رواية اسألي عني الليالي الفصل السادس وأربعون 46 - بقلم رقية جاسم

قناة التليگرام

حساب الانستگرام

الـبـارت الخامس والاربـعـون...............

انداريت على محمد جان كاعد يمي..كتله : محمد الله عليك خابر رائد..حموت خوف شسوي..
محمد : انه هم خفت والله..حكوم اطلع للمحل اخابر بعد وكت هسة مفتحين..لا تكولين لامي خاف يصعد سكرها..
كمت ارجف ياربي ماكو شي..لا تصدمني مرت اللخ .. اخذ التلفون وراح..ضليت افتر بالصالة وادعي .. يارب ماكو شي مو هو والله مو هو..

تقريب النص ساعة واندكت الباب..رحت افتحهه وايدي ترجف لساني ما سكت عن الدعاء..اجه محمد..بالباب حاجيته متحملت اصبر..كتله : ها جاوبك مو..
محمد : اي جاوب لا تخافين..كال انه بسامرا اصلا مو ببغداد يعني مو يمه حتى..
جريت نفس دخل لكل جسمي..كتله : الف الحمدلله..تعال فوت يعني صدك هاي اول مره يصير شي وما ينشلع گلبي بكل مره لازم تصير شغلة تخلي السالفة تطول وتعرض همزين ما حجيت لخالة..جان ضل بالهه ع الخالي بلاش..كمت توضيت وصليت بعدين ساعتين تقريبا ونمت..

وهاي هيج مرت الايام ماكو شي جديد..كله كاعدين بالشقة لو نطلع نتمشى..رائد دائما احاچي يكول زين..بالشهر الثالث ٢٠٠٨ وضع البصرة تأزم حيل وهواي ناس ماتت..الله يرحم الكل ..

وراها بالشهر الخامس بلش الوضع فعلا يستقر حتى بالاخبار يكولون ورائد همات من يخابره محمد يكله نعمة احسن من كبل بهواي..بيوم اندكت الباب العصرية..جنت كاعدة دااتفرج فلم وطه بحضني..كمت فتحت الباب صار امنية بوجهي دخلتهه جوه وكعدنه..رحت اجيبلهه شي جان تحجي..
امنية : لا تعبين نفسج عيوني..اجيت اودعج..
عاينت عليهه متفاجئة : ليش وين حتروحين..شنو حتشيلون
امنية بضحكة : لا ليش نشيل..حنرجع للعراق واخيرا .. طكت رويحتي من الغربة وكعدة الشقة هاي..
عفت الكلاص من ايدي ورحت يمهه..حضنتهه وبستهه : بالسلامة يارب..تعودت عليج وعلى سوالفج شوكت تطلعون
امنية : حبيبتي واني هم والله..

هسة راح عمر يحجزلنت .. ابويه خابرتو قبل فترة اسبوع تقريبا..كتلو شلونو وضع العراق كال زين مستقر ليش ما ترجعون..كتلو اشوف عمر ونجي ما مطولين..اني ما صدكت السالفة كمت كتلو وبلشنه نجهز الغراض..حتى ابو الشقة كال ما يحتاج تدفعون الايجار هلشهر لأن ما اخذنه منو بس اسبوع وباجر..
دنوة : يااا..والله صدك اي وضع العراق تحسن..حتى رجلي كتلج عسكري هم حمايه من يسأله ع الوضع يكول زين .. عاد احنه شوكت نرجع ما ادري..
امنية : ان شاء الله ترجعون وترجع حياتكم مثل ما جانت ونرجع نتشاوف..على كولتج..الدنيا صغيرة وين نروح..
دنوة : هههه..اي والله بعدهه ببالج..
امنية : اي عيوني عجل ليش انسى..

ضلت كاعدة نص ساعه ودعت خالة وراحت..مجانت تشوف جلنار واخلاص هواي فما عدها علاقه بيهن بس انه وخالة اكثر شي..والله هواي فرحت من عرفت حترجع..يعني الوضع زين صدك ومستقر..عبالك كلشي حلم ..منو يصدك العراق يطلع من هاي الازمه الصعبة..اخذت هواي شباب لا بيهه ولا عليهه عصابات ومليشيات وكل الماضي القديم طلع بهاي الفترة .. الكاعد ببيته ما خلصان..لأن چانوا الامريكان على فجأة يدفرون الباب ويفوتون تفتيش..ما يهتمون منو بالبيت رجال .. مره وحدهه..كلشي عادي عدهم البيت بيتك حاسبينهه .. حتى اليشتغل ما خلصان..يروح لشغله يطكطك خاف يصيرله شي لو يصير انفجار ويا مكثرهن هن..ما ينحسبن لا واحد ولا ثنين منو طايح بيهه..بس الفقرة..

بهلايام يكون صار سنتين انه مشايفة حبيبي..بس اسمع صوته وهم مو دائما..وهو اصلا ملتهي مو دائما متواجد .. بس شعور يسوي قشعريرة من شخص تحبه ما شايفه سنتين وهو عدل ويتنفس..هسة شلونه..اكيد متغير وضعفان .. كعدت ارسم تفاصيله الي حشوفهه من ارجع بتفكيري..مشتاقتله اكثر من كلشي بالدنيا..ماكو شي يذكرني بي بس الاغنية .. دورات الواحد يشوف شخص يحبه بشخص قريب علي..لأن اكو شبه بيناتهم..وانه اشوف رائد بخالة صدك احسه يشبهه من ناحية الاسلوب والشخصية.. اكللهه انتو تشابهون.. تكلي لا رائد يشبه ابوه..ولو انه مشايفته بس بعد هاي الصورة طبعت ببالي..وهو شمهما يكون حلو كشكل واسلوب وشخصية وغيرها..

مرت الايام عادي لحد الشهر السابع جان يجي محمد المغرب من شغله بس ملامحه متغيره وفرحان..صاح : يمه وينج تعالييي اليوم شينيمني اليوم..
الحجية : خير ان شاء الله..شكو..
محمد : جنت احاجي رائد..كال شعدكم باقين بعد..ارجعو راجع للبيت ونازل اجازة صار يومين..كال منا لعشر ايام يله .. كتله صدك يعني بس احجز ونجي..كال اي..لج يوم والله ما مصدك..يعني عبالك حلم..هاي الغربة اكلتني اكل والناس ما اعرفهم..مو مثل اهلنا هناك..
الحجية : اي ياربي الف الحمدلله..ما راح الصبر ع الخالي بلاش..زين شوكت نرجع..
محمد : هسة بس اسبح وابدل واروح احجز..عندي فلوس تكفينا..انتو جهزو غراضكم من هسه..ماعدكم شي غير .. بس الملابس..

الحجية : اي شعدنا قابل..اكعد ارتاح ما طايرين..
محمد : يله شعندي قابل..اليوم الشغل خفيف ماكو هواي ناس هسة افوت اسبح..طلعيلي فلوس عود..
فات للغرفة هو ويدندن بينه وبين نفسه..انه من الفرحة دمعت يعني صدك واخيرا ياربي..شحجي شكول ما اعرف اوصف فرحتي بهليوم..يمكن ثاني اسعد يوم بحياتي..ع كد الشفته من اخلاص وجلنار والشفته من الغربة اجه اليوم الي حفرح بي..خالة كالت نشوف الحجز شوكت وراهه نجهز غراضنه .. هو صدك خوما نجهز من هسة والحجز وره يومين او ٣ .. ضليت كاعدة يم خالة..

وراهه كمت اسوي عشه جان يجي محمد..انه واسوي سمعته يحجي وي الحجي..
وائل : ها شسويت..
محمد : حجزت على اقرب موعد..يم نفس الشركة الرجعتو بيهه انت ودنوة..كال عكبة الفجر نطلع..
الحجية : يله خوش عدنه وكت..رائد حيجي لبغداد ياخذنا غير.. لو شلون..
محمد : اي خابرته وره ما طلعت من الشركة..كتله الفجر حنطلع كال هاهية اعرف شوكت توصلون..اجيكم عود
الحجية : ها..زين شحتسوي ع الشغل مالك

محمد : هسة رحتله بدربي..كتله حرجع للعراق وهاي..كال الله يسهلك وانطاني راتبي..
الحجية : الله يسهل..
صبيت العشه وكعدنا كلنا مثل كل مره..بس هلمرة الشعور مختلف بداخل كل واحد بينه..صدك فرحت وحسيت الكابوس خلص وكعدت لكيت الواقع مفرح..ثاني يوم لمينا الملابس التهينا كلش..بالليل نمنا من وكت كلنا..لحدما الفجر كعدت صليت بعدين كعدتهم..بين ما بدلت جانو مخلصين وطلعنا .. محمد انطه الرجال ابو العمارة المفاتيح وتشكره..طول ما هو يحاجي انه اعاين للباب..شكد صارت شغلات هنا..يمكن فرحت يمكن بجيت..تعبت وانقهرت..اشتاقيت وهواي شغلات ..جزء من حياتي صار بهاي الشقة..يمكن الي صار هنا بعد ما يصير بغير مكان..اخذت نفس طويل وابتسمت..بعدين نزلنه جوه وضلينه نتمشى شوي بين ما محمد اخذلنه تكسي ورحنه للكراج..

نفس اللقطة العشتهه من اجيت هسه تكررت..بس الفرق من اجيت جنت مقهورة على فراك رائد..هسة احس كلشي بيه يريد يشوفه بأسرع وقت..وان شاء الله اشوفه .. وره نص ساعه ركبنه السياره وطلعنا بعد..ضلت تمشي بينا هواي .. اكيد وكفونه بالطريق بس جانو جنود عراقيين مو امريكان مثل كل مرة..واخيرا بعد دعش ساعة الطريق وصلنا لبغداد .. عاد انه من نزلت رجلية ما احس بيهن هلكد ما كعدت..ما تحركت لا هنا ولا هنا..نزلنه والناس منهم ضل منتظر ومنهم اهلهم ينتظروهم..انه درت وجهي ع الشارع بس حسيت بمحمد تحرك من يمي..شوي وسمعت صوت رائد..

ما اعرف شوصف احساسي..انداريت شفته..والله دمعت عيوني من الموقف..شكد تعبان وجهه وضعفان..بالبداية ما انتبه علي..سلم ع خالة وهي هم مثلي ما مصدكة حضنته وباسهه من راسهه..سلم ع الحجي واخلاص..لأن صالحته عن طريق خالة..كامت تتوسل بيهه..خاف اموت ورائد زعلان مني شلون بيه..مدري منين جايبه هاي السالفة مال اموت .. المهم تصالحو وسلم عليهه عادي..انه واكفة واعاينلهم..اخر شي صار جدامي..ابتسم من شافني..انه ابتسمت وبچيت من كل عقلي..مهتميت للعالم منو اكو ومنو ديشوف رفعت نفسي شوي وحضنته..كتله : اشتاقيتلك والله..احسه دهر..
رائد بهمس : انه اكثر وداعة عيونج الاحبهن..

وخرت عنه ومسحت دموعي..ابتسملي واخذ الجنط صعدهن بالسيارة..رحنه وراه ورجعنه للبصرة..والحمدلله طريق البصرة ما قاصر هم طويل..انه هنا نمت بالطريق بعد ما ادري وين وشلون..كعدت على صوته..
رائد : كومي يله وصلنا..كلهم نزلو بس انتي..
رفعت راسي شفته دينزل بالجنط..عدلت الشال ونزلت .. طبينا جوه..مثل ما تخيلت..احس البيت قصر..رغم هو جبير اصلا بس حسيته اكبر لأن الشقة صغيرة جانت..كعدنا بالصالة انه من التعب احس نفسي ما اشوف..بس اسمع..كامو يحجون ع الوضع وشصار بهلفترة..
رائد : شلونكم..والله مشتاك اشوفكم مليت وحدي..
الحجية : احنا هم..يله كله يروحلك فدوة..المهم انت سالم ومابيك شي..شريد من ربي بعد..

رائد : الله يخليج..تعال لك شو متجي تسلم على بابا ..
جان ديحاجي طه ويأشرله بيده..نزل من حضن امه وراح علي ذب روحه بحضنه..ابتسمت عليهم وضليت شوي بعدين صعدت فوك..نزعت الشال والقميص..لأن لابسة جواه تشيرت ربع ردان..الهول حيل حار بس الغرفة باردة..بعدين انتبهت السبلت مشتغل..يا..وجايب سبلت هم..

ابتسمت ورحت ع الكنتور طلعت شماغه..شميته حيل لدرجة هجست روحي دااتنفس عطره مو هوى.. لفيته على معصم ايدي انه واگلب بهدومه .. وي كل قطعة تجيني ريحته..ياربي شكد مشتاقتله.. سنتين لا يوم ولا يومين..

شواي وانفتحت الباب..درت وجهي شفته فات هو وينزع قميصه.. علگه ع التعلاگة واندارلي..
فتحلي ايده : اويلي هذا العسل الأسمر محروم منه.. تعاي يبعدي تعاي..
ابتسمت بخجل ورحت بحضنه..ايدي حاوطت چتافه وراسي على صدره..مد ايده يمسد بشعري ويبوسني من راسي ..
حاچيته بدلع : مشتاقتلك موت موت..
رائد : انه اكثر يروح روحي..اميرتي گايمة تدلع وتتغزل..
دنوة : اي من شوقي الك..مشتاقة لحضنك حييل.. وريحتك التجنن.. اووف انحرمت منهه ..ماتشوف ليش لافة الشماغ على ايدي..
رائد : الشماغ وصاحبه فدوه لهلعيون الشهل..

بعدت راسي عن صدره..بسته منه بوسة خفيفة.. لفيت ايدي على رگبته ورفعت روحي شوي..صرت بمستوى رگبته.. قربت شفايفي منهه وخشمي..أشم بيهه ..شفافي تاخذ حقهه بطريقة تغري ..تخلي يذوب بكاستي..
همست بإذنه : اموت بيك حبيبي..
وخرت اشوفه..يتنفس ثگيل وعيونه ذابلة..ابتسمت وذبيت الشماغ من ايدي..طفى الضوة وشالني هو ويهمسلي بكلام غزل وحب..حسيت بي..حسيت بلمساته وكلماته الهادئة .. وعيت إن انه رجعت لمكاني ولحبيبي لمن شاربه لامس رگبتي .. سنتين من البعد خليناهم ورانا وعشنا الجديد بكل حذافيره ولهفتنا هي سلطانة اللحظة..

حضني هو ومنتجي ع التاج مالت الجرباية..كتله : حبيبي .. هم حجيت وي عمو قاسم..رحتله..
رائد : دخيولي..تعاركت وياه هو وجدي والباقين كلهم.. حتى عقيل ادخل وتعاركت وياه طيحت حظه..
دنوة : شنو شنو..ليش هذا شكو مدخل روحه..
رائد : خلصت الفاتحة على حسب الاصول وراها جان تكب العيطة..شكو يابة..محيي توفى من وره بنته بس احنه ما ردنا نفتح الموضوع هسة..كتله هي كبل يومين جانت تحاچيني كالت حجيت وي ابوي..هذا الحجي شنو معناه.. عقيل كام يغلط ويحجي حجي ماصخ..اي هي عذبت ابوها وبهذلته من مكان لمكان وبالمحاكم كل يوم متزوجة ومطلكة كمت خلصت علي.. جدج طردني هو وقاسم وكاظم كلي لا نريدكم ولا تردونا كتله والله احنا المنريدك..عفته وطلعت..سم بدني سم..حتى ابوي جابه بالطاري ومرتي وشرفي..هذا عم هذا..

يعني السالفة صدك..منو مطلع هلحجاية علي..عاينت علي كتله : تدري بيه مو انه مو..ما اسوي هيج ..اصلا جنت مشتاقتله واريد اشوفه.. سكتت وبچيت انقهرت من كلشي..يعني عقيل شيريد مني..اول ثنين يطلكون لو شنو.. وعمي قاسم ولا يوم حچه علي حجاية هلكدوتهه ويداريني بكلشي حتى اكثر من ابوي..ماعندي حظ .. رائد وخر ايدي ومسح دموعي..قربني لحضنه ويمسد بشعري
رائد : اعرفج اكثر من روحي..متشوفين ما نطيت بيج .. دنيتي انتي الله يرحمه..انه ابوج شتريدين يمج..
دنوة : متدري بالحسرة البيه..من محمد كلي متوفي من البارحة بالليل والله ما اعرف شصارلي..صح اجيت للمكبرة بس ما طفت ناري..بعدها الحسرة..

رائد : معذورة بنيتي انتي..راح وهو راضي عليج..انه حجيت وياه..كلي دير بالك عليهه فقيرة..
رفع راسي بايده وعاين علي..كال : وانه داير بالي عليج مو
دنوة : اي..
رائد : كافي دموع..اريد اشوفج فرحانة صار هواي ما شايفج.. مو اشوفج بدموعج..شوكت ما تحسين روحج تعبانه كليلي..وين تردين اخذج..ادري الصارلج مو سهل تعبتي وانتي بعدج صغيرة..
دنوة : تدري بموضوع الطرح شلون أذاني..
رائد : الله كتيم حبيبي.. وما اريدج تكولين رائد خطية ومدري شنو .. انتي بنتي مااريد بنية غيرج..المهم انتي زينة..
ابتسمت والدموع بعيني : هذا الحجي كله علمودي..
رائد : اذا مو الج چا المن..لو اكدر اسوي شي غير الحجي جان سويت..ردت ما اكول لمحمد خاف ميعرفون يكولولج وتتمرضين منو يخليج ترتاحين.. اخلاص..

تنهدت وحضنته : متهمني اخلاص..المهم انت موجود .. ضلينا كاعدين ما اعرف شكد ساعتين يمكن..حجيتله ع الحجي شلون وكف وياي من رجعت للعراق وشذى شكلتلي.. بعدين كمت لبست واخذت ملابس رحت للحمام اسبح اشتميت ريحة اكل مدري منو مسوي..سبحت وبدلت..رحت للغرفة انشف شعري : حبيبي كوم اسبح خلننزل ناكل..
رائد : يله..
كام لبس واجه باسني..بعدين راح يسبح..رتبت الجرباية وضميت الملابس بين ما كمل ونزلنا..كعدنا ع الاكل جان الحجي جايب من بره..شعوري شكد حلو جان..من رائد كاعد يمي وكلنا ملتمين..هسة رجع گلبي يدك من جديد .. احس كبل جنت بس جسد بدون روح..كملنه اكل ورحت انام لأن ميته نعاس وتعب..والدنيا ليل اصلا..بالدعش وشوية هو ضل جوه وانه صعدت تغطيت ونمت ما ادري شصار بعد .. ما كعدت للصبح..لكيته ماكو..

نزلت سويت ريوك وكعدنه نتريك..الحجي هم جان ماكو سألت خالة..كتلهه : خالة اشو ماكو لا الحجي ولا رائد ..
الحجية : كال طالع بشغلة..ويمكن يتأخر..
دنوة : ها.. خلصنا اكل راحت اخلاص تغسل المواعين .. كمت انه وجلنار شلنا الزوالي ومسحت البيت..كله تراب.. بين ما كملنه تنظيف صارت بالثنتين..رحت للمطبخ سويت غده خفيف وتغدينا..بعد هلكت من التعب بس اكلت وصعدت فوك .. سبحت ورحت للغرفة السبلت مشتغل حتى ما نشفت شعري بس حطيت راسي ع المخدة نمت..كعدت وره ما اعرف شكد بس الشمس نازلة ع الشباج..ورائد واكف يم الكنتور ديخابر ويكلب بالتلفزيون..حسيت جسمي نحلان وبلاعيمي منفوخة .. خليت ايدي عليهم..ادك ومنفخة..من وره السبلت وشعري مبلل لسه..جريت الخاولي لفيت بي شعري وتغطيت..هو انتبه علي.. ضل يحجي شوي بعدين سد

اجة كعد يمي وكامش ايدي..كتله : وين جنت..
رائد : جنت يم علي..
دنوة : علي..ليش وينه هو..غير بالكوت..
رائد : لا بس جاي اليوم يريد اشوفله بيت ايجار.. وهذول براس الفرع يريدون يأجرون بيتهم ويسافرون.. كتله تعال شوفه اذا يناسبك اكعد بي..
دنوة : بعدك تحاجي..وره كل السوالكياه..
رائد : شسويله..اطرده..اجاني يتوسل..ما احب ارد احد
دنوة : انت اعرف بعد..سكتت شوي بعدين كتله : خبيبي .. احسني مريضة.. مد ايده لرگبتي
رائد : اي مصخنة..شمسويه..
دنوة : شعري مبلل ونمت..
رائد : ولا تجوزين..هسة اطلع اجيبلج خافض حرارة وكبسول لبلاعيمج..اجيبلج شي وياي..
دنوة : بكيفك..كام باسني وراح ع الكنتور طلع فلوس ونزل

وره نص ساعه تقريبا اجه بيده علاكة وبطل مي..انطاني الكبسولة..خله العلاكة بحضني وراح..فتحتهه حلويات واشياء احبهه..ابتسمت..كمت نشفت شعري ونزلت جوه..مر اليوم عادي..جلنار واخلاص محد يحجي..يخافون منه .. الحجي شكد كبر بعيني..من يوم الجابني للعراق من ابوي توفى.. وهسة كام يوكف وياي من اخلاص تعيل بيه لو جلنار .. مر شهر ماكو شي جديد..كاعدين بالبيت..بيت جدي بعد ما عرفت عنهم شي..ولا احد خابرني حتى..ولا يكولون بتنا وتربت عدنا سنين..حتى جدي الحنين صار مثلهم..شذى هم معرفت عنهه شي..اكيد موجودة وين تولي مثلا..بس اكو سالفة وره هاي مال ابوج متزوجني من جان عمرج سنتين..ردت اروحلهه كبل اسبوع..كتله لرائد ..
رائد : بيج حيل مغثة..ختولي يابة..ناقصج شي كليلي
دنوة : لااا..ما ناقصني شي بس يعني..
رائد : عود اسأل عليهه انه..ليضل بالج..

وصدك وره هلشهر كلي شفت رزان بالباب وسألتهه على وضعهم كالت زينين..اي هم اكيد زينين بس محد كال شي وره وفاة ابوي ولو هو المفروض يصير العكس..وراها نزل للواجب كعدت كبلة..سويت جنطته وحضرتله الملابس كعد جان يبتسم..اول مره اكعد كبلة..سبح وبدل بعدين خلى فلوس يم الحجية وراح..محمد هم كام يشتغل بس ميجي للبيت كل اسبوعين نوبة..هو خريج لغات فارسي فكام يشتغل بالنجف مترجم..يعني بس احنه بالبيت وي الحجي..الحجي دورات من محمد هنا يطلعون..الوضع تحسن يعني عادي..وهاي هج مشى الحال..

وراها بفترة دخلنا الشهر التاسع .. چنت نايمة فوك وفزيت ع التلفون يدك.. مديت ايدي جريته..
جاوبت بدون ماانتبه ع الاسم : منووو..
رائد : ها يولي هاي تالي وكت تصيحين علي..
عدلت نومتي : العفو حبيبي مااقصد..ماشفت رقمك..
ضحك : يله ماصار شي يبعدي.. باچر رمضان تره..
دنوة : صدك..ماادري نايمة..
رائد : هاي لو تصيرين بمكاني شيصير بيج.. ديله حضريلي روحج بالطريق انه..
دنوة : ها عيني..شنو بالطريق..المغرب هسه..
رائد : اي طالع من العصر..ماضل شي واوصل.. وتدرين رمضان يعني خطية انه..
دنوة : ههههههه..اووي سوده علي خطية.. ماشي حبيبي انتبه للدرب..
رائد : تدللين انتي..

ودعته وگمت رتبت الچرباية..شلت شعري ونزلت جوه.. الحجي طالع يرجع بالليل..انطيت خبر لخالة حيجي رائد .. كيفت بي.. صارله عشرين يوم بالدوام..شگد تعب هلفترة بعده الوضع تعبان وانفجارات بكل فضيع.. بحيث انه بكل صلاة ماينزل اسمه من لساني..هواي صارت انفجارات يم المقر اليشتغل بي.. بس يصادف هو مو موجود لو طالعين مأمورية..

چنت العصر مسوية كيكة هيج اشتهيتها..عفت خالة وصعدت فوك سبحت وحضرت روحي.. لبست ونزلت يم خالة.. سويت عشه وفتحت التلفزيون اتفرج.. اجت گعدت يمي..
الحجية : يمة شعجب وليدي هسه طالع..
دنوة : ماادري گال طالع من العصر..
احنا ودنحچي انفتحت الباب وفات شايل الجنطة بيده.. طلعت تلگيته فرحانة بي..حضنته حيل..
بادلني وباسني من خدي : اويلي حبيبي شكد مشتاگلج..
دنوة : انه هماتين.. تعال فوت..
اخذت الجنطة منه..فات يغسل بعدين اجه ياكل.. گعدت يمه ومركزة بحركاته .. اريد اشبع شوف..خلص وكعد يسولف وي خالة بس تعبان بالگوة يحچي.. عاد هي كلتله روح ارتاح .. گمت غسلت المواعين وصعدت وراه..لگيته واكف دينزع الفانيلة.. سديت الباب ورحت عنده حاوطت رگبته ومرتچية ع الكنتور..
دنوة : تعبان حبيبي..
رائد : والله ميت تعب.. بس هلحلو جدامي نساني كلشي..
ابتسمت وبسته..

هديت ايدي ورحت ع الميزتواليت نزعت الروب شمرته ع الچرباية.. هو واگف ومبتسملي بنظرات خبيثة .. گمت انثر بشعري وامشط بي على كيفي..

راح گعد ع الچرباية وصاحني.. گعدني على رجله وعيونه تتلمس گبل ايده..
ردت افتح موضوع : حبيبي شكد حتبقى..
رائد : اطول.. ابتسم وقرب شفايفه من وره إذني يبوسني ويهمس : انه هذا اللبس يوج براسي نار..
ضاع هو ويبوسني وضيعني وياه.. ضليت بحضنه واحس بحرارة حبه ولمساته .. الفترة الابتعدنا بيها عن بعض مدتعوض .. طويلة وتأذي بكل ذكرياتها.. بقينا هواي .. خليت راسي على صدره وهو يمسد بشعري..
رائد : حبيبي مشتهي تحلاة..
دنوة : اامم..من حظك..اليوم سويت كيكة..
رائد : يله گومي سبحي وجيبيلي بين ما اسبح وابدل..
همهمت بالموافقة وگمت لبست الروب رحت سبحت ونزلت قطعتله وصعدت..الحجي راجع ورايح نايم ومحمد يجي الفجر ..

فتحنا فلم وضلينا نتفرج..هو نعس ونام..گال لاتكعديني ع السحور.. عفته نايم ورحت احضر .. اجه محمد شال البيت بسوالفه .. كلش فرفوش .. الحجي كعد وخالة وتسحرنا.. كمت اغسل مواعين واسمع صوته بالهول.. شگعده.. يله احسن..

وراها أذن وگمنا صلينا.. صعدت فوك قريت قرآن ناوية اهدي هلختمة لأبوي ورائد .. مايلحك من الدوام ولمن يجي تعبان مايسوي شي.. انه واقره فات هو..تمدد ويگلب بالتلفزيون.. خلصت وگمت تمددت من الجهة اللخ منطيته ظهري.. حسيت بي نصاه وجر الغطى غطاني وتغطه هو..

بين نايمة وگاعدة سمعته يهمس يمي : دناوي.. بنيتي .. لاتنطيني ظهرج يولي..
انداريتله والنوم بعيوني : چا شسوي حبيبي..
رفع الغطى وأشرلي..اجيت بحضنه .. شگد دافي .. ضليت حاضنته لحدما غفيت..

وهاي هيج مرت أيام رمضان..هادئة وحلوة.. رائد كل يوم يعزم واحد..يوم خالته يوم صحبانه..اخلاص مالها علاقة بيه هي وجلنار بس يشوفها يرزلها ..

بيوم جنت تعبانة وماصايمة..بطني تگوم توجعني من جوه.. فماگدرت اكوم من الفراش حتى.. ضليت متمددة والوب من الوجع.. رائد طالع وي صديقه بشغلة..لمن رجع شافني هيج اجه يمي خايف..
رائد : شبيها دنياتي..
كمشت ايده وضغطت عليها من الوجع : بطني ..
عطت وابچي.. گام جابلي مسكن هو يعرف من يصيرلي هلوجع شيسوي.. ضل گاعد يمي ويمسد بشعري..

صارت بالثنتين..
رفعت راسي عاينتله : حبيبي لازم اسوي سحور..
رائد : كعدي لاتگومين..اخلاص حتسوي..
دنوة : لالا..نايمة هي وجلنار..
رائد : انه اسوي عمي..هسه هو اكل ميخالف.. حروح وانتي لاتتحركين زين..
حركت راسي يعني اي.. باسني وراح ..

شواي واسمع صوته يگعد بمحمد .. محمد يصيح : لك بالماي المجرش تكعدني..الله يقبلها محمد..
واخلاص گعدت على صوت صياحه..تصيح خبلتونا هسه فهمنا رمضان.. ضليت اضحك عليهم وي دموعي التنزل من الوجع.. هو وره شواي اجه يدردم : سرسرية فوك ما اسويلهم سحور.. لو ضال نايم اشرفلي..
دنوة : شبيك حبيبي..شسويتلهم اكل..
رائد : سويت خير من الله.. راح ينزع تشيرته يلبس غيره : تدرين انه اطبخ من زمان.. من يوم شفت العسكرية وشافتني عرفت الطبخ..
دنوة : خاتون صدقة لربك..

كام يضحك واجه يمي..حضني وباسني من راسي : شلونها بطنج گلبي..
دنوة : زينة صارت..
رائد : يله ارتاحي يبعدي..
شبگته وأشم بريحته احسها تسكرني.. وفعلا هيج .. غفيت بحضنه..

وهاي هيج من هو هنا يسوي سحور دورات جلنار.. وانه علي الفطور.. رمضان دائما يكون شهر مميز بحياتي من كل النواحي.. حتى من الناحية النفسية هم تمام ..

وراها بفترة اجه العيد.. صباحية العيد چنت نايمة لأن بقيت للفجر انظف وي البنات..الأعرفه رائد دوامه هلأيام فمايجي.. بس ماحسيت غير الصبح سمعت صوته يمي يفتح البردة ويگعدني : حبيبي دگومي يولي هذا حظي المصخم بس ينيمج ..
كمت بتململ.. فركت وجهي وشلت شعري.. اجه شبگني بقوة وباسني من خدي وشفايفي ..ابتعد وضحك : عيديتي..
ضحكت وبسته بخده.. مد ايده على جيبه طلع فلوس مشدودة بلاستيكة.. حسب وانطاني..
دنوة : حبيبي اشكرك..
رائد : تأمرين أمر..
راح سبح بالعجل ونزلنا.. ام علي چانت هنا والبنات.. علي ومرام..اخت خالة اللخ ام جاسم هي وبتها.. وهيج يعني انملى البيت وصدك صار اسمه عيد..

بالنسبة لعمامي فبس عمي فيصل وابنه يونس .. عامر ابن عمي لواء اجونا ثاني يوم.. رائد ماقابل يفتحون موضوع جدي والصار بذاك اليوم فكلامهم چان على كد السؤال من باب صلة الرحم..

وره ما خلص العيد العصرية اندكت الباب جنت دا ارتب بالكوشات خليت الشال على راسي وطلعت..نسوان اول مره اشوفهم .. ثنين كبار بكد الحجية وثنين اصغر بكد اخلاص جلنار هج يعني..كتلهه بابتسامة : معرفتكم..منو..
- : انتو مو بيت ام رائد..
دنوة : اي..

- : اي هو احنه جاييكم بشغلة..
دنوة : هلا بيكم..فوتو..طبو ..سديت الباب وراهم وطبيت اجت خالة على صوتهم..اخذتهه على صفحة ورحنه للمطبخ ..كتلهه : هذوله مدري منو..يكولون رايديهه بشغلة..شوفيهم بين ما اصب شوف شنو وشربت..
الحجية : عرفتهم منو..كلتلي عليهم اخلاص..
حجت هج وراحت..شكلتلهه..منو هذني..سويت العصير والحلاوة جان تجي اخلاص..حاطه الشال شلون مجان وبنطرون وقميص ..اجت اخذت الصينية من ايدي وراحت بدون ما تحجي شي..ضليت اتصنطلهم ..الظاهر جانو فايتين بالموضوع..
- : مثل ما تعرفين حبيبتي..اليريد يعيش مرتاح لازم نته صافية وعلى حسب الأصول..واني اريد اخطب اخلاص لابني طارق هو يشتغل وعنده شهادة..يعني يعتمد عليه..

الحجية : اي نتشرف..انه عن نفسي موافقة..بس اشوف اخوهه الجبير شيكول..وهي همات..
- : اي على راحتكم عيوني..احنه بالمسيب مثل ما كتلج ومعروفين بالمنطقة..بس تكولين بيت ابو طارق..
الحجية : اي مبينين ناس اوادم..ان شاء الله اسبوع ونردلكم خبر..
تبادلو الارقام وضلو شوي بعدين راحو..انه طبيت للمطبخ اسوي شي اكله..جان تجيني اخلاص فرحانة وتغني .. ضليت اعاين عليهه..هاي شبيهه..عفتهه سويت نفسي مو يمهه..
اخلاص : لج شلون اذا رائد ماقبل..
دنوة : هو منو هذا..
اخلاص : نفسه السمعتيني احاجي جلنار علي..
دنوة : والله ما اعرف..هو اذا راد يسوي شي فحيسوي لمصلحتج مو علموده.. شكو مفاولة من هسة..
اخلاص : اذا ما اقتنع انتي تقنعي..

دنوة : انه شكو بكلشي مدخلتني..هو اخوج يتحاجه..اذا راد يسوي شي ما اكدر امنعه..
اخلص : معلية..كتلج تقنعي يعني تقنعي..هسة امي قنعت وقبلت بعد بس رائد..ومحمد يوافق على موافقته..
عفتهه مجاوبت..شدعوة هلكد كاتلة نفسهه علي..منين تعرفه اذا هو من المسيب وهي بالبصرة..يله شعلية..بلكت تزوج وتروح اخلص منهه..ادور حيرجع الدوام طبيعي وبعد كشاية متشيل من الكع..مدللة اسم الله..خلص اليوم عادي..وراهه بيومين اجة صگر..نزلت سلمت علي ..اخلاص كاعدة وتفرك بايدهه..هاي هلكد تخاف منه..شو ما احسه يخوف ..ولو هو يمي يصير غير شكل..ضل كاعد شوي بعدين صعد فوك ..اخذت جنطته وصعدت وراه..حضنته وبسته ..كتله : مشتاقتلك..همزين ما طولت..
بابتسامة : لا ما اطول بعد..ضال يمج..

دنوة : هههه..الله يطول بعمرك..روح اسبح بين ما اسويلك شي تاكلة.. باسني وراح..نزلت صبيت الغده..جنت مسويته وصاعدة فوك ابدل..فرشت السفرة واجت جلنار اخذت الاكل .. كعدنه بين ما اجة..جان تفتح خالة الموضوع..
الحجية : اكلك يمة..اريد احاجيك بسالفة تخص اخلاص..
رائد : اي شبيهه..
الحجية : اجوهه خطابة..من اهل المسيب..تكول ابني يشتغل وعنده شهادة..هي شايفتهه ذاك اليوم من طلعت تشتري ملابس وي جلنار وعاجبتهه..
رائد : ليش لا..نسأل عنهم ونشوف..
الحجية : وشنو حتروح للمسيب يعني..
رائد : اي اروح..ما اريد ادز احد يجوز يطلع جذاب..
الحجية : يله بكيفك..

كملنه غده وكمت اغسل المواعين..خلصت وصعدت فوك ..لكيته منتجي ع التاج وايده ع اللحاف بيهه الريمونت وغافي.. ابتسمت ورحت اخذته من ايده ع كيفي وغطيته..ضليت بالغرفة اتفرج تلفزيون لحدما كعد العصرية..بعده نفس الحنان والاسلوب.. صار حنين اكثر من توفى ابوي..كل ما يشوفني ابجي يكلي انه ابوج..وشتريدين اصيرلج بس ما اريد اشوف دموعج..صدك عوضني عن هواي ناس خسرتهم ..كل ما يشوفني ضايجة يكلي بدلي اطلعج..لو يجيبلي حلويات .. حتى تلفون جابلي..يعني ما قصر..جلنار من شافته هلكد مهتم بيه واول ما يجي من يطلع يكول وين دنوة..كامت تعاديني وتحجي حجي ماصخ..ها ام الرجولة..مرة رجلج القديم عساس عاگر وخلفت..انتي شبيج حتى الطفل ما ثبت ببطنج..اي اذا انتي طفلة شتجيبين مثلا..بالبداية اسكتلهه..

لأن رائد موجود .. بعدين من يلتحق اجاوبهه ما اسكت.. تكلي وانتي شمفهمج بالرد شلون يصير..اكللهه اي ما افتهم فهميني انتي..تسكت وتروح..
وراهه بيومين اجة محمد وطلع رائد للمسيب هو وياه ..اجة بالليل يصيح..صاح على خالة..
رائد : يمه وينج..هاي شجايبتلي ناس تعبانة..
اجت خالة من الغرفة..جانت دتاخذ دواهه..
الحجية : خير ياستار..شكو عليمن تقصد..
رائد : يعني عليمن..غير هذا طارق مدري قندرة.. ابو كضاهه افرار وهو يشرب..شهادتيش هاي الماخذهه..
الحجية : صخام..جا شكو خبصتني بابنهه..
رائد : كليلهه اخوها ماقبل..شنطيهه لهيلكية..
ديحجي جان تجي اخلاص..كامت تبجي وكعدت يمه تتوسل بي وبمحمد..ضليت صافنة عليهه..

اخلاص : رائد الله يخليك لا تسوي هج..ليش متقبل ..والله جذب السمعته..خوش ولد بس الناس تريد تخرب..
عاين عليهه بعصبية ورافع حاجبة : وانتي شمدريج بي خوش ولد..دااكلج يشرب بالباب وكلساع متعارك وي واحد وماخذي للمراكز..واذا عنده شهادة..الشهايد مطشره ..ومنو يكول هو ماخذهه بزوده..بابا هذا مشتريهه شوف منين وجاي يحجيلي بالشهادة..لا تفكرين مجرد تفكير..بعدج ما تخرجتي والف واحد يتمناج..انه اكبر منج واعرف مصلحتج..
اخلاص : يمه فدوه دشوفي شديكول..يعني شلون ليش هج تسوي..شكد حقير وماعندك ذرة احساس..
محمد : شبيج يابة..تره ديحجي لمصلحتج..عيب تكليلة هج .. هسة هو يجذب..انه هم اجذب..رحت وياه وسمعت باذني
اخلاص : اي كلكم تجذبون..واذا ماقبلت احرك نفسي

رائد : يله روحي..اليسمعج يكول مراهقة..روحي يابة لا تعبيني فوك تعبي..
الحجية : يمه اخوج ديكول الصدك..شنو مصلحتة خاطر ما يقبل ويشوف اخته سعيدة..خيرهه بغيرهه..وانتي مو بايرة داتسوين هيج وتحركين روحج..
كامت من يمه وراحت يم الباب : الله لا يشوفك الهنا مثل ما وكفت بقسمتي..
محمد كام من مكانه ويصيح بوجهه..كمشه من تشيرته..
رائد : عوفهه..متعرف وين مصلحتهه..لج اكبر منك بيوم افهم منك بسنة..اكبر منج بـ١١ سنة جايه تعلميني..يمه اخذيهه فهميهه..
كامت تبجي وراحت..خالة عافتنه وراحت وراهه.. خطية كضتهه ركض من وره اخلاص..ساعة تكللهه لا تعادين مرة اخوج..بالكوة تكومهه تشتغل..متعلعلة وياهه..

انه ضليت كاعدة شوي بعدين رحت للمطبخ اسوي عشه.. شوي واجه رائد..حضني من ظهري وباسني..
رائد : تعبت من الطريق..
دنوة : الله يساعدك..مشتهي شي اسويلك..
رائد : كلشي طيب من ايدج..لا تعبين نفسج عمري..
ابتسمت وانداريت بسته..ضل كاعد يمي بين ما كملت وصبينه اكل..اخلاص كالت ما اريد لحد يصيحني..اول مره اشوفهه هج منهارة وتبجي..هاي كلة علمود هذا مدري منو.. يله .. روان مو تحب عقيل هو يشرب ويدور وراهه..حتى تزوج عليهه وبقت متمسكة بي..مدري ششافت بي..

خلصنا وكمت اغسل المواعين..مرت الايام وخالة انطت خبر مموافقين..اخلاص من عرفت كلبت البيت بچي وصياح.. حتى اجت علينه بالليل..تبجي وتصيح..
اخلاص : رائد اذا ماكتلهه لامي موافق اعوف البيت..
كام من مكانه وكف جدامهه : شنو تعوفين البيت.. بابا شنو قابل ما اريد سعادتج انه..بس اذا تزوجين حيبهذلج.. سمعي مني انه مو عدوج..
كامت تبجي وحضنته..انه ما ادخلت..خفت احجي شي.. ضلت شوي بعدين راحت..اجة يمي..
رائد : كسرت خاطري..بس خايف انطيهه..
دنوة : يعني شحتسوي..
رائد : خليهه تتعود بعدين..احسن مما انطيهه وتجيني زعلانة كل فترة..ولو انه مو هاي غايتي بس ما اريدهه تتبهذل
دنوة : بكيفك..انت تعرفهه هي تلح لو زينة..
رائد : ما ادري..باچر التحق..ديري بالج عليهه..

دنوة : تدلل..ثاني يوم الصبح راح للواجب..مر اليوم عادي .. وره يومين كعدت الصبح على صوت صياح جلنار.. وخالة واكفة يمهه تهديهه..شافتني جان تجي ع الدرج بالعجل .. كمشتني من شعري وجرته ليجوه..صحت : اخ اااخ.. شعرري شبيج تخبلتي..
جلنار : لج بايگة بتوتي..
ضليت صافنة عليهه..كتلهه : شو وخري ايدج..شنو ابوكج .. بحالج انه..ليش اخذ شناقصني..
جلنار : ناقصج غيرة وشرف..شمسوية روحج شريفة براسي .. نصت صوتهه وهمست باذني : بعدين احجي هسة ما اكدر
صحت بيهه : شريفة غصبا ما عليج..روحي دوري كنتوري اذا لكيتي بتوتج شتريدين تسوين سوي..
جلنار : هااا هيج..يله حروح اشوفه..

عافتني وصعدت من كل عقلهه فوك..صعدت وراهه بس ضليت واكفة بالباب..اندارت وبيدهه علبة صغيره مشايفتهه كبل ..
جلنار : هاااا مو اكلج بواكة..متستحين على نفسج.. بس يجي رائد احجيلة..لعبتي بعقلة وخليتي يصدكج من جنتي انتي وعلي بس هسة متكدرين..
دنوة : هاي شنو..هاي شجابهه هنا..
جلنار : اي سوي نفسج فقيرة بعد..بسيطة ياثولة.. بهاي عملتج حتخسرينه..وكولي كالت جلنار..
دنوة : باع هاي شلون تحجي..تره رائد عاطف عليج وجايبج هنا..لا تضلين تحجين حجي اكبر منج..
جلنار : تدللين..ضلي كولي هيج لحدما تشوفين بعينج
عافتني وراحت..هاي شبيهه السخيفة..بس نزلت مسمعت صوتهه بعد..معقولة ماحجت..هي بس تصيح على أسخف شي ..شو هسة سكتت..

سديت الباب ونزلت..رحت للمطبخ جان تجيني خالة..
الحجية : هاي شرادت منج السعلوة..
دنوة : تكلي بايكة بتوتي..راحت للكنتور وطلعتهن.. هذني شجابهن يمي..خالة تدرين بيه ما اسوي هج سوالف ولا علي بيهه..بس شجابهن يمي..ادور هي اخذتهن وسكتت ما كالت شي ..مثل واحد متقصد..
الحجية : الله يستر..شوف شتريد تسوي..عوفيهه انتي
دنوة : اي هو عايفتهه شعندي وياهه..
خلص اليوم عادي..وره يومين طلعت من الحمام رحت انشف شعري جان تجي اخلاص..طبت وسدت الباب وراهه.. ضليت اعاينلهه..هي متجيني بس من تريد شي..
اخلاص : اريد احاجيج بشغلة..
دنوة : اي شنو..
اخلاص : رائد بعد اربع ايام يجي..

اذا ما قنعتي يقبل بطارق اكلة مرتك تبوك..توقعي كلشي اسوي اذا ما سويتي الاريده..دتفهمين..
شهكت وخليت ايدي على گلبي : وانه شعلي تكليله هج عني .. هو يعرفني حتلو حجيتي مراح يأثر شي..
اخلاص : لا حبيبة هلمره مو مثل كل مره..سوي الاريده واعوفج بحال سبيلج الى يوم الدين..
دنوة : وشلون اذا ماقنع..
اخلاص : لا يقتنع..كليلة خطيه تخربطت وهي اختك شلون متنقهر عليهه..المهم حاجي شلون مجان..شبيج ثولة قابل ما تعرفين..هو يحبج وحيسمع كلامج..
دنوة : وانتي علمود هاي جايتني..
اخلاص : واجيج مرتين وتلاثه..اذا ماقنع من اول مره مو تعوفي ..ضلي جربي وياه فدوة..يعني انتي مو تزوجتي عقيل رائد عاف الدنيا كلهه وميحاجي احد..

منشوفه بس اسبوع بالشهر..وهم من يجي لو يروح على ابوج يتعارك ويصيح لو يجي ينام..ساكن الغرفة..الفراك صعب اكيد دتحسين بيه..وانه احبه وادري بي مو مثل ابوه..فلهلسبب دااكلج كولي لرائد وقنعي..
اخذت نفس وكتلهه : ميخالف..يجي واحاجي..عافتني وراحت انه وانشف شعري تذكرت سالفة البتوت..يعني هي وجلنار متفقات علي..علمود يكمشوني من هاي النقطة..وانه اكول ليش جلنار اخذتهن وراحت بدون ما تكول شي.. شنو هاي وين عايشة انه..شنو هذني..شنو من عقول شايلات..يعني اتجنبهم وما اجاوبهه تصير مشكلة شكبرها شكدها..اجاوبهم اطلع غلطانة وهم تصير مشكلة جبيرة..شسوي بهاي الحالة .. اعوفهم واروح..ولو وين اروح..مجبورة ابقى هنا واتحملهم .. اذا هم كالوهه بوجهي متبرين منج الى يوم الدين شترجى منهم بعد..وهاي شذى اصلا غاسلة ايدي منهه..

لفيت شعري ونزلت..ردت اروح ع خالة احجيلهه..ع الاقل يصير عدهه علم مو وحدي احجي..جان تجي جلنار عتتني من زندي..
جلنار : اذا حجيتيلهه شي والرب يصير شي مايعجبج
دنوة : شبيج بابا..منو كال اريد احاجيهه بهذا الموضوع
جلنار : ادري..يله ولي لغرفتج ولا تفكين حلكج..
جريت ايدي منهه وطبيت يم خالة..هي من شافتني فتت بعد مكدرت تحجي..خزرتني وراحت..حجيتلهه شصار..
الحجية : رائد ميقتنع..ولا تورطين روحج وياها خالة.. ادور يطلع مو خوش وانتي تبتلين..
دنوة : مو خطية حالتهه تقهر..خاف تسوي شي بروحهه
الحجية : لا لتخافين عليهه..هو اخوهه ويعرفهه..انه ماغاثني غير من اجت تحمدلي بابنهه وابني وابني..بعدين طلع هيلكي فوكاهه بنفس المنطقة ضالين..ياستار منهم..

دنوة : اي خوما تكلج ابني يشرب وابني هيج وهيج..
الحجية : اي صحيح..ولو بس ميصير هج..جان من البداية كنالهم لا..بس هي اخلاص تحبه..
جاوبتهه بهمس : الحب اعمى بعد..
الحجية : اي والله..اعمى..الله كريم ..تصفى..
مرت الايام عادي..وراها اجه رائد..مثل كل مره نزلت سلمت علي بعدين صعدنا فوك..بالليل صعدت بدلت وانتظرته .. ضليت اكلب بالتلفون بين ما اجه..طفى الضوه واجه يمي .. عفت التلفون وحضنته..كتله : ماحنيت على اخلاص..
رائد : ليش شبيهه..
دنوة : تمرضت خطية..ضليت كاعدة وياهه للصبح.. شبيك بلكت الرجال مابي شي بس ابوه علي سمعه..
رائد : يولي اكلج يشرب..تعرفين شنو يعني..يعني يدمرهه دمار..انه ضابط واكثر الضباط يشربون واعرفهم شنو..

دنوة : شلون يعني..حتضل هيج متعذبة..
رائد : خليهه تتعذب هسة ولا بعدين..
دنوة : بس...
رائد : لا بس ولا شي..كليلهه لا تضل تتوسط يمج.. انه مو صغير واقتنع بالعجل..ختقنع محمد اي..بعده شاب ومندفع يمكن تبجي جدامه دمعتين ويقنع..بس انه لا حطب الاربعين يولي..ما تقنعني الدموع..عشت هواي .. مو يكولون من عاشر قوم اربعين يوم صار مثلهم..عشت شهور وي القتلة والحرامية شفت بنات يجيبوهن من بيوت حرام وتجي تبچي جدامي سيدي بريئة وسيدي بريئة.. ما تعاطفت وياهن.. فاخلاص حتلو تبجي اعرف مصلحتهه وين..
شكد فشلت من كال لتضل تتوسط يمج..هذا شلون يعرف كلشي والله ديقلقني..كتله : بكيفك..بس انه انقهرت عليهه وردت اكلك..بعدين صدك..

شلون ما تقعنك الدموع ومن تشوفني ابجي تنقهر علي.. كام يضحك من كل گلبه..
رائد : هههههه..وانتي عفتي الحجي كله اجيتي على هاي .. انتي غير شكل..اكو اب يشوف بنته تبجي وما ينقهر عليهه .. يوم الخابرتج من ابوج عرف لكيتج تبجين..انه منا توني نازل من الواجب ميت تعب..ادور اكلج سكتي يابة..بنيتي سكتي ما يفيد..هسة منو يخليج تبجين هنا..
ابتسمت : احبك..
رائد : احبج بكد حبي لامي والله..اريد اعوضج عن كلشي خسرتي..بس الوكت ديركض ..شوكت ما انزل للواجب احسه يمشي بالعجل..بس اروح للدوام الدقيقة تصير بساعة.. بس بعد الوضع زين الحمدلله..عندي وكت ارتاح بي واخابرج
دنوة : اممم تخابرنيييي..اي فهمت فهمت..
رائد : ههههه..يولي لتصيرين لوتية..خليج فقيرة تعجبيني

ابتسمت وحضنته..ضلينه كاعدين للاربعة..حضني ونام انه ضليت كاعدة..شسويلهه بعد لاخلاص..حاولت وياه كبل هاي المره اربع مرات وماقبل..اذا احجي مرة اللخ يرزلني .. خلاسكت واكللهه ما يقبل احسلي..اجت ببالي افكار يعني .. ما ادري ليش انقهرت من عرفت عمره حيصير اربعين.. بعده ما شايف شي شبالعجل.. حتى ما صرت حامل.. حيصير شهرين يمكن الاسقاط الصار أثر ع الحمل هسة.. خلاصبر شهر بعد وراهه اكول لرائد ياخذني لدكتورة شي.. حتى اذا بيه شي شوف شسوي..هي تعرف اكيد..مرن يومين اخلاص دنتنظرني احاجي.. لحدما ثالث يوم رائد طلع المغرب كال حجيب اكل وشغلات مال تعليلة..طلعت وياه سديت الباب وطبيت..اجتني اخلاص
اخلاص : ها بشري حاجيتي..شكال..
دنوة : اي..بس ميقبل..
اخلاص : اهوووو..بس اريد اعرف انتي من شنو مخلوقة .. كتلة ثول لو بشر عظم ولحم..

دنوة : اكلج انه شعليه مدخلتني بكلشي..هو ما يقبل.. ميقتنع يكلي مو جاهل امه وتجين تقنعيني..
اخلاص : خوش..حاولت بكلشي اكدر علي..وكلبت الدنيا بجي وصياح وماقبل..وانتي الكلبة هم ماكدرتي تسوين شي .. بس بسيطة..هسة يطلع كله من جوه راسج..حييييه..
دنوة : انه شكووووو..شبيج تغلطين علي انه شعلي .. سالفة انتي واخوج شكو مدخلتني بيهه..عوفيني بحالي عوفيني.. شتردين مني والله لعبت نفسي منج..
اخلاص : يله ولي..هسة تشوفين شحسوي..
دنوة : يله سوي بكيفج..متهميني..عفتهه ورحت..والله شبيهه تغلط علي انه شكو..هو يعرفني من عيوني تريدني اجي احاجي بسالفة الهه علاقة بحياتهه كلهه..

همزين ماقبل الحمدلله ربي..جان طلع مو خوش وتنذب براسي..يكعد رائد يعاتب بيه..من وراج ومن وراج شوف ربك ما يريدهه تصير..من البداية تعرقلت..لأن من چنا بسوريا سمعتهه تكول لجلنار هو راد يجي يخطبني كبل لا نسافر بشهر..بس صار السفر وبعد ما ادري يمكن عرف يمكن لا..مثل عقيل..شكد بجيت وصارت مشاكل حتى بزواجتنه بعدين كلمن راح بدرب..بله انه رائد يحبني من زمان ورايدني.. بس هي شلون..ولو ما احبهه بس خطية محد يستاهل يتبهذل.. الله يخفف عنهه شرد اكول قابل..

بالليل اجه جايب حلويات وجباسة وهواي شغلات حتى دومنة.. الحجي حجه..
وائل : فرحان اليوم..
رائد : هههه..اي والله..صدك ردت اسألك..علي شخباره
وائل : باجر حينتقل للبيت الكتله علي..
رائد : ها..يله خوش..
كعدو يحجون..اخذت الاكل سويته بمواعين وكعدنا نتعشه .. بعدين وره العشه بساعتين تقريبا هج صاحني العب دومنة وياه هو ومحمد واخلاص..صارت مسرحية مو لعبة.. يجي دوري وانه صافنة شخلي..محمد يكلي يله لتصفنين ..اكله ماعندييي شخلي..بعدين بالاخير صرت وي رائد والحجي صار بمكاني..بقينا كاعدين لـ١٢ بعدين لميت الكشور والدومنة وصعدت فوك..شوي واجه صگر..نزع التشيرت واجه يمي .. يتغزل ويحجي بهمس..
رائد : احبج..يعني شلون..اريد اقفل عليج بگلبي..

حاوطته من رگبته وتقربت علي..كتله بهمس ودلع : هو انه الك ولگلبك.. ابتسم وحط راسه بحضني..ضليت العب بشعره .. مليان شيب..كتله : ليش هيج شعرك مشيب فد دور..
رائد : من التعب والبعد..انتو هناك غربة وانه هنا هم غريب احس روحي وحدي..ماكو احد احاجي..كل يوم من اريد انام اتمنى يطلع كلشي حلم ونرجع سوه..اتمنى المخدة حضنج وارتاح بي..الحمدلله على كل حال..رجعنه مثل كبل
دنوة : مثلييي..شوف والله جنت اكول هسة اكيد حبيبي ديفكر بيه مثل ما افكر بي..
رائد : اذا بيج مافكر بيمن افكر..
ابتسمت وكتله : رائد..اذا الشهر الجاي مصار حمل اخذني للدكتورة..يمكن الاسقاط أثر..

رائد : ميخالف..ما مستعجلين..
نزلت جسمي بحيث صرت مقابيله..كتله : ادري بيك دتكول هيج علمودي..بس بداخلك غير شي..
رائد : الي بداخلي على لساني..لا تكولين هشكل..
اخذت نفس وسكتت..ضليت افكر..اكول بكل مره ينزل بيهه من الواجب احس بعالم ثاني..احساسي بوجوده يختلف.. يحبني وداير باله علي بكلشي .. بس يشوفني صافنة يجي يحضني ويحجيلي حجي حلو .. يكلي من تضوجين احجيلي.. ما امل منج حتلو عدتي الموضوع اكثر من مره..وصدك كل ما احس روحي متضايقة اروح يمه..هو يعرفني من تصرفاتي .. من عيوني من كلشي اسوي..فيعوفهم ونصعد فوك..اكوم ابجي واتذكر ابوي..بالبداية يعوفني على راحتي بعدين يهديني وهاي هج خلصت الايام ومر شهر ثاني ..كامت اخلاص تعيرني وشدت كورتهه وياي..هي وجلنار..

جلنار بهاي الفترة من انه اغسل مواعين لو ما كاعدة يم رائد تجي هي تخلي طه بحضنه لو تمشي جدامه وتلف بشعرهه يعني حارت شتسوي..رائد عيوني..ورائد عيني.. كله هج تحاجي وتخلي حمرة ومسكارة لو تتمكيج ع الاخير وتكعد هي واخلاص..ومن اجي احاجيهه اكللهه ليش تلبسين هيج جدام حبيبي..عناد هو لو شنوو..
جلنار : وانتي شعليج..هو هم رجلي تره..
دنوة : لا مو رجلج..انتي هنا ولشي..لا تنسين روحج لوما رائد جان انتي متهجولة بالشوارع..خلف الله علي..
جلنار : اي احجي احجي..كله مضموووم..يطلعلج فديوم بغير شكل..يله روحي عيوني..
عفتهه ورحت..هاي ليش هشكل تحجي..شتقصد عود والله مليت من حجيهه كله الغاز..

بالليل تعشينا جان اخلاص تحجي..
اخلاص : رائد اريد فلوس..اشتري ملابس للدوام..
رائد : ميخالف..شكد تحتاجين..
اخلاص : يعني ميتين وخمسين ..
رائد : باجر انطيج الصبح روحي وي امي اشتري..
انه اكل وانتبهت على جلنار شلون ترفع بردان التشيرت ودنج
جدامه..لوما حرام وعيب جان جريتهه من شعرها وسحلتهه.. كامت تتمادى زايد..شنو هاي التفاهه..مدري شلون خلصنه عشه وكمت اغسل المواعين..رائد ما اجه وراي مدري شعجب.. يمكن كاعد يمهم..بس كملت صعدت فوك .. سبحت وغيرت ملابسي وهو ماكو..بالوحدة يله صعد..طفى الضوه واجه ينام..ما حاجاني ولا كلمة..صدك ضليت فاكة حلكي.. شبي ويايه..اليوم جان عادي يكول ما تعبان..

ما حاجيته..ضليت اكلب بالتلفزيون بعدين نمت ..ثاني يوم هم نفس الشي..ما يحاجيني بس على كد السؤال..جلنار شافته هيج جان تضحك وتمر من يمنه تكمشه من ايده..وخرت ايدها وخزرتهه : شكو مادة ايدج..
رائد بنتر : عوفيهه ولا تضلين تعاديهه..
رفعت راسي مصدومة الف صدمة..من شوكت هو يحاجيهه هج ومهتملهه..شمسويتله هاي الحقيرة..دنجت راسي كتله : ماشي.. عفتهم ورحت يم خالة..كعدت يمهه ..جانت دتسبح استغفرت وكامت تمسح على شعري..
الحجية : خيرج حبيبتي..شو ضايجة..
دنوة : لا..مابيه شي بس كلت اجي يمج.. ضليت كاعدة يمهه بس بالي مو هنا..ليش رائد متغير..هو ضل بس هذا ادور يغيروه علي..وين انطي وجهي..

اذا بقى نفس الشي احاجي..ما اتحمل هج جفو واسلوب حاد..مر اليوم عادي..وثاني يوم هم..لحد اربع ايام هو نفسه ما يحاجيني..يطب للغرفة كبل ينام..ماردت افشل روحي واروح احاجي..مبين ما يريدني احجي وياه..انتظره وين حيوصل .. جلنار استغلت البعد الي صار بيناتنه وتجي تتلزك بي.. كعدت من النوم متأخرة..نزلت جوه لكيته واكف ع الدرج وهي واكفة جدامه تحجي وتغمض بعيونهه بهداوة ومبتسمة .. ماادري شصار بيه..نار اكلتني..نزلت كمشتهه من زندهه ودفعتهه باية ليجوه ع كيفي..كتلهه بابتسامة بس انه متوترة : خيرج .. ان شاء الله خلصتي حچي..تكدرين تروحين هسة..
جلنار : اي وشدعواج..جنت اريد اكلة محتاجة فلوس..
دنوة : اي انطاج هياتهن بيدج..نزلت وأشرت بيدها : عشتووو انداريت علي كتله بهمس : عاجبك هج تحرك بيه..

عاجبك البعد السويته بدون ما اعرف ليش.. احجي اذا غلطانة كلي..ليش تسكت..تعبت من وراهه..اموت من اشوفهه يمك .. ادور شلون تحاجيك وانت راضي..عاينلي من فوك ليجوة وصعد.. وصل لاخر باية وحجة هو وداير وجهه..
رائد : راجعي روحج..شحاجية شمخبصة..
ضليت صافنة..شنو شحاجية..ليش شمسوية..اصلا لمنو حاجية..شبي هذا يحجي الغاز موتني.. نبرته الجافة حرگتني ما متعودة علي هيج..ضليت اليوم كله افكر بي..ليش هشكل متغير..اكيد اخلاص سوت شي..بس شسوت..هو يحبني وما يصدكهم حتلو حجو جدامه..شصار هسة..كلت بالليل احاجي بس صعدت لكيته نايم..كمت ابجي بدون صوت.. طفيت الضوه ورحت تمددت من الجهة اللخ..طلع الفجر يله نمت بس راسي موتني من التفكير..

باجر احاجي يعني احاجي..لو مدري شيصير.. بعد يومين ويروح للواجب..ادور يروح وهو زعلان مني وماخذ بخاطره .. عفت كلشي وراي وغفيت..كعدت الصبح على صوته
رائد : كومي احاجيج..
جر الغطى مني..عاينت وراه..اخلاص واكفة وعيونهه حمر مبينه باجية..انه ما نايمة زين منا ..ومنا اجه كعدني من يوكت جانت بالعشرة وشويه..شافني مدا اكوم صاح بيه..
رائد : مسمعتي لو شلووون..
دنوة : شكو شبيك خوفتني......

يتبـــــــــــــــع.......................

* اعتذر ع التأخير بس دااصوم هلايام واتعب شوي ، المهم نجي على موضوعنا ، بعد شگد وتخلص القصة؟..
بنات بعدلها هواي ، وان شاء الله برمضان حيصير التزام اكثر لأن عندي وقت اطول وقراءة ممتعه😘❤️.