رواية اسألي عني الليالي الفصل الخامس وأربعون 45 - بقلم رقية جاسم

قناة التليگرام

حساب الانستگرام

الـبـارت الرابع والاربـعـون.............

عفتهم يحجون ورحت غسلت وجهي..اكول ليش اخلاص تكب علينه كل فترة..ثاري طلعت تحب..عاد شلون حب هذا .. هو صدك الحب ميعرف طبقات وفروقات..بس اذا راحت لهج قسمة تدمر..تكرهني وانه مرات اكرهه..بس خطية..هي اعرف بمصلحتهه..خلص اليوم عادي..بالليل اندكت الباب قوي .. كعدت مخروعة..لبست الشال والحجية كعدت..شفت الحجي راح يفتحهه..وجنود واكفين بالباب..منو هذول..

ضلينه واكفين بمكانه..بس اسمع الحجي حاجاه..
وائل : نعم..المن رايدين..
- : محمد هنا..مطلوب عنا فالمركز..
وائل : لا ما موجود..خير شمسوي..
- : وصلنه خبر عنو انو على تواصل مستمر مع شئة مشبوهه فيهه ئمار ومشروب وبنات ليل..
الحجية من سمعته شهكت وخلت ايدهه على حلكهه .. سمعتهه تحجي وي روحهه كالت شوداك هناك يمصخم الوجه ..الحجي كمل حجي وياه..
وائل : ماكو هيج حجي..ابنه يطلع من البيت للشغل ومن الشغل للبيت..ماعنده هيج سوالف..مشتبهين..
- : هيك امور مانعملهه الا نتأكد..عموما إتلي انو مو موجود عندكن..لكان هات عنوان محلو..

الحجي تخبل..كله : شلون انطيكيا..دا اكلك ماعدنه هج شي منيلك هلحجي..صار حجي بين الضابط والحجي..حتى جلنار كعدت هي واخلاص..اخر شي راح الضابط..تمشيت قريب الباب شفته يدك الباب على شقة علي..طلعله علي لابس فانيلة وشعره مخربط..مال واحد نايم..ما اعرف شحجة وياه بس تغيرت ملامحه وكام يبلعم..اخذه على صفحة بعدين طلع الضابط وياه جنود ثنين..الحجي سد الباب وفتنه جوه .. راح اخذ ملابس لبس بالعجل ويحاجي خالة ..
وائل : حروح للمحل اليشتغل بي محمد..خلاشوف هذا شمسوي المصخم..هذا التلفون هنا خاف يخابركم جاوبو..
طلع وسد الباب وراه..

كعدت ع القنفة وتكرضم بروحهه..كعدت يمهه احاجيهه كتلهه : اصبري يمكن ماكو شي..
الحجية : لج ماشفتي شلون ضل يلح..معناهه الموضوع صدك
دنوة : لا تظلمي خطية..هسه نعرف كلشي..تذكرته اخر فترة شلون جان متضايق وما يحجي هواي..شكد حاولت وياه .. اكلة احجيلي مثل اختك..يكلي مابيه شي..الله اعلم شصاير .. تقريب النص ساعة جان يدك التلفون..محمد..اجت اخلاص شالتة..ما ادري شكاللهه بس هي حجت..
اخلاص : وين مانندل وخالو كال حروحله للمحل..سكتت شوي بعدين حجت..ها..يله ماشي..
سدته جان تندك الباب..كامت فتحتهه..صار علي بوجهه ..
علي : خالة انه حروح للمركز..اشوف شكدر اسوي..

الحجية : يله روح..الله يصبرني..ضلينا ننتظر لوجه الفجر .. لحد خابر لحد حجة..كعدت يمهه احاجيهه..كتلهه : خالة تدرين محمد صارله فترة مو على بعضة..يعني ضايج اشوفه لو ما يحب يحجي..سألتك خاف بي شي .. ما جاوبني..يكلي زين بس الشغل متعبني ومدا ارتاح..
الحجية : اي حتى انه انتبهت علي..حاجيته هم كلي نفس الحجي..مدري منين متعلم ع الاسلوب..
اخلاص حجت من مكانهه : اي عليمن يطلع..على اخوه غير
الحجية : اي والله صدك..بس مجان هشكل..
دنوة : انطي مجال..يمكن ماكو شي..
الحجية : الله يسمع منج.. ضلينه كاعدين اخر شي تمددت ع القنفة ونمت بعد ماكدرت اضل كاعدة..عيوني قفلت..

كعدت الصبح على صوت خالة دتحاجي الحجي..ومحمد ماكو .. هذا شمسوي ياستار..
الحجية : هذا علي شنو من بشر..صدك ما يستحي..هسة سوي التريده بس ابني شكو مدخلة بالنص..
وائل : اي والله..ادور صارت عركة شكبرهه وثنينهم دخلو للتوقيف..هسة دننتظر..الضابط كال ناخذ اقوالهم ثنينهم .. لأن الشغلة مو هينة..
مفهمت شديحجون..عدلت كعدتي..جريت الشال لبسته .. عاينت لخالة..كتلهه : خير شنو شطلع..
وائل : هذا علي مو جان بسوريا كبلنه..راح وحده .. كايم مأجر شقة بس بالاسم بعدين مكضيهه بشقق وصخة وشرب وعربدة..من محمد اجه بالبداية..شايفه طاب طالع لهلمكان .. هو يدري بي مأجر شقة..

كايم محاجي من باب الفضول..كايله شعندك هنا مو عندك شقة ومن هلحجي..علي كلة لا ماعندي شي وهذوله صحباني وانه وحدي وين اكضي الوكت قابل اكابل الحيطان..كوم باجر اخذك تشوفهم..الاغم رايح وياه ثاني يوم لاكي الشرب والبنات والوصاخة واصلة لسابع جار..عايفهم وطالع..علي جايه للمحل متعارك وياه صايرة لغوة بعدين ابو المحل مفاككهم..مرت الايام جاي علي مصالح محمد كايلة انه عفت الشقة هذيج واريد اجي اسكن عدكم..مرتي اجت وماريدهه تعرف شصار هم عندي بنية ما اريد تصير نهايتهه طلاك وتضل بيني وبين امهه .. متعاطف وياه وجايبه للشقة..هالحچي من جنه بالعراق هو جاي هنا..بعدين تدرين أجر الشقة الكعدنه بيهه ..

كبل جم يوم..عشر ايام اسبوعين..محمد شايفة يطب لنفس المكان..كايم حاجي وياه..
الحجية : اثول ابني مو بيده..هذا لو رائد جان عرف شيسوي بس هذا على نياته..
وائل : اي والله هسة شكو تحاجي..هو وربه..يكلي لا مرته شلون تتبهذل وبنته..ادري هسة انت تهتم بيهم اكثر منه.. هو ابوهم ويعرف شيسوي لو صغير مثلا..عمره تسعة وعشرين شكبره يصير بعد..المهم مهدد محمد..كلة اذا حرف واحد طلع عني جدام مرتي اذبك جوه..ضال حجي بيناتهم ومناكر .. اخر شي الشرطة كامشين علي مشتبهين بي..كايليلة شعندك هنا ماعندك..كايللهم لا ..انه واحد جان يجي هنا وكلي اجي اجيبلة غده..منو هذا..ذابهه براس محمد..

كايمين جايبين دورية وماخذينهم من الشقة كلهم..ضال بس واحد مهزوم..محد معترف على علي..كايلين اسمه محمد ومنطين عنوان الشقة..والبارحة بالليل اجو اخذو محمد..علي اجه للمركز..تعاركو ثنينهم..محمد يكلة ذبيتهه براسي وعلي ينكر..اخر شي ذبوهم ثنينهم جوه..وهسة دياخذون اقوالهم .. الله يستر اذا ثبتت على محمد..
دنوة : هذا شنو علي..والله حرام اسمه هيج..كبر حتى كبر .. ومحمد شعلي خطية هاي فوك ما ينصحه..
وائل : اي هو الينصح هسة يطلع مكروه..
دنوة : زين شلون..
وائل : بعد دننتظر..كال الضابط منا لاسبوع..اذا بقت اقوالهم نفسهه وشاهد ماكو يتحاكم..
الحجية : لا كالهه الله..جا علي الادبسز يطلع وابني الفقير يدخل سجون..ماعدنه واحد فات سجن ابد..والله ابيع التراجي والمحبس علموده..بس كون يطلع..

وائل : دصبري يابة..قابل الشغلة هينة..علي اذا طلع انه اعرف شسوي وياه..هسة هو بالتوقيف بتهمة مشاجرة..ساعات ويطلع..اروحله عود اشوف شنو تاليته هذا..اذا كلش قفلت اوكل محامي..ابو المحل شاهد هو وولده على محمد..من المحل للبيت شعنده قابل..
الحجية : ليش وين صايرة هاي الشقة..
وائل : يم المحل..شوفي الصلافة..يله هو شتترجين منه غير طيحان الحظ والسربته..
الحجية : زين هسة محتكدر تروحله..
وائل : اليوم لا..باجر اي..واذا صار شي يخلوه يخابر
ضلو يحجون..هذا شنو من علي..كبر والله ما يستحي..مو مرتك يمك وبنتك شكو راكض وره هاي السوالف..ادور محمد خطية لا يروح بيهه..ما يستاهل..

كمت انظف الشقة..كملت وخليت الاكل ع النار جان تجيني اخلاص..كمشتني من زندي وتدفع بيه..
اخلاص : تره ادري سمعتيني البارحة من دا احجي وي جلنار بس ارد اكلج اذا فكيتي حلكج بكلمة لامي اموتج..
دنوة : شسمعت..شدتحجين انتي..
اخلاص : اي يله لا تنكرين..احجي من هسة احسن..
دنوة : هو انه شمسويه..شبيج عيني متروحين من وجهي مالي خلكج..شعليه احجي..ناقة جمل..شي يخصج.. ضلت تعاينلي وراحت من وحدهه..والله اسلوبهه همجي واندفاعي.. يعني انه ما حاجيه وتريد كوة تسويني احجي وافتن.. هو انه سرور كلتلي على روان من سوت لعقيل سحر وماحجيت.. تردين هسة على حب ما حب احجي..شدخلني..كافية خيري شري..

صبيت الغده وتغدينه..المغرب اندكت الباب..رحت افتحهه صارت مرام بوجهي هي وبتهه..فاتت جوه تبجي..شافتهه الحجية صدت عنهه..من وره علي..
الحجية : خير..شعندج جاية..
مرام هي وتبجي : خالة فدوة علي لسة ما اجه..مو خالو كال ما مسوي شي وحيطلع اليوم..شو تأخر..
الحجية : وانه شمعرفني..شوف وين دايح..بوحدة من هلاماكن الوصخة مثله..شوفي خالة تردين تكعدين كعدي..بس مال جاية تشكين بحال عليوي جدامنه احب اكلج اطلعي من هسة .. الواحد يحفظ كرامته شوي عاد مو هج..
مرام : هاي بعدني ما طبيت وهج تحاجيني..جا من اكعد شتسوين..ملازم حطلع..وعلي ما مسوي شي انتو تتهمو..
الحجية : اي صحيح ما مسوي..لا انه المسوية..اكلج حبوبة طلعي احسن لا تغثيني ادور يصعد سكري..

دارت وجهه وطلعت..ابتسمت بداخلي..والله تستاهل .. كلما تكعد لازم تكول خطية علي..ومسكين علي..بالغربة وحده لا ام لا اخت..سوده عليه علي مدا يلكى شغل..ما ادري غبية لو تستغبي..يعني تدري بي هج وتعرف بتصرفاته بس جايه تريد تسوي فقير براسنه..انه من احجي هج اعوفهه واروح التهيلي بشغلة واعوفهه تلغي..رحت يم خالة..بستهه من خدهه .. كتلهه بابتسامة : لو هيج الخالات لو بلاها..
الحجية : هههه..تستاهل يمعودة..تسوي روحهه فقيرة وماعدهه احد..بله بالعراق جانو اهلهه بسوريا نكول وحدهه .. هسة شنو حجتهه..عالم لوتية خوما مثلج فطيرة..
دنوة : اي صدك..يله انتي موجودة ادافعيلي..
الحجية : يلة شعندي غيرج..حاسبتج مثل بنتي..
دنوة : احلى ام والله.. ابتسمت وكمت..

خلص اليوم..بس متوترين على محمد..جان هو شنحتاج يجيبلنه..وهاي كلما يجي من الشغل يجيب حب حار وكرزات ونكعد ع التلفزيون..هسة الشقة صارت كلش هدوء..بالليل كبل لا انام توضيت وصليت ركعتين..ادري بي ما مسوي شي خطية بلكت ينصفوه..هذا علي اشوف بي يوم..هسة سوي شيعجبك بس ليش تورط العالم وياك..خالة شكد قوية..مدري انه ضعيفة..ما بجت ولا شي..شخصيتهه قوية تعجبني .. بس بالليل صلت ونامت وانه نمت وراهه..ثاني يوم ما صار شي للعصر سمعت هوسة يم الباب..لبست شال ومديت راسي اشوف شكو..الحجي وعلي واكفين بالباب..
وائل : ها لك ارعن..وين تريد تطلع..تريد تعوفهه براس محمد مووو..اليوم لو انه لو انت..ارد اشوف منو يطلع..
علي كامش جنطة مال ملابس وواكف يمكن خاف الحجي يسويله شي..بس شافه بالباب بعد شيفضهه..

اخذ الجنطة من ايده والفلوس شمرهه بالشقة..انه جفلت وطبيت بالعجل هو طب وراي وقفل الباب..ضل علي يصيح بره جيب الجنطههه تره اروح اشتكي عليك..
الحجي : يله..اذا بيك خير روح اشتكي..ما مرباي..
علي : تريد محمد يطلع مووو..يله احلم شيطلعه هذا..حيخيس هناك ابشرك..
وائل : ديله يلهههه..ما علي بس المزعطة والسرسرية..
عافه وراح..كام يحجي بصوت عالي بالشقة مبين دمه محروك على محمد..هو خطية صدك ما مسوي شي المسكين..
الحجي : شلون يحجي الادبسز..صدك ما مرباي..المفروض اغسل ايدي منه من باك صگر وهو كاعد ببيته..بس لااا شلوووون..اضل انطي اعذار وابرر من يمي..امداااك ياعاااار عيب تنحسب ع الزلم ياخنثههه..
الحجية : ها خير ياستار..شبيك تصيح..

وائل : هذا علي يريد يشرد..اخذت ملابسه والفلوس..ارد اشوف وين حيطلع بعد..منا لهنا ميمشي بعد..
الحجية : حييل..يستاهل..بلكت يتعض ويروح يحجي الحقيقة واذا ما حجى مثل ما كتلك..انطيك المحبس والتراجي تبيعهن وتوكل محامي شوف اي شي..المهم يطلع محمد..
وائل : الله كريم..لا تبيعين ولا شي..انه عندي..
عافنه وراح يبدل..بعدين طلع كام حروح للمركز اشوف محمد .. مر باقي اليوم..واليوم الوراه ما صار شي..علي كاعد وخانس بالشقة لا منا ولا منا..لأن مرام اجت يمنه دتسولف جان يفلت لسانهه..كالت اي والله كاعدين وساكتين..علي ما يطلع للشغل وراهه سكتت..هي كبلهه كالت علي رايح لمساكن برزة .. منطقة هنا بسوريا..عود يدور شغل وهسة كالت علي كاعد معناهه بالبيت..الحجي كال بعدهم الجماعة بالتوقيف..

ومحمد همات..ميكدر يوكل محامي بعدهه القضية ما صاعدة للمحكمة..لسه بالمركز والشهود والثوابت مو كاملة..ثاني يوم الصبح دك التلفون ع الحجي..وره ما سدة كال..
وائل : شوفي ربج ما يكطع بأحد..القضية بعدلهه يوم وتصعد للمحكمة..هسة كامشين هذا الشارد من الشقة..شاهد ضد علي هو والجماعة الي جانو بالشقة..
الحجية : يداده..شلون..مو جانو صحبانه عساس..
وائل : والله ما اعرف..هسة اروح وافتهم..
راح يلبس..عاف التلفون وطلع..ضلينا وحده تعاين للخ .. صدك ربك ما يكطع بأحد..من رجعت للعراق وي خالو كلت شلون حكعد وياه وهو ما يحبني ويكرهني..بس عبالك الله حط بي الاهتمام وتطييب الخاطر..شلون وكفلي وكفة من عمي طردني.. واخذني للمكبرة ورجعني..بدون ما يكول تعبت لو مابيه حيل..ابتسمت ورحت اسوي اكل..

تريكنه وكعدت ارتب الشقة..اخلاص ما عافتني طبعا..بس انه اتجاهلهه..صح يضايقني واضوج بس احسن من العركة واحنه هنا نفوت بغرفة نطلع من الثانية..يعني المكان صغير مو مال زعلت وزاعلتني..بنفس اليوم كاعدة ع القنفة اكلب بالاخبار ارد اشوف وضع العراق شلونه..اجت كعدت يمي واخذت الريمونت..كتلهه : ليش مو دااشوف..
اخلاص بدون ما تعاينلي : اي وشتردين يعني..
دنوة : اريد اشوف..هي دقايق والباقي الج..
اخلاص : امشي لج..زعطوطة حتى الطفل ما ثبت ببطنج .. لأن بعدج جاهلة..طولج شبرين وتردين تصيرين حامل وام .. شكد تحلمين انتي اوي..سخيفة..البنات يكملن دراستهن وتصير بيدهن شهادة يله يفكرن يزوجن..خوما مثلج..توج طلعتي من البيضة ولعبتي بعقل رائد علمود يتزوجج..

لج تدرين ليش اكرهج..لأن انتي متستاهلين اخوي..انتي وحدة مقامج بالحضيض لواحد مثل مسواج من كل النواحي .. شوفي شعرج وطولج وبشرتج..حتى مستوى تعليمج ميلوك لاخوي..تره رائد بمثابة الدكتور..دارس مرتين..تجين انتيييي لا فهم ولا علم تاخذي..والله حريمة..فوكاهه خليتي يتزوج وابوي بعدهه السنة مالته ما طالعة..جا شكد مسمومة .. تقبلين اخوج يتزوج وابوج بعدهه السنة مالته مطالعة..
ما ادري على شنو اجاوبهه..جرحتني بكل كلمة كالتهه..بس خلصت حجي تنهدت عبالك طلعت الجمرة بداخلهه وارتاحت وانه تأذيت..اختنكت من زردومي..كمت ابجي..
دنوة : انه ماكتله تزوجني هسة..هو كال ما اريد اخسرج واجه خطبني..ليش ذابتهه براسي..رائد يحبني وانتي غيرانة .. هو الحب من الله لو حرام عندج..

مثل ما انتي تحبين ذاك مدري منو..ع الاقل انه كرابتة وخالة تعرفني شنو ما شنو..رادت تحجي..عفتهه ورحت للغرفة .. تمددت وتغطيت لراسي..كمت ابجي بدون صوت بس دموعي تنزل..شكد حجت علي وأذتني كلام وفعل..بس مثل هلمرة ابد شكد حقيرة..كرهتهه..تكلي مستواج بالحضيض..اليسمعهه يكول متعرف تقره وتكتب..انه ما ضغطت علي وكتله تعاي اخطبني هسة..هو اجن حتى مجنت ادري بي حيجي ضليت ابجي على حالي..شخصيتي ضعيفة جدامهه..حتى مكدرت اجاوبهه عدل من الدموع والبجي..وهي ماخذة وضعية المرتاح وما منه غلط..شحال لوما هي مليانة اغلاط..كمت اتلمس وجهي وشعري..شبيهن..ملامحي طبيعية وانه عاجبني سماري .. هي بيضة حييل..مدري شتحسبني من اوكف يمهه عبدة مدري من هذولة السود..

هلكد ما بجيت تعبت ونمت..كعدت المغرب..لبست الشال ورحت للصالة..لكيت محمد كاعد..ابتسمت ورحت كعدت يمهم .. كتله : الحمدلله على سلامتك..
محمد : الله يسلمج عيوني..
مبين هستوة جاي..لأن خالو كام يحجي شصار هناك
الحجية : اي شصار احجيلي..انه كلت بس لا غيرو حجيهم
وائل : لا شيغيروه..ثبتت عليهم بعد..هذا الشارد من الشقة كامشي بمكان ثاني..من جايبين للمركز وشايف جماعتة ومحمد بالتوقيف عرف السالفة..ضال يوم واحد وحاجي وي صحبانه..كايليله صارلنه اسبوع ننتظر علي يوكل محامي خاطر نطلع..ليش ما علي ضاربهم بوري وعايفهم..اصلا هو راد يطلع منا..بس اخذت فلوسه والجنطة..كايم هذا الولد شاهد ضده..كال عافنه واحنه ياما كعدناه يمنه واكل وسهرة للصبح..بعدين يدك الناقصة..

طلع علي من جان بالتوقيف كايللهم لتغيرون اقوالكم بين ما اجيب محامي واطلعكم..بس هو عايفهم..هذا من شهد ضده فالباقين هم مغيرين اقوالهم ونزلوهه بالسجل بعد .. رحت انه وابو المحل اليشتغل عنده..انطه شهادته..كلة هو كل الليل يشتغل بالمحل وانه وولدي شاهدين..بس وقع وطلعنه..
الحجية : يمة من علي..هذا شنو من بشر..هسة هو وينه
وائل : ماكو..غراضة وينهن..
جلنار : اجت مرام اخذتهن اولت البارحة..بس كالت علي بالبيت مدا يطلع للشغل..
وائل : شوف وين راح..طبه مرض..خلياخذ جزاته..
الحجية : اي صدك..يمة مشتهي شي اسويلك..هي التوقيفات شبيهه قابل..كلة ضيم وضلايم..
محمد : اي والله صحيح..شينطونه يمعودة..شوربه فاهية لو باكلة..بس تدرين..اكو ضابط ذكرني برائد..

شلون يحجي واسلوبه حلو..تعاطف وياي..كلي انت ماعندك شي وحتطلع عن قريب..كتلة صدك سيدي..كال اي والله لأن هذول كبل هم كامشيهم بس مجان الموضوع بهلكبر..جان ابسط يعني..تخيلت رائد بي..الله يحفظه..
الحجية : ذكرتني بوليدي..والله مشتاقتله.. شوكت يصفى الوضع دانرجع..مليت الغربة..
محمد : الله كريم..تفرج تفرج..حكوم اسبح..
كام اخذ ملابس وراح يسبح..شوي فرحت ونسيت اخلاص كعدنه ع الغده اجت هي تريد تحجي وتنغز بيه بس ما اجاوبهه..حتى ما عاينت عليهه..تجيني من هلدرب اروح لهذاك الدرب..ع السمعته منهه عبالك كاعدة يم عدوي وانه ما ادري..ما كلت لخالة..ادور تروح تذب تهمة اكبر من راسهه براسي..خلص اليوم عادي ما صار شي..بس محمد طلع للشغل المغرب مثل كل مره..ب

مشت الايام..كل فترة الحجية تروح تخابر رائد..دورات اروح وياهه دورات لا..بس مرتين حاجيته..بكل مرة صوته تعبان اكثر ما اتحمل اسمعه هج وهو ما يحجي..ما يكول شبي..طبيعي اخلاص تضوج .. تشوفه شلون متمسك بيه وهو لسه ما يحاجيهه..تتخبل..

بيوم العصرية بدلت واخذت فلوس ورحت للمحل اخابره.. محمد والحجي طالعين كلت اروح وحدي عادي.. خابرت علي تأخر يله شاله..
كتله بلهفة : حبيبي..
رائد : هلا بيج گلبي.. شلونج عيوني..
دنوة : زينة الحمدلله.. انت شلونك.. مشتاقتلك موووت..
رائد : حياتي انتي والله انه اكثر ..تعبان بدونج..
دنوة : الله يساعدك يارب.. ديربالك على روحك فدوه.. صحيح بعيدة بس چني يمك..
رائد : ههههههه.. يروح روحي.. الله يحفظج.. لاتخافين انه زين لمن اسمع حسج..
هو وديحچي كام يگح.. چلبت بي دقايق وسكت.. ادور سمعت صوت الجداحة مال واحد ديورث جگارة : رائد.. لادخن..
رائد : ها ليش..
دنوة : مو دتگح ومريض .. شنو عناد..
رائد : لا هاي الجگارة تسويني زين.. چنها علاج صدك چذب.. ضحك بصوت ..
دنوة : لا دااحچي صدك شبيك.. حباب لخاطري..
رائد : هاي لخاطرج.. لو اكو كامرا چا شوفتج شلون ذبيتها..
دنوة : اي عفية ادري بيك حباب وتحبني..
ضل يضحك بس مبين تعبان.. حاچيته شواي بعدين سديته ورجعت..

بس گلبه شكد قاسي بحيث اخته ما يحاجيهه..السوته مو سهل..هسة لو منطيه الفلوس لشخص يستاهل بيهه مجال.. بس المن..لعلي .. هذا بلاوي الدنيا كلهه بي..ادور طلع راجع للعراق وعايف مرته وبنته..بالبداية مندري وينه..عبالنا رايح لغير منطقة لو غير محافظة..بعدين اجت مرام كبل اسبوع تقريبا كالت تره علي رجع للعراق لأن اذا يضل هنا ياخذو وينسجن..كالت حروح يم بيت اهلي ابوهه جان ينتظرهه جوه..انطت المفاتيح للحجي علمود ينطيهه لابو العمارة وراحت..

هي ليش تكللنه..احنه شكو..اصلا مطايقين نسمع اسمه .. ادور تجي تسولف عنه..المهم راحت والشقة انقفلت بعد..مشت الايام عادي..بين اخلاص والشغل وغيرهه..كل اسبوع .. عشر ايام نطلع نتمشى العصرية نرجع وي المغرب..اكو مطعم نفوت من يمه ريحة الاكل توصل للشارع..مينزلون يمه بس الي عدهم سيارات..هم مو أي سيارة..سود وعاليات..بس المنطقة كلهه على بعضهه حلوة..حتلو بس نتمشى..وهاي هج عشنه .. دورات اكعد اتفرج ع التلفزيون واصفن..حتى نسيت شكل البيت مالتنا والغرفة..يمكن اذا طبيت للبيت مرة لخ احسه قصر لأن تعودت ع الغرف هنا بالشقة..صغيرات وملمامات .. بسيطات من كل النواحي..حتى الفرشة وشكل الجرباية .. اضل دقايق بعدين ارجع اتفرج..

وضع العراق كلش خرب بالـ٢٠٠٧..ناس تتكتل بالشوارع من عدا العرك بين السياسيين وغيرهه وغيرهه..انه هذا كله ما يهمني بس اريد رائد بخير..اذا صارلة شي فأتمنى اموت وما ابقى عايشة..محد يبقالي..بس اكول يومي كبل يومه .. صدك احبه ومتعودة علي..مشتاقة لكلمة بنيتي منه..مشتاقتله من يكلي مشتاكلج ويشيلني..لو من نكعد ع الاكل ويخلي جدامي..اكلة ليش مو دااكل..يكلي ميخالف..اكلي مني .. من اكول كلشي برائد مميز يعني كلشي..على رغم البعد بس كل ما انام احسة قريب وكاعد يمي..

وره هلفترة كعدت الصبح سويت الريوك وكعدنه مثل كل مره .. خالو تريك ووراهه بساعتين تقريبا راح..كال اجيب فواكه وجم شغلة بعد..محمد غير دوامة..جان يطلع من السبعة الصبح للسبعة المغرب يله يجي.. فمحد بالبيت بس احنه البنات يعني .. انه كمت خليت الاكل التمن ع النار جنت منكعته .. والدجاجه همات..بس كلت حشويهه هلمرة..شغلت الفرن ما اشتغل..طفيت النار وكمت..صحت : اخلاص متجين تشوفين الفرن ليش ما يشتغل..درت وجهي مديت ايدي ع اليدة مالت الفرن جان تكب النار على ايدي..انه من الحرارة بعد ما احس بشي..كمزت من مكاني واصيح : خالة..تعالييييي .. ادور الطباخ كله صار نار ومنا ايدي حتى خفت اعاينلهه خاف تشوهت..اجت خالة بالعجل متعرف شتسوي

كمت ابجي واحرك ايدي بالهوى..متت من الوجع..احجي وابجي دموعي ما سكتت : خاله دتحركنييي..موتتنيييي .. عفيه شسوييي..
الحجية : لج اخلاااص..امشي روحي للشقة البسدنا .. احتركت ايدها سوده بوجهي..
انه من البجي كمت ما اشوف..بس اسمع اخلاص تكللهه يمه مديفتحون الباب شلووون..انه من حلاة روحي كمت فتحت المي عليهه..اريد تروح الحرارة..احسهه صارت بكل جسمي مو بس ايدي..ما ادري شكد مر وكت بس اجه رجل امنية بيده مثل الدبة حمرة وجبيرة..رش ع الطباخ وطفت النار..
- : اخذها للمستشفى..خطية ايدهه متأذية..
الحجية : اي ياريت يله..ادور محد من الزلم بالبيت..
- : ميخالف اني موجود..

خلت شال على راسي ونزلت ابجي بعد مشفت شي من الدموع..كلش أذتني..بين ما وصلنه للمستشفى انه ماعت روحي..طبينه جوه..بعدين كعدت بغرفة بيهه سدية وادوات دكتور..فاتت بنية ما انتبهت على شكلهه..بس اجت شافت ايدي وتعاينلهه من كل الجهات..طبطبت على ظهري..
- : ما تخافي..حرئك من الدرجة الاولى بس انتي بشرتك حساسة كتير..فمأثرة ع الجلد كلو..
خلتلي جل شفاف عليهه وكالت اتركيهه ع الهوى..بعدين عافتني وراحت..زين ليش هج حركتني حرك مو طبيعي .. عبالك طبت للعظم..راحت يم الباب تحجي وي خالة..
الحجية : شبيهه دكتورة..
الدكتورة : تعي نحكي هونيك افضل..
راحو ثنينهم وانه كاعدة..ادور من خلتلي جل كامت تحركني بالزايد..شنو هاي من صدك من الدرجة الاولى..

شوي واجت خالة هي والدكتورة..
الدكتورة : عم تجعك او تحرئك..
دنوة : اي هواي..
الدكتورة : اي شي طبيعي..حعطيكي مسكن حاليا ..جل كمان ومرهم تستخدمي بعد ما تصير المنطئة مائلة للسمار تا ما يعملك تصبغات او أثر..بعد هيك ترجعي ع البيت..
دنوة : شكرا..
الدكتورة : واجبي..
اجت فتحت اللوكر وانطتني حباية فوكاهه مي..بقيت نص ساعة تقريبا بعدين طلعنه ورجعنه للبيت..لكيت الحجي كاعد هو واخلاص وجلنار بالشقة..بس شافنه كام..
وائل : خير ياستار..ضل بالي والله..شلون صارت..
دنوة : بعدهه تحركني بس احسن من اول مره..عاينت للطباخ شلون صاير اسود والجدر محترك..انكلب الاكل عزه..

شكد فكر انه..عود ردت اسوي شي جديد..تالي خرب كلشي عفتهم كاعدين وطبيت للغرفة..ضليت احرك بيهه على كيفي بعدين بدت شوي شوي تهدأ..اجت خالة كعدت يمي..
الحجية : ها شلون صرتي..
دنوة : احسن شوي..شكالتلج الدكتورة هناك..
الحجية : ما كالت شي..بس كالت بشرتهه حساسة واحتمال يصير عدهه تصبغات بمكان الحرك..
دنوة : بس كالت من الدرجة الاولى..
الحجية : اي ادري كلتلي..هي دكتورة وتعرف احسن بعد .. وانتي خالة ما شفتي روحج شلون فرفحتي وصارت حمرة وبيهه دم..من هاي كالت حساسة..وانتي مناك مخليتلهه مي فهي خافت خاف يصير التهاب..
دنوة : اي والله خفت اعاينلهه..مدري شجاني..
الحجية : يله ارتاحي..فدوه الج المهم طلعتي سالمة مو مهم الطباخ والاكل..هسة اخلي خالج يطلع يجيب..
عاينت عليهه وابتسمت..

شكد حبابة..حبيتهه بهلموقف هواي..مو علمود بس .. بس موقفهه رزن وهادئ ومن حجت وي الدكتورة شلون تحجي مرتبة وبهدوء..حتى لبسهه مو مثل خالة ابتسام وام عقيل .. على الرغم هم تقريبا كلهم نفس الكصة..بس ام عقيل شوي اكبر..مبينه مثقفة ودارسة..اخلاص شكد تضوجهه وتحجي حجي يسم البدن بس ولا مره كلتلهه ابطلج لو شي .. اذا صارت عندي بنية لو ولد فهنياله على هج بيبية..صارتلي مثل الام من ابوي توفى .. ومن اكعد الفجر ابجي وما اضل نايمة تكعد تضل وياي ما تعوفني وحدي..هي ورائد يعادلون الدنيا كلهه..

عفت التفكير وتمددت ماده ايدي..بعد ما ادري شصار لأن نمت..كعدت العصر على صوت خالة تكعدني..
الحجية : كومي عيني..تغدي ما تغديتي..
كمت وحركت ايدي شوي..احسهه يابسه..مكان الحرك يابس يعني..عاينت علي..احمر والحافة حمارهه اكثر من المنطقة الي بالنص..منظرهه مقرف مدري انه ما اتحمل هج مناظر .. كمت للصالة عاينت للطباخ..منظفي والاسود رايح..زين همزين ما عافوه علي..كعدت اكل..المغرب اجه محمد جايب حلاوة وكرزات خلاهن جدامي..كتله : هاي شنو..
محمد : الج..سمعت محتركة ايدج..
دنوة : هههه..وهاي مثل الحمدلله ع السلامة..
محمد : تكدرين تكولين هيج..شنو ما تردين تاخذينهن..
دنوة : اخذهن ليش لا.. ابتسمت واخذتهن..جايب زنود الست وحب وفستق وبعد جم شغلة..من الاحبهن..

انتظرت وره العشه خلتهن جلنار بصينية وكعدنا كلنا .. خوما اكل وحدي وهم لا..زحمة..درناه على فلم بين ما خلص احنه خلصنه..راحو ضلينه انه ومحمد..كتله : هم خابرت رائد
محمد : لا والله..صار فترة ناسي..ملتهي بالشغل..
دنوة : ها..اي الله يساعدك..مد ايده جدامي..
محمد : شوفي شلون صايرات من المواعين والزاهي..انه متعود ع المواعين جي جنت قسم داخلي واعرف اطبخ احسن منج
دنوة : ها هيج يعني..يله فديوم اطبخلنا انت..
محمد : اي ليش لا..اخليج تاكلين اصابعج وراهه..
دنوة : هههه..ارد اكلك..شلونه وضع العراق هسة..صار فترة ما متفرجة ع الاخبار..
محمد : خارط فد دور..متدرين شلون حتصفى..يم ربج
دنوة : خايفة على رائد..
محمد : انه هم والله..الله يحفظه سبع لتخافين علي..

ابتسمت وضلينا كاعدين شوي..بعدين كمت انام..هو ينام بالصالة ع القنفة..تنفتح تصير مثل الجرباية واحنه كل واحد بغرفة..بس جلنار تنام يمنه واخلاص هي وخالو .. دورات انه بالكع دورات هي..بس من احتركت ايدي كمت انه انام اكثر شي ع الجرباية..

مرت الايام ورحت انه وخالة نخابر رائد.. حچت وياه هي اول بعدين كلتله : دنوة احترگت ايدها.. بس يمة لاتخاف هسه احسن..
دارت وجهها علي وتعاينلي بعگدة حاجب.. كالت : تعاي يريد يحاچيج..
تقربت اخذته.. : الو حبيبي..
رائد : شبيج گلبي.. ليش محد خابرني شبيكم انتو الا تحترك الدنيا يله.. يابة خابروا صخموا .. شلونها ايدج يبعد روحي.. انعل ابو المسافات لابو الطائفية هيج بنيتي تحترك وانه ماادري..

دنوة : حبيبي شبيك على كيفك لايصيرلك شي اسم الله.. والله زينة هسه لاتخاف علي..
رائد : حيضل بالي.. خابريني دائما.. هاي علمودج محقفل التلفون.. يابوية چن انه محترك روحي لايبة عليج..
دنوة : عمري حباب حتخليني مااحچي بعد..
رائد : لا يابة احچي احچي..
دنوة : اي چا مابيه شي لايضل بالك.. وانه اخابرك كل فترة ماشي..
رائد : ماشي حبيبي..
دنوة : اعتبرني بستك.. مايصير عيب منا خالة.. بس يله هي بالنيات مو بله..
رائد : هههههههه... اي يابة بالنيات..
ضحكت وطمنته بعدين سديته..

ايدي بلشت تتحسن بس اخر فترة كامت تحكني وكشرت صار لونهه اطوخ من لون بشرتي فكمت استعمل المرهم واكعد بالبلكونة ع الهوى بين ما يصير لونه فاتح واطب..علي ومرام بعد مالهم اثر وهم سألت عليهم هم..محمد من الشغل للبيت يعني ماكو شي جديد .. اخلاص من ذاك اليوم بعد ما حجيت وياهه ولا حرف..تحجي هي وانه ما اجاوبهه..حتى ما اعاين عليهه..بحيث مره واكفة دا اسوي غده جان تجي تحاجيني..
اخلاص : ليش ما تجاوبيني من احاجيج..
جاوبتهه بدون ما اعاينلهه انه واكلب التمن : ما يعجبني

اخلاص : لا تجاوبين وغصبا ما عليج..
دنوة : بكيفي..منو انتي خاطر تجين تتأمرين علي..عمتي خالتي..انتي حماتي..اعتبريني جاهلة مثل ما تكولين ولا تحاجيني صيري اكبر واحسن مني..من كتلهه هج صفنت شوي بعدين راحت..وراهه سكتت كامت ما تحاجيني ومكضيتهه همس هي وجلنار والضحك للستار..ما ادري على شنو بس اسمع صوتهم..عادي انه ما يهمني..خالة مكفية وغانيتني عنهم..صگر بين فترة وفترة يخابروه لو يدز رسالة على تلفون محمد لو الحجي..وهاي هج..ماكو شي جديد .. امنية اجتني وره فترة من سمعت ايدي احتركت..جابتلي دشداشة لونهه شذري..

انه جنت البس اسود مع ذلك ما فشلتهه واخذتهه..
بس اخلاص حجت..
اخلاص : بس هي تلبس اسود..
امنية : اي ادري..يمكن الظروف تفرقنا وما نتشاوف بعد تكونين انتي نازعة الاسود..اعتبريهه بمكانهه..
دنوة : تسلمين عيوني..ان شاء الله اذا صار شي نرجع نلتقي الدنيا صغيرة قابل وين نروح..
امنية : تدرين شكد سوالفج حلوة..عبالك وحدة كبيرة مو بكدج .. متأكدة عمرج هلكد..
دنوة : هههه..اي غير اتعلم..قابل اضل صغيرة.. ضلت يمنا ساعة بعدين راحت..بالليل رحت انام وتذكرت حجيهه .. صدك هج حجيي مال اكبر من عمري..اكيد المريت بي مو سهل وعلمني هواي شغلات..

من اجيت هنا لسوريا حسيت بفرق جبير..كبل جنت اذا صارت مشكلة اضل ساكتة..انتظر رائد يجي يحلياهه .. يعني شلون الواحد يكول معتمدة..احسه شايل مسؤوليتي هو وساكت..حبا بيه..بس هسة وره سنه ونص من الغربة وهو ماكو ولا شفته ولو شوي تعلمت شلون احجي وادافع عن نفسي ..ما لازم اسكت اذا صار شي..يمكن هلشغلات جان رائد يحجيلياهه بس مجنت اسويهه او ما اعرف شلون اطبقهه..صحيح خالة موجوده وتحجي دورات .. بس انه هذا الشي احس بي بداخلي..احس اكو تغيير..كبل جنت دائما احس شخصيتي مهزوزة مو مثل سرور ونوارة شلون يحجون منطيهم مطلق الحرية..

من صرت يم رائد هواي امور تغيرت..علمني هواي والغربة هم علمتني..صدك شعور يسوي قشعريرة من انت ببلد ثاني وبعيد عن اهلك وناسك..ما تدري شلونهم وشديسوون.. اذا مرتاحين لو لا..بس تسمع كلماتهم تطمنك ومتدري اذا جان هالحچي صحيح لو يخاف يخليك متوتر فيضم الحقيقة.. كل يوم بالليل لازم اخذلي ساعة اتذكر وافكر بعدين اغفى وحدي.. لو اتذكر ابوي واكوم ابجي لو اتذكره وهاي هيج يعني..

مشت الايام على هلنمط..رائد اخر فترة دز رسالة لمحمد گله خاف تخابر ومتلكاني تره حقفل التلفون فوك الشهر .. همزين حجى وانه كلش متفاجئة.. هو يحجي..شي غريب اصلا .. عموما الحمدلله على كل حال..ايدي صارت زينة ع المرهم واختفى الأثر..رجع لون المكان نفس لون البشرة..مو مثلهه عينا بس مو مثل اول مره..بالبداية جانت غامقة اكثر..هسة احسن وفرق كلش جبير..

وره فترة جان باقي شهرين وشوي على سنة ابوي..حسيت گلبي انقبض ..كمت اضوج المغربية..اكعد اصلي واقراله قرآن ختمت مره هديتلياها وبديت بالثانية..بس النار البية ما طفت من اليوم السمعت بي توفى لحد هاي اللحظة..كل يوم اكول اليوم احسن..اكعد اصبر بروحي وادري ما صابرة..فوك البعد شهور ما شايفته بعدين يتوفى وهو بعيد..كل ما اتذكر الموضوع وشلون كالولي انقهر بس ما اكدر اسوي شي غير الدعاء والقرآن..بعدهه الله كريم..

جنت كاعدة دااقرة قرآن..كملت وكمت صليت..خالة جانت طالعة هي والحجي يتمشون كالت رجلية خدرت من الكعدة فطلعو..بقينا انه والبنات..كملت صلاة جان يجي طه ذب روحه بحضني..حضنته وابوس بي..يمكن هو الوحيد المصبرني .. احبه ومتعلقة بي..ادور كام يحجي يضحك يحجي مكسر اكعد اتونس وياه..ضل يمي شوي بعدين كمت نزعت الثوب مالت الصلاة واخذته للمطبخ كشرت خيارة وانطيتهيا..كام يضحك واخذهه بايدة الصغيرة مال عض..رحت وياه كعدنه على افلام كارتون..ضلينه كاعدين شوي بعدين مليت من الكعدة وحدي كلت اشوف جلنار شدتسوي..بالباب واسمعهه تبجي وتون .. طبيت للغرفة لكيتهه متمدده وايدهه على كصتهه

دنجت كعدت يمهه..كتلهه : شبيج ياستار..
جلنار بهمس : لج عيني..جسمي حيطك..ميتة حر عفية شسوي..جيبيلي شي..مصخنة حموووت..
خليت ايدي على خدهه..خطية صدك مصخنة..كمت دكيت الباب على اخلاص جانت بالحمام..كتلهه : اخلاص انطيني شريط الدوه من يمج..شوي وفتحت الباب انطتنيا بدون ما تسأل ليش..اخذته واخذت كلاص مي..رحت عدلت كعدتهه وانطيتهيا تشربه..ضليت كاعدة يمهه..ربع ساعة جان تجي اخلاص..ضلت تعاينلي..
اخلاص : شعندج هنا..وشبيهه جلنار..
دنوة : مريضة..يمكن بيهه فلاونزه..تكول عظامي توجعني
اخلاص : انطيني المي وروحي على طه..
دنوة : ليش مو انه كاعدة يمهه اداريهه..
اخلاص : دمشي لج..لا تغثيني بالله عليج..

كمت انطيتهه الكلاص..كتلهه : احجي عدل مرت اللخ .. عفتهه وطلعت يم طه..شواي واجت خالة..شافت الشقة هدوء
الحجية : جا البنات وين..شنو بس انتي..
دنوة : موجودات بالغرفة..جلنار مريضة واخلاص كاعدة يمهه خالة فوتي شوفيهه شبيهه اكيد تعرفين..
الحجية : يله هسة اروح بس ابدل..
بدلت وراحت يمهه..شوي وطلعت كعدت يمي..كتلهه : ها شبيهه
الحجية : فلاونزه مبينة..عظامهه توجعهه وراسهه هم..
دنوة : خطية..خابري محمد يجيبلهه مسكن شي..انه انطيتهه حباية وجع راس..
الحجية : اي يله هسة اخابره اكلة..خوما تضل متوجعة
راحت خابرتة..اجه وجايب وياه شريطين ادوية وفوار مال صخونة كال..بالليل اجت تنام..كتلهه تعاي نامي ع الجرباية خوما بالكع وين بيج حيل..

هي مخنطلة متدري بالدنيا وين..اخذت طه نيمته بحضني كتله ماما تعبانة شوي..تصير زينة وروح نام يمهه..كام يهمهم بعدين ضل يحوص اخر شي نام..كعدت الفجر اصلي واسمع جلنار تون..هم مصخنة..هاي ميفيد بيهه ادوية..كمت جبت طاسه خليت بيهه مي بارد وفانيلة مالتي صغيرة انكعهه واعصرهه بعدين اخليهه على كصتهه دقايق وارجع اسوي غيرهه لحدما نزلت حرارتهه ونامت..ثاني يوم هم نفس الحالة ادور حتى ما تكدر تتحرك..

فاكوم اسوي غده واصبلهه اجيبه يمهه..اخلاص بس بالاسم صديقتهه ولا اجت يمهه..تسوي روحهه حنينة مناك تسأل تكول اخاف لا انعدي..انه هم غلست وماحجيت شي..ضليت وياهه اسبوع اجيب الاكل يمهه واداري طه..اكعد الفجر اسويلهه كمادات لحدما تنام وانام وراهه .. وره اسبوع استعدلت شوي حرارتهه نزلت وراح الوجع..يعني صارت زينة هاهية ..

رجعت الامور طبيعية..رائد وره هلشهر وچم يوم خابرو علي وجاوب كال زين هسة ونازل اجازة اسبوع..الله يحفظه ماكول غير هلكلمتين من اذكره بصلاتي..

وراهه بفترة كصيرة جنت اصلي المغرب..كملت وكمت اشوف خالة وين..ارد نسولف شوي..مريت بغرفة اخلاص سمعت صوت بجي جلنار..تحجي وتبجي..
اخلاص : لج بس خلافتهم شبيج..هسة شعجب تذكرتي قابل اليوم البارحة هو كال هيج..
جلنار : شسوي بعد ما اكدر اسكت..احبه احبه والله..هو يحبهه وكدام الكل..حتى ماكو مجال يباوعلي..
اخلاص : لج شبيج انتي هم ثولة..هسة هو نازل اجازة امي اكيد حتروح تخابرة..اقنعهه باجر نروح انه وياج وامي لو أي احد ثاني عود خابري..
جلنار : اي خابرته وبعدين شحيصير..دا اكلج يحبهه
اخلاص : باع هاي..انتي تكدرين تخلي يكرهه..مو بالمشاكل لا بالحجي..هو اكيد حيسألج عليهه..

كليلة ما تريد تحاجيك وتكول كل هذا الصارلنا من وره رائد يعني خلي يكرهها بطريقتج ..كليلة حاقدة عليك جي ما خليتهه تجي العراق من توفى ابوهه شبيج ما تعرفين تلزكيهه..
جلنار : ويكوم يحبني هج برأيج..
اخلاص : اي ليش ما يحبج..تره انتي احلى واكبر منهه .. تفتهمين شلون تكسبين الرجال..هي صح تزوجت بس حتى رجلهه طلكهه بدون ما يجي يمهه..ويمج الحساب شوفيهه جا شكد ثولة..
جلنار : الله يسمع منج..لج والله احبه بس ما احجي..من اشوفه وياهه اموت..شايفته شلون طول وجسم..كلشي بي حلو وساعدني هواي شلون ما احبه..
اخلاص : حقج خية حقج..سوي مثل ما كتلج والباقي كلة يمشي وحده..لا ديرين بال عيوني..

ضليت اسمعلهم وفاكة حلكي..هاي من كل عقلهه لو انه دا اخربط..نار وشبت بيه..هاي شكد حقيرة ومخليه عينهه على رائد بحجة ساعدهه وتتقرب منه..وهاي اخلاص الاكثر حقارة متونسة وتعلم بيهه..متحملت فتحت الباب وطبيت كبل ..كمت اصيح وابجي : مخليه عينج على رجلي..انتي مو مرته .. افهمييييي مو مرته..لا تعاينيله..عوفي هو مسكين مكضيهه واجب ومريض من وراجنننن..لج انتي بشر لو شيطان .. اكو وحده تخرب بيت اخوهه..لج اكرهجججج الله يطلع حوبتي بيج ياحقيره ياكلبههه..الله يطلع حوبتي بكل واحد يأذيني .. وانتي ما غزر بيج..ما غزرت المداراة اكعد وياج الفجر اسويلج كمادات واجيب الاكل جدامج..اكول خطيه ما تكدر تكعد بالكع وهي مريضة..حتى طه انه داريته..شنو من بشر انتي بس كليليييي..

اجت خالة ومحمد على صوتي..عفتهه ورحت بحضن خالة ابجي وحاضنتهه..ليش هج يستغلوني..شكد حقراء اخذتني ورحنه للغرفة..كامت تهدي بيه وانه من العصبية والصياح كمت ارجف من فوك ليجوه..اعصابي تلفت كلش..بعد حتى حجي مابيه احجي..الله لا ينطيهه..ضلت يمي شوي بعدين راحت يمهم..كامت ترزل بيهن..انه احس فصلت بعد..كل المريت بي والحجي مالتهن خلاني انفجر..انفجر بداخلي..بعد مابيه اتحرك منا لهنا..عفتهم يحجون ونمت..

كعدت بالليل اتلفت هنا وهنا..اجت خالة علي..
الحجية : حبيبتي شلون صرتي..ضل بالي عليج..
دنوة : زينة..
الحجية : هاي اخلاص رزلتهه وطيحت حظهه..شلون تحجي حجي سم مثلهه..ختولي خالة لا تسمعيلهه..منو يخليهه تسوي هشكل وانه موجودة..هو رائد كالولة مرتك شفناها وي علي ما صدكهم..تردين هسة يصدكهم..مو صحيح..
دنوة : اي والله صحيح..بس خالة والله صعبة علي اسمعهن هج يحجن وما اضوج لو اطك من القهر..
الحجية : حقج حبيبتي قابل انه كلت لا..بس دااكلج ميكدرن يسون شي..وليدي يحبج من يوم يمه..هلكلمتين ما تأثر بي تفهمين شلون..
دنوة : هيج تكولين..
الحجية : اي وهو هذا الصحيح بنتي..

تنهدت وكتلهه : الله كريم..
ثنينهن بعد ما اعاين بوجههن..جلنار بالبداية شكد جانت حبابة وياي..شو انجلبت من كثر الدلال..ولو هي الضرة شوكت حبت ضرتهه..المهم كمت اتجاهلهه هي هم..مرت الايام وصارت السنة مال ابوي..سويت برياني وانطيت ماعون جبير لجوارينه ماكو غيرهم..اكلنا منه ع الغده والباقي اخذه محمد للعمال اليشتغلون وياه..كال هم عراقيين..انه وره المغرب صليت وكعدت اقره قرآن..لحدما صوتي انبح وسديته..كمت ابجي ومغطيه وجهي بإدية..ضليت ع هلوضعية لحدما تعبت وكمت .. ما كلت ارجع للعراق..هي فترة ونرجع كلنه يارب..والله تعبت..مشتاقه لكلشي هناك..اريد ارتاح بغرفتي يم رائد..ما اريد شي

مرت الايام ودخلنه بـ٢٠٠٨..الوضع بده شوي شوي يتحسن بس رائد من محمد يخابره يسأله ع الوضع يكله بعد مو هسة هاي بس بالاخبار هيج يكولون..تعال وشوف بعينك .. وانه همات لمن اسأله يكول اصبري حبيبي لاتستعجلين.. وراها باسبوعين تقريبا كاعدة بالليل وره العشه دااكلب بالتلفزيون جان تطلع قناة مطلعين بيهه اخبار..كاتبين مقتل اثنين من ضباط الجيش العراقي..انه شحجي بعد حتى الكلمات خلصت احس ضيعت الحروف..

انداريت على محمد جان كاعد يمي..كتله : محمد الله عليك خابر رائد..حموت خوف شسوي..
محمد : انه هم خفت والله..حكوم اطلع للمحل اخابر بعد وكت هسة مفتحين..لا تكولين لامي خاف يصعد سكرها..
كمت ارجف ياربي ماكو شي..لا تصدمني مرت اللخ .. اخذ التلفون وراح..ضليت افتر بالصالة وادعي .. يارب ماكو شي مو هو والله مو هو....

يتبـــــــــــــــــع.........................

بنات مو اتفقنا على موعد النشر؟ بين يوم ويوم المفروض بـ١٢ بس هلمرة تأخرت وماردت انشره باجر ، البارت الجاي حيكون بالموعد ان شاء الله وشكرا❤️..