رواية اسألي عني الليالي الفصل السادس 6 - بقلم رقية جاسم

اضل غالي وصعب للوكت والشدايد تكسرني .."
... سطر يعبر عن حال حامد ....

قناة تليگرام

الــبــارت الــخــامــس............

كله ماشي بهدوء.. الى أن بيوم ابو الشغل كال اليوم تطلعون من وكت عندي شغلة اسويها.. عاد احنا كيفنا.. للعصر وطلعت اني وولد تلاثة.. نصيت عيوني ع الردان أكفه وانتبهت على حذاء وحدة واكفة جدامي.. نظيف أسود .. رفعت راسي شفتها..

بيضة گطن واكفة يم أمها.. عيونها جوزية فاتحة .. لابسة حجل ذهب رفيع بي مداليات تلاثة اربعة مثل الدمعة وهيج هي وتمشي يطلع صوت.. جذبتني بجمالها.. ضليت واكف واباوعلها .. حسيتها انتبهت علي وعلى نظراتي شلون اكلتها.. مامباوع على بنية هيج.. بس هاي ماادري عجبتني.. باوعتلي بنظرات بريئة وراحت فاتت لمحل الذهب قريب من المطعم..
نغزني وائل صاحبي : ها يول شبيك اكتلها للبنية..
حامد : وانت شكو تباوعلي ادبسز..
ودق : يابة انت واضح هياتك.. حتى البنية باوعتلك..
حامد : هههههه.. دمشي يله هسه ارجع بس اشتري چم شغلة منا..
الكل : على راحتك.. ثيمالاه..
راحوا واني ضليت واكف أتانيها تطلع.. شبيه چلبت الا اشوفها.. ماكو دقايق وطلعت.. باوعتلي بخوف عبالها اريد اسويلها شي.. تانيتها تمشي واشوفها من وره الظفيرة تتحرك ويا حركاتها.. انتبهت عليها شادة مثل الشريط لونه أسود وبي طوبات صغيرة بيض.. هي وتمشي وكع منها.. تقربت منها عبالي اشيله.. سمعت صوتها تحچي بنعومة
- : ماما اصبري وكع الشريط..
نزلت شالته ورفعت راسها باوعتلي وخزرتني.. لا اراديا ابتسمت.. بوية شنو هاي الحلوة صارت جدامي.. اريد اعرف وين بيتها.. دارت وجهها وراحت.. تانيتها تبتعد ورحت وراها امشي .. مبينة فطيرة حتى مااندارت تشوفني خاف الحگ وراها لو لا.. مشيت من كل عقلي مسافة طويلة لحدما دخلنا لحي الجهاد .. اني بالطريق كلساع اوكف يم محل اشتري ماي وشي اكله.. ميت جوع.. بحيث لمن وصلت لبيتهم ودخلت هي مديت ايدي على جيبي لكيت الفلوس خلصانة.. ماچنت شايل هواي فخلصن.. ضحكت على روحي.. اني اروكض وره النسوان..

درت وجهي ورجعت.. أجرت تكسي ولمن وصلت للشقة صعدت جبت فلوس وانطيته.. ضليت اشتغل واروح لبيت خالي كل اسبوع نوبة.. لحدما طخت ببالي ارجع لبيتها واشوف مدرستها وين.. اداوم لا.. فأخذت اجازة ليوم واحد.. رحت لبيتهم الصبح .. ضليت واكف وره الشجرة لحدما انفتحت الباب وطلعت .. اويلي شلون حلوة هالبنية.. مشت ولازمة بيدها كتاب تراجع مارفعت راسها.. استغليتها فرصة ومشيت وراها لحدما شفتها دخلت لمدرسة اعدادية.. وراها رجعت للشقة تمددت واباوع ع السگف واتخيلها .. بقيت كل يوم الصبح قبل لا اروح للشغل اجي لمكان مدرستها اشوفها تدخل بعدين اروح.. مرتين شافتني بس ماانطتني ردة فعل.. كإن مامهتمة .. اني اشوفها هيج واباوعلها بالزايد.. شخصيتها حلوة ورزنة.. كلها على بعضها جذبتني.. بس كاتمها بگلبي ماحچيت لأحد..

مرت الأيام وصادف صارلي بحدود التلث شهور وشوية اشوفها بس احسها هواي.. كعدت الصبح متأخر .. كلت يمكن ماالحك عليها.. كمت بدلت وطلعت لمدرستها.. لكيتها واكفة بالباب وبنات قليلات واكفات يمها.. شعجب محد اكو.. بقيت بمكاني واباوعلها .. لافة اطراف شعرها بحيث صاير مثل الحلقات.. بوية ناوية تجنني هالبنية.. دقايق واندارت باوعتلي وضلت تتلفت واشوفها تتمشى بإتجاهي .. اويلي اطرافي جمدت.. شنو حلم علم.. چنت اريد منها نظرة ادور هسه تجيني..
وكفت جدامي وحچت بصوت ناصي وحدية : رجاءً انت ليش توكف تباوعلي دائما.. مااقبل ابد.. ابتعد عني اخاف تره وعندي خوان مااريد يشوفوني ويفتهموني غلط..
حامد : تعذريني يبت الناس.. رايدج بالحلال بس مااعرف اهلج يوافقون اذا اتقدملج هسه..
باوعت بصدمة : ماادري.. بس انت شكد جريء..
حامد : ههههه.. اني .. ليش يابة شمسوي..
- : يعني عادي عندك هيج تحچي..
حامد : شحاچي ابوية.. اريد اخطبج حرام لو غلط..
صفنت شوية وحچت.. : اعتقد تندل بيتنا.. اذا صدك تريدني بالحلال هياته ابوية اطلبني منه.. فأرجوك بعد لتوكف هنا..
ابتسمت على عصبيتها : حاضر..
عگدت حواجبها وراحت..
خليت ورحت للشغل.. احبها وگلبي يرجف عليها.. بس احتاج استشارة شخص اكبر مني.. اكدر ادبر روحي واعيشها بدون حاجة.. مااريد اخطي خطوة واتندم عليها..

خلص الدوام ورحت لبيت خالي.. ضيفني وكعدنا نحچي.. فتحت وياه الموضوع..
حامد : خالي اني اريد اخطب وحدة..
خليل : هاا صدك.. شكو بيها..
حامد : شنو رأيك.. اكدر ادبرلها عيشة ومصاريف واني اشتغل بمطعم..
خليل : والله خالو هو مبدئيا انت لمن حتخطبها ميصير تكعدها بشقة.. اني أب ولو اجه واحد خطب سرى بنتي وگال اكعدها بشقة بالسعدون مااقبل.. فلازم تأجر بيت..
حامد : نفرض أجرت .. بلكت ابوها ماانطاها.. شلون بهالحالة..
خليل : لعد اني شدااكلك.. شوفلك بيت مرتب ومثل النگول احجزه وروح اخطب.. اذا وافق خير على خير لتشيل هم اني اساعدك.. واذا ماقبل بحث آخر.. بس لازم تنطي خبر لأبوك..
حامد : اي اروحله لازم..هو فادني لمن ديدزلي مصرف.. مااصرفه فعندي خوش مبلغ هسه..
خليل : اي لعد خوش خالو.. محد ازوج وهو عنده.. اني جنت حتى مااشتغل.. وبعدين هاي شوفة عينك بنيت بيت وولدي كبار والحمدلله..
حامد : صحيح لاعاب حلگك..هو اني ردت شورك قبل لاسوي شي..
خليل : توكل حبيبي وهي اذا قسمتك تصيرلك.. شوكت ناوي تمشي بيها..
حامد : بعد فد يومين هيج.. خلي بالجمعة ..
خليل : خوش بس انطيني خبر علمود ادز ام احمد هي واختها تروحلها..
حامد : اي عاشت ايدك احسن هيج..

ضليت كاعد عنده ساعة وطلعت للشقة.. مرت تلث ايام .. باليوم الرابع كعدت الصبح وبنيتي اروح لأبوية.. بدلت وطلعت لمكان شغله.. لكيته هستوه دينزل من سيارته.. لابس قميص وبنطرون أنيق ومرتب.. تمشيت لعنده سلمت علي وطبينا كعدنا وره الدخل..
شامخ : ابشر بوية شعندك..
حامد : اريد ازوج..
باوعلي بصدمة وفرحة بنفس الوكت : اي ليش لا.. منهي..
حامد : وحدة شفتها يم مدرستها وعجبتني.. شوف خالة غادة اذا ماعدها شي تجي تمشيلي عليها.. لو ادز مرة خالي متكول لا..
شامخ : لا خالتك ماتقصر.. بس اگللها تجي ماعدها مانع.. بس وين صاير بيتهم..
حامد : بحي الجهاد.. بس يسألون على بيت ابو وائل يدلوكم..
شامخ : ان شاء الله.. عندك فلوس تكدر تجهز..
حامد : عندي اي.. بس اريد تشوفلي بيت للإيجار.. مااريد اكعدها بشقة..
شامخ : ميخالف اشوفلك.. يومين تلاثة ومرلي للمحل.. اذا مالگيتني انه راح أمر لخالك انطي خبر..
كمت وتشكرت منه.. شكد يحاول يتصرف ويايه بحنية بس بعدني ماطايقه.. السواه اكبر من ان يندرج ضمن قائمة السماح والتخويل بقبوله كأب من جديد..

مرن يومين وابوية اجاني للشغل كال اليوم تجي خالتك تمشيلك ع البنية.. الفرحة ملت گلبي.. يايابة هاي فرحة عمري اذا أخذتها.. لأن لمن اشوفها انسى هواي شغلات.. شحال لو صارت يمي واشبع شوف.. ضليت بالشغل لحدما خلص الدوام ورحت للشقة لفيت راسي ونمت .. كعدت الصبح متلهف على شوفتها.. بدلت وطلعت لمدرستها.. ضليت انتظرها تجي.. لحدما سمعت صوت ضحكتها وانداريت شفتها هي وبنات بكدها.. مااعرف ياصف هي ولا اعرف اسمها.. بس روحي تنسعد من تشوفها.. هذا دليل واضح لحبي الها.. باوعتلي وابتسمت من گلبها.. صديقاتها طبن للمدرسة واجتني تتلفت..
وكفت يمي وتحچي بنزاكة : شلونك..
حامد : بوياي.. شلوني.. غير الأميرة تسألني.. كلش زين..
ضحكت : ههههه.. البارحة اجت والدتك واختك..
حامد : اي وشگالوا اهلج..
- : يعني قبلوا مبدئيا.. بس يسألون عنكم وهاهيه..
حامد : يله خوش..
ابتسمت واندارت رادت تروح.. صحتها : تعاي لحظة..
باوعتلي : نعم..
حامد : شسمج يابة.. اجيت خطابة ومااعرف اسمج..
- : هههههه.. صدك.. عبالي تعرف.. سارة اسمي.. وانت..
حامد .. يبعد حامد وعشيرته..
ضلت تضحك وراحت تتمشى وگصيبتها تلعب وراها.. اويلي چنها تلعب بگلبي الرهيف مو على ظهرها.. تانيتها تدخل للمدرسة واني رحت لشغلي..

بمرور يومين التهيت بالشغل صار ضغط عليه.. واحد من عدنا بطل.. فصار الشغل ضعف .. وراها لگوا عامل و خف الحمل شوية.. ابو المال كال روح ارتاح.. طلعني من وكت.. مريت على محل ابوية لكيته بالمحل.. سألته على أهل سارة اذا وافقوا لو لا..
شامخ : اي وافقوا.. شوكت تريد تصير مشية الزلم..
حامد : باجر ماعندي شي ونروح العصر..
شامخ : خوش انه اجي وياك وخالك وولده وكاظم..
حامد : اي كلش زين هيج.. بس البيت بشر شصار علي.. لكيتلي..
شامخ : اي لگيتلك ململ ومرتب.. بس التأثيث شوف شكد تعوز علمود اچملك..
حامد : اشوف البيت اول واشتري.. اذا عوزت اخبرك.. بس وين صاير..
شامخ : بالبياع.. عندك شغل لو اخذك تشوفه..
حامد : لا ماعندي شي.. أمشينا..
طلعنا ورحنا للبياع.. شفت البيت صدك حلو يطلع ميتين متر.. بي كاونتر وسنك بس .. هم زين علمود مااجيب اني.. تشكرت منه وراح بدربه.. رجعت للشقة لميت هدومي وقفلتها.. انطيت المفتاح لأم خالد بعد مااكعد هنا.. چم يوم واتزوجها.. مصرف زايد هذا الايجار..

رحت لبيت خالي.. هو يكيف على جيتي بس مرته مشكلة.. واني همات مامطول ان شاء الله.. خبرته ع المشية ماعارض.. نمت وماادري شلون اجاني النوم واني باچر رايح امشي بحبيبتي وسري.. العصر بدلت هدوم مرتبة واجه ابوية هو وكاظم اخذنا ورحنا لبيتهم.. ضيفونا وماقصروا.. ابوها خيّر ومن أهل الله..
ابو سارة : اني انطيتها شفتكم ناس كفو ومامنكم الناقصة.. خصوصا الشيخ يكون والدك يعني متطلع منه العيبة.. بس عندي شرط وميأثر أظنه..
حامد : تأمر عمي..
ابو سارة : طبعا اني أب فأكيد اريد الحياة المستقرة لبنتي.. فلازم تهيأهلها هالشي.. سمعت بيك عايش ويا خالك..
حامد : اي عمي.. بس اني أجرت بيت بس محتاج موافقتك.. لأن طبعا اريد ابدي بحياة جديدة فتكون مبنية على اساس متين..
ابو سارة : هاااه.. لعد هاهيه ابني.. ماطول هشكل گبعها وأخذها..

..
هو كال هيج واني بودي اطير بس كاعد على نار..

ساعة بهالحدود وطلعنا منهم.. بعد بلشت اجمع فلوسي .. قسم منهم انطيتهن لمرة خالي راحت انطتهميا علمود النيشان والذهب وغيرها.. والقسم الباقي أثثت بي.. اشتريت غرفة وفراشات .. طباخ وبعد هواي شغلات.. بس نصهن بالأقساط اخذتهن.. كله علمود لا اطلب من ابوية.. اريد وحدي اسوي حياتي.. تعبت صار سنين.. مااريد هسه أكسر المنوال.. ولو هو دائما يسألني اذا محتاج واگله لا.. صارت الخطوبة ورحت لبيتهم لبستها الحلقة واباوعلها شلون خجلانة حتى ماباوعتلي.. بست خدها لمن شفت الكل مندار..
رفعت راسها وخزرتني : شنو هاي حامد..
حامد : شنو ياعيني.. حرام..
سارة : اي حرام..
حامد : هههههه.. يله عمي نعتذر.. يولي غير اريد تباعيلي..
ابتسمت بدون متحچي.. ماطولت نص ساعة وطلعت..
كمت أشوفها يم مدرستها على راحتي.. انتبهت على رجلها لابسة الحجل متنزعه.. بس لمن تدخل للمدرسة تنزله جوه الجاروبة..
بيوم كعدت الصبح حلمان بأمي.. اااخ يايمة جرحج مديطيب.. شسويله ويهدني.. تعبت ليش بس اني ديرافگني بكل وكت.. كمت بدلت ورحت للشغل.. لحد الثنعش ونص صارت الحلة مالتها وطلعت من المطعم رحت عليها.. شافتني واكف اجتني مبتسمة..
سارة : اشو واكف بالشمس.. تعال ليجاي انوب تسومر..
تمشيت ليغاد وكفت جوه شجرة وهي يمي.. باوعتلها وابتسمت : ميعجبج الأسمر يولي..
سارة : لا عيني مادام انت فيعجبني..
حامد : اويلي الحلو طالعله لسان..
ضحكت وتباوع بعيوني.. دخيل ربج شلون گلبي يتخبل ع النظرات هاي.. (احچي بگلبي) .. حاولت أوضحلها كل تعب بگلبي.. لأن هاي شريكتي حتصير وكل خطوات حياتي.. مااريد أضم عليها واني وحيد اريدها ويايه..
لزمت ايدي بنعومة ايدها تحاول تحتضنها : شبيك ضايج..
حامد : خلصتي امتحانات..
سارة : اي اليوم آخر واحد.. بس ماگتلي شبيك..

شديت على ايدها واخذتها تمشينا ع الشارع..
حامد : سارة اريد احچيلج شنو بگلبي..
سارة : اي اسمعك..
حامد : اني جنت ساكن ويا اختي الأجت بالمشية.. وحدنا.. لمدة سنة..
باوعتلي مصدومة.. رجعت اكمل : اي.. لأسباب هواي.. اولهن ابوية..
حچيتلها المنظر الشفته لمن جنت بعمر الثنعش سنة.. شلون هالموضوع ديجيني صار عشر سنين والله أعلم بعد چم سنة يبقى ويايه.. حاولت اختصر البگلبي بكلمات وافية كمعنى لأن الوقت ميسعفني.. كعدنا على مصطبة واخذت ايدها بستها : اريد تعرفين اني احبج.. هواي متتخيلين شكد .. لهالسبب حچيتلج.. لتفهميني غلط.. الغلط الصار لأبوية ميتكرر عندي..
سحبت ايدها بخوف : حامد شلون يعني مداافهم..
حامد : عيون حامد بس كعدي يولي لتروحين.. ماصدگت اشوفج.. لتخافين والأيام ثتبتلج صحة كلامي.. لوما احبج مااحچيلج.. أضم عليج بحجة ماردتج تروحين.. بس هسه فتحت گلبي وذكرياتي علمود نبني حياتنا بشكل صحيح..
باوعتلي واخذت نفس بحيرة : اني أثق بيك.. فصدگت.. اتمنى تكون كد الثقة..
حامد : كدها وعيونج الحلوات..
ابتسمتلي ونصت ع الجاروبة طلعت الحجل وعدلت كعدتها.. رجليها تلمع من البياض.. دخيلك يالله صبرني.. كمت وگدتها من ايدها وصلتها لبيتهم ورجعت للشغل..

هي خلصت امتحانات وبلشنا نجهز للعرس.. اخذتها للمحكمة عقدنا.. خالة غادة اجت ويايه وابوية وأهلها.. طشوا چكليت لمن كمل العقد.. اجت باست راسي..
الحجية غادة : مبروك يمة.. يوم اشوف ويلادك..
حامد : الله يسلمج حجية متقصرين..
ابتسمت وراحت وكفت يم ابوية.. تقربلي باركلي بعدين طلعنا..
أسعد أيام حياتي.. فرحان والدنيا ماسايعتني من الفرح.. ابو المطعم انطاني اجازة اسبوع.. كال روح اخذ راحتك عريس انت.. الولد بالمطعم صحباني اجو ويايه لمن رحت للحلاق.. العصر كملت وطلعت لبيتهم.. خواني وأهلي بشكل عام كلهم أجو.. الفرحة هاي عوضتني عن أيام الوحدة والسجن .. طلعتلي وأبوها سلمنياها..
عيونه دمعت هو ويحاچيني : ديربالك عليها.. تره گرة عيني هاي..
حامد : بروحي والله مو بس بعيوني..
ابتسم وطبطب على چتفي.. أخذتها وصعنا بالسيارة.. ابوية زفنا للبيت الأجرته.. هي كاعدة يمي وترجف.. دخيل ربها شكد بريئة.. لزمت ايدها وبستها.. تقربت منها همستلها : لتخافين يبعدي.. سكتت ماحچت شي.. وصلنا ونزلت خالة ويايه شوفتني الغراض وين حاطتهن والأكل وهالشغلات وطلعت.. رحت وراها سديت الباب وطبيت.. شو هاي اول ماوكفت جدامها بچت..
حامد : شبيج يابة ليش البچي..
سارة : مااريد بقى هنا.. وديني لأهلي..
استغفرالله.. هاي شدتحچي.. رحت كعدت بصفها ومسحت دموعها.. : ابوية لتخافين.. خليج على راحتج مااجبرج ابد..
رفعت راسها : بس امي كالت لازم كلشي يصير بأول يوم..
حامد : تعرفين شيصير..
سارة : لا..
حامد : لعد شكو خايفة باباتي.. تره اني حباب..
كامت رأسا جان تعثر من الخبصة.. لزمتها من ايدها وكفتها جدامي وأرتب خصلات گذلتها : روحي بدلي واخذي راحتج عمري..

حسيتها ارتاحت لكلامي.. نصت راسها وراحت للغرفة.. ضليت افتر بالبيت .. طلعت اكل اكلت .. ماردت اروحلها خطية مستحية وخايفة.. خليت ايدي على خدي صافن.. مااعرف شكد مر وكت بس حسيت ايد ناعم تخلت على چتفي.. درت وجهي شفتها واكفة ورايه لابسة دشداشة گصيفة وزنودها ورجليها طالعات ثلج.. بوية عقل ماضل براسي.. جريتها من ايدها گعدتها على رجلي.. تريد تكوم وأرد اجرها..
ردت أغير موضوع وأوخر الخجل : عبالي نمتي.. كلت أعوفها على راحتها..
سارة : ماكدرت أنام.. خفت وحدي..
حامد : ها يعني اجي..
سارة : عفية انت ليش هيج تحچي.. تخوفني بالزايد..
حامد : هههههه.. يايابة ..روحي هسه اجي..
كامت وراحت ع الثلاجة مدري شتاكل.. ثواني وطلعت صوت الحجل يدك بإذني.. شبيه متخبل ع البنية حاكلها بعد..

كمت سبحت وبدلت.. طبيت للغرفة لكيتها مگرفصة روحها ومتغطية.. تباوع لحركاتي ومشيتي أحس بيها بس مغلس.. طفيت الضوة رأسا عاطت : لاااا شغله..
حامد : ها ليش يولي.. متريدين تنامين..
سارة : لا اريد بس يعني..
سكتت واني هم غلست ع الضوة.. رحت تمددت يمها وروحي تريدها بس گلبي يرفض يأذيها ويسوي شي غصب عنها.. الغرفة هادئة وكلشي هادئ بس گلبي يدك سريع.. حسيت عليها أنفاسها ثگلت تقربت حاوطت چتفها ودرتها علي.. فزت وخلت ايدها على حلگها بخوف.. جريتها بهدوء لحضني..
حچت بهمس : حامد..
حامد : ياروح حامد.. مااسوي شي بس احضنج يابة..
سكتت بس صوت أنفاسها يرجف.. ضلت تحوص بحضني واني روحي لايبة عليها.. شلون حتجبرني اسوي شي مااريد اسوي.. آخر شي ماتحملت.. اني اجيبها بطريقتي.. بديت اقربها لصدري وأبوسها بهدوء حتى لتخاف مني.. خلص الليل هي بحضني وأشم بشعرها مامصدك .. استقراري وراحتي حتصير يمها .. بالبيت وبغرفتنا..
كعدت الصبح قبلها.. اباوعلها شلون هالگيمر نايم يمي.. رجلها اللابسة بيها الحجل طالعة من الغطى.. ضليت اباوعلها ومبتسم لحدما كعدت.. باوعتلي وضمت راسها..
حامد : زين دگولي صباح الخير..
ضحكت واندارتلي : صباح الخير..
حامد : صباح النور والخيرات وكلشي طعمه حلو بهالدنيا..
ابتسمت وتلفلف بروحها : تره يعني.. يعني اني استحي دير وجهك..
حامد : اي ادري..
سارة : لعد شكو تباوع..
حامد : فعل خارج السيطرة والله..
سارة : ههههه.. شلون تسولف حلوو..
بست خدها وجريت الدشداشة لبستها وكمت : حسبح ولمن اطلع تدخلين تسبحين..
صفنت : ليش اسبح..
حامد : بوية كلشي متعرفين.. اخليج تسبحين مرتين..
سارة : عفية شدتحچي..
حامد : هههههههه.. دگومي.. لازم ابوية.. هو ربج كال.. واني افهمج بعدين هسه مستعجل..
غمزلتها ورحت.. اسمعها تكول شلون اضل هنا واني استحي.. هذا شنو ميكول عيب.. اني ساكت والضحكة بگلبي.. طبيت سبحت وطلعت بدوا يجون اهلي وخالة غادة لافتنتي من بينهم كلهم.. چن ابنها مو ابن ضرتها.. هي سوت الأكل وهي كلشي سوت.. بقوا للعصر وطلعوا..

ضليت اسبوع بالبيت ماطالع للشغل.. صار شكد مگضيها بس شغل حتى بالسجن.. بس هالأسبوع اجاني هدية حتى ارتاح.. سارة اويلي سارة ملاكي هاي.. بريئة وتستحي.. حتى جدامي متمشي اول فترة.. بعدين عودتها عليه.. بدت تتقبلني وشوية خفت المستحاة.. وره هالأيام كعدت الصبح بدلت دااريد اطلع وسمعت صوتها نعسان..
سارة : حامد اصبر..
حامد : شنو عيوني..
سارة : حتروح للشغل..
حامد : اي گلبي.. تخافين تبقين وحيدج..
سارة : هو اريد اگلك.. اذا ضجت اروح لبيت أهلي يصير ..؟
حامد : يصير ليش لا..
سارة : ماشي لعد ارجع المغربية هيج.. لتطول حباب..
تقربت بستها وابهامي على خدها.. : تأمرين أمر.. تعاي سدي الباب..
طلعت وهي سدت الباب ورايه.. رحت للشغل والولد ماقصروا.. صار صالة مو مطعم.. مااشتغلت شي كالوا هاي هديتنا الك..
وائل : خوية اني ع الحديدة.. مااجيبلك هدية.. بس حشتغل بمكانك هاي بعد شتريد..
حامد : رحم الله والديك.. احس روحي بالجنة الصراحة..
وائل : هو صوچ اليشتغل بدالك..
حامد : ههههههه.. حبيبي الغالي متقصر..

مرت الأيام بهالشكل.. كل تعب اليوم ينتهي لمن اجي للبيت وسارة تفتحلي الباب تضحك وتشبگني.. دورات بالليل أفز حلمان بذاك الحلم.. هي تجيبلي ماي وتضل كاعدة يمي تقره على راسي لحدما اغفى ماادري بروحي.. اكعد الصبح الاگيها شابگتني چنها أمي..

بيوم رجعت للبيت متأخر شوية.. دگيت الباب ماطلعتلي.. مديت ايدي فتحت السرگي وطبيت .. لاسمعت صوتها لاشي.. خفت عليها.. طبيت للغرفة لكيتها متمددة وترجف.. الجو حار مو مال مستبردة.. رحت يمها لزمت گصتها.. جمر ..
حامد : سارة.. بابا تسمعيني كاعدة.. شبيج..
باوعتلي وتبچي : ماادري..
گومتها واخذتها للحمام غسلت وجهها ورجعت للغرفة.. جبت طاسة خليت ماي بارد ورحت للغرفة أدور على شي.. جبت الفانيلة مالتي شگيتها وكعدت يمها اسويلها كمادات لحدما راحت الرجفة .. كمت أغفي.. تچيت راسي ع التاج ومخلي ايدي على گصتها..
فزيت على ايدها توخر ايدي.. تقربت مني شبگتني ومحاوطة رگبتي بإديها الناعمة.. همست : شلون صرتي..
سارة : زينة.. ليش تأخرت عليه..
حامد : شسوي غير بالشغل..
سارة : غير شغلك.. ديتعبك حتى اني مااشوفك.. هاي عود احنا عرسان..
حامد : هي سهلة الگى غير شغل باباتي.. بس مع ذلك.. أدور واشوف..
تمددت ومقربها مني.. خايف لترجع تصخن.. الليل كله كلساع أفز اشوفها وارجع أنام .. هلكد متعلق بيها.. روحي يمها..

كعدت الصبح لگيتها متحسنة ومسويتلي ريوك.. كعدت يمي متاكل هي الصبح بس هيج ع الواهس.. اني اكل واتذكر حچيها مالت البارحة.. صدك عود احنا عرسان.. كلشي ماشفت منها بس بالليل وأجي تعبان.. الشغل أكلني.. لازم ادورلي على شغلة جديدة..
كملت وطلعت.. رحت للمطعم أخذت اجازة لمدة يومين.. اذا اريد اضمن مستقبلي لازم ادخل شراكة بمحل ويا واحد ثاني.. ضليت فترة أفكر بفكرة المحل شسويها.. الغذائية اكثر شي ناجح.. بعدين المطاعم وتندرج وراها غير احتياجات.. الى أن بيوم اني وبالشغل عندي استراحة الظهر.. اجاني العامل كال اكو شخص يريد يشوفك.. رحت اشوف منو.. لنه مهدي واكف ديدخن ومنتظرني.. رحت سلمت علي وبوسته.. عاش من شافك فترة طويلة ماشايفه.. جبناها ع الشغل فكلت خلافتح الموضوع وياه.. أهله متمكنين وأهل خير..
حامد : اريد احاچيك بسالفة.. وانت براحتك يعني..
مهدي : اي احچي..
حامد : شنو رأيك نفتح مشروع.. اني وياك يعني.. والشركة بالنص.. تكاليف ووارد وكلشي يمشي بإنصاف..
مهدي : خوش فكرة.. بس التطبيق صعب..
حامد : شلون..
مهدي : بلكت مانجح المشروع.. وتريد تشتري شراية لو تأجر.. علمود نعرف شنسوي..
حامد : لا يابة.. لمن تريد تفتح مشروع يرادلك موقع زين بمكان علي رجل.. مثلا هنا المنصور .. لو باب الشرجي.. هواي أماكن..
مهدي : والله كتلك اني همات تزوجت وابني بالطريق.. فأجيت اريد اشوفلي شغل وتذكرتك هيج عليك يالله اجيت وشفتك.. اذا ببالك هيج شي فاني وياك مو عليك.. بس ادرس السالفة زين.. شنو فكرة مشروع ببالك..
حامد : هي الغذائية ماشية دائما.. انطيني مجال اشوفلي فد مكان زين وانطيك خبر..
مهدي : يله ان شاء الله خير.. دليتك على بيتي.. اذا مااجيت هنا تعال انت عود .. هلا بيك بكل وكت..
حامد : حبيبي متقصر..

طلعت وياه ودعته ورجعت.. ماحچيت لأحد ع الشغلة هاي.. خلأثبت اساسي اول بعدين احچي بيها.. سددت اقساط الأثاث هسه ماعندي دين مرتاح.. كمت لمن اطلع للشغل اخذلي فرة ع المحلات اشوف الأسعار وغيرها علمود لا انغبن..
وراها بفترة اسبوعين مارحت للشغل.. طلعت للكرادة شفت محل ركن فارغ.. چبير وينفع ينفتح مشروع.. سألت ابو المحل البصفه عنه.. كال العصر يتواجد.. رجعت للبيت والعصر اجيت حاچيته .. طرحتله فكرتلي للمحل.. كال خوش فكرة وناجحة.. بس الإيجار غالي..
حامد : عمي اذا ردت افتح المشروع مااكدر ابلش بهيج مبلغ غالي..
- : وليدي.. تدفع هالشهر مبلغ أقل ميخالف.. المحل اذا اشتغل ومشت أمورك عدلة تزيدلي الإيجار واعتبره محلك.. مااشيلك منه..
حامد : اي هيج بيها مجال.. يومين واردلك جواب..
- : على راحتك عيني..
ترخصت منه ورحت لمهدي.. رغبته بالفكرة واقتنع.. انطاني كلمة أكيدة.. مشت الأمور عدلة وأجرته.. نص مني ونص من مهدي.. وراها بلشت اجيبله بضاعة .. اداينت من خالي كال شوكت يصير عندك سددني.. مهدي صارت ايده ويايه.. اخذنا رخصة من وزارة الصحة .. يوم اني من الصبح لليل ويوم مهدي.. بس ثنينا نفتح سوه.. وائل صاحبي بالمطعم ترك الشغل واجه يشتغل ويايه.. بس مو شراكة.. عامل مثل منكول.. اول فترة تعبت تعب موطبيعي .. اكثر الشغل اني شايله واتعب ع التصفيط والأسعار لازم احفظهن.. يعني هواي أمور لحدما استعدل الحال وبدينا نشتغل بالنظيف.. هالفترة اني ارجع تعبان رأسا انام.. اريد اشوف سارة واشوفها خاف محتاجة شي.. بس هي صابرة لأن شافت بيها راحة الي اكثر..

لحدما رجعت للبيت بالليل.. لگيتها مسويتلي اكل مرتب وهي همات شحلاتها طالعة .. فاكة الشعر وتتمشى جدامي صوت الحجل ذوبني.. كعدت يمي ولزمت ايدي..
سارة : ااا... حامد.. عندي الك خبر..
حامد : خير يارب..
سارة : ماادري شلون اگلك..
حامد : شكو يولي.. خوفتيني..
سارة : لا لتخاف.. بالعكس افرح..
حامد : هسه غير تحچي..
سارة : هو.. اني حامل..
رفعت راسها بإصبعي : صحيح والله.. شلون عرفتي..
سارة : سألت امي وكالتلي حامل.. لأن صار فترة متأخرة.. فعرفت.. شو مااحسك فرحان..
شبگتها وبستها : لا يابة والله فرحان.. لعد هو غير من سري.. احطه بروحي.. ولد بنية ميهم.. المهم منج..
سارة : ههههه.. اهو هسه لتخجلني..
حامد : واني اكول ليش هالأكل والهدوم والشعر المفكوك..
سارة : اي شمدريني.. غير اريد اسويلك اجواء..
حامد : يابوية والله انتي كلچ اجواء.. دتعاي وين رايدة.. متروحين اليوم..
أخذتها من ايدها ورحنا للغرفة.. حتى مااكلت.. نمت حاضنها وميت فرح.. شلون اني اصير أب ويجي يتلگاني..

مرت الأيام هادئة.. ابوية درى والكل.. اجاني هو وخالة غادة باركولي وراحوا.. سناء همات چانت وياهم.. سارة كل همي واهتماماتي .. حاير بيها.. هي اصلا متروسة وبيها سمن شوية .. ادور هسه حامل وتاكل هواي.. اشكال تتشهى واجيبلها.. لميت ايدي والربح خير من الله ع المحل هذا.. فتتدلل سري..

فديوم رجعت من التفتحية الصبح نعسان وراسي يوجعني.. شفتها نايمة تمددت ونمت.. ماكو توني غفيت والنوم مر عيوني كعدتني..
سارة : حامد.. حامد اكعد حباب عيوني..
انداريتلها وخازرها.. الا هاي النومة اتخبل اذا واحد گعدني منها : كولي شبيج..
سارة : اشتهيت ككو..
حامد : بس انام يمعودة.. من اكعد اجيبلج..
غمضت داانام وفززتني شفايفها تبوس زندي..
ضحكت : هذا ككو.. شبيك الواحد ميتشاقه والله حلوة.. تره انت صاير اسمر للعلم..
حامد : يابة غير بالشمس..
تقربت شبگتني وشعرها على صدري ولحيتي يطيره الهوى مفتوح الشباچ..
سارة : خوما تضوج من اكعدك اريد اكل.. تره شسوي يعني هو يصير طعمه بحلگي واخاف يطلع بالطفل..
حامد : دخيل ربج شكد دلوعة.. لا عيني هو اني اكدر احچي واكول اي..
سارة : ها شقصدك.. مامقبول هالكلام..
حامد : هههههه.. يبعد حامد وديرته..

مرت فترة واجه الشتا.. جبت زوليات ثنين .. غاليات نار هاي بإعتبار زنگين اني.. وحدة للغرفة واللخ للإستقبال.. الباقي فرشته كومبار.. هي مابيها حيل وبطنها لخشمها فاني فرشت.. جبتلها هدوم جدد وكلشي جديد.. فضلتها على روحي وراحتي بس اشوفها مرتاحة ويايه تسوى عندي الدنيا.. خالة كالت هي تسوي جهاز للطفل.. مندري ولد بنية ومنتظرين تصير ولادتها..

بسنة السبعين دخلناها.. بالشهر الثاني واكف بره بباب المحل المغرب وضام إديه بالقمصلة.. اجه طفل يركض يطلع عمره عشر سنين..
- : عمو عموو.. انت عمو حامد..
حامد : اي حبيبي منو انت..
- : جوارينكم بيت ابو كريم.. ماما كالت گله مرتك جابت..
حامد : شنووو.. عمو متأكد..
- : اي والله متأكد مدااچذب..
راح يركض.. طبيت للمحل خليت وائل وره الدخل ورحت للبياع.. سويت الطريق خمس دقايق.. ماادري بروحي دااركض لو امشي.. بس بعدها بالشهر السابع.. وصلت للبيت شفت النسوان دتفوت للبيت وزلمهن واكفين بره.. رحت سلمت وطبيت.. لكيتها بالغرفة وهاي القابلة يمها..
سألتها : شصار حجية..
- : سبيعي الوليد خالة.. عادي ميخالف..
حامد : ولد..
- : اي بالمبارك يمة.. يتربى بعزكم..
انداريت ع الجهة اللخ لافي ببطانية صوف وصوته يبچي كلش عالي.. مقهور علي وفرحان بنفس الوكت.. اجت القابلة وخرت الغطى عنه وشفته.. ماادري ليش الدمعة صارت بطرف عيني.. اويلي ابني هذا.. اخلي بعيوني مااخلي يحتاج شي..

اجت غطته وطلعن كلهن.. تمشيت لسارة بستها وارجع شعرها مخربط.. : الحمدلله على سلامتج يبعد روحي انتي..
لزمت ايدي وابتسمت بتعب.. : جنت تركض..
حامد : ماادري بروحي والله.. لديرين بال.. ارتاحي..
خليتها ويا النسوان وطلعت.. وصني على چم شغلة جبتها ورحت.. وائل تلگاني..
وائل : هاي وينك يمعود.. خير خوماكو شي..
حامد : سلامتك يابة.. اجاني ولد..
شبگني وباركلي.. طش الخبر والكل عرف.. اجت خالة غادة وخالي وسناء.. اهل سارة وامها دوم يمها.. الولد بعدني ماسميته.. ماادري شيسون هذني ويخلنه بهاي البطانية لشهرين ويصير طبيعي.. مرن الشهرين بطلاع الروح.. سري تعبت وخايفة يروح منها.. ولو امها طمنتها يصير زين .. بس گلب والدة بعد..
وره هالشهرين صار ينلزم وسمن.. من صغره منشنش مو ضعيف.. اجيت من الشغل لكيت سارة شايلته وتتمشى بي.. محد بالبيت كلهن راحن.. رحت كعدت ع القنفة وتعبان بس اريد انام .. اجت وكفت جدامي..
سارة : شنو متريد تشيله.. تره صار حلو..
حامد : والله اخاف..
ضحكت وكعدت يمي.. خلته بحضني وتباوعلي .. : يشبهك كلش..
حامد : اي والله صح.. حتى حنطاوي مو ابيض..
سارة : يله بعد احلى.. شنسمي..
حامد : رائد..
سارة : هاي ليش.. عبالي محمد..
حامد : لا.. هاي قبل لمن طلعت من بيت ابوية كتلهم اسمي رائد وعجبني..
ابتسمت وباست خدي.. : الله يخليلنياك

ثاني يوم الصبح اخذتها واخذته ورحنا للمستشفى سويتله شهادة ولادة وسجلت اسمه رائد .. بالمحل معاميلي يصيحولي ابو رائد بعد قليل يگلولي حامد.. كل يوم ارجع للبيت اشوفه واتخيله شلون يكبر وشيصير بالمستقبل..

محيي .....
اليوم الافراج مال حامد.. ابوي چنه ديزف ابنه مو ينتظره يطلع من السجن.. رحنا لهناك واجه القاضي جابوا حامد.. لحيته طويلة وعيونه مطعنة.. انكسر گلبي علي.. ماتخيلته هيج.. ابوي عاينله وده يروح يشبگه بس متاني على أعصابه..طلع وراها رجعنا للبصرة.. الفرق بين ملامح ابوي بذيچ الجية وكل جياته وهاي الجية يختلف من السما للگع.. صحيح أذاه لمن ماقبل يرجع بس يكفي طلع ويشتم الهوى.. انه على راحة ابوي ارتاحيت.. چنت احس روحي مضنوك..

مشت الأيام طبيعية.. دوام وشغل ..كاظم مرته صارت حامل.. بوية شكد عجوزية.. ماعجبتني.. الچنة شني شغلها.. غير تشيل البيت وي أهله.. هاي ماكو شهر وحبلت كامت تتدلل.. كاظم فقير ويسكت.. الكل فرح بي هذا اول حفيد حيصير للعائلة.. ماندري ولد يابنية.. بس المهم يجي بخير.. انه اشوف كاظم ساكت واسكت.. شعلي.. ابوي دورات يحچي.. بس هي وكحة.. عودك انه تصير عدي هيج مرة.. غير اكسر راسها.. اتخبل منهن.. مشت فترة وراها خلصت امتحانات رجعت انه وقاسم ولواء .. بالباب شفت جماعة واكفين كلت اكيد طلابة.. طبگت السيارة بالگراج الوراني ونزلت دخلت من باب المضيف.. سلمت وواكف اسمع شكو..
- : شيخنا احنا مانكسر بكلمتك..
شامخ : بوية صحيح چلمتي.. بس البت بعدهي صغيرونة وانه ولدي بطولي حتى جد راح اصير.. شيمتي ماتسمحلي اخذها..
- : چا شني شيخ.. بنيتي وحيدة لا أخ لا أخت.. وابوها منطيك عمره.. هاي خو جدامك لوما الله وفضلك چا ماتت..
شامخ : أخذنها مااگولن لا.. تصير من أهل بيتي.. بس وليدي يعقد عليها مو انه..
- : هي الك شيخنا.. انت شتفصل نلبس..
شامخ : هاهيه.. ردي لدارچ وانه چم يوم واجيب الشيخ يعقدلهم..
اجت بس تبوس ايده.. ماقبل يتسودن من هالشغلة.. شواي وطلعت گايدة بيدها بنية.. انداريت لأبوي..
محيي : شني هاي بوية..
شامخ : هاي البت گبل 14 سنة عمتي تخربطت وأخذتها للمستوصف.. شفتها هناك صغيرونة وأمها ماعدها فلوس تنيمها مستشفى.. كمت انطيتها فلوس وأخذت البت لطبيب زين هو طيبها وصارت زينة.. هاي بعد صارت بإعتبار الي.. حتى انه سميتها.. ابوها متوفي صارله چم سنة هسه جابتها تريد ازوجها.. شبيه مسودن اخذ وحدة هالصغرها..
محيي : هيجي الحچي.. چا شحتسوي..
شامخ : انت تعقد عليها..
محيي : انه.. لا ابد.. شني شبيه اعقد على وحدة اصغر من اختي..
شامخ : تعقد عليها وبلاية لغوة زايدة..
محيي : لا مااعقد.. خلي قاسم لو لواء.. انه شكو بوية ارجوك مايصير..
شامخ : يبوي شمالك.. البت صغيرونة وتخدمك.. انت همات شاب وعندك احتياجاتك .. لشوكت تضل عزابي..
محيي : اي وإن بوية.. اريد حياتي تنبني بأساس صحيح.. مو بهالشكل المهمش..
شامخ : بوية.. شوف البت.. بلچن تعجبك.. شكو بيها.. عودك لمن تشوفلك غير وحدة اخطبلكياها مااگولن لا..
محيي : اخذها.. بس مااتگربلها..
شامخ : شمالك انت لاتسودني.. البت حتصير الك.. انه شدخلني بوية.. على راحتك بس المهم تاخذها.. انت اكثر واحد گريب لشغلي وكعداتي.. تعرف شيصير لو تنكسر چلمتي..
عاينتله وكامش أعصابي گوة.. يعرف منين يجيني ويسكتني بذكاءه : صحيح.. اخذها هاهيه .. شوكت تريدني جاهز.. بس مااريد هوسة.. مجرد عقد..
شامخ : التريده يجرالك..

خليت وطلعت.. بوية شني هاي وحدة حتتعلك برگبتي.. مالي نفس بالنسوان.. عاد ياريتها مرة صغيرة فدمرة.. صعدت فوك بدلت ونمت حتى مااكلت.. كعدت العصر امي يم راسي..
الحجية غادة : شو اجيت گبل صعدت فوك.. ماكلت أسلم على أمي..
محيي : يمة الحچي مال ابوي ضوجني..
الحجية غادة : ادري حچالي.. يوم شوفها وعاشرها شكو بيها.. البت يتيمة علمها عليك انت..
محيي : ان شاء الله.. بس شفتيها شصغرها..
الحجية غادة : تكبر خوما تبقى صغيرة.. هسه گوم صبيتلك اكل..
كمت غسلت وجهي ونزلت تغديت.. ثاني يوم اشتريت غرفة جديدة وأمي جابتلها هدوم ماادري شجابت بس انطيتها فلوس.. باليوم الوراه اخذنا الشيخ ورحنالهم.. لمن شفت حال بيتهم كلت اذا تجي يمي حتعتبر بيتنا الجنة.. كلش قديم ومكركب حيل.. عقدت عليها بعدني ماشايف شكلها ولا اعرف اسمها.. بس لخاطر ابوي.. كعدت بالهول وابوي طلع وي الشيخ يوصله برة.. اجت أمها قدمتلي شربت..
- : خالة تعذرنا مو گد المقام..
محيي : لا ماقصرتوا الحمدلله..
راحت وره شواي اجه ابوي وبجيته طلعتها أمها.. لابسة هدوم بسيطة فوكاهن عباية.. منصية راسها وتفرك بإديها.. اجت كعدت يمي وتهز برجلها متوترة.. رفعت راسها عاينتلي .. حلوة مايعيبها شي.. بيضة بشكل متواضع ..يعني بنية عادية.. بس جسمها انوثي.. مبينة عشرينية مو 14 سنة.. ضليت كاعد ربع ساعة بهالحدود بعدين اخذتها وطلعنا.. لمن وصلنا البيت ضلت واكفة بالباب..
عاينتلها ورافع حاجبي بقلة صبر : فوتي شني تحتاجين عزيمة..
- : أمي ماتجي ويانا..
محيي : لا.. يله دخلي تره مااحب التنعوص..
ماحچت شي.. فاتت وانه فتت وراها.. سلمت ع الكل واستقبلوها.. اجت أمي كالت اخذها وروح فوك.. ندهتها وصعدنا فوك.. ضلت تتفرج ع الغرفة بس ماتحركت.. بوية شگد ثگيلة بحركاتها حتى بحچيها..

عفتها ورحت ع الكنتور نزعت القميص..
شهگت : عزه شون تنزع گدامي..
محيي : چا وين بوية.. هاي غرفتي وانتي جايتني..
- : اسفة..
انداريت عليها وألبس بالتشيرت : شسمج انتي.. نسيت أسألج..
- : هدى..
محيي : زين.. وانه تعرفين اسمي..
هدى : اي كالتلي أمي..
محيي : يله خوش خاطر لانتفشل جدام الوادم.. تعاي بدلي وأخذي راحتج.. حطلع للشغل انه..

عفتها ونزلت.. أمي شافتني ماحچت شي.. كتلهم مااخذها وإن اخذتها فمو هسه.. طلعت لأبوي شفته ديحسب راتب العمال.. تانيته يكمل واخذته انه وكاظم سلمناه للعمال.. ادور طلعنا تمشينا ليغاد وتعشينا بره.. هو رجع گبل أذان العشه.. انه ضليت كاعد بالگهوة وافكر بهاي هدى.. مبينة فقيرة يعني ماتحچي شي على جياتي المتأخرة وغيرها.. بقيت لليل يله رجعت.. لكيتهم نايمين بس امي وابوي كاعدين.. لمن شافوني رجعت طبوا.. خليت وصعدت فوك.. لكيتها كاعدة بالركن ومگرفصة روحها.. سديت الباب وقفلتها..
محيي : شبيج كاعدة هناك.. تعاي بابا..
هدى : وين اروح..
محيي : نامي ع الچرباية.. ليش منايمة ليهسه..
سكتت وكامت تمددت بس چنها نايمة على جمر.. تحوص هواي.. انه لمن اريد انام لازم صنطة والضوة مطفي.. هاي سودنتني.. صحت بيها : كافي عاد لاتتحركين ضوجتيني..
هدى : مو...
محيي : لا مو ولا نعل.. نامي فضيني..
خنست بعد ماتحركت.. دقايق وغفيت..
مرت الأيام ماجايسها.. اجي الكاها نايمة.. بس تتصخرلي خاتونة.. انه مو كرهًا بيها اعيط واحچي .. لا مااكرهها بس خلگي گصير مااطول بال..

وره شهر رجعت الظهر من الشغل هلكان من التعب والجو حار يسمط.. ابوي جايين علي ناس رايدينه بشغلة حتى مارحت كعدت.. فالكل ملتهي يسوون غدة وماادري شني.. كعدت ع الكرسي بالهول اجتني هي كامشة گلاص ماي بيدها..
هدى : الله يساعدك..
اخذته منها.. تفاجئت من حركتها نزلت تنزعني الحذاء .. جريت رجلي منها وگومتها من چتافها : لاتسوين هيج ماارضا..
هدى : مو.. مو انه اشوف أمي هيج چانت تسوي لأبوي..
محيي : هذاك ابوج.. وهذا انه.. يعني نختلف..
نصت راسها واخذت الگلاص : اسفة مااعيدها..
محيي : اي عفية حبابة.. صبيلي اكل..
هدى : حاضر..
راحت وره شوي اجت جايبتلي صينية.. ادور عدها عادة ماتاكل وياي الا اخلص.. كل مرة اعيد نفس الحچي : تعاي اكلي لاتضلين واكفة..
هدى : لا مايصير.. كمل يله اكل..
محيي : لج شكد تعاندين.. تعاي اكلي لاتضوجيني..
اجت كعدت تاكل بس تستحي.. فقيرة وأمية وفطيرة على نياتها.. شون ربك ينطي للواحد شخص عكسه بكلشي.. انه فطن ولوتي ودارس.. عكسها.. بين ما خلصت اكل وطبيت سبحت.. الحمام بسد غرفتي.. طبيت شفتها واكفة يم الكنتور.. عاينتلي وغمضت عيونها..
هدى : اسفة اسفة.. ماادري بيك..
محيي : هههههههه.. انه همات ماادري بيج..
راحت ركض نزلت جوه.. رحت بدلت ونمت..

وراها بفترة گصيرة جابت مرة كاظم ولد وسمونه عقيل.. اجت امها يمها وخواتها ثنين.. ارجع من الشغل اشوف هدى واكفة بباب الغرفة تتفرج ع الطفل.. تستحي تكعد وياهم.. اطباعها من كد ما فطارية تضوج.. ماادري انه مااحمل فأضوج.. بس تحب أمي.. دائما تكعد يمها وعلاقتهم طيبة..

ابوي فاجئني لمن كال باچر زواجة حامد.. انه ماكلت لا.. رحت وياه وكلنا رحنا.. بس هدى وام عقيل بقن بالبيت وفيصل.. شفت حامد ثاني بيوم زواجته.. منسم وفرحان حتى شكله متفح.. فرحتله لأن يبقى اخوي.. زفيناهم ورجعنا للبصرة.. انه نزلت اولهم أمي اخذها ابوي للطبيبة.. بباب الكليدور واسمع مرة كاظم تلعلع..
ام عقيل : شني انتي عفية ليش هلكد فاهية..
هدى : ليش خالة..
ام عقيل : وجع لاتكليلي خالة ادور تريد تكبرني.. عيني تره بعدني شابة..
هدى : چا شگلج..
ام عقيل : صيحيلي بإسمي.. جنة .. يله هسه كومي لملمي البيت ومسحي مابيه حيل انه.. عقيل بعده صغيروني مااكدر اعوفنه..
هدى : ساعديني انتي بس نيمي وتعاي وياي..
صاحت : لج انتي حيوانة ماتفتهمين.. دااگلج مابيه حيل..
هي كالتلها هيج وفتحت الباب رگعتها بالحايط.. كمزت من مكانها تعدل بالشال..
جنة : ها خوية جيتوا..
رحت يم هدى كمشتها من معصم ايدها حطيتها وراي : تره سمعتج شتكليلها.. اذا انعاد هالحچي مرة اللخ تشوفين غير شي..
جنة : ليش عيني شحچيت..
محيي : تغلطين على مرتي چي صغيرة.. اشو ماتشتغل يله ارد اشوف ياهو يحچي..
جنة : چا انه اشتغل وحدي..
محيي : مثل ما تكربين عليها تكربين على روحج.. يجي كاظم ويصير الحچي..
انداريتلها وخزرتها : صعدي فوك يله..
عيونها غورگت وراحت فوك.. فات كاظم مستغرب.. حچيتله عليها.. : لاتشوفني ماحاچي بيها يعني مااعتبرها مرتي.. فلزمها حدودها..
كاظم : يصير خير.. حگك علي بوية ميخالف سوالف نسوان هاي..
محيي : شفتني فديوم ادخلت.. لا ماادخل لأن تصير بظهري.. بس لمن صارت جدامي يختلف الحچي..
كاظم : هاهيه غلطة وصارت..

هو فشل من مرته وهي مافشلت.. شني من عين گوية.. لو مرتي انعنعها.. عفتهم وصعدت فوك لكيتها تبچي.. كعدت ع الچرباية وصحتلها.. اجت وكفت جدامي وتمسح دموعها..
محيي : ليش تبچين.. شوكت تكبرين ويطلع لسانج..
هدى : اخااااف.. اخاف احچي.. وامي تكلي تحملي لاتحجين..
محيي : لج شخبصتيني بأمج.. انتي ببيت رجلج هسه.. تعرفين شني يعني..
هدى : لا..
عيوني صارت بگصتي.. عطت بيها : شني.. ماتعرفين..
هدى : لالا اعرف ومااعرف..
محيي : دخيلك يالله.. بابا افهمج.. يعني تسمعين كلامي مو كلام أمج.. انتي هنا بوصايتي وحكمي.. يعني شگلج تسوين بنتي.. لمن اگلج احجي ودافعي عن نفسج تحچين مفهوم..
هدى : مو انه مااحبن المشاكل فأسكت.. مااكدر احچي متعودة..
محيي : خوش.. چا تحملي شيصيرلج..
رجعت تبچي وتشهك.. سحبتها من ايدها خليتها بحضني وإديه محاوطة چتافها.. ماادري منين اجاني هالخلك وتحملت صوت بچي..
رفعت راسها وعاينتلي بخوف : اگلك شي بس حباب لاتسوي شي فدوة..
محيي : اسمعنج..
هدى : وعد ماتحچي..
محيي : وعد بس انطقي..
هدى : هاي طگتني.. راشدي.. چي ماجبت الجودلية..
محيي : شنييي.. جنة القندرة..
كامت مني خلت ايدها على حلگي ودموعها تصب : لاتحچي حباب.. وعدتني ماتكول..
وخرت ايدها وكامشها قوي : صدك تحچين.. هسه اذا هجمت البيت على راسها أحد يكلي ليش..
هدى : كافي فدوة راحت وانه كتلها لاتحاجيني بعد واكول لمحيي..
محيي : لا كلفتي روحج بوية.. هاي لخاطرج حسكت.. بس بعد يا تنزلين تكرصين يم أمي يا تبقين بالغرفة ماتطلعين لو يحترك البيت..
هدى : حاضر ميخالف..

ضليت كاعد هي راحت طلعتلي هدوم وكمت سبحت بس نار واجة بيه.. هاي شون تعيش وهيج يسوولها.. لازم اشوفلها حل.. شكد اتخبل من واحد شخصيته ضعيفة.. خصوصا البت.. مايصير.. مرت الأيام طبيعية.. بس اهجس رويحتي صارت تنجذبلها.. اذا مااشوفنها بالغرفة احس بيها نقص.. الأكل اخذه من ايدها بس.. هدومي والترتيب كله مثل مااريد.. هي ساكتة ماتحچي شي حتى لمن اصيح تسكت.. من بعد سالفة مرة كاظم كمت اخليها يم أمي يله اطلع لبغداد.. لمن ارجع تبقى يمي مااخليها يمهم.. هي أصغر وحدة بالبيت فأستخطيها.. نظراتها من تعاينلي عيونها تلمع .. تجيني ركض بس اصيح بإسمها.. مراهقة هاي لو طفلة شگول عليها.. بالحالتين اذا تحبني فحبتني لإحتوائي الها..
مرة رجعت من وكت من الشغل.. تعشينا وبالليل اخذتها وصعدنا فوك.. عفتها على راحتها خاف تبدل شي ودرت وجهي ع الفانوس أنصي ناره.. نزعت البلوز أحتر لمن انام.. فجأة وطفت النار.. اعلكها احاول ماكو.. الغرفة ظلمة وصنطة.. ندهتها : هدى تعاي..
ماحسيت غير بإيد انوثية ترفة تحطت على رگبتي.. همست يمي : اخاف كلش ظلمة.. مايشتغل..
محيي : لا ماادري شبي..
كمشت إديها جبتها بحضني.. حاوطتها چني متلهف عليها.. تمددت وهي يمي ماتحركت.. ولو ظلمة بس حسيتها لابسة دشداشة گصيفة.. المفضوح اكثر من المستور.. بس كمشت روحي ماتدنيتلها.. هي كل شوي تريد تگوم ومچلب بيها.. لحدما غفيت.. كعدت الصبح الضوة طاب للغرفة.. عاينتلها شون كامشة فانيلتي چنها طفلة.. كمت على كيفي غطيتها وواكف يمها اتفرج على شعرها.. تمري .. لاهو اشگر ولا جوزي.. فركت وجهي وطلعت..

وره يومين كاعد بالاستقبال يمي اوراق واقلام دااكتب چم شغلة.. اسمع حس هدى بره تسولف وتضحك.. هسه انه شني موضوعي.. تاليتي وين.. البت وياي وياي خوما اطلگها.. بهاللحظات فات قاسم و رد الباب وراه.. كعد يمي..
قاسم : هواي تصفن ابو الشباب..
محيي : داافكر بهدى.. شسويلها..
قاسم : تحبها انت..
محيي : لا شحبها..بس هي خاتونة وحبابة..
قاسم : البشر ينحب بالعشرة.. هسه انت مشغول بالدراسة والشغل مامنتبه عليها.. لمن ترتاح وتتقرب لتفكيرها وروحها حتحبها..
محيي : هو الحچي سهل بس تعال طبق كفعل..
عاينلي بصدمة وچنه فهم كلامي : شني.. ماماخذها..
محيي : لا.. هاي جدام عينك شون ملتهي حتى ماالحك أنام..
قاسم : والله ماادري خوي.. براحتك انت شتشوف سوي..بس لاتورطها وياك اذا ماتريدها.. حرامات تنكسر..
محيي : لا شون قابل استغلها.. هم خطية..
قاسم : اي عفية..

وراها بفترة اسبوع گربت امتحاناتي.. ماارجع لحدما اخلص.. كعدت جوه وي ابوي عنده طلابة.. لهناك چان يجاوزون علي.. فوك ما يمهم الغلط اجاوزوا على ابوي.. اعصابي فورت چنهم حچوها الي مو اله.. كمشته من خوانيگه
محيي : والله انتم گواوي... مايصير براسكم خير..
ضربته بوكس جطلته بالكع شبعته كتل.. گومني قاسم ولواء يله فكيت عنه.. هم شافوني تسودنت عليهم اعتذروا.. بس ابوي نزل اسمهم من العشيرة.. طلعوا منصين روسهم حالهم حال المسوي مكسورة ماينغفرلها..
شامخ : انت ماتبطل عركات.. سودنتني..
محيي : چا اعوفنه يغلط عليك.. اصلا چا خليت طلقة براسه بس حريمة يموت بمضيفنا وينجسه..
قاسم : والله يستاهلون بعد اكثر اصلا..
شامخ : استلم.. روحوا مو وراكم دوام شني انتم بوياي چتلتوني..

خليت وطلعت.. تعشيت وصعدت فوك.. اول مافتحت الباب صارت هدى بوجهي وعيونها حمر دم.. بچت رأسا وشبگتني حيل.. دخلت وسديت الباب.. رفعت راسها ومسحت دموعها : يالله.. شبيج بوية ليش البچي..
هدى : خوما تأذيت..
محيي : ليش شبيه..
هدى : عمة كلتلي تعارك وي الزلم بالديوان..
محيي : اي عادي هواي اتعارك.. مابيه شي..
ابتعدت عني وراحت تمشط شعرها.. خليتها وكمت تمددت.. ضليت اعاينلها شون تمشي المشط بهدوء على شعرها.. مادة رجليها من الطبلة بيضات ومدبدبات.. صوتها هي وتحاچيني بنعومة وانوثة.. اچذب اذا كلت مارغبتها.. حسيتها انحرجت من نظراتي.. كامت ع الصوبة وتحچي : خلصت نفط.. شون..
محيي : عوفيها.. تعاي هنا..
جمدت بمكانها واندارتلي خايفة : وين..
محيي : هنا ع الچرباية..
اجت يمي ومنصية عيونها ماتعاينلي.. جريتها من ايدها مددتها بسدي..ردتها تتعود على هالقرب المامعتاد بيناتنا.. حاچيتها بهدوء بدون عصبية.. مااعرف احاچي النسوان.. رأسا اعيط.. بس هسه لا يتطلب الموضوع.. صرت فوگاها ومديت ايدي نصيت ضوة الفانوس..
هدى : لا فدوه لاتطفي..
هي كالت هيج وانه طفيته بالعناد.. تقربت وأبوسها چني محروم منها.. ذابت بيدي مالها حس بس كامشتني بخوف.. انتهى كلشي چان تبچي..
محيي : شبيج عيوني.. ليش البچي..
هدى : انت تريدني.. تحبني..
استغربت من سؤالها.. منيلها هالجرأة : ليش مااحبج بوية..
هدى : اي ماتحبني.. انت تستخطيني..
محيي : وجع شني هالحچي..
هدى : سمعتك تحاچي قاسم تگله مااحبها بس هي حبابة.. انه مفروضة عليك انت ماتريدني..
ابتعدت عنها وكمت لبست.. صح اعتبرها هيج بس مااريدها تسمع وتنجرح.. ضليت اتمشى بالغرفة ساكت مااحچي شي.. هي بس تبچي.. اجيت كعدت يمها رادت تكوم وكمشتها..
محيي : صبرج علي يبت الحلال.. انطيني مجال اشوفج واتگرب لروحج اكثر.. صدكيني كامش روحي عنج لخاطرج.. بس هلمرة صرت أناني.. انه عصبي وطبعي صعب ماارضا بشي بالعجل.. انتي صرتي شريكتي.. بعد كلشي يصير هنا مايطلع باب الغرفة..
هدى : يعني ماتتخلى عني..
محيي : لا مااتخلى.. شني ناقصج شي واعوفنج..
كمت بستها من خدها وراسها واجيت تمددت .. شبگتها واطمنها مااعوفها

يتبــــــــــــــــــــع..............