رواية اسألي عني الليالي الفصل الخامس 5 - بقلم رقية جاسم

". هلي والمضموم چنه گزاز ..
والرّوح صفت بدون عزاز ..
هلي وحيد بلاية گاع ..
متعوب ومشگوگ الشراع ..
- رُقيّة جَاسم. "

قناة التليگرام

الــبــارت الــرابــع..................

گعدنا ع القنفة وخالو گاعد جدامنا..ابوي محاوطني من چتفي چنه كامش طير وخايف يطير منه.. ضلوا يحچون لحدما انفتح موضوع حامد..
خليل : ابو حامد ماادري شلون افاتحك بموضوع حامد.. بس السالفة طويلة ..
شامخ : ادري بي..ماتشوفني ليش اجيت..
عاينتله مصدومة وفاكة حلگي.. : تدري.. شوكت عرفت..

شامخ : كل فترة ادز وادم تسأل عنكم.. ماگدرت اوصلها للمراكز اخافن على سمعتچ انتي وانه وكل اهل بيتي.. بس مايعني كاعد وساكت..لا الله شاهد علي شگد تعبت بلياكم يبوي.. لحد گبل فترة واحد خيّر گال انه شفت حميد بمطعم.. ضليت وراه وراه ماكدرت اعرف عنه شي.. گالوا ماموجود صارله اسبوع.. وهاي ضليت على هالحالة لحدما گبل چم يوم اجيت اشوف الشغل ولمن طلعت شفت سيارتين وحدة اسعاف واللخ شرطة.. اكو عريف بهالدورية يصير صاحبي..اجه يشتري من المحل شغلات وسألته..گال واحد كامشي سكران وكاتل واحد.. ضل يحچي عنه وزلك لسانه كال حامد اسمه.. تسودنت انه شفت الدنيا سودة..حامد شني..وليدي مسجون وچتال.. طلبت منه معلومات عنه وعرفته حامد.. بس ماخليته يگله أبيك وصلك..عرفت كلشي .. هو گايللهم يسكن بالسعدون..رحت للشقق سألت دار دار بالله.. الى أن تعبت وگعدت شافتني مرة تطلع اصغر مني بـ چم سنة.. كالت مبين مو من هنا انت..المن رايد.. سألتها عنكم وعرفتكم..كالت اخذناها لبيت خالها.. ادري محد بيهم يستقبلكم بس خليل واجيت هاي جيتي..اريدنج تجين وياي بنيتي..شفتي الدنيا موهينة..

هو يحچي وانه اعاينله وابچي..حامد بهذلني وبهذل روحه وبهذلنا كلنا..ابوي كاعد على نار وتعبان حتى عيونه حمر..خالي مايحبه بس من شاف حامد غلطان سكت ووگف وياه.. ضيفوه ماقبل يطلع منهم .. ضلينا عدهم وبتنا..بالليل جهزت جنطتي وگاعدة يم القميص الاشتراليا حامد..شوكت تجي..شحيصير بيك حامد.. ليش هيج سويت..ماچنت ادري بي يشرب..

انتبهت على ابوي كاعد بسدي.. خليت راسي بحضنه وأشم بريحته..
سناء : افيييش يابة..شكد مشتاقتلك ومشتاقة لماما غادة.. امانة خوما زعلانة مني..
شامخ : لا يبوي مازعلانة..بالعكس مشتاگتلج تريد تشوفج..
سناء : وانت مشتاقلي..
شامخ : اويلي بوية اهجس گليبي مشلوع مني وهسه ردلي.. شكثر مشتاگلج يبوية دنياي مانها دنيا بغيبتج..
ابتسمت ودموعي بعيوني..شبگته ..بادلني ويمسح على شعري..

سناء : حامد شحيصير بي يابة..
شامخ : رحت للمركز واطمنت على وضعه.. لازم ينسجن الضابط گال هواي تجي هيج حالات.. سنة بالزايد مو اكثر ويطلع..چي قتل غير متعمد..
بعدني عنه وحضن وجهي : چنتي تدرين بحامد يشرب بوية..احچيلي الصدك خلاعرف شسوي..
سناء : لا والله ماچنت اعرف ابد..انه متفاجئة اصلا..
شامخ : الله كريم..كومي نامي باچر نرجع للبصرة..
حركت راسي بالموافقة وكملت هدومي.. رحت تمددت ونمت.. ثاني يوم گعدت الصبح بدلت..ودعت خالو وبسته : حشتاقلك خالو..
ابتسملي : اني هماتين حبيبتي..روحي الله يسهلج الدرب..
ابوي سلم علي وتشكر منه چي دار باله علينا بهالفترة وراها طلعنا..

وصلنا الظهر.. اول مانزلت شفت محيي وماما غادة.. ابوي اخذ الجنطة وانه ركضت على ماما.. شبگتها وابوسها مامصدكة رجعت شفتها.. كمت ابچي وهي تبچي محد مصدك..
حضنت وجهي وتعاينلي بدموع : ماما رجعتي.. سناوي حبيبتي..
سناء : اي ماما..فدوة اروحلج مشتاقتلج حموت من الوحدة مامتعلمة بس عليج..
رجعت شبگتها..سنة كاملة من البعد والضياع انتهت باللقاء ولملمت شتات ذاتي الصار بذيج الأيام..

محيي : وهيج الظهر كاعد يم امي دتصلي.. واسمع صوت باب الگراج انفتحت.. طلعت بالعجل وامي وياي.. لنّه ابوي نازل وياه سناء.. شون وليش وشوكت .. مااعرف..

اجه ابوي يتمشى وكامش جنطة سناء.. وگف يمي عاينلي بتعب..
شامخ : شني ماتاخذ من أبيك..
محيي : اي بوية تعذرني..بس مصدوم..
شامخ : فوتوا هسه نحچي..مايصير بالعتبة..
اخذت من ايده وطبينا بالهول گعدنا.. اجه فيصل متسودن چي سمع صوت ابوي وسناء وياه.. باسه وشبگ سناء.. اعمارهم متگاربة چانوا صحبان كلش..
الحجية غادة : شني ابو كاظم..ماتحچي شون صار كل هذا..والله گليبي غادي نار عليك من أمس..

گعد يحچيلنا من الالف للياء وكل شوي يشبگ سناء مامصدك راجعة..انه همات مامصدك.. حلم علم..
شامخ : وهاي رجعتي.. بس ارتاحلي يومين واروح لبغداد علمود المحكمة مالته..
امي تبچي بحرگة على حامد : شون يابعد طوايفي.. حميد بحسبة وليدي..شون ينسجن فدوة ماتگدر تسوي شي..
شامخ : شمالج حامد چاتل الزلمة.. عاند روحه وعاندني حسباله العيشة والدنيا هينة.. ليش سهلة علي وليدي يفوت سجون..بس الاوراق صاعدة محاكم ماضل شي وتصير الجلسة..انه وصلت متأخر.. وحتلو واصل اوكت مايصير شي غير هذا.. اهل الولد متنازلين عن ثار ابنهم چي عرفونه شارب..بس المحاكمة مالته قانونية مالها دخل بالثارات والعشاير بوية..

گمت على امي مسحت دموعها وغسلت وجهها.. وانه اكول ليش ابوي اخر فترة ساكت مايحچي.. مانه هين اي والله..بس المهم رجعت سناء .. ذبلت رويحته عليها.. حامد شغلة سنة ويطلع مثل هذا الولد الوگفناله..

مر اليوم وابوي دز سناء وامي اشتروا هدوم للمدرسة ودفاتر.. راح لمدرستها كمل اجراءاتها علمود ترجع اداوم.. السنة الراحت نصها ماداومتها فحترجع من عدها.. اشوفنها مكيفة وفرحانة لهناك وبچت.. اجيت يمها مسحت دموعها وگعدت يمها..
محيي : شمالج تبچين..مو باچر ترجعين للمدرسة..
سناء : مشتاقة لحامد..مااريد ابقى بمكان وهو بمكان ثاني..
محيي : تعرفين حامد شسوه..
سناء : اعرف..
محيي : چا ليش تحبينه..مايصير ترضين ع الشينة..
سناء : انه احبه چي اخوي..واحبنك الك.. ثنينكم خواني

حبيته اصرارها على حبها لحامد.. ماتفرق .. نفس الحچي الأبوي علمنياه علمه الها..هو همات مايفرق بيناتنا بس حامد سوى هاي الفروقات بنفسه..

وره يومين طلع ابوي لبغداد وانه رحت وياه.. امي بچت رادت تجي..بس ماقبل..
شامخ : تردين تشوفين وليدج يدخل سجن.. شمالج بوية انه اخافن عليج واحچي هيجي..افهميني يامرة..
الحجية غادة : شسوي غير گلبي غادي نار علي..
شامخ : الله كريم..انه اوصل اله سلامج..
طلعنا من وكت كلش.. بحيث وصلنا الصبح بثمانية .. ضلينا ننتظر لحدما اجه القاضي..ابوي وحامد وخاله.. صارت الجلسة الثانية..الاولى حاضرها بس خاله.. وصدر الحكم.. سنة وشهرين ..عاينت لأبوي دمعته بعينه بس صامد.. القاضي سمح بزيارة اخيرة گبل السجن.. انه وگفت ليجاي ماتگربت بس اشوفه راح لحامد..

شبگه وباسه..يحاچي بكل حب وحنية..
شامخ : انت سبع دومك بوية..سنة تخلص بس صبرك على رويحتك..
حامد : ان شاء الله.. سناء وينها ..شلونها.. خالة غادة..
شامخ : سناء يمي..وخالتك زينة تسأل عنك..
حامد : الله يسلمها.. دير بالك على سناء ..
شامخ : بنيتي بعد..

نصى راسه ماحچه شي..صح مااحبه بس ماتمنيته يصير بهيج موقف وصخ ويدخل مكان مايستاهله.. مقامه اعلى وارقى من السجن..بس الدنيا تجيب التايه وتسوي المايتسوى.. طلعنا منه وصعدنا بالسيارة.. ابوي تچى راسه ع الستيرن بدون حركة اضافية.. خفت علي.. حركته من چتفه..
محيي : بوية شبيك..شجاريلك..
رفع راسه واشوف عيونه حمر ودموعه نازلة.. استغفرت بگلبي..ماتوقعت اشوفه بهيج وضعية بيوم من الأيام..
شامخ : سنة وشهرين ضاعن من عمره.. انه گلبي موچر علي.. ليش هشكل ..والله چنت حاس.. احساسي مايخيب..
محيي : بوية لاتسوي هيج برويحتك اغديلك فدوة.. السنة تمشي برمشة عين..وانت روحله كل فترة شوفه..
شغل السيارة ومسح دموعه : اروحله..اي ميخالف.. انه وليدي يدخل سجون من وره ولد الحرام..هينة..
ماردت اجاوبه خاف أثيره ويصير اندفاعي زيادة.. فسكتت.. ضل ساكت لحدما وصلنا للديرة ..

مرت ايام عادية..انه اخذ سناء للمدرسة وارجعها.. اشوفها متونسة وفرحانة بالبيت وبدراستها.. بس بالليل تضوج وتگعد بغرفة حامد..چان هو ياخذها للمدرسة حتى فلوس ينطيها من شغله..بس مااعرف يعني معقولة حامد الي مايوزه شيطان هيج يسوي.. لحد هسه متفاجئ.. ابوي همات مثلي ..

بيوم رجعت من الشغل العصر ميت تعب من الغبشة طالع.. بس شربت ماي وصعدت فوك تمددت ونمت.. گعدت المغربية غيرت هدومي ونزلت جوه.. لگيت نسوان گرابتنا وبناتهن هنا.. فطلعت خلياخذن راحتهن.. تمشيت ليغاد يم الشط واشوف ابوي كامش ايد سناء وشابگها ويتمشى ع الحافة.. الدنيا شبه غوربت .. هو يحب هذا الوكت.. بقيت واگف بمكاني بس قريب عليهم واسمعه شيگللها..
شامخ : بوية اسمعج تبچين بالليل..والله گلبي ينغزني عليج.. گليلي شتردين واسويلج ..مافرحانة برجعتج لو شني..
سناء : لا يابة فرحانة..بس مشتاقة لحامد.. صدك سنة حيبقى هناك..
شامخ : اي والله يبوي..منيته هاي..واحنا نصبر .. شبيدنا غير الصبر..
سكتت ماگالت شي..قنعها بإسلوبه شفت الابتسامة مرسومة على وجهها..

عفتهم بمكانهم ورحت لبيت عبدالغني.. ثاني يوم الصبح بدلت ونزلت لكيتها جاهزة..گدتها واخذتها للمدرسة.. عاينتلي بإبتسامة : تعال اخذني اوكت..
محيي : بيش الساعة يعني..
سناء : بالعشرة وشوي..چي اجتماع أهالي فمانداوم كل الدوام..
محيي : يله تدللين..
راحت فاتت وانه رجعت للبيت.. مر الوكت للعشرة ورحتلها للمدرسة.. شفت صديقاتها جايات اهاليهن ماردت اخليها بحسرة هالشي.. فطبيت للإدارة سألت المدرسات عنها .. حمدوا بيها كمستوى دراسي واخلاق..

بالطريق ردت اداهرها : سناء گالوا عنج موزينة بالدراسة.. چا والتسعينات التجيبيها منين..
سناء : انه..عزه منو كال ليش هشكل..انه شاطرة.. اكيد هاي ام الاسلامية چي تكرهني..
محيي : لا كلهن گالن هيج..هسه اگول لابوي..
جمدت بمكانها چنها تريد تبچي : خاف يبطلني.. عفية والله چذابة شمالك صدگتها..
محيي : هههههه..دمشي وج اشاقيج.. بالعكس حمدن بيج..
اخذت نفس براحة ودفعت ايدي.. : عليك سوالف..

ابتسمتلها ورجعتها للبيت.. وراها بفترة بلشت امتحاناتها وامتحانات قاسم ولواء.. كاظم تمرض طاح بالفراش مايگدر يمشي..ابوي گال روح انت لبغداد .. هو هالفترة طامس لراسه بالمشاكل والطلايب.. رحت بدون مااعارض.. وصلت الظهرية.. اخذت الدفتر قريت النقوصات والوارد..
بيني وبين نفسي گلت كاظم خوش مشتغل شغل.. هن اربع محلات.. واحد گصابة.. ثنين جملة غذائية مفتوحات واحد ع اللاخ بحيث چبير يعني.. والرابع نجارة.. بلشت بالشغل اليوم كله وياهم ويجون اهل المحلات المفردة يگصون بضاعة وانه واگف يم العمال يصعدون بالبيكمات.. يعني الشغل كله وگفة .. المغربية هيج فاتت وحدة بنية شكلها موراحة..ماارتاحيتلها..ضلت تتفرج ع المحل ووجوه العمال بعدين طلعت.. شمالها هاي.. صحت على صادق.. واحد من العمال..
اجاني .. : نعم خوية..
محيي : شفت هاي المرة الفاتت هسه..
صادق : اي شبيها..
محيي : ليش طبت وطلعت..شايفها گبل..
صادق : ها..اي هي معميلتنا ماكو شي ليضل بالك..
عاينتله ورافع حاجبي : ان شاء الله يكون هيج..

خلى وراح.. بالليل كملنا شغل وقفلت الكبنگات.. انطيت المفاتيح للمسؤولين ع التفتيحة وطلعت للشقة.. بالباب واشوف قاسم شايل اكل وفايت للشقة..
ندهته : ها ولك شو طالع..
اندارلي وضحك : هاي اجيت..الله بالخير تعال فوت..
طبيت وهو فرش الأكل وصاحني.. غسلت وگعدت وياهم..

محيي : قريتوا لا..
قاسم : اي يابة..چا شنسوي..بوية الوحدة تجبرك تدرس.. شعندك تسوي غيرها..
محيي : اليسمعك يگول بالخارج عايش..
لواء : لا والله هي هيج السالفة.. عودك شني.. البصرة شجابها على بغداد..
محيي : هااا عاد حيگول البصرة احلى..
لواء : والله احلى بمليون مرة.. ديرتي بعد..
قاسم : تعلم من اخوك حب الوطن لاتفشلنا يمسودن..
محيي : هههههه..انتم بلية بالله..

ضلينا گاعدين للدعش هيج ونمت مااسيطر نعسان.. گعدت الصبح وگعدتهم.. بدلت وهم همات بعدين كلمن طلع لمكانه.. ضل بالي يم هاي المرة.. مو حبا بيها او اعجاب.. بس انه ابو سوگ واعرف البشر من عيونه.. مامبينة جاية تشتري.. كلت اذا اجت مرة اللخ وطبت بنفس الحركة اسألها شعدها..

مرت ايام على هالنمط.. شقة وشغل ونوم .. بين ما خلصوا الولد امتحانات ورجعنا للبصرة.. كاظم صاير زين چانت فلاونزا قوية بالعظام.. وهمات هو تعب هذيج الفترة كلها وحيده..

كاظم ......
فترة عشر ايام حسيت روحي صحصحت.. چنت حالي حال الميت.. شني هي هاي الفلاونزا هيج تسوي.. دمرتني.. بس تحسنت الحمدلله .. كمت على حيلي سبحت وغيرت هدومي..طلعت وي ابوي بشغل الحلال والگعدة.. ماادري شون افاتحه بالموضوع.. مشتاگلها صار كومة ماشايفها.. طگت روحي عليها..
شافني صافن ..
شامخ : مني ماخذ بالك بوية..
كاظم : سلامتك محد.. شوكت يرجع محيي..
شامخ : على حسابي بعد يومين تلاثة..
كاظم : ها خوش..

سكت بس نظراته مامرتاحتلي اعرفه.. مرت تلث ايام ورجعوا.. انه ثاني يوم الصبح طلعت للمحلات.. لكيت الولد مفتحين وواگفين اهل المحلات ديگصون بضاعة.. رحت كعدت واطمن ع الوارد..هو محيي گال شمسوي بس هم نظرة اخيرة.. شواي واجاني صادق..
صادق : عمي همزين اجيت..
كاظم : ياستار شكو..
صادق : هاي البنية نسيت اسمها تجيك دائما.. اجت ذاك اليوم ومحيي شافها..غير تسودن وضل يسأل عنها.. گتله معميلتنا بس شكله مااقتنع..
كاظم : چذب..واجت بعد لو بس هذيج المرة..
صادق : لا مرة وحدة بعد مااجت..بس گتلك هو بقى يسأل واني انطي نفس الجواب..
كاظم : اي عفية عليك لاتحچي غير هالحچي..
صادق : تأمر عمي..

وانه اكول ليش محيي يعاينلي بطرف عينه.. والله هذا ماطوله معاشر ابوي يصير نيص محد يلحگه.. العصر قفلت محلات الجملة بعد..شغلهن بس الصبح والظهر.. واگف برة وكاف الردانات..سمعت صوتها الناعم وراي.. بوياي شكثر مشتاگلها..

انداريت واشوفها لابسة عباية وشعرها الاشگر طالع شوي منه.. : شلونك عيني..
كاظم : بعد عيني انتي.. بخير وعافية انتي شونج..
ليلى : زينة الحمدلله.. شو ماكو خيرك..
كاظم : والله مريض..هالفترة استعدلت واجيت..
ليلى : سلامتك ماچنت ادري..هذا اخوك جان بمكانك هنا..
كاظم : اي يبت الناس..شمالج جاية مسودنة هم هيج گالوها..
ليلى : ياعيني اني شمدريني..عبالي بس انت تشتغل هنا.. خاصة اخر فترة مااشوف غيرك بالمحل..
كاظم : ديري بالج بعد..بس انطيني مجال اشوف شسوي واجيج..

ضلت واگفة حچينا شواي وراحت.. من بعد سالفة ام حامد.. ابوي صارتله عقدة من بنات بغداد.. صحيح الزين والموزين بكل مكان..بس هذا انطباع ناتج عن ظرف صاير للشخص.. ليلى .. اووف ياليلى.. احبنها واموتن بدونها.. اهجس گلبي مو يمي بس شفتها ارتاحيت.. شون احاچي ابوي بموضوعها.. امها موخوش مرة.. بت ليل ..رجلها توفى گامت تريد تشغل ليلى وياها بعدهي صغيرونة چانت بالدعش سنة.. فماتعرف شتسوي وشاردة منها.. بعدين خوالها شايفينها وماخذينها عدهم.. امها ضالة إدور عليها لحدما شايفتها بالشارع دتلعب وي البنيات.. اخذتها گعدتها يمها ببيتها.. هي موزينة بعد قابل بيتها فارغ.. بس لمن شافتها شردت بعد تركتها مجرد مخليتها يمها.. خوالها جايين يردون ياخذونها وهي متمسكة بيها ماقابلة تنطينها..عاد عايفينها وراجعين گالوا لانعرفكم ولاتعرفونا دامج هيج تسوين..

انه لمن شفت ليلى شفتها بشكل ملائكي وبريء.. شون اقنع گليبي ابوي حيوگف مثل السيف جدامي.. احبنها واحاول بكل ماعندي بس احصلها..لهالسبب لمن شافها محيي خفت مااريده يعرف عنها شي گبل لا احچي انه..

بقيت ببغداد اسبوع ..ليلى مااجتني.. استغربت شعجب.. لمن تشوفني بالمحل تجي كل يومين لو بين يوم ويوم.. ردت انزل للبيت كلت خلانتظر بعد يومين.. والله وثاني يوم واگف وي العمال دااصفط البضاعة وياهم واسمع صوت صادق وراي..
صادق : خوية تعال بلازحمة عليك..
انداريتله ونكتت ايدي : خيرك..
مشيت وياه للمخزن واشوف ليلى واگفة وعينها اليسرى مزورگة بشكل.. عافني وراح..
عاينتلها مصدوم : شبيج ياستار..شصايرلج بوية..
بچت ومخلية ايدها على وجهها : كاظم امي عرفت بينا..
كاظم : لا اله الا الله..شون شمعرفها..
ليلى : واحد جوارينا لاحگني وشايفني احاچيك هنا.. شلون هسه شسوي عفية..
كاظم : بوية انه باچر راد للديرة واحاچي ابوي بموضوعج.. لاتشيلين هم..روحي لدارج هسه لايصير حچي عليج..
عاينتلي بخوف ودموعها نازلة : لتخذلني..اني وثقت بيك وحچيتلك..
كاظم : ان شاء الله يبوي..انتي رويحتي مو بس حبي.. روحي الله يسهلج دربج..
انطيتها كلينس مسحت دموعها وراحت..

ثاني يوم رجعت للديرة.. شفت ابوي ملتهي بمصيبة ابن عمه جهاد..بس طبيت غسلت وطلعت اريد افتهم شكو..
كاظم : شكو بوية شصاير..
شامخ : هذا جهاد مسودن..يريد يطيح راسي.. خلي أخيك يحچيلك..
خلى وراح.. هاي شصاير..رحت على محيي حاچيته..
كاظم : هاي شصاير ماكو أحد مأحود يحچي..
محيي : جهاد شايفينه هو وصحبانه وي وحدة..
كاظم : چذب..منو شايفهم..
محيي : اهل البنية شمالك..هسه يردون يعرفون منو جايبها وشلون واصلة هنا..ماكو ضاع الحگ.. ساعة تكول هم جبروني.. ساعة تحچي العكس..
كاظم : يبوي شني هاي..

محيي : اي والله..هسه ابوي راح يگعد يطلع الحگ وين.. الظاهر مايجون بالعيني والأغاتي.. بس الحچي بيناتنا خوية البت هي جاية برضاتها بس لنهم اهلها يردون يتسترون ع السالفة فيگولون هشكل..
كاظم : انه همات اجه ببالي هيج..
محيي : انه حروح وي ابوي انت ابقى تعبان..
كاظم : لا هسه اجي بس اكل لگمة..
محيي : على راحتك يخوي..

راح وانه طبيت للمطبخ..امي صبتلي اكل وكعدت اكل.. خلصت بالعجل ولحگت ابوي بالكعدة..
شامخ : دام الحگ مايبين عدكم نسأل الجيران الي بسد المشتمل ونشوف..
واحد منهم انتفض من مكانه : لا شيخنا مايصير هيج.. مبينة الولد ماخذينها بالغصب..
شامخ : مانبقى ع المبينة والمامبينة..انه اريدن الشي يجيني تازة مو لعب وحچي مصفط..
نفض غترته وكام..گمنا وياه رحنا لمكان المشتمل.. ابوي اذا شافونه حيعرفونه هو الشيخ ..فدزني انه رحت دگيت الباب طلعتلي مرة ثلاثينية تتلفت وخايفة..
- : تفضل خوية المن رايد..
كاظم : ردت اسألج على أهل المشتمل جاركم..وينهم..
- : مااعرف اخوي فدوة لاتسألني..ماندري عنهم شي..

شفتها خايفة عرفت عدها شي.. دفعت الباب على كيف وطبيت.. تفاجئت..عبالها حسوي شي لو اريدن منها شغيلة..
كاظم : خوية الشغلة ضرورية تره..منو بالبيت جوه..
- : انه وزوجي واولادي..
كاظم : صيحينه اريدن احاچي..سدج امين لاتخافين.. انه من طرف الشيخ شامخ..
لمن گتلها اسم ابوي ارتاحت ودخلت جوه.. شواي وطلع رجال بگدها يلبس بقمصلته باردة.. دخلني جوة وضيفني بس بشي سريع..

- : ابشر خوية شرايد..انه والله لوما تگول من بيت الشيخ ماادخلك..اخاف.. الواحد يحچي ضميره..
كاظم : بوية حگك..بس ماعرفت عشنو تخاف..
- : احچيلك..بس وداعة جهالي مااچذب بحرف واحد.. گبل فترة اجوي جماعة شباب اربعة أجروا المشتمل جوارينا.. هو متروك محد يأجره.. فتفاجئنا لمن عرفنا گعدت بي ناس.. تعرف بعد گاعدين جدد وملتهين بالشيلة فضيفناهم.. ام قصي (مرته) سوت غدة وانه رحت انطيتهميا.. اشوف البيت فارغ مابي غرض.. ماسألتهم كلت عيب شعلي.. صار صيت عليهم لأن بالليل صياح وعرايك..الشارع هادئ الا هالبيت هوسة.. فگامت الوادم تسأل عن اصلهم وفصلهم.. تلاثة منهم يشتغلون ع الحدود مايجون كل اسبوع نوبة.. والرابع ماعرفنا عنه شي.. هاي لحد گبل اسبوعين انه جاي من شغلي بالليل وشفت مرية لابسة عباية وبوشية طبت للبيت.. وضلت كل يوم تجي..حتى انتبهت عليهم يصيحولها ام هادي.. فهي نفس المرة.. لحد گبل يومين طلعنا على صوت صياحهم.. يابة شكو .. گالوا اهل البت جايين شايفينها وي الولد هذول.. احنا اهل المنطقة حچينا گلنا الولد صح غلطانين بس البت جاية برضاتها.. بالليل اسمع ضحك وسوالف.. چا هاي غير مغصوبة على هالحچي..الله شافونه بالعين يا بالعقل خوية..

كاظم : لا بالعقل بوية.. هاي انتم دليل.. چا ماتجون تحچون.. عشيرة البت يردون حگهم..
- : بالله مو عشاير هذول.. جايبين واحد چبير مسوي شيخهم.. اسمراني ومدحدح ..لحيته خفيفة وشواربه سود.. مو..
كاظم : اي هذا نفسه بالگعدة رحم الله والديك..
- : والله خوية مو شيخهم هذا.. وانه ماطول شفتك كفو واخو خيتك اجي واجيب اهل المنطقة.. بعد هم اذا شافوا الحگ مبين يعترفون..
كاظم : هاهيه يبوي..بس استعجل..
- : مااطول دقايق و عد عيناك..

ترخصت منه وطلعت..بالباب انطاني عنوان ابو البيت.. بغير فرع.. كلت اروحله واروح ع البيت الثاني خاف يچذب علي.. شفته طب للبيت وانه تمشيت ليغاد.. طلعتلي مرة چبيرة هم حچت نفس الحچي.. گالت حچينا وماسمعونا فسكتنا..

رجعت لأبوي بشرته..
شامخ : اي ادري بي موشيخ..
عاينتله مصدوم : شني..تدري.. شمدريك..
شامخ : شمالك غير انه الشيخ الچبير.. يعني اعرف شيوخ الفخذ واحد واحد..هذا ماشايفه ولا مرة.. چا شمالي مسودن لو أغبر.. هسه اكدر اگلبها عليهم لنهم جايبين واحد وملبسينه اسم الشيخ.. بس خلأفض هاي واطلع جهاد..
كاظم : بوية انت ماينگدرلك ماتگلي شني سالفتك..
ضحك وگال : مگضية..

شغل السيارة ورجعنا للگعدة.. ابوي كاعد على اعصابه بس يريد يگللهم انتم باطل.. والله ماكو نص ساعة واجه الرجال هو بعد زلم ثنين من ضمنهم ابو الملك.. كتوا كلشي.. الرجال ابو البنية صار بهدومه.. نصاب يريد فلوس..ابوي گللهم الزلمة هذا موشيخ.. هيج طك بطك حچاها.. سودنهم ..
شامخ : بوية لاتعبوني وانه تعبان..عليمن جايين تلعبون.. الشغلة شغلة نصب واحتيال.. چا هو لو الشرف عزيز ماينشهر هشكل بين الوادم الغريبة..
شيخهم حچه : تعذرنا شيخنا..انه اندفعتلي فلوس واجيت.. ليش ارفض..
شامخ : لا يبوي..خربت چا.. توكل بوية ماعندي حچاية وياك.. الگعدة انفضت والحگ صوبي.. هذول شهود .. وانت نفسك شهدت ضدهم.. بعد شني..

سكتوا كعلامة للرضا..طلع جهاد ورجعنا للبيت.. ضل يعتذر من ابوي ع السواه لحدما وصلنا نزل متفشل بعد ماشفناه..

مشت الأيام ورجع دوام الولد..محيي راح وياهم انه بقيت بالديرة بطلب من ابوي.. بيوم العصرية محد اكو گاعدين انه وياه بالحديقة الورانية..كلت افاتحه بموضوع ليلى..
كاظم : بوية ارد احاچيك بسالفة تخصني..
شامخ : اي يالله.. احچي..
كاظم : اريد اتزوج..
شامخ : شكو بيها.. المن رايد..
كاظم : وحدة بغدادية.. شفتها وعجبتني ..
اندار وعاينلي بخزرة : بغدادية.. شمعرفك بيها..
كاظم : بوية تجيني للمحل دوم وضلت ببالي.. احبنها والله ليش اچذب..دتنتظرني اجي اخطبها..
شامخ : شني هاي..اهلها منين فصلها..

ترددت احچيله.. شفته يصر چنه يريد يعرف كلشي.. حچيتله نفس الكلام الگلتليا.. چن الكلمات تسبق لساني بس اريد اخلص واشوف ردة فعله..هو يعاينلي وماعاجبه الحچي اصلا.. رافعلي حاجبه مستصغر كلامي..
گام ويعدل بالسترة.. : انت يا مسودن يا مسودن.. (لو مسودن لو مسودن) ماتقبل غلط..
كاظم : ليش بوية احبنها شني حرام الحب..
شامخ : لا مو حرام.. بس حرام جايب بت ليل وجاي.. مافكرت بصيتك انت وخوانك..خيتك وراها زواج.. ياهو ياخذها.. وانه صيتي وراسي يصير بالطيانة..
كاظم : ازوجها واخذها لبغداد مااجيبنها هنا..
شامخ : لاتزوجها ولاشي..ماكو يعني ماكو.. تريد تزوج اختار براحتك مااريد اجبرنك انه..بس الا هاي البت لو تنطبگ السما ع الگع مااخذلكياها.. وديربالك تلعب بذيالك.. الهوى يفوت من يمك اعرفنه ..
كمت وكفت يمه : يابة لاتكسر بيه..والله احبنها..
شامخ : وك هذا اعمى مايشوف.. لاتورط رويحتك بوية انه اريدن مصلحتك..ابوي چان يكلي اتركها ماتفيدك.. ارجع لعيالك وبيتك.. مامشيت بحچايته.. تالي شصار.. انت أعرف بالصار.. بعد شني يبوي..العرگ دساس.. ماطول امها هيج هي مثلها.. اذا مو هيج بنتها لو ابنها..فهمتني..

ضل يحاچيني وانه رافض رفض قاطع..شون.. احبنها والله صار شهور متلهف بس اريدلي فرصة واكول لأبوي عليها.. شني محبوبتي تروح مني..لا الا ازوجها حتلو بالسر.. طبيت بدلت وطلعت من البيت.. ماانطيت خبر لأحد وين رايح..انه نفسي مااعرف وين حروح.. ضليت اتمشى بالحلال خرته كله (مشيته كله).. صارت الدنيا ليل.. استوحشت .. رحت كعدت ع الشط يم الساجية.. الناعور يفتر وگطرات ماي اطيح علي.. فكرت بأبوي وبكل شخص قريب علي بعدين فكرت بروحي..

احبها اي..بس احب ابوي وخواني وديرتي.. السالفة هنا اطش اسرع من الصوت.. ادري بأبوي شكد تعب خاطر يبني هالشخصية بينا.. شخصية العز والدلال والاكتفاء.. مااريد بغلطة وعمى گلب اهدم كلشي.. انداريت لكيت رجال چبير واكف وراي..كعد يمي ومخلي ايده على چتفي..

- : شو كاعد هنا بوية..لويش..
كاظم : صافن بداهيتي.. انت شعندك حجي..
- : محتصر من البيت واجيت اتمشى.. شعندك سولفلي..
كاظم : والله محتاج اسولف.. احچيلك واريدنك تساعدني حجي..
- : اسمعنك ماعندي شي..
سولفتله على ليلى بس بصيغة شخص ثاني.. يعني صديقي عساس يحبها وصار بموقفي..
عاينتله ومنتظر جوابه.. : شتگول حجي.. شني الصح..
- : اسولفلك سالوفة.. انه جدامك وليدي اخذ وحدة مثل هاي ليلى التحچي عنها..يبوي انه رجال على گد حالي لاعندي صيت ولا ناس تتعانلي..مع ذلك تأذيت من عنده.. عندي بنات اربعة ماتزوجن لحد هسه..
كاظم : يعني يمشي بحچي ابوه..
- : اي انه اشوفن هيج..النسيان نعمة.. سبحانه الماينسى بوية.. الله يعينه على گليبه..

سكتت ماجاوبته..الحقيقة والصراحة تلچم بأغلب المرات.. انه رجال اطب واطلع وعندي شغل اكدر انسى.. بس هي شون.. بوية گلبي من هسه موچر عليها..

ضليت كاعد يمه مااعرف شكثر بس نعست وترخصت منه.. رجعت للبيت لكيت ابوي واگف بره وفيصل يمه..
صاح : بوية هيانه اجه كاظم..
اندارلي واخذ نفس براحة.. تقربت منه : ها بوية شو طالع هسه..
شامخ : خفت عليك بابا..وين رحت..
كاظم : هنا موبعيد.. فوت لاتضل واكف..
طبينا ورحت للمطبخ لكيت امي تلوب علي.. طمنتها وكعدت.. صبتلي اكل.. اكلت واجه ابوي يحاچيني.. مايريدني اضوج من كلامه وهو يريد مصلحتي.. كتله اعرف وضعك ومتفهمك هاهيه مااريدنها..

الانسان العاقل مايطيح بالغلط مرتين..ابوي غلط المفروض استفاد منه.. ولو لكل قاعدة شواذ بس حسمت أمري.. بمرور اسبوع اجه محيي هو والولد وانه رحت بمكانه.. مرت تلث ايام چان تجيني وفرحانة تريد تسمع مني الچلمة الزينة..خليت صادق وره الدخل واخذتها رحنا تمشينا بالشارع..

كاظم : يبت الناس انه مااگدر ازوجج..
عاينتلي ودموعها بعيونها : ليش عيني.. سويت شي غلط..
كاظم : لا حشاج بوية ماسويتي.. بس يبوي الوادم إدور على سمعة طيبة.. وانتي أعرف بسمعة والدتج.. أدريج نظيفة من داخلج.. ثقي بالله احبنج ومااحبن غيرج.. لچن ابوي همات احبه ومااريد سمعته تروح هدر.. روحي بدربج الله يسهلج وياخذج ابن الحلال لن ماكو منج.. شكد حاولت امج تجرج الها بس ماگدرت..
ليلى : بس اني احبك كاظم..
تنهدت ودرت وجهي : انه هماتين احبج بوية.. بس مو كلشي نريده ناخذه..
سكتت ماحچت.. بس سمعت صوت نشغها ودموعها.. اويلي هاي حياتي.. لمن اجي لبغداد چن اشمن ريحتها مااشم الهوى.. دست على گلبي بكل قوتي حتى ماحاچيتها.. راحت رأسا والروحة روحة ماشفتها بعد..

ايامي صعبة وباهتة.. هيج الحب يسوي بينا.. ماألومه لأبوي لمن بقى متمسك بأم حامد لحتى اخذها.. لأن ماكدر يتركها تروح لغيره.. شني الفايدة.. بالأخير راحت لدار حگها.. حاولت اتناسى..اغلب الوكت اگضي بالشغل والگعدات.. وماشي حالي..

محيي ......
ايامي بهالفترة مرت بهدوء.. شغل وبيت.. ابوي شفته تحسنت صحته گلت السنة الجاية اقدم هندسة كهرباء وي قاسم.. لواء بعدله سنة لخ يله يتخرج..

اعاين لكاظم اشوفه يذبل يوم عن يوم.. مااخلي يكعد وحيده.. دائما اخذه ونطلع..بس بالليل أهده .. دورات اروح اشرب ماي واسمع صوته بغرفته يتنهد ويكول .. اي يابة قسمة وموكلشي قسمتنا.. هو من النوع المؤمن.. صبور ويرضا بأي شي حتلو بسيط.. مومعقد مثلي.. قريب على اطباع حامد..

ابوي لمن شافه هيج ذبلان ضل يعاينله من بعيد چنه متندم..
محيي : شبيك يابة متندم شني..
شامخ : چا سهلة علي اشوفن وليدي هيج حالته.. لاهو متهني ولا هو ناسي..
محيي : وشون.. يضل هيج..
شامخ : مااريدن اتعبه بالزايد.. انه حروح للشغل بعد.. خلي يرتاح .. والخسارة تتعوض لابد..

محيي : هاهيه التشوفه سوي بوية..
ثاني يوم من الصبح طلع ابوي.. طلعت وراه سديت الباب وطبيت ابدل علمود اشوف الشغل .. طلع كاظم يلبس التشيرت..
كاظم : هاي وين راح.. ماكعدتوني شمالكم انتم..
محيي : هو ابوي كال خلي نايم لاتكعدونه.. راح بدالك..
كاظم : ها ليش خوي..
محيي : مقهور عليك.. كال خليرتاحله شوي..
ابتسم بتعب وفات جوة.. رخت وراه تريگنا وطلعنا للحلال..

مرت ايام مابيها شي يستحق الذكر بس تعب وشغل.. بس كل هذا يروح لمن اشوف ابوي فرحان بسناء.. متسودن عليها.. هي شوي شوي بلشت تتعود على غيبة حامد.. ابوي راح مرتين شاف حامد بالسجن.. لمن يرجع يتمرض علي.. سكره يهبط.. چم مرة نبهني الدكتور ممكن يتعرض لغيبوبة واحاول اگله.. يكول اي وماينفذ.. تعبت وياه وامي تعبانة وياي.. بعدين اصفن بيني وبين روحي.. اكول ابنه وبعده ماواصل نص العشرين ويدخل سجن.. صح سنة بس هو بنظره عشر سنين.. فأسحب كلامي وبداخلي كلام بدايته ونهايته تكون حگه..

اهدأ سنة مرت علي هي الـ68 .. لحد الشهر التاسع طلعت نتائج قاسم ومعدله يقبل هندسة.. بس مدنية .. ماصارلها چم سنة من فتحت.. اخذت شهادتي والجناسي ورحت للكلية قدمت ابوي اجه ويانا.. قدمت هندسة كهرباء وضليت فترة بين ما طلعت القبولات وانقبلت.. اجيت على قاسم اخذته وطلعنا اشترينا هدوم للكلية .. چان زي موحد.. رجعنا المغربية.. بس تعشيت وصعدت نمت.. ثاني يوم كعدنا من الصبح بدلنا.. كعدت بالمطبخ واشوف ابوي دخل يصبح علينا ومبتسم.. شگد متفائل..
شامخ : ها بوية حترحون..
قاسم : اي هسه حيجي السايق رحت شفته..
شامخ : يله مااوصيكم وليدي .. بعد تعرفون انتم..
قاسم : عد عيناك بوية..
محيي : يابة شونك انت.. زين .. اروح اكيد..
شامخ : اي بوية شمالي چا.. غير انه دزيتك يعني اريدنك تروح..
محيي : يله هاهيه .. ردت اتأكد..

ضلينا كاعدين دقايق واجه السايق وطلعنا.. بتنا بالشقة اول يوم وثاني يوم الصبح طلعنا للكلية.. أيام دوامي بالكلية دنيا ثانية.. صحيح تعب واجهاد بس متعة بنفس الوكت.. الولد يشوفوني عبالهم من بغداد بس لمن احچي أبين بصراوي.. اكو بنات بس مو بكثر الشباب.. مچانت اكو وحدة تلفت نظري.. افوت واطلع كاعد وي الولد سوالف اكثر الوكت والباقي دراسة ومحاضرات..
بقيت ع هالحال لحد امتحانات الكورس الاول.. كاعد بالقاعة بقيت بس انه وچم واحد دنكتب المحاضرة.. ماكو طبع واستنساخ .. مااحس غير بعطر نسائي كفخني.. لا اراديا رفعت راسي شفت وحدة دائما عيوني تخطف نظرة عليها.. هيج منظرها يجذب لا اكثر.. متأكد من روحي مشاعري خالية..
ابتسمتلي وحچت بحس انوثي : عادي تدنى شوية.. مااشوف من بعيد..
محيي : ممكن..
ادنيت وكعدت بسدي.. لهيت روحي وضليت اكتب سريع.. الولد كلهم طلعوا بقينا بس احنا.. دخيلك يالله مامتعود اشوف بت هيج گريبة علي.. بقى چم شغلة ماكتبتها كمت رأسا طلعت.. چا انت شمالك يمسودن.. هي بت .. يامكثرهن.. رجعت للشقة گبل حتى ماانتظرت قاسم كلت هو يلحگني..
هالموقف بقى ببالي وكلش مستعز بي.. دائما اتذكره.. البت من بعد هالموقف صارت تكعد ع الكرسي بسدي لو مگابيلي ولمن تخلص المحاضرة نطلع نتمشى بحرم الجامعة.. يعني شفت راحتي من احچي وياها.. خصوصا وحيد لا أمي هنا لا أبوي..

فدمرة خلصنا من وكت وطلعنا.. قاسم عنده بعد محاضرة فبقيت أتاني.. هي اجتني من بعيد بيدها "بارد .. يعني ببسي بطل گزاز.. قدمتلي واحد وبيدها الثاني..
زينب : تفضل..
محيي : مشكورة بس متخوم..
زينب : دخذه حباب.. شفته واشتهيته النا.. ولو الجو بارد..
ضحكت واخذته : هاي انتي گلتيها..
كعدت يمي ونسولف.. بالأخير كالت : ماحاچيلي على أهلك هلكد..
محيي : شتحبين احچيلج يعني..
زينب : يعني مثلا شنو طبيعتكم وهاي.. بما ان انت من البصرة..
محيي : هااه.. انه ابوي شيخ..
عاينتلي مصدومة : صدك.. يعني عگال يلبس وغترة..
محيي : اي بوية..شني ليش مستغربة..
زينب : بس اسمع بيهم.. فمستغربة يعني.. زين انتو عصبيين ع البنات..
عاينتلها وطگيتها بضحكة : شنهي.. اختي تدرس هسه اعدادية.. يعني عادي نخلي البنيات يدرسن شكو بيها.. بس مع ذلك مو الكل هيج.. نص ونص..
زينب : ااممم.. فهمتك عيني..

ثواني واجه قاسم.. ترخصت منها وطلعت.. وراها بـ چم يوم بلشت الامتحانات والتهيت.. بس خلصنا رجعنا للبصرة.. شفت ابوي فرحان.. ماچان ببالي الموضوع كلت خلأسأله اشوف شكو.. رحت غسلت وغيرت هدومي واجيت علي..
محيي : ها بوية.. اشوفنك فرحان..
شامخ : اي بالله.. بعد چم يوم اخطب لكاظم..
محيي : ها صدك.. المن..
شامخ : كتله على بت وحدة صويحبة امك.. شافها ماكال لا..
محيي : شونه هو زين..
شامخ : يعني نگول احسن.. اشوفنه احسن من أول مرة..
محيي : انت أعرف بعد يبوي.. انه اگومن انام شوي هلكان..
شامخ : روح بوية ريح روحك..
كمت منه رحت نمت..

بمرور يومين رحنا خطابة ع البت هاي الرايدها وصارت المشية.. التهينا بالخطوبة والزواجة.. كاظم همات شفت روحه رادتله مو مثل السنة ذيچ.. لحدما صار يوم العرس وجهزناه عدل.. زفيته انه بالسيارة للبيت الثاني بعد ما جبنا غرفة جديدة.. نزلت هي وراها.. رحت وكفت يمه ضربته بعكسي على زنده..
اندارلي وضحك : شمالك لك..
محيي : انت شمالك خوي.. لاتخاف چا هي شتكول..
كاظم : لك انت والله بلية.. دمشي لاتضوجني..
محيي : صوچي زفيتك وتعبت..
كاظم : غصبا ما على راسك أغم..
كالها وضحك.. ودعته ورجعت للبيت..طبيت من باب الترك البيت هدوء كلها طبت لدارها.. بس ابوي واكف يحاچي أمي..
شامخ : بوية بالله مامصدك..
الحجية غادة : هي هينة علينا لنه عايشين ونفتر هنا وهناك.. بس هو شكد صعبت علي هالسنة..
شامخ : اي صدگتي والله.. ماضل شي.. شهر ويطلع..
الحجية غادة : الله كريم حجي.. فوت نام تعبان من الصبح طالع..
شامخ : چا غير عرس وليدي.. اتعبن منا لأسبوع..
ضحكوا وشبگها وراحوا.. شكثر يحبها .. ولو مايبين هالشي جدامنا بس عيونه فضيحة.. أول مايرجع من الشغل يسأل عنها.. يتسودن اذا شافها نايمة أوكت من عوايدها.. يحسبها مريضة.. هيج يعني يحسبلها حساب لكل حركة تسويها..

هاي مرت الأيام هيج.. رجعت داومت واشوف زينب مثل كل مرة.. ماكو شي بيناتنا مجرد زمالة .. خصوصا هي شبه تغيرت نظراتها علي بعدما عرفت ابوي شيخ وحگها.. لأن الشيوخ بشكل عام يحكمون ع المرة.. حتلو تدرس بس تبقى البيئة سلطانة الموقف وهي المسيطرة..
بمرور شهر كعدنا الصبح من وكت كلش انه وابوي.. مارحت للكلية بقيت بالديرة لخاطر ابوي.. مااريد اكسر بخاطره وهو رايدني وياه.. بدلت وطلعنا للمحكمة ببغداد.. اليوم الافراج مال حامد.. ابوي چنه ديزف ابنه مو ينتظره يطلع من السجن.. رحنا لهناك واجه القاضي جابوا حامد.. لحيته طويلة وعيونه مطعنة.. انكسر گلبي علي.. ماتخيلته هيج.. ابوي عاينله وده يروح يشبگه بس متاني على أعصابه..

حامد ......
اجاني العريف انطاني هدوم.. عاينتله بتساؤل..
- : البس.. باچر محاكمتك..
اخذتهن منه ورحت لبستهن.. ضليت الليل كله كاعد بالركن وحاضن راسي بإديه.. انسجن .. اني ابن العز والدلال.. مامصدك .. بعدها الفكرة ماخاشة بالي.. لحدما طلع الصبح واجه العريف كلبچ إديه واخذني بسيارة هو وبعد چم جندي والنقيب المسؤول عني.. رحنا للمحكمة .. مالفت نظري بس ابوية.. تفاجئت ماعبالي حيجي.. خالي ماكال ابوك يدري بيك مسجون.. ضليت واكف والقاضي يحچي بعدني متاني يطلع الصار حلم.. الى أن دك القاضي ع الخشبة كال تم اصدار الحكم سنة وشهرين رفعت الجلسة .. لوما عيب چان نزلت دموعي.. اني ماابچي ابد.. بس هالموقف هزني.. هز كياني وشخصيتي البنيتها اني بيني وبين نفسي وتعبت عليها.. تمنيت يرجع الوكت واضل عطال بطال ولا ألتقي بهذول الولد واكوم اشرب.. تمنيت وكلها أمنيات.. الواقع غير شي..

اجه ابوي عاينلي بنظرة حزينة ودموعه بعيونه اول مرة اشوفه مفضوح بهالشكل.. شبگني ويصبر بيه.. صرت هيج بسببك.. انت دمرت كلشي ونهيت شخصية حامد المتعود يشوفني عليها.. أتلگاه بضحكة.. هسه حتى مااطيق اشوفه.. راح واجه خالي همات نفس الكليشة وراها طلعوا واني طلعت ابراهم رحت للسجن.. شعور الحبسة والخنگة حسيته من قبل لا ادخل السجن .. شلون حعيش سنة وشهرين هنا.. ماادري .. طبيت واخذني الضابط لغرفة بيها چم سرير وولد اربعة اكبر مني.. رحت كعدت كارص روحي حتى ماحچيت..
مر اليوم ساكت.. بالأخير قبل لا انام واحد سألني..
- : شكد مدة سجنك..
حامد : سنة وشهرين..
- : هينة خوية..غمض فتح تخلص..
حامد : ان شاء الله تكون هيج..
درت وجهي تغطيت وارجف باردة ثلج.. ماادري شلون نمت..

مرت الأيام بهالشكل.. واحد من الولد اسمه فؤاد.. خوش ولد حباب فگمت لمن اكل واكعد وياه.. هذولاك التلاثة الباقين ماارتاحيتلهم.. كاموا ياخذونا نشتغل ونخيط هدوم عسكرية.. تعلمت هواي شغلات بالسجن.. گمت أخيط .. أطبخ .. چنا نطبخ للعساكر والضباط الخفر.. بكد الاستفادة اكو ضرر.. عرفت السجن انگس بقعة بالدنيا.. الولد بيناتهم أمور ممكن خارج السجن مينفصح عنها بس هنا متاحة.. اني كاعد بالليل بس داير وجهي واسمعهم.. يايابة تكش روحي.. كون سچينة واحطها بيهم تلاثتهم.. بس فؤاد مثل ذبتي بعيد عنهم..

بيوم كاعد الصبح ماعدنا شي ووكت زيارات.. ففؤاد اجوا علي اخوه وابوه يشوفوه.. ضليت كاعد ويا هذول.. الجو بلش يحر خصوصا الصبح.. كمت نزعت القميص بقيت بالفانيلة.. مااحس غير بإيد واحد انحطت على بطني من أسفلها.. عيوني صارت بگصتي.. هذا يلزمني بهيج وضعية فاشلة.. لزمت ايده عصرتها بيدي..
صاح : اااخ لك گوااا...
انداريت ضربته بوكس : ماكو غيرك الگوا... ياابن القندرة..
دفرته بالكاع شبعته كتل واغلط علي شلون يلزمني ويتقرب مني.. اتخبل من هالشغلة.. هذوله صحبانه اجوي يردون يگوموني وادفع بيهم.. ماادري شگد ضليت فوكاه.. بس حسيت ع الضابط شالني منه..
- : ممنوع العرك بالسجن.. امشي اطلع..
حامد : سيدي ماشفته شسوى..
- : مهما يكن.. تعال خبرنا واحنا نتصرف.. ميحتاج تتصرف من يمك..
باوعتله بغيظ واشوفه متوجع بالگاع.. عساك بالزايد .. كون مرض ماله علاج بيك وبكلمن يسوي مثلك.. ارتاحيت من كتلته.. اخذني الضابط لغرفة لخ وتغير مكاني..

بالليل اصفن بيني وبين روحي.. هواي شغلات جانت متوفرة جدامي بس ماحاس بقيمتها.. السجن حسسني بقيمة كل ذرة هوى تنفستها بره.. اليوم يمشي عندي بسنة.. شحال سنة شكبرها شيخلصها.. أصعب ايامي هاي.. حتى ابوية الأكرهه تمنيت شوفته.. لأن مليت من الوحدة والنظام اليومي المتكرر.. لحدما اجه اليوم الطلبوني بي.. كالوا والدك جاي يشوفك.. كمت على حيلي ورحت شفته.. شبگني وباسني.. بهاللحظات نسيت كرهي اله بس فرحان شفت شكل جديد بعيد عن الأشكال اليومية..
حامد : سناء شلونها.. تسأل عني لو ناسيتني..
شامخ : لا والله شكد تسأل عليك.. رادت تجي وياي بس ماخليتها..
حامد : ديربالك عليها وسلملي عليها..
شامخ : واصل بوية.. شونك انت..
عاينتله بنظرة قلة صبر وتعب : صابر والله كريم..
ضل يحاچيني لحدما كالوا خلصت الزيارة.. ودعني وراح..

وهاي هيج مرت أيام سجني.. فؤاد متزوج وعنده بنية.. بس سجنه سنتين.. فمرته ماتجي تزوره بس ادزله رسايل.. اني واگف يمه بس مااقره اكول شعليه خصوصيات.. بس اشوفه لمن يقراها يبتسم ويضل يشم بيها.. شكد يأثر بيه واحسهم شلون أرواحهم متعانقة على رغم البعد..

مشت الأيام الى أن اجه اليوم الموعود.. يوم اطلاق العنان لشخص ظلمته الأيام لفترة معينة وجبرته ينحرف عن مسراه وعاداته.. التغير بي حتى ريحة الهوى وطعم الأكل .. يوم استلام وثيقة الغفران للذنب الارتكتبه بلحظة غضب وفقدان وعي..
كعدت الصبح فرحان.. اليوم اطلع.. حلم علم.. چنها قرن مو سنة وشهرين.. كمت واجه العريف انطاني هدوم مدنية.. رحت بدلت بس مازينت.. كلت خلأطلع بعدين عود.. مااريد اطول هنا دقيقة بعد.. بين ما كملت وطلعنا للمحكمة لكيت ابوي واكف يتانيني هو ومحيي وخالي.. خلصت الاجراءات وصار الافراج وطلعت.. يابوية ردتلي روحي.. المعنى الحقيقي لجملة "احس روحي بسجن..

اجه ابوي متلهف شبگني ويباركلي.. صح ماانسى الصار بس ماردت اكسر خاطره واني وراي حياة وزواجة ولا سامح الله اخاف تطلع بإبني.. ابتسمتله وبادلته.. محيي بس يباوعلي وحاچاني من بعيد ماتقرب.. اني هم ماجنت مهتم لكلامه..
شامخ : بوية ماناوي ترد وياي.. الديرة كلها بيتك يبوي لاتسوي هشكل..
حامد : لا مااكدر.. اني بيتي هنا ببغداد.. تعودت على شغلي ومكاني.. سناء بنتك يعني مو احرص عليها منك.. طلعتها چانت غلط مني واعتذر ..
شامخ : مقبول عذرك.. بس اريدنك ترد وياي..
حامد : لا يابة ماارد.. اني حتزوج واعيش هنا.. مااجي للبصرة.. حاول تفهمني..
شامخ : بوية راجع روحك.. شفت العيشة شون صعبة هنا.. چا شون حتكمل وحيدك..
حامد : راجعت هواي يله حچيت هيج..
ضل يحاچيني راد استسلم لرأيه بس ضليت مصر على موقفي.. فرضت رأيي علي وعالظروف.. سكت ماكال شي.. ودعني ويوصيني على روحي.. راح وهو يعيد بجملته.. يگلي راجع روحك.. وانه ابوك اريدك يمي.. رفضت وخليت أمام أمر الواقع.. خاف عباله جيتي لبغداد جانت غلطة.. لا خطوة كاملة بس تفتقر للتشهير.. محد جان يدري فصار عندي مثل الخوفة من المستقبل.. لا هسه اعرف شسوي ومحسب حساب لكل خطوة حخطيها.. انه بالسجن سنة وشهرين شفت مصايب تشيب الراس.. بالليل انثر افكاري وأيامي واحسب شحسوي وشريد اسوي.. ولكل فعل ردة فعل.. ارجع لشغلي واضبط أموري.. ع الاقل المسكن بلاش والباقي يدبر.. واللبيب يوكع بالغلط مرة مو مرتين..

راح هو ومحيي .. ضليت اباوعله لحدما ابتعدت السيارة.. انداريت على خالي واخذت نفس براحة..
حامد : شلونك خالو..
ضحك وتقرب مني طبطب على چتفي.. : امشي يله..
رحت وياه للبيت.. طبيت زينت لحيتي وكعدت.. ضيفني اشكال أكل.. اني شبعان من الفرح كلشي مااشتهي بس اكلت لخاطره.. بت خالي الصغيرة عمرها سنتين.. شافتني كاعد استغربتني.. واكفة ليغاد وتباوعلي بنظرات استغراب.. صحتها وفاتحلها ايدي.. : تعاي احاچيچ..
حركت راسها بالرفض.. جريت من جدامي كرز غريتها بيهن.. هي سمينة تحب الأكل.. اجت ركض.. شبگتها وكعدتها على رجلي.. شواي وفاتت أمها شافتها يمي ضاجت بس ماحچت.. اني تجنبا للمشاكل نزلتها مااريد يصير حچي.. بس هالچم شهر واشوف حياتي بعيد عنهم..

بقيت بالبيت اسبوع.. ماطلعت بس كاعد.. احس جسمي مكسر من نومة السجن والتعب من الصبح اكعد.. بس كل هذا واگول ماضي وراح.. مانسيته بس مااريد اتذكره.. وره هالأسبوع بدلت وطلعت الصبح أدور على شغل.. اول مكان اجه ببالي المطعم القديم فرحت للرواد رأسا.. اول ماطبيت الشارع لكيت المطعم كله متغير.. صح بعده مطعم بس الهيكل والأسم وكلشي يخصه.. ماادري اذا صاحبه نفسه لو همات تغير.. تمشيت وبنيتي أرجع أشتغل هنا.. طبيت شفت طاقم جديد ولا واحد منهم أعرفه.. كلت هاي فرصتك حامد.. رحت على صاحبه همات مو نفسه القديم .. كتله اني چنت اشتغل هنا بس صارلي ظرف ومااجيت.. كال اني همات عندي نقص واكيد اريد شخص عنده خبرة ..
حامد : وين تريد اشتغل عمي..
- : بكيفك يابة.. عندي نقص بالكل.. تعرف تطبخ..
حامد : اي..
- : يله خوش هو هذا أهم شي.. باچر تعال الصبح من وكت شوية..
حامد : ان شاء الله..
خليت وطلعت.. ضليت أفتر واتذكر أيامي.. صح صعبة بس علمتني هواي والله اعلم شكد حتعلم بعد..

رجعت للبيت حاچيت خالي.. كال على راحتك ماطولك مرتاح سوي.. اني رجال فطن والگفها بالعجل.. ادري بمرته ماتريدني فالهالسبب دااشتغل واحاول اضغط على روحي.. حتلو اشوفلي غير شغل اشتغل ثنين عادي اتحمل.. ثاني يوم كعدت الصبح صليت قررت التزم عسى تنفتح بوجهي.. بدلت ورحت للمطعم.. وجهتهم وبلشت اطبخ وياهم.. تعلمت عليهم وحبيتهم.. لمن سألوني على عمري وگتلهم ثنين وعشرين تفاجئوا.. عبالهم تلاثين .. السجن كبرني.. ضليت بالشغل لحد الدعش بالليل واكف على حيلي.. بحيث لمن كالوا حنعزل ذبيت الصدرية هاي مالت المطبخ ورحت للحمام غسلت وجهي بماي بارد.. كعدت شوية وتعشيت ويا الولد بعدين طلعت للبيت.. بس خالي كاعد.. سلمت علي ورحت نمت.. ومشى الحال بهالشكل..

ابوية بكل اسبوع يدزلي مبلغ مالي.. ماانكر نفعني هواي بس ماردته يدز.. اريد وحدي اصير.. بنفس الوكت ادري بي نفسه عزيزة حتى على ولده مايريدهم ياخذون من أحد..

بيوم رجعت من الشغل أوكت شوية.. بالباب واسمع مرة خالي تصيح..
- : يعني لو اني لو هذا خريج السجون..
خليل : لتخليني اجاوز واني بعمري مارافع صوتي عليج.. مو ابوج نفسه مسجون تسع سنين.. هسه منريد نحچي ونفتح دفاتر عتيگة.. روحي لتضوجيني..
- : ها خليل يعني تعيرني.. مو اعوفلك البيت انت وجهالك..
خليل : يابة شبيج تخبلتي على راسي.. خلي الولد ديلم بنفسه باچر عگبة يتزوج ويروح..
- : شوكت عود.. مليت اني تره..
خليل : شو هواي حچيتي انتي.. شمسوية للولد.. شنو غاسلة هدومه .. مسويتله اكل.. اشو ياكل بره وهو يغسل هدومه.. ميصير يابة لتضوجيني روحي كفيني شرچ..
سكتت ماجاوبته.. صار هدوء يله طبيت.. حملت روحي مسؤولية اللغوة الصارت.. خصوصا من كلامه انتبهت هم مامتعاركين قبل.. ادور اجي اني اعاركهم.. استثقلت كعدتي عدهم..

ثاني يوم اخذت هدومي وطلعت.. كلت اروح لنفس الشقة لأن الايجار رخيص والفلوس الدتجيني من ابوية ادفعها.. خالي شافني شايل جنطة تفاجئ.. عباله سمعته البارحة فتوتر.. فهمته وضعي واني مامحتاج يعني هو ماله علاقة.. طلعت منه ورحت للسعدون .. لنفس النقطة والشقة لكيتها مامتأجرة.. أجرتها وصعدت رتبتها .. خليت هدومي وطلعت للشغل.. مشت الأيام بهالشكل.. شفت ابوية مرتين بمحض الصدفة.. مشاعري تلبدت تجاهه ورجعت اسوأ من قبل.. ماكدرت استمر بمجاملته.. محيي وقاسم همات اشوفهم يطلعون من كليتهم بوكت استراحتي الظهرية..

كله ماشي بهدوء.. الى أن بيوم ابو الشغل كال اليوم تطلعون من وكت.. عندي شغلة اسويها.. عاد احنا كيفنا.. للعصر وطلعت اني وولد تلاثة.. نصيت عيوني ع الردان أكفه وانتبهت على حذاء وحدة واكفة جدامي.. نظيف أسود .. رفعت راسي شفتها....

يتبــــــــــــــــــــع.................