رواية اسألي عني الليالي الفصل الخامس وستون 65 - بقلم رقية جاسم

لِلضحكة الهِجرت وجوهنَا بغِيبتك ..
مِحرم إعليك شمّة الهَوىٰ يبَعد الهَوىٰ ..
ريتنِي حَفنة تراب تواسِي وَحشة ليلك ..
أرد اگلك ،

بعد گطعت أغانِينَا والمسامرَة ..
ضلّت بس فزّاتنا الفجرِية يدورنّك ..
ويحنّن لمچان رويحتَك والسَهرة ..

يا أوّل عشگ فِتن عِيوني ..
ورَجّف ظنونِي وجفونِي ..

ردّيت بدمعاتِي لصوَرتك ..
ولرِيحة فرشتك ..
طفَت مَصابيح رُوحي ..
وفَرفَح گلِيبي سَكتة وغِيظ ..

نَاطرك لو صَار العُمر دَربين ..
واذا گطعَت دروب الوَصل ..
دُعاي هَلوحيد تجِيني حلمِين ..

تجِيني ..
وتلِم حَسرة سنينِي ..
تجِيني ....
- رُقيّة جَاسم ( القصيدة بقلمي )

الـبـارت الـرابع والـسـتـون..............

ودعته وسديته..طرت من الفرحة حتى ماكدرت انام للفجر .. كمت توضيت وصليت يله كدرت اغفى..
كعدت الصبح على ديمة تبجي ايمن مكعد بيهه هي ونايمة .. كمت سويتلهه حليب ونزلنا جوه..
للاربعة العصر وهو ماكو..تلفونه خارج منطقة التغطية.. ضليت الوب علي..لليل بثمانية واندك تلفوني.. كمت اشيله .. رقم غريب..
اول ماشلته كال : بيت صگر حامد شامخ...
دنوة : اي..منو ..
- : من بغداد احاجيج من الطب العدلي..

هو كال هيج وانه حسيت الدنيا صارت سودة بوجهي.. لساني انعكد..مستحيل يكون السمعته حقيقة..من الطب العدلي .. اكيد مخربط لا ..
دنوة : لا انت اكيد مخربط..شوف الاسم زين..
- : اختي هذا الاسم اخذناه من صاحب الرقم.. طلع صگر حامد شامخ..بأمر من الشرطة طلع عن طريق شبكة زين للاتصالات فالاسم متأكدين من عنده.. وصلنا جثمان شخص يحمل هذه المعلومات..جنسيته مالهه اثر للأسف كان تأكدنا اكثر..لهلسبب نطلب منكم الحضور للمستشفى حتى تتعرفون ع الجثة ولأن دائما من تجينا حالات وفاة بدون جنسية يتم التلاعب بالرقم حتى اهله ميتعرفون عليه..
دنوة : وهسه نجي..
- : بأي وقت..بس يفضل الاسراع الوضع محرج..

ضل يحاجيني وانه ساكته..بس دموعي تكت.. لا مو هو اكيد مو هو..حبيبي كال اجي ومشتاكلج ومشتاك للجهال.. هو كال الجنسية ماكو يعني مو هو..اي يمكن مخربطين بالاسامي .. ماحسيت غير انسحب التلفون من ايدي اخذه الحجي مني..
وائل : نعم منو حضرتك..اي هو اليوم مخبر زوجته يرجع من واجبه..دكتور المسافة لا ساعة ولا ساعتين وماكو شي يثبت هذا ابنه.. خوش هسه بس مسافة الطريق ونجي..مامطولين..
سده وانطانيا..راح ركض للغرفة يلبس..خالة كلشي مامفتهمه لحد هسه وانه اخاف احجي حتى لو ردت احجي مااكدر .. لساني معكود..اعصابي ونفسيتي هبطت للصفر.. يارب مو هو..فدواتك الهي بلكت يطلع مو هو..

الحجية : وج احجي شكو شبيج تبجين يمة خوفتيني.. صگر وين شبي..منو خابرج..
دنوة : ماادري خالة ماادري..شوفي خالو شيكول..
عفتهه وصعدت فوك لبست صاية وشال ودموعي تصب عشرة عشرة..ايمن شافني ابجي اجه چلّب برجلي..
ايمن : ماما شبيج..
دنوة : كوم بالعجل نروح لبيت خالة غصون..
ايمن : ليش تبجين ..
مسحت دموعي ودنجت حضنته..عصرته بحضني واشم بريحته.. يعني يعوفني وحدي وي جهالي.. لا مايسويهه هو كال مااعوفج ومايكول شي الا اذا جان صدك..

كمت خليت قوطية الحليب والممة مال ديمة واخذتهم ونزلت .. خالة وجهه مصوفر صار ليمونة..الحجي واكف يمهه يحاجيهه..
وائل : لاتفاولون ع الزلمة..انتن لاتجن..انه حروح ..هذا عارف بالباب هو واخوه..
الحجية : اذا مااخذتني احرك روحي..وليدي ماادري بي وينه تالي متالي تكلي ابقي..لا اشو ماتطلع اذا ماتاخذني..
وائل : يابة عيب مايصير..انه خابرت الرجال واجه ياخذني .. تدرين بالسيارة الكشرة عاطلة..
الحجية : عارف من عدنا وبينا..لاتسوي هاي السوالف ..
وائل : امري لالله..امشي خوية..
دنوة : خالووو..اصبر اجي لاتعوفوني وحدي..والله اطك من القهر واموت..

الحجي راد يحجي وخالة قاطعته..
الحجية : خلي الجهال يم خالتج وامشي..
تمشيت لبيتهم خليتهم عدهه..حتى ماكتلهه شكو.. درت وجهي لكيت السيارة بالباب..صعدت وطلعنا لبغداد.. هذا اخو عارف ماادري شيشتغل كلساع يدكون علي.. شواي واندار علينا يحاجي الحجي..
- : خالي هو سيارته شنو..
وائل : برادو..بس ماادري الفين وشكد..
- : اكو سيارتين اليوم برادو وحده صايرلهه حادث واللخ متعرضه لمداهمة .. هسه مانكدر نسوي شي الا نوصل هناك.. تشوفه اول بلكت الله هو ابو الحادث..
وائل : بلكت..بس شمدريك..
- : خالي غير اشتغل باستخبارات بغداد..كلشي يجيني بالدقيقة..داگين ارقامهم ثنينهم بالشركة .. بعد بس باجر يدگون ارقام السيارات..

دنجت راسي بحضني ودموعي تصب..حسيت الدرب نفسه مال سوريا..هلكد ما طويل وثكيل..اريد بس اوصل واريح گلبي كود ماكو شي ومو هو..هو وعدني مايروح ويعوفني خوما يجذب علي..حشاه من الجذب .. طول الدرب مارفلي جفن ابد.. ولو جنت تعبانه من الجهال والتنظيف بس حسيت التعب كله راح بهذا الاتصال..يارب لاتكسرني بعزيز روحي مالي غيره شسوي بدونه.. لا دنوة..لاتفكرين هيج اصحي.. عايش لج لاتفاولين علي..هسه ترحين وتشوفين غير شخص اكيد.. بس يمكن صار تلاعب بالارقام..هو الدكتور كال هيج بعد يعرف احسن مني..حسيت روحي فصلت..تخيلته هو ديسوق السيارة..رفعت راسي صارت عيوني بعيون عارف.. لحظات ورجعت لواقعي..هذا عارف ديسوق لاتوهمين روحج.. هسه نوصل هناك واشوفه طيب واشوف طوله الهيبة فدوه اروح لخطواته خطوة خطوة..

لهناك ووصلنا مستشفى ضخمة وسيارات واكفة بره.. دكاترة فايتين طالعين..وصلنا نص الليل.. خالة وجهه صار اصفر فد دور..خفت لا سكرهه يهبط..طبينا واشوف المنظر مو طبيعي.. اكو دكاترة على سترهم البيضة دم بسيط لو بالچفوف .. دنجت راسي بالعجل ماعاينتلهم..راح الحجي وعارف بقى اخوه ارشد عرفت اسمه من كلامه وي عارف..

بهللحظات ماكو وصف كافي يكدر يوصف حالة الخوف الدخلتهه..ياربي يطلع مو هو..فدواتك الهي..لخاطر ديمة وايمن مو لخاطري..والله مايستاهلون ينعافون وحيدهم.. خالة كاعده يمي وتفرك بإيدهه ..شواي واجه واحد ضابط وياه جنود ثنين..بقيت على وضعيتي واسمعهم..

ارشد : ها شسويت..
الضابط : السيارتين بالمركز..اهل الولد من دهوك.. الفجر يوصلون يشوفون ابنهم..اذا طلع هو علمود نسلمهم السيارة حسب المعلومات..
ارشد : شنو نوعهن ثنينهن..
الضابط : ثنينهن برادو..وحده سودة ٢٠١٣ واللخ اوف وايت ٢٠١١..
ارشد : المن والمن..
الضابط : السوده لصگر حامد شامخ..والثانية خزعل چاسب حمزة..
ارشد : خوش بس يجي عارف نشوف شيكول مانريد نسبق الاحداث..
الضابط : شتريد اني حاضر سيدي..موجود بره بالدورية أي شي ناديني..
ارشد : توكل خوية ماتقصر..

بطني عصرتني من كلامهم..دقايق من الحيرة والخوف والضياع.. قطع الشكوك والظنون صوت عارف..
عارف : لا اله الا الله..حسبي الله..
كمت من مكاني ورجلي احسهه تمشي على هوى.. احسني راح اطيح بحفرة بس اتحرك خطوة وحده..تمشيت يمه بيه مابيه وگلبي صار يدك بكل مكان بجسمي..
دنوة : مو هو مووو..مبدلين بالرقم..
عارف : هذا ابتلاء وهو انقتل بريئ..مكانه بالجنة .. اللللله اكبرررر ع البلد الجايف هذاااا..هيج دم البشر رخيص..

مو كلمات..طلقات .. سچاچين .. خناجر نبتت بنص گلبي واجه واحد يطعن بي بالزايد..لحد هاي اللحظه مامستوعبة السمعته حقيقة..
دنوة : اكيد ماتقصد حبيبي مو..هذا غير واحد شبيك لاتخبلني.. هو البارحة خابرني بالليل كال حرجع من الواجب وجه الفجر اطلع..اكيد صارله شي طارئ هو مايتأخر..

ماجاوبني..حط ايده على عيونه وكام يبجي بجي نسوان وبصوت واضح : الف رحمة على روحك خويههه.. عساهه بعدوانك طلقاتك..

مااحس غير اسمع صوت خالة عاطت وبجت بصوت عالي هي وتجر بالشيلة مالتهه..
الحجية : يمه وليدي حبيبي ابني..وينه فدواتكم خلاشوفه .. والله تجذبون علي..ادري بيكم ..دينتظرنا مووو..
اجه ارشد گومتهه ..طاحت من مكانهه بالكع ..
ارشد : الله يرحمه حجية..
الحجية : تترحم لوليدي وهو طيب حرام عليك.. وينه اريد اشوفه ..
عارف : انه حطلع اخابر اخوه يجي..والحجي ديخابر عمامه .. خوما وحدنا ندفنه..
الحجية : دفنتك رويحتك..لك لاتخليني اتسودن..

كامت من مكانهه وتصيح ع الدكتور : وينهههه..لاتجذبون علي حرام عليكم..انه ام هيج تحرگون گلبي..
الدكتور : البقية بحياتج امي..دمه ماضايع ان شاء الله..

على صوت نحيبهه ودموعهه وشلون ارشد وعارف واكفين يردون ينصون صوتهه وهي بالطالع صحيت.. وعيت ان الصار حقيقة بس گلبي مامقتنع.. لا حبيبي اكيد دينتظرني شلون يعوفني ويروح مايسويهه زلمتي..

عفتهم يبجون ورحت ماادري وين..تمشيت وحدي رجليه اخذتني.. شفت الحجي واكف يخابر ويحجي بصوت مخنوك ودموعه بعينه..عفته ورحت على مكان ثاني يختلف عن المكان الچنت بي..ماحسيت غير بإيد شخص سحبني من ايدي.. تعثرت وطحت بالكع..
- : شعدج فايته هناك..ميصير ممنوع الا الدكتور وياج..

رجال ثلاثيني بعده بحيله..كمت دفعته بكل حيلي وطبيت اركض عبالك بايكتلي بوكة..كام يصيح واجه وراي وانه نفسي ماادري وين طبيت..لحدما صادفتني سدية عليهه جنازة ومغطي بچرچف ابيض..ورجال لابس زي طبي يصيح انطو مجااال..
ضليت واكفة بمكاني من هول الموقف والصدمة احس خسرت كل حاسة عندي..اذا واحد حيضربني مااحس.. لحظات واسمع صوت عارف يمي..
عارف : خويه امشي مايصير تفوتين هنا..
دنوة : صگر وين..احجي الصدك ولاتجذب وتبجي دموع التماسيح..مو بالواجب الله عليك..هو كال هيج لاتجذب علي وتحرگ بگلبي والله مااتحمل..
عارف : امشي دااكول..مات الله يرحمه..
دنوة : بعدك تجذب ..

حسيت الحجي وكف يمي..عيونه حمر دم..
حچى بصوت مخنوك : امشي خالو..مايصير تفوتين هنا..
دنوة : ليش..هاااا ليييش..چي هو هنا مو.. دينتظرني ادري بي هو انه كتله حنتظرك كال اي اطلع الفجر..
وائل : امشي لاتعبيني..
جرني من ايدي طلعني بره..لكيت خالة كاعدة بمكانهه والولد يمهه يردون يسكتوهه..رحت كعدت يمهه مسحت دموعهه : شبيج تبجين خالة لاتخبليني..شنو ماتصدكين بصگر.. هو كال اجي قابل يجذب علينا..
ماجاوبتني ضلت تبجي وتشهك..كامت تلطم على راسهه وتجر شيلتهه طلع شعرهه وگصايبهه طوال بيهن شيب.. اجه عارف لبسهه الشيله..

عارف : لا حول ولا قوة الا بالله..مايصير هيج حجية.. حرام عليج..ترحميله لاتدعين على روحج..
الحجية : روحي..وك انه منيلي روح..رويحتي راحت وي وليدي .. حسبي الله على كلمن جان السبب.. ادري بي مايدخل رويحته بمشاكل.. شجابهم علي.. يمة ابوس راسك اخذني اشوفه والله اموت بحسرتي..
عارف : لا لا يمة لاتكولين هيج..والله اخاف عليج لايهبط سكرج اسم الله..
ارشد : اخذهه بس لاتتأخر..بين مايجون الجماعة..

كامت عدلت شيلتهه وهدومهه عبالك رايحة تشوفه عريس.. انه والميت واحد..لا احساس ولا شعور..فقدت كلشي بس اسمع واحجي..بكل دقيقة اكو هسه يجي..شلون يعوفني وحيدي .. حبيبي اكيد صارله ظرف وماكدر يجي..خلانتظر بعد هسه خالة تجي تكول شفته واكف ديدخن..اي هو من يضوج يدخن طبعا عرف بينا قلقانين علي دينتظرنا نجي نشوفه..
ماادري اقنع بروحي لو انه صدك دااحس هيج.. كعدت بمكاني ماتحركت..احس رجلية صارت حجار هلكد ماثكيلة ومالي قدرة احركهن..صفنت بيني وبين روحي.. ليش ماكتلهه اروح وياج اشوفه.. يمكن هاي اخر مره..
بلحظة او اقل ضربت روحي راشدي : انجبي لاتحجين هيج شنو اخر مرة..اصلا مو هو..
كمت اطبطب على خدودي وأجر بشالي تخبلت.. بس دموعي ماتنزل حسيتهه جمدت..

ارشد : خوية لاتسوين هيج..سلمي أمرج لربج..
عفته ماجاوبته..لساني انعكد.. يعني اصدك حجيهم واجذب گلبي اليحبه..لا اكيد گلبي صدك و هم جذب..
وره نص ساعه تقريبا اجت خالة تبجي وعارف كامشهه من جتفهه تريد اطيح..
الحجية : يمة وليدي يعني صدك..عامود بيتي وشمعة دربي هيج يروح..امداني خليته يدخل عسكرية.. كله من وراي .. وك يوووم عساهه بعدوانك..ليش هيج ابن الخايبة يروح هدر ..
ضلت تحجي تحجي لحدما تخربطت.. نقلوهه لغرفة وخلولهه مغذي حلو سكرهه هبط..انه امشي وراهم وماادري وين رايحين بس اسمع..الحروف ضاعت والكلمات خلصت.. اريد شي واحد يخليني اقتنع..ماكو..

ضلينا ننتظر لوجه الفجر بالخمسة وصل محمد.. اجه مبهذل وهدومه شي فوك شي..شتا والدنيا تكرص من البرد بس احس جسمي يفور من حرارة..راسي حيطك من وراهه..
اول ما شاف عارف حضنه وثنينهم يبجون بچي يهز الحيطان من قوته.. خالة ماتدري محمد هنا لأن بالغرفة خاليلهه المغذي.. شواي واجه اخذ بخاطري..رفعت راسي وعيوني ذابلة بالكوه فاتحتهه..شفت الدموع بعيونه ونظرات حزينة تفطر الصخر.. ماجاوبته ..دنجت چن ماشفت شي حتى..عافني ووكف يحاجي عارف وارشد..

محمد : وين الدكتور خلنشوفه شيكول..
عارف : حاجيته وطبيت شفته..لو مو هو مااخابرك تجي.. كال من البارحه هيج وكت يعني الفجرية لاكي..انسجة صدرة منتهية..لازم تصير الدفنة بعد..
محمد : يعني هنا..بس ماعدنا احد مدفون ببغداد.. كلهه بالنجف..
عارف : هيج كال..خليجون عمامك ونشوف شيكولون.. لاتخاطرون وخلندفنه هنا..هي كلهه كيعان الله..
محمد : والله من خابرتني ماصدكت..طلعت حتى السويچ ناسي.. شايف طريق اربيل شكد فاشل ومزعج.. سقت مثل المخبل..
عارف : فاجعة..وحگ لا اله الا الله فاجعة..
ارشد : البقية بحياتك..بس تخلص الدفنة افتح قضيه يحللون الدم والبصمات ع الكشنات..
محمد : هو حچالي ع العركة الصارت بالفاتحة.. مبينين هم..بس شتدري..نكدر نحجي..هو انه وطفرت بعد مارجعت بس من تزوجت..

عارف : انه اعرف..صارلهم بالست شهور يهددون بي.. كبل فترة ب٢٠١٣ الشهر الدعش هيج بطلو يدزوله شي.. عباله عافوه..
محمد : ماكال هددوني خرب عدو الله..ليش ضل جان جبته يمي واعلي شي..
عارف : ماقبل يعوف المنطقة ويطلع..كال كل يوم ماخذ عائلتي وطالع.. والله حاجيته ماخليت شي ماحاولت اقنعه بي.. شسويله بعد.. الله يرحمه والله بحسبة ارشد چن اخوي.. ماادري شكول انعصرت روحي لمن شفت الطلقات بصدره..
محمد : والله مشتاقله..ارد اشوفه يصير..
عارف : اي بس بالعجل عمامك حيوصلون..
محمد : يله امشينا..

اخذه وراحو..انه اسمعهم وصافنة ع الكع.. ليش مدااحجي .. ليش مدااكول اخذني اشوفه..گلبي يكول مابي شي.. مدري يكول مدري يضحك علي وعلى روحه.. كلهه شافته ضليت انه.. هسه اشوفه انه متأكدة لأن مابي شي حبيبي.. شنو طلقات شنو مداهمة..سبع وزلمة مايصيرله شي فدوه لطوله ولخطوات جدامه تروح روحي..شلون اسمعهم يكلولون الله يرحمه .. ماكو هيج جذب..جذب اي جذب..
وره ساعة هيج اجه محمد وخالة تمشي وياه وتبجي.. وره دقيقتين هيج اسمع صوت اكثر من رجال.. اجو عمامي.. رفعت راسي اشوفهم..يحضنون محمد ويبجون.. ماتخيلت اشوفهم بهلموقف وهلمنظر..حتى الزلم بچت وانه دموعي ماقابلة تنزل وتطفي نار گلبي..

خالة شبعت بجي وكلساع تريد تتخربط ويكمشوهه الولد .. ارشد راح وي الضابط علمود تطلع السيارة كال الجامة اليجدام متفلشة والكشن الوره صايره بي طلقتين.. هو طلع وره نص ساعه اجه الدكتور يحاجيهم..
الدكتور : لازم يتم تشريح الجثة..
محمد : لا ماتشرحه..سبب الوفاة واضح وانتو مطلعين الطلقات ليش دتشرحو..
الدكتور : ضروري..مادام بعده شاب ومابي مرض مزمن..
محمد : اكلب المستشفى على روسكم اذا شرحتو.. شنو بكيفكم.. لا هو موصي نشرحه ولا سبب الوفاة مجهول..

عمامي تخبلو ع الدكتور..عبالك السالفة بالعناد.. هم واحد يصيح ع الثاني وانه بس صافنة.. بالي مو وياهم .. شوكت اصحى واتقبل الواقع..عقلي يكول شي وهو الواقع وگلبي مايرضا يقنع.. شلون يقنع بموتة شخص ماعنده بس هو .. بين هلتفكير جان يصيح ارشد..
ارشد : ارميك اذا شرحته وحگ لا اله الا الله.. سلموه بالعجل هسة..يله ارد اشوف ياهو هذا اليشرحه..
مشى وياه لحد وره ساعه انطوه شهادة الوفاة وتصريح بالدفن وصاح على قصي وعارف وسالم دقايق وطلعو شايلين التابوت .. ومدنجين روسهم..

دورات يجي للواحد حلم چن ديصعد ع الدرج ويوصل باية كلش عالية بعدين يطيح ويجفل گلبه يدك سريع وانفاسه مو منتظمة..يحس روحه صحى من المكان الجان بي وشاف روحه بفراشه.. يعني الجان عايش بي حلم مو حقيقة.. والحقيقة هو بفراشه وماكو شي..

هذا الحسيته..جنت اقنع بروحي مابي شي.. گلبي يقنعني مو انه..صراع بين گلبي وعقلي.. بين ان استوعب هول اللحظة والحقيقة..وبين مر كلشي جدامي ..مرت وعوده لمن يكلي ماعوفج ووياج لحدما اموت..يعني متت خلص.. رحت وعفتني وحيدي..وديمة.. وايمن .. وخالة شلون.. منو النا.. تيتمت بشوفة تابوتك مو بس ترملت.. وعيت على روحي.. شفت الشمس تدخل من الباب..معقولة دموعي مانازلة من اول مافتنا هنا لحد هاي اللحظة.. انصدمت صدمة نستني كل لحظة حسيت بوقتهه هي الاكثر صدمة عشتهه.. طكيت بجي.. كمت ابجي واشهك ورجليه ترجف..كلشي بيه يرجف .. شفتهم عتبوا عتبة الباب ركضت وراهم اريد امشي وياهم.. كمت اصيح واعت بإيد عارف..

دنوة : نزلوووه..حباب نزله..انه شلون ماشفته شلوون .. خوية فدوه اروحلك لاتاخذه..وين ماخذي مابي شي والله فحصو زين حبابين..
صاح على عامر صار بمكانه واندار علي : خوية فوتي جوه مايصير المره تمشي بالجنازة..روحي..
دنوة : لا ماروح..شلون اروح وانتو دتاخذون روحي..
اندار على خالة : يمة بلا زحمة عليج اخذيهه يمج بس بين ما نخلي واجي اخذكم..
اجت اخذتني من ايدي وانه أعت بيهه اريد اروح.. اريد ينزلوه اشوفه وابوسه..حبيبي اكيد مابي شي ..عيوني تجذب وانتو تجذبون كلكم بس گلبي يحجي الصدك..خالة فدوه لعيونج كولي كلامج صدك..هو صدك مو..
الحجية : ولج ماااات..عمت عيوني ياريتهه..مااريد اشوف بيهه ابراك وليدي..

كعدت بالكع يم رجليهه وابجي واشهك..حبيبي ضخم وطويل مايكدر واحد يشيله..مابي شي بس متخربط والله.. هسه يصير زين ويجينا..بس لو اشوفه حتحترگ روحي.. دقايق واجه عارف اخذنا ورحنا بسيارته للمكبرة مال بغداد.. الطريق كله ابجي واحاچي خالة چني تخبلت..
دنوة : خالة دكليلهم ينزلوه شبيكم ليش دتاخذو.. والله مابي شي لاتخبلوني..حرام ..حرااام.. وانه وديمة وايمن وين نروح .. مايعوفنا والله مايعوفنا هو وعدني..
وائل : سكتيهه مالنا خلك نعي..مات استوعبي لاتخبلينا وتكلبين الدرب عزى..
دنوة : انتو حتكلبون حياتي عزى من وره جذبكم.. ليش تردون ترملوني وهو عايش..خالو فدوه اروحلك بس اشوفه.. بس شوفه والله مااريد شي..

الحجي عاط بيه : وين جنتي لمن طبينا نشوفه.. حايرتلي بالتصفن.. كلنا محترگين علي لاتضلين تزرفين براسي..
ارشد : على كيفك وياهه خالي..رجلهه وحگهه..

لمن كال مات احس گلبي صار جوه الرجلين وينداس علي چن ماموجود بكل قسوة..حسيته صار بزردومي ويدك بقوة تعبت من الوضعية..كرفصت روحي تگرفص وايدي على راسي ادك على كيفي واهمس بصوت ناصي.. حبيبي وينك ..مو خابرتني البارحة ومشتاكلي..شوف حتى كمت اكول مشتاگ مثلك.. شوكت تجي واشوفك..بس انه مامصدكة بيك متت.. هو انت مامتت هذول يردون يخبلوني..
فزيت على صوت بيبان السيارة انفتحت..الحجي نزل ونزلت ركض وراه..انه وخالة ليوره يمشون هم عشر خطوات يله احنا خطوة..گلبي احسه حينفجر بصدري من الحسرة.. شلون ماشفته شلووون..شلون انطاني گلبي يصير قريب مني ومااشوفه.. فحطت من البجي ودموعي حارة نار..چنهه اطيح على جرح توه صاير مو على خدودي..

وصلو لمكان كاعدين يمه اربع زلم..راح عمي قاسم يحاجي .. يمكن هذا الدفان..حيدفنون روحي وياه.. مااخليهم يدفنوه .. مابي شي اكو واحد يدفن بشر عايش.. كمت ابجي واشهك .. شفتهم ياخذوه من التابوت فوتوه للمكان ..المغيسل .. الزلم كلهه ضلت بره..راح عمي فيصل وعارف وي رجال من هذول الاربعه ماادري وين..وقصي راح همات هو ومحمد مدري وين.. اول ماراحو طبيت للمغيسل ركض چني مخبلة.. ابجي واشهك واتلفت خاف يجي احد يطلعني.. لكيته متمدد ورجال واكف يمه..كبل لا يحجي قاطعته : خوية فدوه لعمرك لاطلعني بس اشوفه..
- : ميصير اختي..
دنوة : مااتأخر بس دقايق..

سكت ماكال شي..تمشيت يمه لكيته بالفانيلة والبنطرون ومزرفه بأكثر من مكان بصدره.. قميصه العسكري مشمور على كرسي يم الرجال.. فانيتله صايره حمره من الدم.. مغمض عيونه وشعره السرح طولان چي صارله هواي مامزين.. خليت ايدي على صدره واعاين بملامحه..تقربت من حلكه.. ماحسيت بأنفاسه .. كمشت ايده بارده مثل الثلج..گلبه مايدك.. مايدك .. اي مايدك مثل الاول..جان يدك سريع وانفاسه تعلى بس اصير يمه.. بسته من راسه وكصته وخدوده.. نزلت دموعي صارت على خده.. حضنته وايدي على شعره..
دنوة : ابو ديمة..حبيبي .. ادري بيك تحب اصيحلك ابو ديمة .. مشتاقيلك كلنا.. وين رايح وعايفنا.. فتح عيونك الله يخليك..مو كتلي مشتاكلج..

هسه شلون انه شيقنعني.. حبيبي دتسمعني.. مد ايدك احضني مو كلت بنفسي اشبگج..هياتني يمك..
بقيت حاضنته وابوس بي بس اكعد.. گلبي مايتحمل بعد .. لاتعوفني فدوه لطولك.. بسته من صدره وچتفه بدون مااهتم منو هنا.. جسمه بارد ثلج..هو مايبرد ابد بالعكس يستحر حتى بالشتا.. شجاك هسه.. اكيد تعبان ومريض .. انه ليش مدااستوعب الصار.. اي مااستوعب..هسه تفتح عيونك .. افتحهن خلاشوفك..يله دااگللهم مابي شي محد يصدكني .. ادري بيك تصدكني تدري بيه مااجذب..

كمشت ادي بإديه خليتهن على خدودي مثل لمن يحضن وجهي بإدي بحنية وهدوء : منو يسويلي هيج بعد.. اكعد لاتأذي گلبي عزيز گلبي انت..
كمت ابجي واشهك ودموعي تصب على چفوف ايده.. فدوه لطولك اروح انه..اقبل اموت لخاطرك بس اكعد..
قربت اديناته من شفايفي وبتسهن انه واهمس : شلون ارجعك بس كول..مو بستك وتوسلت بيك.. مو كتلي انه تصيرين يمي گلبي يدك سريع..شو مديدك..
رجعت بستهن وشفت الحلقة بإيده اليمنى.. بسته منهه واخذتهه ..

دنوة : طول عمرك وفي ماخنت بنظرة..حاخذهه اخليهه يمي خاف تسأل عليهه وينهه..

انه واحجي جان يدخل عمي قاسم وعقيل.. عمي اجه يمي يريد يجرني منه وانه مچلبه بإدي وابجي واحجي : لاتخلي ياخذنيييي..صگرررر لاتخلييي..
قاسم : لج بابا امشي ورانا دفنه..نعلي الشيطان حرام مات بعد لاتتگربيله..
دنوة : عمو بقيني الله يخليك..شلون يدفنو.. مايندفن هو يحبني حيبقى وياي هسه يكعد بس انطي مجال..
عقيل : تخبلت..جرهه خلنطلع بالعجل كافي..

جرني قوي فلتت ايده من ايدي طاحت ع المصطبة الحاطي عليهه..عتيت ايدي منه ..انچبحت على وجهي.. كمت بالعجل انداريتله : بس ابوس عيونه..
قاسم : الميت نجاسة ابوية مايصير..امشي حرام..
دنوة : لاتحجي علي..وروح ابوي اموت هسه خليدفنوني يمه .. بحضنه..
تقربت منه بسته من عيونه وراسه..مسحت على شعره وايدي اللخ كامشني منهه عمي يعت بيه..
دنوة : اكعد..ابوس عيونك اكعد..ترضا ياخذني ويخليك تبقى وحيدك بدوني.. عمو والله هو كال مشتاگلي لاتاخذني منه .. هسه يكعد بس تعبان من الشغل..

تعب مني هلكد ما يجر بيه وانه مچلبه بإدي.. فلت ايدي ضليت واكفة بمكاني..نزعه الفانيله طلع صدره محفور بتلث اماكن .. داير مداير الحفرة صاير احمر على وردي طوخ.. عيوني راحت ع المكان الي يخلي ايدي علي لمن گلبه يدك سريع.. على گلبه .. ضاربي بگلبه..عساهه بيكم .. عساهه بعزيزكم وماتعيشون مرتاحين طول عمركم..حرمتوني من ابوي الجنت اتمناه..(اقصد صگر) من رجلي وحبيبي وابو جهالي.. الوحيد سندني ووكف بسدي بوكت حتى عمامي التربيت عدهم تبروا مني.. جريت حسرة هزت دكات گلبي ورجفت جفوني .. درت وجهي ودموعي طاحت على چفوفي..طلعت وكفت بالباب واعاينله .. هذا الضخم الشهم الطويل..هيج ينشال ومايدري بروحه..

ابو النفس العزيزة..جان حتى وهو مريض بس يخليني اغسل شعره وظهره واطلع..نفسيته ماتتقبل اضل يمه.. هو وتعبان ومنتهي من المرض يكلي روحي هسه اكمل واجي..

ضليت امشي خطوة وادير وجهي اشوفه دموعي تكت مطر على خدودي..كمت ادك على خدودي تجلغت.. ولك انه بدونك شسوى..شلون اعيش..منو الي.. ابوي واخوي وحبيبي ورجلي العشت يمه دنيا مستحيل اعيشهه حتى بأحلامي.. ربي فدواتك مايطلع كلشي حلم وافز منه..حبيبي ديتغسل بالمغيسل سوده بوجهي..
طلعت مدنجة راسي وجسمي خدران من هول الدقايق العشتهه وانه يمه هناك..عساهه بيكم ولد الكلب..الله ينتقم منكم ومن الجابكم علينا..الواحد مايرتاح بهذا البلد.. ليش شمسوي .. لو هذا حظي مايتحمل فرح..قابله اعيش ع الحصيرة .. قابله انام الليل بدون اكل بس اشوفك يمي.. يعني بعد ماانتظرك ترجع من الدوام.. حبيبي دتسمعني .. ادري دتحس بيه وبگلبي شلون تعبان عليك..

ماترضا اتعب مو.. يله انه يمك ارتاح ..شلون حرتاح بدونك يروحي وانفاسي الاتنفسهه..

رفعت راسي لكيت خالة فاحطه من البجي وبالكوة تتنفس.. رحت كعدت يمهه بدون مااحجي.. دموعي تنزل بهدوء وسكتة على خدودي واطيح بحضني.. وره مااعرف شكد كالو حضرت الجنازة بس الدفن.. روحي صارت بزردومي.. تمنيتهه تطلع واموت ويدفنوني يمه..شسوي بدونه.. بدون حسه وكلماته وحنيته.. لحد هاي اللحظة متأملة يطلع كلشي حلم .. كابوس وأصحى منه.. لاول مره اتمنى الموت من كل گلبي.. مافكرت باحد..مافكرت بجهالي منو الهم اذا راحو ابوهم وامهم.. بس شسوي .. من حلاة روحي.. مشوا بي لحد مكان ... حتى مايهلي تجي هلكلمة بحلكي واكول گبره.. وره ما راحو اجه عارف اخذنا انه وخالة ورحنا.. شفت دفنته بعيوني.. مااعرف بس تمنيت ينشلعن عيوني ولا اشوفهم يطببو جوه التراب ..

خالة ذبحت روحهه بجي ولطم.. فرفحت سوده علي.. هي شكد تحبه..تكول بمعزة حامد المرحوم وبعد اكثر.. شايل البيت على چتافه ويتحمل مسؤولية هو وساكت ولا يتشكى.. حبيبي هو صدك كتوم..

شواي وشالوه يردون يدخلوه بالحفرة.. ركضت من مكاني وكفت بوجهه ومن كثر دموعي حتى مااشوف عدل ..
دنوة : لا فدوه لعمرك لا..مايتحمل وحيده وحشه..
كاظم : وخري يابت..مايصير خلي الرجال يكمل شغله.. واكرام الميت دفنه..روحي لاتتگربين..
دنوة : والله انزل وياه اذا نزلتوه..ارد اموت وياه.. موتوني .. موتوني.. بلكت تطلع روحي واخلص..
كاظم : هاي شلون طلابة.. بوية فيصل اخذهه ليغاد حتسويهه طويلة مايصير..
رجعت خطوتين صار بيني وبين الحفرة اصبعين : اذا كمشتني اذب روحي محد يطلعني..
كعدت يمه واتلمس وجهه من فوك الچفن.. حسيت بعيونه مغمضهن.. بستهن وبست خده..

همست يم اذنه : يردون يدفنوك واخاف عليك من الظلمة .. بعدني عندي امل حتكعد وتفتح عيونك.. احجي حبيبي بس كول كلمة فدوه لعيونك اروح انه..

لحظات وانشاليت من فوكاه..عمي فيصل شالني.. ضل كامشني قوي يريد يوديني بعيد.. كمت ابجي وادفع بي.. تكربصت وطحت بالكع والتراب صار على خدي وردانات الصاية.. رفعت راسي واحاجي بدموع : عوفني والله حعوفه بس لاتجرني الله يخليك..
شفت عمي كاظم أشرله بعيونه يعني هدهه.. كمت حتى التراب مانفضته..كلهه زلم بس انه مرة بيناتهم.. هو علمني شلون اصير قوية بغيبته..بس بغيبتك هاي كسرتني.. رجعت دنوة القديمة الي من كلمة دموعهه تجري چنهه نهر.. الي كلمة تهزهه وتنهي كيانهه.. كلشي توقعت بحياتي ..بس موتتك لا..

شالوه يردون يدخلوه الگبر وعطت : بس كلمة والله واعوفكم تسوون بي التردو..
كمت من مكاني بسته من راسه وهمست : احبك ابوي العوضني عن الاخ والاب والدنيا كلهه..

كمت اصيح واشيل تراب اخلي على راسي.. خدودي انملت تراب : رحت وعفتنيييي..نعلة الله على كلمن جان السبب .. يشمعة روحي وابوي العيشني ملكة..

انهاريت بچي ولطم.. ولك ابجيلك دهر بس اشوفك جدامي واشوف طولك وحركاتك الهادئة والرزنة.. حياتي بس اكعد فدوه لعيونك اروح..ولك حيذبون تراب عليك.. حتختنك .. كوم ابوس ايدك بس كووم..
كام يذب بالتراب فوكاه لحدما تغطى كله ..ذبيت روحي فوكاه ودموعي ماسكتت..شميت ترابه واتلمس بي.. اجه عمي فيصل كومني وكفت يم خالة..حضنتني وتبجي بحضني.. انه روحي خلصانه وخالة تبجي بچي امهات بعد مايتقاوم والحجر ينفطر علي..

جابو مرمراية سوو بيهه گبره عليهه اسمه الرباعي .. تاريخ الولادة ١٩٧٠/٢/٢٠ .. والوفاة ٢٠١٤/٢/١٠ .. بعدك شاب يروح روحي ليش هيج.. روحي شايطة ودمي فاير ماادري شسوي وشلون اشكي حالي.. خلص يعني .. صار جوه التراب وحيده بالليل.. لا لازم ابات يمه.. اكيد يستوحش چي اول ليلة..

قروا الفاتحة وخالة تقره وتبجي وتشهك.. كامو ديروحون انه چلبت بگبره وامسح على اسمه وابوسه : روحو لاتاخذوني .. انه ابقى يمه..روحو عوفوني..
اجه عارف يريد يكومني صاح بي عمي قاسم..
قاسم : لاتكمشهه ..انت تحل عليهه..انه جايهه..
اجه گومني وبالكوة كمت..كمت واخذت حسرة كسرت ضلوعي وطعنت بگلبي.. دنجت بست اسمه ومسحت بإيدي علي .. كمت امشي ودايره وجهي على گبره ..رفعت ايدي ودعته چنه موجود.. مو چن واحد ميت والتراب مله عيونه..

همست بيني وبين نفسي : اجيك مااعوفك وحيدك..

دنجت ومشينا لمكان السيارات..خالة جانت يمي لمن جنت ابجي ومنهارة بس هلكد ما انهاريت ماحسيت بوجودهه.. هي تكسر الگلب سوده علي.. ابنهه بعد ..

صعدت بالسيارة وانتچيت ع الكشن..عاينت للسكف ودموعي تصب على خدودي بدون مااحس.. گلبي بي حسرة تفطر الحجر والله..منو يكلي دنيتي بعد..منو يكلي مااحب الاكل بس من اديناتج..اووووف بكبر الكون طاحت على گليبي.. يروح روحي حسبي الله على كلمن جان السبب.. مظلوم وبريئ عمرك مامشيت وره الغلط..صايم ومصلي وتخاف الله بكل بشر تحبه..

غمضت عيوني وتذكرت منظر الطلقات بصدره.. شاغت روحي وصلت لزردومي.. لج دطلعي وخلصيني ..خليدفنوني يمه .. حبيبي وحيد حتى بالگبور.. عمت عيني عليك يابة.. ابوي المارباني هو.. علمني الماعلمنياه هو.. تيتمت بدونك والله تيتمت .. عمت عيني بس مااكول غيرهه..

من البجي وصوت السيارة والتعب من البارحة كاعده غفيت .. ماكعدت الا لمن وصلنا لبيتنا.. اول مارفعت راسي تخيلته حيكون واكف يم الباب مالت السيارة
يكلي : يله ابوية وصلنا نزلي..
وصلت البيت وحيدي هلمرة..وصلته وحيدي.. وشلون حعيشه بدونك ياشمعتي ونور سنيني..چن كلشي حلم وداعت عيونك الچنهه ليل من سوادهه..

اخذت نفس ونزلت..عفتهم بالباب ورحت تمشيت لبيت خالتي .. دنيا ظهر الجو بي حراره وانه من البارحه ع الغده ماحاطه شي بحلكي.. دكيت الباب طلعتلي..سلمت عليهه ..
خالتي : خيرج خالة شو مورم وجهج..
دنوة : خالة ماادري شلون احجيهه وتطلع مني..
خالتي : ييمة شكو خوفتيني عليج..شصاير..
دنوة : صگر انطاج عمره..
شهكت شهكة..يمكن شحط زردومهه : يداده.. سوده علي بعده بشبابه..الف رحمه على روحه..شلون ولج شلون.. انه خفت احاجيج البارحه شفتج مستعجله..كلت هي تكمل شغلهه وتخابرني..ضليت انتظرج للفجر بس ماكو..

تقربت شمرت روحي بحضنهه ودنجت بالكع كعدت يم رجليهه بعد مابيه حيل اوكف اكثر..دنجت يمي تريد تكومني وسمعت صوت ايمن صاح اجت ماماااا.. كمت من مكاني رحت ركضت حضنته وشلته..مد ايده مسح دموعي ويبوس عيوني ..
ايمن : شبيج ماما..
دنوة : حبيبي مابيه شي..بس تعبانه من الشغل.. ديمة وين .. خوما ضربتهه..
ايمن : لا لا..اسألي بيبي..ماسويت شي..
دنوة : اي حبيبي صدكتك ادري ماتجذب..
بسته وعاينت بملامحه..شفت صگر بي.. نفسه عينا مستنسخ بس تطلعله شوارب يصير هو.. دموعي نزلت بدون مااحس كمت ابجي وامسح على خده..هو طفل حبيبي مايعرف شبيه .. مايدري صار يتيم عمت عيني ..

نزلته وانتبهت على ديمة اجت تركض وكامشه الممة بيدهه .. شعرهه بي شگار على ابوي ومن ضوه الشمس طالع اصفر يجنن..فتحتلهه اديه اجت چيتت بحضني..حضنتهم ثنينهم وبجيت بحضنهم..ديمة ترفع راسي ماتدري شكو .. وايمن يمسح دموعي ويبوس بچتفي.. چن انه طالبه الغوث منهم .. اريد ارتاح بحضنهم..حبايبي مابقيتو بس انتو من ريحته .. اضل ادعي عليكم بكل مغربية كون تطلع بيكم واحد واحد.. حرمتو من شمة الهوى ياحقراء.. ليش شمسوي الهي .. والله مايستاهل حبيب عمري وروحي من الدنيا.. انه روحي راحت وياك..اندفنت بحضنك ..ماارجع انه القديمة لو مر علي دهر .. حسبي الله دنيا وآخرة مااكول غير شي..

كمت حاجيت خالتي..كتلهه اليوم حينصبون الچادر والفاتحة .. كالت اخابر البنات ونجي.. اخذت الجهال ورجعت للبيت مشي.. لكيت عارف بالباب هو وولد عمي.. دنجت وطبيت ماحجيت شي..خالة سوده علي تبجي وتشهك للسما .. جهالي مايدرون شكو..ركضو على جديتهم يشوفون شبيهه.. عفتهم يمهه وصعدت فوك اغير ملابسي.. نزعت الصاية وصفطتهه هي وترابهه والشال همات.. خليتهن بالخانة البيهه هدوم صگر.. لمن اشتاقله اشمهم..بيهن ريحة ترابه فدوه اروحله..

درت وجهي لكيته واكف بالباب يدخن.. جلدي كزبر وعيوني ذبلت..
همست : هذا انت..
ابتسملي بتعب بدون مايحجي..بس رمشت راح.. تمشيت يم المكان الشفته بي..تلمست التريشة مالت الباب واتخيله موجود.. كعدت بالكع ودموعي بحضني اطيح كبل..

وينك عفتني ورحت ارجعلي فدوه لعيونك..اووووف احترگ گلبي والله .. شكد دعيت الله لايحرمني منك وانحرمت.. هيج ربي ماعندي خاطر يمك..تحرمني من اعز بشر عندي.. مااعرف شكول بعد روحي خلصت..

كمت مسحت دموعي ولبست اسود..عاينت لهدومي الملونة .. اشوفلچن صرفة بس تخلص الفاتحة..
لبست شال ونزلت..شفت خالة تبوس بمحمد ..
الحجية : يمة فدوه اروحلك لاتصير عنودي مثل اخيك.. بس تخلص الفاتحة ارجع لبيتك..احبك ومااريد يصيرلك شي يخلي گليبي يوكف..مااتحمل خسارته ادور انت..
محمد : حاضر تدللين بس لاتقهرين بروحج زايد.. لا السكر يأذي عيونج..
الحجية : ولك انه مااريد اشوف بيهن بعد..اريد انعمي .. سوده علي وليدي حبيبي عامود بيتي شلون هيج يصير بي والطلقات مزرفه صدره..

هي كالت عيج وطكت بچي..حضنهه وباسهه من راسهه .. يحاول يهديهه وهي انتهت بعد..نزلت بستهه ومسحت دموعهه .. حضنتني وتشم بشالي..
الحجية : هو يحبج..ريحته بيج وبالويلاد..
بادلتهه الحضن وبجيت لحدما الله كال بس.. شلت راسي حسيت الدنيا ظلمة بوجهي.. دخت دوخة موطبيعية .. بس اسمع محمد يخابر..
محمد : اي انت بس شوف الجامع وانه اشتري.. اي كلش زين دز عامر يأجر كراسي..انه حطلع أأجر چادر واشتري شغلات للبيت..يله لا تتأخر
الحجية : شحتسوي يمة..

محمد : خالة ام علي جايه هي والبنات هسه يم السيطرة .. انتو مابيكم حيل .. خلهم همَ يشتغلون.. سرور ونوارة .. حسبي حساب الكل حيجي..صدقانه بالدوام همات.. هذول هناك بره ونصهم بالجامع.. حطلع اشتري مااطول..
الحجية : ديربالك على رويحتك يمة..
محمد : تدللين..حاخذ ارشد وياي..
الحجية : روح الله يحرسك..
عافنا وراح.. ضليت افتر بالبيت وروحي متكلوطة علي.. كل شوي اسمع حسه يضحك لو يصيحلي دناوي.. لحدما بلشت العالم تجي وانملى البيت..اجت خالتي هي وبناتهه دنيا وتارة وحلا.. اول ماشفتهم متت من البچي.. تذكرت خطوبتي .. تارة وحلا جانن يگللي اي عيني فرحي منو بكدج اليوم..

حضنتهم وابجي بحرگة وگلب ملچوم ومحروك ومتعوب ..
دنوة : شفتي شلون راح..تارة تذكرين من كتيلي صگر جوه دينتظروج ع الخطوبة..
تارة : البقية بحياتج يروحي..مايروح دمه هدر.. ربج بالمرصاد.. حسبي الله..كومي اغسلج وجهج..
دنوة : ولج انه تراب گبره ماغسلته من هدومي..عوفيني بلكت اموت بقهري..مااريد اعيش بدنيا مابيهه هو..
دنيا : حبيبتي هذا ابتلاء..لاتكولين هيج خطية جهالج شنو ذنبهم يخسرون امهم..عشتي الصعب والاصعب تكدرين تربيهم وحيدج ماينخاف عليج..
دنوة : مااريد حياتي والله مااريدهه.. اريد اموت وارتاح .. چا محبوبي يندفن وانه هنا اكول الله يرحمه.. يمه فغرت روحي وداعت عيونه..

كعدت بالكع والبنات يمي ماعافوني لحدما سكتت وكمت .. اجت زينب ونور اخذو من خاطري لابسات اسود.. ادور راحو على خالة.. دقايق جان اسمع صوت صياح قوي.. وي الصياح فاتت اخلاص..كبل لايخابرونا الطب العدلي هي اجه رجلهه رجعهه..يعني ماتدري بصگر ميت..اجت شافت خالة وثنينهن بچت بنحيب وصوت يفطر الحيطان..
اخلاص : سوده علي يبعد عيوني اخوي..

انه كاعدة وفاتن بنات عمامي وعمة سناء هي وكوثر وفرح.. مرة عمي فيصل ولواء وقاسم اجن..ولا وحده حنت على وضعي بس خالة ابتسام فدوه لعيونهه..حضنتني وباستني من راسي ..
ابتسام : الله يرحمه برحمته الواسعة يعمري.. خوش رجال مكانه بالجنة بس اندعيله..
دنوة : خالة كوليلي حلم..الله يخليج.. والله روحي تأذيني مامصدكة.. شلون هسه جوه التراب هو.. والله الغصة اكلت زردومي اكل..شسوي علميني..
ابتسام : اوووف يالله..سوده علي بعدج شابة وشفتي ضيم الدنيا والبيهه.. شبيدج يخالة شبيدج.. اندعيله واقريله قرآن شتسوين اكثر من هيج..

دنوة : خالة اريد ارجع لبيت جدي..لكعدتنا القديمة.. مااريد اشوفه واحبه وانقهر.. شجابني شوداني ..مااعرف شحجي والله مااعرف.. شوفي جهالي ..
أشرتلهه عليهم .. ايمن كامش نستله ديقسمهه بالنص اله ولديمة وديمة چيتت علي حضنته مكيفه بالنستله..
دنوة : دشوفي حتى ماتهنى بيهم..سوده بوجهي هو ماتهنى بشي للاخير لازم يتنغص..
ابتسام : يمة لاتحرگين برويحتج والله شاغت روحي عليج.. قدرج هذا وهذا المكتوب.. الله يعوضج بأيمن..

سكتت ماجاوبتهه بس دموعي تنزل وانه بحضنهه..كالت نوارة وسرور بالطريق.. انه الدنيا كلهه طاحت من عيني.. بعد مايهمني منو حيجي ومنو حيروح..
فزيت من التفكير على صوت اخلاص.. دفرتني بخاصرتي وركعت الجنطة بوجهي..

اخلاص : انتي اكبر فگر بالدنيا.. اريد املخج واذبج للجلاب .. جلبة ادبسز ما الله يموتج ونخلص منج ومن نغطج.. فگر .. فگررررر.. فگرتي الرجال من يوم شافج وهو مبهذل من مكان لمكان..ياسوريا ياتهديدات يا امراض وحالة نفسية وسحر .. كافي كافييييي..گنالج عوفي ..عوفي خيعيش حياته .. چلبتي بي لحدما سكن الكبور..چلبتييييي.. ياحقيرة يانكسه.. الله ينتقم منج ..ماكو سبب بموتة بس انتي..
تفلت بوجهي وتجر بالشال مالتي.. عفتهه ماسويت شي.. انه فگر ادري بروحي..من انه وصغيرة ابوي يكلي انتي فگر شعندج جيتي للدنيا..بس مو قصدي اسوي بي هيج.. انه بس حبيته وشفت يمه الماشفته عد احد.. گلبي يوجعني ويدك سريع كلش..

البنات يردون يفكون اخلاص مني وماكوو..هي ضخمة شوي ومتروسة بالكوة عافتني..لمن عافتني طبت نوارة.. ركضت حضنتني وتبوس بيه من راسي وخدودي..
نوارة : ولج ليش هيج خدودج يروحي..الله يرحمه ترحميله لاتأذين روحج..لو جان هنا چان مارضا..
دنوة : تذكري شلون جان يحبني..
نوارة : اوووف ماادري شحاجيج..الف رحمه على روحه.. مابيدج شي يعيوني..
حضنتهه ودموعي تصب على چتفهه..

البيت انمله ناس..حتى اكو بيهم مااعرفهم..كالو امهات صدقانه.. ياهي التشوفني تكلي بعدج صغيرة.. انه ب٢٠١٤ بعدني ماصرت ثلاثين..جنت ثمانية وعشرين..

محمد جاب كومه كومه شغلات..تمن گونية وشكر وچاي .. بزاليا وجزر وووو .. كلشي ..حتى استكاين ومواعين سفري للزلم بره والنسوان احنا نصبلهم بمواعينا.. جداري كبار .. جاب كوزانين وهواي شغلات بعد، ضليت كاعدة بالمطبخ دموعي مانشفت كل شوي ادوخ واخرب تجي سرور تضوگني ملح ماخليت شي بحلگي جهالي نسيتهم من مصابي بعد ماشفتهم..هواي نسوان وجهال حتى تيهت بينهم..

بالسبعه وي اذان المغرب صعدت فوك لغرفة اخلاص القديمة.. هي تطلع ع الشارع..فتحت البردة شوي واشوف الچادر منصوب من بيتنا لحد بيت خالتي.. يعني كل الفرع.. هواي زلم حتى بالطرمة ونسوان طابه .. كمت ابجي وادك ع الجامه : رحت انت واجت هاي الناس كلهه عليك..هلكد عزيز وكلهم اجوي..

ضليت ابجي واشهك واتذكر الصار ببغداد كلمة كلمة.. ولحظة لحظة.. ياربي ساعدني شسوي ..شلون وين انطي وجهي .. تعبت وتلفت اعصابي..خسرت الكل وقابله اخسرهم بس مااريدك تعوفني..ادري دااحجي وي روحي بس شسوي.. من حلاتي ارد بس اشوفك يروح روحي..
بلحظة او اقل سمعت صوته بركن الغرفة : دموعج غالية لاتبجين دنيتي..
فحطت بچي وعيوني غوشت عبالك حتصيرلي جلطة.. نزلت بالعجل للمطبخ شفت سرور جايه..حضنتهه وبچيت بجي بس الله اليعلم بي..خالة امه مابجت مثلي..روحي وقطعة من گلبي صارت جوه التراب..

دنوة : سرور..ولج غطوه بالتراب..غطو حبيبي سوده علي.. سوده بوجهي كوووود..كمت ادك على خدودي واجلغ بيهن بلا وعي..شاغت روحي للستار والله مامتحمله هول الموقف.. انه اموت ولا هو..شحيصير بحالي من بعدك..
كمت ابجي واشهك مثل الجهال..

مر الوكت لليل والچادر شالوه..بس الكراسي طببوهن بالطرمة .. سرور فرشت للنسوان بس كرايبنا بقو والباقين طلعو وره اذان العشه.. خالة ابتسام وجديتي نامو يم خالة .. الباقين فرشتلهم.. انه وسرور ونوارة صعدنا فوك لغرفتي.. سرور اخذت جهالي وراحت تنيمهم .. ماجابت جهالهه هي ونوارة.. طبيت للمطبخ اشرب مي واجه محمد..
محمد : صبيلي وياج بلا امر عليج..
دنوة : يله هسه..
محمد : والله عبالك حلم..مامصدك..
دنوة : حتى انه..
محمد : لا اله الا الله..بس تخلص السبعة اروح اطلع السيارة اذا تبقى اكثر تنحجز..
دنوة : على راحتك.. حروح انام راسي صار طبل..
محمد : روحي خوية..

خليت ضوه خفيف وصعدت فوك..خطية البنات فارشات بالكع والجرباية محد عليهه..
دنوة : كومن نامن ع الچرباية..انه بالكع..
نوارة : لا حبيبتي روحي نامي..خالة كالت من البارحة كاعدة سوده علي مانايمة..
دنوة : شنام..انه شنام..ماادري شلون حتغفى جفوني بدونه ..
كعدت يمهن وايدي على راسي ابجي بحرگة واسمع حسه داير مدوري..همس بس واضح..
سرور : عيني لاتسوي بروحج هيج..ع الاقل نامي بليلج سودة علي شبيدي عليج..

دنوة : ولج هذا ابوي واخوي مو بس رجلي.. تذكرن لمن ابوي جان يضربني.. ابوي وهيج يضربني..بس هو مامد ايده علي ويداريني اكثر من روحه..شلون اصدك مات بس كليلي شلون.. گلبي صار نار ولج انه ماصدكت بالبداية.. جذبتهم كلهم كتلهم مابي شي هسه يكعد.. لمن شفت التابوت يله خشت بعقلي..
لطمت على خدي ودموعي تصب مثل النهر : طبيت شفته بالمغيسل.. وصدره سوده علي ..محفور حفر.. عساهه بيهم وبولدهم..هيج اخذو عزيزي ووحيد روحي..بعد كل هذا وتردين انام..

گلبي كام يدك سريع بشكل موطبيعي واختنكت حيل.. كمت اكح ودموعي ضعف.. كامت سرور جابت مي غسلتلي وجهي بمي بارد ومسحت دموعي..بنفس الوكت دك تلفوني.. كامت نوارة جابتليا..
رفعت راسي بتعب وعيوني مقفلة من البجي : منو..
نوارة : هاي اختج رزان..

مديت ايدي بدون مااحجي..جاوبتهه بتعب : هلا ..
رزان : حبيبتي شلونج گلبي..من الصبح ادك عليج متجاوبين .. كلت مشغولة اكيد..
دنوة : شلوني..شتتوقعيني..
رزان : يروحي الله يرحمه..لا انتي تستاهلين ولا هو.. الله يساعدج يعمري..اني حطلع الفجر واجي اشوفج..
دنوة : براحتج..
رزان : اخذي راحتج خاف ضايقتج وتريدين تنامين بس ماكدرت انام الا اخابرج..
دنوة : لا حبيبتي كاعدة ماانام..روحي ارتاحي ..
رزان : يله مع السلامة..
دنوة : الله وياج..

سديته جان تطلع الشاشة..مخليه صورته ..عنده صوره بالواجب ماخذهه هو والضباط الوياه..طالع مرتب حيل وضاحك..واكف بالنص ونجماته مبينات.. لابس بيرية والساعه بيده جبتلهيا بعيدميلاده..مايحب الهدايا بس كال چي منج اخذهه واحطهه بگلبي..
تلمست الصوره وتفاصيل وجهه..طوله واديناته.. دموعي نزلت بلا مااحس صارت ع الشاشة..قربت التلفون مني وبسته .. غمضت عيوني وتذكرت شلون بسته بالمغيسل..
سرور سحبت التلفون من ايدي وقفلته..
سرور : كومي نامي روحي روحج..

دنوة : شلون خليتهم ياخذوه ويدفنوه..شلون ولج بس كليلي .. شينيمني اليوم..روحي شايطة ..انه ..انه ماادري سرور .. عفية كولي حلم.. مامصدكة مامصدكة..
حضنتني وباستني هي وتمسح دموعي.. انتهيت من البجي وعيوني ورمت فد دور وتحرگني.. اخر شي بالثنتين تنهدت وكمت تمددت بالمكان الينام علي..حضنت المخده مالته ودفنت وجهي بيهه..شميتهه وبجيت عليهه وغفيت..

كعدت الصبح لكيت ايمن كاعد يم راسي بالكع ويبوس بإيدي .. جنت مخليتهه بوضعية واحد نايم ومايدري بروحه.. ابتسمتله بتعب وفتحتله اديناتي اجه بحضني.. باسني من خدي وعيوني.. طبعا تعلم الحركة هاي من صگر.. جان دائما يشوفه لمن يبوس عيوني وتعلم..
ايمن : ماما..
دنوة : ها يروحي..جوعان..
ايمن : هئ..بيبي اننتني (انطتني) لفة جبن..
دنوة : چا شنو حبيبي شبيك..
ايمن : صدك بابا مات..
دنوة : منين سمعت هلحجي عمري..
ايمن : عمة اخلاص كالت ابوك مات..

شكد چلبة الله يموتج الج واخلص منج.. شلون تكولين لطفل هلحچي..سوده علي يعاينلي ودموعه بعيونه..
ايمن : شنو نعني (يعني) واحد يموت..وين اينوح (يروح)
دنوة : ماكو هيج حجي حبيبي..معليك بيهه..
حتى مايعرف شنو يعني موت تجين تكليله ابوك مات.. شكد اكرهج شوكت اخلص منج علة على گلبي..
بسته من خدوده : انه يمك ومااعوفك لا انت ولا ديمة..
ضحك ودفن راسه بحضني..شعره سرح على صگر.. هو يشبهه بكلشي..بالعجل ياخذ تصرفاته.. لمن يشوفه ديسوي الضوه لو يشد فد حاجة وكامش الدرنفيس يجي يمه يخلي إدي وره ظهره مثل صگر لمن يريد يحجي.. حتى شعره اسود فاحم مثله..

ماادري شكول..خسرتك يااعز من روحي..لو خاسره روحي وماخاسرتك جان هانت..عمت عيوني التشوف غيرك بعد..

كمت سويت حليب لديمة وعدلت الجرباية وشلت الفراش .. طبيت سبحت..جسمي متكسر من السفر وروحة المگبرة كسرت روحي مو بس ظهري..حسبي الله ..حسبي الله..
كملت وطلعت لبست نفس الدشداشة ماعندي اسود بس هاي مايقبل اخلي اسود بالكنتور..يكلي فال موزين واخاف عليج .. لبست شال ونزلت لكيت الهوسة ضعف البارحة.. رزان كاعدة بالزاوية وعيونهه ادور على شي..والمفاجئة سما وشذى وياهه .. سما توقعتهه بس شذى..ابد ولا خطرت على بالي.. نزلت سلمت عليهن واخذن بخاطري.. شذى صوتهه بالكوة ينسمع..تقربت منهه يله سمعتهه..

شذى : البقية بحياتج عيني..سامحيني خاف اموت مثله..
دنوة : مسامحه..
مدت ايدهه الترجف على راسي وباستني منه.. شجاهه وصارت هيج..ماادري.. بس بعديش..بعد ما خبلتيني.. خليتيني مااعرف روحي شدااسوي..حتى سبح مااسبح.. خلف الله على صگر..ياخذني من ايدي يسبحني ويغيرلي هدومي ولا يوم مل مني.. خليتيني اخذ ادوية حالة نفسيه وانه عمري كله ماوصل نص العشرين.. طاحت الدنيا كلهه من عيني.. هي والبيهه..مايهمني بعد..لا عذر ولا سماح.. سامحت الكل ونسيت كل لحظة صعبه عشتهه لمن شفتهم يخلوك بگبرك يروحي.. عمت عيوني عليك وحيدك بالظلمة.. لا اب ولا احد.. وحيدك حتى بالگبور..

غصيت انه وافكر..كمت ابجي ..اجت رزان حضنتني وتمسح دموعي هي وسما..بس شيفيد..

مشى الوكت لحد وره أذان الظهر محمد جاب صندوگين بيهن قرائين اجزاء..وزعت تلاثين واحد للنسوان وهو وزع بره للزلم.. حسام ابد ماقصر..چي وكف وياه وراح بالخطوبة والمشية .. عارف وارشد همات ماقصرو..عمامي ضلو بايتين عدنا وگفو بالفاتحة بكل يوم..هم وولدهم..حتى احمد جان موجود..

تلث ايام وليالي من اصعب الليالي بحياتي.. اصعبهن مو من اصعب.. ادمرت نفسيتي واعصابي تلفت.. كلشي بنيته انهدم بلمح البصر..كل ليلة اتوسل بالنوم توسل يمر عيوني.. مو نعسانة..بس اريد اشوفه بالحلم..جان كبل دائما يجي باحلامي.. وجياته كلهه لمن اكعد من النوم اكون فرحانة.. مرني طيف بحلم يروحي..تلث ايام وتعبت بدونك.. شلون حگضي العمر هيج..

وره هلتلث ايام انشال الچادر والزلم راحت بعد.. عمامي رجعو لبيوتهم..بس النسوان ضلت تتردد ع البيت لحدما صارت السبعة..رزان وسما بقو وياي للسبعة..بس شذى اجاهه السايق رجعهه لبغداد ماكدرت تضل اكثر..

بيبيتي وخالي عمار اجوني..حتى سيف وعذراء مرته .. خالتي مانستني لا هي ولا البنات.. كل يوم الصبح اشوفهن بالبيت ولمن اريد اسوي شي هم يسوو بمكاني..مابيدهم شي بس يخففون عني الشغل.. بالليل انصب عزائي البسيط بيني وبين روحي لمن الكل ينام.. اطلع صورنا انه وياه وابجي بچي يهز الحيطان من قوته..افرفح وروحي توصل لخشمي.. عندي صور هو ديبوسني من خدي وضاحك..مايدري بيه اخذتهه.. جان مغمض عيونه عباله دااگلب وانه اخذتهه.. تقربت بست خده واحاجي بعتاب : شلون انسى تسع سنين.. يوم ويومين .. شلون شسوي ..انه منك جنت اتعلم شلون اتعدى كلشي صعب.. هسه منو يعلمني..ليش انت هم تنسي وتتعدى.. لا وداعت عيونك..

وره السبعة بلش البرود يدخل للبيت.. النسوان راحن.. خالة ابتسام وجديتي كالن نجي كل يوم نشوفج ونشوف ام صگر.. بيبيتي ام امي بقت يومين هيج وراحت ماطولت..
كل الدنيا اجت..ضباط ومنتسبين يعرفهم.. صدقانه وامهاتهم .. مرة محمد روزة اجت ثاني يوم هي وبيت خال صگر الجان محمد كاعد عدهم.. ام روزة وابوهه .. ابو مخلد هو وولده وبناته وچناينه اجو.. نسيت كلشي صار..نسيت كلشي بمعنى الكلمة..بعد مايهمني كلام ورأي احد.. اريد اضل وي روحي اتذكر حبيبي بلكت تطفى ناري وارتاح..

اسبوع هو بس هلكت وتعبت تعب مو طبيعي.. نسوان قيامة الله..والزلم يوم عن يوم يصيرون اكثر ماادري منين يجون ومنين يعرفهم.. الاكل انه وسرور ورزان نسوي.. من غير الاكل الدسم..كل هذا مو بعيني.. ولا استطعم الاكل..چن مابي طعم حتى.. نسيته كله.. نسيت روحي .. دشداشتي اول يوم لبستهه جانت تارسه على جسمي.. وره اسبوع غركت بيهه..ضعفت وضغطت على روحي من كل الجهات.. ايمن يفتهم وذكي من هو صغير.. كل ساعة يجي يكلي بابا وين..صدك عافنا ومايجي بعد.. اضغط على روحي وادوس گلبي ودموعي واكلة بهدوء : لا حبيبي ماعافنا.. هو ويانا بكل مكان لاتخاف..
يضل يعاين بعيوني لحدما يروح يركض على ملاعيبه..

ياريتني بكدك يروحي..شكبرني وشفت الويل.. اوف ياربي اوووف.. شاغت روحي والله..

بعد مرور عشر ايام ماضل بالبيت بس انه وخالة وجهالي .. روزة ومحمد وابنهم الصغير..كلهه طلعت.. بس ضلو يترددون علينا يواسون خالة العصريات يروحون المغرب.. بس التعب والاكل الهواي كله قل وراح..

جنت طالعة من الحمام..لبست شالي الاسود والدشداشة .. رحت ع الكنتور اخذت هدومي الملونة كلهن ونزلت جوه للطرمة كومتهن بالكع..ركضت وره البيت جبت النفط وذبيت عليهن نگعتهن.. جبت جداحة وورقة صغيره حرگتهه وذبيتهه عليهن جان تكب النار اكلتهن بالعجل.. رجعت بخطواتي وكفت بباب الكليدور اعاينلهن شلون يحتركن.. الريحة طلعت جان تجي خالة..
الحجية : شني هاي الريحة ولج..
طلعت شافت الهدوم..
شهكت واندارتلي : وج لو محتركة يمسدونه..شلون تسوين هيج.. جاهلة صغيرونه انتي..

دنوة : خالة انه حياتي هيج احتركت من شفت حبيبي ونور عيوني يندفن جوه التراب.. حياتي مابيهه لون من بعده.. عوفيهن يحتركن عوفيهن..قسمت بعيون صگر بعد ماالبس بس الاسود..لحدما اموت..
بجيت بحرگة ودموعي تصب مثل النار المشعولة هاي.. اجه محمد وروزة تخبلو..
روزة : سلمي امرج لالله حبيبتي ميصير هيج..
دنوة : ونعم بالله..بس مااريدهن..عوفيهن ..محمد لاطفيهن فدوه لگلبك..
راح طفاهن وانه تسودنت..كمت ابجي واضرب بي وادفعه بره بالشارع : ولك ليش طفيتهن حقييير..ليييش..
محمد : ولج بابا مايصير..امشي فوتي امشييي..

فوتني جوه وكعد شال القطع الاحتركت ..قليلات بالنسبة للمابيهن شي..اخذ المابيهن شي ..
دنوة : شحتسوي بيهن..
محمد : بمكان ما تحرگيهن ..ننطيهن للوادم ماعدهه هدم تلبسه..هم ثواب وصدقة..
اخذهن وانطاهن لروزة خلتهن بالغسالة علمود تروح ريحة النفط.. كمت ابجي والطم على راسي.. يروحي شلون بيه .. شلون تعوفني وحيدي والله مامستوعبة موتتك عمري انت.. خالة شلون تعوفهه مو خطية..وديمة.. وايمن.. جهالنا .. وانه بنيتك شلون تعوفني..
بچيت الكل وياي لحدما تعبت وكمت غسلت..

بالليل صعدت نيمت الجهال وفتحت كنتوره.. لكيت دشداشته النيليه طوخ لمن شفته اول مره جان لابسهه..وشماغه اسود بي مربعات بيض..اخذتهن وضميتهن بحضني.. كمت طفيت الضوه وكعدت بالكع بس راسي واديناتي ع الجرباية.. على مكانه الينام بي..كمت اشم بيهن وابجي بچي يخنك ويطلع الروح..بست مكانه ومخدته..بست دشداشته وشميتهه حييل اريد تردلي روحي الراحت وياك..
بعد ساعة مدري اكثر من البجي رفعت راسي دايخة.. شفته متمدد بمكاني الانام علي ع الچرباية ومبتسم.. حسيته حقيقي.. هو اي مو احساس..اكيد هو.. ضليت على وضعيتي حتى مارمشت..خفت يروح مثل ذاك اليوم..

كال هو ويأشر على صدره : تعاي هنا..
كمت بلا وعي تقدمت يمه..خليت ايدي على صدره..
عكد حواجبه وهمس : يوجعني لاتخلين ايدج..
وخرت ايدي وغمضت..بس فتحت عيوني مالكيته.. كمت ادور علي بالغرفة وابجي واكح..امشي واتعثر حتى بالهوى..
دنوة : حبيبي وينك..توني شفتك وين رحت.. شبي صدرك .. اكيد وجعان من الطلقات يعمري سوده علي..
كعدت بالكع بقلة حيله وضعف..دموعي تصب على خدودي چنهه جمر مو دموع..
دقايق واسمع صوت اشعار بتلفوني..كمت اشوفه لكيتهم كاتبين لديك ذكرى صور قبل ثلاث شهور.. جان عندي ايفون سكس.. توه نزل واشتراليا..

فتحتهن لكيت الصور مال عيدميلاد ايموني الثاني.. گلبت بيهن واشوفه كاعد وحاطه على رجله يبوسه.. صوره لخ شايله فوك وايمن ضاحك..لحد اخر صورتين جانت انه وياه .. وحده منهن بالليل لمن نام وراسه برگبتي هو وغافي اخذتهه.. مالي نية بشي..بس احب شكله هو ونايم..بعدين الصبح شوفتهيا كال خليهه حبيبي ليش دتسأليني سوي اليعجبج.. ضليت ابوس بالصوره ودموعي تنزل ع الشاشة.. ياريت توصلك دموعي وتحس بيهن..مو يكولون الميت يحس بأهله.. حس بيه وخليني اشوفك حلم يروحي..شلون اعيش بدونك بس فهمني شلووون..

تعبت من البجي وراسي صار طبل..بس أذن الفجر كمت توضليت وصليت..بجيت بي إدين ربي لحدما غفيت ع المصلاية..
كعدت الصبح لكيت روزة مسويه الغده..ايمن نازللهه مسويتله اكل وديمة محضرتلهه الممة..

دنوة : ليش ماكعدتيني اجي وياج..
روزة : مابيج حيل حبيبتي..اني موجودة شتحتاجين كليلي
دنوة : ماتقصرين الله يسلمج..محمد وين..
روزة : راح هو وارشد وعارف يطلعون السيارة..
دنوة : ها خوش..
كمت على خالة اتفقدهه..لكيتهه تبجي ومفرفحة..بستهه وبجيت وياهه..شواي ومسحت دموعهه اخاف يصير شي بالشبكية مال عينهه ماتستاهل..
بالليل طبو الولد..بس محمد وجهه مصوفر.. هو وعارف.. ضليت منتظرتهم يطلعون واجي اشوف شكو.. كمت سويت حليب لديمة واسمعهم ....

يتبـــــــــــــــــــــــــــع..........................

بارت موجع ومؤلم بمعنى الكلمة ، مااعرف شحجي بس القصة حقيقية والصار حقيقة لايمكن تغييرها ..
الله يرحمه ، وتعذروني ع التأخير لكن صارت مشكلة بالنت ..

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

وهذا مشهد اللقاء الحمدلله لگيته ، تكدرون تشوفوه هنا من ديغني اسألي عني الليالي 💙.