رواية اسألي عني الليالي الفصل التاسع وستون 69 - بقلم رقية جاسم

قناة التليگرام

حساب الانستگرام

الـبـارت الثّامن والستون والاخـيـر...........

طول اليوم ماقبلت تاكل شي..بس شربت حليب..ايمن اجه عليهه يريدهه تلعب وياه ماقبلت تكوم..كعدت بحضني وكامشتني بقوة..تخاف حتى من الحجي..من شي اسمه ولد.. ضلت اليوم كله بحضني..بس انزلهه تبجي..
بالليل صعدت قريت على راسهه لحدما تعبت ونمت.. كعدت الفجر مالكيتهه..نزلت جوه والجو حار كهرباء طافية.. شطفاهه هي ماتطفى..
همست : ماما ديمة حبيبتي..وينج..
سمعت صوت بالطرمة..گلبي خرط..ركضت اشوفهه..

لكيتهه بالطرمة واكفة يم الباب تريد تفتحهه وانه قافلتهه.. رحت يمهه حضنتهه وشلتهه جان تعيط وتدفع بيه..
دنوة : اشش ولج هاي انه..ماما حبيبتي...
اخذتهه جوه فوتتهه للحمام غسلت وجهها.. كامت تبجي وتهلوس بكلمات مامفهومة.. قربتهه لصدري واقره على راسهه لحدما رخت اعصابهه ونامت.. خليتهه بحضني ع الجرباية ماكدرت انام بالي كله يمهه..وجه الصبح كامت تحرك بإديهه بالهوى چن دتفع واحد..
ديمة : عمو..لا..إسوي (شدسوي)..
كامت تبجي وتگرفص بروحهه.. بجيت عليهه بقهر وحرگة.. ضميت راسهه بحضني وابوس بيهه..اووف يايهودي ياحيوان .. ششفت بيهه..ذاك الجسم لو اللسان لو شنو.. كلهه طفلة..

رفعت راسي لكيت صگر كاعد يمهه من الجهة اللخ وعيونه مدمعة.. ردت احاجي..حط ايده على حلگه وغمض عيونه بهدوء.. يعني لاتحجين..
مد ايده على شعر ديمة الاشگر ويدخل اصبعه بحلقات شعرهه بهدوء.. شواي واختفى.. انه من التفكير تعبت ونمت..
كعدت الصبح على صوت خالو هنا.. جريت الشال لبسته وعدلت كعدتي..
دنوة : صباح الخير خالو..
وائل : هلا بيج عيني..حجت لو بعدهه ساكتة..
دنوة : البارحة كامت تبجي وحجت بس هي ونايمة..
وائل : هاي صدمة..والله ماادري شگول..بس ماتستاهل بعدهه صغيرة..هسه عمج خابرني..
دنوة : قاسم..
وائل : اي..

دنوة : شكال..
وائل : مطلعين الولد من المركز ورايحين لاهله..طلع ابوه ميت وامه مقعدة..عنده خوات ثنين كبار..هاي كبل شهرين تقريبا ضارب واحد سچينة وعمام الولد ضالين يدورون علي ومالاگي .. الولد ميت..فهو هسه مطلوب عشائريا وقانونيا .. تهمة الاغتصاب السواهه هسه انضافت لتهمة القتل.. يعني حياخذ جزاته مربع..اقل شي عشرين سنة.. من غير الفضيحة الصارتله بالمنطقة..
دنوة : وعمي شسوه..
وائل : وصل خبر لعمامه يجيبون شيخهم علمود تصير الگعدة ..والقانون واكف ويانا بكل الحالات..
دنوة : لاتكلي حياخذ فصل ويتنازل عنه..
وائل : لا يابة شياخذ فصل..اصلا كاعدين حواسم فلس احمر ماعدهم..هو عمج متعاطف وياهه خطية..ب١٢ تصير الكعدة فاريد التقرير الطبي علمود نعرف شنتصرف..

دنوة : انت حتكعد وياهم..
وائل : اي..ارشد هم حيجي..هو الشاهد..
كمت للكنتور طلعت التقرير وانطيتهيا..
عاينلي بقهر : اذا ماصارت زينة ناخذهه لدكتور..
دنوة : ماشي خالو..
اخذه مني وراح عليهه باسهه ونزل..كمت للحمام غسلت وجهي مااحس الا شخص حضني من رجلي..غسلت الصابون ودنجت لكيتهه ديمة..عيونهه مدمعة وحاضنتني بقوة..
دنوة : ها ماما شبيج يروحي..
سكتت ماحجت..نشفت وشلتهه نزلت جوه..لكيت خالة كاعدة دتسبح ع السجادة..صبحت عليهه وسألتهه اذا متريكة لو اسوي..ولو مالي نفس بس هي عدهه دوايات خطية.. كالت لا.. خليت ديمة يمهه..كامت ترفس ماقبلت تبقى..

دنوة : ماما هاي بيبي شبيج حبيبي..مو تحبيهه..
كامت تحرك براسهه يعني لا وفاتحه اديناتهه يعني شيليني .. شلتهه واخذتهه وياي كعدتهه ع الكاونتر واسوي اكل.. هي صافنة ماحجت شي..بس تعاينلي شلون اروح واجي.. كملت وسويتلهه اكل وحد..ادري بيهه شتحب..بهلاثناء فات ايمن.. هي جفلت منه..بعدين من حچه وياهه هو ويضحك مايدري شبيهه..فسكتت تعودت علي..صبيتلهم بالهول واخذتهه كعدتهه بحضني اوكلهه ع الميز..بالاول ماقبلت تاكل شي.. ادور قنعتهه اجيبلهه هدية اذا اكلت..وكلتهه على كيفي لحدما خلصت الماعون..من البارحة ماماكلة شي سوده علي..
مشى الوكت لحد العصر جان تدخل سيارة خالو للكراج.. نزل هو وارشد..راحت خالة تشوف شسوو..انه ضليت واكفة وره الباب واسمعهم..

الحجية : بشرو..شصار..
ارشد : جابو شيخهم..خالي بشرفك هذا شيخ..
وائل : عمي واحد من الزبل ملبسي غترة وعگال وجايبي.. شيخيش..حتى قاسم ماعرفه..مو هو شيخ اكيد يعرف الباقين.. كام يمسلت حتى مايعرف يحجي..
الحجية : اي المثل هيج واحد دايح قابل عنده اصل لو فصل.. تالي شصار خوية..
ارشد : صارت الگعدة وانه شهدت ضده..حجيت كلشي شفته والتقرير الطبي وكف وياي..عاد بالاخير شيخهم كال شتفصلون احنا نلبس..بس مانريد ابنا يدخل سجون.. عاد عمهم قاسم انهد بي..كال هو ابنكم كاتل واحد والعشيرة تروكض وراه صار شهور..احنا جبناكم خاطر تعرفون حدكم وين وتعرفون بيمن تحرشتو..لانريد فلوس ولا فصلية.. ابنكم ياخذ جزاته ويدخل سجن..وانه لوما اكو قانون چا حرگته جدامكم اخلي يصير بوذه..
وائل : صارت هوسة للستار..ماقبلو..تالي اتفقو على باجر يجي شيخ العشيرة الابنهم انكتل بسبب هذا الارعن وهي تنفض بعد اخر شي..

الحجية : ابو سالم خوما كال نتنازل ع السجن..
وائل : لا يابو..وين..لعب بيهم فلك..والله ماقصر والنعم منه .. كال اذا ماتحاكم حكم عادل بالقانون انه اعرف شسويله.. اكلج بعد بس يبوسون رجله.. قفل.. هذا شيخهم كال للولد روح بوس عمك..قاسم ماقبل.. كال هذا العندي.. يجي شيخ الولد المات ونفضهه..بس ابنكم اذا فلت مثل هذيج المرة حياخذون ولد عمومته..هم ثنين جانو بالكعدة.. بحيث وجههم صوفر.. بعد على باجر يوصلولهم خبر وتصير كعدة اخيرة..
الحجية : اوووف عساه بنار جهنم الملعون الجلب هذا.. وين ينطي وجهه من ربه..عساه بالموت..
ارشد : والله مقهور عليهه خطية..يابة ديرو بالكم عليهه.. المفروض ماتروح وي شخص غريب..
الحجية : اي والله يخالة صحيح..هي طفلة قابل جبيرة.. يجوز غصبهه لو كتلهه..

ارشد : اي اكيد..لأن ايدهه جانت مزورگة.. عموما هسه الله يكون بعونهه..اي شي تحتاجون انه موجود..
الحجية : ماتقصر خالة..
شواي وسمعت صوت الباب يعني طلع..اخذت ديمة وصعدت فوك..لكيت تلفوني داك..سرور..صار شكد مامخابرتني .. رجعت دكيت عليهه..رأسا جاوبت..
سرور : الو حبيبي دنوة..
دنوة : هلا بيج عيوني.. شلونج..
سرور : زينة يروحي..انتي شلونج..
تنهدت وكتلهه : زينين..
سرور : الله يعين گلبج يعمري..اني ببيت جدي صارلي يومين وسمعت بسالفة ديمة..شلونهه حبيبتي سوده عليه..
دنوة : اوف ولج گلبي ورم..لو صگر موجود جان صار هيج حالي.. شكد ما قويت بس هاي الطيحة كسرتني.. مدااعرف شسويلهه.. مگابلتهه وكاعدة..

سرور : دنو سمعيني زين..اني اختج كبل لا رزان تصير اختج.. ان شاء الله بس تفك الگعدة وهذا الساقط ياخذ جزاته انتي رأسا توكلي لشيخ لو سيد يقره عليهه..لأن هاي صدمة .. وصدمة قوية.. وراهه اذا شفتيهه بعدهه ماتنطق وتخاف اخذيهه لدكتور زين..
دنوة : دكتور شنو..
سرور : امراض نفسية يعني دكتوريش.. مايرهملهه دكتور اطفال لأن هاي صدمة ويمكن لاسامح الله تصيرلهه هواي تبعات..فانتي سوي مثل ما اگلج..
دنوة : ان شاء الله..
بقت تحجي وياي وانه صافنة على ديمة شلون كاعدة وساكتة .. جانت ابد ماتسكت..لغوية بس سوالفهه تونس.. سديته منهه وجريتهه بحضني..

بستهه واعدل بشعرهه : ديمة احجي شي حبيبي..كولي ماما بس اسمع صوتج..
عاينت علي بدون ماتحجي.. هي كل ما تسوي هيج احس گلبي ينعصر بيدي.. اووف ياروحي ليش هيج سويت بيهه.. كون احرگك وهم ماارتاح..شكول..عساهه بخواتك المايدرن اخوهن سرسري ونذل..
خلص اليوم هي بحضني..حتى خالة هي سوت الاكل..
ثاني يوم اجه ارشد ع الحجي وطلعو لبيت جدي علمود الگوام وغيرهه.. ضليت حاطة ايدي على گلبي لحدما رجعو المغرب.. اخذت ديمة ووكفت اسمعلهم..

الحجية : الله يساعدك خوية..شسويتو ..فضت بعدهه..
وائل : فضت وراحت..نعلعلا شرفه اذا عنده شرف.. بكد القندرة هيج يسوي..ادور شلون لسان علي.. چنه دلالة..
ارشد : اي والله صحيح.. بس ابو سالم ماقصر.. اجو عمام الولد المات..طاحولهم طيحة من هاي الزينة..رادو يصالحوهم ويفضوهه بفصل وفصلية ماقبلو.. كالو احنا صار شهور ندور علي ماخلينا مركز ماخلينا گرابة يعتبون علينا..دمنا محروك على ابنا بعدين تالي ماتالي لمن نلكاه نخلي يفلت من ادينا.. لا ماصايرة.. ابو سالم هم كال نفس الشي..بالاخير صفت حيشيلون من البصرة كلهه حتى مو بس يغيرون منطقتهم.. الولد اخذوه للمركز هسه هو بالتوقيف..بعد تصعد الاوراق مالته للمحكمة بقضيتين..وحده قتل والثانية اغتصاب.. رافقتهه بشهادة الطب علمود تثبت..وانه شاهد.. عمامه حتى ماخلوله محامي..يعني القضية حتجي عدلة فت..لصالحنا طبعا.. انه ماشايف واحد عمره ١٧ هيج يسوي بلاوي.. صدك ولد الحرام كثرانين..
الحجية : حللل..يستاهل..سوده علي حبوبتي حتى اكل ماتاكل وتخاف من الكل بس كاعدة يم امهه..
ارشد : اي حجية قابل هين الصارلهه..بعد الله كريم..بس لاتتهاونون..من باجر اخذوهه لسيد بلكت يفك لسانهه..
الحجية : بحيل الله..

لو تحترك احسن مما تضل بالسجون ياكلب ابن الكلب.. عاينت عليهه لكيت دموعهه بعينهه وكامشة دشداشتي قوي.. بستهه وقريت على راسهه بگلبي..
وره يومين بدلت وبدلتلهه لكيت المنطقة مجرحة.. هسه وين اخذهه.. دكتور نفساني لو وين..كل يوم دتصير اسوء بعد مااكدر اسكت اكثر.. بدلتلهه بالعجل واخذتهه انه وخالة والحجي بسيارته لواحد سيد..بيته تصميمه كلش قديم.. حسيته حينهدم على راسنا..كعدت بالديوانية وانتظره يجي.. شواي وفاتت مرة حطت عصاير وابتسمت..
- : هسه يجي ابوي..
دنوة : ماشي..
صدك وره دقيقتين فات رجال لابسة غترة ..جبير بالعمر وجهه مكچي.. كمت وكفت سلمت علي ..

ديمة من شافته دفنت راسهه بحضني..مسحت على راسهه واهدي بيهه..

- : يالله..شبيهه حبيبة جدو..
سولفتله شبيهه وشنو الخلاهه تصير هيج..عيونه صارت بگصته..انه واحجيله هو يستغفر وينعل الشيطان..
- : استغفرالله واتوب اليه..شون بشر هذول مااعرف..
دنوة : اي عمو..بلكت تقره عليهه تسويلهه شي بس خلتنطق .. خايفة تكون خسرت صوتهه..
- : لا لا..كبل فترة وحده بكدهه لو اكبر منهه بشوي جابتهه امهه.. ابوهه جايته طلقة تايهة ومتوفي..هي هم جانت مصدومة وماتحجي..هاي صدمة اكيد الصار مو سهل..
دنوة : الله يرحمه..زين هي تخاف منك شلون..
- : خليهه بحضنج عمو وانه اقره عليهه..

تقرب مني كام يقره عليهه بصوت خاشع..يقره ادعية وآيات قرآنية.. بعدين صاح على بنته جابتله مي بگلاص.. همات قره علي بس غير آيات..
كال : ديريهه علي..
شلتهه خليتهه مقابيله..هي مغمضة عيونهه بإديناتهه ماتقبل تشوفه..دار من المي على ايده ومسح بي راسهه.. كامت تبجي كمت اهز بيهه على رجلي..لحدما كمل وغسل وجهها..
- : گوميهه هسه..بس ياعمو تره الصار مو هين..لاتحسبين من هلمرة وتصير زينة..انه صارلي سنين اقره ع الوادم وصادفني مثل البنوتة هاي..خلي ايمانج بالله جبير..واذا بقت هيج توجهي لأقرب طبيب..الطب نعمة ومساعدة ربانية.. الشفاء العاجل بحيل الله..
دنوة : شكرا عمو..ان شاء الله اسوي هيج..
كام ع البوفية طلع مثل الورقة المطبگة بي لونهه اخضر بيهه دنبوس حجمه وسط..شده بالتشيرت مالتهه..
- : خلي دائما بهدومهه.. لاتنزعيلهيا..

دنوة : ان شاء الله..شكرا..
- : العفو بوية ماسويت شي..
شكد ارتاحيتله..حسيته مثل ابوي.. كمت شلتهه ومسحت دموعهه.. لكيت خالة متانيتني بالهول كاعدة هي ونسوان بعد اربعة..ترخصنا منهم وطلعنا..اول مارجعت للبيت نامت.. بس هلمرة نامت نومة كاملة ماكعدت..
اوف ماماتي شصار بحالج..انه بعد اخليكم تطلعون .. امداني اذا صدك..شمدريني وشمعرفني..على نيتي ردتكم تتونسون وتخلصون من جو البيت..اشو البيت تأزم بالزايد..

مرت ايام كضيتهه من دكتور لدكتور..اخذتهه لدكتورة نسائية اول ما گتلهه الفحص لبنتي مو الي ضلت فاكة حلگهه..
- : امي وينهه بنتج..
دنوة : هاي.. وأشرت بيدي عليهه..
سولفتلهه وضعهه وشنو صار..فحصتهه مرة اللخ وهمات كالتلي نفس كلام الدكتورة بالمستشفى..الدم الديطلع بهاي الفترة بسبب جرح صاير..انطتني شريط التهابات ومرهم .. هي ماتعرف تبلع الحباية..فاموعلهيا بالمي..تشوفه مر تذبه ماتقبل.. تالي كمت اخلي بالحليب لو بالعصير يله تشربه.. شوي تحسنت ورجعت المنطقة لشكل تقريب شكلهه القديم.. هي بعدهه ماتحجي..بس كامت تكعد يم ايمن.. هو خطية يشوفهه كاعدة وحدهه يجيب ملاعيبه يطشرهن جدامهه.. يكوم يخلي بحضنهه وتدفعهن..

ايمن : ماما هاي ليش ماتريد تلعب..
دنوة : مريضة حبيبي عوفهه..تعال العب وياك..
ايمن : لا اريد ديمة..
دنوة : ماماتي مريضة شبيك..
ضل يعاينلهه وكام يمهه حضنهه حضن مال جهال مليان براءة وحنية..كام يبوس بيهه..هي بس تعاين ماتحجي.. حتى ماتبتسم.. كل يوم اموت الف موتة عليهه..ماخليت دعاء ماقريته .. ماخليت امام مانخيته بس اريدهه تحجي..
سرور اجتني شافتهه..ماادري شتشوف منهه وهي متيهة كلشي.. تعاين وتنتبه بس ماتحجي..

بيوم كاعدة يمهه دااشربهه العصير جان يدك تلفوني.. رزان.. جاوبتهه وحجينا عادي..
بعدين كالت : ديمة شلونهه..سمعت من سرور..
دنوة : اوف..بعدهه والله..هليومين اجي لبغداد اخذهه لدكتور بعد ماترهم سادة وشيوخ..بنتي حتروح من ايدي..
رزان : اويلي عليج..ولج متعيشين يوم مرتاحة..
دنوة : قسمة ربج بعد..شسوي قابل..انتي شلونج .. جهالج
رزان : كاعدة وساكتة..بين امي وعيالي..
دنوة : شلون صارت..
رزان : يعني شويه احسن..حيعيدولهه التحاليل بلكت تطلع نظيفة..
دنوة : هاا..الله يشافيهه.. يله عيني اروح انه..
رزان : الله وياج حبيبتي..

سديته منهه وصفنت..يادكتور اخذهه..اوديهه لدكتورتي.. لا منو يكول اختصاصهه اطفال..انه من يوم ديمة فقدت النطق كمت ابحوش واسأل دكاترة ع النت..تقريبا تلث دكاترة كالولي هاي صدمة..وممكن بسبب الصدمة يصير عدهه توحد.. بالبداية ماعرفت شنو يعني توحد..بس قريت عنه حسيت گلبي حيوكف..اذا صار بيهه هلمرض اموت بفراشي.. ضليت ادور دكاترة اختصاص توحد وامراض نفسية للاطفال.. بس قليلين والحجز يوصلني وره اسبوع اذا مو اسبوعين.. هم اذا اروح لازم انتظر نص اليوم..
بس مايأست..ضليت ادور واسأل دكاترة.. لحدما ثاني يوم اندكت الباب العصرية..طلع خالو يفتحهه.. ارشد.. صارله من يوم الكعدة ماجاينه..بس على تواصل دائم وي خالو..

شواي وفاتو ثنين..عفتهم وطبيت للمطبخ اغسل مواعين الاكل مال ديمة جان يجي الحجي ..
وائل : خالو تعاي شوي احاجيج..
دنوة : وين خالو..
وائل : بالاستقبال..
عدلت الشال ورحت وياه..سلمت وبقيت واكفة بالباب..
ارشد : خوية ام ايمن..صحيح مداامر عليكم بس الله شاهد ديمة ببالي..تدرين شغلي ببغداد فسألت على دكتور عنده شهادة بهلامراض..وخوش دكتور يعني حتى سمعته طيبة.. اذا تريدين احجزلج عنده وانه ادفع چم فلس يقدم الحجز .. خصوصا انتي من غير محافظة فاول وتالي يتقدم حجزج..
دنوة : شسمه الدكتور ووين صاير..
ارشد : عادل عبدالاله..بالكرادة.. روحيله ماتخسرين شي.. عندي رقم السكرتير..
دنوة : ردليا بلا زحمة وانه احجز عنده..
ارشد : ماكو اشكال..

ردلي الرقم كتبته وحفظته..عفته كاعد وي خالو وطلعت.. لكيتهه متمددة وخدهه على ايدهه..كلش ضعفت وخدودهه خلصن.. جنت اذا اشيلهه اتعب چي مدبدبة..هسه مااحس بيهه حتى.. دمعت عيوني عليهه..كعدت يمهه بستهه وامسح على شعرهه.. اجت خالة حجيتلهه
الحجية : خابري يمة لاتماطلين..
دنوة : اي خالة هسه حخابره..
خابرته مرة ماجاوبني..بعدين يله..اتفقت وياه على يوم الجايين من غير محافظة قليلين علمود ادخل بالعجل.. صادف وره تلث ايام.. كلت اروح وارجع بنفس اليوم ماابات عد احد..

وره تلث ايام بدلتلهه وبدلت..اخذتلهه هدوم خاف ماالحك ارجع بنفس اليوم ابات يم بيت خالي لو ابو جمال..ايمن بقى يم خالة ورحنا انه والحجي.. الطريق كله خالة ايدي على گلبي.. كون مايطلع بيهه توحد وشي يتعالج وي الوكت..
وصلت الظهر ووره ساعة صاح اسمي ودخلت عنده..

ديمة من شافته حضنتني ودفنت راسهه بحضني حتى ماعاينتله.. كعدت يمه حجيتله عن حالتهه..
بعدين كتله : دكتور انه قريت ان الصدمة تسوي توحد.. فخفت عليهه شلون..
- : اي نعم صحيح..لكن الطفل بهيج عمر ذاكرته قيد الاكتمال التام.. من الممكن ان تذكر تفاصيل بسيطة مستقبلا بس كموضوع رئيسي لا.. اكيد الصارلهه صدمة وصدمة قوية ايضا خلتهه تفقد النطق.. شوكت اخر مره حجت..
دنوة : صار هواي..تقريب الشهرين..
- : تنتبه عليج من تحجين وياهه..
دنوة : اي طبعا..
- : والأشخاص الباقين الوياكم بالبيت..
دنوة : اي دكتور هي تنتبه علينا اذا صحناهه..بس ماتجاوب تكتفي بس تعاينلنا..
- : إذًا مابيهه توحد..مجرد صدمة ..كتيلي ديمة اسمهه..
دنوة : اي دكتور..

صفگلهه وندهها : ديمة عمو..باعي شعندي..
رأسا اندارتله.. ابتسم ومد ايده كامش چكليتات ثنين..
- : اخذيهن..
قربت ايدهه من حلگهه خايفة تتقرب..هو بإسلوبه خلاهه تتقرب واخذتهن منه..

- : اذكريلي بعد شنو صارلهه بهلفترة من اعراض..
دنوة : هي تخاف من الكل..اكل ماتاكل الا انه اوكلهه.. ماتحجي ابد..بس كتلك كبل شهرين حجت هي ونايمة.. وتحلم دائما كوابيس لأن من تكعد تبجي وتضل تعاين بالغرفة بعدين تهدأ..
- : حيل زين..علاجهه اسهل بكثير من الباقين.. والفضل لعمرهه الصغير.. اكو اطفال يصير عدهم تدرر لا ارادي ويتصرفون تصرفات طفل عمره اقل من عمرهم.. مع ذلك يجي دوركم انتي ووالدهه.. البنت تحس بأمان الاب .. يكدر هو ينتشلهه منه..موجود..
دنوة : لا دكتور متوفي..

- : الله يرحمه..إذًا الدور عليج حيكون ضعف.. حاولي تتأقلمين مع تفكيرهه واحتياجاتهه..جيبيلهه ورقة واقلام تلوين كليلهه رسميلي شتريد وشتحسين..اذا شفتيهه تعرف ترسم فهي بمرحلة الأمان..انتي كأم ضروري تحسسين ان هي انسانة طبيعية..وإن الصار شي ينسي بمرور الوقت.. طلعيهه دائما اقترحيلهه اماكن تروحلهه وهي تنطيج الموافقة لمكان تريد تروحله.. من تكبر اكثر حتلاحظين عليهه تصرفات اكبر من عمرهه تلقائيا..والسبب يرجع للحالة الدخلتهه.. حتصير تكره الجنس الثاني ويصيرلهه رهاب وهلع منه..شي جدا طبيعي.. ارجع واكول دورج انتي مهم حتى تنتشليهه من البؤرة الدخلت بيهه.. كلهه علاجات سلوكية لا اكثر..اما كعلاج بالعقاقير لطفلة مثلهه ابدا ماارجح هلشي.. بالنسبة للنطق لتخافين عزيزتي .. تلقائيا بس يتم علاج الصدمة هي حترجع تنطق.. اكو تلكئات مبدئيا بعدين يمشي الأمر طبيعي..تقبل بطيئ وغير ملحوظ لكل فعل حتسولهيا..يحتاجلج فقط طول بال..

علمني على تمارين اسويلهيا وشلون احاجيهه خاطر اخليهه تتقبل روحهه.. حسيته انطاني جرعة ايجابية ان ممكن تصير زينة..الله يعطف على حالي يارب واكدر اخلصهه من الي هي بي.. تشكرت منه وكمت..لكيت خالو ينتظرني.. نزلنا جوه اشتريتلهه حلويات وطلعنا تمشيت شوي واحاجي خالو شكال الدكتور..بعدين رجعنا للبصرة بنفس اليوم..همزين مابيه حيل ابات.. وصلنا بالليل بالتسعة وشوي..بدلت وكعدت يمهه وكلتهه لكيتهه كامشة الكواغد مالت الچكليت وضابة ايدهه عليهن.. اعصابهه مشدودة..بست ايدهه وفتحتهه على كيفي اخذتهن منهه ذبيتهن وحضنتهه..

مرت ايام من اصعب الايام بحياتي.. تعبت وهلكت بمعنى الكلمة.. تعبت خاطر اخليهه تتقبل تكعد وحدهه.. تعبت خاطر اخليهه تبتسم لمن واحد يحجي شي يضحك.. اذا اعلمهه شغلة ثاني يوم تنساهه..طول هاي الايام هي ماتحجي.. وانه خوفي يزيد يوم عن يوم..
بالبداية تكمش القلم وتضل صافنة ماتسوي شي.. بعدين كمت اكمش ايدهه وارسملهه وردة لو بيت..خليتهه تتعود ترسم هلشغلتين من وحدهه..لحدما كمت اكعد يمهه من ترسم ادير وجهي اتفرج تلفزيون وارجع الكاهه راسمة شي جديد.. هاي اول خطوة سوتهه حسيت روحي وصلت للسما من الفرح.. كمت اطلعهه دائما اخليهه تشوف ناس.. طبعا سرور ورزان نوارة على طول الخط وياي يخابروني يسألون عليهه .. رزان اجتني مرة ونوارة بس تخابر..

حتى غدير خابرتني هي وشذى..الكل..محد قصر وياي.. ولو دعم معنوي بس يخلي عندي امل.. حشاه ربي مايظلم.. اكيد ديمة حتصير زينة انه عندي ثقة تامة بجلالته.. بس وكت.. يحتاجلي وكت..

الولد السوة بديمة هيج تحاكم..بجلستين صدر الحكم مالته.. ثلاثين سنة كاملة.. عمي قاسم خابرني كال باجر الجلسة الاخيرة تريدين تحضرين..كتله لا..لأن اذا شفته اخلي سچينة بگلبه واكتله خلاص تالي انه افوت للسجن مو هو.. صحيح كلشي صارلي قوّى من نفسيتي وشخصيتي بس طيحة ديمة هي اكثر شي خلاني اوكف بوجه الكل..
اخلاص الماتطيقني الله هداهه علي ودائما تخابرني تسأل على ديمة وتسأل عني انه شخصيا.. مايهموني كل البشر بعد.. بس خالة وجهالي..هاهيه تعلمت ..
ارشد .. ارشد مواقفه مااكدر انساهه..هو دلاني ع الدكتور هذا يمكن لوما هو جان بقيت ع السادة وماشفت نتيجة فعلية.. وهم دائما يخابر خالو يسأل على ديمة..صح مااستلطفه بس السوالياه عمري ماانساه..

ديمة بلشت شوي شوي تتخلص من الاحلام..يعني كل فترة تحلم مرة..كمت اقره على راسهه دائما والقرآن مايطفى من البيت كله..عودتهه تلعب وي ايمن..حتى وي جهال اخلاص.. بالاول خافت تكعد يمهم..بعدين شافت ايمن شلون ديلعب وياهم وراحت..كل شوي تجيني تختل بحضني لحدما تعودت عليهم.. يعني فترة متعبة بمعنى الكلمة..
انام وراهه واكعد كبلهه.. الجرح الصارلهه عالجته وراح الحمدلله.. كامت تكعد يم خالة وتجيب ملاعيبهه تلعب يمهه..

يمكن شغلات ماتستحق هلفرح بنظر البعض بس انه بالنسبة الي جان بمثابة الحصول على شهادة عالية.. هلكد ما تعبت .. الحمدلله على كل حال..

بعد مرور شهور..صرنا بنص الشهر العاشر.. يعني فترة علاجهه خمس شهور..لأن اول شهرين جنت بس ع السادة والشيوخ..كامت تضحك ويانا وتاكل وحدهه.. تلعب وتركض بالبيت.. رجعت بنسبة ٩٠٪؜ طبيعية..بس تخاف من الظلمة ومن الاماكن الضيقة..من اسبحهه تغمض عيوني ماتقبل اعاينلهه.. هن هذني اخر شي بقى عدهه من كل اعراضهه القديمة.. بس بعدهه ماتحجي..ولا كلمة..

وره فترة قصيرة لاتزيد عن عشر ايام كاعدة اتفرج تلفزيون وياهم جان يجي الحجي من دوامه..
وائل : اكلج خالو..مو ديمة بعدهه ماتحجي..
دنوة : اي والله بعدهه..
وائل : ارشد دلاني على دكتور ثاني..ببغداد..تحبين تروحيله اخذج انه..بس هو مال كبار..
دنوة : انطاك رقم السكرتير..
وائل : اي طبعا..
دنوة : خابره احجز عنده بلكت يعرفلهه..
وائل : يله هسه..
خابره حجلنا عنده..كال بعد يومين..

وره يومين بدلت وبدلتلهه بس سيارة خالو مااشتغلت.. بين ما كعد يسويهه فتأخرنا يله طلعنا..بس وصلنا لكيت الدكتور هستوه دينزل من العيادة..
انداريتله : تأخرنا خالو..
وائل : يله شسوي..اكيد بيهه صالح..
الهوى جان طيب بي برودة..فضليت واكفة شوي والحجي اخذ ديمة يشتريلهه..

فاتت مرية جبيرة تطلع اكبر من خالة.. تاتو اهل گبل بعده على حنچهه..اجت يمي تحاجيني..
- : شعندج هنا حبيبة..
دنوة : خالي اخذ بنتي يشتريلهه هسه يجي ونروح..
- : جنتي جاية ع الطبيب خالة..
دنوة : اي يمة..
- : يمة..اخذيهه مني..ذبي الراچيته بحضرة الامام موسى الكاظم عليه السلام..ابد مايردج خايبة..
دنوة : عليه السلام.. انه صارلي شهور وي بنتي اسم الله عليج انصدمت ولحد هسه ماتنطق..
- : ذبي قراصتهه لو بلوز هناك..وحگه ينطيج مرادج.. انتي مبينة بصراوية..
ابتسمت : اي خالة..
- : امكن الله دزني عليج..هسه تذكريني بالخير..
دنوة : شكرا خالة..الله يسلمج..
ابتسمتلي وطبطبت على ظهري وراحت..

اجه خالو يتمشى ويحاجي ديمة هو ومبتسم.. سوتله حركة بيدهه جان يضحك..اجه يمي وسولفتله..
دنوة : خالو هو احنا جايين جايين..وديني..
وائل : براحتج خالو..امشي اخذج يله ماعندي شي..
صعدنا ورحنا للكاظم..مليت من الدكاترة توجهت للائمة.. مامجبرة هلشعور..شعور اطلب شي من ربي جوه گبة امام .. وصلنا هناك بالليل يمكن بالتسعة هيج..من الازدحام كتل .. خالو طبك السيارة بالگراج وتمشينا جوه.. أجرت عباية انه واتفق وي خالو وين الاگي..

فتت للتفتيش.. ماادري بيومهه ليش قليلين الجايين.. يمكن الله يريد يسهلهه علي.. طبيت ويمكن هاي المرة الثانية ازور بيهه..مازايرة قليل كلش.. تمشيت واشوف هذني العاملات يمسحن الكاع وينكتون السجادات.. حسيت روحي دخلت بحضرة الأمان مو بس حضرة الامام..ارتاحيت بمجرد دخولي لهلمكان.. كمشت ديمة بيدي وتمشينا جوه.. گلبي كام يرجف يمكن من الرهبة..مااعرف .. شفت النسوان تمسح ع الباب وتفوت..اكو يبوسوه..مديت ايدي علي لا اراديا ارتعشت.. طبيت كعدت بمكان شفت نسوان كاعدات بي يعني يصير اكعد.. خليت ديمة يمي وحاضنتهه بالعباية..ضليت اعاين للمكان چن كل زاوية بي تنطيني أمل وصبر عجيب.. جسمي قشعر انه وعيوني تتفحصه..ماكو شي ببالي بس اريد ديمة تكوم تنطق..
وضوئي صحيح فكمت صليت..بالسجدة الاخيرة بجيت بحرگة وجسمي كله يرجف..مااعرف ابجي على ديمة لو ع الصارلي من يوم وعيت للدنيا لو على صگر الانحرمت منه عمري كله.. حسيت على ديمة تبوس چتفي..

رفعت راسي سلمت ومسحت دموعي..نزعت كماشاتهه ثنين واخذتهه تمشيت للشباچ..جانت اكو مرة جبيرة بسدهه وحده عشرينية مخلية ايدهه على بطنهه وتبجي هي وكامشة الشباچ .. اووف الناس اشكال وقصص..تمشيت للجهة المابيهه احد ذبيت الكماشات وگلبي يدك سريع.. دعيت بگلبي ربي يطيبهه وترجع تنطق..اريد افرح..اريد اتهنى بحياتي الباقية ياربي لاتردني خايبة بجاه موسى الكاظم.. خليت راسي على ايدي الجانت ع الشباچ وبجيت بدون صوت بس شهگاتي تنسمع..صدك جنت محتاجة تربيت على ظهري.. محتاجة احد يطبطب على گلبي ..لمسة ربانية ملائكية خالية من الذنوب..مو انسان عاصي ومذنب لحد الكفران.. هذا الشي شفته من بجيت جوة الگبة..دخلت بگلب محمل هموم الدنيا..من تيتم لترمل لمشاكل عائلية لحد مشكلة ديمة..

عشت هواي وشفت كلشي..مااريد اولادي يشوفون الشفته.. اريد اصيرلهم ام وأب وكلشي بالحياة.. مااريدهم يحتاجون بس ربهم.. تخليت عن كل ذرة أنانية بنفس أي بشر من يدعي اكيد يفضل نفسه عن أي شخص ثاني يعرفه.. بس هلمرة دعيت لجهالي ولزوجي الخسر حياته علمودنا..الخسر حياته بسبب كتمانة وهدوئه الفضيع.. دعيت لخالة ولخالو ربي يدملياهم.. انه بوجود وسعادة هذول البشر انسعد واعيش احسن عيشة..

فزيت على ايد مرة جبيرة على ظهري.. انداريتلهه انه وامسح دموعي..
ابتسمتلي : الله ينطيج مرادج خالة..
دنوة : ونعم بالله..
اخذت ديمة ورحت كعدت بنفس المكان..قريت سورة يس لوجه الامام وكلي أمل ترجع ديمة تنطق..
شفت ناس وعرفت معاناتهم..بس اسمع ماحجيت شي عن نفسي.. مشكلة عن مشكلة تختلف..حزن عن حزن يختلف.. والكل يشوفه همّه هو الاكبر..
نفس المرة الجبيرة قرت على ديمة وباستهه.. وره شوي طلعنا.. لكيت خالو كاعد من الجهة اللخ..كعدت يمه ..

وائل : تأخرتي ..عبالي ديمة صارلهه شي..
دنوة : لا خالو ماكو شي..حنبات لو نرجع..
وائل : لا يابة نبات..بعد مابيه حيل..من طلعنا مناك تعبان.. هسه خابرت ابو جمال كال تعال هلا بيك..
دنوة : يله ماشي..چا امشينا..
وائل : يله ماعندي شي..

اخذني ورحنا لبيت اخوه..ثاني يوم رجعنا من الصبح..
مرت تلث ايام..باليوم الثالث انه بين نايمة وبين كاعدة .. يعني مامركزة هذا حلم لو حقيقة..سمعت ديمة تصيح ماما كعدي.. ماما.. خفت افتح عيوني خاف يطلع حلم..بعدين صحيت لا اراديا لمن صوت ايمن يمهه..لكيتهه واكفة يمي ومبتسمة.. ايمن كل لحظة يبوسهه..
دنوة : ها ماماتي شبيج حبيبتي..
ايمن : ماماااا..ديمة حجتتتت..
عاينتلهه مصدومة..كمشتهه من چتافهه : احجي خلاسمع..
خلت ايدهه على حلگهه وضحكت : ماما..
بلحظتهه لو اموت من الفرح محد يكول ليش.. كمت ابجي من الفرح..ماعندي شي ثاني أعبر بي عن فرحتي.. حضنتهه وابوس بيهه من كل مكان : ولج ماماتي مامصدكة والله.. احجي بعد حبيبتي احجي..اويلييي يمة فدوه اروح لصوتج يروحي انتي..

باستني من عيوني : احبج ماما..
دنوة : يعمري انه اموت عليج..

تمنيت صگر هنا..جان يمكن حتى هلشي ماصار.. الحمدلله على كل حال..
وراهه بطلتهم من الروضة بعد..صرتلهم أب كبل لا اصير أم بالاساس.. لمن ديمة كامت تحجي صادف وره يومين عيدميلاد ايمن..طلعت العصر اشتريت كيكتين وفستان طويل اسود بعدني للآن مانازعته..اشتريتلهم كل واحد سيت هدوم جديد .. حبشكلات مال عيدميلاد ووكفت على صفحة خابرت خالو يجي ياخذني.. بس سديته شفت ارشد فوك راسي..

تصرفت طبيعي..سلم علي ..جان وياه ابنه وبنته..
ارشد : شلون صارت ديمة..
دنوة : الحمدلله زينة..
ارشد : حچت..
دنوة : اي الحمدلله..
ابتسم ومد ايده على جيبه طلع فلوس..مدهن جدامي : هاي بمناسبة سلامتهه..
دنوة : لا مااكدر اخذ..شكرا هديتك واصلة..
ارشد : انه مثل عمهه زحمة ترديني..
دنوة : اشكرك ماتقصر..
طبعا مااخذت منه عيب..هو كام يعاينلي بنظرة چن واحد تعبان وهسه ارتاح..

دقايق وراح جان يجي خالو ورجعنا للبيت.. كال انه حطلع يم علي..اخذو راحتكم..
بس طبيت تلكتني سرور ونوارة وجهالهم جانو موجودين.. سلمت عليهم وگلبي فرحان بنفس فرحة يوم زواجي من صگر.. خالة ابتسام وجديتي همات جانن هنا..
سلمت وصعدت فوك بدلت الفستان وخليت كحلة وحمرة مكياجي الطبيعي..انتبهت على روحي انه واخلي مكياج.. صار شكد ماشايفه صگر بخيالي.. يعني حچي الدكتورة صحيح.. بعد مااشوفه.. بين انقهرت وبين حسيت دماغي صفى من هم جبير..جنت بيني وبين روحي اكول بس لا تخبلت مثل كبل.. الحمدلله على كل حال..
بين ما كملت اجو ايمن وديمة..بدلتلهم وطبعا ايمن مايقبل الا من عطر صگر.. بس اشتميته حسيت گلبي نغزني.. اووف يامكانك شكد خالي..

كملنا ونزلنا.. سويت النفاخ والنشرات.. شغلنا اغاني .. تونست بيومهه ونسيت الصارلي بفترة مرض ديمة.. سرور باتت عندي ونوارة اجه عليهه رجلهه اخذهه.. خالة ابتسام وجديتي اجه عليهم سالم رجعهم..
بالليل نظفنا وصعدت فوك..شبعت ضحك على سوالف سرور .. ديمة التهت وي الجهال..حسيت روحي ردتلي وارتاحيت..

وراهه بفترة رزان خابرتني خليتهه تحجي وي ديمة.. هي هلكد ما تعاطفت وياهه حتى بالبداية ماصدكت.. اووف يمة بنيتي الحمدلله رجعتلي..جان متت بدونهه..
بيوم كاعدين الظهر جان يدك تلفون خالة..راحت تخابر وره شوي اجتني تحاجيني..
الحجية : اكلج خالة كومي بدلي وبدلي للجها نروح لبيت جدج.. مسوين ثواب لابوج..كلهم موجودين..
دنوة : يله هسه اكوم..
كمت فوك بدلت وكملتلهم بعدين طلعنا..خالة خلت المفاتيح جوه القنينة ومزنجليهه بزنجيل علمود الحجي خاف يجي يرتاح.. لمن وصلت باب واشتم ريحة الاكل..تذكرت طفولتي.. شكد جنت اشم هاي الريحة من بعيد لمن ارجع من المدرسة.. تتلگاني خالة ابتسام فرحانة..عكس خالة فاطمة ولا يوم ابتسمت بوجهي.. همزين خلصت منهه..

دخلت للمطبخ كلهم كاعدين..سلمت عليهم وكعدت.. سوالف وسالفة تجر سالفة..
دنوة : اشو روان ماكو..وينهه..
حنين : سكتي وخليهه..غير ملتهية بإبنهه..
دنوة : شبي ادور..مو زرعوله قوقعة..
حنين : اي بس متعبهه..استيعابه بطيئ.. هسه عود دخلته مدرسة فوتتله سنة..ونفس الشي..
دنوة : خطية..خاف مايفهم ع المعلمة..شوفوله خصوصي..
ام عقيل : بعد سوي حفيدي مخبل فد دور..شكو عليج انتي..
دنوة : ماكلت شي خالة..دااسولف عادي..
فاطمة : بتج شونهه عيني..سمعت ماتحجي..
دنوة : اي بس صارت زينة..
عوجت حلگهه : هاااه..الحمدلله ع السلامة..
دنوة : الله يسلمج..

شواي واجت غدير هي وجهالهه.. هي الوحيدة اتونس وياهه.. نوارة وسرور ماكو.. حسيت البيت ناقصه هواي ناس.. امي .. ابوي.. جدي..صدك الايام تغير المايخطر ع البال..

مشى الوكت وسوينا الاكل..عمة سناء اجت.. بوستهه وكعدت يمهه اسولف..شكد مشتاقتلهه صار كومة ماشايفتهه بس اسمع اخبارهه من بعيد لبعيد..
دنوة : عمة البنات شلونهن..
سناء : اي يعمة غير تزوجن وراحن..صفيت انه وحميد وليدي ورجلي بعد ماعندي شي..
دنوة : اي سمعت تزوجن..تصدكين ماعندي مجال احك راسي.. هلفترة يله ارتاحيت شوي..
سناء : والله الله يساعدج عمة ويحفظلج الويلاد..
دنوة : ويحفظلك حمد.. مايجن اشوفهن..
سناء : لا وين.. بعد اسبوع هيج يجن يمي.. تردين تعاي انتي شوفيهن لو احنا نمرلكم..
دنوة : يله انه اجيكم..هم اغير شي جو..

وره الغدة غسلنا مواعين وكلهم طشو..الكبار راحن ينامن.. واحنا طبينا للهول ندردش.. صدك حسيت نفسيتي تغيرت.. راحت غدير جابت حب وكعدنا..
دنوة : سولفولي..شخباركم منا منا..نور وطيبة (بنات عمي فيصل) وين صارن..
غدير : موجودات يمعوده..غير تزوجت وراحن خو تدرين ..
دنوة : اي ادري..احمد ماتزوج..
غدير : وج الوادم كلهه تزوجت الا هذا..مدري شبي ..
حنين : هسه يطلع يحبله وحده..
دنوة : ههههه..هو هيج ماكو غيرهه..

حجينا ع الباقين..كلهم مستقرين وكاعدين ببيوتهم.. اكيد لاتخلو من المشاكل العائلية.. بس عاديه يعني تعبر.. مرة عصام اماني جايبة ولد ورانية بنية.. سالم كايل مااريد بعد .. ويحبهه مدللهه.. هو شكد حباب حتى لمن جان عزابي يدير باله علينا ويجيبلنا شغلات لمن يطلع للشغل لو للدوام.. فاكيد مرته هم يعاملهه هشكل..
ورود شايلة لبغداد ومتبهذلة بالعيال.. اي چا شعبالهه العيال ينحملون لو شنو.. ولو اكو بيهم زينين بس مو الكل..
روان وعقيل .. غدير كالت باقين سوه علمود الاطفال..چا حب السنين الي روان طلعته براسي وينه.. صدك المظاهر خداعة..

العصرية كمت بدلت للجهال ورحت للغرفة البس الصاية.. كملت وطلعت لكيت عمي قاسم مكعد ديمة على رجله ويسولف وياهه .. ايمن واكف على صفحة غيران.. اجيت وكفت يمه.. رفع راسه يحاجيني..
قاسم : الف سلامة عليهه..الحمدلله كامت تحجي..
دنوة : الحمدلله عمي..
مد ايده على جيبه انطاهه خمسة وعشرين..
دنوة : لا لا مايحتاج عمي هواي هلكد شمفهمهه..
قاسم : ماعليج منهه..خليهه ممرود عليهه خطية.. تره دائما اسأل عليهه..
دنوة : ماقصرت الله يحفظك..
ابتسملي وشالهه خلاهه بحضني.. باسني من راسي وراح ..

اجه سالم سلم علي..ديمة استغربت منه فماحجت بقت ساكتة.. وراهه رجعنا للبيت..

مرت ايام عادية.. كل اسبوع عشر ايام اروح لخالتي لو هي تجيني.. ارشد ماكطع رجل من عدنا.. بس قلت زياراته .. عمة سناء رحتلهه مرة شفت البنات.. سوالف وضحك ماصايرلهم شي..زواج وجهال وعيال..فرح تفطني باليوم الكتلهم انه احب صگر لو لا وتضحك.. ضحكت بس گلبي نغزني بنفس الوكت.. رحت انت بس حبك ماراح.. بعده مدفون بكل جزء من روحي.. مستحيل شخص يعوض مكانه ابد..

وره فترة دارت السنة الثانية مال صگر.. نفس التسجيل ينعاد وتشوغ روحي..رحتله وبچيت على گبره.. بكل سنة ازيد وحشه وقهر.. ولا عبالك سنتين.. چن ذاك اليوم.. ماادري الخلل بگلبي الماينسى لو بالايام المدتكدر تنسيني.. مرت هلسنتين وبعدني لابسة اسود..لانزعته ولا قررت انزعه..ماكو شي يستاهل البسله الوان بعد..

بعد مرور شهر وشوي اجه محمد هو وعائلته.. مرتين اعتذر مني وماصالحته..شصالحه..على سواد وجهه.. بس بهاي جيته اعتذرلي وسامحته..بس مو من گلبي.. وحتلو سامحته فمو مهم اصلا..هو حبيبي مات صارله سنتين..
وره يومين من جيته جان هو ببيت علي وبس عائلته يمنا .. اندكت الباب العصرية.. طلعت افتحهه..نسوان تلاثة.. وحده جبيره وثنين بعدهن شابات..سلمو علي..استقبلتهم وفاتو جوه.. منو هذني..
طبيت صحت خالة ورحت للمطبخ خليت كلاصات عصاير ورحت قدمتلهم..وره سلام وكلام المره الجبيرة فتحت الموضوع الماجنت متوقعته ابددد..
- : والله ياام محمد..الواحد ليش يجذب ويلف ويدور.. بس انه جاية اخطب چنتج لابني ارشد.. هي هم عدهه ويلاد خوما يبقون بدون أب.. الام وحيدهه ماتكدر دادة..

ووليدي رايدهه بالحلال لو نيته لعب چا لافهه من غير درب.. وانتم براحتكم بعد..
لا اراديا حجيت : لا خالة شنو هلحچي.. ليش الام وحيدهه ماتكدر.. انه من وفاة زوجي لحد هاي اللحظة مريت بظروف صعبة..اكبر مرة ماتتحملهه..مااحتاج رجال..
- : بنيتي فكري يمة..وليدي رايدج وشاريج..اخذي وكتج فكري ورديلي خبر..
ردت احجي وخالة حجت ..
الحجية : ان شاء الله ام ارشد..هي تفكر وتردلكم جواب..
بقيت كاعدة على اعصابي لحدما سمعت صوت الباب انفتحت اجه محمد هو وعلي..عاد هم طلعو.. استغفرالله.. يعني هذا سواهه صدك.. وانه كلشي مااعرف عنه بس ادري بي متزوج.. حخربله حياته ع الخالي بلاش..خاصة اذا عرفت مرته.. وجهاله كبار زحمة..

انه من المريت بي بعد مستحيل احتاج رجال وياي.. انه صرت رجال.. اروكض يم السادة والشيوخ..بنتي كل فلس صرفته عليهه من تعب صگر..مااداينت فلس واحد..حتى فلوس الروضة ولا يوم طلبت القسط من احد..
لمن طلعو بالعجل طلعت.. مشى الوكت انه ساكتة ماحجيت.. راسي كام يوجعني من التفكير.. هذا ماطول امه لحت هشكل يعني هو حيلح ضعف..
بالليل كملت شغل وغسلت مواعين وصعدت فوك.. نيمت الجهال ورحت ع التلفون لكيت رسالة ع الواتساب من رقم مابي اسم ..

- : دنوة..انه ارشد.. صار سنتين متحمل ومنتظر هللحظة.. كل مرة يصير شي يعرقلني..صدكيني احبج.. گلبي دگلج واختارج.. مالي نية بشي ثقي بالله.. عجبتيني وحبيتج الشاهد الله..لوما احبج ماجان انتظرت هلسنتين.. اليوم دزيتلج والدتي وخواتي.. فرحيني ووافقي..ديمة وايمن بحسبة جهالي والله..واحبهم واريدلهم الزين..الاولاد بدون أب ضعيفين .. يحتاجلهم ظهر.. مااحسسهم انه عمهم..لاصدكي لمن حيكبرون يصيحولي يابة..الدنيا ماتوكف على احد والمرحوم راح خلص..فكري زين ولاتخذليني..

انه اقره ومصدومة..هذا من كل عقله..مستحيل .. احبج واريدج..حتى ماافكر اصلا طبعا ارفض.. انه صرت بعدال زلمة وره كل هذا العشته.. بعدين اخلي رجال فوك راسي..لا اكيد لا..
سديته وعاينت لايمن وديمة.. يعني اخلي ارشد يصير بحسبة صگر..الاب الماخله بنفسكم شي.. الصار اب حتى لأمكم.. حبني حب حسيت بي حتى بوكت عصبيته.. تالي ماتالي اتزوج وراه.. اخلي رجال يكمشني ويتلمس جسمي من بعدك .. بس فكرت بالموضوع بطني مغصتني.. انه عقيل ماخليته يكمشني هاي كبل لا يصير بيناتنا شي..وهسه وبعد هلسنين والتعب والعشرة ابيعهه واتزوج.. سواء رديت خبر اليوم او بعد اسبوع نفس الرد حيكون..مستحيل ارضا..

انه بعدني ماانام اذا مااشم ريحته..اذا مااحضن مخدته.. ادور اروح اصير بحضن غيره.. مااكدر..مااكدر.. صعبة علي صعبة..لو اعرف اموت ولا يصير هيج..

ضليت الوب وافكر..بعدين كمت جاوبته..
- : اهلا..انه انصدمت اليوم لمن شفت والدتك.. مقدرة حبك لجهالي وشكرا الك ماانسالك مواقفك ابد وعلى طول اتشكرك بيني وبين روحي..بس هنا ابد..مستحيل اوافق.. بكل ما تحمل كلمة مستحيل من معنى..ياريت تتفهمني وتعرف هلشي صعب علي ومايهونلي انسى العشرة علمود جهالي..انه أم وأب .. الله يحفظلك جهالك وتبقى خيمة على راسهم..اما جهالي فانه وخالتي موجودين..

ختمتهه ودزيتهه..حضنت مخدته واشم بيهه.. عيوني دمعت وانه اتذكر مواقفنا وضحكنا ع الفراش..بالاول كلت هاي چي اول سنة..ومرت السنة الثانية ونفس الحالة.. من بعد هلتفكير نمت بس راسي يوجعني من التفكير..
مر اسبوع خالة ماحاجتني بالموضوع ولا انه حاجيتهه.. محمد رجع لاربيل على فجأة.. بعد احسن..كمت مااتحمله.. ارشد بس شاف الرسالة ماجاوبني..وره هلاسبوع كاعدة يم الجهال دياكلون حلويات واجت خالة تحاجيني..
الحجية : يمة فكرتي..تره ام ارشد خابرتني وزحمة بعد تطول اكثر والزلمة متعلك..
دنوة : خالة شلون اقبل زحمة عليه مو علي..رديلهه خبر كليلهه ماتقبل..
الحجية : براحتج يمة..محمد راد يعرف منو هذني النسوان كتله هيج جايات علي بشغلة..هذا من يوم بلوته السودة كمت اخاف يسويلي بلوة لخ..

دنوة : اي والله لاعاب حلگج..لاتخافين حبيبتي.. انه عايشة لاجل جهالي ولاجلج..انتي وكفتيلي وكفات الأم..شلون اعوفج واعوف ذكرياتي بهلبيت واطلع..
مسحت على راسي وباستني..
مرت ايام صنطة..ارشد لايدزلي ولا يخابر..حتى خالة دورات تسأل الحجي علي يكللهه ماموجود اكثر وكته بالشغل.. هو هذا الصح..هاهيه..

بس مرة طالعة اشتري من الدكان شغلة للغدة والشهر الخامس حار بالنهار..اشتريت وطلعت لكيته منتچي ع السيارة عفته ومشيت للبيت..نزل الجامة وحاجاني..انصدمت بصوته شلون تعبان وگوة يحجي..

ارشد : بس احاجيج..
انداريتله : تفضل بس استعجل..
ارشد : شنو الماموجود بيه ورفضتيني..
دنوة : المكان مو مناسب ابد لهيج كلام..
ارشد : انعل شرف المكان..احجي خلصيني..
هذا شبي.. جاوبته بهدوء : مااكدر.. وانه كتلك جهالي مامحتاجين أب..انه ابوهم وامهم..ثم انت متزوج وجهالك كبار .. زحمة اجي انه وجهالي ضرة على مرتك..
ارشد : انه مطلك دنوة..جهالي ماعايشين وياي..
صح صدمني بس حاولت ابين الموضوع مافارق عندي : ولو.. انطيت كلمتي..
خزرني وزفر انفاسه بقوة : نشوف..نشوووف..
شخط السيارة وراح..

هذا اخر موقف صار بيناتنا..وراهه ماشفته..لحدما بالشهر السادس رجع دز امه.. هم حاجتني بنفس الموضوع ونفس طريقة الكلام..تحاول تقنعني وانه رافضة كل الرفض.. هم رجعتلهم خبر ماموافقة..هو كام يدزلي رسايل دائما.. احبج وشتريدين يجرالج..نفس الرد يجي بكل مرة وهو بعده مستمر مااعرف على شنو هلاصرار..
نهاية الشهر السادس اجه محمد وحده..وجهه مايگصه الطبر .. هي العالم تهج من البصرة بهلشهر وهو اجانا.. مدري شكو..خالة سألته كال هيج اجيت اشوفج.. بنفس يوم جيته بالليل نمت هلكانة من التعب..بحيث حتى مافكرت رأسا غفيت..

اجاني الحلم الصار سنين ماحلمانة بي.. نفس الغرفة الظلمة وانه ابجي بحرگة وخايفة..فات نفس الشخص الضخم يصيح علي ويفشر..يكلي صگر لو يدري شتسوين يكرهج.. يكرهج .. لحدما انفتحت الباب وفات واحد مامبين منه شي بس سواد.. صار جدامي وانشمرت علي.. طحت بالكع يم رجلي
كال : عوفهه انه اخذهه..
كمت ابجي وأجر بإيدي منه يريد يطلعني..اصيح بإسم صگر لحدما فزيت..
كعدت ميته من الرعب..شفت جهالي يمي.. كمت غسلت وطلعت صدقة مايصير شي..

مرت تلث ايام جان تندك الباب العصر..محمد جان طالع وي خالو مدري وين..طلعت خالة فتحتهه..طبيت اشوف منو .. ضليت واكفة بمكاني.. ارشد هو وامه..
الحجية : يمة روحي جيبي شي للضيوف..
طلعت منهم مصدومة..شلون اخلي يبتعد عني..حاولت بكل الطرق.. كتله مااريدك .. جهالي مامحتاجين اب ولا انه محتاجة رجال.. شحاجي هسه .. صبيتلهم عصير وقدمته.. طلعت بالعجل..

ام ارشد : دادة انه حجيت العندي وشفت الجواب شنو.. بعد خوما اجبرهه..
الحجية : صحيح دادة صحيح..
ارشد : خالة انه اريدهه..اريد اخطبهه..انتي مرة جبيرة وتعرفين .. بيهه شي لو حرام لو عيب..
الحجية : لا يمة مو حرام..بس هي ماتقبل شرد اسويلهه انه.. حاجيتهه خوما اجبرهه..حياتهه وهي حرة..ويخالة اذا عمامهه عرفوا مايقبلون..بحجة ولدنا مايتربون عند الغريب..
ارشد : ليش انه غريب امي.. طول فترة مرض ديمة انه وياكم وبالي عليهه چنهه بنتي..
الحجية : صح خالة..ماگلنا شي..بس هي رافضة الزواج.. سواء منك او من غيرك ..

ضلو يحجون لحدما طلعو..هذا شيريد مني..حتى عيب يروح ويرجع على مرة أرملة..ادور اجه بنفسه..استغفرالله.. ادور كايللهه لخالة ختفكر بعد..هي خالة همات فقيرة.. لو وحده غيرهه تگله مااخلي احفادي يتربون عند الغريب.. بس تاركة الموضوع كله بيدي..وانه نفس اصراري بس هم ترجع تسألني تكلي اخذي وكتج..
لمن راح وره ربع ساعة اجه محمد.. لاسأل ولا كال..طب ساكت ونام ساكت..

ثاني يوم كعدت لكيت رقم غريب داك علي..بالاول حسبالي ارشد فتركته..كمت غسلت وجهي ورجعت لكيته يدك.. جاوبت.. اول ما شلته سمعت صوت بنيه تبجي وتناشغ..
دنوة : نعم..منو..
- : انتي دنوة..ام ايمن..
دنوة : اي..ماعرفتج ..
- : شوفي..ححجيلج كلشي وثقي بالله كل كلمة اكولهه حقيقية ومااجذب بـ ولا حرف..
دنوة : تفضلي اسمعج..

- : اني زوجة ارشد.. اي زوجته الثانية ..هو متزوج من ٢٠٠٤ ومطلگهه..بعدين تزوجني الي..زواجي مو كامل.. يعني عقد سيد مو محكمة..صرت حامل مرة وطرحني..تدرين ليش..
دنوة : ليش..
-: لأن جنت بمكان ..شتسموه انتو..بيت ليل..بس جنت نظيفة الله شاهد محد لازمني..هو ارشد اول واحد تقربلي.. وراهه تزوجني عقد سيد وعزلني ببيت صغير..هنا بالبصرة بس بغير منطقة مو يمكم..صرت حامل اول مرة وطرحني..بحجة اسوي كولبة علي واخلي يتكربص بجاهل من وحدة مثلي.. وراهه اخذني للدكتورة غصب خلاني اسوي منع..اني مواليد ٨٧ .. لمن طرحني تأذيت وبقيت اراجع دكاترة علمود اتعالج.. وهناك وشلت المنع..كلت لازم نبني حياتنا..خوما نضل بس اني وهو.. وصرت حامل للمرة الثانية..وهلمرة لمن عرف گلب الدنيا عليه وراد يطرحني بس اتفقت ويا الدكتورة وماطرحت..

بعدين طلعت حامل بتوم..هسه عنده جهال ثنين مني.. علمود نسوي الجناسي فحولت العقد من عقد سيد لعقد محكمة.. اني زوجته بالقانون وبالشرع.. بس لمن صرت حامل هملني.. كام دائما يشرد بتفكيره ومايشوفني شريد مااريد.. حتى لمن جبت جابلي اخته دارتني هو مااجه بس اسبوع وراح.. كام يجي سكران وهو مايشرب الشهادة لله..حتى يضربني..تعبت بعد مابيه حيل اتحمل واني عندي جهال ثنين..نتبهذل.. مااعرف شنو الغيرة هيج..مايكول وتلفوناته دائما مقفولة..وراهه بفترة قصيرة فتحت تلفونه ع البصمة مالته هو ونايم لكيت محادثته هو وعارف اخوه ديحجيله عنج..كال احبهه واريد اخطبهه.. وراهه راجع گايله خطبتهه وماتقبل..ماوافقت ..بس حرجع اخطبهه لحدما توافق لأن احبهه..
يعني بالله عليج تقبلين تزوجين واحد عنده ست جهال.. واني حسب العرفته من كلامه هو وعارف انتي عندج ثنين..مو..
دنوة : صحيح..

- : مااريد حياتي تنهدم..حاولي تفهميني.. الانسان يكون اناني بهللحظة..وانتي اذا عندج بيت وجهال وعمة اني كلشي ماعندي بس ارشد واطفالي..هسه هو صارله اسبوع ماجاي للبيت ولا يخابر.. تعبت حيل وخايفة ..خابري كليله مااريدك.. سوي أي شي بس خليرجعلي..مليت من الحچي والتوسل كل يوم اعيد نفس القرص وهو بعده مثل قبل..
دنوة : الله يساعدج ويخفف عنج عيوني..بس منو كال انه موافقة على ارشد..اصلا كبل لا اعرف هلكلام جنت رافضته.. ادور هسه..لاتخافين..انه اخابره واخلي يبتعد عني كل البعد.. بس بالمقابل مااريد يعرف انتي وصلتيلي..
- : اي اكيد مااكول وصلتلج..اني بس اريدج تعرفين ارشد على حقيقته..صح مبين شاب وبعده وعزابي بس عنده مسؤوليات هواي واني من ضمن مسؤولياته.. حبه مؤقت مثل ما حبني.. وهمني هو يحبني ومايشوف غيري بعدين بأقرب فرصة وبأول نظرة عليج نسى كل الحب بيناتنا..شنو اليضمن مينسى الحب الحيحبلچيا..اعتبريني اختج وداانصحج..

دنوة : اهلا بيج وبنصيحتج..بس انه كبل لا تحجيلي رافضته صدكيني..لاتفكرين هواي..هو حيرجعلج تلقائيا لمن اخابره ويخلص كلشي من ناحيتي..يمكن هو على أمل لحد الآن.. فانه حكطع هذا الأمل..الله يوفقج ويساعدج بتربية اطفالج..
-: اشكرج..مااعرف شلون اتشكر منج..ممنونة كلش هواي.. بالبداية عبالي محتجاوبيني..لو عبالي حتقبلين بي..
دنوة : لا عيوني مااتزوج لاتخافين..
-: ماشي..شكرا ..مع السلامة..
دنوة : الله وياج حبيبي..

سديته منهه وعفته ع الكومدي..كمت ألم فراش ديمة نامت بالكع انه وافكر..ست اطفال وتفكر بيه..استغفرالله يعني شحجي وشكول..التهي بأطفالك ومسؤوليتك..لو يبقى اخر رجال مستحيل ارضا بي..

كملت شغلي العصر وصعدت فوك..دكيت رقمه وخابرته.. بدون مقدمات حجيت : مااريد احجي شي وياك غير هلموضوع.. ياريت تبتعد عني ابو اكرم..التهي بعائلتك ومسؤوليتك.. انت رجال مسؤول وعندك عائلة جبيرة فمامجبور تتحمل مسؤولية اطفالي المايمدولك بـ صلة..
ارشد : شنو مناسبة هلكلام..
دنوة : اريد اگلك انه مااوافق..اذا مو اليوم بعد سنة.. شيل هلفكرة من بالك نهائيا..انسانة عايشة ع الذكرى والعشرة.. مااكدر ابدلهه بعلاقة ثانية..وانت انسان صعب وغامض..
جر تنهيدة..كزبر جلدي من يمي : هاهيه مثل ماتريدين.. حاولت بكل الطرق..ردت بس توافقين..بس ماكو نصيب .. الله يسهلج خيتي..مع السلامة..

سده بالعجل.. تنهدت بشعور مابين الفرح ان كدرت اخلي يبتعد عني..وبين انقهرت علي.. بس اكيد مرته تعرفه اكثر مني لهلسبب كالت هيج وحذرتني..عموما سواء حذرتني او لا انه رافضته..

نزلت جوه سولفتلهه لخالة كلشي..من هاي المرة الخابرتني لحد اخر مكالمة..
دنوة : شتكولين خالة سويت الصح..
الحجية : اي والله ييمة هو هذا الصح..انه جبيرة وعندي خبرة.. تردين تقنعيني انتي هلسنة مثل كبل عشر سنين.. يمة دشوفي روحج شلون صايرة بعدال الرجال وعلي.. شلون تروكضين بديمة حبيبتي بالدكاترة والسادة..ماتحتاجين رجال..ويخالة تره مو كل النسوان لازم يجي رجال فوك راسهه..هاي بس الي هي تريد تزوج لو خطية حالتهه المادية مو زينة..انتي الحمدلله احسن من مية وحده ارملة..
باستني من راسي ومسحت على چتفي..
الحجية : الله يثبتج خالة..

وره يومين الجو بالليل جان بي نسمة هوى وكهربائنا ماكو .. فغسلت السطح وفرشت فوك..صعدت خالة هي والحجي ومحمد.. محمد والحجي فرشتلهم بعيد شوي علينا..نمت وره الأذان ماكدرت چي مو بغرفتي..
كعدت الصبح الشمس بعيوني.. عدلت الشال وكمت.. شلت الغطى مالكيت ديمة وايمن.. يله اكيد نزلو وي خالة.. لميت الفرشات خليتهم بغرفة اخلاص ونزلت..ع الدرج صادفتني خالة..
الحجية : وج يمة صار ساعة اصيح عليج وينج مو بطيتي گلبي..
دنوة : شكو خالة خوفتيني..
الحجية : حميدان ماخذ الجهال ورايح لبيت جدج..
خليت ايدي على صدري بخوف : شعنده ماخذهم..

الحجية : البارحة سامعنا دنحجي على ارشد..والأغم حسباله حتوافقين چي مخابرته..كتله يمة لاتركب راسك..المرة ماكالت شي بالعكس ماتريده..كام اخذهم وراح..يكلي مااخلي ولد اخوي يتربون يم هذا السكير..وانه يمة رجليه وين اكدر اروكض وراه.. صار ساعة اصيح عليج ماتسمعين..
دنوة : اوووف بس اووف..دنوة حرام تعيش مرتاحة.. ماعندي شي خالة..والله اروح اوكف بوجه اكبر واحد..لا عمي ولا جدي..بسيطة..

صعدت بركضة فوك لبست الصاية ونزلت..اخذت تكسي ورحت لبيت جدي..ثلث ساعة وصلت..طبيت بالعجل..بس سلمت على جديتي وخالة ابتسام ودخلت للديوانية..لكيت عمامي كلهم كاعدين وجهالي يم محمد..عمي قاسم كام وكف هو والباقين..
محمد : هااا..لازم وصلج الحچي..
دنوة : ليش ماخذ جهالي..مالك حق..
قاسم : لا انتي الج حق تزوجين واحد يشرب ومتزوج مرتين.. لاتنسين روحج انتي ربيتي عدنا..والنا حگ عليج.. ماعدنا مرة تزوج لواحد غريب وولدنا يتربون عنده..ياتخلين محمد يعقد عليج ياتبقين ببيتج..

دنوة : انتو منو كللكم هذا الحچي..انه وين وافقت علي.. ابد ماكو هيج كلام..انه لو اريد اتزوج چا محد بيكم درى بيه.. المرة مايوكف بوجهها بس ربهه..كاعدة ببيتي واربي جهالي.. مامحتاجة لا ارشد ولا محمد ولا أي واحد ثاني يسمي روحه رجال.. ياريت ترجع جهالي لأن هلكلام ماله صحة ابد..
محمد : عمي انه سمعتهه تكول خابرته..
دنوة : خابرته ورفضته..لأن جياته تسوي احراج ومالهه داعي اصلا.. اعرف شنو ديصير كبل لا تحجي.. عمي وروح صگر الماعندي اغلى منه مااتزوج لو على گص رگبتي.. لا ارشد ولا محمد..
صار صياح..ساعة اطلع انه غلطانة وساعة محمد.. بالاخير انطوني الجهال ومحمد خابر ارشد جدامهم فتح حاكية كال اي رفضت وانتهى كلشي من يومهه..

صار بسواد وجهه..احسنلك هيج فشلتك.. اخذت جهالي ورجعنا للبيت.. شكد فرحت بروحي لمن وكفت جدامهم وانه كلي فخر وادري بروحي صح ومايوكف بوجهي بس ربي..

خالة زعلت علي..كالتله تبقى طايش وأرعن.. عاد طاحلهه طيح بعدين رضت علي..هو يومين وطلع لاربيل بعد ماشفته..

نفسيتي انتكست وره هلفترة..التهيت بمشكلة ارشد هاي ومنا طلعتلي سالفة محمد..صح صرت قوية جدامهم بس اعصابي انهدت للكع..
كمت اشوف خيالات واحس برهاب من شخص يريد يكتلني.. حجيتلهه لخالة بالبداية رأسا.. بنفس اليوم وصت خالو جابلي كل الدوايات مالتي..هي تنطينياهم وشوي شوي رجعت مثل كبل وكلشي اختفى..

مرت ايام هادئة صافية..مابيهه أي شوائب.. بين ديمة وايمن وخالة وخالو..روحي من الدنيا هذول..مستمرة ع الادوية مالتي بس كمت اخذ شريط واحد حسب وصفة الدكتورة..

صگر..حبيبي وروحي وابوي وضحكتي الطالعة من گلبي.. اندفنت وياه وراحت وي روحته..مرت سنين وبعدني على موقفي.. مستحيل اتزوج..مستحيل اخلي شخص غيره يلمسني ويشوفني سافرة..روحي معلگة بهدومه وحركاته الرزنة.. ضحكته وكلماته تتردد على مسامعي بكل وكت اصفن بي.. كل يوم تمرني كلماته كبل لا انام..بعدني ماانام الا اشم ريحة شماغه واحضن مخدته..روحه بداخلي..بگلبي.. بكل نفس اتنفسه.. وانه متأكدة لو ميته بمكانه مستحيل يتزوج وراي.. شفت حب بعيونه وبتصرفاته تحلم بي كل بنت بالدنيا.. بعده گلبي يفز لمن ينجاب اسمه.. صح تعودت بس بعده گلبي ملچوم ومستحيل ينجبر .. هو علمني شلون اجبر كل جرح بداخلي..بس جرحه مايجبره شي..

سرور..اختي الماجابتهه امي.. وكفت وياي بشدتي وبكل طيحه طحتهه..گلبهه علي ودائما تخابر وتسأل.. حتى تجينا لمن تمر على اهلهه..

رزان وسما..رزان بخير وعافية الحمدلله ..المعنى الحقيقي للأخت.. صحيح بالبداية جانت طايشة وماتحبني.. بعدين بلشت تعرفني شنو..وكفت وياي وماعافتني.. سما تزوجت واخذت شذى يمهه.. شذى شوي تحسنت عن كبل بس بعدهه تتخربط دورات..

نوارة وخالة ابتسام وكل اقاربي زينين..وعلى تواصل وياهم بفترات متباعدة..كلمن عايشة بديرته ولهلة..والحمدلله على كل حال..

ديمة وايمن..جهالي وحبايبي وأنفاسي الاتنفسهه.. نعمة الله يرزقنياهه ودااحافظ عليهه بكل ما عندي من قدرة وطاقة.. اصرفلهم مي عيوني بس اشوفهم يكبرون وتصير بيدهم شهادة تنفعهم لزمانهم..ديمة تحسنت بس بقت عدهه رهبة من كل ولد يفوت من يمهه..

ارشد..انتقل من البصرة لبغداد هو وعائلته.. بعد ماسمعت اخباره نهائيا..حتى الحجي قليل يخابره..صح الفترة الدخل بيهه حياتي جانت قصيرة بس ساعدني ووكف وياي وكفات لحد هللحظة اتشكرله بداخلي عليهه..لمن جابلي ديمة ولمن انطاني عنوان الدكتور.. من غير سيارة صگر الطلعهه من التوقيف.. وسالفة محمد وسبب قتل صگر..كلهه بفضله.. سوالي زين بس هذا لايعني ان انه اتوددله واريد قربه..

اما انه..كلشي مريت بي هان وراح بوكته..بس وفات زوجي مستحيل تهون علي..جان الي أب وأخ وزوج مايتقدر بثمن واخذه مني الزمن..بعده ببالي ..بعدني ابچي علي واحن لسوالفه وكلشي يخصه..لحد هلسنة لابسة الاسود ومامفكرة انزعه..صحيح الاسود مو رمز للحزن بس ماكو شي يستاهل الالوان من بعده.. بعده ذكراه يسوي غصة بزردومي والدمعة تصير بطرف عيني.. الدنيا علمتني المرة تكدر تصير رجال بنفس الوكت..علمتني الحب الحقيقي ماينسي حتلو جان جوه التراب..وصگر حبي الوحيد وابوي واكولهه للأبد..

تعبت صحيح..بس لكلشي اكو نهاية ولكل قصيدة اكو نقطة تنتهي عدهه.. وهاي نهايتي وي الحب وأهله ..

...........تــــــــــــمــــــــــــت...........

ماحبيت اتأخر عليكم بالبارت..اليوم كله اكتب بي لحدما كملته ..

لهنا وتنتهي رواية اسألي عني الليالي ، عشنا وياهم فرح وحزن وضحك ومواقف ثانية ، حاولت اوضح كل التفاصيل ، كل كلمة وصلتني من البطلة كتبتها بلمستي الخاصة ،

صگر اسمه الحقيقي رائد .. ومتوفي من ٢٠١٤ ، سبب الوفاة مذكور ،

قبل فترة اني واكتب دخلتلي وحده بنية ع الخاص ، كالت انتِ دتكتبين رواية طويلة عريضة ، ماگلتي شنو الفائدة منها ، الصراحة صفنت بيني وبين نفسي ، وشفت بيها فوائد مو فائدة وحدة ، اولهن البنت بهلزمن لازم شخصيتها قوية وتدافع عن حقها سواء وكفت كدام رجل او امرأة مثلها ،

الاب ، دوره جدا مهم ببناء شخصية البنت ، وعرفتو محيي ابو دنوة شلون كان تعامله معاها وشنو تأثيره عليها ،

غسل العار وشنو تبعاته ، الجد الجبير كتل ام حامد (ابو رائد) السبب الخلّه كره بين الأخوان على ذنب ارتكبه الاباء ،

السحر وشلون البنت لازم تنتبه لملابسها والشعر اليوكع بالحمام اثناء الغسل ضروري يندفن او يتم رميه بمكان بعيد عن أعين الناس ضعيفة الأنفس ،

والشي الأهم .. كلشي يتعثر بالبداية يخرب بعدين ، لأن هاي اشارة من رب العالمين إن هلشي مو بصالحك ، لكن انت مع ذلك تستمر بي الى ان تحصله ، واكثر مثال زواجة دنوة ورائد شلون تعثرت وحتى من تزوجو ضلو متعثرين الى ان انقتل ..

بما ان هذه اول رواية الي ، والحمدلله حققت نجاح ، فاريد ابدي معاكم بمصداقية وشفافية تامة ،

لذلك .. القصة استلمت احداثها ب٢٠١٦ عن طريقتي بيبيتي ام والدي ، وكان ذلك عن طريق الصدفة ، ام رائد تصير صديقة بيبيتي من زمان ، ومتلاگين صدفة عند دكتور هنا يمنا ببغداد ، فاجت تكلمت عنها وعن عائلتها بس بشكل هامشي وماموضح ،

من اجتني فكرة كتابة قصة فكلت ابدي بهاي القصة بما إنها واقعية ، البارتات الاولانية كانت تفتقر للتفاصيل ، بسبب عدم معرفتي التامة بحياة الابطال ،

بعد ما وصلت البارت ٢٥ كنت ماشية مسافة طويلة تعرفت ع البطلة عن طريق بيبيتي وانطتني كل التفاصيل ، من قبل لا تلتقي برائد ولحد وفاته ،

كتابة القصة ثقوا بالله صعبة وتحتاج تركيز ، لذلك تشوفون التفاصيل كثرت من بعد البارت ٢٥ ،

البارتات الاولانية حيتم التعديل عليهن ، تعديل تام استنادًا على احداث القصة الحقيقية لأن اني تلاعبت بالبداية لأن كنت ناسية او مامستلمة الاحداث بشكل صحيح ،

واساسا ماكان ببالي اوصل لهذا النجاح ولهذا العدد من البنوتات الحبابات اليتابعوني وينتظروني انزللهم ،

حبيت انبهكم حتى يكون عدكم علم ونكون شفافين مادام بعدنا بالبداية ،

وبالاخير احب اشكر كل انسانة طيبة وخلوقة وكفت ويايه وراعت ظروفي ، اني على مدى ٥٠ بارت او ٥٤ انزل بشكل منتظم بين يوم ويوم او كل يومين ، هذني اخر بارتات صارت بيهن خربطة ومالاقيت تقدير بالمستوى الببالي ،

عموما ، القصص الجاية تنزيل منتظم واحداث جديدة واماكن جديدة وعالم جديد ،

شُكري وامتناني الى صديقتي ومحبوبتي ، دانية ، صديقة بمثابة الأخت ، هي شجعتني على كل كلمة كتبتها .. كل الحب💙

التقيكم بقصة جديدة في أمان الله ..؛
رُقية جاسم