه بيهه ذاك الاحساس..جنت صغيرة كلش..يمكن اذا ردت اتذكرهه فحتذكر شغلات حتى صورتهه مو كامله ببالي..

مع ذلك من يجيبون طاري الام گلبي ينعصر عصر واكضيهه بجي..شحال لو ابوي..عشت وياه سنين..ولو جان عصبي وما يحب تواجدي بس يبقى ابوي..ما ادري شكول..مرت الايام بس ابجي..ابجي ع البعد والحسرة الصارت بگلبي بسبب موتتة .. ابجي ع الكلمات الكالياهه..هو كبل لا يروح كلي زين .. هاي الكلمات مدتروح من بالي..كلما اهدى اتذكرهن واختنك بالبجي والدموع..تجي الحجية تهديني..دورات جلنار .. ولا تكول ضرتي..شكد موقفهه حلو وياي..حتى نسيت سوالفهه كبل من وكفت وياي هسة..

كمت احاول الهي روحي..اسمع الاخبار..لو اكعد وياهم .. المهم ما اضل وحدي ..لأن عيوني ادمرت كلش..صارت حمره دم من اكعد لحدما انام..اضل اكح لحدما اختنك .. محمد يكلي اخذج للدكتور اكلة ماريد..اكثر من مره كلي بس ما اروح..عاد اخر شي اخذني لصيدلية شاف حالتي وانطاني علاج للكحة..شوي تحسنت .. حتى عيوني صارت بس من ابجي تضل حمره لثاني يوم..وراهه يختفي الاحمر بشكل تدريجي..من اصلي اكول ياربي حتى من المتنفس الاخير انحرمت..من البجي..جنت ابجي شوي ارتاح يفرغ حمل جبير بگلبي..بس هسة حتى بجي ما ابجي..يضل الحجي يحرف بگلبي..

هاي التكريتية جوارينه..اجت فد مره علينه..شافت عيوني حمر كلتلي خيرج..كتلهه والله ابوي توفى وما اكدر اروح للعراق
امنية : الله يرحمو يارب..حبيبتي احسن شي ما رجعتي .. اهلي هناك ببغداد عايشين مع بيت خالتي..يقولو كلش متأزم الوضع..حتى ع الحدود..انتظري فترة بعدهه الله يفرجهه
كبل تذكرت حجي رائد من كال لمحمد الحدود مو امان .. خصوصا من يم القائم..يعني داخل العراق..كتلهه : الله يفرجهه ع الكل..ضلت يمنه شوي بعدين راحت..ضلت كل فترة تتردد علينه..وره ما عرفت ابوي متوفي..

بالليل كمت اشوف احلام عبالك سيارة تنفجر جدامي .. لو واحد ينكتل..هلكد ما سمعت اخبار..ضليت بين ابقى وبين ارجع للعراق..ما خايفة على نفسي..انه شعندي .. بس خايفة على رائد كل يوم الفجر اكعد اصلي وادعي .. اكول ياربي ابوي راح وخسرته..لا تخليني اخسر رائد..والله مالي احد من بعده..عمامي كلمن يحير بعائلتة وما اريد اصير حمل على احد..ضليت كل يوم اردد هلحجي بيني وبين نفسي .. صدك تعبت وبعد ما اكدر اخسر شخص ثاني..اخسر روحي ولا اشوف شخص عزيز علي يعوفني ويروح..

مشت الايام وصار الاربعين مال ابوي..ضليت كاعدة من العشرة بالليل لحد الستة الصبح اقراله قرآن وابجي .. شكد بعيدة عنه..هسة كلهم راحو للمكبرة يشوفوه..وانه هنا حتى صوره اله ماعندي..الحجية من صارت سنة عمي جنت اكللهه مدا احس بيج..بس هسة كلشي سوته الحجية من بجي وتكعد تقراله قرآن وتصلي وتهديله حسيت بي..مريت بالموقف بحذافيره..ياريت ما حاسه بي..كلما اكعد بيوم جديد مثل النار تشتعل بيه..اتمنى اضل نايمة لحدما اكعد الكى روحي ناسية كلشي..لو اكعد الكى كلشي حلم..

بس كلشي حقيقة..رائد لمدة شهر ماكو..اخر شي وره هلشهر دز رسالة لمحمد كلة جنت بالواجب والتلفون بالسيارة عايفة .. تعودت على غيابته..بس البعد دمرني دمار..بس ابجي اكوم ارجف كلي..حتى شفايفي..اضل ساعه بعدين اهدى وحدي .. والله صعبة علي..كل يوم اتدمر من جوه..خو من اسمع الاخبار ما ادري شيصير بيه..افقد الامل بكلشي..يضل بالي يم رائد اكول خاف بي شي وما يحجي..كمت اعرفه اكثر من اخلاص ومحمد..من اليوم الشفت رجله شلون مورمه وهو واكف عليهه عادي كمت اخاف من كلشي..احسب الف حساب..

اكول خاف متوجع هسة وما يحجي..لو خاف صار انفجار وهو قريب ع المكان..ما ادري افكار هواي تسيطر على تفكيري بشكل لا ارادي..محمد جاب ملابسه هو والحجي وكعدو يمنه بعد..كل فترة تروح الحجية ومحمد يخابرون رائد.. من تجي الحجية تكعد تحجيلي..
الحجية : رائد يسأل عليج..كل شوي يكلي شلونهه دنوة .. الله عليج لا تخليهه تبجي..ابقي يمهه لا تعوفيهه وحدهه..
ابتسمت..كتلهه : هو ومخبوص يكلج هج..
الحجية : اي والله..يحبج تره..ومشتاقلج .. هو هم ديحسب يوم يوم بس خاطر نرجع وتشوفي..كال هلفترة اشوف بلكت تكدر ترجع..

كمت من مكاني..كتلهه انه وفاتحة عيوني متفاجئة : صدك .. هو كال هج..يعني ارجع..شلون ويامن..
الحجية : لج اصبري..كال بس اتأكد من اصدقائي وادز رسالة لمحمد انطي الاكيد..
سحبت نفس : الله كريم..بلكت..بهلفترة جنه طابين بال٢٠٠٧ صار شهر..يعني ابوي صارلي ٣ شهور من توفى..وانه لهسه انتظر ارجع وازور كبرة..بالليل كعدنه ع العشه الحجية فتحت الموضوع مالت الرجعة..
محمد : اذا رجعتي خوما كلنه نرجع..بس اخلي خالي يروح وياج..فترة اسبوع غير..ما مطوله..
دنوة : اي..حتلو يوم انه قابلة..
محمد : يله خوش..بس انتظر رائد شيكول..اندار على خاله يحاجي..خالو تروح وياهه ماعندك شي مو..
وائل : اي عادي..خوما وحدهه تروح..بعدهي صغيرة..

وره يومين كبل لا يطلع محمد للشغل المغرب انه كاعدة بالغرفة ارتب الجرابي..فات يحاجيني..
محمد : اكلج عيني..هاي رائد دزلي رسالة..يكول خلترجع بس واحد يرجع وياهه..
رفع راسه من التلفون يعاينلي..كتله : شوكت ارجع..
محمد : بكيفج..فد يومين زين..
دنوة : اي زين..رحت ع الكنتور انطيته الميه..كتله : اخذهه صرفهه يمكن تفيدك خاف ماعندك تحجزلنه..وفلوس الرجعة انطيهه للحجي مناك من نريد نرجع هو يحجز .. ابتسم
محمد : ميخالف..يله حروح للشغل..
دنوة : الله وياك..اخذ الفلوس وراح..

محمد اكثر واحد وكف وياي وماقصر بشي .. من اول ما اجيت لكيته يلبس بس ٣ تشيرتات..ينزع واحد يلبس الثاني .. يشتري لاخلاص والنه وهو مايجيب لنفسه..يكول عندي وانتو أهم..حتى دورات يجي يلكاني كاعدة ودا اغسل ملابس بيدي يجي يكعد جدامي ويغسل مالاته..اكله عوفهه انت هم تعبان من الشغل..يكلي انتي هم تعبانة..صدك حسيته اخوي .. ع العشته وانه بهذا العمر كمت اعرف نية المقابل بس من نظراته ومحمد مجان مخلي شي بباله..يعني عادي..

لأن سمعته مره يحاجي الحجية يكللهه والله انقهر عليهه من اشوفهه وحدهه وهاي اخلاص ضدهه..ادري ليش ما تحجي حاجيهه انتي..انه اكدر ارد والعب بيهه فلك..بس مالي خلكهه اذا حجت بعد متسكت منا لباجر..فأضل ساكتة بس الحجية متقصر..وره هليومين محمد اجه الظهر كال حجزتلكم على باجر الفجر اوصلكم للكراج..والكروه دفعتهه..بالليل حضرت الجنطه..حاولت اخليهه وحده علمود الثكل..انه والحجي .. ملابس سود ماعندي..فاخذت دشداشه مؤقت من الحجية بين ما ارجع..

الفجر كعدت صليت ولبست..طلعت لكيت الحجي كاعد ومحمد هم..الحجية كعدت..ودعناهه وطلعنه..وصلنه للكراج .. الحجي اخذ الجنط يصعدهن..اندار علي محمد يحاجيني..
محمد : لا تتأخرون هناك..حيضل بالي عليكم..
دنوة : ان شاء الله..اسبوع بالزايد ونجي..ابتسم وبعد ربع ساعه تقريبا طلعنه..الطريق كله ما نمت..حجي محمد ضل ببالي مال مسلبجيه وعصابات..خفت يوكفونه ادور يصير شي لا كالهه الله..الحجي نام..بس انه والسايق والرجال اليكعد بسدة كاعدين .. لمدة دعش ساعة كاعدة على نفس الكعدة .. الف اية قرآنية على لساني..بس كون نوصل بسلامة ..

بس طبينه للقائم الكل كعد..وكفونه سيطرة بس شكولهم مال مجرمين..ارهاب..ما اعرف مو راحة..ضلينه ساعة واكفين بعدين طلعنه سلامات..عبرنه القائم وهواي مدن بعد .. شوي كامت تصير سيطرات عادية يعني مبينين جنود وضباط عراقيين..وراهه بساعتين ونص وصلنه لبغداد..من الازدحامات والسيطرات..الدنيا مكلوبة..نزلنه وراح الحجي يأجر تكسي شوي واجه..اخذ الجنط وطلعنه..انه بطريق البصرة نمت تقريب الساعتين بعدين كعدت..نمت كبل لا نطب للبصرة وكعدت يم بيت جدي..هدوووء الى ابعد درجة..

نزلت والحجي همات بيده الجنط..مو حيل كبار..رحت دكيت الباب..ضليت شكد ادكهه..بالاخير سمعت صوت بنية .. كالت منو..انه هلكد ما صار هواي مسامعه صوتهه معرفتهه .. كتلهه انه..دنوة..اجت فتحتلي الباب..سرور .. اول ما شفتهه طكيت بجي ودموعي تصب ما انتبهت عليهه..حضنتهه وابجيي .. هي هم كامت تبجي..
سرور : اشتاقيتلج والله..ما تدرين شصار بيه من عرفتج سافرتي..متت قهر وداعتج..
انه بعد معرفت شحجي..لساني تربط..بعدتني عنهه..
سرور : الله يرحمه..جان يوصي بيج..تعاي فوتي جوه..
كلماتهه عصرت گلبي عصر..حسيتهه ابره وطبت بگلبي .. حتى سرور شافته وانه لا..

سلمت ع الحجي وطبينه جوه..صار عمي قاسم وفيصل بوجهي .. ردة فعلهم ما توقعتهه ابد..
قاسم : شعندج جاية..طلعي بره..
ضليت صافنة علي..الحجي حجه بمكاني..
وائل : هاي بمكان ما تضيفونه تكول شجابكم..
قاسم : بسببهه راح المرحوم..هي هاي الجلبة .. خلته بحسرتهه لا تحاجي ولا تسأل علي..بعدين يجي يخابرهه تكله ما اريد احاجيك..هي هاي بنت..هاي عدوه..عدوووو..
سرور : يابة على كيفك وياهه..خطية جايه من سفر..
قاسم : لا خطية ولا هم يحزنون..خلتاخذ جنطتهه وتروح منا .. لا هي بتنه ولا احنه اهلهه..متبرين منهه الى يوم الدين ..

روحي يله روحيييي..خلينفعج رائد..بعتي ديرتج وناسج وابوج علموده..تالي متالي ذبج بديرة غرب..
وائل : شوف طردتنه واحنه ما مفتهمين شنو السالفة .. الشيخ وين..انت ماعدنه حجي وياك..بنية جايه تريد تشوفكم لأن من ريحة ابوهه..وانت تكللهه انتي موتي..
ديحجون جان يطلع جدي..عاينلي وصد وجهه عني .. حسيت بالهضيمة.. ابد ما سوه هج كبل..جان هو يتلكاني ويصيحني من دون البنات اكعد يمه ويوكلني بايده..من جنت صغيرة .. وهسة هج يعاينلي بطرف عينه..
الشيخ : شجابكم..
وائل : تريد تشوفكم..يعني شجابنه..صدك تحجون..

الشيخ : جنت متأمل جيتج خاطر تبرين نفسج..بس ما اجيتي الا هسة..وره ما راح وصار جوه التراب..
كمت ابجي واحجي وياه : شدتحجون..شنو مات من وراج .. انه جنت مخابرته كبل يومين..وراهه توفى..
فيصل : اييييي يلههه..بره وبعد لا تجين..لا نعرفج ولا تعرفينه .. وهذا الحجي جدام جدج..
صار حجي بين جدي والحجي وعمامي..انه بس واكفة وابجي شنو هلحجي..جايه يمهم ارد ياخذوني لعنده وهم يكلولي هج .. رجلية كامت ترجف..كمشت الحجي من ايدة .. كتله بهمس : خالو خلنطلع احسن..
قاسم : اي خالج ليش لا..لج انتي مثل امج..الدم مالتهه محطوط بيج..واجه المحروس زادلج سم فوك السم البيج .. اي عليمن يطلع..على ابوووو..

الحجي راد يصيح..كتله : الله يخليك امشي خلنطلع .. اخذت الجنط وطلعنه..كام يصيح ويحجي..
وائل : هذا شيخ..هذا يسموه شيخ وتجي الناس تستشيره .. هذا ظالم..صدك ما يستحي على شيباته..بت ابنه يطردهه من الباب..حتى ما فتنه جوه..شكال لروحه..بعدين شنو انتي موتي ابوج..قابل هي شنو..راح الله يرحمه..انتي شكو..
ضل يحجي من حركة گلبة..انه الحركة ضلت بگلبي تجوي بيه وتعصر بگلبي..اخر شي كتله خنروح لبيت ابوي..اخذ تكسي ورحنه..شافتني شذى ضلت صافنة..
شذى من وره خشمهه : هله..فوتي..

استغربت من تصرفهه..يعني جدي وعمامي التربيت عدهم سنين عمري كلهه ما استقبلوني وشذى الي سوت بيه كلشي وهانتني جدام خواتي..وفوك هذا سوتلي السحر بعدين تستقبلني عادي..اكيد اكو شي وره السالفة هاي..طبينه جوه .. البنات ملابسات اسود..بس ملابس طوخ .. وعيونهم حمر..اكيد عاش وياهم هواي ويبقى ابوهم مثل ما ابوي .. اجت رزان حضنتني وتبجي بجي مصاير..حضنتهه وابجي وياهه..شميت ريحة ابوي بيهه..شكبرهه الحسرة بكلبي .. شكد صعبة..صعبة..ضليت حاضنتهه وابجي..لحدما اجت سما..حضنتني وباستني..كعدنه بالصالة..

الحجي اخذ بخاطر امي..كامت تبجي..حاسدتهم على شغلة وحده..شافوه كبل لا يموت..وانه ضلت شوفته حسرة بگلبي .. بجت شوي بعدين سكتت..ما سألت ولا كالت ليش اجيتو هنا .. بالليل صبو عشه..ماتعشيت انه..بس الحجي اكل شوي وكام .. البنات راحو بعد مشفتهم..شذى غسلت المواعين وراحت جابتلنه فراش..البيت كئيب بكل ركن بي..محد يحجي كلهم ع الصامت..فرشت للحجي بنهاية الهول وانه نمت ع القنفة..كبل لا ينام حاجاني..
وائل : باجر اطلع اشتري رصيد اخابر رائد..اشوف بلكت يكدر يفتح البيت نكعد بي هليومين..
دنوة : بكيفك خالو..

وائل : والله خالو ما ادري..هذا شبي جدج..انتي مو طلعتي خابرتي بيومهه انتي وعمتج ومحمد..
دموعي صارت بعيوني..كتله : اي..ما ادري حتى ماخلونه نفتهم شكو..حاجي رائد باجر بلكت يعرف شي..
وائل : باجر الصبح من وكت اخذج ونروح للمكبرة..مناك نشتري مي ورد وهاي الاشياء..
دنوة : خاف مابيك حيل..خليهه على عكبة..
وائل : لا مابيه شي..انتي ما جايه عليهم..تزورين ابوج خاطر نرجع بالعجل..خوما نبقى هنا..
دنوة : هاهية ميخالف..نمت ثاني يوم الصبح من السته كعدني الحجي..غسلت وبدلت بين ما كمل هو..

شذى كعدت..كتلهه حنروح للمكبرة..ما كالت شي..بس تعاينلي بنظرات مدري شلونهه..كتلهه وين مكانه..دلتني .. يم كبر امي حسب الوصف..اخذت مصحف بعدين طلعنه..الحجي نص الطريق ونزل اشترى مي ورد وبخور..برتقال هم .. كال نشوف احد هناك ننطي..ابد مرايحة مكبرة كبل..ما اعرف بس اسمع وصلنه هناك..نزلنه وتمشينه لمكان الكبر..نفس الطريق المريت بي من وداني رائد هسة فتت بي..احس الشريط كله انعاد .. امشي ودموعي تصب..شفته من مسافة مو حيل جبيره .. مبين هو..شكل الكبر جديد..انداريت ع الحجي..كتله : هنا..رحت يمه..انطيت المصحف للحجي..

دنجت يمه..خليت ايدي ع الاسم وابجييي..كمت ابجي واشهك واحاجي : ليش عفتني..ادري ماكلت هج حجي..بس الله يدري بكبر الحسرة بكلبي..رحت وانت بعيد..والله جنت مشتاقتلك ومشتاقه اشوفك واحضنك..دنجت راسي وضميته بين ايدي .. كمت ما اسمع بس صوت الحجي يقره قرآن يمي..ضليت على نفس الوضعية ما ادري شكد..بعدين رفعت راسي واخذت مي الورد غسلته بي..ومالت امي همين..بس احساسي لابوي يختلف عن امي..ابوي صدك احس روحي متعلقه بي والحسرة بگلبي على غيبته..جي عشت وياه سنين وحسيت بوجوده .. حسيت بصوته وكلماته..حتى منظره..بس امي هم يالله اتذكر طيفهه..ضلينه كاعدين تقريب الساعة بعدين طلعنه..الحجي اشترى رصيد خابر رائد..

ما ادري شجان يحاجي..بس كلة : اي هستونه طلعنه مناك .. كلت اخابرك بلكت تكدر تجي تفتح البيت نكعد بي .. سكت شوي بعدين كمل..ها اذا هج احجزلنه من يمك على عكبة وانه من اروح ادفع فلوس..اي عندي..يله اخذ راحتك..
سده واندار علي..كال : رائد محيكدر ينزل بس حيحجزلنه مناك..عكبة نطلع بس شوكت ما ادري..هو يكمل ويخابر
دنوة : هاا..الله كريم..اخذت المصحف والحجي اخذ العلاكة انطاهه لواحد يدفع عربانة كله على روح المرحوم..وذكر اسم ابوي..بعدين وكفنه ع الشارع العام..اخذ تكسي ورجعنه

مسافة الطريق ووصلنه..الحجي راح يسبح وانه كعدت بالصالة اجتني شذى تتلفت منا ومنا..
شذى بهمس : ارد احاجيج بشي..
عاينت عليهه مستغربة..كتلهه : اي احجي..
شذى : ادري الموضوع مو بوكته..بس لازم تعرفين يعني .. هو كبل لا يموت كال كوليلهه..
دنوة : اي غير تحجين..انه من الافكار الصارت براسي ايدي كامت ترجف..ع بالي حتكلي ليش عمامي ما يردوني..
شذى : ابوج جان متزوجني من عمرج سنتين..مو وره ما توفت امج..ضل ساكت عن الموضوع لحد قبل كم يوم من وفاته كام يحجي بهلموضوع..راد يكلج بس كتلة مو وقتهه..
ضليت صافنة عليهه..بعدين دنجت واخذت نفس : الله يرحمه .. عفتهه ورحت للمطبخ غسلت وجهي..

شعجب هسة دتكلي..ليش..هاي حية والف شيطان جواهه .. اخذت ملابس ورحت سبحت فوك..مدري شلون خلص الوكت .. بالليل وره العشه الحجي كال حطلع اتمشى شوي..كتله : وين خالو..الوضع مو زين..
وائل : لا هنا بالمنطقة..ماعلي شي..
راح ورحت وراه سديت الباب..رجعت للبيت لكيت التلفون ع الميز..نساه..شذى والبنات راحو..كمت توضيت وصليت .. بعدين فرشت للحجي خاف يجي بالعجل..ضليت كاعدة ع التلفزيون..دك التلفون..شعليه فما جاوبت..سكت شوي بعدين دك مرت اللخ..كمت شفته..رائد..

گلبي كام يدك..شلته بدون ما احجي..
رائد : ها خالو شلونك..
حاجيته بهمس : انه دنوة..الحجي طالع يتمشى..
رائد : هلا والله..شلونج بنيتي..
من كال بنيتي طكيت بجي..هو يكلي يولي كافي وانه بالزايد لحدما سكتت وحدي..جريت نفس..كتله : متجي اشوفك
رائد : لو عندي مجال اجي بدون ما تحجين..الله يرحمه ويصبرج..ديري بالج على روحج..انه ابوج والله واخليج بعيوني بس المسافة خربت بيناتنه..
دنوة : الله يخليك يارب..انت هم دير بالك..حجينه شوي بعدين سديته ورحت تمددت..سمعت صوت الباب تندك..

كمت فتحته..فات الحجي وراح ينام..طفيت الاضوية ورحت وراه..ثاني يوم ما صار شي..بس خابره رائد كله الفجر لازم انتو هناك..بالليل حضرت الجنط وكملت بعدين طلعنه .. وهم من رحنه لسوريا الطريق كله كاعدة..وصلنه للسيدة زينب اجه محمد اخذنه ورجعنه..صح زرته وبجيت يمه بس بعدهه الحسرة بگلبي..ما اعرف شوكت تروح..يمكن محتروح..وصلنه للشقة فتح الباب علي..ضليت صافنة علي..هو عاين علي ودار وجهه كال تفضلو..

طبيت انه واعاينله مصدومة..هذا شجابه..وهاي مرام هنا هي وبتهه..لا مو طبيعيين..كلهه جم يوم هاي شصاير.. اخذت الجنطة للغرفة..اجت الحجية سلمت علي هي وجلنار .. طه اجاني يركض..شلته وابوس بي..كرصت خده..اشتاقيتلك حقير..انداريت ع الحجية..كتلهه : شلونج خالة..
الحجية : اسأل عنج عيني..اكيد تعبتي بالطريق..
دنوة : اي والله..كلشي صار بالعجل..
الحجية : الله يساعدج خالة..رائد مرتين خابر يسأل عليج
دنوة : اي ادري خابر الحجي هناك وانه شلته..بس اكلج علي شجابه هنا..ادور مرام همات..
الحجية : اي سكتي..هاي مرام ام علي دزتهه وي جوارينهم تكول ثقة..ومن وصلت للكراج هنا راح علي اخذهه واجو

دنوة : شنو حيضلون هنا..
الحجية : لا باجر ينتقلون للشقة الكعد بيهه علي..
دنوة : ها زين..راحت هي وجلنار..ضل طه يمي..بدلت وانداريت علي..بسته واشم بريحته..شكد ارتاح من احضنه .. ولو هو مو ابني بس ارتاح..اذا صار عندي طفل يمكن اضل حاضنته من يكعد لحدما ينام..ابتسمت على تفكيري وكمت طلعت بره..اجت مرام اخذت بخاطري وعلي همات .. علي ما عاين بوجهي..مدنج عيونه ويحاجيني.. متغير ..مشى الوكت .. بالليل شفت علي ومحمد يحاجون رجال بالباب..شوي وفاتو ثنينهم..

محمد : هاك هاي المفاتيح..باجر اكعد بيهه..تدري والله ابن حلال..كبل جم يوم كال اريد ااجرهه..
علي : اي هم يالله خوما نضل كاعدين هنا..
عفتهم يحجون وطبيت للغرفة..يمكن جانو يحجون وي ابو الشقة..رحت تمددت ونمت..رجلية ما احس بيهه من التعب .. ثاني يوم راحو للشقة الثانية..رجعنه نفس النظام القديم .. اخلاص تريد تحجي بس كامشة روحهه كوه..مشت الايام هم كل يوم لازم ابجي..تعبت من الغربة..ارد ارجع للعراق .. ارد احضن رائد من اشوف الدنيا صارت صغيرة بيه..صدك مشتاقتله..احس بس هو بقالي بالدنيا..مشتاقه لنبرة صوته ولمعة عيونه من يحاجيني..من يجي من الواجب ويكلي ما اكدر انام الا بحضنج..

بهلايام حجيت للحجية على شذى شكلتلي..وعلى عمامي شسوو من رحنالهم..
الحجية : والله خالة هاي كلشي يطلع منهه..الله اعلم شوف شعدهه..وهذوله عمامج والله ما ادري..اكيد هي حاجيتلهم بس ما تكول..قابل تثبتهه على روحهه..
دنوة : هج تكولين..
الحجية : اشوف هج..بعد الله اليعرف..
دنوة : الله كريم..وراهه بفترة لمدة تقريبا اسبوع محمد يجي للبيت ضايج..يجي يمي من اغسل الملابس..يريد يحجي ويسكت..كتله : شبيك ضايج..
محمد : مابيه شي..بس تعبان من الشغل..

دنوة : حقك..عصرت الملابس وكمت..كتله : اعتبرني بمكان اخلاص..يعني مثل اختك..احجيلي خاف متضايق..
محمد بابتسامه : الله يسلمج..حروح للشغل..اجيبلج شي
دنوة : متقصر..ضل شوي بعدين راح..كمت شريت الملابس الجو بده يصير ربيع يعني بي حراره الصبح..كملت وطبيت مريت من غرفة اخلاص..سمعتهه تحاجي جلنار وتبجي
اخلاص : لج شلون..ارد ارجع واشوفه..خاف صار بي شي
جلنار : هاي شبيهه البنية..بابا وين يقبل رائد..هسة يطرده من الباب..اذا تكولين ابو مسجون..
اخلاص : شمعرفني..اسوي كلشي بس يقبل..
جلنار : تره رائد يريد مصلحتج..وانتي جامعية واكو امل جبير انه تتعينين..ليش ترحين لواحد كضاهه افرار وابو بالسجن..فكري زين علمودج..

عفتهم يحجون ورحت غسلت وجهي..اكول ليش اخلاص تكب علينه كل فترة..ثاري طلعت تحب..عاد شلون حب هذا .. هو صدك الحب ميعرف طبقات وفروقات..بس اذا راحت لهج قسمة تدمر..تكرهني وانه مرات اكرهه..بس خطية..هي اعرف بمصلحتهه..خلص اليوم عادي..بالليل اندكت الباب قوي .. كعدت مخروعة..لبست الشال والحجية كعدت..شفت الحجي راح يفتحهه..وجنود واكفين بالباب..منو هذول......

يتبـــــــــــــــع.......................