رواية اسألي عني الليالي الفصل السبعون 70 - بقلم رقية جاسم

ليلية تمشي روحي ..
ثعوالة عشگ لأراضينا ..
حريمة ضعنا وضاعت معانينا ..
والمات ماظن يجي ويغنّينا ..
وأرد لنگوش الهوى ويمينّا ..
وعيوني على اسمك وأحچينا ..
ياهلبت تمر وتحيينا ..
" بقلمي "

.......................................

گعدت الصبح حلمانة بي .. اليوم اروح اسجل ايمن بالمدرسة .. حبيبي چان يريد يشوفه بزي المدرسة .. گمت غسلت ولبست بنطرون اسود وقميص نيلي .. بس لخاطر ايمن غيرت اللون .. لأن يگلي ماما لمن تسجليني مدرسة البسي الوان حلوة كافي اسود .. خليت كحلة وشي خفيف .. گعدته بدلتله واخذت جنسيته وچم شغلة بعد ..
انه گاعدة جدامه داادگمله القميص رفع راسي : ماما..
دنوة : ها حبيبي گول ..
ايمن : بابا مايجي ويانا .. شو تأخر ..
دنوة : حبيبي مو فهمتك بابا بعد مايجينا .. انه وياكم مثل بابا عمري ..
ايمن : يعني هو مات ..
عاينتله وبالگوة كامشة دموعي .. : اي حبيبي .. يله امشي خلننزل هسه بيبي تنتظرنا..

عدلت شعره وراح نزل يم خالة .. رحت على ديمة بستها ومسحت على راسها .. حبيبتي شگد تفز بالليل .. ماتنام نومة عدلة ..

طفيت الضوة ونزلت جوه .. لگيت خالة مسوية ريوگ وخالو كاعد دينتظرني .. صبحت عليهم وتريگنا ..
الحجية : يمة چا اجيت وياكم بس رجليه اسم الله عليج..
دنوة : ميخالف خالة قابل وين رايحين ..
كملنا واخذنا خالو للمدرسة .. چنت محضرتله صور صغيرة وماخذة كلشي .. المعاونة بلشت تملي الاستمارة وتسألني عن اسمه والسكن والمستوى المعيشي وغيرها ..

بالأخير گالت .. : عمل الأب شنو ..
دنوة : متوفي ..
عاينت لأيمن شلون گاعد بهدوء يم خالو ويعاين ع المعلمات والكتب ديوزعون .. كملتله ورجعنا للبيت .. لگيت ديمة گاعدة وتفتر بالهول : بيبي اوّكت (شوكت) تجي ماما..
خالة أشرت علي : هيانها اجت ..

اجت ركضت علي چيتت بحضني .. شلتها وأبوس بيها .. بس انه وخالة وخالو متعودة علينا .. تخاف من الكل .. شايلتلها هم شلون حتروح مدرسة وهي فقيرة .. سويتلها اكل وگعدت اوكلها واتذكر الحلم ..

چن داافوت للغرفة لگيته گاعد ع الچرباية ولابس دشداشة بيضة كلش .. لاف السبحة على ايده ويدخن مبتسم .. شعره اسود فحم مثل لمن شفته اول مرة .. مابي شيب .. گعدت يمه وحاضنة ايده بين إديه ..
عاينتله وابتسمت : حبيبي شگد حلو طالع ..
سكت ماجاوبني .. تقرب باس راسي وعيوني .. حضن راسي بين إدي .. گال : مشتاگلكم يدنياتي..مشتاك لحضنج وعيونج العسليات ..
دنوة : ليش حياتي انت مدتشوفنا..
عيونه دمعت : اشوفكم حبيبي .. بس يابوية روحي لايبة عليج .. شلونج انتي زينة..
مسحت دموعه وخليت راسي على صدره بحنية وامسد بظهره : اي حبيبي زينة .. انه همات مشتاقتلك ..
ضليت حاضنته واسولف وياه .. اجت ديمة لابسة فستان گصير ورجليها بيض مدبدبات ..  وخرت عنه .. ديمة تقربت منه شالها يلاعبها ويهزها على رجله ..
عاينلي بتعب : ديري بالج عليها يروحي .. تره احبها ..
دنوة : اي اكيد ثنينهم بعيوني ..
رائد : سالمة عيونج يبعد اليشوفن ..

فزيت على صوت الماعون طاح بالگع وتكسر .. ديمة رأسا بچت تخاف..
شلتها واسكت بيها : اشش حبيبتي ماصار شي هسه اشيله ميخالف طار الشر ..
خليتها يم خالة ودنجت لميت الگزاز .. مسحت مكانه وصعدت فوك ابدل ..

گبل فترة دااگلب بالصور مالنا ولگيت وحدة اله لمن صار عيدميلاده .. چان كاعد ع القنفة ويدخن .. حاط رجل على رجل وداير وجهه صفح .. شخصية طالع .. فأخذتها للمصور جومتها بحجم مناسب وعلگتها ع الحايط .. كلما اريد انام اشوفها جدام عيني .. رحت قفلت الباب واجيت وگفت جدامها ومادة ايدي اتلمس شواربه وشعره الأمتلى شيب هو ويدارينا ويتعب علمودنا ..
ماحسيت بروحي غير دااعاتبه : ها حبيبي صدك ماتجي بعد .. صارلك تلث سنين جوه التراب .. مدااصدك ان الگع تضم شخص مثلك .. مثل حنيتك واهتمامك .. حبيبي لو تدري شگد مشتاقتلك .. كل يوم تجي على بالي وابچيلك بچي يفزز الحيطان والله .. انه روحي تعلمت عليك .. تربيت يمك وكبرت بحضنك .. رفعت نفسي وشلتها خليتها بحضني وابوس بيها ..

دموعي گامت تنزل بشكل لا ارادي .. : حبيبي ماادري شلون ضيعت ايام بدونك .. تمنيت انت مو عسكري .. تمنيتك مواطن حالك حال محمد .. ماچان صار بينا هيج .. چان عشنا احلى عيشة وديمة وايمن يلعبون يمنا .. داافتقدك وروحي عطشانة لشوفتك وحسك .. اريد تقرالي قصايد عريان وتسمعني اسألي عني الليالي .. دااسمعها وحدي واتخايلك يمي تگلي احب هذا المقطع وهذا يذكرني بيج .. محد ديگلي صوتج حلو غنيلي .. چنت اغنيلك واشوف عيونك تلمع بحب ماشفت مثله..

ضليت ابچي واحاچي .. گمت اشهك انفاسي شبه انگطعت .. مسحت دموعي ورجعتها لمكانها .. لبست دشداشتي السودة ورحت للحمام غسلت وجهي ونزلت اسوي غدة..

مرت ايامنا هيج .. لحدما بلش دوام ايمن وگعدت الصبح بدلتله واخذتله صور بهدوم المدرسة .. دخلت ع الواتساب اريد ادزها لرائد .. شفت اخر رسالة بـ٢٠١٤ .. اووف يا ٢٠١٤ شگد أذيتيني .. بسته من خده واخذته للمدرسة .. گعدته بالصف واشوفه فرحان ومبتسم .. علمته مايستوحش لو يخاف .. لأن المدرسة بيته الثاني .. اريد اطفالي يتعلمون ويكملون دراستهم على أتم وجه..

وبيوم اجه ايمن من المدرسة جابه خالو واجه .. صعد فوگ رأسا حتى ماباسني .. خفت علي گلت خاف مريض .. هدرت التمن ورحت وراه واشوفه واگف يم خانة رائد وشايل القميص العسكري مالته يبوسه ويدخل ايده بي يريد يلبسه..

استغربت تصرفه .. رحت علي احاچي : ها حبيبي شو اجيت على هدوم بابا ليش..
ايمن : ماما اليوم اجونا بنات .. وهيج ماادري شونهن بس بگدج امكن .. وحدة منهن صاحت اسمي وانه وگفت .. گالت تعال ويانا .. رحت وياها انطتني علاگة بيها هدوم وقرطاسية گتلها ليش ست .. گالت انت يتيم فلازم تاخذ .. ماقبلت ورجعتلهيا .. ماما مو علمتيني مااخذ من أحد أي شي..
دنوة : وشگتلها انت ..
ايمن : گتلها ماما تكول ابوي يشوفنا .. وانه مااريد اخذ شي لأن عدنا كلشي ..
دنوة : حبيبي بس هاي قوانين لازم تاخذ حتلو عندك..
چتف إدي وعاينلي بخزرة : مااخذ ابد..

مسحت على وجهه وانه اشوف رائد بأيمن .. نفس الخزرة والحركات .. حتى طريقة الكلام .. صدك الخلف مامات .. جريته لحضني وابوس راسه : يله بكيفك حبيبي لاتاخذ ..
رفع راسه وعيونه تتوسل بدموع : اخذيني لمكانه..
ماجاوبته .. شيشوف منه ليش شمبين بس اسمه حبيبي ..
رجع حچه : ماما تاخذيني ..؟
دنوة : اي عمري اخذك ميخالف..

سكت وگام يصفط القميص رجعه لمكانه واجه يفتحلي دفاتره يگلي شماخذين وشگايلتله المعلمة .. حبنه من البداية چي شاطر ومؤدب هادئ ..

گبل امتحانات نص السنة اندگت الباب الظهر واشوف سيارات كومة واگفة بالباب .. خليت شال وطلعت افتحها صار عمي قاسم بوجهي .. وياه عمي كاظم وفيصل .. ابتسمتله وگبل لا اوصل للباب تقربلي وفتح ايده بشكل خفيف .. اجيت حضنته ..
باس راسي وجر حسرة : يابعد عمج تذكريني بالمرحوم..
دنوة : انتم همات تذكروني بأبوي عمو .. تعالوا فوتوا ..
دخلتهم جوة وضيفتهم .. گعدت وياهم وخالة اجت همات ..
قاسم : عمو ديمة شونها ..ايمن ..
دنوة : زينين الحمدلله يبوسون ايدك..
انه ودااحچي دخلوا ثنينهم .. ديمة تحب عمي قاسم .. راحت ركضتله حضنها ويبوس بيها..
فيصل : وليداتج ثنينهم يشبهون ابوهم..
انهضمت من كلامه .. ولو صحيح بس مااعرف : اي عمو.. ربك ماراد يروح حسه من الدنيا..
قاسم : يابعد عمج انه جايج اسأل ع ديمة .. واشوفنها زوينة مابيها شي..
دنوة : اي الحمدلله ..
قاسم : المايخاف الله ذاك الوليد أهله طلعوا بال..... يعني يگدرون يطلعونه..ماچنت ادري..بعدين عرفت وتعنيتلهم لبيتهم .. گتله اذا ابنكم طلع طلقة اخلي براسه .. وهاي قوانينا واحنا شيوخ مايعيبنا بس شرفنا وعرضنا..

دنوة : وشگالوا.. تگول يشتغلون هناك يعني اكيد منصبهم قوي..
قاسم : بالبداية اشوفنهم چن ماكو شي ولا چن حچيت وهددت .. عاد بعدين نفس المحامي الكمش القضية بالأول رجع حركها خاطر ماتركد وتصير مرقنة.. گتله محامي وخليت .. واخلي لو تطلب الأمر بعد خمس محاميين .. ولو اسمع لو أشم خبر طاير ابنكم طالع مايفلت من ايدي..
دنوة : شلون عمو وين تندله ..
قاسم : بوية صارلي سنين كامش الشيوخية وراسي افتر فر من المصايب .. ماخليت مكان مادنيتله .. لو يروح للگمر اجيبه واسرده بالنص..
دنوة : الله يخلي ويحفظك ماقصرت والله..

قاسم : لا يبوي انتي بنيتنا وديمة هماتين حالها حالج .. انه گتلج ممرودة رويحتي عليها..  سمعت ايمن دخل مدرسة ..
حسيت بالفخر ووجود ظهر يسندني بحياتي من بعد روحة حبيبي : الله يسلمك ..اي عمو ..
قاسم : منهو يوصله لمدرسته..
دنوة : دورات انه..دورات ام صديقه هنا بيتهم يجي وياها..
قاسم : بوية بعد عمج لادزين الوليد هيج .. الدنيا صعبة توقعي كلشي .. وليد سالم بنفس المدرسة .. خلي وي الخط ماله ثقة وكفو ..
دنوة : هاهيه عمي التشوفه .. انه همات چنت ادورله على خط..
قاسم : يله اجت لعندج..

ضلوا گاعدين عدنا..صبيت الغدة واجه خالو جابت اكل من برة هماتين .. بقوا عدنا للعصر وراها طلعوا .. عاد ثاني يوم الصبح سمعت صوت هورن سيارة .. طلعت حاچيته وانطيته فلوس .. خوش رجال چبير بالعمر وابن سالم الصغير همات وياه .. فاطمنت علي ..

مرت ايام وبلشت امتحانات ايمن .. اراجعله وأردله املاء .. چنت اگله لرائد خاف باچر عگبة جهالنا يسألوني على شي بالدراسة ومااعرف اجاوبهم ..
يگلي : انه وين رحت .. يجون علي .. وحبيبي اذا تريدين ترجعين تدرسين خارجي براحتج شكو بيها..
دائما يگلي رجعي درسي خارجي بس واهسي راح من الدراسة وبهتت كلش .. خصوصا بعد وفاته .. خليت اهتماماتي كلها لناحية ايمن وديمة .. مااريد ألتهي عنهم وبالأخص ديمة .. لأن صعبة وشايلة هم لحياتها شلون حتمشي بمجتمع مثل مجتمعنا..

فكرت .. هواي فكرت .. فكرت ابيع حصتي وحصة خالة من البيت واشتري بيت ببغداد أصغر من هذا وبمنطقة هادئة .. منطقتنا كلش حلوة وراقية بس مااعرف ليش اجتني هاي الفكرة .. ادور بالليل لمن اريد انام اضل افتر بالبيت واشوف كل زاوية بي تندهني وتعاتبني على تفكيري .. تگلي اطفالج هنا تربوا .. وانتي هنا تربيتي .. مكانج مايتغير .. وانه اشوف روحي ببيتنا .. روح رائد ساكنته ..فقررت اناضل لخاطر اطفالي ونعيش مثل الناس مايوگفنا شي ان شاء الله .. لأن هسه بعض العالم تريد تنهش لحم الارملة او المطلقة .. بسبب الفلوس والعازة ..لكن الحمدلله عندي راتب وبيت زوجي بحسبة بيتي .. هاي النقطة توگفني وتصد تفكيري ناحية الانتقال لبغداد..

بعطلة نص السنة گاعدين بالهول دنشرب چاي والجهال يفترون يلعبون ويتفرجون ع التلفزيون ..
الحجية : يمة ليش ماترحين لبيت خالج .. شوي يتونسون الويلاد خطية محبوسين بالبيت..
دنوة : خالة موتدرين بمرة خالي شلونها ..
الحجية : خابري بيبيتج شوفينها بلچن ماموجودة..
دنوة : يله ميخالف بالليل عود..

بالليل خابرت على بيبي گالت مسافرة هي وسيف بس عذراء والجهال وخالو موجودين .. گتلها چم يوم واجيكم .. وراها بتلث ايام هيج اخذت الجهال وخالة اجت وياي ماعولت اعوفها وحيدها خطية .. عاد الحجي يبات يم علي هي كلها چم يوم ونرجع .. ومنها اريد اروح للمگبرة بعد ماعندي فرصة غير هاي ..

عمو قاسم دزلي سايق اجاني الصبح .. خليت الجنط بالجنطة وصعدنا .. وصلت لبغداد دنيا ثانية .. بس تنقبض روحي لمن اتذكر حبيبي هنا چانت آخر ايامه ويوم غدره .. نزلت الجهال وعرفتهم على بيبي لأن مايتذكرونها زين ..
خالو اجه ع الغدة جايب غدة مشاوي ..
گتله : تعبت نفسك خالو مايحتاج ..
عمار : لا خالو شسويتلج قابل .. تدللين ..
انطى الأكل لعذراء وصاح على ديمة ماقبلت تروحله .. عاينلي بقهرة هو ومنصي روحه بمستواها يريدها تجي : بعدها تستغرب ..
دنوة : يعني احسن بس چي ماشايفتك هواي..
گمت عليها بستها وحاچيتها : حبيبتي هذا خالو.. يعني مثل خالو الي بالبصرة ..حباب ويحبچ ..روحيله..
ضلت تعاينله وضامة إديها لصدرها .. طلع مصاص من قمصلته وأشرلها يله راحتله بس جامدة بحركاتها .. گلبي ينحرگ عليها وألم روحي چي دزيتها للروضة..

بعدين اگول قضاء وقدر والانسان مايدري شمضموله .. ماطول انه أمها ماحخليها تشوف شي موزين..

ضليت ببيت خالتي يومين.. باليوم الثالث عساس ارجع اجتني عذراء للغرفة..
عذراء : اگلج حبي ليش منطلع وناخذ الجهال شوية نفرفرهم يتونسون ..
دنوة : ها وين ..
عذراء : نروح للكرادة نتمشى ونگعد يم مرطبات الفقمة ..
دنوة : ها هيج تگولين..
عذراء : اي والله .. هي جية وحدة قابل كم مرة تجين..
دنوة : يله ماكو مشكلة .. العصرية ابدللهم ونطلع..
عذراء : يله ماشي..

مشى اليوم طبيعي ..لحد العصر لبست بنطرون وبلوز .. فوگاه كوت لحد الورك موطويل .. وياه بوت ربع.. والجهال همات .. عذراء هماتين .. خالة ماقبلت تجي رجليها توجعها فضلت يم بيبي وراحن لجوارينهم ابنهم متزوج جديد فيباركوله .. قفلنا البيبان وطلعنا .. الجو بي برودة بس لبستهم زين بعد .. ديمة شايلتها وايمن گايدته .. ادور هي سمينة ثگيلة بس شسوي مجبورة .. تخاف تمشي من يم ولد .. احنا ودنمشي مرينا من محل عطور اندارتلي عذراء ..
عذراء : حفوت اشتري عطر..تعاي ويايه..
عاينت للمحل .. صح حلو ومرتب بس صغير .. گتلها : لا حنتظرج هنا بره بين ما تخلصين..
گالت خوش وراحت فاتت ..

انداريت انده ايمن .. : ايمن وينك تعال شوف هاي السيارة..
مالگيته يمي .. تخبلت .. گلبي كام يدك سريع وحيلي كله باد .. وينك حبيبي لاتخوفني عليك .. تمشيت ليجدام شوي مالگيته .. رجعت للمحل گلت خاف فات وي عذراء .. ماكو .. طبيت حاچيتها وبالگوة مااريد الدمعة اطيح مني .. الشارع روشة والسيارات رايحة راجعة وهوسة.. هي هم انشدهت وياي خطية وطلعت إدور علي .. طبيت ع المحلات اسأل چني مسودنة ودموعي بعيوني .. تأخر الوكت وقسم من المحلات بلشت تعزل ..خابرتني خالة..
الحجية : ها يمة وين صرتي..
دنوة : ها خالة..خالة ماادري ادعيلي ..
الحجية : سترك ياعلي.. شكو شصاير يمة خوفتيني ..
ماردت اگللها.. : بس ادعيلي خالة ان شاء الله مااتأخر..
سديته وضميته بالجنطة ..

البوت كعب .. وانه بس افرفر .. رجلي صار بيها بسامير من الوجع .. گعدت ماتحملت .. لگيت واحد رجال چبير عنده بسطية مال العاب ويمه كرسي..
عاينتله شفت بي ابوي .. نفس الهيئة .. : عمو ..
اندارلي ومقلص عيونه : تفضلي عمو..
دنوة : بلكت شفت طفل ابيضاني شعره اسود .. لابس قمصلة معجونية وكبوس نيلي..
نصى راسه : لا والله .. تعاي گعدي عمو ..
جرلي الكرسي وگعدت..

اشوف الجهال يمشون وكامشين ايد ابوهم لو امهم .. نفس موقف ديمة تخيلت ايمن بي .. دموعي نزلت بخوف وبقهر انه واحاچي بيني وبين روحي : وينك ياروحي .. حبيبي وليدي وينك .. لاتچوي گلبي ..

وهيج انه وابچي والله الدنيا صارت سودة كلها بس اشوف ظل من بعيد ابيض يمشي بإتجاهي .. اسمع صوت قهقهة .. رائد .. اي هذا صوت رائد .. گمت اغمض وافتح اريد اركز .. ليش الدنيا صارت سودة .. ماكو ثواني لحظات واجه رائد گايد ايمن بإيده وايمن كامش لعبة طيارة بيده ..وگف جدامي واشوفه بالزي المدني ..
گال بإبتسامة : هيانه موجود لاتخافين..

بس گال هيج راح رأسا .. مثل واحد دفعوا من الكرسي هيج فزيت .. گمت بالعجل أدور علي .. لگيت وحدة گاعدة بالگع تبيع خبز واشوف ايمن گاعد يمها من بعيد .. تمشيتله ومن ودي اركض لوما عيب .. نزلت ديمة وشلته بسته وامسح بوجهه وابچي : وينك حبيبي ليش رحت .. وين چنت ماماتي فهمني ليش تعوفني وتروح..
مسح دموعي ويبوسني : اسف ماما .. عبالي انتي هنا تيهتج ماادري..
گام يبچي خايف .. وجهه اصفر من الهبطة .. بسته وعدلتله هدومه .. اخذت ديمة ورحت لعذراء خطية هي اللخ همات هبطت وياي .. انسدت نفسي للدنيا كلها .. عاد اخذنا تكسي ورجعنا للبيت .. ماحچيت لخالة ع الصار ووصيت ايمن مايحچي .. خطية چان ضل بالها ..

بالليل اجه خالو گتله باچر آخر يوم وراها ارجع .. اريد اروح للمگبرة..
عمار : اي براحتج خالو .. تردين اجي وياج ماعندي مانع..
دنوة : اي ياريت.. يكون افضل ..
عمار : يله الصبح نطلع ..
حركت راسي بالموافقة ورحت فرشت للجهال .. نيمتهم وتمددت يمهم .. فتحت التلفون اشوف صوره واحاچي : حجي اشوفك باچر .. شكد مشتاقة ابچي يمك وابوس اسمك ..
بچيت على صورته وغفيت ..

گعدت الصبح بدلت واخذت ايمن بس ديمة عفتها يم خالة .. هي همات الدكتور منعها نهائيا من البچي .. شگد رادت اخذها بس ماقبلت .. لأن مهددة بالعمى وانه منو الي بعدها صارتلي أهل طبعا اخاف عليها وصحتها من صحتي ..

اخذني خالو وطلعنا للمگبرة.. اشترى مي ورد وبخور .. وي كل كيلو تمشي السيارة روحي تنسحن بالزايد .. ماچنت متخيلة فديوم ازوره هنا .. بس لا اعتراض على حكم ربي..

طبگ يم البوابة وتمشينا لعنده ..
ايمن رفع راسه عاينلي : ماما حنروح لبابا..
دنوة : اي حبيبي ..

شواي ووصلناله .. حيلي انهد للگع .. مااعرف شلون عالتني رجليه وتمشيت لعنده .. بهالفترة چنا داخلين ٢٠١٨ وباقي بحدود الاسبوعين وتدور السنة الرابعة مالته .. انداريت على ايمن وأشرتله : هذاك حبيبي روح..
هو مثل الخاف .. بس انه اريده يعرف معزة ابوه عندي .. اريده يعرف ان الأب اذا ماموجود واقعيا فهو موجود روحيا .. اريد احسسه بوجوده وإن هذا القبر هو رمز لتواجده بحياتنا .. خليت ايدي على چتفه وامسد بي : لاتخاف عمري .. مايسوولنا شي .. الناس هنا نايمين..
ايمن : وبابا نايم يعني .. للأبد ..
حركت براسي بمعنى اي ..

نصيت مسحت بإيدي على اسمه واحاچي ايمن : تعال حبيبي تعرف تقره..
اجه گعد يمي ويتهجى اسمه .. وانه بداخلي اتخايل رائد شلون حيفرح لمن يشوف ايمن هيج..
شعور الحسرة والفقد .. الحرمان والشوق غلب على مشاعر الفرح البسيطة .. روح رائد اجتاحت تفاصيلي .. بچيت بقهر وغسلته بمي ورد .. فتحت بخور ثنين واخذت القرآن من خالو اقراله سورة يس ..
انه واقره اسمع ايمن يهمس يمه : بابا دااخذ عشرات .. والمعلمة تگول للطلاب صفگوله .. يعني انه شاطر واكيد انت تسمعني وتشوفني ..

بقينا گاعدين ساعة بهالحدود بعدين گمت ورجعت للبيت .. ايمن حسيته هدأ .. خفت علي .. بالليل حاچيته وقريت على راسه .. الصبح گعد مثل گبل ماكو شي عاد وراها ورجعنا للبصرة ..

بلشت المدرسة ورجع ايمن يداوم .. فديوم تأخر مارجع .. خابرت السايق ماجاوبني طلع مغلق .. خفت على ابني وين راح .. موقف ديمة بعده ليهسه ببالي ادور ايمن .. خابرت على عمي قاسم..
رأسا جاوبني : ياهلا ببنيتي..
دنوة : هلا بيك عمو..
قاسم : گولي يابعد عمج شمالج خايفة تتراجفين..
دنوة : عمو ايمن مارجع ليهسه..واخابر ابو الخط مايجاوبني..
قاسم : هيانه يمنا ايمن .. ابو الخط خلص بانزين فنزل يمنا .. جيبي عمتج وخالج وتعاي تغدي عدنا واخذينه عود..
جريت نفس براحة : اووف الحمدلله .. ماشي عمو بين ما ابدل اجي..
قاسم : يله لاتخافين بوية ماكو شي..
دنوة : ماشي ..

ودعته وسديته .. گمت انطيت خبر لخالة ..
دنوة : يله خالة تجين .. خالو وين ..
الحجية : بالشغل هسه مايجي للمغرب..امشينا نروح احنا..
دنوة : ماشي يله..
صعدت فوك بدلت وبدلت لديمة وراها طلعنا .. لمن وصلت لگيتهم صابين الغدة .. بوستهم ورحت على ايمن .. لگيته يم ولد سالم ديلعب .. باسني ويتلوگلي علمود مااضوج .. ضحكتله ورحت گعدت .. شگد مشتاقة لأجواء بيت جدي .. گعدنا نتغدة .. سوالف وضحك .. تونست وياهم .. بعدين گمنا للمطبخ دنغسل مواعين ..الجهال كلهم گاعدين يلعبون وايمن وياهم .. بس ديمة ماكو ..غسلت ايدي وطلعت من المطبخ افتر بالبيت أدور عليها..

سمعت صوت صياحها وبچيها من غرفة سالم فوگ .. ركضتلها وفتحت الباب رأسا .. واشوف ابن سالم بگد ايمن مطشر الملاعيب جدامها ويجرها من ايدها يريدها تلعب .. هي تصيح عمو لااا مااريد .. گلبي عصرني وحضرني الموقف ذاك والدم الشفته على جسمها..نزلت يمها حضنتها وأهدي بيها..
مهند (ابن سالم) : عمة انه والله مااقصد ماسويتلها شي .. ردت العب وياها ..
دنوة : اي حبيبي .. هي تخاف ماتعرف تلعب ..
اعاينله شلون خايف ويرجف..هي حالتها هستيرية وتبچي .. وهو طفل حقه يخاف .. هديتها واخذتها نزلنا جوه .. بقيتها بحضني نامت ومگرفصة روحها نايمة بوضعية الجنين .. قريت على راسها حسيتها ارتاحت وانفاسها انتظمت .. ضليت يمهم تقريب الساعتين وراها رجعني عمو قاسم للبيت..

مرت الأيام واجت عطلة نهاية السنة .. وره العطلة بـ چم يوم اندگت الباب واشوف اخلاص طبت هي وجهالها .. نوار ورامي .. دخلت هي لابسة كعب ولبس موظفات لأن كامت تشتغل تدريسية بكلية بالحلة .. اجت علي تضحك ..
اخلاص : دناوي على گولة اخوي ..شلونج..
گمت عليها شبگتها ومبتسمة .. علاقتنا تحسنت .. الدنيا فانية فتناسيت القديم وعشت ع الجديد .. اشوفها زينة وياي وماتحچي وراي فليش ماارضا واتسامح..لا عادي بالعكس .. العصرية اجت وياي سوينا كيك وجبت عصاير من الدكان عصرونية..
اخلاص : اگلج حبي ..
دنوة : گولي عيني..
اخلاص : ليش ماتدرسين خارجي..تفيدج الشهادة..
دنوة : والله مالي واهس بالدراسة..شسوي بيها..
اخلاص : لا شلون شتسويلج.. تنفعج بالمستقبل .. فكري زين وقدمي ماطول بعده التقديم مامفتوح..
دنوة : ان شاء الله افكر..
اخلاص : يله ماشي..حتى اذا تردين تدرسين انه اقدملج..
ضحكت : لك عيني حماتي گامت تحبني وتدللني..
اخلاص : هههههه.. ولج چنت معمية .. يله هاهيه الراح راح..
دنوة : اي هاهيه..

وراها باسبوع هي راحت لبيتها وانه فكرت بموضوع الخارجي .. شفته فكرة ناجحة .. اخلص وادخل معهد فنون سنتين واتخرج معلمة مال فنية..خابرت رزان ردت آخذ رأيها گالت خوش فكرة وانتي شاطرة اصلا .. قررت ادرس خارجي .. انطيت خبر لأخلاص وهي اجت وياي لمن قدمت .. اشتريت كتب ودفاتر واقلام .. اعاين عليهم واتذكر ايامي .. بيت ابوي .. حب رائد .. معاناتنا .. اطفالنا .. بيتنا .. بالأخير صفيت بس اني بي هو راح وتركلي مكانه فارغ..

بلشت المدرسة وايمن صار صف ثاني .. صعبت المواد شوي فگمت وياه يوم بيوم علمود لاتضيع علي الدروس .. بالليل لمن اكمل شغل وأنوم الجهال يله اقرالي شوي .. حاولت اكمل نص المادة من كل المواد..

وگبل الامتحانات مالت نص السنة بشهرين نيمت الجهال ونزلت جوة بالهول فاتحة الضوة وألخص التعاريف والتعاليل وهالأشياء .. صار وكت أذان الفجر گمت صليت ونمت بالگع ماصعدت فوك .. اجاني حلم مرعب .. خلاني حتى بالحلم أحس بروحي داارجف ..
چن رائد اجاني يلهث ويبچي بحرگة يصيح : دناوي حبيبي ديري بالج على روحج يابعد الدنيا..
ركضتله واغسل وجهه وامسح دموعه اريد افتهم شكو .. بسته من خده وكامشة ايده : حبيبي شبيك بس فهمني على كيفك .. شبيه انه..
أخذ ايدي الكمشت بيها ايده خلاها على بطنه من أسفلها..
دنوة : حبيبي شبيك بطنك توجعك..
رائد : اي يولي..   كمش راسي بإيده ويعاينلي بعيون مجمرة من البچي : انتبهي لروحج بنيتي..الجهال يضيعون وراج ..
دنوة : گلبي مداافتهمك..
رائد : بس ديري بالج على رويحتج..تره انه صح بعيد بس روحي يمج احس بيج باباتي..

فزيت مرعوبة وجسمي يختض من الحرارة .. شيقصد عود .. شبيه انه كلشي مابيه الحمدلله صحتي زينة .. يمكن هلوسة اي ماكو شي ..

مشت الأيام وبلشت الامتحانات لازم امتحن واذا نجحت امتحن خارجي .. تعبت هالفترة وهلكت .. هملت روحي .. صار عندي مسؤوليات هواي .. بيت شكبره شگده على راسي .. مسواگ وطبخ انه اسوي .. الحجي سافر لأربيل يم محمد .. امتحانات ايمن وانه منا امتحاناتي .. فتعبت .. صار عندي خربطة بموعد الشهرية .. خربطة فضيعة مو شلون ماچان .. تغير بهرمونات الشعر..حتى سمنت .. وزني چان ٦٠ صار ٧٧ .. صار عندي نزيف..بالبداية چان شي قليل بعدين بلش يزيد .. غيرت هدومي گمت اشتري عراض .. خالة كل يوم تگلي روحي للدكتورة وماتسمحلي الفرصة.. خالتي همات عرفت وسرور .. كلهم يضغطون علي علمود اروح .. والله وچان باقيلي امتحان واحد .. امتحنته وخلصت .. بنفس اليوم اجت علي سرور اخذتني ورحنا لدكتورتي الأولانية ..

فحصتني وسوتلي سونار .. سويت تحليل دم وهرمونات شامل .. رحتلها ثاني يوم قرتهن كلهن وفاكة حلگها متفاجئة وعصبية..
- : ماما انتي شمسوية بنفسج.. حرام هيج تاركة حالج .. لنفسج عليج حق..
دنوة : دكتورة ظروفي ضغطت علي ماچنت اكدر اسوي شي .. بس فهميني شنو طلعلج ..
- : اولا عندج خربطة بالهرمونات .. لهالسبب دتشوفين شعر الوجه والجسم ديطلع بكثافة.. اضافة الى هرمون الوزن ايضا متأثر فمزيد وزنج .. كله هذا بسبب تكيس ع الرحم .. واني حسب الشفته وقريته الكيس كبير مينزاح بالعلاجات..
بلعت ريگي بخوف : يعني شنو دكتورة..
- : لازم عملية .. ويفضل اذا كان بأقرب موعد ..
انصدمت وتخربطت علي الدنيا .. شلون .. عملية .. لا مستحيل..

دنوة : دكتورة مامستعدة لعملية .. لابد اكو حل بالأدوية ..
- : اني شنو مصلحتي امي .. اكيد الأمر اذا ميستدعي عملية فمااقلقج وأخبرج عنها .. لكن الأكياس الكبيرة لاتزال الا بالعملية الجراحية ..
عاينت عليها واجه جدامي ايمن وديمة .. شلون خاف يصيرلي شي اذا دخلت عملية .. اعوفهم وحيدهم .. نفضت الأفكار السلبية وكلشي يتعلق بالفقد..
دنوة : طيب دكتورة اجيج باچر نحدد موعد العملية..
- : اكيد ماعندي أي اشكال..
دنوة : ان شاء الله .. شكرا دكتورة ..
عفتها وطلعت ..

رحت للبيت وصيت سرور ماتگول لأحد بين ما أحدد موعد العملية يله .. بس گتلها لخالة .. انقهرت علي وبچت .. بس سكتتها رأسا..
شبگتها : خالة لاتبچين فدوه اروحلج.. اوگفي وياي قويني لاتخليني اضعف وحيدي..
الحجية : ييمة غير أخافن عليج..چم مرة گتلج روحي للطبيبة روحي .. بس ماتسمعين الكلمة..
دنوة : خالة صارت بعد..بس ادعيلي تعدي على خير.. اريد اكبر جهالي مااريد اعوفهم ببداية الطريق..
الحجية : اسم الله حبيبة اسم الله..الله يديمج الهم وتربيهم حبوبة .. انه اروحن وياچ باچر علمود تحددين يوم العملية وان شاء الله تتيسر يمة..
بست راسها وگمت صعدت فوك .. بدلت ونومت الجهال ..

تمددت بمكان رائد وأشم بي..تذكرت الحلم .. هو دائما يجيني بالحلم گبل لايصير شي موزين..مثل الأنذار..چن ربي مايريدني اطيح بغيابه..شبگت مخدته وبچيت : وينك لمن چنت تلح علي اروح للدكتورة كلما تشوف صحتي موزينة.. مشتاقتلك اريد اتخبى بحضنك ..
ضليت ابچي لحدما تعبت ونمت .. ثاني يوم اخذت خالة ورحت للدكتورة حددتلي موعد للعملية بعد اربع ايام ..

بهالأربع ايام خبرت خالتي گالت انه ابات وياج بالمستشفى .. جهالي حتجي سرور يمهم بين ما اتحسن ..
گبل يوم العملية بالليل خابرني عمو قاسم .. سلم علي بعدين گال : حبيبة عمو عندج فلوس للعملية..بس احچي وكلشي يرخصلج..
دنوة : لا عمو وداعتك كلشي عندي .. تقاعد رائد استلمته گبل اسبوع فأخذت منه وسحبت اربعمية من البنگ..
قاسم : ليش ماطلبتي مني بوية..خليهن ذني ذخر الج ولوليداتج .. لاتبذورين بيهن ..
دنوة : عمو ادري بيك ماتقصر..بس عندي فلوس الحمدلله..
قاسم : يله على راحتج بوية..خالتج ام سالم تعرفينها مابيها حيل بس ان شاء الله بس تطلعين من العملية تجيج..
دنوة : اشكرك عمو ماتقصر وخالة فضلها واصل..
قاسم : يالله بوية..الله يگومج بالسلامة وترجعين لولدج..
دنوة : الله يسلمك ماقصرت ..
ودعته وسديته ..شگد حبيت عمو شلون وگف وياي ومهتم لأمري..

ثاني يوم من الصبح اجت خالتي واخذتلي الجنطة .. سرور اجت رتبتلي الغرفة گالت بلكت تطلعين اليوم .. ودعتهم ورحت للمستشفى .. نوارة همات اجت وياي .. دخلت الصالة وتبنجت بعد ماحسيت بشي..

گعدت مااعرف شوكت .. أحس بألم ببطني وجسمي كله يون من الوجع .. اجت الدكتور فحصتني وچيكت حالتي..
- : الحمدلله ع السلامة امي .. ان شاء الله باچر تطلعين ..
حچتلي على تعليمات ولازم راحة لمدة اسبوعين وبعد چم شغلة .. بتت بالمستشفى يوم ..اجت خالة ابتسام وخالة شيماء مرة عمي فيصل تحمدولي ع السلامة وراحن..
ثاني يوم الصبح خالتي حضرت الجنطة وساعدتني البس ورجعنا للبيت .. لأن العملية صارت بالتنظير فمايحتاج ابقى هواي بالمستشفى..

رجعت للبيت واشوف جهالي يحومون يردوني .. بوستهم وانه روحي ذابلة .. عملية بعد .. ايمن يگلي ماما جبتيلنا طفل جديد مثل ديمة .. بوكتها ضحكت من گلبي .. منين اجيب .. انتو نظر عيني وحياتي المرتاحة بيها ..

عمو قاسم اجاني لمن رجعت للبيت تحمدلي ع السلامة وخلى فلوس جوه راسي .. ماقبلت أخذهن بس بعد هو أصر..

وهيج مرت الأيام تحسنت صحتي .. سرور ونوارة يداروني .. دورات خالتي تجيني .. حلا ودنيا .. حسب لحدما استعدلت وصرت زينة .. گمت ادير بالي على روحي واهتم لصحتي .. سويت دايت ورجعت لوزني الطبيعي .. رائد ضل يجيني بس بالأحلام وعلى طول اشوفه بحلم تفسيره يكون زين..

هاي بيوم الحجي گال حيجي محمد ومرته باچر.. هو تمرض خطية .. فطلعت انه اتسوگ .. انه مندارة ع الفواكه دااشتري تفاح وبرتقال واسمع مرية تصيحني يبنية..
انداريتلها ومبتسمة : انه خالة..
- : اي حبيبتي ..
دنوة : تفضلي ماعرفتج..
اجت تقربت مني دتسوگ وتحاچيني : خالة عجبتيني .. شفتج حليوة وانه اريد أزوج وليدي .. انتي بت بيت..
عاينتلها والضحكة بالگوة كاتمتها : لا خالة انه متزوجة وعندي اطفال ثنين..
خلت ايدها على حلگها متفاجئة : يداده .. الله يحفظلچياهم حبوبة تره ماادري بس شفتج صغيرونة..شگد مواليدج..
دنوة : ٨٦ خالة..
باستني واعتذرت مني ..

خلصت مسواگ ورجعت للبيت .. سولفتلها لخالة .. ضحكت بس ادري بداخلها مقهورة .. بگلبي اگول انه الچنت محد يجيب اسمي كلها تدري رائد زوجي ..   كل تفكير افكر بي نهايته تكون " الحمدلله على كل حال "

حياتي ماشية طبيعية واقاربي وناسي كلهم زينين .. بالنسبة للخارجي ماامتحنت وتركت الموضوع .. چانت تجربة وكل تجربة ممكن تكون نتيجتها صحيحة او لا .. مامحتاجة ولو أحتاج فأول طريق حيكون أمام هو الدراسة والتعيين ..
عمي قاسم انسان مثالي بمعنى الكلمة.. وگفلي بكل طيحة طحتها بعد وفاة رائد ..والحمدلله لأن صار بطريقي وتحنن گلبه علي..

...............................

اهلا حبايبي ، شگد مشتاقتلكم ومشتاقة لتعليقاتكم الحلوة
كثير بنات طلبوا مني اكتبلهم شصار بدنوة بعد ما ختمت القصة فنزلتلكم هذا البارت او المشهد ..
بالنسبة للتعديل فوصلت للبارت العشرين بعد ست بارتات ان شاء الله وانشر التعديل ، بعدها يتم نشر القصة الثانية "

وطبعا احب أشكركم ع المليونين مشاهدة لأول قصة .

ألتقيكم في وقت آخر ..
رقية جاسم