رواية اسألي عني الليالي الفصل الرابع وستون 64 - بقلم رقية جاسم

قناة التليگرام

حساب الانستگرام

الـبـارت الـسـادس والـسـتـون.............

حركت راسي يعني اي..باسني من خدي وابتسم : اعتذر بنيتي..ماامد ايدي عليج والله مو طبعي..
دنوة : ادري بيك وعاذرتك..
طبطب على جتفي وراح ع الميزتواليت ينشف شعره.. اشتاقيت لوكفته هنا وكلماته واحساسه..الحمدلله ماراح الصبر بلاش .. مرن يومين عاديات..وراهه كعدت من الصبح على صوت صگر يصيح.. يووو شكو هسة..

كمت لبست شال ونزلت..صگر واكف بالهول يخابر ويصيح .. حتى مافهمت عليش يصيح..خالة واكفة يمه وتعصر بإديهه..
صگر : شوف لك قندرة..لا عبالك تريد تكربصني بأختك الملعبة .. لااااع .. ماكتلهه هشكل لاتضل تلفق من يمك.. اذا جان اكو سبب للصارلي كبل فترة فجوان هي السبب.. انه مو صغير ومراهق خاطر تقنعني بت مخطوبة احبهه واخطبهه.. متزوج وعندي ولد ومن الواجب للبيت يابت هاي الاشوفهه واحبهه.. والله مو شيمتي اعير وافتح دفاتر مشگگة مو بس عتيكة..بس اذا ناسي اذكرك .. انت نفسك كتلت جوان چي شفت الرسايل بتلفونهه..اي لو لا .. اي لو لااااا.. لاتنكر ابن الكلب انعل شرفك لابو شرفي انه الدخلتك لبيتي انت واختك الوصخة هاي..

شفت الله بعيوني بسببهه هاي الچلبة..هااااا تكول انه حاجي هيج مووو..انطيني دليلك والتريده يصيرلك .. يله ماعندي شي انتظرك..
سده وشمر التلفون ع القنفة..
الحجية : ها يمة شكال..
صگر : شكال..صخام بعينه كال.. يكلي احنا ماندري جوان فسخت علمودك..انت ضاحك عليهه..يله ماطول كايللهه فسخي واجي اخطبج تعال اخطبهه..
الحجية : لا هذا مسودن من الأبي..شني جاهل صغيرون مايدري بأخته شمسويه الملعونة..
صگر : كتله..ماشفتيني اصيح..حجية لمن رجعت قريت الرسايل ماصدكت روحي والله..

تدرين بدنوة شكد عزيزة..حتى بغيبتهه احبهه..مو ادور اروح على جوان الي لمن جنت شاب مااجت على بالي.. تريد اجي هسه اكلبهه وارتبط بيهه..مخبلللللل عاقل..
الحجية : اووف منك..هو انه ليش دكيت رجل اخذك للسيد غير علمود هاي السالفة..قابل انه صغيرونة مااعرف الحياية شيسون ويصخمن..كلت بس لا يروح بيهه وليدي..
صگر : هو انه البيت جنت مااطيقه .. ادور اروح للسيد
الحجية : راحت وفضت..هسة مخيلد المسودن شكال اخر شي .. انه ماشايفه زلم تمشي بحچي النسوان.. يدري بأخته شني بس يسوي روحه اثول..عساه بالثول..
صگر : يكلي انت كايللهه وعدنا دليل..المحادثات موجودة .. بله منين طلع هلنت الاكشر..چنا ع الارضي والرسايل احسن

الحجية : انت كاتبلهه شي..
صگر : حجية وداعتج جنت اعمى..ماادري بروحي من كاتبلهه هلحچي..بس هي الكالتلي بالاول اذا فسخت تجي تخطبني .. كتلهه اي..
الحجية : وك يمعزاي بس لا خاطبهه لمن بقيت ببغداد فترة طويلة وسويت البلوة هاي..
صگر : لا يابة شخطبهه..جنت مشغول اصلا حتى نسيت التلفون بالبيت..همزين ربج نسيته..جنت ناوي اشوفهه..
الحجية : الله وكفلك بدعائي والعلگ .. سوده علي شصار بوليدي حتى مايدري برويحته شمسوي..

ديحجون جان تجي رسايل على تلفونه..راح شالة بالعجل ويقرا بيهن..وكفت يمه اشوفهن.. هاي شلون هيج .. المحادثة اكثر الحچي من صگر وچم كلمة من عدهه.. حتى البصمة الصوتية ماكو..هو كايللهه فسخي واجي اخطبج.. راجع كايللهه احبج ومااريد غيرج..هي رسايلهه اي ماشي.. تمام على راحتك.. حتى حبيبي ماكو..وانه لمن قريت الرسايل جان حجيهه وصخ اكثر من هيج..حبيبي واحبك واريدك .. شوكت ننجمع سوه ومدري شنو..
هو كام يصيح وضاب ايده ع التلفون تهستر..
الحجية : شكو يمة غير تفهمني..
صگر : هاي مو بت بيت..والله تروح فدوة للكح....والله كوة كامش لساني مااريد افشر واحجي حجي ماصخ.. بس على سوايتهه هاي الا اشوفهم نجوم الظهر..

منطية لاخوهه محادثة مابيهه بس اني وهي چم كلمة .. مال اكمشهه بيدي امردهه مرد..

سكت ورجع خابر على مخلد..اول مادك شاله..استلمه صياح وغلط..
صگر : انت غبي لو تستغبي ياعاااار..انت لوما عار چا ماقبلت واحد يكول لاختك هيج..اذا اختك مايجون يخطبوهه انه شكو تريد تذبهه براسي..تره موصغير وتلعب علي بهذن الصور مالت المزعطة.. لك مخبل انت .. يلهههه .. لا خلف الله عليك..مو شيمتي التعيار..

هو ويحجي تذكرت لمن شفت الرسايل..سويتلهن توجيه ولقطات شاشة لرقمي..ركضت للغرفة جبت التلفون .. اخذت نفس .. الحمدلله ماماسحتهن..انتظرته يكمل وحجيت..
دنوة : عندي المحادثات الاصلية..
عاين علي متفاجئ ورفع حاجبه : وين..
دنوة : ااا..والله موو قصدي افتش تلفونك..بس بالفترة التأخرت بيهه بالواجب فتحته وشفتهن..هياتهن ..
انطيتيا..كعد يكلب بيهن..فتح التلفون مالته وسجل رقم مخلد بتلفوني..دزله كل الرسايل..بالصور وبالتوجيه.. حتى صوتهه وهي تتنعوصله..يربي شكد انغثيت من سمعته.. شلون صوت .. مبين مصطنع..يلعب الروح..
كمل وانطانيا..

الحجية : ها يمة شسويت..
صگر : دزيتله المحادثات قبل لا تمسحهن من يمهه.. هو انه المفروض اتوقع منهه هيج شي..من يوم اخوج دزلي رسايل لدنوة عساس دتفشر على جوان..بس انعميت والله.. خلاشوفه هسه هم يكدر يفك حلكة..
الحجية : ايييي..الحمدلله يالله..انه خفت ييمة..خفت لا يكلولك تعال اخطبهه وانت ماعندك غير حل..
صگر : لا حجية شنو صغير واسوي اليردو..عوفيهه هاهية فضت..هسه هو اذا مارجع خابرني يعني عرف يتصرف.. ابن اخوج اثول وزمال..لوما زمال چا شاف الخربطة والمسلته بالحجي..چن انه احجي وانه اجاوب روحي..بس ماسامعة يجذب الجذبة ويصدكهه..هو هذا المخبل هنا.. نفسه كتلهه بنص بيتي وهانهه..المفروض ياخذ عبره..

الحجية : لاتقهر بروحك يمة..المهم بينت الحقيقة ..
صگر : اي والله..راسي حيطك ..
الحجية : خالة دنوة كومي سوي لكمة لرجلج علمود ياخذ حب وجع راس..
دنوة : اي خالة..

كمت للمطبخ اسوي الريوك..كملته وخليته بصينية.. صبتلهيا بالهول وكعدت يمه..
رفع راسه : ماتاكلين..
دنوة : مااشتهي..
صگر : اكلي لخاطري..ولو لكمة..شوفي شلون ذبلانة..
دنوة : مو بسبب الاكل..
رفعلي حاجبة ونزل اللكمة من حلكة : چا شنو..بيج شي..
دنوة : لا لاتخاف مابيه شي..من اشتهي شي اكل..كلشي موجود لاتهتم..
صگر : دنشوف..
ابتسمتله..عفته ياكل وصعدت فوك اشوف ايمن.. صدك نومه ثكيل..صگر يصيح وخابص الدنيا هو ولا يمة.. ابتسمت وعفته نايم..

رتبت الجرباية وغيرت الوجوه مالت المخاديد..قربت مخدته مني وحضنتهه..الله لايحرمني منك..شكد حسيت بالوحشة بالفترة الهو مريض بيهه..
رجعتهن لمكانهن ومسحت..هم فتحت قرآن ..منهه علمود صگر ومنهه يجدد نفسيتنا ونرتاح..
كلت احاجي صگر ع الحمل..علمود اروح للدكتورة تشوف وضعي شنو ماشنو.. بين ما كملت هو اجه..
ابتسم وانتچى ع الباب : نغير الغرفة..
دنوة : يعني تجيب غيرهه لو نغير مكانا ..
صگر : لا اجيب غيرهه..اجازتي طويلة عندي مجال..
دنوة : شنو عاجبك..
صگر : اجيب تركي..صارت قديمة هاي.. تدرين شكد التهيت حتى ماشفتج زين..بلكت هلفترة ماكو شي..

دنوة : ان شاء الله عيوني..سوي اليعجبك..واكيد ذوقك يجنن مايحتاج نحتار.. من الاغنية..
صگر : هههههه..اي يولي شعبالج.. تعاي هنا اشو..
رحت يمه..حاوطني من ظهري بإدي ..
همس : اكو شي تردين تكولي..منتبه على حركة شفايفج تره .. تردين تحجين وتسكتين..
دنوة : يمة منك..هو انت عايف كلشي ومركز عليهن..
صگر : هن لو ينوكلن چا اكلتهن..
دنوة : لك شنو هلحجي..
صگر : ديله يابة نعتذر..كولي شعندج باباتي..
دنوة : حييل..صار شكد ماكايلي باباتي.. عموما .. ردت اكلك انه حامل..بس ماادري ولد بنية ..

الابتسامة تلقائيا انرسمت على شفايفه..تجاعيد بسيطة وخفيفة بينت بأطراف عيونه : سبحانك ربي..شكد جنت كاتم موضوع الحمل ومااريد اوترج واكلج اريد طفل..لحدما صار ايمن .. كلت اذا بيهه صالح يجي طفل ثاني لايموني.. بس كون هي ماتتأذى..وصار بدون حتى ماتفكرين ..
دنوة : اي صحيح والله..حبيبي انت شنو.. وين الكى مثلك هيج يقدر دموعي وتفكيري حتى بدون مااحجي..
خلى ايده على گلبي : انه دكة گلبج هاي احبهه.. شحال لو كلج..سعيد بحبج وبوجودج يمي..وغلاتج لو وحدة غيرج ماتتحمل ذرة من العشناه..من ٢٠٠٥ لحد هسه..
بسته من خده وكمشت ايده : انه منك ومن العشته وياك تعلمت شلون اصير انسانة تتحمل الصعب.. شلون اعوف العلمني .. مو تكول بنيتي.. اكو بت تعوف ابوهه..

صگر : يولي شوف اللسان شلون ينكط عسل.. بنيتي وامي واختي ومرتي الاتباهه بيهه..
اكتفيت بالابتسامة ماحجيت شي..
صگر : دواج دتاخذي..
دنوة : لا تاركته..
صگر : لا والله..ليش يابة بكيفج تلعبين..
دنوة : لااا مو انه خفت غير..قريت ع الدوة هذا كاتبين يسوي تشوه للجنين..فاريد اروح للدكتورة اتأكد..
صگر : شوكت تردين تروحين..
دنوة : باجر او عكبة..تجي وياي..
صگر : اليعجبج دنيتي..تردين اجي عادي ماعندي شي..
دنوة : اي تعال..چا عكبة نروح..
صگر : تأمرين..

دنوة : صدك شصار على مخلد وجوان..
صگر : خابرني اعتذر مني..كتله مقبول بس الصار مو هين .. الافضل نبقى كل واحد بجهة..امي عمتك سلم علي براحتك .. انه من طرفي بعد ماعندي كلام وياك..
دنوة : وشكال..
صگر : ماكال شي..حسباله جاهل وانسى الصار.. المفروض بعد حتى مااشيل التلفون علي..
دنوة : اي صحيح..ادري بگلبك طيب مايقسي على احد ..
صگر : هاي بس انتي تشوفيني هيج..
دنوة : بعد احسن..انه اشوفك بنظرات خاصة.. ماعلي بالسطحية مالتهم..احبك..
صگر : غير اعشكج يبعد طولي هلطول..
ابتسمتله وحاوطته من رگبته..

صگر : بمناسبة الذوق..غنيلي الاغنية..
دنوة : هاي شوكت ماتضوج تكلي غنيهه..
صگر : يعني عندي هيج صوت يخليني اتيه علومي شلون مااخلي يغنيلي..
دنوة : احمم..يله ..
غمضت وغنيتلهيا بصوت ناصي..هو يذوب لمن اغنيهه هيج.. خلصتها وفتحت عيوني لكيته مبتسم وعيونه ذابله..
دنوة : شنو شبيك..
صگر : مابيه شي..بس احتركت عشيرتي..
دنوة : ههههههه..مااقصد تره..انت كتلي ..
صگر : اي حبيبي..

وخرت ايدي ورحت على ايمن لكيته كاعد ويعضعض بالعضضاضة.. ارتاحيت لمن شفت صگر صار زين وايمن حبيبي يمي..چن عائلتي انجمعت بعد ماتتفرق.. الحمدلله على كل حال..اكيد لكلشي اكو سبب.. وانه ماصارلي شي الا تعلمت منه..

وره يومين خليت ايمن جوه وطلعنا انه وصگر للدكتورة .. فحصتني وشافت الطفل بالسونار..كالت مايبين هسة بس مابي شي..حجيتلهه ع العلاج والقريته عنه..
الدكتورة : اي اكيد حبيبتي..اكو بعض الادوية تأثر ع الجنين.. ممكن علاجات الجهاز التنفسي تأثر.. فما بالك بأدوية الحالة النفسية.. لهلسبب كتلج توجهي لدكتورتج حتى تقلل الكمية .. علمود جسمج يتعود ع الكمية القليلة بحيث وجودهه وعدمه ممكن ميأثر اذا كنتِ بحالة جيدة من الناحية النفسية .. ضغط وتوتر قليل..والحمدلله الطفل اجه بدون مرض صحيح ..
دنوة : اي دكتورة..مابي شي..بس جبته بالشهر الثامن..
الدكتورة : انتي مهددة بالولادة المبكرة..لأن صغيرة وطرحتي .. فيتأذى الرحم..من اقل حركة طائشة تسببلج ولادة مبكرة .. هذي المره انتبهي وراجعيني بالشهر الخامس نهايته علمود نشوف جنس الجنين..
دنوة : ان شاء الله دكتورة..شكرا ..
الدكتورة : العفو امي..

انطيتهه فلوس وطلعت..بالسيارة حجيتله لصگر..
صگر : يالله..خير ان شاء الله..شفتي الدكتورة شكالت.. بدون توتر وضغط..يولي والله اخاف عليج من الهوى..
دنوة : ماعلي شي عمري..ان شاء الله مو مثل ايمن و اتم على خير بدون عرقلات..
صگر : خير يالله..كولي مشتهية شي..
دنوة : بكيفك حبيبي..صدك خلانزل اشتري ملابس لايمن .. مداالحك علي..كام يزحف ويوصخ بالعجل..
صگر : يله بس اشوف مجال اطبك وننزل..
ابتسمت وانتظرته يشوف مكان ونزلنا.. اشتريتله هدوم جدد .. حبيبي حتى ماطلعته غير لبيت جدي.. بس مشتريتله كبل وضامتهن..

صگر وكف بره يدخن وانه تمشيت لمحل لاخ..شفت تشيرت جذبني..نيلي طوخ چنه اسود وعلي كلمتين من يم الصدر .. عاملت علي واشتريته..رجعت شاف بيدي علاكة زايده.. ماكال شي..تمشينا للسيارة دنرجع..
صگر : ششتريتي..
دنوة : هدوم لايمن غير..
صگر : اي صحيح..
اكيد عرف..ليش هو ينضم شي علي..دورات اخاف منه .. ع الطريق ونزل اشترالي حب وكرزات..اهم شي الجباسة هاي اول شي..هو انه مره كبل كتله احب الجبس..كام كل ما يشوف جبس يشتريلي..انسان مايتكرر مرتين مستحيل .. دورات اكول ليش انه..ليش انه هلكد يحبني..يمكن الله دزليا بعد كل هلتعب العشته..

انه لوما صگر وياي جان ماكدرت اتخطى أي فترة عشتهه.. خصوصا لمن شذى سوتلي عمل وصارتلي الحالة النفسية .. منو يتحمل واحد يحجي يم راسة صبح وليل .. جنت حتى مو حامل وطارحة..واحد غيره يتركني بدون مايتحمل ذرة من الصار.. الحمدلله ع النعمة البيدي..

رجعنا للبيت..لكيت خالة مبدلتله ومسويتله حليب .. كاعد يم ملاعيبة يلعب..صگر وكف بالباب واجه هو يزحف حضنه من رجله يريد يوكف ويغنغن بينه وبين نفسه ماينفهم.. شاله ويبوس بي..هو يكيف بالبداية چي يدغدغه بعدين يضوج من شواربة..ولو هي شكلهه مرتب حيل بس هو صغير يتأذى خطية.. عفتهم كاعدين ورحت فوك..بدلت ونزلت اسوي العشه .. اجتني اخلاص..بطنهه كبرانه وعالية..
اخلاص : ها شكالتلج الدكتورة..
دنوة : ماكالت شي..وضعي عادي..
اخلاص : ها ديله خوش..

ضليت متفاجئة منهه..شعجب سألت عني .. الله هداهه يمكن .. كعدت ع الكرسي تخابر..
اخلاص : الله يسلمج عمة..زين مابي شي..انه هم زينة .. لا والله ماخابرني..شسويله خوما اتوسل بي يجي يرجعني .. انه همات مااريد اكلف امي واخوي..حاجي انتي بلكت يسوي شي..لاتكوليله اخلاص كالتلي..اي فدوة لعمرج.. مع السلامة ماتقصرين..

هاي عمتهه ام رجلهه اكيد..رايده خاطرهه..و هم يمكن علمود رامي چي ولد..ماهتميتلهه..جبيرة وتفتهم .. جان رجعت وياه ذاك اليوم لوما كايلتله نذل.. ولو هي من حرگة گلبها كالت هيج بس يريد يكمش الزلة عليهه.. انه واطبخ واسمع صوتهه تتأفأف وتجر حسرات.. كملت بالعجل ورحت بالهول.. هو انه مالي خلك روحي ادور جايه هاي كل حسرة تذبهه هلكبرهه.. كلهه فكر..

مرت تلث ايام بعدين المغربية بدلنا وطلعنا انه وصگر نشوف غرفة جديده..بالبداية حسبالي كلمة عابره.. بس سواهه صدك .. ضلينا شكد ندور..كلشي مايعجبه..انه شيكلي اكلة اي..اخر شي اختار وحده صدك حلوه.. ابيض واسود .. فخمة وجبيرة..غرفتنا جبيرة كلش.. فتكفيهه وزايد .. اتفق وياه يايوم يشدوهه وانطاه عربون لحدما يجيبوهه.. طلعني ع السريع ومشغلي اغاني..نزل اشترى اكل واكلنا.. تونست بيومهه وحسيت بي وبحنيتة..
وره يومين كبل مايجون يجيبون الغرفة طلعت الهدوم كلهن والغراض بالمجارير..الدوشك وهذني كلهن.. بين ما اجو .. ساعتين ونص اذا مو اكثر هم يسوون بيهه.. لمن طلعو صعدت اشوفهه..عبالك الغرفة كلهه تغيرت..شكد حلوه صارت واللون بارز يجنن..ذواق عيني هي گوة..

هو لمن صعد وشاف الهوسة انقهر علي..
صگر : انظفهه واخلي الدوشك وانتي سوي الكنتور..
دنوة : لا مو وراك دوام..
صگر : ميخالف ابوية شنو يعني..
ابتسملي وكام رتبهه كلهه ومسح..عاد شنو مرتب حيل.. وخطواته هادئة..ضليت كاعدة واعاينله شلون يشتغل.. ماشايفة رجال يساعد مرته..عود عيب والشغل كله ع المره .. يم صگر شفت الجنت احلم بي لمن انام..والحمدلله ع الحلم الصار حقيقة..
كمل وكعد ع الجرباية : يله كملي انتي على راحتج..
كمت من مكاني رحت يمه..حاوطته من رگبته وايدي على شعره : شلون بيك كل مره تخجلني بشي جديد..
صگر : ليش دااخجلج ابوية..

دنوة : حتى بالشغل ساعدتني..
صگر : مريتي ودنيتي حامل ومااريدهه تشتغل هواي.. شلون .. لازم اساعدهه ..
دنوة : حياتي انت..
بسته وكمت ارتب الهدوم ورجعت الغراض..مدري شلون بس عبالك عرست من جديد..

بالليل كملت الشغل وطفيت الاضوية..البيت صنطة .. حتى ايمن نايم..صعدت فوك ع الدرج وافك بالضفيرة.. طبيت للغرفة باردة وضوه احمر خفيف مشتغل.. صگر فاتح التلفزيون يفترج .. غيرت هدومي وخليت كحلة ورحت تمددت يمه .. حضنته وراسي على صدره..الفلم جانت على نهايته فنص ساعة وخلص..
ردت اتحارش بي..همست : شو گلبك مايدك سريع.. خاف كمت ماتحبني مثل اول..
صگر : انه مااحبج يولي..هسة اخلي يدك..
وخرت منه..صار فوكاي وايده تدخل بشعري على كيف..
صگر : اموت على بساطتج..يولي والله احبج واحب هدوئج .. صار شكد متزوجين..بكل يوم احس بنفس الشعور واكثر ..

دنوة : اا..انه هماتين والله..
ابتسملي ودنج همس يم اذني : احب مستحاج وارتباكج..
كمش ايدي خلاهه على گلبه وتقرب باسني من رگبتي بهدوء وحب اتمناه بكل يوم يبقى ويدوم..بقيت بحضنه لحدما غفيت .. كعدت الفجر على ايمن يبجي..سويتله حليب ورجع نام .. حسبالي غافي فتمددت من الجهة اللخ..شواي وحسيت علي صار وراي وقريب حيل..باسني من رگبتي وايدة محاوطة خصري..ضل على وضعيته لحدما ثكلت انفاسه .. غفيت ماكعدت للصبح..لكيته واكف يم الميزتواليت يمشط شعره .. يرجعه ليوره ..لبس البيرية ودنج ياخذ الجنطة.. شافني كاعدة ابتسملي وصبح علي..كمت غسلت وجهي ونزلت وياه .. اخلاص جانت كاعدة مدري شعجب من الصبح.. راد يطلع اجت هي تحاجي..

اخلاص : خوية اكدر احاجيك كبل لاتروح..
صگر : كولي عيني..
اخلاص : وحيدنا اذا تكدر..
صگر : ماكو احد غريب..احجي..

عفتهم يحجون ورحت للمطبخ..هو دقايق واجه.. جنت صابة زيتون بماعون وجبن..كعد يمي ياكل..
دنوة : شنو مامتريك..
صگر : لا..
دنوة : چا تطلع للدوام بدون اكل..شوكت تكعدني اسويلك حتزعلني عليك..
صگر : والله مامشتهي حبيبي..بس هسة شفته واشتهيته ..
مد ايده بجيبه انطاني فلوس..
صگر : هاج كمشي..فوك بالكنتور اكو بعد خمسين.. هاي اخلاص رادت فلوس خوما اردهه فشلة..
دنوة : اي شكو بيهه..غير اخوهه..هي حتبقى هنا..
صگر : ماادري .. بكيفهه..

كام يغسل وراح..كمت وراه واشوفه شلون فتح الباب طلع السيارة وصعد بيهه حركاته وهدوئه بكلشي .. حتى من يحجي .. طلعت سديت الباب وصعدت فوك سبحت ورجعت نمت..

مرت خمس ايام وراهه جنت منظفة البيت وكاعدة يم ايمن الاعبة..دك تلفوني..رزان .. صار شكد مامخابرتني .. من كبل لايتمرض صگر..شذكرهه.. جاوبتهه..
رزان : الو..هلو دنو..
دنوة : هلو بيج عيني..شلونج..
رزان : على الله..وانتي صحتج ..ايمن..
دنوة : ماشية..شنو الاخبار..امج شلونهه..
رزان : امي..امي مواتة دنوة..حتى ماتحجي..
دنوة : الله يشافيهه..
رزان : مااريد ادوخج بيهه..خابرت اسأل على صگر.. صدك مريض..
دنوة : اي كبل فترة تحسن..منين عرفتي..

رزان : اجيت لبيت جدو قبل اسبوع..سرور جانت هناك وحجتلي.. ماجنت ادري .. تدرين ملتهية بالجهال ومهند يطلع من الصبح مايرجع الا بالليل..
دنوة : الله يساعدج..هو هذا الزواج..بس المهم مرتاحة..
رزان : اي والله مرتاحة لوما امي..خايفة عليهه..هاي كل شهر عشرين يوم اروح اشوفهه..جدو حياخذهه لايران يمكن..
دنوة : هااا..اي شكو بيهه..بلكت يعرفون شبيهه..
رزان : بلكت..يله خية اروح انوم الجهال..نتخابر غير وقت..
دنوة : على راحتج عيوني..مع السلامة..
سديته منهه وكمت اسوي عشه..اخلاص فاتت ضايجة وعيونهه حمر ومنفوخة..ماسألت شبيج..معلي..

اخر شي هي حجت..
اخلاص : باجر يجي محمود يشوف رامي..
دنوة : ها خوش..حترجعين وياه..
اخلاص : شنو تردين اطرديني انتي..صار اكثر من مره اسمعج تكولين شوكت تروح..
دنوة : لا ماكلت هيج..دااسأل بس شدعواج..
اخلاص : اي خليهه ببالج..تره بيت اخوي مو بيتج..
دنوة : لاتاكليني بسوالفج..ماتبقين شرد اسويلج عشتوووو .. ادور ماعلي انتي..والله يالله..
اخلاص : هو حظ الزرك كاعد..اخذتلهه واحد يحبهه خوما مثلي متعلعلة..اووف شحجي شكول..
دنوة : لاتجرين حسرات جدامي..ولي هناك يله..
عاطت بيه جفلتني..اجت خالة على صوتهه..

الحجية : شبيجن يمة..
اخلاص : دنوة تعيرني..تكلي مايريدج رجلج..
دنوة : لا رادتج روحج كولي امين..جذابة ماكتلهه هيج.. هي متخبله علي انه شكو..شلون نفسيات مريضة..
الحجية : كومي عنهه ختكمل شغلهه..شني سمعتج تكولين حيجي محمود..حترجعين يول..
اخلاص : اي يمة..شنو اضل يمكم يعني..
الحجية : تردين ترحين لواحد متزوج عليج..مسودنة..
اخلاص : يمة ماعندي غير هلحل فدوه لاتكولين لا وتحبطين معنوياتي..ابقى ببيتي وهي ببيت اهله..اشوف شلون تصفى السالفة..
الحجية : انه امج ييمة خوما اريدلج خراب بيتج.. بس لاتنطي عين وتشوفي انتي مهتمة وشامره روحج شمر اعلي.. كليلة راجعه لخاطر رامي..
اخلاص : اي يمة هو كتله علمود رامي حرجع..
الحجية : على راحتج يوم مااتدخل انه..

عافتنا وراحت..وي ما صبيت العشه جان يجي علي هو ومرته وجهاله..كعدنا كلنا تعشينا بين سالفة وضحكة صارت ب١٢ بالليل وراحو لبيتهم..
ثاني يوم الصبح اجه محمود اعتذر من الحجي ومن خالة هماتين.. اخذت اخلاص ورامي وراح.. همزين راحت عوذه .. شكد غثيثة حتى وهي ساكتة..حقه يضوج منهه.. جامدة الى درجة وشكاكة حتى بروحهه..انه بسوريا وحايرة بضيمي وهي تكلي اخاف تشوفيلج واحد وتعوفين اخوي.. تصرفاتهه مال وحده عدهه عقدة نفسية.. المهم راحت وخلصنا ..

وره اسبوع نزل صگر من الواجب..وصل بالوحدة الظهر .. طلعت فتحتله الباب وحضنته..مشتاقتله ..
ضحك وحضن وجهي بإدي بحنية : يلوموني .. واحسك تكبر بروحي ويلوموني.. وانه بلا شوفتك شينفعن عيوني .. يولي ويلوموني ليش احبج..انه لو بيدي اضل مكابلج لحدما يشيب رمش عيوني مو شعري..
ضحكت بهدوء وبسته من خده..حاوطني من جتفي وطبينا جوه.. كعد شوي بعدين صعد يسبح..صبيت اكل وصحته تغدينا..هو بس يتغده يهست وينعس كلش..خصوصا جاي من سفر..فراح كبل ينام..غسلت مواعين واخذت ايمن نيمته .. لكيته متمدد وايده جوه خده..تقربت بهدوء من وره وحضنته .. شميت ريحته..صرته بموقفه لمن يجي يحضني انه ونايمة ويشم ريحتي من رگبتي..بقيت على وضعيتي لحدما غفيت ..

بالليل بدل ديطلع يشتري شغلات للتعليلة..اجه يحاجيني .. جنت دااكرز حب واتفرج فلم بالهول..
صگر : دناوي حطلع ابوية..
دنوة : على وين كل هلكشخة عيني..
صگر : اروح لمرتي الثانية..
دنوة : ادري بيك ماتسويهه ..
صگر : لا يابة شسوي..حطلع اجيب شغلات..وتدرين شنو بنفسي..
دنوة : شنو حبيبي..
صگر : ذاك اليوم نركلت يم عارف وعجبتني..
دنوة : لا والله..انت تريد تأذي روحك وماتدري شلون..
صگر : مره وحده ماتأثر..كليلي مشتهية شي..
دنوة : لا بس مااريد تشتريهه..
صگر : يله ميخالف..
دنوة : اصبر..اريد كباب شوي..شو ريحته بخشمي من البارحة بس الحجي رجع تعبان ماكتله..
صگر : چنج على كباب..اجيبلج كيلو..تأمرين..
بدلع : شكراا حياتي..

صگر : اشتعللل..
دنوة : منو هذا..
صگر : شيبي..اشتعل شيبي يابة..

ضحكت وهو همات..راح بالكراج يتمشى وطلع.. كلت بيني وبين نفسي..شحلاتهه لو طلع الطفل بنية..حيطير من الفرح .. اول مره اشوف رجال يحب تجي بنية..شكد حباب ومختلف عن الكل حتى بالتفاصيل..يله انتظر اطب بالشهر السادس واروح للدكتورة تشوفليا بالسونار..
رجعت اكمل الحب وخلص الفلم وراهه اجه.. جاب كباب مثل ماوصيته..كعدني يمه ويخلي جدامي..ايمن يمد ايده ويشوفه حار يكوم يبجي..يريد ياكل ومااوكله هيج.. كمت سويتله سريلاك وكلته وكعدت اكل..همزين يحبه مدري شعجب..

بالليل كعدنا وعلي اجه هماتين وحده..للوحدة وراح.. كمت داارتب الهول..لكيت النفاضة متروسة كطوف جكاير.. علي والحجي مايدخنون بس صگر..يمكن الباكيت خلصان.. هو جان كاعد يكلب بالتلفزيون..
دنوة : هاي شنووو..ليش هلكد مدخن تريد تنتقم من روحك
صگر : بيهه فلتر ابوية..
دنوة : شنو هذا..
صگر : يقلل النيكوتين..لاديرين بال..دااخذ من هذا المموع .. هو اصلا طبيعي الواحد من يعبر الاربعين وهو يدخن لازم ياخذ من هذا المموع..فلاتخافين..
دنوة : هو انت تكلي لاتخافين علمود تسوي اليعجبك..
صگر : يولي صغير خاطر العب عليج..هو هذا حچي الدكتور خوما من جيبي..

دنوة : اي حچي الدكتور صحيح..عشتووو..
صگر : هههههه..اروح فدوه للكلمات اليكولهه هلحلك..
ابتسمت وكمت كملت الهول..اجيت لكيت ايمن غافي على رجل صگر وكامش السويج بيده..اجيت اشيله..
همس : عوفي انه اصعده..
دنوة : يله..
اخذت الريمونت طفيت التلفزيون والاضوية وصعدنا فوك.. خلاه بفراشه وطفى الضوة واجه يمي.. حضني ويشم بشعري بهدوء وانفاسه ترجف..
دنوة : دااحسهه بنية مدري ليش..
صگر : شيجي نعمة..مااريد اكول بنية ادور يطلع ولد مثل ايمن..المهم شخص يتگوة بي وراي..انه مادايم..
دنوة : اسم الله عليك..لاتكول هيج ابد..

صگر : كلنا نموت..وانه شغلي خطر .. بس الله الحافظ..
كعدت جدامه وكمشت ايده : لاتكول هيج..تريد تروح وتعوفني مثل ابوي..حتى جدي.. انت اهلي وانه بدونك يتيمة.. اذا صارلك شي امو...
صگر : اششش..يومي كبل يومج..لاتحجين هيج ابوية..
خلى ايده وره راسي وسحبني بهدوء لحضنه..باسني منه ويمسد بشعري..
صگر : ديربالج تكصين شعرج..
دنوة : داافكر اكصة..اطرافه تعبت ..
صگر : اي كصي الاطراف..فوكاهن لا.. يولي البنيات يتمنن عدهن طول شعرج..لاتبذرين بي.. احبه..
دنوة : اي ميخالف..

صگر : ميخالف وميخالف بعدين اشوفج كاصته..
دنوة : لا لا..انت كصلي الاطراف عود..
صگر : تأمرين أمر..
بسته وراسي على صدره اسمع دكات گلبه.. رفع راسي بهدوء وهمس : مشتاكلج وعيونج..
حجاهه بصوت ذبلان وضايع..حركت راسي بالموافقة وتقرب مني بحنية وحذر..خايف علي بكل حركاته من روحه.. رحنا بغير عالم..ساعات تفصلنا عن واقعنا بعالم مابي بس همساته وحبه وحنيته .. بقينا كاعدين للتلاثة بعدين غفى بحضني..

ثاني يوم العصرية نظفت البيت فعرگته..صعدت سبحت .. كملت وطبيت للغرفة لكيته مدنج يم المجارير مالت الميزتواليت ..
دنوة : شدسوي حبيبي..
صگر : ادور مكص..عندج هنا..
دنوة : اي هياته موجود..
طلعتلهيا ..اجه جر الطبلة مالت الميزتواليت ..حط ادي على جتافي وكعدني بهدوء.. جاب المشط ويمشط بشعري بهدووء وحب وحذر..
دنوة : شحتسوي..حتكص شعري..
صگر : بس الاطراف..
دنوة : وتعرف ..
صگر : ايدي مسطرة..لاتخافين عيوني الاشوف بيهه..

دنوة : يله على راحتك عمري..
سرحه وكص اطرافة .. لفهن بورقه وذبهن بالزبل..
دنوة : ليش سويت هيج..ذبه هيج منو اكو..
صگر : لا شلون..اخاف عليج..كلشي يصير .. حتى اخاف من الهوى الطاير اليفوت من يمج..خاصة وره هاي الشغلة القديمة حتى مااريد اتذكرهه..
كمت من مكاني بسته من خده وايدي وره على شعره : شلون اجازيك على زيناتك وياي..
صگر : غنيلي..
دنوة : اغنيتنا..
صگر : ليش اكو غيرهه..
غنيتله انه ومبتسمه..هو راح بغير عالم وي صوتي.. لحدما خلصت ..باسني من خدي وكام..

مرت ايام هادئة مابيهه مشاكل..عايشين مرتاحين مثل أي ثنين يحبون بعض..
سرور تخابرني بين فترة وفترة هي ونوارة.. حياتهم طبيعية وماشافو مشاكل مثلي..الحمدلله لا اعتراض على حكمك ربي ..
سمر مرة عصام طلعت متخلف..نسبتهه صفر .. غدير خابرتني وكلتلي..متت قهر عليهه شكد حبابة ماتستاهل ابد .. حتى مو نسبة ضعيفة خاطر تكدر ترفعهه بالادوية.. خطية .. عمي قاسم كايل مانريد نظلم البنية..خنشوف نسبتهه كاحتمال اخير ..هي محللة وهو همات ..هو طالع مابي شي وهي الخلل بيهه..بعدين هي طالبة الطلاق منه ومتنازلة عن النفقة بس المؤخر منطيهيا..عاد هو تزوج هاي البنت الي عمهه اجه لبيت جدي ذاك اليوم..

سالم جايته بنية وهو عنده ولد ثنين..من زمان تزوج.. وره سنة ابو صگر..تزوجت سرور بعدين هو وراهه..

وره شهر تقريبا جنت بالسوك دااشتري هدوم ودكت علي رزان .. ماكدرت احجي وياهه..كتلهه ارجع للبيت واخابر عليج بس صوتهه جان مقهور ومتضايق..خفت عليهه.. اشتريت ورجعت..صگر جان بالدوام..
طبيت غسلت وبدلت ورحت خابرتهه..جاوبتني..
دنوة : ها ولج خوفتيني..شبيج..
هو انه كتلهه هيج لو طكت بچي..ارد افتهم شبيهه ماكو.. فقدت..عفتهه على راحتهه..دقايق وحجت..
رزان : دنوة ارضي عنهه فدوة لطولج..
دنوة : منو هي شبيج..
رزان : امي..
دنوة : ليش شبيهه..

رزان : دااشوف تموت كدامي..والله تعبت نفسيتي حتى شعري كام يوكع..جهالي يكلولي شبيج ماما ..اكللهم مابيه شي..
دنوة : شصار اخر شي..
رزان : جانو هي وجدو وخالو بايران..اخذوهه عند احسن دكتور..كايللهم ماكو علاج لحالتهه..هي حتضل هيج عايشة ع المغذيات والمقويات..هسه خالو اشترى من هذا اليشيل المغذي والچيس مالته وكاعدة بالبيت..صارت كوخ..
دنوة : خطية..شنو مرضهه معقولة ماعرفو..
رزان : كل واحد يكول شكل..تقرح بالمعدة..انسداد بالمريء .. حاروا.. كلشي ماكو..
دنوة : والله ماادري شگلج..شبيدي انه..الله يشافيهه لخاطرج انتي وسما..

رزان : حتى السماوات ملت من دعائي..شلون يعني..
دنوة : شبيدي..انتبهي لجهالج ولروحج..محد يفيدج اذا طحتي حتى امج ماتفيدج..انه اكبر منج وافتهم اكثر..
رزان : بس مدااكدر حتى انام بس افكر بيهه..
دنوة : اعتبريهه مثل ابوي لمن انجلط..هو مرض مزمن حيضل وياهه شتسوين يعني..ضلي ترددي عليهه كل فترة يمكن هي تتحسن لمن تشوفج انتي وجهالج..
رزان : اي صدك هي تحب جهالي..
دنوة : اي بعد شكو حبي..وكلشي بي صالح .. لا اعتراض على حكمة ربج..الله يشافيهه مابيدج شي..
رزان : الله كريم..ماعرفت شسوي كلت اخابرج..بس ارتاح من احاجيج واسولفلج..
دنوة : براحتج عيوني..موجودة انه خابريني شوكت مايعجبج ..
رزان : ان شاء الله..مع السلامة اخذي راحتج..

ودعتهه وسديته..خطية انقهرت عليهه شلون تبجي وتشهك .. اذا دعيت الله يشافي شذى فلرزان مو غيرهه.. ماحاسة بشعور الام بطفولتي.. بشعور احضن امي لمن اشتاقلهه.. بس حسيت بي لمن صار ايمن بحضني..طلبت من الله يحفظليا واضل يمه اشوفه شلون يكبر ويدخل مدرسة وكلية .. مااريده ينحرم مني ولا من ابوه..ونضل نسنده لحدما يكبر وتختط شواربه ولحيته.. ان شاء الله هيج يصير ..

وره تلث ايام خابرني صگر العصرية..
اول ماشلته كال : جسمي عايش ببغداد وروحي ساكنة البصرة.. تحديدا ساكنة بگلبج.. شلونج يبعدي انتي..
دنوة : ههههه..فدوه لحسك ..زينة وانت شلونك..
صگر : والله زين..ومشتاك لدنيتي حيل هواي ..
دنوة : انه اكثر وداعتك..شوكت تجي شو تأخرت..
صگر : باجر بحيل الله حبيبي..اويليييي .. ارد اشبع من شوفتج مشتاكلج بكد طول شعرج..
دنوة : اممم..اليوم دللتني بالغزل والحچي الحلو..
صگر : اخ يابة..هو انه غير اموت بنبرة الحس هاي.. شعندي غيرج يولي..صورتج جدام عيوني وببالي..واحبج ..
دنوة : اموت عليك انه..

ضلينا نحجي ربع ساعة وراح كال عندي شغل.. ثاني يوم اجه الصبح مثل عوايده..ضل اليوم كله يدندن بجملة يلوموني واحسك تكبر بروحي ويلوموني..
بالليل نومت ايمن ورحت بحضنه..
دنوة : اكول..
صگر : كولي عمري..
دنوة : شنو هلجملة التحجي بيهه طول اليوم..
صگر : يلوموني .. هاي قصيدة..وصارت اغنية قديمة..
دنوة : هااا..شو اقرالياهه..

صگر :
اعلى ياذمة توصّيني ..
وحياتي انت ونبض يسري بشراييني ..
ويضل اسمك علامة توسّم سنيني ..

ولونّك مو دمع ماضمتة عيني ..
ولونّك مو كحل ماشالتك عيني ..

ويلوموني .. واحسك تكبر بروحي ويلوموني ..
وانه بلا شوفتك شينفعن عيوني ..

يشوگي ورجوتي ودنياتي ولوني ..
وعذابي وبسمتي وشكواي وظنوني ..
يَخي عونك علي وبيك خي عوني ..

يواهس تضحك الدنيا على شفافك ..
يابو الليل الحلو اليلعب على چتافك ..

احس روحي تأمن بيك وتخافك ..
واحسك مدري شنهو انتَ ..
لغز .. لا حچي ولا سكتة ..

ولا غيرك نبع .. بالشوگ يرويني ..
وتوصيني ..
لونّك مو دمع ماشالتك عيني ..

صگر : ها حلوة مو..
عاينت بعيونه شلون تلمع حيل..ابتسمت : اي كلش..
صگر : حياتي انت ونبض يسري بشراييني .. اي والله .. نبض ونَفسي الاتنفسه انتي..عساج دايمة اذا مو الي لأيمن ..
دنوة : الله يحفظك انت همات وتضل خيمة تحمينا..
ابتسم بتعب وباسني من راسي وخدي.. انسان كله احاسيس ومشاعر..شكد حنين وهادئ حتى بنبرة صوته..مليان رزانة ورجولة..صدك الواحد مايستحسف يكول علي زلمة..

مرت الايام طبيعية..بت خالتي تارة انخطبت بس ماكدرت احضر الخطوبة..رحتلهه بيوم عادي ..اشتريت هدية ورحت .. عاتبتي بس شسوي صدك جنت كلش ملتهية.. كتلهه اجيج بالعرس تدللين..عاد لمن صار عرسهه كبلهه بچم يوم طلعت انه وصگر اجرت فستان شوي عريض لأن بطني بينت خلصت الرابع..ماكدرت اروح وياهه للصالون..خفت اعوف ايمن لأن بس يبجي اخر فترة..ديطلع اسنان وتوجعه.. بس رحت على كد الحفلة بالبيت بين مااجه الولد اخذهه وراحو للقاعة .. رحت وياهه وباركتلهه تقريب النص ساعة وطلعت صگر ينتظرني بره.. صعدت ومشى بينا..شفته غير طريقة..
دنوة : شنو وين حنروح..
صگر : نتعشى بره..عازمج..
دنوة : بس اليوم كلش جوعانة..حضر جيبك..
صگر : الجيب وصاحبه فدوه لعيونج..
دنوة : ههههه..حبيبي الله لايحرمني منك..

مد ايده كرص خدي بهدوء..ونزلنا يم مطعم فخم تعشينا وكملنا ادور رجعنا للبيت..لكيت خالة منيمة ايمن خطية هي تعبانه ومنا هذا شلغم على گلبهه..صعدت بدلت وخليت الفستان بتعلاكته باجر يرجعه صگر..شواي واجه جاب ايمن نيمة بفراشه واجه حضني من ظهري وايده محاوطة بطني..
صگر : تعبانة..
دنوة : اي والله..
صگر : يله غسلي وتعاي نامي..
همهمت يعني اي وكمت للحمام غسلت وسبحت.. اجيت لكيته متمدد ويكلب بتلفونه..تمددت بحضنه واشوفه شيسوي .. لحدما دخت ونمت..

وره فترة طبيت بالشهر الخامس وبطني كبرت.. صارت ثكيلة وظهري يوجعني من الطيحة ببيت عمي كاظم كله طلع تأثيره هسه..بأيمن همات جانت توجعني بس مو مثل هسه.. عبالك الوجع ضعف..فكمت مااشتغل هواي بس على كد المواعين والمسح امسح بالماسحة..خالة تسوي الاكل خطية.. دورات انه بس هي اكثر شي..خوما اخليهه تمسح وتنظف عيب.. صگر بالدوام وحاطلي فلوس..كلت اروح اسوي سونار بلكت يبين هسة..لأن بأيمن كلتلي لو جاية بالشهر الخامس جان بين .. كعدت الصبح على صوت رامي ابن اخلاص.. هاي اجت .. شعدهه ياستار بس لا هم متعاركين.. كمت غسلت ونزلت سلمت عليهه وكعدت..

الحجية : ادري ييمة چا انه اجيتج شعندج جاية طريق شطوله وانتي حبلة مابيج حيل ..
اخلاص : يمة انه ارد اجيب هنا..مااريد اكلفج واعنيج يمي .. محمود ملتهي وحتى مايجينا ..بس انطاني فلوس هاي ثمنمية مال جيبوبة والحليب وهاي..واذا عوزت يدزلي بعد..
الحجية : شكد الج هسة..
اخلاص : طبيت بشهري صار اسبوع..جم يوم واروح لمستشفى اهلية هي دكتورتي تشتغل هنا دوام ثاني..
الحجية : ديله خوش يمة..الله يسهلج وتكومين بالسلامة..
اخلاص : الله يسلمج ..دنوة ياشهر الج..
دنوة : طبيت بالخامس صار اسبوع..
اخلاص : يالله بعدلج هواي..
دنوة : اي هاي شنسوي..صابرة..

شكد حقير هذا رجلهه..يعني مرتك حتجيب وانت حتى ماتجي تشوفهه..اذا ماتريد تشوفهه ع الاقل شوف الطفل.. كالت حامل بولد..يعني عندك ولد ثنين وعينك على غير حلالك.. والله بشر عجيب..ماادري صگر مختلف ومايشبههم..
وره تلث ايام راح الحجي وخالة وام محمود وي اخلاص للمستشفى..رامي ضل يمي والبيت فارغ مابي احد بس انه والجهال..طبيت للمطبخ اسوي ريوك ومشغلة الراديو.. عليته .. احب هلاجواء..شواي وسمعت صوت طكطكة قوية.. نصيته ورحت بغرفة خالة چي طلع منهه الصوت..لكيت رامي كاعد ويتفرج ع التلفزيون..
دنوة : عمة سمعت صوت..
رامي : لا عمة ماكو صوت..

ضليت رافعة حاجبي..ادور بطني كامت توجعني من الموقف .. منو يعني..رجعت للمطبخ وكفت ع الطباخ.. شواي وحسيت واحد حاوطني من بطني وفرني علي..
شهكت ودفعته لا اراديا : وخرررر..
صگر : اششش يولي هذا انه شبيج..
دنوة : خوفتني صدك ماتستحي..وانه عبالي حرامي طفر علينا..يمة متت خوف حتى رامي خوفته وياي..
كام يضحك من كل عقله..عفته ودرت وجهي اكمل شلون جفلني عبالك طار نص عمري..عاد كام يدكلي ناعم .. حياتي وحبيبي ومشتاكلج وانه ضعيفة جدامه ماارفضله شي.. فرضيت بالعجل..صبيت ريوك وتريكنا.. رحت اغسل مواعين واجه رامي يفتح الثلاجة ويسدهه..حسيته يريد شي

دنوة : حبيبي تريد شي..
رامي : عمة عندج نستلة..
دنوة : لا والله مخلصين..اجيبلك العصر ..
رامي : اي اي..
دنوة : حاضر..من اجيبلك اكلك عود ماشي..
حرك راسه يعني اي وابتسم وراح يركض صار صگر بوجهه .. هو خجل ودنج راسه بالعجل..دنج يمه وإدي على جتافة
صگر : شتحب يانوع..ياهي يعني..
رامي : لا خالو مو عمة كالت حتجيب..
صگر : ميخالف..انه وعمة ماكو فرق..سولفلي ..
كعد يسولفله شيريد..كام نزع البيرية واخذه من ايدة راحو للدكان يشترون..بين ماكملت اجه بيده علاكة وحاضنهه شكد حلو ودبدوب..

راح يركض ع التلفزيون يتفرج..اجه صگر خلالي علاكة ع الكاونتر وانتچى علي..
صگر : شوكت اشوف ايمن يريد اشتريله حلويات.. والله حنتظر هللحظة يوم يوم..
دنوة : يارب يجي هليوم ونكون سوه ..
صگر : ان شاء الله حبيبي..جبتلج وياي ناسيج صار فترة.. بس شغل وهوسة للستار..
دنوة : الله يساعدج عيني..روح ارتاحلك شوي..
صگر : حبدل واروح لاخلاص..هذا العار ماعنده ذرة غيرة ..
دنوة : انه همات كلت شو مااجه..
صگر : عار موبيده..يله خلاروح..
راح سبح وبدل وطلع ..رجع وره الغده هو والحجي تغدو .. الحجي بقى وصگر رجع للمستشفى..

رجع بالليل كال حتبات هناك وباجر ترجع الصبح.. نام من وكت والصبح راحلهه..انه سويتلهه الغرفه ودفيتهه اكيد حتبرد وتكمشهه الباردة..
رجعو الظهر بثنعش ونص..جابت ولد وسمته همام.. خالة خطية بس سبحت ونامت بعد مابيهه حيل..التهت بهاي المسعدة.. ام محمود بقت لحد السبعة مالت همام وراحت وراهه.. محمود ماقابل تبقى اكثر..عاد انه التهيت بالبيت كله .. شغل وتنظيف وهذا الجاهل يصيح ويبجي دوخنا.. انه ايموني حبيبي ماعشت اربعيني وياه..الا اخر ايام.. ادور كام يغار من يشوفني اجيبلهه الاكل واشيل همام بين ماتسويله حليب .. عباله اخوه ويكوم يبجي..يله جاي اخوك بالطريق لاتخاف .. حبيبي عيدميلاده قرب..بس اروح للدكتورة اسوي سونار عود اسويله عيدميلاد..

التهيت وانخبصت لحدما طلع اربعينهه عاد هي كامت تكدر تمشي عدل وادير بالهه على روحهه..شلت ايدي بعد.. صگر خطية كل ما يشوفني اشتغل يكلي كعدي موزين عليج.. بس مااسمع .. عود عناد ماادري شيسمونه..

وره اربعينهه اخذت فلوس ورحت للدكتورة..سوتلي سونار
الدكتورة : همزين اجيتي هسة..جنس الجنين بنوتة .. لأن لو جايتني قبلهه جان مابين زين فنشكك..
دنوة : اي تأخرت بسبب ظرف صار مو بالقصد..
الدكتورة : مبروك..يوم تكومين بالسلامة ..
دنوة : شكرا دكتورة ..
الدكتورة : العفو حبيبتي..
انطيتهه فلوس ورجعت للبيت طايرة فرح..اريد ابشر صگر.. هو بالدوام مو بالبيت..رحت لخالة جانت يم اخلاص بالغرفة.. كتلهه بيه بنية..
الحجية : اييي ع الخير..وليدي شكد نفسه ببنية..
اخلاص : عشتوو..اكو واحد يريدله بنية..
الحجية : چا انتي شني..خاف زلمة وماادري ..
اخلاص : لا بس البنية حمل ثكيل شيسوي بيهه..
الحجية : هو يريد چا شني نجبره مايحبهن..شحلاتهن البنيات يضون البيت..

دنوة : اي والله عاش لسانج خالة..من رخصتكم اروح ارتاح..
الحجية : على راحتج يوم..
كمت صعدت فوك بدلت وخابرت صگر..حجينا عادي بعدين كتله..
صگر : لا لا جذب..صدك..
دنوة : يااا..وليش دااجذب عليك حبيبي..
صگر : الحمدلله عمري..انتبهي لنفسج ولا تشتغلين زايد
دنوة : حاضر..
صگر : فدوه اروح لهلحليگ..يله ابوية ارتاحي اروح انه..
دنوة : الله وياك عيني..
سديته منه وكمت شربت ايمن حليب واحاول امشي.. كام يحجي ويدندن بينه وبين نفسه..

انه يصيحلي اما..وصگر ابا..بس بيبيتيه يصيحلهه بيبي عدل .. بعد عنده كلمات اشكال ويضحكن .. كلنا مكيفين علي.. اول حفيد من الابن يعني.. الحمدلله هيج ولا غيرهه..

وره يومين لمن نزل صگر كتله ع العيدميلاد..
صگر : ديله ماعندي شي..
دنوة : جيبله كيكة بالككو يعني ورهمهه على ذوقك..
صگر : اي تدللين..
ثاني يوم جابله كيكة ونفاخ كومه كعدت انفخ انه وياه.. سويت شوي والباقي هو ماخلاني اكمل..جابله سيت هدوم جديد لبستياه طلع يجنن..كل الجهال حلوين بهلعمر.. انه همات لبست فستاني ولميت شعري لبست شال بي شذر وتفاصيل .. لأن الحجي موجود.. نزلته من فوك تاتي تواتي..هو شاف الكيكة ويريد يخلي ايدهه چفت.. طبعا طفل شمعرفه.. صگر شاله ويدنجه ع الكيكة ويشيله بالعجل .. چن يلعب باعصابه.. انه واكفة واغير بالاغاني وصافنة على صگر..

شلون شايل ابنه هسه يله عمره سنة..العمرهم ثنين واربعين هسه ابنهم اقل شي عمره سبعة ستة..بس لكلشي سبب اكيد .. هو فرحان بايمن وبيه على هذا وضعنا..قنوع الى درجة..ويرضا بالمقسوم ..واحنا راضي بينا..

وره ساعتين هيج كمش ايده وبيهه السجينة قطعوهه.. خالة اكلت لكمة وحده ماتكدر چي بيهه سكر..خو رامي .. البيت بيتك..شكد عفوي وحلو..حرامات امه وابوه هيج مشاكل بيناتهم ومامتصافين..الله يهدي النفوس..

اخلاص بس صرت انه بالشهر الثامن هي رجعت لبيتهه.. ابنهه عمره تلث شهور..طبينا لسنة جديدة ومتأملة نبقى عايشين حياة صافية بدون مشاكل.. وجع ظهري كام يزيد يوم عن يوم..بحيث الا ابر ومسكنات يله يهدأ..طبعا بعد وصف الدكتورة مر من عندي..اخاف يطلع بيهه شي اسم الله.. اهم شي تمام الخلقة علمود تكمل فرحتنا..
بيوم كاعدين داامشط جنت سابحة واجه صگر يدخن .. كعد ع الجرباية ويحاجيني..
صگر : جنت افكر بإسم للبنوتة..
دنوة : اي وشنو اجه ببالك..
صگر : ديمة..ديمة حلو ..
دنوة : اي صدك..هادئ وحلو..بس شحتصيحلي.. ام ايمن لو ام ديمة..

صگر : بنيتي..
ابتسمت علي واستحيت بنفس الوكت..شكد حلو.. بعده محافظ على مكانتي يمه..حبلت وطرحت وجبت ولد وحجيب بنية وبعده يكلي بنيتي وباباتي..

بنهاية حملي بالشهر الثامن چنا كاعدين بالهول الصبح ودك التلفون مال صگر..
لهناك جان يكول : لا اله الا الله..شوكت هلحجي.. الله يرحمه.. يله بس ابدل واجيك نروح للفاتحة..تانيني..
الحجية : ها يمة شكو ياستار..
صگر : واحد صاحبي ميت..
الحجية : الله يرحمه..شون خطية..
صگر : موتة الله..هو بعده عمره بالتلاثيات..
الحجية : اويلي على امه شحيصير بيهه..الله يرحمه
صگر : اي والله..حبدل واخذ عارف واروح..

راح صعد فوك شواي ونزل شغل السيارة وطلع..
صار العشه وهو ماكو..انه الادري الفاتحة تنشال وره العشه وترجع تنصب باليوم الوراه..ليش تأخر هلكد..ادور ادك علي يطلع مغلق..ورقم عارف مسحته ..حتى استحي احاجي.. ضلينا صابرين..لدعش ونص جان تندك الباب..طلع الحجي فتحهه..كمت بيه مابيه وكفت وره الباب وفاتحه فتحة صغيرة اشوف شديسوون..طب صگر شفته مورمة وطاكة دم.. چف ايده مشدود ببلاستر..الا شوي واتهستر.. شمسوين بي عمت عيني..خالة اجت مناك شافته كامت تبجي ..

عارف : لاتبجين حجية..لغوة بسيطة..
الحجية : لا يمة لاتكلي لغوة بسيطة..چا اذا عرك شيسوون لوليدي..منو هذول من ياديرة..
صگر : جلاب ولد جلاب من عدا المرحوم جان خوش رجال.. الا هذول المناعيل..
الحجية : غير يحجي شصاير..

صگر : كاعدين بالفاتحة مثل خلگ الله..لهناك جان يجيني واحد زعطوط عمره بداية العشرين..كال عوف شغلك احسلك مايفيدك..ضليت صافن علي..ماكو هيج جرأة..وشمدري انه وين اشتغل اصلا.. ردت اكوم اخلص علي وعارف كمشني.. عفته ماجاوبته.. توني دااطلع وره اذان المغرب جان اشوفه بره هو وياه رجال شايفه واعرفه حگ المعرفة وادري بي وين يشتغل..اجه يمي وحجاهه عيني عينك .. كال ماطولك حاجيت ابنا هيج مكانك وره الشمس..عاد انهديت بي.. كتله انه اذبك وره الشمس واحرك عشيرتك لابو اليطلعلك من سابع ظهر..لا انت ولا عشرة مثلك توكفون بوجهي..شنو زعطوط انه..

هو انه كتله هيج ومااحس غير اربعة صارو فوكاي.. ارد افتهم منو هذول..شفت اخوان المرحوم وياهم كلت هذا يريد يسوي ولية وكبسة علي..اطلع احسلي.. عارف فضهه وطلعنا..
الحجية : ايا مناعيل..هو هذا حجي..شلون يعني مانعيش مرتاحين..كلساع طالعة شغل صفح..يمة فدوه لطولك لاتسوي هيج بيه واخذلك اجازة بين ما تنسي السالفة..
صگر : لا يمة شاخذ مايصير..هو انه ببغداد منو يوصلني .. بعدين شبيج قابل اول اخر واحد..طبيعي كل واحد بهلمنصب تطلعله هيج زعاطيط..
الحجية : هو انه احجي وانه اسمع ادري برويحتي.. بس غير اخاف عليك ييمة قابل بيدي..
عارف : لاتخافين علي..سبع وانه وياه خوما اعوفه..
الحجية : الله كريم خالة..ان شاء الله ماكو شي..

تانيته يروح وانتبهت على روحي دموعي تارسه خدودي .. مااريد الفين وستة تنعاد..مااريد اعيش المأساة مرة اللخ .. يارب يطلعون مشتبهين بي وتنسي السالفة.. صعدت فوك وانتظرته يجي..اول مافات رحت ذبيت روحي بحضنه وحاوطته من ظهره انه وابجي ..
دنوة : لاتعوفني الله يخليك والله اموت بدونك..
صگر : اسم الله عليج دنيتي..لاتخافين مااعوفج لو مدري شيصير..انتبهي لنفسج ولاتنقهرين ادور يصيرلج شي انتي وديمة..
دنوة : مااريدهه اذا جيتهه حتاخذك..
خزرني وحچى بنتر : ديربالج اسمعج تكولين هيج مرة اللخ .. زين لو لا..

كلمن يومه وانه كتلج اضل وياج لحدما يجي يومي.. لا تكرهين البنوته وهي بعدهه ببطنهه ازعل عليج والله..
دنوج : انه ..انه مااقصد هيج صدك..بس چي انقهرت عليك وخايفه..
صگر : لاتخافين عيوني انتي..ان شاء الله خير..
حركت راسي يعني اي وسكتت..باسني من راسي وحضني بهدوء..هو انه صدك من الخوف كلت هيج خوما بالصدك حكرهه وانه اتاني يوم ولادتي بكل صبر..

مرت ايام عادية..صگر مايحجي ادري بي فانه اخذ تلفونه افتش بالرسايل والمكالمات..كلهه ارقام مسجلة ماكو رقم غريب والرسايل هماتين قليلة التجي ع الرصيد..يعني صافي .. الحمدلله يمكن انست السالفة وراحت.. لو يمكن هم اصلا غلطانين..قابل شعنده ..اكيد اذا اكو شي حيگلي هو وعدني مايضم عني شي..

طبيت بشهري ورحت للدكتورة حددتلي يوم لولادتي واجه اليوم صگر جان بالدوام..بالليل خابرني..
صگر : تدرين شنو..
دنوة : شنو..
صگر : اول مره اتمنى مو عسكري..شلون حعوفج وحدج تدخلين عمليات وانه بكل عملية وياج..حتى لمن سويتي ناظور والاشعة وغيرهه..
دنوة : انت وياي حتلو ماموجود..احس بيك..
صگر : يبعد عيوني هلعيون..الله يكومج بالسلامة.. لاتعبين روحج ابوية..اربع ايام واجي..
دنوة : تدلل..انت همات انتبه لروحك..
صگر : تأمرين دنيتي انتي..

ودعته وسديته..شوي خايفة چي ماكو..لمن هو قريب احس بالقوة والامان وشعور حلو..يله هو اكيد حيكيف يجي ويشوف ديمة شلون شكلهه حيكون..
طفيت الضوه ونمت..كعدت الصبح بدلت واخذت الجنطة حضرتهه من الليل وشلت ايمن نايم حبيبي..خليته يم خالتي والحجي ودانا للمستشفى..رزان وسما اجو وياي.. رزان كلتلي اجيج بس ماتوقعت تسويهه صدك..كيفت بجيتهه هي وسما..حسيت عندي خوات صدك والحمدلله..
اجت الدكتورة..غيرت الهدوم وفتت لصالة العمليات جبيرة وسكفهه عالي..هم اجه دكتور التخدير خدرني وراح.. بعد ماحسيت بشي غير متمددة ع الجرباية وايدي مشدوده بيهه كانونة..

خالة ورزان كاعدات ع الكراسي يمي..تحمدولي ع السلامة .. اول كلمة نطقتهه بتعب وحيل هافت : وينهه..
الحجية : هسه حتجيبهه السستر..
حركت راسي بهدوء وانتظرت يجيبوهه..شواي واجت خلتهه بحضني..گلبي فرفح عليهه..شلون غافية بهدوء.. بستهه على كيف..تمنيت صگر هنا ويشوفهه..جان فرح بيهه اكثر مني .. سميتهه ديمة مثل ما راد هو..
مشى الوكت لحدما اجت رزان مشتني بالممر والحجي جابلي اكل..ثاني يوم الظهر طلعنا ورجعنا للبيت.. سما ورزان بقو يمي تلث ايام..داروني حيل حتى الماعون مااشيله.. سما اخذت ايمن خلته يمهه خاطر مايشوف ديمة ادور يغار ويچيت بحضني..رزان تسوي الباقي والحليب مالتهه..

ماكدرت انطيهه من صدري..فبس ع القواطي.. خالة دورات وياي ودورات تطبخ يعني يبدلون..
وره هلتلث ايام اجه السايق عليهم وراحو من الصبح .. هي هم عدهه جهال خوما تلتهي بيه..وسما وي شذى علتهه علة .. كومتني خالة تمشيت بالهول واشوف الباب انفتحت وفاتت سيارة صگر..نزلت بالعجل ومخبوص..اول ما شافني رخه .. خالة سلمت علي وراحت للمطبخ..اجه يمي باسني من خدي وراسي وحاوطني من جتفي تمشينا لغرفة خالة..
صگر : تعذريني غاليتي بس التزام شسوي..
خليت ايدي على ايده : معذور واعرف وضعك..
صگر : تعبانة مو..
دنوة : اي والله..اريد اكعد تعبت من الوكفة..
صگر : يله امشي..

مشاني للغرفة وشاف ديمة بالكاروك تخبل عليهه..راح يمهه ويمشي اصبعه على خدهه بهدوء..لحظات وابتعد..
دنوة : تشبهمن..
صگر : بعدهه ماتبين..بس تشبهني .. شنو هاي كلهه علي ماصارت هاي..
دنوة : هههه..اي وشبيك انت تخبل اصلا..
صگر : لا يولي اريدهه سميرة مثلج..والحمدلله على كل حال .. المهم بنيتي زينة..
دنوة : تقصدني لو تقصد ديمة..
صگر : اقصدج ابوية..
ابتسمت بتعب..اجه باسني وراح يسبح..

مرت ايام اربعيني بتعب من العملية وبالي يم ايمن هسه اكيد يكوم يضوج ياكل ويتحسس من كلشي.. رحت للدكتورة شالتلي الخيط ومرهم مثل ذيج المره.. خلص الاربعين وسبحناهه وانه همات سبحت..شوي ارتاحيت وتغيرت نفسيتي .. كاروك ايمن صار لديمة وايمن صگر جابله اشكال الوان..جاب جرباية صغيرة اله وملاعيب جدد وطوبات خاطر مايغار..وهم من يجي شوفهه بحضني يكوم يريد يخبث..
دنوة : ولك ماما لاتسوي هيج..هاي اختك..
ايمن : ماما هاي حتعفج (تعضج) واخاف عليج..
دنوة : لاتخاف حبيبي..تعال انطي ماما بوسة..
اجه باسني وطلعلهه لسانه : اننن..ماما تحبني..
نيمتهه بسدي وجبته بحضني ابوس بي واشاوره .. ادغدغة .. كيف حس روحه رجع عزيز..

ثنينهم ولدي واحبهم نفس الحب..واحب ابوهم بعد اكثر .. حسيت وصلت للحياة الاريد اوصللهه من جنت بالاعدادية .. والحمدلله وصلتهه..

صگر دللني عيشني اسعد انسانة..كل فترة افتح تلفونه اتأكد من موضوع ذاك اليوم واشوف ماكو شي.. بس هو كام يدخن حيل هواي..اكثر من كبل..ويتأخر يله ينام..يكول عندي أرق مابيه شي..من جهة تلفونه صافي ومن جهة هو مااعرف شبي .. بس لمن نكعد سوه يصير طبيعي..

مرت سنة ٢٠١٣ بهدوء من بعد الشهر الخامس بيهه .. وهاي اكثر سنة ماحسيت بيهه هلكد ما مشت بالعجل وماصارت بيهه مشاكل..بين جهالي وبين صگر .. ملتهية بحياتي وعائلتي وفرحانة بيهم.. رزان تخابرني كل فترة تسولفلي على امهه..تكول بعدهه مريضة.. سما اجوهه خطابة وماقابلة..كايله مااعوف امي وحدهه..
سرور والبنات اجوني وره الاربعين ..بنات خالتي هماتين وبيبيتي خابرتني..جديتي اجتني .. شوي تجددت نفسيتهم بعد وفاة جدي الحمدلله.. اخلاص رايحة جاية.. تجي يمنا شهر وتروح يم رجلهه شهرين..وهاي هيج كضت السنة كلهه رايحة جاية وتتزعل..زعلاتهه ماخلصن..انه كافية خيري شري لا احجي ولا اكول..

ديمة حبيبتي كبرت وبينت ملامحهه..عيونهه كشكل ولون علي والباقي على صگر حتى رسمة الشفايف ولون البشرة .. ايمن بعده يغار ..
مره وره ما فكيت الكماط منهه اجيت خليتهه بحضني دااتغده وهو كاعد يم صگر..شافه خله اكل جدامي حسباله لديمة .. كام وشاله خلاه بحلكه..
صگر : يول هاي لامك..ماكتلي اخليلك..
ايمن : لا خليته لديمة ادري..ماتاكل هي..
ضحك وخربط شعره..هو حتى بصغره هادئ .. مد ايده على شعره مسحه بهدوء تعدل..جاب قطعه من نفس الماعون خلاهه جدامي..
ايمن : اسف..

دنوة : يمة يمة منك..لك فدوه اروحلك..
بسته وكرصت خده..انتعش .. حس روحه الاول والاخير .. طفل بعد..

وره هلفترة الاعتبرهه اكثر سعادة بحياتي اجتنا اخلاص هي وجهالهه كالعادة زعلانة..بس اجت تبجي وضايجة فد دور.. حتى خفت احاجيهه..وانه منا مختنكة صار سبعة وعشرين يوم صگر بالواجب..بداية دخول داعش ٢٠١٤/٢ .. تفكيري كله يمه وخايفة يصيرله شي..كل يوم الفجر اكعد اصليله وادعي الله يحفظه..تلفونه مقفول مايفتحه الا كبل لايجي بيوم ينطينا خبر حيجي..
بالليل صعدت نومت الجهال..ايمن صار سنتين وشوي .. وديمة دعش شهر..فاخليهم يمي مو مال وحيدهم بعدهم صغار .. نيمتهم واعاينلهم شلون نايمين براحة..كلت بگلبي ياربي كون صگر يخابرني هسه والله مشتاقه اسمع حسه..

كمت طفيت الضوه وتمددت ..ضليت اتكلب جان يدك تلفوني كمت شلته ملهوفة..حبيبي .. گلبي كام يدك سريع ..
شلته : صگرررر..
صگر : يروح روحي..والله مشتاك لحسج يبعد طوايفي.. شلونج دنيتي انتي..
لا اراديا دمعت من سمعت صوته : انه اكثر وداعتك.. زينة الحمدلله منتظرتك تخابر..انت شلونك..
صگر : والله بخير..مشتاكلج بكد رحمة الله .. يابة فد تعبان تعب موطبيعي..
دنوة : الله يساعدك حبيبي..حتجي باجر..
صگر : بحيل الله الفجر اطلع..تدرين شنو بنفسي..
دنوة : شنو..

صگر : اشبگج لحدما يروح التعب كله..انه بحضنج ارتاح بس ..
دنوة : يله بس تجي انه احضنك..
صگر : اويلي يابة..يعني صدك جسمي عايش ببغداد وروحي ساكنة البصرة..اموت ع البصرة والبيهه..
دنوة : انه همات اموت عليك..لاتطول حنتظرك..
صگر : ان شاء الله حبيبي انتي..يله نامي ابوية اكيد تعبوج الملاعين هذول..
دنوة : يله انه حنسى التعب لمن اشوفك..
صگر : بحيل الله..نامي زين..
دنوة : حاضر..

ودعته وسديته..طرت من الفرحة حتى ماكدرت انام للفجر .. كمت توضيت وصليت يله كدرت اغفى..
كعدت الصبح على ديمة تبجي ايمن مكعد بيهه هي ونايمة .. كمت سويتلهه حليب ونزلنا جوه..
للاربعة العصر وهو ماكو..تلفونه خارج منطقة التغطية.. ضليت الوب علي..لليل بثمانية واندك تلفوني.. كمت اشيله .. رقم غريب..
اول ماشلته كال : بيت صگر حامد شامخ...
دنوة : اي..منو ..
- : من بغداد احاجيج من .....

يتبـــــــــــــــــــــــــــع.............................

تدرون شنو؟ اليوم صار شي جدا فرحني وهو ان قاسم السلطان طلع بلقاء على برنامج سهراية وغنّى اغنية اسألي عني الليالي .. ومن مفضلاته طبعا ، اهلي ردة فعلهم زرعت كمية من الشجاعة ان استمر للنهاية وتصيرلي قصة بإسمي ممكن تشتهر اكثر بعدين وتاخذ حقها من هلناحية .

احبكم .. رقية جاسم💙.