رواية اسألي عني الليالي الفصل التاسع 9 - بقلم رقية جاسم

قناة التليگرام

حساب الانستگرام

الــبــارت الــثــامــن................

وراها نزلت للواجب وبدت الاشتباكات تتصاعد وبالمقابل القتلى يتصاعدون.. بهالشكل.. بين ما خلص دوامي ورجعت.. اجت سارة حضنتني وتبچي بشكل هستيري..
حامد : يمعودة.. سارة شبيج..
ماكو متحچي.. خفت بيها شي لو مريضة.. محمد واخلاص نايمين گعدوا على صوتي ورائد بالدوام..
رفعت راسها وحچت بشهگة : شفته بعيوني..

حامد : منوه شبيج عيني..
بهاللحظات فات رائد من بره.. سلم عليه وحچه..
رائد : عرفت شصاير..
حامد : لا والله.. شكو شبيكم..
رائد : ابن ابو انمار الچبير عدموه هنا بالفلكة.. جايين ع البيوت گايلين للنسوان طلعوا شوفوا إعدامه.. لأن افرار..
حامد : يالله دخيلك.. الله يرحمه..بمكان ميستشهد راح هيج..
رائد : اي خطية.. لعبت روحي من العيشة هاي.. لانحچي لانكول شنو السالفة..حتلو مساجين مچان صار بينا هيج..
حامد : اكعد يابة لتحجي.. خليك بنفسك والله كريم لابد تفرج.. فوت ارتاح تعبان من الدوام..
رائد : هو هم عليها..
راح فات جوه.. رفعت راسها بستها ومسحت دموعها.. : بعد لتطلعين اذا اندگت الباب..
هديتها بإسلوبي حسيتها ارتاحت شوية..

ضلينا هيج سمعت بمحيي تزوج وجايته بنية.. بس مارحت لا بالعرس ولا لبنته.. البيناتنا انتهى صار سنين متحيي مواقف بسيطة مثل هاي.. مع ذلك دزيت سلامي بيد سناء.. هي سناء همات تزوجت بس رحت بعرسها.. بين ما اجت الزفة ورجعت بعد مابقيت يمهم.. ابوية منتمي للحزب وماشين عدل..

وره فترة كاعد بالبيت الظهرية واجه رائد دفر الباب وفات بالعجل.. كمت من مكاني مرعوب..
حامد : تعال وين رايح.. اكو واحد صاحي يدفر الباب هيج..
رائد : يابة شنو صاحي شنو بطيخ..
اجه كعد يمي ويحچي بصعوبة انفاسه سريعة..
رائد : هذوله بيت ابو انمار مو انعدم ابنهم.. اني وانمار بس چم سنة بيناتنا فدائما وياه وصديقي يعني اكثر من هيج قابل.. كايم يمسلت ويهذري بسوالفه يحچي ع الحزب ويطلع أخوه مظلوم.. هسه قبل شوية طلعت اجيب شغلات من الدكان وواحد رجال حچه ويايه.. يكلي اذا تضل ويا انمار يشيلوك .. كتله ماعندي شي وياه واني حتى مبتعد عنه صار فترة من وره الدراسة.. كال لعد حيجيك شخص يريد منك معلومات عن انمار وكلشي يخصه.. لحدما تكوم تتخشخش بيناتهم وتجيبله تسجيلات رسمية لمن يحچي ع الحزب.. علمود يصير اعدامه رسمي وبدليل.. شسوي يابة اني شعليه منين جتني هالمصيبة..

باوعتله وصفنت.. خفت اي خفت علي مو عليه.. : بابا ابقى بالبيت لتطلع.. اني اتصرف.. بس حضر هدومك..
رائد : ليش وين حروح..
حامد : هسه اشوف شسوي..
كمت بدلت وطلعت بالعجل.. اكدر اماطل بالموضوع بس مامستعد اضحي بحياة ابني.. محد اجه ببالي بس ابوية.. هو يكدر يساعدني.. من زمان واصل وعنده معارف بكل مكان.. عاد لمن صار بالحزب شلوون..مريت لمحله لكيت بس العمال..
حامد : صاحب المحل وين..
- : هسه على جية..
ضليت كاعد وانتظره.. بحدود النص ساعة اجه.. اكلني بالسلام وقدملي شي اشربه..

شامخ : زارتني البركة.. شمالك وجهك مصوفر..
حامد : تدري بيه مااطلب مساعدة من أحد.. بس هسه محتاجك.. اذا ماچنت ابوية فتكون جد اولادي..
رفع حاجبه : شني.. شرايد يعني..
حامد : رائد اريد تخلي يمك وتفك سالفته.. سمعت بيك بالحزب وماكو غيرك أأمن على ابني يمه.. حچيتله السالفة وسبب اعدام اخو انمار وغيرها.. : هسه شلون..
شامخ : بس ترجع للبيت دزليا للمحل اخذنه يمي.. يمتى ما تنفض السالفة خليرجع.. البيت بيته بكل وكت..
حامد : وسالفة انمار شون.. الحچاية التطلع صحيحة وهواي سمعنا هيج مو اول واحد..
شامخ : خلها عدي انه اجيبلك الصافي..
حامد : يعني ماعلي شي اذا اجاك..
شامخ : ماينلمس بكد الشعراية.. وهو يطمنك بروحه..
حامد : نشوف.. المغرب يجيك..
شامخ : هلا بي عسى ما الفجر..

طلعت منه ورجعت للبيت.. هو ميخاف بس ميريد يظلم الولد ويدخل نفسه بشغلة مخبرين وتسجيلات صوتية.. انطيته خبر هو رأسا لم هدومه.. اخذت سارة على صفحة حاچيتها..
سارة : خاف يضلون يطاردون وراه..
حامد : لا لتخافين.. ابوية بالحزب هو يفكها.. وشيخ .. بعد اكثر من هيج..
سارة : خايفة على رائد.. شلون.. خلأروح وياه..
حامد : اني اخذج كل يومين تشوفي..بس خلتستقر السالفة ونشوف شيصير..

المغربية اخذته ورحنا للمحل.. هو شايف ابوية ويعرفه معرفة سطحية.. بس تفاجئ بي لمن شافه شاب وشواربه ولحيته..
شامخ : اصعد بالسيارة هسه دقايق واجيك..
راح وهو تقدم عليه .. : نسخة منك ومن اسلوبك.. كونه يطلع حنين على أبيه مو مثلك..
حامد : سبب واحد ميقبل غلط..وانت أعرف بي.. منريد نفتح دفاتر عتيگة.. ديربالك علي..
شامخ : بعيوني.. توكل لدارك وانه موجود بكل وكت تحب تجي تشوفه..
حامد : مشكور مع السلامة..
عفته ورجعت للبيت.. حسيته فارغ ويفتقر لهواي أمور.. هدوئه وضحكته.. بس ان شاء الله فترة وتعدي..

ضليت بين الواجب والبيت.. رائد اروحله كل يومين.. بيت أبوية ببغداد صار بسبب احداث البصرة الغالبية العظمى من السكان تهجروا لشمال العراق.. هو نجح من المرحلة الأولى وبعده ببيت جده.. بسنة الـ٨٨ هو مرحلة ثانية والأخيرة لأن كسب سنة فيعتبر ع المواليدهم تسعة وستين ..الى أن فديوم اني هستوني نازل ومسموط من الحر بس اريد افوت بماي بارد.. منا گلبي صاير نار على ابني.. خصوصا بيت ابو انمار شالوا ومحد يعرف وين راحوا.. خفت يچلبون برائد عبالهم يعرف شي..

طبيت بعدني يالله داابدل واندگت الباب.. سمعت صوته يضحك ويصيح لإخلاص يشيلها.. طلعت بالعجل حضنته وبست راسه..
حامد : ليش جاي بابا.. احنا نجيك..
رائد : لا يابة انفضت بعد..
حامد : شنو.. شلون ..
رائد : هسه يجي جدي يحچيلك هياته اجه ويايه..
فات وراه..ضيفته وگعدنا بالاستقبال.. انفتح الموضوع..
شامخ : هاي ابنك امانة عندي ورديتلكياها..
حامد : اشكرك ماقصرت.. بس شصار.. ابو انمار شال تره بليلة ظلمة مندري بي..
شامخ : اي ادري.. وصلتلهم خبر إن رائد ماله علاقة والبيناتهم مجرد جورة.. كالوا لا نريده لو يجيبلنا اخبارية لو يصير بالحزب.. شمدرينا ميصير من ضمن الأفرارية بعدين.. كتلهم الولد طالب معهد بعدله سنة ويخدم.. أبيه صارله من بداية الحرب هو جندي ومتصوب وعندي كل الاثباتات.. طلعتله الباج مالتي جر بوش.. كال ماچنا متأكدين منك بالحزب.. هاهيه متروك الولد.. عاد هم وراها بـ چم يوم عرفوا بيهم شايلين وضالين وراهم لحدما كامشين انمار هسه بالمحكمة اكيد ينعدم ماتقبل غلط..
تقرب عليه وحچه بنبرة صوت تنبيهية : ابو كريم مخبر ع المنطقة كلها.. ديربالك على رويحتك ووليداتك..
فكيت حلگي متفاجئ.. شبيها الناس باعت من وكت علمود الفلوس ..عجيبة.. : ان شاء الله ماعدنا شي احنا..
شامخ : اي خاف يصير مايصير..هو ساعدهم يوصلون لأنمار وانكمش بعد..

ضل كاعد يمي شوية وطلع.. رجع البيت لطبيعته.. رائد چنه يريد يركض بهاي السنة بس علمود يروح للخدمة..
حامد : يابة شعاجبك بالجيش انت..
رائد : اني لوما طلب أمي چان قدمت كلية عسكرية.. بس حرامات..
سكتت وأباوعله.. نيته بيها شي.. احنا ودنحچي فات محمد جاي من المدرسة يبچي.. اجه يركض لسارة واكفة بصفي..
سارة : ها شبيك ماما.. ليش تبچي..
محمد : اشو ماخلولي من هاي الإشارة.. الصف كله اخذ.. لا يعني بقوا ثنين تلاثة مااخذنا..
سارة : شنو هي هاي..
كعدت يوصف شكلها.. شارة الحزب ينطوها لأبناء الشهداء والمفقودين بالحرب.. ضربته على ايده بالخفيف وخزرته..

سارة : ها ولك اسم الله على بابا شنو هالكلام هذا..
محمد : اي ليش.. اريد منها..
سارة : ماما هاي اذا اخذتها يعني بابا صايرله شي اسم الله بعيد الشر.. فهمت..
ضل يعاند يريد منها.. طفل بعد شمفهمه..

محيي ......
البصرة بالخمسين والستين والسبعين من أفضل وأحلى المحافظات العراقية.. من ناحية البيئة والمستوى العلمي وغيرها من الأمور .. بس اجه اليوم الدمرها ودمر أهلها واحنا من ضمنهم .. حرب أيران.. سنة الثمانين ..

كاعدين بالبيت ملتمين ع الأكل وگرابة أبوي يمنا.. لحظات قليلة وسمعنا صوت قصف قوي.. كمت مخروع اريد اطلع..
ابوي صاح : وييين.. تعال فوت..
محيي : يابة خاف صار شي..
شامخ : اذا تطلع احش رجليك.. فوت..
طبيت وساكت.. عدنا مثل المخزن جوه الگع .. نزلنا بي كلنا لحد الآن محد طالع خايفين من القصف وصوت طلق ناري.. ماتحملت اضل كاعد.. ردت اطلع وأمي كمشت ايدي تترجاني مااروح.. بست راسها وطلعت.. ابوي متحضر ديطلع هو وعمامه.. اجيت وياه ضل يماطل مايقبل.. بعدين قنع .. بهاللحظات مستعدين دنطلع چان تندفر الباب علينا.. فاتوا جماعة الحزب.. حچوا بإسلوب محترم وي ابوي..
- : شيخ انتم قريبين على شط العرب والعمليات العسكرية كلها هنايه..
شامخ : يعني نطلع يا شني سيدي..
- : التشوفه شيخنا.. العوائل حتطلع من عدها بدون أوامر..

حچوا شوي وطلعوا.. قفلنا البيبان وطبينا ..بالليل هيج وكلنا كاعدين على صوت القصف والطلقات ماهدأت.. ابوي ندهنا كلنا واجيناله..
شامخ : لازم تتجندون الزامي.. انه مو بالحزب مااگدر اسويلكم شي.. وهاي شوفة عينكم الشط والگيعان ليجاي منه صارت قاعدة عسكرية..
الحجية غادة : حجي شون ولدي اخافن عليهم.. فدواتك سوي شي..
شامخ : لاتخافين.. بوية قاسم ولواء باچر من الصبح تطلعون للشقة مالكم تقدمون بشهايدكم ع المستشفى .. حتلو بالخفرات وهمَ يمتى ما ينقلوكم عود الله كريم..
قاسم : بس يابة شون.. مااعتقد يصير.. لازم من الأول نتعين هناك..
شامخ : سوي مثل مااگلك.. چبير الاطباء صويحب عمك ازهر هو يمشيلكمياها..محيي وفيصل ساقطة الخدمة عنهم..

ضل يحاچينا ويوجهنا.. ثاني يوم من الصبح طلع قاسم ولواء وعمي ازهر وياهم لبغداد.. ضلينا احنا بالبيت ماطلعنا.. بس ابوي راح يتفقد الناس لنهم بإعتبار كاعدين بدارنا الديرة ديرتنا .. عمام ابوي وولدهم كلهم لبسوا عسكرية وطلعوا .. المنطقة كلها صارت عبارة عن نسوان وجهال.. الزلم كلها راحت للحرب ومنهم الأفرار هذا مصيره مجهول..

انه ضليت اسبوع مارايح للكلية.. لحدما اجاني صاحبي كال لازم تجي..
ماجد : خويي اخذها مني.. بعدلك تلث سنين يله تتخرج.. انه بإتحاد الكلية.. صير وياي وإنسى الخدمة..
محيي : شون هاي..
ماجد : شمالك.. يصير عندك علاقة بالعمادة والأستاذة .. ترسب روحك مايكولون شي يعبروها.. عود ارسبلك بكل سنة مرتين بينما نشوف هاي المعضلة وين تاليتها..
محيي : ويصير هيج.. شني هاي..
ماجد : اي وداعتك يصير.. باچر تعال داوم بعد انطونا خبر نرجع وانضملها..
محيي : يله خوش چا.. اشوفك باچر..

راح وانه رجعت للبيت بس خايف على ابوي.. جيش الشعبي يروح اذا كمشوه.. كاظم لبس وراح بس بعد ماندري وين مكانه .. قاسم بهالسنة عنده ولد ثنين.. سالم وعصام.. لواء عنده ولد وبنية.. قصي و ورود.. كاظم همات جايته بنية غدير.. يعني عدهم عوائل والبيت كله بشر..

وراها بيوم داومت وانضميت للاتحاد.. ابوي اجند بالجيش الشعبي يكونون الاحتياطي.. يعني الخطر أقل وكاظم مكانه بالشمال..قاسم ولواء طلع تعيينهم وانقبلوا .. ع الأقل هنا ارتاحينا من ناحيتهم..

البصرة ادمرت دمار.. الناس العدها والماعدها طلعت لبغداد والديوانية وغيرها.. بس احنا باقين موبسهولة نطلع ومكانتنا وصيتنا وحده يرن بإذان كل واحد يعرفنا وحتى المايعرفنا.. فضلينا بس متوترين اكثر من الطلعوا .. مشت الأيام واجه اليوم الصدمنا بي ابوي..
شامخ : انه صرت بالحزب..
امي لطمت على خدها : لا دخيلك ابو كاظم صدك چذب.. ليش شبينا ماشايفين يا معتازين..
شامخ : لا بوية شني معتازين..الحمدلله العين شبعانة گبل الحشة (الأحشاء بمعنى البطن) .. بس البيت خالي ماله والي .. ادري محيي هنا..بس مو مثل أبو البيت.. كلچن نسوان والجهال هنايه شني تضلن وحيدچن.. انه تدريني امشي ع الدرب.. لا منا ولا منا.. بس الظرف يتطلب بوية..
سكتنا بعد هو چلمة ماتتثنى ولمن نجي ع الواقع احسن مما يضل أفرارية والحرب شكلها مطولة..

انه وبطريقي من الكلية مريت من بيت.. لكيت الأماية طالعة ونايمة ع التابوت ملفوف بالعلم.. النسوان يردن يگومنها وهي مچلبة بي.. آخر شي كامت تريد ترعط ثوبها وكمشنها بنات ماادري مننه.. جرت الشيلة وتصيح ابني حبيبي هو ياهو يستاهل ادافعله.. وفشرت ع الريس.. درت وجهي ورجعت للبيت.. منو يتجرأ يجيب اسمه.. بس هي من حرگة گلبها خطية.. بمرور شهر تقريبا سمعت ابنها اللاخ معدوم..

قاسم ولواء كل شهرين تلاثة ينزلون نوبة.. بس كاعدين بالشقة.. ابوي لمن شاف الوضع بالطالع مديتحسن راح لبغداد اشترى بيت وسجله بإسم امي.. خصوصا بعد ما شافنا البصرة دتفرغ يوم عن يوم.. وصدك اجه اليوم الانجمعنا بي..
شامخ : بوية .. باچر تحضرون رويحاتكم نروح لبغداد بعد..
ابتسام (مرة قاسم) : عمي شون اروح..
هي حامل وبطنها لخشمها..
شامخ : مااخليج ويانا يبوي.. يجي قاسم ياخذج انتي ووليداتكم شوفي شون ترتاحين بالدرب چي طويل..
محيي : شوكت نطلع..
شامخ : الفجر.. ماناخذ أثاث ونكعد ننقل مايصير.. أثثت واخذت بيت يكفينا والله كريم..نشوف وين تصفى..
حضرنا هدومنا متانين الفجر يطلع..
جريت السماعة خابرت قاسم.. كال هسه حطلع..

سديته واجيت كعدت يم أبوي..توني مخلص امتحانات الكورس الاول ومحضر روحي داارسب.. صارلي سنتين..
محيي : بوية الكلية شون.. خوما اروح وارجع.. چا ليش شلنا..
شامخ : لا چا شسوينا بهالحالة.. ماطولك خلصت امتحانات .. انت خلها علي.. انه انقلك للمستنصرية..
محيي : ماتفوتك الطايرة..
شامخ : شعبالك.. أبيك مايخطي..
بست راسه وتمددنا .. وجه الفجر اندگت الباب اجه قاسم.. اخذ ولده ومرته وطلعنا احنا..

حسيت قطعة من روحي بقت هناك.. صحيح اجي لبغداد هواي وعشت بيها بس مو مثل البصرة.. طبيت للمرة وهاي اول مرة افوتله.. مأثث اثاث كامل.. بالداوودي المنصور.. چبير وبي غرف على عددنا.. چان تغيير مطروء بشكل قسري علي انه خصوصا.. بس حاولت اتأقلم وانقلت للمستنصرية.. همات انضميت للاتحاد ومشيت على هالمنوال..

فيصل ماقبل يدخل الاتحاد..بس تخرج راح يخدم ست شهور .. لمن رجع من الخدمة گال اريد اتزوج.. كعدت وياه بالحديقة بالليل الكل نايم..
محيي : انت حتفتح حلك ابوي علي..
فيصل : ها ليش خوية..
محيي : هسه يكلي حتى اخوك الصغير حيتزوج وانت بعدك .. تعال برر وانطي اسباب..
فيصل : اي يابة شني طلابة.. عمرك ٣٦ ماادري شكثر.. شوف حياتك تره الدنيا ماواگفة على أحد.. مااريد افطنك بيها بس اريد افطنك بحياتك لاتضيع منك..
محيي : مدااشوف التعجبني..ماادري شبيهن البنيات مايعجبني..
فيصل : ها طلعت شايفهن كلهن.. فد واحد انت..
محيي : ههههههه.. لا لك ادبسز موهيج قصدي..

وراها بفترة گصيرة رحنا خطبناله وحدة هو شايفها ومنعجب بيها وصار يوم زواجته.. ابوي راد حامد يحضر بس ماقبل.. اجه ضايج ومقهور صاير هلگدوته من القهرة..
محيي : بوية حامد ماينسى.. هاهيه لاتجبره..
شامخ : لا مااجبرنه انه.. بس ردته يشوف خوانه ومايصير گطعي.. يحتاجكم وتحتاجونه..
محيي : ان شاء الله محد يحتاج لأحد.. بس ريح روحك باچر زواجة ابنك وتجي هيج..
سكت بس تنهد.. الظاهر حامد حاچي حچي يسم البدن.. تعودنا كلنا بس ابوي بعده يحاول وياه..

صارت الزواجة وانه زفيته.. خو انه زافوف زفيت الكل وبعدني .. مشت حياتنا بهالشكل.. اطلع من الكلية لاعندي دراسة ولا هم يحزنون..فأروح للشغل بمكان أبوي.. فيصل بس كمل خدمة قدم تعيين وطلع قبوله.. حاول بأكثر من مكان بس علمود مايروح للحرب..

انه واكف بالمحل دااصفط بالبضاعة وسمعت حس بت صغيرونة تندهني.. درت وجهي شفت وحدة اذا اگول هدى بشحمها ولحمها مااچذب.. تشبهها بشكل .. نفس الملامح والشعر بس هاي سمرة كلش..
- : عمو اريد من هاي وهاي.. وأشرتلي عليهن..
ضليت صافن وضيعت علومي.. مايتجاوز عمرها ١٣ سنة .. منو هاي..
شافتني صافن رجعت حچت : عمو شبيك..
محيي : اي هسه بوية صبري..
نزلتلها معجون من فوك وبازليا انطيتهيا.. انطتني فلوس وراحت .. ماگدرت امنع فضولي.. مشيت وراها چني مسودن مااهتميت منو هنا ومنو ديشوفني بس اريد اشوف هاي الداهية منين طلعت.. بقيت امشي هواي لحدما دخلت لحي الأمانة.. وبفرع من الفروع شفت مرة لابسة عباتها وواگفة بباب بيت.. راحت البت تركض للبيت وانطتها الغراض.. دارت وجهها تسولف وي النسوان جورتها.. تمشيت اكثر صرت مقابيل البيت .. واگفة وتغطي بحلگها لمن تضحك.. اويلي هجست گلبي صار جمر.. اشتعل شعل.. هدى اي وعلي هدى..

وتأكدت اكثر لمن طلعت أمها من جوه..
كلتلها : وينج دتسولفين.. ابنج بس يبچي تعاليله..
كالت : اي يمة جاية.. عن رخصتچن عيني.. افوت اني..
تانيت النسوان يروحن وطفرت يمها.. كمشتها من ايدها.. عاطت : منووو.. شون تمد ايدك عليه..
محيي : هدى..
عاينتلي مصدومة وجرت ايدها : نعم..منين تعرفني اعرفك..
محيي : انه محيي يبت الناس ماعرفتيني..
سكتت واخذتلها صفنة.. ادري تعرفني بس ماگالت .. حسبالها حسويلها شي.. نزلت راسها.. : العفو مابيناتنا شي بعد.. اني تزوجت وعايشة ببيت عيالي لتسويلي مشاكل ارجوك.. زوجي على جية..

محيي : اگلج حچاية واروحن.. لو رايدة ترحين برضاتج چا طلكتج ولا هاي الروحة والبهذلة.. اكلتي من چدي وسهر ليلي بعدين هيج.. مزوجة انتي وهذا الشفعلج بس..
درت وجهي ورجعت للمحل.. تمنيت اكسر واهطر كلشي يجي جدامي.. ماكلت لأحد بس كاتمها بگلبي.. مقهور قهرة عمري .. لو ادريها ميتة ولا هاي الصفعة القوية.. چذبت علي وهي بكد القندرة.. شينسيني اريد انسى جزعت..
طلعت وانطيت خبر للعامل يگول لابوي يتأخر يله يرجع.. ضليت افرفر بالشوارع واخوط بروحي بين الناس اريد ألتهيلي بسالفة .. رحت للكرادة.. يم ابو نؤاس.. نزلت جوه كلش گريب من النهر واكرف ماي بيدي واذبه.. كلشي صار بيناتنا تذكرته وچنه خنجر مسموم بات بصدري.. اويلي عليك يگلبي .. ضليت كاعد لحدما نعست وراسي كام يفتر من صوت الماي .. نفضت هدومي ورجعت للبيت ماحاچيت احد بس طبيت بالفراش اريد اغفى..

مشت الأيام وانه رافض أكون عائلة.. خايف.. اي ميت خوف .. مااريد ينعادلي الصار وي هدى.. صحيح البشر مايتشابهون بس مااكدر.. انچويت واخاف اتگرب من كل فحمة حتلو جانت باردة اهجسها جمرة مشتعلة..

الى أن انه وبالكلية هستوني طلعت واجوي علي ثنين زلم بالاربعينات يطلعون.. كمشني من زندي والثاني وراي..
- : اصعد بالسيارة..
محيي : تفضل منو.. ليش اصعد..
- : هسه تعرف ليش..
صعدت وياه شو هذا وداني للمركز.. ماقبلت افوت.. دفعته وطگيته دفره ببطنه.. اجوا جنود وعريف من المركز فاككونا واخذوني وحيدي جوه.. صرت عصبي وادفع بيهم اريد افتهم ليش اجت هنا.. طبيت وكعدت اتاني..
ماكو شواي واجه الضابط.. كعد جدامي وكمشني من ياخة قميصي : انت ليش تهذري وتحچي بشغلات احنا الضباط منحجي بيها..
محيي : عمي اعرفكم تعرفوني شمالك.. شمسوي وحگ ربك ماادري شكو..
- : انت تسقط بالنظام وتحچي ضده.. صار چم مرة اسمع بإسمك وهسه شفتك.. لا وفوكاها عندك سلاح مابي رخصة..
عاينتله مصدوم ومفور من حچيه : وشرف أمي لاحاچي ولا عندي سلاح.. اروح بطرك الملازم وارجع..
- : احچي هالحچي كدام القاضي..

عافني وطلع.. صحت وراه اريد افتهم.. اليحچي ويطلعله صيت گبل ينعدم.. لا يالله شمسوي بدنياي.. ماقبل يخليني اخابر على ابوي.. كلشي انسد بوجهي.. خايف ومتوتر شني هالمصيبة طاحت على راسي..

مرن يومين انه بالتوقيف..لحد اليوم الثالث گال عندك مقابلة .. اجه ابوي يحاچيني..
محيي : بوية ماادري شكو شحيصيرلي فهمني..
شامخ : اسمعني ولاتبري روحك.. اذا حاچي ومسوي شي انطيني خبر.. خاطر اعرف شتصرف..
محيي : ها يابة تشك بيه.. ليش ماتعرفني..
شامخ : اعرفنك.. بس هنايه مايفيد بس هيج.. لازم دليل..
محيي : زين شحتسوي.. والله خايف..
شامخ : لاتخاف.. بس ابقى على كلامك لاتغيره وتشهد ضدك.. بس اوصل للي رفع الدعوة عليك..
ضل يحاچيني ويهدي بيه بعدين راح.. بس افكر بالموضوع اهجس الهوى ينگطع عني.. شحال لو صارت صدك..

صعدت أوراقي للمحكمة وصارت اول جلسة.. ابوي خلالي محامي وديحاول شون ماچان تصير جلستين.. أيام مرت علي برعب ماله نظير.. بالليل ماانام خايف مصيري ماادري وين حينتهي.. بقالي بحدود الخمس أيام وتصير الجلسة الأخيرة .. وصارت.. لبست البدلة البرتقالية وطبيت كل جزء بيه يتصافگ ومنتظر نهايته المحسومة.. شفت ابوي واخوي كاظم.. وواحد رجال مااعرفه..

طول الجلسة انه ساكت..كلامهم اهجسه مجرد وشة ماكو كلمة دتوصلني بشكل واضح.. بالأخير كال : تم تبرئة المتهم..
ضليت فاك حلگي واحاول اقنع روحي مو حلم الديصير وانه طول الوكت اتفرج للحايط واتخيل المشنقة.. اجه الضابط فك إديه وطبطب على چتفي.. تمشيت لأبوي ومن كثر مافرحان عيوني دمعت وشبگته ..باسني من راسي..
محيي : بوية شصار دخيلك مدااصدك..
شامخ : فوت غير هدومك واحچيلك.. مدلي ايده بيها هدوم.. طبيت بدلت.. كملت وطلعنا..

شامخ : أمك تخربطت لمن درت بيك حتطلع براءة..
محيي : والله هو انه ردت اتخربط عاد امي.. بس شون يعني مدااستوعب..
شامخ : افااا.. يعني انه الشيخ شكبري شگدي اخلي وليدي يروح اعدام هدر.. لا حريمة والله.. دزيت جماعة من طرفي للكلية مالتك.. لاگين الخبر طاش بيناتهم والكل داري محيي حينعدم.. ضلوا يتخشخشون بيناتهم الى أن سامعين واحد يكول اي حيل يستاهل.. واحد من الولد الدزيتهم صار صويحبه علمود يجر لسانه.. طلع عم الولد صحفي وهو مخبر عليك ورافع الدعوة بإسمه بس چي صحفي وإله مكانته الضابط ماقبل ينطيني اسمه الصريح.. ملفق چم تهمة براسك انت هم فد واحد أغم.. حاط المسدس بالملازم مالك لمن جايين يفتشون ماخذي وراجعين لصاحبه مالاگيله صاحب.. يعني إنسب الك وبلاية رخصة..
محيي : وليش هيج يسوي.. لا اعرفه ولا يعرفني..
شامخ : شغلة عداوات مو اكثر.. انه شفته للولد وعرفته.. أبوه طردته من الديرة.. كامش وحدة بت بيت يريد يعتدي عليها.. كمت شمرته بره وكسفت احواله.. عودك جاي ينتقم لأبيه بأبني .. شبيها الوادم تسودنت ماادري..هو اليسوي زين مكروه وماينراد..
محيي : اي لاعاب حلگك..

تگربت بست راسه واتشكر منه مامصدك.. بوية والله ماچذبت لمن كلت العنده حگ يمي اطلعه من حلك السبع.. بيني وبين المشنقة ساعتين .. الحمدلله طلعت منها وارتاحيت.. رجعت للدوام والتسخيت.. واحد من الأساتذة يكلي دروح صارلك چم سنة هنا ماضجت.. عمي اضوج شني.. چا مااضوج لمن اصير بالگبور..

بهالسنة اجه خطابة لسناء وابوي انطاها.. خوش ولد ضابط ملازم.. ابوي صارت دمعته بعينه لمن اجه ياخذها من البيت ويوصي بي عليها.. انه واكف بسده واتخيل فديوم يصير عندي بنية وهمات هيج استعز عليها الروحة.. من بعد زواجة سناء والموقف الصار قررت أشوف حياتي.. مااريد اضل على هدى راحت وطلعت متزوجة اصلا.. انه طلگتها الشاهد الله ومتبري منها ومن كلشي يخصها.. مايخصني شي.. بس تبقى اول حب حبيته ودگله گلبي.. احاول انساها عسى ولعل أفلح..

مرت فترة طويلة اكثر فترة صار عندي فتور بيها تجاه كلشي بهالحياة.. تمنيت رشفة من هوى الحب يحييني.. شعور يوقظ كل اعضاي مو بس گلبي.. واجه هاليوم.. طلعت من الكلية من وكت ماعندي شي.. اكو محل يبيع كاسيتات اغاني لياس خضر وطالب القره غولي.. دااعبر السريع وسمعت حس وحدة تحچي بنعومة ومتوترة..
- : عمو.. اصبر خليني اعبر وياك..
انداريتلها عبالي صغيرونة.. شفتها عشرينية وسمرة.. بشرتها تبرج هلكد ما صافية.. وكفت بسدها اتاني السيارات تروح.. عبرت وهي همات وياي.. عاينتلها وابتسمت : تره انه مو چبير .. عمو شني..
هي استحت غدت طماطاية : تعذرني بس معرفت شگلك..
محيي : يله ماصار شي..
- : حتفوت لمحل الكاسيتات ..
محيي : اي ليش..
- : اني همين اريد.. سمعت اغنية ياس بالراديو وعجبتني..
محيي : يله تفضلي چا..
رفعتلي حاجبها ومبتسمة بطرف شفافها : چا..
محيي : اي بوية مو بغدادي انه.. لاتتبغددين علي..
فاتت جدامي.. تانيتها تطلع وطبيت..

يابوية.. شون عجبتني هالبنية.. هيج رزنة حتى بنظراتها.. ضليت كل فترة يومين تلاثة اشوفها يم محل الكاسيتات.. بيتها گريب ع الكلية.. هي نفس جامعتي بس غير كلية فماشايفها او مامنتبه عليها.. نوبة مطر زخ.. انه مالابس هيج حي الله مامحسب حساب للمطر.. ضليت واكف جوه الشجرة اتاني يوگف وعيوني ع المحل.. وهيج بيني وبين روحي كلت هسه وين اشوفها بهالمطر.. فززني صوتها واكفة يمي..
- : شو ترجف..
محيي : هاي شجابج..
- : داانتظر ابوية يجي ياخذني..
سكتت واعاينلها.. عيونها مجرورة وچبيرة.. كلها على بعضها حلوة ومرتبة.. رادت تروح وندهتها : شسمج انتي..
- : شهلاء .. وانت..
محيي ..

ابتسمت لمن سمعت اسمي.. وراها راحت اجاها ابوها.. انه ضليت معلك غير يوگف المطر.. سطرني.. وچن ربي سمعني .. دقايق ووگف.. شحظك حلو اليوم يامحيي يبن غادة.. تمشيت للمحل اكلت شي والعصر رجعت للبيت..

مرت الأيام بهالشكل.. حسيت روحي بديت اتعود عليها.. هي حبابة واسلوبها احلى شي بيها.. شخصيتها قوية من النوع اليعجبني.. جذبتني ..ماردت العب واطولها.. فاتحتها بالموضوع وهي سنة اخيرة بالكلية يمكن مااكدر اشوفها بعد .. اجيت للكلية مالتها لمن شافتني عافت صاحباتها واجت يمي سلمت علي..
شهلاء : فاجئتني بجيتك..
محيي : اي والله.. واريد احاچيج بسالفة..
شهلاء : اي تفضل محد اكو..
محيي : لا مو هنا.. بره يكون افضل..
حركت راسها بالموافقة.. اخذتها وتمشينا يم المكان النمشي بي كل يوم.. سألتها عن اهلها وخوانها وهالأمور.. بعدين حچيت..
محيي : والله يبت الحلال انه اريد اخطبج.. ارتاحيتلج وراغبج بس أبيج ماادري ينطيج لا..
شهلاء : الصراحة ابوية مثل ما گتلك معتز بينا اني واختي.. اختي اجاها خطابة هواي يله انطاها.. بس انت كتلي والدك شيخ فأكيد حيقبل..
محيي : كلام اكيد لو اشوف غيره..
شهلاء : اكيد..
محيي : بس تخلصين امتحانات انه جايج..
شهلاء : اهلا بيك..

شفت ردة فعلها مال شخص رايدني مو بس انه.. نظراتها وطريقة كلامها وياي سلسة ماتحچي بنتر و حدية مثل باقي الولد.. تانيتها تكمل امتحانات وحاچيت ابوي..
شامخ : چا غير يوم السعد هذا.. طبعا اروحن اخطبلكياها واجيبها عسى ما چانت بالگمر..
محيي : ههههههه.. الله يسلمك ويحفظك..
مرن يومين بين ما اجوا عمام ابوي وخواني وراها رحنالهم.. لمن طبگت السيارات النسوان طلعن من بيوتهن متفاجئات.. عبالهم ناس من الحزب لو شي بالدولة.. ابوها لمن شافنا احنا وسياراتنا وابوي وعگاله صك بمكانه.. استقبلنا وطبينا..

بعد سلام وكلام طلبت ايدها.. بس صدمني بجوابه ..
- : عگلكم وانتو كلكم على راسي.. بس بنتي ماانطيها بهالعمر..
شامخ : البت عمرها ٢١ خوية ابو عمار بعد اكثر من هيج..
- : مو بالعمر هي.. بس بناتي مدللات ممتعلمات على عيشة الشيوخ والكعدات والطبخ..
ابوي كام من مكانه وعدل غترته : جايين نخطب ماجايين ناخذ خدامة خاطر هشكل تحاچينا.. طالعين ومانريد بت منكم..
طلع وانسحبنا وراه.. انه فشلان من ابوي.. كتله لا اكيد ينطيها وحچي زلم..

سكت هو ماعاتبني.. رجعنا للبيت واسحن بروحي سحن.. شون هيج تفشلنا احنا واهلنا جايين وهيج.. صارت مثل العناد براسي.. اخذها يعني اخذها.. لو اعرف اخطب الف مرة .. ردت اكسر چلمة ابوها مو اكثر..

وفعلا.. وره فترة رجعت خطبتها وحاولت اكثر من مرة يله قبل ينطيها.. ابوي يجي علمودي لو تبقى علي مايتحرك خطوة وحدة.. صارت الخطوبة نيشنتها احسن نيشان.. ماخليت شي بنفسها.. هي مو طماعة بالعكس متواضعة.. بس ردت احس روحي حاخذ مرة كاملة وابوها ينطينياها مو مثل هدى.. اريد احسس گلبي بالأختلاف وإن هدى جانت شخص عابر وشهلاء هي الحبني حياتي وياها وعلى اساسها.. عقدت عليها عقد سيد اول بعدين وراها بأسبوع رحنا للمحكمة .. هي فرحانة اكثر مني وتحبني.. اي تحبني بگلبها وعقلها وكل جوارحها.. صارت الزفة هلمرة ابوي زفني همزين مو انه زفيت روحي.. اخذتها للبيت بعد مافرغولنيا.. خافت وبچت.. اجيت يمها شبگتها وهديتها..
محيي : انه وياج ومااعوفنج.. بس مااريدج تطعنين بيه بأي شكل من الأشكال..
شهلاء : لااا مستحيل اسوي هيج.. اني احبك محيي..
تگربت بستها وشمرت المشمر من على چتفها.. : انه همات..
اخذتها وصارت مرتي..

علاقتي وياها بيها تفاوت.. اجي للبيت تجي تتلگاني وتاخذ الغراض من ايدي.. مدللتني وماانكر هالشي.. رجعت من الشغل بالليل كلش.. بثنعش هيج.. اول ماطبيت اجت شبگتني وبچت.. بعدتها ومسحت دموعها..
محيي : ليش البچي بهالليل..
شهلاء : خفت عليك.. ليش تأخرت..
محيي : لا لاتخافين وين اروح..
بستها من راسها وصعدنا فوك.. علاقتها زينة بالكل ويحبوها .. شون مدااشوفها دااشوف هدى.. ظلمتها وتندمت لمن خطيت هيج خطوة بحگها وبحگ نفسي..

تحاول بكل الطرق تجذبني الها.. حبيبي بس گول شتحب اسويلك.. شتريد حاضر..اگللها اي واسكت..

بيوم طلعت من الكلية ماردت ارجع للبيت.. محتصرة روحي اريد اهج بمكان عام.. رحت للحدايق هيج اتمشى واشوف المخطوبين طالعين لو المتزوجين هستوهم.. هذا حظي شبي معثر وأغبر..

ضليت من مكان لمكان لحدما بالليل رحت لواحد صاحبي يشرب هو.. كعدت يمه ومديت ايدي ع الگلاص وافكر اشربه لو لا..
- : خوية اذا مجبور لاتقربه منك.. خيولي..
محيي : لا اريد مامجبور..
اخذته وشربته.. دخت وراسي اهجسه راد يطك.. مااعرف لشوكت استمريت وهذا المسجل يشتغل على أغنية حاسبينك .. ضلت تعيد بروحها ماادري شكثر.. وعيت على روحي انه بباب البيت.. دگيتها وبالگوة شايل ايدي.. طلع ابوي شافني هيج .. صحاني من كلشي ولو انه چبير عمري حيطخ الاربعين موصغيرون.. طگني راشدي رأسا طحت بالگع.. اعصابي راخية بس يجوسني شي اطيح.. نزل يمي شالني بقرف من قميصي دخلني للحمام وفتح الماي البارد علي.. عصر فچي بقوة ودارني علي..
شامخ : اتركك هنا ولمن تخلص اطلع..
عافني وراح.. سبحت شون ماچان واجت شهلاء تبچي انطتني هدوم وراحت..بس كملت صعدت فوك شمرت روحي شمر ع الفراش..

كعدت الصبح اتلفت بالغرفة.. دقايق وفاتت شهلاء.. عاينتلي ودارت وجهها..
شهلاء : عمي طالبك..
محيي : شصار شهلاء.. ماچنت واعي..
شهلاء : ماادري..
راحت ع الهدوم تصفطهن..

ذبيت الغطى ونزلتله.. بقينا انه وياه والباقين طلعوا.. صفك بإيده باستهزاء..
شامخ : عفية.. هي هاي التربية ماگصرت بوية..
محيي : يابة انه تعبان لاتجي تحاچيني هيج..
شامخ : تعبان.. چا اليتعب هيج يعالج تعبه.. شمالك شو تهذري هواي..
محيي : والله تعبان.. ومتندم كلش متندم..
كعدت يمه حاچيته على شهلاء.. : اهجس روحي ظلمتها.. شسوي مااريدنها..
شامخ : انت صغيرون لو شني..هذا بس المراهق مايدري بروحه شديفكر..
محيي : ياريتني مراهق.. ع الأقل ماوراي سين وجيم..

شامخ : بابا البت رايدتك وتحبك.. شوفها شون كلساع جايتني تگلي عمي لاتسويله شي وانت هيج تفرط بيها هي والجاهل ببطنها..
فكيت عيني بصدمة : شني.. شدتحچي..
شامخ : مريتك حامل.. شني غريبة يعني.. لخاطر هالطفل راجع روحك.. شوفها شتحتاج وابتعد عن الشرب.. هلمرة شربت مرة اللخ يصير غير حچي.. وتعرفني لمن اكولن هيج يعني اقصدها بالحرف..
سكتت وطلعت منه.. صعدتلها فوك ندهتها وكفت جدامي وانه كاعد ع القريولة..

محيي : حامل.. ليش ماگتيلي..
شهلاء : صارلك فترة مو على بعضك فماردت احچيلك..
محيي : لا احچي خاطر اعرف شتصرف..
عاينت بعيوني وكمشت ايدي : محيي.. تريدني ..احسك ضحكت عليه وعلى گلبي.. ليش هيج سويت مادام بعدك تحبها وماناسيها.. بس لتنسى هي تركتك وماحبتك.. اني احبك وماشفت منك تقدير لحبي..
كمت من مكاني شمرتها ع الچرباية وشديت شعرها بيدي .. : اذا شفتج جايبة سيرتها اگص لسانج..
شهلاء : ليش.. لأن دااحچي الصدك.. اذا متريدني رجعني لبيت اهلي ممجبور تتحملني..
محيي : جيبي الطفل وولي عود..
خزرتني ودارت وجهها : شكد حقير..
هي كالت هيج وانه تسودنت.. طگيتها راشدي فريت راسها.. اخذتها بالغصب وعفتها..

مرت خمس ايام هيج زعلانة حتى ماتعاين بوجهي.. ماانكر ضجت واحس بنقص.. ماادري شسوي موذنبي الصوچ موبيه .. انه ردت اخذها خاطر ماتكول يلعب ع النسوان هذا .. ردت انسى هدى ومداانسى.. الشرب تركته ماشربت بعد هي مرة وحدة ..

رجعت للبيت بالليل هلكان من التعب.. صعدت فوك لكيتها متمددة والهوى يطير ثوبها.. تگربت منها واصابعي تمشي على شعرها.. جريتها لحضني فتحت عيونها مانايمة..
شهلاء : عبالي محتجي..
محيي : لا اجي.. رفعت راسها واعاين بعيونها.. ماادري اعتذر لو شسوي.. اخاف انطيها وعد وأخلف بي..
شبگتها وأشم بريحتها.. : انطيني مجال.. صعبة علي مدااكدر انسى.. ساعديني لاتصيرين ضدي..
سكتت بس بادلتني واحتوتني عدها..

بقينا هيج.. علاقتنا مفككة ..ارجع بالليل متأخر الكاها نايمة .. تحبني بس جرحتها هواي وادري بيها نسرة ماطيح بالصيدة.. صارت تعاملني بجفاف مثلي .. تحط الأكل جدامي وتغسل هدومي.. بس ماتحاچيني ..اغلب اليوم ببيت اهلها..

بمرة ضليت واكف بالشغل فوك التلث ساعات والعرگ يصب مني.. الشمس قوية بحيث دخت.. بين ما عزلنا بالليل ورجعت شمرت روحي جنازة مابيه حيل.. جسمي صار نار وارجف.. مع العلم صيف.. كعدت الفجر لكيت شهلاء يمي تسويلي كمادات وخاولي بارد محطوط على ايدي.. بطنها كبرانة بالگوة كاعدة.. رفعت راسي عاينتلها دموعها بعيونها..
رفعت حاجبي بتساؤل.. طگت بچي وتشهك چنها مدتنفس .. خفت لاتطرح.. عدلت كعدتي ومسحت دموعها..
محيي : شجاريلج.. ليش البچي..
شهلاء : ولادتي قربت.. بس أولد مايصير بيناتنا شي بعد.. طلگني لو اهجرني ميهمني..
محيي : شني هالحچي مو وكته هسه..
شهلاء : لا وكته.. لمن اسمعك تصيح بإسم هدى وتبچي عليها حتى وانت مريض شوكت لعد يصير وكته..
صفنت عليها.. : شهلاء تره مااتذكر هيج حاچي.. مريض والمريض كلشي يهذري..

سكتت واخذت الطاسة..راحت تنزل .. ثواني وسمعت عيطتها والطاسة تكسرت گزاز.. طفرت من مكاني لكيتها طايحة ع الدرجة وكامشة المحجر بس تهده تنگلب.. اجيت يمها گومتها صاحت عندي ألم.. نزلتها وصعدت جبت السويچ وامي اجت وياي اخذتها للمستشفى.. الدكتورة كالت ولادة عدها.. دخلت للصالة وانه ضال بره اتاني.. اجه ابوي وقاسم شايل سرور بنته الصغيرة.. اجت وره الولد.. بينما طلعت الدكتورة رحت حاچيتها..
محيي : شونها هسه دكتورة..
- : الحمدلله بصحة جيدة هي والطفلة.. بنت اجتك..
محيي : يصير اشوفها..
- : هسه دقايق..
: ماشي ..

فاتتلها أمي وراها بنص ساعة طبيت شفتها.. بست راسها وشلت البت.. كبرت بإذنها واعاينلها.. بعدها موحيل مبينة بس سمرة..
الحجية غادة : شحتسميها يمة..
محيي : ماادري والله.. شتگولين شهلاء..
حچت بتعب : اليعجبك..
خليتها بحضنها وطلعت.. سرور هستوها دتحچي.. فانه دااحچي وي قاسم على اسم لبنتي..
كال : دنيا حلو سميها..
سرور لمن سمعت الأسم عود دتردد وراه كالت دنوة.. خش بعقلي وسميتها دنوة.. مصغر دنيا عسى تكون بداية للإستقرار الداخلي المفتقدة بحياتي.. وره ما كملت الاجراءات اخذتهن ثنينهن ورجعت للبيت..أم شهلاء اجت وياها ومشت الأيام .. اهتميتلهن هواي هيج اخلص الشغل شون ماجان بس اريد ارجع اشوف بنتي..انتقالة چبيرة بحياتي..

هي شوي شوي بلشت تكبر وملامحها بينت.. ياهو اليشوفها يكول محيي الصغير بس بت..شهلاء مقهورة ادري بيها بس لمن تشوفني هيج أحبها لدنوة ومهتملها تطمن..

بيوم انه وبالكلية هيج صافن واشوف روحي بعد مامستقر.. عمري ٣٧ وبنتي هستوها عمرها أشهر.. حياتي ادمرت من يوم دخلتها هدى.. السالفة موبيدي مااكدر اتحكم.. ماچنت متخيل الحب هيج يسوي.. من بين هالحچي لفتني صوت شاب وبت ديحچون وراي.. بس چي شجرة يمكن مامنتبهين علي..
گلتله : شتريد مني انت دمرت حياتي.. هاهيه موزين تركتلك كلشي بهدوء وانسحبت..
گال : لا اني اريدج بحياتي والله متندم وگلبي منجذبلج.. راحت هي بعد انتي الاساس..
- : حچيك كل مرة ينعاد نفسه.. واني خوما اغلط مرتين..

ضل يحاچيها ويقنعها.. من كلامه مبين چان يحب وحدة.. تفطنت شهلاء.. هي صابرة علي هلمرة وبعد چم مرة بس مايعني حتصبرلي دائما..خصوص انه عصبي نار واضرب .. هسه تطفر روحها وتروح..

كمت ورجعت للبيت.. تغديت وصعدت فوك لكيتها متمددة ومخلية دنوة بحضنها تلاعبها.. كعدت يمها..
شهلاء : شوفها صارت تجنن.. تشبهك كلش..
محيي : اي صحيح..
اندارتلي وخلتها بسدها : اريد تصير نهاية لعلاقتنا.. ابوية ماراضي ع الديصير بيه.. اني خلفت وتعبت على أمل يتصلح البيناتنا مو يبقى متهدم..
محيي : ابوج شكو.. شو ماتعرفين تتصرفين..
شهلاء : لعد اضل تحت رحمتك..
محيي : اكول لاتضلين تلغين براسي.. فلوس واكل وكلشي يجي يم رجليج.. اذا تجيني من هالناحية ماعندج كمشة علي مامقصر..
شهلاء : لا مو هيج.. بس احتاجك احتاج قربك واحسك زوجي من صدك.. شوف قاسم وابتسام شكد علاقتهم حلوة كله يگللها عيوني وأغاتي وباباتي.. ليش احنا هيج محيي..
محيي : ادري.. انه جايچ اريد نملي هالفجوة بيناتنا..

ضليت احاچيها لحدما مليت.. هي عنودية وانه عصبي.. اتسودن من العناد.. من ودي اكسرها بس كاعد على اعصابي .. بقينا هيج ماكو شي تغير.. الى أن بيوم كاعد بالغرفة داابدل حطلع للشغل فاتت هي شمرت الهدوم بوجهي وتعاينلي بنظرة تحدي.. راحت تطلع وعطت بيها عيطة كمزت من مكانها..
محي : تعاي جاي.. وين رايدة.. انعل ابوج لابو حتى الجابج علي ياقندرة..
شهلاء : ليش تغلط على ابوية.. مو ردت هدوم.. هاك هاي..
كمت كمشتها من شعرها سحلتها شبعتها كتل.. شمرتها ع الچرباية ورحت يم الباب..
محيي : مرة اللخ لسانج هذا اگصه گص..
عفتها ورحت للشغل..

بمرور فترة گصيرة ردت استقل وحدي وهيج أفضل.. دخلت شراكة وي صاحبي عنده محل حلويات وبقلاوة بالمنصور .. انه مااعرف لهالصنعة بس لنه صويحبني ومحتاج أكون نفسي هالفترة فصارت..

رجعت للبيت وانصدمت برائد بالبيت يمنا.. ماسلمت علي رحت لأبوي وفهمني السالفة.. شماارتاحله هالبشر چنه أبوه.. ضليت كاعد شواي وطلعت شفت دنوة تمشيله هو رجال كامل مايعيبه شي وهاي بتي ثولة ولو صغيرة سنتين عمرها.. ماادري أشك بي كارهه من السما للگع.. اجيت شلتها بچت..
رائد : ليش اخذتها..
محيي : وانت شكو.. ابوها عمها..
رائد : تفكيرك ماادري شلونه..هي صغيرة شريد اسويلها..
محيي : احچي عدل وي عمك.. اكبر من أبوك انه احترم..
رائد : الله يسلمك شعليه على عيني وراسي.. اني ضيف هنا مااريد تصير مشاكل..

عفته وصعدت فوك وهاي بس تعوي.. شهلاء ببيت اهلها.. شون اكره المزعطة.. شمعرفج بي.. خليتها ع الچرباية وخزرتها : اذا ترحين يم هذا الرجال جوه اطيح حظج..
سكتت بعد خافت مني.. للعصر رحت جبت شهلاء واجيت .. طلعت للشغل ورجعت بالليل كلش.. لگيته كاعد ع الكرويتة يدخن والضوه مشتغل ديدرس.. درت وجهي دنوة واكفة يم باب المطبخ وتعاينله .. الضوه صاير على شعرها اشگر وعكش مثل مالتي وهي سمرة تشكيلة منا ومنا.. رحت شلتها وانطيتها قطعة من الحلاوة صعدنا فوك..

مرت الأيام بهالشكل .. انه وشهلاء عركات ومشاكل للصبح.. تنگر براسي وتتنگنگ على أتفه الاشياء.. اتسودن من هيج مرة قنقينة.. ضربتها .. رزلتها .. مايفيدها شي.. عينها گوية.. ادور كامت تمقت دنوة.. اجي للبيت الگاها تاركتها تبچي ولا يمها.. ابتسام تشيلها تبدللها وتاكل وي بناتها..

انه وبالشغل اجه طفل صغير علي..
جرني من ايدي : عمو بسرعة تعال للبيت الشيخ يگول..
محيي : شكو عمو شصاير..
- : بنتك ماادري شبيها.. الشيخ گلي لتگول بس خليجي ابو دنوة..
هديت ايده واخذت السيارة رحت للبيت.. من باب الحوش اسمع صوت دنوة تصيح وتبچي بشكل هستيري موطبيعية.. ركضت جوه شلتها رأسا عاطت..
محيي : شبيكم يمعودين.. شبيها البت.. ليش تبچي..
شامخ : اخذها لطبيب جلدية.. فخذها مچوي.. ماتقبل نجوسها تهسترت..چا اخذتها انه..
رفعت الغطى عنها شفت الچوية.. مال خاشوگة لو سچينة.. اخذتها وبوجهي رحت لطبيب.. فحصها وشاف الحرگ.. ضل يستغفر ويسأل شنو السبب..هو انه نفسي ماادري بس اريدها تبطل بچي وجهها صار جمر..كتبلها مراهم وچم شغلة اشتريتهن بعدين رجعت..

صحت شهلاء مااجت.. اجه ابوي وكاظم..
شامخ : ماموجودة..
محيي : وينها بت الكلب..
شامخ : هسه على جية..
ضليت اتانيها لحدما اجت.. دنوة اول ماشافتها دفنت راسها بحضني وتعيط وترفس.. شكيت بالسالفة..
محيي : وين چنتي منعولة الوالدين.. بتچ مچوية..
شهلاء : اي الحمدلله ع السلامة..
شامخ : انه مااريد تصير مشاكل.. بس هالشغلة ماينسكت عليها.. الوادم تربي جهالها بكلمة حرام وعيب وطگة صغيرة مو چوية.. انتي چويتيها واحنا غافلين عنج..

عيوني صارت بگصتي.. هي چاويتها گلبي حسسني.. خليت دنوة عد ابتسام وكمشتها من شالها جريتها سحل فوك.. عتت ايدي وكامت..
شهلاء : مااريدك لا انت ولا بنتك.. اكرهكم ثنينكم.. اي اني چويتها حميت الخاشوگة ولزگتها عليها حتى تكرهني.. دمرتني انت الله لينطيك وتضل طول عمرك مهموم والدنيا كلها واگعة على چتافك ولا تشوف الراحة كول امين يارب..

هي كالت هيج وانه تسودنت.. ضربتها ماخليت على حالها حال.. كل قهرة مقهورها طلعتها بيها وهي عادي لابچت ولا صيحت.. نزلت يمها كمشتها من شعر راسها صار كله بيدي : ترحين فدوه للگح... ع الاقل معروف معدنها.. بت النواقيص.. امشي لبيت اهلج عساچ لا رادة مشعولة الدفة..
دفرتها بخاصرتها وگومتها.. شمرت هدومها وراها وطلعت چنها مگدية.. ابوها مااجه ولا اخوها.. كلشي ماوصلني منهم ولا انه وصلتلهم..

دنوة تصيح وتستريح من الچوية.. اضل الليل كله گاعد وياها مااعرف للجهال وخصوصا هي بنية شگدر اسوي.. بس اخليلها من المرهم واتاني ينطي مفعوله بعدين تهدأ وتنام..

وراها بفترة رجعت من الكلية لكيت سيارتين واگفات بالباب.. طبيت ابوها وخوانها ثنين جايين وجايبيها.. لوما عيب چا رديت كتلتها جدامهم..طاحوا علي طيحة بس رجعها.. انه ماشايف وحدة زعلانة اهلها يرجعونها.. كل هذا ماهامني.. الهمني بس لمن چانت تنفخ بأبوها وابوي وابوي بعدين هو جابها واجاني على عمى عيونه..
ابو شهلاء : ابوية هاي مرتك وهاي بنتك.. لتخرب عائلتك من مشكلة تصير بأرقى العوائل..
محيي : اسألك وجاوبني بضميرك.. ترضا مرتك تچوي شهلاء لو اختها.. اذا ترضاها انه ارجعها والبيت بيتها..
ابو شهلاء : لا ماارضا بس اعلمها متسوي هيج..
محيي : هي موصغيرة ماشاءالله عقلها يوزن بلد وتجيب التايهة بس علمها تلطف بالطفلة هي بتها گبل لاتكون بنتي وتعبت بيها اكثر مني.. وتصيرلها اخلاق لمن تحاچيني .. اكبر منها بـ١٧ سنة وتجاوز علي عيني عينك.. والله وحگ ربك لوما انت جايني فلا اردها وخلها عدك هي تريدك بعد شكو.. ثابرتني ابوي وابوي.. عمي انه مگصر وياج بشي.. مااحب أعير وهي مرتي وأم بنتي بس شتريد اجيبلها.. الوادم ميتة جوع وهي تتنعوص على راسي بس ميخالف اجيب واخلي بحضنها.. اكل وهدوم وغيرها.. حتى الروحة لبيتكم گتلها الج مطلق الحرية ترحين وترجعين چي تضوج من البيت.. بعد اكثر من هيج شسويلها..

انهديت علي مانطيته مجال.. فشل من بنته.. رديتها بس ساقطة كل حقوقي تجاهها.. مجرد باقية علمود لانطلك وعلمود دنوة..

مرت فترة گصيرة وانحلت مشكلة رائد وراح.. ماانكر وجوده چان شي هامشي بيناتنا بحيث ماحسينا بي.. ياكل ويغسل هدومه ومواعينه مايخلي احد يجوسهن.. بس يحب دنوة هي همات تتوددله وتجيبله ماي لمن يرجع من المعهد.. رغم صغيرة بس دورات اتعجب بتصرفاتها..

وراها صار الحدث اليعتبر من ضمن الأحداث التاريخية بالعراق.. علنوا وقف اطلاق النار.. اكبر فرحة فرحتها والدنيا ماوسعتني.. ولو مالبست عسكرية بس قلق دائما على كاظم وعلى هواي ولد صحباني.. الوادم من فرحتها بالشارع ياهو اليشوفونه يمشي يرشونه بماي كرمز لفرحتهم.. بقيت بالشارع هواي لحد الليل ورجعت مرتاح نفسيا.. بس دخلت للبيت شفت شهلاء تكتل بدنوة.. ادور هي مريضة ..شلتها منها ودفرتها طاحت بالگع..
محيي : اذا تجوسيها انعل سلفة سلفاتج..
بعد مااكتلها مليت منها.. شكد اكتل مايفيد.. احچي عيني واغاتي هم مايفيد.. انسانة تحب الإهاين.. شبگتها وصعدت فوك سويتلها كمادات وانطيتها خافض حرارة نزلت حرارتها يله غفيت..

بمرور الأيام بدت تتعود علي اكثر.. اجي للبيت تتلگاني قليل تروح لأمها.. اكعدها يمي اوكلها تنام بحضني.. شهلاء تنام بالگع .. هيج علاقتنا انحدرت بس ابوها مايقبل اطلگها وانه همات اريدها يم بتي.. تبقى امها مهما كان..

بيوم گاعدين بالبيت كلنا ملتمين اجه ابوي..
شامخ : بوية همونا نرد للديرة.. شعدنا هنا..
محيي : ليش بوية مو مستقرين..
شامخ : ديرتي وناسي وكل معارفي هناك.. شون اتركنهم.. والوضع استقر الحمدلله انه خفت عليكم واجيت هنايه..
لواء : براحتك يابة.. دزيت أحد يشوف الوضع..
شامخ : دزيت وكلشي ماشي حسب الأصول..
كاظم : يله چا هاهيه بعد.. شوكت تحب نطلع..
شامخ : ان شاء الله فد يومين من الصبح مغبش بين مانوصل هم يالله..
اتفقنا على يوم نرجع بي.. لمينا الغراض والهدوم وطلعنا للبصرة.. شبه منتهية والجو تراب ومغبر..

رحنا انه وابوي وكاظم نشوف الحلال.. الزرع تالف والجهة الگريبة من الشط مأكولة من الأسلحة والألغام.. اكو جزء من الدوانم مسيجي كاتبين منطقة ملغومة.. رجعنا بعد ماتقدمنا.. ابوي واصل وكلش همات.. من صحبانه ومعارفه والدولة هماتين نشرت فريق مهندسين يشيلون الألغام .. مع ذلك المنطقة البعيدة ماتگربنالها انتركت وانترك وراها بعد خمس دوانم كإجراء احترازي..

رجعت اداوم ببغداد وابات بالشقة.. انسحبت من اتحاد الكلية وصرت حالي من حال الطلاب.. تلث سنين باقيلي واتخرج .. گمت احس بالملل واصفن وي روحي.. اربعين سنة بدون علاقة دايمة ومستقيمة.. أي بت تفوت من يمي اهجسها حتغلط مثل غلطة هدى وتكره بتها مثل شهلاء.. حاولت اصحح علاقتي بيها بس مافاد.. رجعت اشرب بس بالشقة وي واحد صاحبي .. فديوم انه وياه گاعدين وحاط الشرب اندكت الباب .. عاينتله مستغرب..
محيي : گوم شوف منو..
أنور : لاتخاف.. وحدة ..
راح فتح الباب دخلت وحدة آية جمالية.. شگرة وعيونها زرگ گزاز عبالك.. مكحلة والرموش طوال.. ضليت فاك حلگي.. ذبت العباية لابسة فستان گصير لطش ع الجسم.. منو يأجر هالفساتين.. غاليات بالنسبة لهواي طبقات بالمجتمع..
محيي : مني انتي بوية شجابج..
أنور : خوية انت مهموم.. شوفها چنها جمارة تفيدك..

محيي : تعال حطلي گرون فدمرة.. روحي شوفي دربج لاتجين بعدج..
تعاركت وياهم ثنينهم وطردتهم.. ولو شارب بس لمن افكر هاي چم واحد متگربلها تكش روحي..

مرت أيام وحسيت محتاج اتزوج.. لازم.. اشوف خواني ولدهم بطولهم وانه بتي يالله تلث سنين ونص.. حاچيت كاظم.. هو ازوج على مرته وانه وابوي رحنا وياه لمن خطبها..
كاظم : اي اروح وياك.. بس منو تريد..
صفنت واجت ببالي : بت معميلي.. بته واعية ومطلگة.. تدري ماكو بت تطلك لازم يزوجونها..
كاظم : شكد عمرها هاي..
محيي : ستة وعشرين..من بغداد..
كاظم : هاهيه چم يوم واروحن وياك..

اخذته اله وابنه عقيل وصحباني ثنين ورحت خطبتها.. ابوها رأسا انطاها..كال مايحتاج نسأل عنكم نعرفكم وتعرفونا.. انه ماشايفها الصراحة بس اسمع بيها.. بيوم العقد شفتها وعرفت اسمها.. شذى.. حلوة بت عادية.. عقدت عليها وخصصتلها مهر زين.. أجرت بيت وأثثته كاظم ساعدني وصارت..

دارتني وحبابة ارتاحيت وياها.. البصرة شبه هجرتها.. اكثر الوكت ببغداد بحجة الكلية والشغل.. رجعت بيوم من الدوام العصر.. وانه دااتمشى للبيت اسمع صوت صياح نسوان من بيتي ......

يتبــــــــــــــــــــع..................